អត្ថបទសិក្សា ២៣
ចម្រៀងលេខ២ នាមលោកគឺយេហូវ៉ា
តើនាមរបស់ព្រះយេហូវ៉ាសំខាន់យ៉ាងណាចំពោះអ្នក?
«ព្រះយេហូវ៉ាប្រកាសថា៖ ‹អ្នករាល់គ្នាជាសាក្សីរបស់ខ្ញុំ›»។—អេ. ៤៣:១០
ចំណុចផ្ដោត
ដើម្បីបង្ហាញអំពីតួនាទីរបស់យើងក្នុងការធ្វើឲ្យនាមរបស់ព្រះយេហូវ៉ាបានបរិសុទ្ធ និងជម្រះការតិះដៀលចំពោះនាមរបស់លោក។
១-២. តើយើងដឹងថានាមរបស់ព្រះយេហូវ៉ាគឺសំខាន់ចំពោះលោកយេស៊ូយ៉ាងដូចម្ដេច?
នាមរបស់ព្រះយេហូវ៉ាគឺជាអ្វីដ៏សំខាន់បំផុតចំពោះលោកយេស៊ូ។ លោកគឺជាបុគ្គលចម្បងដែលបង្ហាញឲ្យអ្នកឯទៀតស្គាល់នាមរបស់បិតាលោក។ នៅក្នុងអត្ថបទមុនយើងបានរៀនថា លោកយេស៊ូសុខចិត្តស្លាប់ដើម្បីបង្ហាញថាព្រះយេហូវ៉ាគឺបរិសុទ្ធ និងបង្ហាញថាអ្វីទាំងអស់ដែលព្រះធ្វើគឺត្រឹមត្រូវ។ (ម៉ាក. ១៤:៣៦; ហេ. ១០:៧-៩) ក្រោយពីការគ្រប់គ្រងមួយពាន់ឆ្នាំរបស់លោកយេស៊ូ លោកនឹងសុខចិត្តប្រគល់គ្រប់ទាំងអំណាចដែលលោកមានទៅបិតាលោក ដើម្បីធ្វើឲ្យនាមរបស់ព្រះយេហូវ៉ាបានបរិសុទ្ធ។ (១កូ. ១៥:២៦-២៨) អ្វីទាំងអស់ដែលលោកយេស៊ូបានធ្វើដើម្បីព្រះយេហូវ៉ាបង្ហាញថា លោកស្រឡាញ់ព្រះយេហូវ៉ាខ្លាំងណាស់។
២ លោកយេស៊ូបានមកផែនដីក្នុងនាមរបស់បិតាលោក។ (យ៉ូន. ៥:៤៣; ១២:១៣) លោកបានបង្ហាញនាមរបស់បិតាលោកឲ្យពួកអ្នកកាន់តាមរបស់លោកស្គាល់។ (យ៉ូន. ១៧:៦, ២៦) លោកបានបង្រៀននិងធ្វើអព្ភូតហេតុក្នុងនាមរបស់ព្រះយេហូវ៉ា។ (យ៉ូន. ១០:២៥) ម្យ៉ាងទៀត លោកយេស៊ូបានសុំព្រះយេហូវ៉ាឲ្យការពារពួកអ្នកកាន់តាមរបស់លោក ‹ដោយយល់ដល់នាមរបស់ព្រះយេហូវ៉ា›។ (យ៉ូន. ១៧:១១) យើងឃើញច្បាស់ថា ចំពោះលោកយេស៊ូ នាមរបស់ព្រះយេហូវ៉ាគឺសំខាន់ជាងអ្វីណាទាំងអស់។ បើដូច្នេះ ហេតុអ្វីបានជាអ្នកដែលនិយាយថាខ្លួនជាគ្រិស្តសាសនិកមិនស្គាល់នាមរបស់ព្រះយេហូវ៉ាឬប្រើនាមរបស់លោក?
៣. តើយើងនឹងពិចារណាអ្វីខ្លះក្នុងអត្ថបទនេះ?
