អ្វីដែលសំខាន់បំផុតក្នុងជីវិតយើង
១. តើលោកយេស៊ូបានបង្ហាញយ៉ាងដូចម្ដេចថា កិច្ចផ្សព្វផ្សាយជាការសំខាន់ចំពោះលោក?
១ ពេលដែលលោកយេស៊ូនៅផែនដី កិច្ចផ្សព្វផ្សាយជាអ្វីដែលសំខាន់បំផុតក្នុងជីវិតរបស់លោក។ លោកបានដើររាប់រយគីឡូម៉ែត្រពេញស្រុកប៉ាឡេស្ទីនដោយខំខ្នះខ្នែងផ្សព្វផ្សាយដល់មនុស្សឲ្យបានច្រើនបំផុត។ លោករក្សារបៀបរស់នៅឲ្យសាមញ្ញ ដើម្បីអាចផ្ចង់អារម្មណ៍ទៅលើកិច្ចផ្សព្វផ្សាយ។ (ម៉ាថ. ៨:២០) ពេលដែលបណ្ដាជនខំឃាត់លោកឲ្យនៅជាមួយនឹងពួកគេតទៅទៀត ដើម្បីធ្វើឲ្យមនុស្សជាសះស្បើយពីជំងឺ នោះលោកមានប្រសាសន៍ថា៖ «ខ្ញុំត្រូវប្រកាសដំណឹងល្អអំពីរាជាណាចក្ររបស់ព្រះនៅក្រុងផ្សេងទៀតដែរ ពីព្រោះនេះជាមូលហេតុដែលខ្ញុំបានត្រូវចាត់ឲ្យមក»។—លូក. ៤:៤៣
២. ហេតុអ្វីកិច្ចផ្សព្វផ្សាយជាកិច្ចការសំខាន់បំផុតចំពោះលោកយេស៊ូ?
២ ហេតុអ្វីកិច្ចផ្សព្វផ្សាយជាការសំខាន់ម្ល៉េះចំពោះលោកយេស៊ូ? ការធ្វើឲ្យនាមរបស់ព្រះបានបរិសុទ្ធ ជាអ្វីដែលលោកចាត់ទុកថាសំខាន់បំផុត។ (ម៉ាថ. ៦:៩) ដោយសារលោកស្រឡាញ់បិតានៅស្ថានសួគ៌ លោកចង់ធ្វើតាមបំណងប្រាថ្នារបស់បិតា និងស្ដាប់បង្គាប់បិតាទាំងស្រុង។ (យ៉ូន. ១៤:៣១) បន្ថែមទៅទៀត លោកបានយកចិត្តទុកដាក់ចំពោះមនុស្សយ៉ាងស្មោះ ហើយលោកចង់ជួយពួកគេ។—ម៉ាថ. ៩:៣៦, ៣៧
៣. តើយើងអាចបង្ហាញយ៉ាងដូចម្ដេចថាកិច្ចផ្សព្វផ្សាយជាអ្វីដ៏សំខាន់បំផុតចំពោះយើង?
៣ ធ្វើតាមគំរូរបស់លោកយេស៊ូ: ការចាត់ទុកកិច្ចបម្រើជាអ្វីសំខាន់បំផុតក្នុងជីវិតដូចលោកយេស៊ូ អាចជាការពិបាកណាស់ ពីព្រោះជីវិតក្នុងពិភពលោកនេះតម្រូវឲ្យយើងចំណាយពេលច្រើន ហើយក៏ពេញទៅដោយអ្វីផ្សេងៗដែលអាចបំបែរអារម្មណ៍យើង។ (ម៉ាថ. ២៤:៣៧-៣៩; លូក. ២១:៣៤) ដោយយល់ដូច្នេះ យើងត្រូវតែពិចារណាឲ្យប្រាកដថាការអ្វីដែលពិតជាសំខាន់ជាង ដោយលៃទុកពេលសម្រាប់រៀបចំហើយចូលរួមក្នុងកិច្ចផ្សព្វផ្សាយជាទៀងទាត់។ (ភី. ១:១០) យើងត្រូវខំប្រឹងព្យាយាមធ្វើឲ្យជីវិតសាមញ្ញ ហើយមិនប្រើប្រាស់ពិភពលោកពេញលេញនោះទេ។—១កូ. ៧:៣១
៤. ហេតុអ្វីចាំបាច់ឲ្យយើងផ្ចង់អារម្មណ៍ទៅលើអ្វីដែលសំខាន់បំផុតនៅឥឡូវនេះ?
៤ ពេលដែលពេលវេលាកាន់តែចង្អៀត មនុស្សដែលមានប្រាជ្ញាធ្វើអ្វីៗដែលសំខាន់ជាងជាមុនសិន។ ជាឧទាហរណ៍ បើអ្នកបានដឹងថាមានខ្យល់ព្យុះដ៏ធំមួយកំពុងធ្វើដំណើរមកកន្លែងដែលអ្នករស់នៅ អ្នកនឹងប្រើពេលវេលានិងកម្លាំងក្នុងការជួយក្រុមគ្រួសារឲ្យមានសុវត្ថិភាព ថែមទាំងក្នុងការព្រមានអ្នកជិតខាងដែរ។ កិច្ចការណាដែលមិនសូវសំខាន់ អ្នកនឹងទុកមួយឡែកសិន។ ស្រដៀងគ្នាដែរ ពេលនៅសល់មុនសង្គ្រាមហាម៉ាគេដូនគឺខ្លីណាស់ហើយ។ (សេផ. ១:១៤-១៦; ១កូ. ៧:២៩) ដើម្បីសង្គ្រោះខ្លួនព្រមទាំងអ្នកដែលស្ដាប់យើង យើងត្រូវប្រុងប្រយ័ត្នជានិច្ចនឹងខ្លួនយើង និងសេចក្ដីបង្រៀនរបស់យើង មិនថាក្នុងក្រុមជំនុំឬនៅក្រៅក្រុមជំនុំក្ដី។ (១ធី. ៤:១៦) ដូច្នេះ ដើម្បីរួចជីវិត យើងត្រូវចាត់ទុកកិច្ចផ្សព្វផ្សាយជាអ្វីដ៏សំខាន់បំផុតជានិច្ច!