កុំស្ទាក់ស្ទើរក្នុងការផ្សព្វផ្សាយ
១. តើអ្វីតម្រូវឲ្យមានចិត្តក្លាហាន? ហើយហេតុអ្វី?
១ តើអ្នកធ្លាប់ស្ទាក់ស្ទើរក្នុងការផ្សព្វផ្សាយនៅសាលារៀនដោយសារខ្លាចគេសើចចំអកឲ្យអ្នកឬទេ? ដើម្បីផ្សព្វផ្សាយអ្នកពិតជាត្រូវមានចិត្តក្លាហាន ជាពិសេសបើអ្នកមានការអៀនខ្មាស។ តើអ្វីនឹងជួយអ្នក?
២. ហេតុអ្វីអ្នកត្រូវចេះពិចារណាពេលផ្សព្វផ្សាយនៅសាលារៀន?
២ ចូរចេះពិចារណា: ទោះជាសាលារៀនជាកន្លែងដែលអ្នកអាចចាត់ទុកជាតំបន់ផ្សព្វផ្សាយរបស់អ្នកក៏ដោយ ប៉ុន្តែសូមចាំថាអ្នកមិនចាំបាច់និយាយអំពីគម្ពីរជាមួយមនុស្សគ្រប់រូបដូចជាពេលផ្សព្វផ្សាយពីផ្ទះមួយទៅផ្ទះមួយនោះទេ។ ចូរចេះពិចារណាថាពេលណាដែលត្រូវនិយាយ។ (សាស្ដ. ៣:១, ៧) សាច់រឿងដែលថ្នាក់អ្នកកំពុងពិភាក្សា ឬកិច្ចការដែលសាលាឲ្យអ្នកធ្វើប្រហែលជាផ្ដល់ឱកាសឲ្យអ្នកប្រាប់អំពីជំនឿរបស់អ្នក ឬសិស្សរួមថ្នាក់ប្រហែលជាសួរអ្នកអំពីមូលហេតុដែលអ្នកមិនចូលរួមសកម្មភាពខ្លះ។ គ្រិស្តសាសនិកខ្លះបានប្រាប់គ្រូរបស់ពួកគេនៅពេលចាប់ផ្ដើមឆ្នាំសិក្សាថាពួកគេជាសាក្សីព្រះយេហូវ៉ា ហើយជូនគ្រូនូវសៀវភៅដែលពន្យល់អំពីជំនឿរបស់យើង។ សាក្សីព្រះយេហូវ៉ាឯទៀតទុកសៀវភៅអង្គការយើងនៅលើតុរបស់ខ្លួនដើម្បីឲ្យសិស្សរួមថ្នាក់សួរសំណួរអំពីសៀវភៅទាំងនោះ។
៣. តើតាមរបៀបណាអ្នកអាចរៀបចំទុកជាមុនដើម្បីផ្សព្វផ្សាយនៅសាលារៀន?
៣ ចូររៀបចំទុកជាមុន: បើអ្នករៀបចំទុកជាមុន នោះអ្នកនឹងមានទំនុកចិត្តកាន់តែច្រើនឡើង។ (១ពេ. ៣:១៥) ដូច្នេះ ចូរខំគិតអំពីសំណួរដែលគេអាចសួរ ហើយគិតអំពីរបៀបដែលអ្នកអាចឆ្លើយ។ (សុភ. ១៥:២៨) បើអាចធ្វើបាន សូមទុកនៅសាលានូវគម្ពីររបស់អ្នក និងសៀវភៅអង្គការយើងពីរបីដូចជា សៀវភៅអំពីការបង្កើត ដើម្បីយើងអាចប្រើសៀវភៅទាំងនោះពេលដែលត្រូវការ។ សូមឪពុកម្ដាយរបស់អ្នកឲ្យបញ្ចូលការហាត់សមអំពីរបៀបឆ្លើយសំណួរក្នុងពេលគោរពប្រណិប័តន៍ជាក្រុមគ្រួសារ។
៤. ហេតុអ្វីអ្នកគួរបន្តផ្សព្វផ្សាយនៅសាលារៀន?
៤ ចូរមានសុទិដ្ឋិនិយម: កុំសន្និដ្ឋានថា សិស្សរួមថ្នាក់របស់អ្នកច្បាស់ជានឹងចំអកឲ្យអ្នកបើអ្នកប្រាប់អំពីសេចក្ដីពិត។ សិស្សខ្លះទំនងជានឹងកោតស្ងើចអ្នកដោយសារអ្នកមានចិត្តក្លាហាន ហើយប្រហែលជានឹងស្ដាប់អ្នកដែរ។ តែកុំធ្លាក់ទឹកចិត្តបើគ្មានអ្នកណាស្ដាប់។ ព្រះយេហូវ៉ានឹងពេញចិត្តចំពោះការខំប្រឹងរបស់អ្នក។ (ហេ. ១៣:១៥, ១៦) ចូរបន្តសុំលោកជួយអ្នកឲ្យ‹បន្តប្រកាសដោយសេចក្ដីក្លាហាន›។ (សកម្ម. ៤:២៩; ២ធី. ១:៧, ៨) សូមស្រមៃគិតថាអ្នកនឹងរំភើបចិត្តយ៉ាងណាពេលមានអ្នកណាម្នាក់ស្ដាប់។ ប្រហែលជានៅទីបំផុតបុគ្គលនោះអាចក្លាយទៅជាអ្នកបម្រើព្រះយេហូវ៉ាដូចយើងដែរ!