៣ ក្នុងនាមជាគ្រិស្តសាសនិកពិត យើងយកតម្រាប់លោកយេស៊ូដោយឲ្យតម្លៃយ៉ាងខ្លាំងចំពោះនាមរបស់បិតាលោក។ (១ពេ. ២:២១) នៅក្នុងអត្ថបទនេះ យើងនឹងឃើញអំពីរបៀបដែលពួកអ្នកផ្សព្វផ្សាយ‹ដំណឹងល្អអំពីរាជាណាចក្រ› បានត្រូវសម្គាល់ដោយនាមរបស់ព្រះយេហូវ៉ា។ (ម៉ាថ. ២៤:១៤) យើងក៏នឹងពិចារណាថា តើនាមរបស់ព្រះយេហូវ៉ាគួរសំខាន់យ៉ាងណាចំពោះយើងម្នាក់ៗ?
«រាស្ត្រមួយជាតំណាងនាមរបស់លោក»
៤. (ក) តើលោកយេស៊ូបង្គាប់ពួកអ្នកកាន់តាមលោកឲ្យធ្វើអ្វីបន្តិចមុនលោកត្រឡប់ទៅស្ថានសួគ៌វិញ? (ខ) តើយើងនឹងពិចារណាចម្លើយចំពោះសំណួរអ្វី?
៤ បន្តិចមុនលោកយេស៊ូត្រឡប់ទៅស្ថានសួគ៌វិញ លោកបានប្រាប់ពួកអ្នកកាន់តាមរបស់លោកថា៖ «អ្នករាល់គ្នានឹងទទួលឫទ្ធានុភាព ពេលឫទ្ធានុភាពបរិសុទ្ធរបស់ព្រះមកសណ្ឋិតលើអ្នករាល់គ្នា ហើយអ្នករាល់គ្នានឹងធ្វើជាសាក្សីបញ្ជាក់អំពីខ្ញុំនៅក្រុងយេរូសាឡិម នៅតំបន់យូឌាទាំងមូល នៅទូទាំងស្រុកសាម៉ារី និងរហូតដល់កន្លែងឆ្ងាយបំផុតនៅផែនដី»។ (សកម្ម. ១:៨) ដូច្នេះ ពួកអ្នកកាន់តាមនឹងផ្សព្វផ្សាយដំណឹងល្អនៅគ្រប់កន្លែង មិនគ្រាន់តែនៅស្រុកអ៊ីស្រាអែលទេ។ នៅទីបំផុត មនុស្សពីគ្រប់ប្រជាជាតិនឹងមានឱកាសក្លាយជាអ្នកកាន់តាមលោកយេស៊ូ។ (ម៉ាថ. ២៨:១៩, ២០) ប៉ុន្តែ លោកយេស៊ូបានមានប្រសាសន៍ថា៖ «អ្នករាល់គ្នានឹងធ្វើជាសាក្សីបញ្ជាក់អំពីខ្ញុំ»។ ដូច្នេះ តើអ្នកកាន់តាមថ្មីទាំងនោះត្រូវស្គាល់នាមរបស់ព្រះយេហូវ៉ា ឬតើពួកគេគ្រាន់តែធ្វើជាសាក្សីបញ្ជាក់អំពីលោកយេស៊ូប៉ុណ្ណោះ? ព្រឹត្តិការណ៍ដែលរៀបរាប់នៅសកម្មភាព ជំពូកទី១៥ ជួយយើងឲ្យទទួលចម្លើយចំពោះសំណួរនេះ។
៥. តើតាមរបៀបណាពួកសាវ័កនិងពួកបុរសចាស់ទុំនៅក្រុងយេរូសាឡិមបង្ហាញថាការស្គាល់នាមរបស់ព្រះយេហូវ៉ាគឺសំខាន់? (សូមមើលរូបភាពផងដែរ)
៥ នៅឆ្នាំ៤៩ គ.ស. ពួកសាវ័កនិងពួកបុរសចាស់ទុំនៅក្រុងយេរូសាឡិមបានជួបជុំគ្នាដើម្បីពិភាក្សាថា តើជនជាតិដទៃដែលមិនបានកាត់ចុងស្បែកត្រូវធ្វើអ្វីដើម្បីក្លាយទៅជាគ្រិស្តសាសនិក? នៅចុងបញ្ចប់នៃការពិភាក្សានោះ យ៉ាកុបដែលជាប្អូនប្រុសរួមម្ដាយជាមួយលោកយេស៊ូបាននិយាយថា៖ «[ពេត្រុស]បានរៀបរាប់យ៉ាងល្អិតល្អន់អំពីរបៀបដែលព្រះបានបង្ហាញចំណាប់អារម្មណ៍ជាលើកដំបូងទៅលើប្រជាជាតិនានា ដើម្បីជ្រើសរើសរាស្ត្រមួយជាតំណាងនាមរបស់លោក»។ តើយ៉ាកុបកំពុងសំដៅទៅលើនាមរបស់អ្នកណា? គាត់ដកស្រង់ពាក្យរបស់អ្នកប្រកាសទំនាយអេម៉ុស ពេលគាត់បន្ថែមថា៖ «ដើម្បីឲ្យអស់អ្នកដែលនៅសល់ពីបណ្ដាជននេះ អាចស្វែងរកព្រះយេហូវ៉ាអស់ពីចិត្ត ជាមួយនឹងមនុស្សគ្រប់ជនជាតិ ដែលបានត្រូវហៅដោយឈ្មោះរបស់ខ្ញុំ។ នេះជាប្រសាសន៍របស់ព្រះយេហូវ៉ា»។ (សកម្ម. ១៥:១៤-១៨) ពួកអ្នកកាន់តាមថ្មីទាំងនេះមិនគ្រាន់តែរៀនអំពីព្រះយេហូវ៉ាប៉ុណ្ណោះទេ តែពួកគេក៏‹បានត្រូវហៅដោយឈ្មោះរបស់លោក›ដែរ។ នេះមានន័យថា ពួកគេនឹងត្រូវបង្ហាញឲ្យអ្នកឯទៀតស្គាល់នាមរបស់ព្រះ ហើយថាមនុស្សនឹងសម្គាល់ពួកគេជាតំណាងនាមនោះ។
នៅកិច្ចប្រជុំរបស់គណៈអភិបាលនាសតវត្សរ៍ទី១ ពួកបុរសស្មោះត្រង់ទាំងនោះបានយល់ឃើញច្បាស់ថា គ្រិស្តសាសនិកត្រូវជារាស្ត្រមួយជាតំណាងនាមរបស់ព្រះ (សូមមើលវគ្គ៥)
៦-៧. (ក) ហេតុអ្វីលោកយេស៊ូមកផែនដី? (ខ) តើអ្វីជាមូលហេតុសំខាន់ជាងនេះដែលលោកយេស៊ូមកផែនដី?
៦ ឈ្មោះរបស់លោកយេស៊ូមានន័យថា«ព្រះយេហូវ៉ាជាសេចក្ដីសង្គ្រោះ» ហើយតាមរយៈលោកយេស៊ូ ព្រះយេហូវ៉ាបានបើកឱកាសឲ្យមនុស្សទាំងអស់ដែលបង្ហាញជំនឿលើលោកនិងបុត្ររបស់លោកទទួលសេចក្ដីសង្គ្រោះ។ លោកយេស៊ូបានមកផែនដីដើម្បីផ្ដល់ជីវិតរបស់លោកសម្រាប់មនុស្សជាតិ។ (ម៉ាថ. ២០:២៨) យ៉ាងនេះ លោកបានបើកឱកាសឲ្យពួកគេទទួលការអភ័យទោសចំពោះការខុសឆ្គងនិងទទួលជីវិតដែលគ្មានទីបញ្ចប់។—យ៉ូន. ៣:១៦
៧ ប៉ុន្តែ ហេតុអ្វីបានជាមនុស្សជាតិត្រូវការថ្លៃលោះ? គឺដោយសារអ្វីដែលបានកើតឡើងនៅសួនអេដែន។ ដូចបានរៀបរាប់ក្នុងអត្ថបទមុន ឪពុកម្ដាយដំបូងរបស់មនុស្សជាតិ គឺអាដាមនិងអេវ៉ា បានបះបោរប្រឆាំងនឹងព្រះយេហូវ៉ា ហេតុនេះហើយ ពួកគេបានបាត់បង់ឱកាសរស់ជារៀងរហូត។ (ដក. ៣:៦, ២៤) ប៉ុន្តែ លោកយេស៊ូមកផែនដីដើម្បីធ្វើអ្វីដែលសំខាន់ជាងការសង្គ្រោះមនុស្សជាតិទៅទៀត។ តើនោះគឺជាអ្វី? សូមចាំថា នាមរបស់ព្រះយេហូវ៉ាបានត្រូវគេបង្កាច់បង្ខូច។ (ដក. ៣:៤, ៥) ដូច្នេះ មនុស្សជាតិត្រូវដឹងថាព្រះយេហូវ៉ាមិនដែលធ្វើអ្វីខុសទាល់តែសោះ ហើយថានាមរបស់លោកគឺបរិសុទ្ធ។ លោកយេស៊ូគឺជាបុគ្គលដ៏ល្អបំផុតដើម្បីបង្ហាញអំពីរឿងនេះ ដោយសារលោកយេស៊ូជាតំណាងព្រះយេហូវ៉ា ហើយបានធ្វើអ្វីទាំងអស់យ៉ាងល្អឥតខ្ចោះដែលព្រះយេហូវ៉ាចង់ឲ្យលោកធ្វើ។
ហេតុអ្វីបានជាអ្នកដែលនិយាយថាខ្លួនជាគ្រិស្តសាសនិកមិនស្គាល់នាមរបស់ព្រះយេហូវ៉ាឬប្រើនាមរបស់លោក?
