ការសិក្សាគម្ពីរដោយខ្លួនឯងនិងជាក្រុមគ្រួសារ គឺសំខាន់ណាស់!
១ ដូចនៅសតវត្សរ៍ទី១ដែរ គណៈអភិបាលយកចិត្តទុកដាក់យ៉ាងខ្លាំងចំពោះសុខុមាលភាពរាស្ត្ររបស់ព្រះយេហូវ៉ា។ (កិច្ច. ១៥:៦, ២៨) សេចក្ដីវេទនាជាខ្លាំងកាន់តែជិតមកដល់ហើយ គឺសំខាន់ណាស់ឲ្យអ្នកផ្សាយម្នាក់ៗបង្កើនឲ្យមានចំណងមិត្តភាពកាន់តែរឹងមាំជាមួយព្រះយេហូវ៉ា។ តើអ្នកនឹងប្រើពេលដែលធ្លាប់មានពីការសិក្សាសៀវភៅតាមក្រុមជំនុំពីមុន យ៉ាងដូចម្ដេច? ទាំងអស់គ្នាត្រូវបានលើកទឹកចិត្តឲ្យប្រើពេលនោះ ដើម្បីថ្វាយបង្គំព្រះយេហូវ៉ាជាក្រុមគ្រួសារ។ ចូរប្រើពេលនោះឲ្យប្រកបទៅដោយប្រាជ្ញា ដើម្បីឲ្យបានទទួលប្រយោជន៍ពីការសិក្សាបណ្ដាំរបស់ព្រះយ៉ាងយកចិត្តទុកដាក់។—ទំនុក. ១:១-៣; រ៉ូម ១១:៣៣, ៣៤
២ ពេលល្ងាចសិក្សាជាគ្រួសារ : មេគ្រួសារមានភារកិច្ចទទួលខុសត្រូវនៅចំពោះព្រះយេហូវ៉ា ស្តីពីការរៀបចំកម្មវិធីឲ្យបានទទួលប្រយោជន៍ពីការសិក្សាគម្ពីរជាក្រុមគ្រួសារយ៉ាងទៀងទាត់។ (ចោទិ. ៦:៦, ៧) បងប្អូនប្រុសស្រីដែលនៅលីវគ្មានគ្រួសារដែលមានភារកិច្ចនេះ អាចប្រើពេលនោះដើម្បីសិក្សាគម្ពីរ និងធ្វើការស្រាវជ្រាវដោយខ្លួនឯង។ នេះជាការសំខាន់ណាស់ចំពោះយើងម្នាក់ៗ ក្នុងការ‹លៃយកពេល›សម្រាប់សិក្សាហើយរំពឹងគិត ដើម្បីរក្សាឲ្យមានចំណងមិត្តភាពដ៏រឹងមាំជាមួយព្រះយេហូវ៉ា នៅ‹សម័យដ៏អាក្រក់នេះ›។—អេភ. ៥:១៥, ១៦
៣ អ្វីដែលត្រូវសិក្សា : ដោយប្រើប្រធានពីលិបិក្រមទស្សនាវដ្ដីប៉មយាមដែលចេញរៀងរាល់ខែធ្នូ អាចជួយអ្នកឲ្យរកព័ត៌មានដែលនឹងធ្វើឲ្យការសិក្សាគម្ពីរជាក្រុមគ្រួសារកាន់តែសប្បាយឡើង។ ជាមួយក្រុមគ្រួសារប្រហែលជាអាចពិចារណាអំពីអត្ថបទ«ចូរបង្រៀនកូនរបស់អ្នក» ឬ«ការស្រាវជ្រាវខាងគម្ពីរសម្រាប់ប្អូនៗ»ដែលមានចេញនៅទស្សនាវដ្ដីប៉មយាម។ សៀវភៅរឿងព្រះគម្ពីររបស់ខ្ញុំមានមេរៀនសំខាន់ៗសម្រាប់កូនក្មេងស្តីអំពីកិរិយាប្រព្រឹត្ត។ សៀវភៅព្រះគម្ពីរ បន្ទូលនៃព្រះឬក៏ពាក្យសំដីនៃមនុស្ស? មានចំណុចដ៏ល្អៗដើម្បីជួយយើងឲ្យពង្រឹងជំនឿនៃក្រុមគ្រួសារឲ្យទុកចិត្តទៅលើគម្ពីរ។
៤ ពេលណាអានគម្ពីរជាក្រុមគ្រួសារតាមសម្រួល ជួយឲ្យសមាជិកម្នាក់ៗក្នុងក្រុមគ្រួសារចងចាំនិងអាចអនុវត្តគោលការណ៍របស់ព្រះក្នុងជីវិតបាន។ (ហេ. ៤:១២) វិធីមួយទៀតប្រហែលជាអ្នកអាចមើល ហើយពិគ្រោះអំពីវីដេអូរបស់អង្គការយើង។ មានឧបករណ៍ និងវិធីជាច្រើនដែលអ្នកអាចជ្រើសរើសយកមកសិក្សា។ សូមសួរយោបល់ពីសមាជិកក្នុងក្រុមគ្រួសាររបស់អ្នក តើពួកគេចង់រៀន និងពិចារណាតាមរបៀបយ៉ាងណា?
៥ ឥឡូវជាពេលសំខាន់ : ការពង្រឹងឲ្យមានចំណងមិត្តភាពរឹងមាំជាមួយព្រះយេហូវ៉ា នឹងជួយយើងឲ្យត្រៀមខ្លួនដើម្បី«ចាំមើលសេចក្ដីសង្គ្រោះរបស់ព្រះយេហូវ៉ា»។ (និក្ខ. ១៤:១៣) «នៅក្នុងដំណមនុស្សវៀច ហើយខិលខូច»ដូចនេះ គឺចំបាច់ណាស់ឲ្យមាតាបិតាផ្ដល់ការណែនាំអប់រំពីព្រះ ដល់បុត្រធីតារបស់ខ្លួន។ (ភី. ២:១៥) បុត្រធីតាត្រូវការជំនួយដើម្បីអាចតស៊ូយកឈ្នះនឹងការប្រព្រឹត្តដែលប្រាសចាកសីលធម៌នៅឯសាលារៀន។ (សុ. ២២:៣, ៦) យកល្អឲ្យគូស្វាមីភរិយា ពង្រឹង«ពួរ៣ធ្លុង»របស់ខ្លួនជាមួយនឹងព្រះយេហូវ៉ា។ (សាស. ៤:១២) សូមឲ្យយើងប្រើពេលដែលនៅសល់ដោយប្រាជ្ញា ដើម្បីបង្កើន«សេចក្ដីជំនឿដ៏បរិសុទ្ធបំផុត»។—យូ. ២១
[សំណួរសម្រាប់អត្ថបទសិក្សា]
១. នៅគ្រានេះ តើគណៈអភិបាលយកចិត្តទុកដាក់ជាពិសេសអ្វីចំពោះយើង ហេតុអ្វី?
២. តើកម្មវិធីសិក្សាគម្ពីរជាក្រុមគ្រួសារអាចរៀបចំយ៉ាងណា?
៣, ៤. តើអាចប្រើឧបករណ៍ណាខ្លះដើម្បីសិក្សាគម្ពីរជាក្រុមគ្រួសារ ហើយមានប្រយោជន៍អ្វី?
៥. ហេតុអ្វីការសិក្សាគម្ពីរផ្ទាល់ខ្លួន និងសិក្សាគម្ពីរជាក្រុមគ្រួសារគឺសំខាន់ម្ល៉េះ?