၂ မိၤၡ့

၁ ဒီးစီၤအံၣ်စရ့လး လၢအမ့ၢ် စီၤယၤကိာ်န့ၣ်​ လဲၤဃုာ်တၢ်ဒီးအဖိခွါတဖၣ်​ လၢကီၢ်အဲၤကူပတူး အပူၤလီၤ. ဒီးအဖိခွါ တဂၤစုာ်စုာ်န့ၣ်​ လဲၤဃုာ်တၢ်ဒီး အဟံၣ်ဖိဃီဖိလီၤ.+ စီၤယၤကိာ် အဖိခွါတဖၣ်​ အမံၤမ့ၢ်ဝဲ ၂ စီၤရူၤဘ့ၣ်, စီၤစူၤမ့းအိၣ်, စီၤလ့ၤဝံ, စီၤယူဒၤ,+ ၃ စီၤယံးစၣ်ကၢ်, စီၤစဘူလိၣ်, စီၤဘံၣ်ယၤမံၣ်, ၄ စီၤဒၣ်, စီၤနးသၤလံ, စီၤကး ဒီးစီၤအၤၡ့ၢ်လီၤ.+ ၅ ပှၤလၢ အဟဲလီၤစၢၤလီၤသွဲၣ်​ လၢစီၤယၤကိာ်န့ၣ်​ အိၣ်ဝဲ အဂၤနွံဆံလီၤ. ဘၣ်ဆၣ်​ စီၤယိၤသးန့ၣ်​ အိၣ်ပာ်စၢၤ လၢကီၢ်အဲၤကူပတူး အပူၤလံ.+ ၆ လၢခံန့ၣ်​ စီၤယိၤသးသံဝဲ+ တကးဒံးဘၣ်​ အဒီပုၢ်ဝဲၢ်ခဲလၢာ် ဒီးပှၤတစိၤန့ၣ်ခဲလၢာ် သံဝဲလီၤ. ၇ ဒီးပှၤအံၣ်စရ့လးဖိတဖၣ်​ သၣ်ထီၣ်အါထီၣ်ဝဲ ဒီဒူၣ်လီၤ. ဒီးအဝဲသ့ၣ်​ ဆဲးအါထီၣ်ဂီၢ်ထီၣ်​ ဒီးအဂံၢ်ဆူၣ်ထီၣ်​ ချ့မး တုၤဒၣ်လဲာ် အဝဲသ့ၣ်အိၣ်လၢ ကီၢ်ပူၤပှဲၤပှဲၤလီၤ.+

၈ လၢခံ စီၤပၤထီၣ်လၢ အသီတဂၤလၢ ကီၢ်အဲၤကူပတူးအပူၤလီၤ. ဒီးအဝဲတသ့ၣ်ညါ စီၤယိၤသးဘၣ်. ၉ အဝဲတဲဘၣ်​ အပှၤဂီၢ်မုၢ်သ့ၣ်တဖၣ်လၢ “ကွၢ်မီၤ, ပှၤအံၣ်စရ့လးဖိတဖၣ်န့ၣ်​ အနီၣ်ဂံၢ် အါန့ၢ်ဒံးပှၤ ဒီးအဂံၢ်ဆူၣ်ဒိၣ်န့ၢ်ဒံးပှၤလီၤ.+ ၁၀ ပကဘၣ်သူ တၢ်ကူၣ်သ့ ဒီးမၤအဝဲသ့ၣ်​ တမံၤမံၤသၢၤ. ပမ့ၢ်တမၤ ဒ်န့ၣ်ဘၣ်ဒီး အဝဲသ့ၣ်​ မ့ၢ်ဆဲးအါထီၣ်ဂီၢ်ထီၣ်​ ဒီးတၢ်ဒုးမ့ၢ်ကဲထီၣ်န့ၣ်​ အဝဲသ့ၣ်​ ကအိၣ်ဃူ ပဒုၣ်ပဒါတဖၣ်​ ဒ်သိး ကဒုးပှၤအဂီၢ် ဒီးအဝဲသ့ၣ်​ ကဟးထီၣ်ကွံာ်လၢ ထံကီၢ်တဘ့ၣ်အံၤ အပူၤလီၤ.”

၁၁ အဃိ ပှၤအဲၤကူပတူးဖိ ဃုထၢထီၣ်​ ခိၣ်နၢ်တဖၣ်လၢ ကုၢ်တဖၣ်​ အဖီခိၣ်​ ဒ်သိး ကဆီၣ်တံၢ်မၤနၢၤ အဝဲသ့ၣ်​ ခီဖျိ မၢဆူၣ်အဝဲသ့ၣ်​ လၢကမၤတၢ် နးနးကျံၤကျံၤလီၤ.+ ဒီးအဝဲသ့ၣ်​ သူၣ်ထီၣ်​ ဝ့ၢ်ပံသိၣ်​ ဒီးဝ့ၢ်ရၤမစ့ လၢအမ့ၢ် တၢ်ပာ်ဖှိၣ်တၢ်အလီၢ်လၢ ဖၤရိၤအဂီၢ်လီၤ.+ ၁၂ အဝဲသ့ၣ်​ ဆီၣ်တံၢ်မၤနၢၤဝဲ ပှၤအံၣ်စရ့လးဖိတဖၣ်​ ဒံးဆူၣ်ထီၣ်​ ဒီးပှၤအံၣ်စရ့လးဖိတဖၣ်​ အနီၣ်ဂံၢ် ဒံးအါထီၣ်​ ဒီးပှၤအံၣ်စရ့လးဖိ ရၤလီၤအသး ဒံးအါထီၣ်ဝဲလီၤ. ဒီးခီဖျိလၢ ပှၤအံၣ်စရ့လးဖိအဃိ အဝဲသ့ၣ်ပျံၤတၢ်ဒိၣ်မးလီၤ.+ ၁၃ လၢတၢ်န့ၣ်အဃိ ပှၤအဲၤကူပတူးဖိတဖၣ်​ မၢဆူၣ်​ ပှၤအံၣ်စရ့လးဖိတဖၣ်​ လၢအဝဲသ့ၣ်ကကဲကုၢ် ဒီးမၤတၢ် နးနးကျံၤကျံၤလီၤ.+ ၁၄ ဒီးပှၤအဲၤကူပတူးဖိ မၤကီမၤခဲ အဝဲသ့ၣ်​ ခီဖျိလၢ မၢဆူၣ်အဝဲသ့ၣ်​ လၢကမၤတၢ် နးနးကျံၤကျံၤလီၤ. အဝဲသ့ၣ်​ ဘၣ်မၤဝဲ ဘံလၣ်မၠ့ၤ ဒီးအူးခဲတဖၣ်​ ဒီးဘၣ်မၤဝဲ ကုၢ်အတၢ်မၤ ကိးကလုာ်ဒဲးလၢ တၢ်ပျီပူၤလီၤ. မ့ၢ်လီၤ, ပှၤအဲၤကူပတူးဖိ မၢဆူၣ်အဝဲသ့ၣ်​ လၢကမၤကုၢ်အတၢ်မၤ ကိးကလုာ်ဒဲးလၢ တၢ်အိၣ်သး နးမးအပူၤလီၤ.+

၁၅ လၢခံ အဲၤကူပတူး အစီၤပၤတဲတၢ်ဒီး နီၢ်ၡံးပရၤ ဒီးနီၢ်ပူအၤ လၢအမ့ၢ် ပှၤဧ့ၤဘြံၤမုၣ်လၢ အဒုးအိၣ်ဖျဲၣ်ထီၣ်စၢၤ ပှၤဖိတဖၣ်လီၤ. ၁၆ ဒီးအတဲဘၣ်​ အဝဲသ့ၣ်လၢ “ဖဲသုဒုးအိၣ်ဖျဲၣ်ထီၣ်​ ပှၤဧ့ၤဘြံၤမုၣ်တဖၣ်​ အဖိအခါ+ မ့ၢ်အဝဲသ့ၣ်​ အိၣ်ဖျဲၣ်ထီၣ်​ အဖိမုၣ်​ မ့တမ့ၢ် ဖိခွါလဲၣ်န့ၣ်​ သုကဘၣ်​ ကွၢ်ထံလီၤ. မ့မ့ၢ် ပိာ်ခွါန့ၣ်​ သုကဘၣ်​ မၤသံအီၤလီၤ. မ့မ့ၢ် ပိာ်မုၣ်န့ၣ်​ အကဘၣ်​ ဆဲးအိၣ်မူဝဲလီၤ.” ၁၇ ဘၣ်ဆၣ်​ ပှၤလၢ အဒုးအိၣ်ဖျဲၣ်ထီၣ်စၢၤ ပှၤဖိတဖၣ်န့ၣ်​ ပျံၤဝဲယွၤလၢ အမ့ၢ်အတီတဂၤအဃိ အဝဲသ့ၣ်​ တမၤဝဲဒ် အဲၤကူပတူး အစီၤပၤ မၢအဝဲသ့ၣ်အသိးဘၣ်. လၢတၢ်န့ၣ်အလီၢ် အဝဲသ့ၣ်​ ပာ်မူဒံး ပိာ်ခွါဖိသၣ်​ တဖၣ်လီၤ.+ ၁၈ လၢခံ အဲၤကူပတူးအစီၤပၤ ကိးဝဲပှၤလၢ အဒုးအိၣ်ဖျဲၣ်ထီၣ်စၢၤ ပှၤဖိတဖၣ်​ ဒီးတဲအဝဲသ့ၣ်လၢ “ဘၣ်မနုၤအဃိ သုပာ်မူဒံး ပိာ်ခွါဖိသၣ်​ တဖၣ်လဲၣ်.” ၁၉ ပိာ်မုၣ်လၢ အဒုးအိၣ်ဖျဲၣ်ထီၣ်စၢၤ ပှၤဖိတဖၣ်န့ၣ်​ တဲဖၤရိၤလၢ “ပှၤဧ့ၤဘြံၤမုၣ်တဖၣ်န့ၣ်​ တလီၤဂာ်ဒီး ပှၤအဲၤကူပတူးမုၣ်​ တဖၣ်ဘၣ်. အဝဲသ့ၣ်​ အသးဆူၣ်ဒိၣ်မးအဃိ တချုးလၢ ပိာ်မုၣ်လၢ အဒုးအိၣ်ဖျဲၣ်ထီၣ်စၢၤပှၤဖိ လဲၤတုၤလၢ အဝဲသ့ၣ်​ အအိၣ်ဒံးဘၣ်အခါန့ၣ်​ အဝဲသ့ၣ်​ အိၣ်ဖျဲၣ်ထီၣ်ပာ်စၢၤ အဖိဝံၤလံ.”

၂၀ ဒီးကစၢ်ယွၤဆိၣ်ဂ့ၤ ပှၤလၢ အဒုးအိၣ်ဖျဲၣ်ထီၣ်စၢၤ ပှၤဖိတဖၣ်​ ဒီးပှၤအံၣ်စရ့လးဖိတဖၣ်​ အနီၣ်ဂံၢ် ဆဲးအါထီၣ်ဝဲကွ့ၢ်ကွ့ၢ် ဒီးအဝဲသ့ၣ်​ အဂံၢ်အဘါ ဆူၣ်ဝဲဒိၣ်မးလီၤ. ၂၁ ဒီးမ့ၢ်လၢ ပှၤလၢအဒုးအိၣ်ဖျဲၣ်ထီၣ်စၢၤ ပှၤဖိတဖၣ်န့ၣ်​ ပျံၤယွၤလၢ အမ့ၢ်အတီတဂၤအဃိ လၢခံ ကစၢ်ယွၤ ဆိၣ်ဂ့ၤအဝဲသ့ၣ်​ ဒ်သိးအဝဲသ့ၣ်​ ကအိၣ်ဒီး အနီၢ်ကစၢ် အဟံၣ်ဖိဃီဖိလီၤ. ၂၂ လၢခံ ဖၤရိၤ ဟ့ၣ်လီၤတၢ်ကလုၢ် လၢအပှၤဂီၢ်မုၢ် ခဲလၢာ်အအိၣ်လၢ “သုကဘၣ်​ ကွံာ်လီၤ ပှၤဧ့ၤဘြံၤဖိ အဖိခွါလၢအအိၣ်ဖျဲၣ်ထီၣ်​ သီသီတဖၣ်​ ကိးဂၤဒဲးလၢ ထံကျိနံၤလါ အပူၤလီၤ. ဘၣ်ဆၣ်​ သုကဘၣ်ပာ်မူ အဝဲသ့ၣ်အဖိမုၣ်​ ကိးဂၤဒဲးလီၤ.”+

၂ ဖဲန့ၣ်အဆၢကတီၢ် ပိာ်ခွါ လၢအဟဲလီၤစၢၤလီၤသွဲၣ်လၢ လ့ၤဝံအဒူၣ်​ အကျါတဂၤန့ၣ်​ ဖျီအသးဒီး ပိာ်မုၣ်​ လၢအဟဲလီၤစၢၤလီၤသွဲၣ်​ လၢလ့ၤဝံအဒူၣ်​ အကျါတဂၤလီၤ.+ ၂ ဒီးပိာ်မုၣ်တဂၤန့ၣ်​ ဒၢထီၣ်​ ဒီးအိၣ်ဖျဲၣ်ထီၣ်ဝဲ အဖိခွါတဂၤလီၤ. ဒီးမ့ၢ်လၢ အထံၣ်ဘၣ်ဝဲလၢ အဖိခွါန့ၣ်​ လီၤအဲၣ်ဒိၣ်မးအဃိ အပာ်ခူၣ်သူၣ်အီၤ သၢလါလီၤ.+ ၃ ဘၣ်ဆၣ်​ ဖဲအပာ်ခူသူၣ်အီၤ တန့ၢ်လၢၤဘၣ်အခါ+ အဟံးန့ၢ်ဝဲ နာ်တဖျၢၣ်​ လၢအဘၣ်​ တၢ်တ့အီၤလၢ တပိၢ်ဆှဲ ဒီးဖှူအီၤလၢ ကျဲတံးလီၤ. ဒီးအဝဲ ပာ်လီၤဖိသၣ်လၢအပူၤ ဝံၤဒီးပာ်လီၤနာ်လၢ တပိၢ်တဖၣ်​ အကျါလၢ ထံကျိနံၤလါ အပူၤလၢ အဘူးဒီး ထံကၢၢ်နံၤန့ၣ်လီၤ. ၄ ဘၣ်ဆၣ်​ အနီ+ ဆၢထၢၣ်ကွၢ်စိအီၤ လၢအယံၤ ဒ်သိး ကထံၣ်ဘၣ်ဝဲလၢ တၢ်ကမၤအသးဒီးအီၤ ဒ်လဲၣ်န့ၣ်လီၤ.

၅ ဖဲဖၤရိၤ အဖိမုၣ်​ လဲၤလုၢ်ထံလၢ ထံကျိနံၤလါပူၤအခါ အကုၢ်မုၣ်တဖၣ်​ ဟးဝဲလၢ ထံကျိနံၤလါ အကပၤလီၤ. ဒီးအဝဲ ထံၣ်ဘၣ်ဝဲ နာ်တဖျၢၣ်​ အိၣ်လၢတပိၢ်တဖၣ်​ အကျါလီၤ. အဃိ အဝဲမၢလီၤဝဲ အကုၢ်မုၣ်တဂၤ တဘျီဃီ ဒ်သိး အကလဲၤဟံးန့ၢ်အီၤအဂီၢ်လီၤ.+ ၆ ဒီးဖဲအဝဲ အိးထီၣ်ဝဲ နာ်တဖျၢၣ်န့ၣ်အခါ အဝဲထံၣ်ဝဲဖိသၣ်​ ဒီးဖိသၣ်ပိာ်ခွါတဂၤအံၤ ဟီၣ်ဝဲလီၤ. ဒီးအတဲဝဲလၢ “အဝဲမ့ၢ် ပှၤဧ့ၤဘြံၤဖိတဖၣ်​ အဖိတဂၤလီၤ.” ဘၣ်ဆၣ်​ အသးကညီၤဘၣ်အီၤလီၤ. ၇ ဒီးအနီန့ၣ်​ တဲဘၣ်​ ဖၤရိၤအဖိမုၣ်လၢ “မ့ၢ်ယကဘၣ်​ လဲၤကိးန့ၢ် ပှၤဧ့ၤဘြံၤမုၣ်တဂၤလၢ အကဒုးအီၣ်နုၢ် ဖိသၣ်အံၤ လၢနဂီၢ်ဧါ.” ၈ ဒီးဖၤရိၤ အဖိမုၣ်​ တဲအီၤလၢ “လဲၤမီၤ.” အဃိ ပိာ်မုၣ်ဖိသၣ်န့ၣ်​ လဲၤကိးဝဲ ဖိသၣ်တဂၤအံၤအမိၢ် တဘျီဃီလီၤ.+ ၉ ဒီးဖၤရိၤ အဖိမုၣ်​ တဲဘၣ်​ ပိာ်မုၣ်တဂၤအံၤလၢ “က့ၤကိးဖိသၣ်အံၤ ဒီးဒုးအီၣ်အီၤနုၢ် လၢယဂီၢ် ဒီးယကဟ့ၣ်နၤ အပှ့ၤလီၤ.” အဃိ ပိာ်မုၣ်တဂၤန့ၣ်​ က့ၤကိးဖိသၣ်​ ဒီးဒုးအီၣ်အီၤနုၢ်လီၤ. ၁၀ ဖဲဖိသၣ်န့ၣ်​ ဒိၣ်ထီၣ်အခါ အဝဲလဲၤကိးအီၤလၢ ဖၤရိၤ အဖိမုၣ်အအိၣ်​ ဒီးဖၤရိၤအဖိမုၣ်​ ကွၢ်လုၢ်ဖိအီၤလီၤ.+ ဒီးဖၤရိၤ အဖိမုၣ်​ ကိးန့ၢ်အမံၤ လၢစီၤမိၤၡ့* ဒီးတဲဝဲလၢ “မ့ၢ်လၢ ယထုးထီၣ်အီၤ လၢထံကျါ အဃိလီၤ.”+

၁၁ လၢခံ ဖဲစီၤမိၤၡ့ အနီၢ်ဒိၣ်ထီၣ်အခါ အဝဲလဲၤလၢ အဒီပုၢ်ဝဲၢ် ပှၤဧ့ၤဘြံၤဖိတဖၣ်အအိၣ်​ ဒ်သိး အကလဲၤကွၢ်ဝဲ တၢ်မၤလၢ အဝဲသ့ၣ်​ ဘၣ်မၤဝဲ နးနးကျံၤကျံၤန့ၣ်လီၤ.+ ဖဲန့ၣ်အခါ အထံၣ်ဘၣ်ဝဲလၢ ပှၤအဲၤကူပတူးဖိတဂၤ တီၢ်ဝဲ အဒီပုၢ်ဝဲၢ် ပှၤဧ့ၤဘြံၤဖိတဂၤလီၤ. ၁၂ ဒီးအဝဲ ကွၢ်တၢ်လၢ အခိၣ်အဃၢၤ ဒီးတထံၣ်​ ပှၤနီတဂၤဘၣ်အဃိ အဝဲ မၤသံဝဲ ပှၤအဲၤကူပတူးဖိ ဒီးဘျၢလီၤအီၤလၢ မဲးဖီလာ်လီၤ.+

၁၃ ဒီးအဝဲလဲၤကဒီး လၢခံတနံၤ ဒီးအထံၣ်ဝဲ ပှၤဧ့ၤဘြံၤခွါခံဂၤ ထိလိာ်အသးလီၤ. ဒီးအဝဲတဲဘၣ်​ ပှၤလၢအမၤကမၣ်တၢ် တဂၤန့ၣ်လၢ “ဘၣ်မနုၤအဃိ နထိ နသကိးလဲၣ်.”+ ၁၄ ဒီးပှၤတဂၤန့ၣ်​ တဲဆၢအီၤလၢ “မတဂၤ ဃုထၢထီၣ်နၤလၢ ပှၤခိၣ်ပှၤနၢ် ဒီးစံၣ်ညီၣ်ကွီၢ် လၢပဖီခိၣ်လဲၣ်. မ့ၢ်နကမၤသံယၤ ဒ်နမၤသံ ပှၤအဲၤကူပတူးဖိတဂၤ အသိးဧါ.”+ ဒီးစီၤမိၤၡ့ပျံၤတၢ်ဒီး တဲဝဲလၢ “တၢ်ဂ့ၢ်တခါအံၤဒု ပှၤသ့ၣ်ညါလံသၢၤ.”

၁၅ ဒီးဖၤရိၤနၢ်ဟူ တၢ်ဂ့ၢ်တခါအံၤအဃိ အဝဲဃုမၤသံ စီၤမိၤၡ့လီၤ. ဘၣ်ဆၣ်​ စီၤမိၤၡ့ ဃ့ၢ်ထီၣ်ကွံာ်လၢ ဖၤရိၤအအိၣ်​ ဒီးလဲၤအိၣ်လၢ ကီၢ်မံးဒယၣ်လီၤ.+ ဒီးအဝဲဆ့ၣ်နီၤဝဲလၢ ထံကမျၢ* အကပၤလီၤ. ၁၆ ပှၤမံးဒယၣ်​ အပှၤလုၢ်တၢ်ဒိၣ်တဂၤန့ၣ်+ အဖိမုၣ်အိၣ်ဝဲ နွံဂၤလီၤ. ဒီးအဝဲသ့ၣ်​ ဟဲဒၢၣ်ထံ ဒီးမၤပှဲၤဝဲ ထံလၢကျိးအပူၤ ဒ်သိးကဒုးအီဝဲ အပၢ်အသိတဖၣ်အဂီၢ်လီၤ. ၁၇ ဘၣ်ဆၣ်​ ဒ်ညီနုၢ်အသိး ပှၤကွၢ်သိတဖၣ်န့ၣ်​ နီဟးထီၣ်​ အဝဲသ့ၣ်လီၤ. ဖဲန့ၣ်န့ၣ်​ စီၤမိၤၡ့ ဂဲၤဆၢၣ်ထၢၣ်​ ဒီးမၤစၢၤ ပိာ်မုၣ်တဖၣ်အံၤ ဒီးဒုးအီဝဲ အသိတဖၣ်​ လၢထံလီၤ. ၁၈ ဖဲအဝဲသ့ၣ်​ ဟဲက့ၤတုၤလၢ ဟံၣ်အခါ အပၢ်စီၤရဧူၤအ့လး*+ တဲဝဲလၢ “တနံၤညါအံၤ ဘၣ်မနုၤအဃိ သုဟဲက့ၤ တုၤလၢဟံၣ်​ ချ့မးလဲၣ်.” ၁၉ အဝဲသ့ၣ်​ တဲဆၢဝဲလၢ “ပှၤအဲၤကူပတူးဖိတဂၤ+ မၤပူၤဖျဲးပှၤလၢ ပှၤကွၢ်သိတဖၣ်​ အအိၣ်လီၤ. တကးဒံးဘၣ်​ အဝဲ ဒၢၣ်န့ၢ်ပှၤထံ ဒီးဒုးအီစ့ၢ်ကီး ပသိတဖၣ်​ လၢထံလီၤ.” ၂၀ ဒီးအဝဲတဲဘၣ်​ အဖိမုၣ်တဖၣ်လၢ “အခဲအံၤ အဝဲအိၣ်ဖဲလဲၣ်. ဘၣ်မနုၤအဃိ သုပာ်တ့ၢ်အီၤ ဖဲန့ၣ်လဲၣ်. လဲၤကိးအီၤ ဒ်သိး အကဟဲအီၣ်သကိးတၢ်ဒီးပှၤမီၤ.” ၂၁ လၢခံ စီၤမိၤၡ့ သးလီၤပလိာ်လၢ အကအိၣ်ဒီးအီၤ ဒီးအဝဲဟ့ၣ်လီၤ စီၤမိၤၡ့ လၢအဖိမုၣ်​ နီၢ်စံးဖိရၤ+ ဒ်အမါ အသိးလီၤ. ၂၂ လၢခံ နီၢ်စံးဖိရၤ အိၣ်ဖျဲၣ်ထီၣ်ဝဲ အဖိခွါတဂၤ ဒီးစီၤမိၤၡ့ ကိးန့ၢ်ဝဲ အမံၤလၢ စီၤက့းရၡိၣ်*+ ဒီးတဲဝဲလၢ “ယကဲထီၣ်​ ပှၤထံဂၤကီၢ်ဂၤဖိ လၢထံကီၢ်အဂၤတဘ့ၣ်​ အပူၤလီၤ.”+

၂၃ အါနံၣ်အါလါ ဝံၤအလီၢ်ခံ ကီၢ်အဲၤကူပတူး အစီၤပၤတဂၤန့ၣ်​ သံဝဲလီၤ.+ ဘၣ်ဆၣ်​ ပှၤအံၣ်စရ့လးဖိတဖၣ်​ ဆဲးကအုကစွါဝဲ လၢတၢ်မၢကဲကုၢ်အီၤ အဃိလီၤ. ဒီးအဝဲသ့ၣ်​ အတၢ်ကိးပသူထီၣ်လၢ တၢ်မၤစၢၤအဂီၢ် ခီဖျိလၢ တၢ်မၢကဲကုၢ်အီၤ အဃိန့ၣ်​ တုၤလၢ ကစၢ်ယွၤ အအိၣ်လီၤ.+ ၂၄ ဒီးကစၢ်ယွၤ နၢ်ဟူ အဝဲသ့ၣ်​ အတၢ်ကအုကစွါ+ ဒီးကစၢ်ယွၤ သ့ၣ်နီၣ်ထီၣ်က့ၤ အတၢ်အၢၣ်လီၤအီလီၤ လၢအမၤတ့ၢ်ဝဲဒီး စီၤအၤဘြၤဟၣ်, စီၤအံၤစဲး ဒီးစီၤယၤကိာ်လီၤ.+ ၂၅ အဃိ ကစၢ်ယွၤ ပာ်သူၣ်ပာ်သးဝဲ ပှၤအံၣ်စရ့လးဖိတဖၣ်​ ဒီးထံၣ်ဝဲ အဝဲသ့ၣ်​ အတၢ်နးတၢ်ဖှီၣ်လီၤ.

၃ စီၤမိၤၡ့ ကွၢ်န့ၢ်ဝဲ အမံၤပှၢ် စီၤယံးသရိၤ+ လၢအမ့ၢ် ပှၤမံးဒယၣ်ဖိ အပှၤလုၢ်တၢ်ဒိၣ်တဂၤန့ၣ်​ အသိလီၤ. ဖဲအလဲၤနီသိလၢ ပှၢ်မုၢ်ကနၢ အမုၢ်နုာ် တကပၤအခါ အဝဲလဲၤတုၤလၢ ယွၤလၢအမ့ၢ်အတီတဂၤ အကစၢၢ် ဃိၤရ့းလီၤ.+ ၂ ဒီးယဟိဝၤယွၤ အမူခိၣ်ကလူးတဂၤ ဟဲလီၣ်ဖျါထီၣ်အသးလၢ စီၤမိၤၡ့အအိၣ်​ လၢသပှီာ်တၤဆှုၣ်​ လၢမ့ၣ်အူ ကဲၤဝဲတခိၣ်အပူၤလီၤ.+ ဒီးအဝဲ ဆဲးကွၢ်ဝဲ ဒီးထံၣ်ဝဲလၢ သပှီာ်တၤဆှုၣ်တခိၣ်န့ၣ်​ ကဲၤဝဲ ဘၣ်ဆၣ်​ မ့ၣ်အူတအီၣ်ကွံာ် အီၤဘၣ်. ၃ အဃိ စီၤမိၤၡ့ တဲဝဲလၢ “တၢ်တခါအံၤ လီၤဆီဒိၣ်မး. ဘၣ်မနုၤအဃိ မ့ၣ်အူတအီၣ်ကွံာ် သပှီာ်တခိၣ်အံၤဘၣ်လဲၣ်. ယကလဲၤကွၢ်တထံၣ်.” ၄ ဒီးယဟိဝၤယွၤ ထံၣ်ဝဲလၢ စီၤမိၤၡ့ လဲၤဘူးထီၣ်ဝဲ ဒ်သိးကကွၢ်ဝဲအဂီၢ် အဃိကစၢ်ယွၤ ကိးထီၣ်လၢ သပှီာ်တၤဆှုၣ်တခိၣ်​ အပူၤလၢ “စီၤမိၤၡ့ဧၢ, စီၤမိၤၡ့ဧၢ” ဒီးစီၤမိၤၡ့ ကိးဆၢဝဲလၢ “မ့ၢ်, ကစၢ်ဧၢ.” ၅ ဒီးကစၢ်ယွၤ တဲအီၤလၢ “တဘၣ်​ ဟဲသုးဘူးထီၣ်နသး လၢၤတဂ့ၤ. တၢ်လီၢ်လၢ နဆၢထၢၣ်အံၤ မ့ၢ်တၢ်လီၢ် လၢအစီဆှံအဃိ ဘ့ၣ်လီၤကွံာ် နခီၣ်ဖံးတက့ၢ်.”

၆ ဒီးကစၢ်ယွၤ ဆဲးတဲအီၤလၢ “ယမ့ၢ် နမိၢ်ပၢ်ဖံဖုလၢပျၢၤ အယွၤ, စီၤအၤဘြၤဟၣ်​ အယွၤ,+ စီၤအံၤစဲး အယွၤ+ ဒီးစီၤယၤကိာ် အယွၤလီၤ.”+ ဒီးစီၤမိၤၡ့န့ၣ်​ ကွၢ်ကစၢ်ယွၤ တဘူၣ်ဘၣ်အဃိ မၤဘၢဃာ် အမဲာ်လီၤ. ၇ ယဟိဝၤယွၤ ဆဲးတဲဝဲလၢ “ယပှၤဂီၢ်မုၢ်လၢ အအိၣ်လၢ ကီၢ်အဲၤကူပတူးအပူၤ ဘၣ်တၢ်မၤနးမၤဖှီၣ်အီၤ ဒ်လဲၣ်န့ၣ်​ ယထံၣ်ဘၣ်အီၤ သပှၢ်တၢၢ်လံ. ဒီးအဝဲသ့ၣ်​ အတၢ်ကိးပသူထီၣ်​ ခီဖျိလၢ ပှၤမၢဆူၣ်​ အဝဲသ့ၣ်လၢ ကမၤတၢ်မၤအဃိန့ၣ်​ ယနၢ်ဟူဘၣ်လံ. တၢ်လၢအဝဲသ့ၣ်​ တူၢ်ဘၣ်ခီၣ်ဘၣ်ဝဲတဖၣ်န့ၣ်​ ယသ့ၣ်ညါအီၤ ဂ့ၤဂ့ၤလီၤ.+ ၈ ယကလဲၤလီၤ မၤထူၣ်ဖျဲးထီၣ်​ အဝဲသ့ၣ်လၢ ပှၤအဲၤကူပတူးဖိတဖၣ်​ အစုပူၤ+ ဒီးကဒုးဟးထီၣ်ကွံာ် အဝဲသ့ၣ်လၢ ကီၢ်တဘ့ၣ်န့ၣ်အပူၤ ဒီးဆှၢအဝဲသ့ၣ်ဆူ ကီၢ်တဘ့ၣ်လၢ အဂ့ၤဒီး အလဲၢ်လီၤ. ကီၢ်တဘ့ၣ်အံၤ တၢ်နုၢ်ထံ ဒီးကနဲစီ ယွၤလီၤဝဲလၢအပူၤ+ ဒီးမ့ၢ်ဝဲ ကီၢ်လၢ ပှၤကနၤဧၣ်ဖိ, ပှၤဃ့ၤသးဖိ, ပှၤအမိၢ်ဖိ, ပှၤပရးစၤဖိ, ပှၤဃံၤဝံဖိ ဒီးပှၤယဘူၣ်ဖိတဖၣ်​ အိၣ်ဝဲအလီၢ်လီၤ.+ ၉ ပှၤအံၣ်စရ့လးဖိတဖၣ်​ အတၢ်ကိးပသူန့ၣ်​ တုၤလၢ ယအိၣ်လံ. ဒီးယထံၣ်ဘၣ်လၢ ပှၤအဲၤကူပတူးဖိသ့ၣ်တဖၣ်​ ဆီၣ်တံၢ်မၤနၢၤ အဝဲသ့ၣ်​ နးနးကျံၤကျံၤလီၤ.+ ၁၀ အခဲအံၤ ယကဆှၢလီၤနၤလၢ ဖၤရိၤအအိၣ်​ ဒီးနကဘၣ်ထုးထီၣ်​ ယပှၤဂီၢ်မုၢ် ပှၤအံၣ်စရ့လးဖိတဖၣ်​ လၢကီၢ်အဲၤကူပတူး အပူၤလီၤ.”+

၁၁ ဘၣ်ဆၣ်​ စီၤမိၤၡ့တဲ ယွၤလၢအမ့ၢ်အတီ တဂၤလၢ “ဒ်သိး ယကလဲၤလၢ ဖၤရိၤအအိၣ်​ ဒီးထုးထီၣ်ကွံာ် ပှၤအံၣ်စရ့လးဖိ လၢကီၢ်အဲၤကူပတူးအဂီၢ် ယမ့ၢ် မတဂၤလဲၣ်.” ၁၂ ကစၢ်ယွၤ တဲဆၢအီၤလၢ “ယကအိၣ်ဒီးနၤလီၤ.+ ဖဲနဒုးဟးထီၣ်ကွံာ် ပှၤဂီၢ်မုၢ်လၢ ကီၢ်အဲၤကူပတူး ဝံၤအလီၢ်ခံ သုကဘူၣ်ထီၣ်ဘါထီၣ်​ ယွၤလၢ အမ့ၢ်အတီတဂၤလၢ ကစၢၢ်တဖျၢၣ်အံၤ အလိၤလီၤ. တၢ်အဝဲန့ၣ်​ ကမ့ၢ် တၢ်ပနီၣ်တခါလၢ နဂီၢ်လၢ အကပာ်ဖျါထီၣ်ဝဲလၢ ယဲဒၣ်အံၤ ယမ့ၢ်ပှၤလၢ အမၢလီၤနၤလီၤ.”+

၁၃ ဘၣ်ဆၣ်​ စီၤမိၤၡ့ တဲယွၤလၢ အမ့ၢ်အတီတဂၤလၢ “အဒိ ယမ့ၢ်လဲၤလၢ ပှၤအံၣ်စရ့လးဖိ တဖၣ်အအိၣ်​ ဒီးတဲအဝဲသ့ၣ်လၢ ‘သုမိၢ်ပၢ်ဖံဖု လၢပျၢၤတဖၣ်​ အကစၢ်ယွၤ ဆှၢလီၤယၤလၢ သုအိၣ်’ ဒီးအဝဲသ့ၣ်​ မ့ၢ်သံကွၢ်ယၤလၢ ‘အမံၤဒ်လဲၣ်’ န့ၣ်+ ယကဘၣ်တဲ အဝဲသ့ၣ်​ ဒ်လဲၣ်.” ၁၄ အဃိ ကစၢ်ယွၤ တဲစီၤမိၤၡ့လၢ “ယကကဲထီၣ်​ တၢ်လၢယအဲၣ်ဒိး ကဲထီၣ်လီၤ.”*+ ဒီးအဆဲးတဲဝဲလၢ “နကဘၣ်တဲ ပှၤအံၣ်စရ့လးဖိတဖၣ်လၢ ပှၤတဂၤလၢ အကိးလီၤအသးလၢ ‘ယကကဲထီၣ်န့ၣ်​ ဆှၢလီၤယၤလၢ သုအိၣ်လီၤ.’”+ ၁၅ ဒီးကစၢ်ယွၤ တဲကဒီး စီၤမိၤၡ့လၢ

“နကဘၣ်တဲ ပှၤအံၣ်စရ့လးဖိလၢ ‘ယဟိဝၤယွၤ လၢအမ့ၢ် သုမိၢ်ပၢ်ဖံဖု လၢပျၢၤတဖၣ်​ အယွၤ, စီၤအၤဘြၤဟၣ်​ အယွၤ,+ စီၤအံၤစဲး အယွၤ+ ဒီးစီၤယၤကိာ် အယွၤန့ၣ်+ မၢလီၤယၤလၢ သုအိၣ်လီၤ.’ အဝဲန့ၣ်​ မ့ၢ်ယမံၤ လီၤထူလီၤယိာ်+ ဒီးအကဘၣ်​ တၢ်သ့ၣ်နီၣ်ထီၣ်အီၤ အစိၤစိၤအဃၣ်ဃၣ်လီၤ. ၁၆ အဃိ လဲၤဒီးကိးဖှိၣ်​ အံၣ်စရ့လး အပှၤသူၣ်က့သးပှၢ်တဖၣ်​ ဒီးတဲအဝဲသ့ၣ်လၢ ‘ယဟိဝၤယွၤ လၢအမ့ၢ် သုမိၢ်ပၢ်ဖံဖု လၢပျၢၤတဖၣ်​ အယွၤ, စီၤအၤဘြၤဟၣ်​ အယွၤ, စီၤအံၤစဲး အယွၤ ဒီးစီၤယၤကိာ်အယွၤန့ၣ်​ လီၣ်ဖျါထီၣ်အသး လၢယအိၣ်​ ဒီးအတဲဝဲလၢ “ယပာ်သူၣ်ပာ်သးသုလံ+ ဒီးလၢကီၢ်အဲၤကူပတူးအပူၤ ပှၤမၤသုဒ်လဲၣ်န့ၣ်​ ယထံၣ်ဘၣ်လံ. ၁၇ အဃိ ယတဲလၢ ယကထုးထီၣ်ကွံာ်သုလၢ တၢ်နးတၢ်ဖှီၣ်လၢ သုထံၣ်ဘၣ်အီၤလၢ+ ပှၤအဲၤကူပတူးဖိတဖၣ်​ အစုပူၤ ဒီးယကဆှၢသုဆူ ကီၢ်တဘ့ၣ်လၢ ပှၤကနၤဧၣ်ဖိ, ပှၤဃ့ၤသးဖိ, ပှၤအမိၢ်ဖိ,+ ပှၤပရးစၤဖိ, ပှၤဃံၤဝံဖိ ဒီးပှၤယဘူၣ်ဖိတဖၣ်+ အိၣ်ဝဲအလီၢ် လၢအမ့ၢ် ကီၢ်တဘ့ၣ်လၢ တၢ်နုၢ်ထံ ဒီးကနဲစီ ယွၤလီၤဝဲလၢ အပူၤလီၤ.”’+

၁၈ “အံၣ်စရ့လး အပှၤသူၣ်က့သးပှၢ်တဖၣ်​ ကဒိကနၣ်​ နကလုၢ် သပှၢ်ကတၢၢ်+ ဒီးနၤဒီး အဝဲသ့ၣ်န့ၣ်​ သုကဘၣ်လဲၤလၢ ကီၢ်အဲၤကူပတူး အစီၤပၤအအိၣ်​ ဒီးသုကဘၣ်​ တဲအီၤလၢ ‘ပှၤဧ့ၤဘြံၤဖိ+ အကစၢ် ယဟိဝၤယွၤ ဆဲးကျိးဒီးပှၤလံ. အဃိ ဝံသးစူၤ ပျဲပလဲၤလၢ ပှၢ်မုၢ်ကနၢသၢသီ* ဒ်သိး ပကလဲၤလုၢ်ထီၣ်တၢ်လၢ ပကစၢ် ယဟိဝၤယွၤ အအိၣ်တက့ၢ်.’+ ၁၉ ဘၣ်ဆၣ်​ ယသ့ၣ်ညါလၢ စုလၢအပှဲၤဒီး တၢ်စိကမီၤ မ့ၢ်တမၢဆူၣ်​ ကီၢ်အဲၤကူပတူး အစီၤပၤဘၣ်န့ၣ်​ အဝဲတဟ့ၣ်အခွဲးလၢ သုကလဲၤတၢ်ဘၣ်.+ ၂၀ အဃိ ယကဘၣ်ယူာ်ထီၣ်ယစု ဒီးစံၣ်ညီၣ်​ ကီၢ်အဲၤကူပတူးလၢ တၢ်လီၤလးအါမံၤ လၢယကမၤ လၢအပူၤလီၤ. ဖဲန့ၣ်ဝံၤအလီၢ်ခံ ဖၤရိၤ ကမၢသုဟးထီၣ်လီၤ.+ ၂၁ ဒီးယကမၤဒ်သိး ပှၤအဲၤကူပတူးဖိတဖၣ်​ ကဘၣ်သူၣ်ဘၣ်သး ယပှၤဂီၢ်မုၢ်အံၤ ဒီးဖဲသုဟးထီၣ်အခါ သုတဟးထီၣ်ဘၣ်​ ခီလီလီဘၣ်.+ ၂၂ ပိာ်မုၣ်ကိးဂၤဒဲး ကဘၣ်ဃ့ ပှၤလၢအခိၣ်အဃၢၤ ဒီးဃ့ပိာ်မုၣ်လၢ အအိၣ်တမှံၤ လၢအဟံၣ်ပူၤ အတၢ်ဖိတၢ်လံၤ လၢအမ့ၢ် စ့ညၣ်ဒီးထူ တကးဒံးဘၣ်​ ကဘၣ်ဃ့ တၢ်ကူတၢ်သိး စ့ၢ်ကီးလီၤ. ဒီးသုကဒုးကူဒုးသိး သုဖိမုၣ်ဖိခွါတဖၣ်လၢ တၢ်ကူတၢ်သိးတဖၣ်အံၤ ဒီးသုကဟံးထီၣ်ကွံာ် ပှၤအဲၤကူပတူးဖိ အတၢ်လီၤ.”+

၄ ဒီးစီၤမိၤၡ့ တဲဆၢဝဲလၢ “ဘၣ်ဆၣ်​ အဝဲသ့ၣ်ကတဲဝဲလၢ ‘ယဟိဝၤယွၤ တလီၣ်ဖျါထီၣ်အသး လၢနအိၣ်ဘၣ်.’ အဃိ အဝဲသ့ၣ်​ မ့ၢ်တနာ်ယၤဘၣ်​ ဒီးမ့ၢ်တဒိကနၣ်​ ယကလုၢ်ဘၣ်မီၤ.’”+ ၂ ယဟိဝၤယွၤ တဲအီၤလၢ “လၢနစုပူၤန့ၣ်​ တၢ်မနုၤ အိၣ်လဲၣ်.” စီၤမိၤၡ့ တဲဆၢဝဲလၢ “နီၣ်ထိးဘိ တဘိလီၤ.” ၃ ဒီးယွၤတဲအီၤလၢ “ကွံာ်လီၤအီၤ လၢဟီၣ်ခိၣ်လိၤမီၤ.” အဃိ စီၤမိၤၡ့ ကွံာ်လီၤအီၤလၢ ဟီၣ်ခိၣ်လိၤ ဒီးနီၣ်ထိးဘိအံၤ ကဲထီၣ်ဝဲ ဂုၢ်တဘိအဃိ+ စီၤမိၤၡ့ ဃ့ၢ်ဝဲလီၤ. ၄ ဒီးယဟိဝၤယွၤ တဲဘၣ်စီၤမိၤၡ့လၢ “ယူာ်ဃီၤနစု ဒီးဖီၣ်​ အခံမဲၢ်တက့ၢ်.” အဃိ စီၤမိၤၡ့ ယူာ်ဃီၤအစု ဒီးဖီၣ်ဝဲအခံမဲၢ် ဒီးအကဲထီၣ်ကဒါက့ၤ နီၣ်ထိးဘိ တဘိလၢ အစုပူၤလီၤ. ၅ ဒီးကစၢ်ယွၤ တဲဝဲလၢ “နဘၣ်မၤဒ်အံၤ ဒ်သိး အဝဲသ့ၣ်​ ကနာ်ဝဲလၢ ယဟိဝၤယွၤ လၢအမ့ၢ် အဝဲသ့ၣ်​ အမိၢ်ပၢ်ဖံဖုလၢပျၢၤတဖၣ်​ အယွၤ, စီၤအၤဘြၤဟၣ်​ အယွၤ, စီၤအံၤစဲး အယွၤ ဒီးစီၤယၤကိာ် အယွၤ+ လီၣ်ဖျါထီၣ်အသး လၢနအိၣ်လီၤ.”+

၆ ယဟိဝၤယွၤ တဲကဒီး စီၤမိၤၡ့လၢ “ဝံသးစူၤ ဂိာ်လီၤနစုလၢ နဆ့ကၤ အပူၤတက့ၢ်.” အဃိ အဝဲဂိာ်လီၤအစုလၢ အဆ့ကၤအပူၤလီၤ. ဖဲအထုးထီၣ်အစုအခါ အစုဘၣ်တၢ်ဆါအၢ ဒီးဝါဝဲဒ် မူခိၣ်ဖီအသိးလီၤ.+ ၇ ဒီးအတဲကဒီးဝဲလၢ “က့ၤဂိာ်လီၤကဒါက့ၤ နစုလၢ နဆ့ကၤ အပူၤတက့ၢ်.” အဃိ အဝဲဂိာ်လီၤအစု လၢအဆ့ကၤ အပူၤလီၤ. ဖဲအထုးထီၣ်အစု လၢအဆ့ကၤပူၤအခါ အစုက့ၤဂ့ၤထီၣ်ဝဲ ဒ်အဖံးအညၣ်​ အဂၤတဖၣ်အသိးလီၤ. ၈ ဒီးအတဲဝဲလၢ “အဝဲသ့ၣ်​ မ့ၢ်တနာ်နၤဘၣ်​ ဒီးမ့ၢ်တကနၣ်ဃုာ် တၢ်ပနီၣ်လီၤလး လၢအဆိကတၢၢ် တခါဘၣ်န့ၣ်​ အဝဲသ့ၣ်​ ကနာ်ဝဲ တၢ်ပနီၣ်လီၤလး ခံခါတခါအံၤ သပှၢ်ကတၢၢ်လီၤ.+ ၉ ဘၣ်ဆၣ်​ အဝဲသ့ၣ်​ မ့ၢ်တနာ်ဒံး တၢ်ပနီၣ်လီၤလး ခံခါအံၤဘၣ်​ ဒီးမ့ၢ်တဒိကနၣ်​ နကလုၢ်ဒံးဘၣ်န့ၣ်​ နကဘၣ်လဲၤဟံးန့ၢ် ထံလၢ ထံကျိနံၤလါအပူၤ ဒီးလူလီၤအီၤလၢ ဟီၣ်ခိၣ်ဃ့ထီအလိၤလီၤ. ဒီးထံလၢ နလဲၤဟံးန့ၢ်အီၤလၢ ထံကျိနံၤလါအပူၤန့ၣ်​ ကကဲထီၣ်​ တၢ်သွံၣ်လၢ ဟီၣ်ခိၣ်ဃ့ထီ အလိၤလီၤ.”+

၁၀ စီၤမိၤၡ့တဲ ယဟိဝၤယွၤလၢ “ယဟိဝၤယွၤဧၢ, ဝံသးစူၤယၤနီၤ. လၢအပူၤကွံာ်မ့ၢ်ဂ့ၤ, စးထီၣ်လၢ နတဲတၢ်ဒီး နခ့နပှၤ ယၤအံၤမ့ၢ်ဂ့ၤ, ယတကဲပှၤလၢ အတဲတၢ်သ့ ဂ့ၤဂ့ၤဘၣ်ဘၣ်​ နီတဘျီဘၣ်. ယမ့ၢ်ပှၤလၢ အတဲတၢ်ကဘှၢ ဒီးယပျ့ၤဃၢလီၤ.”+ ၁၁ ယဟိဝၤယွၤ တဲအီၤလၢ “မတဂၤ တ့လီၤ ပှၤထးခိၣ်လဲၣ်. မတဂၤ မၤဝဲဒ်သိး ပှၤတဲတၢ် တသ့ဘၣ်, ပှၤနၢ်ကတအၢ, ပှၤအမဲာ် ကထံၣ်တၢ်ၡဲၡဲ မ့တမ့ၢ် ပှၤမဲာ်ကဘျီၣ်လဲၣ်. ယၤ ယဟိဝၤယွၤ တမ့ၢ်ဧီၤ. ၁၂ အဃိ ခဲအံၤ လဲၤဟီ. ဖဲနတဲတၢ်အခါ ယကအိၣ်ဒီးနၤ* ဒီးနကြၢးတဲ တၢ်မနုၤလဲၣ်န့ၣ်​ ယကသိၣ်လိနၤလီၤ.”+ ၁၃ ဘၣ်ဆၣ်​ စီၤမိၤၡ့ တဲဝဲလၢ “ယဟိဝၤယွၤဧၢ, ဝံသးစူၤယၤနီၤ, ဆှၢလီၤပှၤတဂၤဂၤ လၢနအဲၣ်ဒိး ဆှၢလီၤအီၤမီၤ.” ၁၄ ဒီးယဟိဝၤယွၤ အသးဒိၣ်ထီၣ်​ စီၤမိၤၡ့ ဒီးတဲဝဲလၢ “နကၠီ ပှၤလ့ၤဝံဖိ စီၤအၤဟရိၣ်မီၤ.+ ယသ့ၣ်ညါလၢ အဝဲတဲတၢ်သ့ ဂ့ၤဂ့ၤလီၤ. ခဲအံၤ အဝဲဟဲလၢကျဲ ဒ်သိး အကထံၣ်လိာ်သးဒီးနၤအဂီၢ် ဒီးဖဲအဝဲထံၣ်နၤအခါ အကသးခုဒိၣ်မးလီၤ.+ ၁၅ ဒီးနကဘၣ်တဲဘၣ်အီၤ တၢ်လၢ ယတဲဘၣ်နၤတဖၣ်+ ဒီးယကအိၣ်ဒီးသု ဖဲသုတဲတၢ် အခါလီၤ.+ ဒီးယကသိၣ်လိသု တၢ်လၢ သုကဘၣ်မၤလီၤ. ၁၆ စီၤအၤဟရိၣ်​ ကတဲတၢ်ဒီး ပှၤဂီၢ်မုၢ် လၢနဂီၢ် ဒီးအကကဲထီၣ်​ ပှၤလၢ အတဲတၢ်လၢ နခၢၣ်စး ဒီးနကကဲ ဒ်ယွၤအသိး လၢအဂီၢ်လီၤ.+ ၁၇ ဒီးနကဟံးန့ၢ် နီၣ်ထိးဘိတဘိအံၤ လၢနစုပူၤ ဒီးနကသူအီၤလၢ နကမၤ တၢ်ပနီၣ်လီၤလးတဖၣ်​ အဂီၢ်လီၤ.”+

၁၈ ဒီးစီၤမိၤၡ့ က့ၤကဒါက့ၤလၢ အမံၤပှၢ် စီၤယံးသရိၤအအိၣ်+ ဒီးတဲအီၤလၢ “ဝံသးစူၤ, ယအဲၣ်ဒိးက့ၤလီၤ. လၢကီၢ်အဲၤကူပတူးအပူၤ ယဒီပုၢ်ဝဲၢ်တဖၣ်​ အိၣ်မူဒံးဧါ တအိၣ်မူဒံးဧါန့ၣ်​ ယအဲၣ်ဒိးက့ၤကွၢ်တဘျး.” ဒီးစီၤယံးသရိၤ တဲစီၤမိၤၡ့လၢ “က့ၤမုာ်မုာ်ခုၣ်ခုၣ်တက့ၢ်.” ၁၉ ဖဲန့ၣ်ဝံၤအလီၢ်ခံ ယဟိဝၤယွၤ တဲတၢ်ဒီး စီၤမိၤၡ့လၢ ကီၢ်မံးဒယၣ်အပူၤ ဒီးတဲအီၤလၢ “က့ၤဟီ, ပှၤလၢအဃု မၤသံနၤန့ၣ်​ သံလၢာ်လံ အဃိ က့ၤလၢ ကီၢ်အဲၤကူပတူး အပူၤတက့ၢ်.”+

၂၀ ဒီးစီၤမိၤၡ့ ကိးထီၣ်​ အမါ ဒီးအဖိခွါတဖၣ်​ ဒီးတီၣ်ထီၣ်အဝဲသ့ၣ်လၢ ကသ့ၣ်ယီၤအလိၤ ဒီးစးထီၣ်​ က့ၤဝဲလၢ ကီၢ်အဲၤကူပတူးလီၤ. တကးဒံးဘၣ်​ စီၤမိၤၡ့ စိာ်ဃုာ်ဒီး ယွၤလၢ အမ့ၢ်အတီတဂၤ အနီၣ်ထိးဘိလီၤ. ၂၁ ဒီးယဟိဝၤယွၤ တဲစီၤမိၤၡ့လၢ “ယဟ့ၣ်စိဟ့ၣ်ကမီၤနၤလၢ နကမၤ တၢ်လီၤလးတဖၣ်လီၤ. ဖဲနက့ၤတုၤလၢ ကီၢ်အဲၤကူပတူးအခါ နကဘၣ်မၤ တၢ်လီၤလးတဖၣ်အံၤခဲလၢာ် လၢဖၤရိၤ အမဲာ်ညါလီၤ.+ ဘၣ်ဆၣ်​ ယကပျဲလၢ အခိၣ်ကကိၤထီၣ်+ ဒီးတမ့ၢ်လၢ အကပျဲလဲၤ ပှၤဂီၢ်မုၢ်တဖၣ်ဘၣ်.+ ၂၂ ဒီးနကဘၣ်တဲ ဖၤရိၤလၢ ‘ယဟိဝၤယွၤ တဲဝဲလၢ “အံၣ်စရ့လး မ့ၢ်ယဖိခွါ ဝဲၢ်ကိလီၤ.+ ၂၃ အဃိ ယကတဲဘၣ်နၤလၢ ပျဲလဲၤယဖိခွါ ဒ်သိး အကဘူၣ်ထီၣ်ဘါထီၣ်ယၤ အဂီၢ်တက့ၢ်. ဘၣ်ဆၣ်​ နမ့ၢ်တပျဲအီၤဘၣ်န့ၣ်​ ယကမၤသံ နဖိခွါဝဲၢ်ကိလီၤ.”’”+

၂၄ ဖဲအလဲၤတၢ် လၢကျဲအခါ အိၣ်ပတုာ်ဝဲ ဖဲတၢ်အိၣ်ဘှံးအလီၢ် ဒီးယဟိဝၤယွၤ+ သဂၢၢ်အီၤ ဒီးဃုမၤသံအီၤလီၤ.*+ ၂၅ ဒီးနီၢ်စံးဖိရၤ+ ဟံးန့ၢ်လၢၢ်တဖျၢၣ်လၢ အကနၣ်အ့ၣ်, ကူးတရံး အဖိခွါဝံၤ ဒီးမၤဝဲဒ်သိး အဖိခွါ အတၢ်ခိၣ်ဖံး ကဘၣ်ထံးဒီး အဝဲဒၣ်အခီၣ်* ဒီးတဲဝဲလၢ “နမ့ၢ် တၢ်သွံၣ်​ အတလးမူးပိာ်ခွါတဂၤ လၢယဂီၢ်လီၤ.” ၂၆ ဒီးအပျဲလီၤအီၤလီၤ. ဖဲန့ၣ်အဆၢကတီၢ် ခီဖျိလၢ တၢ်ကူးတရံးအဃိ နီၢ်စံးဖိရၤ တဲဝဲလၢ “နမ့ၢ် တၢ်သွံၣ်​ အတလးမူးပိာ်ခွါတဂၤ” လီၤ.

၂၇ ဒီးယဟိဝၤယွၤ တဲဘၣ်​ စီၤအၤဟရိၣ်လၢ “လဲၤထံၣ်လိာ်သးဒီး စီၤမိၤၡ့လၢ ပှၢ်မုၢ်ကနၢ အပူၤတက့ၢ်.”+ အဃိ စီၤအၤဟရိၣ်​ လဲၤထံၣ်လိာ်သးဒီး စီၤမိၤၡ့ လၢယွၤအမ့ၢ်အတီတဂၤ အကစၢၢ်န့ၣ်လီၤ.+ ဒီးအဝဲဆၢဂ့ၤဆၢဝါအီၤ ဒီးနၢမူအီၤလီၤ. ၂၈ ဒီးစီၤမိၤၡ့ တဲဘၣ်​ စီၤအၤဟရိၣ်လၢ ယဟိဝၤယွၤ အတၢ်ကတိၤခဲလၢာ်+ ဒီးတၢ်ပနီၣ်လီၤလး လၢကစၢ်ယွၤ မၤလိာ်အီၤ လၢကမၤဝဲခဲလၢာ်လီၤ.+ ၂၉ ဖဲန့ၣ်ဝံၤအလီၢ်ခံ စီၤမိၤၡ့ ဒီးစီၤအၤဟရိၣ်​ လဲၤကိးဖှိၣ်ဝဲ အံၣ်စရ့လး အပှၤသူၣ်က့သးပှၢ် ခဲလၢာ်လီၤ.+ ၃၀ စီၤအၤဟရိၣ်​ တဲဘၣ်​ အဝဲသ့ၣ်​ ကယဲၢ်တၢ်လၢ ယဟိဝၤယွၤ တဲစီၤမိၤၡ့လီၤ. ဒီးစီၤမိၤၡ့ မၤတၢ်ပနီၣ်လီၤလးတဖၣ်+ လၢပှၤဂီၢ်မုၢ်သ့ၣ်တဖၣ်​ အမဲာ်ညါလီၤ. ၃၁ ဖဲန့ၣ်န့ၣ်​ ပှၤဂီၢ်မုၢ်တဖၣ်​ နာ်ဝဲလီၤ.+ ဖဲအဝဲသ့ၣ်​ နၢ်ဟူဝဲလၢ ယဟိဝၤယွၤ ဃၣ်ဃီၤအသးဆူ ပှၤအံၣ်စရ့လးဖိ အအိၣ်လံ+ ဒီးထံၣ်ဘၣ်​ အဝဲသ့ၣ်​ အတၢ်နးတၢ်ဖှီၣ်လံအခါ+ အဝဲသ့ၣ်​ ဆုးလီၤအခိၣ်​ ဒီးထိၣ်လီၤပှီၤအသးလီၤ.

၅ လၢခံ စီၤမိၤၡ့ ဒီးစီၤအၤဟရိၣ်​ လဲၤတဲဘၣ်​ ဖၤရိၤလၢ “ပှၤအံၣ်စရ့လးဖိ အကစၢ် ယဟိဝၤယွၤ တဲဝဲလၢ ‘ပျဲလဲၤ ယပှၤဂီၢ်မုၢ် ဒ်သိး အဝဲသ့ၣ်ကမၤဝဲ ဘူၣ်လၢယဂီၢ် လၢပှၢ်မုၢ်ကနၢ အပူၤတက့ၢ်.’” ၂ ဘၣ်ဆၣ်​ ဖၤရိၤ တဲဝဲလၢ “ယဟိဝၤယွၤ မ့ၢ်မတၤတဂၤလၢ+ ယဘၣ်ဒိကနၣ်​ အကလုၢ် ဒီးပျဲလဲၤ ပှၤအံၣ်စရ့လးဖိလဲၣ်.+ ယတသ့ၣ်ညါ ယဟိဝၤ နီတစဲးဘၣ်​ ဒီးယတပျဲလဲၤ ပှၤအံၣ်စရ့လးဖိဘၣ်.”+ ၃ ဘၣ်ဆၣ်​ အဝဲသ့ၣ်​ တဲဝဲလၢ “ပှၤဧ့ၤဘြံၤဖိအယွၤ ဆဲးကျိးဒီးပှၤဝံၤလံ. ဝံသးစူၤ, ပအဲၣ်ဒိးလဲၤလၢ ပှၢ်မုၢ်ကနၢ သၢသီ* ဒ်သိး ပကလုၢ်ထီၣ်တၢ်လၢ ပကစၢ် ယဟိဝၤယွၤ အအိၣ်မီၤ.+ ပမ့ၢ်တမၤ ဒ်န့ၣ်ဘၣ်န့ၣ်​ အကစံၣ်ညီၣ်ပှၤလၢ တၢ်ဆူးတၢ်ဆါ မ့တမ့ၢ် မၤသံပှၤလၢနးလီၤ.” ၄ ဒီးအဲၤကူပတူး အစီၤပၤ တဲဆၢက့ၤ အဝဲသ့ၣ်လၢ “စီၤမိၤၡ့ ဒီးစီၤအၤဟရိၣ်ဧၢ, ဘၣ်မနုၤအဃိ သုအဲၣ်ဒိးမၢ ပှၤဂီၢ်မုၢ်တဖၣ်​ ပတုာ်အတၢ်မၤလဲၣ်. က့ၤမၤ သုတၢ်မၤန့ၣ်.”+ ၅ ဒီးဖၤရိၤ ဆဲးတဲဝဲလၢ “ကွၢ်မီၤ, လၢထံကီၢ်အံၤအပူၤန့ၣ်​ ပှၤမၤတၢ်ဖိ အိၣ်ဝဲဒီဒူၣ်​ ဒီးသုကအဲၣ်ဒိးလၢ အဝဲသ့ၣ်​ ကပတုာ်အတၢ်မၤန့ၣ်.”

၆ ဖဲတၢ်တနံၤန့ၣ်​ ဖၤရိၤမၤလိာ်ဝဲ ခိၣ်နၢ်တဖၣ်​ လၢအမၢပှၤမၤတၢ် ဒီးအဝဲသ့ၣ်​ အပှၤမၤစၢၤတၢ်တဖၣ်လၢ* ၇ “သုတဘၣ်ဟ့ၣ်လီၤ ပှၤဂီၢ်မုၢ် လီၢ်ဘိတဖၣ်ဒ်သိး အဝဲသ့ၣ်​ ကတ့ထီၣ်​ အူးခဲအဂီၢ် လၢၤတဂ့ၤ.+ အဝဲသ့ၣ်​ ကဘၣ်ဟးဃုဝဲ လီၢ်ဘိလၢ အနီၢ်ကစၢ်လီၤ. ၈ ဘၣ်ဆၣ်​ သုကဘၣ်မၢ အဝဲသ့ၣ်​ တ့ထီၣ်အူးခဲ ပှဲၤသိးဒီး လၢညါလီၤ. တဘၣ်မၢ အမၤစှၤလီၤတဂ့ၤ. မ့ၢ်လၢ အဝဲသ့ၣ်​ ကၢၣ်အဃိ အဝဲသ့ၣ်​ တဲဝဲလၢ ‘ပအဲၣ်ဒိးလဲၤတၢ် ဒီးပအဲၣ်ဒိးလဲၤ လုၢ်ထီၣ်တၢ်လၢ ပကစၢ်ယွၤ အအိၣ်လီၤ.’ ၉ မၢအဝဲသ့ၣ်​ မၤတၢ်ဆူၣ်န့ၢ်ဒံးလၢညါ ဒီးဟ့ၣ်အဝဲသ့ၣ်​ တၢ်မၤအါအါဂီၢ်ဂီၢ် ဒ်သိးအသုတကနၣ်ဃုာ် တၢ်လံၣ်တၢ်လီတဖၣ်တဂ့ၤ.”

၁၀ အဃိ ခိၣ်နၢ်တဖၣ်+ လၢအမၢပှၤမၤတၢ် ဒီးအပှၤမၤစၢၤတၢ်တဖၣ်န့ၣ်​ လဲၤတဲဘၣ်ပှၤဂီၢ်မုၢ်တဖၣ်လၢ “ဖၤရိၤတဲဝဲလၢ ‘ယတဟ့ၣ်သု လီၢ်ဘိလၢၤဘၣ်. ၁၁ သုကဘၣ်လဲၤဟံးန့ၢ် လီၢ်ဘိလၢ သုနီၢ်ကစၢ် ဖဲသုဃုအီၤ ဘၣ်အလီၢ်န့ၣ်လီၤ. ဘၣ်ဆၣ်​ သုတဘၣ်​ တ့စှၤလီၤအူးခဲ နီတဖျၢၣ်ဘၣ်.’” ၁၂ ဒီးပှၤဂီၢ်မုၢ်တဖၣ်​ လီၤပြံလီၤပြါဝဲလၢ ကီၢ်အဲၤကူပတူးအပူၤ ဒီဘ့ၣ်ညါ ဒ်သိးကဃုဝဲ လီၢ်ဘိ* အဂီၢ်လီၤ. ၁၃ ဒီးခိၣ်နၢ်တဖၣ်​ လၢအမၢပှၤမၤတၢ်န့ၣ်​ မၢဆူၣ်​ အဝဲသ့ၣ်လၢ “သုကဘၣ်မၤဝံၤ သုတၢ်မၤ ကိးနံၤဒဲး ဒ်သုမၤတ့ၢ်အီၤလၢညါ ဖဲသုဒိးန့ၢ်ဘၣ်​ လီၢ်ဘိအခါ အသိးန့ၣ်လီၤ.” ၁၄ တကးဒံးဘၣ်​ ဖၤရိၤ အပှၤခိၣ်ပှၤနၢ်တဖၣ်​ လၢအမၢပှၤမၤတၢ်န့ၣ်​ တီၢ်ဝဲ အပှၤမၤစၢၤတၢ်တဖၣ်လၢ အဝဲသ့ၣ်​ ဃုထၢထီၣ်​ ပာ်စၢၤဝဲလၢ ပှၤအံၣ်စရ့လးဖိအကျါ+ ဒီးသံကွၢ် အဝဲသ့ၣ်လၢ “မဟါတနံၤ ဒီးတနံၤညါအံၤန့ၣ်​ ဘၣ်မနုၤအဃိ သုတတ့အူးခဲ ပှဲၤသိးဒီး လၢညါဘၣ်လဲၣ်.”

၁၅ ဒီးပှၤမၤစၢၤတၢ်တဖၣ်လၢ အဝဲသ့ၣ်​ ဃုထၢထီၣ်​ ပာ်စၢၤဝဲလၢ ပှၤအံၣ်စရ့လးဖိအကျါန့ၣ်​ လဲၤကဒူးကဒ့ၣ်ဝဲ ဖၤရိၤလၢ “ဘၣ်မနုၤအဃိ နမၤ နခ့နပှၤတဖၣ်​ ဒ်အံၤလဲၣ်. ၁၆ ပှၤတဟ့ၣ်ပှၤ လီၢ်ဘိလၢၤဘၣ်. ဘၣ်ဆၣ်​ အဝဲသ့ၣ်မၢ ပတ့ထီၣ်အူးခဲတဖၣ်ဒံး. တကးဒံးဘၣ်​ အဝဲသ့ၣ်တီၢ်ပှၤ, ဘၣ်ဆၣ်​ နီၢ်ကီၢ်န့ၣ်​ မ့ၢ်ဒၣ်အဝဲသ့ၣ်​ အတၢ်ကမၣ်လီၤ.” ၁၇ ဘၣ်ဆၣ်​ ဖၤရိၤ တဲဝဲလၢ “သုကၢၣ်လီၤ. သုကၢၣ်အဃိ+ သုတဲလၢ ‘ပအဲၣ်ဒိးလဲၤတၢ်, ပအဲၣ်ဒိးလဲၤ လုၢ်ထီၣ်တၢ်လၢ ယဟိဝၤယွၤ အအိၣ်လီၤ.’+ ၁၈ အဃိ ခဲအံၤ က့ၤ, က့ၤမၤက့ၤတၢ်န့ၣ်. ပှၤတဟ့ၣ်လီၤသု လီၢ်ဘိလၢၤဘၣ်. ဘၣ်ဆၣ်​ သုကဘၣ်တ့ အူးခဲ ပှဲၤသိးဒီး လၢညါအသိးလီၤ.”

၁၉ ပှၤမၤစၢၤတၢ်တဖၣ်လၢ အဝဲသ့ၣ်​ ဃုထၢထီၣ်​ ပာ်စၢၤဝဲလၢ ပှၤအံၣ်စရ့လးဖိအကျါန့ၣ်​ သ့ၣ်ညါလၢ အဝဲသ့ၣ်​ အိၣ်ဒီးတၢ်ကီတၢ်ခဲဖးဒိၣ်​ ခီဖျိလၢ တၢ်ကလုၢ်လီၤလၢ “အူးခဲလၢ သုကဘၣ်တ့အီၤ လၢတနံၤဂီၢ် တနံၤဂီၢ်န့ၣ်​ တဘၣ်လီၤစှၤ နီတဖျၢၣ်ဘၣ်.” ၂၀ ဖဲအဝဲသ့ၣ်​ ဟးထီၣ်လၢ ဖၤရိၤအအိၣ်အခါ အဝဲသ့ၣ်​ ထံၣ်လိာ်အသးဒီး စီၤမိၤၡ့ ဒီးစီၤအၤဟရိၣ်​ လၢအဆၢထၢၣ်ဖဲန့ၣ်​ ဒ်သိးကထံၣ်လိာ်အသးဒီး အဝဲသ့ၣ်​ အဂီၢ်လီၤ. ၂၁ ဒီးအဝဲသ့ၣ်တဲဘၣ်​ စီၤမိၤၡ့ ဒီးစီၤအၤဟရိၣ်​ တဘျီဃီလၢ “လၢသုဃိ ဖၤရိၤဒီး အခ့အပှၤတဖၣ်​ သးဟ့ပှၤလံ ဒီးလီၤဂာ်ဒ် သုဟ့ၣ်လီၤနးတဘ့ၣ်လၢ အဝဲသ့ၣ်​ အစုပူၤ ဒ်သိး အကမၤသံပှၤအဂီၢ် အဃိ မ်ယဟိဝၤယွၤ ကွၢ်လီၤသု ဒီးစံၣ်ညီၣ်သုတက့ၢ်.”+ ၂၂ ဒီးစီၤမိၤၡ့ ဃ့ကညး ယဟိဝၤယွၤလၢ “ယဟိဝၤယွၤဧၢ, ဘၣ်မနုၤအဃိ နမၤနးမၤဖှီၣ်​ ပှၤဂီၢ်မုၢ်တဖၣ်အံၤလဲၣ်. ဘၣ်မနုၤအဃိ နဆှၢလီၤယၤလဲၣ်. ၂၃ စးထီၣ်လၢ ယလဲၤတၢ်လၢ နမံၤအပူၤလၢ ဖၤရိၤ အမဲာ်ညါန့ၣ်+ အဝဲမၤအၢမၤသီ ပှၤဂီၢ်မုၢ်တဖၣ်အံၤ နးန့ၢ်ဒံး လၢညါလီၤ.+ နတမၤပူၤဖျဲး အဝဲသ့ၣ်​ နီတစဲးဘၣ်.”+

၆ ဒီးယဟိဝၤယွၤ တဲစီၤမိၤၡ့လၢ “ယကမၤ ဖၤရိၤ ဒ်လဲၣ်ဒ်လဲၣ်န့ၣ်​ ခဲအံၤ နကထံၣ်ဘၣ်လီၤ.+ စုလၢအပှဲၤဒီး တၢ်စိတၢ်ကမီၤ ကမၢဆူၣ်အီၤလၢ အကပျဲလဲၤ အဝဲသ့ၣ်​ ဒီးစုလၢအပှဲၤဒီး တၢ်စိတၢ်ကမီၤ ကမၢဆူၣ်အီၤလၢ အကနီဟးထီၣ်ကွံာ် အဝဲသ့ၣ်လၢ အကီၢ်ပူၤလီၤ.”+

၂ ဒီးကစၢ်ယွၤ တဲဘၣ်​ စီၤမိၤၡ့လၢ “ယမ့ၢ် ယဟိဝၤယွၤလီၤ. ၃ လၢညါ ယလီၣ်ဖျါထီၣ်ယသးလၢ စီၤအၤဘြၤဟၣ်, စီၤအံၤစဲး ဒီးစီၤယၤကိာ် အမဲာ်ညါ ဒ်သ့တၢ်လၢာ် ကစၢ်တဂၤအသိးလီၤ.+ ဘၣ်ဆၣ်​ တၢ်လၢအဘၣ်ဃးဒီး ယမံၤ ယဟိဝၤန့ၣ်+ ယတဒုးသ့ၣ်ညါ အဝဲသ့ၣ်ဘၣ်.+ ၄ ယမၤစ့ၢ်ကီး တၢ်အၢၣ်လီၤအီလီၤဒီး အဝဲသ့ၣ်​ ဒ်သိး ယကဟ့ၣ်လီၤ အဝဲသ့ၣ်​ ကီၢ်ကနၤဧၣ်​ လၢအမ့ၢ် ကီၢ်တဘ့ၣ်လၢ အဝဲသ့ၣ်​ အိၣ်ဝဲဆိးဝဲ လၢအပူၤ ဒ်ပှၤထံဂၤကီၢ်ဂၤဖိ အသိးလီၤ.+ ၅ ခီဖျိလၢ ပှၤအဲၤကူပတူးဖိ ဒုးကဲကုၢ်ဝဲ ပှၤအံၣ်စရ့လးဖိအဃိ အခဲအံၤ ယနၢ်ဟူ ပှၤအံၣ်စရ့လးဖိတဖၣ်​ အတၢ်ကအုကစွါလံ. ဒီးယသ့ၣ်နီၣ်ထီၣ်က့ၤ ယတၢ်အၢၣ်လီၤအီလီၤလီၤ.+

၆ “အဃိ တဲဘၣ်​ ပှၤအံၣ်စရ့လးဖိလၢ ‘ယမ့ၢ် ယဟိဝၤယွၤ ဒီးယကဒုးဟးထီၣ်ကွံာ်သုလၢ ပှၤအဲၤကူပတူးဖိ အတၢ်ဝံတၢ်ယိး အဖီလာ် ဒီးမၤထူၣ်ဖျဲးထီၣ်သုလၢ အတၢ်မၢကဲကုၢ် အဖီလာ်လီၤ.+ ယကယူာ်ဃီၤယစု ဒီးဟံးန့ၢ်က့ၤသု ဒီးယကစံၣ်ညီၣ်​ အဝဲသ့ၣ်​ နးမးလီၤ.+ ၇ ဒီးယက တူၢ်လိာ်သု ဒ်ယပှၤဂီၢ်မုၢ်အသိး ဒီးယကကဲထီၣ်​ သုကစၢ်ယွၤ+ ဒီးသုကသ့ၣ်ညါလၢ ယမ့ၢ် သုကစၢ် ယဟိဝၤယွၤ လၢအဒုးဟးထီၣ်ကွံာ်သုလၢ ပှၤအဲၤကူပတူးဖိ အတၢ်ဝံတၢ်ယိး အဖီလာ်လီၤ. ၈ ဒီးယကဒုးလဲၤသုလၢ ကီၢ်တဘ့ၣ်လၢ ယအၢၣ်လီၤ လၢယကဟ့ၣ်​ စီၤအၤဘြၤဟၣ်, စီၤအံၤစဲး ဒီးစီၤယၤကိာ်လီၤ. ဒီးယကဟ့ၣ်လီၤသု ကီၢ်တဘ့ၣ်န့ၣ်​ ဒ်သိးအကကဲထီၣ်​ သုတၢ်အဂီၢ်လီၤ.+ ယမ့ၢ် ယဟိဝၤယွၤလီၤ.’”+

၉ လၢခံ စီၤမိၤၡ့တဲဘၣ်​ ပှၤအံၣ်စရ့လးဖိလၢ တၢ်ကစီၣ်အဝဲအံၤ ဘၣ်ဆၣ်​ ခီဖျိလၢ အဝဲသ့ၣ်​ အသးဂံၢ်ဘါလီၤစၢ် ဒီးဘၣ်ကဲကုၢ် နးနးကျံၤကျံၤအဃိ အဝဲသ့ၣ်​ တကနၣ်​ စီၤမိၤၡ့ဘၣ်.+

၁၀ ဒီးယဟိဝၤယွၤ တဲစီၤမိၤၡ့လၢ ၁၁ “လဲၤတဲဘၣ်​ အဲၤကူပတူး အစီၤပၤ ဖၤရိၤလၢ အဝဲကဘၣ်​ ပျဲဟးထီၣ်​ ပှၤအံၣ်စရ့လးဖိ လၢအကီၢ်ပူၤန့ၣ်တက့ၢ်.” ၁၂ ဘၣ်ဆၣ်​ စီၤမိၤၡ့ တဲဆၢ ယဟိဝၤယွၤလၢ “ကွၢ်မီၤ, ပှၤအံၣ်စရ့လးဖိမး တကနၣ်​ ယကလုၢ်ဘၣ်+ ဒီးယတဲတၢ် တဘၣ်ဂ့ၤဂ့ၤ စ့ၢ်ကီးဘၣ်အဃိ ဖၤရိၤ ကကနၣ်​ ယကလုၢ် ဒ်လဲၣ်.”+ ၁၃ ဘၣ်ဆၣ်​ ယဟိဝၤယွၤ တဲကဒီး စီၤမိၤၡ့ ဒီးစီၤအၤဟရိၣ်​ တၢ်လၢ အဝဲသ့ၣ်ကဘၣ်တဲ ပှၤအံၣ်စရ့လးဖိ ဒီးအဲၤကူပတူး အစီၤပၤဖၤရိၤ ဒ်သိး ကဒုးဟးထီၣ်​ ပှၤအံၣ်စရ့လးဖိ လၢကီၢ်အဲၤကူပတူး အပူၤန့ၣ်လီၤ.

၁၄ ပှၤအံၣ်စရ့လးဖိ အဒူၣ်ဖိထၢဖိ အခိၣ်အနၢ်တဖၣ်​ ဘၣ်တၢ်ပာ်ဖျါထီၣ်အီၤ ဒ်လၢလာ် အသိးလီၤ. စီၤအံၣ်စရ့လး အဖိဝဲၢ်ကိ စီၤရူၤဘ့ၣ်​ အဖိခွါတဖၣ်န့ၣ်+ မ့ၢ်ဝဲ စီၤဃနိး, စီၤပးလူ, စီၤဃ့ၤစရိၣ်​ ဒီးစီၤကၢ်မံၤလီၤ.+ အဝဲသ့ၣ်တဖၣ်န့ၣ်​ ဟဲလီၤစၢၤလီၤသွဲၣ်လၢ စီၤရူၤဘ့ၣ်လီၤ.

၁၅ စီၤစူၤမ့းအိၣ်​ အဖိခွါတဖၣ်န့ၣ်​ မ့ၢ်ဝဲ စီၤယမူးအ့လး, စီၤယၤမံၣ်, စီၤအိၤဟး, စီၤယၤကံၣ်, စီၤစိၤဃၢ် ဒီးပှၤကနၤဧၣ်မုၣ်​ အဖိခွါ စီၤၡီအူးလီၤ.+ အဝဲသ့ၣ်တဖၣ်န့ၣ်​ ကဲထီၣ်​ စီၤစူၤမ့းအိၣ်​ အဒူၣ်ဖိထၢဖိတဖၣ်လီၤ.

၁၆ စီၤလ့ၤဝံ အဖိခွါတဖၣ်န့ၣ်+ မ့ၢ်ဝဲ စီၤက့ရၡိၣ်, စီၤကဃး ဒီးစီၤမရၤရံၤ ဒီးအဝဲသ့ၣ်​ အဒူၣ်ဖိထၢဖိတဖၣ်​ ဟဲလီၤစၢၤလီၤသွဲၣ်လၢ အဝဲသ့ၣ်လီၤ.+ ဒီးစီၤလ့ၤဝံန့ၣ်​ အိၣ်မူဝဲ ၁၃၇ နံၣ်လီၤ.

၁၇ စီၤက့ရၡိၣ်​ အဖိခွါတဖၣ်န့ၣ်​ မ့ၢ်စီၤလံးဘနံၤ ဒီးစီၤၡံမံၤ ဒ်အဒူၣ်ဖိထၢဖိတဖၣ်​ အိၣ်ဝဲအသိးလီၤ.+

၁၈ ဒီးစီၤကဃး အဖိခွါတဖၣ်​ မ့ၢ်စီၤဧၤမရၣ်, စီၤယံးစဟၢ်, စီၤဃ့ဘြိၣ်​ ဒီးစီၤဧူးစံၤအ့လးလီၤ.+ ဒီးစီၤကဃး အိၣ်မူဝဲ ၁၃၃ နံၣ်လီၤ.

၁၉ ဒီးစီၤမရၤရံၤ အဖိခွါတဖၣ်​ မ့ၢ်စီၤမးဃလံ ဒီးစီၤမူၡံၤလီၤ.

အဝဲသ့ၣ်​ ကဲထီၣ်ပှၤလ့ၤဝံဖိ အဒူၣ်ဖိထၢဖိတဖၣ်​ ဒ်အဝဲသ့ၣ်​ အစၢၤအသွဲၣ်တဖၣ်​ အိၣ်ဝဲအသိးလီၤ.+

၂၀ ဒီးစီၤဧၤမရၣ်​ န့ၢ်အမါလၢ အပၢ်အဒီပုၢ်ဝဲၢ်မုၣ်​ နီၢ်ယိကဘ့ၣ်လီၤ.+ ဒီးအဝဲ အိၣ်ဖျဲၣ်ထီၣ်န့ၢ်အီၤ စီၤအၤဟရိၣ်​ ဒီးစီၤမိၤၡ့လီၤ.+ စီၤဧၤမရၣ်​ အိၣ်မူဝဲ ၁၃၇ နံၣ်လီၤ.

၂၁ စီၤယံးစဟၢ် အဖိခွါတဖၣ်​ မ့ၢ်စီၤကိၤရး,+ စီၤန့ဖ့း ဒီးစီၤစံးကရံလီၤ.

၂၂ စီၤဧူးစံၤအ့လး အဖိခွါတဖၣ်​ မ့ၢ်စီၤမံၡအ့လး, စီၤအလံစဖၣ်+ ဒီးစီၤစံးသရံလီၤ.