៨. តើអស់អ្នកដែលជឿលើលោកយេស៊ូត្រូវទទួលស្គាល់អ្វី?
៨ អស់អ្នកដែលបង្ហាញជំនឿលើលោកយេស៊ូ ទាំងជនជាតិយូដាទាំងជនជាតិដទៃ នឹងត្រូវទទួលស្គាល់ប្រភពនៃសេចក្ដីសង្គ្រោះរបស់ពួកគេ គឺព្រះយេហូវ៉ាជាបិតារបស់លោកយេស៊ូ។ (យ៉ូន. ១៧:៣) បន្ថែមទៅទៀត ដូចលោកយេស៊ូ ពួកគេនឹងត្រូវហៅដោយនាមរបស់ព្រះយេហូវ៉ា។ ពួកគេក៏ត្រូវទទួលស្គាល់ដែរអំពីសារៈសំខាន់នៃការធ្វើឲ្យនាមនោះបានបរិសុទ្ធ។ ការសង្គ្រោះរបស់ពួកគេអាស្រ័យទៅលើអ្វីនេះ។ (សកម្ម. ២:២១, ២២) ដូច្នេះ ពួកអ្នកកាន់តាមដ៏ស្មោះត្រង់ទាំងអស់របស់លោកយេស៊ូ ត្រូវរៀនអំពីព្រះយេហូវ៉ានិងលោកយេស៊ូ។ យើងអាចឃើញមូលហេតុដែលលោកយេស៊ូបញ្ចប់សេចក្ដីអធិដ្ឋានរបស់លោក ដែលបានត្រូវកត់ទុកនៅយ៉ូហាន ជំពូកទី១៧ដោយពាក្យថា៖ «ខ្ញុំបានបង្ហាញឲ្យពួកគាត់ស្គាល់នាមរបស់លោក ក៏នឹងបង្ហាញឲ្យស្គាល់តទៅទៀត ដើម្បីឲ្យពួកគាត់បង្ហាញសេចក្ដីស្រឡាញ់ដូចសេចក្ដីស្រឡាញ់ដែលលោកមានចំពោះខ្ញុំ និងដើម្បីឲ្យខ្ញុំរួបរួមជាមួយនឹងពួកគាត់»។—យ៉ូន. ១៧:២៦
«អ្នករាល់គ្នាជាសាក្សីរបស់ខ្ញុំ»
៩. តើយើងអាចបង្ហាញយ៉ាងណាថានាមរបស់ព្រះយេហូវ៉ាគឺសំខាន់ចំពោះយើង?
៩ ពួកអ្នកកាន់តាមពិតទាំងអស់របស់លោកយេស៊ូត្រូវធ្វើឲ្យនាមរបស់ព្រះយេហូវ៉ាបានបរិសុទ្ធ។ (ម៉ាថ. ៦:៩, ១០) យើងត្រូវចាត់ទុកនាមរបស់ព្រះយេហូវ៉ាថាសំខាន់ជាងនាមណាទាំងអស់។ នេះក៏ជាអ្វីដែលយើងត្រូវបង្ហាញតាមរយៈការប្រព្រឹត្តរបស់យើងដែរ។ ដូច្នេះ តើយើងអាចធ្វើអ្វីដើម្បីធ្វើឲ្យនាមរបស់ព្រះយេហូវ៉ាបានបរិសុទ្ធ ហើយបង្ហាញថាអ្វីដែលសាថានចោទប្រកាន់ព្រះយេហូវ៉ា គឺមិនមែនជាការពិត?
