LEWITIKI

1 Nunku Yehowa wakabikila Mose, kuakulaye nende kumbukila mu ntenta wa kusambakena,+ wamba ne: 2 “Akula ne bena Isalele,* ubambile ne: ‘Muntu wa kunudi yeye musue kulua ne mulambu kudi Yehowa muangatshila mu bimuna biende, nealue ne mulambu muangatshila mu ngombe, mu mikoko anyi mu mbuji.+

3 “‘Bikala mulambu wende muikale mulambu wa kuosha muangatshila mu ngombe, nealue ne nyama mulume muimpe.+ Nealue nende ku disua diende nkayende+ kumpala kua Yehowa ku tshibuelelu tshia ntenta wa kusambakena. 4 Neatenteke tshianza tshiende pa mutu wa mulambu wa kuosha, ne nebawitabe bua bualu buende bua kumubuikidila mpekatu.

5 “‘Pashishe badi ne bua kushipa muana mulume wa ngombe au kumpala kua Yehowa, ne bakuidi,+ bana ba Alona, nebalue ne mashi ende ne nebamiamine mashi au ku nseke yonso ya tshioshelu+ tshidi ku tshibuelelu tshia ntenta wa kusambakena. 6 Mulambu wa kuosha ngua kumbusha tshiseba ne kukosolola mu bitupa.+ 7 Bakuidi, bana ba Alona, nebateke kapia pa tshioshelu+ ne nebalonge nkunyi pa kapia aku. 8 Bakuidi, bana ba Alona, nebalonge bitupa bia nyama wa mulambu au+ ne mutu ne bifutafuta* pa nkunyi idi mu kapia kadi pa tshioshelu. 9 Mala ende ne tulum’a mukolo tuende mbia kusukula ne mâyi, ne muakuidi neabifuimishe bionso pa tshioshelu bu mulambu wa kuosha, mulambu muosha pa kapia wa dipembu dimpe,* kudi Yehowa.+

10 “‘Bikala mulambu udiye ufila bu mulambu wa kuosha mmuangatshila mu tshisumbu tshia nyama mikese,+ mmumue ne: mu bimpanga bia mikoko bitshidi biana anyi mu mbuji, nealue ne nyama mulume muimpe.+ 11 Nebamushipele luseke lua ku nord lua tshioshelu kumpala kua Yehowa, ne bakuidi, bana ba Alona, nebamiamine mashi ende ku nseke yonso ya tshioshelu.+ 12 Neamukosolole mu bitupa, ne muakuidi nealonge bitupa biende, pamue ne mutu wende ne bifutafuta* biende pa nkunyi idi pa kapia pa tshioshelu. 13 Neasukule mala ne tulum’a mukolo ne mâyi, ne muakuidi nealue ne bintu bionso abi ne neabifuimishe pa tshioshelu. Mmulambu wa kuosha, mulambu muosha pa kapia wa dipembu dimpe,* kudi Yehowa.

14 “‘Kadi yeye mufile nyunyi kudi Yehowa bu mulambu wa kuosha, nealue ne mulambu wende muangatshila mu nyunyi ya tumanda nkutshi* anyi mu bana ba nkudimba.+ 15 Muakuidi nealue nende ku tshioshelu, neamunyinge mutu bua kuwukosa ne neamufuimishe pa tshioshelu, kadi mashi ende nga kupongolola ku luseke lua tshioshelu. 16 Yeye neumbushe dibodi diende ne masala ende ne neabimanshe ku luseke lua tshioshelu, ku est, muaba wa butu.*+ 17 Neamupandile lua pa mapuapua ende, kayi umukosolola bitupa bibidi to. Pashishe muakuidi neamufuimishe pa tshioshelu pa mutu pa nkunyi idi pa kapia. Mmulambu wa kuosha, mulambu muosha pa kapia wa dipembu dimpe,* kudi Yehowa.

2 “‘Kadi muntu* yeye mulue ne mulambu wa ntete+ kudi Yehowa, mulambu wende udi ne bua kuikala bukula bunefuke, ne udi ne bua kuelapu mafuta ne kutentekapu budimbu bua mupuya muimpe.+ 2 Pashishe nealue nawu kudi bakuidi, bana ba Alona, ne muakuidi neangate dianza dia bukula bunefuke ne mafuta ne budimbu bua mupuya muimpe buawu buonso, ne neawufuimishe pa tshioshelu bu tshimanyinu tshia mulambu,*+ mulambu muosha pa kapia wa dipembu dimpe,* kudi Yehowa. 3 Bionso bidi bishala ku mulambu wa ntete mbia Alona ne bana bende,+ bu tshintu tshitambe tshijila+ tshia ku milambu miosha pa kapia bua Yehowa.

4 “‘Wewe mulue ne mulambu wa ntete udibu buoshe mu mfulu, mulambu eu udi ne bua kuikala muenza ne bukula bunefuke, mampa menza bu bikata mela mafuta kaayi mela luevene anyi mikata ya bibetubetu milaba mafuta kayiyi miela luevene.+

5 “‘Bikala mulambu webe muikale mulambu wa ntete muenzela mu mpanu,+ udi ne bua kuikala muenza ne bukula buimpe menemene budi kabuyi buela luevene busambakaja ne mafuta. 6 Ngua kutshibula bitupa bitupa ne neupongoluelapu mafuta.+ Mmulambu wa ntete.

7 “‘Bikala mulambu webe muikale mulambu wa ntete mulambila mu luesu, ngua kuenza ne bukula bunefuke ne mafuta. 8 Neulue ne mulambu wa ntete uvuabu benze ne bintu ebi kudi Yehowa, ne nebawupeshe muakuidi, ne yeye neaye nawu pabuipi ne tshioshelu. 9 Muakuidi neangate ndambu wa mulambu wa ntete bu tshimanyinu tshia mulambu,*+ neawufuimishe pa tshioshelu bu mulambu muosha pa kapia wa dipembu dimpe,* kudi Yehowa.+ 10 Bintu bidi bishala ku mulambu wa ntete mbia Alona ne bana bende ba balume bu tshintu tshitambe tshijila tshia ku milambu ya pa kapia bua Yehowa.+

11 “‘Milambu ya ntete inudi nulua nayi kudi Yehowa kayena ne bua kuikala miela luevene to,+ bualu kanuena ne bua kufuimisha luevene* anyi buitshi bu mulambu muosha pa kapia bua Yehowa to.

12 “‘Nudi mua kulua nabi kudi Yehowa bu mulambu wa bintu bia kumpala bia pa madimi,+ kadi kanuena ne bua kulua nabi ku tshioshelu bu dipembu dimpe* to.

13 “‘Udi ne bua kuela mukele mu milambu ya ntete yonso iudi ufila; kupangi bua kuela mukele wa tshipungidi tshia Nzambi webe mu milambu yebe ya ntete to. Neufile mukele pamue ne milambu yebe yonso.+

14 “‘Wewe mulue ne mulambu wa ntete wa bintu bia pa madimi bidi bikola bia kumpala kudi Yehowa, neulue ne ntete mipiamipia* mikanga pa kapia, ntete mipiamipia mitua kayiyi mibotesha bimpe, bu mulambu wa ntete wa bintu biebe bidi bikola bia kumpala.+ 15 Newelapu mafuta ne neutentekapu budimbu bua mupuya muimpe. Mmulambu wa ntete. 16 Muakuidi neawufuimishe bu tshimanyinu tshia mulambu,*+ mmumue ne: ndambu wa ntete mitua kayiyi mibotesha bimpe ne mafuta, pamue ne budimbu bua mupuya muimpe buawu buonso, bu mulambu muosha pa kapia bua Yehowa.

3 “‘Bikala mulambu wende muikale mulambu wa diumvuangana,*+ ne yeye muwangatshile mu tshisumbu tshia ngombe, nansha ngombe mulume nansha ngombe mukaji, udi ne bua kulua ne nyama muimpe kumpala kua Yehowa. 2 Neatenteke tshianza tshiende pa mutu wa mulambu wende ne nebawushipele ku tshibuelelu tshia ntenta wa kusambakena; bakuidi, bana ba Alona, nebamiamine mashi ku nseke yonso ya tshioshelu. 3 Nealue ne tshitupa tshia mulambu wa diumvuangana bu mulambu muosha pa kapia bua Yehowa:+ mafuta+ adi mabuikile mala, mafuta onso adi ku mala, 4 ne tuonyi tubidi ne mafuta adi malamataku adi pabuipi ne mbese. Neumbushe kabidi lutandetande lua ku mutshima pamue ne tuonyi.+ 5 Bana ba balume ba Alona nebafuimishe bintu bionso ebi pa tshioshelu pa mutu pa mulambu wa kuosha udi pa nkunyi idi mu kapia;+ mmulambu muosha pa kapia, bu dipembu dimpe* kudi Yehowa.+

6 “‘Bikalaye mufile mukoko anyi mbuji kudi Yehowa bu mulambu wa diumvuangana, nealue ne nyama muimpe, mulume anyi mukaji.+ 7 Yeye mulue ne tshimpanga tshia mukoko tshitshidi tshiana bu mulambu, dîba adi nealue natshi kumpala kua Yehowa. 8 Neatenteke tshianza tshiende pa mutu wa mulambu wende ne nebawushipele kumpala kua ntenta wa kusambakena. Bana ba balume ba Alona nebamiamine mashi awu ku nseke yonso ya tshioshelu. 9 Nealue ne mafuta a ku mulambu wa diumvuangana bu mulambu muosha pa kapia bua Yehowa.+ Neumbushe mukila mujima udi ne mafuta udi pabuipi ne muongo, mafuta adi mabuikile mala, mafuta onso adi ku mala, 10 ne tuonyi tubidi ne mafuta adi malamataku adi pabuipi ne mbese. Neumbushe kabidi lutandetande lua ku mutshima pamue ne tuonyi.+ 11 Muakuidi neafuimishe bintu bionso ebi pa tshioshelu bu biakudia,* mulambu muosha pa kapia bua Yehowa.+

12 “‘Bikala mulambu wende muikale mbuji, dîba adi nealue nende kumpala kua Yehowa. 13 Neatenteke tshianza tshiende pa mutu wende, ne nebashipe mbuji au kumpala kua ntenta wa kusambakena, ne bana ba balume ba Alona badi ne bua kumiamina mashi ende ku nseke yonso ya tshioshelu. 14 Tshitupa tshialuaye natshi bu mulambu muosha pa kapia kudi Yehowa mmafuta adi mabuikile mala, mafuta onso adi ku mala,+ 15 ne tuonyi tubidi ne mafuta adi malamataku adi pabuipi ne mbese. Neumbushe kabidi lutandetande lua ku mutshima pamue ne tuonyi. 16 Muakuidi neabifuimishe pa tshioshelu bu biakudia,* mulambu muosha pa kapia bua dipembu dimpe.* Mafuta onso nga Yehowa.+

17 “‘Eu mmukenji mufunda wa kashidi bua bipungu bienu bionso, miaba yonso inudi nusombela: kanuena ne bua kudia mafuta a nyama anyi mashi+ nansha kakese.’”

4 Yehowa wakambila kabidi Mose ne: 2 “Ambila bena Isalele ne: ‘Muntu* yeye muenze mpekatu kabiyi ku bukole,+ bualu mmuenze bualu budi Yehowa muelele mukenji ne: kabena ne bua kubuenza, nebienzeke nunku:

3 “‘Muakuidi muela manyi+ yeye muenze mpekatu+ ne mukebele tshisamba dipila, dîba adi udi ne bua kulua ne ngombe mulume muimpe utshidi muana kudi Yehowa bu mulambu wa mpekatu bua mpekatu udiye muenze.+ 4 Nealue ne ngombe mulume au ku tshibuelelu tshia ntenta wa kusambakena,+ kumpala kua Yehowa, neatenteke tshianza tshiende pa mutu wa ngombe au, ne neashipe ngombe au kumpala kua Yehowa.+ 5 Pashishe muakuidi muela manyi+ neangate ndambu wa mashi a ngombe mulume au, neabuele nawu mu ntenta wa kusambakena; 6 muakuidi neatue munu wende mu mashi,+ ne neanyakile ndambu wa mashi au misangu muanda mutekete+ kumpala kua Yehowa, kumpala kua tshilamba tshia kukosolola natshi tshia muaba wa tshijila. 7 Muakuidi neele kabidi ndambu wa mashi au ku nsengu ya tshioshelu tshia musenga wa manananshi wa mupuya muimpe+ tshidi kumpala kua Yehowa mu ntenta wa kusambakena; ne neapongolole mashi onso a ngombe mulume adi mashale kuinshi kua tshioshelu tshia mulambu wa kuosha+ tshidi ku tshibuelelu tshia ntenta wa kusambakena.

8 “‘Pashishe neumbushe mafuta onso a ngombe mulume wa mulambu wa mpekatu, too ne mafuta adi mabuikile mala ne mafuta adi ku mala, 9 ne tuonyi tubidi ne mafuta adi malamataku adi pabuipi ne mbese. Neumbushe kabidi lutandetande lua ku mutshima pamue ne tuonyi.+ 10 Nebikale bintu bia muomumue ne bidibu bumbusha ku ngombe mulume wa mulambu wa diumvuangana.+ Muakuidi neabifuimishe pa tshioshelu tshia mulambu wa kuosha.

11 “‘Kadi bua tshiseba tshia ngombe mulume ne munyinyi wende wonso pamue ne mutu wende ne tulum’a mukolo tuende ne mala ende ne tumvi,+ 12 mmumue ne: bishadile bionso bia ku ngombe mulume, neabiambuishe too ne pambelu pa tshitudilu muaba wa mankenda udibu bimanshila butu,* ne neabioshe pa nkunyi mu kapia.+ Bidi ne bua kuoshibua muaba udibu bimanshila butu.

13 “‘Mpindieu bikala tshisumbu tshijima tshia bena Isalele tshipile bualu ntshienze mpekatu kabiyi ku bukole,+ kadi tshisumbu katshivua tshimanye ne: bavua benze bualu buvua Yehowa muele mukenji bua kabenji,+ 14 ne pashishe mpekatu udi ulua kumanyika, tshisumbu tshidi ne bua kulua ne muana mulume wa ngombe bua mulambu wa mpekatu ne kulua nende kumpala kua ntenta wa kusambakena. 15 Bakulu ba tshisumbu nebatenteke bianza biabu pa mutu wa ngombe mulume au kumpala kua Yehowa, ne ngombe au neashipibue kumpala kua Yehowa.

16 “‘Pashishe muakuidi muela manyi neabuele ne ndambu wa mashi a ngombe mulume au mu ntenta wa kusambakena. 17 Muakuidi neatue munu wende mu mashi, neanyakile ndambu wa mashi au misangu muanda mutekete kumpala kua Yehowa, kumpala kua tshilamba tshia kukosolola natshi.+ 18 Pashishe neele ndambu wa mashi ku nsengu ya tshioshelu+ tshidi kumpala kua Yehowa, tshidi mu ntenta wa kusambakena; neapongolole mashi onso adi mashale kuinshi kua tshioshelu tshia mulambu wa kuosha tshidi ku tshibuelelu tshia ntenta wa kusambakena.+ 19 Neumbushe mafuta ende onso ne neaafuimishe pa tshioshelu.+ 20 Neenze ne ngombe mulume eu anu muvuaye muenze ne ngombe mulume mukuabu wa mulambu wa mpekatu. Ke muenzaye nende nanku, ne muakuidi neababuikidile mpekatu,+ ne nebafuidibue luse. 21 Neambuishe ngombe mulume au too ne pambelu pa tshitudilu ne neamuoshe anu muvuaye muoshe ngombe mulume wa kumpala au.+ Mmulambu wa mpekatu bua tshisumbu tshijima.+

22 “‘Padi mfumu+ wenza mpekatu kabiyi ku bukole bualu mmuenze bualu budi Yehowa Nzambi wende muele mukenji ne: kabena ne bua kubuenza, ne mmupile bua bualu abu, 23 anyi yeye mulue kumanya mpekatu udiye muenze bua mukenji udiye mushipe, dîba adi udi ne bua kulua ne mbuji wa mpumbu muimpe utshidi muana bu mulambu wende. 24 Neatenteke tshianza tshiende pa mutu wa muana wa mbuji au ne neamushipe kumpala kua Yehowa,+ muaba udibu bashipela mulambu wa kuosha. Mmulambu wa mpekatu. 25 Muakuidi neangate ndambu wa mashi a mulambu wa mpekatu ne munu wende, neaele ku nsengu+ ya tshioshelu tshia mulambu wa kuosha, ne neapongolole mashi adi mashale kuinshi kua tshioshelu tshia mulambu wa kuosha.+ 26 Neafuimishe mafuta awu onso pa tshioshelu anu muvuaye muenze ne mafuta a nyama wa mulambu wa diumvuangana;+ ne muakuidi neabuikidile mfumu au mpekatu, ne mfumu au neafuidibue luse.

27 “‘Bikala muntu kampanda* wa mu buloba muenze mpekatu kabiyi ku bukole ne udi upila bualu mmuenze bualu budi Yehowa muele mukenji ne: kabuena ne bua kuenzeka,+ 28 anyi yeye mulue kumanya mpekatu udiye muenze, dîba adi nealue ne lukungulu lua mbuji luimpe bu mulambu wende bua mpekatu udiye muenze. 29 Neatenteke tshianza tshiende pa mutu wa mulambu wa mpekatu, ne neashipe mulambu wa mpekatu muaba wa muomumue ne wa mulambu wa kuosha.+ 30 Muakuidi neangate ndambu wa mashi a mulambu ne munu wende, neaele ku nsengu ya tshioshelu tshia mulambu wa kuosha, ne neapongolole mashi onso adi mashale kuinshi kua tshioshelu.+ 31 Neumbushe mafuta onso+ a nyama wa mulambu anu mudibu bumbusha mafuta a nyama wa mulambu wa diumvuangana,+ ne muakuidi neaafuimishe pa tshioshelu bu dipembu dimpe* kudi Yehowa; muakuidi neabuikidile muntu au mpekatu, ne muntu au neafuidibue luse.

32 “‘Kadi yeye mufile muana wa mukoko bu mulambu wende wa mpekatu, udi ne bua kulua ne lukungulu lua mukoko luimpe. 33 Neatenteke tshianza tshiende pa mutu wa mulambu wa mpekatu, ne neawushipe bu mulambu wa mpekatu muaba udibu bashipela mulambu wa kuosha.+ 34 Muakuidi neangate ndambu wa mashi a mulambu wa mpekatu ne munu wende, neaele ku nsengu ya tshioshelu tshia mulambu wa kuosha,+ ne neapongolole mashi onso adi mashale kuinshi kua tshioshelu. 35 Neumbushe mafuta onso a nyama wa mulambu anu mudibu bumbusha mafuta a tshimpanga tshia mulambu wa diumvuangana, ne muakuidi neabifuimishe pa tshioshelu pa mutu pa milambu ya Yehowa miosha pa kapia;+ muakuidi neamubuikidile mpekatu udiye muenze, ne muntu au neafuidibue luse.+

5 “‘Bikala muntu* ntemu wa bualu, nansha mubumone anyi mubumvue, kadi kayi ubuamba padiye mumvue bela lubila patoke bua kubujadika*+ udi wenza mpekatu, dîba adi neambule bujitu bua tshilema tshiende.

2 “‘Nansha padi muntu* ulenga tshintu tshidi ne bukoya, nansha tshikale tshitalu tshia nyama wa tshisuku udi kayi mukumbane, tshia tshimuna tshidi katshiyi tshikumbane, anyi kamue ka ku tubifukibua tukese tudi tuenda mu bisumbu kadi kakayi kakumbane,+ muntu au mmukoya ne mmupile nansha yeye kayi mumanye ne: mmutshilenge. 3 Anyi bikala muntu mulenge bukoya bua muntu kayi mumanye, mmumue ne: tshintu tshikoya+ tshionso tshidi mua kumuvuija mukoya, ne yeye mulue kumanya bualu ebu, dîba adi udi upila.

4 “‘Anyi muntu* yeye muditshipe bua kuenza bualu kampanda kayi muele meji bimpe, nansha biobi bikale bua kuenza bualu buimpe anyi bualu bubi, nansha buobu mua kuikala bua mushindu kayi, ne yeye kavua mubumanye, kadi pashishe udi ujingulula ne: mmuditshipe kayi muele meji bimpe, udi upila.*+

5 “‘Bikalaye mupile mu bumue bua ku malu aa, dîba adi udi ne bua kutonda+ mushindu udiye muenze mpekatu. 6 Nealue kabidi ne mulambu wende wa dipila kudi Yehowa bua mpekatu uvuaye muenze,+ mmumue ne: nyama mukaji wa mu tshisumbu tshia nyama ya mikese, nansha lukungulu lua mukoko anyi lua mbuji, bua mulambu wa mpekatu. Pashishe muakuidi neamubuikidile mpekatu wende.

7 “‘Kadi bikalaye kayi ne mushindu wa kupeta mukoko, udi ne bua kulua ne tumanda nkutshi* tubidi anyi bana ba nkudimba babidi+ kudi Yehowa bu mulambu wende wa dipila bua mpekatu, umue bua mulambu wa mpekatu ne mukuabu bua mulambu wa kuosha.+ 8 Aye nayi kudi muakuidi, ne yeye neanji kulua ne umue bua mulambu wa mpekatu ne neamunyinge mutu bua kuwukosa, kayi uwutula to. 9 Neanyakile ndambu wa mashi a mulambu wa mpekatu ku luseke lua tshioshelu, kadi mashi adi ashala nga kupongolola kuinshi kua tshioshelu.+ Mmulambu wa mpekatu. 10 Neafile mukuabu bu mulambu wa kuosha bilondeshile mutubu benza pa tshibidilu;+ ne muakuidi neamubuikidile mpekatu udiye muenze, ne muntu au neafuidibue luse.+

11 “‘Kadi bikalaye kayi ne mushindu wa kupeta tumanda nkutshi* tubidi anyi bana ba nkudimba babidi bu mulambu bua mpekatu wende, udi ne bua kulua ne tshia dikumi tshia efa*+ wa bukula bunefuke bua mulambu wa mpekatu. Kena ne bua kusakidilapu mafuta anyi kutekapu budimbu bua mupuya muimpe to, bualu mmulambu wa mpekatu. 12 Nealue natshi kudi muakuidi, ne muakuidi neangatamu dianza dia bukula bu tshimanyinu tshia mulambu* ne neadifuimishe pa tshioshelu pa mutu pa milambu ya Yehowa miosha pa kapia. Mmulambu wa mpekatu. 13 Muakuidi neamubuikidile mpekatu udiye muenze, mpekatu yonso wa ku mpekatu eyi, ne muntu au neafuidibue luse.+ Mulambu udi ushala newikale wa muakuidi,+ anu bu mulambu wa ntete.’”+

14 Yehowa wakatungunuka ne kuakula ne Mose wamba ne: 15 “Bikala muntu* mupange lulamatu bualu mmushipe mukenji udi utangila bintu bia tshijila bia Yehowa kabiyi ku bukole,+ nealue ne tshimpanga tshia mukoko tshimpe tshia mu tshisumbu tshia mikoko kudi Yehowa bu mulambu wa dipila;+ mushinga watshi mu nshekele* ya arjan mmujadika bilondeshile nshekele wa muaba wa tshijila.*+ 16 Neafute bua mpekatu udiye muenze bua muaba wa tshijila, ne neasakidile kabidi tshia bitanu tshia mushinga au.+ Neabifile kudi muakuidi, bua muakuidi amubuikidile mpekatu+ ne tshimpanga tshia mukoko tshia mulambu wa dipila, ne muntu au neafuidibue luse.+

17 “Bikala muntu* muenze mpekatu bualu mmuenze bumue bua ku malu adi Yehowa muele mukenji bua kabenji, nansha yeye kayi mumanye ne: mmubuenze, udi anu mupile ne neambule bujitu bua tshilema tshiende.+ 18 Udi ne bua kulua ne tshimpanga tshia mukoko tshimpe tshia mu tshisumbu tshia mikoko kudi muakuidi bilondeshile mushinga udibu batue, bua mulambu wa dipila.+ Nunku muakuidi neamubuikidile mpekatu bua tshilema tshidiye muenze kayi mumanye, kabiyi ku bukole, ne muntu au neafuidibue luse. 19 Mmulambu wa dipila. Bushuwa muntu au mmupile bualu mmuenzele Yehowa mpekatu.”

