ចូរធ្វើជាដៃគូផ្សាយដែលមានប្រយោជន៍
១. ពេលយើងចូលរួមកិច្ចបម្រើផ្សាយជាមួយបងប្អូនឯទៀត តើយើងអាចយកតម្រាប់តាមចិត្តគំនិតរបស់សាវ័កប៉ូលយ៉ាងដូចម្ដេច?
១ សាវ័កប៉ូលបានចាត់ទុកការចំណាយពេលវេលាជាមួយបងប្អូនរួមជំនឿជាឱកាសក្នុងការ«លើកទឹកចិត្តគ្នាទៅវិញទៅមក»។ (រ៉ូម ១:១២) ពេលអ្នកចូលរួមកិច្ចបម្រើផ្សាយជាមួយបងប្អូនម្នាក់ទៀត តើអ្នកឆ្លៀតយកឱកាសនេះដើម្បីជួយនិងលើកទឹកចិត្តគាត់ទេ? ដើម្បីធ្វើជាដៃគូផ្សាយដែលមានប្រយោជន៍ សូមចែកប្រាប់នូវអ្វីដែលបានជួយអ្នកឲ្យក្លាយជាអ្នកផ្សាយដែលមានប្រសិទ្ធភាព។
២. តើយើងអាចពង្រឹងទំនុកចិត្តដៃគូផ្សាយរបស់យើងយ៉ាងណា ហើយហេតុអ្វីការធ្វើបែបនោះគឺសំខាន់?
២ សូមពង្រឹងទំនុកចិត្តគាត់: អ្នកផ្សាយខ្លះខ្វះទំនុកចិត្ត យើងប្រហែលជាឃើញតាមរយៈទឹកមុខឬទំហំសំឡេងរបស់ពួកគាត់។ យើងអាចពង្រឹងទំនុកចិត្តពួកគាត់ដោយនិយាយសរសើរពួកគាត់យ៉ាងស្មោះ។ តើមានវិធីណាទៀតដែលយើងអាចពង្រឹងទំនុកចិត្តពួកគាត់? អ្នកធ្វើដំណើរត្រួតពិនិត្យម្នាក់បានប្រាប់ត្រង់ៗដល់ដៃគូផ្សាយរបស់គាត់ថាគាត់ក៏មានចិត្តភ័យខ្លាចដែរ ហើយជាញឹកញយគាត់អធិដ្ឋានសុំជំនួយពីព្រះដើម្បីយកឈ្នះអារម្មណ៍បែបនោះ។ ស្តីអំពីរឿងនេះដែរ បងប្រុសយើងម្នាក់ទៀតបានកត់សម្គាល់ថាអ្វីដែលបានជួយគាត់ឲ្យមើលទៅឃើញថាមានទំនុកចិត្តគឺ៖ «មុនបង្អស់ត្រូវញញឹម។ ជួនកាលខ្ញុំត្រូវតែអធិដ្ឋានសុំជំនួយពីព្រះដើម្បីអាចញញឹម»។ តើមានអ្វីខ្លះដែលបានជួយអ្នកឲ្យមានទំនុកចិត្តថែមទៀតក្នុងកិច្ចបម្រើផ្សាយ? សូមប្រាប់អំពីរឿងនេះដល់ដៃគូផ្សាយរបស់អ្នក។
៣. តើយើងអាចប្រាប់ដៃគូផ្សាយរបស់យើងអ្វីខ្លះ ដែលប្រហែលជាជួយគាត់ឲ្យមានប្រសិទ្ធភាពជាងក្នុងកិច្ចបម្រើរបស់គាត់?
៣ សូមប្រាប់វិធីរបស់ខ្លួន: ដើម្បីចាប់ផ្ដើមការសន្ទនាដែលមានប្រសិទ្ធភាព តើអ្នកធ្លាប់សួរសំណួរឬនិយាយពាក្យដំបូងដ៏ស្រួលទេ ប្រហែលជានិយាយអំពីព្រឹត្ដិការណ៍មួយដែលកើតឡើងក្នុងតំបន់របស់អ្នក? តើអ្នកធ្លាប់បន្ថែមពាក្យខ្លះក្នុងពាក្យផ្សាយគំរូដើម្បីនិយាយធម្មតាជាងដែលនាំឲ្យមានលទ្ធផលល្អទេ? សូមប្រាប់ដៃគូផ្សាយរបស់អ្នក។ (សុភ. ២៧:១៧) អំឡុងពេលធ្វើដំណើរត្រឡប់ទៅជួប អ្នកអាចប្រាប់អំពីអ្វីដែលអ្នកចង់និយាយនិងរបៀបដែលអ្នកបានរៀបចំព័ត៌មានទាំងនោះ។ ក្រោយបង្រៀនគម្ពីរ អ្នកអាចពន្យល់មូលហេតុដែលអ្នកបានជ្រើសយកចំណុចណាមួយ បទគម្ពីរ ឬវិធីបង្រៀនដែលស្របតាមតម្រូវការរបស់សិស្ស។
៤. ហេតុអ្វីយើងគួរយកចិត្តទុកដាក់ជួយអ្នកផ្សាយគ្នីគ្នា?
៤ អ្នកផ្សាយនៅសតវត្សរ៍ទី១មិនគ្រាន់តែចាប់អារម្មណ៍ជួយអ្នកដែលមិនជឿប៉ុណ្ណោះទេ តែពួកគាត់ក៏យល់តម្លៃនៃការលើកទឹកចិត្តនិងពង្រឹងកម្លាំងចិត្តគ្នាទៅវិញទៅមកដែរ។ (សកម្ម. ១១:២៣; ១៥:៣២) សាវ័កប៉ូលបានបង្រៀនយុវជនធីម៉ូថេ រួចមកគាត់ក៏បានលើកទឹកចិត្តធីម៉ូថេឲ្យចែកប្រាប់នូវអ្វីដែលគាត់បានរៀនដល់អ្នកឯទៀតដែរ។ (២ធី. ២:២) ពេលយើងមិនភ្លេចធ្វើល្អដល់បងប្អូនរួមជំនឿក្នុងពេលចូលរួមកិច្ចបម្រើផ្សាយ យើងមិនគ្រាន់តែជួយឲ្យពួកគាត់មានអំណរនិងមានប្រសិទ្ធភាពថែមទៀតប៉ុណ្ណោះទេ តែយើងក៏ធ្វើឲ្យព្រះដែលជាបិតានៅស្ថានសួគ៌ពេញចិត្តដែរ។—ហេ. ១៣:១៥, ១៦