၂၃ ဒီးစီၤအၤဟရိၣ်​ န့ၢ်အမါလၢ စီၤနးၡိၣ်​ အဒီပုၢ်ဝဲၢ်မုၣ်​ နီၢ်အ့းလံၤစါဘ့ၤလီၤ.+ နီၢ်အ့းလံၤစါဘ့ၤ မ့ၢ်ဝဲ စီၤဧးမံၤနဒး အဖိမုၣ်လီၤ. ဒီးအဝဲ အိၣ်ဖျဲၣ်ထီၣ်​ စီၤနၤဒး, စီၤအဘံဟူၤ, စီၤအလၤဧစၢ် ဒီးစီၤအံသမၢ်လီၤ.+

၂၄ ဒီးစီၤကိၤရး အဖိခွါတဖၣ်​ မ့ၢ်စီၤအးစံၢ်, စီၤအ့လကါနၤ ဒီးစီၤအဘံဧ့စၢ်လီၤ.+ အဝဲသ့ၣ်တဖၣ်န့ၣ်​ ကဲထီၣ်​ ပှၤကိၤရးဖိ အဒူၣ်ဖိထၢဖိတဖၣ်လီၤ.+

၂၅ ဒီးစီၤအၤဟရိၣ်​ အဖိခွါ စီၤအလၤဧစၢ်န့ၣ်+ န့ၢ်အမါလၢ စီၤပူတံၤအ့ၤလး အဖိမုၣ်တဂၤလီၤ. ဒီးအမါအိၣ်ဖျဲၣ်ထီၣ်​ စီၤဖံၤနဃၣ်လီၤ.+

ပှၤတဖၣ်န့ၣ်​ မ့ၢ်ပှၤလ့ၤဝံဖိ အဒူၣ်ဖိထၢဖိ အခိၣ်နၢ်တဖၣ်, ဒ်အဝဲသ့ၣ်​ အဒူၣ်ဖိထၢဖိတဖၣ်​ အိၣ်ဝဲအသိးလီၤ.+

၂၆ အဝဲအံၤမ့ၢ် စီၤအၤဟရိၣ်​ ဒီးစီၤမိၤၡ့ လၢယဟိဝၤယွၤ တဲအဝဲသ့ၣ်လၢ “ဒုးဟးထီၣ်​ ပှၤအံၣ်စရ့လးဖိတဖၣ်​ လၢကီၢ်အဲၤကူပတူးအပူၤ ဒ်သုးမုၢ် တဖုဘၣ်တဖု အသိးတက့ၢ်.”+ ၂၇ ပှၤလၢအတဲတၢ်ဒီး အဲၤကူပတူး အစီၤပၤဖၤရိၤ ဒ်သိး အကဒုးဟးထီၣ်​ ပှၤအံၣ်စရ့လးဖိ လၢကီၢ်အဲၤကူပတူး အပူၤန့ၣ်​ မ့ၢ်ဝဲစီၤမိၤၡ့ ဒီးစီၤအၤဟရိၣ်အံၤလီၤ.+

၂၈ တၢ်တနံၤန့ၣ်​ ဖဲယဟိဝၤယွၤ တဲတၢ်ဒီးစီၤမိၤၡ့ လၢကီၢ်အဲၤကူပတူး အပူၤအခါ ၂၉ ယဟိဝၤယွၤ တဲဘၣ်စီၤမိၤၡ့လၢ “ယမ့ၢ် ယဟိဝၤယွၤလီၤ. တၢ်လၢ ယတဲဘၣ်နၤ ခဲလၢာ်န့ၣ်​ နကဘၣ်တဲဘၣ်​ အဲၤကူပတူး အစီၤပၤဖၤရိၤလီၤ.” ၃၀ စီၤမိၤၡ့တဲ ယဟိဝၤယွၤလၢ “ယတဲတၢ် တဘၣ်ဂ့ၤဂ့ၤဘၣ်​ အဃိ ဖၤရိၤ ကကနၣ်​ ယကလုၢ် ဒ်လဲၣ်.”+

၇ ယဟိဝၤယွၤ တဲစီၤမိၤၡ့လၢ “ယဒုးကဲထီၣ်နၤ ဒ်ယွၤအသိး လၢဖၤရိၤအဂီၢ် ဒီးနကၠီ စီၤအၤဟရိၣ်​ ကကဲထီၣ်​ နဝံတဂၤလီၤ.+ ၂ တၢ်လၢယကမၤလိာ်နၤန့ၣ်​ နကဘၣ်​ တဲကဒါက့ၤ နကၠီ စီၤအၤဟရိၣ်​ ခဲလၢာ်ဒီး အဝဲ ကတဲတၢ်ဒီး ဖၤရိၤလီၤ. ဒီးဖၤရိၤ ကဘၣ်ပျဲဟးထီၣ်ဝဲ ပှၤအံၣ်စရ့လးဖိတဖၣ်​ လၢအအိၣ်လၢ အကီၢ်ပူၤန့ၣ်လီၤ. ၃ မ့မ့ၢ်ယၤန့ၣ်​ ယကပျဲလၢ ဖၤရိၤ အခိၣ်ကကိၤထီၣ်+ ဒီးယကမၤအါထီၣ်​ ယတၢ်ပနီၣ်လီၤလး ဒီးယတၢ်လီၤလးတဖၣ်လၢ ကီၢ်အဲၤကူပတူးအပူၤလီၤ.+ ၄ ဘၣ်ဆၣ်​ တမ့ၢ်လၢ ဖၤရိၤ ကဒိကနၣ်​ နကလုၢ်ဘၣ်. ဒီးယကပာ်လီၤယစုလၢ အဲၤကူပတူးအလိၤ ဒီးယပှၤဂီၢ်မုၢ် ပှၤအံၣ်စရ့လးဖိလၢ အအိၣ်ဝဲ အါအါဂီၢ်ဂီၢ်န့ၣ်​ ယကဒုးဟးထီၣ်ကွံာ် အဝဲသ့ၣ်လၢ ကီၢ်အဲၤကူပတူးအပူၤ ဒီးယကစံၣ်ညီၣ်​ ပှၤအဲၤကူပတူးဖိ နးမးလီၤ.+ ၅ ဖဲယယၤထီၣ်ယစု ဒ်သိး ကထီဒါ ကီၢ်အဲၤကူပတူး ဒီးဒုးဟးထီၣ်​ ပှၤအံၣ်စရ့လးဖိလၢ အဝဲသ့ၣ်အကျါအခါန့ၣ်​ ပှၤအဲၤကူပတူးဖိ ကသ့ၣ်ညါလၢ ယမ့ၢ်ယဟိဝၤယွၤ သပှၢ်ကတၢၢ်လီၤ.”+ ၆ ဒီးစီၤမိၤၡ့ ဒီးစီၤအၤဟရိၣ်​ မၤဝဲဒ် ယဟိဝၤယွၤ မၤလိာ်အဝဲသ့ၣ်အသိး ဒီးအဝဲသ့ၣ်​ မၤထွဲဝဲ လီၤတံၢ်လီၤဆဲးလီၤ. ၇ ဖဲစီၤမိၤၡ့ ဒီးစီၤအၤဟရိၣ်​ လဲၤတဲတၢ်ဒီး ဖၤရိၤအခါ စီၤမိၤၡ့ အသးအိၣ်​ အနံၣ်​ ၈၀ ဒီးစီၤအၤဟရိၣ်​ အသးအိၣ်​ ၈၃ နံၣ်လီၤ.+

၈ ဒီးယဟိဝၤယွၤ တဲဘၣ်စီၤမိၤၡ့ ဒီးစီၤအၤဟရိၣ်လၢ ၉ “ဖၤရိၤမ့ၢ်တဲသုလၢ ‘မၤတၢ်လီၤလးတခါ’ န့ၣ်တဲဘၣ်​ စီၤအၤဟရိၣ်လၢ ‘တၢၤလီၤ နနီၣ်ထိးဘိလၢ ဖၤရိၤ အမဲာ်ညါတက့ၢ်.’ ဒီးနီၣ်ထိးဘိန့ၣ်​ ကကဲထီၣ်​ ဂုၢ်ဖးဒိၣ်တဘိလီၤ.”+ ၁၀ အဃိ စီၤမိၤၡ့ ဒီးစီၤအၤဟရိၣ်​ လဲၤဝဲလၢ ဖၤရိၤအအိၣ်​ ဒီးမၤဝဲဒ် ယဟိဝၤယွၤ မၤလိာ် အဝဲသ့ၣ်အသိးလီၤ. စီၤအၤဟရိၣ်​ တၢၤလီၤ အနီၣ်ထိးဘိ လၢဖၤရိၤ ဒီးအခ့အပှၤတဖၣ်​ အမဲာ်ညါ ဒီးအနီၣ်ထိးဘိန့ၣ်​ ကဲထီၣ်ဂုၢ်ဖးဒိၣ်တဘိလီၤ. ၁၁ ဘၣ်ဆၣ်​ ဖၤရိၤကိးန့ၢ် ပှၤကူၣ်ဘၣ်ကူၣ်သ့ ဒီးပှၤအူတၢ်လိၢ်တၢ်တဖၣ်လီၤ.+ ဒီးအဲၤကူပတူး အပှၤအူတၢ်သမူတၢ်တဖၣ်န့ၣ်​ မၤဝဲဒ် စီၤအၤဟရိၣ်​ မၤဝဲအသိး ခီဖျိလၢ အတၢ်အူအဃိလီၤ.+ ၁၂ အဝဲသ့ၣ်​ တဂၤစုာ်စုာ်န့ၣ်​ တၢၤလီၤဝဲ အနီၣ်ထိးဘိလီၤ. ဒီးနီၣ်ထိးဘိတဖၣ်န့ၣ်​ ကဲထီၣ်ဝဲ ဂုၢ်ဖးဒိၣ်တဖၣ်​ ဘၣ်ဆၣ်​ စီၤအၤဟရိၣ်​ အနီၣ်ထိးဘိန့ၣ်​ ယူၢ်လီၤကွံာ် အဝဲသ့ၣ်​ အနီၣ်ထိးဘိတဖၣ်လီၤ. ၁၃ ဘၣ်ဆၣ်​ ဒ်ယဟိဝၤယွၤ တဲဝဲအသိးန့ၣ်​ ဖၤရိၤ အခိၣ်ကိၤဒံး+ ဒီးတကနၣ်​ အဝဲသ့ၣ်ဘၣ်.

၁၄ ဒီးယဟိဝၤယွၤ တဲဘၣ်စီၤမိၤၡ့လၢ “ဖၤရိၤ အခိၣ်ကိၤ+ ဒီးတပျဲလဲၤ ပှၤဂီၢ်မုၢ်တဖၣ်ဘၣ်. ၁၅ လၢဂီၤခီန့ၣ်​ လဲၤလၢဖၤရိၤအအိၣ်တက့ၢ်. အဝဲကလဲၤလၢ ထံကျိနံၤလါ အဃိ နကဘၣ်​ ဆၢထၢၣ်အိၣ်ခိးအီၤလၢ ထံကျိနံၤလါ အကၢၢ်နံၤ ဒ်သိး နကထံၣ်လိာ်သးဒီးအီၤ အဂီၢ်လီၤ. ဒီးနကဘၣ်​ လဲၤစိာ်ဃုာ်ဒီး နီၣ်ထိးဘိတဘိလၢ အကဲထီၣ်ဂုၢ်န့ၣ်လီၤ.+ ၁၆ ဒီးနကဘၣ်​ တဲဘၣ်အီၤလၢ ‘ပှၤဧ့ၤဘြံၤဖိအကစၢ် ယဟိဝၤယွၤ ဆှၢလီၤယၤလၢနအိၣ်+ ဒီးအဝဲတဲဝဲလၢ “ပျဲလဲၤယပှၤဂီၢ်မုၢ်တဖၣ်​ ဒ်သိး အဝဲသ့ၣ်​ ကဘူၣ်ထီၣ်ဘါထီၣ်ယၤလၢ ပှၢ်မုၢ်ကနၢအပူၤတက့ၢ်.” ဘၣ်ဆၣ်​ တုၤခဲအံၤန့ၣ်​ နတကနၣ်​ ယကလုၢ်ဒံးဘၣ်. ၁၇ ယဟိဝၤယွၤ တဲဝဲလၢ “နကသ့ၣ်ညါလၢ ယမ့ၢ် ယဟိဝၤယွၤ+ ခီဖျိလၢ တၢ်လၢယကမၤ အဃိလီၤ. ယကတီၢ်ထံလၢ ထံကျိနံၤလါအပူၤလၢ နီၣ်ထိးဘိ လၢအအိၣ်လၢ ယစုပူၤ ဒီးထံန့ၣ်​ ကကဲထီၣ်​ တၢ်သွံၣ်လီၤ. ၁၈ ဒီးညၣ်တဖၣ်​ လၢထံကျိနံၤလါ အပူၤန့ၣ်​ ကသံဝဲ ဒီးထံကျိနံၤလါ ကနၢအုၣ်ဝဲ ဒီးပှၤအဲၤကူပတူးဖိတဖၣ်​ ကထံၣ်ဝဲလၢ အဝဲသ့ၣ်​ အီထံလၢ ထံကျိနံၤလါအပူၤန့ၣ်​ တသ့လၢၤဘၣ်.”’”

၁၉ ဒီးယဟိဝၤယွၤ တဲစီၤမိၤၡ့လၢ “တဲဘၣ်စီၤအၤဟရိၣ်လၢ ‘ဟံးန့ၢ် နနီၣ်ထိးဘိ ဒီးယူာ်ထီၣ်အီၤလၢ အဲၤကူပတူး အထံတဖၣ်​ အဖီခိၣ်,+ လၢအထံကျိတဖၣ်​ အဖီခိၣ်, လၢအထံကျိၤတဖၣ်​ အဖီခိၣ်,+ လၢအထံချၢးတဖၣ်* အဖီခိၣ်​ ဒီးလၢကမါ ခဲလၢာ်အဖီခိၣ်​ ဒ်သိး အကကဲထီၣ်​ တၢ်သွံၣ်အဂီၢ်တက့ၢ်.’ ဒီးတၢ်သွံၣ်ကအိၣ်လၢ ကီၢ်အဲၤကူပတူး ဒီဘ့ၣ်ညါအပူၤ, တၢ်ပူၤတၢ်လီၢ်လၢ ပှၤတ့အီၤလၢ သ့ၣ်ဒီးလၢၢ်တဖၣ်​ အပူၤဒၣ်လဲာ်လီၤ.” ၂၀ စီၤမိၤၡ့ ဒီးစီၤအၤဟရိၣ်​ မၤဝဲဒ် ယဟိဝၤယွၤ မၤလိာ်အဝဲသ့ၣ်အသိး တဘျီဃီလီၤ. စီၤအၤဟရိၣ်​ ယၤထီၣ်အနီၣ်ထိးဘိ ဒီးတီၢ်ဝဲ ထံလၢအအိၣ်လၢ ထံကျိနံၤလါအပူၤ လၢဖၤရိၤ ဒီးအခ့အပှၤတဖၣ်​ အမဲာ်ညါလီၤ. ဒီးထံလၢ အအိၣ်လၢ ထံကျိပူၤခဲလၢာ်န့ၣ်​ ကဲထီၣ်ဝဲ တၢ်သွံၣ်လီၤ.+ ၂၁ ဒီးညၣ်လၢအအိၣ်လၢ ထံကျိပူၤန့ၣ်​ သံဝဲ+ ဒီးထံကျိန့ၣ်​ နၢအုၣ်ဝဲ ဒီးပှၤအဲၤကူပတူးဖိတဖၣ်​ အီထံလၢ ထံကျိနံၤလါအပူၤ တသ့လၢၤဘၣ်.+ ဒီးတၢ်သွံၣ်န့ၣ်​ အိၣ်ဝဲလၢ ကီၢ်အဲၤကူပတူးအပူၤ ဝးဝးလီၤ.

၂၂ ဘၣ်ဆၣ်​ အဲၤကူပတူး အပှၤအူတၢ်သမူတၢ်တဖၣ်န့ၣ်​ မၤဝဲဒ်န့ၣ်အသိး စ့ၢ်ကီး ခီဖျိလၢ တၢ်အူအဃိလီၤ.+ အဃိ ဒ်ယဟိဝၤယွၤ တဲဝဲအသိးန့ၣ်​ ဖၤရိၤအခိၣ်ကိၤ ဒီးတကနၣ်​ အဝဲသ့ၣ်ဘၣ်.+ ၂၃ ဒီးဖၤရိၤ က့ၤလၢအဟံၣ်​ ဒီးတကနၣ်ဃုာ် တၢ်ဂ့ၢ်တခါအံၤ စ့ၢ်ကီးဘၣ်. ၂၄ ဒီးပှၤအဲၤကူပတူးဖိ အီထံကျိနံၤလါအထံ တန့ၢ် နီတစဲးလၢၤဘၣ်အဃိ ပှၤအဲၤကူပတူးဖိခဲလၢာ် ခူၣ်တၢ်လၢ ထံကျိနံၤလါ အကပိာ်ကပၤဝးဝး ဒ်သိးကန့ၢ်ဘၣ်​ ထံအီအဂီၢ်လီၤ. ၂၅ ဒီးယဟိဝၤယွၤ တီၢ်ဝဲထံကျိနံၤလါ ဝံၤအလီၢ်ခံ တၢ်ဆၢကတီၢ် ပှဲၤထီၣ်နွံသီလီၤ.

၈ ဒီးယဟိဝၤယွၤ တဲစီၤမိၤၡ့လၢ “လဲၤလၢ ဖၤရိၤအအိၣ်​ ဒီးတဲအီၤလၢ ‘ယဟိဝၤယွၤ တဲဝဲလၢ “ပျဲလဲၤယပှၤဂီၢ်မုၢ် ဒ်သိးအဝဲသ့ၣ်​ ကဘူၣ်ထီၣ်ဘါထီၣ်ယၤ အဂီၢ်တက့ၢ်.+ ၂ နမ့ၢ်တပျဲလဲၤ အဝဲသ့ၣ်ဒံးဘၣ်န့ၣ်​ ယကဒုးလီၤဘၣ်​ တၢ်နးတၢ်ဖှီၣ်​ လၢနဟီၣ်ကဝီၤ ခဲလၢာ်အပူၤ ခီဖျိလၢဒ့ၣ်တဖၣ်လီၤ.+ ၃ ဒီးဒ့ၣ်တဖၣ်​ ကအိၣ်ပှဲၤလၢ ထံကျိနံၤလါအပူၤ ဒီးဒ့ၣ်တဖၣ်​ ကဟဲထီၣ်​ ဒီးနုာ်လီၤလၢ နဟံၣ်အပူၤ, နလီၢ်မံအဒၢး, နလီၢ်မံခိၣ်, နခ့နပှၤတဖၣ်​ အဟံၣ်ပူၤ ဒီးလၢနပှၤဂီၢ်မုၢ်တဖၣ်အလိၤ, လၢနဖၣ်ကပူၤ ဒီးနစံၢ်ကိၣ်​ အကျိးတဖၣ်လီၤ.+ ၄ ဒ့ၣ်တဖၣ်​ ကဟဲထီၣ်လၢ နလိၤ, နပှၤဂီၢ်မုၣ်​ ဒီးနခ့နပှၤခဲလၢာ် အလိၤလီၤ.”’”

၅ လၢခံယဟိဝၤယွၤ တဲစီၤမိၤၡ့လၢ “တဲစီၤအၤဟရိၣ်လၢ ‘နီၣ်ထိးဘိလၢ အအိၣ်လၢ နစုလိၤန့ၣ်​ ယူာ်ထီၣ်အီၤလၢ ထံကျိတဖၣ်​ အဖီခိၣ်, လၢထံကျိနံၤလါ အထံကျိၤတဖၣ်​ အဖီခိၣ်​ ဒီးလၢထံချၢးတဖၣ်* အဖီခိၣ်​ ဒီးဒုးဟဲထီၣ်​ ဒ့ၣ်တဖၣ်​ လၢကီၢ်အဲၤကူပတူး အပူၤန့ၣ်တက့ၢ်.’” ၆ အဃိ စီၤအၤဟရိၣ်​ ယူာ်ထီၣ်အစု လၢကီၢ်အဲၤကူပတူး အထံတဖၣ်​ အဖီခိၣ်​ ဒီးဒ့ၣ်တဖၣ်​ ဟဲထီၣ်ဝဲ ဒီးအိၣ်ဝဲလၢ ကီၢ်အဲၤကူပတူးအပူၤ ဝးဝးလီၤ. ၇ ဘၣ်ဆၣ်​ အဲၤကူပတူး အပှၤအူတၢ်သမူတၢ်တဖၣ်န့ၣ်​ မၤဝဲဒ်န့ၣ်အသိး ခီဖျိလၢ အတၢ်အူအဃိလီၤ. ဒီးအဝဲသ့ၣ်စ့ၢ်ကီး ဒုးဟဲထီၣ်​ ဒ့ၣ်တဖၣ်လၢ ကီၢ်အဲၤကူပတူးအပူၤလီၤ.+ ၈ ဒီးဖၤရိၤ ကိးန့ၢ်ဝဲ စီၤမိၤၡ့ ဒီးစီၤအၤဟရိၣ်​ ဒီးတဲဝဲလၢ “ခဲအံၤန့ၣ်​ ယသးအိၣ်ပျဲလဲၤ ပှၤဂီၢ်မုၢ်တဖၣ်​ ဒ်သိးကလုၢ်ထီၣ်တၢ်ဆူ ယဟိဝၤယွၤအအိၣ်​ အဃိဃ့ကညး ယဟိဝၤယွၤ ဒ်သိး အကဒုးဟးထီၣ်ကွံာ် ဒ့ၣ်တဖၣ်အံၤလၢ ယအိၣ်​ ဒီးလၢယပှၤဂီၢ်မုၢ်တဖၣ်​ အအိၣ်တက့ၢ်.”+ ၉ ဒီးစီၤမိၤၡ့ တဲဖၤရိၤလၢ “ဒ်သိးဒ့ၣ်တဖၣ်​ ကဟးထီၣ်ကွံာ်လၢ နအိၣ်, လၢနခ့နပှၤတဖၣ်အအိၣ်, လၢနပှၤဂီၢ်မုၢ်တဖၣ်အအိၣ်​ ဒီးလၢနဟံၣ်တဖၣ်​ အပူၤအဂီၢ် ဒီးဒ်သိးဒ့ၣ်တဖၣ်​ ကအိၣ်တ့ၢ်က့ၤ ထဲလၢထံကျိနံၤလါပူၤအဂီၢ် နကမၢ ယဃ့ကညး ကစၢ်ယွၤ ဆံးယံာ်လဲၣ်န့ၣ်​ ကွၢ်လၢနၤလီၤ.” ၁၀ ဒီးဖၤရိၤ တဲဝဲလၢ “ခဲမုၢ်ဆ့ၣ်လီၤ.” ဒီးစီၤမိၤၡ့ တဲဝဲလၢ “ဒ်သိး နကသ့ၣ်ညါလၢ ပှၤလၢအလီၤဂာ် ဒီးယဟိဝၤယွၤ တအိၣ်နီတဂၤဘၣ်အဂီၢ် တၢ်ကမၤအသး ဒ်နတဲအသိးလီၤ.+ ၁၁ ဒ့ၣ်တဖၣ်​ ကဟးထီၣ်ကွံာ်လၢနအိၣ်, လၢနဟံၣ်ပူၤ, လၢနခ့နပှၤတဖၣ်အအိၣ်​ ဒီးလၢ နပှၤဂီၢ်မုၢ်တဖၣ်​ အအိၣ်လီၤ. ဒီးဒ့ၣ်တဖၣ်​ ကအိၣ်တ့ၢ်က့ၤ ထဲလၢ ထံကျိနံၤလါအပူၤလီၤ.”+

၁၂ စီၤမိၤၡ့ ဒီးစီၤအၤဟရိၣ်​ ဟးထီၣ်ကွံာ်လၢ ဖၤရိၤအအိၣ်လီၤ. ဒီးစီၤမိၤၡ့ ဃ့ကညး ယဟိဝၤယွၤ ဒ်သိး အကမၤလီၤမၢ်ကွံာ် ဒ့ၣ်တဖၣ်လၢ အဒုးဟဲထီၣ်ဝဲ လၢဖၤရိၤ အအိၣ်လီၤ.+ ၁၃ ဒီးယဟိဝၤယွၤ မၤဝဲဒ် စီၤမိၤၡ့ ဃ့ကညးအီၤအသိး ဒီးဒ့ၣ်တဖၣ်​ သံဝဲလၢဟံၣ်ပူၤ, လၢကရၢၢ်ပူၤ ဒီးလၢ စံာ်ပျီပူၤလီၤ. ၁၄ ဒီးအဝဲသ့ၣ်​ ပာ်ဖှိၣ်ထီၣ်ဝဲ ဒ့ၣ်တဖၣ်​ တပူၣ်ဘၣ်တပူၣ်​ ဒီးဒ့ၣ်အပူၣ်တဖၣ်​ အိၣ်ဝဲအါမး တုၤလၢ ပှၤဂံၢ်အီၤတဘၣ်ဘၣ်အဃိ ကီၢ်နၢအုၣ်ဝဲ ဒီတဘ့ၣ်ညါလီၤ. ၁၅ ဖၤရိၤ ထံၣ်ဝဲလၢ တၢ်အိၣ်သးတဖၣ်​ ကိညၢ်ထီၣ်လံ အဃိ အခိၣ်ကိၤထီၣ်ဝဲလီၤ.+ ဒီးဒ်ယဟိဝၤယွၤ တဲဝဲအသိး အဝဲတကနၣ်​ အဝဲသ့ၣ်​ အကလုၢ်ဘၣ်.

၁၆ ဒီးယဟိဝၤယွၤ တဲဘၣ်​ စီၤမိၤၡ့လၢ “တဲဘၣ်​ စီၤအၤဟရိၣ်လၢ ‘ယၤထီၣ်နနီၣ်ထိးဘိ ဒီးတီၢ်ဟီၣ်ခိၣ်ကမူၣ်တက့ၢ်. ဒီးဟီၣ်ခိၣ်ကမူၣ်​ ကကဲထီၣ်​ ဃးသူတဖၣ်လၢ ကီၢ်အဲၤကူပတူးအပူၤ ဒီဘ့ၣ်ညါလီၤ.’” ၁၇ ဒီးအဝဲသ့ၣ်​ မၤဝဲဒ်န့ၣ်လီၤ. စီၤအၤဟရိၣ်​ ယၤထီၣ်အနီၣ်ထိးဘိ ဒီးတီၢ်ဝဲ ဟီၣ်ခိၣ်ကမူၣ်လီၤ. ဒီးဃးသူတဖၣ်​ ဟဲထီၣ်လၢ ပှၤကညီ ဒီးဆၣ်ဖိကီၢ်ဖိအလိၤလီၤ. ဒီးဟီၣ်ခိၣ်ကမူၣ်​ ခဲလၢာ်န့ၣ်​ ကဲထီၣ်ဝဲ ဃးသူလၢ ကီၢ်အဲၤကူပတူး ဒီဘ့ၣ်ညါအပူၤလီၤ.+ ၁၈ ဒီးပှၤအူတၢ်သမူတၢ်တဖၣ်​ ဂုာ်ကျဲးစၢး မၤဝဲဒ်န့ၣ်စ့ၢ်ကီး ဒီးဒုးအိၣ်ထီၣ်​ ဃးသူတဖၣ်​ ခီဖျိလၢ အတၢ်အူ+ ဘၣ်ဆၣ်​ အဝဲသ့ၣ်​ မၤဝဲတသ့ဘၣ်. ဒီးဃးသူတဖၣ်​ ဟဲထီၣ်ဝဲလၢ ပှၤကညီ ဒီးဆၣ်ဖိကီၢ်ဖိ အလိၤလီၤ. ၁၉ အဃိ ပှၤအူတၢ်သမူတၢ်တဖၣ်​ တဲဖၤရိၤလၢ “အဝဲန့ၣ်​ မ့ၢ်ကစၢ်ယွၤ အစုနၢ* လီၤမၢၤ.”+ ဘၣ်ဆၣ်​ ဒ်ယဟိဝၤယွၤ တဲပာ်စၢၤဝဲအသိး ဖၤရိၤ အခိၣ်ကိၤဒံး ဒီးတကနၣ်​ အဝဲသ့ၣ်ဘၣ်.

၂၀ ဒီးယဟိဝၤယွၤ တဲစီၤမိၤၡ့လၢ “ဆၢထၢၣ်​ ဂီၤဂီၤ ဒီးလဲၤဆၢထၢၣ်​ အိၣ်ခိးပာ်စၢၤ ဖၤရိၤတချုးလၢ အဝဲလဲၤတုၤလၢ ထံကျိန့ၣ်တက့ၢ်. ဒီးနကဘၣ်​ တဲအီၤလၢ ‘ယဟိဝၤယွၤ တဲဝဲလၢ “ပျဲလဲၤယပှၤဂီၢ်မုၢ် ဒ်သိးအဝဲသ့ၣ်​ ကဘူၣ်ထီၣ်ဘါထီၣ်ယၤ အဂီၢ်တက့ၢ်. ၂၁ နမ့ၢ်တပျဲလဲၤ ယပှၤဂီၢ်မုၢ်ဘၣ်န့ၣ်​ ယကပျၢ်လီၤ ပကိာ်ဃၢ်တဖၣ်​ လၢနအိၣ်, လၢနခ့နပှၤတဖၣ်​ ဒီးလၢနပှၤဂီၢ်မုၢ်တဖၣ်အအိၣ်​ ဒီးလၢနဟံၣ်တဖၣ်​ အပူၤလီၤ. ဒီးပှၤအဲၤကူပတူးဖိတဖၣ်​ အဟံၣ်န့ၣ်​ ကပှဲၤဒီး ပကိာ်ဃၢ်တဖၣ်​ ဒီးပကိာ်ဃၢ်တဖၣ်အံၤ ကအိၣ်လၢ ဟီၣ်ခိၣ်လိၤပှဲၤပှဲၤလီၤ. ၂၂ ဖဲမုၢ်နံၤ အဝဲန့ၣ်န့ၣ်​ ယကပာ်လီၤဆီ ကိၡ့ၣ်​ အဟီၣ်ကဝီၤ ဖဲယပှၤဂီၢ်မုၢ် အိၣ်ဝဲအလီၢ် သပှၢ်ကတၢၢ်လီၤ. ဖဲန့ၣ်န့ၣ်​ ပကိာ်ဃၢ် တဟဲအိၣ်ထီၣ်ဘၣ်.+ လၢတၢ်န့ၣ်အဃိ သုကသ့ၣ်ညါလၢ ယၤ ယဟိဝၤယွၤ အိၣ်ဖဲအံၤလၢ ကီၢ်ပူၤလီၤ.+ ၂၃ ဒီးယပှၤဂီၢ်မုၢ်တဖၣ်န့ၣ်​ ယကပာ်လီၤဆီအီၤဒီး နပှၤဂီၢ်မုၢ်တဖၣ်လီၤ. ခဲမုၢ်ဆ့ၣ်န့ၣ်​ တၢ်ပနီၣ်လီၤလး တခါအံၤ ကမၤအသးလီၤ.”’”

၂၄ ဒီးယဟိဝၤယွၤ မၤဝဲဒ်န့ၣ်အသိးလီၤ. ဒီးပကိာ်ဃၢ် အါအါဂီၢ်ဂီၢ် ဟဲနုာ်လီၤလၢ ဖၤရိၤအဟံၣ်ပူၤ ဒီးလၢအခ့အပှၤ အဟံၣ်တဖၣ်အပူၤ ဒီးလၢကီၢ်အဲၤကူပတူး ဒီဘ့ၣ်ညါ အပူၤလီၤ.+ ဒီးပကိာ်ဃၢ်တဖၣ်န့ၣ်​ ဒုးအိၣ်ထီၣ်​ တၢ်ကီတၢ်ခဲဖးဒိၣ်​ လၢထံကီၢ်အပူၤလီၤ.+ ၂၅ လၢခံ ဖၤရိၤ ကိးန့ၢ် စီၤမိၤၡ့ ဒီးစီၤအၤဟရိၣ်​ ဒီးတဲဝဲလၢ “လဲၤလုၢ်ထီၣ်တၢ် လၢသုကစၢ်ယွၤအအိၣ်​ လၢထံကီၢ်အပူၤတက့ၢ်.” ၂၆ ဘၣ်ဆၣ်​ စီၤမိၤၡ့ တဲဝဲလၢ “ပမ့ၢ်မၤဒ်န့ၣ်န့ၣ်​ တကြၢးဘၣ်​ မ့ၢ်လၢ တၢ်လၢ ပကလုၢ်ထီၣ်အီၤလၢ ပကစၢ် ယဟိဝၤယွၤအအိၣ်န့ၣ်​ မ့ၢ်တၢ်လၢ အလီၤသးဘၣ်အၢ လၢပှၤအဲၤကူပတူးဖိတဖၣ်​ အမဲာ်ညါအဃိလီၤ.+ ပှၤအဲၤကူပတူးဖိ မ့ၢ်ထံၣ်လၢ ပလုၢ်ထီၣ်​ တၢ်လၢအလီၤသးဘၣ်အၢ လၢအဝဲသ့ၣ်အမဲာ်ညါန့ၣ်​ အဝဲသ့ၣ်​ ကကွံာ်ပှၤလၢလၢၢ် တမ့ၢ်ဧီၤ. ၂၇ ပကလဲၤလၢ ပှၢ်မုၢ်ကနၢ သၢသီ* ဒီးဖဲန့ၣ်​ ပကလုၢ်ထီၣ်တၢ်လၢ ပကစၢ် ယဟိဝၤယွၤအအိၣ်​ ဒ်အဝဲ တဲပှၤအသိးလီၤ.”+

၂၈ ဒီးဖၤရိၤ တဲဝဲလၢ “ယကပျဲသု ဒ်သိး သုကဟ့ၣ်လုၢ်ထီၣ်တၢ်လၢ သုကစၢ် ယဟိဝၤယွၤအအိၣ်လၢ ပှၢ်မုၢ်ကနၢ အပူၤလီၤ. ဘၣ်ဆၣ်​ သုတဘၣ်​ လဲၤယံၤယံၤဘၣ်. ဒီးဃ့ကညးန့ၢ်တၢ်လၢ ယဂီၢ်တက့ၢ်.”+ ၂၉ ဒီးစီၤမိၤၡ့ တဲဝဲလၢ “ခဲအံၤ ယကဟးထီၣ်​ လၢနအိၣ်​ ဒီးယကဃ့ကညး ယဟိဝၤယွၤ ဒီးခဲမုၢ်ဆ့ၣ်န့ၣ်​ ပကိာ်ဃၢ်တဖၣ်​ ကဟးထီၣ်ကွံာ်လၢ ဖၤရိၤအအိၣ်, လၢအခ့အပှၤအအိၣ်​ ဒီးလၢအပှၤဂီၢ်မုၢ် အအိၣ်လီၤ. ဘၣ်ဆၣ်​ တဘၣ်မၤပှၤ ကဒံကဒါ ခီဖျိလၢ နတြီပှၤဂီၢ်မုၢ်လၢ ကလဲၤဟ့ၣ်လုၢ်ထီၣ်တၢ်လၢ ယဟိဝၤယွၤအအိၣ်​ လၢၤတဂ့ၤ.”+ ၃၀ ဒီးစီၤမိၤၡ့ ဟးထီၣ်လၢ ဖၤရိၤအအိၣ်​ ဒီးဃ့ကညး ယဟိဝၤယွၤလီၤ.+ ၃၁ အဃိ ယဟိဝၤယွၤ မၤဝဲဒ် စီၤမိၤၡ့ တဲဝဲအသိး ဒီးပကိာ်ဃၢ်တဖၣ်​ ဟးထီၣ်လၢ ဖၤရိၤအအိၣ်, အခ့အပှၤတဖၣ်အအိၣ်​ ဒီးအပှၤဂီၢ်မုၢ်အအိၣ်​ ဒီးတအိၣ်တ့ၢ် နီတဘ့ၣ်လၢၤဘၣ်. ၃၂ ဘၣ်ဆၣ်​ ဖၤရိၤ အခိၣ်ကိၤထီၣ်ကဒီး ဒီးအဝဲ တပျဲလဲၤ ပှၤဂီၢ်မုၢ်ဘၣ်.

၉ အဃိ ယဟိဝၤယွၤ တဲစီၤမိၤၡ့လၢ “လဲၤလၢ ဖၤရိၤအအိၣ်​ ဒီးတဲအီၤလၢ ‘ပှၤဧ့ၤဘြံၤဖိအကစၢ် ယဟိဝၤယွၤ တဲဝဲလၢ “ပျဲလဲၤယပှၤဂီၢ်မုၢ် ဒ်သိး အဝဲသ့ၣ်​ ကဘူၣ်ထီၣ်ဘါထီၣ်ယၤ အဂီၢ်တက့ၢ်.+ ၂ ဘၣ်ဆၣ်​ နမ့ၢ်တပျဲလဲၤ အဝဲသ့ၣ်ဘၣ်​ ဒီးနမ့ၢ် ဖီၣ်ဃာ်ဒံး အဝဲသ့ၣ်န့ၣ်​ ၃ ယဟိဝၤယွၤအစု+ ကဟဲထီဒါ နဆၣ်ဖိကီၢ်ဖိ အဒၢတဖၣ်​ လၢအအိၣ်လၢ တၢ်ပျီပူၤလီၤ. အဃိ တၢ်ဆူးတၢ်ဆါ လၢအနး ကဟဲအိၣ်ထီၣ်လၢ ကသ့ၣ်အလိၤ, လၢကသ့ၣ်ယီၤအလိၤ, လၢကီၤလၤအူးအလိၤ, လၢကျီၢ်အလိၤ ဒီးလၢသိအလိၤလီၤ.+ ၄ ဒီးပှၤအံၣ်စရ့လးဖိ အဆၣ်ဖိကီၢ်ဖိ အဒၢန့ၣ်​ ယဟိဝၤယွၤ ကပာ်ပနီၣ်အီၤလၢ အလီၤဆီန့ၢ်ဒံး ပှၤအဲၤကူပတူးဖိ အဆၣ်ဖိကီၢ်ဖိ အဒၢန့ၣ်လီၤ. အဃိ မ့မ့ၢ် ပှၤအံၣ်စရ့လးဖိ အတၢ်န့ၣ်​ တသံဘၣ်​ နီတဒုဘၣ်.”’”+ ၅ ဒီးယဟိဝၤယွၤ ပာ်ပနီၣ်ဃာ် တၢ်ဆၢကတီၢ် ဒီးတဲဝဲလၢ “ခဲမုၢ်ဆ့ၣ်န့ၣ်​ ယၤ, ယဟိဝၤယွၤ ကမၤဝဲဒ်န့ၣ်​ လၢထံကီၢ်အပူၤလီၤ.”

၆ ဒီးလၢခံတနံၤန့ၣ်​ ယဟိဝၤယွၤ မၤဝဲဒ်န့ၣ်အဃိ ပှၤအဲၤကူပတူးဖိ အဆၣ်ဖိကီၢ်ဖိအဒၢ အကလုာ်ကလုာ်န့ၣ်​ သံဝဲ+ ဘၣ်ဆၣ်​ ပှၤအံၣ်စရ့လးဖိ အဆၣ်ဖိကီၢ်ဖိ အဒၢတဖၣ်န့ၣ်​ တသံနီတဒုဘၣ်. ၇ ဖဲဖၤရိၤ ဃုသ့ၣ်ညါတၢ်အခါ အဝဲ သ့ၣ်ညါဝဲလၢ ပှၤအံၣ်စရ့လးဖိ အဆၣ်ဖိကီၢ်ဖိအဒၢတဖၣ်​ တသံဝဲ နီတဒုဘၣ်. ဘၣ်ဆၣ်​ ဖၤရိၤ အခိၣ်ကိၤဒံးဝဲ ဒီးအဝဲ တပျဲလဲၤ ပှၤဂီၢ်မုၢ်တဖၣ်ဘၣ်.+

၈ ဒီးယဟိဝၤယွၤ တဲဘၣ်စီၤမိၤၡ့ ဒီးစီၤအၤဟရိၣ်လၢ “ဟံးန့ၢ် ဖၣ်ဆါလၢ ပှၤကုၢ်တၢ်အလီၢ် လၢသုစုခံခီ အပူၤပှဲၤပှဲၤ ဒီးစီၤမိၤၡ့ ကဘၣ်ဖှံထီၣ်ဝဲလၢ ဖၤရိၤအမဲာ်ညါ လၢကလံၤကျါလီၤ. ၉ ဒီးအကကဲထီၣ်​ တၢ်ကမူၣ်လၢ ကီၢ်အဲၤကူပတူး ဒီဘ့ၣ်ညါအပူၤ ဒီးအကကဲထီၣ်​ တၢ်ဝ့တဖၣ်လၢ အဒၢဖံထီၣ်လၢ ပှၤကညီ ဒီးဆၣ်ဖိကီၢ်ဖိအလိၤ လၢကီၢ်အဲၤကူပတူး ဒီဘ့ၣ်ညါ အပူၤလီၤ.”

၁၀ ဒီးအဝဲသ့ၣ်​ ဟံးန့ၢ် ဖၣ်ဆါလၢ ပှၤကုၢ်တၢ်အလီၢ် ဒီးလဲၤစိာ်ဝဲလၢ ဖၤရိၤအမဲာ်ညါလီၤ. ဒီးစီၤမိၤၡ့ ဖှံထီၣ်ဝဲ ဖၣ်ဆါ လၢကလံၤကျါ ဒီးအကဲထီၣ်​ တၢ်ဝ့တဖၣ်လၢ အဒၢဖံထီၣ်လၢ ပှၤကညီ ဒီးဆၣ်ဖိကီၢ်ဖိအလိၤလီၤ. ၁၁ ဒီးပှၤအူတၢ်သမူတၢ်တဖၣ်​ ဒီးပှၤအဲၤကူပတူးဖိခဲလၢာ် ဝ့ထီၣ်ဝဲလီၤ. ဒီးလၢတၢ်ဝ့တဖၣ်အံၤ အဃိ ပှၤအူတၢ်သမူတၢ်တဖၣ်​ လဲၤဆၢထၢၣ်ဝဲလၢ စီၤမိၤၡ့အမဲာ်ညါ တကဲဘၣ်.+ ၁၂ ဘၣ်ဆၣ်​ ယဟိဝၤယွၤ ပျဲဝဲလၢ ဖၤရိၤအခိၣ်ကကိၤ ဒီးဒ်ယဟိဝၤယွၤ တဲဝဲအသိး ဖၤရိၤ တဒိကနၣ်​ အဝဲသ့ၣ်​ အကလုၢ်ဘၣ်.+

၁၃ ဒီးယဟိဝၤယွၤ တဲဘၣ်စီၤမိၤၡ့လၢ “ဂဲၤဆၢထၢၣ်ဂီၤဂီၤ ဒီးလဲၤဆၢထၢၣ်လၢ ဖၤရိၤအမဲာ်ညါတက့ၢ်. ဒီးနဘၣ်တဲအီၤလၢ ‘ပှၤဧ့ၤဘြံၤဖိအကစၢ် ယဟိဝၤယွၤ တဲဝဲလၢ “ပျဲလဲၤယပှၤဂီၢ်မုၢ် ဒ်သိးအဝဲသ့ၣ်​ ကဘူၣ်ထီၣ်ဘါထီၣ်ယၤ အဂီၢ်တက့ၢ်. ၁၄ ခဲအံၤ ယကဆှၢလီၤ ယတၢ်နးတၢ်ဖှီၣ်ခဲလၢာ် ဒ်သိးအကမၤဘၣ်ဒိ နသး ဒီးနခ့နပှၤတဖၣ်​ ဒီးနပှၤဂီၢ်မုၢ်, ဒ်သိးနကသ့ၣ်ညါလၢ ပှၤလၢ အလီၤဂာ်ဒီးယၤလၢ ဟီၣ်ခိၣ်ချၢန့ၣ်​ တအိၣ်နီတဂၤဘၣ်.+ ၁၅ လၢညါ ယမ့ၢ်အဲၣ်ဒိး ယၤထီၣ်ယစု ဒီးတီၢ်နၤ ဒီးနပှၤဂီၢ်မုၢ် လၢတၢ်နးတၢ်ဖှီၣ်​ လၢအနးမးတခါ ဒီးမၤလီၤမၢ်ကွံာ်နၤလၢ ဟီၣ်ခိၣ်ချၢန့ၣ်​ ယမၤသ့လီၤ. ၁၆ ဘၣ်ဆၣ်​ ယပာ်မူနၤန့ၣ်​ မ့ၢ်ဒ်သိး ယကဒုးနဲၣ်နၤ ယတၢ်စိတၢ်ကမီၤ ဒီးဒ်သိးယမံၤ ကဘၣ်တၢ်စံၣ်တဲၤတဲလီၤအီၤ လၢဟီၣ်ခိၣ်​ ဒီဘ့ၣ်ညါအဂီၢ်လီၤ.+ ၁၇ မ့ၢ်နပာ်ထီၣ်ထီဒံးနသးလၢ ယပှၤဂီၢ်မုၢ် အဖီခိၣ်​ ခီဖျိလၢ နတပျဲလဲၤ အဝဲသ့ၣ်​ ဒံးဘၣ်န့ၣ်ဧါ. ၁၈ ခဲမုၢ်ဆ့ၣ်​ ဖဲတၢ်ဆၢကတီၢ် ဒ်အံၤန့ၣ်​ ယကဒုးစူၤလီၤ သူၣ်ဖးဒိၣ်လီၤ. လၢကီၢ်အဲၤကူပတူး အပူၤန့ၣ်​ တၢ်တမၤအသးဒ်အံၤ နီတဘျီဘၣ်. ၁၉ အဃိ ဟ့ၣ်လီၤတၢ်ကလုၢ် ဒ်သိး နဆၣ်ဖိကီၢ်ဖိအဒၢ ခဲလၢာ် ဒီးတၢ်လၢအကဲနတၢ် လၢတၢ်ပျီပူၤ ခဲလၢာ်န့ၣ်​ ပှၤကပာ်အီၤလၢ တၢ်သဒၢ အလီၢ်တက့ၢ်. ပှၤကညီ ဒီးဆၣ်ဖိကီၢ်ဖိ လၢအအိၣ်လၢ တၢ်ပျီပူၤ လၢအပှၤတဟဲကိးနုာ်အီၤလၢ ဟံၣ်ပူၤဘၣ်န့ၣ်​ သူၣ်တဖၣ်​ ကလီၤတဲာ်ဒိးအီၤ ဒီးကသံဝဲလီၤ.”’”

၂၀ ဖၤရိၤ အခ့အပှၤတဖၣ်လၢ အပျံၤယဟိဝၤယွၤ အကလုၢ်န့ၣ်​ ကိးနုာ်ဝဲ အခ့အပှၤ ဒီးအဆၣ်ဖိကီၢ်ဖိ အဒၢတဖၣ်​ လၢဟံၣ်ပူၤ ချ့ချ့လီၤ. ၂၁ ဘၣ်ဆၣ်​ ပှၤလၢ အတဒိကနၣ်​ ယဟိဝၤယွၤ အကလုၢ်ဘၣ်န့ၣ်​ ပာ်ဝဲအခ့အပှၤတဖၣ်​ ဒီးအဆၣ်ဖိကီၢ်ဖိ အဒၢတဖၣ်​ လၢတၢ်ပျီပူၤလီၤ.

၂၂ ယဟိဝၤယွၤ တဲဘၣ်စီၤမိၤၡ့လၢ “ယူာ်ထီၣ်နစု လၢမူခိၣ်​ ဒ်သိး သူၣ်တဖၣ်​ ကဟဲလီၤလၢ ကီၢ်အဲၤကူပတူး ဒီဘ့ၣ်ညါအပူၤ,+ လၢပှၤကညီ, ဆၣ်ဖိကီၢ်ဖိ ဒီးတၢ်မုၢ်တၢ်ဘိလၢ အအိၣ်လၢ ကီၢ်အဲၤကူပတူး အလိၤန့ၣ်တက့ၢ်.”+ ၂၃ အဃိ စီၤမိၤၡ့ ယူာ်ထီၣ်အနီၣ်ထိးဘိလၢ မူခိၣ်​ ဒီးယဟိဝၤယွၤ ဒုးသီၣ်ထီၣ်လီ ဒီးဒုးလီၤဝဲသူၣ်​ ဒီးမ့ၣ်အူ* လၢဟီၣ်ခိၣ်လိၤ ဒီးယဟိဝၤယွၤ ဆဲးဒုးစူၤလီၤဝဲ သူၣ်တဖၣ်​ လၢကီၢ်အဲၤကူပတူး အပူၤလီၤ. ၂၄ သူၣ်လီၤဝဲ ဒီးမ့ၣ်အူဟဲကပီၤထီၣ်​ ဆူအံၤဆူဘး လၢသူၣ်အကျါလီၤ. ဒီးသူၣ်ဖးဒိၣ်လီၤဝဲလီၤ. လၢကီၢ်အဲၤကူပတူးအပူၤန့ၣ်​ သူၣ်တလီၤဒ်အံၤ နီတဘျီဒံးဘၣ်.+ ၂၅ သူၣ်လီၤဝဲလၢ တၢ်ကိးမံၤဒဲးလၢ အအိၣ်လၢ ကီၢ်အဲၤကူပတူးအပူၤ အလိၤ စးထီၣ်လၢ ပှၤကညီ တုၤလီၤလၢ ဆၣ်ဖိကီၢ်ဖိန့ၣ်လီၤ. ဒီးအမၤဟးဂီၤဝဲ တၢ်မုၢ်တၢ်ဘိခဲလၢာ် ဒီးမၤကၢ်ကွံာ် သ့ၣ်ထူၣ်တဖၣ်​ လၢအအိၣ်လၢ တၢ်ပျီပူၤ ခဲလၢာ်လီၤ.+ ၂၆ ထဲဒၣ်​ ဖဲပှၤအံၣ်စရ့လးဖိ အိၣ်ဝဲအလီၢ် လၢအမ့ၢ် ကိၡ့ၣ်အဟီၣ်ကဝီၤန့ၣ်​ သူၣ်တလီၤဘၣ်.+

၂၇ အဃိ ဖၤရိၤ ကိးန့ၢ် စီၤမိၤၡ့ ဒီးစီၤအၤဟရိၣ်​ ဒီးတဲအဝဲသ့ၣ်လၢ “တဘျီအံၤဒု ယမၤကမၣ်တၢ်လံ. ယဟိဝၤယွၤ မ့ၢ်ပှၤတီပှၤလိၤ မ့မ့ၢ်ယၤဒီး ယပှၤဂီၢ်မုၢ်တဖၣ်န့ၣ်​ ကမၣ်လံ. ၂၈ ဃ့ကညး ယဟိဝၤယွၤလၢ အကမၤပတုာ် လီသီၣ်​ ဒီးသူၣ်န့ၣ်တက့ၢ်. ဖဲန့ၣ်ဝံၤမး ယကပျဲလဲၤသု လၢတၢ်သူၣ်အိၣ်သးအိၣ်အပူၤ ဒီးသုတလိၣ်အိၣ်ဖဲအံၤ လၢၤဘၣ်.” ၂၉ အဃိ စီၤမိၤၡ့ တဲအီၤလၢ “ဖဲယဟးထီၣ်​ လၢဝ့ၢ်ပူၤ တဘျီဃီန့ၣ်​ ယကဃ့ဘါထုကဖၣ်* လၢယဟိဝၤယွၤ အအိၣ်လီၤ. ဒီးဒ်သိးနကသ့ၣ်ညါလၢ ဟီၣ်ခိၣ်မ့ၢ် ယဟိဝၤယွၤ အတၢ်အဂီၢ် လီသီၣ်ကပတုာ်ဝဲ ဒီးသူၣ်တလီၤလၢၤဘၣ်.+ ၃၀ ဘၣ်ဆၣ်​ ယသ့ၣ်ညါပာ်စၢၤလၢ နၤဒီးနခ့နပှၤတဖၣ်န့ၣ်​ တမ့ၢ်လၢ သုကပျံၤ ယဟိဝၤယွၤဘၣ်.”

၃၁ မ့ၢ်လၢ ဘုမုယီၤအစဲၤ ပှၢ်ထီၣ်ပာ်စၢၤလံ ဒီးပအီအမုၢ် ဖီထီၣ်သၣ်ထီၣ်​ ပာ်စၢၤလံအဃိ ပအီအမုၢ် ဒီးဘုမုယီၤတဖၣ်​ ဟးဂီၤဝဲလၢ သူၣ်အဃိလီၤ. ၃၂ ဘၣ်ဆၣ်​ မ့ၢ်လၢ ဘုကၠူၣ်* သၣ်ထီၣ်စဲၤခံ* အဃိ အတဟးဂီၤကွံာ်ဘၣ်. ၃၃ စီၤမိၤၡ့ ဟးထီၣ်ကွံာ်လၢ ဖၤရိၤအအိၣ်​ ဒီးလဲၤဝဲလၢဝ့ၢ်ချၢ ဒီးဃ့ထုကဖၣ်* လၢယဟိဝၤယွၤ အအိၣ်​ ဒီးလီသီၣ်​ ဒီးသူၣ်လီၤပတုာ်ဝဲလီၤ. ဒီးမူခိၣ်စူၤလီၤဖးဒိၣ်​ ပတုာ်ဝဲလီၤ.+ ၃၄ ဖဲဖၤရိၤ ထံၣ်ဝဲလၢ တၢ်စူၤထံ, သူၣ်​ ဒီးလီသီၣ်​ ပတုာ်ဝဲအခါ အဝဲဒီးအခ့အပှၤတဖၣ်​ မၤကမၣ်တၢ် ခီဖျိ အဝဲသ့ၣ်​ အခိၣ်ကိၤထီၣ်ကဒီး အဃိလီၤ.+ ၃၅ ဒီးဒ်ယဟိဝၤယွၤ တဲပာ်စၢၤဝဲ ခီဖျိလၢစီၤမိၤၡ့အသိး ဖၤရိၤအခိၣ်ကိၤဒံး ဒီးတပျဲလဲၤ ပှၤအံၣ်စရ့လးဖိ တဖၣ်ဘၣ်.+

၁၀ ဒီးယဟိဝၤယွၤ တဲစီၤမိၤၡ့လၢ “လဲၤလၢ ဖၤရိၤအအိၣ်တက့ၢ်. ဖၤရိၤဒီး အခ့အပှၤတဖၣ်​ အခိၣ်ကိၤဒံးဝဲလီၤ.+ ယပျဲအဝဲသ့ၣ်​ ဒ်န့ၣ်​ ဒ်သိးယကဒုးနဲၣ်​ ယတၢ်ပနီၣ်လီၤလးတဖၣ်အံၤ လၢဖၤရိၤ အမဲာ်ညါ+ ၂ ဒီးဒ်သိး နကတဲဘၣ်​ နဖိနလံၤတဖၣ်​ ဘၣ်ဃးဒီး ယစံၣ်ညီၣ်​ ပှၤအဲၤကူပတူးဖိ နးထဲလဲၣ်​ ဒီးယမၤ တၢ်ပနီၣ်လီၤလး မနုၤတဖၣ်လၢ အဝဲသ့ၣ်​ အကျါလဲၣ်န့ၣ်လီၤ.+ ဖဲန့ၣ်​ သုကသ့ၣ်ညါလၢ ယမ့ၢ် ယဟိဝၤယွၤ သပှၢ်ကတၢၢ်လီၤ.”

၃ အဃိ စီၤမိၤၡ့ ဒီးစီၤအၤဟရိၣ်​ လဲၤလၢဖၤရိၤအအိၣ်​ ဒီးတဲအီၤလၢ “ပှၤဧ့ၤဘြံၤဖိအကစၢ် ယဟိဝၤယွၤ တဲဝဲလၢ ‘နကထီဒါယၤ ဆံးယံာ်ဒံးလဲၣ်.+ ပျဲလဲၤယပှၤဂီၢ်မုၢ် ဒ်သိး အဝဲသ့ၣ်​ ကဘူၣ်ထီၣ်ဘါထီၣ်ယၤ အဂီၢ်တက့ၢ်. ၄ နမ့ၢ်တပျဲလဲၤ ယပှၤဂီၢ်မုၢ်ဒံးဘၣ်န့ၣ်​ ခဲမုၢ်ဆ့ၣ်​ ယကဒုးဟဲထီၣ်​ ဒွဲၣ်တဖၣ်​ လၢနကီၢ်ပူၤလီၤ. ၅ ဒီးဒွဲၣ်တဖၣ်အံၤ ကအိၣ်လၢ ဟီၣ်ခိၣ်အမဲာ်ဖံးခိၣ်​ ပှဲၤပှဲၤ တုၤဒၣ်လဲာ် ပှၤထံၣ်ဟီၣ်ခိၣ်ညၣ်​ တသ့လၢၤဘၣ်. တၢ်လၢအအိၣ်တ့ၢ်ဒံးလၢ သုဂီၢ်လၢ သူၣ်တမၤဟးဂီၤအီၤဘၣ်န့ၣ်​ ဒွဲၣ်ကအီၣ်ကွံာ်ဝဲလီၤ. ဒီးအကအီၣ်​ သုသ့ၣ်ထူၣ်လၢ အမဲထီၣ်ဝဲလၢ တၢ်ပျီပူၤ ကိးထူၣ်ဒဲးလီၤ.+ ၆ ဒွဲၣ်ကအိၣ်ပှဲၤလၢ နဟံၣ်တဖၣ်ပူၤ, လၢနခ့နပှၤ ကိးဂၤဒဲးအဟံၣ်ပူၤ ဒီးလၢပှၤအဲၤကူပတူးဖိ ကိးဂၤဒဲး အဟံၣ်ပူၤလီၤ. စးထီၣ်လၢ နမိၢ်ပၢ်ဖံဖုတဖၣ်​ အိၣ်လၢ ကီၢ်အံၤအပူၤ တုၤလၢ မုၢ်မဆါတနံၤအံၤန့ၣ်​ အဝဲသ့ၣ်​ တထံၣ်ဘၣ်ဝဲ ဒ်အံၤ နီတဘျီဘၣ်.’”+ ဒီးအဝဲ ဃၣ်အသး ဒီးဟးထီၣ်ကွံာ်ဝဲလၢ ဖၤရိၤအအိၣ်လီၤ.

၇ ဒီးဖၤရိၤ အခ့အပှၤတဖၣ်​ တဲအီၤလၢ “ပှၤတဂၤအံၤ ကဆဲးမၤကီမၤခဲပှၤ ဆံးယံာ်လဲၣ်. ပျဲလဲၤပှၤတဖၣ်အံၤ ဒ်သိး အကဘူၣ်ထီၣ်ဘါထီၣ်​ အဝဲသ့ၣ်​ အကစၢ် ယဟိဝၤသၢၤ. ကီၢ်အဲၤကူပတူး ဟးဂီၤလံန့ၣ်​ နတသ့ၣ်ညါဒံးဧီၤ.” ၈ အဃိ ပှၤဟဲကိးကဒါက့ၤ စီၤမိၤၡ့ ဒီးစီၤအၤဟရိၣ်​ ဆူဖၤရိၤအအိၣ်​ ဒီးဖၤရိၤ တဲအဝဲသ့ၣ်လၢ “လဲၤဘူၣ်ထီၣ်ဘါထီၣ်​ သုကစၢ် ယဟိဝၤယွၤန့ၣ်. ဘၣ်ဆၣ်​ မတၤတဖၣ်​ ကလဲၤဝဲလဲၣ်.” ၉ ဒီးစီၤမိၤၡ့ တဲဝဲလၢ “မ့ၢ်လၢ ပကမၤ ဘူၣ်တခါလၢ ယဟိဝၤယွၤ အဂီၢ်အဃိ+ ပကလဲၤဒီး ပှၤသးစၢ်တဖၣ်, ပှၤသးပှၢ်တဖၣ်, ပဖိမုၣ်ဖိခွါတဖၣ်, ပသိဒီးပကျီၢ်တဖၣ်လီၤ.”+ ၁၀ ဒီးဖၤရိၤ တဲအဝဲသ့ၣ်လၢ “ယမ့ၢ် ပျဲလဲၤဘၣ်ဖုးသု ဒီးသုဖိတဖၣ်ဒု သုတဲလၢ ယဟိဝၤယွၤ အိၣ်ဒီးသု ကသ့အနီၢ်ကီၢ်သၢၤ.+ သုအဲၣ်ဒိးမၤ တၢ်လၢအတဂ့ၤဘၣ်ဒု လီၤတံၢ်လံ. ၁၁ အဃိ တန့ၢ်ဘၣ်. ပှၤလဲၤဘူၣ်ထီၣ်ဘါထီၣ်​ ယဟိဝၤယွၤ န့ၢ်ထဲ သုပိာ်ခွါတဖၣ်လီၤ. သုဃ့ပာ်စၢၤဒ်န့ၣ်​ တမ့ၢ်ဧီၤ.” ဒီးအဝဲသ့ၣ်​ ဘၣ်တၢ်နီဟးထီၣ်ကွံာ်အီၤ လၢဖၤရိၤ အမဲာ်ညါလီၤ.

၁၂ ဒီးယဟိဝၤယွၤ တဲဘၣ်စီၤမိၤၡ့လၢ “ယူာ်ထီၣ်နစုလၢ ကီၢ်အဲၤကူပတူး အဖီခိၣ်​ ဒ်သိးဒွဲၣ်တဖၣ်​ ကဟဲထီၣ်လၢ ကီၢ်အဲၤကူပတူးအဖီခိၣ်​ ဒီးကအီၣ်ကွံာ် တၢ်မုၢ်တၢ်ဘိခဲလၢာ် လၢထံကီၢ်အပူၤ ဒီးတၢ်လၢသူၣ်​ တမၤဟးဂီၤဝဲဘၣ်​ ကိးမံၤဒဲးအဂီၢ်တက့ၢ်.” ၁၃ ဒီးစီၤမိၤၡ့ ယူာ်ထီၣ်​ အနီၣ်ထိးဘိ လၢကီၢ်အဲၤကူပတူး အဖီခိၣ်​ ဒီးတၢ်တနံၤန့ၣ်​ ယဟိဝၤယွၤ ဒုးဟဲထီၣ်ကလံၤလၢ မုၢ်ထီၣ်တခီ လၢကီၢ်ပူၤ ဒီနံၤဒီနၤ တုၤလၢ ဂီၤခီလီၤ. ဒီးကလံၤလၢ မုၢ်ထီၣ်တခီ ဟဲစိာ်ဝဲ ဒွဲၣ်တဖၣ်လီၤ. ၁၄ ဒီးဒွဲၣ်တဖၣ်​ ဟဲထီၣ်ဝဲလၢ ကီၢ်အဲၤကူပတူး ဒီဘ့ၣ်ညါ အဖီခိၣ်​ ဒီးစီၢ်လီၤဝဲလၢ တၢ်လီၢ်ကိးပူၤဒဲးလၢ ကီၢ်အဲၤကူပတူး အပူၤလီၤ.+ တၢ်နးတၢ်ဖှီၣ်အံၤ နးမးလီၤ.+ လၢညါ ဒွဲၣ်တအိၣ်​ အါထဲအံၤ နီတဘျီဘၣ်​ ဒီးလၢခံန့ၣ်​ အတအိၣ်​ အါထဲအံၤ နီတဘျီလၢၤဘၣ်. ၁၅ ဒီးဒွဲၣ်တဖၣ်အံၤ အိၣ်လၢ ထံကီၢ်အပူၤပှဲၤပှဲၤ ဒီးကီၢ်ဖျါ ခံးသူဝဲလၢ ဒွဲၣ်တဖၣ်အံၤ အဃိလီၤ. ဒီးဒွဲၣ်တဖၣ်​ အီၣ်ကွံာ်ဝဲ တၢ်မုၢ်တၢ်ဘိခဲလၢာ် လၢထံကီၢ်အပူၤ ဒီးသ့ၣ်သၣ်တဖၣ်လၢ သူၣ်တမၤဟးဂီၤအီၤဘၣ်န့ၣ်လီၤ. အဃိ လၢသ့ၣ်တဖၣ်အလိၤ ဒီးလၢ တၢ်မုၢ်တၢ်ဘိတဖၣ်အလိၤန့ၣ်​ တၢ်လၢအလါတဖၣ်​ တအိၣ်တ့ၢ် နီတမံၤလၢၤဘၣ်.

၁၆ အဃိ ဖၤရိၤ ကိးန့ၢ်ဝဲ စီၤမိၤၡ့ ဒီးစီၤအၤဟရိၣ်​ ချ့ချ့ ဒီးတဲဝဲလၢ “ယမၤကမၣ်ဘၣ်​ သုကစၢ် ယဟိဝၤယွၤ ဒီးယမၤကမၣ်ဘၣ်သုလီၤ. ၁၇ ဝံသးစူၤ ပျၢ်ယတၢ်ကမၣ်​ ထဲတဘျီအံၤ ဒီးဃ့ကညး သုကစၢ် ယဟိဝၤယွၤလၢ အကထုးထီၣ်ကွံာ် တၢ်နးတၢ်ဖှီၣ်နးမးတခါအံၤ လၢယအိၣ်တက့ၢ်.” ၁၈ အဃိ စီၤမိၤၡ့ ဟးထီၣ်လၢ ဖၤရိၤအအိၣ်​ ဒီးဃ့ကညး ယဟိဝၤယွၤလီၤ.+ ၁၉ ဒီးယဟိဝၤယွၤ ဃၣ်ကဒါက့ၤ ကလံၤကျိၤလီၤ. ဒီးကလံၤလၢ မုၢ်နုာ်တခီန့ၣ်​ ဟဲထီၣ်ဝဲဆူၣ်ဆူၣ်​ ဒီးစိာ်ကွံာ်ဝဲ ဒွဲၣ်တဖၣ်လၢအယံၤ ဒီးတၢၤလီၤအဝဲသ့ၣ်​ လၢပီၣ်လဲၣ်ဂီၤအပူၤလီၤ. လၢကီၢ်အဲၤကူပတူးအပူၤန့ၣ်​ ဒွဲၣ်တဖၣ်​ တအိၣ်တ့ၢ်ဝဲ နီတဘ့ၣ်ဘၣ်. ၂၀ ဘၣ်ဆၣ်​ ယဟိဝၤယွၤ ပျဲလၢဖၤရိၤ အခိၣ်ကကိၤ+ ဒီးဖၤရိၤ တပျဲလဲၤ ပှၤအံၣ်စရ့လးဖိတဖၣ်ဘၣ်.

၂၁ ဒီးယဟိဝၤယွၤ တဲစီၤမိၤၡ့လၢ “ယူာ်ထီၣ်နစု ဆူမူခိၣ်​ ဒ်သိး တၢ်ခံးသူဖးဒိၣ်​ ကအိၣ်လၢ ကီၢ်အဲၤကူပတူး အပူၤတက့ၢ်.” ၂၂ အဃိ စီၤမိၤၡ့ ယူာ်ထီၣ်အစု ဆူမူခိၣ်​ တဘျီဃီ ဒီးတၢ်ခံးသူ လီၤဘၣ်ဝဲ ကီၢ်အဲၤကူပတူးဒီဘ့ၣ်​ သၢသီလီၤ.+ ၂၃ အဝဲသ့ၣ်​ တထံၣ်လိာ်အသး တဂၤဒီးတဂၤလၢၤဘၣ်. ဒီးအဝဲသ့ၣ်​ တဟးထီၣ်လၢအလီၢ် နီတဂၤဘၣ်​ သၢသီညါလီၤ. ဘၣ်ဆၣ်​ ဖဲပှၤအံၣ်စရ့လးဖိခဲလၢာ် အိၣ်ဝဲအလီၢ်န့ၣ်​ တၢ်ကပီၤအိၣ်ဝဲလီၤ.+ ၂၄ ဒီးဖၤရိၤ ကိးန့ၢ်ဝဲ စီၤမိၤၡ့ ဒီးတဲဝဲလၢ “လဲၤဘူၣ်ထီၣ်ဘါထီၣ်​ ယဟိဝၤယွၤန့ၣ်.+ သုဖိတဖၣ်​ လဲၤဒီးသုသ့လီၤ. ဘၣ်ဆၣ်​ ပာ်တ့ၢ်ထဲ သုသိ ဒီးကျီၢ်တက့ၢ်.” ၂၅ ဘၣ်ဆၣ်​ စီၤမိၤၡ့ တဲဝဲလၢ “နကဟ့ၣ်လီၤစ့ၢ်ကီးပှၤ* ဆၣ်ဖိကီၢ်ဖိတဖၣ်လၢ တၢ်လုၢ်တၢ်ပာ် ဒီးတၢ်လုၢ်ဒွဲၣ်အူအဂီၢ်လီၤ. ဒီးပကလုၢ်ထီၣ်​ တၢ်လုၢ်တဖၣ်အံၤ လၢယဟိဝၤယွၤ အအိၣ်လီၤ.+ ၂၆ ဒီးပဆၣ်ဖိကီၢ်ဖိ အဒၢတဖၣ်​ ကလဲၤတၢ်ဒီးပှၤ စ့ၢ်ကီးလီၤ. ဒ်သိး ပကဘူၣ်ထီၣ်ဘါထီၣ်​ ပကစၢ် ယဟိဝၤယွၤအဂီၢ် ပကဘၣ်သူ ပဆၣ်ဖိကီၢ်ဖိတနီၤ ဒီးတချုးလၢ ပလဲၤတုၤ ဖဲန့ၣ်ဒံးဘၣ်အခါ ပကဘၣ်​ ဟ့ၣ်လုၢ်ထီၣ်​ ဆၣ်ဖိကီၢ်ဖိ မနုၤတဖၣ်လၢ ယဟိဝၤယွၤ အအိၣ်လဲၣ်န့ၣ်​ ပတသ့ၣ်ညါဆိဘၣ်. အဃိ ဆၣ်ဖိကီၢ်ဖိ တဘၣ်အိၣ်တ့ၢ် နီတဒုဘၣ်.” ၂၇ ဘၣ်ဆၣ်​ ယဟိဝၤယွၤ ပျဲလၢဖၤရိၤ အခိၣ်ကကိၤ ဒီးဖၤရိၤ တသးအိၣ်​ ပျဲလဲၤ အဝဲသ့ၣ်ဘၣ်.+ ၂၈ ဒီးဖၤရိၤ တဲအီၤလၢ “ဟးထီၣ်ကွံာ်လၢ ယမဲာ်ညါ. တဘၣ်ဟဲကွၢ် ယမဲာ်လၢၤတဂ့ၤ. မုၢ်တနံၤလၢ နဟဲကွၢ်ယမဲာ်န့ၣ်​ နကသံလီၤ.” ၂၉ စီၤမိၤၡ့ တဲဆၢအီၤလၢ “ဒ်နတဲအသိး ယတဟဲကွၢ် နမဲာ်လၢၤဘၣ်.”

၁၁ ဒီးယဟိဝၤယွၤ တဲဘၣ်​ စီၤမိၤၡ့လၢ “ယကဒုးလီၤကဒီး တၢ်နးတၢ်ဖှီၣ်​ တခါလၢ ဖၤရိၤ ဒီးကီၢ်အဲၤကူပတူး အလိၤဒံး. တၢ်န့ၣ်ဝံၤအလီၢ်ခံ အဝဲကပျဲလဲၤသုလီၤ.+ ဖဲအဝဲ ပျဲလဲၤသုအခါ အကနီဟးထီၣ်ကွံာ်သု လၢတၢ်လီၢ်ဖဲအံၤ သပှၢ်ကတၢၢ်လီၤ.+ ၂ ဒီးတဲဘၣ်​ ပှၤဂီၢ်မုၢ်တဖၣ်​ လၢအမ့ၢ် ပှၤပိာ်မုၣ်​ ဒီးပိာ်ခွါ ကိးဂၤဒဲးလၢ အဝဲသ့ၣ်​ ကဘၣ်ဃ့ဝဲ ပှၤလၢအခိၣ်အဃၢၤ အတၢ်ဖိတၢ်လံၤ လၢအမ့ၢ် စ့ညၣ်ဒီးထူ တဖၣ်လီၤ.”+ ၃ ဒီးယဟိဝၤယွၤ မၤဝဲဒ်သိး ပှၤအဲၤကူပတူးဖိ ကဘၣ်သူၣ်ဘၣ်သး ပှၤအံၣ်စရ့လးဖိ အဂီၢ်လီၤ. တကးဒံးဘၣ်​ စီၤမိၤၡ့န့ၣ်​ ကဲထီၣ်​ ပှၤဖးဒိၣ်တဂၤလၢ ကီၢ်အဲၤကူပတူးအပူၤ လၢဖၤရိၤ အခ့အပှၤတဖၣ်​ အမဲာ်ညါ ဒီးလၢပှၤဂီၢ်မုၢ် အမဲာ်ညါလီၤ.

၄ ဒီးစီၤမိၤၡ့ တဲဝဲလၢ “ယဟိဝၤယွၤ တဲဝဲလၢ ‘ဖဲဖးဖီမုၢ်န့ၣ်​ ယကလဲၤလၢ ကီၢ်အဲၤကူပတူးအပူၤ+ ၅ ဒီးဖိဝဲၢ်ကိလၢ ကီၢ်အဲၤကူပတူးအပူၤ စးထီၣ်လၢ ဖၤရိၤလၢ အဆ့ၣ်နီၤလၢ အလီၢ်ပစိာ်တဂၤ အဖိဝဲၢ်ကိ တုၤလီၤလၢ ကုၢ်မုၣ်လၢ အဂူာ် ဆၢၣ်ဂူာ် အဖိဝဲၢ်ကိ ဒီးဆၣ်ဖိကီၢ်ဖိ အဒၢခဲလၢာ် အဖိဝဲၢ်ကိန့ၣ်+ ကသံဝဲလီၤ.+ ၆ အဃိ တၢ်ဟီၣ်တၢ်ယၢၤ ဒိၣ်ဒိၣ်မုၢ်မုၢ် ကအိၣ်ထီၣ်လၢ ကီၢ်အဲၤကူပတူး ဒီဘ့ၣ်ညါအပူၤ ဒီးတၢ်ဟီၣ်တၢ်ယၢၤ ဒ်အံၤန့ၣ်​ တအိၣ်ဝဲ နီတဘျီဘၣ်​ ဒီးတကဲထီၣ်​ နီတဘျီလၢၤဘၣ်.+ ၇ ဒ်သိး သုကသ့ၣ်ညါလၢ ယဟိဝၤယွၤ ပာ်လီၤဆီ ပှၤအဲၤကူပတူးဖိ ဒီးပှၤအံၣ်စရ့လးဖိ သ့ဝဲအဂီၢ် ထွံၣ်တဒုမး တမီၤ ပှၤအံၣ်စရ့လးဖိ ဒီးအဝဲသ့ၣ်​ အဆၣ်ဖိကီၢ်ဖိ အဒၢတဖၣ်ဘၣ်.’+ ၈ ဒီးနခ့နပှၤခဲလၢာ် ကဟဲလီၤဆူယအိၣ်​ ဒီးကထိၣ်လီၤပှီၤအသး လၢယမဲာ်ညါ ဒီးကတဲဝဲလၢ ‘နၤဒီးပှၤဂီၢ်မုၢ် ခဲလၢာ်လၢ အပိာ်နခံန့ၣ်​ လဲၤသၢၤ.’+ တၢ်န့ၣ်ဝံၤအလီၢ်ခံ ယက ဟးထီၣ်ကွံာ်လီၤ.” ဒီးအဟးထီၣ်ဝဲလၢ ဖၤရိၤအအိၣ်​ လၢတၢ်သးထီၣ်အပူၤလီၤ.

၉ ဒီးယဟိဝၤယွၤ တဲစီၤမိၤၡ့လၢ “တမ့ၢ်လၢ ဖၤရိၤ ကဒိကနၣ်​ သုကလုၢ်ဘၣ်အဃိ+ ယကမၤအါထီၣ်​ တၢ်လီၤလးလၢ ကီၢ်အဲၤကူပတူးအပူၤလီၤ.”+ ၁၀ ဒီးစီၤမိၤၡ့ ဒီးစီၤအၤဟရိၣ်​ မၤတၢ်လီၤလးတဖၣ်အံၤ ကိးမံၤဒဲးလၢ ဖၤရိၤအမဲာ်ညါ+ ဘၣ်ဆၣ်​ ယဟိဝၤယွၤ ပျဲဝဲလၢ ဖၤရိၤ အခိၣ်ကကိၤအဃိ ဖၤရိၤ တပျဲဝဲလၢ ပှၤအံၣ်စရ့လးဖိ ကဟးထီၣ်လၢ အထံကီၢ်ပူၤဘၣ်.+

၁၂ လၢကီၢ်အဲၤကူပတူးအပူၤန့ၣ်​ ယဟိဝၤယွၤ တဲဘၣ်​ စီၤမိၤၡ့ ဒီးစီၤအၤဟရိၣ်လၢ ၂ “လါတလါအံၤန့ၣ်​ ကမ့ၢ်ဝဲ လါအခီၣ်ထံးတလါ လၢသုဂီၢ်လီၤ. ဒီးကမ့ၢ်ဝဲ လါအဆိကတၢၢ်တလါ လၢတနံၣ်အတီၢ်ပူၤလီၤ.+ ၃ ဒီးတဲဘၣ်​ ပှၤအံၣ်စရ့လးဖိ ခဲလၢာ်လၢ ‘ဖဲလါတလါအံၤ လါထီၣ်အသီတဆံန့ၣ်​ အဝဲသ့ၣ်​ တဂၤစုာ်စုာ် ကဘၣ်ဟံးန့ၢ် သိတဒုလၢ+ အဝဲသ့ၣ်​ အဟံၣ်ဖိဃီဖိတဒူၣ်​ အဂီၢ်လီၤ. ၄ ဘၣ်ဆၣ်​ လၢဟံၣ်တဖျၢၣ်အပူၤန့ၣ်​ ပှၤမ့ၢ်အိၣ်စှၤတလၢ လၢကအီၣ်ဝဲ သိဒီတဒုအဂီၢ်န့ၣ်​ အဝဲသ့ၣ်​ ဒီးပှၤလၢအခိၣ်ဃၢၤလၢ အဘူးကတၢၢ်တဒူၣ်​ ကြၢးအီၣ်သကိး သိတဒုအံၤလၢ အဝဲသ့ၣ်​ အဟံၣ်ပူၤလီၤ. ဒီးအဝဲသ့ၣ်​ ကြၢးဒွးဝဲ ဒ်ပှၤအနီၣ်ဂံၢ် အိၣ်ဝဲအသိး ဒီးအဝဲသ့ၣ်​ ကအီၣ်သိညၣ်​ တဂၤထဲလဲၣ်န့ၣ်လီၤ. ၅ ဒီးသိတဒုန့ၣ်​ ကဘၣ်မ့ၢ်သိလၢအလၢအပှဲၤ+ ဒီးကဘၣ်မ့ၢ် အဖါလၢ အသးအိၣ်​ တနံၣ်လီၤ. သုဃုထၢထီၣ်အီၤ လၢသိတဖၣ်အကျါသ့ မ့တမ့ၢ် လၢမဲာ်တဲးလဲးတဖၣ်အကျါ သ့ဝဲစ့ၢ်ကီးလီၤ. ၆ ဒီးသုကဘၣ်​ ကွၢ်ထွဲအီၤ တုၤလၢ လါတလါအံၤ ၁၄ သီလီၤ.+ ဒီးဟံၣ်ဖိဃီဖိ ကိးဒူၣ်ဒဲးလၢ အံၣ်စရ့လး အတၢ်အိၣ်ဖှိၣ်ပူၤန့ၣ်​ ကဘၣ်မၤသံအီၤ ဖဲမုၢ်လီၤနုာ် အဆၢကတီၢ်န့ၣ်လီၤ.*+ ၇ အဝဲသ့ၣ်​ ဘၣ်ဟံးန့ၢ် အသွံၣ်တနီၤ ဒီးပဲထီၣ်အီၤလၢ ပဲတြီ အကပၤ ခံကပၤ ဒီးပဲတြီ အဒီခိၣ်​ လၢဟံၣ်တဖၣ်လၢ အဝဲသ့ၣ်အီၣ်သိအညၣ်​ လၢအပူၤလီၤ.+

၈ “‘အဝဲသ့ၣ်​ ကြၢးကၣ်အီၤလၢ မ့ၣ်အူအဖီခိၣ်​ ဒီးဖဲတၢ်တနၤန့ၣ်​ အဝဲသ့ၣ်​ ကဘၣ်အီၣ်အီၤဒီး+ ကိၣ်လၢအတပၣ်ဒီး ကိၣ်မံၣ်ဘၣ်+ ဒီးတၢ်ဒိးတၢ်လၣ်​ လၢအခၣ်လီၤ.+ ၉ တဘၣ်အီၣ်သံသိအီၤ မ့တမ့ၢ် ချီအီၣ်အီၤလၢ ထံတဂ့ၤ. မ့မ့ၢ် ကၣ်အီၤဃုာ်ဒီးအခိၣ်, အခီၣ်​ ဒီးတၢ်အိၣ်လၢအကိပူၤတဖၣ်​ လၢမ့ၣ်အူ အဖီခိၣ်တက့ၢ်. ၁၀ သုတဘၣ်ပာ်ဃာ်အီၤ တုၤလီၤလၢ ဂီၤခီ နီတစဲးတဂ့ၤ. အမ့ၢ်အိၣ်ဒံး တုၤလီၤလၢ ဂီၤခီန့ၣ်​ သုကဘၣ်​ ဒွဲၣ်အူကွံာ်အီၤ လၢမ့ၣ်အူလီၤ.+ ၁၁ ဖဲသုအီၣ်အီၤအခါန့ၣ်​ သုကဘၣ်စၢဃာ်ပာ်စၢၤ သုယီၢ်တကိး,* ဒိးဃာ်ခီၣ်ဖံး ဒီးဖီၣ်ဃာ်နီၣ်ထိးဘိ ဒီးသုကဘၣ်အီၣ်အီၤ ချ့ချ့လီၤ. အဝဲအံၤ မ့ၢ်ဝဲ ယဟိဝၤယွၤ အဘူၣ်လဲၤကပာ်လီၤ. ၁၂ ဖဲတၢ်တနၤန့ၣ်​ ယကလဲၤတၢ်လၢ ကီၢ်အဲၤကူပတူး ဒီဘ့ၣ်အပူၤ ဒီးကယဲၢ် ဖိဝဲၢ်ကိလၢ ကီၢ်အဲၤကူပတူးအပူၤ လၢအမ့ၢ် ပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ ယကမၤသံအီၤလီၤ.+ ဒီးယကစံၣ်ညီၣ်​ ကီၢ်အဲၤကူပတူး အယွၤခဲလၢာ်လီၤ.+ ယဲဒၣ်အံၤ ယမ့ၢ် ယဟိဝၤယွၤလီၤ. ၁၃ တၢ်သွံၣ်န့ၣ်​ ကကဲထီၣ်​ တၢ်ပနီၣ်တမံၤလၢ သုဟံၣ်အလိၤ ဒီးယကထံၣ်တၢ်သွံၣ်​ ဒီးယကလဲၤကပာ်သု အဃိ ဖဲယတီၢ် ကီၢ်အဲၤကူပတူးအခါ တၢ်နးတၢ်ဖှီၣ်အံၤ တဘၣ်သုဘၣ်​ ဒီးတမၤဟးဂီၤသုဘၣ်.+

၁၄ “‘သုကြၢးသ့ၣ်နီၣ်ထီၣ်က့ၤ မုၢ်နံၤအဝဲန့ၣ်​ ဒီးတစိၤဘၣ်တစိၤ သုကဘၣ်မၤ ဘူၣ်ဧိၤပွဲဧိၤ ဖဲမုၢ်နံၤ အဝဲန့ၣ်​ ဒ်သိး ကမၤလၤကပီၤ ယဟိဝၤယွၤ အဂီၢ်လီၤ. သုကဘၣ်မၤဘူၣ်အံၤ ဒ်အမ့ၢ် တၢ်သိၣ်တၢ်သီလၢ အဂၢၢ်ကျၢၤအသိးလီၤ. ၁၅ သုကဘၣ်အီၣ်​ ကိၣ်လၢ အတပၣ်ဒီး ကိၣ်မံၣ်ဘၣ်​ နွံသီလီၤ.+ ဖဲအဆိကတၢၢ် တသီန့ၣ်​ သုကဘၣ်ထုးထီၣ်ကွံာ် ကိၣ်မံၣ်လၢ အအိၣ်လၢသုဟံၣ်ပူၤလီၤ. စးထီၣ်လၢ အဆိကတၢၢ်တသီ တုၤလီၤလၢ နွံသီတသီန့ၣ်​ ပှၤလၢအအီၣ်​ တၢ်လၢအပၣ်ဃုာ်ဒီး ကိၣ်မံၣ်န့ၣ်​ ကဘၣ်​ တၢ်မၤသံကွံာ်အီၤ ဒ်သိးကထုးထီၣ်ကွံာ်အီၤလၢ ပှၤအံၣ်စရ့လးဖိ အကျါလီၤ. ၁၆ ဖဲအဆိကတၢၢ်တသီန့ၣ်​ သုကဘၣ်မၤ တၢ်အိၣ်ဖှိၣ်စီဆှံ ဒီးဖဲနွံသီတသီန့ၣ်​ သုကဘၣ်​ မၤကဒီး တၢ်အိၣ်ဖှိၣ်စီဆှံလီၤ. ဖဲတၢ်ခံသီအံၤ အတီၢ်ပူၤ ပှၤတဘၣ်မၤတၢ်မၤ နီတခါဘၣ်.+ သုကတဲာ်ကတီၤသ့ထဲဒၣ်​ တၢ်အီၣ်လၢ သုဝဲတဂၤစုာ်စုာ် လိၣ်ဘၣ်ဝဲန့ၣ်လီၤ.

