ការរៀបចំថ្មីសម្រាប់កិច្ចប្រជុំក្រុមជំនុំ
១ សេចក្ដីប្រកាសជូនដំណឹងដែលគួរឲ្យរំភើបចិត្តមួយនៅសប្ដាហ៍ថ្ងៃទី២១ដល់ថ្ងៃទី២៧ ខែមេសា ឆ្នាំ២០០៨ ត្រូវបានបងប្អូននៅទូទាំងពិភពលោកដឹងឮ។ «ចាប់ផ្ដើមពីថ្ងៃទី១ ខែមករា ឆ្នាំ២០០៩ ការសិក្សាសៀវភៅតាមក្រុមជំនុំនឹងលើកមកប្រជុំនៅថ្ងៃជាមួយប្រជុំសាលាកិច្ចបម្រើផ្សាយ ហើយប្រជុំអប់រំកិច្ចបម្រើវិញ។ ឈ្មោះនៃការសិក្សាសៀវភៅតាមក្រុមជំនុំនឹងប្ដូរទៅហៅការសិក្សាគម្ពីរជាក្រុមជំនុំវិញ»។
២ កម្មវិធីប្រជុំរាល់សប្ដាហ៍ : រយៈពេលនៃការប្រជុំនេះរួមបញ្ចូលទាំងការច្រៀងចម្រៀងនិងសេចក្ដីអធិដ្ឋានគឺ ១ម៉ោង៤៥នាទី។ ប្រជុំចាប់ផ្ដើមឡើងដោយការច្រៀងចម្រៀង និងសេចក្ដីអធិដ្ឋាន (៥នាទី) ការសិក្សាគម្ពីរជាក្រុមជំនុំ (២៥នាទី) បន្ទាប់មកទៀតមានប្រជុំសាលាកិច្ចបម្រើផ្សាយ (៣០នាទី)។ ក្រោយពីនោះមានច្រៀងចម្រៀង (៥នាទី)ក្រោយច្រៀងចម្រៀងមានប្រជុំអប់រំកិច្ចបម្រើ (៣៥នាទី)។ បញ្ចប់កិច្ចប្រជុំដោយច្រៀងចម្រៀងនិងសេចក្ដីអធិដ្ឋាន (៥នាទី)។ ដើម្បីអាចជួយអ្នកឲ្យរៀបចំការប្រជុំសិក្សាគម្ពីរជាក្រុមជំនុំ ប្រជុំសាលាកិច្ចបម្រើផ្សាយ និងប្រជុំអប់រំកិច្ចបម្រើបាន យើងមានកាលវិភាគសម្រាប់ប្រជុំទាំងនេះជារៀងរាល់ខែនៅកិច្ចបម្រើព្រះ។
៣ ការសិក្សាគម្ពីរជាក្រុមជំនុំ : ការប្រជុំនេះនឹងមានរបៀបដឹកនាំដូចដឹកនាំការសិក្សាទស្សនាវដ្ដីប៉មយាមដែរ។ ពេលចាប់ផ្ដើមមិនចាំបាច់ឲ្យរំលឹកឡើងវិញពីសប្ដាហ៍មុនឡើយ។ ផ្ទុយទៅវិញអ្នកដឹកនាំអាចលើកឡើងពីចំណុចត្រួសៗនៃមេរៀនដែលនឹងត្រូវសិក្សា។ ការធ្វើដូច្នេះ អនុញ្ញាតឲ្យមានពេលគ្រប់គ្រាន់ដើម្បីឲ្យទាំងអស់គ្នាអាចផ្ដល់ចម្លើយខ្លីៗ។ ប្រធានត្រួតពិនិត្យនឹងរៀបចំឲ្យមានអ្នកចាស់ទុំដែលជាអ្នកដឹកនាំ ឆ្លាស់គ្នារាល់សប្ដាហ៍ម្ដង។