១០. តើអេសាយ ជំពូកទី៤២ដល់៤៤ចែងអំពីអ្វី? (អេសាយ ៤៣:៩; ៤៤:៧-៩) (សូមមើលរូបភាពផងដែរ)
១០ នៅអេសាយ ជំពូកទី៤២ដល់៤៤ យើងរៀនអំពីអ្វីដែលយើងអាចធ្វើដើម្បីឲ្យនាមរបស់ព្រះយេហូវ៉ាបានបរិសុទ្ធ។ ក្នុងជំពូកទាំងនោះ ព្រះយេហូវ៉ាតម្រូវឲ្យពួកអ្នកដែលមិនគោរពប្រណិប័តន៍លោកនាំសាក្សីមកផ្ដល់ភ័ស្តុតាងដូចក្នុងរឿងកាត់ក្ដីដែលបញ្ជាក់ថា ព្រះរបស់ពួកគេពិតជាមានជីវិតរស់នៅមែន។ ប៉ុន្តែ គ្មានសាក្សីណាទេ!—សូមអាន អេសាយ ៤៣:៩; ៤៤:៧-៩
តាមរយៈអ្វីដែលយើងនិយាយនិងធ្វើ យើងបង្ហាញថាគ្មានព្រះណាក្រៅពីព្រះយេហូវ៉ាទេ (សូមមើលវគ្គ១០-១១)
១១. តើព្រះយេហូវ៉ាមានប្រសាសន៍អ្វីទៅកាន់រាស្ត្ររបស់លោកនៅអេសាយ ៤៣:១០-១២?
១១ សូមអាន អេសាយ ៤៣:១០-១២។ ព្រះយេហូវ៉ាមានប្រសាសន៍ទៅកាន់រាស្ត្ររបស់លោកថា៖ «អ្នករាល់គ្នាជាសាក្សីរបស់ខ្ញុំ . . . ហើយខ្ញុំគឺជាព្រះ»។ ព្រះយេហូវ៉ាសួរពួកគេថា៖ «ក្រៅពីខ្ញុំ តើមានព្រះណាទៀតឬ?»។ (អេ. ៤៤:៨) យើងមានឯកសិទ្ធិតបឆ្លើយសំណួរនោះ។ តើតាមរបៀបណា? តាមរយៈពាក្យសម្ដីនិងការប្រព្រឹត្តរបស់យើង យើងបង្ហាញថាមានតែព្រះយេហូវ៉ាប៉ុណ្ណោះគឺជាព្រះពិត។ នាមរបស់លោកគឺខ្ពង់ខ្ពស់ជាងនាមណាទាំងអស់។ យើងបង្ហាញតាមរយៈរបៀបរស់នៅរបស់យើងថា យើងពិតជាស្រឡាញ់ព្រះយេហូវ៉ា ហើយថាយើងស្មោះត្រង់ចំពោះលោក មិនថាយើងទទួលការបង្ខិតបង្ខំបែបណាពីសាថានក៏ដោយ។ យ៉ាងនេះ យើងមានឱកាសជួយធ្វើឲ្យនាមរបស់ព្រះបានបរិសុទ្ធ។
១២. តើទំនាយនៅអេសាយ ៤០:៣, ៥បានសម្រេចយ៉ាងដូចម្ដេច?
១២ ពេលយើងគាំទ្រនាមឬកេរ្តិ៍ឈ្មោះរបស់ព្រះយេហូវ៉ា យើងកំពុងយកតម្រាប់លោកយេស៊ូគ្រិស្ត។ អេសាយក៏បានប្រកាសទុកជាមុនថា នឹងមានបុគ្គលម្នាក់ដែលនឹង«រៀបចំផ្លូវទទួលព្រះយេហូវ៉ា»។ (អេ. ៤០:៣) តើនោះបានសម្រេចយ៉ាងដូចម្ដេច? យ៉ូហានដែលជាអ្នកជ្រមុជទឹកបានរៀបចំផ្លូវសម្រាប់លោកយេស៊ូ ដែលមកក្នុងនាមព្រះយេហូវ៉ានិងនិយាយក្នុងនាមលោក។ (ម៉ាថ. ៣:៣; ម៉ាក. ១:២-៤; លូក. ៣:៣-៦) ទំនាយនេះក៏ចែងថា៖ «សិរីរុងរឿងរបស់ព្រះយេហូវ៉ានឹងត្រូវបង្ហាញ»។ (អេ. ៤០:៥) តើនេះបានកើតឡើងយ៉ាងដូចម្ដេច? ពេលលោកយេស៊ូមកផែនដី លោកបានតំណាងព្រះយេហូវ៉ាយ៉ាងល្អឥតខ្ចោះ គឺហាក់ដូចជាព្រះយេហូវ៉ាផ្ទាល់បានមកផែនដី។—យ៉ូន. ១២:៤៥
១៣. តើយើងអាចយកតម្រាប់លោកយេស៊ូយ៉ាងដូចម្ដេច?
