ស្វែងរកអ្នកដែលសមទទួលដំណឹងល្អ
១. តើយើងអាចបង្ហាញចិត្តអបអរចំពោះឯកសិទ្ធិដែលយើងមានក្នុងកិច្ចបម្រើផ្សាយយ៉ាងដូចម្ដេច?
១ ក្នុងអំឡុងកិច្ចបម្រើផ្សាយរបស់លោកយេស៊ូ លោកបានព្យាយាមប្រឹងប្រែងយ៉ាងខ្លាំងដើម្បីផ្ដល់ការសម្រាលទុកដល់មនុស្សរាបសា តាមរយៈដំណឹងល្អ។ (អេ. ៦១:១, ២) យើងជាទូត និងជាអ្នកតំណាងគ្រិស្ត សព្វថ្ងៃនេះយើងមានឯកសិទ្ធិដើម្បីធ្វើតាមគំរូរបស់លោក ក្នុងការព្យាយាមប្រឹងប្រែងនិងយកចិត្តទុកដាក់ចំពោះការស្វែងរកមនុស្សដែលសមទទួលដំណឹងល្អក្នុងតំបន់ផ្សាយ។—ម៉ាថ. ១០:១១; ២កូ. ៥:២០
២. តើប៉ូលបានបង្ហាញការប្រែប្រួលតាមកាលៈទេសៈដោយរបៀបណា? តើមានលទ្ធផលអ្វី?
២ ចូរចេះប្រែប្រួល: សាវ័កប៉ូលមានទម្លាប់ទៅសាលាប្រជុំជាមុន ដើម្បីផ្សព្វផ្សាយដល់ជនជាតិយូដានិងអស់អ្នកដែលកាន់សាសនានោះ។ (សកម្ម. ១៤:១) នៅទីក្រុងភីលីព ប៉ូលនិងស៊ីឡាសបានស្វែងរកមនុស្សឯកន្លែងដែល‹ពួកគេគិតថាមានកន្លែងអធិដ្ឋាន›។ ពួកគេចាប់ផ្ដើមផ្សព្វផ្សាយដល់ក្រុមស្ត្រីនៅទីនោះ ហើយក្នុងចំណោមនោះមានស្ត្រីម្នាក់ឈ្មោះលីឌាបានទទួលយកសេចក្ដីពិតភ្លាមៗ។—សកម្ម. ១៦:១២-១៥
៣. បន្ថែមពីការផ្សព្វផ្សាយពីផ្ទះមួយទៅផ្ទះមួយ តើមានឱកាសអ្វីទៀតដែលអាចនាំឲ្យយើងមានអំណរក្នុងកិច្ចបម្រើផ្សាយ?
៣ បន្ថែមពីការផ្សព្វផ្សាយពីផ្ទះមួយទៅផ្ទះមួយ តើអ្នកអាចផ្សព្វផ្សាយនៅកន្លែងដឹកជញ្ជូនអ្នកដំណើរ សួនច្បារ កន្លែងធ្វើការ តាមផ្លូវ កន្លែងធ្វើជំនួញ និងក្នុងហាងនៅតំបន់ផ្សាយរបស់អ្នកដែរឬទេ? នៅអគារធំៗដែលមានផ្ទះច្រើនជាន់ ជាធម្មតាយើងមិនអាចចូលទៅក្នុងបានទេប្រសិនបើគ្មានការអនុញ្ញាតនោះ ប្រហែលជាអ្នកអាចផ្សព្វផ្សាយដោយសរសេរសំបុត្រឬដោយទូរស័ព្ទ។ ដោយចេះសង្កេតនិងចេះផ្លាស់ប្ដូរទៅតាមកាលៈទេសៈផ្សេងៗនៅក្នុងកិច្ចបម្រើផ្សាយ នោះនឹងនាំឲ្យអ្នកមាន«កិច្ចការដ៏ច្រើនរបស់លោកម្ចាស់»។—១កូ. ១៥:៥៨
៤. តើយើងមានជម្រើសអ្វីទៀត ប្រសិនបើក្រុមជំនុំរបស់យើងមិនមានតំបន់ផ្សាយធំ?
៤ អ្នកផ្សាយជាច្រើនមានឱកាសដើម្បីពង្រីកកិច្ចបម្រើផ្សាយរបស់ពួកគេ ដោយរើទៅក្រុមជំនុំផ្សេងទៀត ឬទៅបម្រើនៅក្រៅប្រទេស។ បងប្អូនខ្លះទៀតរៀនភាសាផ្សេង ដើម្បីផ្សព្វផ្សាយដល់មនុស្សដែលមកពីប្រទេសផ្សេង។
៥. តើយើងគួរមានទស្សនៈយ៉ាងណាអំពីគ្រាដែលយើងកំពុងតែរស់នៅ? តើយើងគួរតាំងចិត្តធ្វើអ្វី?
៥ យើងទាំងអស់គ្នាគួរចងចាំថា «វាលស្រូវសាលី គឺជាពិភពលោក»នេះ។ (ម៉ាថ. ៩:៣៧; ១៣:៣៨) ដោយដឹងថារបៀបរបបពិភពលោកដ៏អាក្រក់នេះជិតដល់ទីបញ្ចប់ហើយនោះ ម្នាក់ៗគួរគិតអំពីកាលៈទេសៈ ទេពកោសល្យ ឱកាស និងលទ្ធភាពរបស់ខ្លួន ឲ្យបានហ្មត់ចត់ដើម្បីពង្រីកកិច្ចបម្រើផ្សាយ។ ព្រះយេហូវ៉ាផ្ដល់ឲ្យយើងនូវការធានារ៉ាប់រងថា ប្រសិនបើយើងចាត់ទុកប្រយោជន៍រាជាណាចក្រព្រះជាមុន នោះលោកនឹងផ្ដល់ពរឲ្យយើងជាពិតប្រាកដ ដើម្បីឲ្យយើងអាចពង្រីកកិច្ចបម្រើផ្សាយរបស់ខ្លួន។—ម៉ាថ. ៦:៣៣