၁၇ “‘သုကဘၣ်မၤ ဘူၣ်ကိၣ်လၢ အတပၣ်ဒီး ကိၣ်မံၣ်ဘၣ်​ ထီဘိ,+ မ့ၢ်လၢ ဖဲမုၢ်နံၤ အဝဲန့ၣ်န့ၣ်​ ယကဒုး ဟးထီၣ်ကွံာ် သုပှၤဂီၢ်မုၢ်လၢ အအိၣ်ဝဲ အါအါဂီၢ်ဂီၢ်လၢ ကီၢ်အဲၤကူပတူးအပူၤလီၤ. ဒီးတစိၤဘၣ်တစိၤ သုကဘၣ်​ သ့ၣ်နီၣ်ထီၣ်က့ၤ မုၢ်နံၤအဝဲန့ၣ်​ ဒ်အမ့ၢ် တၢ်သိၣ်တၢ်သီလၢ အဂၢၢ်ကျၢၤအသိးလီၤ. ၁၈ လါအဆိကတၢၢ်တလါ, လါထီၣ်​ ၁၄ သီတသီ ဖဲဟါလီၤခီ အဆၢကတီၢ်န့ၣ်​ သုကဘၣ်အီၣ်​ ကိၣ်လၢ အတပၣ်ဒီး ကိၣ်မံၣ်ဘၣ်​ တုၤလီၤလၢ လါထီၣ်​ ၂၁ သီ ဟါလီၤခီန့ၣ်လီၤ.+ ၁၉ ပှၤထံဂၤကီၢ်ဂၤဖိမ့ၢ်ဂ့ၤ, ပှၤလၢအအိၣ်ဖျဲၣ်ထီၣ်​ ဒ်ပှၤအံၣ်စရ့လးဖိ အသိးမ့ၢ်ဂ့ၤ,+ ပှၤတဂၤဂ့ၤ တဂၤဂ့ၤ လၢအအီၣ်တၢ်လၢ အပၣ်ဃုာ်ဒီး ကိၣ်မံၣ်န့ၣ်​ အဝဲကဘၣ်​ တၢ်မၤသံအီၤ ဒ်သိး တၢ်ကထုးထီၣ်ကွံာ်အီၤလၢ ပှၤအံၣ်စရ့လးဖိ အကျါလီၤ.+ အဃိ ဖဲနွံသီအတီၢ်ပူၤန့ၣ်​ ကိၣ်မံၣ်​ တဘၣ်အိၣ်လၢ သုဟံၣ်ပူၤဘၣ်. ၂၀ တၢ်အီၣ်လၢ အပၣ်ဃုာ်ဒီး ကိၣ်မံၣ်န့ၣ်​ သုတဘၣ်အီၣ်အီၤ နီတခါဘၣ်. ပှၤလၢ အအိၣ်လၢ သုဟံၣ်ပူၤ ကိးဂၤဒဲးန့ၣ်​ ကဘၣ်အီၣ်​ ကိၣ်လၢ အတပၣ်ဒီး ကိၣ်မံၣ်ဘၣ်န့ၣ်လီၤ.’”

၂၁ ဒီးစီၤမိၤၡ့ ကိးန့ၢ် အံၣ်စရ့လး အပှၤသူၣ်က့သးပှၢ် ခဲလၢာ်+ ဒီးတဲအဝဲသ့ၣ်လၢ “လဲၤဃုထၢထီၣ်​ ဆၣ်ဖိကီၢ်ဖိတဖၣ်* လၢသုဟံၣ်ဖိဃီဖိ တဒူၣ်စုာ်စုာ်အဂီၢ် ဒီးမၤသံအီၤ ဒ်အမ့ၢ် ဘူၣ်လဲၤကပာ် အတၢ်လုၢ်အသိးတက့ၢ်. ၂၂ ဒီးသုဘၣ်ဘျၢလီၤ ကဖျီၣ်အ့စိး တကဒိၣ်လၢ တၢ်သွံၣ်လၢ အအိၣ်လၢ ထံဒၢအပူၤ ဒီးပဲထီၣ်တၢ်သွံၣ်​ လၢပဲတြီ အဒီခိၣ်​ ဒီးပဲတြီအကပၤ ခံကပၤလီၤ. ဒီးသုတဘၣ်​ ဟးထီၣ်လၢ သုဟံၣ်ပူၤ နီတဂၤဘၣ်​ တုၤလီၤလၢ ဂီၤခီလီၤ. ၂၃ ဒီးယဟိဝၤယွၤ ကလဲၤတၢ်လၢ ကီၢ်ပူၤ ဒ်သိး ကစံၣ်ညီၣ်​ ပှၤအဲၤကူပတူးဖိတဖၣ်လီၤ. ဒီးယဟိဝၤယွၤ မ့ၢ်ထံၣ်တၢ်သွံၣ်လၢ ပဲတြီ အကပၤ ခံကပၤ ဒီးဟံၣ်အပဲတြီ အဒီခိၣ်န့ၣ်​ အဝဲကလဲၤကပာ်ကွံာ်ဝဲ ပဲတြီတဘ့ၣ်အံၤ သပှၢ်ကတၢၢ် ဒီးအဝဲ တပျဲလၢ တၢ်နးတၢ်ဖှီၣ်အံၤ ကမၤသံပှၤလၢ အအိၣ်လၢသုဟံၣ်ပူၤ နီတဂၤဘၣ်.+

၂၄ “သုကဘၣ်မၤဘူၣ်အံၤ ဒ်အမ့ၢ် တၢ်သိၣ်တၢ်သီလၢ အဂၢၢ်ကျၢၤလၢ သုဂီၢ် ဒီးလၢသုဖိတဖၣ်​ အဂီၢ်လီၤ.+ ၂၅ ဒီးဖဲသုလဲၤနုာ်လီၤလၢ ကီၢ်လၢယဟိဝၤယွၤ အၢၣ်လီၤဝဲလၢ အကဟ့ၣ်လီၤသုအခါ သုကဘၣ်​ မၤဘူၣ်အံၤလီၤ.+ ၂၆ ဒီးသုဖိတဖၣ်​ မ့ၢ်သံကွၢ်ဝဲလၢ ‘ဘူၣ်တခါအံၤ အခီပညီဒ်လဲၣ်’ န့ၣ်+ ၂၇ သုကဘၣ်​ တဲလၢ ‘အဝဲအံၤမ့ၢ် ယဟိဝၤယွၤ အဘူၣ်လဲၤကပာ်လီၤ. ဖဲအဝဲစံၣ်ညီၣ်​ ပှၤအဲၤကူပတူးဖိအခါ အဝဲလဲၤကပာ်ကွံာ် ပှၤအံၣ်စရ့လးဖိ အဟံၣ်တဖၣ်​ လၢအအိၣ်လၢ ကီၢ်အဲၤကူပတူးအပူၤ ဒီးအဝဲမၤပူၤဖျဲး ပဟံၣ်ဖိဃီဖိလီၤ.’”

ဒီးပှၤဂီၢ်မုၢ်တဖၣ်​ ဆုးလီၤအခိၣ်​ ဒီးထိၣ်လီၤပှီၤအသးလီၤ. ၂၈ ဒီးပှၤအံၣ်စရ့လးဖိတဖၣ်​ လဲၤမၤဝဲဒ် ယဟိဝၤယွၤ မၤလိာ်ဝဲ စီၤမိၤၡ့ ဒီးစီၤအၤဟရိၣ်​ အသိးလီၤ.+ ဒီးအဝဲသ့ၣ်​ မၤထွဲဝဲ လီၤတံၢ်လီၤဆဲးလီၤ.

၂၉ ဒီးဖဲဖးဖီမုၢ်န့ၣ်​ ယဟိဝၤယွၤ မၤသံ ကယဲၢ်ဖိဝဲၢ်ကိ လၢကီၢ်အဲၤကူပတူးအပူၤ,+ စးထီၣ်လၢ ဖၤရိၤလၢ အဆ့ၣ်နီၤလၢ အလီၢ်ပစိာ်အလိၤ အဖိဝဲၢ်ကိ တုၤလၢ ပှၤလၢ အဘၣ်တၢ်စၢဃာ်အီၤ လၢဃိာ်ပူၤ အဖိဝဲၢ်ကိ ဒီးကယဲၢ်ဆၣ်ဖိကီၢ်ဖိ အဖိဝဲၢ်ကိတဖၣ်​ စ့ၢ်ကီးလီၤ.+ ၃၀ ဒီးလၢ မုၢ်နၤခီန့ၣ်​ ဖၤရိၤ ဒီးအခ့အပှၤ ခဲလၢာ် ဒီးပှၤအဲၤကူပတူးဖိ ခဲလၢာ် ပၢၢ်ထီၣ်လီၤ. ဒီးပှၤဟီၣ်ဝဲ နးမးလၢ ကီၢ်အဲၤကူပတူးအပူၤ မ့ၢ်လၢဟံၣ်လၢ ပှၤတဂၤဂၤ တသံဘၣ်န့ၣ်​ တအိၣ်ဝဲ နီတဟံၣ်ဘၣ်​ အဃိလီၤ.+ ၃၁ တဘျီဃီန့ၣ်​ အဝဲကိးန့ၢ် စီၤမိၤၡ့ ဒီးစီၤအၤဟရိၣ်+ လၢမုၢ်နၤခီ ဒီးတဲဝဲလၢ “ဟးထီၣ်, သုဒီးပှၤအံၣ်စရ့လးဖိ လၢအဂၤတဖၣ်န့ၣ်​ ဟးထီၣ်ကွံာ်လၢ ယပှၤဂီၢ်မုၢ်အကျါ ဒီးဒ်သုတဲအသိးန့ၣ်​ လဲၤဘူၣ်ထီၣ်ဘါထီၣ်​ ယဟိဝၤယွၤန့ၣ်.+ ၃၂ ဒ်သုတဲအသိးန့ၣ်​ ကိးထီၣ်​ သုသိဒီးမဲာ်တဲးလဲး ဒီးသုကျီၢ်န့ၣ်.+ ဘၣ်ဆၣ်​ သုကဘၣ်​ ဆိၣ်ဂ့ၤယၤ စ့ၢ်ကီးလီၤ.”

၃၃ ဒီးပှၤအဲၤကူပတူးဖိ ဟ့ၣ်သဆၣ်ထီၣ်​ ပှၤဂီၢ်မုၢ်ဒ်သိး အကဟးထီၣ်ကွံာ် လၢကီၢ်ပူၤချ့ချ့+ ဒီးတဲဝဲလၢ “သုမ့ၢ် တဟးထီၣ်ဘၣ်န့ၣ်​ ပကသံ ကိးဂၤဒဲးလီၤသၢၤ.”+ ၃၄ အဃိ ပှၤဂီၢ်မုၢ်တဖၣ်​ ဘိၣ်ထီၣ်ဝဲ ကိၣ်လၢ ပှၤတထၢနုာ်ဘၣ်​ ကိၣ်မံၣ်ဒံးဘၣ်​ ဒီးပှၤစံၢ်ကိၣ်​ အကျိးတဖၣ်​ လၢတၢ်ကံးညာ် ဒီးယိးဝဲလၢ အဖံဘၣ်ခိၣ်လီၤ. ၃၅ ဒ်စီၤမိၤၡ့ တဲဝဲ ပှၤအံၣ်စရ့လးဖိတဖၣ်အသိး ပှၤအံၣ်စရ့လးဖိတဖၣ်​ ဃ့ဝဲ ပှၤအဲၤကူပတူးဖိတဖၣ်​ အတၢ်ဖိတၢ်လံၤ လၢအမ့ၢ် စ့ညၣ်​ ဒီးထူတဖၣ်​ ဒီးတၢ်ကူတၢ်သိးတဖၣ်လီၤ.+ ၃၆ ယဟိဝၤယွၤ မၤဝဲဒ်သိး ပှၤအဲၤကူပတူးဖိ ကဘၣ်သူၣ်ဘၣ်သး အပှၤဂီၢ်မုၢ်အဃိ ပှၤအဲၤကူပတူးဖိ ဟ့ၣ်လီၤဝဲ တၢ်လၢ အဝဲသ့ၣ်​ ဃ့ဝဲတဖၣ်လီၤ. ဒီးအဝဲသ့ၣ်​ ဟံးထီၣ်ကွံာ် ပှၤအဲၤကူပတူးဖိ အတၢ်လီၤ.+

၃၇ ဒီးပှၤအံၣ်စရ့လးဖိတဖၣ်​ ဟးထီၣ်လၢ ဝ့ၢ်ရၤမစ့အပူၤ+ ဒီးလဲၤဝဲဆူ စူးကိၤသးလီၤ.+ ပှၤဖိသၣ်​ မ့ၢ်တပၣ်ဘၣ်န့ၣ်​ ပှၤပိာ်ခွါလၢ အလဲၤတၢ်လၢ အခီၣ်ကအိၣ်ဝဲ အဂၤ ၆၀၀,၀၀၀ လီၤ.+ ၃၈ ဒီးပှၤအကလုာ်ကလုာ်ဂီၢ်မုၢ်+ လဲၤပိာ်စ့ၢ်ကီး အဝဲသ့ၣ်အခံ ဃုာ်ဒီးသိ, မဲာ်တဲးလဲး, ကျီၢ် ဒီးဆၣ်ဖိကီၢ်ဖိအဒၢ ဒီဒူၣ်လီၤ. ၃၉ ဒီးကိၣ်လၢ အဝဲသ့ၣ်​ ဟဲစိာ်ဝဲလၢ ကီၢ်အဲၤကူပတူးန့ၣ်​ အဝဲသ့ၣ်​ ဃိဝဲဒ် ကိၣ်ကဝီၤကျီၤ လၢအတပၣ်ဒီး ကိၣ်မံၣ်ဘၣ်လီၤ. ကိၣ်အံၤတပၣ်ဃုာ်ဒီး ကိၣ်မံၣ်ဘၣ်​ မ့ၢ်လၢ အဝဲသ့ၣ်​ ဘၣ်တၢ်နီဟးထီၣ်ကွံာ်အီၤ လၢကီၢ်အဲၤကူပတူးအပူၤ သတူၢ်ကလာ် ဒီးအဝဲသ့ၣ်​ တကတဲာ်ကတီၤဘၣ်ဝဲ တၢ်အီၣ်တၢ်အီလၢ အနီၢ်ကစၢ်အဂီၢ် နီတမံၤဘၣ်အဃိလီၤ.+

၄၀ ဖဲပှၤအံၣ်စရ့လးဖိ ဟးထီၣ်လၢ ကီၢ်အဲၤကူပတူးအခါ အဝဲသ့ၣ်အိၣ်တမှံၤ ဒ်ပှၤထံဂၤကီၢ်ဂၤဖိအသိးန့ၣ်+ အိၣ်ဝဲ အနံၣ်​ ၄၃၀ လီၤ.+ ၄၁ ဖဲအနံၣ်​ ၄၃၀ လၢာ်ဝဲအနံၤန့ၣ်​ ယဟိဝၤယွၤ အပှၤဂီၢ်မုၢ်ခဲလၢာ်* ဟးထီၣ်လၢ ကီၢ်အဲၤကူပတူးအပူၤလီၤ. ၄၂ ဒီးမ့ၢ်ဝဲ မုၢ်နၤတနၤ လၢအဝဲသ့ၣ်​ ကမၤလၤကပီၤ ယဟိဝၤယွၤအဂီၢ် ခီဖျိလၢ အဒုးဟးထီၣ်​ အဝဲသ့ၣ်​ လၢကီၢ်အဲၤကူပတူး အပူၤအဃိလီၤ. တစိၤဘၣ်တစိၤန့ၣ်​ ပှၤအံၣ်စရ့လးဖိခဲလၢာ် ကဘၣ်မၤလၤကပီၤ ယဟိဝၤယွၤ လၢမုၢ်တနၤအံၤလီၤ.+

၄၃ ယဟိဝၤယွၤ တဲဝဲ စီၤမိၤၡ့ ဒီးစီၤအၤဟရိၣ်လၢ “အအံၤမ့ၢ်ဝဲ တၢ်သိၣ်တၢ်သီလၢ ဘူၣ်လဲၤကပာ်အဂီၢ်လီၤ. ပှၤထံဂၤကီၢ်ဂၤဖိ* တဘၣ်အီၣ်ဝဲ ဘူၣ်လဲၤကပာ်ဘၣ်.+ ၄၄ ဘၣ်ဆၣ်​ ပှၤတဂၤဂၤ မ့ၢ်အိၣ်ဒီး အကုၢ်ပိာ်ခွါတဂၤလၢ အပှ့ၤဝဲလၢစ့န့ၣ်​ အဝဲကဘၣ်​ ကူးတရံး အကုၢ်တဂၤအံၤလီၤ.+ အမ့ၢ်မၤဝဲ ဒ်န့ၣ်မး ကုၢ်တဂၤအံၤ အီၣ်ဝဲကသ့လီၤ. ၄၅ ဒီးပှၤထံဂၤကီၢ်ဂၤဖိ လၢအဟဲအိၣ်လၢ သုကျါ ဒီးပှၤလၢအဒိးငါအသး လၢတၢ်မၤအဂီၢ်န့ၣ်​ တဘၣ်အီၣ်ဝဲဘၣ်. ၄၆ ပှၤလၢအအီၣ်သိအညၣ်​ လၢဟံၣ်တဖျၢၣ်အပူၤန့ၣ်​ ကဘၣ်အီၣ်ဝဲ တပူၤဃီလီၤ. ဒီးသုတဘၣ်​ လဲၤစိာ်သိအညၣ်လၢ ဟံၣ်ချၢ နီတစဲးဘၣ်​ ဒီးသုတဘၣ်မၤကၢ် အဃံနီတဘိဘၣ်.+ ၄၇ ပှၤအံၣ်စရ့လးဖိ ကိးဂၤဒဲး ကဘၣ်မၤဝဲ ဘူၣ်လဲၤကပာ်လီၤ. ၄၈ ပှၤထံဂၤကီၢ်ဂၤဖိတဂၤ မ့ၢ်အိၣ်ဝဲဆိးဝဲ လၢသုကျါ ဒီးအဝဲမ့ၢ်အဲၣ်ဒိး မၤဘူၣ်လဲၤကပာ်လၢ ယဟိဝၤယွၤအဂီၢ်န့ၣ်​ ပိာ်ခွါလၢ အအိၣ်လၢ အဟံၣ်ပူၤ ကိးဂၤဒဲး ကဘၣ်ဒိးတၢ်ကူးတရံးလီၤ. အမၤဝဲဒ်န့ၣ်​ မ့ၢ်ဝံၤဒီး တၢ်ကပာ်အီၤဒ်သိးဒီး ပှၤတဂၤလၢ အအိၣ်ဖျဲၣ်ထီၣ်​ ဒ်ပှၤအံၣ်စရ့လးဖိအသိးလီၤ. မ့မ့ၢ်ပှၤလၢ အတဒိး တၢ်ကူးတရံးဘၣ်န့ၣ်​ တဘၣ်အီၣ်​ ဘူၣ်လဲၤကပာ် နီတဂၤဘၣ်.+ ၄၉ လၢသု ဒီးပှၤထံဂၤကီၢ်ဂၤဖိ လၢအဟဲအိၣ်လၢ သုကျါတဖၣ်အဂီၢ်န့ၣ်​ တၢ်သိၣ်တၢ်သီ ကအိၣ်ဝဲ တမံၤဃီလီၤ.”+

၅၀ ဒီးပှၤအံၣ်စရ့လးဖိတဖၣ်​ မၤဝဲဒ် ယဟိဝၤယွၤ မၤလိာ်ဝဲ စီၤမိၤၡ့ ဒီးစီၤအၤဟရိၣ်​ အသိးလီၤ. ဒီးအဝဲသ့ၣ်​ မၤထွဲဝဲ လီၤတံၢ်လီၤဆဲးလီၤ. ၅၁ ဖဲတၢ်တနံၤန့ၣ်​ ယဟိဝၤယွၤ ဒုးဟးထီၣ်​ ပှၤအံၣ်စရ့လးဖိ ခဲလၢာ်လၢ ကီၢ်အဲၤကူပတူး အပူၤလီၤ.

၁၃ ယဟိဝၤယွၤ ဆဲးတဲ စီၤမိၤၡ့လၢ ၂ “ပှၤအံၣ်စရ့လးဖိ အဖိဝဲၢ်ကိပိာ်ခွါ ကိးဂၤဒဲးန့ၣ်​ ပာ်စီဆှံအဝဲသ့ၣ်​ လၢယဂီၢ်တက့ၢ်. ပှၤကညီ အဖိဝဲၢ်ကိ ပိာ်ခွါမ့ၢ်ဂ့ၤ, ဆၣ်ဖိကီၢ်ဖိ အဖိဝဲၢ်ကိ အဖါမ့ၢ်ဂ့ၤ အကဲယတၢ်လီၤ.”+

၃ စီၤမိၤၡ့ တဲဘၣ်​ ပှၤဂီၢ်မုၢ်လၢ “ယဟိဝၤယွၤသူဝဲ စုလၢအပှဲၤဒီး တၢ်စိတၢ်ကမီၤ ဒီးဒုးဟးထီၣ်သု လၢကီၢ်အဲၤကူပတူး+ ဖဲသုကဲကုၢ်အလီၢ်အဃိ သ့ၣ်နီၣ်ထီၣ်က့ၤ မုၢ်တနံၤအံၤတက့ၢ်.+ တၢ်လၢအပၣ်ဃုာ်ဒီး ကိၣ်မံၣ်န့ၣ်​ တဘၣ်အီၣ်အီၤ နီတမံၤတဂ့ၤ. ၄ သုဟးထီၣ်ဘၣ်လၢ လါအၤဘံာ်* ဖဲတၢ်တနံၤန့ၣ်လီၤ.+ ၅ ယဟိဝၤယွၤ အၢၣ်လီၤ သုမိၢ်ပၢ်ဖံဖု လၢပျၢၤတဖၣ်လၢ အကဟ့ၣ်လီၤသုလၢ+ ပှၤကနၤဧၣ်ဖိ, ပှၤဃ့ၤသးဖိ, ပှၤအမိၢ်ဖိ, ပှၤဃံၤဝံဖိ ဒီးပှၤယဘူၣ်ဖိတဖၣ်​ အကီၢ်လီၤ.+ ဖဲအဝဲ ဆှၢသုတုၤလၢ ကီၢ်တဘ့ၣ်အံၤလၢ တၢ်နုၢ်ထံ ဒီးကနဲစီ ယွၤလီၤဝဲလၢ အပူၤအခါ+ ကိးနံၣ်ဒဲးန့ၣ်​ သုကဘၣ်​ မၤဘူၣ်အံၤ ဖဲလါအၤဘံာ်န့ၣ်လီၤ. ၆ သုကဘၣ်အီၣ်ကိၣ်လၢ အတပၣ်ဒီး ကိၣ်မံၣ်ဘၣ်န့ၣ်နွံသီ+ ဒီးဖဲနွံသီတသီန့ၣ်​ သုကဘၣ်မၤ ဘူၣ်ဧိၤပွဲဧိၤ ဒ်သိး ကမၤလၤကပီၤ ယဟိဝၤယွၤ အဂီၢ်လီၤ. ၇ အီၣ်ကိၣ်လၢ တပၣ်ဒီးကိၣ်မံၣ်ဘၣ်​ နွံသီ+ ဒီးတၢ်လၢအပၣ်ဃုာ်ဒီး ကိၣ်မံၣ်န့ၣ်​ တဘၣ်အိၣ်လၢ သုအိၣ်​ နီတမံၤဘၣ်.+ လၢသုဟီၣ်ကဝီၤခဲလၢာ်အပူၤန့ၣ်​ ကိၣ်မံၣ်တဘၣ်အိၣ်ဘၣ်. ၈ ဒီးဖဲတၢ်တနံၤန့ၣ်​ နကဘၣ်တဲ နဖိတဖၣ်လၢ ‘ခီဖျိ တၢ်လၢယဟိဝၤယွၤ မၤန့ၢ်ယၤ ဖဲအဒုးဟးထီၣ်ယၤလၢ ကီၢ်အဲၤကူပတူးအဃိ ယမၤဒ်အံၤလီၤ.’+ ၉ ဒီးဘူၣ်အံၤ ကကဲထီၣ်ဒ်သိးဒီး တၢ်ပနီၣ်တမံၤလၢ သုစုလိၤ ဒီးတၢ်သ့ၣ်နီၣ်တခါ လၢသုမဲာ်တူၢ်ခိၣ်​ အလိၤလီၤ.+ ဒီးအကဒုးသ့ၣ်နီၣ်သုလၢ ယဟိဝၤယွၤ အတၢ်သိၣ်တၢ်သီန့ၣ်​ ကဘၣ်အိၣ်လၢ သုကိာ်ပူၤ, မ့ၢ်လၢ ယဟိဝၤယွၤသူဝဲ စုလၢအပှဲၤဒီး တၢ်စိတၢ်ကမီၤ ဒ်သိး အကဒုးဟးထီၣ်သုလၢ ကီၢ်အဲၤကူပတူးအပူၤ အဃိလီၤ. ၁၀ တနံၣ်ဘၣ်တနံၣ်​ ဖဲတၢ်ဆၢကတီၢ် လၢအဘၣ်တၢ်ပာ်ပနီၣ်အီၤလၢ ဘူၣ်အဂီၢ် ဘၣ်ဝဲအခါ သုကဘၣ်ဆဲးမၤဒ် တၢ်သိၣ်တၢ်သီအံၤ အသိးလီၤ.+

၁၁ “ယဟိဝၤယွၤ အၢၣ်လီၤပာ်စၢၤသု ဒီးသုမိၢ်ပၢ်ဖံဖုလၢပျၢၤတဖၣ်လၢ အကဟ့ၣ်လီၤသု ကီၢ်ကနၤဧၣ်လီၤ. ဖဲအဝဲ ဆှၢသုတုၤလၢ ကီၢ်ကနၤဧၣ်အခါ+ ၁၂ သုကဘၣ်ဟ့ၣ်လီၤ ယဟိဝၤယွၤလၢ ဖိဝဲၢ်ကိ အပိာ်ခွါ ကိးဂၤဒဲး ဒီးဆၣ်ဖိကီၢ်ဖိ အဖိဝဲၢ်ကိအဖါ လၢအအိၣ်ဒီးသု ခဲလၢာ်လီၤ. တၢ်သ့ၣ်တဖၣ်န့ၣ်​ အကဲ ယဟိဝၤယွၤ အတၢ်လီၤ.+ ၁၃ သုကဘၣ်ပှ့ၤက့ၤ ကသ့ၣ်ယီၤ အဖိဝဲၢ်ကိ တဒုစုာ်စုာ် ဒီးသုဘၣ်ပှ့ၤက့ၤအီၤ လၢသိတဒုလီၤ. သုမ့ၢ်တပှ့ၤက့ၤအီၤဘၣ်န့ၣ်​ သုကဘၣ်​ မၤကၢ်ကွံာ် အကိာ်ဘိလီၤ. ဒီးသုဖိဝဲၢ်ကိပိာ်ခွါ ကိးဂၤဒဲးန့ၣ်​ သုကဘၣ်​ ပှ့ၤက့ၤအီၤလီၤ.+

၁၄ “လၢခံ သုဖိတဖၣ်​ မ့ၢ်သံကွၢ်ဘၣ်ဖုးသုလၢ ‘ဘၣ်မနုၤအဃိ ပဘၣ်မၤ ဒ်အံၤလဲၣ်’ န့ၣ်​ သုကဘၣ်တဲအီၤလၢ ‘မ့ၢ်လၢ ယဟိဝၤယွၤသူဝဲ စုလၢအပှဲၤဒီး တၢ်စိတၢ်ကမီၤ ဒီးဒုးဟးထီၣ်ပှၤ လၢကီၢ်အဲၤကူပတူး ဖဲပကဲကုၢ်အလီၢ် အဃိလီၤ.+ ၁၅ ဖဲဖၤရိၤ အခိၣ်ကိၤ ဒီးတပျဲလဲၤပှၤဘၣ်အခါ+ ယဟိဝၤယွၤ မၤသံ ကယဲၢ်ပှၤကညီ ဒီးဆၣ်ဖိကီၢ်ဖိ အဖိဝဲၢ်ကိလၢ ကီၢ်အဲၤကူပတူး အပူၤလီၤ.+ အဃိ ပဟ့ၣ်လုၢ်ထီၣ်​ ပဆၣ်ဖိကီၢ်ဖိ အဖိဝဲၢ်ကိခဲလၢာ် လၢယဟိဝၤယွၤအအိၣ်​ ဒီးပပှ့ၤက့ၤ ပဖိဝဲၢ်ကိပိာ်ခွါ ကိးဂၤဒဲးလီၤ.’ ၁၆ ဘူၣ်အံၤ ကကဲထီၣ်​ ဒ်သိးဒီး တၢ်ပနီၣ်တမံၤလၢ သုစုလိၤ ဒီးခိၣ်ကျီၤလၢ သုမဲာ်တူၢ်ခိၣ်အလိၤ,+ မ့ၢ်လၢ ယဟိဝၤယွၤ သူဝဲ စုလၢအပှဲၤဒီး တၢ်စိတၢ်ကမီၤ ဒ်သိး အကဒုးဟးထီၣ်သုလၢ ကီၢ်အဲၤကူပတူး အပူၤအဃိလီၤ.”

၁၇ ကျဲလၢအလဲၤခီဂာ် ပှၤဖလ့ၡသးဖိအကီၢ်န့ၣ်​ ဘူးဝဲ ဘၣ်ဆၣ်​ ဖဲဖၤရိၤ ပျဲလဲၤ ပှၤဂီၢ်မုၢ်အခါ ကစၢ်ယွၤ တဆှၢပှၤဂီၢ်မုၢ် လၢကျဲဖဲန့ၣ်ဘၣ်, မ့ၢ်လၢ ကစၢ်ယွၤ တဲဝဲလၢ “ပှၤဂီၢ်မုၢ်တဖၣ်​ မ့ၢ်ထံၣ်ဘၣ်​ တၢ်ဒုးန့ၣ်​ အဝဲသ့ၣ်​ ကဆီတလဲ ဘၣ်ဖုးအသး ဒီးကက့ၤကဒါက့ၤလၢ ကီၢ်အဲၤကူပတူးလီၤ.” ၁၈ အဃိ ကစၢ်ယွၤ ဒုးလဲၤတရံး ပှၤဂီၢ်မုၢ်လၢ ပီၣ်လဲၣ်ဂီၤ အပှၢ်မုၢ်ကနၢ အပူၤလီၤ.+ ပှၤအံၣ်စရ့လးဖိတဖၣ်​ ဟးထီၣ်လၢ ကီၢ်အဲၤကူပတူးအပူၤ ဒ်သုးဖိအဒူၣ်တဖၣ်​ အသိးလီၤ. ၁၉ ဒီးစီၤမိၤၡ့ လဲၤစိာ် စီၤယိၤသး အဃံ မ့ၢ်လၢ စီၤယိၤသး မၢပှၤအံၣ်စရ့လးဖိ အၢၣ်လီၤဝဲ လီၤတံၢ်လီၤဆဲးလၢ “ကစၢ်ယွၤ ကမၤစၢၤသု သပှၢ်ကတၢၢ်လီၤ. သုကဘၣ်​ စိာ်ထီၣ်ကွံာ် ယဃံယကွဲ လၢတၢ်လီၢ်ဖဲအံၤလီၤ.”+ ၂၀ အဝဲသ့ၣ်​ ဟးထီၣ်လၢ စူးကိၤသး ဒီးသူၣ်လီၤအဒဲလၢ အ့သၣ်​ ဖဲပှၢ်မုၢ်ကနၢ အဃၢၤန့ၣ်လီၤ.

၂၁ ဒီးလၢ မုၢ်ဆါခီ အဆၢကတီၢ် ယဟိဝၤယွၤ လဲၤတၢ်လၢ အဝဲသ့ၣ်​ အမဲာ်ညါ ခီဖျိလၢ တၢ်အၢၣ်အထူၣ်​ ဒ်သိး အကလဲၤဆှၢ အဝဲသ့ၣ်​ လၢကျဲလီၤ.+ ဒီးလၢမုၢ်နၤခီ အဆၢကတီၢ် အလဲၤတၢ်လၢ အဝဲသ့ၣ်​ အမဲာ်ညါ ခီဖျိလၢ မ့ၣ်အူအထူၣ်​ ဒ်သိး အကဟ့ၣ်​ အဝဲသ့ၣ်​ တၢ်ကပီၤ အဂီၢ်လီၤ. အဃိ အဝဲသ့ၣ်​ လဲၤတၢ်လၢ မုၢ်ဆါခီမ့ၢ်ဂ့ၤ, မုၢ်နၤခီမ့ၢ်ဂ့ၤ သ့ဝဲလီၤ.+ ၂၂ တၢ်အၢၣ်အထူၣ်​ လၢမုၢ်ဆါခီမ့ၢ်ဂ့ၤ, မ့ၣ်အူအထူၣ်​ လၢမုၢ်နၤခီမ့ၢ်ဂ့ၤ တဟးထီၣ်ကွံာ် လၢပှၤဂီၢ်မုၢ် အမဲာ်ညါဘၣ်.+

၁၄ ဒီးယဟိဝၤယွၤ တဲစီၤမိၤၡ့လၢ ၂ “တဲဘၣ်​ ပှၤအံၣ်စရ့လးဖိလၢ ‘သုကဘၣ်​ ဃၣ်ကဒါက့ၤသုသး ဒီးသူၣ်ဒဲတဖၣ်လၢ ပံၤဟဃံရိး အမဲာ်ညါ, ဖဲတၢ်လီၢ်တတီၤလၢ အအိၣ်လၢ မံးကဒိးလး ဒီးပီၣ်လဲၣ်​ အဘၢၣ်စၢၤလီၤ. ဖဲတၢ်လီၢ်အဝဲန့ၣ်​ သုထံၣ်စိ ဘဧၤလးစဖိၣ်​ သ့ဝဲလီၤ.+ ဒီးသုကဘၣ်​ သူၣ်ဒဲလၢ ဘဧၤလးစဖိၣ်​ အမဲာ်ညါ, ဘူးဒီးပီၣ်လဲၣ်လီၤ.’ ၃ ဒီးဘၣ်ဃး ပှၤအံၣ်စရ့လးဖိန့ၣ်​ ဖၤရိၤ ကတဲဝဲလၢ ‘အဝဲသ့ၣ်ဟးဖျိးလံ. အဝဲသ့ၣ်​ အိၣ်ကတာ်လၢ ပှၢ်မုၢ်ကနၢ အပူၤလံ.’ ၄ ယကပျဲလၢ ဖၤရိၤအခိၣ်​ ကကိၤဒံးဝဲ+ ဒီးအဝဲ ကလူၤထွဲ ပှၤအံၣ်စရ့လးဖိလီၤ. ဒီးယကမၤလၤကပီၤ ယနီၢ်ကစၢ် ခီဖျိလၢ ယမၤနၢၤ ဖၤရိၤ ဒီးအသုးမုၢ်ခဲလၢာ်အဃိ+ ဒီးပှၤအဲၤကူပတူးဖိတဖၣ်​ ကသ့ၣ်ညါဝဲ သပှၢ်ကတၢၢ်လၢ ယမ့ၢ် ယဟိဝၤယွၤလီၤ.”+ အဃိ ပှၤအံၣ်စရ့လးဖိတဖၣ်​ မၤဝဲဒ်န့ၣ်လီၤ.

၅ လၢခံ ပှၤတဲဘၣ်​ အဲၤကူပတူး အစီၤပၤလၢ ပှၤဂီၢ်မုၢ်တဖၣ်​ ဃ့ၢ်ကွံာ်ဝဲလံ. တဘျီဃီန့ၣ်​ ဖၤရိၤ ဒီးအခ့အပှၤတဖၣ်​ အတၢ်ပာ်သူၣ်ပာ်သး ဆီတလဲဝဲလၢ ပှၤဂီၢ်မုၢ်တဖၣ်န့ၣ်​ အဖီခိၣ်+ ဒီးအဝဲသ့ၣ်တဲဝဲလၢ “ဘၣ်မနုၤအဃိ ပဘၣ်မၤဒ်အံၤ ဒီးပျၢ်ကွံာ် ပှၤအံၣ်စရ့လးဖိလၢ အမၤတၢ်ဒ် ပကုၢ်အသိးလဲၣ်.” ၆ အဃိ အဝဲကတဲာ်ကတီၤထီၣ်​ အလ့ၣ်ကဟၣ်သုးတဖၣ်​ ဒီးအဝဲ လဲၤကိးဃုာ်ဒီး အပှၤဂီၢ်မုၢ်တဖၣ်လီၤ.+ ၇ ဖၤရိၤ လဲၤဝဲဒီး လ့ၣ်ကဟၣ်သုးလၢ အဂ့ၤကတၢၢ် အခိၣ်​ ၆၀၀ ဒီးလ့ၣ်ကဟၣ်သုး အဂၤခဲလၢာ် လၢအအိၣ်လၢ ကီၢ်အဲၤကူပတူးအပူၤ ဒီးပှၤသုးဖိတဖၣ်​ ဒိးဝဲကိးခိၣ်ဒဲးလီၤ. ၈ အဃိ ယဟိဝၤယွၤ ပျဲဝဲလၢ အဲၤကူပတူး အစီၤပၤ ဖၤရိၤအခိၣ်ကကိၤလီၤ. ဒီးဖဲပှၤအံၣ်စရ့လးဖိ ဟးထီၣ်ကွံာ်လၢ ထံကီၢ်ပူၤလၢ တၢ်သးဆူၣ်အပူၤအခါ ဖၤရိၤ လူၤက့ၤ အဝဲသ့ၣ်လီၤ.+ ၉ ဖဲအဝဲသ့ၣ်​ သူၣ်ဒဲလၢ ဘဧၤလးစဖိၣ်​ အမဲာ်ညါ ဘူးဒီး ပံၤဟဃံရိး ဒီးပီၣ်လဲၣ်အခါ ပှၤအဲၤကူပတူးဖိ ဒီးကယဲၢ် ဖၤရိၤ အလ့ၣ်ကဟၣ်သုး, အသုးဖိလၢ အဒိးကသ့ၣ်​ ဒီးအသုးမုၢ်သံၣ်ဘိတဖၣ်​ လူၤအဝဲသ့ၣ်+ ဘူးကချုးလံ.

၁၀ ဖဲဖၤရိၤ ဟဲဘူးထီၣ်အခါ ပှၤအံၣ်စရ့လးဖိတဖၣ်​ ကွၢ်ထီၣ်တၢ် ဒီးထံၣ်ဝဲလၢ ပှၤအဲၤကူပတူးဖိတဖၣ်​ လူၤအဝဲသ့ၣ်​ အဃိ ပှၤအံၣ်စရ့လးဖိတဖၣ်​ ပျံၤတၢ်ဖုးတၢ်ဒိၣ်မး ဒီးအဝဲသ့ၣ်​ ကိးပသူထီၣ်လၢ ယဟိဝၤယွၤအအိၣ်လၢ တၢ်မၤစၢၤအဂီၢ်လီၤ.+ ၁၁ ဒီးအဝဲသ့ၣ်တဲ စီၤမိၤၡ့လၢ “လၢကီၢ်အဲၤကူပတူးအပူၤန့ၣ်​ တၢ်လီၢ်လၢ ပှၤကခူၣ်လီၤပှၤကညီ တအိၣ်ဘၣ်အဃိ နဟဲကိးပှၤဖဲအံၤ ဒ်သိးပကသံလၢ ပှၢ်မုၢ်ကနၢပူၤန့ၣ်ဧါ.+ နထုးထီၣ်ပှၤလၢ ကီၢ်အဲၤကူပတူးအပူၤ ဒီးနမၤပှၤဒ်အံၤ ဘၣ်လဲၣ်. ၁၂ ဖဲပအိၣ်လၢ ကီၢ်အဲၤကူပတူးအခါ ပတဲနၤ ဝံၤလံဧဲၤ. ပတဲပာ်စၢၤနၤလၢ ‘မၤတံာ်တာ်ပှၤတဂ့ၤ. ပကဆဲးကဲ ပှၤအဲၤကူပတူးဖိ အကုၢ်ဒၣ်ဝဲ.’ ပကဲ ပှၤအဲၤကူပတူးဖိ အကုၢ်န့ၣ်​ ဂ့ၤဒိၣ်န့ၢ်ဒံး ပသံလၢ ပှၢ်မုၢ်ကနၢဒံး.”+ ၁၃ ဒီးစီၤမိၤၡ့ တဲဘၣ်​ ပှၤဂီၢ်မုၢ်တဖၣ်လၢ “ပျံၤတၢ်တဂ့ၤ.+ ဆၢထၢၣ်ဂၢၢ်ကျၢၤ ဒီးသုကထံၣ်ဘၣ်​ ယဟိဝၤယွၤ အတၢ်အုၣ်က့ၤခီၣ်က့ၤ လၢအကမၤဝဲ လၢသုဂီၢ် လၢတနံၤအံၤန့ၣ်လီၤ.+ ပှၤအဲၤကူပတူးဖိ လၢသုထံၣ်ဘၣ်အီၤ လၢတနံၤအံၤန့ၣ်​ လၢခံ သုတထံၣ်ဘၣ်​ အဝဲသ့ၣ်​ နီတဘျီလၢၤဘၣ်.+ ၁၄ ယဟိဝၤယွၤ ကဒုးတၢ် လၢသုဂီၢ်+ ဒီးသုက အိၣ်ဘှ့ၣ်လီၤ.”

၁၅ ယဟိဝၤယွၤ တဲစီၤမိၤၡ့လၢ “ဘၣ်မနုၤအဃိ နဆဲးကိးပသူထီၣ်လၢ တၢ်မၤစၢၤ အဂီၢ်လဲၣ်. တဲဘၣ်​ ပှၤဂီၢ်မုၢ်လၢ အဝဲသ့ၣ်​ ကြၢးလဲၤဆူညါလီၤ. ၁၆ မ့မ့ၢ်နၤန့ၣ်​ ယူာ်ထီၣ်​ နနီၣ်ထိးဘိလၢ အအိၣ်လၢ နစုပူၤ, ယူာ်ဃီၤအီၤလၢ ပီၣ်လဲၣ်အဖီခိၣ်​ ဒီးမၤသ့ၣ်ဖး ပီၣ်လဲၣ်တက့ၢ်. ဒီးပှၤအံၣ်စရ့လးဖိ ကဟးလၢ ဟီၣ်ခိၣ်ဃ့ထီအလိၤ ဒီးကခီဂာ် ပီၣ်လဲၣ်လီၤ. ၁၇ မ့မ့ၢ်ယၤန့ၣ်​ ယကပျဲလၢ ပှၤအဲၤကူပတူးဖိ အခိၣ်ကကိၤ ဒ်သိးအဝဲသ့ၣ်​ ကလဲၤနုာ်လီၤလူၤ ပှၤအံၣ်စရ့လးဖိ အဂီၢ်လီၤ. ဒီးယကမၤလၤကပီၤ ယနီၢ်ကစၢ် ခီဖျိလၢ ယမၤနၢၤ ဖၤရိၤ, အသုးမုၢ်ခဲလၢာ်, အလ့ၣ်ကဟၣ်သုးတဖၣ်​ ဒီးအသုးဖိလၢ အဒိးကသ့ၣ်တဖၣ်​ အဃိလီၤ.+ ၁၈ ယကမၤလၤကပီၤ ယနီၢ်ကစၢ် ခီဖျိလၢ ယမၤနၢၤ ဖၤရိၤ, အလ့ၣ်ကဟၣ်သုးတဖၣ်​ ဒီးအသုးဖိလၢ အဒိးကသ့ၣ်တဖၣ်​ ဒီးပှၤအဲၤကူပတူးဖိတဖၣ်​ ကသ့ၣ်ညါဝဲ သပှၢ်ကတၢၢ် လၢယမ့ၢ် ယဟိဝၤယွၤလီၤ.”+

၁၉ ဒီးယွၤလၢအမ့ၢ်အတီ အမူခိၣ်ကလူး+ လၢအလဲၤတၢ်လၢ ပှၤအံၣ်စရ့လးဖိ အမဲာ်ညါန့ၣ်​ ဟးထီၣ်ဒီးလဲၤလၢ အဝဲသ့ၣ်​ အလီၢ်ခံ ဒီးတၢ်အၢၣ်ထူၣ်​ လၢအအိၣ်လၢ အဝဲသ့ၣ်အမဲာ်ညါန့ၣ်​ သုးအသး လၢတၢ်လီၢ်ခံ ဒီးအိၣ်ဆၢထၢၣ်​ လၢအဝဲသ့ၣ်​ အလီၢ်ခံလီၤ.+ ၂၀ ဒီးတၢ်အၢၣ်အထူၣ်န့ၣ်​ အိၣ်ဝဲလၢ ပှၤအဲၤကူပတူးဖိ ဒီးပှၤအံၣ်စရ့လးဖိ အဘၢၣ်စၢၤလီၤ.+ တၢ်အၢၣ်အထူၣ်အံၤ မၤခံးလီၤတၢ်လၢ ပှၤအဲၤကူပတူးဖိအအိၣ်​ တကပၤ ဒီးမၤကပီၤထီၣ်တၢ်လၢ ပှၤအံၣ်စရ့လးဖိအအိၣ်​ တကပၤ လၢမုၢ်နၤခီလီၤ.+ အဃိ ဖဲဒီတနၤ အတီၢ်ပူၤန့ၣ်​ ပှၤအဲၤကူပတူးဖိတဖၣ်​ တဟဲဘူးဒီး ပှၤအံၣ်စရ့လးဖိတဖၣ်ဘၣ်.

၂၁ စီၤမိၤၡ့ ယူာ်ဃီၤအစု လၢပီၣ်လဲၣ်​ အဖီခိၣ်+ ဒီးယဟိဝၤယွၤ ဒုးဟဲ ကလံၤဆူၣ်ဆူၣ်လၢ မုၢ်ထီၣ်တခီ ဒီတနၤ ဒီးဒုးအူဘၣ်ဝဲ ပီၣ်လဲၣ်အထံအဃိ ပီၣ်လဲၣ်အခံဒး ဃ့ထီထီၣ်ဝဲ+ ဒီးထံသ့ၣ်ဖးကွံာ် ခံက့လီၤ.+ ၂၂ တက့န့ၣ်​ အိၣ်ဝဲလၢ အဝဲသ့ၣ်​ အစုစ့ၣ်တခီ ဒီးအဝဲ တက့န့ၣ်​ အိၣ်လၢ အဝဲသ့ၣ်​ အစုထွဲတခီ ဒ်တၢ်ဒူၣ်အသိးလီၤ.+ အဃိ ပှၤအံၣ်စရ့လးဖိတဖၣ်​ ဟးလၢ ဟီၣ်ခိၣ်ဃ့ထီအလိၤ ဒီးခီဂာ် ပီၣ်လဲၣ်လီၤ.+ ၂၃ ပှၤအဲၤကူပတူးဖိတဖၣ်​ ဆဲးလူၤ အဝဲသ့ၣ်​ ဒီးကယဲၢ်ဖၤရိၤ အကသ့ၣ်တဖၣ်, အလ့ၣ်ကဟၣ်သုးတဖၣ်​ ဒီးအသုးဖိလၢ အဒိးကသ့ၣ်တဖၣ်​ လဲၤပိာ်အဝဲသ့ၣ်အခံ လၢပီၣ်လဲၣ်ပူၤလီၤ.+ ၂၄ ဒီးဖဲ ပှၤခိးတၢ်လၢ ဂီၤခီတတီၤ* အဆၢကတီၢ်န့ၣ်​ ယဟိဝၤယွၤကွၢ်လီၤ ပှၤအဲၤကူပတူးဖိ အသုးမုၢ် လၢမ့ၣ်အူဒီးတၢ်အၢၣ်အထူၣ်+ ဒီးဒုးအိၣ်ထီၣ်​ တၢ်သဘံၣ်သဘုၣ်လၢ ပှၤအဲၤကူပတူးဖိ အသုးမုၢ် အကျါလီၤ. ၂၅ ဒီးအဝဲ မၤလီၤဖျု အဝဲသ့ၣ်​ အလ့ၣ်ကဟၣ်သုးအပၣ်​ အဃိ အဝဲသ့ၣ်​ ဘၣ်နီလ့ၣ်ကဟၣ်သုး ကီမးလီၤ. ဒီးပှၤအဲၤကူပတူးဖိ တဲဝဲလၢ “ယဟိဝၤယွၤ ဒုးတၢ်လၢ အဝဲသ့ၣ်အဂီၢ် ဒီးထီဒါပဝဲ ပှၤအဲၤကူပတူးဖိလံ. အဃိ ပကဘၣ်​ ဃ့ၢ်ကွံာ်လၢ ပှၤအံၣ်စရ့လးဖိ အအိၣ်သၢၤ.”+

၂၆ ယဟိဝၤယွၤ တဲစီၤမိၤၡ့လၢ “ယူာ်ဃီၤနစုလၢ ပီၣ်လဲၣ်အဖီခိၣ်​ ဒ်သိးထံတဖၣ်​ ကဟဲက့ၤလီၤဘၣ်​ ပှၤအဲၤကူပတူးဖိတဖၣ်, အဝဲသ့ၣ်​ အလ့ၣ်ကဟၣ်သုးတဖၣ်​ ဒီးအဝဲသ့ၣ်​ အသုးဖိလၢ အဒိးကသ့ၣ်တဖၣ်​ တက့ၢ်.” ၂၇ ဒီးစီၤမိၤၡ့ ယူာ်ဃီၤအစု လၢပီၣ်လဲၣ်အဖီခိၣ်​ တဘျီဃီ ဒီးဖဲမုၢ်ဘူးကဝါထီၣ်​ အဆၢကတီၢ်န့ၣ်​ ပီၣ်လဲၣ်​ အိၣ်ကဒါက့ၤ ဒ်အလီၢ်လီၢ်လီၤ. ဖဲပှၤအဲၤကူပတူးဖိ ဃ့ၢ်ကွံာ်ဝဲအခါ ယဟိဝၤယွၤ ကွံာ်လီၤဝဲ ပှၤအဲၤကူပတူးဖိ လၢပီၣ်လဲၣ်ပူၤလီၤ.+ ၂၈ ထံလုၢ်ဘၢကွံာ် လ့ၣ်ကဟၣ်သုးတဖၣ်, သုးဖိလၢ အဒိးကသ့ၣ်တဖၣ်​ ဒီးကယဲၢ် ဖၤရိၤအသုးမုၢ်သံၣ်ဘိတဖၣ်​ လၢအလဲၤလူၤ ပှၤအံၣ်စရ့လးဖိတဖၣ်​ လၢပီၣ်လဲၣ်ပူၤလီၤ.+ လၢအဝဲသ့ၣ်အကျါန့ၣ်​ ပှၤတပူၤဖျဲးဝဲ နီတဂၤဘၣ်.+

၂၉ ဘၣ်ဆၣ်​ ပှၤအံၣ်စရ့လးဖိ ဟးလၢ ဟီၣ်ခိၣ်ဃ့ထီအလိၤ လၢပီၣ်လဲၣ်​ အခံဒးပူၤလီၤ.+ ဒီးထံတက့န့ၣ်​ အိၣ်ဝဲလၢ အဝဲသ့ၣ်​ အစုစ့ၣ်တခီ ဒီးအဝဲ တက့န့ၣ်​ အိၣ်လၢ အဝဲသ့ၣ်​ အစုထွဲတခီ ဒ်တၢ်ဒူၣ်အသိးလီၤ.+ ၃၀ ဖဲတၢ်တနံၤန့ၣ်​ ယဟိဝၤယွၤ မၤပူၤဖျဲး ပှၤအံၣ်စရ့လးဖိလၢ ပှၤအဲၤကူပတူးဖိ အစုပူၤလီၤ.+ ဒီးပှၤအံၣ်စရ့လးဖိတဖၣ်​ ထံၣ်ဘၣ်ဝဲ ပှၤအဲၤကူပတူးဖိတဖၣ်​ အစိၣ်အိၣ်လၢ ပီၣ်လဲၣ်ကၢၢ်နံၤလီၤ. ၃၁ ဖဲပှၤအံၣ်စရ့လးဖိ ထံၣ်ဘၣ်​ ယဟိဝၤယွၤ အတၢ်စိတၢ်ကမီၤ ဖးဒိၣ်လၢ အသူဝဲ ဒ်သိး ကမၤဟးဂီၤကွံာ် ပှၤအဲၤကူပတူးဖိအခါ ပှၤဂီၢ်မုၢ် ပျံၤယဟိဝၤယွၤ ဒီးနာ်ယဟိဝၤယွၤ ဒီးအခ့အပှၤ စီၤမိၤၡ့လီၤ.+

၁၅ ဖဲန့ၣ်အခါ စီၤမိၤၡ့ ဒီးပှၤအံၣ်စရ့လးဖိ သးဝံၣ်​ တၢ်သးဝံၣ်​ တယုၢ်အံၤလၢ ယဟိဝၤယွၤ အဂီၢ်လၢ+

“ယကသးဝံၣ်ထီၣ်​ ယဟိဝၤယွၤ, မ့ၢ်လၢ အဘၣ်​ တၢ်ပာ်ဒိၣ်ပာ်ကဲအီၤ ဒိၣ်မး.+

အဝဲ ကွံာ်လီၤဝဲ ကသ့ၣ်​ ဒီးပှၤဒိးကသ့ၣ်ဖိ လၢပီၣ်လဲၣ်ပူၤလီၤ.+

 ၂ ယဟိဝၤမ့ၢ် ယစိကမီၤ ဒီးယဂံၢ်ယဘါ, မ့ၢ်လၢ အအုၣ်က့ၤခီၣ်က့ၤယၤ အဃိလီၤ.+

အဝဲမ့ၢ်ယယွၤ ဒီးယကစံးထီၣ်ပတြၢၤအီၤလီၤ.+ အဝဲမ့ၢ် ယမိၢ်ပၢ်ဖံဖု လၢပျၢၤတဖၣ်အယွၤ+ ဒီးယကပာ်ဒိၣ်ပာ်ကဲအီၤလီၤ.+

 ၃ ယဟိဝၤယွၤမ့ၢ် ပှၤဒုးတၢ်လၢ အဂံၢ်ဆူၣ်ဘါဆူၣ်တဂၤ.+ ဒီးအမံၤမ့ၢ် ယဟိဝၤလီၤ.+

 ၅ ထံယိာ် လုၢ်ဘၢကွံာ် အဝဲသ့ၣ်​ ဒီးဒ်လၢၢ်တဖျၢၣ်​ လီၤဘျၢဝဲအသိး အဝဲသ့ၣ်​ လီၤဘျၢလၢ ထံဖီလာ်လီၤ.+

 ၇ ဒီးလၢ နတၢ်ကဟုကညီၢ် အဒိၣ်အထီအပူၤန့ၣ်​ နကွံာ်လီၤ ပှၤလၢ အဂဲၤဆၢထၢၣ်​ ထီဒါနၤလီၤ.+

နတၢ်သးထီၣ်​ ကဲၤကပျီၤထီၣ်ဝဲ ဒီးအီၣ်ကွံာ် အဝဲသ့ၣ်​ ဒ်လီၢ်ဘိ* အသိးလီၤ.

 ၈ နကသါလီၤ ကလံၤလၢ နနါဒ့ တထံၣ်အဃိ ထံပာ်ဖှိၣ်ထီၣ်အသးလီၤ.

ယကထုးထီၣ်ယနး ဒီးယစု ကဖီၣ်န့ၢ်အဝဲသ့ၣ်လီၤ.’+

၁၀ နအူလီၤနကလံၤ ဒီးပီၣ်လဲၣ်​ ကျၢၢ်ဘၢ အဝဲသ့ၣ်လီၤ.+

အဝဲသ့ၣ်​ လီၤဘျၢဝဲလၢ ပီၣ်လဲၣ်လၢ အလီၤဘီလီၤမုၢ်အပူၤ ဒ်စၢၢ်ထး လီၤဘျၢဝဲ အသိးလီၤ.

၁၁ အိ ယဟိဝၤယွၤဧၢ, လၢယွၤတဖၣ်​ အကျါန့ၣ်​ မ့ၢ်မတၤ လီၤဂာ်ဒီး နၤလဲၣ်.+

မ့ၢ်မတၤ ပာ်ဖျါထီၣ်လၢ အစီဆှံဒိၣ်မး ဒ်သိးဒီးနၤ တဂၤလဲၣ်.+

နမ့ၢ်ယွၤတဂၤလၢ ပှၤကြၢးပျံၤအီၤ ဒီးသးဝံၣ်​ စံးထီၣ်ပတြၢၤအီၤ ဒီးနမ့ၢ်ယွၤတဂၤလၢ အမၤ တၢ်လီၤလိၢ်လီၤလး တဖၣ်လီၤ.+

၁၂ နယူာ်ထီၣ်​ နစုထွဲ ဒီးဟီၣ်ခိၣ်​ ယူၢ်လီၤကွံာ် အဝဲသ့ၣ်လီၤ.+

၁၃ ပှၤဂီၢ်မုၢ်လၢ နမၤပူၤဖျဲးအီၤတဖၣ်န့ၣ်​ နဆှၢအီၤ လၢနတၢ်အဲၣ်​ လၢအတီအပူၤလီၤ.+

လၢနတၢ်စိတၢ်ကမီၤ အပူၤန့ၣ်​ နကဟံးစုနဲၣ်ကျဲ အဝဲသ့ၣ်ဆူ နတၢ်အိၣ်တၢ်ဆိး အလီၢ်စီဆှံလီၤ.

၁၄ ပှၤကဘၣ်နၢ်ဟူဘၣ်+ ဒီးကကနိးကစုာ်ဝဲလီၤ.

တၢ်သူၣ်ကိၢ်သးဂီၤ ကဖီၣ်ဃာ် ပှၤဖလ့ၡသးဖိတဖၣ်လီၤ.

၁၅ ဖဲန့ၣ်အခါ ကီၢ်အဒိၣ်​ အခိၣ်နၢ်တဖၣ်​ ကပျံၤတၢ်ဒိၣ်မး,

ဒီးကီၢ်မိၤအး အပဒိၣ်လၢ အစိကမီၤဒိၣ်တဖၣ်​ ကကနိးကစုာ်ဝဲလီၤ.+

ဒီးပှၤလၢအအိၣ်လၢ ကီၢ်ကနၤဧၣ်တဖၣ်​ ကသးလီၤစၢ် ကိးဂၤဒဲးလီၤ.+

၁၆ တၢ်ပျံၤတၢ်ဖုး ဒီးတၢ်သူၣ်ကိၢ်သးဂီၤ ကလီၤဘၣ်​ အဝဲသ့ၣ်လီၤ.+

ဖဲနပှၤဂီၢ်မုၢ်လၢ နဃုထၢထီၣ်အီၤတဖၣ်+ ခီဂာ်တၢ်အခါလီၤ.+

၁၈ ယဟိဝၤယွၤ ကပၢတၢ် ဒ်စီၤပၤအသိး အစိၤစိၤအဃၣ်ဃၣ်​ လီၤထူလီၤယိာ်လီၤ.+

ဘၣ်ဆၣ်​ ပှၤအံၣ်စရ့လးဖိတဖၣ်​ ဟးလၢ ဟီၣ်ခိၣ်ဃ့ထီအလိၤ ဒီးခီဂာ် ပီၣ်လဲၣ်လီၤ.”+

၂၀ ဒီးစီၤအၤဟရိၣ်အနီ နီၢ်မံးရယၣ်​ လၢအမ့ၢ် ဝံမုၣ်န့ၣ်​ ဟံးန့ၢ်တၢ်ခြ့ခြ့တခါ လၢအစုပူၤ ဒီးပိာ်မုၣ်ကိးဂၤဒဲး ပိာ်ထီၣ်အခံ အိၣ်ဒီးတၢ်ခြ့ခြ့တဖၣ်​ ဒီးဂဲၤကလံၣ်လီၤ. ၂၁ နီၢ်မံးရယၣ်​ သးဝံၣ်ဆၢက့ၤ ပှၤပိာ်ခွါတဖၣ်လၢ

၂၂ လၢခံ စီၤမိၤၡ့ ဆှၢဝဲ ပှၤအံၣ်စရ့လးဖိတဖၣ်လၢ အယံၤထီၣ်ဒီး ပီၣ်လဲၣ်ဂီၤ ဒီးအဝဲသ့ၣ်​ လဲၤလၢ ၡူၢ်အပှၢ်မုၢ်ကနၢအပူၤလီၤ. ဒီးအဝဲသ့ၣ်​ လဲၤတၢ်လၢ ပှၢ်မုၢ်ကနၢအပူၤ အိၣ်ဝဲသၢသီလံ ဘၣ်ဆၣ်​ တထံၣ်န့ၢ်ထံဘၣ်. ၂၃ ဖဲအဝဲသ့ၣ်​ လဲၤတုၤလၢ မၤရၤ*+ အခါ မ့ၢ်လၢထံန့ၣ်​ ခၣ်ဝဲအဃိ အဝဲသ့ၣ်​ အီဝဲထံလၢ အအိၣ်လၢ မၤရၤ တန့ၢ်ဘၣ်. လၢတၢ်န့ၣ်အဃိ အဝဲကိးဝဲ တၢ်လီၢ်အံၤလၢ မၤရၤလီၤ. ၂၄ အဃိ ပှၤဂီၢ်မုၢ်တဖၣ်​ ကဒူးကဒ့ၣ်​ စီၤမိၤၡ့+ ဒီးတဲဝဲလၢ “ပကဘၣ်အီ မနုၤလဲၣ်.” ၂၅ ဒီးစီၤမိၤၡ့ ဃ့တၢ်မၤစၢၤလၢ ယဟိဝၤယွၤအအိၣ်+ ဒီးယဟိဝၤယွၤ ဒုးနဲၣ်အီၤလၢ သ့ၣ်တထူၣ်လီၤ. ဖဲစီၤမိၤၡ့ ကွံာ်လီၤအီၤလၢ ထံကျါအခါ ထံန့ၣ်ကဲထီၣ်ထံလၢ ပှၤအီအီၤဝံၣ်လီၤ.

ဖဲန့ၣ်​ ယွၤပာ်တၢ်မၤအသးအံၤ ဒ်တၢ်မၤလိလၢ အဝဲသ့ၣ်အဂီၢ် ဒီးဒ်တၢ်အဒိလၢ အဘၣ်ဃးဒီး တၢ်စံၣ်ညီၣ်အသိး ဒီးဖဲန့ၣ်​ ယွၤမၤကွၢ် အဝဲသ့ၣ်လီၤ.+ ၂၆ ဒီးယွၤတဲဝဲလၢ “သုမ့ၢ်ဒိကနၣ်​ သုကစၢ် ယဟိဝၤယွၤ အကလုၢ် လီၤတံၢ်လီၤဆဲး, မၤတၢ်လၢအဘၣ်​ လၢယမဲာ်ညါ, ဒိကနၣ်​ ယတၢ်မၤလိာ် ဒီးအိၣ်မူမၤထွဲ ယတၢ်ဘျၢ ခဲလၢာ်န့ၣ်+ ယတစံၣ်ညီၣ်သုလၢ တၢ်ဆူးတၢ်ဆါတဖၣ်​ ဒ်ယစံၣ်ညီၣ်​ ပှၤအဲၤကူပတူးဖိ အသိးဘၣ်.+ ယဲဒၣ်အံၤ ယမ့ၢ် ယဟိဝၤယွၤ, ကစၢ်လၢ အမၤဘျါက့ၤသုလီၤ.”+

၂၇ ဝံၤဒီး အဝဲသ့ၣ်​ လဲၤတုၤလၢ အ့လံၣ်လီၤ. ဖဲန့ၣ်န့ၣ်​ ထံထီၣ်ပၢၢ်အိၣ်ဝဲ ၁၂ ခါ ဒီးသ့ၣ်စူၣ်ပလိၣ်​ အိၣ်ဝဲ အထူၣ်​ ၇၀ လီၤ. အဃိ အဝဲသ့ၣ်​ သူၣ်လီၤအဒဲဖဲန့ၣ်လၢ ထံအဃၢၤလီၤ.

၁၆ ပှၤအံၣ်စရ့လးဖိခဲလၢာ် ဟးထီၣ်ဝဲလၢ အ့လံၣ်လီၤ. ဖဲအဝဲသ့ၣ်​ ဟးထီၣ်လၢ ကီၢ်အဲၤကူပတူး ဝံၤအလီၢ်ခံ လါခံလါတလါထီၣ်​ ၁၅ သီန့ၣ်​ အဝဲသ့ၣ်​ လဲၤတုၤဝဲလၢ စံၤအပှၢ်မုၢ်ကနၢ+ လၢအအိၣ်လၢ အ့လံၣ်​ ဒီးစံၤနါ အဘၢၣ်စၢၤန့ၣ်လီၤ.

၂ ဒီးပှၤအံၣ်စရ့လးဖိခဲလၢာ် ကဒူးကဒ့ၣ်​ စီၤမိၤၡ့ ဒီးစီၤအၤဟရိၣ်​ လၢပှၢ်မုၢ်ကနၢ အပူၤလီၤ.+ ၃ ဒီးပှၤအံၣ်စရ့လးဖိ ဆဲးတဲ အဝဲသ့ၣ်လၢ “ဖဲပအိၣ်လၢ ကီၢ်အဲၤကူပတူးအခါ ပဆ့ၣ်နီၤလၢ တၢ်ညၣ်အသပၢၤတဖၣ်​ အကပၤ+ ဒီးပအီၣ်ဘၣ်တၢ် ဘျဲဘျဲအဃိ ယဟိဝၤယွၤ မ့ၢ်မၤသံပှၤဖဲန့ၣ်န့ၣ်​ ဝံၤလီၤ. ခဲအံၤန့ၣ်​ သုဟးကိးပှၤလၢ ပှၢ်မုၢ်ကနၢတခါအံၤ ဒ်သိး သုကမၤသံ တၢ်အိၣ်ဖှိၣ်ဒီတဖုအံၤလၢ တၢ်သၣ်ဝံၤလီၤဒိ အဃိလီၤ.”+

၄ ဒီးယဟိဝၤယွၤ တဲဘၣ်စီၤမိၤၡ့လၢ “ယကဒုးစူၤလီၤ ကိၣ်လၢမူခိၣ်​ လၢသုဂီၢ်လီၤ.+ ဒီးတနံၤဘၣ်တနံၤန့ၣ်​ ပှၤတဂၤစုာ်စုာ် ကဘၣ်လဲၤထၢဖှိၣ်အီၤ လၢတနံၤအဂီၢ် တနံၤအဂီၢ်လီၤ.+ ယကမၤကွၢ် အဝဲသ့ၣ်​ လၢကျဲဒ်အံၤ ဒ်သိး ယကသ့ၣ်ညါလၢ မ့ၢ်အဝဲသ့ၣ်​ ကလဲၤတၢ်ဒ် ယတၢ်သိၣ်တၢ်သီ အိၣ်ဝဲအသိးဧါ မ့တမ့ၢ် တလဲၤဝဲဘၣ်ဧါန့ၣ်လီၤ.+ ၅ ဘၣ်ဆၣ်​ လၢဃုသီတသီန့ၣ်+ အဝဲသ့ၣ်​ ကဘၣ်ထၢဖှိၣ်ဝဲ အါန့ၢ်ဒံး နံၤလၢအဂၤတဖၣ်​ ခံစး ဒီးကတဲာ်ကတီၤထီၣ်​ တၢ်အီၣ်လီၤ.”+

၆ ဒီးစီၤမိၤၡ့ ဒီးစီၤအၤဟရိၣ်​ တဲဘၣ်ပှၤအံၣ်စရ့လးဖိ ခဲလၢာ်လၢ “ဖဲဟါလီၤခီန့ၣ်​ သုကသ့ၣ်ညါ သပှၢ်ကတၢၢ်လၢ ယဟိဝၤယွၤ မ့ၢ်ပှၤလၢ အထုးထီၣ်သု လၢကီၢ်အဲၤကူပတူး အပူၤလီၤ.+ ၇ ယဟိဝၤယွၤ နၢ်ဟူ သုတၢ်ကဒူးကဒ့ၣ်လၢ အထီဒါအီၤလံ အဃိ လၢဂီၤခီန့ၣ်​ သုကထံၣ်ဘၣ်​ ယဟိဝၤယွၤ အလၤကပီၤလီၤ. ဘၣ်မနုၤအဃိ သုကဒူးကဒ့ၣ်ပှၤလဲၣ်, ပတမ့ၢ် တၢ်နီတမံၤဘၣ်.” ၈ ဒီးစီၤမိၤၡ့ ဆဲးတဲဝဲလၢ “ယဟိဝၤယွၤ ကဟ့ၣ်လီၤသု တၢ်ညၣ်လၢ သုကအီၣ်အဂီၢ်လၢ မုၢ်ဟါလီၤ ဒီးကိၣ်လၢ သုကအီၣ်ဘျဲဘျဲအဂီၢ် လၢဂီၤခီလီၤ. ဖဲန့ၣ်အခါ သုကထံၣ်ဘၣ်လၢ ယဟိဝၤယွၤ နၢ်ဟူလၢ သုကဒူးကဒ့ၣ်အီၤလီၤ. ဘၣ်ဆၣ်​ ပဝဲဒၣ်အံၤ ပတမ့ၢ် တၢ်နီတမံၤဘၣ်. အဃိ တမ့ၢ်လၢ သုကဒူးကဒ့ၣ်ပှၤဘၣ်, မ့ၢ်ဒၣ်​ သုကဒူးကဒ့ၣ်​ ယဟိဝၤယွၤလီၤ.”+

၉ ဒီးစီၤမိၤၡ့ တဲဘၣ်​ စီၤအၤဟရိၣ်လၢ “တဲဘၣ်​ ပှၤအံၣ်စရ့လးဖိ ခဲလၢာ်လၢ ‘မ့ၢ်လၢ ယဟိဝၤယွၤ နၢ်ဟူ သုတၢ်ကဒူးကဒ့ၣ်လံ အဃိ ဟဲအိၣ်ဖှိၣ်လၢ အမဲာ်ညါတက့ၢ်.’”+ ၁၀ ဖဲစီၤအၤဟရိၣ်​ တဲတၢ်ဒီး ပှၤအံၣ်စရ့လးဖိခဲလၢာ် ဝံၤဝဲအခါ အဝဲသ့ၣ်​ ဃၣ်အသး ဒီးကွၢ်တၢ်လၢ ပှၢ်မုၢ်ကနၢ ဒီးယဟိဝၤယွၤ အလၤကပီၤ အိၣ်ဖျါထီၣ်​ လၢတၢ်အၢၣ်အကျါလီၤ.+

၁၁ ယဟိဝၤယွၤ ဆဲးတဲစီၤမိၤၡ့လၢ ၁၂ “ယနၢ်ဟူဘၣ်​ ပှၤအံၣ်စရ့လးဖိ အတၢ်ကဒူးကဒ့ၣ်လံ.+ တဲဘၣ်​ အဝဲသ့ၣ်လၢ ‘ဖဲမုၢ်လီၤနုာ် အဆၢကတီၢ်န့ၣ်* သုကအီၣ်ဘၣ်တၢ်ညၣ်​ ဒီးလၢဂီၤခီန့ၣ်​ သုကအီၣ်ဘၣ်ကိၣ်​ ဘျဲဘျဲလီၤ.+ ဒီးသုကသ့ၣ်ညါလၢ ယမ့ၢ် သုကစၢ် ယဟိဝၤယွၤ သပှၢ်တၢၢ်လီၤ.’”+

၁၃ ဖဲဟါလီၤခီန့ၣ်​ ထိၣ်ပဝံတဖၣ်​ ဟဲဝဲ ဒီးအိၣ်ပှဲၤဝဲလၢ ဒဲကဝီၤ အပူၤလီၤ.+ ဒီးလၢဂီၤခီန့ၣ်​ ပစီၤထံ အိၣ်ဝးတရံးဝဲ ဒဲကဝီၤလီၤ. ၁၄ ဖဲပစီၤထံ သဝံထီၣ်ကွံာ်အခါ တၢ်အဖျၢၣ်​ ပြံကဒံတဖၣ်​ အိၣ်ဝဲလၢ ပှၢ်မုၢ်ကနၢအပူၤ+ ဒ်ပစီၤထံ လီၤသကၤလၢ ဟီၣ်ခိၣ်လိၤ အသိးလီၤ. ၁၅ ဖဲပှၤအံၣ်စရ့လးဖိတဖၣ်​ ထံၣ်ဝဲအခါ မ့ၢ်လၢ အဝဲသ့ၣ်​ တသ့ၣ်ညါဝဲလၢ အမ့ၢ် တၢ်မနုၤလဲၣ်အဃိ အဝဲသ့ၣ်​ တဲလိာ်အသး တဂၤဒီးတဂၤလၢ “အဝဲအံၤကဲ တၢ်မနုၤလဲၣ်.” ဒီးစီၤမိၤၡ့ တဲအဝဲသ့ၣ်လၢ “အဝဲအံၤ မ့ၢ်ဝဲ ကိၣ်လၢ ယဟိဝၤယွၤ ဟ့ၣ်လီၤသုလၢ တၢ်အီၣ်အဂီၢ်န့ၣ်လီၤ.+ ၁၆ ယဟိဝၤယွၤ မၤလိာ်ဝဲလၢ ‘ပှၤတဂၤစုာ်စုာ် ကြၢးထၢဖှိၣ်တၢ် ဒ်တၢ်လၢ အအီၣ်ဝဲ လၢာ်အသိးလီၤ. ဒ်ပှၤအိၣ်လၢ သုဒဲပူၤ အနီၣ်ဂံၢ် အိၣ်ဝဲအသိး သုဝဲတဂၤစုာ်စုာ် ကဘၣ်ဟံးန့ၢ် တဂၤတဧိၤမ့ၢ်လီၤ.’”*+ ၁၇ ဒီးပှၤအံၣ်စရ့လးဖိတဖၣ်​ မၤဝဲဒ်န့ၣ်​ ဒီးထၢဖှိၣ်ထီၣ်ဝဲ ကိၣ်လီၤ. ပှၤတနီၤန့ၣ်​ ထၢထီၣ်ဝဲအါ ဒီးတနီၤန့ၣ်​ ထၢထီၣ်ဝဲ စှၤလီၤ. ၁၈ ဒီးအဝဲသ့ၣ်​ ထိၣ်ကွၢ်ဝဲ ဒ်ဧိၤမ့ၢ်အတၢ်ထိၣ်အိၣ်ဝဲအသိး လၢဧိၤမ့ၢ် တဖျၢၣ်အပူၤလီၤ. ဒီးပှၤလၢ အထၢထီၣ်တၢ် အါတဂၤန့ၣ်​ တန့ၢ်ဝဲ အါတလၢဘၣ်. ဒီးပှၤလၢ အထၢထီၣ်တၢ် စှၤတဂၤန့ၣ်​ အတန့ၢ်ဝဲ စှၤတလၢဘၣ်.+ အဝဲသ့ၣ်​ တဂၤစုာ်စုာ် ထၢထီၣ်ဝဲဒ် အဝဲသ့ၣ်​ အီၣ်ဝဲ လၢာ်အသိးလီၤ.

၁၉ ဒီးစီၤမိၤၡ့ တဲအဝဲသ့ၣ်လၢ “ပှၤတဂၤဂ့ၤတဂၤဂ့ၤ တဘၣ်ပာ်ဃာ်အီၤ တုၤလၢဂီၤခီ နီတစဲးဘၣ်.”+ ၂၀ ဘၣ်ဆၣ်​ အဝဲသ့ၣ်​ တနီၤန့ၣ်​ တကနၣ်​ စီၤမိၤၡ့ အကလုၢ်ဘၣ်​ ဒီးပာ်ဃာ်ဝဲတနီၤလီၤ. အဃိ တုၤလၢဂီၤခီ အဆၢကတီၢ်န့ၣ်​ လၢၣ်ထီၣ်ဝဲ ဒီးနၢအုၣ်ဝဲ ဒီးစီၤမိၤၡ့ သးဒိၣ်ထီၣ်​ အဝဲသ့ၣ်လီၤ. ၂၁ တဂီၤဘၣ်တဂီၤ အဝဲသ့ၣ်​ ထၢဖှိၣ်အီၤ ဒ်အဝဲသ့ၣ်​ တဂၤစုာ်စုာ် အီၣ်ဝဲလၢာ် အသိးလီၤ. ဖဲမုၢ်အတၢ်ကိၢ် ဆူၣ်ထီၣ်အခါ ကိၣ်န့ၣ်ပှံၢ်လီၤကွံာ်ဝဲလီၤ.