៤ ការប្រជុំអប់រំកិច្ចបម្រើ : ការប្រជុំអប់រំកិច្ចបម្រើធ្វើឡើងដូចពីមុន ប៉ុន្តែខ្លីជាងបន្ដិច។ សេចក្ដីជូនដំណឹងធម្មតាមានតែប្រាំនាទីប៉ុណ្ណោះ។ នេះគួរល្មមគ្រប់គ្រាន់ដើម្បីអានសំបុត្រខ្លះៗ និងជូនដំណឹងអ្វីដែលសំខាន់ៗដែលមកពីការិយាល័យសាខា។ សេចក្ដីជូនដំណឹងដូចជាអំពីកិច្ចបម្រើផ្សាយ ការបោសសំអាត សេចក្ដីរាយការណ៍ពីគណនី និងសំបុត្រដែលមានជាប្រចាំពីការិយាល័យសាខានឹងមិនចាំបាច់អានទេ ប៉ុន្តែនឹងមានបិទនៅលើក្ដារខៀនព័ត៌មានសម្រាប់បងប្អូនអាន។ បងប្រុសដែលដឹកនាំផ្នែកប្រជុំអប់រំកិច្ចបម្រើ គួររៀបចំឲ្យបានល្អ។ គាត់គួរធ្វើតាមការណែនាំដែលបានផ្ដល់ឲ្យ និងតាមពេលកំណត់។
៥ ទស្សនកិច្ចអ្នកត្រួតពិនិត្យមណ្ឌល : កម្មវិធីរបស់អ្នកត្រួតពិនិត្យមណ្ឌលនឹងមិនកែប្រែទេ។ សាលាកិច្ចបម្រើផ្សាយ ហើយការប្រជុំអប់រំកិច្ចបម្រើនឹងមាននៅថ្ងៃអង្គារ ព្រមទាំងមានការច្រៀងចម្រៀងដែរ។ បន្ទាប់មកអ្នកត្រួតពិនិត្យមណ្ឌលនឹងថ្លែងសុន្ទរកថាអស់រយៈ៣០នាទី។ ដូចយើងកំពុងធ្វើនៅបច្ចុប្បន្ននេះ ធម្មតាក្នុងអំឡុងសប្ដាហ៍ដែលមានទស្សនកិច្ចរបស់អ្នកត្រួតពិនិត្យមណ្ឌលការសិក្សាគម្ពីរជាក្រុមជំនុំតែងប្ដូរទៅថ្ងៃផ្សេង ហើយបន្ទាប់ពីប្រជុំនោះមានការច្រៀងចម្រៀង និងសុន្ទរកថារបស់អ្នកត្រួតពិនិត្យមណ្ឌល។ ពេលបញ្ចប់កិច្ចប្រជុំមានច្រៀងចម្រៀងនិងសេចក្ដីអធិដ្ឋាន។
៦ ការប្រជុំសម្រាប់កិច្ចផ្សព្វផ្សាយ : បងប្រុសដែលជាអ្នកត្រួតពិនិត្យក្រុមត្រូវតែងតាំងដោយក្រុមអ្នកចាស់ទុំ ដើម្បីជួយមើលខុសត្រូវក្រុមផ្សព្វផ្សាយរបស់គាត់ ហើយថែរក្សានិងផ្ដល់កម្លាំងចិត្តសមាជិកម្នាក់ៗក្នុងក្រុមនោះ។ អ្នកងារជំនួយដែលតាំងឲ្យជំនួសកិច្ចការរបស់គាត់ក៏ត្រូវហៅថា «ជំនួយការក្រុម»។
