ចូរបង្កើនភាពប៉ិនប្រសប់ក្នុងកិច្ចបម្រើផ្សាយ ដោយជួយបង្រៀនអ្នកផ្សាយថ្មី
ហេតុអ្វីសំខាន់?: អ្នកកាន់តាមថ្មីរបស់លោកយេស៊ូត្រូវរៀនធ្វើតាម«អ្វីៗទាំងអស់»ដែលលោកបានបង្គាប់ ក្នុងនោះរួមមានការបង្រៀនអ្នកឯទៀតអំពីសេចក្ដីពិត។ (ម៉ាថ. ២៨:១៩, ២០) បងប្អូនថ្មីជាច្រើនមានគុណសម្បត្ដិគ្រប់គ្រាន់ចូលសាលាកិច្ចបម្រើផ្សាយ ហើយពួកគាត់ប្រហែលជាបានផ្សព្វផ្សាយក្រៅផ្លូវការដល់សមាជិកគ្រួសារ ឬមិត្តភក្ដិរួចហើយ។ ទោះជាយ៉ាងនោះក៏ដោយ កាលដែលពួកគាត់ឲ្យតម្លៃកាន់តែច្រើនឡើងចំពោះអ្វីដែលពួកគាត់កំពុងរៀន ព្រមទាំងដឹងថាព្រះយេហូវ៉ាចង់ឲ្យមនុស្សទាំងអស់ឮដំណឹងល្អ នោះពួកគាត់ប្រហែលជាបង្ហាញបំណងចិត្តចង់ចូលរួមកិច្ចបម្រើផ្សាយ។ (រ៉ូម ១០:១៣, ១៤) ពេលអ្នកថ្មីបានរីកចម្រើនដល់ដំណាក់កាលនេះ ហើយក្រោយមកបានត្រូវតែងតាំងឲ្យក្លាយជាអ្នកផ្សាយដែលមិនទាន់ទទួលការជ្រមុជទឹក នោះគាត់ត្រូវការការបង្ហាត់បង្រៀនដ៏ល្អដើម្បីជួយពួកគាត់ឲ្យមានទំនុកចិត្តថែមទៀត។—លូក. ៦:៤០
សូមសាកធ្វើដូច្នេះក្នុងអំឡុងខែនេះ:
បើសិស្សគម្ពីររបស់អ្នកជាអ្នកផ្សាយ សូមទៅផ្សព្វផ្សាយពីផ្ទះមួយទៅផ្ទះមួយជាមួយនឹងគាត់ ហើយយកគាត់ទៅជាមួយពេលអ្នកត្រឡប់ទៅជួប ឬទៅបង្រៀនគម្ពីរ។ បើអ្នកគ្មានសិស្សគម្ពីរជាអ្នកផ្សាយទេ សូមអញ្ជើញអ្នកផ្សាយដែលមិនសូវមានបទពិសោធន៍ទៅជាមួយនឹងអ្នក។