၂၂ ဖဲဃုသီတသီန့ၣ်​ အဝဲသ့ၣ်​ ထၢထီၣ်ကိၣ်ခံစးအဃိ တဂၤန့ၣ်​ ထၢထီၣ်ဝဲ ခံဧိၤမ့ၢ်လီၤ.+ ဒီးပှၤဂီၢ်မုၢ် အခိၣ်နၢ်ခဲလၢာ် လဲၤတဲဘၣ်​ စီၤမိၤၡ့ တၢ်ဂ့ၢ်တခါအံၤလီၤ. ၂၃ ဒီးအဝဲတဲဘၣ်​ အဝဲသ့ၣ်လၢ “ယဟိဝၤယွၤ တဲဝဲဒ်အံၤလီၤ. ခဲမုၢ်ဆ့ၣ်န့ၣ်​ မ့ၢ်တၢ်အိၣ်ဘှံးအနံၤ လၢအမ့ၢ် မုၢ်အိၣ်ဘှံးနံၤစီဆှံ လၢယဟိဝၤယွၤ အဂီၢ်လီၤ.+ ဒီးဃိတၢ်လၢ သုကဘၣ်ဃိ ဒီးချီတၢ်လၢ သုကဘၣ်ချီ+ ဒီးပာ်ဃာ်တၢ်လၢ အအိၣ်တ့ၢ်တဖၣ်တုၤလၢ လၢခံတဂီၤတက့ၢ်.” ၂၄ အဃိ အဝဲသ့ၣ်​ ပာ်ဃာ် တၢ်လၢအအိၣ်တ့ၢ်တဖၣ်တုၤလၢ လၢခံတဂီၤ ဒ်စီၤမိၤၡ့ မၤလိာ် အဝဲသ့ၣ်အသိးလီၤ. ဘၣ်ဆၣ်​ တၢ်လၢအအိၣ်တ့ၢ်တဖၣ်အံၤ တနၢအုၣ်ဘၣ်​ ဒီးလၢၣ်တထီၣ်​ စ့ၢ်ကီးဘၣ်. ၂၅ ဒီးစီၤမိၤၡ့ တဲဝဲလၢ “တနံၤအံၤမ့ၢ်ဝဲ မုၢ်အိၣ်ဘှံးနံၤလၢ ယဟိဝၤယွၤအဂီၢ်အဃိ အီၣ်တၢ်လၢ သုပာ်ဃာ်အီၤတက့ၢ်. တနံၤအံၤ သုတထံၣ်န့ၢ်အီၤ လၢဟီၣ်ခိၣ်လိၤဘၣ်. ၂၆ သုကဘၣ်​ ထၢဖှိၣ်ထီၣ်အီၤ ဃုသီ ဘၣ်ဆၣ်​ လၢနွံသီတသီန့ၣ်​ မ့ၢ်ဝဲ မုၢ်အိၣ်ဘှံးနံၤအဃိ+ သုတထံၣ်န့ၢ် တၢ်နီတမံၤဘၣ်.” ၂၇ သနာ်က့ ဖဲမုၢ်နွံနံၤတနံၤန့ၣ်​ ပှၤတနီၤ လဲၤဃု ထၢထီၣ်တၢ်လီၤ. ဘၣ်ဆၣ်​ အဝဲသ့ၣ်​ တထံၣ်န့ၢ် တၢ်နီတမံၤဘၣ်.

၂၈ အဃိ ယဟိဝၤယွၤ တဲစီၤမိၤၡ့လၢ “သုကမၤက့ၣ်သုနၢ် ဒီးတမၤထွဲ ယတၢ်မၤလိာ်ဒီး ယတၢ်သိၣ်တၢ်သီတဖၣ်ဘၣ်န့ၣ်​ ကယံာ်ထဲလဲၣ်.+ ၂၉ တဘၣ်သးပ့ၤနီၣ်လၢ ယဟိဝၤယွၤ ဟ့ၣ်လီၤသု မုၢ်အိၣ်ဘှံးနံၤတဂ့ၤ.+ အဃိ မုၢ်ဃုနံၤတနံၤန့ၣ်​ အဝဲဟ့ၣ်လီၤသု ကိၣ်လၢ ခံသီအဂီၢ်လီၤ. ဒီးလၢ နွံသီတသီန့ၣ်​ ပှၤကိးဂၤဒဲး ကဘၣ်အိၣ်ဖဲ အဝဲသ့ၣ်​ အိၣ်ဝဲအလီၢ် ဒီးပှၤတဘၣ်​ ဟးထီၣ်ဖဲန့ၣ်​ နီတဂၤဘၣ်.” ၃၀ အဃိ ပှၤဂီၢ်မုၢ်တဖၣ်​ မၤထွဲဝဲ မုၢ်အိၣ်ဘှံးနံၤအတၢ်သိၣ်တၢ်သီလၢ မုၢ်နွံနံၤတနံၤန့ၣ်လီၤ.+

၃၁ ပှၤအံၣ်စရ့လးဖိ ကိးဝဲကိၣ်အံၤလၢ “မၤနၤ” လီၤ.* ဒီးအလီၤဂာ်ဒ် တၢ်အချံဝါဝါ ဆံးဆံးဖိတဖၣ်အသိး ဒီးအဝံၣ်ဝဲ ဒ်ကိၣ်ဘ့ၣ်ဘၣ်​ လၢအပၣ်ဃုာ်ဒီး ကနဲစီအသိးလီၤ.+ ၃၂ ဒီးစီၤမိၤၡ့ တဲဝဲလၢ “ယဟိဝၤယွၤ မၤလိာ်ဝဲလၢ ‘မၤပှဲၤကိၣ်တဧိၤမ့ၢ် ဒီးပာ်ဃာ်အီၤ ဒ်သိးပှၤတစိၤဘၣ်တစိၤ+ ကထံၣ်ဘၣ်ဝဲ ကိၣ်လၢ ယဒုးအီၣ်သု လၢပှၢ်မုၢ်ကနၢအပူၤ ဖဲယဒုးဟးထီၣ်သု လၢကီၢ်အဲၤကူပတူး အခါန့ၣ်တက့ၢ်.’” ၃၃ အဃိ စီၤမိၤၡ့ တဲစီၤအၤဟရိၣ်လၢ “ဟံးန့ၢ်ကိတဖျၢၣ်, ပၢနုာ်မၤနၤ တဧိၤမ့ၢ် လၢအပူၤ ဒီးပာ်အီၤလၢ ယဟိဝၤယွၤ အမဲာ်ညါ ဒ်တၢ်တမံၤလၢ အကဘၣ်​ တၢ်ပာ်ဃာ်အီၤ တစိၤဘၣ်တစိၤ အသိးန့ၣ်တက့ၢ်.”+ ၃၄ ဒ်ယဟိဝၤယွၤ မၤလိာ်စီၤမိၤၡ့အသိး စီၤအၤဟရိၣ်​ ပာ်လီၤဝဲလၢ တၢ်အၢၣ်လီၤအီလီၤ အတလါ အမဲာ်ညါ+ ဒ်သိး အသုတဟးဂီၤ တဂ့ၤအဂီၢ်လီၤ. ၃၅ ဒီးပှၤအံၣ်စရ့လးဖိတဖၣ်​ အီၣ်ဝဲ ကိၣ်မၤနၤ တုၤလၢ အလဲၤတုၤလၢ ကီၢ်တဘ့ၣ်လၢ ပှၤအိၣ်ပာ်စၢၤဝဲလၢအပူၤလီၤ.+ အဝဲသ့ၣ်​ အီၣ်ဝဲကိၣ်မၤနၤ တုၤလၢ အလဲၤတုၤလၢ ကီၢ်ကနၤဧၣ်​ အကီၢ်ဆၢလီၤ.+ အဃိ အဝဲသ့ၣ်​ အီၣ်ဝဲကိၣ်န့ၣ်​ အိၣ်ဝဲ အနံၣ်​ ၄၀ လီၤ.+ ၃၆ တဧိၤမ့ၢ်န့ၣ်​ အိၣ်ဝဲ တအ့ဖး* ဆံဆဲၣ်ပူတပူလီၤ.

၁၇ ဒီးပှၤအံၣ်စရ့လးဖိခဲလၢာ် ဟးထီၣ်လၢ စံၤအပှၢ်မုၢ်ကနၢ+ ဒီးအဝဲသ့ၣ်​ လဲၤတၢ် တတီၤဝံၤတတီၤ ဒ်ယဟိဝၤယွၤ မၤလိာ်အဝဲသ့ၣ်​ အသိးလီၤ.+ အဝဲသ့ၣ်​ သူၣ်လီၤဒဲကဝီၤလၢ ရဖံၤဒံၣ်အပူၤလီၤ.+ ဘၣ်ဆၣ်​ ဖဲတၢ်လီၢ် အဝဲန့ၣ်န့ၣ်​ ထံလၢပှၤဂီၢ်မုၢ်တဖၣ်​ ကအီအဂီၢ် တအိၣ်ဘၣ်.

၂ ဒီးပှၤဂီၢ်မုၢ် တဲအါလိာ်သးဒီး စီၤမိၤၡ့+ ဒီးတဲဝဲလၢ “ဟ့ၣ်ပှၤထံလၢ ပကအီအဂီၢ်သၢၤ.” ဘၣ်ဆၣ်​ စီၤမိၤၡ့ တဲအဝဲသ့ၣ်လၢ “ဘၣ်မနုၤအဃိ သုတဲအါလိာ်သးဒီးယၤလဲၣ်. ဘၣ်မနုၤအဃိ သုမၤကွၢ်ဒံး ယဟိဝၤယွၤလဲၣ်.”+ ၃ ဘၣ်ဆၣ်​ ဖဲန့ၣ်န့ၣ်​ ပှၤဂီၢ်မုၢ်တဖၣ်​ လီၤဘဲအီထံ သပှၢ်ကတၢၢ် ဒီးအဝဲသ့ၣ်​ ဆဲးကဒူးကဒ့ၣ်​ စီၤမိၤၡ့+ ဒီးတဲဝဲလၢ “ဘၣ်မနုၤအဃိ နဒုးဟးထီၣ်ပှၤလၢ ကီၢ်အဲၤကူပတူး အပူၤလဲၣ်. မ့ၢ်ဒ်သိး ပကလီၤဘဲအီထံ တုၤလၢပသံအဂီၢ်ဧါ. ပဝဲဒီး ပဖိတဖၣ်​ ဒီးပဆၣ်ဖိကီၢ်ဖိ အဒၢတဖၣ်​ ကသံလီၤသၢၤ.” ၄ ဒီးစီၤမိၤၡ့ ဃ့တၢ်မၤစၢၤလၢ ယဟိဝၤယွၤ အအိၣ်လၢ “ယကဘၣ်မၤ ပှၤဂီၢ်မုၢ်တဖၣ်အံၤ ဒ်လဲၣ်. လိၣ်ဒံးတစဲးဖိဒီး အဝဲသ့ၣ်​ ကကွံာ်ယၤ လၢလၢၢ်လီၤ.”

၅ ဒီးယဟိဝၤယွၤ တဲစီၤမိၤၡ့လၢ “လဲၤလၢ ပှၤဂီၢ်မုၢ်အမဲာ်ညါ ဒီးကိးဃုာ်ဒီး အံၣ်စရ့လး အပှၤသူၣ်က့သးပှၢ်တနီၤ ဒီးလဲၤစိာ် နနီၣ်ထိးဘိ လၢနတီၢ် ထံကျိနံၤလါတက့ၢ်.+ လဲၤစိာ် နနီၣ်ထိးဘိအံၤ လၢနစုပူၤ ဒီးလဲၤတၢ်တက့ၢ်. ၆ ယကဆၢထၢၣ်လၢ နမဲာ်ညါ လၢလၢၢ်ဖးဒိၣ်​ တဖျၢၣ်အဖီခိၣ်​ လၢအအိၣ်​ လၢဃိၤရ့း အဟီၣ်ကဝီၤ အပူၤန့ၣ်လီၤ. နကဘၣ်တီၢ် လၢၢ်တဖျၢၣ်​ ဒီးထံကဟဲထီၣ်ဝဲလီၤ. ဒီးပှၤဂီၢ်မုၢ်တဖၣ်​ ကအီဝဲထံလီၤ.”+ ဒီးစီၤမိၤၡ့ မၤဝဲဒ်န့ၣ်​ လၢအံၣ်စရ့လး အပှၤသူၣ်က့သးပှၢ်တဖၣ်​ အမဲာ်ညါလီၤ. ၇ လၢတၢ်လီၢ်ဖဲန့ၣ်​ ပှၤအံၣ်စရ့လးဖိတဖၣ်​ တဲအါတၢ် ဒီးမၤကွၢ် ယဟိဝၤယွၤ+ ခီဖျိ အဝဲသ့ၣ်​ တဲဝဲလၢ “မ့ၢ်ယဟိဝၤယွၤ အိၣ်လၢပကျါဧါ တအိၣ်ဘၣ်ဧါ” န့ၣ်လီၤ. လၢတၢ်န့ၣ်အဃိ စီၤမိၤၡ့ကိးဝဲ တၢ်လီၢ်အံၤလၢ မးစၤ*+ ဒီးမရံၤဘါလီၤ.*+

၈ ဒီးပှၤဧမၤလ့းဖိတဖၣ်+ ဟဲဒုးဝဲ ပှၤအံၣ်စရ့လးဖိတဖၣ်​ လၢအအိၣ်​ လၢရဖံၤဒံၣ်န့ၣ်လီၤ.+ ၉ စီၤမိၤၡ့ တဲစီၤယိၤၡူလၢ+ “ဃုထၢထီၣ်​ ပှၤပိာ်ခွါတဖၣ်​ ဒီးလဲၤဒုး ပှၤဧမၤလ့းဖိတဖၣ်တက့ၢ်. ခဲမုၢ်ဆ့ၣ်န့ၣ်​ ယကဖီၣ်ဃာ် ယွၤလၢအမ့ၢ်အတီ အနီၣ်ထိးဘိ ဒီးယကဆၢထၢၣ်လၢ တၢ်လူၢ်အဒီခိၣ်လီၤ.” ၁၀ ဒီးစီၤယိၤၡူ မၤဝဲဒ် စီၤမိၤၡ့ တဲအီၤအသိး+ ဒီးအဝဲ ဒုးဝဲပှၤဧမၤလ့းဖိတဖၣ်လီၤ. ဒီးစီၤမိၤၡ့, စီၤအၤဟရိၣ်​ ဒီးစီၤဃူၢ်+ လဲၤထီၣ်ဝဲလၢ တၢ်လူၢ်အဒီခိၣ်လီၤ.

၁၁ ဖဲစီၤမိၤၡ့ ယူာ်ထီၣ်ဒံးအစုအခါ ပှၤအံၣ်စရ့လးဖိ မၤနၢၤတၢ်လီၤ. ဘၣ်ဆၣ်​ ဖဲအဝဲ ပာ်လီၤအစုအခါ ပှၤဧမၤလ့းဖိ မၤနၢၤတၢ်လီၤ. ၁၂ ဖဲစီၤမိၤၡ့ အစုလီၤဘှံးဝဲအခါ စီၤအၤဟရိၣ်​ ဒီးစီၤဃူၢ် ဟံးန့ၢ်လၢၢ်တဖျၢၣ်, ပာ်လီၤဝဲလၢအခီၣ်ထံး ဒီးစီၤမိၤၡ့ဆ့ၣ်နီၤလၢ လၢၢ်အလိၤလီၤ. ဒီးအဝဲသ့ၣ်​ ဖီၣ်ဃာ်ဝဲ စီၤမိၤၡ့အစု တဂၤတကပၤ ဒ်သိးစီၤမိၤၡ့အစု ကအိၣ်ဂၢၢ်ဝဲ တုၤလၢမုၢ်လီၤနုာ်လီၤ. ၁၃ ဒီးစီၤယိၤၡူ မၤနၢၤကွံာ်ဝဲ ပှၤဧမၤလ့းဖိတဖၣ်​ လၢနးလီၤ.+

၁၄ ဒီးယဟိဝၤယွၤ တဲစီၤမိၤၡ့လၢ “ယကမၤလီၤမၢ်ကွံာ် ပှၤဧမၤလ့းဖိ ခဲလၢာ်ခဲဆ့ လၢဟီၣ်ခိၣ်ချၢ ဒီးတၢ်တသ့ၣ်နီၣ်ထီၣ်​ အဝဲသ့ၣ်လၢၤဘၣ်. ‘ကွဲးလီၤ တၢ်ဂ့ၢ်တခါန့ၣ်လၢ လံာ်ပူၤ ဒ်သိး တၢ်ကသ့ၣ်နီၣ်ထီၣ်အီၤအဂီၢ် ဒီးတဲဘၣ်က့ၤ စီၤယိၤၡူတက့ၢ်.’”+ ၁၅ ဒီးစီၤမိၤၡ့ တ့ထီၣ်ဝဲ တၢ်လုၢ်လီၢ်တခါ ဒီးကိးန့ၢ်ဝဲ အမံၤလၢ ယဟိဝၤနံးစံးလီၤ.* ၁၆ ဒီးတဲဝဲလၢ “မ့ၢ်လၢ ပှၤဧမၤလ့းဖိတဖၣ်​ အစုထီဒါ ယဟိဝၤယွၤ အလီၢ်ပစိာ်အဃိ+ ယဟိဝၤယွၤ ကဒုးတၢ်ဒီးအဝဲသ့ၣ်​ တစိၤဘၣ်တစိၤလီၤ.”+

၁၈ စီၤမိၤၡ့ အမံၤပှၢ် စီၤယံးသရိၤ လၢအမ့ၢ် ပှၤမံးဒယၣ်ဖိ အပှၤလုၢ်တၢ်ဒိၣ်န့ၣ်+ နၢ်ဟူဘၣ်ဝဲ ကယဲၢ်တၢ်လၢ ကစၢ်ယွၤ မၤဝဲလၢ အပှၤဂီၢ်မုၢ် အံၣ်စရ့လးအဂီၢ် ဒီးလၢစီၤမိၤၡ့အဂီၢ် ဒီးယဟိဝၤယွၤ ထုးထီၣ်​ ပှၤအံၣ်စရ့လးဖိတဖၣ်​ လၢကီၢ်အဲၤကူပတူး ဒ်လဲၣ်အဂ့ၢ်န့ၣ်လီၤ.+ ၂ ဒီးစီၤမိၤၡ့ အမံၤပှၢ် စီၤယံးသရိၤ ကွၢ်ထွဲက့ၤ စီၤမိၤၡ့အမါ နီၢ်စံးဖိရၤ ဖဲအဘၣ်​ တၢ်ဆှၢက့ၤအီၤဆူအအိၣ်​ ၃ ဃုာ်ဒီး အဖိခွါခံဂၤအခါလီၤ.+ အဖိခွါတဂၤန့ၣ်​ အမံၤမ့ၢ် စီၤက့းရၡိၣ်,*+ မ့ၢ်လၢ စီၤမိၤၡ့ တဲဝဲလၢ “ယကဲထီၣ်​ ပှၤထံဂၤကီၢ်ဂၤဖိလၢ ထံကီၢ်အဂၤတဘ့ၣ်” အဃိလီၤ. ၄ ဒီးအဝဲတဂၤန့ၣ်​ အမံၤမ့ၢ် စီၤအလံၤဧ့စ့ၢ်,* မ့ၢ်လၢ စီၤမိၤၡ့ တဲဝဲလၢ “ယပၢ်အယွၤန့ၣ်​ မ့ၢ်ပှၤလၢအမၤစၢၤယၤ ဒီးအမ့ၢ် ပှၤတဂၤလၢ အမၤပူၤဖျဲးယၤ လၢဖၤရိၤ အနးလီၤ.”+

၅ စီၤမိၤၡ့ အမံၤပှၢ် စီၤယံးသရိၤ ဒီးစီၤမိၤၡ့အမါ ဒီးအဖိခွါတဖၣ်န့ၣ်​ လဲၤဝဲလၢ စီၤမိၤၡ့အအိၣ်​ လၢပှၢ်မုၢ်ကနၢလီၤ. ဖဲန့ၣ်န့ၣ်​ စီၤမိၤၡ့ သူၣ်အဒဲဖဲ ယွၤလၢအမ့ၢ်အတီတဂၤ အကစၢၢ်န့ၣ်လီၤ.+ ၆ ဒီးစီၤယံးသရိၤ ဆှၢလီၤတၢ်ကစီၣ်လၢ စီၤမိၤၡ့အအိၣ်လၢ “နမံၤပှၢ် စီၤယံးသရိၤ+ ဟဲလၢနအိၣ်​ ဒီးအဟဲဝဲဒီး နမါ ဒီးနဖိခွါ ခံဂၤလီၤ.” ၇ ဒီးစီၤမိၤၡ့ လဲၤထံၣ်လိာ်အသးဒီး အမံၤပှၢ်တဘျီဃီ ဒီးအဝဲ ဆုးလီၤအခိၣ်​ ဒီးနၢမူအီၤလီၤ. အဝဲသ့ၣ်​ သံကွၢ်လိာ်အသး ဘၣ်ဃးဒီး အတၢ်အိၣ်ဆူၣ်အိၣ်ချ့အဂ့ၢ် ဝံၤဒီး အဝဲသ့ၣ်​ လဲၤနုာ်လီၤလၢ ဒဲပူၤလီၤ.

၈ ဒီးစီၤမိၤၡ့ တဲဘၣ်​ အမံၤပှၢ် ဘၣ်ဃးဒီး တၢ်ခဲလၢာ်လၢ ယဟိဝၤယွၤ မၤဝဲဖၤရိၤ ဒီးကီၢ်အဲၤကူပတူး ဒ်သိး ကမၤစၢၤဝဲ ပှၤအံၣ်စရ့လးဖိတဖၣ်အဂီၢ်+ ဒီးတဲဘၣ်အီၤ တၢ်ကီတၢ်ခဲ ခဲလၢာ်လၢ အဝဲသ့ၣ်​ ထံၣ်ဘၣ်ဝဲလၢကျဲ ဒီဘိ+ ဒီးယဟိဝၤယွၤ မၤပူၤဖျဲး အဝဲသ့ၣ်​ ဒ်လဲၣ်န့ၣ်လီၤ. ၉ ဒီးမ့ၢ်လၢ ယဟိဝၤယွၤ မၤပူၤဖျဲးထီၣ်​ ပှၤအံၣ်စရ့လးဖိလၢ ကီၢ်အဲၤကူပတူး ဒီးမၤဂ့ၤအဝဲသ့ၣ်အါမးအဃိ စီၤယံးသရိၤ သးခုဝဲဒိၣ်မးလီၤ. ၁၀ ဒီးစီၤယံးသရိၤ တဲဝဲလၢ “ယဟိဝၤယွၤလၢ အမၤပူၤဖျဲးသုလၢ ကီၢ်အဲၤကူပတူး ဒီးလၢဖၤရိၤ အစုပူၤ ဒီးအမၤပူၤဖျဲး ပှၤဂီၢ်မုၢ်လၢ ကီၢ်အဲၤကူပတူး အတၢ်ပၢဖီလာ်န့ၣ်​ မ်အဘၣ်​ တၢ်စံးထီၣ်ပတြၢၤအီၤတက့ၢ်. ၁၁ မ့ၢ်လၢ ယဟိဝၤယွၤ စံၣ်ညီၣ်ပှၤလၢ အပာ်ထီၣ်ထီအသးလၢ အပှၤဂီၢ်မုၢ် အဖီခိၣ်အဃိ ခဲအံၤ ယသ့ၣ်ညါလၢ အဝဲဒိၣ်န့ၢ်ဒံး ယွၤအဂၤ ခဲလၢာ်လီၤ.”+ ၁၂ ဒီးစီၤမိၤၡ့ အမံၤပှၢ် စီၤယံးသရိၤ ဟဲစိာ်ဝဲ တၢ်လုၢ်ဒွဲၣ်အူတခါ ဒီးတၢ်လုၢ်တၢ်ပာ်တဖၣ်​ လၢကစၢ်ယွၤ အဂီၢ်လီၤ. ဒီးစီၤအၤဟရိၣ်​ ဒီးအံၣ်စရ့လး အပှၤသူၣ်က့သးပှၢ် ကိးဂၤဒဲး ဟဲအီၣ်သကိးတၢ်အီၣ်ဒီး စီၤမိၤၡ့ အမံၤပှၢ် လၢယွၤလၢအမ့ၢ်အတီ အမဲာ်ညါလီၤ.

၁၃ လၢခံတနံၤန့ၣ်​ ဒ်စီၤမိၤၡ့ မၤညီနုၢ်ဝဲအသိး အဝဲဆ့ၣ်နီၤလၢ ကစံၣ်ညီၣ်န့ၢ် တၢ်လၢ ပှၤဂီၢ်မုၢ်တဖၣ်​ အဂီၢ်လီၤ. ဒီးပှၤဂီၢ်မုၢ်တဖၣ်​ ဆၢထၢၣ်လၢ စီၤမိၤၡ့အမဲာ်ညါ စးထီၣ်လၢဂီၤခီ တုၤလၢဟါခီလီၤ. ၁၄ ဖဲစီၤမိၤၡ့ အမံၤပှၢ် ထံၣ်ဘၣ်​ ကယဲၢ်တၢ်လၢ စီၤမိၤၡ့ ဘၣ်မၤဝဲလၢ ပှၤဂီၢ်မုၢ် အဂီၢ်အခါ အတဲဝဲလၢ “ဘၣ်မနုၤအဃိ နမၤဒ်အံၤလဲၣ်. နဆ့ၣ်နီၤဖဲအံၤ ထဲတဂၤ ဒီးပှၤဂီၢ်မုၢ်ခဲလၢာ် ဆၢထၢၣ်လၢ နမဲာ်ညါ စးထီၣ်လၢ ဂီၤခီတုၤလၢ ဟါခီ ဘၣ်လဲၣ်.” ၁၅ ဒီးစီၤမိၤၡ့ တဲဆၢ အမံၤပှၢ်လၢ “ပှၤဂီၢ်မုၢ်တဖၣ်​ ဟဲလၢယအိၣ်​ ဒ်သိးကသံကွၢ်တၢ်လၢ ယွၤအအိၣ်​ အဂီၢ်လီၤ. ၁၆ ဖဲတၢ်ဂ့ၢ်ကီ အိၣ်ထီၣ်လၢ ပှၤခံဂၤ အဘၢၣ်စၢၤအခါ အဝဲသ့ၣ်​ ဟဲတဲဘၣ်ယၤ တၢ်ဂ့ၢ်လီၤ. ဒီးယဘၣ်စံၣ်ညီၣ်တၢ် ဒီးယဘၣ်တဲဘၣ်​ စ့ၢ်ကီးအဝဲသ့ၣ်လၢ ယွၤလၢအမ့ၢ်အတီတဂၤ အတၢ်ဆၢတဲာ်တဖၣ်​ ဒီးအတၢ်သိၣ်တၢ်သီတဖၣ်လီၤ.”+

၁၇ ဒီးစီၤမိၤၡ့ အမံၤပှၢ် တဲအီၤလၢ “နမၤဒ်အံၤန့ၣ်​ တဘၣ်ဘၣ်. ၁၈ ခဲကိာ်န့ၣ်​ နၤဒီးပှၤဂီၢ်မုၢ်လၢ အအိၣ်ဒီးနၤတဖၣ်အံၤ ကလီၤဘှံးသပှၢ်တၢၢ်လီၤ. တၢ်ဝံတၢ်ယိးတခါအံၤ ဃၢတလၢ လၢနဂီၢ် ဒီးနယိးအီၤ ထဲတဂၤ တန့ၢ်ဘၣ်. ၁၉ အဃိ ကနၣ်ယကလုၢ်မီၤ. ယကဟ့ၣ်ကူၣ်နၤ ဒီးကစၢ်ယွၤ ကအိၣ်ဒီးနၤလီၤ.+ နကဘၣ်ကဲ ပှၤခၢၣ်စးတၢ်လၢ ပှၤဂီၢ်မုၢ်အဂီၢ် လၢယွၤလၢအမ့ၢ်အတီတဂၤ အမဲာ်ညါ+ ဒီးနဘၣ်ဆှၢထီၣ်​ တၢ်ဂ့ၢ်ကီတဖၣ်လၢ ယွၤလၢအမ့ၢ်အတီတဂၤ အအိၣ်လီၤ.+ ၂၀ ဒီးနဘၣ်ဟ့ၣ်ပလီၢ် အဝဲသ့ၣ်​ ဘၣ်ဃးဒီး တၢ်ဘျၢ ဒီးတၢ်သိၣ်တၢ်သီတဖၣ်​ အိၣ်ဒ်လဲၣ်+ ဒီးနဘၣ်​ ဒုးသ့ၣ်ညါ အဝဲသ့ၣ်လၢ အဝဲသ့ၣ်​ ကြၢးအိၣ်မူဒ်လဲၣ်​ ဒီးကြၢးမၤ တၢ်မၤမနုၤလဲၣ်​ န့ၣ်လီၤ. ၂၁ ဘၣ်ဆၣ်​ နကဘၣ်​ ဃုထၢထီၣ်​ ပှၤပိာ်ခွါတဖၣ်​ လၢအတုၤထီၣ်ထီၣ်ဘး+ လၢအပျံၤယွၤ ဒီးအမ့ၢ်ပှၤလၢ ပှၤနာ်န့ၢ်အီၤသ့ လၢအတဃု အနီၢ်ကစၢ် အဘျုးဘၣ်န့ၣ်လီၤ.+ ဒီးပာ်ထီၣ်အဝဲသ့ၣ်လၢ ပှၤတကထိ အခိၣ်, ပှၤတကယၤအခိၣ်, ပှၤယဲၢ်ဆံ အခိၣ်​ ဒီးပှၤအဂၤတဆံ အခိၣ်လီၤ.+ ၂၂ ဖဲတၢ်ဂ့ၢ်ကီ အိၣ်ထီၣ်ဝဲအခါ ပှၤပိာ်ခွါတဖၣ်အံၤ ကဘၣ်စံၣ်ညီၣ်န့ၢ်တၢ်လၢ ပှၤဂီၢ်မုၢ်တဖၣ်​ အဂီၢ်လီၤ. မ့မ့ၢ် တၢ်ဂ့ၢ်လၢအကီ ဖးဒိၣ်​ တမံၤဂ့ၤတမံၤဂ့ၤန့ၣ်​ အဝဲသ့ၣ်​ ကဟဲဆှၢထီၣ်ဝဲ ဆူနအိၣ်+ ဘၣ်ဆၣ်​ မ့မ့ၢ် တၢ်ဂ့ၢ်ဆံးဆံးဖိ ကိးမံၤဒဲးန့ၣ်​ အဝဲသ့ၣ်​ ကဆၢတဲာ်ဝဲလီၤ. နမ့ၢ်ဟ့ၣ်အခွဲးလၢ အဝဲသ့ၣ်ကယိးစၢၤနၤ တၢ်ဝံတၢ်ယိးတခါအံၤန့ၣ်​ ကညီထီၣ်လၢနဂီၢ်လီၤ.+ ၂၃ နမ့ၢ်မၤဒ်န့ၣ်​ ဒီးအမ့မ့ၢ်ဘၣ်ဖုး တၢ်လၢ ကစၢ်ယွၤ မၤလိာ်စ့ၢ်ကီးနၤန့ၣ်​ နတလီၤဘှံး ဒိၣ်တလၢဘၣ်​ ဒီးပှၤကိးဂၤဒဲး ကက့ၤဝဲလၢ အဒဲလၢ တၢ်သူၣ်မံသးမုာ် အပူၤလီၤ.”

၂၄ စီၤမိၤၡ့ ဒိကနၣ်ဝဲ အမံၤပှၢ် အကလုၢ် တဘျီဃီ ဒီးမၤဝဲဒ် အမံၤပှၢ်တဲအီၤ အသိးလီၤ. ၂၅ စီၤမိၤၡ့ ဃုထၢထီၣ်ဝဲ ပှၤပိာ်ခွါလၢ အတုၤထီၣ်ထီၣ်ဘးတဖၣ်​ လၢပှၤအံၣ်စရ့လးဖိ ခဲလၢာ်အကျါ ဒီးပာ်ထီၣ်အဝဲသ့ၣ်လၢ ပှၤဂီၢ်မုၢ်တဖၣ်​ အဖီခိၣ်​ ဒ်ပှၤတကထိ အခိၣ်, ပှၤတကယၤ အခိၣ်, ပှၤယဲၢ်ဆံ အခိၣ်​ ဒီးပှၤအဂၤတဆံ အခိၣ်လီၤ. ၂၆ အဃိ ဖဲတၢ်ဂ့ၢ်ကီတဖၣ်​ ဟဲအိၣ်ထီၣ်ဝဲအခါ အဝဲသ့ၣ်​ စံၣ်ညီၣ်န့ၢ်တၢ်လၢ ပှၤဂီၢ်မုၢ်တဖၣ်​ အဂီၢ်လီၤ. မ့မ့ၢ် တၢ်ဂ့ၢ်လၢ အကီဖးဒိၣ်န့ၣ်​ အဝဲသ့ၣ်​ ဟဲဆှၢထီၣ်ဝဲဆူ စီၤမိၤၡ့အအိၣ်+ ဘၣ်ဆၣ်​ မ့မ့ၢ် တၢ်ဂ့ၢ်ဆံးဆံးဖိ ကိးမံၤဒဲးန့ၣ်​ အဝဲသ့ၣ်​ စံၣ်ညီၣ်န့ၢ်ဝဲလီၤ. ၂၇ ဒီးစီၤမိၤၡ့ အမံၤပှၢ် ဆၢဂ့ၤဆၢဝါအီၤ ဝံၤဒီး+ က့ၤဝဲလၢ အအိၣ်တၢ်လီၢ်လီၤ.

၁၉ ဖဲပှၤအံၣ်စရ့လးဖိတဖၣ်​ ဟးထီၣ်လၢ ကီၢ်အဲၤကူပတူးအပူၤ ဝံၤအလီၢ်ခံ သၢလါတလါန့ၣ်​ အဝဲသ့ၣ်​ လဲၤတုၤလၢ စံၤနါ အပှၢ်မုၢ်ကနၢ ဖဲတၢ်တသီန့ၣ်လီၤ.* ၂ ပှၤအံၣ်စရ့လးဖိတဖၣ်​ ဟးထီၣ်လၢ ရဖံၤဒံၣ်+ ဒီးလဲၤဝဲလၢ စံၤနါ အပှၢ်မုၢ်ကနၢ ဒီးသူၣ်လီၤအဒဲ လၢပှၢ်မုၢ်ကနၢ အပူၤလီၤ. အဝဲသ့ၣ်​ သူၣ်လီၤအဒဲ လၢကစၢၢ် အမဲာ်ညါလီၤ.+

၃ ဒီးစီၤမိၤၡ့ လဲၤထီၣ်ကစၢၢ် ဒ်သိး ကပာ်ဖျါထီၣ်အသးလၢ ယွၤလၢအမ့ၢ်အတီတဂၤ အမဲာ်ညါလီၤ. ဒီးလၢကစၢၢ်လိၤန့ၣ်​ ယဟိဝၤယွၤ တဲအီၤလၢ+ “နကဘၣ်တဲ စီၤယၤကိာ် အစၢၤအသွဲၣ်​ ပှၤအံၣ်စရ့လးဖိတဖၣ်လၢ ၄ ‘ဒ်သိး ယကစိာ်သု ဒ်လံာ်ကြီကြာ် စိာ်အဖိလၢ အဒံးဆ့အလိၤ ဒီးဆှၢသုလၢ ယအိၣ်အဂီၢ် ယမၤပှၤအဲၤကူပတူးဖိ ဒ်လဲၣ်န့ၣ်+ သုထံၣ်ဘၣ်လၢ သုနီၢ်ကစၢ်လံ.+ ၅ မ့ၢ်လၢဟီၣ်ခိၣ်ဒီဘ့ၣ်ညါ မ့ၢ်ယတၢ်အဃိ ခဲအံၤန့ၣ်​ သုမ့ၢ်ဒိကနၣ်​ ယကလုၢ် လီၤတံၢ်လီၤဆဲး ဒီးမၤထွဲဒ် ယတၢ်အၢၣ်လီၤအီလီၤ အသိးန့ၣ်​ လၢပှၤကလုာ် ခဲလၢာ်အကျါ သုကကဲထီၣ်​ ပှၤလၢအလုၢ်ဒိၣ်ပှ့ၤဒိၣ်တဒူၣ်+ လၢယဂီၢ်လီၤ.+ ၆ ဒီးသုကကဲထီၣ်​ ပှၤလုၢ်တၢ်ဒိၣ်တဖၣ်​ အဘီမုၢ် လၢယဂီၢ် ဒီးပှၤစီဆှံတကလုာ် လၢယဂီၢ်လီၤ.’+ နကဘၣ်တဲ ပှၤအံၣ်စရ့လးဖိလၢ တၢ်ကတိၤတဖၣ်အံၤလီၤ.”

၇ အဃိ စီၤမိၤၡ့က့ၤလီၤ ဒီးကိးဖှိၣ်ဝဲ ပှၤဂီၢ်မုၢ် အပှၤသူၣ်က့သးပှၢ်တဖၣ်​ ဒီးတဲဘၣ်​ အဝဲသ့ၣ်​ တၢ်ခဲလၢာ်လၢ ယဟိဝၤယွၤ မၤလိာ်အီၤန့ၣ်လီၤ.+ ၈ ဒီးပှၤဂီၢ်မုၢ်ခဲလၢာ် အသးလီၤပလိာ်လိာ်အသး ဒီးတဲဝဲလၢ “ပသးအိၣ်မၤထွဲ တၢ်လၢ ယဟိဝၤယွၤ တဲဝဲခဲလၢာ်လီၤ.”+ ဒီးစီၤမိၤၡ့ တဲဘၣ်က့ၤ ယဟိဝၤယွၤလၢ ပှၤဂီၢ်မုၢ်တဖၣ်အံၤ အတၢ်ကတိၤ တဘျီဃီလီၤ. ၉ ဒီးယဟိဝၤယွၤ တဲဘၣ်စီၤမိၤၡ့လၢ “ကွၢ်မီၤ, ယကဟဲလၢနအိၣ်​ လၢတၢ်အၢၣ်ခံးသူ တလိၣ်အကျါ ဒ်သိး ဖဲယတဲတၢ်ဒီးနၤအခါ ပှၤဂီၢ်မုၢ်တဖၣ်​ ကနၢ်ဟူဝဲ ဒီးအဝဲသ့ၣ်​ ကနာ်နၤ ထီဘိအဂီၢ် စ့ၢ်ကီးလီၤ.” ဒီးစီၤမိၤၡ့ တဲဘၣ်​ ယဟိဝၤယွၤ လၢပှၤဂီၢ်မုၢ်တဖၣ်​ အတၢ်ကတိၤလီၤ.

၁၀ ဒီးယဟိဝၤယွၤ တဲစီၤမိၤၡ့လၢ “လဲၤလၢပှၤဂီၢ်မုၢ်တဖၣ်အအိၣ်​ ဒီးမၢအဝဲသ့ၣ်​ ပာ်စီဆှံအသး လၢတနံၤအံၤ ဒီးခဲမုၢ်ဆ့ၣ်တက့ၢ်. ဒီးအဝဲသ့ၣ်​ ကဘၣ်ဆှုၣ်​ အတၢ်ကူတၢ်သိးတဖၣ်လီၤ. ၁၁ လၢသၢသီတသီန့ၣ်​ ယဟိဝၤယွၤ ကဟဲလီၤလၢ ကစၢၢ်စံၤနါအလိၤ လၢပှၤဂီၢ်မုၢ် အမဲာ်ညါ အဃိ အဝဲသ့ၣ်​ ဘၣ်အိၣ်ကတဲာ်ကတီၤပာ်စၢၤအသး ဖဲသၢသီတသီလီၤ. ၁၂ နကဘၣ်​ ပာ်လီၤတၢ်အဆၢ လၢပှၤဂီၢ်မုၢ်တဖၣ်အဂီၢ် လၢကစၢၢ်အဃၢၤဝးဝး ဒီးနဘၣ်တဲ အဝဲသ့ၣ်လၢ ‘ပလီၢ်သုသး ဒ်သိး သုသုတလဲၤ လၢကစၢၢ်အအိၣ်​ မ့တမ့ၢ် ထိးဘူးအီၤတဂ့ၤ. ပှၤတဂၤဂ့ၤတဂၤဂ့ၤ လၢအထိးဘၣ်ဝဲ ကစၢၢ်န့ၣ်​ ကဘၣ်တၢ်မၤသံအီၤ သပှၢ်ကတၢၢ်လီၤ. ၁၃ ဆၣ်ဖိကီၢ်ဖိမ့ၢ်ဂ့ၤ, ပှၤကညီမ့ၢ်ဂ့ၤ, တအိၣ်မူဘၣ်လၢၤဘၣ်. ပှၤကဘၣ်​ ကွံာ်သံအီၤလၢလၢၢ် မ့တမ့ၢ် ခးသံအီၤ ဒီးပှၤတဘၣ်​ ထိးအီၤလၢအစု နီတဂၤဘၣ်.’+ ဘၣ်ဆၣ်​ မ့မ့ၢ် ဖဲကွဲၤ* သီၣ်ထီၣ်အခါ+ အဝဲသ့ၣ်​ ဟဲဘူးထီၣ်ဒီး ကစၢၢ်သ့လီၤ.”

၁၄ ဒီးစီၤမိၤၡ့ က့ၤလီၤလၢ ကစၢၢ်လိၤ ဒီးမၢပှၤဂီၢ်မုၢ်တဖၣ်​ ပာ်စီဆှံအသး ဒီးအဝဲသ့ၣ်​ ဆှုၣ်အတၢ်ကူတၢ်သိးလီၤ.+ ၁၅ ဒီးအဝဲတဲဘၣ်​ ပှၤဂီၢ်မုၢ်တဖၣ်လၢ “အိၣ်ကတဲာ်ကတီၤသုသး လၢသၢသီတသီ အဂီၢ်တက့ၢ်. တဘၣ်မံဃုာ်ဒီး သုမါတဂ့ၤ.”

၁၆ ဖဲသၢသီတသီ ဂီၤခီန့ၣ်​ လီသီၣ်ထီၣ်​ ဒီးလီဝၢ်ဒံး ဒီးတၢ်အၢၣ်လၢအတီၣ်တလိၣ်+ အိၣ်ဝဲလၢ ကစၢၢ်လိၤလီၤ. ဒီးဖဲကွဲၤသီၣ်ထီၣ်ဝဲ ဖးဒိၣ်အခါ ပှၤဂီၢ်မုၢ်လၢ အအိၣ်လၢ ဒဲကဝီၤအပူၤ ခဲလၢာ်န့ၣ်​ ကနိးကစုာ်ဝဲလီၤ.+ ၁၇ စီၤမိၤၡ့ လဲၤကိးပှၤဂီၢ်မုၢ်တဖၣ်လၢ ဒဲကဝီၤအချၢ ဒ်သိးအဝဲသ့ၣ်​ ကလဲၤထံၣ်လိာ်သးဒီး ယွၤလၢအမ့ၢ်အတီ အဂီၢ်လီၤ. ဒီးပှၤဂီၢ်မုၢ်တဖၣ်​ ဟံးန့ၢ်အလီၢ်လၢ ကစၢၢ်ခီၣ်ထံးလီၤ. ၁၈ ဒီးမ့ၢ်လၢ ယဟိဝၤယွၤ ဟဲလီၤလၢ မ့ၣ်အူကျါ လၢကစၢၢ်စံၤနါအလိၤအဃိ+ လၢကစၢၢ်စံၤနါ ဒီတဖျၢၣ်အလိၤန့ၣ်​ မ့ၣ်အူခုၣ်ထီၣ်ဝဲလီၤ. ဒီးအခုၣ်ထီၣ်​ ဒ်မ့ၣ်အူခုၣ်​ ဟဲထီၣ်လၢ ဖၣ်ကပူၤအသိး ဒီးကစၢၢ်ဒီဖျၢၣ်ညါ ဟူးဝးဒိၣ်မးလီၤ.+ ၁၉ ဒီးဖဲကွဲၤသီၣ်​ ဒိၣ်ထီၣ်​ ဒိၣ်ထီၣ်ဝဲအခါ စီၤမိၤၡ့ တဲထီၣ်တၢ် ဒီးယွၤလၢအမ့ၢ်အတီတဂၤ အကလုၢ်န့ၣ်​ စံးဆၢအီၤလီၤ.

၂၀ အဃိ ယဟိဝၤယွၤ ဟဲလီၤလၢ ကစၢၢ်စံၤနါ အဒီခိၣ်လီၤ. ဒီးယဟိဝၤယွၤ ကိးထီၣ်စီၤမိၤၡ့ လၢကစၢၢ်ဒီခိၣ်​ ဒီးစီၤမိၤၡ့ လဲၤထီၣ်ဝဲလီၤ.+ ၂၁ ဒီးယဟိဝၤယွၤ တဲစီၤမိၤၡ့လၢ “က့ၤလီၤဟ့ၣ်ပလီၢ် ပှၤဂီၢ်မုၢ်တဖၣ်လၢ အဝဲသ့ၣ်​ တဘၣ်ခီဂာ်ဆူၣ်​ တၢ်အဆၢ ဒ်သိးကကွၢ် ယဟိဝၤယွၤအဂီၢ်တဂ့ၤ. အဝဲသ့ၣ်အါဂၤ ကကျဲးစၢး မၤဘၣ်ဖုးဒ်န့ၣ်​ ဒီးကသံဝဲလီၤ. ၂၂ ဒီးပှၤလုၢ်တၢ်ဒိၣ်တဖၣ်လၢ အညီနုၢ် ဟဲဘူးဒီး ယဟိဝၤယွၤန့ၣ်​ မ်အဝဲသ့ၣ်​ ပာ်စီဆှံအသး ဒ်သိးယဟိဝၤယွၤ သုတစံၣ်ညီၣ်သံ အဝဲသ့ၣ်တဂ့ၤအဂီၢ် န့ၣ်တက့ၢ်.”+ ၂၃ ဒီးစီၤမိၤၡ့တဲဘၣ်​ ယဟိဝၤယွၤလၢ “နဟ့ၣ်ပလီၢ်ပာ်စၢၤပှၤလၢ ‘ပာ်လီၤတၢ်အဆၢလၢ ကစၢၢ်အဃၢၤဝးဝး ဒီးပာ်စီဆှံအီၤတက့ၢ်.’ အဃိ ပှၤဂီၢ်မုၢ်တဖၣ်​ ဟဲထီၣ်လၢ ကစၢၢ်စံၤနါအလိၤ တသ့ဘၣ်.”+ ၂၄ ဘၣ်ဆၣ်​ ယဟိဝၤယွၤ တဲအီၤလၢ “က့ၤလီၤ ဒီးဟဲက့ၤထီၣ်​ ဃုာ်ဒီး စီၤအၤဟရိၣ်တက့ၢ်. ဘၣ်ဆၣ်​ တဘၣ်ဟ့ၣ်အခွဲးလၢ ပှၤလုၢ်တၢ်ဒိၣ်တဖၣ်​ ဒီးပှၤဂီၢ်မုၢ်တဖၣ်​ ကခီဂာ်ဆူၣ်​ တၢ်အဆၢ ဒ်သိး ကဟဲထီၣ်လၢ ယဟိဝၤယွၤအအိၣ်​ အဂီၢ်တဂ့ၤ. အဝဲသ့ၣ်​ မ့ၢ်မၤဒ်န့ၣ်န့ၣ်​ ယွၤကစံၣ်ညီၣ်သံ အဝဲသ့ၣ်လီၤ.”+ ၂၅ အဃိ စီၤမိၤၡ့ က့ၤလီၤလၢ ပှၤဂီၢ်မုၢ်တဖၣ်အအိၣ်​ ဒီးတဲဘၣ်​ အဝဲသ့ၣ်လီၤ.

၂၀ ဒီးကစၢ်ယွၤတဲဝဲ တၢ်ကတိၤတဖၣ်အံၤခဲလၢာ်+ ဒ်လၢလာ်အံၤအသိးလီၤ.

၂ “ယမ့ၢ်သုကစၢ် ယဟိဝၤယွၤ လၢအဒုးဟးထီၣ်သုလၢ ကီၢ်အဲၤကူပတူး ဖဲသုကဲကုၢ်အလီၢ်လီၤ.+ ၃ နကဘၣ်ဘူၣ်ထီၣ်ဘါထီၣ်ထဲ ယၤတဂၤ ဒီးနတဘၣ်​ ဘူၣ်ထီၣ်ဘါထီၣ်​ ယွၤအဂၤတဖၣ်ဘၣ်.+

၄ “နတဘၣ်တ့ထီၣ်​ တၢ်အက့ၢ်အဂီၤ မ့တမ့ၢ် တၢ်ဂီၤတၢ်ဖှီၣ်လၢ အလီၤဂာ်ဒီး တၢ်အိၣ်လၢ မူခိၣ်ထးမ့ၢ်ဂ့ၤ, တၢ်အိၣ်လၢ ဟီၣ်ခိၣ်လာ်မ့ၢ်ဂ့ၤ, တၢ်အိၣ်လၢ ထံကျါမ့ၢ်ဂ့ၤ, လၢနဂီၢ် နီတမံၤတဂ့ၤ.+ ၅ နတဘၣ်ဘါ တၢ်သ့ၣ်တဖၣ်အံၤ မ့တမ့ၢ် မၤအတၢ်တဂ့ၤ.+ နကစၢ် ယဟိဝၤယွၤ ယဲဒၣ်အံၤ မ့ၢ်ကစၢ်လၢ အမၤလိာ်ဝဲလၢ ပှၤကဘၣ်​ တီဒီးအီၤလၢ သးဒီဖျၢၣ်လီၤ.+ ဘၣ်ဃးဒီး ပှၤလၢအသးဟ့ယၤန့ၣ်​ တၢ်စံၣ်ညီၣ်လၢ ပၢ်တဖၣ်​ အတၢ်ကမၣ်အဂီၢ်န့ၣ်​ ယကဒုးလီၤဘၣ်လၢ အဖိတဖၣ်အလိၤ ဒီးလၢ အလံၤအလိၤတဖၣ်​ အလိၤလီၤ. ၆ ဘၣ်ဆၣ်​ ပှၤလၢအအဲၣ်ယၤ ဒီးမၤထွဲ ယတၢ်မၤလိာ်တဖၣ်န့ၣ်​ ယကပာ်ဖျါထီၣ်​ တၢ်အဲၣ်လၢအတီ လၢအဝဲသ့ၣ်အဖီခိၣ်​ တုၤလီၤလၢအစိၤလၢ အကထိလီၤ.+

၇ “နတဘၣ်သူ နကစၢ် ယဟိဝၤယွၤ အမံၤလၢ တၢ်တပာ်ကဲဘၣ်​ အပူၤတဂ့ၤ.+ ပှၤလၢ အသူအမံၤလၢ တၢ်တပာ်ကဲဘၣ်​ အပူၤန့ၣ်​ ယဟိဝၤယွၤ တပျဲလၢ အဝဲသ့ၣ်​ ကပူၤဖျဲးဒီး တၢ်စံၣ်ညီၣ်ဘၣ်.+

၈ “သ့ၣ်နီၣ်ထီၣ်​ မုၢ်အိၣ်ဘှံးနံၤဒ်သိး နကပာ်စီဆှံအီၤ အဂီၢ်တက့ၢ်.+ ၉ နကဘၣ်မၤ နတၢ်မၤခဲလၢာ် လၢဃုသီ အတီၢ်ပူၤလီၤ.+ ၁၀ ဘၣ်ဆၣ်​ နွံသီတသီန့ၣ်​ မ့ၢ်ဝဲ မုၢ်အိၣ်ဘှံးနံၤလၢ နကစၢ် ယဟိဝၤယွၤ အဂီၢ်လီၤ. နတဘၣ်​ မၤတၢ်မၤ နီတမံၤတဂ့ၤ. နၤမ့ၢ်ဂ့ၤ, နဖိမုၣ်ဖိခွါမ့ၢ်ဂ့ၤ, နကုၢ်မုၣ်ကုၢ်ခွါမ့ၢ်ဂ့ၤ, နဆၣ်ဖိကီၢ်ဖိ အဒၢမ့ၢ်ဂ့ၤ ဒီးပှၤထံဂၤကီၢ်ဂၤဖိလၢ အအိၣ်လၢ နတၢ်အိၣ်တၢ်ဆိး အလီၢ်န့ၣ်​ တဘၣ်မၤတၢ်မၤ နီတမံၤဘၣ်.+ ၁၁ လၢဃုသီအတီၢ်ပူၤန့ၣ်​ ယဟိဝၤယွၤ တ့လီၤ မူခိၣ်ဒီးဟီၣ်ခိၣ်, ပီၣ်လဲၣ်​ ဒီးတၢ်ခဲလၢာ် လၢအအိၣ်လၢ တၢ်သ့ၣ်တဖၣ်အံၤအပူၤန့ၣ်လီၤ. ဒီးအဝဲ အိၣ်ဘှံးဝဲလၢ မုၢ်နွံနံၤတနံၤလီၤ.+ လၢတၢ်န့ၣ်အဃိ ယဟိဝၤယွၤ ဆိၣ်ဂ့ၤ မုၢ်အိၣ်ဘှံးနံၤ ဒီးပာ်စီဆှံဝဲလီၤ.

၁၂ “ယူးယီၣ်ပာ်ကဲ နမိၢ်ဒီးနပၢ်တက့ၢ်.+ နမ့ၢ်မၤဒ်န့ၣ်န့ၣ်​ ကီၢ်တဘ့ၣ်လၢ နကစၢ် ယဟိဝၤယွၤ ကဟ့ၣ်လီၤနၤန့ၣ်​ နကအိၣ်မူဘၣ်လၢအပူၤ ဖးယံာ်ညါလီၤ.+

၁၃ “နတဘၣ်​ မၤသံ ပှၤနီတဂၤတဂ့ၤ.+

၁၄ “နတဘၣ်​ အဲၣ်ဘၢမါအဲၣ်ဘၢဝၤ တဂ့ၤ.+

၁၅ “နတဘၣ်​ ဟုၣ်တၢ်တဂ့ၤ.+

၁၆ “နတဘၣ်​ အုၣ်နသး ကဘျံးကဘျၣ်​ ဘၣ်ဃးဒီး ပှၤအဂၤတဂ့ၤ.+

၁၇ “နတဘၣ်​ လီကီပှၤဂၤ အဟံၣ်တဂ့ၤ. ပှၤဂၤ အမါမ့ၢ်ဂ့ၤ,+ အကုၢ်မုၣ်မ့ၢ်ဂ့ၤ, အကုၢ်ပိာ်ခွါမ့ၢ်ဂ့ၤ, အကျီၢ်ဖါမ့ၢ်ဂ့ၤ, အကသ့ၣ်ယီၤမ့ၢ်ဂ့ၤ ဒီးတၢ်လၢအကဲ ပှၤဂၤအတၢ်န့ၣ်​ နတဘၣ်​ လီကီအီၤ နီတမံၤတဂ့ၤ.”+

၁၈ ဒီးပှၤဂီၢ်မုၢ်ခဲလၢာ် နၢ်ဟူဘၣ်​ လီသီၣ်​ ဒီးကွဲၤသီၣ်​ ဒီးထံၣ်ဘၣ်​ လီဝၢ်ဒံး ဒီးမ့ၣ်အူ ခုၣ်ထီၣ်ဝဲလၢ ကစၢၢ်အလိၤလီၤ. ဖဲပှၤဂီၢ်မုၢ် ထံၣ်ဝဲအခါ အဝဲသ့ၣ်​ ကနိးဝဲ ဒီးအိၣ်ဆၢထၢၣ်ဖဲန့ၣ်​ လၢအယံၤလီၤ.+ ၁၉ ဒီးအဝဲသ့ၣ်​ တဲစီၤမိၤၡ့လၢ “နဘၣ်တဲတၢ်ဒီးပှၤ ဒီးပကဒိကနၣ်လီၤ. ကစၢ်ယွၤ မ့ၢ်တဲတၢ်ဒီးပှၤန့ၣ်​ ပပျံၤလၢ ပကသံဘၣ်ဖုးလီၤ.”+ ၂၀ အဃိ စီၤမိၤၡ့ တဲပှၤဂီၢ်မုၢ်လၢ “ပျံၤတၢ်တဂ့ၤ. ယွၤလၢအမ့ၢ်အတီ ဟဲမၤကွၢ်သု+ ဒ်သိး သုကဆဲးပျံၤအီၤ ဒီးဒ်သိး သုသုတမၤ တၢ်ဒဲးဘး တဂ့ၤအဂီၢ်လီၤ.”+ ၂၁ အဃိ ပှၤဂီၢ်မုၢ် ဆဲးဆၢထၢၣ်ဝဲ လၢအယံၤ ဘၣ်ဆၣ်​ စီၤမိၤၡ့ လဲၤဘူးထီၣ်ဒီး တၢ်အၢၣ်ခံးသူ ဖဲယွၤလၢ အမ့ၢ်အတီတဂၤ အိၣ်ဝဲန့ၣ်လီၤ.+

၂၂ ဝံၤဒီး ယဟိဝၤယွၤ တဲစီၤမိၤၡ့လၢ “နကဘၣ်တဲ ပှၤအံၣ်စရ့လးဖိလၢ ‘ယတဲတၢ်ဒီးသု လၢမူခိၣ်န့ၣ်​ သုထံၣ်လၢ သုနီၢ်ကစၢ်လီၤ.+ ၂၃ သုတဘၣ်​ တ့ထီၣ်ယွၤတဖၣ်​ လၢစ့ညၣ်​ ဒ်သိး သုကဘါအီၤဒီးယၤ ဒ်သိးသိး အဂီၢ်တဂ့ၤ. ဒီးသုတဘၣ်​ တ့ထီၣ်ယွၤတဖၣ်​ လၢထူ လၢသုဂီၢ်တဂ့ၤ.+ ၂၄ သုကဘၣ်​ တ့ထီၣ်န့ၢ်ယၤ တၢ်လုၢ်လီၢ် လၢဟီၣ်ခိၣ်​ ဒီးသုကဟ့ၣ်လုၢ်ထီၣ်​ သုတၢ်လုၢ်ဒွဲၣ်အူတဖၣ်, တၢ်လုၢ်အိၣ်ဃူအိၣ်ဖိးတဖၣ်, သုသိ ဒီးသုကျီၢ်တဖၣ်လၢ တၢ်လုၢ်လီၢ်အံၤ အဖီခိၣ်လီၤ. ဖဲတၢ်လီၢ်လၢ ယဃုထၢအီၤလၢ တၢ်ကသ့ၣ်နီၣ်ထီၣ်က့ၤယမံၤ ကိးတီၤဒဲးန့ၣ်+ ယကလဲၤလၢသုအိၣ်​ ဒီးယကဆိၣ်ဂ့ၤသုလီၤ. ၂၅ သုမ့ၢ်တ့ထီၣ်​ တၢ်လုၢ်လီၢ်လၢလၢၢ် လၢယဂီၢ်န့ၣ်​ တဘၣ်သူ လၢၢ်တဖၣ်လၢ အဘၣ်တၢ်ဒီၣ်တဲာ်အီၤလၢ တၢ်ပီးတၢ်လီတဖၣ်တဂ့ၤ.+ သုမ့ၢ်ပျၤအီၤလၢထးပျၤန့ၣ်​ တၢ်လုၢ်လီၢ် တကဆှီလၢၤဘၣ်. ၂၆ ဒ်သိး သုတၢ်အိၣ်ဘ့ၣ်ဆ့ သုတအိၣ်ဖျါလၢ တၢ်လုၢ်လီၢ် အဖီခိၣ်တဂ့ၤအဂီၢ်န့ၣ်​ ယတၢ်လုၢ်လီၢ် တဘၣ်အိၣ်ဒီး ဃီသွါတဖၣ်လၢ သုကလဲၤထီၣ်အဂီၢ်ဘၣ်.’

၂၁ “တၢ်သ့ၣ်တဖၣ်အံၤ မ့ၢ်တၢ်သိၣ်တၢ်သီတဖၣ်လၢ နကဘၣ်​ ပာ်ဖျါထီၣ်န့ၢ် အဝဲသ့ၣ်လီၤ.+

၂ “နမ့ၢ်ပှ့ၤန့ၢ် ကုၢ်တဂၤ လၢအမ့ၢ် ပှၤဧ့ၤဘြံၤဖိန့ၣ်+ အကမၤတၢ် ဒ်ကုၢ်အသိးဃုနံၣ်​ ဘၣ်ဆၣ်​ ဖဲနွံနံၣ်တနံၣ်န့ၣ်​ အကဘၣ်​ တၢ်ပျၢ်လီၤကွံာ်အီၤ ခီလီလီလီၤ.+ ၃ ဖဲအဝဲဟဲအခါ အဝဲမ့ၢ်ဟဲ ထဲတဂၤန့ၣ်​ အကဟးထီၣ်ဝဲ ထဲအီၤတဂၤလီၤ. ဒီးအဝဲမ့ၢ်ဟဲဒီး အမါန့ၣ်​ အမါ ကဟးထီၣ်​ ဃုာ်ဒီးအီၤလီၤ. ၄ အကစၢ် မ့ၢ်ဟ့ၣ်အီၤ အမါတဂၤ ဒီးအမါ မ့ၢ်အိၣ်ဖျဲၣ်ထီၣ်န့ၢ်အီၤ အဖိမုၣ်မ့ၢ်ဂ့ၤ, အဖိခွါမ့ၢ်ဂ့ၤန့ၣ်​ အမါ ဒီးအဖိတဖၣ်န့ၣ်​ မ့ၢ်အကစၢ်အတၢ်အဃိ အဝဲ ကဘၣ်ဟးထီၣ်​ ထဲတဂၤလီၤ.+ ၅ ဘၣ်ဆၣ်​ ကုၢ်တဂၤန့ၣ်​ မ့ၢ်တဲဝဲလၢ ‘ယအဲၣ်ယကစၢ် ဒီးယဖိယမါ ဒီးယတအဲၣ်ဒိး ဟးထီၣ်ဘၣ်’ န့ၣ်+ ၆ အကစၢ် ကဘၣ်လဲၤကိးအီၤလၢ ယွၤလၢအမ့ၢ်အတီတဂၤ အမဲာ်ညါ ဝံၤဒီးအကစၢ် ကလဲၤကိးအီၤလၢ ပဲတြီအခီၣ်ထံး မ့တမ့ၢ် ပဲတြီအကပၤ ဒီးအကစၢ်ကတုၢ်ဖျိ အနၢ်လၢထးလူ ဒီးအကကဲထီၣ်​ အကစၢ်အကုၢ် တစိၤသးလီၤ.

၇ “ပိာ်ခွါတဂၤ မ့ၢ်ဆါကွံာ် အဖိမုၣ်​ ဒ်သိးအကကဲထီၣ်​ ကုၢ်မုၣ်န့ၣ်​ အဖိမုၣ်​ တၢ်တပျၢ်လီၤကွံာ်အီၤ ဒ်ကုၢ်ပိာ်ခွါ ဘၣ်တၢ်ပျၢ်လီၤကွံာ်အီၤ အသိးဘၣ်. ၈ အကစၢ် မ့ၢ်တဘၣ်သးအီၤဘၣ်​ ဒီးမ့ၢ်တပာ်ပနီၣ်အီၤ ဒ်အသံၣ်မါ* အသိးဘၣ်​ ဒီးအမ့ၢ်ဆၢတဲာ်ဝဲလၢ ကဆါလီၤကွံာ်အီၤ လၢပှၤအဂၤတဂၤ အအိၣ်န့ၣ်​ မ့ၢ်လၢ အမၤအီၤ တတီတလိၤဘၣ်အဃိ တၢ်တဟ့ၣ်အခွဲးလၢ အကဆါလီၤအီၤလၢ ပှၤထံဂၤကီၢ်ဂၤဖိ အအိၣ်ဘၣ်. ၉ ဒီးအဝဲ မ့ၢ်ဟ့ၣ်လီၤအီၤ လၢအဖိခွါန့ၣ်​ အကဘၣ်ဟ့ၣ်အီၤ တၢ်ခွဲးတၢ်ယာ်တဖၣ်​ ဒ်အဖိမုၣ်တဂၤ အသိးလီၤ. ၁၀ ဒီးအဝဲမ့ၢ်ဟံးန့ၢ်အါထီၣ်​ အမါတဂၤန့ၣ်​ အတဘၣ်မၤစှၤလီၤ အမါ အဆိကတၢၢ်တဂၤ အတၢ်အီၣ်တၢ်အီ, အတၢ်ကူတၢ်သိး ဒီးတၢ်လၢအမါ ကြၢးဒိးန့ၢ်ဘၣ်ဝဲဘၣ်.*+ ၁၁ အဝဲမ့ၢ်တဟ့ၣ်အီၤ တၢ်သၢမံၤအံၤဘၣ်န့ၣ်​ ပိာ်မုၣ်အံၤ ဟးထီၣ်​ ခီလီလီသ့ ဒီးအတလိၣ်​ ဟ့ၣ်တၢ်အပှ့ၤ နီတစဲးဘၣ်.

၁၂ “ပှၤတဂၤဂၤ မ့ၢ်တီၢ် ပိာ်ခွါတဂၤ ဒီးပိာ်ခွါတဂၤအံၤ မ့ၢ်သံန့ၣ်​ အဝဲ ကဘၣ်တၢ်မၤသံအီၤလီၤ.+ ၁၃ ဘၣ်ဆၣ်​ အဝဲမ့ၢ်မၤသံဘၣ်အီၤ လၢတၢ်တပာ်သူၣ်ပာ်သးအပူၤ ဒီးယွၤလၢအမ့ၢ်အတီ မ့ၢ်ပျဲလၢ အကကဲထီၣ်​ ဒ်န့ၣ်န့ၣ်​ ယကပာ်ပနီၣ်​ တၢ်လီၢ်လၢ အဝဲ ကလဲၤဃ့ၢ်ပူၤဖျဲးအသး အဂီၢ်လီၤ.+ ၁၄ ဘၣ်ဆၣ်​ ပှၤပိာ်ခွါတဂၤ မ့ၢ်သးပှံၢ်ထီၣ်​ ပှၤလၢအဃၢၤ ဖးဒိၣ်​ ဒီးမ့ၢ်ကူၣ်ထီၣ်ဆိပာ်စၢၤဝဲ ဒီးမၤသံအီၤန့ၣ်+ အဝဲမ့ၢ်လဲၤလၢ ယတၢ်လုၢ်လီၢ်ဒၣ်လဲာ် နကဘၣ်​ ထုးထီၣ်အီၤ ဒီးမၤသံအီၤလီၤ.+ ၁၅ ပှၤတဂၤ မ့ၢ်တီၢ် အမိၢ် မ့တမ့ၢ် အပၢ်န့ၣ်​ အဝဲကဘၣ်​ တၢ်မၤသံအီၤလီၤ.+

၁၆ “ပှၤမ့ၢ်စံၣ်စိာ် ပှၤတဂၤဂၤ+ ဒီးဆါအီၣ်အီၤ မ့တမ့ၢ် ပှၤမ့ၢ်ထံၣ်ချုးအီၤ ဖဲအဖီၣ်ဃာ်ဒံး ပှၤတဂၤန့ၣ်+ အခါန့ၣ်​ အဝဲကဘၣ်​ တၢ်မၤသံကွံာ်အီၤလီၤ.+

၁၇ “ပှၤတဂၤဂၤ မ့ၢ်ဆိၣ်အၢ အမိၢ် မ့တမ့ၢ် အပၢ်န့ၣ်​ အဝဲကဘၣ်​ တၢ်မၤသံအီၤလီၤ.+

၁၈ “ပှၤမ့ၢ်အ့ၣ်လိာ်အသး ဒီးတဂၤမ့ၢ်တီၢ် အဝဲတဂၤလၢ လၢၢ်မ့ၢ်ဂ့ၤ, ထိအီၤလၢ အစုခိၣ်သၣ်မ့ၢ်ဂ့ၤ ဒီးအမ့ၢ်တသံဘၣ်​ သနာ်က့ အမ့ၢ်ဘၣ်အိၣ်လၢ လီၢ်မံခိၣ်န့ၣ်​ ပှၤကဘၣ်မၤဝဲ ဒ်အံၤလီၤ. ၁၉ ပှၤလၢ အဘၣ်ဒိတဂၤအံၤ ဂဲၤဆၢထၢၣ်​ ဟးလၢတၢ်ချၢဒီး နီၣ်ထိးဘိ မ့ၢ်ကဲန့ၣ်​ ပှၤလၢအတီၢ်အီၤတဂၤ ကပူၤဖျဲး ဒီးတၢ်စံၣ်ညီၣ်လီၤ. ဘၣ်ဆၣ်​ အဝဲ မ့ၢ်ဘၣ်ပတုာ်ကွံာ် အတၢ်မၤန့ၣ်​ ပှၤလၢအတီၢ်အီၤတဂၤ ဘၣ်လိးက့ၤစ့ တုၤလၢ အဘျါက့ၤ မူာ်မူာ်နီၢ်နီၢ် တစုလီၤ.

၂၀ “ပှၤတဂၤ မ့ၢ်တီၢ် အကုၢ်မုၣ်​ မ့တမ့ၢ် အကုၢ်ပိာ်ခွါ လၢနီၣ်တီၢ် ဒီးအဝဲသ့ၣ်​ မ့ၢ်သံလၢ အစုပူၤ တဂၤဂၤန့ၣ်​ အကဘၣ်​ တၢ်စံၣ်ညီၣ်လီၤ.+ ၂၁ ဘၣ်ဆၣ်​ ကုၢ်န့ၣ်​ မ့ၢ်ဆဲးအိၣ်မူဒံး တသီခံသီန့ၣ်​ အကစၢ်တဘၣ်​ တၢ်စံၣ်ညီၣ်အီၤဘၣ်, မ့ၢ်လၢ အကစၢ်ပှ့ၤပာ်စၢၤအီၤ လၢစ့အဃိလီၤ.

၂၂ “ပိာ်ခွါ မ့ၢ်ထိလိာ်အသး တဂၤဒီးတဂၤ ဒီးအမ့ၢ်မၤဘၣ်ဒိ ပိာ်မုၣ်လၢအဒၢတဂၤ ဒီးပိာ်မုၣ်တဂၤအံၤ မ့ၢ်အိၣ်ဖျဲၣ်ထီၣ်အဖိ တချုးလၢ အလါဘၣ်ဒံးဘၣ်+ ဒီးမိၢ်မ့ၢ်ဂ့ၤ ဖိမ့ၢ်ဂ့ၤ မ့ၢ်တဘၣ်ဒိ ဒိၣ်ဒိၣ်မုၢ်မုၢ်ဘၣ်န့ၣ်​ ပှၤလၢ အမၤဘၣ်ဒိတၢ်တဂၤ ကဘၣ်လိးဝဲ တၢ်လၢ ပိာ်မုၣ်အဝၤဃ့အီၤ, ဒ်စံၣ်ညီၣ်ကွီၢ်တဖၣ်​ ဆၢတဲာ်ဝဲအသိးလီၤ.+ ၂၃ ဘၣ်ဆၣ်​ အဝဲသ့ၣ်​ မ့ၢ်သံတဂၤဂၤန့ၣ်​ နကဘၣ်​ ဟ့ၣ်လီၤကွံာ် သးသမူလၢ သးသမူအဂီၢ်+ ၂၄ မဲာ်ချံလၢ မဲာ်ချံအဂီၢ်, မဲလၢ မဲအဂီၢ်, စုလၢ စုအဂီၢ်, ခီၣ်လၢ ခီၣ်အဂီၢ်,+ ၂၅ တၢ်ကိၢ်ဃီၤလၢ တၢ်ကိၢ်ဃီၤအဂီၢ်, တၢ်ပူၤလီၢ်လၢ တၢ်ပူၤလီၢ်အဂီၢ်, တၢ်တီၢ်တၢ်လၢ တၢ်တီၢ်တၢ်အဂီၢ်လီၤ.

၂၆ “ပှၤတဂၤ မ့ၢ်တီၢ်ဘၣ်​ အကုၢ်မုၣ်​ မ့တမ့ၢ် အကုၢ်ပိာ်ခွါ အမဲာ်ချံ ဒီးအမဲာ်ချံ မ့ၢ်ဘျီၣ်န့ၣ်​ အဝဲကဘၣ်​ ပျၢ်လီၤကွံာ် အကုၢ်တဂၤအံၤ လၢတၢ်လိးက့ၤ အမဲာ်ချံအပှ့ၤ အဂီၢ်လီၤ.+ ၂၇ ဒီးအဝဲ မ့ၢ်မၤကၢ်ဘၣ်​ အကုၢ်မုၣ်​ မ့တမ့ၢ် အကုၢ်ပိာ်ခွါ အမဲန့ၣ်​ အဝဲကဘၣ်​ ပျၢ်လီၤကွံာ် အကုၢ်တဂၤအံၤ လၢတၢ်လိးက့ၤ အမဲအပှ့ၤ အဂီၢ်လီၤ.

၂၈ “ကျီၢ်ဖါ မ့ၢ်ဘျၢၣ်ပိာ်မုၣ်​ မ့တမ့ၢ် ပိာ်ခွါတဂၤဂၤ ဒီးအမ့ၢ်သံန့ၣ်​ ပှၤကဘၣ်ကွံာ်သံ ကျီၢ်လၢလၢၢ်+ ဒီးပှၤတဘၣ်အီၣ်​ အညၣ်ဘၣ်. ဘၣ်ဆၣ်​ ကျီၢ်ကစၢ်န့ၣ်​ ကပူၤဖျဲးဒီး တၢ်စံၣ်ညီၣ်လီၤ. ၂၉ ဘၣ်ဆၣ်​ ကျီၢ်ဖါတဒုန့ၣ်​ မ့ၢ်ဟးဘျၢၣ်ညီနုၢ်တၢ် ဒီးပှၤမ့ၢ်ဟ့ၣ်ပလီၢ်ဆိပာ်စၢၤ ကျီၢ်ကစၢ် ဘၣ်ဆၣ်​ အဝဲ မ့ၢ်တကွၢ်ထွဲအကျီၢ် ဂ့ၤဂ့ၤဘၣ်​ ဒီးကျီၢ်အံၤ မ့ၢ်မၤသံဘၣ်​ ပှၤပိာ်မုၣ်​ မ့တမ့ၢ် ပှၤပိာ်ခွါ တဂၤဂၤန့ၣ်​ ပှၤကဘၣ်​ ကွံာ်သံကျီၢ် လၢလၢၢ် ဒီးကျီၢ်ကစၢ်န့ၣ်​ ကဘၣ်တၢ်မၤသံအီၤ စ့ၢ်ကီးလီၤ. ၃၀ ဘၣ်ဆၣ်​ ဒ်သိး ကျီၢ်ကစၢ် အသးသမူ ကပူၤဖျဲးအဂီၢ် ပှၤမ့ၢ်ဃ့အီၤ တၢ်အပှ့ၤန့ၣ်​ အဝဲ ကဘၣ်ဟ့ၣ်လီၤ တၢ်အပှ့ၤ ဒ်တၢ်ပာ်ပနီၣ်အီၤအသိး ခဲလၢာ်ခဲဆ့လီၤ. ၃၁ ကျီၢ်ဖါတဒု မ့ၢ်ဘျၢၣ်သံ ဖိသၣ်ပိာ်ခွါတဂၤမ့ၢ်ဂ့ၤ, ဖိသၣ်ပိာ်မုၣ်တဂၤမ့ၢ်ဂ့ၤန့ၣ်​ ပှၤကဘၣ်​ မၤကျီၢ်ကစၢ် ဒ်တၢ်သိၣ်တၢ်သီအံၤ အသိးလီၤ. ၃၂ ကျီၢ်ဖါမ့ၢ်ဘျၢၣ်သံဘၣ်​ ကုၢ်ပိာ်မုၣ်​ တဂၤမ့ၢ်ဂ့ၤ, ကုၢ်ပိာ်ခွါ တဂၤမ့ၢ်ဂ့ၤ ကျီၢ်ကစၢ် ကဘၣ်ဟ့ၣ်လီၤ ကုၢ်အံၤ အကစၢ်လၢ စ့ၡက့လး* ၃၀ ဒီးကျီၢ်အံၤ ကဘၣ်​ တၢ်ကွံာ်သံအီၤ လၢလၢၢ်လီၤ.

၃၃ “ပှၤတဂၤ မ့ၢ်အိးထီၣ်​ တၢ်ပူၤအခိၣ်​ မ့တမ့ၢ် မ့ၢ်ခူၣ်တၢ်ပူၤဒီး မ့ၢ်တကျၢၢ်ဘၢဝဲအခိၣ်ဘၣ်​ ဒီးကျီၢ်ဖါတဒု မ့တမ့ၢ် ကသ့ၣ်ယီၤတဒု မ့ၢ်လီၤတဲာ်လၢအပူၤန့ၣ်​ ၃၄ တၢ်ပူၤကစၢ် ကဘၣ်လိးက့ၤဝဲ အပှ့ၤလီၤ.+ အဝဲ ကဘၣ်ဟ့ၣ်လီၤဝဲ ဆၣ်ဖိကီၢ်ဖိ အကစၢ် လၢတၢ်အပှ့ၤ ဒီးဆၣ်ဖိကီၢ်ဖိ လၢအသံန့ၣ်​ ကကဲထီၣ်​ အတၢ်လီၤ. ၃၅ ပှၤတဂၤ အကျီၢ်ဖါ မ့ၢ်ဘျၢၣ်ဘၣ်​ ပှၤအဂၤတဂၤ အကျီၢ်ဖါ ဒီးအမ့ၢ်သံန့ၣ်​ အဝဲသ့ၣ်​ ကဘၣ်ဆါကွံာ် ကျီၢ်လၢ အမူဒံးတဒု ဒီးကဘၣ်​ နီၤလီၤလိာ်အသးအပှ့ၤ ဒီးအဝဲသ့ၣ်​ ကဘၣ်နီၤလီၤလိာ်အသး ဆၣ်ဖိကီၢ်ဖိ လၢအသံတဒုန့ၣ်​ စ့ၢ်ကီးလီၤ. ၃၆ ဘၣ်ဆၣ်​ ပှၤမ့ၢ်သ့ၣ်ညါလၢ ကျီၢ်ဖါတဒုန့ၣ်​ ဟးဘျၢၣ်ညီနုၢ်တၢ် ဒီးအကစၢ်မ့ၢ် တကွၢ်ထွဲအီၤဂ့ၤဂ့ၤဘၣ်န့ၣ်​ ကျီၢ်ကစၢ် တဂၤအံၤ ကဘၣ်လိးက့ၤ ကျီၢ်ဖါလၢ ကျီၢ်ဖါအဂီၢ် ဒီးကျီၢ်ဖါလၢ အသံတဒုန့ၣ်​ ကကဲထီၣ်​ အတၢ်လီၤ.

၂၂ “ပှၤတဂၤ မ့ၢ်ဟုၣ်ပှၤကျီၢ်ဖါတဒု မ့တမ့ၢ် ပှၤသိတဒု ဒီးမ့ၢ်မၤသံအီၤမ့ၢ်ဂ့ၤ, မ့ၢ်ဆါဝဲမ့ၢ်ဂ့ၤန့ၣ်​ လၢကျီၢ်ဖါတဒု အဂီၢ်န့ၣ်​ အဝဲကဘၣ်လိးက့ၤဝဲ ကျီၢ်ဖါယဲၢ်ဒု ဒီးလၢသိတဒုအဂီၢ်န့ၣ်​ ကဘၣ်လိးက့ၤဝဲ သိလွံၢ်ဒုလီၤ.+

၂ (“တၢ်ဟုၣ်တၢ်ဘျၣ်+ မ့ၢ်ဘၣ်တၢ်ထံၣ်ချုးအီၤ ဖဲအနုာ်လီၤလၢ ဟံၣ်ပူၤအခါ ဒီးပှၤမ့ၢ်တီၢ်အီၤ ဒီးအမ့ၢ်သံဝဲ သနာ်က့ တၢ်သွံၣ်တလီၤတီလၢ ပှၤခိၣ်လိၤဘၣ်. ၃ ဘၣ်ဆၣ်​ တၢ်မ့ၢ်ကဲထီၣ်အသး ဒ်အံၤ ဖဲမုၢ်ဟဲထီၣ်ဝံၤ အလီၢ်ခံန့ၣ်​ တၢ်သွံၣ်ကလီၤတီ လၢပှၤခိၣ်လိၤလီၤ.)

“တၢ်ဘျၣ်တဂၤ ကဘၣ်လိးက့ၤ တၢ်အပှ့ၤလီၤ. ဒီးအတၢ် မ့ၢ်တအိၣ်​ နီတမံၤဘၣ်န့ၣ်​ တၢ်ကဘၣ်ဆါလီၤကွံာ် အနီၢ်ကစၢ် ဒ်သိးကလိးက့ၤ တၢ်လၢ အဟုၣ်ဝဲတဖၣ်အပှ့ၤ အဂီၢ်လီၤ. ၄ တၢ်လၢအဟုၣ်န့ၢ်ဝဲန့ၣ်​ မ့မ့ၢ် ကျီၢ်ဖါမ့ၢ်ဂ့ၤ, ကသ့ၣ်ယီၤမ့ၢ်ဂ့ၤ, သိမ့ၢ်ဂ့ၤ ပှၤမ့ၢ်ထံၣ်န့ၢ်က့ၤဝဲ ဖဲအအိၣ်ဒီးအီၤဒီးအမူဒံးဝဲန့ၣ်​ အဝဲကဘၣ်လိးက့ၤဝဲ ခံစးလီၤ.

၅ “ပှၤမ့ၢ်ဒုးအီၣ်​ အဆၣ်ဖိကီၢ်ဖိအဆၣ်​ လၢပျီပူၤ မ့တမ့ၢ် လၢစပံးကျီးပူၤ ဒီးအမ့ၢ်ပျဲဝဲလၢ အဆၣ်ဖိကီၢ်ဖိတဖၣ်အံၤ ကလဲၤအီၣ်တၢ်လၢ ပှၤအဂၤတဂၤ အပျီပူၤန့ၣ်​ အဝဲ ကဘၣ်လိးက့ၤဝဲ တၢ်လၢ အဂ့ၤကတၢၢ် လၢအနီၢ်ကစၢ် အပျီပူၤ မ့တမ့ၢ် တၢ်လၢ အဂ့ၤကတၢၢ်လၢ အနီၢ်ကစၢ် အစပံးကျီးပူၤလီၤ.