១៣ ដូចលោកយេស៊ូ យើងជាសាក្សីរបស់ព្រះយេហូវ៉ា។ យើងតំណាងនាមព្រះយេហូវ៉ា ហើយយើងប្រាប់មនុស្សទាំងអស់ដែលយើងជួបអំពីកិច្ចការអស្ចារ្យរបស់លោក។ ប៉ុន្តែ ដើម្បីធ្វើជាសាក្សីដ៏ល្អអំពីព្រះយេហូវ៉ា យើងក៏ត្រូវប្រាប់មនុស្សឲ្យស្គាល់អំពីអ្វីទាំងអស់ដែលលោកយេស៊ូបានធ្វើ ដើម្បីធ្វើឲ្យនាមរបស់ព្រះយេហូវ៉ាបានបរិសុទ្ធ។ (សកម្ម. ១:៨) លោកយេស៊ូគឺជាសាក្សីសំខាន់ចម្បងរបស់ព្រះយេហូវ៉ា ហើយយើងធ្វើតាមគំរូរបស់លោក។ (បប. ១:៥) ប៉ុន្តែ តើនាមរបស់ព្រះយេហូវ៉ាគួរសំខាន់យ៉ាងណាចំពោះយើងម្នាក់ៗ?
តើនាមរបស់ព្រះយេហូវ៉ាគឺសំខាន់យ៉ាងណាចំពោះយើង?
១៤. ដូចបានរៀបរាប់នៅចម្រៀងសរសើរព្រះ ១០៥:៣ តើយើងមានអារម្មណ៍យ៉ាងណាចំពោះនាមរបស់ព្រះយេហូវ៉ា?
១៤ យើងមានមោទនភាពចំពោះនាមរបស់ព្រះយេហូវ៉ា។ (សូមអាន ចម្រៀងសរសើរព្រះ ១០៥:៣) ព្រះយេហូវ៉ាអរសប្បាយពេលដែលយើងអួតអំពីនាមលោក។ (យេ. ៩:២៣, ២៤; ១កូ. ១:៣១; ២កូ. ១០:១៧) ការ«អួតអំពីព្រះយេហូវ៉ា»មានន័យថា យើងមានមោទនភាពដែលព្រះយេហូវ៉ាជាព្រះរបស់យើង។ យើងចាត់ទុកការលើកកិត្តិយសនាមរបស់លោកនិងការគាំទ្រកេរ្តិ៍ឈ្មោះរបស់លោកគឺជាឯកសិទ្ធិ។ យើងមិនត្រូវអៀនខ្មាសប្រាប់អ្នករួមការងារ សិស្សរួមថ្នាក់ អ្នកជិតខាង និងអ្នកឯទៀតថាយើងជាសាក្សីព្រះយេហូវ៉ាទេ! មេកំណាចចង់ឲ្យយើងឈប់ប្រាប់អ្នកឯទៀតអំពីនាមរបស់ព្រះយេហូវ៉ា។ (យេ. ១១:២១; បប. ១២:១៧) តាមពិត សាថាននិងពួកអ្នកប្រកាសទំនាយមិនពិតរបស់វាចង់ឲ្យយើងភ្លេចនាមរបស់ព្រះយេហូវ៉ា។ (យេ. ២៣:២៦, ២៧) ប៉ុន្តែ សេចក្ដីស្រឡាញ់របស់យើងចំពោះនាមរបស់ព្រះយេហូវ៉ានាំឲ្យយើងបន្តត្រេកអរចំពោះនាមនោះ«គ្រប់វេលា»។—ចសព. ៥:១១; ៨៩:១៦
១៥. តើការហៅរកនាមព្រះយេហូវ៉ាមានន័យយ៉ាងណា?