6 Yehowa wakambila kabidi Mose ne: 2 “Bikala muntu* muenze mpekatu ne muenze bualu bua dipanga lulamatu kudi Yehowa+ pa kudinga muena mutumba nende bua tshintu tshidibu batekeshe kudiye,+ anyi tshintu tshidibu bamueyeke, peshi yeye muibe anyi mushime muena mutumba nende mumuibe, 3 anyi muangule tshintu tshijimine ne mushime bua tshintu atshi, ne bikalaye muenze mutshipu wa dishima bua mpekatu yonso wa mushindu eu udiye mua kuenza,+ udi ne bua kuenza nunku: 4 Bikalaye muenze mpekatu ne mupile, udi ne bua kupingaja tshintu tshivuaye muibe, tshivuaye munyenge, tshivuaye mupetele ku dishima, tshivuabu batekeshe kudiye, anyi tshintu tshijimine tshivuaye muangule, 5 peshi tshintu kayi tshionso tshivuaye muenzele mutshipu wa dishima, ne udi ne bua kutshifuta tshionso tshijima,+ kusakidilaku ne tshia bitanu tshia mushinga watshi. Udi ne bua kutshipesha muena tshintu dituku didibu bajadika dipila diende. 6 Bua mulambu wa dipila, neatuadile muakuidi tshimpanga tshia mukoko tshimpe tshia mu tshisumbu tshia mikoko, bilondeshile mushinga udibu batue, bu mulambu wende wa dipila wa kupesha Yehowa.+ 7 Muakuidi neamubuikidile mpekatu kumpala kua Yehowa, ne muntu au neafuidibue luse bua bualu kayi buonso budiye mua kuikala muenze buvua bumukebele dipila.”+

8 Yehowa wakatungunuka ne kuakula ne Mose, wamba ne: 9 “Tumina Alona ne bana bende ba balume dîyi ne: ‘Mukenji wa mulambu wa kuosha ngowu eu:+ Mulambu wa kuosha udi ne bua kushala mu kapia kadi pa tshioshelu butuku bujima too ne mu dinda, badi ne bua kulama kapia anu katema pa tshioshelu. 10 Muakuidi neavuale tshilamba tshiende tshia mudimu tshia line+ ne neavuale kaputula*+ ka line bua kujika mubidi wende. Pashishe neumbushe butu*+ bua mulambu wa kuosha uvua kapia kashidishe pa tshioshelu, ne neabuele kumpenga kua tshioshelu. 11 Pashishe neavule bilamba biende,+ neavuale bilamba bikuabu, ne neaye ne butu muaba wa mankenda udi pambelu pa tshitudilu.+ 12 Badi ne bua kulama kapia bua kikale anu katema pa tshioshelu. Kakena ne bua kujima to. Muakuidi udi ne bua kuela nkunyi+ mu kapia mu dinda dionso ne kulongapu mulambu wa kuosha, ne neafuimishapu mafuta a milambu ya diumvuangana.+ 13 Badi ne bua kulama kapia bua kikale katema anu kutema pa tshioshelu. Kakena ne bua kujima to.

14 “‘Kadi mukenji wa mulambu wa ntete ngowu eu:+ Nuenu bana ba balume ba Alona nudi ne bua kulua nawu ku mêsu kua Yehowa kumpala kua tshioshelu. 15 Umue wa kudibu neangate dianza dia bukula mu bukula bunefuke bua mulambu wa ntete ne ndambu wa mafuta a mulambu au ne budimbu bua mupuya muimpe buonso budi pa mulambu wa ntete, ne neabifuimishe pa tshioshelu bu dipembu dimpe* bua tshimanyinu tshia mulambu* kudi Yehowa.+ 16 Alona ne bana bende ba balume nebadie bidi bishala ku mulambu au.+ Nebabidiile muaba kampanda wa tshijila bu mampa kaayi mela luevene. Nebabidiile mu lubanza lua ntenta wa kusambakena.+ 17 Kabena ne bua kubiosha ne tshintu tshiela luevene to.+ Ndi mubifile bu tshitupa tshiabu tshia mu milambu yanyi miosha pa kapia.+ Mbintu bitambe tshijila+ anu bu mulambu wa mpekatu ne mulambu wa dipila. 18 Muana wa balume yonso wa ku bana ba Alona neabidie.+ Nebikale tshitupa tshiabu tshia kashidi tshia ku milambu ya Yehowa miosha pa kapia mu bipungu bienu bionso.+ Tshintu tshionso tshialengaku* netshilue tshia tshijila.’”

19 Yehowa wakambila kabidi Mose ne: 20 “Mulambu wikala Alona ne bana bende ba balume ne bua kulua nawu kudi Yehowa dituku diamuelabu manyi ngowu eu:+ tshia dikumi tshia efa*+ wa bukula bunefuke bu mulambu wa ntete wa kufila pa tshibidilu,+ tshitupa mu dinda, tshitupa tshikuabu dilolo. 21 Ngua kuenza ne mafuta mu mpanu.+ Neulue nawu musambakaja bimpe ne mafuta, ne neulue nawu mukosolola bitupa bitupa bu tshintu tshikanga tshia mulambu wa ntete, bu dipembu dimpe* kudi Yehowa. 22 Muakuidi muela manyi wa munkatshi mua bana bende+ udi umupingana neawufile. Nebafuimishile Yehowa mulambu mujima au. Eu mmukenji wa kashidi. 23 Mulambu wa ntete wonso wa muakuidi udi ne bua kuikala mulambu mujima. Kabena ne bua kuwudia nansha.”

24 Yehowa wakakula kabidi ne Mose, wamba ne: 25 “Ambila Alona ne bana bende ba balume ne: ‘Mukenji wa mulambu wa mpekatu ngowu eu:+ Muaba udibu bashipela mulambu wa kuosha+ ke muaba washipelabu kabidi mulambu wa mpekatu kumpala kua Yehowa. Ntshintu tshitambe tshijila. 26 Muakuidi udi uwufila bua mpekatu neawudie.+ Ngua kudiila muaba kampanda wa tshijila, mu lubanza lua ntenta wa kusambakena.+

27 “‘Tshintu tshionso tshidi tshilenga ku munyinyi wawu netshilue tshia tshijila, ne padi muntu kayi yonso udiela ndambu wa mashi a mulambu ku bilamba biende, wewe udi ne bua kusukuila tshidi tshimatshile mashi muaba kampanda wa tshijila. 28 Dibungu divuabu bawulambile ndia kutayisha. Kadi bobu bawulambile mu tshiesu tshia tshiamu tshia mitaku, dîba adi badi ne bua kupela tshiesu atshi ne kutshisukula ne mâyi.

29 “‘Muntu mulume yonso wa munkatshi mua bakuidi neawudie.+ Ntshintu tshitambe tshijila.+ 30 Kadi kabena ne bua kudia mulambu wa mpekatu bobu babuele ne ndambu wa mashi a mulambu au mu ntenta wa kusambakena bua kubuikila mpekatu muaba wa tshijila.+ Badi ne bua kuwosha mu kapia.

7 “‘Mukenji wa mulambu wa dipila ngowu eu:+ Ntshintu tshitambe tshijila. 2 Nebashipele mulambu wa dipila muaba udibu bashipela milambu ya kuosha, ne mashi awu+ nga kumiamina ku nseke yonso ya tshioshelu.+ 3 Nealue ne mafuta awu onso,+ pamue ne mukila wa mafuta, ne mafuta adi ku mala, 4 ne tuonyi tubidi ne mafuta atu adi pabuipi ne mbese. Neumbushe kabidi lutandetande lua ku mutshima pamue ne tuonyi.+ 5 Muakuidi neabifuimishe pa tshioshelu bu mulambu muosha pa kapia bua Yehowa.+ Mmulambu wa dipila. 6 Muntu mulume yonso wa munkatshi mua bakuidi neawudie,+ ne ngua kudiila muaba kampanda wa tshijila. Ntshintu tshitambe tshijila.+ 7 Mukenji udi utangila mulambu wa mpekatu udi utangila kabidi mulambu wa dipila; ngua muakuidi udi ubuikila nawu mpekatu.+

8 “‘Padi muakuidi ufidila muntu mulambu wa kuosha, tshiseba+ tshia mulambu wa kuosha udibu bafile kudi muakuidi netshikale tshiende.

9 “‘Mulambu wa ntete wonso udi muoshila mu mfulu anyi muenzela mu luesu peshi mu mpanu+ ngua muakuidi udi uwufila. Newikale wende.+ 10 Kadi mulambu wa ntete wonso udi musambakaja ne mafuta+ anyi udi mume+ newikale wa bana ba balume bonso ba Alona; yonso wa kudibu neapete bungi bua muomumue.

11 “‘Mpindieu mukenji wa mulambu wa diumvuangana+ udi muntu mua kulua nawu kudi Yehowa ngowu eu: 12 Yeye mulue nawu bua kuela tuasakidila,+ nealue ne mulambu wa kuela nawu tuasakidila au pamue ne mampa menza bu bikata kaayi mela luevene masambakaja ne mafuta, mikata ya bibetubetu kayiyi miela luevene milaba mafuta, ne mampa menza bu bikata menza ne bukula bunefuke, bututakaja bimpe ne busambakaja ne mafuta. 13 Nealue ne mulambu wende pamue ne mampa menza bu bikata mela luevene ne mulambu wa kuela nawu tuasakidila wa milambu yende ya diumvuangana. 14 Mu bintu ebi nealue ne tshintu tshimue tshia mu mulambu wonso bu tshitupa tshia tshijila tshia Yehowa; netshikale tshia muakuidi udi umiamina mashi a milambu ya diumvuangana.+ 15 Munyinyi wa mulambu wa kuela nawu tuasakidila wa milambu yende ya diumvuangana ngua kudia dituku didiye uwufila. Kena ne bua kuwushiya nansha mukese too ne mu dinda to.+

16 “‘Bikala mulambu wa kupa kuende muikale mutshipu+ anyi mulambu wa budisuile,+ nebawudie dituku didiye ufila mulambu wende, ne badi kabidi mua kudia munyinyi udi mushale dituku didi dilonda. 17 Kadi munyinyi wa mulambu awu udi ushala too ne mu dituku disatu nebawoshe mu kapia.+ 18 Kadi dituku disatu bobu badie munyinyi nansha mukese wa mulambu wende wa diumvuangana, muntu udi uwufila kakuanyishibua to. Kabakumuitabilawu to; ntshintu tshibole, ne muntu* udi udia ndambu wa munyinyi au neambule bujitu bua tshilema tshiende.+ 19 Munyinyi udi ulenga tshintu kayi tshionso tshia bukoya ki ngua kudia to. Ngua kuosha mu kapia. Muntu yonso udi mukezuke udi mua kudia munyinyi mukezuke.

20 “‘Kadi muntu* yonso udi ne bukoya udi udia munyinyi wa mulambu wa diumvuangana wa bende wa Yehowa, badi ne bua kumbusha* muntu* au mu tshisamba tshiabu.+ 21 Bikala muntu* mulenge tshintu kayi tshionso tshidi ne bukoya, nansha tshiotshi tshikale bukoya bua muntu,+ anyi nyama udi kayi mukumbane+ anyi tshintu kayi tshionso tshia muengu tshidi ne bukoya,+ ne mudie ndambu wa munyinyi wa mulambu wa diumvuangana wa bende wa Yehowa, badi ne bua kumbusha* muntu* au mu tshisamba tshiabu.’”

22 Yehowa wakatungunuka ne kuakula ne Mose, wamba ne: 23 “Ambila bena Isalele ne: ‘Kanuena ne bua kudia mafuta kayi onso+ a ngombe anyi a tshimpanga tshia mukoko tshiana anyi a mbuji to. 24 Mafuta a nyama musangana mufue ne mafuta a nyama mushipa kudi nyama mukuabu nudi mua kuenza nawu mudimu mukuabu kayi wonso, kadi kanuena ne bua kuadia nansha kakese.+ 25 Bualu bua muntu yonso udi udia mafuta a nyama udiye ufila bu mulambu muosha pa kapia bua Yehowa badi ne bua kumumbusha* mu tshisamba tshiabu.

26 “‘Kanuena ne bua kudia mashi kayi onso+ muaba kayi wonso unudi basombele, nansha owu a nyunyi anyi a nyama. 27 Muntu* yonso udi udia mashi kayi onso badi ne bua kumumbusha*+ mu tshisamba tshiabu.’”

28 Yehowa wakambila kabidi Mose ne: 29 “Ambila bena Isalele ne: ‘Muntu yonso udi ulua ne mulambu wende wa diumvuangana kudi Yehowa neafile tshitupa tshia mulambu tshiangatshila mu mulambu wende wa diumvuangana kudi Yehowa.+ 30 Nealue ne mafuta+ pamue ne tshiadi mu bianza biende bu mulambu muosha pa kapia bua Yehowa, ne neawukupakaje kumpala ne panyima bu mulambu wa kukupakaja+ kumpala kua Yehowa. 31 Muakuidi neafuimishe mafuta pa tshioshelu,+ kadi tshiadi netshikale tshia Alona ne bana bende ba balume.+

32 “‘Nenupeshe muakuidi tshibelu tshia dia balume bu tshitupa tshia tshijila tshia mu milambu yenu ya diumvuangana.+ 33 Muana wa Alona udi ulambula mashi a milambu ya diumvuangana ne mafuta neangate tshibelu tshia dia balume bu tshitupa tshiende.+ 34 Bualu ndi muangate tshiadi tshia mulambu wa kukupakaja ne tshibelu tshia tshitupa tshia tshijila mu milambu ya diumvuangana ya bena Isalele, ne ndi mubipeshe muakuidi Alona ne bana bende ba balume bu mukenji wa kashidi bua bena Isalele.+

35 “‘Etshi ke tshivua tshitupa tshia mu milambu ya Yehowa miosha pa kapia tshia kuteka ku luseke bua bakuidi, bua Alona ne bana bende ba balume, dituku divuaye mulue nabu bua kuenzelabu Yehowa mudimu wa buakuidi.+ 36 Yehowa wakatuma dîyi bua babapeshe tshitupa etshi tshia kudi bena Isalele dituku divuaye mubele manyi.+ Mmukenji mufunda wa kashidi bua bipungu biabu bionso.’”

37 Eu ke mukenji udi utangila mulambu wa kuosha,+ mulambu wa ntete,+ mulambu wa mpekatu,+ mulambu wa dipila,+ mulambu wa dijadikibua mu mudimu+ ne mulambu wa diumvuangana,+ 38 anu muvua Yehowa mutumine Mose dîyi ku mukuna wa Sinai+ dituku divuaye mutumine bena Isalele dîyi bua kulua ne milambu yabu kudi Yehowa mu tshipela tshia Sinai.+

8 Yehowa wakatungunuka ne kuakula ne Mose, wamba ne: 2 “Luaku ne Alona pamue ne bana bende ba balume,+ ne bilamba,+ ne manyi a kuelangana,+ ne ngombe mulume wa mulambu wa mpekatu, ne bimpanga bibidi bia mikoko, ne tshianda* tshia mampa kaayi mela luevene,+ 3 usangishe tshisumbu tshijima kaba kamue ku tshibuelelu tshia ntenta wa kusambakena.”

4 Nunku Mose wakenza anu muvua Yehowa mumutumine dîyi bua kuenza, ne tshisumbu tshijima tshiakadisangisha kaba kamue ku tshibuelelu tshia ntenta wa kusambakena. 5 Ke Mose kuambilaye tshisumbu ne: “Ke tshidi Yehowa mututumine dîyi bua kuenza etshi.” 6 Nunku Mose wakasemeja Alona ne bana bende ba balume pabuipi, ne wakabowesha mâyi.+ 7 Pashishe wakamuvuadika muzabi,+ kumusuikaye mukaba wa tshilamba,+ kumuvuadikaye muzabi wa kawuyi maboko,+ kumuvuadikaye kabidi efoda+ ne kusuikaye efoda au ne mukaba muluka*+ wa efoda mukuata efoda bimpe pambidi pende. 8 Pashishe wakamuvuadika tshilamba tshia pa tshiadi,+ kuelaye Ulima ne Tumima+ mu tshilamba tshia pa tshiadi atshi. 9 Pashishe wakamuvuadika tshilamba tshia kujingila+ ku mutu ku mutu wende, kutekaye tshitata tshia or tshidi tshibalakana, tshimanyinu tshia tshijila tshia dibanjijibua,*+ kumpala kua tshilamba tshia kujingila ku mutu anu muvua Yehowa mutumine Mose dîyi bua kuenza.

10 Pashishe Mose wakangata manyi a kuelangana, kuelaye ntenta wa tshitendelelu ne bintu bionso bivuamu manyi,+ ne wakabijidila. 11 Pashishe wakanyakila ndambu wa manyi au ku tshioshelu misangu muanda mutekete, kuelaye tshioshelu ne bintu biatshi bionso ne dilongo dinene ne tshintu tshia kuditekela manyi bua kubijidila. 12 Ndekelu wa bionso wakapongolola ndambu wa manyi a kuelangana pa mutu pa Alona, kumuelaye manyi bua kumujidila.+

13 Pashishe Mose wakasemeja Alona ne bana bende ba balume pabuipi, kubavuadikaye mizabi, kubasuikaye mikaba ya bilamba, kubavuadikaye* kabidi bilamba bia kuvuala ku mutu+ anu muvua Yehowa mutumine Mose dîyi bua kuenza.

14 Pashishe wakalua ne ngombe mulume wa mulambu wa mpekatu, ne Alona ne bana bende bakatenteka bianza biabu pa mutu wa ngombe wa mulambu wa mpekatu au.+ 15 Mose wakamushipa, kuangataye mashi+ ne munu wende, kuelaye ku nsengu ya tshioshelu ku nseke yonso, yeye kukezula tshioshelu ku mpekatu, kadi mashi avua mashale wakaapongolola kuinshi kua tshioshelu bua kutshijidila bua kubuikilapu mpekatu. 16 Pashishe wakangata mafuta onso avua ku mala, lutandetande lua ku mutshima ne tuonyi tubidi ne mafuta atu, Mose kubifuimishaye pa tshioshelu.+ 17 Pashishe wakuoshisha bishadile bia ku ngombe mulume, mmumue ne: tshiseba tshiende, munyinyi wende ne tumvi, mu kapia pambelu pa tshitudilu+ anu muvua Yehowa mutumine Mose dîyi bua kuenza.

18 Pashishe wakasemeja tshimpanga tshia mukoko wa mulambu wa kuosha pabuipi, ne Alona ne bana bende ba balume bakatenteka bianza biabu pa mutu wa tshimpanga atshi.+ 19 Pashishe Mose wakatshishipa ne wakamiamina mashi ku nseke yonso ya tshioshelu. 20 Wakakosolola tshimpanga atshi bitupa bitupa, ne Mose wakafuimisha mutu, ne bitupa abi, ne bifutafuta.* 21 Wakasukula mala ne tulum’a mukolo ne mâyi, ne Mose wakafuimisha tshimpanga tshijima pa tshioshelu. Uvua mulambu wa kuosha wa dipembu dimpe.* Uvua mulambu muosha pa kapia bua Yehowa anu muvua Yehowa mutumine Mose dîyi bua kuenza.

22 Pashishe wakalua ne tshimpanga tshibidi tshia mukoko, tshimpanga tshia dibanjijibua,+ ne Alona ne bana bende ba balume bakatenteka bianza biabu pa mutu wa tshimpanga atshi.+ 23 Mose wakatshishipa, kuangataye ndambu wa mashi atshi, kuelaye ku lusongo lua ditshi dia Alona dia ku dia balume ne ku tshiala tshia ku tshianza tshiende tshia balume ne ku muan’a nkasa munene wa ku dikasa diende dia ku dia balume. 24 Pashishe Mose wakasemeja bana ba balume ba Alona, kuelaye ndambu wa mashi ku nsongo ya matshi abu a ku dia balume ne ku biala bia ku bianza biabu bia balume ne ku bana ba nkasa banene ba ku makasa abu a ku dia balume; kadi Mose wakamiamina mashi avua mashale ku nseke yonso ya tshioshelu.+

25 Pashishe wakangata mafuta, ne mukila wa mafuta, ne mafuta onso avua ku mala, ne lutandetande lua ku mutshima, ne tuonyi tubidi ne mafuta atu, ne tshibelu tshia dia balume.+ 26 Wakangata diampa dimue kadiyi diela luevene+ dienza bu tshikata ne diampa dimue diela mafuta+ dienza bu tshikata ne mukata umue wa tshibetubetu mu tshianda tshia mampa kaayi mela luevene tshivua kumpala kua Yehowa. Pashishe wakabiteka pa bitupa bia mafuta ne pa tshibelu tshia dia balume. 27 Pashishe wakabiteka bionso mu bianza bia Alona ne mu bianza bia bana bende ba balume, kubangaye kubikupakaja kumpala ne panyima bu mulambu wa kukupakaja kumpala kua Yehowa. 28 Pashishe Mose wakabiangata mu bianza biabu, kubifuimishaye pa tshioshelu pa mutu pa mulambu wa kuosha. Bivua mulambu wa dijadikibua mu mudimu bu dipembu dimpe.* Uvua mulambu muosha pa kapia bua Yehowa.

29 Pashishe Mose wakangata tshiadi, kutshikupakajaye kumpala ne panyima bu mulambu wa kukupakaja kumpala kua Yehowa.+ Tshiakalua tshitupa tshia Mose tshia ku tshimpanga tshia mukoko tshia dijadikibua mu mudimu anu muvua Yehowa mutumine Mose dîyi bua kuenza.+

30 Pashishe Mose wakangata ndambu wa manyi a kuelangana+ ne ndambu wa mashi avua pa tshioshelu, kunyakilaye Alona ne bilamba biende, ne bana bende ne bilamba bia bana bende bavuaye nabu. Nunku wakajidila Alona ne bilamba biende ne bana bende+ ne bilamba biabu.+

31 Pashishe Mose wakambila Alona ne bana bende ba balume ne: “Lambilayi+ munyinyi ku tshibuelelu tshia ntenta wa kusambakena, nenuwudiile muaba au ne mampa adi mu tshianda tshia dijadikibua mu mudimu, anu muvuabu bantumine dîyi ne: ‘Alona ne bana bende ba balume nebabidie.’+ 32 Munyinyi ne mampa bidi bishala nenubioshe mu kapia.+ 33 Kuena ne bua kumbuka ku tshibuelelu tshia ntenta wa kusambakena munkatshi mua matuku muanda mutekete too ne padi matuku a kujikija dijadikibua dienu mu mudimu ajika, bualu nebiangate matuku muanda mutekete bua kunujadika mu mudimu wa buakuidi.*+ 34 Yehowa uvua mututumine dîyi bua tuetu kuenza tshitudi benze lelu etshi bua kunubuikidila mpekatu.+ 35 Nenushale ku tshibuelelu tshia ntenta wa kusambakena munya ne butuku matuku muanda mutekete+ ne nenuenze bualu budi Yehowa munufundile+ bua kuenza bua kanufu to; bualu ke tshidibu bantumine dîyi bua kuenza.”