၆ “ဖဲပှၤတဂၤ မၤကဲၤထီၣ်​ မ့ၣ်အူအခါ မ့ၣ်အူမ့ၢ်အီၣ်​ သပှီာ်တၤဆှုၣ်တဖၣ်​ ဒီးမ့ၣ်အူ မ့ၢ်အီၣ်တၢ်တုၤလၢ ပှၤဂၤအပျီ ဒီးမ့ၢ်အီၣ်ကွံာ် ပှၤဂၤ အဘုကဒိၣ်မ့ၢ်ဂ့ၤ, အဘုလၢ ပှၤတကူးဒံးဘၣ်မ့ၢ်ဂ့ၤ, ပှၤပျီဒီတဘ့ၣ်မ့ၢ်ဂ့ၤ ပှၤတဂၤလၢအမၤကဲၤထီၣ်​ မ့ၣ်အူန့ၣ်​ ကဘၣ်လိးက့ၤ တၢ်လၢမ့ၣ်အူ အီၣ်ကွံာ်ဝဲတဖၣ်လီၤ.

၇ “ပှၤတဂၤ မ့ၢ်မၢ ပှၤလၢအဃၢၤတဂၤ ပာ်ဃာ်န့ၢ်အီၤစ့ မ့တမ့ၢ် တၢ်ဖိတၢ်လံၤ ဒီးပှၤမ့ၢ်ဟဲဟုၣ်န့ၢ် တၢ်သ့ၣ်တဖၣ်အံၤလၢ ပှၤလၢအဃၢၤတဂၤအံၤ အဟံၣ်ပူၤ ဒီးပှၤမ့ၢ်ထံၣ်န့ၢ် ပှၤလၢအဟုၣ်တၢ်န့ၣ်​ ပှၤလၢအဟုၣ်တၢ် ကဘၣ်လိးက့ၤဝဲ ခံစးလီၤ.+ ၈ ပှၤမ့ၢ်တထံၣ်န့ၢ် တၢ်ဘျၣ်ဘၣ်န့ၣ်​ ဟံၣ်ကစၢ် ကဘၣ်တၢ်လဲၤကိးအီၤလၢ ယွၤလၢအမ့ၢ်အတီတဂၤ အမဲာ်ညါ+ ဒ်သိး ကစၢ်ယွၤ ကပာ်ဖျါထီၣ်ဝဲလၢ မ့ၢ်အဟုၣ်​ အသကိး အတၢ်ဖိတၢ်လံၤဧါ, တဟုၣ်ဘၣ်ဧါ အဂီၢ်လီၤ. ၉ တၢ်ဂ့ၢ်ကီတဖၣ်​ မ့ၢ်ဟဲအိၣ်ထီၣ်လၢ အဘၣ်ဃးဒီး တၢ်ဟံးန့ၢ် ပှၤဂၤ အကျီၢ်ဖါမ့ၢ်ဂ့ၤ, ကသ့ၣ်ယီၤမ့ၢ်ဂ့ၤ, သိမ့ၢ်ဂ့ၤ, တၢ်ကူတၢ်သိးမ့ၢ်ဂ့ၤ မ့တမ့ၢ် တၢ်လၢအလီၤမၢ် တခါဂ့ၤတခါဂ့ၤ ခီဖျိလၢ ပှၤတဂၤ တဲဝဲလၢ ‘တၢ်တခါအံၤ အကဲယတၢ်’ အဃိန့ၣ်​ ပှၤခံဂၤအံၤ ကဘၣ်တီၣ်ဖျါထီၣ်​ အတၢ်ဂ့ၢ်လၢ ယွၤလၢအမ့ၢ်အတီတဂၤ အမဲာ်ညါလီၤ.+ ပှၤလၢ ကစၢ်ယွၤ ပာ်ဖျါထီၣ်ဝဲလၢ အတၢ်ကမၣ်​ အိၣ်တဂၤန့ၣ်​ ကဘၣ်လိးက့ၤ အဝဲတဂၤ ခံစးလီၤ.+

၁၀ “ပှၤတဂၤ မ့ၢ်မၢ အသကိး ကွၢ်ထွဲန့ၢ်အီၤ ကသ့ၣ်ယီၤမ့ၢ်ဂ့ၤ, ကျီၢ်ဖါမ့ၢ်ဂ့ၤ, သိမ့ၢ်ဂ့ၤ, ဆၣ်ဖိကီၢ်ဖိအဒၢ တကလုာ်ဂ့ၤ တကလုာ်ဂ့ၤ မ့ၢ်ဂ့ၤ ဒီးဖဲပှၤတထံၣ်​ နီတဂၤဘၣ်​ အဆၢကတီၢ် ဆၣ်ဖိကီၢ်ဖိတဒုအံၤ မ့ၢ်သံ, မ့ၢ်ဘၣ်ဒိဘၣ်ထံးဖးဒိၣ်​ မ့တမ့ၢ် မ့ၢ်ဘၣ်တၢ်ဂုာ်န့ၢ်အီၤန့ၣ်​ ၁၁ အသကိးတဂၤအံၤ ကဘၣ်​ အၢၣ်လီၤဝဲလၢ ယဟိဝၤယွၤ အမဲာ်ညါ လၢအတထိးဘၣ်​ အဝဲတဂၤ အဆၣ်ဖိကီၢ်ဖိဘၣ်. ဒီးဆၣ်ဖိကီၢ်ဖိ အကစၢ်တဂၤအံၤ ကဘၣ်တူၢ်လိာ်ဝဲ ဒီးအသကိးတဂၤ တဘၣ်လိးက့ၤ တၢ်အပှ့ၤဘၣ်.+ ၁၂ ဘၣ်ဆၣ်​ ပှၤတဂၤမ့ၢ်ဟုၣ်န့ၢ် ဆၣ်ဖိကီၢ်ဖိအံၤလၢ အအိၣ်န့ၣ်​ အဝဲကဘၣ်လိးက့ၤ ဆၣ်ဖိကီၢ်ဖိအကစၢ်လီၤ. ၁၃ ဘၣ်ဆၣ်​ ဆၣ်ဖိကီၢ်ဖိအမံၤတဒု မ့ၢ်အ့ၣ်ဖှီအီၤန့ၣ်​ အဝဲကဘၣ်ဟဲစိာ်ဝဲလၢ တၢ်အုၣ်အသးအဂီၢ် ဒ်သိးအသု တဘၣ်လိးက့ၤဝဲ တၢ်လၢ ဆၣ်ဖိကီၢ်ဖိအမံၤတဒု အ့ၣ်ဖှီဝဲ တဂ့ၤအဂီၢ်လီၤ.

၁၄ “ဘၣ်ဆၣ်​ ပှၤတဂၤဂၤလၢ အဃ့လိၢ် ပှၤလၢအဃၢၤတဂၤ အဆၣ်ဖိကီၢ်ဖိ ဒီးဆၣ်ဖိကီၢ်ဖိ မ့ၢ်ဘၣ်ဒိ မ့တမ့ၢ် မ့ၢ်သံဖဲ အကစၢ် တအိၣ်ဘၣ်​ အဆၢကတီၢ်န့ၣ်​ ပှၤလၢအဃ့လိၢ်တၢ် ကဘၣ်လိးက့ၤဝဲလီၤ. ၁၅ ဒီးမ့ၢ်ကဲထီၣ်အသးဖဲ အကစၢ် အိၣ်ဝဲအဆၢကတီၢ်န့ၣ်​ အဝဲတလိၣ်​ လိးက့ၤဝဲဘၣ်. ဆၣ်ဖိကီၢ်ဖိတဒုအံၤ မ့ၢ်ဘၣ်​ တၢ်ငါလီၤအီၤန့ၣ်​ စ့လၢတၢ်ငါအီၤအဂီၢ်န့ၣ်​ မ့ၢ်ဝဲ တၢ်လိးက့ၤ တၢ်အပှ့ၤလီၤ.

၁၆ “ပိာ်ခွါတဂၤ မ့ၢ်ကွဲန့ၢ်လွဲန့ၢ် မုၣ်ကနီၤတဂၤလၢ အတဘၣ်​ တၢ်အဲၣ်တီအီၤဒံးဘၣ်​ ဒီးမ့ၢ်မံဃုာ်ဒီးအီၤန့ၣ်​ အဝဲကဘၣ်ဟ့ၣ်လီၤ တလးမူးပိာ်မုၣ်အပှ့ၤ ဒ်သိး ပိာ်မုၣ်တဂၤအံၤ ကကဲထီၣ်​ အမါအဂီၢ်လီၤ.+ ၁၇ ဘၣ်ဆၣ်​ ပိာ်မုၣ်အပၢ် မ့ၢ်တအဲၣ်ဒိး ဒုးဖျီအဖိမုၣ်ဒီးအီၤ နီတစဲးဘၣ်န့ၣ်​ ပိာ်ခွါတဂၤန့ၣ်​ ကဘၣ်ဟ့ၣ်စ့ လၢတလးမူးပိာ်မုၣ်အပှ့ၤ အဂီၢ်ဒံးလီၤ.

၁၈ “နတဘၣ်​ ပာ်မူ ပိာ်မုၣ်လၢ အအူတၢ်လိၣ်တၢ်တဂ့ၤ.+

၁၉ “ပှၤတဂၤဂၤလၢ အမံဃုာ်ဒီး ဆၣ်ဖိကီၢ်ဖိန့ၣ်​ ကဘၣ်တၢ်မၤသံအီၤ သပှၢ်ကတၢၢ်လီၤ.+

၂၀ “ပှၤတဂၤဂ့ၤတဂၤဂ့ၤ လၢအလုၢ်ထီၣ်တၢ်လၢ ယွၤအဂၤတဖၣ်​ လၢအတမ့ၢ် ယဟိဝၤယွၤဘၣ်​ အအိၣ်န့ၣ်​ ကဘၣ်တၢ်မၤသံအီၤလီၤ.+

၂၁ “နတဘၣ်​ မၤအၢမၤနး မ့တမ့ၢ် ဆီၣ်တံၢ်မၤနၢၤ ပှၤထံဂၤကီၢ်ဂၤဖိတဖၣ်​ တဂ့ၤ,+ မ့ၢ်လၢ လၢညါန့ၣ်​ သုကဲဘၣ်​ ပှၤထံဂၤကီၢ်ဂၤဖိတဖၣ်​ လၢကီၢ်အဲၤကူပတူး အပူၤအဃိလီၤ.+

၂၂ “သုတဘၣ်​ မၤကီမၤခဲ မုၣ်ကမဲ ဒီးဖိၣ်ဃဲ တဂ့ၤ.+ ၂၃ သုမ့ၢ် မၤကီမၤခဲအီၤ ထဲတစဲး ဒီးအမ့ၢ် ကိးပသူထီၣ်​ လၢယအိၣ်န့ၣ်​ ယကဒိကနၣ်အီၤ သပှၢ်ကတၢၢ်လီၤ.+ ၂၄ ဒီးယတၢ်သးဒိၣ်​ ကကဲၤထီၣ်​ ဒီးယကမၤသံသုလၢနး ဒီးသုမါကကဲထီၣ်​ ပှၤမုၣ်ကမဲ ဒီးသုဖိကကဲထီၣ်​ ဖိၣ်ဃဲလီၤ.

၂၅ “နမ့ၢ်ဟ့ၣ်လိၢ်စ့ လၢယပှၤဂီၢ်မုၢ် လၢအဖှီၣ်​ လၢအအိၣ်ဒီးနၤန့ၣ်​ နတဘၣ်​ မ့ၢ်ပှၤလၢ အအီၣ်စ့အ့ၣ်တဂ့ၤ. နတဘၣ်ဃ့ စ့အအ့ၣ်​ လၢအအိၣ်တဂ့ၤ.+

၂၆ “နမ့ၢ်ဟံးန့ၢ်ဆ့ကၤလၢ ပှၤတဂၤဂၤအအိၣ်​ ဒ်တၢ်အုၣ်အသးတမံၤလၢ အဝဲ ကဘၣ်လိးက့ၤနၤ အဒ့ၣ်ကမၢ်အသိးန့ၣ်+ တချုးလၢ မုၢ်လီၤနုာ်ဒံးဘၣ်အခါ နကဘၣ်ဟ့ၣ်က့ၤအီၤ အဆ့ကၤလီၤ. ၂၇ ဒ်သိး အကမၤကလၢၤအသးအဂီၢ် အဝဲအိၣ်ထဲ တၢ်ကူတၢ်သိးတခါအံၤ အဃိ အတၢ်ကူတၢ်သိးအံၤ မ့ၢ်တအိၣ်ဘၣ်န့ၣ်​ ဖဲအဝဲမံအခါ အကသိးဝဲ မနုၤလဲၣ်.+ ဒီးဖဲအကိးပသူထီၣ်​ လၢယအိၣ်အခါ ယကဒိကနၣ်အီၤ သပှၢ်ကတၢၢ် မ့ၢ်လၢ ယမ့ၢ်ပှၤလၢ အသးကညီၤတၢ် အဃိလီၤ.+

၂၈ “နတဘၣ်ဆိၣ်အၢ ကစၢ်ယွၤ+ ဒီးပှၤခိၣ်ပှၤနၢ်လၢ နပှၤဂီၢ်မုၢ်တဖၣ်​ အကျါတဂ့ၤ.+

၂၉ “သုတဘၣ်​ မၤယံာ်မၤနီၢ်သုသးလၢ သုကဟ့ၣ်လုၢ်ထီၣ်​ သုတၢ်လၢ အမဲထီၣ်သၣ်ထီၣ်​ အါအါဂီၢ်ဂီၢ်အကျါတနီၤ ဒီးလၢသုစပံးထံ ဒီးသုသိအါအါဂီၢ်ဂီၢ် အကျါတနီၤဘၣ်.+ ဒီးသုဖိဝဲၢ်ကိ ပိာ်ခွါတဖၣ်န့ၣ်​ သုကဘၣ်ဟ့ၣ်ယၤလီၤ.+ ၃၀ သုကျီၢ်ဖါဒီး သုသိန့ၣ်​ သုကဘၣ်​ မၤအီၤဒ်အံၤလီၤ.+ ဖဲအအိၣ်ဖျဲၣ်ထီၣ်​ ဝံၤအခါ အကဘၣ်အိၣ်ဒီးအမိၢ် နွံသီ ဒီးလၢဃိးသီတသီန့ၣ်​ သုကဘၣ်ဟ့ၣ်လီၤအီၤလၢ ယၤလီၤ.+

၃၁ “သုကဘၣ်​ ပာ်ဖျါထီၣ်လၢ သုမ့ၢ်ပှၤဂီၢ်မုၢ် လၢအစီဆှံ လၢယဂီၢ်လီၤ.+ သုတဘၣ်အီၣ်​ တၢ်အညၣ်​ တမံၤဂ့ၤတမံၤဂ့ၤလၢ ဆၣ်ဖိကီၢ်ဖိ အမံၤ အ့ၣ်ဖှီအီၤ လၢပျီပူၤတဂ့ၤ.+ သုကဘၣ်​ ကွံာ်လီၤန့ၢ် ထွံၣ်တဖၣ်လီၤ.

၂၃ “နတဘၣ်ရၤလီၤ တၢ်ကစီၣ်လၢ အတမ့ၢ်တတီဘၣ်​ တဂ့ၤ.+ တဘၣ်အိၣ်ဃူ ပှၤအၢပှၤသီတဂၤ ဒီးကဲထီၣ်ပှၤအုၣ်အသးလၢ အအဲၣ်ဒိးမၤဘၣ်ဒိ ပှၤလၢ အတၢ်ကမၣ်တအိၣ်ဘၣ်​ တဂၤန့ၣ်တဂ့ၤ.+ ၂ နတဘၣ်​ မၤပိာ် ပှၤဂီၢ်မုၢ်အခံ လၢတၢ်မၤလၢ အအၢအသီတဂ့ၤ. ဖဲနအုၣ်နသးအခါ နတဘၣ်​ မၤက့ၣ်ကူ တၢ်မ့ၢ်တၢ်တီ ခီဖျိလၢ နအဲၣ်ဒိးမၤမုာ် ပှၤဂီၢ်မုၢ်အသးအဃိန့ၣ်တဂ့ၤ. ၃ ဖဲပှၤဖှီၣ်ဖိယာ်ဖိ အတၢ်ဂ့ၢ်လိာ်ဘှီလိာ် အိၣ်ထီၣ်အခါ နတဘၣ်​ ကွၢ်ဒိၣ်ဆံးအါစှၤတၢ်ဘၣ်.+

၄ “နမ့ၢ်ထံၣ်ဘၣ်​ နဒုၣ်နဒါ အကျီၢ်ဖါမ့ၢ်ဂ့ၤ, အကသ့ၣ်ယီၤမ့ၢ်ဂ့ၤ ဟးဖျိးကျဲန့ၣ်​ နကဘၣ်​ က့ၤဆှၢက့ၤအီၤ ဆူအအိၣ်လီၤ.+ ၅ နမ့ၢ်ထံၣ်ဘၣ်​ ပှၤလၢအသးဟ့နၤတဂၤ အကသ့ၣ်ယီၤ လီၤဃံၢ်လၢ အတၢ်ဘိၣ်အဖီလာ်န့ၣ်​ နတဘၣ်​ ပာ်မၤနသး ဒ်သိး နတသ့ၣ်ညါဘၣ်​ ဒီးလဲၤသဒၣ်အီၤ တဂ့ၤ. နကဘၣ်​ မၤစၢၤအီၤ ဒ်သိး အကမၤပူၤဖျဲး အဆၣ်ဖိကီၢ်ဖိ အဂီၢ်လီၤ.+

၆ “ဖဲပှၤဖှီၣ်ဖိယာ်ဖိ လၢသုကျါ အတၢ်ဂ့ၢ်လိာ်ဘှီလိာ် အိၣ်ထီၣ်အခါ သုတဘၣ်​ စံၣ်ညီၣ်န့ၢ်အီၤ တတီတလိၤဘၣ်​ န့ၣ်တဂ့ၤ.+

၇ “တၢ်ပာ်ဒ့ၣ်ပာ်ကမၣ်တၢ်လၢ အကဘျံးကဘျၣ်န့ၣ်​ တဘၣ်မၤဘၣ်ဃးနသးဒီးအီၤ နီတစဲးတဂ့ၤ. ဒီးပှၤလၢအတၢ်ကမၣ်​ တအိၣ်ဘၣ်​ ဒီးပှၤတီပှၤလိၤန့ၣ်​ တဘၣ်မၤသံ အဝဲသ့ၣ်တဂ့ၤ, မ့ၢ်လၢ ယတပာ်ပနီၣ်​ ပှၤအၢပှၤသီတဂၤ လၢပှၤတီပှၤလိၤဘၣ်​ အဃိလီၤ.+

၈ “ပှၤမ့ၢ်ထီးနၤစ့န့ၣ်* နတဘၣ်ဟံးန့ၢ်တဂ့ၤ. တၢ်ထီးကျိၣ်ထီးစ့န့ၣ်​ မၤခံးပှၤမဲာ် ဒ်သိး ပှၤသုတမၤတၢ်လၢ အဘၣ်တဂ့ၤအဂီၢ် ဒီးမၤက့ၣ်မၤကူ ပှၤတီပှၤလိၤ အတၢ်ကတိၤလီၤ.+

၉ “နတဘၣ်​ ဆီၣ်တံၢ်မၤနၢၤ ပှၤထံဂၤကီၢ်ဂၤဖိ တဂ့ၤ. မ့ၢ်လၢ လၢညါန့ၣ်​ သုကဲဘၣ်​ ပှၤထံဂၤကီၢ်ဂၤဖိတဖၣ်​ လၢကီၢ်အဲၤကူပတူး အပူၤအဃိ ပှၤထံဂၤကီၢ်ဂၤဖိတဖၣ်​ တူၢ်ဘၣ်တၢ် ဒ်လဲၣ်န့ၣ်​ သုသ့ၣ်ညါလီၤ.+

၁၀ “နကဘၣ်​ သူၣ်အီၣ်ဖျးအီၣ်တၢ် လၢနကီၢ်အပူၤ ဒီးပာ်ဖှိၣ်​ တၢ်လၢအမဲထီၣ်သၣ်ထီၣ်တဖၣ်​ ဃုနံၣ်လီၤ.+ ၁၁ ဘၣ်ဆၣ်​ ဖဲနွံနံၣ်တနံၣ်န့ၣ်​ နတဘၣ်​ သူၣ်လီၤဖျးလီၤတၢ်လၢ အပူၤဘၣ်​ ဒီးနဘၣ်​ ပာ်အီၤ ဒ်န့ၣ်လီၤ. ဒီးပှၤဖှီၣ်ဖိယာ်ဖိလၢအိၣ်လၢ သုကျါန့ၣ်​ ကအီၣ်တၢ်လၢ အမဲထီၣ်ဖဲန့ၣ်​ ဒီးတၢ်လၢ အဝဲသ့ၣ်​ ပာ်တ့ၢ်ဝဲတဖၣ်န့ၣ်​ ဆၣ်ဖိကီၢ်ဖိအမံၤတဖၣ်​ ကအီၣ်ဘၣ်ဝဲလီၤ. နစပံးကျီးဒီး နသ့ၣ်စၤယံး အလီၢ်န့ၣ်​ နကဘၣ်မၤအီၤ ဒ်န့ၣ်စ့ၢ်ကီးလီၤ.

၁၂ “နကဘၣ်​ မၤတၢ်ဃုသီ ဘၣ်ဆၣ်​ လၢနွံသီတသီန့ၣ်​ နကဘၣ်​ အိၣ်ဘှံးလၢ နတၢ်မၤလီၤ. ခီဖျိလၢ နမၤဒ်န့ၣ်အဃိ နကျီၢ်ဖါ ဒီးနကသ့ၣ်ယီၤ ကအိၣ်ဘှံးဘၣ်​ ဒီးနကုၢ်မုၣ်​ အဖိခွါ ဒီးပှၤထံဂၤကီၢ်ဂၤဖိ အဂံၢ်ဘါကဆူၣ်ထီၣ်က့ၤလီၤ.+

၁၃ “ပလီၢ်သုသးလၢ သုကမၤဒ် ကယဲၢ် တၢ်လၢယတဲသု အသိးန့ၣ်တက့ၢ်.+ သုတဘၣ်​ ကိးထီၣ်​ ယွၤလၢအဂၤတဖၣ်​ အမံၤတဂ့ၤ. အဝဲသ့ၣ်​ အမံၤတဘၣ်သီၣ်ထီၣ်လၢ သုထးခိၣ်တဂ့ၤ.+

၁၄ “သုကဘၣ်မၤ ဘူၣ်လၢယဂီၢ် တနံၣ်သၢဘျီလီၤ.+ ၁၅ သုကဘၣ်မၤ ဘူၣ်ကိၣ်လၢ အတပၣ်ဒီး ကိၣ်မံၣ်ဘၣ်လီၤ.+ မ့ၢ်လၢ သုဟးထီၣ်လၢ ကီၢ်အဲၤကူပတူးအပူၤလၢ လါအၤဘံာ်အဃိ ဒ်ယမၤလိာ်သုအသိး တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ လၢလါအၤဘံာ်အပူၤ မ့ၢ်ဘၣ်န့ၣ်+ သုကဘၣ်အီၣ်​ ကိၣ်လၢအတပၣ်ဒီး ကိၣ်မံၣ်ဘၣ်န့ၣ်​ နွံသီလီၤ. ပှၤလၢ အတဟဲစိာ် တၢ်နီတမံၤဘၣ်န့ၣ်​ တဘၣ်​ ဟဲပာ်ဖျါထီၣ်အသး လၢယမဲာ်ညါ နီတဂၤဘၣ်.+ ၁၆ ဒီးဖဲနကူး တၤသၣ်ဆိတဖၣ်လၢ နဖှံပာ်စၢၤအီၤလၢ ပျီပူၤအခါ+ နကဘၣ်မၤ ဘူၣ်ကူးတၢ်လီၤ.* ဒီးလၢနံၣ်အကတၢၢ် ဖဲနထၢဖှိၣ်တၢ်လၢ နမၤတ့ၢ်ပာ်စၢၤအီၤလၢ ပျီပူၤအခါ နကဘၣ်မၤ ဘူၣ်ထၢဖှိၣ်တၢ်လီၤ.*+ ၁၇ ပိာ်ခွါကိးဂၤဒဲး ကဘၣ်​ ဟဲပာ်ဖျါထီၣ်အသး လၢကစၢ် လၢအမ့ၢ်အတီ ယဟိဝၤယွၤ အမဲာ်ညါ တနံၣ်သၢဘျီလီၤ.+

၁၈ “ယတၢ်လုၢ်အသွံၣ်လၢ သုဟ့ၣ်လုၢ်ထီၣ်အီၤန့ၣ်​ သုတဘၣ်​ ဟ့ၣ်လုၢ်ထီၣ်အီၤဃုာ်ဒီး တၢ်လၢ အပၣ်ဒီးကိၣ်မံၣ်​ နီတမံၤတဂ့ၤ. ဖဲသုလုၢ်ထီၣ်​ တၢ်အသိလၢ ယဘူၣ်တဖၣ်​ အဆၢကတီၢ်န့ၣ်​ သုတဘၣ်​ ပာ်ဃာ်အီၤ ဒီတနၤ တုၤလၢ ဂီၤခီတဂ့ၤ.

၁၉ “နဟီၣ်ခိၣ်​ အတၤသၣ်ဆိ လၢအဂ့ၤကတၢၢ်န့ၣ်​ နကဘၣ်​ ဟဲစိာ်အီၤလၢ နကစၢ် ယဟိဝၤယွၤ အဟံၣ်လီၤ.+

“နတဘၣ်ချီ မဲာ်တဲးလဲးဖိ လၢအမိၢ် အနုၢ်ထံကျါတဂ့ၤ.+

၂၀ “ယကဆှၢလီၤ မူခိၣ်ကလူးတဂၤလၢ နမဲာ်ညါ+ ဒ်သိး ကဒီသဒၢသုလၢကျဲ ဒီးဒ်သိးကဆှၢသုလၢ တၢ်လီၢ်လၢ ယကတဲာ်ကတီၤ ပာ်စၢၤအီၤအဂီၢ်လီၤ.+ ၂၁ ဒိကနၣ်အီၤ ထံထံဆးဆး ဒီးမၤထွဲဒ် အတဲဝဲအသိးတက့ၢ်. တဘၣ်ထီဒါက့ၤအီၤတဂ့ၤ. မ့ၢ်လၢ အဟဲလၢ ယမံၤပူၤ အဃိ သုမ့ၢ်မၤဒ်န့ၣ်န့ၣ်​ အဝဲတပျၢ် သုတၢ်ကမၣ်ဘၣ်.+ ၂၂ ဘၣ်ဆၣ်​ သုမ့ၢ်ဒိကနၣ်​ အကလုၢ် လီၤတံၢ်လီၤဆဲး ဒီးမၤတၢ်လၢ ယတဲသု ကိးမံၤဒဲးန့ၣ်​ ယကကဲထီၣ်​ သုဒုၣ်သုဒါတဖၣ်​ အဒုၣ်အဒါ ဒီးယကထီဒါ ပှၤလၢအထီဒါသုလီၤ. ၂၃ ယမူခိၣ်ကလူးတဂၤ ကလဲၤလၢ သုမဲာ်ညါ ဒီးအဝဲကဆှၢသုဆူ ပှၤအမိၢ်ဖိ, ပှၤဃ့ၤသးဖိ, ပှၤပရးစၤဖိ, ပှၤကနၤဧၣ်ဖိ, ပှၤဃံၤဝံဖိ ဒီးပှၤယဘူၣ်ဖိတဖၣ်အအိၣ်​ ဒီးယကမၤဟးဂီၤ ပှၤသ့ၣ်တဖၣ်န့ၣ်လီၤ.+ ၂၄ သုတဘၣ်ဘါ အဝဲသ့ၣ်​ အယွၤတဖၣ်​ မ့တမ့ၢ် မၤအတၢ်တဂ့ၤ. ဒီးသုတဘၣ်​ ကွၢ်လိမၤဒိး တၢ်လၢအဝဲသ့ၣ်​ မၤဝဲတဖၣ်တဂ့ၤ.+ သုကဘၣ်​ မၤဟးဂီၤကွံာ် အဝဲသ့ၣ်​ အတၢ်ဂီၤတၢ်ဖှီၣ်တဖၣ်​ ဒီးတီၢ်သဘှံး အဝဲသ့ၣ်​ အလၢၢ်ထူၣ်စီဆှံတဖၣ်လီၤ.+ ၂၅ ယၤလၢအမ့ၢ် သုကစၢ်ယဟိဝၤယွၤန့ၣ်+ သုကဘၣ်မၤယတၢ် ဒီးယကဆိၣ်ဂ့ၤ သုကိၣ်ဒီးသုထံလီၤ.+ ဒီးယကမၤလီၤမၢ် တၢ်ဆူးတၢ်ဆါ လၢသုကျါလီၤ.*+ ၂၆ ပှၤပိာ်မုၣ်လၢ အအိၣ်လၢ သုထံသုကီၢ်အပူၤန့ၣ်​ အဟုးတဟးဂီၤဘၣ်​ ဒီးတကဲထီၣ်ဘၣ်​ ပှၤလၢ အဖိအိၣ်​ တန့ၢ်ဘၣ်န့ၣ်ဘၣ်.+ ဒီးယကဒုးအိၣ်မူသု တုၤလၢ သုသးပှၢ်လီၤ.

၂၇ “တချုးလၢ သုလဲၤတုၤဒံးဘၣ်န့ၣ်​ ယကမၤဒ်သိး အဝဲသ့ၣ်​ ကပျံၤယၤ+ ဒီးယကဒုးအိၣ်ထီၣ်​ တၢ်သဘံၣ်သဘုၣ်လၢ ပှၤကိးကလုာ်ဒဲးလၢ အထီဒါနၤအကျါ ဒီးယကမၤဒ်သိး သုဒုၣ်သုဒါတဖၣ်​ ကဃ့ၢ်ကွံာ် လၢသုမဲာ်ညါလီၤ.+ ၂၈ တချုးလၢ သုလဲၤတုၤဒံးဘၣ်န့ၣ်​ အဝဲသ့ၣ်​ အသးကဟးဂီၤဆိပာ်စၢၤ လၢယဃိ+ ဒီးယကနီဟးထီၣ်ကွံာ် ပှၤဃံၤဝံဖိ, ပှၤကနၤဧၣ်ဖိ ဒီးပှၤဃ့ၤသးဖိ လၢသုမဲာ်ညါလီၤ.+ ၂၉ ဒ်သိး ထံကီၢ်သုတအိၣ်လီၤဃီတဂ့ၤ ဒီးဆၣ်ဖိကီၢ်ဖိ အမံၤတဖၣ်​ သုတအါထီၣ်ဂီၢ်ထီၣ်​ ဒီးမၤဘၣ်ဒိသု တဂ့ၤအဂီၢ် ယတနီဟးထီၣ်ကွံာ် အဝဲသ့ၣ်​ လၢသုမဲာ်ညါ လၢတနံၣ်ဃီ အတီၢ်ပူၤဘၣ်.+ ၃၀ ယကနီဟးထီၣ်ကွံာ် အဝဲသ့ၣ်​ လၢသုမဲာ်ညါ တစဲးဘၣ်တစဲး တုၤလၢ သုသၣ်ထီၣ်အါထီၣ်​ ဒီးသုဒိးန့ၢ်ဘၣ်​ ကီၢ်အံၤတစုလီၤ.+

၃၁ “ယကဟ့ၣ်လီၤ ပှၤကီၢ်ဖိတဖၣ်​ လၢသုစုပူၤ ဒီးသုကနီဟးထီၣ်ကွံာ် အဝဲသ့ၣ်​ အဃိ+ ယကပာ်လီၤ သုကီၢ်အဆၢ စးထီၣ်လၢ ပီၣ်လဲၣ်ဂီၤ တုၤလၢ ပှၤဖလ့ၡသးဖိ အပီၣ်လဲၣ်, ဒီးစးထီၣ်လၢ ပှၢ်မုၢ်ကနၢ ဒီးတုၤလၢ ထံကျိ ဖရၤသးလီၤ.+ ၃၂ သုတဘၣ်မၤ တၢ်အၢၣ်လီၤအီလီၤဒီး အဝဲသ့ၣ်​ ဒီးအဝဲသ့ၣ်​ အယွၤတဖၣ်တဂ့ၤ.+ ၃၃ ဒ်သိး အဝဲသ့ၣ်​ သုတမၢ သုမၤကမၣ်ယၤတဂ့ၤအဂီၢ် အဝဲသ့ၣ်​ တဘၣ်အိၣ်လၢ သုကီၢ်ပူၤဘၣ်. သုမ့ၢ်မၤ အဝဲသ့ၣ်​ အယွၤတဖၣ်​ အတၢ်န့ၣ်​ အကကဲထီၣ်​ ပျံၤသကွီၤ လၢသုဂီၢ် သပှၢ်ကတၢၢ်လီၤ.”+

၂၄ ဒီးယဟိဝၤယွၤ တဲစီၤမိၤၡ့လၢ “နၤဒီးစီၤအၤဟရိၣ်, စီၤနၤဒး, စီၤအဘံဟူၤ+ ဒီးအံၣ်စရ့လး အပှၤသူၣ်က့သးပှၢ် အဂၤ ၇၀ န့ၣ်​ လဲၤထီၣ်လၢ ကစၢၢ်လိၤ တက့ၢ်. ဒီးသုကဘၣ်​ ဆုးလီၤသုခိၣ်​ လၢအယံၤ ဒီးဘူၣ်ထီၣ်ဘါထီၣ်​ ယၤလီၤ. ၂ စီၤမိၤၡ့ ကဘၣ်​ သုးဘူးအသးလၢ ယဟိဝၤယွၤအအိၣ်​ မ့မ့ၢ် ပှၤအဂၤတဖၣ်န့ၣ်​ တဘၣ်​ သုးဘူးအသးဘၣ်. ဒီးပှၤဂီၢ်မုၢ်တဖၣ်​ တဘၣ်​ လဲၤထီၣ်ဃုာ်ဒီးအီၤဘၣ်.”+

၃ ဒီးစီၤမိၤၡ့ ဟဲတဲဘၣ်​ ပှၤဂီၢ်မုၢ်တဖၣ်လၢ ယဟိဝၤယွၤ အတၢ်ကတိၤခဲလၢာ် ဒီးတၢ်သိၣ်တၢ်သီခဲလၢာ်+ ဒီးပှၤဂီၢ်မုၢ်ခဲလၢာ် စံးဆၢအီၤလၢ အကလုၢ်တဖျၢၣ်ဃီလၢ “ပသးအိၣ်မၤဒ် ယဟိဝၤယွၤ တဲဝဲအသိး ခဲလၢာ်လီၤ.”+ ၄ အဃိ စီၤမိၤၡ့ကွဲးလီၤ ယဟိဝၤယွၤ အတၢ်ကတိၤတဖၣ်​ ခဲလၢာ်လီၤ.+ ဒီးလၢဂီၤခီန့ၣ်​ အဝဲ ဂဲၤဆၢထၢၣ်ဂီၤဂီၤ ဒီးတ့ထီၣ်​ တၢ်လုၢ်လီၢ်လၢ ကစၢၢ်အခီၣ်ထံး ဒီးဆီလီၤဝဲလၢၢ်ထူၣ်​ ၁၂ ထူၣ်​ ဒ်ပှၤအံၣ်စရ့လးဖိ ၁၂ ဒူၣ်​ အိၣ်ဝဲအသိးလီၤ. ၅ ဝံၤဒီးစီၤမိၤၡ့ မၢလီၤဝဲ အံၣ်စရ့လး ပိာ်ခွါသးစၢ်တဖၣ်​ ဒီးအဝဲသ့ၣ်​ လုၢ်ထီၣ်ဝဲ တၢ်လုၢ်ဒွဲၣ်အူ ဒီးလုၢ်ထီၣ်ဝဲ ကျီၢ်ဖါတဖၣ်​ ဒ်တၢ်လုၢ်အိၣ်ဃူအိၣ်ဖိးတဖၣ်+ လၢယဟိဝၤယွၤ အအိၣ်လီၤ. ၆ ဒီးစီၤမိၤၡ့ ဟံးန့ၢ်ဝဲ တၢ်သွံၣ်တဝာ် ဒီးပာ်လီၤဝဲလၢ လီခီဖျၢၣ်တဖၣ်အပူၤ ဒီးတၢ်သွံၣ်လၢ အဂၤတဝာ်န့ၣ်​ အဝဲ ဖှံဝဲလၢ တၢ်လုၢ်လီၢ် အလိၤလီၤ. ၇ စီၤမိၤၡ့ ထုးထီၣ်​ လံာ်တၢ်အၢၣ်လီၤအီလီၤ ဒီးဖးထီၣ်ဝဲလၢ အကလုၢ်ဖးဒိၣ်​ လၢပှၤဂီၢ်မုၢ်တဖၣ်​ အအိၣ်လီၤ.+ ဒီးအဝဲသ့ၣ်​ တဲဝဲလၢ “ပသးအိၣ်မၤဒ် ယဟိဝၤယွၤ တဲဝဲအသိး ခဲလၢာ် ဒီးပကဒိကနၣ်အကလုၢ်လီၤ.”+ ၈ အဃိ စီၤမိၤၡ့ ဟံးထီၣ်တၢ်သွံၣ်​ ဒီးဖှံဝဲလၢ ပှၤဂီၢ်မုၢ်တဖၣ်အလိၤ+ ဒီးတဲဝဲလၢ “အဝဲအံၤမ့ၢ်ဝဲ သွံၣ်လၢ အဘၣ်ဃးဒီး တၢ်အၢၣ်လီၤအီလီၤ လၢယဟိဝၤယွၤ မၤဝဲဒီးသုလီၤ. တၢ်အၢၣ်လီၤအီလီၤအံၤန့ၣ်​ ပၣ်ဃုာ်ဒီး တၢ်ကတိၤခဲလၢာ် လၢသုနၢ်ဟူလံအီၤန့ၣ်လီၤ.”+

၉ စီၤမိၤၡ့, စီၤအၤဟရိၣ်, စီၤနၤဒး, စီၤအဘံဟူၤ ဒီးအံၣ်စရ့လး အပှၤသူၣ်က့သးပှၢ် အဂၤ ၇၀ န့ၣ်​ လဲၤထီၣ်ဝဲ ၁၀ ဒီးအဝဲသ့ၣ်​ ထံၣ်ဝဲ အံၣ်စရ့လး အကစၢ်ယွၤလီၤ.+ ဒီးလၢအခီၣ်ဖီလာ်န့ၣ်​ အိၣ်ဒီး တၢ်လၢအလီၤဂာ် ဒ်တၢ်မျၢ်နံၤလါအဲး ဒါလီၤအသးအသိး ဒီးအဆှံဝဲ ဒ်မူခိၣ်အသိးလီၤ.+ ၁၁ အဝဲ တမၤဘၣ်ဒိ ပှၤအံၣ်စရ့လးဖိ အခိၣ်နၢ်တဖၣ်အံၤဘၣ်.+ အဝဲသ့ၣ်​ ထံၣ်ဘၣ်​ ယွၤလၢအမ့ၢ်အတီတဂၤ လၢတၢ်ထံၣ်လၢညါခီအပူၤ ဒီးအဝဲသ့ၣ်​ အီၣ်တၢ်အီတၢ်လီၤ.

၁၂ ယဟိဝၤယွၤ တဲစီၤမိၤၡ့လၢ “ဟဲထီၣ်လၢယအိၣ်​ လၢကစၢၢ်လိၤ ဒီးအိၣ်ဖဲန့ၣ်တက့ၢ်. ယကဟ့ၣ်လီၤနၤ လၢၢ်ဘ့ၣ်ဘၣ်တဖၣ်လၢ အအိၣ်ဒီး တၢ်သိၣ်တၢ်သီ ဒီးတၢ်မၤလိာ် လၢယကကွဲးလီၤဃာ် ဒ်သိးကဟံးစုနဲၣ်ကျဲ ပှၤဂီၢ်မုၢ်အဂီၢ်လီၤ.”+ ၁၃ အဃိ စီၤမိၤၡ့ ဒီးအပှၤမၤစၢၤတၢ် စီၤယိၤၡူ စးထီၣ်လဲၤတၢ်လီၤ.+ မ့မ့ၢ် စီၤမိၤၡ့န့ၣ်​ ဆဲးလဲၤထီၣ်ဝဲ ယွၤလၢအမ့ၢ်အတီတဂၤ အကစၢၢ်လီၤ.+ ၁၄ ဘၣ်ဆၣ်​ အဝဲတဲဆိပာ်စၢၤ ပှၤသူၣ်က့သးပှၢ်တဖၣ်လၢ “အိၣ်ခိးပှၤဖဲအံၤ တုၤလၢ ပဟဲက့ၤတုၤလၢ သုအိၣ်တက့ၢ်.+ စီၤအၤဟရိၣ်​ ဒီးစီၤဃူၢ်+ အိၣ်ဒီးသုလီၤ. အဃိ ဖဲပှၤတဂၤဂ့ၤတဂၤဂ့ၤ အတၢ်ဂ့ၢ်လိာ်ဘှီလိာ် အိၣ်ထီၣ်အခါ အဝဲသ့ၣ်​ ကဘၣ်လဲၤဝဲလၢ စီၤအၤဟရိၣ်​ ဒီးစီၤဃူၢ် အအိၣ်လီၤ.”+ ၁၅ ဒီးဖဲတၢ်အၢၣ်​ အိၣ်ဘၢဝဲ ကစၢၢ်အခါ စီၤမိၤၡ့ လဲၤထီၣ်ကစၢၢ်လီၤ.+

၁၆ ဒီးယဟိဝၤယွၤ အလၤကပီၤန့ၣ်+ ဆဲးအိၣ်ဝဲလၢ ကစၢၢ်စံၤနါအလိၤ+ ဒီးတၢ်အၢၣ်အိၣ်ဘၢ ကစၢၢ်စံၤနါ ဃုသီလီၤ. ဖဲနွံသီတသီန့ၣ်​ ယွၤကိးထီၣ်ဝဲလၢ စီၤမိၤၡ့အအိၣ်လၢ တၢ်အၢၣ်အကျါလီၤ. ၁၇ လၢပှၤအံၣ်စရ့လးဖိ လၢအကွၢ်တၢ်တဖၣ်​ အမဲာ်ညါန့ၣ်​ ယဟိဝၤယွၤ အလၤကပီၤ အိၣ်ဖျါဒ် မ့ၣ်အူအီၣ်တၢ်အသိး လၢကစၢၢ်ဒီခိၣ်လီၤ. ၁၈ ဒီးစီၤမိၤၡ့ နုာ်လီၤလၢ တၢ်အၢၣ်အကျါ ဒီးဆဲးလဲၤထီၣ်​ ကစၢၢ်အလိၤလီၤ.+ ဒီးအဝဲ အိၣ်ဝဲဖဲန့ၣ်​ အနံၤ ၄၀ အနၤ ၄၀ လီၤ.+

၂၅ ယဟိဝၤယွၤ တဲဘၣ်​ စီၤမိၤၡ့လၢ ၂ “တဲဘၣ်​ ပှၤအံၣ်စရ့လးဖိတဖၣ်​ ဒ်သိး အကဟဲစိာ် တၢ်မၤဘူၣ်​ လၢယဂီၢ်တက့ၢ်. ဟံးန့ၢ်ယတၢ်မၤဘူၣ်လၢ ပှၤလၢအသးအိၣ်​ ဟ့ၣ်ဝဲ ကိးဂၤဒဲး အအိၣ်တက့ၢ်.+ ၃ နကဘၣ်ဟံးန့ၢ် အဝဲသ့ၣ်​ အတၢ်မၤဘူၣ်​ လၢအမ့ၢ် ထူ,+ စ့ညၣ်,+ တိၢ်ဘီ,+ ၄ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ်, လုၣ်လၢအဂ့ၤ, မဲာ်တဲးလဲးအဆူၣ်, ၅ သိဖါအဘ့ၣ်​ လၢအဘၣ်တၢ်စုၣ်ဂီၤအီၤ, ပီၣ်လဲၣ်ဆှီအဘ့ၣ်, သ့ၣ်ဖှ့ၡံးတၤ,+ ၆ သိလၢ မ့ၣ်အူဒၢအဂီၢ်,+ သ့ၣ်စရံအထုးလၢ သိလၢတၢ်ဒိးဖှူတၢ်အဂီၢ်+ ဒီးလၢတၢ်နၢမူအဂီၢ်+ ၇ ဒီးတၢ်မျၢ်မဟူယၤတဖၣ်​ ဒီးလၢၢ်အဂၤတဖၣ်​ လၢပှၤကထီထီၣ်အီၤလၢ အ့ဖိး+ ဒီးထၢၣ်ဖိ* အလိၤလီၤ.+ ၈ ဒီးအဝဲသ့ၣ်​ ကတ့ထီၣ်​ တၢ်လီၢ်လၢ တၢ်ဘူၣ်ထီၣ်ဘါထီၣ်ယၤအဂီၢ် ဒီးယကအိၣ်လၢ အဝဲသ့ၣ်​ အကျါလီၤ.+ ၉ နကဘၣ်တ့ထီၣ်​ ဒဲစီဆှံ ဒီးအတၢ်ဖိတၢ်လံၤခဲလၢာ် ဒ်တၢ်အဒိလၢ ယကဒုးနဲၣ်နၤအသိး လီၤတံၢ်လီၤဆဲးလီၤ.+

၁၀ “အဝဲသ့ၣ်​ ကဘၣ်တ့ထီၣ်​ တလါစီဆှံလၢ သ့ၣ်ဖှ့ၡံးတၤ ဒီးကဘၣ်ထီဝဲ ခံပျၢ်တထါ,* ကဘၣ်လဲၢ်ဝဲ တပျၢ်တထါ ဒီးအကစီၤထီၣ်ထီ ကဘၣ်အိၣ်ဝဲ တပျၢ်တထါလီၤ.+ ၁၁ ဒီးလၢတလါစီဆှံအပူၤ ဒီးအချၢန့ၣ်​ နဘၣ်ကျးအီၤဒီး ထူစီကဘျၣ်တဖၣ်+ ဒီးအခိၣ်ဒူန့ၣ်​ နဘၣ်ကျီၤဝးတရံးအီၤ လၢထူလီၤ.+ ၁၂ ဒီးနဘၣ်တ့ထီၣ်​ ထူအကွီၤလွံၢ်ကွီၤ ဒီးထီထီၣ်ကွီၤတဖၣ်အံၤလၢ အခီၣ်လွံၢ်ခီ အဖီခိၣ်​ အဃိ လၢတကပၤန့ၣ်​ ကွီၤကအိၣ်​ ခံကွီၤ ဒီးလၢ အဝဲတကပၤန့ၣ်​ ကွီၤကအိၣ်​ ခံကွီၤလီၤ. ၁၃ ဒီးနကဘၣ်တ့ထီၣ်​ နီၣ်ယိးဘိတဖၣ်လၢ သ့ၣ်ဖှ့ၡံးတၤ ဒီးနကဘၣ်​ ကျးအီၤလၢ ထူကဘျၣ်လီၤ.+ ၁၄ နကဘၣ်​ ဂိာ်လီၤ နီၣ်ယိးဘိတဖၣ်လၢ ထူကွီၤတဖၣ်အပူၤလၢ တလါစီဆှံ အကပၤ ခံကပၤလၢာ် ဒ်သိး ပှၤကယိးတလါ အဂီၢ်လီၤ. ၁၅ ဒီးနီၣ်ယိးဘိတဖၣ်​ ကဘၣ်ဆဲးအိၣ်လၢ တလါစီဆှံ အကွီၤတဖၣ်အပူၤ ဒီးပှၤတဘၣ်​ ထုးထီၣ်ကွံာ်အီၤဘၣ်.+ ၁၆ ဒီးတၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ်​ လၢယကဟ့ၣ်လီၤနၤန့ၣ်​ နကဘၣ်​ ပာ်လီၤအီၤလၢ တလါစီဆှံ အပူၤလီၤ.+

၁၇ “နကဘၣ်တ့ထီၣ်​ တၢ်အခိၣ်ကျး လၢထူစီလီၤ. ဒီးကဘၣ်ထီဝဲ ခံပျၢ်တထါ ဒီးကဘၣ်လဲၢ်ဝဲ တပျၢ်တထါလီၤ.+ ၁၈ ဒီးနကဘၣ်ပိာ် ခ့ရူာ်ခံဒု လၢထူစီ ဒီးပာ်ဝဲလၢ တလါအခိၣ်ကျး အထိးနါ ခံကပၤ အလိၤလီၤ.+ ၁၉ တ့ထီၣ်ခ့ရူာ်တဖၣ်​ ဒီးပာ်အီၤလၢ တလါအခိၣ်ကျးအလိၤ, တဒုန့ၣ်​ လၢအထိးနါတကပၤ ဒီးအဂၤတဒုန့ၣ်​ လၢအဝဲတကပၤ န့ၣ်တက့ၢ်. ၂၀ ဒီးခ့ရူာ် ခံဒုန့ၣ်​ အဒံးဆ့ ကဘၣ်ယူာ်ထီၣ်အသးလၢ တၢ်ဖီခိၣ်အဃိ အဒံးဆ့တဖၣ်​ အကဒု ကလီၤဘၣ်လၢ တလါအခိၣ်ကျး အလိၤလီၤ.+ ဒီးခ့ရူာ်ခံဒုန့ၣ်​ ကကွၢ်ဆၢၣ်မဲာ်လိာ်အသး ဒီးကဆုးလီၤအခိၣ်​ လၢတလါအခိၣ်ကျးလီၤ. ၂၁ နကဘၣ်​ ပာ်လီၤ တၢ်အခိၣ်ကျး+ လၢတလါစီဆှံအလိၤ ဒီးလၢတလါပူၤန့ၣ်​ နကဘၣ်ထၢနုာ် တၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ်​ လၢယကဟ့ၣ်နၤလီၤ. ၂၂ ယကပာ်ဖျါထီၣ်ယသး လၢနအိၣ်​ ဖဲန့ၣ်​ ဒီးယကတဲတၢ်ဒီးနၤ လၢတလါ အခိၣ်ကျး အဖီခိၣ်လီၤ.+ လၢခ့ရူာ် လၢအအိၣ်လၢ တၢ်အၢၣ်လီၤအီလီၤ အတလါ အဖီခိၣ်​ ခံဒုအဘၢၣ်စၢၤန့ၣ်​ ယကဒုးသ့ၣ်ညါနၤ ယတၢ်မၤလိာ်ခဲလၢာ် လၢပှၤအံၣ်စရ့လးဖိတဖၣ်​ အဂီၢ်လီၤ.

၂၃ “နကဘၣ်တ့ထီၣ်​ စီၢ်နီၤခိၣ်+ တဖျၢၣ်လၢ သ့ၣ်ဖှ့ၡံးတၤ ဒီးအထီကဘၣ်အိၣ်ဝဲ ခံပျၢ်, အလဲၢ်တပျၢ် ဒီးအကစီၤထီၣ်ထီ တပျၢ်တထါလီၤ.+ ၂၄ ဒီးနဘၣ်ကျးအီၤဒီး ထူစီကဘျၣ်တဖၣ်​ ဒီးနကဘၣ်​ ကျီၤဝးတရံး အကနူၤလၢ ထူလီၤ. ၂၅ တၢ်ကွီၤတခါ လၢအလဲၢ် စုနၢလွံၢ်ဘိန့ၣ်* နကဘၣ်​ ထီထီၣ်အီၤလၢ စီၢ်နီၤခိၣ်​ အကနူၤအဖီခိၣ်ဝးဝး ဒီးနကဘၣ်ကျီၤဃာ် တၢ်ကွီၤအံၤ အကနူၤ လၢထူလီၤ. ၂၆ နဘၣ်တ့ထီၣ်​ ထူကွီၤလွံၢ်ကွီၤ ဒီးပာ်အီၤလၢ စီၢ်နီၤခိၣ်​ အနၢၣ်လွံၢ်နၢၣ်​ ဖဲစီၢ်နီၤခိၣ်​ အခီၣ်ဘုးတာ်လိာ်အသးဒီး စီၢ်နီၤခိၣ်အလီၢ်န့ၣ်လီၤ. ၂၇ ဒီးကွီၤတဖၣ်အံၤန့ၣ်​ နကဘၣ်ထီထီၣ်အီၤဘူးဒီး စီၢ်နီၤခိၣ်အကွီၤ ဒ်သိးကဖီၣ်ဃာ် နီၣ်ယိးဘိတဖၣ်​ ဒီးပှၤကယိးဝဲ စီၢ်နီၤခိၣ်အဂီၢ်လီၤ. ၂၈ ဒီးနကဘၣ်တ့ထီၣ်​ နီၣ်ယိးဘိတဖၣ်​ လၢသ့ၣ်ဖှ့ၡံးတၤ ဒီးနဘၣ်ကျးအီၤဒီး ထူကဘျၣ်တဖၣ်​ ဒီးနကဘၣ်သူ နီၣ်ယိးဘိတဖၣ်အံၤ ဒ်သိးကယိး စီၢ်နီၤခိၣ်အဂီၢ်လီၤ.

၂၉ “ဒီးနဘၣ်တ့ထီၣ်​ အလီခီတဖၣ်, အထံခွးတဖၣ်​ ဒီးအထံအီဒၢ ဒီးအလီခီဖျၢၣ်တဖၣ်​ လၢအဝဲသ့ၣ်​ ကသူဝဲ ဒ်သိး ကလူလီၤ စပံးထံလၢ တၢ်လုၢ်တၢ်ပာ် အဂီၢ်လီၤ. နဘၣ်တ့ထီၣ်​ တၢ်သ့ၣ်တဖၣ်အံၤ လၢထူစီလီၤ.+ ၃၀ ဒီးလၢစီၢ်နီၤခိၣ်​ အလိၤန့ၣ်​ နကဘၣ်ပာ်လီၤ ကိၣ်လၢ တၢ်လုၢ်ထီၣ်တၢ်အဂီၢ် လၢယမဲာ်ညါ ထီဘိလီၤ.+

၃၁ “နကဘၣ်ပိာ် မ့ၣ်အူဒၢတဖျၢၣ်+ လၢထူစီလီၤ. မ့ၣ်အူဒၢ အခီၣ်လၣ်, အထူၣ်, အဒ့တဖၣ်, အဖီတဖၣ်, အကဘိၣ်တဖၣ်​ ဒီးအတၢ်ကယၢကယဲတဖၣ်န့ၣ်​ ကဘျးစဲလိာ်သးခဲလၢာ်လီၤ.+ ၃၂ အဒ့ဃုဒ့န့ၣ်​ ကဘၣ်ကရၣ်ထီၣ်ဝဲလၢ မ့ၣ်အူဒၢအထူၣ်​ အကပၤ, တကပၤန့ၣ်​ သၢဒ့ ဒီးအဝဲတကပၤန့ၣ်​ သၢဒ့လီၤ. ၃၃ တၢ်အဒ့တဒ့စုာ်စုာ် ကဘၣ်အိၣ်ဒီး ဖီသၢဖီး လၢအလီၤဂာ်ဒီး သ့ၣ်ၡၤကးအဖီ ဒီးအဖီတဖီးစုာ်စုာ် အဖီလာ်န့ၣ်​ ကဘၣ်အိၣ်ဒီး ဖီအကဘိၣ်တခါ ဒီးတၢ်ကယၢကယဲတခါလၢ အလီၤဂာ်ဒီး ဖီလၢ အဖးထီၣ်တဖီးလီၤ. အဃိ အဒ့ဃုဒ့ လၢအကရၣ်ထီၣ်လၢ မ့ၣ်အူဒၢ အထူၣ်ကပၤန့ၣ်​ ကဘၣ်အိၣ်ဝဲ ဒ်န့ၣ်လီၤ. ၃၄ ဒီးလၢမ့ၣ်အူဒၢ အထူၣ်အလိၤန့ၣ်​ ကအိၣ်ဒီး ဖီလွံၢ်ဖီးလၢ အလီၤဂာ်ဒီး သ့ၣ်ၡၤကးအဖီလီၤ. ဒီးလၢဖီတဖီးစုာ်စုာ် အဖီလာ်န့ၣ်​ ကအိၣ်ဒီး ဖီအကဘိၣ်တခါ ဒီးတၢ်ကယၢကယဲတခါ လၢအလီၤဂာ်ဒီး ဖီလၢ အဖးထီၣ်​ တဖီးလီၤ. ၃၅ တၢ်အဒ့ လၢအဖီခိၣ်ကတၢၢ် ခံဒ့အဖီလာ်န့ၣ်​ ကဘၣ်အိၣ်ဒီး ဖီအကဘိၣ်​ တခါလီၤ. ဒီးတၢ်အဒ့လၢ အခၢၣ်သးခံဒ့ အဖီလာ်န့ၣ်​ ကဘၣ်အိၣ်ဒီး ဖီအကဘိၣ်​ တခါလီၤ. ဒီးတၢ်အဒ့လၢ အဖီလာ်ကတၢၢ်ခံဒ့ အဖီလာ်စ့ၢ်ကီး ကဘၣ်အိၣ်ဒီး ဖီအကဘိၣ်​ တခါလီၤ. အဃိ တၢ်အဒ့ဃုဒ့လၢ အကရၣ်ထီၣ်လၢ မ့ၣ်အူဒၢ အထူၣ်ကပၤန့ၣ်​ ကဘၣ်အိၣ်ဝဲ ဒ်န့ၣ်လီၤ. ၃၆ ပှၤကဘၣ်ပိာ် ဖီအကဘိၣ်တဖၣ်, တၢ်အဒ့တဖၣ်​ ဒီးမ့ၣ်အူဒၢ ဒီတဖျၢၣ်​ လၢထူစီ ဒီးတၢ်သ့ၣ်တဖၣ်အံၤ ကဘၣ်ဘျးစဲလိာ်သးခဲလၢာ်လီၤ.+ ၃၇ နကဘၣ်တ့ထီၣ်​ မ့ၣ်အူ အခွးနွံခွး လၢမ့ၣ်အူဒၢအဂီၢ် ဒီးဖဲပှၤဒွဲၣ်ထီၣ်အီၤအခါ ကကပီၤထီၣ်ဝဲလၢ အမဲာ်ညါလီၤ.+ ၃၈ မ့ၣ်အူဒၢ အနီၣ်တံာ် ဒီးမ့ၣ်အူအ့ၣ်အခွးတဖၣ်န့ၣ်​ ပှၤကဘၣ်တ့အီၤလၢ ထူစီလီၤ.+ ၃၉ မ့ၣ်အူဒၢ ဒီးအတၢ်ပီးတၢ်လီတဖၣ်န့ၣ်​ ပှၤကဘၣ်တ့အီၤဒီး ထူစီ တတၤလၣ်လီၤ.* ၄၀ တ့ထီၣ်​ တၢ်တဖၣ်အံၤ ဒ်တၢ်အဒိလၢ ယဒုးနဲၣ်နၤလၢ ကစၢၢ်လိၤ အသိးတက့ၢ်.+

၂၆ “နဘၣ်တ့ထီၣ်​ ဒဲစီဆှံ+ ဃုာ်ဒီး ဒဲအတၢ်ကံးညာ် အဘ့ၣ်တဆံ လၢအဘၣ်တၢ်တ့အီၤ လၢလုၣ်လၢအဂ့ၤ လၢအပိၤအသး, လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး ဒီးတၢ်အဂီၤဆှုၣ်ကလာ်လီၤ. ဒီးနဘၣ်​ ဆးထီၣ်အီၤဒီး+ ခ့ရူာ်အဂီၤတဖၣ်လီၤ.+ ၂ တၢ်ကံးညာ် တဘ့ၣ်စုာ်စုာ်န့ၣ်​ ကဘၣ်ထီဝဲ ၂၈ ပျၢ်* ဒီးကဘၣ်လဲၢ်ဝဲ ၄ ပျၢ်လီၤ. ဒီးဒဲအတၢ်ကံးညာ်တဖၣ်န့ၣ်​ အလဲၢ်အထီ ကဘၣ်​ ထဲသိးလိာ်အသးလီၤ.+ ၃ ဒဲအတၢ်ကံးညာ် တဘ့ၣ်ဒီးတဘ့ၣ်န့ၣ်​ နဘၣ်ဆးကထြၢထီၣ်​ ယဲၢ်ဘ့ၣ်တကရူၢ် ယဲၢ်ဘ့ၣ်တကရူၢ်လီၤ. ၄ ဒီးနကဘၣ်တ့ထီၣ်​ တၢ်အကွီၤတဖၣ်လၢ လုၣ်အလါအဲး လၢဒဲအတၢ်ကံးညာ်တဘ့ၣ်​ အကနူၤ ဒီးတၢ်ကံးညာ်အဂၤတဘ့ၣ်​ အကနူၤန့ၣ်​ နကဘၣ်မၤအီၤ ဒ်န့ၣ်စ့ၢ်ကီး ဖဲတၢ်မၤဘၣ်ဘျးအီၤအလီၢ်လီၤ. ၅ အဃိ နဘၣ်တ့ထီၣ်​ တၢ်အကွီၤအခါ ၅၀ လၢတၢ်ကံးညာ်တဘ့ၣ်အလိၤ ဒီးလၢတၢ်ကံးညာ် အဝဲတဘ့ၣ်​ အကနူၤန့ၣ်​ နဘၣ်တ့ထီၣ်​ တၢ်အကွီၤအခါ ၅၀ ဒ်သိး တၢ်အကွီၤတဖၣ်အံၤ ကအိၣ်သဃီၤလိာ်အသး ဖဲတၢ်မၤဘၣ်ဘျးအီၤ အလီၢ်လီၤ. ၆ ဒီးနဘၣ်တ့ထီၣ်​ နီၣ်ဘျးထူ အဘ့ၣ်​ ၅၀ ဒီးမၤဘၣ်ဘျး တၢ်ကံးညာ်တဖၣ်လၢ နီၣ်ဘျးတဖၣ်အံၤ ဒီးကကဲထီၣ်​ တၢ်ကံးညာ်တဘ့ၣ်ဃီလၢ ဒဲစီဆှံ အဂီၢ်လီၤ.+

၇ “နကဘၣ်တ့ထီၣ်​ စ့ၢ်ကီး ဒဲအတၢ်ကံးညာ် ၁၁ ဘ့ၣ်လၢ+ မဲာ်တဲးလဲးအဆူၣ်+ လၢနကကျၢၢ်ဘၢ ဒဲစီဆှံအဂီၢ်လီၤ. ၈ ဒဲအတၢ်ကံးညာ်တဖၣ်အံၤ တဘ့ၣ်စုာ်စုာ်န့ၣ်​ ကဘၣ်ထီဝဲ အပျၢ် ၃၀ ဒီးကဘၣ်လဲၢ်ဝဲ ၄ ပျၢ်လီၤ. ဒီးဒဲအတၢ်ကံးညာ် ၁၁ ဘ့ၣ်န့ၣ်​ အလဲၢ်အထီ ကဘၣ်​ ထဲသိးလိာ်အသးလီၤ. ၉ ဒဲအတၢ်ကံးညာ် ယဲၢ်ဘ့ၣ်န့ၣ်​ နကဘၣ်​ ဆးကထြၢထီၣ်အီၤလီၤ. ဒီးဒဲအတၢ်ကံးညာ် အဂၤဃုဘ့ၣ်န့ၣ်​ နကဘၣ်​ ဆးကထြၢထီၣ်အီၤလီၤ. ဒီးဒဲအတၢ်ကံးညာ် ဃုဘ့ၣ်တဘ့ၣ်န့ၣ်​ နကဘၣ်​ ချံးထီၣ်အီၤ လၢဒဲအမဲာ်ညါန့ၣ်လီၤ. ၁၀ ဒီးနကဘၣ်တ့ထီၣ်​ တၢ်အကွီၤအခါ ၅၀ လၢတၢ်ကံးညာ်တဘ့ၣ်​ အကနူၤ ဒီးလၢတၢ်ကံးညာ် အဝဲတဘ့ၣ်​ အကနူၤန့ၣ်​ နကဘၣ်တ့ထီၣ်​ တၢ်အကွီၤအခါ ၅၀ ဖဲတၢ်မၤဘၣ်ဘျးအီၤ အလီၢ်လီၤ. ၁၁ ဒီးနဘၣ်တ့ထီၣ်​ နီၣ်ဘျးတိၢ်ဘီ အခါ ၅၀ ဒီးထီထီၣ်​ နီၣ်ဘျးတဖၣ်အံၤလၢ တၢ်အကွီၤတဖၣ်အပူၤ ဒ်သိးတၢ်ကံးညာ် ခံကရူၢ်ကဘၣ်ဘျး ဒီးကကဲထီၣ်​ တခါဃီအဂီၢ်လီၤ. ၁၂ ဒဲအတၢ်ကံးညာ်တဖၣ်အံၤ ကလီၤစဲၤထီန့ၢ်ဒံး တၢ်ကံးညာ်လၢအဖီလာ်တဖၣ်လီၤ. ဒဲအတၢ်ကံးညာ် လၢအအိၣ်ပိၣ်​ ခံပျၢ်န့ၣ်​ ကလီၤစဲၤလၢ ဒဲစီဆှံ အလီၢ်ခံ တကပၤလီၤ. ၁၃ ဒီးလၢဒဲအကပၤ ခံကပၤလၢာ်န့ၣ်​ ဒဲအတၢ်ကံးညာ်တဖၣ်အံၤ ကလီၤစဲၤထီန့ၢ်ဒံး တၢ်ကံးညာ် လၢအဖီလာ် တပျၢ် ဒ်သိး ကကျၢၢ်ဘၢ ဒဲစီဆှံ အဂီၢ်လီၤ.

၁၄ “နကဘၣ်တ့ထီၣ်စ့ၢ်ကီး ဒဲစီဆှံ အတၢ်ကျၢၢ်ဘၢတၢ် တဘ့ၣ်လၢ သိဖါအဘ့ၣ်​ လၢအဘၣ်တၢ်စုၣ်ဂီၤအီၤ ဒီးတၢ်ကျၢၢ်ဘၢတၢ်အဂၤ တဘ့ၣ်လၢ ပီၣ်လဲၣ်ဆှီအဘ့ၣ်လၢ အကအိၣ်လၢ အဖီခိၣ်လီၤ.+

၁၅ “ဒီးနကဘၣ်တ့ထီၣ်​ သ့ၣ်ဘ့ၣ်ဘၣ်အကျီၤတဖၣ်+ လၢသ့ၣ်ဖှ့ၡံးတၤ လၢဒဲစီဆှံအဂီၢ် ဒီးပာ်ဆၢထၢၣ်အီၤလီၤ.+ ၁၆ သ့ၣ်ဘ့ၣ်ဘၣ်အကျီၤ ကိးဘ့ၣ်ဒဲးန့ၣ်​ ကဘၣ်ထီဝဲ အပျၢ်တဆံ ဒီးအဒီၣ်ဃီၤ ကဘၣ်အိၣ်ဝဲ တပျၢ်တထါလီၤ. ၁၇ သ့ၣ်ဘ့ၣ်ဘၣ်အကျီၤ ကိးဘ့ၣ်ဒဲးန့ၣ်​ ကဘၣ်အိၣ်ဒီး အခီၣ်ခံခါ လၢအသဃဲၤလိာ်သးလီၤ. နကဘၣ်တ့ထီၣ်​ ဒဲစီဆှံ အသ့ၣ်ဘ့ၣ်ဘၣ်အကျီၤ ကိးဘ့ၣ်ဒဲး ဒ်န့ၣ်လီၤ. ၁၈ နကဘၣ်တ့ထီၣ်​ သ့ၣ်ဘ့ၣ်ဘၣ်အကျီၤ အဘ့ၣ်​ ၂၀ လၢဒဲစီဆှံ အကလံၤထံးတခီ အဂီၢ်လီၤ.

၁၉ “နဘၣ်တ့ထီၣ်​ တၢ်အခီၣ်လီၢ် အဘ့ၣ်​ ၄၀ လၢစ့ညၣ်+ ဒီးတၢ်အခီၣ်လီၢ်တဖၣ်အံၤ ကအိၣ်ဝဲလၢ သ့ၣ်ဘ့ၣ်ဘၣ်အကျီၤ အဘ့ၣ်​ ၂၀ အဖီလာ်လီၤ. အဃိ လၢသ့ၣ်ဘ့ၣ်ဘၣ်အကျီၤ တဘ့ၣ်စုာ်စုာ် အခီၣ်ခံခါ အဖီလာ်န့ၣ်​ ကအိၣ်ဒီး အခီၣ်လီၢ်ခံဘ့ၣ်လီၤ.+ ၂၀ လၢဒဲစီဆှံ လၢအဝဲတကပၤ လၢကလံၤစိးတခီ အဂီၢ်န့ၣ်​ နဘၣ်တ့ထီၣ်​ သ့ၣ်ဘ့ၣ်ဘၣ်အကျီၤ ၂၀ ၂၁ ဒီးတၢ်အခီၣ်လီၢ်အဘ့ၣ်​ ၄၀ လၢစ့ညၣ်​ အဃိ လၢသ့ၣ်ဘ့ၣ်ဘၣ်အကျီၤ တဘ့ၣ်စုာ်စုာ် အဖီလာ်န့ၣ်​ အခီၣ်လီၢ် ကအိၣ်ဝဲခံဘ့ၣ်လီၤ. ၂၂ ဒီးလၢ ဒဲစီဆှံ အလီၢ်ခံ တကပၤ လၢမုၢ်နုာ်တခီအဂီၢ်န့ၣ်​ နကဘၣ်တ့ထီၣ်​ သ့ၣ်ဘ့ၣ်ဘၣ်အကျီၤ ဃုဘ့ၣ်လီၤ.+ ၂၃ နကဘၣ်တ့ သ့ၣ်ဘ့ၣ်ဘၣ်အကျီၤ ခံဘ့ၣ်လၢ ဒဲစီဆှံ အနၢၣ်ခံနၢၣ်​ လၢအလီၢ်ခံတကပၤ အဂီၢ်လီၤ. ၂၄ သ့ၣ်ဘ့ၣ်ဘၣ်အကျီၤလၢ တၢ်အနၢၣ်ခံနၢၣ်​ အဂီၢ်အံၤန့ၣ်​ ကဘၣ်မ့ၢ် သ့ၣ်ဘ့ၣ်ဘၣ်ခံဘ့ၣ်​ စးထီၣ်လၢ အဖီခိၣ်​ တုၤလၢ အဖီလာ်လီၤ. ဒီးသ့ၣ်ဘ့ၣ်ဘၣ်အကျီၤ ခံဘ့ၣ်အံၤ ကဘုးတာ်လိာ်အသး ဖဲကွီၤအဆိကတၢၢ် တကွီၤန့ၣ်လီၤ. ၂၅ သ့ၣ်ဘ့ၣ်ဘၣ်အကျီၤ ကအိၣ်ဝဲ ဃိးဘ့ၣ်​ ဒီးအခီၣ်လီၢ်လၢ ဘၣ်တၢ်တ့အီၤလၢ စ့ညၣ်န့ၣ်​ ကအိၣ်ဝဲ ၁၆ ဘ့ၣ်လီၤ. အဃိ လၢသ့ၣ်ဘ့ၣ်ဘၣ်အကျီၤ တဘ့ၣ်စုာ်စုာ်အဖီလာ်န့ၣ်​ အခီၣ်လီၢ် ကအိၣ်ဝဲခံဘ့ၣ်လီၤ.

၂၆ “လၢသ့ၣ်ဘ့ၣ်ဘၣ်အကျီၤ လၢဒဲစီဆှံ တကပၤအဂီၢ်န့ၣ်​ နကဘၣ်တ့န့ၢ်အီၤ တၢ်အတီ ယဲၢ်ခါ လၢသ့ၣ်ဖှ့ၡံးတၤလီၤ.+ ၂၇ ဒီးသ့ၣ်ဘ့ၣ်ဘၣ်အကျီၤ လၢဒဲစီဆှံ အဂၤတကပၤ အဂီၢ်န့ၣ်​ နကဘၣ်တ့န့ၢ်အီၤ တၢ်အတီယဲၢ်ခါ ဒီးသ့ၣ်ဘ့ၣ်ဘၣ်အကျီၤ လၢဒဲစီဆှံ အလီၢ်ခံ တကပၤ လၢမုၢ်နုာ်တခီ အဂီၢ်န့ၣ်​ နကဘၣ်တ့န့ၢ်အီၤ တၢ်အတီ ယဲၢ်ခါလီၤ. ၂၈ ဒီးတၢ်အတီလၢ အခၢၣ်သးတခါန့ၣ်​ ကဘၣ်အိၣ်လၢ သ့ၣ်ဘ့ၣ်ဘၣ်​ အကျီၤတဖၣ်​ အခၢၣ်သး စးထီၣ်​ လၢအံၤတခီ တုၤလၢ အဝဲတခီလီၤ.

၂၉ “သ့ၣ်ဘ့ၣ်ဘၣ်​ အကျီၤတဖၣ်န့ၣ်​ နဘၣ်ကျးအီၤဒီး ထူကဘျၣ်တဖၣ်လီၤ.+ ဒီးနဘၣ်တ့ထီၣ်​ ထူအကွီၤတဖၣ်လၢ အကဖီၣ်ဃာ် တၢ်အတီတဖၣ်အဂီၢ် ဒီးတၢ်အတီတဖၣ်န့ၣ်​ နဘၣ်ကျးအီၤဒီး ထူကဘျၣ်တဖၣ်လီၤ. ၃၀ နဘၣ်သူၣ်ထီၣ်​ ဒဲစီဆှံ ဒ်တၢ်အဒိလၢ ယဒုးနဲၣ်နၤလၢ ကစၢၢ်လိၤ အသိးလီၤ.+

၃၁ “နကဘၣ်မၤထီၣ်​ ယၣ်ဘျးသဒၢလၢ+ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ. ဒီးနဘၣ်​ ဆးထီၣ်အီၤဒီး ခ့ရူာ်အဂီၤတဖၣ်လီၤ. ၃၂ ဒီးနကဘၣ်ဘျးလီၤအီၤလၢ တၢ်အထူၣ်လွံၢ်ထူၣ်အလိၤလီၤ. တၢ်အထူၣ်လွံၢ်ထူၣ်အံၤန့ၣ်ဘၣ်တၢ်တ့အီၤလၢ သ့ၣ်ဖှ့ၡံးတၤ ဒီးဘၣ်တၢ်ကျးအီၤဒီး ထူကဘျၣ်တဖၣ်လီၤ. ဒီးတၢ်အထူၣ်​ အနီၣ်ကွးတဖၣ်န့ၣ်​ ကဘၣ်တၢ်တ့အီၤလၢ ထူလီၤ. ဒီးတၢ်အခီၣ်လီၢ်လွံၢ်ဘ့ၣ်လၢ ဘၣ်တၢ်တ့အီၤဒီး စ့ညၣ်န့ၣ်​ ကဘၣ်အိၣ်ဝဲလၢ တၢ်အထူၣ်လွံၢ်ထူၣ်အံၤ အဖီလာ်လီၤ. ၃၃ ဒီးနဘၣ်ဘျးထီၣ်​ ယၣ်ဘျးသဒၢ လၢနီၣ်ဘျးတဖၣ်​ အဖီလာ် ဒီးဟဲစိာ် တၢ်အၢၣ်လီၤအီလီၤ အတလါ+ လၢယၣ်ဘျးသဒၢ အလီၢ်ခံလီၤ. ဒီးယၣ်ဘျးသဒၢန့ၣ်​ ကနီၤဖးန့ၢ်သုလၢ တၢ်လီၢ်စီဆှံ+ ဒီးတၢ်လီၢ်စီဆှံကတၢၢ်လီၤ.+ ၃၄ နကဘၣ်ပာ်လီၤ တၢ်အခိၣ်ကျးလၢ တၢ်အၢၣ်လီၤအီလီၤ အတလါ အလိၤ ဒီးပာ်အီၤလၢ တၢ်လီၢ်စီဆှံကတၢၢ်လီၤ.

၃၅ “နကဘၣ်ပာ် စီၢ်နီၤခိၣ်​ လၢယၣ်ဘျးသဒၢ အမဲာ်ညါ* ဒီးမ့ၣ်အူဒၢန့ၣ်+ ကဘၣ်အိၣ်ဝဲလၢ ဒဲစီဆှံ အကလံၤထံးတခီ ဒီးကဘၣ်​ ကွၢ်ဆၢၣ်မဲာ်လိာ်အသးဒီး စီၢ်နီၤခိၣ်လီၤ. ဒီးစီၢ်နီၤခိၣ်န့ၣ်​ နကဘၣ်ပာ်အီၤလၢ ကလံၤစိးတခီလီၤ. ၃၆ လၢဒဲစီဆှံ အတၢ်နုာ်လီၤအလီၢ် အဂီၢ်န့ၣ်​ နကဘၣ်ထါ တၢ်ကံးညာ်* လၢလုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ.+ ၃၇ ဒီးလၢတၢ်ကံးညာ်အံၤ အဂီၢ်န့ၣ်​ နကဘၣ်တ့ထီၣ်​ တၢ်အထူၣ်ယဲၢ်ထူၣ်လၢ သ့ၣ်ဖှ့ၡံးတၤ ဒီးကျးအီၤဒီး ထူကဘျၣ်တဖၣ်လီၤ. ဒီးတၢ်အထူၣ်တဖၣ်အံၤ အနီၣ်ကွးန့ၣ်​ ကဘၣ်တၢ်တ့အီၤလၢထူ ဒီးနကဘၣ်တ့ထီၣ်​ တၢ်အထူၣ်တဖၣ်အံၤ အခီၣ်လီၢ်ယဲၢ်ခါ လၢတိၢ်ဘီလီၤ.

၂၇ “နကဘၣ်တ့ထီၣ်​ တၢ်လုၢ်လီၢ်လၢ သ့ၣ်ဖှ့ၡံးတၤလီၤ.+ ဒီးတၢ်လုၢ်လီၢ်န့ၣ်​ အလဲၢ်ကဘၣ်အိၣ်​ ယဲၢ်ပျၢ်,* အဒီၣ်ဃီၤ ကဘၣ်အိၣ်​ ယဲၢ်ပျၢ် ဒီးကဘၣ်မ့ၢ် တၢ်လွံၢ်နၢၣ်လၢ အကနူၤ ထဲသိးလိာ်အသး ဒီးအကစီၤထီၣ်ထီ သၢပျၢ်လီၤ.+ ၂ ဒီးနကဘၣ်တ့ထီၣ်​ တၢ်လုၢ်လီၢ် အနၢၤတဖၣ်လၢ+ တၢ်လုၢ်လီၢ် အနၢၣ်လွံၢ်နၢၣ်​ အလိၤလီၤ. ဒီးအနၢၤတဖၣ်န့ၣ်​ နကဘၣ်တ့အီၤ တဆဲးဃီဒီး တၢ်လုၢ်လီၢ်လီၤ. ဝံၤဒီး နကဘၣ်ကျး တၢ်လုၢ်လီၢ်ဒီး တိၢ်ဘီကဘျၣ်တဖၣ်လီၤ.+ ၃ နကဘၣ်တ့ထီၣ်​ ထံစဲၤတဖၣ်လၢ တၢ်ကစိာ်ထီၣ်ကွံာ် ဖၣ်ဆါအဂီၢ် ဒီးနီၣ်တရီာ်တၢ်တဖၣ်, လီခီဖျၢၣ်တဖၣ်, နီၣ်ဆဲးတဖၣ်​ ဒီးမ့ၣ်အူအ့ၣ်အခွးတဖၣ်​ ဒီးနကဘၣ်တ့ထီၣ်​ တၢ်ပီးတၢ်လီတဖၣ်အံၤ ခဲလၢာ်လၢ တိၢ်ဘီလီၤ.+ ၄ နဘၣ်တ့ထီၣ်​ နီၣ်ကၣ်တိၢ်ဘီတခါ ဒ်ဃ့အသိး လၢတၢ်လုၢ်လီၢ် အဂီၢ်လီၤ. ဒီးနဘၣ်တ့ထီၣ်​ တိၢ်ဘီအကွီၤလွံၢ်ကွီၤ ဖဲနီၣ်ကၣ်တခါအံၤ အနၢၣ်လွံၢ်နၢၣ်လီၤ. ၅ ဒီးနဘၣ်ပာ် နီၣ်ကၣ်တခါအံၤလၢ တၢ်လုၢ်လီၢ် အခိၣ်ဒူအဖီလာ် ဒီးကအိၣ်ဝဲလၢ တၢ်လုၢ်လီၢ် အခၢၣ်သးလီၤ. ၆ နကဘၣ်တ့ထီၣ်​ တၢ်လုၢ်လီၢ် အနီၣ်ယိးဘိတဖၣ်​ လၢသ့ၣ်ဖှ့ၡံးတၤ ဒီးနဘၣ်ကျးအီၤဒီး တိၢ်ဘီကဘျၣ်တဖၣ်လီၤ. ၇ နကဘၣ်ဂိာ်လီၤ နီၣ်ယိးဘိတဖၣ်​ လၢတၢ်အကွီၤတဖၣ်အပူၤလၢ အအိၣ်လၢ တၢ်လုၢ်လီၢ် ခံကပၤလၢာ်အလိၤ ဒ်သိး ပှၤကယိး တၢ်လုၢ်လီၢ်အံၤ အဂီၢ်လီၤ.+ ၈ နဘၣ်တ့ထီၣ်​ တၢ်လုၢ်လီၢ်သ့ၣ်​ လၢအလီၤဂာ်ဒ် တလါတဖျၢၣ်လၢ အအိၣ်ဒီး အကအိပူၤလီၤ. နဘၣ်တ့ထီၣ်အီၤ ဒ်တၢ်ဒုးနဲၣ်နၤလၢ ကစၢၢ်လိၤ အသိးလီၤ.+

၉ “ဒဲစီဆှံ ကဘၣ်အိၣ်ဒီး အတၢ်ပျီလၢ အအိၣ်လၢ ကရၢၢ်ပူၤလီၤ.+ လၢတၢ်ပျီ အကလံၤထံးတခီန့ၣ်​ ကဘၣ်အိၣ်ဒီး တၢ်ကံးညာ်တဖၣ်လၢ အဘၣ်တၢ်မၤအီၤလၢ လုၣ်လၢအဂ့ၤ လၢအပိၤအသးလီၤ. ဒီးတၢ်ကံးညာ်တဖၣ်အံၤန့ၣ်​ အလဲၢ်ကဘၣ်အိၣ်ဝဲ အပျၢ် ၁၀၀ လီၤ.+ ၁၀ ဒီးအထူၣ်​ ကဘၣ်အိၣ်​ အထူၣ်​ ၂၀ ဒီးအခီၣ်လီၢ်တိၢ်ဘီ ကဘၣ်အိၣ်​ အခါ ၂၀ လီၤ. တၢ်အထူၣ်တဖၣ်​ အနီၣ်ကွး ဒီးအတၢ်ဘျးစဲတဖၣ်န့ၣ်* ကဘၣ်တၢ်တ့အီၤ လၢစ့ညၣ်လီၤ. ၁၁ တၢ်ကံးညာ်တဖၣ်​ လၢကလံၤစိး တကပၤ အဂီၢ်န့ၣ်​ အလဲၢ်ကဘၣ်အိၣ်ဝဲ အပျၢ် ၁၀၀ စ့ၢ်ကီးလီၤ. ဒီးအထူၣ်​ ကဘၣ်အိၣ်​ အထူၣ်​ ၂၀ ဒီးအခီၣ်လီၢ်တိၢ်ဘီ ကဘၣ်အိၣ်​ အခါ ၂၀ လီၤ. ဒီးအထူၣ်တဖၣ်န့ၣ်​ ကဘၣ်အိၣ်ဒီး အနီၣ်ကွးတဖၣ်​ ဒီးအတၢ်ဘျးစဲတဖၣ်လၢ အဘၣ်တၢ်တ့အီၤလၢ စ့ညၣ်လီၤ. ၁၂ တၢ်ကံးညာ်တဖၣ်လၢ မုၢ်နုာ်တခီန့ၣ်​ အလဲၢ်ကဘၣ်အိၣ်ဝဲ အပျၢ် ၅၀ လီၤ. ဒီးအထူၣ်​ ကဘၣ်အိၣ်အထူၣ်​ တဆံ ဒီးအခီၣ်လီၢ် ကဘၣ်အိၣ်​ အခါတဆံလီၤ. ၁၃ လၢမုၢ်ထီၣ်တခီန့ၣ်​ တၢ်ပျီလၢ အအိၣ်လၢ ကရၢၢ်ပူၤ အလဲၢ်ကဘၣ်အိၣ်ဝဲ အပျၢ် ၅၀ လီၤ. ၁၄ တၢ်ပျီလၢ အအိၣ်လၢ ကရၢၢ်ပူၤ အတၢ်နုာ်လီၤအလီၢ်န့ၣ်​ လၢအစ့ၣ်တခီ တၢ်ကံးညာ်အလဲၢ် ကဘၣ်အိၣ်​ ၁၅ ပျၢ် ဒီးအိၣ်ဝဲဒီး အထူၣ်သၢထူၣ်​ ဒီးအခီၣ်လီၢ် သၢခါလီၤ.+ ၁၅ ဒီးလၢအထွဲတခီန့ၣ်​ တၢ်ကံးညာ်အလဲၢ် ကဘၣ်အိၣ်ဝဲ ၁၅ ပျၢ် ဒီးအိၣ်ဝဲဒီး အထူၣ်သၢထူၣ်​ ဒီးအခီၣ်လီၢ် သၢခါလီၤ.

