ប្រអប់សំណួរ
◼ តើសមរម្យទេដែលក្រុមជំនុំឬបុគ្គលផ្សេងៗ ប្រើសញ្ញាតំណាងនៃសាជីវកម្មរបស់សាក្សីព្រះយេហូវ៉ា?
សាជីវកម្មផ្សេងៗតែងមានឡូហ្គោឬរូបសញ្ញាតំណាង ដើម្បីឲ្យស្រួលសម្គាល់។ សញ្ញាជាប៉មយាម គឺតំណាងសមាគមប៉មយាមខាងគម្ពីរនិងខិត្តប័ណ្ណនៃរដ្ឋប៉ិនស៊ីវ៉ានី និងសាជីវកម្មឯទៀតនៃអង្គការរបស់ព្រះ។ ក្រុមជំនុំនៃសាក្សីព្រះយេហូវ៉ាប្រើសញ្ញាដែលមានគម្ពីរបើកនៅលើក្បាលសំបុត្រ។ សាជីវកម្មឯទៀតដែលសាក្សីព្រះយេហូវ៉ាប្រើមានសញ្ញាតំណាងផ្សេងពីគ្នា។
ក្រុមជំនុំផ្សេងៗនិងបុគ្គលទាំងឡាយ មិនគួរប្រើសញ្ញាតំណាងឬឈ្មោះនៃសាជីវកម្មរបស់អង្គការព្រះ ឬសញ្ញាស្រដៀងនោះដាក់នៅតាមសាលប្រជុំ នៅលើស្លាកសម្គាល់សាលប្រជុំឬនៅលើក្បាលសំបុត្រ និងលើរបស់ផ្ទាល់ខ្លួនឡើយ។ ការប្រើសញ្ញាតំណាងរបស់អង្គការព្រះ អាចធ្វើឲ្យអាជ្ញាធរ អ្នកបោះពុម្ពផ្សាយ និងអ្នកឯទៀតច្រឡំអំពីទំនាក់ទំនងរវាងក្រុមជំនុំនិងសាជីវកម្មរបស់អង្គការព្រះ។ ដូចគ្នាដែរ សំបុត្រទាក់ទងដែលប្រើសញ្ញាតំណាងនោះនៅលើក្បាលសំបុត្រ អាចធ្វើឲ្យគេយល់ច្រឡំថាមានការអនុញ្ញាតឬបានផ្ញើពីមន្ទីរចាត់ការពិភពលោកឬពីការិយាល័យសាខា។
មិនគួរប្រើសញ្ញាតំណាងប៉មយាមឬសញ្ញាស្រដៀងនោះ ពេលមានសាងសង់សាលប្រជុំនៅថ្ងៃមុខ ទោះជាសាលប្រជុំនោះជារបស់សមាគមប៉មយាមក៏ដោយ។ ក្រុមជំនុំដែលមានសញ្ញាតំណាងនេះនៅសាលប្រជុំ មិនតម្រូវឲ្យផ្លាស់ប្ដូរសញ្ញានោះភ្លាមៗទេ ដ្បិតការផ្លាស់ប្ដូរនេះអាចតម្រូវឲ្យមានការផ្លាស់ប្ដូរធំដុំហើយត្រូវការពេល ការខំប្រឹង និងចំណាយច្រើន។ ប៉ុន្តែ បើការផ្លាស់ប្ដូរសញ្ញានោះ គឺជាកិច្ចការតូចតាច ហើយមិនតម្រូវការងារច្រើនទេ នោះគួរគិតផ្លាស់ប្ដូរចុះ។ បើមិនដូច្នេះទេ ពេលមានគម្រោងជួសជុលអគារឬស្លាកសញ្ញានៃសាលប្រជុំ ការផ្លាស់ប្ដូរអាចត្រូវធ្វើនៅពេលនោះ។