យើងត្រូវត្រឡប់ទៅជួបអ្នកចាប់អារម្មណ៍
១. តើយើងត្រូវស្រោចទឹកអ្វីដើម្បីឲ្យវាដុះដាល?
១ គេត្រូវស្រោចទឹកគ្រាប់ពូជដែលគេដាំនៅក្នុងសួនច្បារទើបវាដុះដាល។ ដូចគ្នាដែរ ចំពោះគ្រាប់ពូជនៃសេចក្ដីពិតដែលយើងបានដាំនៅក្នុងចិត្តមនុស្សក្នុងតំបន់ផ្សាយរបស់យើង។ (១កូ. ៣:៦) យើងត្រូវត្រឡប់ទៅជួប ហើយស្រោចទឹកគ្រាប់ពូជក្នុងន័យធៀបដោយប្រើបណ្ដាំរបស់ព្រះ បើយើងចង់ឲ្យគ្រាប់ពូជទាំងនោះចាក់ឫស ដុះដាល ហើយលូតលាស់ឡើង។
២. តើតាមរបៀបណាយើងអាចជួយម្ចាស់ផ្ទះឲ្យចាប់អារម្មណ៍ទៅលើចំណុចដែលយើងនឹងពិភាក្សា ពេលត្រឡប់មកវិញលើកក្រោយ?
២ លើកសំណួរមួយ: កាលណាអ្នករៀបចំពាក្យផ្សាយរបស់អ្នក សូមរៀបចំសំណួរមួយដែលធ្វើឲ្យម្ចាស់ផ្ទះចាប់អារម្មណ៍ទៅលើប្រធានបទដែលអ្នកនឹងពិភាក្សាពេលអ្នកត្រឡប់មកវិញ។ សូមសួរសំណួរនោះពេលបញ្ចប់ការពិភាក្សាដំបូង ហើយណាត់ពេលឲ្យបានច្បាស់លាស់ដើម្បីត្រឡប់មកវិញ។ បងប្អូនច្រើននាក់ជ្រើសរើសចំណុចមួយក្នុងសៀវភៅព្រះគម្ពីរបង្រៀនដែលនឹងជួយពួកគាត់ឲ្យបង្ហាញរបៀបសិក្សាគម្ពីរ។ ដោយធ្វើដូច្នោះ ពួកគាត់ឃើញថាមានប្រយោជន៍។
៣. ពេលជួបគេជាលើកដំបូង តើអ្នកអាចកត់អំពីអ្វីខ្លះ?
៣ កត់កំណត់: ពេលជួបម្ចាស់ផ្ទះជាលើកដំបូង ភ្លាមៗក្រោយពេលអ្នកចាកចេញពីគាត់ សូមចំណាយពេលដើម្បីកត់អ្វីដែលអ្នកបាននិយាយ។ សូមកត់ឈ្មោះនិងអាសយដ្ឋានរបស់បុគ្គលនោះ។ ជាការល្អដែរ បើអ្នកកត់ថ្ងៃខែនិងម៉ោងនិងអ្វីដែលអ្នកបាននិយាយជាមួយនឹងគាត់ ហើយបើអ្នកបានជូនគាត់សៀវភៅណាមួយ សូមសរសេរឈ្មោះសៀវភៅនោះ។ តើគាត់បាននិយាយថាគាត់កាន់សាសនាមួយណា? តើគាត់មានគ្រួសារហើយឬ? តើគាត់បាននិយាយអំពីអ្វីដែលគាត់ចាប់អារម្មណ៍និងអ្វីដែលធ្វើឲ្យគាត់ខ្វល់ខ្វាយឬទេ? ព័ត៌មានបែបនេះនឹងជួយអ្នកឲ្យពិភាក្សាអំពីប្រធានបទដែលសំខាន់ចំពោះគាត់ពេលអ្នកត្រឡប់មកវិញ។ សូមកត់ដែរថា អ្នកយល់ព្រមត្រឡប់មកវិញនៅពេលណា និងសំណួរដែលអ្នកនឹងឆ្លើយ។
៤. ហេតុអ្វីយើងគួរព្យាយាមឥតឈប់ដើម្បីជួបអ្នកចាប់អារម្មណ៍ម្ដងទៀត?
៤ ព្យាយាមឥតឈប់: សាថានខំប្រឹងឥតឈប់ដើម្បី«ឆក់យកបណ្ដាំ»ដែលបានត្រូវសាបព្រោះក្នុងចិត្តរបស់បុគ្គលម្នាក់។ (ម៉ាក. ៤:១៤, ១៥) ហេតុនេះ សូមកុំបោះបង់ បើអ្នកពិបាកជួបអ្នកដែលចាប់អារម្មណ៍នៅផ្ទះរបស់គាត់ម្ដងទៀត។ តើអ្នកអាចផ្ញើសំបុត្រឬទុកកំណត់មួយនៅផ្ទះគាត់ឬទេ? អ្នកត្រួសត្រាយម្នាក់បានចាប់ផ្ដើមសិក្សាគម្ពីរជាមួយនឹងស្ត្រីម្នាក់នៅមាត់ទ្វារផ្ទះ តែមិនអាចជួបគាត់នៅផ្ទះម្ដងទៀតទេ ដូច្នេះ គាត់ផ្ញើសំបុត្រមួយ។ នៅទីបំផុត ពេលដែលបងស្រីជួបស្ត្រីនោះនៅផ្ទះ គាត់បានប្រាប់ថា គាត់រំភើបចិត្តខ្លាំងណាស់ចំពោះការយកចិត្តទុកដាក់ដ៏ស្មោះចំពោះគាត់។ កាលដែលយើងស្រោចទឹកគ្រាប់ពូជនៃសេចក្ដីពិត យើងអាចមានអំណរដោយសារបានឃើញគ្រាប់ពូជទាំងនោះចេញពន្លក ដុះដាលរហូតដល់ធំពេញវ័យ ហើយ«បង្កើតផលមួយជាសាមសិប មួយជាហុកសិប និងមួយជាមួយរយ»។—ម៉ាក. ៤:២០