MUKANDA MUIBIDI WA KULONDOLOLA

1 Solomo muana wa Davidi uvua anu wenda upeta bukole bua bungi mu bukalenge buende, ne Yehowa Nzambi wende uvua nende ne wakamuvuija munene bikole menemene.+

2 Solomo wakabikidisha Isalele mujima, bamfumu ba bantu tshinunu tshinunu ne ba bantu lukama lukama, balumbuluishi, ne bamfumu bonso ba Isalele mujima, bamfumu ba nzubu ya batatu. 3 Pashishe Solomo ne tshisumbu tshionso atshi bakaya muaba mutumbuke ku Gibeona,+ bualu ke kuvua ntenta wa kusambakena wa Nzambi mulelela, ntenta uvua Mose muena mudimu wa Yehowa muenze mu tshipela. 4 Kadi Davidi uvua mumbushe Mushete wa Nzambi mulelela ku Kîyata-yalima,+ mubande nawu muaba uvua Davidi mulongolole bua kuwuteka; yeye uvua muwashile ntenta ku Yelushalema.+ 5 Kadi tshioshelu tshia tshiamu tshia mitaku+ tshivua Besalele+ muana wa Uli muana wa Hû muenze, bavua batshiteke kumpala kua ntenta wa tshitendelelu wa Yehowa; Solomo ne tshisumbu tshijima bavua basambila kumpala kuatshi.* 6 Nunku Solomo wakalambula milambu kumpala kua Yehowa kuntu aku, ne wakalambula milambu ya kuosha tshinunu pa tshioshelu tshia tshiamu tshia mitaku+ tshia ku ntenta wa kusambakena.

7 Nzambi wakamuenekela Solomo butuku abu, kumuambilaye ne: “Lomba tshiudi musue bua nkupeshe.”+ 8 Ke Solomo kuambila Nzambi ne: “Udi muleje tatuanyi Davidi+ dinanga dia lulamatu dia bungi, ne udi munteke meme mukalenge pa muaba wende.+ 9 Mpindieu, Yehowa Nzambi wanyi, bualu buuvua mulaye tatuanyi Davidi bukumbanaku,+ bualu udi mumvuije mukalenge ku mutu kua tshisamba tshidi ne bantu bungi bu nsenga ya pa buloba.+ 10 Nunku, mpesha meji ne dimanya+ bua kulombola tshisamba etshi,* bualu nnganyi udi mua kukumbana bua kulumbuluisha tshisamba tshiebe tshinene etshi?”+

11 Nunku Nzambi wakambila Solomo ne: “Bu mudi bualu ebu buikale dijinga dia mu muoyo webe ne kuyi mulombe bubanji, biuma, ne lumu anyi mulombe lufu lua* bantu badi bakukine, peshi mulombe matuku a muoyo a bungi,* kadi mulombe meji ne dimanya bua kulumbuluisha tshisamba tshianyi tshindi mukuteke mukalenge ku mutu kuatshi,+ 12 nenkupeshe meji ne dimanya; kadi nenkupeshe kabidi bubanji ne biuma ne lumu bivua mukalenge nansha umue kayi mupete kumpala kuebe ne bikala mukalenge nansha umue kayi mua kupeta panyima pebe.”+

13 Nunku Solomo wakumbuka muaba mutumbuke ku Gibeona,+ kumpala kua ntenta wa kusambakena, kuyaye ku Yelushalema; ne wakakokesha ku mutu kua Isalele. 14 Solomo wakatungunuka ne kukumbaja matempu ne tubalu;* uvua ne matempu 1 400 ne tubalu*+ binunu 12, ne wakabiteka mu bimenga bia matempu+ ne pabuipi ne mukalenge mu Yelushalema.+ 15 Mukalenge wakenza bua tshiamu tshia arjan ne or bikale bia bungi mu Yelushalema anu bu mabue,+ ne bua mitshi ya sedre yikale ya bungi anu bu mitshi ya tshikuyi mu Shefela.+ 16 Bavua basumbila tubalu tua Solomo mu Ejipitu,+ ne tshisumbu tshia bangenda mushinga ba mukalenge tshivua tshisumba tubalu mu bisumbu* ku mushinga umue.+ 17 Ditempu dionso divuabu basumbile mu Ejipitu divua ne mushinga wa bitupa 600 bia arjan, ne kabalu kavua ne mushinga wa bitupa 150 bia arjan; bobu pabu bavua baya nabi babisumbisha bakalenge bonso ba bena Hiti ne bakalenge ba mu Sulia.