36 Nunku Alona ne bana bende ba balume bakenza malu onso avua Yehowa mutume dîyi ku butuangaji bua Mose bua kuenza.

9 Dituku dia muanda mukulu+ Mose wakabikila Alona ne bana bende ba balume ne bakulu ba mu Isalele. 2 Yeye kuambila Alona ne: “Angata muana wa ngombe bua mulambu wa mpekatu+ ne tshimpanga tshia mukoko bua mulambu wa kuosha buebe wewe, bia bimpe, ulue nabi kumpala kua Yehowa. 3 Kadi newambile bena Isalele ne: ‘Angatayi mpumbu wa mbuji bua mulambu wa mpekatu ne muana wa ngombe ne tshimpanga tshia mukoko tshitshidi tshiana, bionso bikale bia tshidimu tshimue, bia bimpe, bua mulambu wa kuosha, 4 ne ngombe mulume ne tshimpanga tshia mukoko bua milambu ya diumvuangana+ bua kubilambula kumpala kua Yehowa, ne mulambu wa ntete+ musambakaja ne mafuta, bualu lelu Yehowa neanumuenekele.’”+

5 Nunku bakalua ne bivua Mose mubatumine dîyi bua kuangata kumpala kua ntenta wa kusambakena. Pashishe tshisumbu tshijima tshiakasemena kumpala, kuimanatshi kumpala kua Yehowa. 6 Mose kuambaye ne: “Ebu mbualu budi Yehowa munutumine dîyi bua kuenza, bua butumbi bua Yehowa bumueneke kunudi.”+ 7 Pashishe Mose wakambila Alona ne: “Semena ku tshioshelu, ufile mulambu webe wa mpekatu+ ne mulambu webe wa kuosha, ne ubuikile mpekatu webe wewe+ ne wa ba mu nzubu muebe; ufile mulambu wa tshisamba+ ne ubuikile mpekatu yabu,+ anu mudi Yehowa mutume dîyi bua kuenza.”

8 Diakamue Alona wakaya ku tshioshelu, kushipaye muana wa ngombe wa mulambu wa mpekatu uvuaku bua bualu buende.+ 9 Pashishe bana ba balume ba Alona bakamutuadila mashi,+ yeye kutua munu wende mu mashi au, kuelaye ku nsengu ya tshioshelu, ne mashi avua mashale wakaapongolola kuinshi kua tshioshelu.+ 10 Wakafuimisha mafuta, ne tuonyi, ne lutandetande lua ku mutshima bia ku mulambu wa mpekatu pa tshioshelu, anu muvua Yehowa mutumine Mose dîyi bua kuenza.+ 11 Yeye kuosha munyinyi ne tshiseba mu kapia pambelu pa tshitudilu.+

12 Pashishe wakashipa mulambu wa kuosha, ne bana ba balume ba Alona bakamupesha mashi, yeye kuamiamina ku nseke yonso ya tshioshelu.+ 13 Bakamupesha bitupa bia mulambu wa kuosha, pamue ne mutu, yeye kubifuimisha pa tshioshelu. 14 Pashishe wakasukula mala ne tulum’a mukolo, kubifuimishaye pa tshioshelu, pa mutu pa mulambu wa kuosha.

15 Pashishe wakafila mulambu wa tshisamba, yeye kuangata mbuji wa mulambu wa mpekatu uvua bua bualu bua tshisamba, kumushipaye, ne kumufilaye bu mulambu wa mpekatu anu muvuabu benze ne wa kumpala. 16 Wakafila mulambu wa kuosha, kuwenzaye bilondeshile mutubu benza pa tshibidilu.+

17 Pashishe wakafila mulambu wa ntete,+ kuwujaye tshianza tshiende ne ndambu wa mulambu au, kuwufuimishaye pa tshioshelu pamue ne mulambu wa kuosha wa mu dinda.+

18 Pashishe wakashipa ngombe mulume ne tshimpanga tshia mukoko bia mulambu wa diumvuangana uvua bua bualu bua tshisamba. Pashishe bana ba balume ba Alona bakamupesha mashi, yeye kuamiamina kumpenga kua tshioshelu, ku nseke yonso.+ 19 Bua bitupa bia mafuta bia ngombe mulume,+ mukila wa mafuta wa tshimpanga tshia mukoko, mafuta adi mabuikile bia munda, tuonyi ne lutandetande lua ku mutshima,+ 20 bakateka bitupa bionso bia mafuta abi pa biadi bia nyama, pashishe wakafuimisha bitupa bia mafuta abi pa tshioshelu.+ 21 Kadi Alona wakakupakaja biadi ne tshibelu tshia dia balume kumpala ne panyima bu mulambu wa kukupakaja kumpala kua Yehowa, anu muvua Mose mutume dîyi bua kuenza.+

22 Pashishe Alona wakolola bianza biende kudi bantu, kubabeneshaye,+ ne wakatuluka ufuma ku difila dia mulambu wa mpekatu ne mulambu wa kuosha ne milambu ya diumvuangana. 23 Ndekelu wa bionso, Mose ne Alona bakabuela mu ntenta wa kusambakena ne bakapatuka, kubeneshabu tshisamba.+

Nunku butumbi bua Yehowa buakamueneka kudi bantu bonso,+ 24 ne kapia kakafuma kudi Yehowa,+ kubangaku kuosha mulambu wa kuosha ne bitupa bia mafuta bivua pa tshioshelu. Pavua bantu bonso bamone bualu abu, bakatuadija kuela mbila, kutuabu mpala yabu panshi.+

10 Pashishe Nadaba ne Abihu,+ bana ba Alona, bakangata muntu yonso tshintu tshiende tshia kuambuila kapia, kuelamu kapia, kuelapu musenga wa manananshi.+ Pashishe bakatuadija kulambula kapia kadi kakayi kanyishibue kumpala kua Yehowa,+ kavuaye kayi mubatumine dîyi bua kufila. 2 Bua bualu ebu kapia kakafuma kumpala kua Yehowa, kubuoshaku,+ nunku bakafua kumpala kua Yehowa.+ 3 Pashishe Mose wakambila Alona ne: “Yehowa mmuambe nunku: ‘Nemvuijibue wa tshijila munkatshi mua bantu badi pabuipi nanyi,+ ne nentumbishibue kumpala kua bantu bonso.’” Alona wakashala mupuwe.

4 Ke Mose kubikila Mishaele ne Elisafana, bana ba Uziele,+ tatuende mukuabu wa Alona, kubambilaye ne: “Luayi muaba eu, umbushayi bana benu kumpala kua muaba wa tshijila, nuye nabu muaba mukuabu pambelu pa tshitudilu.” 5 Nunku bakalua ne bakambula bantu abu mu mizabi yabu, kuyabu nabu muaba mukuabu pambelu pa tshitudilu, anu muvua Mose mubambile.

6 Pashishe Mose wakambila Alona ne bana bende bakuabu, Eleazâ ne Itamâ ne: “Kanulekeledi nsuki ya ku mitu yenu peshi kanupandi bilamba bienu,+ bua kanufu ne bua Nzambi kalu kufiikila tshisumbu tshijima munda. Bana benu ba mu nzubu mujima wa Isalele nebadile bantu badi Yehowa mushipe ku kapia. 7 Kanuena ne bua kumbuka ku tshibuelelu tshia ntenta wa kusambakena to, tshianana nenufue, bualu manyi a kuelangana a Yehowa adi pa mitu penu.”+ Nunku bakenza malu mu diumvuangana ne dîyi dia Mose.

8 Pashishe Yehowa wakambila Alona ne: 9 “Kunu mvinyo anyi maluvu makuabu makole, wewe ne bana bebe ba balume badi nebe, panudi nubuela mu ntenta wa kusambakena,+ bua kanulu kufua. Eu mmukenji mufunda wa kashidi bua bipungu bienu bionso. 10 Mbua kuikale dishilangana pankatshi pa tshintu tshia tshijila ne tshidi katshiyi tshia tshijila, ne pankatshi pa tshintu tshia bukoya ne tshidi tshikezuke,+ 11 ne bua kulongesha bena Isalele mêyi ne mikandu bionso bidi Yehowa mubambile ku butuangaji bua Mose.”+

12 Pashishe Mose wakambila Alona ne bana bende bavua bashale, Eleazâ ne Itamâ ne: “Angatayi mulambu wa ntete uvua mushale ku milambu ya Yehowa miosha pa kapia, nuwudiile pabuipi ne tshioshelu bu diampa kadiyi diela luevene,+ bualu ntshintu tshitambe tshijila.+ 13 Nudi ne bua kuwudiila muaba kampanda wa tshijila,+ bualu ntshitupa tshiebe ne ntshitupa tshia bana bebe tshia ku milambu ya Yehowa miosha pa kapia, bualu ke tshivuabu bantumine dîyi bua nuenu kuenza. 14 Nenudiile kabidi tshiadi tshia mulambu wa kukupakaja ne tshibelu tshia mu tshitupa tshia tshijila+ muaba wa mankenda, wewe, ne bana bebe ba balume, ne bana bebe ba bakaji badi nebe,+ bualu bintu ebi mbifila bu tshintu tshiebe ne tshintu tshia bana bebe tshia mu milambu ya diumvuangana ya bena Isalele. 15 Nebalue ne tshibelu tshia mu tshitupa tshia tshijila ne tshiadi tshia mu mulambu wa kukupakaja, pamue ne milambu ya mafuta miosha pa kapia, bua kukupakaja mulambu wa kukupakaja kumpala ne panyima, kumpala kua Yehowa; ne netshikale bu tshintu tshia kashidi buebe wewe ne bua bana bebe badi nebe,+ anu muvua Yehowa mutume dîyi bua kuenza.”

16 Mose wakakeba mbuji wa mulambu wa mpekatu ne muoyo mujima,+ kuluaye kumona ne: bakavua bamuoshe. Ke yeye kufiikila Eleazâ ne Itamâ, bana ba Alona bavua bashale munda bikole, kuambaye ne: 17 “Bua tshinyi kanuvua badiile mulambu wa mpekatu muaba kampanda wa tshijila,+ pawu muikale tshintu tshitambe tshijila tshidiye munupeshe bua numone mua kuambula bujitu bua tshilema tshia tshisumbu ne kubabuikidila mpekatu kumpala kua Yehowa? 18 Mona! Ki mbabuele ne mashi a mulambu au muaba wa tshijila to.+ Nuvua bushuwa ne bua kuwudiila muaba kampanda wa tshijila, anu muvuabu bantumine dîyi bua nuenu kuenza.” 19 Alona wakandamuna Mose ne: “Mona! Lelu mbafile mulambu wabu wa mpekatu ne mulambu wabu wa kuosha kumpala kua Yehowa,+ nansha nanku malu aa mmamfikile. Bu meme mudie mulambu wa mpekatu lelu, bivuaku mua kusankisha Yehowa anyi?” 20 Pakumvua Mose bualu ebu, wakanyisha.

11 Pashishe Yehowa wakambila Mose ne Alona ne: 2 “Ambilayi bena Isalele ne: ‘Ebi ke bifukibua bidi ne muoyo bia pa buloba* binudi mua kudia:+ 3 Nudi mua kudia nyama yonso udi ne bikono bipanduluke ne ntanta mu bikono biende ne udi upingajilula bintu mukana ubidia kabidi.

4 “‘Kadi kanuena ne bua kudia nyama idi ipingajilula bintu mukana ibidia kabidi anyi idi ne bikono bipanduluke idi ilonda eyi: kamelu, bualu kadi kapingajilula bintu mukana kabidia kabidi, kadi kakena ne bikono bipanduluke. Ki nkakumbane buenu nuenu to.+ 5 Nansha nsenji,+ bualu udi upingajilula bintu mukana ubidia kabidi, kadi kena ne bikono bipanduluke. Ki mmukumbane buenu nuenu to. 6 Nansha kalulu ka ditu, bualu kadi kapingajilula bintu mukana kabidia kabidi, kadi kakena ne bikono bipanduluke. Ki nkakumbane buenu nuenu to. 7 Nansha ngulube,+ bualu udi ne bikono bipanduluke ne ntanta mu bikono, kadi kena upingajilula bintu mukana ubidia kabidi. Ki mmukumbane buenu nuenu to. 8 Kanuena ne bua kudia munyinyi wa nyama eyi nansha mukese anyi kulenga bitalu biayi. Ki mmikumbane buenu nuenu to.+

9 “‘Monayi bintu bia mu mâyi binudi mua kudia: Nudi mua kudia tshintu tshionso tshidi mu mâyi tshidi ne bipepe ne musalala ne mabamba, nansha tshiotshi tshikale mu mbuu anyi mu misulu.+ 10 Kadi tshintu tshionso tshidi mu mbuu ne mu misulu tshidi katshiyi ne bipepe ne musalala ne mabamba, munkatshi mua tubifukibua tuonso tudi tuenda mu bisumbu ne munkatshi mua bifukibua bikuabu bionso bidi ne muoyo* bidi mu mâyi, ntshintu tshia muengu buenu nuenu. 11 Eyowa, nebikale bintu bia muengu kunudi, ne kanuena ne bua kudia munyinyi wabi+ nansha mukese ne nudi ne bua kumona bitalu biabi bu bintu bia muengu. 12 Tshintu tshionso tshidi mu mâyi tshidi katshiyi ne bipepe ne musalala ne mabamba ntshintu tshia muengu kunudi.

13 “‘Monayi bifukibua bidi bibuuka binudi ne bua kumona bu bintu bia muengu; kanuena ne bua kubidia bualu mbintu bia muengu: mukanku,+ mukanku utu ukuata mishipa, tshiminyi tshifiike,+ 14 kabemba ne nkumbikumbi ya mishindu yonso, 15 bikololo bia mishindu yonso, 16 nyunyi wa mfiondo, tshipungulu, musabula nkala, nyunyi ya mvulu ya mishindu yonso, 17 kakutukutu, tshiowa,* tshikutukutu, 18 dibata ditoke dia pa mâyi, mukuekue, tshiminyi, 19 kasonga nyunyi, nyunyi ya tusonga mule ya mishindu yonso, katodi ne mudima. 20 Tubifukibua tua mishindu yonso tudi ne masala tudi tuenda mu bisumbu* tuikale ne tukolo tunayi ntuntu tua muengu kunudi.

21 “‘Bua tubifukibua tudi tuenda mu bisumbu tudi ne masala tuikale tuenda ne tukolo tunayi, udi mua kudia anu tudi ne mapangu ku mutu kua tukasa bua kutumpika panshi. 22 Mu tuotu etu udi mua kudia: mpasu ya mikumbi ya mishindu yonso, mpasu mikuabu itubu badia,+ mienze, ne mpasu mikuabu. 23 Tubifukibua tukuabu tuonso tudi ne tukolo tunayi tuikale ne masala tudi tuenda mu bisumbu ntuntu tua muengu kunudi. 24 Tubifukibua etu tudi mua kunuvuija bakoya. Muntu yonso udi ulenga bitalu biatu neikale mukoya too ne ku dilolo.+ 25 Muntu yonso udi wambula bitalu biatu udi ne bua kusukula bilamba biende;+ neikale mukoya too ne ku dilolo.

26 “‘Nyama yonso udi ne bikono bipanduluke, kadi kayi ne ntanta mu bikono biende ne kayi upingajilula bintu mukana ubidia kabidi ki mmukumbane buenu nuenu to. Muntu yonso udi umulenga neikale mukoya.+ 27 Bifukibua bionso bidi ne muoyo bidi biendela ku makama bidi munkatshi mua bifukibua bidi bienda ne mikolo inayi ki mbikumbane buenu nuenu to. Muntu yonso udi ulenga bitalu biabi neikale mukoya too ne ku dilolo. 28 Muntu udi wambula bitalu biabi udi ne bua kusukula bilamba biende,+ ne neikale mukoya too ne ku dilolo.+ Ki mbikumbane buenu nuenu to.

29 “‘Monayi bifukibua bidi bidikoka panshi bidi kabiyi bikumbane buenu nuenu: tshibulebule, mpuku,+ misodi ya mishindu yonso, 30 kampulunsamba, lombe, musodi wa mu mâyi, musodi wa mu lusenga, ne lungonyonyi. 31 Bifukibua bidi bidikoka panshi ebi ki mbikumbane buenu nuenu to.+ Muntu yonso udi ulenga bitalu biabi neikale mukoya too ne ku dilolo.+

32 “‘Kadi tshintu tshionso tshidibi bikulukila padibi bifua netshikale ne bukoya, nansha tshiotshi tshikale tshintu tshia mutshi tshia kuenza natshi mudimu mu nzubu, anyi tshilamba, anyi tshiseba, anyi tshipese tshia tshilamba tshikayabale. Badi ne bua kutua tshintu tshionso tshidibu benza natshi mudimu mu nzubu mu mâyi, ne netshikale ne bukoya too ne ku dilolo; pashishe netshikale tshikezuke. 33 Biobi bikulukile mu dibungu, nudi ne bua kuditayisha, ne bintu bionso bivuamu nebikale ne bukoya.+ 34 Biakudia bia mishindu yonso bidi bilengangana ne mâyi a mu dibungu adi nebikale ne bukoya, ne bintu bionso bia kunua bidi mu dibungu adi nebikale ne bukoya. 35 Tshintu tshionso tshidi bitalu biabi bikulukila netshikale ne bukoya. Nansha tshiotshi tshikale mfulu anyi ditshuwa, nudi ne bua kutshitayisha. Bidi ne bukoya, ne nebishale ne bukoya kunudi. 36 Anu mpokolo wa mâyi anyi tshina tshidibu balamina mâyi ke biashala bikezuke, kadi muntu yonso udi ulenga bitalu biabi neikale ne bukoya. 37 Bitalu biabi biobi bikulukile pa mamiinu a kukuna, mamiinu au mmakezuke. 38 Kadi bobu bele mâyi pa mamiinu, ne tshitupa tshia bitalu biabi tshikulukilapu, mamiinu au adi ne bukoya kunudi.

39 “‘Kadi nyama unutu nudia yeye mufue, muntu yonso udi ulenga tshitalu tshiende neikale mukoya too ne ku dilolo.+ 40 Muntu yonso udi udia munyinyi wa tshitalu tshiende neasukule bilamba biende, ne neikale mukoya too ne ku dilolo.+ Muntu yonso udi wambula tshitalu tshiende udi ne bua kusukula bilamba biende, ne neikale mukoya too ne ku dilolo. 41 Bifukibua bionso bidi bidikoka panshi mbintu bia muengu.+ Kanuena ne bua kubidia to. 42 Kanuena ne bua kudia bifukibua bionso bidi bikoka mafu abi panshi, bifukibua bionso bidi bienda ne makasa anayi, anyi bifukibua bionso bia pa buloba bidi bidikoka panshi, bikale ne tukolo tua bungi, bualu mbintu bia muengu.+ 43 Kanudivuiji* tshintu tshia muengu ne tshifukibua nansha tshimue tshidi tshidikoka panshi, ne kanudinyangi, nudivuija bakoya bua bualu buabi.+ 44 Bualu meme ndi Yehowa Nzambi wenu;+ nudi ne bua kudijidila ne kulua ba tshijila+ bualu meme ndi wa tshijila.+ Nunku kanuena* ne bua kudivuija bakoya pa kudia bifukibua bidi bidikoka panshi bidi bienda mu bisumbu. 45 Bualu meme ndi Yehowa udi unupatula mu buloba bua Ejipitu bua meme kuleja mundi Nzambi wenu,+ ne nudi ne bua kuikala ba tshijila,+ bualu meme ndi wa tshijila.+

46 “‘Eu ke mukenji udi utangila nyama, bifukibua bidi bibuuka, bifukibua* bionso bidi bienda mu mâyi, ne utangila bifukibua* bionso bidi bidikoka panshi, 47 bua kuikale dishilangana pankatshi pa tshintu tshidi ne bukoya ne tshintu tshikezuke, ne pankatshi pa bifukibua bidibu mua kudia ne bidibu kabayi mua kudia.’”+

12 Yehowa wakambila kabidi Mose ne: 2 “Ambila bena Isalele ne: ‘Bikala mukaji mupete difu* ne mulele muana wa balume, neikale mukoya matuku muanda mutekete, anu mutuye mu matuku a bukoya padiye uya ku tshijila tshia mashi.+ 3 Mu dituku dia muanda mukulu nebatengule muana.+ 4 Neatungunuke ne kudikezula ku mashi matuku 33 adi alonda. Kena ne bua kulenga tshintu tshia tshijila nansha tshimue, ne kena ne bua kubuela muaba wa tshijila too ne padiye ujikija matuku a didilengeja diende.

5 “‘Bikalaye mulele muana wa bakaji, dîba adi neikale mukoya matuku 14, anu mutuye tshikondo tshituye uya ku tshijila tshia mashi. Neatungunuke ne kudikezula ku mashi matuku 66 adi alonda. 6 Padi matuku a didilengeja diende bua muana wa balume anyi bua muana wa bakaji ajika, nealue ne tshimpanga tshia mukoko tshidi mu tshidimu tshiatshi tshia kumpala bua mulambu wa kuosha+ ne muana wa nkudimba anyi kamanda nkutshi* bua mulambu wa mpekatu kudi muakuidi, ku tshibuelelu tshia ntenta wa kusambakena. 7 Muakuidi nealue nabi kumpala kua Yehowa ne neamubuikidile mpekatu, nunku neikale mukezuke ku dipueka diende dia mashi. Eu mmukenji udi utangila mukaji udi ulela muana wa balume anyi wa bakaji. 8 Kadi yeye kayi ne mushindu wa kupeta mukoko, dîba adi udi ne bua kuangata tumanda nkutshi* tubidi anyi bana ba nkudimba babidi,+ umue bua mulambu wa kuosha ne mukuabu bua mulambu wa mpekatu; muakuidi neamubuikidile mpekatu, ne yeye neikale mukezuke.’”

13 Yehowa wakatungunuka ne kuakula ne Mose ne Alona, wamba ne: 2 “Bikala lupusu, tshilamulamu anyi dikeji dipatuke pa dikoba* dia muntu ne ndifuane kulua disama dia nsudi*+ pa dikoba diende, dîba adi badi ne bua kuya nende kudi muakuidi Alona anyi kudi umue wa ku bana bende, bakuidi.+ 3 Muakuidi neakenkete disama didi pa dikoba. Buoya bua muaba au buobu bulue butoke ne disama dimueneke dibuele too ne mu munyinyi, ndisama dia nsudi. Muakuidi neakenkete disama adi ne neambe mudi muntu au mukoya. 4 Kadi bikala dikeji didi pa dikoba dikale ditoke, dimueneka kadiyi dibuele too ne mu munyinyi ne buoya kabuyi bulue butoke, dîba adi muakuidi neateke muntu udi usama muaba wa nkayende bua matuku muanda mutekete.+ 5 Pashishe muakuidi neamukenkete mu dituku dia muanda mutekete; biobi bimueneke ne: disama ndimane, ne ki nditampakane pa dikoba, muakuidi neamuteke kabidi muaba wa nkayende bua matuku makuabu muanda mutekete.