១៥ យើងបន្តហៅរកនាមព្រះយេហូវ៉ា។ (យ៉ូល. ២:៣២; រ៉ូម ១០:១៣, ១៤) ការហៅរកនាមព្រះយេហូវ៉ាមិនគ្រាន់តែមានន័យថា យើងស្គាល់និងប្រើនាមរបស់ព្រះផ្ទាល់ប៉ុណ្ណោះទេ តែយើងក៏ស្គាល់បុគ្គលិកលក្ខណៈរបស់លោក ទុកចិត្តលោក ហើយរកជំនួយនិងការណែនាំពីលោកដែរ។ (ចសព. ២០:៧; ៩៩:៦; ១១៦:៤; ១៤៥:១៨) ម្យ៉ាងទៀត យើងប្រកាសប្រាប់អ្នកឯទៀតអំពីនាមនិងគុណសម្បត្តិរបស់លោក ហើយលើកទឹកចិត្តពួកគេឲ្យប្រែចិត្ត និងចាត់វិធានការដើម្បីពួកគេអាចទទួលការពេញចិត្តពីព្រះយេហូវ៉ា។—អេ. ១២:៤; សកម្ម. ២:២១, ៣៨
១៦. តើយើងអាចបង្ហាញយ៉ាងណាថាសាថានគឺជាអ្នកភូតភរ?
១៦ យើងសុខចិត្តរងទុក្ខដើម្បីនាមព្រះយេហូវ៉ា។ (យ៉ា. ៥:១០, ១១) ពេលយើងរក្សាភក្ដីភាពចំពោះព្រះយេហូវ៉ាមិនថាយើងរងទុក្ខក្ដី យើងបង្ហាញថាសាថានគឺជាអ្នកភូតភរ។ នៅសម័យរបស់យ៉ូប សាថានបានចោទប្រកាន់ពួកអ្នកបម្រើព្រះយេហូវ៉ាថា៖ «មនុស្សនឹងសុខចិត្តលះបង់អ្វីៗទាំងអស់ ដើម្បីរក្សាជីវិតខ្លួន»។ (យ៉ូប ២:៤) សាថានបានអះអាងថាមនុស្សនឹងបម្រើព្រះយេហូវ៉ានៅគ្រាសុខស្រួលតែប៉ុណ្ណោះ ហើយថាពួកគេនឹងបោះបង់ចោលលោក បើពួកគេជួបការពិបាក។ យ៉ូបដែលជាបុរសស្មោះត្រង់បានបង្ហាញថា ការអះអាងរបស់សាថានគឺមិនត្រឹមត្រូវ។ សព្វថ្ងៃនេះ យើងក៏អាចបង្ហាញថាទោះបីជាជីវិតរបស់យើងពិបាកយ៉ាងខ្លាំង ឬសាថានព្យាយាមធ្វើឲ្យយើងធ្លាក់ទឹកចិត្តក្ដី យើងនឹងមិនឈប់បម្រើព្រះយេហូវ៉ាឡើយ។ យើងអាចជឿជាក់ទាំងស្រុងថា ព្រះយេហូវ៉ានឹងការពារយើងដោយយល់ដល់នាមរបស់លោក។—យ៉ូន. ១៧:១១
១៧. ដូចបានរៀបរាប់នៅពេត្រុសទី១ ២:១២ តើមានរបៀបផ្សេងទៀតអ្វីដែលយើងអាចនាំឲ្យនាមរបស់ព្រះយេហូវ៉ាទទួលការសរសើរតម្កើង?
