ព្រះយេហូវ៉ាបង្ហាត់បង្រៀនយើងឲ្យធ្វើកិច្ចការដ៏សំខាន់
១. ពេលព្រះយេហូវ៉ាប្រគល់ភារកិច្ចណាមួយដល់មនុស្ស តើលោកក៏បានធ្វើអ្វីដែរ?
១ ពេលដែលព្រះយេហូវ៉ាប្រគល់ភារកិច្ចណាមួយដល់មនុស្ស លោកក៏ឲ្យពួកគេនូវជំនួយដែលពួកគេត្រូវការដើម្បីបំពេញភារកិច្ចនោះដែរ។ ជាឧទាហរណ៍ ពេលព្រះយេហូវ៉ាប្រាប់ណូអេឲ្យសង់ទូកធំមួយដែលជាកិច្ចការដែលគាត់មិនធ្លាប់ធ្វើពីមុន លោកក៏បានប្រាប់គាត់អំពីរបៀបធ្វើទូកនោះដែរ។ (លោ. ៦:១៤-១៦) ពេលដែលម៉ូសេជាគង្វាលដែលមានចិត្តរាបទាបបានទទួលភារកិច្ចទៅជួបពួកបុរសចាស់ទុំជាជនជាតិអ៊ីស្រាអែលនិងផារ៉ូ ព្រះយេហូវ៉ាបានពង្រឹងទំនុកចិត្តគាត់ថា៖ «អញនឹងនៅជាមួយនឹងមាត់ឯង ព្រមទាំងបង្រៀនសេចក្ដីដែលឯងត្រូវនិយាយផង»។ (និក្ខ. ៤:១២) ពេលដែលព្រះយេហូវ៉ាប្រគល់ភារកិច្ចឲ្យយើងផ្សព្វផ្សាយដំណឹងល្អ នោះលោកក៏បានឲ្យការណែនាំអំពីរបៀបដែលយើងបំពេញភារកិច្ចនោះដែរ។ លោកកំពុងបង្ហាត់បង្រៀនយើងឲ្យធ្វើកិច្ចការនេះតាមរយ:សាលាកិច្ចបម្រើផ្សាយនិងការប្រជុំអប់រំកិច្ចបម្រើ។ តើតាមរបៀបណាដែលយើងអាចទទួលប្រយោជន៍ពីការបង្ហាត់បង្រៀននេះ?
២. តើយើងអាចទទួលប្រយោជន៍ពីសាលាកិច្ចបម្រើផ្សាយយ៉ាងដូចម្ដេច?
២ សាលាកិច្ចបម្រើផ្សាយ: សូមអាន ហើយសិក្សាព័ត៌មាននៅក្នុងកម្មវិធីសាលានោះមុននឹងទៅប្រជុំម្ដងៗ។ ដូច្នេះ កាលដែលអ្នកឃើញរបៀបដែលសិស្សប្រើព័ត៌មាននេះក្នុងសុន្ទរកថារបស់ពួកគេ នោះការយល់ដឹងរបស់អ្នកអំពីរបៀបបង្រៀននឹងកាន់តែស្រួចស្រាល់។ (សុភ. ២៧:១៧) សូមយកកូនសៀវភៅវិធីបង្កើនសមត្ថភាពមកកិច្ចប្រជុំ ហើយប្រើវាជាសៀវភៅលំហាត់។ ពេលដែលអ្នកត្រួតពិនិត្យសាលានិយាយអំពីកូនសៀវភៅនោះបន្ទាប់ពីសុន្ទរកថារបស់សិស្សនីមួយៗ សូមគូសបន្ទាត់លើចំណុចសំខាន់ៗដែលអ្នកចង់យកមកប្រើ ហើយប្រើរឹមទំព័រដើម្បីកត់កំណត់។ ទោះជាយ៉ាងនេះក្ដី ការចុះឈ្មោះចូលសាលានេះ គឺជាវិធីដ៏ល្អបំផុតដើម្បីទទួលប្រយោជន៍។ តើអ្នកបានចុះឈ្មោះសាលាហើយឬនៅ? ពេលដែលអ្នកមានសុន្ទរកថា សូមរៀបចំឲ្យបានល្អ ហើយធ្វើតាមយោបល់ដែលអ្នកបានទទួល។ ពេលអ្នកផ្សព្វផ្សាយ សូមអនុវត្តអ្វីដែលអ្នកបានរៀន។
៣. តើអ្វីដែលជួយយើងឲ្យទទួលប្រយោជន៍ពីការប្រជុំអប់រំកិច្ចបម្រើ?
៣ ការប្រជុំអប់រំកិច្ចបម្រើ: យើងអាចចាំបានល្អជាងនូវយោបល់ដែលត្រូវបានផ្ដល់ក្នុងកិច្ចប្រជុំនេះ ដោយអានព័ត៌មានទុកជាមុន និងដោយរៀបចំចម្លើយ។ បើយើងឆ្លើយយ៉ាងខ្លីៗ នោះអាចឲ្យបងប្អូនកាន់តែច្រើនចូលរួមឆ្លើយផងដែរ។ សូមប្រុងស្ដាប់ការសម្ដែង ហើយប្រើយោបល់ដែលអ្នកគិតថានឹងធ្វើឲ្យកិច្ចបម្រើផ្សាយរបស់អ្នកមានប្រសិទ្ធភាពជាង។ ពេលមានអត្ថបទក្នុងកិច្ចបម្រើព្រះដែលអាចជួយអ្នកក្នុងកិច្ចបម្រើផ្សាយ សូមរក្សាទុកអត្ថបទទាំងនោះសម្រាប់ប្រើនៅពេលក្រោយ។
៤. ហេតុអ្វីយើងគួរប្រើការបង្ហាត់បង្រៀនពីព្រះឲ្យបានប្រយោជន៍ច្រើនបំផុត?
៤ ដូចភារកិច្ចដែលព្រះផ្ដល់ឲ្យណូអេនិងម៉ូសេដែរ នោះភារកិច្ចរបស់យើងដែលត្រូវផ្សព្វផ្សាយដំណឹងល្អគ្រប់ទីអាស្រ័យនៅផែនដី គឺពិបាក។ (ម៉ាថ. ២៤:១៤) ប៉ុន្តែ យើងអាចទទួលបានជោគជ័យ បើយើងទុកចិត្តទៅលើព្រះយេហូវ៉ា ដែលជា«គ្រូដ៏ឧត្តម»របស់យើង ហើយប្រើអ្វីដែលលោកបានបង្ហាត់បង្រៀនយើង ដើម្បីឲ្យបានប្រយោជន៍ច្រើនបំផុត។—អេ. ៣០:២០, ព.ថ.