2 Nunku Solomo wakatuma dîyi bua kuibaka nzubu bua dîna dia Yehowa+ ne nzubu* bua bukalenge buende yeye.+ 2 Solomo wakangata bantu binunu 70 bua bikale bena mudimu betu ba tshianana aba,* bantu binunu 80 bua bikale bapanda mabue ku mikuna,+ ne bantu 3 600 bua bikale batangidi ku mutu kuabu.+ 3 Pashishe Solomo wakatumina Hilama+ mukalenge wa Tulo mukenji ne: “Ngenzela bualu buuvua muenzele tatuanyi Davidi pauvua mumutumine mitshi ya sedre bua kuibaka nzubu* wa kusombela.+ 4 Mpindieu ndi ngibaka nzubu bua dîna dia Yehowa Nzambi wanyi, bua kumujidilaye, bua kuosha musenga wa manananshi+ kumpala kuende ne kabidi bua milongo ya mampa* a pa tshibidilu+ ne milambu ya kuosha dinda ne dilolo,+ matuku a Nsabatu,+ matuku adi ngondo ubala+ ne mu bibilu bia ku tshidimu+ bia Yehowa Nzambi wetu. Ebu mbualu budibu bafundile Isalele bua kuenza bua kashidi. 5 Nzubu undi ngibaka neikale munene, bualu Nzambi wetu mmunene kupita nzambi mikuabu yonso. 6 Nnganyi udi mukumbane bua kumuibakila nzubu? Bualu diulu ne diulu dia mu diulu kabiena mua kumukumbana to,+ nunku meme ndi nganyi bua kumuibakila nzubu? Tshionso tshindi mua kuenza tshidi anu kuibaka nzubu bua kufuimisha muishi wa milambu kumpala kuende. 7 Mpindieu, ntumina nsenda udi mupiluke mu dienza mudimu ne or, arjan, tshiamu tshia mitaku,+ tshiamu tshifiike, miosa mikunzubile ya mikoko, buanda bukunze, ne buanda bua dikala dia ble udi mumanye mua kuondola bimfuanyi pa bintu. Neenze mudimu mu Yuda ne mu Yelushalema ne bansenda bapiluke bavua tatuanyi Davidi musungule.+ 8 Untumine kabidi mitshi ya sedre, ya jenevriye,+ ne ya algumime+ ya ku Lebanona, bualu ndi mumanye bimpe ne: bena mudimu bebe mbapiluke mu dikosa mitshi ya mu Lebanona.+ Bena mudimu banyi nebenze mudimu pamue ne bena mudimu bebe+ 9 bua kundongoluela mabaya a bungi menemene, bualu nzubu undi ne bua kuibaka neikale munene wa dikema. 10 Mpindieu mona! Meme nemfile biakudia bua bena mudimu bebe,+ bakoshi ba mitshi badi bakosa mitshi: bipiminu binunu 20 bia kore* bia ntete ya blé, bipiminu binunu 20 bia kore bia orje, bipiminu binunu 20 bia bata* bia mvinyo, ne bipiminu binunu 20 bia bata bia mafuta.”