၁၆ “တၢ်ပျီလၢ အအိၣ်လၢ ကရၢၢ်ပူၤ အတၢ်နုာ်လီၤအလီၢ်န့ၣ်​ ကဘၣ်အိၣ်ဒီး တၢ်ကံးညာ်* လၢအလဲၢ်ဝဲ အပျၢ် ၂၀ လီၤ. ဒီးပှၤကဘၣ်ထါအီၤလၢ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ.+ ဒီးကဘၣ်အိၣ်ဒီး အထူၣ်လွံၢ်ထူၣ်​ ဒီးအခီၣ်လီၢ် လွံၢ်ခါလီၤ.+ ၁၇ ထူၣ်ကိးထူၣ်ဒဲးလၢ အအိၣ်ဝးတရံး တၢ်ပျီလၢ အအိၣ်လၢ ကရၢၢ်ပူၤန့ၣ်​ ကဘၣ်အိၣ်ဒီး နီၣ်ဘျးဒီးနီၣ်ကွးတဖၣ်​ လၢအဘၣ်တၢ်တ့အီၤလၢ စ့ညၣ်လီၤ. မ့မ့ၢ် ထူၣ်အခီၣ်လီၢ်တဖၣ်န့ၣ်​ ကဘၣ်မ့ၢ် တိၢ်ဘီလီၤ.+ ၁၈ တၢ်ပျီလၢ အအိၣ်လၢ ကရၢၢ်ပူၤန့ၣ်​ အထီကဘၣ်အိၣ်ဝဲ အပျၢ် ၁၀၀+ ဒီးအလဲၢ် ကဘၣ်အိၣ်ဝဲ အပျၢ် ၅၀ လီၤ. ဒီးတၢ်ကံးညာ်တဖၣ်လၢ ဘၣ်တၢ်မၤအီၤလၢ လုၣ်လၢအဂ့ၤ လၢအပိၤအသးန့ၣ်​ အကစီၤထီၣ်ထီ ကဘၣ်အိၣ်ဝဲ ၅ ပျၢ်လီၤ. ဒီးကဘၣ်အိၣ်ဒီး အခီၣ်လီၢ်တိၢ်ဘီတဖၣ်လီၤ. ၁၉ တၢ်ပီးတၢ်လီ ဒီးတၢ်ဖိတၢ်လံၤခဲလၢာ် လၢပှၤကသူအီၤလၢ ဒဲစီဆှံတၢ်မၤအဂီၢ် ဃုာ်ဒီး ဒဲစီဆှံ အထးခိၣ်စူတဖၣ်​ ဒီးတၢ်ပျီ အထးခိၣ်စူတဖၣ်န့ၣ်​ ကဘၣ်မ့ၢ် တိၢ်ဘီလီၤ.+

၂၀ “ဒ်သိးမ့ၣ်အူ ကကဲၤဝဲလၢ မ့ၣ်အူဒၢအခွးတဖၣ်အပူၤ ထီဘိအဂီၢ် နကဘၣ်မၤလိာ် ပှၤအံၣ်စရ့လးဖိလၢ အကဟဲစိာ်န့ၢ်နၤ သ့ၣ်စၤယံးအသိစီလၢ မ့ၣ်အူဒၢအခွးတဖၣ်အဂီၢ်လီၤ.+ ၂၁ စီၤအၤဟရိၣ်​ ဒီးအဖိခွါတဖၣ်​ ကဘၣ်ရဲၣ်လီၤကျဲၤလီၤတၢ် ဒ်သိး မ့ၣ်အူဒၢအခွးတဖၣ်​ လၢတၢ်အိၣ်ဖှိၣ်အဒဲပူၤ လၢယၣ်ဘျးသဒၢ အမဲာ်ညါ လၢအဘူးဒီး တၢ်အၢၣ်လီၤအီလီၤအတလါန့ၣ်*+ ကကပီၤဝဲလၢ ယဟိဝၤယွၤ အမဲာ်ညါ စးထီၣ်လၢဟါခီ တုၤလၢ ဂီၤခီလီၤ.+ အဝဲအံၤ မ့ၢ်ဝဲ တၢ်သိၣ်တၢ်သီလၢ အဂၢၢ်ကျၢၤ လၢပှၤအံၣ်စရ့လးဖိတဖၣ်​ ကဘၣ်မၤထွဲဝဲ တစိၤဘၣ်တစိၤလီၤ.+

၂၈ “နကဘၣ်ကိးန့ၢ် နဒီပုၢ်ဝဲၢ်ခွါ စီၤအၤဟရိၣ်+ ဒီးအဖိခွါတဖၣ်+ လၢအမ့ၢ် စီၤနၤဒး, စီၤအဘံဟူၤ,+ စီၤအလၤဧစၢ် ဒီးစီၤအံသမၢ်+ ဒီးနီၤဖးလီၤအဝဲသ့ၣ်လၢ ပှၤအံၣ်စရ့လးဖိအကျါ ဒ်သိးအဝဲသ့ၣ်​ ကမၤတၢ်ဒ် ပှၤလုၢ်တၢ်ဒိၣ်​ လၢယဂီၢ်လီၤ.+ ၂ ဒီးနကဘၣ်ထါ တၢ်ကူတၢ်သိးစီဆှံလၢ အဃံအလၤ ဒီးအဖျါလီၤပာ်ကဲလၢ နဒီပုၢ်ဝဲၢ်ခွါ စီၤအၤဟရိၣ်​ အဂီၢ်လီၤ.+ ၃ နကဘၣ်တဲတၢ်ဒီး ကယဲၢ်ပှၤလၢ ယဟ့ၣ်အီၤ တၢ်ကူၣ်သ့ လၢအအိၣ်ဒီး တၢ်သ့တၢ်ဘၣ်​ ကိးဂၤဒဲး+ ဒီးအဝဲသ့ၣ်​ ကထါ တၢ်ကူတၢ်သိးလၢ တၢ်ကပာ်စီဆှံ စီၤအၤဟရိၣ်အဂီၢ် ဒ်သိး စီၤအၤဟရိၣ်​ ကမၤတၢ် ဒ်ပှၤလုၢ်တၢ်ဒိၣ်​ လၢယဂီၢ်လီၤ.

၄ “အဝဲသ့ၣ်​ ကဘၣ်ထါဝဲ တၢ်ကူတၢ်သိးတဖၣ်​ လၢအမ့ၢ် ထၢၣ်ဖိ,*+ အ့ဖိးတဘ့ၣ်,+ ဆ့ကၤလၢ အစုဒုၣ်တအိၣ်ဘၣ်​ တဘ့ၣ်,+ ဆ့ဖးထီ လီၤလီၤဆီဆီတဘ့ၣ်, ခိၣ်ဖၢၣ်လီၤဆီတဘ့ၣ်+ ဒီးယီၢ်တကိးလၢ ဆ့ဖးထီအဂီၢ်လီၤ.+ အဝဲသ့ၣ်​ ကဘၣ်ထါ တၢ်ကူတၢ်သိးစီဆှံ လၢနဒီပုၢ်ဝဲၢ်ခွါ စီၤအၤဟရိၣ်​ ဒီးအဖိခွါတဖၣ်အဂီၢ် ဒ်သိး အဝဲသ့ၣ်​ ကမၤတၢ်ဒ် ပှၤလုၢ်တၢ်ဒိၣ်​ လၢယဂီၢ်လီၤ. ၅ ပှၤလၢအမၤတၢ်သ့ဂ့ၤဂ့ၤန့ၣ်​ ကသူဝဲထူ, လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢ အဂ့ၤလီၤ.

၆ “အဝဲသ့ၣ်​ ကဘၣ်ထါ အ့ဖိးတဘ့ၣ်လၢ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ. ဒီးအဝဲသ့ၣ်​ ကဘၣ်ဆးကံၣ်ဃ့အီၤလၢ လုၣ်ထူတဖၣ်လီၤ.+ ၇ ဒီးအ့ဖိးတဘ့ၣ်အံၤ ကဘၣ်အိၣ်ဒီး အဖံဘၣ်ခိၣ်ခံဘ့ၣ်​ လၢအကဒုးဘျးစဲ အ့ဖိးအမဲာ်ညါ ဒီးအလီၢ်ခံ အဂီၢ်လီၤ. ၈ ဒီးယီၢ်တကိးလၢ+ အအိၣ်လၢ အ့ဖိးအလိၤ ဒ်သိး ကစၢဃာ်အီၤ ကျၢၤကျၢၤအဂီၢ်န့ၣ်​ ကဘၣ်တၢ်ထါအီၤလၢ တၢ်ဖိတၢ်လံၤ ဒ်သိးသိးဒီး အ့ဖိး လၢအမ့ၢ် လုၣ်လၢအလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ. ဒီးတၢ်ကဘၣ်​ ဆးကံၣ်ဃ့အီၤလၢ လုၣ်ထူတဖၣ်လီၤ.

၉ “နကဘၣ်ဟံးန့ၢ် တၢ်မျၢ်မဟူယၤခံဖျၢၣ်+ ဒီးစိးပျၤ စီၤအံၣ်စရ့လး အဖိခွါတဖၣ်​ အမံၤလၢ လၢၢ်ခံဖျၢၣ်အံၤ အလိၤလီၤ.+ ၁၀ လၢလၢၢ်တဖျၢၣ်​ အလိၤန့ၣ်​ နကဘၣ်​ စိးပျၤ မံၤဃုဖျၢၣ်​ ဒီးလၢလၢၢ် အဂၤတဖျၢၣ်​ အလိၤန့ၣ်​ နကဘၣ်စိးပျၤ မံၤအဂၤ ဃုဖျၢၣ်​ ဒ်အဝဲသ့ၣ်​ အသးနံၣ်​ အိၣ်ဝဲအသိးလီၤ. ၁၁ ဒ်ပှၤစိးပျၤတၢ်ဖိ စိးပျၤဝဲ တၢ်ပနီၣ်အသိး အဝဲကဘၣ်​ စိးပျၤဝဲ စီၤအံၣ်စရ့လး အဖိခွါတဖၣ်​ အမံၤလၢ လၢၢ်ခံဖျၢၣ်​ အလိၤလီၤ.+ ဒီးလၢၢ်ခံဖျၢၣ်အံၤန့ၣ်​ နဘၣ်​ ထီထီၣ်အီၤလၢ ထူဘ့ၣ်ဘၣ်​ အကွီၤခံခါအလိၤလီၤ. ၁၂ ဒီးနဘၣ်ပာ် လၢၢ်ခံဖျၢၣ်အံၤလၢ အ့ဖိးအဖံဘၣ်ခိၣ်ခံဘ့ၣ်အလိၤ ဒ်လၢၢ်တၢ်သ့ၣ်နီၣ်လၢ စီၤအံၣ်စရ့လး အဖိခွါတဖၣ်​ အဂီၢ်လီၤ.+ ဒီးစီၤအၤဟရိၣ်​ ဘၣ်စိာ်အဝဲသ့ၣ်​ အမံၤလၢ အဖံဘၣ်ခိၣ်လၢ ယဟိဝၤယွၤ အမဲာ်ညါ ဒ်တၢ်သ့ၣ်နီၣ်​ အသိးလီၤ. ၁၃ နကဘၣ်​ တ့ထီၣ်ထူဘ့ၣ်ဘၣ်​ အကွီၤခံခါလီၤ. ၁၄ နကဘၣ်တ့ထီၣ်​ ထူစီပျံၤဖိခံဘိ လၢအပိၤအသး ဒ်ပျံၤတဘိအသိး+ ဒီးနကဘၣ်​ ထီထီၣ်အီၤလၢ ထူဘ့ၣ်ဘၣ်​ အကွီၤခံခါ အလိၤလီၤ.+

၁၅ “နဘၣ်မၢ ပှၤလၢဆးကံၣ်ဃ့တၢ်တဂၤလၢ အကထါဝဲ တၢ်စံၣ်ညီၣ်​ အထၢၣ်ဖိလီၤ.+ ဒီးဒ်အ့ဖိးအသိး တၢ်ကဘၣ်ထါအီၤလၢ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ. ဒီးတၢ်ကဘၣ်​ ဆးကံၣ်ဃ့အီၤလၢ လုၣ်ထူတဖၣ်လီၤ.+ ၁၆ ဖဲတၢ်ချံးအီၤ လၢအခၢၣ်သးအခါ အနၢၣ်လွံၢ်နၢၣ်​ အကနူၤန့ၣ်​ ကဘၣ်ထဲသိးလိာ်အသး ဒီးအထီကအိၣ်ဝဲ တထါ* ဒီးအလဲၢ် ကအိၣ်ဝဲတထါလီၤ. ၁၇ နကဘၣ်ထီထီၣ်​ လၢၢ်လၢထၢၣ်ဖိအလိၤ လွံၢ်ကျိၤလီၤ. တၢတကျိၤန့ၣ်​ မ့ၢ်ဝဲ တၢ်မျၢ်ဆီသွံၣ်, တၢ်မျၢ်ဘီအူးသပးယၢ် ဒီးတၢ်မျၢ်လါဟ့လီၤ. ၁၈ ခံကျိၤတကျိၤန့ၣ်​ မ့ၢ်ဝဲ တၢ်မျၢ်လါလုး, တၢ်မျၢ်နံၤလါအဲး ဒီးတၢ်မျၢ်နကၤသွဲးလီၤ. ၁၉ သၢကျိၤတကျိၤန့ၣ်​ မ့ၢ်ဝဲ တၢ်မျၢ်ဂီၤဘီ, တၢ်မျၢ်မဟူယၤကံၣ်ဃ့ ဒီးတၢ်မျၢ်သကီၤဖီလီၤ. ၂၀ လွံၢ်ကျိၤတကျိၤန့ၣ်​ မ့ၢ်ဝဲ တၢ်မျၢ်ဘီလါ, တၢ်မျၢ်မဟူယၤ ဒီးတၢ်မျၢ်ဂီၤလုးလီၤ. လၢၢ်သ့ၣ်တဖၣ်အံၤ တၢ်ကဘၣ်​ ကွီၤဃာ်အီၤ လၢထူလီၤ. ၂၁ ဒီးလၢၢ်ကဘၣ်အိၣ်လၢ စီၤအံၣ်စရ့လး အဖိခွါ ၁၂ ဂၤအဂီၢ် တဂၤတဖျၢၣ်လီၤ. ဒီးဒ်ပှၤစိးပျၤတၢ်ပနီၣ်အသိး ပှၤ ၁၂ ဒူၣ်အမံၤ ကဘၣ်တၢ်စိးပျၤအီၤလၢ လၢၢ်တဖျၢၣ်စုာ်စုာ် အလိၤ တဒူၣ်တဖျၢၣ်လီၤ.

၂၂ “နကဘၣ်ပိၤ ထူစီပျံၤဖိတဖၣ်​ ဒ်ပျံၤအသိး ဝံၤဒီး ထီထီၣ်အီၤလၢ ထၢၣ်ဖိအလိၤလီၤ.+ ၂၃ ဒီးနဘၣ်တ့ထီၣ်​ ထူအကွီၤ ခံကွီၤလၢ ထၢၣ်ဖိအံၤအဂီၢ် ဒီးနဘၣ်ထီထီၣ်အီၤ လၢထၢၣ်ဖိအနၢၣ်​ ခံခီလီၤ. ၂၄ နကဘၣ်ထီထီၣ်​ ပျံၤထူခံဘိန့ၣ်​ လၢထူအကွီၤ ခံကွီၤအပူၤ လၢအအိၣ်လၢ ထၢၣ်ဖိအနၢၣ်​ ခံခီလၢာ်လီၤ. ၂၅ ဒီးပျံၤထူ ခံဘိအစိးနါန့ၣ်​ နကဘၣ်​ ထီထီၣ်အီၤဒီး ထူဘ့ၣ်ဘၣ်​ အကွီၤခံခါ ဒီးနဘၣ်​ ထီထီၣ်အီၤလၢ အဖံဘၣ်ခိၣ်ခံဘ့ၣ်​ အဖီခိၣ်​ လၢအ့ဖိးအမဲာ်ညါ တကပၤလီၤ. ၂၆ နကဘၣ်တ့ထီၣ်​ ထူအကွီၤခံကွီၤ ဒီးထီထီၣ်အီၤလၢ ထၢၣ်ဖိ အလီၢ်ခံတကပၤ အနၢၣ်ထံး ခံကပၤအလိၤလီၤ. ထၢၣ်ဖိ အလီၢ်ခံတကပၤန့ၣ်​ အမဲာ်ကွၢ်လိာ်အသးဒီး အ့ဖိးလီၤ.+ ၂၇ နဘၣ်တ့ထီၣ်​ ထူအကွီၤ အဂၤခံကွီၤလၢ အ့ဖိးအမဲာ်ညါတပၤလၢ အဖံဘၣ်ခိၣ်​ ခံဘ့ၣ်အဖီလာ်, ဘူးဒီးတၢ်ဘျးစဲလိာ်သးအလီၢ် ဒီးလၢအ့ဖိး အယီၢ်တကိး အဖီခိၣ်လီၤ.+ ၂၈ နဘၣ်စၢဃာ် ထၢၣ်ဖိအကွီၤတဖၣ်​ ဒီးအ့ဖိးအကွီၤတဖၣ်လၢ ပျံၤလၢ အလွဲၢ်လါအဲးတဘိ ဒ်သိး ထၢၣ်ဖိကအိၣ်ဝဲလၢ အ့ဖိးအလိၤ ကျၢၤကျၢၤလၢ ယီၢ်တကိး အဖီခိၣ်လီၤ.

၂၉ “ဖဲစီၤအၤဟရိၣ်​ လဲၤနုာ်လၢ တၢ်စီဆှံအလီၢ်အခါ လၢအသးနါပှၢ်* အလိၤန့ၣ်​ အဝဲကဘၣ်​ သိးဝဲ တၢ်စံၣ်ညီၣ်​ အထၢၣ်ဖိ လၢအအိၣ်ဒီး စီၤအံၣ်စရ့လး အဖိခွါတဖၣ်အမံၤ ဒ်တၢ်သ့ၣ်နီၣ်လၢ ယဟိဝၤယွၤအမဲာ်ညါ ထီဘိအသိးလီၤ. ၃၀ နဘၣ်ဖၢနုာ် အူရံၣ်​ ဒီးတူမံၣ်+ လၢတၢ်စံၣ်ညီၣ်​ အထၢၣ်ဖိအပူၤ ဒီးအကဘၣ်အိၣ်လၢ စီၤအၤဟရိၣ်​ အသးနါပှၢ်အလိၤ ဖဲအလဲၤနုာ်လီၤလၢ ယဟိဝၤယွၤ အမဲာ်ညါအခါလီၤ. လၢယဟိဝၤယွၤ အမဲာ်ညါန့ၣ်​ စီၤအၤဟရိၣ်​ ကဘၣ်စိာ်ဝဲ တၢ်ဖိတၢ်လံၤတဖၣ်အံၤထီဘိလၢ အဘၣ်တၢ်သူအီၤ ဒ်သိးကစံၣ်ညီၣ်န့ၢ်တၢ်လၢ ပှၤအံၣ်စရ့းဖိတဖၣ်အဂီၢ်န့ၣ်လီၤ.

၃၁ “ဆ့ကၤလၢ အစုဒုၣ်တအိၣ်ဘၣ်လၢ အကဘၣ်တၢ်သိးအီၤ လၢအ့ဖိး အဖီလာ်န့ၣ်​ နကဘၣ်ထါအီၤ လၢလုၣ်လၢ အလါအဲး ဒီတဘ့ၣ်လီၤ.+ ၃၂ ဒီးဆ့ကၤဖးထီ အဖီခိၣ်တတီၤ အခၢၣ်သးန့ၣ်​ ကဘၣ်အိၣ်ဒီး အပူၤတပူၤလၢ ပှၤလုၢ်တၢ်ဒိၣ်​ ကဖျီၣ်လီၤ အခိၣ်သၣ်ဃံ အဂီၢ်လီၤ. ဒီးဒ်သိး အသုတညာ် တဂ့ၤအဂီၢ် ပှၤကဘၣ်ဆးဝးတရံး တၢ်ပူၤအံၤ အကနူၤ, လီၤဂာ် ဒ်ဆ့ကၤသုးအသိးလီၤ. ၃၃ လၢဆ့ကၤဖးထီ အခီၣ်ထံးဝးဝးန့ၣ်​ နကဘၣ်​ ဆးထီၣ်​ တၢ်ကယၢကယဲတဖၣ်လၢ အလီၤဂာ်ဒီး သလဲသၣ်တဖၣ်လၢ အဘၣ်တၢ်မၤအီၤလၢ လုၣ်အလါအဲး, သိဆူၣ်အလုး ဒီးတၢ်အဂီၤဆှုၣ်ကလာ်လီၤ. ဒီးလၢသလဲသၣ်တဖၣ်​ အဘၢၣ်စၢၤန့ၣ်​ နဘၣ်ထီထီၣ်​ ဒၢလွဲထူဖိတဖၣ်လီၤ. ၃၄ အဃိ ဒၢလွဲထူဖိ တဖျၢၣ်ဝံၤ သလဲသၣ်တဖျၢၣ်, ဒၢလွဲထူဖိတဖျၢၣ်ဝံၤ သလဲသၣ်တဖျၢၣ်​ ကဘၣ်ဝးတရံး ဆ့ကၤဖးထီလၢ အစုဒုၣ်တအိၣ်ဘၣ်​ တဘ့ၣ်န့ၣ်​ အခီၣ်ထံးလီၤ. ၃၅ ဖဲစီၤအၤဟရိၣ်​ မၤပှၤလုၢ်တၢ်ဒိၣ်​ အတၢ်မၤအခါ အဝဲကဘၣ်သိးဝဲ ဆ့ကၤတဘ့ၣ်အံၤလီၤ. ဒီးဖဲအလဲၤနုာ် ဒီးအဟးထီၣ်လၢ တၢ်စီဆှံအလီၢ် လၢယဟိဝၤယွၤ အမဲာ်ညါအခါ ဒ်သိး အသုတသံတဂ့ၤအဂီၢ် ပှၤကဘၣ်နၢ်ဟူ ဆ့ကၤအဒၢလွဲဖိသီၣ်ဝဲလီၤ.+

၃၆ “နကဘၣ်တ့ ထူစီဘ့ၣ်ဘၣ်လၢ အကပြုၢ်ကပြီၤ တဘ့ၣ်လီၤ. ဒီးလၢအလိၤန့ၣ်​ နကဘၣ်​ စိးပျၤဝဲ လံာ်မဲာ်ဖျၢၣ်​ လၢအမ့ၢ် ‘ယဟိဝၤယွၤ မ့ၢ်တၢ်စီဆှံ အဂံၢ်ခီၣ်ထံးလီၤ.’+ ၃၇ ဒီးနကဘၣ်စၢထီၣ်​ ထူစီဘ့ၣ်ဘၣ်​ လၢခိၣ်ဖၢၣ်လီၤဆီတဘ့ၣ်အလိၤ+ လၢပျံၤလၢ အလွဲၢ်လါအဲးတဘိ ဒီးအကဘၣ်အိၣ်လၢ ခိၣ်ဖၢၣ်လီၤဆီတဘ့ၣ်​ အမဲာ်ညါ ထီဘိလီၤ. ၃၈ ထူစီတဘ့ၣ်န့ၣ်​ ကဘၣ်အိၣ်လၢ စီၤအၤဟရိၣ်​ အခိၣ်တိသၣ်​ ဒီးဖဲပှၤတဂၤဂၤ မၤကမၣ်​ တၢ်စီဆှံတဖၣ်+ လၢပှၤအံၣ်စရ့လးဖိတဖၣ်​ လုၢ်ထီၣ်အီၤဒ် တၢ်ဟ့ၣ်စီဆှံတဖၣ်​ အသိးအခါ စီၤအၤဟရိၣ်​ ကဘၣ်ဟ့ၣ်တၢ်စံးဆၢလီၤ. ထူစီတဘ့ၣ်အံၤ ကဘၣ်အိၣ်လၢ စီၤအၤဟရိၣ်​ အခိၣ်တိသၣ်ထီဘိ ဒ်သိး အဝဲသ့ၣ်​ ကန့ၢ်ဘၣ်​ ယဟိဝၤယွၤ အတၢ်ဘၣ်သး အဂီၢ်လီၤ.

၃၉ “ဒီးနဘၣ်ထါ ဆ့ဖးထီ လီၤလီၤဆီဆီ တဘ့ၣ်လၢ တၢ်ကံးညာ်လၢအဂ့ၤ ဒီးထါခိၣ်ဖၢၣ်​ လီၤဆီတဘ့ၣ်လၢ တၢ်ကံးညာ်လၢအဂ့ၤ ဒီးနဘၣ်ထါစ့ၢ်ကီး ယီၢ်တကိးလၢ ဆ့ဖးထီအဂီၢ်လီၤ.+

၄၀ “လၢစီၤအၤဟရိၣ်​ အဖိခွါတဖၣ်​ အဂီၢ်န့ၣ်​ နကဘၣ်ထါစ့ၢ်ကီး ဆ့ဖးထီတဖၣ်, ယီၢ်တကိးတဖၣ်လၢ ဆ့ဖးထီအဂီၢ် ဒီးခိၣ်ဖၢၣ်တဖၣ်+ လၢအဃံအလၤ ဒီးအဖျါလီၤပာ်ကဲလီၤ.+ ၄၁ နကဘၣ်​ ဒုးသိးထီၣ်​ နဒီပုၢ်ဝဲၢ်ခွါ စီၤအၤဟရိၣ်​ ဒီးအဖိခွါတဖၣ်​ ဒီးနကဘၣ်​ ဒိးဖှူအဝဲသ့ၣ်,+ ပာ်ထီၣ်အဝဲသ့ၣ်​ ဒ်ပှၤလုၢ်တၢ်ဒိၣ်တဖၣ်အသိး+ ဒီးပာ်စီဆှံ အဝဲသ့ၣ်​ ဒီးအဝဲသ့ၣ်​ ကမၤတၢ်ဒ် ပှၤလုၢ်တၢ်ဒိၣ်တဖၣ်​ လၢယဂီၢ်လီၤ. ၄၂ ဒီးထါစ့ၢ်ကီး ဖျီၣ်ခံဖုၣ်ခီၣ်​ လၢအညၣ်ဂ့ၤ ဒ်သိး အဝဲသ့ၣ်​ ကကးဘၢ အတၢ်အဂီၢ်လီၤ.+ ဖျီၣ်ခံဖုၣ်ခီၣ်တဖၣ်အံၤ ကဘၣ်​ ကးဘၢဝဲ အယီၢ်ဒ့ တုၤလီၤလၢ အခီၣ်ကံၣ်ဒုၣ်လီၤ. ၄၃ ဒ်သိး စီၤအၤဟရိၣ်​ ဒီးအဖိခွါတဖၣ်​ သုတဘၣ်​ တၢ်ကမၣ်​ ဒီးသုတသံတဂ့ၤအဂီၢ် အဝဲသ့ၣ်​ ကဘၣ်ကူထီၣ်သိးထီၣ်​ တၢ်သ့ၣ်တဖၣ်အံၤ ဖဲအဝဲသ့ၣ်​ လဲၤနုာ်လၢ တၢ်အိၣ်ဖှိၣ်​ အဒဲပူၤမ့ၢ်ဂ့ၤ သုးဘူးအသးဆူ တၢ်လုၢ်လီၢ် ဒ်သိး ကမၤတၢ်အခ့အပှၤ အတၢ်မၤလၢ တၢ်စီဆှံအလီၢ်မ့ၢ်ဂ့ၤ အခါန့ၣ်လီၤ. အဝဲအံၤ မ့ၢ်တၢ်သိၣ်တၢ်သီ လၢအဂၢၢ်ကျၢၤ လၢစီၤအၤဟရိၣ်​ ဒီးအဖိအလံၤ* လၢခံတဖၣ်​ အဂီၢ်လီၤ.

၂၉ “ဒ်သိး နကပာ်စီဆှံ အဝဲသ့ၣ်​ ဒ်ယပှၤလုၢ်တၢ်ဒိၣ်တဖၣ်​ အသိးအဂီၢ် နကဘၣ်မၤ ဒ်အံၤလီၤ. ဟံးန့ၢ်ကျီၢ်ဖါဖိတဒု, သိဖါလၢ အလၢအပှဲၤခံဒု,+ ၂ ကိၣ်လၢ အတပၣ်ဒီး ကိၣ်မံၣ်ဘၣ်, ကိၣ်လၢ အတပၣ်ဒီး ကိၣ်မံၣ်ဘၣ်​ လၢအဘၣ်တၢ်တ့အီၤ ဃုာ်ဒီးသိ ဒီးအလီၤဂာ်ဒ် ကိၣ်ထံဖှံၣ်အသိး ဒီးကိၣ်ဘူဘူဖိလၢ အတပၣ်ဒီး ကိၣ်မံၣ်ဘၣ်လၢ တၢ်ဖှူအီၤ လၢသိန့ၣ်တက့ၢ်.+ နဘၣ်တ့အီၤလၢ ဘုကၠူၣ်ကမူၣ်​ လၢအဂ့ၤလီၤ. ၃ ဒီးနဘၣ်ဒၢနုာ် တၢ်သ့ၣ်တဖၣ်အံၤလၢ နာ်တဖျၢၣ်အပူၤ ဒီးဟဲစိာ်အီၤလၢ နာ်ပူၤ+ ဒီးနဘၣ်​ ဟဲစိာ်အီၤဃုာ်ဒီး ကျီၢ်ဖါဖိတဒု ဒီးသိဖါခံဒုလီၤ.

၄ “နကဘၣ်ဟဲကိး စီၤအၤဟရိၣ်​ ဒီးအဖိခွါတဖၣ်​ လၢတၢ်အိၣ်ဖှိၣ်​ အဒဲ အတၢ်နုာ်လီၤအလီၢ်+ ဒီးမၤကဆှီ အဝဲသ့ၣ်​ လၢထံလီၤ.*+ ၅ နကဘၣ်ဟဲစိာ် တၢ်ကူတၢ်သိးတဖၣ်+ ဒီးဒုးသိးထီၣ်​ စီၤအၤဟရိၣ်လၢ ဆ့ဖးထီ, ဆ့ကၤလၢ အစုဒုၣ်တအိၣ်ဘၣ်​ လၢကဘၣ်တၢ်သိးအီၤ လၢအ့ဖိး အဖီလာ်, အ့ဖိး ဒီးထၢၣ်ဖိ* ဒီးနကဘၣ်စၢထီၣ်​ အယီၢ်ဒ့လၢ ယီၢ်တကိးလၢ အအိၣ်လၢ အ့ဖိးအလိၤ ကျၢၤကျၢၤလီၤ.+ ၆ နကဘၣ်​ ဖၢၣ်အခိၣ်လၢ ခိၣ်ဖၢၣ်လီၤဆီတဘ့ၣ်န့ၣ်​ ဒီးထီထီၣ်​ တၢ်ပနီၣ်စီဆှံတခါ* လၢခိၣ်ဖၢၣ်လီၤဆီတဘ့ၣ်​ အလိၤလီၤ.+ ၇ ဒီးနကဘၣ်ဟံးန့ၢ် သိလၢတၢ်ဒိးဖှူတၢ်အဂီၢ်+ ဒီးလူလီၤအီၤလၢ အခိၣ်လိၤ ဒီးဒိးဖှူအီၤလီၤ.+

၈ “ဝံၤဒီး ဟဲကိး အဖိခွါတဖၣ်​ ဒီးဒုးသိးထီၣ်​ အဝဲသ့ၣ်လၢ ဆ့ဖးထီတဖၣ်+ ၉ ဒီးစၢထီၣ်​ ယီၢ်တကိးလၢ ဆ့ဖးထီအဂီၢ်လၢ စီၤအၤဟရိၣ်​ ဒီးအဖိခွါတဖၣ်​ အယီၢ်ဒ့ ဒီးဒုးဖၢၣ်ထီၣ်​ အဝဲသ့ၣ်​ အခိၣ်တဖၣ်လၢ ခိၣ်ဖၢၣ်တက့ၢ်. ဒ်သိး နကပာ်ထီၣ်​ စီၤအၤဟရိၣ်​ ဒီးအဖိခွါတဖၣ်​ ဒ်ပှၤလုၢ်တၢ်ဒိၣ်တဖၣ်​ အသိးအဂီၢ် နကဘၣ်မၤ ဒ်န့ၣ်လီၤ.+ အဝဲသ့ၣ်​ ကကဲထီၣ်​ ပှၤလုၢ်တၢ်ဒိၣ်​ ဒီးအဝဲအံၤမ့ၢ် ယတၢ်သိၣ်တၢ်သီ လၢအဂၢၢ်ကျၢၤလီၤ.+

၁၀ “နကဘၣ်​ ဟဲမူၤကျီၢ်ဖါတဒု လၢတၢ်အိၣ်ဖှိၣ်​ အဒဲအမဲာ်ညါ ဒီးစီၤအၤဟရိၣ်​ ဒီးအဖိခွါတဖၣ်​ ကပာ်အစုလၢ ကျီၢ်ဖါတဒုအံၤ အခိၣ်လိၤလီၤ.+ ၁၁ နကဘၣ်​ မၤသံကျီၢ်ဖါတဒုအံၤ လၢယဟိဝၤယွၤ အမဲာ်ညါ ဖဲတၢ်အိၣ်ဖှိၣ်​ အဒဲ အတၢ်နုာ်လီၤ အလီၢ်လီၤ.+ ၁၂ ထိးန့ၢ် ကျီၢ်ဖါအသွံၣ်တနီၤ လၢနစုနၢ ဒီးထွါအီၤလၢ တၢ်လုၢ်လီၢ် အနၢၤတဖၣ်အလိၤ+ ဒီးတၢ်သွံၣ်လၢ အအိၣ်တ့ၢ်ခဲလၢာ်န့ၣ်​ လူလီၤအီၤလၢ တၢ်လုၢ်လီၢ် အခီၣ်ထံးတက့ၢ်.+ ၁၃ ဒီးနဘၣ်ဟံးန့ၢ် အသိလၢ+ အအိၣ်လၢ အပှံာ်လိၤခဲလၢာ်, အသိလၢ အအိၣ်လၢ အသူၣ်လိၤ ဒီးအကလ့ၢ်ခံဖျၢၣ်​ ဃုာ်ဒီးသိလၢ အအိၣ်လၢအလိၤ ဒီးနကဘၣ်​ ဒွဲၣ်အူထီၣ်အီၤ ဒ်သိး အကခုၣ်ထီၣ်လၢ တၢ်လုၢ်လီၢ် အဖီခိၣ်​ အဂီၢ်လီၤ.+ ၁၄ ဘၣ်ဆၣ်​ ကျီၢ်ဖါအညၣ်, အဘ့ၣ်​ ဒီးအအ့ၣ်တဖၣ်န့ၣ်​ ဒွဲၣ်အူထီၣ်အီၤလၢ ဒဲကဝီၤအချၢတက့ၢ်. ကျီၢ်ဖါတဒုအံၤ မ့ၢ်တၢ်လုၢ်လၢ တၢ်ဒဲးဘး အဂီၢ်လီၤ.

၁၅ “ဝံၤဒီး ဟဲမူၤသိဖါတဒုတက့ၢ်. ဒီးစီၤအၤဟရိၣ်​ ဒီးအဖိခွါတဖၣ်​ ကဘၣ်ပာ်အစု လၢသိဖါတဒုအံၤ အခိၣ်လိၤလီၤ.+ ၁၆ ဒီးနကဘၣ်မၤသံ သိဖါတဒုအံၤ ဒီးဟံးန့ၢ်အသွံၣ်​ ဒီးဖှံအီၤလၢ တၢ်လုၢ်လီၢ်အလိၤ ကိးကပၤဒဲးလီၤ.+ ၁၇ ဒီးနဘၣ်ဒီၣ်တဲာ်သိဖါ တကူာ်တကူာ် ဒီးသ့စီအပှံာ်+ ဒီးအခီၣ်​ ဒီးရဲၣ်လီၤအကူာ်တဖၣ်​ ဃုာ်ဒီး အခိၣ်သၣ်ဃံလီၤ. ၁၈ နကဘၣ်​ ဒွဲၣ်အူထီၣ်သိဖါ ဒီတဒု ဒ်သိး အကခုၣ်ထီၣ်လၢ တၢ်လုၢ်လီၢ် အဖီခိၣ်လီၤ. မ့ၢ်ဝဲ တၢ်လုၢ်ဒွဲၣ်အူလၢ ယဟိဝၤယွၤအဂီၢ် ဒီးမ့ၢ်ဝဲ တၢ်နၢမူလၢ အမၤမုာ်အသးလီၤ.+ ဒီးမ့ၢ်ဝဲ တၢ်လုၢ်လၢမ့ၣ်အူ လၢယဟိဝၤယွၤ အအိၣ်လီၤ.

၁၉ “ဝံၤဒီး နကဘၣ်​ ဟဲမူၤသိဖါ အဝဲတဒုလီၤ. ဒီးစီၤအၤဟရိၣ်​ ဒီးအဖိခွါတဖၣ်​ ကပာ်အစုလၢ သိဖါတဒုအံၤ အခိၣ်လိၤလီၤ.+ ၂၀ ဒီးနဘၣ်မၤသံသိဖါ ဒီးဟံးန့ၢ်အသွံၣ်တနီၤ ဒီးဖှူအီၤလၢ စီၤအၤဟရိၣ်​ ဒီးအဖိခွါတဖၣ်​ အနၢ်စဲၤလၢ အနၢ်ထွဲတခီ ဒီးလၢအဝဲသ့ၣ်​ အစုမုၢ်လၢ အစုထွဲတခီ ဒီးလၢအဝဲသ့ၣ်​ အခီၣ်မုၢ်လၢ အခီၣ်ထွဲတခီ ဒီးနဘၣ်​ ဖှံတၢ်သွံၣ်လၢ တၢ်လုၢ်လီၢ်အလိၤ ကိးကပၤဒဲးလီၤ. ၂၁ ဒီးဒ်သိး စီၤအၤဟရိၣ်​ ဒီးအတၢ်ကူတၢ်သိး ဒီးအဖိခွါတဖၣ်​ ဒီးအဝဲသ့ၣ်​ အတၢ်ကူတၢ်သိး ကစီဆှံအဂီၢ် နကဘၣ်​ ဟံးန့ၢ် တၢ်အသွံၣ်တနီၤ လၢအအိၣ်လၢ တၢ်လုၢ်လီၢ်ဖီခိၣ်​ ဒီးသိလၢ တၢ်ဒိးဖှူတၢ်အဂီၢ်တနီၤ+ ဒီးဖှံအီၤလၢ စီၤအၤဟရိၣ်​ ဒီးအတၢ်ကူတၢ်ကၤ အလိၤ ဒီးလၢစီၤအၤဟရိၣ်​ အဖိခွါ ဒီးအဝဲသ့ၣ်​ အတၢ်ကူတၢ်ကၤ အလိၤလီၤ.+

၂၂ “သိဖါတဒုအံၤ မ့ၢ်ဝဲသိဖါလၢ အဘၣ်တၢ်လုၢ်ထီၣ်အီၤလၢ တၢ်ပာ်ထီၣ်​ ပှၤလုၢ်တၢ်ဒိၣ်တဖၣ်​ အဂီၢ်အဃိ နဘၣ်ဟံးန့ၢ် သိဖါအံၤအသိ, အခံမဲၢ်လၢအဘီၣ်, အသိလၢ အအိၣ်လၢ အပှံာ်လိၤခဲလၢာ်, အသိလၢ အအိၣ်လၢ အသူၣ်လိၤ, အကလ့ၢ်ခံဖျၢၣ်​ ဃုာ်ဒီးသိလၢ အအိၣ်လၢအလိၤ+ ဒီးအခီၣ်ထွဲ တခီလီၤ.+ ၂၃ ဟံးန့ၢ်စ့ၢ်ကီး ကိၣ်လၢအကဝီၤတလိၣ်​ ဒီးကိၣ်လၢ အဘၣ်တၢ်တ့အီၤ ဃုာ်ဒီးသိ ဒီးအလီၤဂာ်ဒ် ကိၣ်ထံဖှံၣ်အသိး ဒီးကိၣ်ဘူဘူဖိတဘ့ၣ်လၢ အအိၣ်လၢ နာ်အပူၤတက့ၢ်. နာ်တဖျၢၣ်အံၤ အိၣ်ဝဲလၢ ယဟိဝၤယွၤ အမဲာ်ညါ ဒီးအိၣ်ဒီးကိၣ်လၢ အတပၣ်ဒီး ကိၣ်မံၣ်ဘၣ်န့ၣ်လီၤ. ၂၄ ဒီးနကဘၣ်ပာ်လီၤ ကိၣ်တဖၣ်န့ၣ်​ ခဲလၢာ်လၢ စီၤအၤဟရိၣ်​ ဒီးအဖိခွါတဖၣ်​ အစုပူၤလီၤ. ဒီးနကဘၣ်​ ဝံၢ်ဝၢ်အီၤ လၢအလီၢ်ခံဒီးအမဲာ်ညါ ဒ်တၢ်လုၢ်ဝံၢ်ဝၢ်အသိး လၢယဟိဝၤယွၤ အမဲာ်ညါလီၤ. ၂၅ ဒီးနဘၣ်ဟံးထီၣ်​ တၢ်သ့ၣ်တဖၣ်အံၤလၢ အဝဲသ့ၣ်​ အစုပူၤ ဒီးပာ်အီၤလၢ တၢ်လုၢ်ဒွဲၣ်အူ အဖီခိၣ်​ ဒီးဒွဲၣ်အူထီၣ်အီၤလၢ တၢ်လုၢ်လီၢ် အဖီခိၣ်​ ဒ်အမ့ၢ် တၢ်နၢမူလၢ အမၤမုာ် ယဟိဝၤယွၤ အသးလီၤ. ဒီးမ့ၢ်ဝဲ တၢ်လုၢ်လၢမ့ၣ်အူ လၢယဟိဝၤယွၤ အအိၣ်လီၤ.

၂၆ “သိဖါလၢ အဘၣ်တၢ်လုၢ်ထီၣ်အီၤ ဒ်သိး တၢ်ကပာ်ထီၣ်​ စီၤအၤဟရိၣ်​ ဒ်ပှၤလုၢ်တၢ်ဒိၣ်အသိး အဂီၢ်န့ၣ်​ နဘၣ်ဟံးန့ၢ် အသးနါပှၢ်+ ဒီးဝံၢ်ဝၢ်အီၤ လၢအလီၢ်ခံဒီးအမဲာ်ညါ ဒ်တၢ်လုၢ်ဝံၢ်ဝၢ်လၢ ယဟိဝၤယွၤ အမဲာ်ညါ ဒီးအကကဲထီၣ်​ နတၢ်လီၤ. ၂၇ ဒီးလၢသိဖါလၢ အဘၣ်တၢ်လုၢ်ထီၣ်အီၤ ဒ်သိး တၢ်ကပာ်ထီၣ်​ စီၤအၤဟရိၣ်​ ဒီးအဖိခွါတဖၣ်​ ဒ်ပှၤလုၢ်တၢ်ဒိၣ်တဖၣ်​ အဂီၢ်န့ၣ်​ နကဘၣ်​ ပာ်စီဆှံ အသးနါပှၢ်လၢ တၢ်လုၢ်ဝံၢ်ဝၢ်အဂီၢ် ဒီးအခီၣ်လၢ တၢ်လုၢ်စီဆှံအဂီၢ် လၢအမ့ၢ် တၢ်လၢအဘၣ်​ တၢ်ဝံၢ်ဝၢ်အီၤ ဒီးတၢ်လၢ အဘၣ်​ တၢ်ထုးထီၣ်အီၤလီၤ.+ ၂၈ ဒီးအမ့ၢ်ဝဲ တၢ်လုၢ်စီဆှံ ဒီးအကဘၣ်ကဲထီၣ်​ စီၤအၤဟရိၣ်​ ဒီးအဖိခွါတဖၣ်အတၢ် ဒ်အမ့ၢ် တၢ်သိၣ်တၢ်သီလၢ အဂၢၢ်အကျၢၤလၢ ပှၤအံၣ်စရ့လးဖိ ကဘၣ်မၤထွဲဝဲလီၤ.+ လၢပှၤအံၣ်စရ့လးဖိ အတၢ်လုၢ် အိၣ်ဃူအိၣ်ဖိးတဖၣ်အကျါန့ၣ်​ အဝဲသ့ၣ်​ ကဘၣ်ဟ့ၣ်လီၤ တၢ်လုၢ်စီဆှံအံၤ လၢယဟိဝၤယွၤ အဂီၢ်လီၤ.+

၂၉ “ဖဲစီၤအၤဟရိၣ်​ အဖိအလံၤ လၢခံတဖၣ်​ ဘၣ်တၢ်ဒိးဖှူအီၤ ဒီးဘၣ်တၢ်ပာ်ထီၣ်အီၤ ဒ်ပှၤလုၢ်တၢ်ဒိၣ်​ အသိးအခါ အဝဲသ့ၣ်​ ကသိးဝဲ+ စီၤအၤဟရိၣ်​ အတၢ်ကူတၢ်သိးစီဆှံတဖၣ်အံၤလီၤ.+ ၃၀ လၢစီၤအၤဟရိၣ်​ အဖိခွါ လၢအမ့ၢ် ပှၤလုၢ်တၢ်ဒိၣ်တဖၣ်အကျါ ပှၤလၢအထီၣ်​ စီၤအၤဟရိၣ်​ အလီၢ် ဒီးအလဲၤနုာ် မၤတၢ်အခ့အပှၤ အတၢ်မၤလၢ တၢ်အိၣ်ဖှိၣ်​ အဒဲပူၤ လၢတၢ်လီၢ်စီဆှံန့ၣ်​ ကဘၣ်သိးဝဲ တၢ်ကူတၢ်သိးတဖၣ်န့ၣ်​ နွံသီလီၤ.+

၃၁ “သိဖါလၢ အဘၣ်တၢ်လုၢ်ထီၣ်ပာ်စၢၤအီၤ အညၣ်လၢအအိၣ်တ့ၢ်န့ၣ်​ နကဘၣ်ဟံးန့ၢ်အီၤ ဒီးချီထီၣ်အီၤ ဖဲတၢ်စီဆှံ အလီၢ်လီၤ.+ ၃၂ စီၤအၤဟရိၣ်​ ဒီးအဖိခွါတဖၣ်​ ကဘၣ်အီၣ်ဝဲ+ သိဖါအညၣ်​ ဒီးကိၣ်လၢ အအိၣ်လၢနာ်ပူၤ ဖဲတၢ်အိၣ်ဖှိၣ်အဒဲ အတၢ်နုာ်လီၤ အလီၢ်န့ၣ်လီၤ. ၃၃ တၢ်လၢအဘၣ်​ တၢ်ဟ့ၣ်လုၢ်ထီၣ်အီၤလၢ တၢ်မၤဘၣ်လိာ်ဖိးဒ့က့ၤတၢ်အဂီၢ် ဒ်သိးကပာ်ထီၣ်အဝဲသ့ၣ်​ ဒ်ပှၤလုၢ်တၢ်ဒိၣ်အသိး ဒီးကပာ်စီဆှံအဝဲသ့ၣ်အဂီၢ်န့ၣ်​ အဝဲသ့ၣ်ကဘၣ်အီၣ်ဝဲလီၤ. မ့မ့ၢ် ပှၤလၢအတအိၣ်ဒီး တၢ်ခွဲးတၢ်ယာ်ဘၣ်န့ၣ်* တဘၣ်အီၣ်တၢ်သ့ၣ်တဖၣ်အံၤဘၣ်, မ့ၢ်လၢ တၢ်သ့ၣ်တဖၣ်အံၤ မ့ၢ်ဝဲတၢ်လၢအစီဆှံအဃိလီၤ.+ ၃၄ သိဖါလၢ အဘၣ်တၢ်လုၢ်ထီၣ်ပာ်စၢၤအီၤအညၣ်​ မ့တမ့ၢ် ကိၣ်​ မ့ၢ်အိၣ်တ့ၢ်ဒံး တုၤလၢဂီၤခီန့ၣ်​ နကဘၣ်​ ဒွဲၣ်အူထီၣ်ကွံာ်အီၤလၢ မ့ၣ်အူအပူၤလီၤ.+ မ့ၢ်လၢ အမ့ၢ်တၢ်လၢ အစီဆှံအဃိ ပှၤတဘၣ်အီၣ်အီၤဘၣ်.

၃၅ “ဒ်တၢ်ခဲလၢာ်လၢ ယမၤလိာ်ပာ်စၢၤနၤ အသိးန့ၣ်​ နကဘၣ်မၤ စီၤအၤဟရိၣ်​ ဒီးအဖိခွါတဖၣ်​ ဒ်န့ၣ်လီၤ. ဒ်သိး နကပာ်ထီၣ်​ အဝဲသ့ၣ်​ ဒ်ပှၤလုၢ်တၢ်ဒိၣ်​ အသိးအဂီၢ် တၢ်ဆၢကတီၢ် ကယံာ်ဝဲ နွံသီလီၤ.+ ၃၆ နဘၣ်ဟ့ၣ်လုၢ်ထီၣ်​ တၢ်လုၢ်တၢ်ဒဲးဘး အကျီၢ်ဖါ ကိးနံၤဒဲးလၢ တၢ်မၤဘၣ်လိာ်ဖိးဒ့က့ၤတၢ်အဂီၢ် ဒီးနဘၣ်မၤကဆှီထီၣ်​ တၢ်လုၢ်လီၢ်လၢ တၢ်ဒဲးဘး ဒီးနဘၣ်ဖှူ သိလၢအလိၤ ဒ်သိး နကပာ်စီဆှံအီၤ အဂီၢ်လီၤ.+ ၃၇ ဒ်သိး တၢ်လုၢ်လီၢ် ကဘၣ်လိာ်ဖိးဒ့က့ၤအဂီၢ် ကလိၣ်တၢ်ဆၢကတီၢ်နွံသီ ဒီးနကဘၣ်​ ပာ်စီဆှံအီၤ ဒ်သိး အကကဲထီၣ်​ တၢ်လုၢ်လီၢ် လၢအစီဆှံ နီၢ်ကီၢ်အဂီၢ်လီၤ.+ ပှၤတဂၤဂ့ၤတဂၤဂ့ၤ လၢအထိးဘၣ်​ တၢ်လုၢ်လီၢ်န့ၣ်​ ကဘၣ်မ့ၢ် ပှၤလၢအစီဆှံလီၤ.

၃၈ “လၢတၢ်လုၢ်လီၢ် အဖီခိၣ်န့ၣ်​ နကဘၣ်လုၢ်ထီၣ်​ သိဖါခံဒု လၢအသးအိၣ်တနံၣ်​ ကိးနံၤဒဲးလီၤ.+ ၃၉ လၢဂီၤခီန့ၣ်​ နကဘၣ်လုၢ်ထီၣ်​ သိဖါဖိတဒု ဒီးဖဲမုၢ်လီၤနုာ် အဆၢကတီၢ်န့ၣ်* နကဘၣ်လုၢ်ထီၣ်​ သိဖါဖိ အဝဲတဒုလီၤ.+ ၄၀ ဒီးကိၣ်ကမူၣ်လၢအဂ့ၤ တကံလိ* ဃါဃုာ်အသး ဒီးသ့ၣ်စၤယံးအသိစီ တလံးထၢၣ်* ဒီးစပံးထံ တလံးထၢၣ်​ လၢတၢ်လုၢ်တၢ်ပာ်အဂီၢ်န့ၣ်​ ကဘၣ်​ တၢ်ဟ့ၣ်လုၢ်ထီၣ်အီၤ ဃုာ်ဒီးသိဖါဖိ အဆိကတၢၢ် တဒုလီၤ. ၄၁ ဖဲမုၢ်လီၤနုာ် အဆၢကတီၢ်န့ၣ်​ နဘၣ်​ ဟ့ၣ်လုၢ်ထီၣ်​ သိဖါဖိ ခံဒုတဒု ဃုာ်ဒီးကိၣ်ကမူၣ်​ ဒီးစပံးထံလၢ တၢ်လုၢ်တၢ်ပာ်အဂီၢ် ဒ်လၢ ဂီၤခီအသိးလီၤ. ဒီးအမ့ၢ်ဝဲ တၢ်လုၢ်လၢမ့ၣ်အူ လၢယဟိဝၤယွၤအအိၣ်​ ဒီးတၢ်နၢမူလၢ အမၤမုာ်အသးလီၤ. ၄၂ ဖဲတၢ်အိၣ်ဖှိၣ်အဒဲ အတၢ်နုာ်လီၤအလီၢ် လၢယဟိဝၤယွၤ အမဲာ်ညါန့ၣ်​ တၢ်လုၢ်ဒွဲၣ်အူအံၤ ကဘၣ်တၢ်ဟ့ၣ်လုၢ်ထီၣ်အီၤ ထီဘိ တစိၤဘၣ်တစိၤလီၤ. ဖဲတၢ်လီၢ်ဝဲန့ၣ်​ ယကပာ်ဖျါထီၣ်ယသး လၢပှၤဂီၢ်မုၢ်အအိၣ်​ ဒ်သိး ယကတဲတၢ်ဒီးနၤ အဂီၢ်လီၤ.+

၄၃ “ယကပာ်ဖျါထီၣ်​ ယသးလၢ ပှၤအံၣ်စရ့လးဖိတဖၣ်​ အမဲာ်ညါ ဖဲန့ၣ်​ ဒီးခီဖျိလၢ ယတၢ်လၤကပီၤအဃိ တၢ်လီၢ်ဝဲန့ၣ်​ ကဘၣ်တၢ်ပာ်စီဆှံအီၤလီၤ.+ ၄၄ ယကပာ်စီဆှံ တၢ်အိၣ်ဖှိၣ်အဒဲ ဒီးတၢ်လုၢ်လီၢ် ဒီးယကပာ်စီဆှံ စီၤအၤဟရိၣ်​ ဒီးအဖိခွါတဖၣ်+ ဒ်သိး အဝဲသ့ၣ်​ ကကဲထီၣ်​ ယပှၤလုၢ်တၢ်ဒိၣ်​ တဖၣ်အဂီၢ်လီၤ. ၄၅ ယကအိၣ်လၢ ပှၤအံၣ်စရ့လးဖိတဖၣ်အကျါ ဒီးယကကဲထီၣ်​ အဝဲသ့ၣ်​ အကစၢ်ယွၤလီၤ.+ ၄၆ ဒီးအဝဲသ့ၣ်​ ကသ့ၣ်ညါဝဲ သပှၢ်ကတၢၢ်လၢ ယမ့ၢ် အဝဲသ့ၣ်​ အကစၢ် ယဟိဝၤယွၤ လၢအဒုးဟးထီၣ်​ အဝဲသ့ၣ်လၢ ကီၢ်အဲၤကူပတူးအပူၤ ဒ်သိးယကအိၣ်လၢ အဝဲသ့ၣ်​ အကျါလီၤ.+ ယမ့ၢ် အဝဲသ့ၣ်​ အကစၢ် ယဟိဝၤယွၤလီၤ.

၃၀ “နဘၣ်တ့ထီၣ်​ တၢ်လုၢ်လီၢ်လၢ သ့ၣ်ဖှ့ၡံးတၤ+ ဒ်အမ့ၢ် တၢ်လီၢ်လၢ တၢ်ကဒွဲၣ်ထီၣ်​ တၢ်နၢမူ အဂီၢ်လီၤ.+ ၂ တၢ်လုၢ်လီၢ်န့ၣ်​ အလဲၢ်ကဘၣ်အိၣ်​ တပျၢ်,* အဒီၣ်ဃီၤ ကဘၣ်အိၣ်​ တပျၢ် ဒီးကဘၣ်မ့ၢ် တၢ်လွံၢ်နၢၣ်လၢ အကနူၤ ထဲသိးလိာ်အသး ဒီးအကစီၤထီၣ်ထီ ကဘၣ်အိၣ်​ ခံပျၢ်လီၤ. ဒီးအနၢၤတဖၣ်န့ၣ်​ ကဘၣ်အိၣ်​ တဆဲးဃီဒီး တၢ်လုၢ်လီၢ်လီၤ.+ ၃ တၢ်လုၢ်လီၢ် အဖီခိၣ်, အကပၤ ကိးကပၤဒဲး ဒီးအနၢၤတဖၣ်န့ၣ်​ နကဘၣ်​ ကျးအီၤဒီး ထူစီကဘျၣ်တဖၣ်လီၤ. ဒီးနကဘၣ်​ ကျီၤဃာ်တၢ်လုၢ်လီၢ် အဖီခိၣ်​ အကနူၤဝးဝး လၢထူလီၤ. ၄ နကဘၣ်တ့ထီၣ်​ ထူအကွီၤခံကွီၤ ခံကွီၤ လၢတၢ်လုၢ်လီၢ် အခိၣ်လၢ အကျီၤဃာ်အသးအဖီလာ် ခံကပၤ ဒ်သိး ပှၤကဂိာ်နုာ် နီၣ်ယိးဘိလၢ ကယိးဝဲ တၢ်လုၢ်လီၢ် အဂီၢ်လီၤ. ၅ နကဘၣ်တ့ထီၣ်​ နီၣ်ယိးဘိတဖၣ်​ လၢသ့ၣ်ဖှ့ၡံးတၤ ဒီးနကဘၣ်​ ကျးအီၤဒီး ထူကဘျၣ်တဖၣ်လီၤ. ၆ ဒီးနဘၣ်​ ပာ်အီၤလၢ ယၣ်ဘျးသဒၢ အမဲာ်ညါ ဒ်သိး အကအိၣ်ဘူးဒီး တၢ်အၢၣ်လီၤအီလီၤ အတလါ အဂီၢ်လီၤ.+ ဒီးယကပာ်ဖျါထီၣ်​ ယသးလၢ နအိၣ်လၢ တၢ်အၢၣ်လီၤအီလီၤ အတလါ အခိၣ်ကျး အဖီခိၣ်လီၤ.+

၇ “ကိးဂီၤဒဲး ဖဲစီၤအၤဟရိၣ်+ ကတဲာ်ကတီၤထီၣ်​ မ့ၣ်အူဒၢ အခွးတဖၣ်အခါ+ အဝဲ ကဘၣ်ဒွဲၣ်ထီၣ်​ တၢ်နၢမူလၢ+ တၢ်လုၢ်လီၢ်အဖီခိၣ်+ ဒ်သိး အကခုၣ်ထီၣ်​ အဂီၢ်လီၤ. ၈ ဒီးဖဲစီၤအၤဟရိၣ်​ ဒွဲၣ်ကပီၤထီၣ်​ မ့ၣ်အူလၢ မ့ၣ်အူဒၢ အခွးတဖၣ်အပူၤ လၢမုၢ်လီၤနုာ် အဆၢကတီၢ်န့ၣ်* အကဘၣ်ဒွဲၣ်ထီၣ်​ တၢ်နၢမူ စ့ၢ်ကီးလီၤ. ဒီးမ့ၢ်ဝဲ တၢ်နၢမူလၢ အဘၣ်တၢ်ဟ့ၣ်လုၢ်ထီၣ်အီၤ ထီဘိလၢ ယဟိဝၤယွၤ အမဲာ်ညါ တစိၤဘၣ်တစိၤလီၤ. ၉ တၢ်နၢမူ လၢအလီၤတိၢ်လီၤဆီမ့ၢ်ဂ့ၤ,+ တၢ်လုၢ်ဒွဲၣ်အူမ့ၢ်ဂ့ၤ, တၢ်လုၢ်ဘု မ့ၢ်ဂ့ၤ နတဘၣ်​ ဟ့ၣ်လုၢ်ထီၣ်အီၤလၢ တၢ်လုၢ်လီၢ် အဖီခိၣ်တဂ့ၤ. ဒီးနတဘၣ်လူလီၤ စပံးထံလၢ တၢ်လုၢ်တၢ်ပာ်အဂီၢ် လၢတၢ်လုၢ်လီၢ် အဖီခိၣ်တဂ့ၤ. ၁၀ ဆၣ်ဖိကီၢ်ဖိလၢ အဘၣ်တၢ်လုၢ်ထီၣ်အီၤ ဒ်တၢ်လုၢ်လၢ တၢ်ဒဲးဘးအဂီၢ် အသွံၣ်တနီၤန့ၣ်​ စီၤအၤဟရိၣ်​ ကဘၣ်ထွါဝဲလၢ တၢ်လုၢ်လီၢ် အနၢၤတဖၣ်အလိၤ ဒ်သိး တၢ်လုၢ်လီၢ်ကဘၣ်လိာ်ဖိးဒ့က့ၤ အဂီၢ်လီၤ.+ ဒ်သိး တၢ်လုၢ်လီၢ် ကဘၣ်လိာ်ဖိးဒ့က့ၤအဂီၢ်န့ၣ်​ အကဘၣ်​ မၤဝဲဒ်အံၤ တနံၣ်တဘျီ တစိၤဘၣ်တစိၤလီၤ.+ တၢ်လုၢ်လီၢ်အံၤ မ့ၢ်ဝဲ တၢ်လၢအစီဆှံနီၢ်ကီၢ် လၢယဟိဝၤယွၤ အဂီၢ်လီၤ.”

၁၁ ဒီးယဟိဝၤယွၤ တဲဘၣ်​ စီၤမိၤၡ့လၢ ၁၂ “ဖဲနထၢ ပှၤအံၣ်စရ့လးဖိ အနီၣ်ဂံၢ်အခါ+ ပှၤတဂၤစုာ်စုာ်န့ၣ်​ ကဘၣ်ဟ့ၣ်​ ယဟိဝၤယွၤလၢ တၢ်ပှ့ၤက့ၤတခါလၢ အသးသမူအဂီၢ်လီၤ. ဖဲတၢ်ထၢ အဝဲသ့ၣ်​ အနီၣ်ဂံၢ်အခါန့ၣ်​ ဒ်သိးတၢ်နးတၢ်ဖှီၣ်​ သုတဘၣ်​ အဝဲသ့ၣ်​ နီတမံၤတဂ့ၤအဂီၢ် အဝဲသ့ၣ်​ ကဘၣ်မၤဝဲ ဒ်န့ၣ်လီၤ. ၁၃ ဖဲပှၤထၢပှၤနီၣ်ဂံၢ်အခါ ပှၤလၢအဘၣ်​ တၢ်ဂံၢ်ဃုာ်အီၤတဖၣ်န့ၣ်​ ဘၣ်ဟ့ၣ်​ စ့ၡက့လး* တဝာ် ဒ်တၢ်စီဆှံအလီၢ် အၡက့လး အသိးလီၤ.+ တၡက့လးန့ၣ်​ အလုၢ်အပှ့ၤ ထဲသိးဒီး က့ရၤခံဆံလီၤ.* စ့ၡက့လး တဝာ်န့ၣ်​ မ့ၢ်ဝဲ တၢ်မၤဘူၣ်လၢ ယဟိဝၤယွၤ အဂီၢ်လီၤ.+ ၁၄ ဒီးပှၤလၢအဘၣ်တၢ်ဂံၢ်ဃုာ်အီၤလၢ အသးအိၣ်အနံၣ်​ ၂၀ ဒီးဆူအဖီခိၣ်န့ၣ်​ ကဘၣ်ဟ့ၣ်​ တၢ်မၤဘူၣ်လၢ ယဟိဝၤယွၤ အဂီၢ်လီၤ.+ ၁၅ ဖဲသုဟ့ၣ်​ တၢ်မၤဘူၣ်လၢ ယဟိဝၤယွၤအအိၣ်လၢ ကပှ့ၤက့ၤသုသးသမူ အဂီၢ်အခါ ပှၤထူးပှၤတီၤန့ၣ်​ တဘၣ်ဟ့ၣ်တၢ် အါန့ၢ် စ့ၡက့လး* တဝာ် ဒီးပှၤလၢအဖှီၣ်န့ၣ်​ တဘၣ်ဟ့ၣ်တၢ် စှၤန့ၢ် စ့ၡက့လး တဝာ်ဘၣ်. ၁၆ စ့ညၣ်လၢ ကပှ့ၤက့ၤသးသမူအဂီၢ်န့ၣ်​ နကဘၣ်ဟံးန့ၢ်အီၤလၢ ပှၤအံၣ်စရ့လးဖိတဖၣ်အအိၣ်​ ဒီးဟ့ၣ်လီၤအီၤ ဒ်သိး ပှၤကသူအီၤလၢ တၢ်အိၣ်ဖှိၣ်အဒဲ အတၢ်မၤအဂီၢ်လီၤ. စ့ညၣ်တဖၣ်အံၤ ကမ့ၢ်ဝဲ တၢ်သ့ၣ်နီၣ်ထီၣ်​ လၢယဟိဝၤယွၤ အမဲာ်ညါ လၢပှၤအံၣ်စရ့လးဖိအဂီၢ် ဒီးကကဲထီၣ်​ တၢ်ပှ့ၤက့ၤတခါလၢ သုသးသမူ အဂီၢ်လီၤ.”

၁၇ ယဟိဝၤယွၤ ဆဲးတဲ စီၤမိၤၡ့လၢ ၁၈ “နဘၣ်တ့ထီၣ်​ ထံဒၢဖးဒိၣ်​ ဒီးတၢ်တီၣ်ထီၣ်​ ထံဒၢအလီၢ် လၢတိၢ်ဘီ ဒ်သိး ပှၤကသ့စီတၢ် အဂီၢ်လီၤ.+ ဒီးနဘၣ်ပာ်အီၤလၢ တၢ်အိၣ်ဖှိၣ်အဒဲ ဒီးတၢ်လုၢ်လီၢ် အဘၢၣ်စၢၤ ဒီးနဘၣ်လူလီၤထံ လၢအပူၤလီၤ.+ ၁၉ စီၤအၤဟရိၣ်​ ဒီးအဖိခွါတဖၣ်​ ကသ့အစုအခီၣ်​ ဖဲန့ၣ်လီၤ.+ ၂၀ ဖဲအဝဲသ့ၣ်​ လဲၤနုာ်လီၤလၢ တၢ်အိၣ်ဖှိၣ်​ အဒဲပူၤ မ့တမ့ၢ် ဖဲအဝဲသ့ၣ်​ လဲၤဘူးထီၣ်ဒီး တၢ်လုၢ်လီၢ် ဒ်သိး ကမၤတၢ်အခ့အပှၤ အတၢ်မၤ ဒီးလုၢ်ထီၣ်တၢ်လၢမ့ၣ်အူ ဒ်သိး တၢ်အခုၣ်ကထီၣ်​ လၢယဟိဝၤယွၤ အအိၣ်အခါ အဝဲသ့ၣ်​ ကဘၣ်​ မၤကဆှီအသးလၢထံ ဒ်သိး အသုတသံတဂ့ၤ အဂီၢ်လီၤ. ၂၁ ဒ်သိး အဝဲသ့ၣ်​ သုတသံတဂ့ၤအဂီၢ် အဝဲသ့ၣ်​ ကဘၣ်သ့စုသ့ခီၣ်လီၤ. အဝဲအံၤမ့ၢ် တၢ်သိၣ်တၢ်သီလၢ အဂၢၢ်အကျၢၤလၢ စီၤအၤဟရိၣ်​ ဒီးအဖိအလံၤတဖၣ်အဂီၢ် တစိၤဘၣ်တစိၤလီၤ.”+

၂၂ ယဟိဝၤယွၤ ဆဲးတဲ စီၤမိၤၡ့လၢ ၂၃ “ဝံၤဒီး ဟံးန့ၢ်တၢ်နၢမူ လၢအဂ့ၤကတၢၢ်တဖၣ်​ လၢအမ့ၢ် မူရၣ်လၢ အကိၣ်လိၣ်ထီၣ်​ လီၤတယၢၢ် အၡက့လး ၅၀၀, ကဒါရၤလၢအဆၢ အၡက့လး ၂၅၀ ဒီးလီၢ်ဟ့ၣ်​ အၡက့လး ၂၅၀, ၂၄ ဒီးကဒါနါ အဂၤတကလုာ်* အၡက့လး ၅၀၀ ဒ်တၢ်စီဆှံအလီၢ် အၡက့လးအသိး+ ဒီးသ့ၣ်စၤယံးအသိ သၢလံးထၢၣ်ဒီးတဝာ်လီၤ.* ၂၅ ဒီးနဘၣ်ဃါဃုာ် တၢ်သ့ၣ်တဖၣ်အံၤ ဂ့ၤဂ့ၤ ဒီးဒုးကဲထီၣ်အီၤလၢ သိစီဆှံလၢ တၢ်ဒိးဖှူတၢ် အဂီၢ်လီၤ.+ တၢ်အဝဲအံၤ ကဘၣ်မ့ၢ် သိစီဆှံ လၢတၢ်ဒိးဖှူတၢ် အဂီၢ်လီၤ.

၂၆ “ဒီးနကဘၣ်​ ဒိးဖှူတၢ်အိၣ်ဖှိၣ်အဒဲ+ ဒီးတၢ်အၢၣ်လီၤအီလီၤ အတလါ လၢသိအံၤ ၂၇ ဃုာ်ဒီး စီၢ်နီၤခိၣ်​ ဒီးအတၢ်ပီးတၢ်လီခဲလၢာ်, မ့ၣ်အူဒၢ ဒီးအတၢ်ပီးတၢ်လီတဖၣ်, တၢ်လုၢ်လီၢ်လၢ တၢ်ဒွဲၣ်ထီၣ်​ တၢ်နၢမူအဂီၢ်, ၂၈ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ်, ထံဒၢဖးဒိၣ်​ ဒီးတၢ်တီၣ်ထီၣ်ထံဒၢ အလီၢ်လီၤ. ၂၉ နကဘၣ်​ ပာ်စီဆှံ တၢ်သ့ၣ်တဖၣ်အံၤခဲလၢာ် ဒ်သိး အကကဲထီၣ်​ တၢ်လၢအစီဆှံနီၢ်ကီၢ် အဂီၢ်လီၤ.+ ပှၤတဂၤဂ့ၤတဂၤဂ့ၤလၢ အထိးဘၣ်​ တၢ်သ့ၣ်တဖၣ်အံၤန့ၣ်​ ကဘၣ်မ့ၢ် ပှၤလၢအစီဆှံလီၤ.+ ၃၀ ဒီးနဘၣ်ဒိးဖှူ စီၤအၤဟရိၣ်+ ဒီးအဖိခွါတဖၣ်+ ဒီးပာ်စီဆှံ အဝဲသ့ၣ်​ ဒ်သိး ကကဲထီၣ်​ ယပှၤလုၢ်တၢ်ဒိၣ်တဖၣ်​ အဂီၢ်လီၤ.+

၃၁ “နဘၣ်တဲ ပှၤအံၣ်စရ့လးဖိလၢ ‘တၢ်အဝဲအံၤ ကဘၣ်မ့ၢ် သိစီဆှံလၢ ယမဲာ်ညါ တစိၤဘၣ်တစိၤလီၤ.+ ၃၂ သိစီဆှံအံၤ တဘၣ်ဖှူအီၤလၢ ပှၤဂၤအလိၤတဂ့ၤ. ဒီးသုတဘၣ်​ ဃါဃုာ်တၢ် ဒ်သိး သုကဒုးကဲထီၣ်​ တၢ်လၢအလီၤဂာ်ဒီးအီၤ နီတမံၤတဂ့ၤ. အမ့ၢ်တၢ်လၢ အစီဆှံ ဒီးအကဘၣ်ဆဲးကဲ တၢ်လၢအစီဆှံလၢ သုမဲာ်ညါလီၤ. ၃၃ ပှၤတဂၤဂ့ၤတဂၤဂ့ၤ မ့ၢ်တ့ထီၣ်သိလၢ အလီၤဂာ်ဒီး သိစီဆှံအံၤ ဒီးဖှူဝဲ ပှၤလၢအတအိၣ်ဒီး တၢ်ခွဲးတၢ်ယာ်ဘၣ်န့ၣ်* ကဘၣ်တၢ်မၤသံအီၤလီၤ.’”+

၃၄ ယဟိဝၤယွၤ တဲဘၣ်​ စီၤမိၤၡ့လၢ “တၢ်နၢမူလၢအမ့ၢ် သ့ၣ်နၤအထုး, သ့ၣ်ၡဃ့လ့းအထုး, သ့ၣ်သံခိၣ်ဝါအထုး ဒီးလီၢ်ဘၣ်န့ၣ်​ ဟံးန့ၢ်အီၤ ပှဲၤသိးသိးတက့ၢ်.+ ၃၅ ဒီးဃါဃုာ် တၢ်နၢမူတဖၣ်အံၤ ဂ့ၤဂ့ၤ+ ဒီးထၢနုာ်အံသၣ်+ ဒ်သိး တၢ်နၢမူအံၤ ကကဆှီ ဒီးစီဆှံဝဲ အဂီၢ်တက့ၢ်. ၃၆ ဒီးတနီၤန့ၣ်​ နဘၣ်တိၢ်အီၤ တုၤလၢ အလီၤကမူၣ်ဂ့ၤဂ့ၤ ဝံၤဒီး တနီၤန့ၣ်​ နကဘၣ်​ ပာ်အီၤလၢ တၢ်အၢၣ်လီၤအီလီၤ အတလါ အမဲာ်ညါ လၢတၢ်အိၣ်ဖှိၣ်​ အဒဲပူၤ ဖဲယကပာ်ဖျါထီၣ်ယသး လၢနအိၣ်​ အလီၢ်လီၤ. ဒီးအကဘၣ်မ့ၢ် တၢ်လၢ အစီဆှံနီၢ်ကီၢ် လၢသုမဲာ်ညါလီၤ. ၃၇ သုတဘၣ်​ ဃါဃုာ်တၢ်ဒီး တ့ထီၣ်​ တၢ်နၢမူဒ်အံၤ လၢသုနီၢ်ကစၢ် အဂီၢ်တဂ့ၤ.+ နကဘၣ်​ ပာ်ပနီၣ်အီၤ ဒ်တၢ်လၢ အစီဆှံလၢ ယဟိဝၤယွၤ အမဲာ်ညါလီၤ. ၃၈ ပှၤတဂၤဂ့ၤ တဂၤဂ့ၤ လၢအတ့ထီၣ်​ တၢ်နၢမူဒ်အံၤတကလုာ် ဒ်သိးအကနၢဝဲ အဂီၢ်န့ၣ်​ ကဘၣ်တၢ်မၤသံအီၤလီၤ.”

၃၁ ယဟိဝၤယွၤ ဆဲးတဲ စီၤမိၤၡ့လၢ ၂ “ယဃုထၢထီၣ်​ စီၤဘစၤလအ့လး+ လၢယူဒၤ အဒူၣ်အကျါလီၤ. အဝဲမ့ၢ် စီၤအူရံၤ အဖိခွါ ဒီးစီၤဃူၢ် အလံၤခွါလီၤ.+ ၃ ဒီးယကမၤပှဲၤအီၤဒီး ယသးစီဆှံ* ဒ်သိး အကအိၣ်ဒီး တၢ်ကူၣ်သ့, တၢ်နၢ်ပၢၢ် ဒီးတၢ်သ့ၣ်ညါ ဘၣ်ဃးဒီး စုသ့တၢ်မၤ ကိးမံၤဒဲး ၄ ဒ်သိး အကကူၣ်ထီၣ်ဖးလီၤတၢ်လၢ အကတ့ထီၣ်တၢ် ဃံဃံလၤလၤ, ကမၤတၢ်လၢထူ, စ့ညၣ်​ ဒီးတိၢ်ဘီ, ၅ ဒီးကပိာ် လၢၢ်လုၢ်ဒိၣ်ပှ့ၤဒိၣ်တဖၣ်​ ဒီးကထီထီၣ်အီၤ+ ဒီးကတ့ထီၣ်​ တၢ်ဖိတၢ်လံၤလၢ ပှၤဘၣ်တ့အီၤလၢသ့ၣ်​ ကိးမံၤဒဲး အဂီၢ်လီၤ.+ ၆ ဒီးယဃုထၢထီၣ် စီၤအဃံစမး အဖိခွါ စီၤအၤဟလံအာ်+ လၢဒၣ်အဒူၣ်အကျါ ဒ်သိး အကမၤစၢၤ စီၤဘစၤလအ့လး အဂီၢ်လီၤ. ဒီးပှၤလၢအအိၣ်ဒီး တၢ်သ့တၢ်ဘၣ်တဖၣ်န့ၣ်​ ယကဟ့ၣ်လီၤ အဝဲသ့ၣ်​ တၢ်ကူၣ်သ့ ဒ်သိးအဝဲသ့ၣ်​ တ့ထီၣ်တၢ်လၢ ယမၤလိာ်နၤ ကိးမံၤဒဲး ကသ့အဂီၢ်လီၤ.+ ၇ တၢ်သ့ၣ်တဖၣ်အံၤ မ့ၢ်ဝဲ တၢ်အိၣ်ဖှိၣ်အဒဲ,+ တၢ်အၢၣ်လီၤအီလီၤ အတလါ+ ဒီးအခိၣ်ကျး,+ ဒဲအတၢ်ဖိတၢ်လံၤခဲလၢာ်, ၈ စီၢ်နီၤခိၣ်+ ဒီးအတၢ်အပီးအလီတဖၣ်, မ့ၣ်အူဒၢထူစီ ဒီးအတၢ်ပီးတၢ်လီခဲလၢာ်,+ တၢ်လုၢ်လီၢ်လၢ တၢ်ဒွဲၣ်ထီၣ်​ တၢ်နၢမူအဂီၢ်,+ ၉ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ်+ ဒီးအတၢ်ပီးတၢ်လီခဲလၢာ်, ထံဒၢဖးဒိၣ်​ ဒီးတၢ်တီၣ်ထီၣ်​ ထံဒၢအလီၢ်,+ ၁၀ တၢ်ကူတၢ်သိးတဖၣ်လၢ အဘၣ်တၢ်ထါအီၤဂ့ၤဂ့ၤ, ပှၤလုၢ်တၢ်ဒိၣ်​ စီၤအၤဟရိၣ်​ အတၢ်ကူတၢ်သိး စီဆှံတဖၣ်, စီၤအၤဟရိၣ်​ အဖိခွါတဖၣ်​ အတၢ်ကူတၢ်သိးလၢ အဝဲသ့ၣ်​ ကမၤတၢ်ဒ် ပှၤလုၢ်တၢ်ဒိၣ်တဖၣ်အဂီၢ်,+ ၁၁ သိလၢ တၢ်ဒိးဖှူတၢ်အဂီၢ် ဒီးတၢ်နၢမူလၢ တၢ်စီဆှံအလီၢ် အဂီၢ်လီၤ.+ အဝဲသ့ၣ်​ ကမၤတၢ်လၢ ယမၤလိာ်နၤ ခဲလၢာ်လီၤ.”

