កម្មវិធីសម្រាប់សន្និបាតពិសេស
ប្រធាននៃកម្មវិធីសម្រាប់សន្និបាតពិសេសឆ្នាំកិច្ចបម្រើ២០០៩គឺ «‹ចូរប្រយ័ត . . . ដើម្បីឲ្យបានបំពេញ[កិច្ចបម្រើ]› » មានមូលដ្ឋានពីកូល៉ុស ៤:១៧។ ជាគ្រិស្តសាសនិកយើងគួរធ្វើតាមការដាស់តឿននេះយ៉ាងម៉ឺងម៉ាត់។ សេចក្ដីប្រាថ្នារបស់យើងគឺ ដើម្បីបំពេញកិច្ចបម្រើរបស់យើងឲ្យបានពេញលេញដូចជាលោកយេស៊ូបានធ្វើ។ (យ៉ូន. ១៧:៤) សាវ័កប៉ុលបានទុកគំរូដ៏ល្អប្រសើរសម្រាប់យើង ស្តីអំពីការបំពេញកិច្ចការនេះ។ គាត់បានតាំងចិត្តដើម្បីបង្ហើយកិច្ចការរបស់ខ្លួន។—កិច្ច. ២០:២៤
សុន្ទរកថារបស់អ្នកត្រួតពិនិត្យមណ្ឌលនឹងបង្ហាញពីរបៀបដែលអ្នកផ្សាយម្នាក់ៗ អាចពុះពារយកឈ្នះនឹងការលំបាកក្នុងកិច្ចបម្រើផ្សាយរបស់ខ្លួន។ បន្ទាប់មកសុន្ទរកថាដែលមានប្រធានថា «ចូរយកចិត្តទុកដាក់នឹងអ្វីដែលអ្នកដាំ» នឹងបង្ហាញនូវចំណុចសំខាន់ៗពីរបៀបដែលយើងអាចផ្ដល់ជាជំនួយដល់អស់អ្នកដែល«ត្រូវបានជីវិតអស់កល្បជានិច្ច»។ (កិច្ច. ១៣:៤៨) សុន្ទរកថាទីមួយដែលត្រូវថ្លែងដោយភ្ញៀវមានប្រធានថា «របៀបដែលយើងតាំងគំរូក្នុងកិច្ចបម្រើព្រះ» ដែលនឹងពិគ្រោះពីខនីមួយៗនៅបទគម្ពីរ កូរិនថូសទី២ ៦:១-១០។ នៅពេលរសៀលបងប្រុសជាភ្ញៀវនឹងថ្លែងសុន្ទរកថាដែលមានប្រធានបទ «កិច្ចការផ្សព្វផ្សាយរបស់អ្នកជាឯកសិទ្ធិសំខាន់ណាស់»។ បងប្អូននឹងបានទទួលការលើកទឹកចិត្តពីផ្នែកដែលមានចំណងជើងថា «ក្មេងៗ និងវ័យចំណាស់ រីករាយធ្វើកិច្ចការផ្សព្វផ្សាយ» ហើយនិងផ្នែក «ប្អូនៗយុវវ័យដែលបំពេញកិច្ចបម្រើផ្សាយ»។ អស់អ្នកដែលចង់ទទួលការជ្រមុជទឹកនៅសន្និបាតប្រចាំមណ្ឌល ឬក៏សន្និបាតពិសេសខាងមុខនេះ គួរទៅរកជួបប្រធានត្រួតពិនិត្យឲ្យបានឆាប់បំផុតបើអាចធ្វើទៅបាន។ ការពិចារណាអត្ថបទទស្សនាវដ្ដីប៉មយាមជាផ្នែកមួយដ៏សំខាន់នៃសន្និបាត និងមហាសន្និបាតរបស់យើង។ សូមបងប្អូនយកទស្សនាវដ្ដីរបស់ខ្លួនមក នៅសប្ដាហ៍ដែលមានសន្និបាតពិសេស។
ការប្រុងប្រយ័ត្ននឹងបំពេញកិច្ចការផ្សព្វផ្សាយ តម្រូវឲ្យយើងមានការព្យាយាម ដោយមិនអនុញ្ញាតឲ្យអ្វីណាមកបំបែរអារម្មណ៍យើងចេញពីកិច្ចការដែលព្រះយេហូវ៉ាប្រគល់ឲ្យយើងទេ។ បទគម្ពីរដែលបានផ្ដល់ឲ្យយើងនូវការលើកទឹកចិត្តតាមរយៈកម្មវិធីសន្និបាតពិសេសនេះ គួរជួយយើងទាំងអស់គ្នាឲ្យយល់ពីអ្វីដែលយើងត្រូវធ្វើ ដើម្បីរក្សាឲ្យមានទស្សនៈត្រឹមត្រូវចំពោះកិច្ចការដ៏សំខាន់ និងពិចារណាអំពីខ្លួននូវអ្វីដែលយើងគួរធ្វើ ក្នុងការបំពេញកិច្ចបម្រើផ្សាយយ៉ាងពេញលេញ។