៧ ដូចយើងបានឃើញច្បាស់ស្តីពីការរៀបចំថ្មីសម្រាប់កិច្ចប្រជុំក្រុមជំនុំ គឺដើម្បីផ្ដល់ឱកាសឲ្យយើងអាចពិចារណាពីការបង្ហាត់បង្រៀន និងពីព័ត៌មានដែលនឹងលើកទឹកចិត្តយើងឲ្យមានចំណងមិត្តភាពរឹងមាំជាមួយព្រះយេហូវ៉ា។ នេះផ្ដល់ឲ្យយើងមានសមត្ថភាពជាអ្នកផ្សព្វផ្សាយនិងជាអ្នកបង្រៀនដែលអាចបង្កើតផលក្នុងកិច្ចបម្រើផ្សាយ។—អេភ. ៤:១៣, ១៤; ២ធី. ៣:១៧
៨ ការរៀបចំជាមុនសម្រាប់ប្រជុំទាំងនេះ នឹងជួយយើងឲ្យផ្ចង់អារម្មណ៍ទៅលើចំណុចដែលសំខាន់ក្នុងអំឡុងពេលប្រជុំ។ យើងទាំងអស់គ្នាមានឱកាសអាចលើកដៃឆ្លើយ ដើម្បីផ្ដល់ការកម្សាន្តឬលើកទឹកចិត្តគ្នាទៅវិញទៅមក។ (រ៉ូម ១:១១, ១២; ហេ. ១០:២៤) យើងគួរមានគោលដៅបង្ហាញ‹សេចក្ដីជំនឿនរបស់ខ្លួន› ដោយ«កាត់ស្រាយព្រះបន្ទូលនៃសេចក្ដីពិតយ៉ាងត្រឹមត្រូវ»។—១ធី. ៤:១៥; ២ធី. ២:១៥
៩ យើងមានចិត្តរីករាយណាស់ នឹងការផ្លាស់ប្ដូរថ្មីនេះ ស្តីពីកិច្ចប្រជុំក្រុមជំនុំរបស់យើង។ សូមឲ្យយើងទាំងអស់គ្នាព្យាយាមប្រឹងប្រែងឲ្យបានទទួលប្រយោជន៍ ពីការណែនាំដែល«អ្នកបំរើស្មោះត្រង់»ផ្ដល់ឲ្យ ដើម្បីជួយយើងឲ្យនៅជិតស្និទ្ធនឹងគង្វាលដ៏ឧត្តមរបស់យើង ដែលនឹងជួយយើងឲ្យត្រៀមខ្លួនសម្រាប់«សេចក្ដីវេទនាជាខ្លាំង»ដែលជិតមកដល់ហើយនោះ។—ម៉ាថ. ២៤:២១, ៤៥; ហេ. ១៣:២០, ២១; វិវរ. ៧:១៤
[សំណួរសម្រាប់អត្ថបទសិក្សា]
១, ២. តើនឹងមានការផ្លាស់ប្ដូរអ្វីដែលនឹងកើតឡើងនៅដើមខែមករា ឆ្នាំ២០០៩?
៣. តើការសិក្សាគម្ពីរជាក្រុមជំនុំនឹងត្រូវដឹកនាំឡើងយ៉ាងដូចម្ដេច?
៤. តើការប្រជុំអប់រំកិច្ចបម្រើនឹងមានការផ្លាស់ប្ដូរយ៉ាងណា?
៥. តើកិច្ចប្រជុំនឹងប្រព្រឹត្តឡើងយ៉ាងដូចម្ដេច ក្នុងអំឡុងសប្ដាហ៍ដែលមានទស្សនកិច្ចរបស់អ្នកត្រួតពិនិត្យមណ្ឌល?
៦. តើអ្នកត្រួតពិនិត្យក្រុមមានភារកិច្ចអ្វី?
៧. តើយើងអាចទទួលប្រយោជន៍យ៉ាងណាស្តីពីការរៀបចំថ្មីសម្រាប់កិច្ចប្រជុំក្រុមជំនុំយើង?
៨. តើយ៉ាងដូចម្ដេចដែលការរៀបចំជាមុនសម្រាប់ប្រជុំ ជួយយើងនិងអ្នកឯទៀតឲ្យទទួលប្រយោជន៍?
៩. តើអ្វីជាការតាំងចិត្តរបស់យើង? ហើយហេតុអ្វី?