6 “Muakuidi neamukenkete kabidi mu dituku dia muanda mutekete; bikala disama dikepe ne kadiyi ditampakane pa dikoba, muakuidi neambe mudi muntu au mukezuke;+ tshivua tshilamulamu tshianana. Dîba adi muntu au neasukule bilamba biende ne neikale mukezuke. 7 Kadi bikala tshilamulamu* tshitampakane bushuwa pa dikoba panyima pa yeye mumane kumueneka kumpala kua muakuidi bua kujadika dilengejibua diende, dîba adi neaye kudileja kabidi* kudi muakuidi. 8 Muakuidi neatshikenkete; bikala tshilamulamu tshitampakane pa dikoba, dîba adi muakuidi neambe mudi muntu au mukoya. Ndisama dia nsudi.+

9 “Bikala disama dia nsudi dikuate muntu, dîba adi badi ne bua kuya nende kudi muakuidi, 10 ne muakuidi neamukenkete.+ Bikalaye ne lupusu lutoke pa dikoba, ne lupusu nduvuije buoya butoke, ne nduenze mputa,+ 11 ndisama dia nsudi dia matuku a bungi didi pa dikoba diende; muakuidi neambe mudi muntu au mukoya. Kakumuteka muaba wa nkayende to,+ bualu mmukoya. 12 Mpindieu bikala nsudi mikuate muntu mubidi mujima, ne disama dia nsudi dibuikile muntu ku mutu too ne ku makasa, miaba yonso idi muakuidi mua kumona, 13 ne muakuidi mmumukenkete ne mmumone ne: nsudi mmibuikile dikoba diende dijima, dîba adi neambe mudi muntu udi usama au muikale mukezuke.* Dikoba dionso ndilue ditoke; muntu au mmukezuke. 14 Kadi dîba dionso didi mputa wenza pa dikoba, muntu au neikale mukoya. 15 Padi muakuidi umona mputa, neambe mudi muntu au mukoya.+ Mputa au mmukoya. Ndisama dia nsudi.+ 16 Kadi bikala mputa mulue kabidi mutoke, dîba adi muntu au nealue kudi muakuidi. 17 Muakuidi neamukenkete,+ ne bikala mputa mulue mutoke, dîba adi muakuidi neambe mudi muntu udi usama au muikale mukezuke. Muntu au mmukezuke.

18 “Bikala muntu mupete tshiwuja pambidi pende ne tshiotshi tshijike, 19 kadi pa muaba wa tshiwuja palue kuenzeka lupusu lutoke anyi dikeji dikunzubile, dîba adi udi ne bua kudileja kudi muakuidi. 20 Muakuidi neadikenkete,+ ne diodi dimueneke dibuele too ne mu munyinyi ne buoya bua muaba au bulue butoke, dîba adi muakuidi neambe mudi muntu au mukoya. Ndisama dia nsudi didi dipatukile mu tshiwuja. 21 Kadi bikala muakuidi mudikenkete, mumone ne: kamuena buoya butoke, ki ndibuele too ne mu munyinyi ne ndimueneke dikepe, dîba adi muakuidi neateke muntu au muaba wa nkayende bua matuku muanda mutekete.+ 22 Kadi diodi ditampakane bushuwa pa dikoba, dîba adi muakuidi neambe mudi muntu au mukoya. Ndisama. 23 Kadi bikala dikeji dishale kaba kamue kadiyi ditampakane, ndiuwula tshianana dia tshiwuja; muakuidi neambe mudi muntu au mukezuke.+

24 “Peshi bikala muntu muikale ne tshibangu tshia kapia, ne mputa wa mu tshibangu mmulue dikeji dikunzubile anyi ditoke, 25 dîba adi muakuidi neadikenkete. Bikala buoya budi mu dikeji bulue butoke ne dikeji ndimueneke dibuele too ne mu munyinyi, ndisama dia nsudi didi dipatukile mu tshibangu, ne muakuidi neambe mudi muntu au mukoya. Ndisama dia nsudi. 26 Kadi bikala muakuidi mudikenkete ne mumone ne: mu dikeji kamuena buoya butoke, ki ndibuele too ne mu munyinyi ne ndikepe, dîba adi muakuidi neateke muntu au muaba wa nkayende bua matuku muanda mutekete.+ 27 Muakuidi neamukenkete mu dituku dia muanda mutekete, ne dikeji diodi didiunde bushuwa pa dikoba, dîba adi muakuidi neambe mudi muntu au mukoya. Ndisama dia nsudi. 28 Kadi bikala dikeji dishale kaba kamue, kadiyi didiunde pa dikoba ne dikepe, ndiuwula tshianana dia tshibangu; muakuidi neambe mudi muntu au mukezuke, bualu ndituntamana dia tshibangu.

29 “Muntu mulume anyi muntu mukaji yeye mupete mputa ku mutu anyi ku tshibanga, 30 dîba adi muakuidi neakenkete mputa au.+ Yeye mumueneke mubuele too ne mu munyinyi ne nsuki* milue mikunzubile ne mikepe, dîba adi muakuidi neambe mudi muntu au mukoya; mmputa wa ku tshiseba tshia ku mutu anyi wa ku muedi. Ndisama dia nsudi dia ku mutu anyi dia ku tshibanga. 31 Kadi bikala muakuidi mumone ne: mputa kena umueneka mubuele too ne mu munyinyi, ne kamuena nsuki mifiike, muakuidi neateke muntu udi ne mputa au muaba wa nkayende bua matuku muanda mutekete.+ 32 Muakuidi neakenkete mputa mu dituku dia muanda mutekete, ne bikala mputa kayi mudiunde ne nsuki mikunze kayiyi mitolokamu, ne mputa kena umueneka mubuele too ne mu munyinyi, 33 muntu au neadikunguishe, kadi kakudikunguisha muaba udi mputa to. Pashishe muakuidi neateke muntu udi ne mputa au muaba wa nkayende bua matuku muanda mutekete.

34 “Muakuidi neakenkete kabidi mputa mu dituku dia muanda mutekete, ne bikala mputa wa ku tshiseba tshia ku mutu anyi wa ku muedi kayi mudiunde pa dikoba, ne kena umueneka mubuele too ne mu munyinyi, dîba adi muakuidi neambe mudi muntu au mukezuke, ne muntu au neasukule bilamba biende ne neikale mukezuke. 35 Kadi bikala mputa au udiunda bushuwa pa dikoba panyima pa dilengejibua diende, 36 muakuidi neamukenkete, ne bikala mputa mudiunde pa dikoba, muakuidi kena dijinga ne kukeba nsuki mikunzubile to; muntu au mmukoya. 37 Kadi bikala dikenketa dileje ne: mputa ki mmudiunde ne nsuki mifiike mmitolokamu, mputa mmuondopibue. Muntu au mmukezuke, ne muakuidi neambe mudiye mukezuke.+

38 “Makeji owu mapatuke muntu mulume anyi muntu mukaji pambidi* ne makeji au mikale matoke, 39 muakuidi neaakenkete.+ Bikala makeji adi pambidi au kaayi matoke bikole, mmpusu ya tshianana idi mipatuke pambidi. Muntu au mmukezuke.

40 “Bikala nsuki ya ku mutu kua muntu mituke ne muntu au mupete dibala, mmukezuke. 41 Yeye mutuke nsuki ya mu mpala ne mupete dibala muaba au, muntu au mmukezuke. 42 Kadi bikala mputa mukunzubile mumupatuke mu dibala dia tshiseba tshiende tshia ku mutu anyi mu mpala muende, ndisama dia nsudi didi dipatukile mu tshiseba tshiende tshia ku mutu anyi mu mpala muende. 43 Muakuidi neamukenkete, ne bikala muaba udi muwule bua disama muikale mukunzubile mu dibala didi mu kabonkoshi kende anyi mu mpala muende, ne umueneka bu nsudi pa dikoba diende, 44 muntu au mmuena nsudi. Mmukoya, ne muakuidi neambe mudiye mukoya bua disama didi ku mutu kuende. 45 Muena nsudi udi ne disama neapande bilamba biende, nealekelele nsuki ya ku mutu kuende, ne neabuikile muedi wa pa mushiku wende wa muulu, ne neele dîyi ne: ‘Ndi mukoya, ndi mukoya!’ 46 Neikale mukoya matuku onso adiye ne disama. Bu mudiye mukoya, neasombele muaba wa nkayende. Neasombele pambelu pa tshitudilu.+

47 “Bikala disama dia nsudi dikuate ku tshilamba, nansha tshiotshi tshikale tshilamba tshienza ne miosa ya mikoko anyi tshia line, 48 nansha ku manda a mu bule anyi ku manda a mu butshiama a tshilamba tshia line anyi tshienza ne miosa ya mikoko, anyi ku tshiseba anyi ku tshintu tshionso tshienza ne tshiseba, 49 ne ditoba dia dikala dia mâyi a matamba a manyimanyi anyi dikunzubile dia ku disama diodi dikuate ku tshilamba, ku tshiseba, ku manda a mu bule, ku manda a mu butshiama a tshilamba, anyi ku tshintu tshionso tshia tshiseba, nditampakana dia nsudi, ne badi ne bua kudileja muakuidi. 50 Muakuidi neakenkete disama, ne udi ne bua kuteka tshintu tshidi ne disama muaba wa nkayatshi bua matuku muanda mutekete.+ 51 Padiye ukenketa disama dituku dia muanda mutekete ne umona ne: nditampakane ku tshilamba, ku manda a mu bule, ku manda a mu butshiama, anyi ku tshiseba (nansha bobu benza mudimu kayi ne tshiseba atshi), disama adi nnsudi idi itampakana ne tshintu atshi tshidi ne bukoya.+ 52 Newoshe tshilamba, manda a mu bule, manda a mu butshiama a tshilamba tshienza ne miosa ya mikoko anyi tshia line, anyi tshintu tshionso tshienza ne tshiseba tshidi tshipie disama, bualu nnsudi idi itampakana. Ntshia kuosha mu kapia.

53 “Kadi muakuidi yeye mutshikenkete ne disama ki nditampakane ku tshilamba, ku manda a mu bule, ku manda a mu butshiama anyi ku tshintu tshionso tshia tshiseba, 54 dîba adi muakuidi neatume dîyi bua basukule tshintu tshidi tshipie disama atshi, ne neatshiteke muaba wa nkayatshi bua matuku makuabu muanda mutekete. 55 Pashishe muakuidi neakenkete tshintu tshidi tshipie disama panyima pa bobu bamane kutshisukula bimpe menemene. Bikala ditoba dimueneka kadiyi dishintuluke, nansha disama diodi kadiyi ditampakane, tshintu atshi tshidi ne bukoya. Udi ne bua kutshiosha mu kapia, bualu tshikadi tshidiike munda anyi pambelu.

56 “Kadi bikala muakuidi mutshikenkete, ne tshitupa tshidi ne ditoba ntshibuitshidile panyima pa bobu bamane kutshisukula bimpe menemene, dîba adi neatshikose ku tshilamba anyi ku tshiseba anyi ku manda a mu bule a tshilamba anyi ku manda a mu butshiama. 57 Kadi diodi dimueneke kabidi mu tshitupa tshikuabu tshia tshilamba, ku manda a mu bule a tshilamba, ku manda a mu butshiama anyi ku tshintu tshionso tshia tshiseba, ditoba adi didi ditampakana, ne newoshe tshintu tshionso tshidi tshipie disama mu kapia.+ 58 Kadi ditoba diodi dijimine ku tshilamba, ku manda a mu bule a tshilamba, ku manda a mu butshiama anyi ku tshintu tshionso tshia tshiseba tshiudi usukula, dîba adi nebatshisukule musangu muibidi, ne netshikale tshikezuke.

59 “Eu mmukenji wa disama dia nsudi ku tshilamba tshienza ne miosa ya mikoko anyi ku tshilamba tshia line, ku manda a mu bule a tshilamba, ku manda a mu butshiama, anyi ku tshintu tshionso tshia tshiseba, bua kuamba muditshi tshikezuke anyi tshikale ne bukoya.”

14 Yehowa wakatungunuka ne kuakula ne Mose, wamba ne: 2 “Eu newikale mukenji wa muena nsudi dituku didibu bajadika dilengejibua diende, padibu baya nende kudi muakuidi.+ 3 Muakuidi neaye pambelu pa tshitudilu ne neamukenkete. Bikala nsudi ya muena nsudi mijike, 4 muakuidi neamutumine dîyi bua kulua ne nyunyi mikezuke ibidi ya muoyo, mutshi wa sedre, buanda bukunze kunzuu, ne tumitshi tua izope bua dikezudibua diende.+ 5 Muakuidi neatume dîyi bua bashipe nyunyi umue mu dibungu pa mutu pa mâyi masuna mu mpokolo. 6 Kadi udi ne bua kuangata nyunyi wa muoyo pamue ne mutshi wa sedre, buanda bukunze kunzuu, ne bisalasala bia tumitshi tua izope, kubitua bionso mu mashi a nyunyi uvuabu bashipe pa mutu pa mâyi a mu mpokolo. 7 Pashishe neanyakile mashi au misangu muanda mutekete pambidi pa muntu udi udilengeja ku nsudi, ne neambe mudi muntu au mukezuke, ne nealekelele nyunyi wa muoyo mu mpata.+

8 “Muntu udi udilengeja udi ne bua kusukula bilamba biende, kukungula nsuki yende yonso ne kuowa mâyi, nunku neikale mukezuke. Pashishe udi mua kulua mu tshitudilu, kadi neasombe pambelu pa ntenta wende matuku muanda mutekete. 9 Mu dituku dia muanda mutekete, neakungule nsuki yonso ya ku mutu kuende, miedi yende, ne makiki ende. Panyima pa yeye mumane kukungula nsuki yende yonso, neasukule bilamba biende, neowe mâyi, ne neikale mukezuke.

10 “Mu dituku dia muanda mukulu neangate bimpanga bia mikoko bibidi bimpe bitshidi biana, lukungulu lua mukoko luimpe+ ludi mu tshidimu tshialu tshia kumpala, bia dikumi bisatu bia efa* wa bukula bunefuke busambakaja ne mafuta bu mulambu wa ntete,+ ne tshipiminu tshimue tshia loga* tshia mafuta;+ 11 ne muakuidi udi wamba mudi muntu udi udikezula au mukezuke neaye nende kumpala kua Yehowa ku tshibuelelu tshia ntenta wa kusambakena, pamue ne milambu ayi. 12 Muakuidi neangate tshimpanga tshimue, neatshifile bu mulambu wa dipila+ pamue ne tshipiminu tshia loga tshia mafuta, ne neabikupakaje kumpala ne panyima bu mulambu wa kukupakaja kumpala kua Yehowa.+ 13 Pashishe neashipe tshimpanga atshi muaba utubu ne tshibidilu tshia kushipela mulambu wa mpekatu ne mulambu wa kuosha,+ muaba kampanda wa tshijila, bualu, anu bu mulambu wa mpekatu, mulambu wa dipila ngua muakuidi.+ Ntshintu tshitambe tshijila.+

14 “Pashishe muakuidi neangate ndambu wa mashi a mulambu wa dipila, ne muakuidi neaele ku lusongo lua ditshi dia ku dia balume dia muntu udi udikezula ne ku tshiala tshia ku tshianza tshiende tshia balume ne ku muan’a nkasa munene wa ku dikasa diende dia ku dia balume. 15 Muakuidi neangate tshipiminu tshia loga tshia mafuta atshi,+ neapongolole ndambu wa mafuta mu tshianza tshiende tshia bakaji. 16 Pashishe muakuidi neatue munu wende wa ku dia balume mu mafuta adi mu tshianza tshiende tshia bakaji, ne neanyakile ndambu wa mafuta ne munu wende misangu muanda mutekete kumpala kua Yehowa. 17 Pashishe muakuidi neele ndambu wa mafuta adi ashala mu tshianza tshiende ku lusongo lua ditshi dia ku dia balume dia muntu udi udikezula ne ku tshiala tshia ku tshianza tshiende tshia balume ne ku muan’a nkasa munene wa ku dikasa diende dia ku dia balume pa mutu pa mashi a mulambu wa dipila. 18 Muakuidi nealabe mafuta adi ashala mu tshianza tshiende mu mutu mua muntu udi udikezula, ne muakuidi neamubuikidile mpekatu kumpala kua Yehowa.+

19 “Muakuidi nealambule nyama wa mulambu wa mpekatu+ bua kubuikidila muntu udi udikezula ku bukoya buende mpekatu, ne pashishe neashipe nyama wa mulambu wa kuosha. 20 Muakuidi neafile nyama wa mulambu wa kuosha ne mulambu wa ntete+ pa tshioshelu, ne muakuidi neamubuikidile mpekatu,+ ne muntu au neikale mukezuke.+

21 “Kadi bikalaye mupele, kayi ne mushindu, dîba adi neangate tshimpanga tshia mukoko tshitshidi tshiana bu mulambu wa dipila bua mulambu wa kukupakaja bua kumubuikidila mpekatu wende yeye, pamue ne tshia dikumi tshia efa* wa bukula bunefuke busambakaja ne mafuta bu mulambu wa ntete, ne tshipiminu tshimue tshia loga tshia mafuta, 22 ne tumanda nkutshi* tubidi anyi bana ba nkudimba babidi, bilondeshile mudiye mukokeshe. Nyunyi umue neikale wa mulambu wa mpekatu, ne mukuabu wa mulambu wa kuosha.+ 23 Mu dituku dia muanda mukulu+ nealue nabi kudi muakuidi ku tshibuelelu tshia ntenta wa kusambakena, kumpala kua Yehowa, bua kujadika dilengejibua diende.+

24 “Muakuidi neangate tshimpanga tshia mukoko tshia mulambu wa dipila+ ne tshipiminu tshia loga tshia mafuta, ne muakuidi neabikupakaje kumpala ne panyima bu mulambu wa kukupakaja kumpala kua Yehowa.+ 25 Pashishe neashipe tshimpanga tshia mukoko tshia mulambu wa dipila, ne muakuidi neangate ndambu wa mashi a nyama wa mulambu wa dipila, neaele ku lusongo lua ditshi dia ku dia balume dia muntu udi udikezula ne ku tshiala tshia ku tshianza tshiende tshia balume ne ku muan’a nkasa munene wa ku dikasa diende dia balume.+ 26 Muakuidi neapongolole ndambu wa mafuta mu tshianza tshiende yeye tshia bakaji,+ 27 pashishe neanyakile ndambu wa mafuta adi mu tshianza tshiende tshia bakaji ne munu wende wa ku dia balume misangu muanda mutekete kumpala kua Yehowa. 28 Muakuidi neele ndambu wa mafuta adi mu tshianza tshiende ku lusongo lua ditshi dia ku dia balume dia muntu udi udikezula ne ku tshiala tshia ku tshianza tshiende tshia balume ne ku muan’a nkasa munene wa ku dikasa diende dia balume, miaba ya muomumue ne ivuaye muele mashi a nyama wa mulambu wa dipila. 29 Pashishe muakuidi nealabe mafuta adi ashala mu tshianza tshiende mu mutu mua muntu udi udikezula bua kumubuikidila mpekatu kumpala kua Yehowa.

30 “Nealambule kamue ka ku tumanda nkutshi* anyi umue wa ku nkudimba ayi, bilondeshile mudiye mukokeshe,+ 31 nyunyi udiye mua kukokesha, bu mulambu wa mpekatu ne mukuabu bu mulambu wa kuosha+ pamue ne mulambu wa ntete; ne muakuidi neabuikidile muntu udi udikezula mpekatu kumpala kua Yehowa.+

32 “Eu mmukenji bua muntu uvua ne disama dia nsudi, kadi kayi ne mushindu dîba didibu bajadika dilengejibua diende.”

33 Pashishe Yehowa wakambila Mose ne Alona ne: 34 “Panudi nubuela mu buloba bua Kanâna+ bundi nnupesha bua buikale buenu,+ ne meme muele disama dia nsudi ku nzubu kampanda mu buloba buenu,+ 35 dîba adi muena nzubu nealue kuambila muakuidi ne: ‘Disama kampanda ndikuate nzubu wanyi.’ 36 Muakuidi neatume dîyi bua bapatule bintu bionso bidi mu nzubu kumpala kua yeye kulua bua kukenketa disama, bua kalu kuamba mudi bintu bionso bidi mu nzubu bikale ne bukoya; pashishe muakuidi neabuele bua kukenketa nzubu. 37 Neakenkete muaba udi disama, ne bikala bimanu bia nzubu bikale ne miaba miondoke mikale ne dikala dia mâyi a matamba a manyimanyi anyi mikunzubile, ne yoyi imueneka mibuele too ne mu tshimanu, 38 dîba adi muakuidi neapatuke too ne ku tshiibi tshia nzubu ne neakange nzubu bua matuku muanda mutekete.+

39 “Pashishe muakuidi neapingane dituku dia muanda mutekete bua kukenketa nzubu. Bikala disama ditampakane ku bimanu bia nzubu, 40 muakuidi neatume dîyi bua batule mabue onso adi makuatshike disama ne nebaimanshe pambelu pa tshimenga, muaba wa bukoya. 41 Pashishe neakoneshe munda mua nzubu bimpe menemene; bishinguidi ne potopoto mume bidibu balamune mbia kuimansha pambelu pa tshimenga, muaba wa bukoya. 42 Pashishe nebapingaje mabue makuabu muaba wa mabue avuabu batule, ne neangate potopoto mukuabu ne neashinguishe nzubu.

43 “Kadi bikala disama dipingane ne dibudike mu nzubu panyima pa bamane kutula mabue, bakone mu nzubu ne bamushinguile tshiakabidi, 44 dîba adi muakuidi neabuelamu ne neamukenkete. Bikala disama ditampakane mu nzubu, ndisama dia nsudi idi itampakana+ mu nzubu. Nzubu au udi ne bukoya. 45 Dîba adi neupuishe nzubu ne mabue ende, ne mabaya ende ne bishinguidi bionso ne potopoto mume wa nzubu; nebaye nabi pambelu pa tshimenga, muaba wa bukoya.+ 46 Kadi muntu yonso udi ubuela mu nzubu au mu matuku adibu bamukange au,+ neikale mukoya too ne ku dilolo;+ 47 muntu yonso udi ulala mu nzubu amu neasukule bilamba biende, ne muntu yonso udi udiila mu nzubu amu neasukule bilamba biende.

48 “Kadi bikala muakuidi mulue ne mumone ne: disama ki nditampakane mu nzubu panyima pa bamane kumushinguila tshiakabidi, dîba adi muakuidi neambe mudi nzubu au mukezuke, bualu disama ndijike. 49 Bua kukezula nzubu ku bukoya,* neangate nyunyi ibidi, ditamba dia mutshi wa sedre, buanda bukunze kunzuu, ne bisalasala bia tumitshi tua izope.+ 50 Neashipe nyunyi umue mu dibungu pa mutu pa mâyi a mu mpokolo. 51 Pashishe neangate mutshi wa sedre, bisalasala bia tumitshi tua izope, buanda bukunze kunzuu ne nyunyi wa muoyo, neabitue bionso mu mashi a nyunyi uvuabu bashipe ne mu mâyi a mu mpokolo, ne neaanyakile lua ku nzubu misangu muanda mutekete.+ 52 Neakezule nzubu ku bukoya* ne mashi a nyunyi, ne mâyi a mu mpokolo, ne nyunyi wa muoyo, ne mutshi wa sedre, ne bisalasala bia tumitshi tua izope, ne buanda bukunze kunzuu. 53 Pashishe nealekelele nyunyi wa muoyo pambelu pa tshimenga mu mpata ne neabuikile mpekatu wa nzubu au, ne nzubu au neikale mukezuke.