၁၂ ယဟိဝၤယွၤ ဆဲးတဲစီၤမိၤၡ့လၢ ၁၃ “တဲဘၣ်​ ပှၤအံၣ်စရ့လးဖိလၢ ‘သုကဘၣ်​ မၤထွဲ ယတၢ်သိၣ်တၢ်သီလၢ အဘၣ်ဃးဒီး မုၢ်အိၣ်ဘှံးနံၤ လီၤတံၢ်လီၤဆဲးလီၤ.+ ဒ်သိး သုကသ့ၣ်ညါလၢ ယၤ, ယဟိဝၤယွၤအံၤ ပာ်စီဆှံသုအဂီၢ် အဝဲအံၤ မ့ၢ်တၢ်ပနီၣ်လၢ ယၤဒီးသု အဘၢၣ်စၢၤ တစိၤဘၣ်တစိၤလီၤ. ၁၄ သုကဘၣ်​ မၤထွဲ မုၢ်အိၣ်ဘှံးနံၤ အတၢ်သိၣ်တၢ်သီ, မ့ၢ်လၢ အမ့ၢ်တၢ်လၢ အစီဆှံ လၢသုဂီၢ် အဃိလီၤ.+ ပှၤလၢ အတမၤထွဲ မုၢ်အိၣ်ဘှံးနံၤ အတၢ်သိၣ်တၢ်သီဘၣ်န့ၣ်​ ကဘၣ်တၢ်မၤသံအီၤလီၤ. ပှၤလၢအမၤတၢ်မၤ ဖဲမုၢ်အိၣ်ဘှံးနံၤန့ၣ်​ ကဘၣ်​ တၢ်မၤသံအီၤလီၤ.+ ၁၅ သုအိၣ်ဒီး မုၢ်နံၤဃုသီ လၢသုကမၤတၢ်မၤ အဂီၢ်လီၤ. ဘၣ်ဆၣ်​ နွံသီတသီန့ၣ်​ မ့ၢ်တၢ်အိၣ်ဘှံးအနံၤ+ လၢအမ့ၢ် မုၢ်နံၤစီဆှံ လၢယဟိဝၤယွၤ အဂီၢ်လီၤ. ပှၤတဂၤဂ့ၤတဂၤဂ့ၤ လၢအမၤတၢ် ဖဲမုၢ်အိၣ်ဘှံးနံၤန့ၣ်​ ကဘၣ်တၢ်မၤသံအီၤလီၤ. ၁၆ ပှၤအံၣ်စရ့လးဖိ ကဘၣ်မၤထွဲ မုၢ်အိၣ်ဘှံးနံၤ အတၢ်သိၣ်တၢ်သီ တစိၤဘၣ်တစိၤလီၤ. တၢ်အဝဲန့ၣ်​ မ့ၢ်ဝဲ တၢ်အၢၣ်လီၤအီလီၤ လၢအဂၢၢ်အကျၢၤလီၤ. ၁၇ ဒီးမ့ၢ်ဝဲ တၢ်ပနီၣ်လၢ အဂၢၢ်ကျၢၤတမံၤ လၢယၤဒီး ပှၤအံၣ်စရ့လးဖိတဖၣ်​ အဘၢၣ်စၢၤ,+ မ့ၢ်လၢ ယဟိဝၤယွၤ တ့လီၤမူခိၣ်ဒီးဟီၣ်ခိၣ်​ လၢဃုသီအတီၢ်ပူၤ ဒီးဖဲနွံသီတသီန့ၣ်​ အအိၣ်ဘှံးဝဲ အဃိလီၤ.’”+

၁၈ ဖဲကစၢ်ယွၤ တဲတၢ်ဒီး စီၤမိၤၡ့ လၢကစၢၢ်စံၤနါ ဝံၤအခါ အဝဲဟ့ၣ်လီၤ စီၤမိၤၡ့လၢ တၢ်အၢၣ်လီၤအီလီၤ အလၢၢ်ဘ့ၣ်ဘၣ်ခံဘ့ၣ်+ လၢအကွဲးလီၤဝဲလၢ အစုလီၤ.*+

၃၂ ဒီးပှၤဂီၢ်မုၢ် ထံၣ်ဝဲလၢ စီၤမိၤၡ့ အိၣ်ဝဲလၢ ကစၢၢ်လိၤဖးယံာ် ဒီးအတဟဲက့ၤလီၤဒံးဘၣ်.+ အဃိ ပှၤဂီၢ်မုၢ် အိၣ်ဝးတရံးစီၤအၤဟရိၣ်​ ဒီးတဲအီၤလၢ “တၢ်လၢ စီၤမိၤၡ့တဂၤအံၤ လၢအဒုးဟးထီၣ်ပှၤလၢ ကီၢ်အဲၤကူပတူး အပူၤန့ၣ်​ တၢ်မၤအသးဒီးအီၤ ဒ်လဲၣ်​ ပတသ့ၣ်ညါဘၣ်. အဃိ တ့ထီၣ်န့ၢ်ပှၤ ယွၤတဂၤလၢ အကလဲၤတၢ်လၢ ပမဲာ်ညါသၢၤ.”+ ၂ ဖဲန့ၣ်န့ၣ်​ စီၤအၤဟရိၣ်​ တဲဘၣ်အဝဲသ့ၣ်လၢ “ဟံးန့ၢ် နၢ်ဒံးထူလၢ+ သုမါ, သုဖိခွါ ဒီးသုဖိမုၣ်အအိၣ်​ ဒီးဟဲစိာ်လၢ ယအိၣ်တက့ၢ်.” ၃ အဃိ ပှၤဂီၢ်မုၢ်ခဲလၢာ် ဘ့ၣ်လီၤကွံာ် အနၢ်ဒံးထူ လၢအနၢ်လိၤ ဒီးဟဲစိာ်ဝဲလၢ စီၤအၤဟရိၣ်​ အအိၣ်လီၤ. ၄ ဒီးအဝဲ ဟံးန့ၢ်ထူလၢ အဝဲသ့ၣ်အအိၣ်​ ဒီးသူဝဲထးပျၤ ဒ်သိး အကတ့ထီၣ်​ ကျီၢ်ထူဖိတဒု အဂီၢ်လီၤ.+ ဒီးအဝဲသ့ၣ်​ တဲဝဲလၢ “အံၣ်စရ့လးဧၢ, အဝဲအံၤ မ့ၢ်နကစၢ်ယွၤလၢ အဒုးဟးထီၣ်နၤလၢ ကီၢ်အဲၤကူပတူး အပူၤလီၤ.”+

၅ ဖဲစီၤအၤဟရိၣ်​ ထံၣ်ဝဲ တၢ်မၤအသးတဖၣ်အခါ အဝဲတ့ထီၣ်ဝဲ တၢ်လုၢ်လီၢ်တဖျၢၣ်လၢ ကျီၢ်ထူဖိ အမဲာ်ညါလီၤ. ဒီးစီၤအၤဟရိၣ်​ ကိးထီၣ်ဝဲလၢ “ခဲမုၢ်ဆ့ၣ်န့ၣ်​ ဘူၣ်ကအိၣ်ဝဲ လၢယဟိဝၤယွၤ အဂီၢ်လီၤ.” ၆ အဃိ လၢခံတသီန့ၣ်​ အဝဲသ့ၣ်​ ပၢၢ်ထီၣ်ဂီၤဂီၤ ဒီးဟ့ၣ်လုၢ်ထီၣ်​ တၢ်လုၢ်ဒွဲၣ်အူတဖၣ်​ ဒီးတၢ်လုၢ်အိၣ်ဃူအိၣ်ဖိး တဖၣ်လီၤ. ဒီးပှၤဂီၢ်မုၢ်တဖၣ်​ ဆ့ၣ်နီၤအီၣ်တၢ်အီတၢ် ဝံၤဒီးအဝဲသ့ၣ်​ ဂဲၤဆၢထၢၣ်​ မၤတၢ်သူၣ်ဖှံသးညီလီၤ.+

၇ ယဟိဝၤယွၤ တဲဘၣ်စီၤမိၤၡ့လၢ “မ့ၢ်လၢ နပှၤဂီၢ်မုၢ်လၢ နဒုးဟးထီၣ်အီၤ လၢကီၢ်အဲၤကူပတူး အပူၤန့ၣ်​ မၤတၢ်အၢအၢသီသီလံအဃိ က့ၤလီၤကဒါက့ၤဟီ.+ ၈ အဝဲသ့ၣ်​ ပာ်တ့ၢ်ကွံာ် ယတၢ်မၤလိာ်တဖၣ်​ ချ့မးလီၤ.+ အဝဲသ့ၣ်​ တ့ထီၣ်ကျီၢ်ဖိတဒု ဒီးဘါဝဲ တဘျီဝံၤတဘျီ ဒီးဟ့ၣ်လုၢ်ထီၣ်တၢ် လၢအအိၣ်​ ဒီးတဲဝဲလၢ ‘အံၣ်စရ့လးဧၢ, အဝဲအံၤ မ့ၢ်နကစၢ်ယွၤလၢ အဒုးဟးထီၣ်နၤလၢ ကီၢ်အဲၤကူပတူး အပူၤလီၤ.’” ၉ ယဟိဝၤယွၤ ဆဲးတဲ စီၤမိၤၡ့လၢ “ယထံၣ်ဘၣ်လၢ ပှၤဂီၢ်မုၢ်တဖၣ်အံၤ မ့ၢ်ပှၤလၢ အခိၣ်ကိၤလီၤ.+ ၁၀ ခဲအံၤန့ၣ်​ ယသးဒိၣ်ထီၣ်လံ. အဃိ ပျဲယမၤဟးဂီၤ အဝဲသ့ၣ်​ တုၤအလၢာ် ဒီးပျဲယဒုးကဲထီၣ်နၤလၢ ပှၤကလုာ်ဖးဒိၣ်​ တကလုာ်လၢ အဝဲသ့ၣ်​ အလီၢ်တက့ၢ်.”+

၁၁ ဒီးစီၤမိၤၡ့ ဃ့ကညး အကစၢ် ယဟိဝၤယွၤလၢ+ “အိ ယဟိဝၤယွၤဧၢ, နသူနစုလၢ အပှဲၤဒီး တၢ်စိတၢ်ကမီၤ ဒီးဒုးဟးထီၣ်ကွံာ် နပှၤဂီၢ်မုၢ် လၢကီၢ်အဲၤကူပတူးဝံၤ ဘၣ်မနုၤအဃိ နကသးဒိၣ်ထီၣ်​ အဝဲသ့ၣ်​ ဒီးကမၤဟးဂီၤ အဝဲသ့ၣ်လဲၣ်.+ ၁၂ နမ့ၢ်မၤဒ်န့ၣ်န့ၣ်​ ပှၤအဲၤကူပတူးဖိ ကတဲဝဲလၢ ‘အဝဲသ့ၣ်အယွၤ ဒုးဟးထီၣ်ကွံာ် အဝဲသ့ၣ်​ ဆူကစၢၢ်ကလိအကျါ ဒ်သိး အကမၤသံ အဝဲသ့ၣ်​ ဒီးမၤလီၤမၢ်ကွံာ် အဝဲသ့ၣ်​ လၢဟီၣ်ခိၣ်ချၢ အဂီၢ်လီၤ.’+ ပၢၤဃာ် နတၢ်သးထီၣ်​ ဒီးဆိကမိၣ်ကဒါက့ၤ နတၢ်ဆၢတဲာ်လၢ နကမၤဟးဂီၤကွံာ် နပှၤဂီၢ်မုၢ်မီၤ. ၁၃ သ့ၣ်နီၣ်ထီၣ်က့ၤ နခ့နပှၤ စီၤအၤဘြၤဟၣ်, စီၤအံၤစဲး ဒီးစီၤအံၣ်စရ့လးလၢ နအၢၣ်လီၤပာ်စၢၤ အဝဲသ့ၣ်လၢ နနီၢ်ကစၢ် အမံၤအပူၤလၢ ‘ယကမၤအါထီၣ်​ သုချံသုသၣ်​ တုၤလၢအအိၣ်အါ ထဲသိးဒီး ဆၣ်တဖၣ်​ လၢမူခိၣ်+ ဒီးယကဟ့ၣ်လီၤ သုချံသုသၣ်လၢ ထံကီၢ်လၢ ယပာ်ပနီၣ်အီၤခဲလၢာ် ဒ်သိး အကကဲထီၣ်​ အဝဲသ့ၣ်အတၢ် လီၤစိၤလီၤထီလီၤ.’”+

၁၄ အဃိ ယဟိဝၤယွၤ ဆိကမိၣ်ကဒါက့ၤ တၢ်လၢအတဲပာ်စၢၤဝဲ ဘၣ်ဃးဒီး အကမၤဟးဂီၤ အပှၤဂီၢ်မုၢ်န့ၣ်လီၤ.+

၁၅ ဒီးစီၤမိၤၡ့ ဃၣ်အသး ဒီးက့ၤလီၤလၢ ကစၢၢ်လိၤ ဒီးတၢ်အၢၣ်လီၤအီလီၤ အလၢၢ်ဘ့ၣ်ဘၣ်​ ခံဘ့ၣ်န့ၣ်+ အိၣ်ဝဲလၢ အစုပူၤလီၤ.+ တၢ်ကွဲးအသး အိၣ်ဝဲလၢ လၢၢ်ဘ့ၣ်ဘၣ်အလိၤ ခံကပၤလၢာ်, လၢအမဲာ်ညါ တကပၤ ဒီးလၢအလီၢ်ခံ တကပၤလီၤ. ၁၆ ကစၢ်ယွၤ အနီၢ်ကစၢ်ဒၣ်ဝဲ မၤထီၣ်လၢၢ်ဘ့ၣ်ဘၣ်ခံဘ့ၣ်​ ဒီးကွဲးလီၤအတၢ်ကတိၤတဖၣ်​ လၢအလိၤလီၤ.+ ၁၇ ဖဲစီၤယိၤၡူ နၢ်ဟူဝဲ ပှၤဂီၢ်မုၢ်တဖၣ်​ ကိးပသူကိးပသီအခါ အတဲဘၣ်​ စီၤမိၤၡ့လၢ “လၢဒဲကဝီၤအပူၤန့ၣ်​ တၢ်သီၣ်လီၤဂာ်လၢ ပှၤဒုးတၢ်လီၤ.” ၁၈ ဘၣ်ဆၣ်​ စီၤမိၤၡ့ တဲဝဲလၢ

တၢ်သးဝံၣ်လၢ ယနၢ်ဟူန့ၣ်​ မ့ၢ်တၢ် သးဝံၣ်​ အဂၤတကလုာ်လီၤ.”

၁၉ ဖဲစီၤမိၤၡ့ ဟဲဘူးထီၣ်လၢ ဒဲကဝီၤအခါ အဝဲထံၣ်ဝဲ ကျီၢ်ထူဖိတဒု+ ဒီးပှၤဂဲၤကလံၣ်လီၤ. အဃိ အသးပှံၢ်ထီၣ်တၢ် ဒီးလၢၢ်ဘ့ၣ်ဘၣ်တဖၣ်လၢ အစိာ်ဝဲလၢ အစုပူၤန့ၣ်​ အဝဲကွံာ်လီၤဝဲလၢ ကစၢၢ်အခီၣ်ထံး ဒီးသ့ၣ်ဖးဝဲလီၤ.+ ၂၀ ဒီးကျီၢ်ထူဖိလၢ အဝဲသ့ၣ်​ တ့ထီၣ်ဝဲန့ၣ်​ စီၤမိၤၡ့ ဟံးထီၣ်ဝဲဒီး ဒွဲၣ်အူထီၣ်ဝဲ လၢမ့ၣ်အူ ဒီးမၤလီၤကမူၣ်ဝဲလီၤ.+ ဝံၤဒီး အဝဲဖှံလီၤဝဲလၢ ထံကျါ ဒီးဒုးအီ ပှၤအံၣ်စရ့လးဖိတဖၣ်လီၤ.+ ၂၁ ဒီးစီၤမိၤၡ့တဲ စီၤအၤဟရိၣ်လၢ “ဒ်သိး နကဒုးအိၣ်ထီၣ်​ တၢ်ဒဲးဘးဖးဒိၣ်လၢ ပှၤဂီၢ်မုၢ်အဂီၢ် ဒ်အံၤန့ၣ်​ အဝဲသ့ၣ်​ ကွဲန့ၢ်လွဲန့ၢ်နၤ ဒ်လဲၣ်.” ၂၂ ဒီးစီၤအၤဟရိၣ်​ တဲဆၢဝဲလၢ “ကစၢ်ဧၢ, တဘၣ်​ သးဒိၣ်ထီၣ်တၢ်တဂ့ၤ. ပှၤဂီၢ်မုၢ်အံၤ အဲၣ်ဒိးမၤ တၢ်အၢတၢ်သီ တလီၢ်လီၢ်န့ၣ်​ နသ့ၣ်ညါ ဂ့ၤဂ့ၤလီၤ.+ ၂၃ အဃိ အဝဲသ့ၣ်​ တဲယၤလၢ ‘တၢ်လၢ စီၤမိၤၡ့တဂၤအံၤလၢ အဒုးဟးထီၣ်ပှၤလၢ ကီၢ်အဲၤကူပတူး အပူၤန့ၣ်​ တၢ်မၤအသးဒီးအီၤ ဒ်လဲၣ်​ ပတသ့ၣ်ညါဘၣ်. အဃိ တ့ထီၣ်န့ၢ်ပှၤ ယွၤတဂၤလၢ အကလဲၤတၢ်လၢ ပမဲာ်ညါသၢၤ.’+ ၂၄ အဃိ ယတဲအဝဲသ့ၣ်လၢ ‘ပှၤလၢအအိၣ်ဒီးထူ တဂၤဂၤန့ၣ်​ ဘ့ၣ်လီၤကွံာ်အထူ ဒီးဟ့ၣ်ယၤတက့ၢ်.’ ဝံၤဒီး ယကွံာ်လီၤအီၤလၢ မ့ၣ်အူပူၤ ဒီးကျီၢ်ဖိတဒုအံၤ ဟဲဖျိးထီၣ်ဝဲလီၤ.”

၂၅ ဒီးစီၤမိၤၡ့ ထံၣ်ဘၣ်ဝဲလၢ ပှၤဂီၢ်မုၢ်မၤတၢ် ဖဲအသး မ့ၢ်လၢ စီၤအၤဟရိၣ်​ တတြီအဝဲသ့ၣ်ဘၣ်​ အဃိလီၤ. ဒီးအဝဲသ့ၣ်​ မၤမဲာ်ဆှးလီၤ အနီၢ်ကစၢ်အသး လၢအဒုၣ်အဒါတဖၣ်​ အမဲာ်ညါလီၤ. ၂၆ ဒီးစီၤမိၤၡ့ ဆၢထၢၣ်လၢ ဒဲကဝီၤ အတြဲၤခီၣ်ထံး ဒီးတဲဝဲလၢ “ပှၤလၢအအိၣ်လၢ ယဟိဝၤယွၤ အအိၣ်တခီန့ၣ်​ ဟဲလၢယအိၣ်တက့ၢ်.”+ ဒီးပှၤလ့ၤဝံဖိ ကိးဂၤဒဲး ဟဲပာ်ဖှိၣ်ထီၣ်အသး ဝးတရံး စီၤမိၤၡ့လီၤ. ၂၇ ဒီးစီၤမိၤၡ့ တဲအဝဲသ့ၣ်လၢ “ပှၤအံၣ်စရ့လးဖိ အကစၢ် ယဟိဝၤယွၤ တဲဝဲလၢ ‘သုဝဲတဂၤစုာ်စုာ် ကဘၣ်ဟံးထီၣ်​ သုနး ဒီးလဲၤလၢ ဒဲကဝီၤ ဒီတဘ့ၣ်အပူၤ စးထီၣ်လၢတြဲၤလၢအံၤတခီ ပၢၢ်တုၤလၢ တြဲၤလၢန့ၣ်တခီ ဒီးမၤသံကွံာ် သုဒီပုၢ်ဝဲၢ်, ပှၤလၢသုခိၣ်သုဃၢၤ ဒီးသုသကိး ဘူးဘူးတံၢ်တံၢ်တဖၣ်တက့ၢ်.’”+ ၂၈ ဒီးပှၤလ့ၤဝံဖိတဖၣ်​ မၤဝဲဒ် စီၤမိၤၡ့ တဲဝဲအသိးလီၤ. ဒီးဖဲတၢ်တနံၤန့ၣ်​ ပှၤလၢအဘၣ်တၢ်မၤသံအီၤ အိၣ်ဝဲ အဂၤ ၃,၀၀၀ လီၤ. ၂၉ ဒီးစီၤမိၤၡ့ တဲဝဲလၢ “ခီဖျိလၢ သုဝဲတဂၤစုာ်စုာ် သုဒုး သုဖိခွါ ဒီးသုဒီပုၢ်ဝဲၢ်ခွါအဃိ စးထီၣ်လၢ တနံၤအံၤန့ၣ်​ ပာ်လီၤဆီသုသးလၢ ယဟိဝၤယွၤ အဂီၢ်တက့ၢ်.+ တနံၤအံၤ ကစၢ်ယွၤ ကဟ့ၣ်လီၤသု တၢ်ဆိၣ်ဂ့ၤ တမံၤလီၤ.”+

၃၀ လၢခံတနံၤန့ၣ်​ စီၤမိၤၡ့တဲဘၣ်​ ပှၤဂီၢ်မုၢ်လၢ “သုမၤဘၣ်​ တၢ်ဒဲးဘး ဖးဒိၣ်ညါ, ခဲအံၤ ယကလဲၤထီၣ်လၢ ယဟိဝၤယွၤအအိၣ်​ ဒီးယကဃ့ကညးအီၤ ဒီးဘၣ်သ့ၣ်သ့ၣ်​ သုတၢ်ဒဲးဘးကပျၢ်ဝဲလီၤ.”+ ၃၁ အဃိ စီၤမိၤၡ့ လဲၤလၢ ယဟိဝၤယွၤအအိၣ်​ ဒီးတဲဝဲလၢ “ပှၤဂီၢ်မုၢ် မၤဘၣ်တၢ်ဒဲးဘး ဖးဒိၣ်ညါ. အဝဲသ့ၣ်​ တ့ထီၣ်​ ယွၤထူတဒု လၢအနီၢ်ကစၢ် အဂီၢ်လီၤ.+ ၃၂ ဘၣ်ဆၣ်​ ခဲအံၤ နသးမ့ၢ်အိၣ်န့ၣ်​ ဝံသးစူၤ ပျၢ်အဝဲသ့ၣ်​ အတၢ်ဒဲးဘးတက့ၢ်.+ နမ့ၢ်တမၤ ဒ်န့ၣ်ဘၣ်န့ၣ်​ ဝံသးစူၤ ထူးသံကွံာ်ယမံၤလၢ နကွဲးလီၤတ့ၢ်အီၤ လၢနလံာ်ပူၤတက့ၢ်.”+ ၃၃ ဘၣ်ဆၣ်​ ယဟိဝၤယွၤ တဲစီၤမိၤၡ့လၢ “ပှၤတဂၤဂ့ၤတဂၤဂ့ၤ လၢအမၤကမၣ်ယၤန့ၣ်​ ယကထူးသံကွံာ် အမံၤလၢ ယလံာ်ပူၤလီၤ. ၃၄ ခဲအံၤန့ၣ်​ လဲၤဆှၢပှၤဂီၢ်မုၢ်လၢ တၢ်လီၢ်လၢ ယတဲနၤတက့ၢ်. ဒီးယမူခိၣ်ကလူးတဂၤ ကလဲၤလၢ နမဲာ်ညါလီၤ.+ ဘၣ်ဆၣ်​ မုၢ်နံၤလၢ ယကၡဲစရီန့ၣ်​ ယကစံၣ်ညီၣ်​ အဝဲသ့ၣ်လၢ အတၢ်ဒဲးဘး အဃိလီၤ.” ၃၅ ဒီးယဟိဝၤယွၤ ဒုးလီၤဘၣ်​ တၢ်နးတၢ်ဖှီၣ်လၢ ပှၤဂီၢ်မုၢ်အလိၤ မ့ၢ်လၢ အဝဲသ့ၣ်တ့ထီၣ်​ ကျီၢ်ထူဖိတဒု ခီဖျိလၢ စီၤအၤဟရိၣ်လီၤ.

၃၃ ဒီးယဟိဝၤယွၤ တဲစီၤမိၤၡ့လၢ “ဟးထီၣ်ဖဲအံၤ ဃုာ်ဒီးပှၤဂီၢ်မုၢ်လၢ နထုးထီၣ်အီၤလၢ ကီၢ်အဲၤကူပတူး အပူၤတက့ၢ်. လဲၤဆူကီၢ်တဘ့ၣ်လၢ ယအၢၣ်လီၤအီလီၤ စီၤအၤဘြၤဟၣ်, စီၤအံၤစဲး ဒီးစီၤယၤကိာ်လၢ ယကဟ့ၣ်လီၤ အဝဲသ့ၣ်​ အစၢၤအသွဲၣ်​ န့ၣ်တက့ၢ်.+ ၂ ယကမၢ မူခိၣ်ကလူးတဂၤ လဲၤလၢနမဲာ်ညါ+ ဒီးနီဟးထီၣ်ကွံာ် ပှၤကနၤဧၣ်ဖိ, ပှၤအမိၢ်ဖိ, ပှၤဃ့ၤသးဖိ, ပှၤပရးစၤဖိ, ပှၤဃံၤဝံဖိ ဒီးပှၤယဘူၣ်ဖိလီၤ.+ ၃ လဲၤထီၣ်ဆူ ကီၢ်လၢ တၢ်နုၢ်ထံ ဒီးကနဲစီ ယွၤလီၤဝဲ လၢအပူၤတက့ၢ်.+ ဘၣ်ဆၣ်​ ယတလဲၤတၢ်လၢ သုကျါဘၣ်, မ့ၢ်လၢ သုမ့ၢ်ပှၤလၢ အခိၣ်ကိၤ+ ဒီးယကမၤဟးဂီၤဘၣ်ဖုးသု လၢကျဲအဃိလီၤ.”+

၄ ဖဲပှၤဂီၢ်မုၢ်နၢ်ဟူ တၢ်ကတိၤ ဆူၣ်ဆူၣ်ကိၤကိၤအံၤအခါ အဝဲသ့ၣ်​ သးအုးဝဲ ဒိၣ်မး ဒီးအဝဲသ့ၣ်​ တကယၢကယဲအသး နီတဂၤဘၣ်. ၅ ယဟိဝၤယွၤ တဲစီၤမိၤၡ့လၢ “တဲဘၣ်​ ပှၤအံၣ်စရ့လးဖိတဖၣ်လၢ ‘သုမ့ၢ်ပှၤလၢ အခိၣ်ကိၤလီၤ.+ လၢတဖျးမဲာ် အတီၢ်ပူၤန့ၣ်​ ယလဲၤတၢ်လၢသုကျါ ဒီးမၤဟးဂီၤသု ခဲလၢာ်ခဲဆ့ သ့လီၤ.+ အဃိ ခဲအံၤ ဖဲယဆိကမိၣ်​ ဘၣ်ဃးဒီး ယကမၤသု ဒ်လဲၣ်အခါ သုတဘၣ်​ ကယၢကယဲထီၣ်​ သုသးတဂ့ၤ.’” ၆ အဃိ ဖဲကစၢၢ်ဃိၤရ့းန့ၣ်​ ပှၤအံၣ်စရ့လးဖိတဖၣ်​ ဘ့ၣ်လီၤကွံာ် အတၢ်ကယၢကယဲ ဒီးလၢခံန့ၣ်​ အဝဲသ့ၣ်​ တကယၢကယဲထီၣ်အသး လၢတၢ်သ့ၣ်တဖၣ်အံၤလၢၤဘၣ်.

၇ ဒီးစီၤမိၤၡ့ ဟံးထီၣ်အဒဲ ဒီးသူၣ်ထီၣ်အီၤလၢ ဒဲကဝီၤအချၢ လၢအစီၤစုၤ တယံၤတဘူးဒီး ဒဲကဝီၤ ဒီးအဝဲကိးဝဲ အဒဲအံၤလၢ တၢ်အိၣ်ဖှိၣ်အဒဲလီၤ. ဒီးပှၤကိးဂၤဒဲးလၢ အအဲၣ်ဒိးသံကွၢ်တၢ်လၢ ယဟိဝၤယွၤန့ၣ်+ ကဘၣ်လဲၤထီၣ်လၢ တၢ်အိၣ်ဖှိၣ်အဒဲ လၢအအိၣ်လၢ ဒဲကဝီၤအချၢလီၤ. ၈ ဖဲစီၤမိၤၡ့လဲၤလၢ ဒဲအံၤ တဘျီဂ့ၤတဘျီဂ့ၤအခါ ပှၤဂီၢ်မုၢ်ခဲလၢာ် ဆၢထၢၣ်ဝဲလၢ အဝဲသ့ၣ်​ အနီၢ်ကစၢ် အဒဲတဖၣ်​ အတၢ်နုာ်လီၤအလီၢ် ဒီးအဝဲသ့ၣ်​ ကွၢ်စိဝဲ စီၤမိၤၡ့ထံထံ တုၤလၢ အဝဲနုာ်လီၤလၢ ဒဲအံၤအပူၤလီၤ. ၉ ဖဲစီၤမိၤၡ့ လဲၤနုာ်လီၤ လၢဒဲပူၤ ဝံၤအလီၢ်ခံ တၢ်အၢၣ်အထူၣ်+ ဟဲလီၤ ဒီးအိၣ်ဆၢၣ်ထၢၣ်ဝဲလၢ ဒဲအတၢ်နုာ်လီၤအလီၢ် ဖဲကစၢ်ယွၤ တဲတၢ်ဒီး စီၤမိၤၡ့အခါန့ၣ်လီၤ.+ ၁၀ ဖဲပှၤဂီၢ်မုၢ်ခဲလၢာ် ထံၣ်ဝဲ တၢ်အၢၣ်အထူၣ်​ အိၣ်ဆၢထၢၣ်လၢ ဒဲအတၢ်နုာ်လီၤ အလီၢ်အခါ အဝဲသ့ၣ်​ တဂၤစုာ်စုာ် ထိၣ်လီၤပှီၤအသး လၢအနီၢ်ကစၢ် အဒဲအတၢ်နုာ်လီၤ အလီၢ်လီၤ. ၁၁ ယဟိဝၤယွၤ တဲတၢ်ဒီး စီၤမိၤၡ့ လၢမဲာ်သကိးမဲာ်+ ဒ်ပှၤတဂၤ တဲတၢ်ဒီး ပှၤအဂၤတဂၤ အသိးန့ၣ်လီၤ. ဖဲစီၤမိၤၡ့ ဟဲက့ၤလၢ ဒဲကဝီၤအခါ ပှၤလၢအမၤစၢၤအီၤ+ လၢအမ့ၢ် စီၤနိၣ်အဖိခွါ စီၤယိၤၡူတဂၤန့ၣ်+ အိၣ်တ့ၢ်ဝဲလၢ ဒဲအံၤအပူၤလီၤ.

၁၂ ဒီးစီၤမိၤၡ့ တဲယဟိဝၤယွၤလၢ “နတဲယၤလၢ ‘ဆှၢထီၣ်ပှၤဂီၢ်မုၢ်န့ၣ်’ ဘၣ်ဆၣ် နကမၢမတဂၤ လဲၤဒီးယၤလဲၣ်န့ၣ်​ နတဒုးသ့ၣ်ညါယၤ ဒံးဘၣ်. တကးဒံးဘၣ် နတဲယၤလၢ ‘ယသ့ၣ်ညါနၤဂ့ၤဂ့ၤ* ဒီးယဘၣ်သူၣ်ဘၣ်သးနၤ စ့ၢ်ကီးလီၤ.’ ၁၃ ဝံသးစူၤ, နမ့ၢ်ဘၣ်သူၣ်ဘၣ်သးယၤန့ၣ်​ ဒုးသ့ၣ်ညါယၤ တၢ်လၢနမၤတဖၣ်+ ဒ်သိး ယကသ့ၣ်ညါ အါထီၣ်နၤ ဒီးယကဆဲးမ့ၢ်ပှၤလၢ နဘၣ်သူၣ်ဘၣ်သးအီၤ အဂီၢ်န့ၣ်တက့ၢ်. သ့ၣ်နီၣ်ထီၣ်စ့ၢ်ကီးလၢ ပှၤတကလုာ်အံၤ မ့ၢ်နပှၤဂီၢ်မုၢ်တက့ၢ်.”+ ၁၄ အဃိ ကစၢ်ယွၤ* တဲဝဲလၢ “ယကလဲၤတၢ်ဒီးနၤ+ ဒီးယကဟ့ၣ်လီၤနၤ တၢ်ဃူတၢ်ဖိးလီၤ.”+ ၁၅ ဒီးစီၤမိၤၡ့ တဲအီၤလၢ “နမ့ၢ်တလဲၤတၢ် ဒီးပှၤဘၣ်န့ၣ်​ တဘၣ်ဒုးဟးထီၣ်ပှၤလၢ တၢ်လီၢ်ဖဲအံၤ တဂ့ၤ. ၁၆ နဘၣ်သူၣ်ဘၣ်သးယၤ ဒီးနပှၤဂီၢ်မုၢ်န့ၣ်​ ပှၤကသ့ၣ်ညါအီၤ ဒ်လဲၣ်. နမ့ၢ်လဲၤတၢ်ဒီးပှၤမး+ ယၤဒီးနပှၤဂီၢ်မုၢ် ကဖျါလီၤဆီဒီး ပှၤအဂၤ လၢဟီၣ်ခိၣ်ချၢ ကိးဂၤဒဲး တမ့ၢ်ဘၣ်ဧါ.”+

၁၇ ဒီးယဟိဝၤယွၤ တဲဘၣ်​ စီၤမိၤၡ့လၢ “မ့ၢ်လၢ ယဘၣ်သူၣ်ဘၣ်သးနၤ ဒီးယသ့ၣ်ညါနၤ ဂ့ၤဂ့ၤအဃိ ယကမၤ ဒ်နဃ့ယၤ ဖဲမကၢာ်အသိးလီၤ.” ၁၈ ဝံၤဒီး စီၤမိၤၡ့ တဲအီၤလၢ “ဝံသးစူၤ ဒုးနဲၣ်ယၤ နလၤကပီၤတက့ၢ်.” ၁၉ ဘၣ်ဆၣ်​ ယွၤတဲစီၤမိၤၡ့လၢ “ယကလဲၤခီဂာ် လၢနမဲာ်ညါ ဒီးယကဒုးထံၣ်နၤ ယတၢ်ဂ့ၤတၢ်ဝါခဲလၢာ် ဒီးယမံၤလၢအမ့ၢ် ယဟိဝၤန့ၣ်​ ယကဘိးဘၣ်သ့ၣ်ညါအီၤ လၢနမဲာ်ညါလီၤ.+ ဒီးယကဘၣ်သူၣ်ဘၣ်သး ဖဲဒၣ်​ ပှၤလၢယအဲၣ်ဒိး ဘၣ်သူၣ်ဘၣ်သးအီၤ ဒီးယကသးကညီၤ ဖဲဒၣ်​ ပှၤလၢ ယအဲၣ်ဒိး သးကညီၤအီၤလီၤ.”+ ၂၀ ဘၣ်ဆၣ်​ အဝဲ ဆဲးတဲဝဲလၢ “ပှၤလၢအထံၣ်ယၤန့ၣ်​ တအိၣ်မူဘၣ်လၢၤဘၣ်​ အဃိ နထံၣ်ယမဲာ် တသ့ဘၣ်.”

၂၁ ဒီးယဟိဝၤယွၤ တဲဝဲလၢ “ဖဲအံၤန့ၣ်​ မ့ၢ်တၢ်လီၢ်လၢ အအိၣ်ဘူးဒီးယၤလီၤ. ဆၢထၢၣ်အိၣ်ခိးလၢ လၢၢ်တဖျၢၣ်န့ၣ်​ အဖီခိၣ်တက့ၢ်. ၂၂ ဖဲယလၤကပီၤ လဲၤခီဂာ်တၢ်အခါ ယကပာ်နၤလၢ လၢၢ်တဖျၢၣ်န့ၣ်​ အကအိပူၤ ဒီးယကဒီသဒၢနၤ လၢယစု တုၤလၢ ယလဲၤခီဂာ်တၢ် ဝံၤတစုလီၤ. ၂၃ ဝံၤဒီး ယကထုးထီၣ်ကွံာ်ယစု ဒီးနကထံၣ်ဘၣ်​ ယချၢဃံလီၤ. ဘၣ်ဆၣ်​ နတထံၣ်ဘၣ်​ ယမဲာ်ဘၣ်.”+

၃၄ ယဟိဝၤယွၤ တဲဘၣ်စီၤမိၤၡ့လၢ “တ့ထီၣ်​ လၢၢ်ဘ့ၣ်ဘၣ်ခံဘ့ၣ်​ ဒ်အခီၣ်ထံးခံဘ့ၣ်​ အသိးတက့ၢ်.+ ဒီးတၢ်ကတိၤလၢ အအိၣ်လၢ လၢၢ်ဘ့ၣ်ဘၣ်​ အခီၣ်ထံးခံဘ့ၣ်​ လၢနမၤသ့ၣ်ဖးအီၤ အလိၤန့ၣ်+ ယကကွဲးလီၤအီၤလၢ လၢၢ်ဘ့ၣ်ဘၣ်​ ခံဘ့ၣ်အံၤ အလိၤလီၤ.+ ၂ အိၣ်ကတဲာ်ကတီၤ ပာ်စၢၤနသးလၢ ခဲမုၢ်ဆ့ၣ်ဂီၤခီ အဂီၢ်တက့ၢ်. ဖဲန့ၣ်အခါ နကဘၣ်​ လဲၤထီၣ်လၢ ကစၢၢ်စံၤနါ ဒီးဆၢထၢၣ်အိၣ်ခိးလၢ ယမဲာ်ညါလၢ ကစၢၢ်ခိၣ်​ ဖဲန့ၣ်တက့ၢ်.+ ၃ ဘၣ်ဆၣ်​ ပှၤတဘၣ်​ လဲၤထီၣ်ဒီးနၤ နီတဂၤဘၣ်. ဒီးပှၤတဘၣ်​ အိၣ်လၢ ကစၢၢ်လိၤ နီတဂၤဘၣ်. သိဒီးမဲာ်တဲးလဲးတဖၣ်​ ဒီးကျီၢ်တဖၣ်ဒၣ်လဲာ် တဘၣ်အီၣ်အဆၣ်​ လၢကစၢၢ် အမဲာ်ညါဘၣ်.”+

၄ အဃိ စီၤမိၤၡ့တ့ထီၣ်​ လၢၢ်ဘ့ၣ်ဘၣ်ခံဘ့ၣ်​ ဒ်အခီၣ်ထံးခံဘ့ၣ်​ အသိးလီၤ. ဒီးဒ်ယဟိဝၤယွၤ မၤလိာ်အီၤအသိး အဝဲ ဂဲၤဆၢထၢၣ်ဂီၤဂီၤ, လဲၤစိာ် လၢၢ်ဘ့ၣ်ဘၣ်ခံဘ့ၣ်​ လၢအစုပူၤ ဒီးလဲၤထီၣ်​ ကစၢၢ်စံၤနါလီၤ. ၅ ဒီးယဟိဝၤယွၤ ဟဲလီၤလၢ+ တၢ်အၢၣ်အပူၤ ဒီးဆၢထၢၣ်လၢ စီၤမိၤၡ့ အကပၤလၢ ကစၢၢ်ခိၣ်​ ဒီးဘိးဘၣ်သ့ၣ်ညါဝဲ ဘၣ်ဃးဒီး မံၤလၢအမ့ၢ် ယဟိဝၤလီၤ.+ ၆ ယဟိဝၤယွၤ လဲၤခီဂာ် စီၤမိၤၡ့ လၢအမဲာ်ညါ ဒီးဘိးဘၣ်သ့ၣ်ညါဝဲလၢ “ယဟိဝၤ, ယဟိဝၤ, မ့ၢ်ကစၢ်ယွၤလၢ အသးကညီၤတၢ်,+ အသးဂ့ၤ,+ တသးဒိၣ်ထီၣ်တၢ် ချ့ချ့ဘၣ်,+ အိၣ်ဒီး တၢ်အဲၣ်လၢအတီဒိၣ်မး,+ တီဒီးအတၢ်ကတိၤ ထီဘိ,+ ၇ ပာ်ဖျါထီၣ်ဝဲ တၢ်အဲၣ်လၢအတီလၢ ပှၤလၢအကထိတဖၣ်​ အဖီခိၣ်+ ဒီးပျၢ်ကွံာ်ဝဲ တၢ်ကမၣ်​ ဒီးတၢ်ဒဲးဘးလီၤ.+ ဘၣ်ဆၣ်​ ပှၤလၢအတၢ်ကမၣ်​ အိၣ်ဝဲတဖၣ်န့ၣ်​ အဝဲတပျဲပူၤဝဲလၢ တၢ်စံၣ်ညီၣ်ဘၣ်.+ မ့မ့ၢ် တၢ်စံၣ်ညီၣ်လၢ ပၢ်တဖၣ်​ အတၢ်ကမၣ်အဂီၢ်န့ၣ်​ အဝဲဒုးလီၤဘၣ်လၢ အဝဲသ့ၣ်အဖိတဖၣ်​ အလိၤ ဒီးလၢအလံၤတဖၣ်​ အလိၤလီၤ.”+

၈ ဒီးစီၤမိၤၡ့ ကရီထိၣ်လီၤပှီၤအသးလီၤ. ၉ ဒီးစီၤမိၤၡ့ တဲဝဲလၢ “အိ ယဟိဝၤယွၤဧၢ, ပမ့မ့ၢ် ပှၤလၢ အခိၣ်ကိၤဘၣ်ဆၣ်+ နမ့ၢ်ဘၣ်သူၣ်ဘၣ်သးယၤန့ၣ်​ ယဟိဝၤယွၤဧၢ, ဝံသးစူၤ လဲၤတၢ်လၢပကျါ,+ ပျၢ်ကွံာ်ပတၢ်ကမၣ်​ ဒီးပတၢ်ဒဲးဘး+ ဒီးတူၢ်လိာ်ပှၤဒ် နပှၤဂီၢ်မုၢ်အသိး တက့ၢ်.” ၁၀ ဒီးကစၢ်ယွၤတဲ စီၤမိၤၡ့လၢ “ခဲအံၤ ယမၤ တၢ်အၢၣ်လီၤအီလီၤဒီးသုလီၤ. တၢ်လီၤလိၢ်လီၤလးလၢ ယတမၤဘၣ်လၢ ဟီၣ်ခိၣ်ချၢ နီတဘျီဒံးဘၣ်​ ဒီးလၢ ပှၤကိးကလုာ်ဒဲးအကျါ နီတဘျီဒံးဘၣ်န့ၣ်​ ယကမၤအီၤလၢ သုခဲလၢာ် အမဲာ်ညါလီၤ.+ ဒီးပှၤလၢ သုအိၣ်ဆိးလၢအကျါ ခဲလၢာ်န့ၣ်​ ကထံၣ်ဘၣ်ဝဲ ယၤ ယဟိဝၤယွၤ အတၢ်မၤလီၤ. ယကမၤ တၢ်လၢ အလီၤကမၢကမၣ်တဖၣ်​ လၢသုဂီၢ်လီၤ.+

၁၁ “ပာ်သူၣ်ပာ်သး တၢ်လၢယမၤလိာ်နၤ လၢတနံၤအံၤတက့ၢ်.+ ယကနီဟးထီၣ်ကွံာ် ပှၤအမိၢ်ဖိ, ပှၤကနၤဧၣ်ဖိ, ပှၤဃ့ၤသးဖိ, ပှၤပရးစၤဖိ, ပှၤဃံၤဝံဖိ ဒီးပှၤယဘူၣ်ဖိတဖၣ်​ လၢသုမဲာ်ညါလီၤ.+ ၁၂ သုမ့ၢ်မၤ တၢ်အၢၣ်လီၤအီလီၤဒီး ပှၤလၢအအိၣ်ပာ်စၢၤလၢ ထံကီၢ်လၢ သုကလဲၤအိၣ်လၢ အပူၤတဘ့ၣ်န့ၣ်​ အကကဲထီၣ်ဘၣ်ဖုး ပျံၤသကွီၤ လၢသုဂီၢ်အဃိ+ ပလီၢ်သုသး ဒ်သိး သုသုတမၤ တၢ်အၢၣ်လီၤအီလီၤဒီး အဝဲသ့ၣ်​ တဂ့ၤအဂီၢ်တက့ၢ်.+ ၁၃ သုဘၣ်မၤလီၤပှီၢ်ကွံာ် အဝဲသ့ၣ်​ အတၢ်လုၢ်လီၢ်တဖၣ်လီၤ. ဒီးသုဘၣ်မၤကၢ်ကွံာ် အဝဲသ့ၣ်​ အလၢၢ်ထူၣ်စီဆှံတဖၣ်​ ဒီးအဝဲသ့ၣ်​ အတၢ်စီဆှံအထူၣ်တဖၣ်န့ၣ်​ သုဘၣ်ကျီကွံာ်အီၤလီၤ.+ ၁၄ ယဟိဝၤယွၤန့ၣ်​ မ့ၢ်ယွၤလၢ အမၤလိာ်ဝဲလၢ ပှၤကဘၣ်​ တီဒီးအီၤလၢ သးဒီဖျၢၣ်လီၤ. အဃိ သုတဘၣ်ဘါ ယွၤအဂုၤအဂၤတဖၣ်တဂ့ၤ.+ မ့ၢ်လီၤ, အဝဲမ့ၢ်ယွၤလၢ အမၤလိာ်ဝဲလၢ ပှၤကဘၣ်​ တီဒီးအီၤလၢ သးဒီဖျၢၣ်လီၤ.+ ၁၅ ပလီၢ်သုသး ဒ်သိးသုသုတမၤ တၢ်အၢၣ်လီၤအီလီၤ ဒီးပှၤလၢ အအိၣ်ပာ်စၢၤ လၢထံကီၢ်အပူၤတဂ့ၤ. သုမ့ၢ်မၤဒ်န့ၣ်န့ၣ်​ ဖဲအဝဲသ့ၣ်​ ဘူၣ်ထီၣ်ဘါထီၣ်* အယွၤတဖၣ်​ ဒီးလုၢ်ထီၣ်တၢ်လၢ အယွၤလၢ အကမၣ်တဖၣ်+ အအိၣ်အခါ အဝဲသ့ၣ်တဂၤဂၤ ကကွဲမုာ်ဘၣ်ဖုးသု ဒီးသုကအီၣ်ဘၣ်ဖုး တၢ်လၢ အလုၢ်ထီၣ်ဝဲန့ၣ်လီၤ.+ ၁၆ ဒီးသုကဟံးန့ၢ် အဝဲသ့ၣ်​ အဖိမုၣ်တနီၤ လၢသုဖိခွါအဂီၢ်+ ဒီးအဝဲသ့ၣ်​ အဖိမုၣ်တဖၣ်​ ကဘူၣ်ထီၣ်ဘါထီၣ်* အယွၤတဖၣ်​ ဒီးကဟ့ၣ်သဆၣ်ထီၣ်​ သုဖိခွါတဖၣ်ဒ်သိး ကဘူၣ်ထီၣ်ဘါထီၣ်​ အဝဲသ့ၣ်​ အယွၤတဖၣ်အဂီၢ်လီၤ.+

၁၇ “သုတဘၣ်တ့ထီၣ်​ ယွၤတဖၣ်​ လၢထးတဂ့ၤ.+

၁၈ “သုကဘၣ်မၤ ဘူၣ်ကိၣ်လၢ အတပၣ်ဒီးကိၣ်မံၣ်ဘၣ်လီၤ.+ မ့ၢ်လၢ သုဟးထီၣ်လၢ ကီၢ်အဲၤကူပတူးအပူၤလၢ လါအၤဘံာ်အဃိ ဒ်ယမၤလိာ်သုအသိး ဆၢကတီၢ်လၢ အဘၣ်တၢ်ပာ်ပနီၣ်အီၤလၢ လါအၤဘံာ်အပူၤ*+ မ့ၢ်ဘၣ်န့ၣ်​ သုကဘၣ်အီၣ်​ ကိၣ်လၢအတပၣ်ဒီး ကိၣ်မံၣ်ဘၣ်န့ၣ်​ နွံသီလီၤ.

၁၉ “ဖိဝဲၢ်ကိ အပိာ်ခွါ ကိးဂၤဒဲး ဒီးဆၣ်ဖိကီၢ်ဖိ အဖိဝဲၢ်ကိအဖါ လၢအအိၣ်ဒီးသုခဲလၢာ်, ကျီၢ်ဖါ အဝဲၢ်ကိမ့ၢ်ဂ့ၤ သိအဝဲၢ်ကိမ့ၢ်ဂ့ၤ+ မ့ၢ်ယတၢ်လီၤ.+ ၂၀ သုကဘၣ်ပှ့ၤက့ၤ ကသ့ၣ်ယီၤ အဖိဝဲၢ်ကိတဒု လၢသိတဒုလီၤ. သုမ့ၢ်တပှ့ၤက့ၤအီၤဘၣ်န့ၣ်​ သုကဘၣ်​ မၤကၢ်ကွံာ် အကိာ်ဘိလီၤ. ဒီးသုဖိဝဲၢ်ကိ ပိာ်ခွါကိးဂၤဒဲးန့ၣ်​ သုကဘၣ်​ ပှ့ၤက့ၤအီၤလီၤ.+ ပှၤလၢ အတဟဲစိာ် တၢ်နီတမံၤဘၣ်န့ၣ်​ တဘၣ်ဟဲ ပာ်ဖျါထီၣ်အသး လၢယမဲာ်ညါ နီတဂၤဘၣ်.

၂၁ “သုကဘၣ်​ မၤတၢ်ဃုသီ ဘၣ်ဆၣ်​ နွံသီတသီန့ၣ်​ သုကဘၣ်​ အိၣ်ဘှံးလီၤ.+ မ့ၢ်ဘၣ်လၢ ပှၤထဲၣ်တၢ်အခါ မ့ၢ်ဂ့ၤ ပှၤကူးတၢ်အခါမ့ၢ်ဂ့ၤ ဒၣ်လဲာ် သုကဘၣ်​ အိၣ်ဘှံးလီၤ.

၂၂ “ဒီးသုကဘၣ်မၤ ဘူၣ်နွံတဖၣ်​ ဒီးဖဲန့ၣ်အခါ သုဘၣ်လုၢ်ထီၣ်​ ဘုကၠူၣ်မံ အတၤသၣ်ဆိတဖၣ်လီၤ. ဒီးဖဲနံၣ်အကတၢၢ်န့ၣ်​ သုကဘၣ်မၤ ဘူၣ်ထၢဖှိၣ်တၢ်လီၤ.+

၂၃ “ပိာ်ခွါကိးဂၤဒဲး ကဘၣ်​ ဟဲပာ်ဖျါထီၣ်အသး လၢအံၣ်စရ့လး အကစၢ် လၢအမ့ၢ်အတီ ယဟိဝၤယွၤ အမဲာ်ညါ တနံၣ်သၢဘျီလီၤ.+ ၂၄ ယကနီဟးထီၣ်ကွံာ် ပှၤကလုာ်တဖၣ်​ လၢသုမဲာ်ညါလီၤ.+ ဒီးယကမၤလဲၢ်ထီၣ်​ သုဟီၣ်ကဝီၤ ဒီးဖဲသုလဲၤပာ်ဖျါထီၣ်သုသး လၢသုကစၢ် ယဟိဝၤယွၤအအိၣ်​ တနံၣ်သၢဘျီ အတီၢ်ပူၤန့ၣ်​ ပှၤတသူၣ်လီသးကွံ သုတၢ်လီၢ်တၢ်ကျဲ နီတဂၤဘၣ်.

၂၅ “ယတၢ်လုၢ်အသွံၣ်လၢ သုဟ့ၣ်လုၢ်ထီၣ်အီၤန့ၣ်​ သုတဘၣ်​ ဟ့ၣ်လုၢ်ထီၣ်အီၤ ဃုာ်ဒီး တၢ်လၢအပၣ်ဒီး ကိၣ်မံၣ်​ နီတမံၤတဂ့ၤ.+ ဘူၣ်လဲၤကပာ် အတၢ်လုၢ်န့ၣ်​ သုတဘၣ်​ ပာ်ဃာ်အီၤ ဒီတနၤ တုၤလၢ ဂီၤခီတဂ့ၤ.+

၂၆ “သုဟီၣ်ခိၣ်​ အတၤသၣ်ဆိ လၢအဂ့ၤကတၢၢ်န့ၣ်​ သုကဘၣ်​ ဟဲစိာ်အီၤလၢ သုကစၢ် ယဟိဝၤယွၤ အဟံၣ်လီၤ.+

“သုတဘၣ်ချီ မဲာ်တဲးလဲးဖိ လၢအမိၢ် အနုၢ်ထံကျါတဂ့ၤ.”+

၂၇ ယဟိဝၤယွၤ တဲဘၣ်​ စီၤမိၤၡ့လၢ “ယမၤတၢ်အၢၣ်လီၤအီလီၤဒီးနၤ ဒီးပှၤအံၣ်စရ့လးဖိ+ ဒ်တၢ်ကတိၤတဖၣ်အံၤ အိၣ်ဝဲအသိးအဃိ ကွဲးလီၤ တၢ်ကတိၤတဖၣ်အံၤ တက့ၢ်.”+ ၂၈ ဒီးစီၤမိၤၡ့ အိၣ်ဒီး ယဟိဝၤယွၤဖဲန့ၣ်​ အနံၤ ၄၀ ဒီးအနၤ ၄၀ လီၤ. ဒီးအတအီၣ်တၢ်နီတမံၤဘၣ်​ ဒီးတအီထံစ့ၢ်ကီးဘၣ်.+ ဒီးအဝဲ* ကွဲးလီၤဝဲ တၢ်အၢၣ်လီၤအီလီၤ အတၢ်ကတိၤတဖၣ်​ လၢအမ့ၢ် တၢ်မၤလိာ်အဘီတဆံ လၢလၢၢ်ဘ့ၣ်ဘၣ်တဖၣ်​ အလိၤလီၤ.+

၂၉ ဒီးစီၤမိၤၡ့ ဟဲက့ၤလီၤလၢ ကစၢၢ်စံၤနါအလိၤ ဒီးတၢ်အၢၣ်လီၤအီလီၤ အလၢၢ်ဘ့ၣ်ဘၣ်​ ခံဘ့ၣ်န့ၣ်​ အိၣ်လၢအစုပူၤလီၤ.+ ဒီးမ့ၢ်လၢ စီၤမိၤၡ့ တဲဘၣ်တၢ်ဒီး ကစၢ်ယွၤအဃိ ဖဲအဝဲ ဟဲက့ၤလီၤလၢ ကစၢ်လိၤအခါ အမဲာ်သၣ်န့ၣ်​ ဆဲးကပြုၢ်ကပြီၤဝဲလီၤ. ဘၣ်ဆၣ်​ အဝဲတသ့ၣ်ညါဝဲဘၣ်. ၃၀ ဖဲစီၤအၤဟရိၣ်​ ဒီးပှၤအံၣ်စရ့လးဖိခဲလၢာ် ကွၢ်စီၤမိၤၡ့အခါ အဝဲသ့ၣ်​ ထံၣ်ဝဲလၢ အမဲာ်သၣ်​ ဆဲးကပြုၢ်ကပြီၤအဃိ အဝဲသ့ၣ်​ လဲၤဘူးဒီးအီၤ တဘူၣ်ဘၣ်.+

၃၁ ဘၣ်ဆၣ်​ စီၤမိၤၡ့ကိးဃီၤ အဝဲသ့ၣ်အဃိ စီၤအၤဟရိၣ်​ ဒီးပှၤဂီၢ်မုၢ် အခိၣ်အနၢ်ခဲလၢာ် လဲၤလၢအအိၣ်လီၤ. ဒီးစီၤမိၤၡ့ တဲတၢ်ဒီး အဝဲသ့ၣ်လီၤ. ၃၂ ဝံၤဒီးပှၤအံၣ်စရ့လးဖိခဲလၢာ် ဟဲဘူးထီၣ်ဒီး စီၤမိၤၡ့ ဒီးစီၤမိၤၡ့ ဟ့ၣ်လီၤ အဝဲသ့ၣ်​ တၢ်မၤလိာ် ခဲလၢာ်လၢ ယဟိဝၤယွၤ ဟ့ၣ်လီၤအီၤ လၢကစၢၢ်စံၤနါ အလိၤလီၤ.+ ၃၃ ဖဲစီၤမိၤၡ့ တဲတၢ်ဒီး အဝဲသ့ၣ်​ ဝံၤအလီၢ်ခံ အဝဲမၤဘၢအမဲာ် လၢနီၣ်ကျၢၢ်ဘၢတၢ်လီၤ.+ ၃၄ ဘၣ်ဆၣ်​ ဖဲစီၤမိၤၡ့ လဲၤနုာ်လီၤလၢ ယဟိဝၤယွၤ အမဲာ်ညါ ဒ်သိး အကတဲတၢ်ဒီးအီၤ အဂီၢ်အခါ အဝဲ ဘ့ၣ်လီၤကွံာ် နီၣ်ကျၢၢ်ဘၢတၢ် တုၤလၢ အဟးထီၣ်ဖဲန့ၣ်​ တစုလီၤ.+ ဒီးဖဲအဝဲဟးထီၣ်အခါ အဝဲတဲဘၣ်​ ပှၤအံၣ်စရ့လးဖိလၢ တၢ်မၤလိာ်လၢ အဒိးန့ၢ်ဘၣ်ဝဲတဖၣ်လီၤ.+ ၃၅ ဒီးပှၤအံၣ်စရ့လးဖိတဖၣ်​ ထံၣ်ဘၣ်ဝဲလၢ စီၤမိၤၡ့ အမဲာ်သၣ်​ ဆဲးကပြုၢ်ကပြီၤလီၤ. ဒီးစီၤမိၤၡ့ မၤဘၢကဒါက့ၤအမဲာ် လၢနီၣ်ကျၢၢ်ဘၢတၢ် တုၤလၢ အက့ၤနုာ်လီၤ တဲသကိးတၢ်ဒီး ကစၢ်ယွၤလီၤ.+

၃၅ လၢခံ စီၤမိၤၡ့ ကိးဖှိၣ်​ ပှၤအံၣ်စရ့လးဖိခဲလၢာ်ဒီး တဲအဝဲသ့ၣ်လၢ “အဝဲအံၤ မ့ၢ်တၢ်လၢ ယဟိဝၤယွၤ မၤလိာ်ဝဲလၢ ပကဘၣ်မၤအီၤလီၤ.+ ၂ သုအိၣ်ဒီး မုၢ်နံၤဃုသီလၢ သုကမၤတၢ်မၤ အဂီၢ်လီၤ. ဘၣ်ဆၣ်​ မုၢ်နွံနံၤတနံၤန့ၣ်​ ကကဲထီၣ်​ တၢ်လၢအစီဆှံ လၢသုဂီၢ် ဒီးမ့ၢ်ဝဲ မုၢ်အိၣ်ဘှံးအနံၤ လၢတၢ်ပာ်စီဆှံအီၤလၢ ယဟိဝၤယွၤ အဂီၢ်လီၤ.+ ပှၤလၢအမၤတၢ်မၤ ဖဲနံၤအဝဲန့ၣ်န့ၣ်​ ကဘၣ်​ တၢ်မၤသံအီၤလီၤ.+ ၃ ဒီးလၢမုၢ်အိၣ်ဘှံးနံၤန့ၣ်​ သုတဘၣ်​ မၤကဲၤထီၣ်​ မ့ၣ်အူလၢ သုတၢ်အိၣ်တၢ်ဆိးအလီၢ် နီတပူၤဘၣ်.”

၄ ဒီးစီၤမိၤၡ့တဲဘၣ်​ ပှၤအံၣ်စရ့လးဖိ ခဲလၢာ်လၢ “အဝဲအံၤ မ့ၢ်တၢ်လၢ ယဟိဝၤယွၤ မၤလိာ်ဝဲန့ၣ်လီၤ. ၅ ‘ဟံးန့ၢ် တၢ်မၤဘူၣ်လၢ ယဟိဝၤယွၤအဂီၢ် လၢသုကျါတက့ၢ်.+ ပှၤကိးဂၤဒဲးလၢ အသးအိၣ်လၢ အကဟ့ၣ်မၤဘူၣ်တၢ်+ လၢယဟိဝၤယွၤ အဂီၢ်န့ၣ်​ မ်အဟဲစိာ်ထူ, စ့ညၣ်, တိၢ်ဘီ, ၆ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ်, လုၣ်လၢအဂ့ၤ, မဲာ်တဲးလဲးအဆူၣ်,+ ၇ သိဖါအဘ့ၣ်​ လၢအဘၣ်​ တၢ်စုၣ်ဂီၤအီၤ, ပီၣ်လဲၣ်ဆှီအဘ့ၣ်, သ့ၣ်ဖှ့ၡံးတၤ, ၈ သိလၢမ့ၣ်အူဒၢအဂီၢ်, သ့ၣ်စရံအထုးလၢ သိလၢတၢ်ဒိးဖှူတၢ်အဂီၢ် ဒီးလၢတၢ်နၢမူအဂီၢ်,+ ၉ တၢ်မျၢ်မဟူယၤတဖၣ်​ ဒီးလၢၢ်အဂၤတဖၣ်လၢ ကဘၣ်တၢ်ထီထီၣ်အီၤလၢ အ့ဖိး+ ဒီးထၢၣ်ဖိ*+ အလိၤ အဂီၢ်လီၤ.

၁၀ ‘“ပှၤလၢအအိၣ်ဒီး တၢ်သ့တၢ်ဘၣ်​ လၢသုကျါ ကိးဂၤဒဲးန့ၣ်+ မ်အဝဲသ့ၣ်​ ဟဲတ့ထီၣ်တၢ်လၢ ယဟိဝၤယွၤ မၤလိာ်ဝဲ ခဲလၢာ်တက့ၢ်. ၁၁ တၢ်သ့ၣ်တဖၣ်အံၤ မ့ၢ်ဝဲ ဒဲစီဆှံ ဒီးအတၢ်ကံးညာ်, အနီၣ်ဘျးတဖၣ်, အသ့ၣ်ဘ့ၣ်ဘၣ်​ အကျီၤတဖၣ်, တၢ်အတီတဖၣ်, အထူၣ်တဖၣ်​ ဒီးအခီၣ်လီၢ်တဖၣ်, ၁၂ တလါစီဆှံ+ ဒီးအနီၣ်ယိးဘိတဖၣ်,+ တလါအခိၣ်ကျး,+ ယၣ်ဘျးသဒၢလၢ+ တၢ်ကနီၤဖးတၢ်အဂီၢ်, ၁၃ စီၢ်နီၤခိၣ်+ ဒီးအနီၣ်ယိးဘိတဖၣ်​ ဒီးအတၢ်ပီးတၢ်လီခဲလၢာ်, ကိၣ်လၢ တၢ်လုၢ်ထီၣ်တၢ်အဂီၢ်,+ ၁၄ မ့ၣ်အူဒၢ+ လၢတၢ်ကပီၤအဂီၢ် ဒီးအတၢ်ပီးတၢ်လီတဖၣ်​ ဒီးမ့ၣ်အူဒၢ အခွးတဖၣ်​ ဒီးသိလၢ တၢ်ကပီၤအဂီၢ်,+ ၁၅ တၢ်လုၢ်လီၢ်လၢ တၢ်ဒွဲၣ်ထီၣ်​ တၢ်နၢမူအဂီၢ်+ ဒီးအနီၣ်ယိးဘိတဖၣ်, သိလၢ တၢ်ဒိးဖှူတၢ်အဂီၢ်, တၢ်နၢမူ,+ တၢ်ကံးညာ်လၢ တၢ်ကနုာ်လီၤလၢ ဒဲစီဆှံအဂီၢ်, ၁၆ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ်+ ဒီးအနီၣ်ကၣ်တိၢ်ဘီ, အနီၣ်ယိးဘိတဖၣ်​ ဒီးအတၢ်ပီးတၢ်လီခဲလၢာ်, ဒီးထံဒၢဖးဒိၣ်​ ဒီးတၢ်တီၣ်ထီၣ်ထံဒၢအလီၢ်,+ ၁၇ တၢ်ကံးညာ်တဖၣ်လၢ အကရၢၢ်ဃာ် တၢ်ပျီပူၤ,+ အထူၣ်တဖၣ်​ ဒီးအခီၣ်လီၢ်တဖၣ်​ ဒီးတၢ်ကံးညာ်လၢ တၢ်နုာ်လီၤအလီၢ်လၢ ပှၤကနုာ်လီၤဆူ တၢ်ပျီလၢ အအိၣ်လၢ ကရၢၢ်ပူၤ ၁၈ ဒီးထးခိၣ်စူတဖၣ်လၢ ဒဲစီဆှံအဂီၢ် ဒီးထးခိၣ်စူတဖၣ်လၢ တၢ်ပျီလၢ အအိၣ်လၢ ကရၢၢ်ပူၤအဂီၢ် ဒီးအပျံၤတဖၣ်,+ ၁၉ တၢ်ကူတၢ်သိးလၢ အဘၣ်တၢ်ထါအီၤဂ့ၤဂ့ၤ+ လၢပှၤကမၤတၢ် လၢဒဲစီဆှံအဂီၢ်, ပှၤလုၢ်တၢ်ဒိၣ်​ စီၤအၤဟရိၣ်​ အတၢ်ကူတၢ်သိးစီဆှံ+ ဒီးစီၤအၤဟရိၣ်​ အဖိခွါတဖၣ်​ အတၢ်ကူတၢ်သိးလၢ အဝဲသ့ၣ်​ ကမၤတၢ် ဒ်ပှၤလုၢ်တၢ်ဒိၣ်တဖၣ်​ အဂီၢ်လီၤ.’”

၂၀ ဒီးပှၤအံၣ်စရ့လးဖိခဲလၢာ် ဟးထီၣ်လၢ စီၤမိၤၡ့အအိၣ်လီၤ. ၂၁ ဝံၤဒီးပှၤလၢ အသးထိၣ်ဟူးထိၣ်ဂဲၤထီၣ်အီၤ ကိးဂၤဒဲးန့ၣ်+ ဟဲစိာ်တၢ်မၤဘူၣ်​ လၢယဟိဝၤယွၤ အဂီၢ်လီၤ. ဒီးတၢ်မၤဘူၣ်အံၤ တၢ်ကသူအီၤလၢ တၢ်အိၣ်ဖှိၣ်အဒဲ, တၢ်အိၣ်ဖှိၣ်အဒဲ အတၢ်ဖံးတၢ်မၤတဖၣ်​ ဒီးတၢ်ကူတၢ်သိး စီဆှံအဂီၢ်လီၤ. ၂၂ ဒီးပှၤလၢအသးအိၣ်​ ဟ့ၣ်တၢ်တဖၣ်န့ၣ်​ အဝဲသ့ၣ်​ ဆဲးဟဲဝဲလီၤ. ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ ဟဲစိာ်ဝဲ နီၣ်ဆှိးဃံလၤထီၣ်တၢ်, နၢ်ဒံး, ပသံး ဒီးတၢ်မၤဃံမၤလၤသး လၢအဂၤတဖၣ်​ ဃုာ်ဒီး တၢ်ဖိတၢ်လံၤလၢ အမ့ၢ်ထူတဖၣ်လီၤ. အဝဲသ့ၣ်​ ကိးဂၤဒဲး ဟဲဟ့ၣ်လုၢ်ထီၣ်ဝဲ အထူတဖၣ်​ လၢယဟိဝၤယွၤ အအိၣ်လီၤ.+ ၂၃ ဒီးပှၤလၢအအိၣ်ဒီး လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ်, လုၣ်လၢအဂ့ၤ, မဲာ်တဲးလဲးအဆူၣ်, သိဖါအဘ့ၣ်​ လၢအဘၣ်​ တၢ်စုၣ်ဂီၤအီၤ, ပီၣ်လဲၣ်ဆှီအဘ့ၣ်န့ၣ်​ ဟဲစိာ်ဝဲ တၢ်သ့ၣ်တဖၣ်န့ၣ်လီၤ. ၂၄ ပှၤလၢ အသးအိၣ်​ ဟ့ၣ်မၤဘူၣ်လီၤဝဲ စ့ညၣ်​ ဒီးတိၢ်ဘီတဖၣ်န့ၣ်​ ဟဲစိာ်ဝဲလၢ တၢ်မၤဘူၣ်လၢ ယဟိဝၤယွၤ အဂီၢ်လီၤ. ဒီးပှၤလၢ အအိၣ်ဒီး သ့ၣ်ဖှ့ၡံးတၤတဖၣ်န့ၣ်​ ဟဲစိာ်ဝဲ ဒ်သိး ပှၤကသူအီၤလၢ တၢ်သူၣ်ထီၣ်တၢ် အဂီၢ်လီၤ.

၂၅ ပိာ်မုၣ်လၢအအိၣ်ဒီး တၢ်သ့တၢ်ဘၣ်​ ကိးဂၤဒဲးန့ၣ်+ လ့ၢ်လုၣ်လၢအစု ဒီးဟဲစိာ်တၢ်လၢ အလ့ၢ်ဝဲတဖၣ်​ လၢအမ့ၢ် လုၣ်လၢအလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤလီၤ. ၂၆ ဒီးပိာ်မုၣ်လၢ အအိၣ်ဒီး တၢ်သ့တၢ်ဘၣ်​ ကိးဂၤဒဲးန့ၣ်​ အသးထိၣ်ဟူးထိၣ်ဂဲၤထီၣ်အီၤ လၢကလ့ၢ်ဝဲ မဲာ်တဲးလဲး အဆူၣ်လီၤ.

၂၇ ဒီးပှၤခိၣ်ပှၤနၢ်တဖၣ်​ ဟဲစိာ်ဝဲ တၢ်မျၢ်မဟူယၤတဖၣ်​ ဒီးလၢၢ်အဂၤတဖၣ်​ လၢပှၤကထီထီၣ်အီၤလၢ အ့ဖိး ဒီးထၢၣ်ဖိ အလိၤ+ ၂၈ ဒီးသ့ၣ်စရံအထုးဒီးသိ လၢမ့ၣ်အူဒၢအဂီၢ်, သိလၢတၢ်ဒိးဖှူတၢ်အဂီၢ်+ ဒီးတၢ်နၢမူအဂီၢ်လီၤ.+ ၂၉ ဒီးယဟိဝၤယွၤ မၤလိာ်ပာ်စၢၤ စီၤမိၤၡ့လၢ ပှၤကဘၣ်မၤ တၢ်မၤတဖၣ်အံၤလီၤ. အဃိ ပှၤအံၣ်စရ့လးဖိ ပိာ်မုၣ်ဒီး ပိာ်ခွါလၢ အသး ထိၣ်ဟူးထိၣ်ဂဲၤထီၣ်အီၤ ကိးဂၤဒဲးန့ၣ်​ ဟဲစိာ် တၢ်တမံၤမံၤ လၢတၢ်မၤအံၤ အဂီၢ်လီၤ. ဒီးအဝဲသ့ၣ်​ ဟဲစိာ်အီၤ ဒ်တၢ်ဟ့ၣ်လၢ တၢ်သးအိၣ်အပူၤအသိး လၢယဟိဝၤယွၤ အဂီၢ်လီၤ.+

၃၀ ဒီးစီၤမိၤၡ့တဲဘၣ်​ ပှၤအံၣ်စရ့လးဖိလၢ “ယဟိဝၤယွၤ ဃုထၢထီၣ်​ စီၤဘစၤလအ့လး လၢယူဒၤ အဒူၣ်ကျါလီၤ. အဝဲမ့ၢ် စီၤအူရံၤ အဖိခွါ ဒီးစီၤဃူၢ် အလံၤခွါလီၤ.+ ၃၁ ဒီးကစၢ်ယွၤ မၤပှဲၤအီၤဒီး အသးစီဆှံ ဒီးဟ့ၣ်အီၤ တၢ်ကူၣ်သ့, တၢ်နၢ်ပၢၢ် ဒီးတၢ်သ့ၣ်ညါ ဘၣ်ဃးဒီး စုသ့တၢ်မၤ ကိးမံၤဒဲး ၃၂ ဒ်သိး အကကူၣ်ထီၣ်ဖးလီၤတၢ် လၢအကတ့ထီၣ်တၢ် ဃံဃံလၤလၤအဂီၢ် ဒီးကမၤတၢ်လၢထူ, စ့ညၣ်​ ဒီးတိၢ်ဘီ ၃၃ ဒီးကပိာ် လၢၢ်လုၢ်ဒိၣ်ပှ့ၤဒိၣ်တဖၣ်​ ဒီးကထီထီၣ်အီၤအဂီၢ် ဒီးကတ့ထီၣ်​ တၢ်ကိးမံၤဒဲးလၢ သ့ၣ်အဂီၢ်လီၤ. ၃၄ စီၤဘစၤလအ့လး ဒီးစီၤအၤဟလံအာ်+ လၢအမ့ၢ် စီၤအဃံစမး အဖိခွါ လၢဒၣ်အဒူၣ်ကျါန့ၣ်​ ကစၢ်ယွၤ ဟ့ၣ်လီၤအီၤ တၢ်သ့တၢ်ဘၣ်လၢ ကသိၣ်လိတၢ်အဂီၢ်လီၤ. ၃၅ ကစၢ်ယွၤ ဟ့ၣ်အဝဲသ့ၣ်​ တၢ်သ့တၢ်ဘၣ်​ လၢလၢပှဲၤပှဲၤ+ ဒ်သိး အကမၤ ကယဲၢ်စုသ့တၢ်မၤ, ဆးကံၣ်ဃ့တၢ် ဒီးထါတၢ်လၢ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ အဂီၢ်လီၤ. အဃိ အဝဲသ့ၣ်​ ကကူၣ်ထီၣ်ဖးလီၤတၢ်လၢ ကတ့ထီၣ်​ တၢ်အကလုာ်ကလုာ် ဒီးကမၤတၢ်မၤ ကိးခါဒဲးလီၤ.

၃၆ “စီၤဘစၤလအ့လးန့ၣ်​ ကမၤသကိးတၢ်ဒီး စီၤအၤဟလံအာ် ဒီးပိာ်ခွါလၢအအိၣ်ဒီး တၢ်သ့တၢ်ဘၣ်​ ကိးဂၤဒဲးလီၤ. ယဟိဝၤယွၤဟ့ၣ်​ အဝဲသ့ၣ်​ တၢ်ကူၣ်သ့ ဒီးတၢ်နၢ်ပၢၢ် ဒ်သိးအဝဲသ့ၣ်​ တ့ထီၣ်တၢ်ခဲလၢာ် လၢအဘၣ်ထွဲဒီး ဒဲစီဆှံ ဒ်ယဟိဝၤယွၤ မၤလိာ်ဝဲအသိး ကဘၣ်အဂီၢ်လီၤ.”+

၂ အဃိ စီၤမိၤၡ့ ကိးန့ၢ်ဝဲ စီၤဘစၤလအ့လး ဒီးစီၤအၤဟလံအာ် ဒီးကယဲၢ်ပိာ်ခွါတဖၣ်လၢ အအိၣ်ဒီး တၢ်သ့တၢ်ဘၣ်​ လၢယဟိဝၤယွၤ ဟ့ၣ်လီၤအဝဲသ့ၣ်လၢ တၢ်ကူၣ်သ့လီၤ.+ အဝဲသ့ၣ်ကိးဂၤဒဲးန့ၣ်​ အသးထိၣ်ဟူးထိၣ်ဂဲၤထီၣ်အီၤလၢ ကမၤတၢ်မၤအံၤလၢ တၢ်သးအိၣ်အပူၤလီၤ.+ ၃ ဒီးတၢ်မၤဘူၣ်ခဲလၢာ်လၢ ပှၤအံၣ်စရ့လးဖိ ဟဲစိာ်ဝဲလၢ ပှၤကတ့ထီၣ်တၢ်လၢ အဘၣ်ထွဲဒီးဒဲစီဆှံအဂီၢ်န့ၣ်​ အဝဲသ့ၣ်ဟံးန့ၢ်ဝဲ လၢစီၤမိၤၡ့အအိၣ်လီၤ.+ ဒီးပှၤအံၣ်စရ့လးဖိ ဆဲးဟဲစိာ်န့ၢ်အီၤ တၢ်ဟ့ၣ်​ လၢတၢ်သးအိၣ်အပူၤ ကိးမုၢ်ဂီၤဒဲးလီၤ.

၄ ဒီးဖဲအဝဲသ့ၣ်စးထီၣ်မၤဝဲ တၢ်မၤစီဆှံအံၤအခါ ပှၤလၢအမၤတၢ်သ့ဂ့ၤဂ့ၤ ကိးဂၤဒဲး ဟဲဝဲတဂၤဝံၤတဂၤ ၅ ဒီးအဝဲသ့ၣ်​ တဲဘၣ်စီၤမိၤၡ့လၢ “ဒ်သိးပှၤကမၤ တၢ်မၤလၢ ယဟိဝၤယွၤမၤလိာ်တ့ၢ်ဝဲအဂီၢ် ပှၤဂီၢ်မုၢ် ဟဲစိာ်တၢ်အါန့ၢ်ဒံး တၢ်လၢပလိၣ်ဘၣ်အီၤ စၢၢ်တလၢၢ်လီၤ.” ၆ အဃိ စီၤမိၤၡ့ မၤလိာ်ဝဲလၢ ပှၤကဘိးဘၣ်သ့ၣ်ညါ ဒဲကဝီၤ ဒီတဘ့ၣ်ညါလၢ “တဘၣ်ဟဲစိာ် တၢ်မၤဘူၣ်​ လၢဒဲစီဆှံအဂီၢ်လၢၤတဂ့ၤ.” အဃိ ပှၤဂီၢ်မုၢ်တဖၣ်​ ဘၣ်တၢ်တြီအဝဲသ့ၣ်​ ဒ်သိးအသုတဟဲစိာ် တၢ်နီတမံၤလၢၤတဂ့ၤ အဂီၢ်လီၤ. ၇ ဒီးတၢ်မၤဘူၣ်ခဲလၢာ်န့ၣ်​ အိၣ်ဝဲအါန့ၢ်ဒံး ပှၤလိၣ်ဘၣ်ဝဲလၢ ကတ့ထီၣ်တၢ်လၢ အဘၣ်ထွဲဒီး ဒဲစီဆှံအဂီၢ်လီၤ.

၈ အဃိ ပှၤလၢအမၤတၢ်သ့ ကိးဂၤဒဲး+ တ့ထီၣ်ဝဲ ဒဲစီဆှံလၢ+ ဒဲအတၢ်ကံးညာ် အဘ့ၣ်တဆံ လၢအဘၣ်တၢ်တ့အီၤ လၢလုၣ်လၢအဂ့ၤ လၢအပိၤအသး, လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး ဒီးတၢ်အဂီၤဆှုၣ်ကလာ်လီၤ. ဒီးအဝဲ* ဆးထီၣ်အီၤဒီး ခ့ရူာ်အဂီၤတဖၣ်လီၤ.+ ၉ ဒဲအတၢ်ကံးညာ် တဘ့ၣ်စုာ်စုာ်န့ၣ်​ ထီဝဲ ၂၈ ပျၢ်* ဒီးလဲၢ်ဝဲ ၄ ပျၢ်လီၤ. ဒီးဒဲအတၢ်ကံးညာ်တဖၣ်န့ၣ်​ အလဲၢ်အထီ ထဲသိးလိာ်အသးလီၤ. ၁၀ ဒီးအဝဲဆးကထြၢထီၣ်ဝဲ ဒဲအတၢ်ကံးညာ် ယဲၢ်ဘ့ၣ်​ တကရူၢ် ယဲၢ်ဘ့ၣ်​ တကရူၢ်လီၤ. ၁၁ ဝံၤဒီးအဝဲတ့ထီၣ်​ တၢ်အကွီၤတဖၣ်လၢ လုၣ်လၢအလွဲၢ်လါအဲး လၢတၢ်ကံးညာ်တဘ့ၣ်​ အကနူၤ ဖဲတၢ်မၤဘၣ်ဘျးအီၤ အလီၢ်လီၤ. ဒီးအဝဲတ့ထီၣ်​ တၢ်အကွီၤတဖၣ်လၢ တၢ်ကံးညာ်အဝဲတဘ့ၣ်​ အကနူၤ ဖဲတၢ်မၤဘၣ်ဘျးအီၤ အလီၢ်လီၤ. ၁၂ အဝဲတ့ထီၣ်​ တၢ်အကွီၤအခါ ၅၀ လၢတၢ်ကံးညာ်တဘ့ၣ်အလိၤ ဒီးလၢတၢ်ကံးညာ် အဝဲတဘ့ၣ်​ အကနူၤန့ၣ်​ အဝဲတ့ထီၣ်​ တၢ်အကွီၤအခါ ၅၀ ဒ်သိး တၢ်အကွီၤတဖၣ်အံၤ ကအိၣ်သဃီၤလိာ်အသး ဖဲတၢ်မၤဘၣ်ဘျးအီၤ အလီၢ်လီၤ. ၁၃ ဒီးအဝဲတ့ထီၣ်​ နီၣ်ဘျးထူ အဘ့ၣ်​ ၅၀ ဒီးမၤဘၣ်ဘျး တၢ်ကံးညာ်တဖၣ်လၢ နီၣ်ဘျးတဖၣ်အံၤ အဃိ အကဲထီၣ်​ တၢ်ကံးညာ် တဘ့ၣ်ဃီလၢ ဒဲစီဆှံအဂီၢ်လီၤ.

