ការណែនាំសម្រាប់អ្នកដែលមានចំណែកក្នុងប្រជុំអប់រំកិច្ចបម្រើ
ក្នុងកិច្ចបម្រើព្រះចាប់ពីខែនេះទៅ ពាក្យដែលត្រូវប្រើដើម្បីកំណត់ផ្នែកនីមួយៗនៃកម្មវិធីប្រជុំអប់រំកិច្ចបម្រើនឹងត្រូវកែសម្រួល។ ការណែនាំដែលមានក្នុងអត្ថបទកិច្ចបម្រើព្រះខែឧសភា ឆ្នាំ២០០៩ ប្រធានថា«តើយើងគួររៀបចំសម្រាប់ការប្រជុំអប់រំកិច្ចបម្រើតាមរបៀបណា?» នឹងត្រូវជំនួសដោយការណែនាំនិងការរំលឹកដែលមានជាបន្តបន្ទាប់នេះ:
◼ សុន្ទរកថា: នេះជាសុន្ទរកថាដែលមានមូលដ្ឋានទៅលើព័ត៌មានដែលបានត្រូវកំណត់ឲ្យ ហើយគ្មានការពិគ្រោះជាមួយនឹងអ្នកស្ដាប់ទេ។ អ្នកថ្លែងគួរផ្ចង់អារម្មណ៍ទៅលើអ្វីដែលអាចផ្ដល់ប្រយោជន៍ច្រើនបំផុតដល់ក្រុមជំនុំ។
◼ សំណួរនិងចម្លើយ: ផ្នែកនេះនឹងត្រូវដឹកនាំដូចការសិក្សាទស្សនាវដ្ដីប៉មយាម ដោយមានពាក្យផ្ដើមនិងពាក្យបញ្ចប់យ៉ាងខ្លី ហើយសំណួរនឹងត្រូវសួរនៅគ្រប់វគ្គ។ អ្នកដឹកនាំគួរជៀសវាងពីការនិយាយច្រើនពេក។ បើមានពេលគ្រប់គ្រាន់ ប្រហែលជាអាចអានបទគម្ពីរដែលសំខាន់ៗ។ មិនត្រូវអានវគ្គនីមួយៗទេ លើកលែងតែបានត្រូវណែនាំឲ្យអានវគ្គនោះ។
◼ ការពិគ្រោះ: នេះជាសុន្ទរកថាដែលរួមបញ្ចូលការពិគ្រោះខ្លះៗជាមួយនឹងអ្នកស្ដាប់។ មិនមែនជាការអធិប្បាយសុទ្ធនោះទេ ហើយក៏មិនមែនជាការសួរសំណួរនិងចម្លើយទាំងអស់ដែរ។
◼ បទសម្ភាសន៍និងការសម្ដែង: កាលណាមានផ្នែកដែលថាសូមធ្វើការសម្ដែង នោះមានន័យថាបងប្រុសដែលដឹកនាំផ្នែកនោះគួររៀបចំឲ្យមានការសម្ដែង។ គាត់មិនចាំបាច់ធ្វើការសម្ដែងដោយខ្លួនឯងទេ។ បងប្អូនដែលគាត់ជ្រើសរើសឲ្យធ្វើការសម្ដែងគួរមានសមត្ថភាពគ្រប់គ្រាន់និងជាគំរូល្អ ហើយបើអាចធ្វើបាន គាត់គួរធ្វើការរៀបចំជាមួយពួកគេឲ្យបានយូរទុកជាមុន។ ពេលជ្រើសរើសអ្នកផ្សាយដើម្បីធ្វើការសម្ដែងអំពីរបៀបផ្សព្វផ្សាយ ជាការល្អបំផុត បើមិនជ្រើសរើសអ្នកផ្សាយថ្មីដែលមិនមានបទពិសោធន៍ ក្នុងបំណងគ្រាន់តែផ្ដល់ឱកាសឲ្យគាត់ឡើងវេទិកាធ្វើការសម្ដែង។ ប៉ុន្តែពួកគេខ្លះអាចត្រូវជ្រើសរើសឲ្យធ្វើជាម្ចាស់ផ្ទះបាន។ អ្នកដែលធ្វើការសម្ដែងត្រូវបែរមុខទៅរកបងប្អូនដែលអង្គុយស្ដាប់។ បងប្អូនដែលត្រូវជ្រើសរើសសម្រាប់បទសម្ភាសន៍ ត្រូវឡើងលើវេទិការួចឆ្លើយសំណួរ ជាជាងឆ្លើយពីកន្លែងអង្គុយ។ ការសម្ដែងនិងបទសម្ភាសន៍គួរតែបានហាត់ទុកជាមុន។ បើកិច្ចប្រជុំហួសម៉ោង ហើយបងប្រុសដែលដឹកនាំត្រូវបង្រួមផ្នែកដែលគាត់ដឹកនាំ គាត់មិនគួរលុបចោលការសម្ដែងនិងបទសម្ភាសន៍ទេ។ ជំនួយការខាងកិច្ចបម្រើគួរទាក់ទងអ្នកចាត់ចែងកិច្ចការពួកអ្នកចាស់ទុំ ឬអ្នកចាស់ទុំម្នាក់ទៀតមុនគាត់ជ្រើសរើសអ្នកដែលត្រូវសម្ភាសឬធ្វើការសម្ដែង។
បើផ្នែកមួយមានការណែនាំពិសេស គួរធ្វើតាមដោយប្រុងប្រយ័ត្ន។ ដោយធ្វើតាមការណែនាំសម្រាប់ការប្រជុំអប់រំកិច្ចបម្រើនេះ បងប្អូននឹងជួយធ្វើឲ្យការប្រជុំអប់រំកិច្ចបម្រើ«ប្រព្រឹត្តទៅយ៉ាងត្រឹមត្រូវ និងដោយរបៀបរៀបរយ»។—១កូ. ១៤:៤០