១៧ យើងខំអស់ពីសមត្ថភាពដើម្បីធ្វើឲ្យនាមរបស់ព្រះយេហូវ៉ាទទួលការសរសើរតម្កើង។ (សុភ. ៣០:៩; យេ. ៧:៨-១១) ដោយសារយើងតំណាងព្រះយេហូវ៉ានិងនាមរបស់លោក យើងអាចធ្វើឲ្យនាមរបស់ព្រះយេហូវ៉ាទទួលការសរសើរតម្កើងឬអាប់ឱន។ (សូមអាន ពេត្រុសទី១ ២:១២) ដូច្នេះ យើងចង់ខំអស់ពីសមត្ថភាពដើម្បីសរសើរព្រះយេហូវ៉ាតាមរយៈពាក្យសម្ដីនិងការប្រព្រឹត្តរបស់យើង។ ពេលយើងធ្វើដូច្នេះ ទោះបីជាយើងជាមនុស្សមិនល្អឥតខ្ចោះក្ដី យើងនឹងនៅតែអាចលើកតម្កើងនាមព្រះយេហូវ៉ា។
១៨. តើមានរបៀបផ្សេងទៀតអ្វីដែលយើងអាចបង្ហាញថានាមរបស់ព្រះយេហូវ៉ាគឺសំខាន់ចំពោះយើង? (សូមមើលកំណត់សម្គាល់ផងដែរ)
១៨ យើងចាត់ទុកនាមរបស់ព្រះយេហូវ៉ាថាសំខាន់ជាងកេរ្តិ៍ឈ្មោះរបស់យើង។ (ចសព. ១៣៨:២) ហេតុអ្វីនេះគឺសំខាន់ម្ល៉េះ? ពីព្រោះពេលយើងធ្វើអ្វីដែលព្រះយេហូវ៉ាពេញចិត្ត មនុស្សច្រើនតែមិនចូលចិត្ត ហើយនិយាយអាក្រក់អំពីយើង។a លោកយេស៊ូសុខចិត្តស្លាប់តាមរបៀបដែលគួរឲ្យអាម៉ាស់ជាឧក្រិដ្ឋជន ដើម្បីលើកតម្កើងនាមរបស់ព្រះយេហូវ៉ា។ គម្ពីរចែងថា លោក«មិនបានអាម៉ាស់ខ្មាស» គឺលោកមិនបានបារម្ភច្រើនពេកអំពីអ្វីដែលអ្នកឯទៀតគិតអំពីលោកនោះទេ។ (ហេ. ១២:២-៤) ផ្ទុយទៅវិញ លោកផ្ដោតអារម្មណ៍ទៅលើការធ្វើតាមបំណងប្រាថ្នារបស់ព្រះយេហូវ៉ា។—ម៉ាថ. ២៦:៣៩
១៩. តើអ្នកមានអារម្មណ៍យ៉ាងណាអំពីនាមរបស់ព្រះយេហូវ៉ា ហើយហេតុអ្វី?
១៩ យើងមានមោទនភាពដែលយើងអាចបម្រើព្រះយេហូវ៉ា ហើយចាត់ទុកការហៅថាជាសាក្សីព្រះយេហូវ៉ាជាឯកសិទ្ធិ។ យ៉ាងនេះ យើងសុខចិត្តរងការមើលងាយណាក៏ដោយដែលយើងជួប។ ចំពោះយើង នាមរបស់ព្រះយេហូវ៉ាគឺសំខាន់ជាងកេរ្ដិ៍ឈ្មោះរបស់យើង។ ដូច្នេះ សូមឲ្យយើងតាំងចិត្តបន្តសរសើរនាមរបស់ព្រះយេហូវ៉ា ទោះជាសាថានខំព្យាយាមរារាំងយើងពីការធ្វើដូច្នេះក៏ដោយ។ យ៉ាងនេះ យើងនឹងបង្ហាញថានាមរបស់ព្រះយេហូវ៉ាគឺសំខាន់បំផុតចំពោះយើង ដូចដែលសំខាន់បំផុតចំពោះលោកយេស៊ូគ្រិស្តដែរ។
ចម្រៀងលេខ១០ ចូរសរសើរព្រះយេហូវ៉ាជាព្រះរបស់យើង!
a សូម្បីតែយ៉ូបដែលជាបុរសស្មោះត្រង់ ក៏បានគិតច្រើនពេកអំពីកេរ្តិ៍ឈ្មោះរបស់ខ្លួនពេលបុរសបីនាក់បានចោទប្រកាន់គាត់។ ដំបូង ពេលយ៉ូបបាត់បង់កូននិងទ្រព្យសម្បត្តិទាំងអស់របស់គាត់ «គាត់មិនបានប្រព្រឹត្តអំពើខុសឆ្គង ឬចោទប្រកាន់ថាព្រះបានធ្វើខុសឡើយ»។ (យ៉ូប ១:២២; ២:១០) ប៉ុន្តែ ពេលគេចោទប្រកាន់ថាគាត់បានធ្វើខុស គាត់បានពោលពាក្យ«ដោយមិនបានគិត»។ គាត់គិតអំពីការនិយាយការពារកេរ្តិ៍ឈ្មោះរបស់ខ្លួន ច្រើនជាងការធ្វើឲ្យនាមឬកេរ្តិ៍ឈ្មោះរបស់ព្រះបានបរិសុទ្ធ។—យ៉ូប ៦:៣; ១៣:៤, ៥; ៣២:២; ៣៤:៥។