54 “Eu mmukenji udi utangila nsudi ya mishindu yonso, mputa wa ku tshiseba tshia ku mutu anyi wa ku muedi,+ 55 nsudi ya ku tshilamba+ anyi ya ku nzubu,+ 56 ne utangila mpusu, nkaka ne makeji,+ 57 bua kumanya dîba didi tshintu ne bukoya ne dîba didi tshintu tshikezuke.+ Eu mmukenji udi utangila nsudi.”+

15 Yehowa wakatungunuka ne kuakula ne Mose ne Alona, wamba ne: 2 “Akulayi ne bena Isalele, nubambile ne: ‘Bikala muntu mulume ne bintu bipatuka mu butaka buende,* bintu abi bidi bimuvuija mukoya.+ 3 Mmukoya bua bintu abi, nansha biobi bitungunuka ne kupatuka mu butaka buende anyi bibupatshishe, udi anu mukoya.

4 “‘Bulalu buonso budi muntu udi bintu bipatuka ulala nebuikale ne bukoya, ne tshintu tshionso tshidiye usombela netshikale ne bukoya. 5 Muntu udi ulenga bulalu buende udi ne bua kusukula bilamba biende, ne neowe mâyi ne neikale mukoya too ne ku dilolo.+ 6 Muntu yonso udi usomba pa tshintu tshivua muntu udi bintu bipatuka musombe neasukule bilamba biende, neowe mâyi, ne neikale mukoya too ne ku dilolo. 7 Muntu yonso udi ulenga pambidi pa muntu udi bintu bipatuka neasukule bilamba biende, neowe mâyi, ne neikale mukoya too ne ku dilolo. 8 Bikala muntu udi bintu bipatuka mutuile muntu udi mukezuke mate, muntu au udi ne bua kusukula bilamba biende, kuowa mâyi, ne neikale mukoya too ne ku dilolo. 9 Tshiseba tshionso tshitubu basombela pa nyima pa nyama tshidi muntu udi bintu bipatuka musombele netshikale ne bukoya. 10 Muntu yonso udi ulenga tshintu tshionso tshivua muntu au musombele neikale mukoya too ne ku dilolo, ne muntu yonso udi wambula bintu abi neasukule bilamba biende, neowe mâyi, ne neikale mukoya too ne ku dilolo. 11 Bikala muntu udi bintu bipatuka+ kayi muowe mâyi ku bianza, yeye mulenge muntu mukuabu, dîba adi muntu au udi ne bua kusukula bilamba biende, kuowa mâyi, ne neikale mukoya too ne ku dilolo. 12 Dibungu didibu balenga kudi muntu udi bintu bipatuka nebaditayishe, ne dibungu dionso dia mutshi nebadisukule ne mâyi.+

13 “‘Padi bintu abi bilekela kupatuka ne muntu au ulengejibua ku bintu abi, dîba adi neabale matuku muanda mutekete bua dilengejibua diende, ne udi ne bua kusukula bilamba biende, kuowa mâyi a mu mpokolo, ne neikale mukezuke.+ 14 Dituku dia muanda mukulu neangate tumanda nkutshi* tubidi anyi bana ba nkudimba babidi,+ nealue kumpala kua Yehowa ku tshibuelelu tshia ntenta wa kusambakena ne neapeshe muakuidi nyunyi ayi. 15 Muakuidi neayilambule, umue bu mulambu wa mpekatu ne mukuabu bu mulambu wa kuosha, ne muakuidi neamubuikidile mpekatu kumpala kua Yehowa bua bintu bivua bimupatuka.

16 “‘Kadi bikala muntu mulume muele bilume, neowe mâyi mubidi mujima ne neikale mukoya too ne ku dilolo.+ 17 Udi ne bua kusukula tshilamba tshionso ne tshiseba tshionso tshidi ne bilume, ne netshikale ne bukoya too ne ku dilolo.

18 “‘Padi muntu mulume ulala ne muntu mukaji ne udi wela bilume, nebowe bonso mâyi ne nebikale bakoya too ne ku dilolo.+

19 “‘Bikala muntu mukaji ne mashi apatuka mu mubidi wende, neashale mu bukoya bua ku tshijila atshi bua matuku muanda mutekete.+ Muntu yonso udi umulenga neikale mukoya too ne ku dilolo.+ 20 Tshintu tshionso tshidiye uladila padiye mu bukoya bua ku tshijila netshikale ne bukoya, ne tshintu tshionso tshidiye usombela netshikale ne bukoya.+ 21 Muntu yonso udi ulenga bulalu buende neasukule bilamba biende, neowe mâyi, ne neikale mukoya too ne ku dilolo. 22 Muntu yonso udi ulenga tshintu tshionso tshivuaye musombele neasukule bilamba biende, neowe mâyi, ne neikale mukoya too ne ku dilolo. 23 Yeye mulenge bulalu anyi tshintu tshikuabu tshivua mukaji au musombele, ditshilenga adi nedimuvuije mukoya too ne ku dilolo.+ 24 Bikala muntu mulume mulale nende ne bukoya bua ku tshijila tshiende buobu bumuyile,+ dîba adi muntu au neikale mukoya matuku muanda mutekete, ne bulalu buonso budiye ulala nebuikale ne bukoya.

25 “‘Dîba didi mashi apatuka muntu mukaji bua matuku a bungi+ padibi kabiyi tshikondo tshituye uya ku tshijila tshia mashi pa tshibidilu,+ anyi mashi owu amupatuka matuku a bungi kupita bungi bua matuku atuwu apatuka padiye ku tshijila tshia mashi, neikale mukoya matuku onso adi mashi amupatuka anu bu mutuye matuku adiye ne bukoya bua ku tshijila tshiende. 26 Bulalu buonso budiye uladila matuku onso adi mashi amupatuka nebuikale bu bulalu bua padiye ne bukoya bua tshijila tshia mashi,+ ne tshintu tshionso tshidiye usombela netshikale ne bukoya anu mutubi bienzeka padiye mu bukoya bua tshijila tshiende tshia mashi. 27 Muntu yonso udi ubilenga neikale mukoya, ne udi ne bua kusukula bilamba biende, kuowa mâyi, ne neikale mukoya too ne ku dilolo.+

28 “‘Kadi dîba didiye ulengejibua ku dipatuka dia mashi, neadibadile matuku muanda mutekete, pashishe neikale mukezuke.+ 29 Dituku dia muanda mukulu neangate tumanda nkutshi* tubidi anyi bana ba nkudimba babidi,+ neaye ne nyunyi ayi kudi muakuidi ku tshibuelelu tshia ntenta wa kusambakena.+ 30 Muakuidi neafile umue bu mulambu wa mpekatu ne mukuabu bu mulambu wa kuosha, ne muakuidi neabuikidile mukaji au mpekatu kumpala kua Yehowa bua bukoya bua dipatuka dia mashi ende.+

31 “‘Nunku nudi ne bua kulama bena Isalele batapuluke ku bukoya buabu, bua kabafu mu bukoya buabu padibu banyanga ntenta wanyi wa tshitendelelu udi munkatshi muabu.+

32 “‘Eu mmukenji udi utangila muntu mulume udi bintu bipatuka, muntu mulume udi mukoya bualu mmuele bilume,+ 33 muntu mukaji udi mu bukoya bua tshijila tshiende tshia mashi,+ muntu mulume yonso anyi muntu mukaji yonso udi bintu anyi mashi bipatuka mu mubidi wende,+ ne muntu mulume udi ulala ne muntu mukaji mukoya.’”

16 Yehowa wakakula ne Mose panyima pa lufu lua bana babidi ba Alona bavua bafue bualu bavua basemene kudi Yehowa.+ 2 Yehowa wakambila Mose ne: “Ambila muanenu Alona ne: kena mua kubuela muaba wa tshijila+ dia muamua dia tshilamba tshia kukosolola natshi,+ kumpala kua tshibuikidiji tshidi pa Mushete dîba dionso tshianana tshianana bua kafu to;+ bualu nemmueneke mu ditutu+ pa tshibuikidiji atshi.+

3 “Mona bintu bidi Alona ne bua kulua nabi padiye ubuela muaba wa tshijila: muana mulume wa ngombe bua mulambu wa mpekatu+ ne tshimpanga tshia mukoko bua mulambu wa kuosha.+ 4 Neavuale muzabi wa tshijila wa line,+ neabuikile mubidi wende* ne kaputula* ka line,+ neadisuike mukaba wa tshilamba wa line+ ne neasuike ku mutu wende tshilamba tshia kujingila ku mutu tshia line.+ Ebi mbilamba bia tshijila.+ Neowe mâyi+ ne neabivuale.

5 “Neangate mbuji ya mpumbu ibidi itshidi miana kudi tshisumbu tshia bena Isalele+ bua mulambu wa mpekatu ne tshimpanga tshia mukoko tshimue bua mulambu wa kuosha.

6 “Pashishe Alona udi ne bua kulua ne ngombe mulume wa mulambu wa mpekatu, udiku buende yeye, ne neabuikile mpekatu yende yeye+ ne ya ba mu nzubu muende.

7 “Pashishe neangate mbuji ibidi ayi, neayimanyike kumpala kua Yehowa ku tshibuelelu tshia ntenta wa kusambakena. 8 Alona neele nshobo bua mbuji ibidi ayi, nshobo umue bua Yehowa, nshobo mukuabu bua Azazele.* 9 Alona nealue ne mbuji uvuabu basungule ku nshobo+ bua Yehowa ne neamufile bu mulambu wa mpekatu. 10 Kadi bua mbuji uvuabu basungule ku nshobo bua Azazele, nebalue nende ne muoyo, nebamuimanyike kumpala kua Yehowa bua kubuikila mpekatu pambidi pende, bua bamutume mu tshipela bua Azazele.+

11 “Alona nealue ne ngombe mulume wa mulambu wa mpekatu, udiku buende yeye, ne neabuikile mpekatu yende yeye ne ya ba mu nzubu muende; pashishe neashipe ngombe wa mulambu wa mpekatu au, udiku buende yeye.+

12 “Pashishe neangate tshintu tshia kuambuila kapia+ tshiuwule tente ne makala a kapia a pa tshioshelu+ tshidi kumpala kua Yehowa ne manza abidi a musenga wa manananshi wa mupuya muimpe menemene,+ neabuele nabi dia muamua dia tshilamba tshia kukosolola natshi.+ 13 Neele kabidi musenga wa manananshi pa kapia kumpala kua Yehowa,+ ne ditutu dia muishi wa musenga wa manananshi nedibuikile tshibuikidiji tshia Mushete+ tshidi pa mutu pa Bujadiki,+ bua kafu to.

14 “Neangate ndambu wa mashi a ngombe mulume au,+ neaanyakile ne munu wende kumpala kua tshibuikidiji ku luseke lua est, ne neanyakile ndambu wa mashi ne munu wende misangu muanda mutekete kumpala kua tshibuikidiji.+

15 “Pashishe neashipe mbuji wa mulambu wa mpekatu, udiku bua tshisamba tshijima,+ neabuele ne mashi ende dia muamua dia tshilamba tshia kukosolola natshi,+ ne neenze ne mashi au+ anu muvuaye muenze ne mashi a ngombe mulume; neaanyakile lua ku tshibuikidiji ne kumpala kua tshibuikidiji.

16 “Yeye udi ne bua kubuikila mpekatu bua muaba wa tshijila bua bienzedi bia bukoya bia bena Isalele ne bua dishipa diabu dia mikenji ne mpekatu yabu;+ ke tshienzaye bua ntenta wa kusambakena udi munkatshi muabu, munkatshi mua bienzedi biabu bia bukoya.

17 “Muntu nansha umue kena ne bua kuikala mu ntenta wa kusambakena kutuadija dîba didiye ubuela muaba wa tshijila bua kubuikila mpekatu too ne padiye upatukamu. Neabuikile mpekatu buende yeye ne bena mu nzubu muende+ ne bua tshisumbu tshijima tshia bena Isalele.+

18 “Pashishe neapatuke, neaye ku tshioshelu+ tshidi kumpala kua Yehowa, neatshibuikidile mpekatu, neangate ndambu wa mashi a ngombe mulume ne ndambu wa mashi a mbuji, ne neaele pa nsengu ya tshioshelu ku nseke yonso. 19 Neanyakilaku kabidi ndambu wa mashi ne munu wende misangu muanda mutekete, neatshilengeje ne neatshijidile ku bienzedi bia bukoya bia bena Isalele.

20 “Padiye ujikija kubuikila mpekatu+ bua muaba wa tshijila, bua ntenta wa kusambakena ne bua tshioshelu,+ nealue kabidi ne mbuji wa muoyo.+ 21 Alona neatenteke bianza biende bionso bibidi pa mutu wa mbuji wa muoyo, neatondelapu bilema bionso bia bena Isalele, dishipa diabu dionso dia mikenji ne mpekatu yabu yonso, neabiteke pa mutu wa mbuji au+ ne neamutume mu tshipela ku tshianza tshia muntu udibu basungule bua kuenza nanku.* 22 Mbuji neambule bilema biabu bionso pambidi pende,+ neaye nabi muaba udi kawuyi tshintu,+ ne neatume mbuji au mu tshipela.+

23 “Pashishe Alona neabuele mu ntenta wa kusambakena, neavule bilamba bia line bivuaye muvuale pavuaye mubuele muaba wa tshijila, ne neabishiye muntu amu. 24 Udi ne bua kuowa mâyi*+ muaba kampanda wa tshijila ne kuvuala bilamba biende;+ pashishe neapatuke ne neafile mulambu wende wa kuosha+ ne mulambu wa kuosha wa tshisamba tshijima+ ne neabuikile mpekatu buende yeye ne bua tshisamba tshijima.+ 25 Neafuimishe mafuta a mulambu wa mpekatu pa tshioshelu.

26 “Muntu uvua mutume mbuji bua Azazele+ neasukule bilamba biende, neowe mâyi, pashishe udi mua kupingana mu tshitudilu.

27 “Nebaye ne ngombe mulume wa mulambu wa mpekatu ne mbuji wa mulambu wa mpekatu miena mashi avuabu babuele nawu muaba wa tshijila bua kubuikila mpekatu pambelu pa tshitudilu, ne neboshe biseba biayi ne munyinyi wayi ne tumvi tuayi mu kapia.+ 28 Muntu udi ubiosha neasukule bilamba biende, neowe mâyi, pashishe udi mua kupingana mu tshitudilu.

29 “Bualu ebu nebuikale mukenji mufunda wa kashidi buenu nuenu: Mu ngondo wa muanda mutekete, mu dituku dia dikumi dia ngondo, nenudikengeshe,* ne kanuena ne bua kuenza mudimu nansha umue,+ nansha muena ditunga nansha muntu wa ku babende udi musombele munkatshi muenu. 30 Dituku edi nebanubuikidile mpekatu+ bua kunulengeja. Nenulengejibue ku mpekatu yenu yonso kumpala kua Yehowa.+ 31 Ndituku dia nsabatu bua nuenu kuikisha ku midimu yenu yonso, ne nenudikengeshe.*+ Eu mmukenji mufunda wa kashidi.

32 “Muakuidi udibu bela manyi+ ne bajadika* bua kuenza mudimu wa buakuidi+ pa muaba wa tatuende+ neabuikile mpekatu ne neavuale bilamba bia line,+ bilamba bia tshijila.+ 33 Neabuikile mpekatu bua muaba munsantu wa tshijila,+ bua ntenta wa kusambakena+ ne bua tshioshelu;+ ne neabuikidile bakuidi ne bantu bonso ba mu tshisumbu mpekatu.+ 34 Bualu ebu nebuikale mukenji mufunda wa kashidi buenu nuenu,+ bua kubuikidila bena Isalele mpekatu bua mpekatu yabu yonso musangu umue tshidimu tshionso.”+

Nunku wakenza anu muvua Yehowa mutumine Mose dîyi bua kuenza.

17 Yehowa wakatungunuka ne kuambila Mose ne: 2 “Akula ne Alona ne bana bende ba balume ne bena Isalele bonso, ubambile ne: ‘Ebu mbualu budi Yehowa mutume dîyi bua kuenza:

3 “‘“Bikala muntu kampanda wa mu nzubu wa Isalele mushipe ngombe mulume anyi tshimpanga tshia mukoko tshitshidi tshiana anyi mbuji mu tshitudilu anyi bikalaye mushipe nyama au pambelu pa tshitudilu 4 pamutu pa kulua nende ku tshibuelelu tshia ntenta wa kusambakena bua kumufila bu mulambu kudi Yehowa kumpala kua ntenta wa tshitendelelu wa Yehowa, nebabadile muntu au dibanza dia mashi. Mmuele mashi panshi, ne badi ne bua kumbusha* muntu au munkatshi mua tshisamba tshiabu. 5 Bidi ne bua kuenzeka nunku bua bena Isalele balue ne milambu idibu balambula mu mpata mpindieu, kudi Yehowa, ku tshibuelelu tshia ntenta wa kusambakena, kudi muakuidi. Badi ne bua kuyilambula bu milambu ya diumvuangana kudi Yehowa.+ 6 Muakuidi neamiamine mashi ku tshioshelu tshia Yehowa ku tshibuelelu tshia ntenta wa kusambakena ne neafuimishe mafuta bu dipembu dimpe* kudi Yehowa.+ 7 Nunku kabakufila kabidi milambu kudi bademon badi bu mbuji*+ badibu benda nabu masandi.+ Eu newikale mukenji mufunda wa kashidi kunudi, mu bipungu bienu bionso.”’

8 “Neubambile ne: ‘Muntu yonso wa mu nzubu wa Isalele anyi muntu yonso wa ku babende udi musombele munkatshi muenu udi ufila mulambu wa kuosha anyi mulambu mukuabu 9 ne kayi ulua nawu ku tshibuelelu tshia ntenta wa kusambakena bua kuwufila kudi Yehowa, badi ne bua kumbusha* muntu au mu tshisamba tshiabu.+

10 “‘Bikala muntu kampanda wa mu nzubu wa Isalele anyi muntu wa ku babende udi musombele munkatshi muenu mudie mashi kayi onso,+ nembenge bushuwa muntu* udi udia mashi au, ne nemmumbushe* munkatshi mua tshisamba tshiabu. 11 Bualu muoyo* wa tshintu udi mu mashi,+ ne meme ndi muafile pa tshioshelu+ bua bualu buenu bua kubuikila mpekatu yenu nuenu,* bualu mashi ke adi abuikila mpekatu+ bua muoyo* udi munda muawu. 12 Ke bualu kayi ndi muambile bena Isalele ne: “Muntu* nansha umue wa kunudi kena ne bua kudia mashi, ne muntu wa ku babende nansha umue udi musombele munkatshi muenu+ kena ne bua kudia mashi to.”+

13 “‘Bikala muena Isalele anyi muntu kampanda wa ku babende udi musombele munkatshi muenu ulemba nyama ne udi ukuata nyama wa tshisuku anyi nyunyi udibu mua kudia, udi ne bua kupongolola mashi ende panshi+ ne kuajibikila ne buloba. 14 Bualu muoyo* wa tshintu tshionso mmashi atshi, bualu muoyo* udi mu mashi. Ke bualu kayi mvua muambile bena Isalele ne: “Kanuena ne bua kudia mashi a tshintu kayi tshionso, bualu muoyo* wa tshintu tshionso mmashi atshi. Muntu yonso udi uadia neumbushibue.”*+ 15 Bikala muntu* kampanda, nansha muena ditunga nansha wa ku babende, mudie nyama musangana mufue anyi nyama mupandulula kudi nyama wa luonji,+ dîba adi udi ne bua kusukula bilamba biende, kuowa mâyi ne neikale mukoya too ne ku dilolo;+ pashishe neikale mukezuke. 16 Kadi yeye kayi mubisukule ne kayi muowe mâyi,* neambule bujitu bua tshilema tshiende.’”+

18 Yehowa wakatungunuka ne kuakula ne Mose, wamba ne: 2 “Akula ne bena Isalele, ubambile ne: ‘Meme ndi Yehowa Nzambi wenu.+ 3 Kanuena ne bua kuenza malu bu mudibu benza mu buloba bua Ejipitu munuvua basombele, ne kanuena ne bua kuenza malu adibu benza mu buloba bua Kanâna mundi nya nenu.+ Kanuena ne bua kulonda bilele biabu to. 4 Nenutumikile mapangadika anyi, ne nenulame mikenji yanyi mifunda ne nenuyilonde.+ Meme ndi Yehowa Nzambi wenu. 5 Nudi ne bua kutumikila mikenji yanyi mifunda ne mapangadika anyi; muntu yonso udi ubitumikila neikale ne muoyo ku diambuluisha diabi.+ Meme ndi Yehowa.

6 “‘Muntu nansha umue wa kunudi kena ne bua kuya kudi mulela wende wa pabuipi bua kusangila* nende to.+ Meme ndi Yehowa. 7 Kuena ne bua kusangila ne tatuebe, ne kuena ne bua kusangila ne mamuebe to. Yeye mmamuebe, ne kuena ne bua kusangila nende to.

8 “‘Kuena ne bua kusangila ne mukaji wa tatuebe to.+ Nkufuisha tatuebe bundu.*

9 “‘Kuena ne bua kusangila ne muanenu wa bakaji, nansha yeye muikale muana wa tatuebe anyi muana wa mamuebe, nansha yeye muledibue mu nzubu umue nebe anyi muledibue muaba mukuabu.+

10 “‘Kuena ne bua kusangila ne muana wa bakaji wa muanebe wa balume anyi muana wa bakaji wa muanebe wa bakaji, bualu bobu badi butaka buebe wewe muine.

11 “‘Kuena ne bua kusangila ne muana wa mukaji wa tatuebe, muana wa tatuebe, bualu yeye mmuanenu wa bakaji.

12 “‘Kuena ne bua kusangila ne tatuebe mukaji. Yeye udi mashi amue ne tatuebe.+

13 “‘Kuena ne bua kusangila ne mamuebe mukuabu, bualu yeye udi mashi amue ne mamuebe.

14 “‘Kuena ne bua kufuisha tatuebe mukuabu bundu* pa kusangila ne mukajende. Yeye mmamuebe mukuabu.+

15 “‘Kuena ne bua kusangila ne mukaji wa muanebe to.+ Yeye mmukaji wa muanebe, ne kuena ne bua kusangila nende to.

16 “‘Kuena ne bua kusangila ne mukaji wa muanenu to,+ bualu nkufuisha muanenu bundu.*

17 “‘Kuena ne bua kusangila ne mamu, kusangila kabidi ne muanende wa bakaji to.+ Kuena ne bua kuangata muana wa bakaji wa muanende wa balume ne muana wa bakaji wa muanende wa bakaji bua kusangila nabu to. Bobu mbalela bende ba pabuipi; ntshienzedi tshia bundu.*

18 “‘Kuena ne bua kuangata mukaji bua kusakidila ku muanabu wa bakaji bua ikale mukenende+ ne kusangila nende patshidi muanabu wa bakaji ne muoyo.

19 “‘Kuena ne bua kuya kudi muntu mukaji padiye mu bukoya buende bua tshijila tshia mashi bua kusangila nende to.+

20 “‘Kuena ne bua kusangila ne mukaji wa mukuebe,* udivuija mukoya.+

21 “‘Kuena ne bua kuitaba bua muanebe nansha umue afidibue* kudi Moleke.+ Kuena ne bua kunyanga dîna dia Nzambi webe mushindu au to.+ Meme ndi Yehowa.

22 “‘Kuena ne bua kulala ne muntu mulume mushindu wa muomumue ne uudi ulala ne mukaji to.+ Mbualu bubi butambe.

23 “‘Muntu mulume kena ne bua kusangila ne nyama bua kulua mukoya bua bualu abu; nansha muntu mukaji kena ne bua kudifila kudi nyama bua kusangila nende to.+ Nkunyanga tshilele tshia ku tshifukilu.

