ចូរប្រើខិត្តប័ណ្ណដឹងអំពីសេចក្ដីពិត
១. តើខិត្តប័ណ្ណដឹងអំពីសេចក្ដីពិត មានប្រយោជន៍សម្រាប់អ្វី?
១ ខិត្តប័ណ្ណតើអ្នកចង់ដឹងអំពីសេចក្ដីពិតទេ? ត្រូវបានរៀបចំឡើងដើម្បីជួយយើងឲ្យចាប់ផ្ដើមបង្រៀនគម្ពីរ។ ប៉ុន្តែខិត្តប័ណ្ណនេះក៏ជាឧបករណ៍ដ៏មានប្រសិទ្ធភាពមួយ ដែលយើងអាចប្រើដើម្បីសាបព្រោះគ្រាប់ពូជនៃសេចក្ដីពិតផងដែរ។ (សាស្ដ. ១១:៦) នេះជាយោបល់ខ្លះៗដែលអាចជួយយើងឲ្យចេះប្រើខិត្តប័ណ្ណនេះ។
២. តើយើងអាចប្រើខិត្តប័ណ្ណដើម្បីចាប់ផ្ដើមការសន្ទនាយ៉ាងដូចម្ដេច?
២ សម្រាប់ចាប់ផ្ដើមការសន្ទនា: អ្នកអាចជូនខិត្តប័ណ្ណនេះដល់ម្ចាស់ផ្ទះ ហើយចង្អុលទៅសំណួរទាំង៦នៅទំព័រទី១ រួចសួរថា «តើសំណួរមួយណាដែលលោកអ្នកធ្លាប់ឆ្ងល់?»។ បន្ទាប់ពីម្ចាស់ផ្ទះប្រាប់អំពីសំណួរមួយណារួចហើយ សូមពិចារណានូវចម្លើយដែលមានក្នុងខិត្តប័ណ្ណនោះ ហើយអានបទគម្ពីរមួយដែលមានក្នុងចម្លើយនោះ។ ចូរអានឬសង្ខេបទំព័រចុងក្រោយ រួចផ្ដល់សៀវភៅគម្ពីរបង្រៀន។ ប្រសិនបើគាត់មិនទទួលសៀវភៅទេ តែបានទទួលខិត្តប័ណ្ណ នោះក៏អាចជួយឲ្យសេចក្ដីពិតចាក់ឫសទៅក្នុងចិត្តរបស់គាត់ដែរ។—ម៉ាថ. ១៣:២៣
៣. ប្រសិនបើម្ចាស់ផ្ទះរវល់ តើយើងប្រហែលជាអាចធ្វើអ្វី?
៣ ប្រសិនបើម្ចាស់ផ្ទះរវល់: ប្រហែលជាអ្នកអាចនិយាយថា «ដោយសារលោកអ្នករវល់ ខ្ញុំសូមជូនខិត្តប័ណ្ណមួយទុកអាន។ នេះជាសំណួរសំខាន់៦យ៉ាងដែលយើងភាគច្រើនធ្លាប់ឆ្ងល់ ហើយសំណួរនីមួយៗមានចម្លើយយ៉ាងចំៗពីគម្ពីរ។ ពេលខ្ញុំមកជួបលោកអ្នកម្ដងទៀត សូមឲ្យខ្ញុំដឹងអំពីយោបល់របស់លោកអ្នកផង»។
៤. តើយើងអាចនិយាយយ៉ាងដូចម្ដេច ពេលផ្ដល់ខិត្តប័ណ្ណក្រៅផ្លូវការ?
៤ ពេលផ្សព្វផ្សាយក្រៅផ្លូវការ: អ្នកអាចនិយាយថា «ជម្រាបសួរ។ តើលោកអ្នកធ្លាប់សួរសំណួរណាមួយដូចនេះទេ? [ទុកឲ្យគេឆ្លើយ] ក្នុងនេះមានចម្លើយច្បាស់ៗដែលនាំឲ្យស្កប់ចិត្តពីក្នុងគម្ពីរ»។ ប្រសិនបើបុគ្គលនោះមិនប្រញាប់ទេ ប្រហែលជាអ្នកអាចពិគ្រោះជាមួយគាត់នូវចម្លើយមួយក្នុងខិត្តប័ណ្ណ ហើយប្រហែលជាអាចស្នើឲ្យគាត់សៀវភៅគម្ពីរបង្រៀនមួយក្បាល។
៥. ពេលផ្សព្វផ្សាយនៅផ្ទះដែលមនុស្សមិននៅ តើម្ដងម្កាលយើងអាចប្រើខិត្តប័ណ្ណនេះយ៉ាងដូចម្ដេច?
៥ ពេលគេមិននៅផ្ទះ: នៅតំបន់ផ្សាយខ្លះពេលមនុស្សមិននៅផ្ទះ ជួនកាលអ្នកផ្សាយទុកសៀវភៅយើងនៅផ្ទះនោះ ដោយមិនឲ្យអ្នកឯទៀតឃើញ។ ប្រសិនបើនេះជាទម្លាប់នៃក្រុមជំនុំរបស់អ្នកដែរ សូមទុកខិត្តប័ណ្ណដឹងអំពីសេចក្ដីពិតនៅផ្ទះគេម្ដងម្កាលដែរ។ ពេលត្រឡប់ទៅវិញអ្នកអាចនិយាយថា «ពេលដែលយើងមកទីនេះពីមុន លោកអ្នកមិនបាននៅផ្ទះទេ ដូច្នេះយើងបានទុកខិត្តប័ណ្ណនេះនៅទ្វាររបស់លោកអ្នក។ តើមានសំណួរណាមួយក្នុងខិត្តប័ណ្ណនេះដែលលោកអ្នកចង់ដឹងចម្លើយឬទេ?»។
៦. តើអ្វីធ្វើឲ្យខិត្តប័ណ្ណដឹងអំពីសេចក្ដីពិតមានប្រសិទ្ធភាពក្នុងការផ្សព្វផ្សាយ?
៦ ខិត្តប័ណ្ណដឹងអំពីសេចក្ដីពិតពន្យល់អំពីសេចក្ដីពិតតាមរបៀបដែលស្រួលយល់ ហើយក៏ទាក់ទាញចិត្តមនុស្សពីគ្រប់មជ្ឈដ្ឋាន មិនថាពួកគេកាន់សាសនាអ្វីក៏ដោយ។ ខិត្តប័ណ្ណនេះគឺស្រួលចែក។ សូម្បីតែអ្នកផ្សាយវ័យក្មេងនិងអ្នកផ្សាយថ្មីក៏អាចចែកបានដែរ។ តើអ្នកកំពុងប្រើខិត្តប័ណ្ណនេះនៅគ្រប់ឱកាសដែលសមគួរឬទេ?