ខិត្តប័ណ្ណប្រភេទថ្មីដែលគួរឲ្យរំភើបចិត្ត!
១. តើមានអ្វីខ្លះដែលបានត្រូវរៀបចំថ្មីដើម្បីប្រើក្នុងកិច្ចបម្រើផ្សាយ?
១ នៅមហាសន្និបាតប្រចាំតំបន់ឆ្នាំ២០១៣ ដែលមានប្រធានថា‹បណ្ដាំរបស់ព្រះជាសេចក្ដីពិត!› បានចេញខិត្តប័ណ្ណថ្មីចំនួនប្រាំ។ បន្ថែមទៅទៀតមានដំណឹងរាជាណាចក្រលេខ៣៨ ចំណងជើងថា«តើមនុស្សស្លាប់ពិតជាអាចរស់ម្ដងទៀតឬ?» បានត្រូវរាប់ជាខិត្តប័ណ្ណដូចខិត្តប័ណ្ណទាំងប្រាំនោះដែរ។ ខិត្តប័ណ្ណទាំង៦នេះជាខិត្តប័ណ្ណប្រភេទថ្មីដែលគួរឲ្យរំភើបចិត្ត។ ហេតុអ្វីខិត្តប័ណ្ណទាំងនេះមានទម្រង់ថ្មី? ពេលដែលយើងស្នើផ្ដល់ខិត្តប័ណ្ណទាំងនេះពីផ្ទះមួយទៅផ្ទះមួយ តើយើងអាចប្រើវាឲ្យបានប្រយោជន៍ច្រើនបំផុតយ៉ាងដូចម្ដេច?
២. តើខិត្តប័ណ្ណប្រភេទថ្មីទាំង៦នេះបានត្រូវរៀបចំឡើងក្នុងគោលបំណងអ្វី?
២ ហេតុអ្វីរៀបចំថ្មី?: ពាក្យផ្សាយពីផ្ទះមួយទៅផ្ទះមួយដែលមានប្រសិទ្ធភាព ច្រើនតែរួមបញ្ចូលជំហានបួនយ៉ាងនេះ: (១) ដោយសួរសំណួរដើម្បីចាប់ផ្ដើមការសន្ទនា។ (២) ប្រាប់ចំណុចណាមួយពីបទគម្ពីរ។ (៣) ស្នើផ្ដល់សៀវភៅផ្សេងៗ ឬខិត្តប័ណ្ណឲ្យម្ចាស់ផ្ទះទុកអាន។ (៤) ទុកសំណួរមួយដល់ម្ចាស់ផ្ទះ ហើយណាត់ពេលត្រឡប់ទៅជួបវិញ។ ខិត្តប័ណ្ណប្រភេទថ្មីទាំង៦នោះជួយយើងឲ្យស្រួលធ្វើតាមជំហានទាំងបួននេះ។
៣. តើតាមរបៀបណាយើងអាចស្នើផ្ដល់ខិត្តប័ណ្ណថ្មីក្នុងកិច្ចបម្រើផ្សាយ?
៣ របៀបប្រើ: (១) ក្រោយពីជម្រាបសួរនិងសួរសុខទុក្ខម្ចាស់ផ្ទះហើយ សូមបង្ហាញគាត់នូវសំណួរនិងចម្លើយជ្រើសរើសដែលមាននៅទំព័រខាងមុខ រួចមកសួរអំពីទស្សនៈរបស់គាត់។ (២) បើកខិត្តប័ណ្ណ ហើយអានត្រង់ចំណុច«គម្ពីររៀបរាប់ថា»។ បើកាលៈទេសៈអនុញ្ញាត អ្នកអាចអានបទគម្ពីរនោះពីគម្ពីរតែម្ដង។ បើម្ចាស់ផ្ទះមានពេល សូមពិគ្រោះត្រង់ចំណុច«នោះអាចជួយលោកអ្នកដូចជា»។ (៣) ស្នើផ្ដល់ខិត្តប័ណ្ណ ហើយទឹកចិត្តគាត់ឲ្យអានព័ត៌មានផ្សេងទៀតក្នុងខិត្តប័ណ្ណនោះ ពេលណាដែលគាត់អាចអានបាន។ (៤) មុនបញ្ចប់ការសន្ទនា សូមបង្ហាញគាត់សំណួរដែលមាននៅខ្នងខិត្តប័ណ្ណក្រោមចំណងជើងថា«សូមគិតអំពីសំណួរនេះ» ហើយណាត់ពេលដើម្បីពិគ្រោះចម្លើយពីគម្ពីរនៅលើកក្រោយ។
៤. តើយើងអាចប្រើខិត្តប័ណ្ណថ្មីដើម្បីត្រឡប់ទៅជួបម្ចាស់ផ្ទះវិញយ៉ាងដូចម្ដេច?
៤ ខិត្តប័ណ្ណថ្មីទាំងនោះក៏ងាយស្រួលឲ្យយើងត្រឡប់ទៅជួបដែរ។ អ្នកអាចប្រើបទគម្ពីរដែលមិនបានដកស្រង់នៅខាងខ្នងខិត្តប័ណ្ណដែលអ្នកបានបង្ហាញពីលើកមុន ហើយឆ្លើយសំណួរដែលអ្នកបានទុកឲ្យគាត់។ មុនបញ្ចប់ការសន្ទនា អ្នកអាចចង្អុលបង្ហាញរូបភាពសៀវភៅស្តើងដំណឹងល្អ ក្នុងខិត្តប័ណ្ណនោះ។ បន្ទាប់មកសូមបង្ហាញសៀវភៅស្តើងនោះដល់គាត់ ហើយបង្ហាញមេរៀនមួយដែលមានព័ត៌មានច្រើនជាង ស្តីអំពីប្រធានបទដែលអ្នកបានពិគ្រោះជាមួយគាត់ រួចមកស្នើផ្ដល់សៀវភៅស្តើងនោះ។ បើគាត់ព្រមទទួល សូមណាត់ពេលដើម្បីពិគ្រោះអំពីសៀវភៅស្តើងនោះនៅលើកក្រោយ។ ដោយធ្វើដូច្នេះ អ្នកបានចាប់ផ្ដើមបង្រៀនគម្ពីរហើយ! ប៉ុន្តែបើមិនស្នើផ្ដល់សៀវភៅស្តើងនោះទេ អ្នកអាចស្នើផ្ដល់ខិត្តប័ណ្ណផ្សេងទៀត ហើយណាត់ពេលទៅជួបដើម្បីពិគ្រោះជាមួយម្ចាស់ផ្ទះអំពីខិត្តប័ណ្ណនោះ។
៥. តើខិត្តប័ណ្ណមានប្រយោជន៍យ៉ាងណាក្នុងកិច្ចបម្រើផ្សាយ?
៥ អស់ជាង១៣០ឆ្នាំមកហើយ អង្គការយើងបានប្រើខិត្តប័ណ្ណផ្សេងៗក្នុងកិច្ចបម្រើផ្សាយ។ ទោះជាខិត្តប័ណ្ណទាំងនោះមានទំហំ និងទម្រង់ខុសៗគ្នាក្ដី តែវាជាជំនួយដ៏មានប្រសិទ្ធភាពក្នុងកិច្ចបម្រើផ្សាយ។ សូមយើងប្រើខិត្តប័ណ្ណប្រភេទថ្មីទាំងនេះឲ្យបានប្រយោជន៍ច្រើនបំផុត ដើម្បីបន្តផ្សព្វផ្សាយចំណេះពីគម្ពីរដល់មនុស្សទូទាំងផែនដី។—សុភ. ១៥:៧ក