24 “‘Kanudivuiji bakoya bua bualu nansha bumue bua ku malu aa, bualu bisamba bindi ngipata kumpala kuenu bivua bidivuije bikoya bua malu onso aa.+ 25 Ke bualu kayi buloba budi ne bukoya, ne nembupeshe dinyoka bua tshilema tshiabu, ne buloba nebuluke bantu badi basombamu.+ 26 Kadi nuenu nudi ne bua kutumikila mikenji yanyi mifunda ne mapangadika anyi,+ ne kanuena ne bua kuenza bualu nansha bumue bua ku malu mabi aa to, nansha muena ditunga nansha muntu wa ku babende udi musombele munkatshi muenu.+ 27 Bualu bantu bavua basombele mu buloba ebu kumpala kuenu bavua benze malu mabi onso aa,+ ne mpindieu buloba budi ne bukoya. 28 Nunku buloba kabuakunuluka bualu nudi babunyange mushindu wikalabu ne bua kuluka bisamba bivua kumpala kuenu. 29 Muntu yeye muenze bumue bua ku malu mabi aa, bonso* badi baenza badi ne bua kubumbusha* munkatshi mua tshisamba tshiabu. 30 Nudi ne bua kulama malu andi munufundile bua kuenza, kanuyi nuenza tshilele nansha tshimue tshia ku bilele bibi bivuabu benza kumpala kuenu,+ bua kanudivuiji bakoya bua bualu buabi. Meme ndi Yehowa Nzambi wenu.’”

19 Yehowa wakakula kabidi ne Mose, wamba ne: 2 “Akula ne tshisumbu tshijima tshia bena Isalele, ubambile ne: ‘Nudi ne bua kuikala ba tshijila, bualu meme Yehowa Nzambi wenu ndi wa tshijila.+

3 “‘Muntu yonso wa kunudi udi ne bua kunemeka* mamuende ne tatuende,+ ne nudi ne bua kunemekela nsabatu yanyi.+ Meme ndi Yehowa Nzambi wenu. 4 Kanulondi nzambi idi kayiyi ne mushinga+ anyi kanudienzedi nzambi ya tshiamu tshiengulula.+ Meme ndi Yehowa Nzambi wenu.

5 “‘Mpindieu nuenu bafile mulambu wa diumvuangana kudi Yehowa,+ nudi ne bua kuwulambula mu mushindu wa nuenu kuanyishibua.+ 6 Nudi ne bua kuwudia dituku dinudi nuwulambula ne dituku didi dilonda, kadi bidi bishala too ne dituku disatu mbia kuosha mu kapia.+ 7 Kadi nuenu bawudie nansha mukese dituku disatu, ntshintu tshibole tshikalabu kabayi mua kuanyisha. 8 Muntu udi uwudia neambule bujitu bua tshilema tshiende, bualu mmunyange tshintu tshia tshijila tshia Yehowa; badi ne bua kumbusha* muntu* au mu tshisamba tshiabu.

9 “‘Panudi nupuola bintu mu buloba buenu, kanuena ne bua kupuola bintu bionso bidi ku mielelu ya madimi enu kujikija to, ne kanuena ne bua kuangulula mpumbuluila ya* bintu binudi nupuola.+ 10 Kanuena ne bua kupuola kabidi tumuma tudi tushala mu madimi enu a tumuma tua mvinyo anyi kuangula tumuma tudi tutangalake mu madimi enu a tumuma tua mvinyo. Udi ne bua kubishila mupele*+ ne muntu udi musombe buenyi. Meme ndi Yehowa Nzambi wenu.

11 “‘Kanuena ne bua kuiba,+ kanuena ne bua kushima+ ne kanuena ne bua kushimakajangana to. 12 Kanuena ne bua kuditshipa mu dîna dianyi mu bualu bua dishima,+ nunyanga dîna dia Nzambi wenu mushindu eu. Meme ndi Yehowa. 13 Kuena ne bua kudia mukuebe bintu,+ ne kuena ne bua kunyengangana tshintu.+ Kuena ne bua kulama difutu dia muena mudimu butuku bujima too ne mu dinda.+

14 “‘Kuena ne bua kuela mpudi matshi mulawu* anyi kutekela mpofu tshintu mu njila,+ ne udi ne bua kutshina Nzambi webe.+ Meme ndi Yehowa.

15 “‘Kanuena ne bua kukosa bilumbu bibi to. Kuena ne bua kutua ku tshia mupele anyi kuengeleka mubanji.+ Ukose tshilumbu tshia mukuebe bimpe.

16 “‘Kuena ne bua kuya wenda ushiminyinangana malu munkatshi mua tshisamba tshienu.+ Kuena ne bua kukeba bua kujimija muoyo* wa mukuebe.*+ Meme ndi Yehowa.

17 “‘Kuena ne bua kukina muanenu mu muoyo webe.+ Udi ne bua kubela mukuebe mu mishindu yonso+ bua kulu kuambula nende mpekatu.

18 “‘Kuena ne bua kudisombuela+ anyi kulamina bana ba mu tshisamba tshienu munda; udi ne bua kunanga mukuebe muudi mudinange.+ Meme ndi Yehowa.

19 “‘Nudi ne bua kutumikila mikenji yanyi mifunda: Kanuena ne bua kuenza bua bimuna bienu bia mishindu ibidi bikuatangane. Kanuena ne bua kukuna ntete ya mishindu ibidi mu madimi enu,+ ne kanuena ne bua kuvuala tshilamba tshienza ne manda a mishindu ibidi masambakane.+

20 “‘Mpindieu bikala mulume mulale ne mukaji ne musangile nende, ne mukaji au mmuena mudimu udibu balamine muntu mukuabu kadi kabayi banji kumupikula anyi kumupesha budikadidi, nekuikale dinyoka. Kadi kabakubashipa to, bualu kabavua banji kumulekela to. 21 Muntu au nealue ne mulambu wa dipila kudi Yehowa ku tshibuelelu tshia ntenta wa kusambakena, mmumue ne: tshimpanga tshia mukoko tshia mulambu wa dipila.+ 22 Muakuidi neamubuikidile mpekatu ne tshimpanga tshia mukoko tshia mulambu wa dipila kumpala kua Yehowa bua mpekatu uvuaye muenze, ne nebamufuile luse bua mpekatu uvuaye muenze.

23 “‘Panudi nubuela mu buloba, nuenu bakune mutshi kampanda wa kudia, nudi ne bua kumona bimuma biawu bu bikoya ne bikandikibue.* Mbikandikibue* buenu nuenu bua bidimu bisatu. Kanuena ne bua kubidia to. 24 Kadi mu tshidimu tshinayi bimuma biawu bionso nebikale bia tshijila bua kusanka kumpala kua Yehowa.+ 25 Pashishe mu tshidimu tshitanu nudi mua kudia bimuma biawu bua nuenu kusakidila bimuma biawu ku bintu binudi nupuola. Meme ndi Yehowa Nzambi wenu.

26 “‘Kanuena ne bua kudia tshintu nansha tshimue tshikale ne mashi.+

“‘Kanuena ne bua kukeba bimanyinu bua kumanya malu atshilualua anyi kuenza majimbu.+

27 “‘Kanuena ne bua kukungula* nsuki ya kumpenga kua mitu* yenu anyi kunyangakaja mielelu ya miedi yenu.+

28 “‘Kanuena ne bua kuditapa pambidi bua muntu mufue*+ ne kanuena ne bua kuditapa nsalu pambidi. Meme ndi Yehowa.

29 “‘Kufuishishi muanebe bundu pa kumuvuija ndumba,+ bua buloba kabuendi bundumba ne kabuwudi ne bikadilu bibi.+

30 “‘Nudi ne bua kunemekela nsabatu yanyi,+ ne nudi ne bua kunemeka* muaba wanyi munsantu. Meme ndi Yehowa.

31 “‘Kuyi kudi bena mbuku,+ ne kuebeji malu kudi bantu batu bamba malu atshilualua,+ bua kulu mukoya bua malu au. Meme ndi Yehowa Nzambi wenu.

32 “‘Kumpala kua nsuki mitoke udi ne bua kuimana kuulu,+ udi ne bua kunemeka muntu mununu,+ ne udi ne bua kutshina Nzambi webe.+ Meme ndi Yehowa.

33 “‘Bikala muntu wa ku babende musombe nebe mu buloba buenu, kanuena ne bua kumukengesha to.+ 34 Muntu wa ku babende udi musombe nenu neikale kunudi bu muena ditunga munkatshi muenu;+ udi ne bua kumunanga muudi mudinange, bualu nuvua basombe buenyi mu buloba bua Ejipitu.+ Meme ndi Yehowa Nzambi wenu.

35 “‘Kanuena ne bua kupima bule bua bintu, bujitu buabi anyi bungi buabi ne bipiminu bibi.+ 36 Nudi ne bua kupima bintu ne bipiminu bia bujitu bijalame, ne bipimu bijalame, ne tshipiminu tshia bintu biume* tshijalame ne tshipiminu tshia bintu bia mâyi mâyi* tshijalame.+ Meme ndi Yehowa Nzambi wenu uvua munupatule mu buloba bua Ejipitu. 37 Nunku nudi ne bua kulama mikenji yanyi mifunda yonso ne mapangadika anyi onso, nudi ne bua kubilonda.+ Meme ndi Yehowa.’”

20 Yehowa wakatungunuka ne kuakula ne Mose, wamba ne: 2 “Udi ne bua kuambila bena Isalele ne: ‘Muena Isalele yonso anyi muntu yonso wa ku babende udi musombele mu Isalele udi ufila muanende kudi Moleke nebamushipe kakuyi mpata.+ Bantu ba mu buloba nebamuase mabue too ne padiye ufua. 3 Meme nembenge muntu au, nemmumbushe* munkatshi mua tshisamba tshiabu, bualu mmufile muanende kudi Moleke, ne mmunyange muaba wanyi wa tshijila+ ne mmunyange dîna dianyi dia tshijila. 4 Bikala bantu ba mu buloba babuikile mêsu abu ku bukole pa bualu budi muntu au wenza padiye ufila muanende kudi Moleke ne babenge bua kumushipa,+ 5 dîba adi nembenge bushuwa muntu au ne bena mu dîku diende.+ Nengumbushe* muntu au mu tshisamba tshiabu pamue ne bantu bonso badi badisangisha kudiye bua kuenda masandi ne Moleke.

6 “‘Bua muntu* udi uya kudi bena mbuku+ ne bantu batu bamba malu atshilualua+ bua kuenda nabu bundumba bua mu nyuma, nembenge bushuwa muntu* au ne nemmumbushe* mu tshisamba tshiabu.+

7 “‘Nudi ne bua kudijidila ne kulua ba tshijila,+ bualu meme ndi Yehowa Nzambi wenu. 8 Nudi ne bua kulama mikenji yanyi mifunda ne kuyitumikila.+ Meme ndi Yehowa udi unujidila.+

9 “‘Bikalaku kudi muntu udi wela tatuende anyi mamuende mulawu,* badi ne bua kumushipa kakuyi mpata.+ Bu mudiye muele tatuende anyi mamuende mulawu, mashi ende adi pambidi pende yeye.

10 “‘Mpindieu bua muntu udi wenda masandi ne mukaji wa muntu mukuabu: Muntu udi wenda masandi ne mukaji wa muinende badi ne bua kumushipa kakuyi mpata, kushipa mulume ne mukaji badi bende masandi.+ 11 Muntu udi ulala ne mukaji wa tatuende mmufuishe tatuende bundu.*+ Badi ne bua kubashipa bonso babidi kakuyi mpata. Mashi abu adi pambidi pabu. 12 Bikala muntu mulale ne mukaji wa muanende, badi ne bua kubashipa bonso babidi kakuyi mpata. Mbanyange tshilele tshia ku tshifukilu. Mashi abu adi pambidi pabu.+

13 “‘Bikala mulume mulale ne mulume mushindu utu mulume ulala ne mukaji, bonso babidi mbenze tshintu tshibi tshitambe.+ Badi ne bua kubashipa bonso babidi kakuyi mpata. Mashi abu adi pambidi pabu.

14 “‘Bikala muntu muangate mukaji, muangate ne mamuende wa mukaji au, ntshienzedi tshia bundu.*+ Badi ne bua kumuosha yeye ne bobu kabidi mu kapia,+ bua tshikadilu tshia bundu katshikadi munkatshi muenu.

15 “‘Bikala mulume musangile ne nyama, badi ne bua kumushipa kakuyi mpata, nudi kabidi ne bua kushipa nyama au.+ 16 Bikala mukaji muye kudi nyama ne musangile nende,+ nudi ne bua kushipa mukaji au ne nyama au. Nudi ne bua kubashipa kakuyi mpata. Mashi abu adi pambidi pabu.

17 “‘Bikala muntu mulume musangile ne muanabu wa bakaji, muana wa tatuende anyi muana wa mamuende, ne yeye mumone butaka buende ne yeye pende mumone butaka buende pende, mbualu bua bundu.+ Badi ne bua kubumbusha* ku mêsu kua bana ba mu tshisamba tshiabu. Mmufuishe muanabu wa bakaji bundu.* Neambule bujitu bua tshilema tshiende.

18 “‘Bikala mulume mulale ne mukaji padiye ku tshijila tshia mashi ne musangile nende, bonso babidi mbele dipatuka dia mashi ende patoke.+ Badi ne bua kubumbusha* bonso babidi munkatshi mua tshisamba tshiabu.

19 “‘Kuena ne bua kusangila ne mamuebe mukuabu anyi ne tatuebe mukaji, bualu bualu abu nebufuishishe mulela webe bundu.+ Nebapete difutu dia tshilema tshiabu. 20 Muntu udi ulala ne mukaji wa tatuende mukuabu mmufuishe tatuende mukuabu bundu.*+ Nebapete difutu dia mpekatu wabu. Nebafue kabayi balele. 21 Bikala muntu muangate mukaji wa muanabu, mbualu bubi butambe.+ Mmufuishe muanabu bundu.* Nebashale kabayi balele.

22 “‘Nudi ne bua kulama mikenji yanyi mifunda yonso ne mapangadika anyi onso+ ne kubitumikila,+ bua buloba bundi nya nenu bua nuenu kusombela kabunuluki to.+ 23 Kanuena ne bua kulonda bilele bia bisamba bindi ngipata kumpala kuenu to;+ bualu mbienze malu onso aa ne ndi mubikine.+ 24 Ke bualu kayi mvua munuambile ne: “Nenuangate buloba buabu, ne nennupeshabu bua buikale buloba buenu, buloba budi ne mabele ne buitshi bia bungi.+ Meme ndi Yehowa Nzambi wenu udi munutapulule ne bisamba bikuabu.”+ 25 Nudi ne bua kuenza bua kuikale dishilangana pankatshi pa nyama udi mukumbane ne udi kayi mukumbane, ne pankatshi pa nyunyi udi kayi mukumbane ne udi mukumbane;+ kanuena ne bua kudivuija* tshintu tshia muengu bua bualu bua nyama anyi nyunyi anyi tshintu tshionso tshidi tshidikoka panshi tshindi muteke ku luseke bua nuenu kutshiangata bu tshidi katshiyi tshikumbane.+ 26 Nudi ne bua kuikala ba tshijila kundi, bualu meme, Yehowa, ndi wa tshijila,+ ne ndi nnutapulula ne bisamba bikuabu bua nulue banyi meme.+

27 “‘Mulume anyi mukaji yonso udi ubukila bantu malu anyi udi wamba malu atshilualua* udi ne bua kushipibua kakuyi mpata.+ Bantu badi ne bua kubasa mabue too ne padibu bafua. Mashi abu adi pambidi pabu.’”

21 Yehowa wakatungunuka ne kuambila Mose ne: “Akula ne bakuidi, bana ba Alona, ubambile ne: ‘Muntu nansha umue kena ne bua kudinyanga bua muntu mufue* mu tshisamba tshiabu.+ 2 Kadi udi mua kuenza nunku bua mulela wa pabuipi menemene, bua mamuende, tatuende, muanende wa balume, muanende wa bakaji, muanabu wa balume, 3 ne udi mua kudinyanga bua muanabu wa bakaji udi pabuipi nende bikalaye utshidi kamama ne kayi muanji kusedibua. 4 Kena mua kudinyanga ne kudibipisha bua mukaji musela kudi mulume kampanda wa mu tshisamba tshiabu. 5 Kabena ne bua kuenza mabala mu mitu yabu,+ anyi kukungula mielelu ya miedi yabu, anyi kuditapa pambidi.+ 6 Badi ne bua kuikala ba tshijila kudi Nzambi wabu,+ ne kabena ne bua kunyanga dîna dia Nzambi wabu,+ bualu badi balua ne milambu ya Yehowa miosha pa kapia, biakudia* bia Nzambi wabu; badi ne bua kuikala ba tshijila.+ 7 Kabena ne bua kusela mukaji wa ndumba,+ mukaji udibu banyange, anyi mukaji udibu babenge kudi bayende,+ bualu muakuidi mmuntu wa tshijila kudi Nzambi wende. 8 Udi ne bua kumujidila+ bualu yeye udi ufila biakudia bia Nzambi webe. Yeye udi ne bua kuikala wa tshijila kunudi, bualu meme Yehowa, udi unujidila, ndi wa tshijila.+

9 “‘Mpindieu bikala muana wa bakaji wa muakuidi mudinyange pa kuenda bundumba, udi ufuisha tatuende bundu. Badi ne bua kumuosha mu kapia.+

10 “‘Muakuidi munene wa bana babu, udibu bele manyi pa mutu+ ne udibu bajadike mu mudimu* bua avuale bilamba bia buakuidi,+ kena ne bua kulekelela nsuki yende anyi kupanda bilamba biende to.+ 11 Kena ne bua kusemena pabuipi ne muntu mufue;*+ kena ne bua kudinyanga nansha bua tatuende anyi bua mamuende. 12 Kena ne bua kumbuka muaba munsantu ne kena ne bua kunyanga muaba munsantu wa Nzambi wende,+ bualu tshimanyinu tshia dibanjijibua, manyi a kuelangana a Nzambi wende,+ tshidi pa mutu wende. Meme ndi Yehowa.

13 “‘Yeye udi ne bua kusela mukaji utshidi kamama.+ 14 Kena ne bua kusela mukaji mukamba, mukaji udi dibaka difue, mukaji udibu banyange, anyi mukaji wa ndumba; kadi udi ne bua kuangata mukaji wa mu tshisamba tshiabu utshidi kamama. 15 Kena ne bua kunyanga bana* bende munkatshi mua tshisamba tshiabu,+ bualu meme ndi Yehowa udi umujidila.’”

16 Yehowa wakatungunuka ne kuakula ne Mose, wamba ne: 17 “Ambila Alona ne: ‘Muntu nansha umue wa mu bana* bebe, mu bipungu biabu bionso, udi ne bulema kena ne bua kulua bua kufila biakudia bia Nzambi wende to. 18 Bikalaku kudi muntu udi ne bulema, kena mua kulua to: mpofu anyi mulema anyi muntu udi ne bulema ku mêsu* anyi muntu udi ne diboko anyi mukolo mule ne muîpi, 19 muntu udi ne dikasa ditshibuke anyi tshianza tshitshibuke, 20 muntu udi ne katontomena anyi muntu mushawuke* anyi muntu udi ne dîsu dia bulema anyi nkaka anyi tubaba anyi mipesa minyanguke.+ 21 Muntu mulume nansha umue wa mu bana* ba muakuidi Alona udi ne bulema kena mua kulua bua kufila milambu ya Yehowa miosha pa kapia nansha. Bu mudiye ne bulema, kena mua kusemena bua kufila biakudia bia Nzambi wende to. 22 Yeye udi mua kudia biakudia bia Nzambi wende bia mu bintu bitambe tshijila+ ne bia mu bintu bia tshijila.+ 23 Kadi kena mua kulua pabuipi ne tshilamba tshia kukosolola natshi,+ ne kena mua kusemena ku tshioshelu nansha,+ bualu udi ne bulema; kena ne bua kunyanga muaba wanyi munsantu to,+ bualu meme ndi Yehowa udi ubajidila.’”+

24 Nunku Mose wakakula ne Alona ne bana bende ba balume ne bena Isalele bonso.

22 Yehowa wakakula kabidi ne Mose, wamba ne: 2 “Ambila Alona ne bana bende ba balume bua badimuke bua tshidibu benza* ne bintu bia tshijila bia bena Isalele ne bua kabanyangi dîna dianyi dia tshijila+ mu bualu bua bintu bidibu banjidila.+ Meme ndi Yehowa. 3 Ubambile ne: ‘Mu bipungu bienu bionso muntu wa mu bana benu udi usemena pabuipi ne bintu bia tshijila bidi bena Isalele bajidila Yehowa padiye mukoya, nebumbushe* muntu* au kumpala kuanyi.+ Meme ndi Yehowa. 4 Muntu nansha umue wa mu bana ba Alona udi ne nsudi+ anyi udi bintu bipatuka mu mubidi wende+ kena mua kudia bintu bia tshijila too ne padiye ulua mukezuke,+ nansha muntu udi ulenga muntu udi mulue mukoya bua tshitalu tshia muntu,*+ anyi muntu udi muele bilume,+ 5 anyi muntu udi ulenga tshifukibua tshidi tshidikoka panshi tshidi katshiyi tshikumbane+ anyi udi ulenga muntu mukoya bua bualu kayi bonso udi mua kumuvuija mukoya.+ 6 Muntu* udi ulenga bantu anyi bintu ebi neikale mukoya too ne ku dilolo, ne kena ne bua kudia tshintu nansha tshimue tshia ku bintu bia tshijila, kadi udi ne bua kuowa mâyi.+ 7 Padi dîba dibuela, neikale mukezuke, pashishe udi mua kudia bintu bia tshijila bualu mbiakudia biende.+ 8 Kena kabidi ne bua kudia nyama musangana mufue anyi nyama yonso mupandulula kudi nyama ya luonji ne kulua mukoya bua bualu abu.+ Meme ndi Yehowa.

9 “‘Badi ne bua kulama malu andi mubafundile bua kuenza, bua kabadikebedi mpekatu bua bualu abu ne kabafu bua mpekatu au bualu bavua banyanga bintu bia tshijila. Meme ndi Yehowa udi ubajidila.

10 “‘Muntu nansha umue udibu kabayi banyishile* kena mua kudia tshintu tshia tshijila.+ Muenyi wa ku babende udi kua muakuidi anyi muntu udibu bangate ku mudimu kena mua kudia tshintu tshia tshijila. 11 Kadi bikala muakuidi musumbe muntu* ku makuta ende, muntu au udi mua kutshidia. Bapika badi baledibue mu nzubu muende badi mua kudia pabu biakudia biende.+ 12 Bikala muana wa bakaji wa muakuidi musedibue kudi muntu udi kayi muakuidi,* kena mua kudia bintu bia tshijila bidibu bafila to. 13 Kadi bikala muana wa bakaji wa muakuidi mufuishe mulume anyi dibaka diende difue ne kayi ne bana ne udi upingana mu nzubu mua tatuende anu bu ku buana buende, yeye udi mua kudia biakudia bia tatuende;+ kadi muntu udibu kabayi banyishile* kena mua kubidia to.

14 “‘Mpindieu bikala muntu mutupakane, mudie tshintu tshia tshijila, udi ne bua kusakidila tshia bitanu tshia mushinga watshi ne neafile mulambu wa tshijila au kudi muakuidi.+ 15 Nunku kabena ne bua kunyanga bintu bia tshijila bidi bena Isalele bafila kudi Yehowa+ 16 ne kubakebela dinyoka bua dipila didi dibakuate padibu badie bintu biabu bia tshijila to; bualu meme ndi Yehowa udi ubajidila.’”