၁၄ ဝံၤဒီး အဝဲတ့ထီၣ်​ ဒဲအတၢ်ကံးညာ် ၁၁ ဘ့ၣ်လၢ မဲာ်တဲးလဲးအဆူၣ်​ လၢကကျၢၢ်ဘၢဝဲ ဒဲစီဆှံအဂီၢ်လီၤ.+ ၁၅ ဒဲအတၢ်ကံးညာ်တဖၣ်အံၤ တဘ့ၣ်စုာ်စုာ်န့ၣ်​ ထီဝဲ အပျၢ် ၃၀ ဒီးလဲၢ်ဝဲ ၄ ပျၢ်လီၤ. ဒီးဒဲအတၢ်ကံးညာ် ၁၁ ဘ့ၣ်န့ၣ်​ အလဲၢ်အထီ ထဲသိးလိာ်အသးလီၤ. ၁၆ ဒီးအဝဲ ဆးကထြၢထီၣ်ဝဲ ဒဲအတၢ်ကံးညာ် ယဲၢ်ဘ့ၣ်​ ဒီးဒဲအတၢ်ကံးညာ် အဝဲဃုဘ့ၣ်န့ၣ်​ အဝဲဆးကထြၢထီၣ်ဝဲ စ့ၢ်ကီးလီၤ. ၁၇ ဒီးအဝဲတ့ထီၣ်​ တၢ်အကွီၤအခါ ၅၀ လၢတၢ်ကံးညာ်တဘ့ၣ်​ အကနူၤ ဖဲတၢ်မၤဘၣ်ဘျးအီၤအလီၢ် ဒီးတၢ်အကွီၤအခါ ၅၀ လၢတၢ်ကံးညာ် အဝဲတဘ့ၣ်အကနူၤ ဒ်သိး ကမၤဘၣ်ဘျးအီၤ အဂီၢ်လီၤ. ၁၈ ဒီးအဝဲတ့ထီၣ်​ နီၣ်ဘျးတိၢ်ဘီ အခါ ၅၀ ဒ်သိးတၢ်ကံးညာ် ခံကရူၢ် ကဘၣ်ဘျး ဒီးကကဲထီၣ်​ တခါဃီအဂီၢ်လီၤ.

၁၉ ဒီးအဝဲတ့ထီၣ်ဝဲ ဒဲစီဆှံ အတၢ်ကျၢၢ်ဘၢတၢ်တဘ့ၣ်​ လၢသိဖါအဘ့ၣ်လၢ အဘၣ်တၢ်စုၣ်ဂီၤအီၤ ဒီးအဝဲတ့ထီၣ်ဝဲ တၢ်ကျၢၢ်ဘၢတၢ် အဂၤတဘ့ၣ်​ လၢပီၣ်လဲၣ်ဆှီအဘ့ၣ်​ လၢအကအိၣ်လၢ အဖီခိၣ်အဂီၢ်လီၤ.+

၂၀ ဒီးအဝဲတ့ထီၣ်​ သ့ၣ်ဘ့ၣ်ဘၣ်အကျီၤတဖၣ်​ လၢသ့ၣ်ဖှ့ၡံးတၤ+ လၢဒဲစီဆှံအဂီၢ် ဒီးအဝဲ ပာ်ဆၢထၢၣ်ဝဲလီၤ.+ ၂၁ သ့ၣ်ဘ့ၣ်ဘၣ်အကျီၤ ကိးဘ့ၣ်ဒဲးန့ၣ်​ ထီဝဲအပျၢ်တဆံ ဒီးအဒီၣ်ဃီၤ အိၣ်ဝဲ တပျၢ်တထါလီၤ. ၂၂ သ့ၣ်ဘ့ၣ်ဘၣ်အကျီၤ ကိးဘ့ၣ်ဒဲးန့ၣ်​ အိၣ်ဒီးအခီၣ်ခံခါ လၢအသဃဲၤလိာ်သးလီၤ. အဝဲတ့ထီၣ်​ ဒဲစီဆှံ အသ့ၣ်ဘ့ၣ်ဘၣ်အကျီၤ ဒ်န့ၣ်​ ကိးဘ့ၣ်ဒဲးလီၤ. ၂၃ ဒီးအဝဲတ့ထီၣ်ဝဲ သ့ၣ်ဘ့ၣ်ဘၣ်အကျီၤ အဘ့ၣ်​ ၂၀ လၢဒဲစီဆှံ အကလံၤထံးတခီ အဂီၢ်လီၤ. ၂၄ ဒီးအဝဲတ့ထီၣ်​ တၢ်အခီၣ်လီၢ်အဘ့ၣ်​ ၄၀ လၢစ့ညၣ်​ ဒ်သိးအကအိၣ်လၢ သ့ၣ်ဘ့ၣ်ဘၣ်အကျီၤ အဘ့ၣ်​ ၂၀ အဖီလာ်လီၤ. အဃိ လၢသ့ၣ်ဘ့ၣ်ဘၣ်အကျီၤ တဘ့ၣ်စုာ်စုာ် အခီၣ်ခံခါ အဖီလာ်န့ၣ်​ အိၣ်ဝဲဒီး တၢ်အခီၣ်လီၢ် ခံဘ့ၣ်လီၤ.+ ၂၅ လၢဒဲစီဆှံ အဝဲတကပၤ လၢကလံၤစိးတခီ အဂီၢ်န့ၣ်​ အဝဲတ့ထီၣ်​ သ့ၣ်ဘ့ၣ်ဘၣ်အကျီၤ ၂၀ ၂၆ ဒီးတၢ်အခီၣ်လီၢ် အဘ့ၣ်​ ၄၀ လၢစ့ညၣ်လီၤ. အဃိ လၢသ့ၣ်ဘ့ၣ်ဘၣ်အကျီၤ တဘ့ၣ်စုာ်စုာ် အခီၣ်ခံခါ အဖီလာ်န့ၣ်​ အိၣ်ဝဲဒီး တၢ်အခီၣ်လီၢ် ခံဘ့ၣ်လီၤ.

၂၇ လၢဒဲစီဆှံအလီၢ်ခံတကပၤ လၢမုၢ်နုာ်တခီအဂီၢ်န့ၣ်​ အဝဲတ့ထီၣ်ဝဲ သ့ၣ်ဘ့ၣ်ဘၣ်အကျီၤ ဃုဘ့ၣ်လီၤ.+ ၂၈ ဒီးလၢဒဲစီဆှံ အနၢၣ်ခံနၢၣ်​ လၢအလီၢ်ခံ တကပၤအဂီၢ်န့ၣ်​ အဝဲတ့ထီၣ်ဝဲ သ့ၣ်ဘ့ၣ်ဘၣ်အကျီၤ ခံဘ့ၣ်လီၤ. ၂၉ ဒီးသ့ၣ်ဘ့ၣ်ဘၣ်အကျီၤလၢ တၢ်အနၢၣ်ခံနၢၣ်​ အဂီၢ်အံၤန့ၣ်​ မ့ၢ်ဝဲ သ့ၣ်ဘ့ၣ်ဘၣ်ခံဘ့ၣ်​ စးထီၣ်လၢ အဖီခိၣ်​ တုၤလၢ အဖီလာ်လီၤ. ဒီးသ့ၣ်ဘ့ၣ်ဘၣ်ခံဘ့ၣ်အံၤ ဘုးတာ်လိာ်အသး ဖဲကွီၤအဆိကတၢၢ် တကွီၤန့ၣ်လီၤ. ၃၀ အဃိ သ့ၣ်ဘ့ၣ်ဘၣ်အကျီၤတဖၣ်အံၤ အိၣ်ဝဲ ဃိးဘ့ၣ်​ ဒီးအခီၣ်လီၢ်လၢ အဘၣ်တၢ်တ့အီၤလၢ စ့ညၣ်န့ၣ်​ အိၣ်ဝဲ ၁၆ ဘ့ၣ်လီၤ. အဃိ လၢသ့ၣ်ဘ့ၣ်ဘၣ်အကျီၤ တဘ့ၣ်စုာ်စုာ်အဖီလာ်န့ၣ်​ တၢ်အခီၣ်လီၢ် အိၣ်ဝဲခံဘ့ၣ်လီၤ.

၃၁ လၢသ့ၣ်ဘ့ၣ်ဘၣ်အကျီၤ လၢဒဲစီဆှံ တကပၤအဂီၢ်န့ၣ်​ အဝဲတ့ထီၣ်​ တၢ်အတီယဲၢ်ခါ လၢသ့ၣ်ဖှ့ၡံးတၤလီၤ.+ ၃၂ ဒီးသ့ၣ်ဘ့ၣ်ဘၣ်အကျီၤ လၢဒဲစီဆှံ အဝဲတကပၤအဂီၢ်န့ၣ်​ အဝဲတ့ထီၣ်ဝဲ တၢ်အတီယဲၢ်ခါ ဒီးသ့ၣ်ဘ့ၣ်ဘၣ်အကျီၤ လၢဒဲစီဆှံ အလီၢ်ခံတကပၤ လၢမုၢ်နုာ်တခီအဂီၢ်န့ၣ်​ အဝဲတ့ထီၣ်ဝဲ တၢ်အတီ ယဲၢ်ခါလီၤ. ၃၃ ဒီးအဝဲတ့ထီၣ်​ တၢ်အတီ လၢတၢ်ခၢၣ်သးတဘိ ဒ်သိးအကအိၣ်​ လၢသ့ၣ်ဘ့ၣ်ဘၣ်​ အကျီၤတဖၣ်​ အခၢၣ်သး စးထီၣ်လၢအံၤတခီ တုၤလၢ အဝဲတခီလီၤ. ၃၄ ဒီးသ့ၣ်ဘ့ၣ်ဘၣ်အကျီၤတဖၣ်န့ၣ်​ အဝဲကျးဝဲဒီး ထူကဘျၣ်တဖၣ်လီၤ. ဒီးအဝဲတ့ထီၣ်ဝဲ ထူအကွီၤတဖၣ်​ လၢအကဖီၣ်ဃာ် တၢ်အတီတဖၣ်​ အဂီၢ်လီၤ. ဒီးတၢ်အတီတဖၣ်န့ၣ်​ အဝဲကျးဝဲဒီး ထူကဘျၣ်တဖၣ်လီၤ.+

၃၅ ဒီးအဝဲမၤထီၣ်​ ယၣ်ဘျးသဒၢလၢ+ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ. ဒီး အဆးထီၣ်ဝဲဒီး+ ခ့ရူာ်အဂီၤတဖၣ်လီၤ.+ ၃၆ ဒီးလၢယၣ်ဘျးသဒၢအဂီၢ်န့ၣ်​ အဝဲတ့ထီၣ်​ တၢ်အထူၣ်လွံၢ်ထူၣ်​ လၢအဘၣ်တၢ်တ့အီၤလၢ သ့ၣ်ဖှ့ၡံးတၤ ဒီးဘၣ်တၢ်ကျးအီၤဒီး ထူကဘျၣ်တဖၣ်​ ဒီးအတ့ထီၣ်စ့ၢ်ကီး နီၣ်ကွးထူတဖၣ်လီၤ. ဒီးတၢ်အခီၣ်လီၢ်လွံၢ်ဘ့ၣ်​ လၢအဘၣ်တၢ်တ့အီၤလၢ စ့ညၣ်န့ၣ်​ အဝဲပာ်လီၤဝဲလၢ တၢ်အထူၣ်လွံၢ်ထူၣ်အံၤ အဖီလာ်လီၤ. ၃၇ လၢဒဲစီဆှံ အတၢ်နုာ်လီၤအလီၢ် အဂီၢ်န့ၣ်​ အဝဲထါန့ၢ်ဝဲ တၢ်ကံးညာ် လၢလုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသး,+ ၃၈ အထူၣ်ယဲၢ်ထူၣ်​ ဒီးအနီၣ်ကွးတဖၣ်လီၤ. ဒီးတၢ်အထူၣ်တဖၣ်​ အခိၣ်ထိး ဒီးအတၢ်ဘျးစဲတဖၣ်န့ၣ်​ အဝဲကျးဝဲ ဒီးထူကဘျၣ်တဖၣ်လီၤ. မ့မ့ၢ် တၢ်အထူၣ်​ ယဲၢ်ထူၣ်​ အခီၣ်လီၢ်တဖၣ်န့ၣ်​ မ့ၢ်ဝဲတိၢ်ဘီလီၤ.

၃၇ ဒီးစီၤဘစၤလအ့လး+ တ့ထီၣ်ဝဲ တလါစီဆှံလၢ+ သ့ၣ်ဖှ့ၡံးတၤလီၤ. တလါစီဆှံန့ၣ်​ အထီအိၣ်ဝဲ ခံပျၢ်တထါ,* အလဲၢ်အိၣ်တပျၢ်တထါ ဒီးအကစီၤထီၣ်ထီ အိၣ်တပျၢ်တထါလီၤ.+ ၂ လၢအပူၤဒီးအချၢန့ၣ်​ အဝဲကျးထီၣ်ဝဲ ထူစီကဘျၣ်တဖၣ်​ ဒီးကျီၤဝးတရံးဝဲ အခိၣ်ဒူ လၢထူလီၤ.+ ၃ ဒီးအဝဲတ့ထီၣ်​ ထူအကွီၤလွံၢ်ကွီၤ ဒီးထီထီၣ်ဝဲလၢ အခီၣ်လွံၢ်ခီ အဖီခိၣ်အဃိ လၢအကပၤတခီန့ၣ်​ ကွီၤအိၣ်ခံကွီၤ ဒီးလၢအဝဲတကပၤန့ၣ်​ ကွီၤအိၣ်ခံကွီၤလီၤ. ၄ ဒီးအဝဲတ့ထီၣ်ဝဲ နီၣ်ယိးဘိတဖၣ်လၢ သ့ၣ်ဖှ့ၡံးတၤ ဒီးအဝဲကျးဝဲဒီး ထူကဘျၣ်တဖၣ်လီၤ.+ ၅ ဝံၤဒီး အဝဲဂိာ်လီၤဝဲ နီၣ်ယိးဘိတဖၣ်လၢ ထူကွီၤတဖၣ်အပူၤ လၢတလါစီဆှံ အကပၤ ခံကပၤလၢာ် ဒ်သိး ပှၤကယိး တလါအဂီၢ်လီၤ.+

၆ အဝဲတ့ထီၣ်​ တၢ်အခိၣ်ကျး လၢထူစီလီၤ.+ ဒီးတၢ်အခိၣ်ကျးန့ၣ်​ ထီဝဲခံပျၢ်တထါ ဒီးအလဲၢ်အိၣ်ဝဲ တပျၢ်တထါလီၤ.+ ၇ ဒီးအဝဲပိာ်ဝဲ ခ့ရူာ်ခံဒု+ လၢထူစီ ဒီးပာ်ဝဲလၢ တလါအခိၣ်ကျး အထိးနါ ခံကပၤလၢာ် အလိၤလီၤ.+ ၈ ခ့ရူာ်တဒုန့ၣ်​ အိၣ်လၢ တလါအခိၣ်ကျး အထိးနါ တကပၤ ဒီးခ့ရူာ် အဝဲတဒုန့ၣ်​ အိၣ်လၢ အထိးနါ အဝဲတကပၤလီၤ. အဝဲပိာ်န့ၢ်ဝဲ ခ့ရူာ်ခံဒု ဒီးပာ်ဝဲလၢ တလါအခိၣ်ကျး အထိးနါ ခံကပၤလၢာ် အလိၤလီၤ. ၉ ဒီးခ့ရူာ်ခံဒုန့ၣ်​ အဒံးဆ့ ယူာ်ထီၣ်အသးလၢ တၢ်ဖီခိၣ်အဃိ အဒံးဆ့တဖၣ်​ အကဒုလီၤဘၣ်လၢ တလါအခိၣ်ကျး အလိၤလီၤ.+ ဒီးခ့ရူာ် ခံဒုန့ၣ်​ ကွၢ်ဆၢၣ်မဲာ်လိာ်အသး ဒီးဆုးလီၤအခိၣ်​ လၢတလါအခိၣ်ကျးလီၤ.+

၁၀ ဒီးအဝဲတ့ထီၣ်​ စီၢ်နီၤခိၣ်တဖျၢၣ်လၢ သ့ၣ်ဖှ့ၡံးတၤလီၤ.+ စီၢ်နီၤခိၣ်တဖျၢၣ်န့ၣ်​ အထီအိၣ်ဝဲ ခံပျၢ်, အလဲၢ်အိၣ်ဝဲတပျၢ် ဒီးအကစီၤထီၣ်ထီ အိၣ်ဝဲ တပျၢ်တထါလီၤ.+ ၁၁ ဒီးအဝဲကျးဝဲဒီး ထူစီကဘျၣ်တဖၣ်​ ဒီးအဝဲကျီၤဝးတရံး အကနူၤလၢ ထူလီၤ. ၁၂ လၢခံ တၢ်အကွီၤလၢ အလဲၢ်ဝဲ စုနၢလွံၢ်ဘိန့ၣ်* အဝဲထီထီၣ်​ ဝးတရံးဝဲ စီၢ်နီၤခိၣ်အဖီခိၣ်​ ဒီးအကျီၤဃာ်ဝဲ တၢ်ကွီၤအံၤအကနူၤ လၢထူလီၤ. ၁၃ တကးဒံးဘၣ်​ အဝဲတ့ထီၣ်​ ထူအကွီၤလွံၢ်ကွီၤ ဒီးပာ်ဝဲ ကွီၤတဖၣ်အံၤ လၢစီၢ်နီၤခိၣ်​ အနၢၣ်လွံၢ်နၢၣ်​ ဖဲစီၢ်နီၤခိၣ်​ အခီၣ်ဘုးတာ်လိာ်အသးဒီး စီၢ်နီၤခိၣ်အလီၢ်န့ၣ်လီၤ. ၁၄ ကွီၤတဖၣ်အံၤန့ၣ်​ အဝဲထီထီၣ်အီၤဘူးဒီး စီၢ်နီၤခိၣ်အကွီၤ ဒ်သိးကဖီၣ်ဃာ် နီၣ်ယိးဘိတဖၣ်​ ဒီးပှၤကယိးဝဲ စီၢ်နီၤခိၣ်အဂီၢ်လီၤ. ၁၅ ဒီးအဝဲတ့ထီၣ်​ နီၣ်ယိးဘိတဖၣ်လၢ သ့ၣ်ဖှ့ၡံးတၤ ဒီးအကျးဝဲဒီး ထူကဘျၣ်တဖၣ်​ ဒီးပှၤကသူအီၤ ဒ်သိးကယိး စီၢ်နီၤခိၣ်​ အဂီၢ်လီၤ. ၁၆ လၢခံ အဝဲတ့ထီၣ်ဝဲ စီၢ်နီၤခိၣ်​ အတၢ်ပီးတၢ်လီတဖၣ်​ လၢထူစီလီၤ. တၢ်ပီးတၢ်လီတဖၣ်အံၤ မ့ၢ်ဝဲ လီခီတဖၣ်, ထံခွးတဖၣ်​ ဒီးလီခီဖျၢၣ်​ ဒီးထံအီဒၢတဖၣ်​ ဒ်သိး ပှၤကသူအီၤလၢ တၢ်လူလီၤစပံးထံလၢ တၢ်လုၢ်တၢ်ပာ် အဂီၢ်လီၤ.+

၁၇ ဒီးအဝဲပိာ်န့ၢ်ဝဲ မ့ၣ်အူဒၢတဖျၢၣ်+ လၢထူစီလီၤ. မ့ၣ်အူဒၢ အခီၣ်လၣ်, အထူၣ်, အဖီတဖၣ်, အကဘိၣ်တဖၣ်​ ဒီးအတၢ်ကယၢကယဲတဖၣ်န့ၣ်​ ဘျးစဲလိာ်သး ခဲလၢာ်လီၤ.+ ၁၈ အဒ့ဃုဒ့န့ၣ်​ ကရၣ်ထီၣ်အသးလၢ မ့ၣ်အူဒၢအထူၣ်​ အကပၤ, တကပၤန့ၣ်​ သၢဒ့ ဒီးအဝဲတကပၤန့ၣ်​ သၢဒ့လီၤ. ၁၉ တၢ်အဒ့တဒ့စုာ်စုာ် အိၣ်ဒီး ဖီသၢဖီးလၢ အလီၤဂာ်ဒီး သ့ၣ်ၡၤကးအဖီ ဒီးလၢဖီတဖီးစုာ်စုာ် အဖီလာ်န့ၣ်​ အိၣ်ဒီး ဖီအကဘိၣ်တခါ ဒီးတၢ်ကယၢကယဲတခါလၢ အလီၤဂာ်ဒီး ဖီလၢအဖးထီၣ်​ တဖီးလီၤ. အဃိ အဒ့ဃုဒ့ လၢအကရၣ်ထီၣ်လၢ မ့ၣ်အူဒၢ အထူၣ်ကပၤန့ၣ်​ အိၣ်ဝဲဒ်န့ၣ်လီၤ. ၂၀ ဒီးလၢမ့ၣ်အူဒၢ အထူၣ်လိၤန့ၣ်​ အိၣ်ဒီး ဖီလွံၢ်ဖီးလၢ အလီၤဂာ်ဒီး သ့ၣ်ၡၤကးအဖီလီၤ. ဒီးလၢဖီတဖီးစုာ်စုာ် အဖီလာ်န့ၣ်​ အိၣ်ဒီး ဖီအကဘိၣ်​ ဒီးတၢ်ကယၢကယဲ တခါလၢ အလီၤဂာ်ဒီး ဖီလၢ အဖးထီၣ်​ တဖီးလီၤ. ၂၁ တၢ်အဒ့လၢ အဖီခိၣ်ကတၢၢ်ခံဒ့ အဖီလာ်န့ၣ်​ အိၣ်ဒီး ဖီအကဘိၣ်​ တခါလီၤ. ဒီးတၢ်အဒ့လၢ အခၢၣ်သးခံဒ့ အဖီလာ်န့ၣ်​ အိၣ်ဒီး ဖီအကဘိၣ်​ တခါလီၤ. ဒီးတၢ်အဒ့လၢ အဖီလာ်ကတၢၢ်ခံဒ့ အဖီလာ်စ့ၢ်ကီး ဖီအကဘိၣ်အိၣ်တခါလီၤ. အဃိ တၢ်အဒ့ဃုဒ့လၢ အကရၣ်ထီၣ်လၢ မ့ၣ်အူဒၢ အထူၣ်ကပၤန့ၣ်​ အိၣ်ဝဲဒ်န့ၣ်လီၤ. ၂၂ ဖီကဘိၣ်တဖၣ်, တၢ်အဒ့တဖၣ်​ ဒီးမ့ၣ်အူဒၢ ဒီတဖျၢၣ်န့ၣ်​ ဘၣ်တၢ်ပိာ်အီၤလၢထူစီ ဒီးတၢ်သ့ၣ်တဖၣ်အံၤ ဘျးစဲလိာ်သး ခဲလၢာ်လီၤ. ၂၃ ဒီးအဝဲတ့ထီၣ်ဝဲ မ့ၣ်အူ အခွးနွံခွးလၢ မ့ၣ်အူဒၢအဂီၢ်,+ မ့ၣ်အူဒၢ အနီၣ်တံာ် ဒီးမ့ၣ်အူအ့ၣ်အခွး တဖၣ်န့ၣ်လၢ ထူစီလီၤ. ၂၄ အဝဲတ့ထီၣ်ဝဲ မ့ၣ်အူဒၢ ဒီးအတၢ်ပီးတၢ်လီတဖၣ်​ လၢထူစီတတၤလၣ်လီၤ.*

၂၅ ဒီးအဝဲတ့ထီၣ်​ တၢ်လုၢ်လီၢ်လၢ တၢ်ဒွဲၣ်ထီၣ်​ တၢ်နၢမူအဂီၢ်+ လၢသ့ၣ်ဖှ့ၡံးတၤလီၤ. တၢ်လုၢ်လီၢ်န့ၣ်​ အလဲၢ်အိၣ်ဝဲ တပျၢ်, အဒီၣ်ဃီၤအိၣ်ဝဲ တပျၢ် ဒီးအမ့ၢ်ဝဲ တၢ်လွံၢ်နၢၣ်လၢ အကနူၤ ထဲသိးလိာ်အသး ဒီးအကစီၤ ထီၣ်ထီအိၣ်ဝဲ ခံပျၢ်လီၤ. ဒီးတၢ်လုၢ်လီၢ် အနၢၤတဖၣ်န့ၣ်​ အိၣ်တဆဲးဃီဒီး တၢ်လုၢ်လီၢ်လီၤ.+ ၂၆ တၢ်လုၢ်လီၢ် အဖီခိၣ်, အကပၤ ကိးကပၤဒဲး ဒီးအနၢၤတဖၣ်န့ၣ်​ အဝဲကျးအီၤဒီး ထူစီကဘျၣ်တဖၣ်လီၤ. ဒီးအဝဲ ကျီၤဃာ်တၢ်လုၢ်လီၢ် အဖီခိၣ်​ အကနူၤလၢထူ ဝးဝးလီၤ. ၂၇ ဒီးအဝဲတ့ထီၣ်​ ထူအကွီၤခံကွီၤလၢ တၢ်လုၢ်လီၢ် အခိၣ်လၢ အကျီၤဃာ်အသး အဖီလာ် ခံကပၤစုာ်စုာ် ဒ်သိး ပှၤကဂိာ်နုာ် နီၣ်ယိးဘိလၢ ကယိးဝဲတၢ်လုၢ်လီၢ် အဂီၢ်လီၤ. ၂၈ ဒီးအဝဲတ့ထီၣ်​ နီၣ်ယိးဘိတဖၣ်လၢ သ့ၣ်ဖှ့ၡံးတၤ ဒီးကျးဝဲဒီး ထူကဘျၣ်တဖၣ်လီၤ. ၂၉ ဒီးအဝဲတ့ စ့ၢ်ကီး သိစီဆှံလၢ တၢ်ဒိးဖှူတၢ်အဂီၢ်+ ဒီးတၢ်နၢမူစီဆှံ+ လၢအဘၣ်တၢ်ဃါဃုာ်အီၤ ဂ့ၤဂ့ၤလီၤ.

၃၈ အဝဲတ့ထီၣ်​ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ်လၢ သ့ၣ်ဖှ့ၡံးတၤလီၤ. ဒီးတၢ်လုၢ်လီၢ်န့ၣ်​ အလဲၢ်အိၣ်ဝဲ ယဲၢ်ပျၢ်,* အဒီၣ်ဃီၤအိၣ်ဝဲ ယဲၢ်ပျၢ် ဒီးအမ့ၢ် တၢ်လွံၢ်နၢၣ်​ လၢအကနူၤ ထဲသိးလိာ်အသး ဒီးအကစီၤထီၣ်ထီ အိၣ်ဝဲသၢပျၢ်လီၤ.+ ၂ ဒီးအဝဲ တ့ထီၣ်ဝဲ တၢ်လုၢ်လီၢ် အနၢၤတဖၣ်လၢ တၢ်လုၢ်လီၢ် အနၢၣ်လွံၢ်နၢၣ်​ အလိၤလီၤ. ဒီးအနၢၤတဖၣ်န့ၣ်​ အိၣ်တဆဲးဃီဒီး တၢ်လုၢ်လီၢ်လီၤ. ဝံၤဒီး အဝဲကျးတၢ်လုၢ်လီၢ်ဒီး တိၢ်ဘီကဘျၣ်တဖၣ်လီၤ.+ ၃ လၢခံ အဝဲတ့ထီၣ်​ တၢ်ပီးတၢ်လီတဖၣ်​ လၢတၢ်လုၢ်လီၢ် အဂီၢ်လီၤ. အဝဲတ့ထီၣ်​ ထံစဲၤတဖၣ်, နီၣ်တရီာ်တၢ်တဖၣ်, လီခီဖျၢၣ်တဖၣ်, နီၣ်ဆဲးတဖၣ်​ ဒီးမ့ၣ်အူအ့ၣ်​ အခွးတဖၣ်လီၤ. တၢ်ပီးတၢ်လီတဖၣ်အံၤ အဝဲတ့ထီၣ်ဝဲလၢ တိၢ်ဘီခဲလၢာ်လီၤ. ၄ ဒီးအဝဲတ့ထီၣ်စ့ၢ်ကီး နီၣ်ကၣ်တိၢ်ဘီတခါ လၢတၢ်လုၢ်လီၢ်အဂီၢ် ဝံၤဒီး ပာ်ဝဲနီၣ်ကၣ်တခါအံၤလၢ တၢ်လုၢ်လီၢ်အခိၣ်ဒူ အဖီလာ် ဒီးနီၣ်ကၣ်တခါအံၤ အိၣ်ဝဲလၢ တၢ်လုၢ်လီၢ် အခၢၣ်သးလီၤ. ၅ အဝဲတ့ထီၣ်​ တၢ်အကွီၤလွံၢ်ကွီၤ လၢတၢ်လုၢ်လီၢ် အနၢၣ်လွံၢ်နၢၣ်​ ဘူးဒီးနီၣ်ကၣ်တိၢ်ဘီလီၤ. ဒီးတၢ်အကွီၤလွံၢ်ကွီၤန့ၣ်​ မ့ၢ်ဒ်သိး ပှၤကဂိာ်နုာ် နီၣ်ယိးဘိတဖၣ်​ အဂီၢ်လီၤ. ၆ လၢခံ အဝဲတ့ထီၣ်​ နီၣ်ယိးဘိတဖၣ်လၢ သ့ၣ်ဖှ့ၡံးတၤ ဒီးအကျးဝဲဒီး တိၢ်ဘီကဘျၣ်လီၤ. ၇ ဒီးအဝဲဂိာ်လီၤ နီၣ်ယိးဘိတဖၣ်​ လၢတၢ်အကွီၤတဖၣ်အပူၤလၢ အအိၣ်လၢ တၢ်လုၢ်လီၢ် ခံကပၤလၢာ်အလိၤ ဒ်သိး ပှၤကယိး တၢ်လုၢ်လီၢ်အံၤ အဂီၢ်လီၤ. အဝဲတ့ထီၣ်​ တၢ်လုၢ်လီၢ်သ့ၣ်​ လၢအလီၤဂာ်ဒ် တလါတဖျၢၣ်​ လၢအအိၣ်ဒီး အကအိပူၤလီၤ.

၈ ဒီးအဝဲတ့ထီၣ်​ ထံဒၢတိၢ်ဘီဖးဒိၣ်+ ဒီးတၢ်တီၣ်ထီၣ်ထံဒၢအလီၢ်လၢ တိၢ်ဘီလီၤ. ဒ်သိး အကမၤဝဲ ဒ်န့ၣ်အဂီၢ် အဝဲသူဝဲ ပိာ်မုၣ်တဖၣ်လၢ အမၤတၢ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ်န့ၣ်​ အမဲာ်ထံကလၤ တိၢ်ဘီတဖၣ်လီၤ.

၉ ဒီးအဝဲ မၤထီၣ်​ တၢ်ပျီလၢ အအိၣ်လၢ ကရၢၢ်ပူၤလီၤ.+ လၢတၢ်ပျီ အကလံၤထံးတခီန့ၣ်​ အိၣ်ဒီးတၢ်ကံးညာ်တဖၣ်လၢ အဘၣ်တၢ်မၤအီၤလၢ လုၣ်လၢအဂ့ၤ လၢအပိၤအသးလီၤ. ဒီးတၢ်ကံးညာ်တဖၣ်အံၤန့ၣ်​ အလဲၢ်အိၣ်ဝဲ အပျၢ် ၁၀၀ လီၤ.+ ၁၀ ဒီးအထူၣ်အိၣ်​ ၂၀ ဒီးအခီၣ်လီၢ်တိၢ်ဘီ အိၣ်အခါ ၂၀ လီၤ. ဒီးအထူၣ်​ အနီၣ်ကွးတဖၣ်​ ဒီးအတၢ်ဘျးစဲတဖၣ်န့ၣ်​ ဘၣ်တၢ်တ့အီၤလၢ စ့ညၣ်လီၤ. ၁၁ တၢ်ကံးညာ်တဖၣ်လၢ ကလံၤစိးတခီအဂီၢ်န့ၣ်​ အလဲၢ်ဝဲအပျၢ် ၁၀၀ စ့ၢ်ကီးလီၤ. တၢ်ကံးညာ်အထူၣ်​ ၂၀ ဒီးအခီၣ်လီၢ် အခါ ၂၀ န့ၣ်​ ဘၣ်တၢ်တ့အီၤလၢ တိၢ်ဘီလီၤ. ဒီးအထူၣ်​ အနီၣ်ကွးတဖၣ်​ ဒီးအတၢ်ဘျးစဲတဖၣ်န့ၣ်​ ဘၣ်တၢ်တ့အီၤလၢ စ့ညၣ်လီၤ. ၁၂ တၢ်ကံးညာ်တဖၣ်​ လၢမုၢ်နုာ်တခီ အဂီၢ်န့ၣ်​ အလဲၢ်အိၣ်ဝဲ အပျၢ် ၅၀ လီၤ. ဒီးအထူၣ်အိၣ်​ အထူၣ်တဆံ ဒီးအခီၣ်လီၢ်အိၣ်​ အခါတဆံလီၤ. ဒီးအထူၣ်​ အနီၣ်ကွးတဖၣ်​ ဒီးအတၢ်ဘျးစဲတဖၣ်န့ၣ်​ ဘၣ်တၢ်တ့အီၤလၢ စ့ညၣ်လီၤ. ၁၃ ဒီးလၢမုၢ်ထီၣ်တခီန့ၣ်​ တၢ်ပျီလၢ အအိၣ်လၢ ကရၢၢ်ပူၤ အလဲၢ် အိၣ်ဝဲ အပျၢ် ၅၀ လီၤ. ၁၄ တၢ်ပျီလၢ အအိၣ်လၢ ကရၢၢ်ပူၤ အတၢ်နုာ်လီၤအလီၢ်န့ၣ်​ လၢအစ့ၣ်တခီ တၢ်ကံးညာ် အလဲၢ်အိၣ်ဝဲ ၁၅ ပျၢ်ဒီးအိၣ်ဝဲဒီး အထူၣ်သၢထူၣ်​ ဒီးအခီၣ်လီၢ် သၢခါလီၤ. ၁၅ ဒီးလၢအထွဲတခီန့ၣ်​ တၢ်ကံးညာ် အလဲၢ်အိၣ်ဝဲ ၁၅ ပျၢ်ဒီးအိၣ်ဝဲဒီး အထူၣ်သၢထူၣ်​ ဒီးအခီၣ်လီၢ် သၢခါလီၤ. ၁၆ တၢ်ကံးညာ်ခဲလၢာ် လၢအကရၢၢ်ဃာ် တၢ်ပျီပူၤန့ၣ်​ ဘၣ်တၢ်မၤအီၤလၢ လုၣ်လၢအဂ့ၤ လၢအပိၤအသးလီၤ. ၁၇ တၢ်အထူၣ်​ အခီၣ်လီၢ်တဖၣ်န့ၣ်​ မ့ၢ်ဝဲ တိၢ်ဘီလီၤ. ဒီးတၢ်အထူၣ်​ အနီၣ်ကွးတဖၣ်​ ဒီးအတၢ်ဘျးစဲတဖၣ်န့ၣ်​ မ့ၢ်ဝဲစ့လီၤ. တၢ်အထူၣ်​ အခိၣ်ထိးတဖၣ်န့ၣ်​ အဝဲကျးဝဲဒီး စ့ကဘျၣ်တဖၣ်​ ဒီးတၢ်ပျီလၢ အအိၣ်လၢ ကရၢၢ်ပူၤ အထူၣ်ခဲလၢာ်န့ၣ်​ အိၣ်ဝဲဒီး နီၣ်ဘျးစ့တဖၣ်လီၤ.+

၁၈ တၢ်ကံးညာ်လၢ တၢ်နုာ်လီၤအလီၢ်လၢ ပှၤကနုာ်လီၤဆူ တၢ်ပျီပူၤ လၢအအိၣ်​ လၢကရၢၢ်ပူၤန့ၣ်​ ပှၤထါအီၤလၢ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ. တၢ်ကံးညာ်န့ၣ်​ အလဲၢ်အိၣ်ဝဲ အပျၢ် ၂၀ ဒီးအကစီၤထီၣ်ထီ အိၣ်ဝဲ ၅ ပျၢ်လီၤ. အဃိ အကစီၤထီၣ်ထီ ထဲသိးဒီး တၢ်ကံးညာ်တဖၣ်​ လၢအကရၢၢ်ဃာ် တၢ်ပျီပူၤလီၤ.+ ၁၉ ဒီးတၢ်အထူၣ်လွံၢ်ထူၣ်​ ဒီးအခီၣ်လီၢ် လွံၢ်ခါန့ၣ်​ ဘၣ်တၢ်တ့အီၤလၢ တိၢ်ဘီလီၤ. ဒီးတၢ်အထူၣ်​ အနီၣ်ကွးတဖၣ်​ ဒီးအတၢ်ဘျးစဲတဖၣ်န့ၣ်​ မ့ၢ်ဝဲစ့လီၤ. ဒီးတၢ်အထူၣ်​ အခိၣ်ထိး တဖၣ်န့ၣ်​ ဘၣ်တၢ်ကျးအီၤဒီး စ့ကဘျၣ်တဖၣ်လီၤ. ၂၀ ဒဲစီဆှံ အထးခိၣ်စူတဖၣ်​ ဒီးတၢ်ပျီ အထးခိၣ်စူတဖၣ်န့ၣ်​ မ့ၢ်ဝဲ တိၢ်ဘီလီၤ.+

၂၁ စီၤမိၤၡ့ မၤလိာ်ဝဲလၢ ပှၤကမၤစရီလၢ ဒဲစီဆှံလၢ အအိၣ်ဒီး တၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ်အဂီၢ်လီၤ.+ အဃိ ဒဲစီဆှံ အတၢ်ဖိတၢ်လံၤ အစရီန့ၣ်​ ဘၣ်တၢ်ပာ်ဖျါထီၣ်အီၤ လၢလာ်လီၤ. ဒီးပှၤလ့ၤဝံဖိတဖၣ်​ မၤဝဲမူဒါအံၤ+ လၢပှၤလုၢ်တၢ်ဒိၣ်​ စီၤအၤဟရိၣ်​ အဖိခွါ စီၤအံသမၢ်+ အတၢ်တီခိၣ်ရိၤမဲ အဖီလာ်န့ၣ်လီၤ. ၂၂ စီၤဘစၤလအ့လး+ မၤဝဲဒ် ယဟိဝၤယွၤ မၤလိာ်ပာ်စၢၤ စီၤမိၤၡ့အသိး ခဲလၢာ်လီၤ. စီၤဘစၤလအ့လးန့ၣ်​ မ့ၢ်ဝဲ စီၤအူရံၤ အဖိခွါ ဒီးစီၤဃူၢ် အလံၤခွါ လၢယူဒၤ အဒူၣ်ကျါလီၤ. ၂၃ ပှၤလၢ အမၤစၢၤအီၤန့ၣ်​ မ့ၢ်ဝဲ စီၤအဃံစမး အဖိခွါ စီၤအၤဟလံအာ်+ လၢဒၣ်အဒူၣ်ကျါလီၤ. အဝဲမ့ၢ် ပှၤစုသ့ဖိ ဒီးအဝဲ ဆးကံၣ်ဃ့တၢ် ဒီးအဝဲထါတၢ်လၢ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤလီၤ.

၂၄ ကယဲၢ်ထူလၢ ပှၤသူအီၤဒ်သိး ကတ့ထီၣ်တၢ်ခဲလၢာ် လၢအဘၣ်ထွဲဒီး ဒဲစီဆှံအဂီၢ်န့ၣ်​ အတယၢၢ်အိၣ်ဝဲ ၂၉ တၤလၣ်* ဒီးၡက့လး* ၇၃၀ ဒ်တၢ်စီဆှံအလီၢ် အၡက့လး အသိးလီၤ. ဒီးထူတဖၣ်အံၤ ဘၣ်တၢ်ဟ့ၣ်လီၤအီၤ ဒ်တၢ်လုၢ်ဝံၢ်ဝၢ် အသိးလီၤ.+ ၂၅ ပှၤဂီၢ်မုၢ်လၢ အဘၣ်တၢ်ဂံၢ်ဃုာ်အီၤလၢ တၢ်ထၢ ပှၤနီၣ်ဂံၢ်အကျါန့ၣ်​ အဝဲသ့ၣ်​ ဟဲစိာ်စ့ညၣ်​ အိၣ်ဝဲအတၤလၣ်​ ၁၀၀ ဒီးၡက့လး ၁,၇၇၅ ဒ်တၢ်စီဆှံအလီၢ် အၡက့လး အသိးလီၤ. ၂၆ ကယဲၢ်ပှၤပိာ်ခွါ လၢအသးနံၣ်အိၣ်​ ၂၀ ဒီးဆူအဖီခိၣ်​ လၢအဘၣ်တၢ်ဂံၢ်ဃုာ်အီၤ ကိးဂၤဒဲးန့ၣ်​ ဟဲစိာ်ဝဲ တဂၤ စ့ၡက့လးတဝာ် တဂၤ စ့ၡက့လးတဝာ် ဒ်တၢ်စီဆှံအလီၢ် အၡက့လး အသိးလီၤ.+ ဒီးပှၤတဖၣ်အံၤ အနီၣ်ဂံၢ်အိၣ်ဝဲ အဂၤ ၆၀၃,၅၅၀ လီၤ.+

၂၇ တၢ်အခီၣ်လီၢ်တဖၣ်လၢ တၢ်စီဆှံအလီၢ်အဂီၢ် ဒီးတၢ်အခီၣ်လီၢ်တဖၣ်လၢ ယၣ်ဘျးသဒၢ အဂီၢ်န့ၣ်​ အတယၢၢ်အိၣ်ဝဲ အတၤလၣ်​ ၁၀၀ လီၤ. တၢ်အခီၣ်လီၢ်တခါ စုာ်စုာ်န့ၣ်​ အတယၢၢ်အိၣ်ဝဲ တတၤလၣ်အဃိ အခါ ၁၀၀ န့ၣ်အတယၢၢ်အိၣ်ဝဲ အတၤလၣ်​ ၁၀၀ လီၤ.+ ၂၈ ဒီးအဝဲတ့ထီၣ်ဝဲ တၢ်အထူၣ်​ အနီၣ်ကွးတဖၣ်​ လၢၡက့လး ၁,၇၇၅ ဒီးတၢ်အထူၣ်​ အခိၣ်ထိးတဖၣ်န့ၣ်​ အဝဲကျးဝဲဒီး စ့ညၣ်ကဘျၣ်တဖၣ်​ ဒီးမၤဘျးဝဲ တပူၤဃီလီၤ.

၂၉ တိၢ်ဘီလၢ တၢ်လုၢ်ထီၣ်* အဂီၢ်န့ၣ်​ အတယၢၢ်အိၣ်ဝဲ အတၤလၣ်​ ၇၀ ဒီးၡက့လး ၂,၄၀၀ လီၤ. ၃၀ အဝဲသူဝဲ တိၢ်ဘီတဖၣ်အံၤ ဒ်သိးကတ့ထီၣ်ဝဲ တၢ်အခီၣ်လီၢ်တဖၣ်လၢ အအိၣ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ်, တၢ်လုၢ်လီၢ် တိၢ်ဘီ, တၢ်လုၢ်လီၢ် အနီၣ်ကၣ်တိၢ်ဘီတခါ ဒီးတၢ်လုၢ်လီၢ် အတၢ်ပီးတၢ်လီ ခဲလၢာ်, ၃၁ တၢ်အခီၣ်လီၢ်တဖၣ်လၢ အအိၣ်ဝးတရံး တၢ်ပျီလၢ အအိၣ်လၢ ကရၢၢ်ပူၤ, တၢ်ပျီလၢ အအိၣ်လၢ ကရၢၢ်ပူၤ အတၢ်နုာ်လီၤအလီၢ် အခီၣ်လီၢ်တဖၣ်, ကယဲၢ်ထးခိၣ်စူတဖၣ်လၢ ဒဲစီဆှံအဂီၢ် ဒီးကယဲၢ် ထးခိၣ်စူတဖၣ်လၢ+ အအိၣ်ဝးတရံး တၢ်ပျီလၢအအိၣ်လၢ ကရၢၢ်ပူၤလီၤ.

၃၉ အဝဲသ့ၣ်သူဝဲ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး ဒီးတၢ်အဂီၤဆှုၣ်ကလာ်+ ဒ်သိး ကထါဝဲ တၢ်ကူတၢ်သိးလၢ အဘၣ်တၢ်ထါအီၤဂ့ၤဂ့ၤ လၢပှၤကမၤတၢ်လၢ ဒဲစီဆှံ အဂီၢ်လီၤ. ဒီးဒ်ယဟိဝၤယွၤ မၤလိာ်ပာ်စၢၤ စီၤမိၤၡအသိး အဝဲသ့ၣ်ထါဝဲ တၢ်ကူတၢ်သိးစီဆှံလၢ စီၤအၤဟရိၣ်အဂီၢ်လီၤ.+

၂ အဝဲထါဝဲ အ့ဖိးတဘ့ၣ်လၢ+ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ. ဒီးအဝဲဆးကံၣ်ဃ့အီၤလၢ လုၣ်ထူတဖၣ်လီၤ. ၃ အဝဲသ့ၣ်​ ပိာ်ဝဲထူကဘျၣ်တဖၣ်​ တုၤလၢအကဲထီၣ်​ ထူဘ့ၣ်ဘၣ်​ ဘူဘူဖိတဖၣ်​ ဒီးအဝဲတံာ်တဲာ်ဝဲ ဒ်လုၣ်တဖၣ်အသိး ဒ်သိးအကထါဃုာ်ဝဲဒီး လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤလၢ အပိၤအသးလီၤ. ဒီးအ့ဖိးတဘ့ၣ်န့ၣ်​ ဘၣ်တၢ်ဆးကံၣ်ဃ့အီၤလီၤ. ၄ အဝဲသ့ၣ်​ ထါန့ၢ်ဝဲ အ့ဖိးတဘ့ၣ်အံၤ အဖံဘၣ်ခိၣ်တဖၣ်​ လၢအဒုးဘျးစဲဝဲ အ့ဖိးအမဲာ်ညါ ဒီးအလီၢ်ခံလီၤ. ၅ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့အသိး ယီၢ်တကိးလၢ အအိၣ်လၢ အ့ဖိးအလိၤ ဒ်သိး ကစၢဃာ်အီၤ ကျၢၤကျၢၤအဂီၢ်န့ၣ်+ ဘၣ်တၢ်ထါအီၤလၢ တၢ်ဖိတၢ်လံၤ ဒ်သိးသိးဒီးအ့ဖိး လၢအမ့ၢ် လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ. ဒီးအဘၣ်တၢ်ဆးကံၣ်ဃ့အီၤ လၢလုၣ်ထူတဖၣ်လီၤ.

၆ အဝဲသ့ၣ်​ ထီထီၣ်​ တၢ်မျၢ်မဟူယၤခံဖျၢၣ်​ လၢထူဘ့ၣ်ဘၣ်​ အကွီၤခံခါအလိၤ ဒီးဒ်ပှၤစိးပျၤဝဲ တၢ်ပနီၣ်အသိး အဝဲသ့ၣ်​ စိးပျၤဝဲ အံၣ်စရ့လး အဖိခွါတဖၣ်​ အမံၤလၢ လၢၢ်ခံဖျၢၣ်အံၤ အလိၤလီၤ.+ ၇ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့အသိး စီၤဘစၤလအ့လး ပာ်လၢၢ်ခံဖျၢၣ်အံၤ လၢအ့ဖိး အဖံဘၣ်ခိၣ်ခံဘ့ၣ်​ အလိၤ ဒ်လၢၢ်တၢ်သ့ၣ်နီၣ်​ လၢအံၣ်စရ့လး အဖိခွါတဖၣ်​ အဂီၢ်လီၤ.+ ၈ ဝံၤဒီး အဝဲထါဝဲ ထၢၣ်ဖိလီၤ.*+ ဒီးဒ်အ့ဖိးအသိး ထၢၣ်ဖိ န့ၣ်ဘၣ်တၢ်ဆးကံၣ်ဃ့အီၤလၢ လုၣ်ထူတဖၣ်, လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး, တၢ်အဂီၤဆှုၣ်ကလာ် ဒီးလုၣ်လၢအဂ့ၤ လၢအပိၤအသးလီၤ.+ ၉ ဖဲအဘၣ်တၢ်ချံးအီၤ လၢအခၢၣ်သးအခါ အနၢၣ်လွံၢ်နၢၣ်​ အကနူၤန့ၣ်​ ထဲသိးလိာ်အသး ဒီးအထီအိၣ်ဝဲ တထါ* ဒီးအလဲၢ်အိၣ်ဝဲ တထါလီၤ. ၁၀ ဒီးအဝဲသ့ၣ်​ ထီထီၣ်​ လၢၢ်လၢ ထၢၣ်ဖိအလိၤ လွံၢ်ကျိၤလီၤ. တၢတကျိၤန့ၣ်​ မ့ၢ်ဝဲ တၢ်မျၢ် ဆီသွံၣ်, တၢ်မျၢ်ဘီ အူးသပးယၢ် ဒီးတၢ်မျၢ် လါဟ့လီၤ. ၁၁ ခံကျိၤတကျိၤန့ၣ်​ မ့ၢ်ဝဲ တၢ်မျၢ် လါလုး, တၢ်မျၢ် နံၤလါအဲး ဒီးတၢ်မျၢ် နကၤသွဲးလီၤ. ၁၂ သၢကျိၤတကျိၤန့ၣ်​ မ့ၢ်ဝဲ တၢ်မျၢ် ဘီဂီၤ, တၢ်မျၢ် မဟူယၤကံၣ်ဃ့ ဒီးတၢ်မျၢ် သကီၤဖီလီၤ. ၁၃ ဒီးလွံၢ်ကျိၤတကျိၤန့ၣ်​ မ့ၢ်ဝဲ တၢ်မျၢ် ဘီလါ, တၢ်မျၢ် မဟူယၤ ဒီးတၢ်မျၢ် ဂီၤလုးလီၤ. လၢၢ်တဖၣ်အံၤ ဘၣ်တၢ်ကွီၤဃာ်အီၤ လၢထူလီၤ. ၁၄ လၢၢ်တဖၣ်အံၤ အိၣ်ဝဲလၢ အံၣ်စရ့လး အဖိခွါ ၁၂ ဂၤအဂီၢ် တဂၤတဖျၢၣ်လီၤ. ဒီးဒ်ပှၤစိးပျၤ တၢ်ပနီၣ်အသိး ပှၤ ၁၂ ဒူၣ်အမံၤအံၤ ဘၣ်တၢ်စိးပျၤအီၤလၢ လၢၢ်တဖျၢၣ်စုာ်စုာ်အလိၤ တဒူၣ်တဖျၢၣ်လီၤ.

၁၅ အဝဲသ့ၣ်ပိၤန့ၢ်ဝဲ ထူစီပျံၤဖိတဖၣ်​ ဒ်ပျံၤအသိး ဒီးထီထီၣ်အီၤလၢ ထၢၣ်ဖိအလိၤလီၤ.+ ၁၆ ဒီးအဝဲသ့ၣ်​ တ့ထီၣ်ဝဲ ထူဘ့ၣ်ဘၣ်​ အကွီၤခံခါ ဒီးထူအကွီၤခံကွီၤ ဒီးထီထီၣ်​ ထူအကွီၤခံကွီၤအံၤလၢ ထၢၣ်ဖိ အနၢၣ်ခံခီ အလိၤလီၤ. ၁၇ ဒီးအဝဲသ့ၣ်​ ထီထီၣ်​ ပျံၤထူခံဘိန့ၣ်​ လၢထူအကွီၤ ခံကွီၤအပူၤ လၢအအိၣ်လၢ ထၢၣ်ဖိအနၢၣ်​ ခံခီလၢာ်လီၤ. ၁၈ ပျံၤထူခံဘိ အစိးနါန့ၣ်​ အဝဲသ့ၣ်​ ထီထီၣ်အီၤဒီး ထူဘ့ၣ်ဘၣ်​ အကွီၤခံခါ ဒီးအဝဲသ့ၣ်​ ထီထီၣ်ဝဲလၢ အဖံဘၣ်ခိၣ်ခံဘ့ၣ်​ အဖီခိၣ်​ လၢအ့ဖိးအမဲာ်ညါ တကပၤလီၤ. ၁၉ ဒီးအဝဲသ့ၣ်​ တ့ထီၣ်​ ထူအကွီၤခံကွီၤ ဒီးထီထီၣ်အီၤလၢ ထၢၣ်ဖိ အလီၢ်ခံ တကပၤ အနၢၣ်ထံး ခံကပၤ အလိၤလီၤ. ထၢၣ်ဖိ အလီၢ်ခံ တကပၤန့ၣ်​ အမဲာ်ကွၢ်လိာ်အသးဒီး အ့ဖိးလီၤ.+ ၂၀ ဒီးအဝဲသ့ၣ်​ တ့ထီၣ်​ ထူအကွီၤအဂၤခံကွီၤ ဒီးထီထီၣ်ဝဲလၢ အ့ဖိးအမဲာ်ညါ တကပၤ လၢအဖံဘၣ်ခိၣ်ခံဘ့ၣ်​ အဖီလာ်, ဘူးဒီး တၢ်ဘျးစဲလိာ်သးအလီၢ် ဒီးလၢအ့ဖိး အယီၢ်တကိး အဖီခိၣ်လီၤ. ၂၁ ဒီးလၢခံကတၢၢ်န့ၣ်​ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့အသိး အဝဲသ့ၣ်စၢဃာ်ဝဲ ထၢၣ်ဖိအကွီၤတဖၣ်​ ဒီးအ့ဖိးအကွီၤတဖၣ်​ လၢပျံၤလၢ အလွဲၢ်လါအဲးတဘိ ဒ်သိး ထၢၣ်ဖိ ကအိၣ်ဝဲလၢ အ့ဖိးအလိၤကျၢၤကျၢၤ လၢယီၢ်တကိး အဖီခိၣ်လီၤ.

၂၂ ဒီးဆ့ကၤလၢ အစုဒုၣ်​ တအိၣ်ဘၣ်​ လၢအကဘၣ်​ တၢ်သိးအီၤလၢ အ့ဖိးအဖီလာ်န့ၣ်​ အဝဲထါဝဲလၢ လုၣ်လၢအလါအဲး ဒီတဘ့ၣ်လီၤ.+ ၂၃ ဒီးဆ့ကၤဖးထီ အဖီခိၣ်တတီၤ အခၢၣ်သးန့ၣ်​ အိၣ်ဒီးအပူၤတပူၤလၢ ပှၤလုၢ်တၢ်ဒိၣ်​ ကဖျီၣ်လီၤ အခိၣ်သၣ်ဃံအဂီၢ်လီၤ. ဒီးဒ်သိး အသုတညာ်တဂ့ၤအဂီၢ် ပှၤဆးဝးတရံး တၢ်ပူၤအံၤ အကနူၤ, လီၤဂာ်ဒ် ဆ့ကၤသုး အသိးလီၤ. ၂၄ ဝံၤဒီး လၢဆ့ကၤဖးထီ အခီၣ်ထံးဝးဝးန့ၣ်​ အဝဲသ့ၣ်​ ဆးထီၣ်​ တၢ်ကယၢကယဲတဖၣ်လၢ အလီၤဂာ်ဒီး သလဲသၣ်တဖၣ်​ လၢအဘၣ်တၢ်မၤအီၤလၢ လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး ဒီးတၢ်အဂီၤဆှုၣ်ကလာ် လၢအပိၤအသးလီၤ. ၂၅ လၢဆ့ကၤဖးထီလၢ အစုဒုၣ်​ တအိၣ်ဘၣ်တဘ့ၣ်​ အခီၣ်ထံးဝးဝးန့ၣ်​ အဝဲသ့ၣ်​ တ့ထီၣ်ဝဲ ဒၢလွဲထူဖိတဖၣ်​ ဒီးဆးထီၣ်ဝဲ ဒၢလွဲထူဖိတဖၣ်လၢ သလဲသၣ်တဖၣ်​ အဘၢၣ်စၢၤ ၂၆ အဃိ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့အသိး အဝဲသ့ၣ်​ ဆးထီၣ်ဝဲ ဒၢလွဲထူဖိတဖျၢၣ်ဝံၤ သလဲသၣ်တဖျၢၣ်​ ဒၢလွဲထူဖိတဖျၢၣ်ဝံၤ သလဲသၣ်တဖျၢၣ်​ ဝးတရံး ဆ့ကၤဖးထီလၢ အစုဒုၣ်တအိၣ်ဘၣ်တဘ့ၣ်န့ၣ်​ အခီၣ်ထံးလီၤ. ဒီးဆ့ကၤတဘ့ၣ်န့ၣ်​ ပှၤသူအီၤလၢ ပှၤမၤပှၤလုၢ်တၢ်ဒိၣ်​ အတၢ်မၤအဂီၢ်လီၤ.

၂၇ ဒီးအဝဲသ့ၣ်​ ထါဝဲ ဆ့ဖးထီတဖၣ်​ လၢတၢ်ကံးညာ်လၢ အညၣ်ဂ့ၤ လၢစီၤအၤဟရိၣ်​ ဒီးအဖိခွါတဖၣ်အဂီၢ်+ ၂၈ ဒီးခိၣ်ဖၢၣ်လီၤဆီ တဘ့ၣ်လၢ+ တၢ်ကံးညာ်လၢ အညၣ်ဂ့ၤ, ခိၣ်ဖၢၣ်တဖၣ်လၢ တၢ်ကံးညာ်လၢ အညၣ်ဂ့ၤ,+ ဖျီၣ်ခံဖုၣ်ခီၣ်တဖၣ်+ လၢလုၣ်လၢအဂ့ၤ လၢအပိၤအသးလီၤ. ၂၉ ဒီးယီၢ်တကိးလၢ ဆ့ဖးထီအဂီၢ်န့ၣ်​ အဝဲသ့ၣ်​ ထါဝဲလၢ လုၣ်လၢအဂ့ၤ လၢအပိၤအသး, လုၣ်လၢ အလွဲၢ်လါအဲး, သိဆူၣ်လၢ အလွဲၢ်လုး ဒီးတၢ်အဂီၤဆှုၣ်ကလာ် ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့ အသိးလီၤ.

၃၀ ဒီးအဝဲသ့ၣ်တ့ဝဲ ထူစီဘ့ၣ်ဘၣ်လၢ အကပြုၢ်ကပြီၤ တဘ့ၣ်လီၤ. အဝဲန့ၣ်​ မ့ၢ်တၢ်ပနီၣ်စီဆှံတခါလီၤ.* ဒီးလၢအလိၤန့ၣ်​ အဝဲသ့ၣ်​ စိးပျၤဝဲ လံာ်မဲာ်ဖျၢၣ်​ လၢအမ့ၢ် “ယဟိဝၤယွၤ မ့ၢ်တၢ်စီဆှံ အဂံၢ်ခီၣ်ထံးလီၤ.”+ ၃၁ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့အသိး အဝဲသ့ၣ်​ စၢထီၣ်ထူစီဘ့ၣ်ဘၣ်​ လၢခိၣ်ဖၢၣ်လီၤဆီ တဘ့ၣ်အလိၤ လၢပျံၤလၢ အလွဲၢ်လါအဲးတဘိလီၤ.

၃၂ အဃိ ကယဲၢ်တၢ်မၤ လၢအဘၣ်ထွဲဒီး ဒဲစီဆှံ လၢအမ့ၢ် တၢ်အိၣ်ဖှိၣ်အဒဲ အဂီၢ်န့ၣ်​ ဝံၤဝဲခဲလၢာ်လီၤ. ဒီးပှၤအံၣ်စရ့လးဖိ မၤဝဲဒ် ယဟိဝၤယွၤ မၤလိာ်ပာ်စၢၤ စီၤမိၤၡ့အသိး ခဲလၢာ်လီၤ.+ ဒီးအဝဲသ့ၣ်​ မၤထွဲဝဲ လီၤတံၢ်လီၤဆဲးလီၤ.

၃၃ ဒီးအဝဲသ့ၣ်​ လဲၤစိာ်ဝဲ ဒဲစီဆှံဒီး+ ဒဲအတၢ်ဖိတၢ်လံၤ ခဲလၢာ်လၢ စီၤမိၤၡ့အအိၣ်လီၤ. ဒဲအတၢ်ဖိတၢ်လံၤတဖၣ်+ ပၣ်ဃုာ်ဒီး ဒဲအနီၣ်ကွးတဖၣ်,+ သ့ၣ်ဘ့ၣ်ဘၣ်အကျီၤတဖၣ်,+ တၢ်အတီတဖၣ်,+ အထူၣ်တဖၣ်, အခီၣ်လီၢ်တဖၣ်,+ ၃၄ ဒဲအတၢ်ကျၢၢ်ဘၢတၢ်လၢအမ့ၢ် သိဖါအဘ့ၣ်လၢ အဘၣ်တၢ်စုၣ်ဂီၤအီၤ,+ ဒဲအတၢ်ကျၢၢ်ဘၢတၢ်လၢအမ့ၢ် ပီၣ်လဲၣ်ဆှီအဘ့ၣ်, ယၣ်ဘျးသဒၢလၢ တၢ်ကနီၤဖးတၢ်အဂီၢ်,+ ၃၅ တၢ်အၢၣ်လီၤအီလီၤ အတလါ, တလါ အနီၣ်ယိးဘိတဖၣ်,+ တလါအခိၣ်ကျး,+ ၃၆ စီၢ်နီၤခိၣ်ဒီး အတၢ်ပီးတၢ်လီခဲလၢာ်,+ ကိၣ်လၢ တၢ်လုၢ်ထီၣ်တၢ်အဂီၢ်, ၃၇ မ့ၣ်အူဒၢလၢ အမ့ၢ်ထူစီ, မ့ၣ်အူဒၢအခွးတဖၣ်လၢ+ အဘၣ်တၢ်ရဲၣ်လီၤအီၤ ဃူဃူ ဒီး အတၢ်ပီးတၢ်လီခဲလၢာ်,+ သိလၢတၢ်ကပီၤအဂီၢ်,+ ၃၈ တၢ်လုၢ်လီၢ်ထူ,+ သိလၢ တၢ်ဒိးဖှူတၢ်အဂီၢ်,+ တၢ်နၢမူ,+ တၢ်ကံးညာ်လၢ တၢ်ကနုာ်လီၤလၢ ဒဲစီဆှံအဂီၢ်,+ ၃၉ တၢ်လုၢ်လီၢ်တိၢ်ဘီ,+ နီၣ်ကၣ်တိၢ်ဘီ တခါလၢ တၢ်လုၢ်လီၢ်အဂီၢ်, တၢ်လုၢ်လီၢ် အနီၣ်ယိးဘိတဖၣ်ဒီး+ အတၢ်ပီးတၢ်လီခဲလၢာ်,+ ထံဒၢဖးဒိၣ်​ ဒီးတၢ်တီၣ်ထီၣ်ထံဒၢအလီၢ်,+ ၄၀ တၢ်ကံးညာ်တဖၣ်လၢ တၢ်ပျီလၢ အအိၣ်လၢ ကရၢၢ်ပူၤအဂီၢ်, အထူၣ်တဖၣ်ဒီး အခီၣ်လီၢ်တဖၣ်,+ တၢ်ကံးညာ်လၢ တၢ်နုာ်လီၤအလီၢ်လၢ+ ပှၤကနုာ်လီၤဆူ တၢ်ပျီလၢအအိၣ်လၢ ကရၢၢ်ပူၤအဂီၢ်, ဒဲအပျံၤတဖၣ်ဒီး ဒဲအထးခိၣ်စူတဖၣ်+ ဒီးတၢ်ပီးတၢ်လီ ခဲလၢာ်လၢ ပှၤကမၤတၢ်လၢ ဒဲစီဆှံ လၢအမ့ၢ် တၢ်အိၣ်ဖှိၣ်အဒဲအဂီၢ် ၄၁ ဒီးတၢ်ကူတၢ်သိးလၢ အဘၣ်တၢ်ထါအီၤ ဂ့ၤဂ့ၤလၢ ပှၤကမၤတၢ်လၢ ဒဲစီဆှံအဂီၢ်, ပှၤလုၢ်တၢ်ဒိၣ်​ စီၤအၤဟရိၣ်​ အတၢ်ကူတၢ်သိးစီဆှံ ဒီးစီၤအၤဟရိၣ်​ အဖိခွါတဖၣ်​ အတၢ်ကူတၢ်သိးလၢ+ အဝဲသ့ၣ်​ ကမၤတၢ်ဒ် ပှၤလုၢ်တၢ်ဒိၣ်တဖၣ်​ အဂီၢ်လီၤ.

၄၂ ပှၤအံၣ်စရ့လးဖိတဖၣ်​ မၤဝဲတၢ်မၤခဲလၢာ် ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့အသိးလီၤ.+ ၄၃ ဖဲစီၤမိၤၡ့ သမံသမိးကွၢ်ဝဲ အဝဲသ့ၣ်​ အတၢ်မၤ ခဲလၢာ်အခါ အထံၣ်ဘၣ်ဝဲလၢ အဝဲသ့ၣ်​ မၤထွဲဝဲဒ် ယဟိဝၤယွၤ မၤလိာ်ပာ်စၢၤဝဲ အသိးလီၤ. ဒီးစီၤမိၤၡ့ ဆိၣ်ဂ့ၤအဝဲသ့ၣ်လီၤ.

၄၀ ယဟိဝၤယွၤ တဲဘၣ်စီၤမိၤၡ့လၢ ၂ “လၢလါအဆိကတၢၢ်တလါ ဖဲလါထီၣ်တသီန့ၣ်​ နကဘၣ်​ ရဲၣ်လီၤကျဲၤလီၤ ဒဲစီဆှံ လၢအမ့ၢ် တၢ်အိၣ်ဖှိၣ်အဒဲလီၤ.+ ၃ ပာ်တၢ်အၢၣ်လီၤအီလီၤ အတလါလၢ ဒဲစီဆှံအပူၤ+ ဒီးပာ်သဒၢအီၤ ဒီးယၣ်ဘျးသဒၢတက့ၢ်.+ ၄ နဘၣ်ဟဲစိာ်နုာ် စီၢ်နီၤခိၣ်+ ဒီးရဲၣ်လီၤ တၢ်ဖိတၢ်လံၤတဖၣ်လၢ အကဘၣ်အိၣ်လၢ စီၢ်နီၤခိၣ်​ အဖီခိၣ်လီၤ. ဒီးနဘၣ်ဟဲစိာ်နုာ် မ့ၣ်အူဒၢ+ ဒီးဒွဲၣ်ကပီၤထီၣ်​ မ့ၣ်အူဒၢ အခွးတဖၣ်လီၤ.+ ၅ ဝံၤဒီး တၢ်လုၢ်လီၢ်ထူလၢ တၢ်နၢမူအဂီၢ်န့ၣ်+ နဘၣ်ပာ်အီၤလၢ တၢ်အၢၣ်လီၤအီလီၤ အတလါ အမဲာ်ညါ ဒီးနဘၣ်ဘျးထီၣ်​ တၢ်ကံးညာ်လၢ တၢ်ကနုာ်လီၤလၢ ဒဲစီဆှံအပူၤ အဂီၢ်လီၤ.+

၆ “တၢ်လုၢ်လီၢ်လၢ တၢ်လုၢ်ဒွဲၣ်အူ အဂီၢ်န့ၣ်+ နဘၣ်ပာ်အီၤလၢ ဒဲစီဆှံ လၢအမ့ၢ် တၢ်အိၣ်ဖှိၣ်အဒဲ အတၢ်နုာ်လီၤအလီၢ် အမဲာ်ညါလီၤ. ၇ ဒီးနဘၣ်ပာ် ထံဒၢဖးဒိၣ်​ လၢတၢ်အိၣ်ဖှိၣ်အဒဲ ဒီးတၢ်လုၢ်လီၢ် အဘၢၣ်စၢၤ ဒီးလူလီၤထံလၢ အပူၤလီၤ.+ ၈ ဒီးနဘၣ်​ ကရၢဃာ် ဒဲစီဆှံဝးဝး ဒီးဘျးထီၣ်​ တၢ်ကံးညာ်လၢ+ တၢ်ပျီလၢ အအိၣ်လၢ ကရၢၢ်ပူၤ+ အတၢ်နုာ်လီၤအလီၢ်လီၤ. ၉ ဝံၤဒီး နကဘၣ်ဟံးန့ၢ် သိလၢတၢ်ဒိးဖှူတၢ်အဂီၢ်+ ဒီးဒိးဖှူဒဲစီဆှံ ဒီးတၢ်အိၣ်လၢ အပူၤခဲလၢာ်လီၤ.+ ဒီးပာ်စီဆှံ ဒဲဒီးအတၢ်ပီးတၢ်လီခဲလၢာ် ဒ်သိးအက စီဆှံအဂီၢ်တက့ၢ်. ၁၀ တၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ် ဒီးအတၢ်ပီးတၢ်လီ ခဲလၢာ်န့ၣ်​ နဘၣ်ဒိးဖှူအီၤ ဒီးပာ်စီဆှံအီၤဒ်သိး တၢ်လုၢ်လီၢ်န့ၣ်​ ကကဲထီၣ်​ တၢ်လုၢ်လီၢ်လၢ အစီဆှံနီၢ်ကီၢ် အဂီၢ်လီၤ.+ ၁၁ ဒီးထံဒၢဖးဒိၣ်​ ဒီးတၢ်တီၣ်ထီၣ်​ ထံဒၢအလီၢ်န့ၣ်​ နဘၣ်ဒိးဖှူအီၤ ဒီးပာ်စီဆှံအီၤလီၤ.

၁၂ “ဝံၤဒီး ဟဲကိးစီၤအၤဟရိၣ်​ ဒီးအဖိခွါတဖၣ်​ ဘူးဒီးတၢ်အိၣ်ဖှိၣ်အဒဲ အတၢ်နုာ်လီၤအလီၢ် ဒီးမၤကဆှီ အဝဲသ့ၣ်​ လၢထံတက့ၢ်.*+ ၁၃ ဒီးနဘၣ်ဒုးကၤထီၣ်​ စီၤအၤဟရိၣ်လၢ တၢ်ကူတၢ်သိးစီဆှံတဖၣ်+ ဒီးဒိးဖှူအီၤ+ ဒီးပာ်စီဆှံအီၤလီၤ. ဒီးအဝဲကမၤတၢ်ဒ် ယပှၤလုၢ်တၢ်ဒိၣ်အသိးလီၤ. ၁၄ ဝံၤဒီး ဟဲကိးအဖိခွါတဖၣ်​ ဒီးဒုးကၤထီၣ်​ အဝဲသ့ၣ်လၢ ဆ့ဖးထီတဖၣ်တက့ၢ်.+ ၁၅ ဒီးဒ်နဒိးဖှူအဝဲသ့ၣ်​ အပၢ်အသိး နဘၣ်ဒိးဖှူအဝဲသ့ၣ်+ ဒ်သိးအဝဲသ့ၣ်​ ကမၤတၢ် ဒ်ယပှၤလုၢ်တၢ်ဒိၣ်တဖၣ်​ အဂီၢ်လီၤ. ဒီးခီဖျိလၢ အဝဲသ့ၣ်​ အတၢ်ဒိးဖှူအဃိ မူဒါလၢအမ့ၢ် ပှၤလုၢ်တၢ်ဒိၣ်န့ၣ်​ ကမ့ၢ် အဝဲသ့ၣ်အတၢ် တစိၤဘၣ်တစိၤလီၤ.”+

၁၆ စီၤမိၤၡ့ မၤဝဲဒ် ယဟိဝၤယွၤ မၤလိာ်ပာ်စၢၤအီၤအသိး ခဲလၢာ်လီၤ.+ ဒီးအမၤထွဲဝဲ လီၤတံၢ်လီၤဆဲးလီၤ.

၁၇ ဖဲခံနံၣ်တနံၣ်​ အတီၢ်ပူၤ လၢလါအဆိကတၢၢ်တလါ ဖဲလါထီၣ်တသီန့ၣ်​ ပှၤရဲၣ်လီၤကျဲၤလီၤ ဒဲစီဆှံ ဝံၤဝဲလီၤ.+ ၁၈ ဖဲစီၤမိၤၡ့ ရဲၣ်လီၤကျဲၤလီၤ ဒဲစီဆှံအခါ အဝဲပာ်လီၤဝဲ အခီၣ်လီၢ်တဖၣ်,+ ဆီလီၤဝဲ သ့ၣ်ဘ့ၣ်ဘၣ်​ အကျီၤတဖၣ်,+ ဂိာ်နုာ်ဝဲ တၢ်အတီတဖၣ်+ ဒီးဆီလီၤဝဲ အထူၣ်တဖၣ်လီၤ. ၁၉ ဒ်ယဟိဝၤယွၤ မၤလိာ်ဝဲ စီၤမိၤၡ့အသိး အဝဲသလၣ်ထီၣ်ဝဲ ဒဲအတၢ်ကံးညာ်တဖၣ်လၢ+ ဒဲစီဆှံအဖီခိၣ်​ ဝံၤဒီး ပာ်ထီၣ်ဝဲ ဒဲစီဆှံ အတၢ်ကျၢၢ်ဘၢတၢ်တဖၣ်​ လၢအဖီခိၣ်လီၤ.+

၂၀ ဝံၤဒီး အဝဲဟံးန့ၢ် တၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ်+ ဒီးပၢနုာ်ဝဲလၢ တလါစီဆှံအပူၤလီၤ.+ ဒီးအဝဲ ဂိာ်နုာ်ဝဲ နီၣ်ယိးဘိတဖၣ်လၢ+ တလါစီဆှံအလိၤ ဒီးပာ်ထီၣ်​ တလါစီဆှံအခိၣ်ကျး+ လၢတလါစီဆှံအဖီခိၣ်လီၤ.+ ၂၁ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့ အသိး အဝဲဟဲစိာ်နုာ် တလါစီဆှံလၢ ဒဲစီဆှံအပူၤ ဒီးဘျးလီၤဝဲ ယၣ်ဘျးသဒၢ+ ဒီးပာ်သဒၢဝဲ တၢ်အၢၣ်လီၤအီလီၤအတလါလၢ+ ယၣ်ဘျးသဒၢလီၤ.

၂၂ ဒီးအဝဲပာ်လီၤဝဲ စီၢ်နီၤခိၣ်လၢ+ ဒဲစီဆှံ လၢအမ့ၢ် တၢ်အိၣ်ဖှိၣ်အဒဲ အကလံၤစိး တကပၤ လၢယၣ်ဘျးသဒၢ အမဲာ်ညါလီၤ. ၂၃ ဒီးဒ်ယဟိဝၤယွၤ မၤလိာ်ပာ်စၢၤ စီၤမိၤၡ့အသိး အဝဲရဲၣ်လီၤဝဲ ကိၣ်လၢ+ စီၢ်နီၤခိၣ်​ အဖီခိၣ်လၢအလီၢ်ဒၣ်ဝဲ လၢယဟိဝၤယွၤ အမဲာ်ညါလီၤ.

၂၄ ဒီးအဝဲ ပာ်လီၤဝဲ မ့ၣ်အူဒၢ+ လၢတၢ်အိၣ်ဖှိၣ်​ အဒဲအပူၤလၢ စီၢ်နီၤခိၣ်​ အမဲာ်ညါ လၢဒဲစီဆှံ အကလံၤထံး တခီလီၤ. ၂၅ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့ အသိး အဝဲဒွဲၣ်ကပီၤထီၣ်​ မ့ၣ်အူဒၢအခွးတဖၣ်+ လၢယဟိဝၤယွၤ အမဲာ်ညါလီၤ.

၂၆ ဝံၤဒီး အဝဲပာ်လီၤ တၢ်လုၢ်လီၢ်ထူ+ လၢတၢ်အိၣ်ဖှိၣ်​ အဒဲအပူၤ လၢယၣ်ဘျးသဒၢ အမဲာ်ညါ ၂၇ ဒ်သိး အကဒွဲၣ်ထီၣ်+ တၢ်နၢမူ+ လၢတၢ်လုၢ်လီၢ်အဖီခိၣ်​ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့ အသိးလီၤ.

၂၈ ဒီးအဝဲ ဘျးထီၣ်​ တၢ်ကံးညာ်+ လၢဒဲစီဆှံ အတၢ်နုာ်လီၤအလီၢ်လီၤ.

၂၉ ဒီးတၢ်လုၢ်လီၢ်လၢ တၢ်လုၢ်ဒွဲၣ်အူအဂီၢ်န့ၣ်+ အဝဲပာ်ဝဲလၢ ဒဲစီဆှံ လၢအမ့ၢ် တၢ်အိၣ်ဖှိၣ်အဒဲ အတၢ်နုာ်လီၤအလီၢ် အမဲာ်ညါ ဒ်သိး အဝဲကလုၢ်ထီၣ်ဝဲ တၢ်လုၢ်ဒွဲၣ်အူ+ ဒီးတၢ်လုၢ်ဘုလၢ အဖီခိၣ်​ ဒ်ယဟိဝၤယွၤ မၤလိာ်ပာ်စၢၤအီၤ အသိးလီၤ.

၃၀ ဒီးအဝဲပာ်လီၤ ထံဒၢဖးဒိၣ်​ လၢတၢ်အိၣ်ဖှိၣ်အဒဲ ဒီးတၢ်လုၢ်လီၢ် အဘၢၣ်စၢၤ ဒီးလူလီၤထံလၢအပူၤ လၢတၢ်မၤကဆှီတၢ် အဂီၢ်လီၤ.+ ၃၁ ဒီးစီၤမိၤၡ့, စီၤအၤဟရိၣ်​ ဒီးအဖိခွါတဖၣ်​ သ့အစုအခီၣ်​ ဖဲန့ၣ်လီၤ. ၃၂ ဖဲအဝဲသ့ၣ်​ လဲၤနုာ်လီၤလၢ တၢ်အိၣ်ဖှိၣ်အဒဲ မ့တမ့ၢ် လဲၤဘူးထီၣ်ဒီး တၢ်လုၢ်လီၢ်အခါ အဝဲသ့ၣ်​ မၤကဆှီအသး+ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့ အသိးလီၤ.

၃၃ လၢခံကတၢၢ်န့ၣ်​ စီၤမိၤၡ့ ကရၢဃာ်ဝဲ+ ဒဲစီဆှံ ဒီးတၢ်လုၢ်လီၢ်လီၤ. ဒီးအဝဲဘျးထီၣ်ဝဲ တၢ်ကံးညာ်လၢ တၢ်နုာ်လီၤအလီၢ်လၢ ပှၤကနုာ်လီၤဆူ တၢ်ပျီလၢ အအိၣ်လၢ ကရၢၢ်ပူၤ အဂီၢ်လီၤ.+

အဃိ စီၤမိၤၡ့ မၤတၢ်မၤခဲလၢာ် ဝံၤဝဲလီၤ. ၃၄ ဒီးတၢ်အၢၣ်​ ကးဘၢ တၢ်အိၣ်ဖှိၣ်အဒဲ ဒီးဒဲစီဆှံန့ၣ်​ ပှဲၤဝဲဒီး ယဟိဝၤယွၤ အလၤကပီၤလီၤ.+ ၃၅ မ့ၢ်လၢ တၢ်အၢၣ်အိၣ်ဒံးဝဲလၢ တၢ်အိၣ်ဖှိၣ်အဒဲ အဖီခိၣ်​ ဒီးဒဲစီဆှံ ပှဲၤဝဲဒီး ယဟိဝၤယွၤ အလၤကပီၤအဃိ စီၤမိၤၡ့ လဲၤနုာ်လီၤ တန့ၢ်ဒံးဘၣ်.+

၃၆ ဒီးဖဲတၢ်အၢၣ်​ သုးထီၣ်အသး လၢဒဲစီဆှံ အအိၣ်အခါ ပှၤအံၣ်စရ့လးဖိတဖၣ်​ လဲၤသုးအဒဲကဝီၤလၢ တၢ်လီၢ်အဂၤတတီၤလီၤ.+ ၃၇ ဘၣ်ဆၣ်​ တၢ်အၢၣ်​ မ့ၢ်တသုးထီၣ်အသးဘၣ်န့ၣ်​ အဝဲသ့ၣ်​ တလဲၤသုး အဒဲကဝီၤလၢ တၢ်လီၢ်အဂၤတတီၤဘၣ်.+ ၃၈ ဖဲပှၤအံၣ်စရ့လးဖိခဲလၢာ် လဲၤတၢ် ဒီတကတီၢ်အခါ လၢမုၢ်ဆါခီန့ၣ်​ အဝဲသ့ၣ်​ ထံၣ်ဘၣ်ဝဲ ယဟိဝၤယွၤ အတၢ်အၢၣ်​ အိၣ်ဝဲလၢ ဒဲစီဆှံအဖီခိၣ်​ ဒီးလၢမုၢ်နၤခီန့ၣ်​ မ့ၣ်အူအိၣ်ဝဲလၢ ဒဲစီဆှံ အဖီခိၣ်လီၤ.+