17 Yehowa wakatungunuka ne kuakula ne Mose, wamba ne: 18 “Akula ne Alona ne bana bende ba balume ne bena Isalele bonso, ubambile ne: ‘Padi muena Isalele anyi muntu udi musombe buenyi mu Isalele ulua ne mulambu wa kuosha+ kudi Yehowa bua kukumbaja mitshipu yende anyi bua kufila mulambu wa budisuile,+ 19 nealue ne nyama wa mpanga muimpe+ wa mu tshisumbu tshia ngombe, tshia mikoko itshidi miana anyi tshia mbuji, bua kuanyishibua. 20 Kanuena ne bua kulua ne tshintu tshidi ne bulema,+ bualu katshiena mua kunuambuluisha bua nuanyishibue to.

21 “‘Bikala muntu mulue ne mulambu wa diumvuangana+ kudi Yehowa bua kukumbaja mutshipu anyi bu mulambu wa budisuile, nyama au udi ne bua kuikala muimpe muangatshila mu ngombe anyi mu mikoko anyi mu mbuji, bua kuanyishibua. Kena ne bua kuikala ne kalema nansha kakese. 22 Nyama wa mulambu kena ne bua kuikala mufue mêsu, mutshibuke, mutapike, muikale ne nsundu, ne tshikupi anyi ne tubaba; kanuena ne bua kulua ne nyama ya nunku kudi Yehowa anyi kufila nyama ya nunku pa tshioshelu bua Yehowa. 23 Udi mua kufila ngombe mulume anyi mukoko udi ne mukolo mule anyi muîpi kupita mikuabu bu mulambu wa budisuile, kadi kabakuanyisha nyama au bu mulambu wa kukumbaja nawu mutshipu to. 24 Kanuena ne bua kulua kudi Yehowa ne nyama udi ne mipesa minyanguke anyi miboza anyi mipakula anyi mikosa, ne kanuena ne bua kufila nyama ya nunku mu buloba buenu to. 25 Kanuena kabidi ne bua kulua ne nyama nansha umue wa ku nyama eyi mufume ku tshianza tshia muntu wa ku babende bu tshiakudia* tshia Nzambi wenu, bualu mmibi ne idi ne bulema. Kabakunuitabilayi ne dianyisha to.’”

26 Yehowa wakakula kabidi ne Mose wamba ne: 27 “Padibu balela muana mulume wa ngombe anyi tshimpanga tshia mukoko anyi mbuji, udi ne bua kushala ne mamuende matuku muanda mutekete,+ kadi kumbukila ku dituku dia muanda mukulu kubanda nebamuanyishe bu mulambu, mulambu muosha pa kapia bua Yehowa. 28 Bua ngombe mulume anyi mukoko, kanuena ne bua kumushipa ne muanende dituku dimue to.+

29 “Nuenu balambule mulambu wa kuela nawu Yehowa tuasakidila,+ nuwulambule bua nuenu kuanyishibua. 30 Nudi ne bua kuwudia anu dituku adi. Kanuena ne bua kuwushiya nansha mukese too ne mu dinda.+ Meme ndi Yehowa.

31 “Nudi ne bua kulama mikenji yanyi ne kuyitumikila.+ Meme ndi Yehowa. 32 Kanuena ne bua kunyanga dîna dianyi dia tshijila,+ ne ndi ne bua kujidibua munkatshi mua bena Isalele.+ Meme ndi Yehowa udi unujidila,+ 33 udi unupatula mu buloba bua Ejipitu bua kuleja mundi Nzambi wenu.+ Meme ndi Yehowa.”

23 Yehowa wakatungunuka ne kuakula ne Mose, wamba ne: 2 “Akula ne bena Isalele, ubambile ne: ‘Bibilu+ bia Yehowa binudi ne bua kumanyisha+ bidi masangisha a tshijila. Bibilu bianyi mbiobi ebi:

3 “‘Udi mua kuenza mudimu matuku asambombo, kadi dituku dia muanda mutekete ndituku dia nsabatu wa dikisha ku midimu yonso,+ ndituku dia masangisha a tshijila. Kuena mua kuenza mudimu nansha wa mushindu kayi to. Dituku adi nedikale dia nsabatu bua Yehowa miaba yonso inudi nusombela.+

4 “‘Ebi mbibilu bia Yehowa, masangisha a tshijila anudi ne bua kumanyisha padi bikondo biawu bikumbana: 5 Mu ngondo wa kumpala, dituku dia 14 dia ngondo au,+ pakadi dîba dibuele, kumpala kua butuku kuila,* nekuikale Pasaka+ bua Yehowa.

6 “‘Mu dituku dia 15 dia ngondo eu nekuikale Tshibilu tshia Mampa kaayi mela Luevene bua Yehowa.+ Nenudie mampa kaayi mela luevene matuku muanda mutekete.+ 7 Dituku dia kumpala nenuenze masangisha a tshijila.+ Kanuena ne bua kuenza mudimu mukole nansha umue to. 8 Kadi mu matuku muanda mutekete nudi ne bua kulua ne mulambu muosha pa kapia bua Yehowa. Dituku dia muanda mutekete nekuikale masangisha a tshijila. Kanuena ne bua kuenza mudimu mukole nansha umue to.’”

9 Yehowa wakatungunuka ne kuakula ne Mose, wamba ne: 10 “Akula ne bena Isalele, ubambile ne: ‘Panuabuela ndekelu wa bionso mu buloba bundi nya nenu, ne panuapuola bintu bia muomu, nudi ne bua kulua ne tshisumbu tshia bintu bia kumpala+ binudi nupuola kudi muakuidi.+ 11 Yeye neakupakaje tshisumbu atshi kumpala ne panyima, kumpala kua Yehowa bua nuanyishibue. Muakuidi udi ne bua kutshikupakaja dituku didi dilonda dituku dia Nsabatu. 12 Dituku dinudi nukupakajija tshisumbu atshi, nudi ne bua kufila tshimpanga tshia mukoko tshimpe tshitshidi tshiana, tshitshidi mu tshidimu tshiatshi tshia kumpala, bu mulambu wa kuosha kudi Yehowa. 13 Mulambu wawu wa ntete newikale wa bia dikumi bibidi bia efa* wa bukula bunefuke busambakaja ne mafuta, bu mulambu muosha pa kapia bua Yehowa, dipembu dimpe.* Mulambu wawu wa bia kunua newikale wa tshia binayi tshia hine* wa mvinyo. 14 Kanuena ne bua kudia nansha diampa, nansha ntete mikanga, anyi ntete mipiamipia too ne ku dituku edi, too ne panualua ne mulambu wa Nzambi wenu. Eu mmukenji mufunda wa kashidi bua bipungu bienu bionso miaba yonso inudi nusombela.

15 “‘Nudi ne bua kubala nsabatu muanda mutekete kumbukila ku dituku didi dilonda dituku dia Nsabatu, kumbukila ku dituku dinudi nulua ne tshisumbu tshia mulambu wa kukupakaja.+ Idi ne bua kuikala mbingu mijima. 16 Nenubale matuku 50+ too ne dituku didi dilonda Nsabatu wa muanda mutekete, pashishe nenulue ne mulambu mukuabu wa ntete kudi Yehowa.+ 17 Nudi ne bua kufuma miaba inudi basombele ne mampa abidi bu mulambu wa kukupakaja. Nudi ne bua kuenza mampa aa ne bia dikumi bibidi bia efa* wa bukula bunefuke. Mampa aa ikale muosha mela luevene,+ bu bintu bidi bikole bia kumpala bua Yehowa.+ 18 Nudi ne bua kulua ne mampa aa pamue ne bana ba mikoko muanda mutekete ba mpanga bimpe, muana wa mukoko yonso muikale ne tshidimu tshimue, ne muana mulume wa ngombe umue ne bimpanga bibidi bia mikoko.+ Nebikale bu mulambu wa kuosha bua Yehowa pamue ne mulambu wayi wa ntete ne milambu ya bia kunua bu mulambu muosha pa kapia, wa dipembu dimpe* kudi Yehowa. 19 Nudi ne bua kulambula muana wa mbuji umue bu mulambu wa mpekatu+ ne bana ba mikoko ba mpanga babidi, yonso muikale ne tshidimu tshimue, bu mulambu wa diumvuangana.+ 20 Muakuidi neabikupakaje kumpala ne panyima pamue ne mampa menza ne bintu bidi bikole bia kumpala, bu mulambu wa kukupakaja kumpala kua Yehowa, pamue ne bana ba mikoko babidi ba mpanga. Nebikale bu tshintu tshia tshijila kudi Yehowa bua muakuidi.+ 21 Mu dituku edi nenumanyishe+ bua masangisha enu a tshijila. Kanuena mua kuenza mudimu mukole nansha umue to. Eu mmukenji mufunda wa kashidi mu miaba yonso inudi nusombela bua bipungu bienu bionso.

22 “‘Panudi nupuola bintu bia mu buloba buenu, kuena ne bua kupuola bintu bia ku mielelu ya budimi buebe kujikija, ne kuena ne bua kuangulula bidi bishala mu bintu biudi upuola.+ Udi ne bua kubishiya bua mupele*+ ne bua muntu udi musombe buenyi.+ Meme ndi Yehowa Nzambi wenu.’”

23 Yehowa wakatungunuka ne kuakula ne Mose, wamba ne: 24 “Ambila bena Isalele ne: ‘Mu ngondo wa muanda mutekete, dituku dia kumpala dia ngondo au nedikale dituku dia dikisha ku midimu yonso, dituku dia tshivulukilu tshiamanyishabu ne muadi wa mpungi,+ dituku dia masangisha a tshijila. 25 Kanuena mua kuenza mudimu mukole nansha umue, kadi nenulue ne mulambu muosha pa kapia bua Yehowa.’”

26 Yehowa wakakula kabidi ne Mose, wamba ne: 27 “Kadi dituku dia dikumi dia ngondo wa muanda mutekete eu, nedikale Dituku dia Dibuikila dia mpekatu.+ Nudi ne bua kuenza masangisha a tshijila, ne nudi ne bua kudikengesha*+ ne kulua ne mulambu muosha pa kapia bua Yehowa. 28 Kanuena ne bua kuenza mudimu nansha wa mushindu kayi mu dituku edi mene, bualu ndituku dia dibuikila dia mpekatu bua kunubuikidila mpekatu+ kumpala kua Yehowa Nzambi wenu. 29 Muntu* yonso wabenga kudikengesha* dituku edi nebamumbushe* mu tshisamba tshiabu.+ 30 Nenshipe muntu* yonso udi wenza mudimu nansha wa mushindu kayi dituku adi munkatshi mua tshisamba tshiabu. 31 Kanuena ne bua kuenza mudimu nansha wa mushindu kayi. Eu mmukenji mufunda wa kashidi bua bipungu bienu bionso miaba yonso inudi nusombela. 32 Ndituku dia nsabatu bua nuenu kuikisha ku midimu yenu yonso, ne nenudikengeshe*+ dituku dia tshitema dia ngondo ku dilolo. Nudi ne bua kuenza nsabatu wenu kumbukila ku dilolo too ne ku dilolo dikuabu.”

33 Yehowa wakatungunuka ne kuakula ne Mose, wamba ne: 34 “Ambila bena Isalele ne: ‘Dituku dia 15 dia ngondo wa muanda mutekete eu nekuikale Tshibilu tshia Bitanda* bua matuku muanda mutekete bua Yehowa.+ 35 Nekuikale masangisha a tshijila dituku dia kumpala, ne kanuena ne bua kuenza mudimu mukole nansha umue to. 36 Mu matuku muanda mutekete nudi ne bua kulua ne mulambu muosha pa kapia bua Yehowa. Dituku dia muanda mukulu nudi ne bua kuenza masangisha a tshijila+ ne nudi ne bua kulua ne mulambu muosha pa kapia bua Yehowa. Ndituku dia masangisha a pa buawu. Kanuena mua kuenza mudimu mukole nansha umue.

37 “‘Ebi mbibilu+ bia Yehowa binudi ne bua kumanyisha bu masangisha a tshijila,+ bua kulua ne mulambu muosha pa kapia bua Yehowa: mulambu wa kuosha+ ne mulambu wa ntete+ wa mulambu ne milambu ya bia kunua+ bilondeshile mudibu balongolole dituku dionso. 38 Milambu eyi nya kusakidila ku bintu bidibu bafila matuku a nsabatu ya Yehowa,+ ne ku mapa enu,+ ku milambu yenu inudi nufila bua kukumbaja mitshipu,+ ne ku milambu yenu ya budisuile,+ inudi ne bua kupesha Yehowa. 39 Kadi mu dituku dia 15 dia ngondo wa muanda mutekete, panuikala bapuole bintu bia mu maloba enu, nudi ne bua kuenza tshibilu tshia Yehowa bua matuku muanda mutekete.+ Dituku dia kumpala ndituku dia dikisha ku midimu yonso ne dituku dia muanda mukulu ndituku dia dikisha ku midimu yonso.+ 40 Dituku dia kumpala, nenuangate bintu bia ku mitshi minene: malala a mabue,+ matamba a mitshi idi ne mabeji a bungi ne mitshi ya pepiliye ya mu tshibandabanda,* ne nenusanke+ kumpala kua Yehowa Nzambi wenu matuku muanda mutekete.+ 41 Nenutshienze bu tshibilu tshia Yehowa matuku muanda mutekete mu tshidimu.+ Nudi ne bua kutshienza mu ngondo wa muanda mutekete bu mukenji mufunda wa kashidi mu bipungu bienu bionso. 42 Nudi ne bua kusombela mu bitanda bua matuku muanda mutekete.+ Bena buloba bonso mu Isalele badi ne bua kusombela mu bitanda, 43 bua bana benu ba mu bipungu bialonda+ bamanye ne: mvua musombeshe bena Isalele mu bitanda pamvua mbapatula mu buloba bua Ejipitu.+ Meme ndi Yehowa Nzambi wenu.’”

44 Nunku Mose wakakula ne bena Isalele bua bibilu bia Yehowa.

24 Yehowa wakatungunuka ne kuakula ne Mose, wamba ne: 2 “Tumina bena Isalele dîyi bua bakutuadile mafuta matambe buimpe a olive idibu batue, bua kulama miendu mitemesha dîba dionso.+ 3 Dia munemu dia tshilamba tshia kukosolola natshi tshia Bujadiki tshidi mu ntenta wa kusambakena, Alona nealongolole bua miendu yikale anu yitema kumbukila ku dilolo too ne mu dinda kumpala kua Yehowa dîba dionso. Mmukenji mufunda wa kashidi bua bipungu bienu bionso. 4 Nealonge miendu pa tshitekelu tshia miendu+ tshia or muimpe menemene kumpala kua Yehowa dîba dionso.

5 “Newangate bukula bunefuke bua kuenza mampa 12 menza bu bikata. Newenze diampa dionso ne bia dikumi bibidi bia efa.* 6 Neuateke pa mêsa a or muimpe menemene kumpala kua Yehowa,+ mambakaja mu milongo ibidi, mulongo wonso muikale ne mampa asambombo.+ 7 Neuteke budimbu bua mupuya muimpe bua buimpe menemene pa mulongo wonso wa mampa, ne nebuikale bu tshimanyinu tshia mulambu* bua mampa,+ mulambu muosha pa kapia bua Yehowa. 8 Dituku dionso dia Nsabatu neikale ne tshibidilu tshia kualonga kumpala kua Yehowa.+ Ntshipungidi tshia kashidi ne bena Isalele. 9 Mampa au nealue a Alona ne bana bende ba balume,+ ne nebaadiile muaba kampanda wa tshijila,+ bualu mbintu bitambe tshijila buende yeye biangatshila mu milambu ya Yehowa miosha pa kapia, bu mukenji wa kashidi.”

10 Mpindieu munkatshi mua bena Isalele muvua muana wa mamu kampanda muena Isalele ne tatu muena Ejipitu,+ ne mvita yakajuka mu tshitudilu pankatshi pende ne muena Isalele mukuabu. 11 Muana wa mamu muena Isalele au wakatuadija kuakula bibi bua Dîna* ne kudiela mulawu.*+ Nunku bakalua nende kudi Mose.+ Mpindieu mamuende uvua Shelomita muana wa bakaji wa Dibili wa mu tshisa tshia Dana. 12 Bakamulama too ne pakamanyabu dipangadika dia Yehowa.+

13 Pashishe Yehowa wakambila Mose ne: 14 “Patula muntu uvua muele mulawu au pambelu pa tshitudilu; bantu bonso bavua bamumvue badi ne bua kutenteka bianza biabu pa mutu wende, ne pashishe tshisumbu tshijima tshidi ne bua kumuasa mabue.+ 15 Pashishe newambile bena Isalele ne: ‘Muntu yeye muele Nzambi wende mulawu neapete difutu bua mpekatu wende. 16 Nunku kakuyi mpata nebashipe muntu udi upenda dîna dia Yehowa.+ Tshisumbu tshijima netshimuase mabue kakuyi mpata. Nebashipe muntu udi musombe buenyi anu mudibu bashipa muena ditunga bualu mmupende Dîna.

17 “‘Bikala muntu mushipe muntu mukuabu,* nebamushipe kakuyi mpata.+ 18 Muntu yonso udi ututa tshimuna ne utshishipa,* udi ne bua kutshifuta, ufuta muoyo ku muoyo.* 19 Muntu yeye mutape mukuende, dîba adi nebamuenzele tshidiye muenzele mukuende.+ 20 Ditshibulangana ku ditshibulangana, dîsu ku dîsu, dînu ku dînu, bualu bubi bua muomumue budiye muenzelangane nebamuenzelabu pende.+ 21 Muntu udi ututa nyama ne umushipa neamufute,+ kadi muntu udi ututa muntu nende ne umushipa nebamushipe pende.+

22 “‘Nekuikale dipangadika dia muomumue buenu nuenu bonso, nansha bua muntu udi musombe buenyi nansha bua muena ditunga,+ bualu meme ndi Yehowa Nzambi wenu.’”

23 Pashishe Mose wakakula ne bena Isalele, bobu kupatula muntu uvua muele mulawu au pambelu pa tshitudilu, bobu kumuasa mabue.+ Nunku bena Isalele bakenza anu muvua Yehowa mutumine Mose dîyi bua kuenza.

25 Yehowa wakakula kabidi ne Mose ku mukuna wa Sinai, wamba ne: 2 “Akula ne bena Isalele, ubambile ne: ‘Ndekelu wa bionso, panuabuela mu buloba bundi nnupesha,+ dîba adi buloba nebulame nsabatu bua Yehowa.+ 3 Mu bidimu bisambombo neukune ntete mu budimi buebe, ne mu bidimu bisambombo neusonze mionji ya tumuma tua mvinyo tua mu budimi buebe, ne neupuole bintu bidi buloba buebe bumenesha.+ 4 Kadi mu tshidimu tshia muanda mutekete nekuikale nsabatu wa dikisha ku midimu yonso bua buloba, nsabatu bua Yehowa. Kuena ne bua kukuna ntete mu budimi buebe anyi kusonza mionji ya tumuma tua mvinyo tua mu budimi buebe. 5 Kuena ne bua kupuola bintu bidi biditolokela ku ntete ivua mishale panyima pa dipuola dia bintu, ne kuena ne bua kupuola tumuma tua ku mionji yebe ya tumuma tua mvinyo ivua kayiyi misonza. Nekuikale tshidimu tshijima tshia dikisha ku midimu yonso bua buloba. 6 Kadi nudi mua kudia biakudia bidi bitoloka mu buloba padibu mu nsabatu; nudi mua kubidia, wewe ne bapika bebe balume ne bakaji, ne muntu uudi muangate ku mudimu, ne benyi badi basombe nebe, 7 pamue ne bimuna ne nyama ya tshisuku bidi mu buloba buebe. Bintu bionso bidi buloba bumenesha nebikale bia kudia.

8 “‘Neubale bidimu muanda mutekete bia nsabatu, bidimu muanda mutekete misangu muanda mutekete, ne matuku a bidimu muanda mutekete bia nsabatu neikale bidimu 49. 9 Pashishe newele mpungi mukole ne lusengu mu ngondo wa muanda mutekete dituku dia dikumi dia ngondo au, mu Dituku dia Dibuikila dia mpekatu;+ nenuenze bua muadi wa lusengu umvuike mu buloba buenu buonso. 10 Nudi ne bua kujidila tshidimu tshia 50 ne kumanyisha budikadidi mu buloba kudi bantu bonso badi basombamu.+ Netshilue Tshidimu tshia budikadidi kunudi, ne yonso wa kunudi neapingane mu buloba buende ne yonso wa kunudi neapingane mu dîku diabu.+ 11 Tshidimu tshia 50 netshilue Tshidimu tshia budikadidi kunudi. Kanuakukuna ntete anyi kupuola bintu bivua biditolokele ku ntete ivua mishale mu budimi anyi kupuola tumuma tua ku mionji ya tumuma tua mvinyo ivua kayiyi misonza.+ 12 Bualu etshi ke Tshidimu tshia budikadidi. Tshidi ne bua kuikala tshia tshijila kunudi. Nudi mua kudia anu bintu bidi buloba budimeneshile.+

13 “‘Mu Tshidimu tshia budikadidi etshi yonso wa kunudi neapingane mu buloba buende.+ 14 Nuenu basumbishe mukuenu tshintu, anyi batshisumbe kudiye, kanuena mua kudiangana bintu to.+ 15 Paudi usumba buloba kudi muinebe, ubale bungi bua bidimu bikadi bipite kutuadijila ku Tshidimu tshia budikadidi, ne yeye neakusumbishe bilondeshile bungi bua bidimu bidi bishale bia kupuola bia pa madimi.+ 16 Bikalaku kushale bidimu bia bungi, yeye neabandishe mushinga wa kubusumba nawu, ne koku kushale bidimu bikese neapuekeshe mushinga wa kubusumba nawu, bualu udi ukusumbisha bungi bua misangu ya bia pa madimi biapatula budimi. 17 Muntu nansha umue wa munkatshi muenu kena ne bua kudia mukuende bintu to;+ wewe udi ne bua kutshina Nzambi webe,+ bualu meme ndi Yehowa Nzambi wenu.+ 18 Panudi nutumikila mikenji yanyi mifunda ne nulama mapangadika anyi, nenusombe mu buloba talalaa.+ 19 Buloba nebupatule bintu biabu,+ nenudie, nenukute, ne nenusombamu talalaa.+

20 “‘Kadi nuenu badikonke ne: “Netudie tshinyi mu tshidimu tshia muanda mutekete bituikala katuyi bakune ntete anyi bapuole bia pa madimi?”+ 21 Nennutumine mabenesha anyi mu tshidimu tshisambombo, ne buloba nebupatule bia pa madimi bikumbane bua bidimu bisatu.+ 22 Pashishe nenukune ntete mu tshidimu tshia muanda mukulu ne nenudie bia pa madimi bia kale too ne mu tshidimu tshia tshitema. Nenudie bia pa madimi bia kale too ne panuapuola bia tshidimu atshi.

23 “‘Kanuena ne bua kusumbisha buloba bua kashidi to,+ bualu buloba mbuanyi.+ Bualu ku mêsu kuanyi nudi bantu badi basombe buenyi ne bena tshimuangi.+ 24 Nudi ne bua kupesha bantu bukenji bua kukuula buloba mu buloba buenu buonso.

25 “‘Bikala muanenu mulue mupele ne udi ne bua kusumbisha tshitupa tshia buloba buende, mukuudi udi mulela wende wa pabuipi udi ne bua kulua kukuula tshidi muanabu musumbishe.+ 26 Bikala muntu kayi ne mukuudi, kadi mulue mubanji ne mmupete mushindu wa kutshikuula, 27 neenze makumi bua kumanya mushinga watshi bilondeshile bungi bua bidimu bidi bipite katshia watshisumbisha, ne neapingajile muntu uvuaye mutshisumbishe makuta adi ashala. Dîba adi udi mua kupingana mu buloba buende.+

28 “‘Kadi bikalaye kayi mupete mushindu wa kutshikuula kudiye, tshivuaye mupane netshishale kudi musumbi too ne mu Tshidimu tshia budikadidi;+ nunku netshipingane kudiye mu Tshidimu tshia budikadidi ne neapingane mu buloba buende.+

29 “‘Mpindieu bikala muntu ne bua kusumbisha nzubu mu tshimenga tshidi tshinyunguluka kudi bimanu, bukenji buende bua kukuula nebuikalaku kabidi too ne ku ndekelu kua tshidimu tshijima kumbukila dîba didiye mumusumbishe; bukenji buende bua kukuula+ nebuikalaku tshidimu tshijima. 30 Kadi bikalabu kabayi bakuule nzubu ku ndekelu kua tshidimu tshijima, nzubu udi mu tshimenga tshidi tshinyunguluka kudi bimanu au neashale wa muntu udi mumusumbe bua kashidi, mu ndelanganyi yende yonso. Kabakumupingaja mu Tshidimu tshia budikadidi to. 31 Kadi badi ne bua kuangata nzubu ya miaba ya kusombela idi kayiyi minyunguluka kudi bimanu bu tshitupa tshia mpata ya misoko ayi. Bukenji bua kukuula nebutungunuke ne kuikalaku bua nzubu au, ne nebamupingaje mu tshidimu tshia budikadidi.

32 “‘Bua nzubu ya bena Lewi ne nzubu idi mu bimenga biabu,+ bena Lewi nebikale ne bukenji bua kashidi bua kuyikuula. 33 Padibu kabayi bakuule nzubu wa muena Lewi, nebapingaje kabidi nzubu uvuabu basumbishe mu tshimenga tshiabu au mu Tshidimu tshia budikadidi,+ bualu nzubu ya mu bimenga bia bena Lewi mbintu biabu munkatshi mua bena Isalele.+ 34 Kabena mua kusumbisha kabidi mpata ya kudishila nyama+ idi minyunguluke bimenga biabu, bualu mmpata yabu bua kashidi.

35 “‘Bikala muanenu udi nebe pabuipi mulue mupele ne kayi ne mushindu wa kudikuatshisha, udi ne bua kumuambuluisha+ anu muudi mua kuambuluisha muntu udi musombe buenyi ne muena tshimuangi,+ bua amone mua kushala ne muoyo pamue nenu. 36 Kuangatshi tshia kasombela kudiye anyi kupetedi makasa* kudiye.+ Udi ne bua kutshina Nzambi webe,+ ne muanenu neashale ne muoyo munkatshi muenu. 37 Kuena ne bua kumusombesha makuta ne tshia kasombela+ anyi kumupesha biakudia bua kupeta makasa. 38 Meme ndi Yehowa Nzambi wenu uvua munupatule mu buloba bua Ejipitu+ bua kunupesha buloba bua Kanâna, bua kuleja mundi meme Nzambi wenu.+

39 “‘Bikala muanenu udi musombe pabuipi nebe mulue mupele ne udi ne bua kudisumbisha kuudi,+ kuena ne bua kumuenzeja bua kuenzaye midimu mikole ya bapika to.+ 40 Udi ne bua kumuenzela malu bu muntu udibu bangate ku mudimu,+ bu muena tshimuangi. Neakuenzele mudimu too ne mu Tshidimu tshia budikadidi. 41 Pashishe neumbuke kuudi, yeye ne bana* bende, neapingane mu dîku diabu. Neapingane mu buloba bua bankambua bende.+ 42 Bualu mbapika banyi bamvua mupatule mu buloba bua Ejipitu.+ Kabena mua kudisumbisha mutubu basumbisha mupika to. 43 Kuena ne bua kumuenzela malu ne tshikisu,+ ne udi ne bua kutshina Nzambi webe.+ 44 Bapika bebe balume ne bapika bebe bakaji badi ne bua kufumina mu bisamba bidi binunyunguluke, kudibi ke kunudi mua kusumba mupika mulume anyi mupika mukaji. 45 Nudi kabidi mua kusumba bapika munkatshi mua bena tshimuangi badi basombe munkatshi muenu,+ munkatshi muabu ne munkatshi mua bana babu badi baledibue mu buloba buenu, ne nebalue bapika benu. 46 Nudi mua kubashila bana benu badi balonda panyima penu bu bumpianyi bua babapiane bu bapika babu bua kashidi. Nudi mua kubangata bu bena mudimu, kadi kanuena mua kuenzela bana benu bena Isalele malu ne tshikisu to.+

47 “‘Kadi bikala muntu udi musombe buenyi anyi muena tshimuangi mulue mubanji munkatshi muenu, ne muanenu udi musombe pabuipi nende mulue yeye mupele ne udi ne bua kudisumbisha kudi muntu udi musombe buenyi anyi kudi muena tshimuangi udi musombe munkatshi muenu, anyi kudi muntu wa mu dîku dia muntu udi musombe buenyi, 48 neatungunuke ne kuikala ne bukenji bua kukuudibua panyima pa yeye mumane kudisumbisha. Umue wa ku bana babu udi mua kumusumbulula,+ 49 anyi tatuende mukuabu anyi muana wa tatuende mukuabu udi mua kumusumbulula, anyi mulela wende wa pabuipi,* muntu wa mu dîku diabu, udi mua kumusumbulula.

“‘Peshi bikalaye yeye muine mulue mubanji, udi kabidi mua kudisumbulula nkayende.+ 50 Neenze makumi ne muntu uvua mumusumbe bua kumanya bungi bua matuku kutuadijila ku tshidimu tshivuaye mudisumbishe kudiye too ne ku Tshidimu tshia budikadidi,+ ne bungi bua makuta avuaye mudisumbishe nawu nebukumbanangane ne bungi bua bidimu abi.+ Mu tshikondo atshi, nebabale matuku ende a mudimu mudibu babala matuku a muntu udibu bangate ku mudimu.+ 51 Bikalaku kushale bidimu bia bungi, neafute mushinga wa dikuudibua diende bilondeshile bungi bua bidimu bidi bishale. 52 Kadi bikalaku kushale anu bidimu bikese too ne ku tshidimu tshia budikadidi, dîba adi neadienzele makumi ne neafute mushinga wa dikuudibua diende bilondeshile bungi bua bidimu bidi bishale. 53 Neatungunuke ne kumuenzela mudimu ku tshidimu ku tshidimu bu muntu udibu bangate ku mudimu; ne wewe neutabalele bua kamuenzedi malu ne tshikisu to.+ 54 Kadi bikalaye kayi mua kudisumbulula mushindu eu, dîba adi neapete budikadidi mu Tshidimu tshia budikadidi,+ yeye ne bana* bende.

55 “‘Bualu bena Isalele mbapika banyi meme. Mbapika banyi bamvua mupatule mu buloba bua Ejipitu.+ Meme ndi Yehowa Nzambi wenu.

26 “‘Kanuena ne bua kudienzela nzambi idi kayiyi ne mushinga,+ kanuena ne bua kudimanyikila lupingu lusonga+ anyi dikunji dia tshijila, ne kanuena ne bua kuteka lupingu lua dibue+ mu buloba buenu bua kuluinamina;+ bualu meme ndi Yehowa Nzambi wenu. 2 Nudi ne bua kunemekela nsabatu yanyi ne kunemeka* muaba wanyi munsantu. Meme ndi Yehowa.

3 “‘Binuatungunuka ne kuendela mu mikenji yanyi mifunda, kutumikila mêyi anyi ne kuenza,+ 4 meme nennulokeshile mvula mu tshikondo tshiayi,+ buloba nebukuamishe bintu biabu+ ne mitshi ya mu mpata neyikuame bimuma. 5 Tshikondo tshienu tshia kushipula ntete netshiye too ne ku dipuola dia tumuma tua mvinyo, ne dipuola dia tumuma tua mvinyo nediye too ne ku tshikondo tshia dikuna; nenudie biakudia bienu, nenukute, ne nenusombe mu buloba buenu talalaa.+ 6 Nenteke ditalala mu buloba,+ nenulale kakuyi muntu unukuatshisha buôwa;+ nengumbushe nyama mibi ya luonji mu buloba ne muele wa mvita kawakupitshila mu buloba buenu to. 7 Bushuwa nenuipate bena lukuna benu, ne nebakuluke kumpala kuenu ku muele wa mvita. 8 Bantu batanu ba kunudi nebipate bantu lukama, ne bantu lukama ba kunudi nebipate bantu binunu 10, ne bena lukuna benu nebakuluke kumpala kuenu ku muele wa mvita.+

9 “‘Meme nennuanyishe,* nengenze bua nulelangane bikole, nennuvudije,+ ne nendame tshipungidi tshianyi nenu.+ 10 Panutshidi nudia bintu bia kale binuvua bapuole tshidimu tshishale, nebikengele bua numbushe bia kale bua kushila bipiabipia muaba. 11 Nenteke ntenta wanyi wa tshitendelelu munkatshi muenu,+ ne meme* tshiakunubenga to. 12 Nengende munkatshi muenu, nengikale Nzambi wenu,+ ne nuenu nenuikale bantu banyi.+ 13 Meme ndi Yehowa Nzambi wenu uvua munupatule mu buloba bua Ejipitu bua kanuikadi kabidi bapika babu, ne mvua mutshibule mitshi ya tshikokedi tshienu ne munuendeshe ne mitu miolola.*

14 “‘Kadi nuenu kanuyi banteleje anyi batumikile mêyi onso aa,+ 15 ne nuenu babenge mikenji yanyi mifunda,+ ne nuenu* bakine mapangadika anyi, nubenga kulama mêyi anyi, ne nunyanga tshipungidi tshianyi,+ 16 meme panyi nennuenzele malu adi alonda aa: nennunyoke ne dikenga, ne disama dia tshiadi ne mubidi mubande kapia bikole, binyanga mêsu enu ne bitekesha mioyo* yenu. Nuenu nenukune ntete yenu mu tshianana, bualu bena lukuna benu nebayidie.+ 17 Meme nennubenge ne bena lukuna benu nebanutshimune;+ bantu badi banukine nebanudiate,+ ne nenunyeme kakuyi muntu unuipata.+

18 “‘Nansha malu aa owu kaayi manuambuluishe bua kunteleja, nennunyoke misangu muanda mutekete kupita bua mpekatu yenu. 19 Nentshibule lutambishi luenu lua tshitunu ne nemvuije diulu dienu bu tshiamu tshifiike+ ne buloba buenu bu tshiamu tshia mitaku. 20 Nuenu nenunyange bukole buenu tshianana, bualu buloba buenu kabuakukuamisha bintu,+ ne mitshi ya mu buloba kayakukuama bimuma to.

21 “‘Kadi binuikala nutungunuka anu ne kuntombokela, nubenga kunteleja, dîba adi nengikale ne bua kununyoka misangu muanda mutekete kupita bilondeshile mpekatu yenu. 22 Nentume nyama ya luonji ya mu mpata munkatshi muenu,+ neyikuate bana benu,+ neyishipe bimuna bienu, neyikepeshe bungi buenu, ne njila yenu neyishale munda mutupu.+

23 “‘Binuabenga kuitaba dinyoka dianyi nansha malu aa menzeke,+ nutungunuka anu ne kuntombokela, 24 dîba adi meme panyi nennuluishe; ne meme nennunyoke misangu muanda mutekete bua mpekatu yenu. 25 Nennutumine muele wa disombuela bualu nudi banyange tshipungidi tshianyi.+ Nuenu badikunguije mu bimenga bienu, nentume masama munkatshi muenu,+ ne nennufile mu bianza bia muena lukuna.+ 26 Panganyanga bilaminu bienu* bia mampa,*+ bantu bakaji dikumi nebuoshile mampa enu mu mfulu umue tshianana ne pashishe nebanuabanyine mampa enu bilondeshile bungi bupima,+ ne nenudie kadi kanuakukuta to.+

27 “‘Binuikala kanuyi banteleje nansha malu aa menzeke, nutungunuka anu ne kuntombokela, 28 nennuluishe bikole,+ ne meme nennunyoke misangu muanda mutekete bua mpekatu yenu. 29 Nunku nenudie munyinyi wa pambidi pa bana benu ba balume, ne nenudie munyinyi wa pambidi pa bana benu ba bakaji.+ 30 Nembutule miaba yenu mitumbuke ya tshijila,+ nengupule bioshelu bienu bia musenga wa manananshi, nengambakaje bitalu bienu pa mutu pa mpingu yenu ya muendi* idi kayiyi ne muoyo;+ ne meme* nennubenge ne muoyo mujima.+ 31 Nemfile bimenga bienu ku muele wa mvita,+ nenshiye miaba yenu ya tshijila munda mutupu, ne tshiakumvua dipembu didi disankisha* dia milambu yenu. 32 Meme nemvuije buloba munda mutupu,+ ne bena lukuna benu badi basombamu nebabutangile benda bakema.+ 33 Kadi nuenu, nennutangalaje mu bisamba,+ nentule muele wa mvita panyima penu;+ buloba buenu nebushale munda mutupu,+ ne bimenga bienu nebibutudibue.

34 “‘Tshikondo atshi buloba nebufute nsabatu yabu matuku onso adibu bushala munda mutupu panudi nuenu mu buloba bua bena lukuna benu. Tshikondo atshi buloba nebuikishe,* bualu budi ne bua kufuta nsabatu yabu.+ 35 Nebuikishe matuku onso adibu bushala munda mutupu, bualu kabuvua buikishe mu nsabatu yenu panuvua basombamu.

36 “‘Bua bantu bapanduka,+ nenguwuje mioyo yabu ne buôwa mu maloba a bena lukuna babu; mutoyi wa dibeji didi lupepele lunyungisha newubanyemeshe, nebanyeme anu bu muntu udi unyema muele wa mvita ne nebakuluke kakuyi muntu ubipata.+ 37 Nebatutakanangane bu bantu badi banyema muele wa mvita, paku kakuyi muntu udi ubipata. Kanuakukokesha bua kukandamena bena lukuna benu to.+ 38 Nenufuile munkatshi mua bisamba bikuabu,+ ne buloba bua bena lukuna benu nebunumine. 39 Bantu ba kunudi badi bashala nebashale bua kubolelabu mu maloba a bena lukuna benu+ bua tshilema tshienu. Eyowa, nebabole bua bilema bia batatuabu.+ 40 Pashishe nebatonde tshilema tshiabu bobu bine+ ne tshilema tshia batatuabu ne dipanga lulamatu diabu ne nebitabe muvuabu bapange lulamatu pavuabu bantombokela.+ 41 Nunku meme panyi ngakabaluisha,+ kuya nabu mu buloba bua bena lukuna babu.+

“‘Dîba adi pamuapa muoyo wabu udi kawuyi mutengula* newupuekeshibue,+ ne dîba adi nebafute tshilema tshiabu. 42 Nunku nemvuluke tshipungidi tshianyi ne Yakoba+ ne tshipungidi tshianyi ne Izaka,+ nemvuluke tshipungidi tshianyi ne Abalahama+ ne nemvuluke buloba buabu. 43 Pavuabu balekele buloba, buvua bufuta nsabatu yabu,+ buvua bushale munda mutupu bobu kabayimu, ne bavua bafuta tshilema tshiabu bualu bobu bavua babenge mapangadika anyi ne bavua* bakine mikenji yanyi mifunda.+ 44 Kadi nansha bionso bikale nanku, padibu mu buloba bua bena lukuna babu, tshiakubabengelamu kashidi+ anyi kubalekela, mfika too ne ku dibabutula, bualu kuenza nunku nekunyange tshipungidi tshianyi+ nabu, bualu meme ndi Yehowa Nzambi wabu. 45 Bua bualu buabu, nemvuluke tshipungidi tshimvua mudie ne bankambua babu+ bamvua mupatule mu buloba bua Ejipitu mu mêsu a bisamba bikuabu,+ bua kuleja mundi Nzambi wabu. Meme ndi Yehowa.’”

46 Aa mmêyi ne mikandu, mapangadika ne mikenji bivua Yehowa muteke pankatshi pende ne bena Isalele ku mukuna wa Sinai ku butuangaji bua Mose.+

27 Yehowa wakatungunuka ne kuakula ne Mose, wamba ne: 2 “Akula ne bena Isalele, ubambile ne: ‘Bikala muntu muenze mutshipu wa pa buawu+ bua kufila mushinga udibu bakose bua muntu* kudi Yehowa, 3 mushinga udibu bakose bua muntu mulume udi ne bidimu kumbukila ku 20 too ne ku 60 newikale wa nshekele* 50 ya arjan bilondeshile nshekele wa muaba wa tshijila.* 4 Kadi bikalaye muntu mukaji, mushinga wende newikale wa nshekele 30. 5 Bikala muntu ne bidimu kumbukila ku bitanu too ne ku 20, mushinga udibu bakose bua muntu mulume newikale wa nshekele 20, ne wa muntu mukaji newikale wa nshekele dikumi. 6 Bikala muana ne ngondo kumbukila ku umue too ne ku bidimu bitanu, mushinga udibu bakose bua muana wa balume newikale wa nshekele itanu ya arjan ne bua muana wa bakaji wa nshekele isatu ya arjan.

7 “‘Bikala muntu ne bidimu 60 kubanda, mushinga udibu bakose bua muntu mulume newikale wa nshekele 15, ne bua muntu mukaji nshekele dikumi. 8 Kadi bikalaye mupele kayi ne mushindu wa kufuta mushinga udibu bakose,+ muntu au neimane kumpala kua muakuidi, ne muakuidi neatue mushinga wende. Muakuidi neatue mushinga bilondeshile tshidi muntu udi wenza mutshipu au mua kukumbaja.+

9 “‘Mutshipu wowu wa kufila nyama udi mukumbane bua kulambula Yehowa, tshionso tshidibu mua kupesha Yehowa netshikale tshintu tshia tshijila. 10 Kena mua kushintulula nyama au anyi kushintakaja udi muimpe ku udi mubi anyi udi mubi ku udi muimpe. Kadi yeye mushintakaje nyama umue ne nyama mukuabu, nyama wa kumpala ne udibu bamushintakaje nende, yonso neyikale ya tshijila. 11 Bikala nyama au muikale nyama udi kayi mukumbane+ udibu kabayi mua kufila kudi Yehowa bu mulambu, dîba adi neimanyike nyama au kumpala kua muakuidi. 12 Nunku muakuidi neatue mushinga wende bilondeshile tshidi nyama, nansha yeye muimpe anyi mubi. Mushinga udi muakuidi utua newushale anu nanku. 13 Kadi bikalaye musue kumukuula, dîba adi neafile tshia bitanu tshia mushinga wende bua kusakidila ku mushinga uvuabu batue au.+

14 “‘Mpindieu bikala muntu mujidile nzubu wende bu tshintu tshia tshijila kudi Yehowa, dîba adi muakuidi neatue mushinga wende, nansha yeye muimpe anyi mubi. Mushinga udi muakuidi utua ke wikala mushinga wende.+ 15 Kadi bikala muntu udi ujidila nzubu wende musue kumukuula, dîba adi neafile tshia bitanu tshia makuta a mushinga uvuabu bamutuile bua kusakidila ku mushinga au, ne nzubu nealue wende.

16 “‘Bikala muntu mujidile Yehowa tshitupa tshia budimi buende, nebatue mushinga bilondeshile bungi bua ntete idibu ne bua kukunamu: tshipiminu tshia homer* wa orje netshikale nshekele 50 ya arjan. 17 Bikalaye mujidile budimi buende kutuadijila ku Tshidimu tshia budikadidi,+ mushinga wabu udibu batue newushale anu nanku. 18 Bikalaye mujidile budimi buende Tshidimu tshia budikadidi tshimane kupita, muakuidi neamuenzele makumi bua mushinga wabu bilondeshile bidimu bidi bishale too ne ku Tshidimu tshia budikadidi tshialonda, ne nebumbushile mu mushinga uvuabu batue.+ 19 Kadi bikala muntu uvua mujidile budimi abu ne bua kubukuula, dîba adi neafile tshia bitanu tshia makuta a mushinga uvuabu batue bua kusakidila ku mushinga au, ne nebushale buende. 20 Mpindieu yeye kayi mukuule budimi abu ne bobu babusumbishe muntu mukuabu, kabena mua kubukuula kabidi to. 21 Padibu bapingaja budimi abu mu Tshidimu tshia budikadidi nebulue tshintu tshia tshijila kudi Yehowa, bu budimi bufila kudiye. Nebulue budimi bua bakuidi.+

22 “‘Bikala muntu mujidile Yehowa budimi buvuaye musumbe, budi kabuyi tshitupa tshia buloba budiye mupiane,+ 23 muakuidi neamuenzele makumi bua kumanya mushinga wabu too ne ku Tshidimu tshia budikadidi, ne dituku adi neafile mushinga wabu uvuabu batue.+ Ntshintu tshia tshijila kudi Yehowa. 24 Mu Tshidimu tshia budikadidi, budimi nebupingane kudi muntu uvuaye mubusumbe, kudi muena buloba buende.+

25 “‘Badi ne bua kutua mushinga wonso bilondeshile nshekele wa muaba wa tshijila. Nshekele umue udi ne gera* 20.

26 “‘Kadi muntu nansha umue kena mua kujidila muanabute wa nyama to, bualu mmuledibue bu muanabute bua Yehowa.+ Nansha ngombe mulume anyi mukoko, ukadi mumane kuikala wa Yehowa.+ 27 Bikala nyama muikale munkatshi mua nyama idi kayiyi mikumbane ne yeye udi umupikula bilondeshile mushinga udibu batue, udi ne bua kufila tshia bitanu tshia mushinga au bua kusakidila ku mushinga wende.+ Kadi yeye kayi mumukuule, nebamusumbishe bilondeshile mushinga udibu batue.

28 “‘Kadi tshintu tshionso tshidi muntu ufila kudi Yehowa bua kashidi* tshia mu bintu biende kabena ne bua kutshisumbisha anyi kutshikuula to, nansha muntu anyi nyama anyi budimi. Tshintu tshionso tshifila nunku ntshintu tshitambe tshijila kudi Yehowa.+ 29 Kabena kabidi mua kupikula muntu yonso udibu bakosele tshibawu,* udibu bateke ku luseke bua kushipa.+ Badi ne bua kumushipa kakuyi mpata.+

30 “‘Tshia dikumi tshionso+ tshia buloba, nansha tshiotshi tshia bia pa madimi anyi tshia bimuma bia ku mitshi, ntshia Yehowa. Ntshintu tshia tshijila bua Yehowa. 31 Bikala muntu musue kukuula tshia dikumi tshiende kayi tshionso, udi ne bua kufila tshia bitanu tshiatshi bua kusakidilaku. 32 Kadi bua tshia dikumi tshionso tshia mu tshisumbu tshia ngombe ne mu tshisumbu tshia mikoko anyi mbuji, ku nyama yonso udi upita muinshi mua dikombo dia mulami wa nyama, nyama* wa dikumi neikale tshintu tshia tshijila kudi Yehowa. 33 Kena ne bua kutangila bikala nyama au muimpe anyi mubi, anyi kena ne bua kumushintakaja to. Kadi bikalaye mutete bua kumushintakaja, yonso ibidi, nyama wa kumpala ne udibu bamushintakaje nende, neyikale ya tshijila.+ Kabena mua kuyikuula to.’”

34 Aa ke mêyi avua Yehowa mupeshe Mose ku mukuna wa Sinai+ bua bena Isalele.