11 Ke Hilama mukalenge wa Tulo kutuminaye Solomo mukanda wamba ne: “Bu mudi Yehowa munange bantu bende, mmukuteke wewe mukalenge wabu.” 12 Pashishe Hilama wakamba ne: “Yehowa Nzambi wa Isalele atumbishibue, yeye uvua muenze diulu ne buloba, bualu mmupeshe mukalenge Davidi muana wa meji+ udi ne budimu ne lungenyi,+ wikala ne bua kuibaka nzubu bua Yehowa ne nzubu bua bukalenge buende yeye. 13 Nunku ndi nkutumina nsenda mupiluke udi ne lungenyi, Hilama-abi,+ 14 muana wa mamu kampanda muena Dana, kadi tatuende uvua muntu wa ku Tulo; yeye udi ne dimanya mu dienza mudimu ne or, arjan, tshiamu tshia mitaku, tshiamu tshifiike, mabue, mitshi, miosa mikunzubile ya mikoko, buanda bua dikala dia ble, bilamba bimpe menemene, ne buanda bukunze.+ Udi mua kuondola bimfuanyi bia mishindu yonso ne kuenza tshintu tshionso tshidibu bamupesha bua kuenza.+ Neenze mudimu ne bansenda bebe bapiluke ne bansenda bapiluke ba mukalenge wanyi Davidi tatuebe. 15 Mpindieu mukalenge wanyi atumaku ntete ya blé, ya orje, mafuta, ne mvinyo bivuaye mulaye bena mudimu bende.+ 16 Tuetu petu netukose mitshi ya ku Lebanona,+ bungi buonso buudi nabu dijinga, ne netuyisuike mu bisumbu, kukutuminayi ku Yopa pa mâyi;+ wewe neuyangate bua kubanda nayi ku Yelushalema.”+

17 Pashishe Solomo wakabala bantu balume bonso bavua basombe buenyi mu buloba bua Isalele,+ panyima pa dibala divua tatuende Davidi muenze,+ ne bakapeta bantu 153 600. 18 Nunku wakateka bantu binunu 70 bua bikale bena mudimu betu ba tshianana aba,* bantu binunu 80 bua bikale bapanda mabue+ ku mikuna, ne bantu 3 600 bua bikale batangidi badi bapesha bantu mudimu wa kuenza.+

3 Pashishe Solomo wakabanga kuibaka nzubu wa Yehowa+ mu Yelushalema pa mukuna wa Moliya,+ muaba uvua Yehowa mumuenekele tatuende Davidi,+ mu muaba uvua Davidi mulongolole muaba wa tshishipuidi wa Ônana+ muena Yebuse. 2 Wakatuadija kuibaka mu dituku dibidi dia ngondo muibidi, mu tshidimu tshinayi tshia bukokeshi buende. 3 Tshishimikidi tshivua Solomo muenze bua kuibaka nzubu wa Nzambi mulelela tshivua ne nkubita 60 mu bule ne nkubita 20 mu butshiama,+ bilondeshile tshipiminu tshia kale.* 4 Lutanda lua kumpala luvua ne nkubita 20 mu bule, bipetangana ne butshiama bua nzubu,* ne luvua ne butumbuke bua 20;* wakalamika or muimpe menemene munda mualu.+ 5 Wakalamika mabaya a mutshi wa jenevriye ku nzubu munene, kuluaye kumulamika or muimpe menemene,+ ne pashishe kumulengejaye ne bimfuanyi bia mabue a ngaji+ ne shene.+ 6 Pashishe wakalamika mabue mimpe a mushinga mukole ku nzubu;+ ne or+ uvuaye mulamike uvua or wa ku Pâwayima. 7 Wakalamika or ku nzubu, ku mikamba ya muulu, ku mishiku ya mbelu, ku bimanu bia nzubu ne ku biibi biende;+ pashishe wakondola bimfuanyi bia bakeluba ku bimanu.+

8 Wakenza kabidi tshibambalu* tshia Muaba Mutambe Tshijila;+ bule buatshi buvua bupetangana ne butshiama bua nzubu, nkubita 20, ne uvua ne nkubita 20 mu butshiama. Wakalamikamu or muimpe menemene uvua ne bujitu bua ntalanta* 600.+ 9 Bujitu bua or wa misonso buvua bua nshekele* 50; ne wakalamika or ku bibambalu bia kuulu.

10 Pashishe wakasonga bimfuanyi bibidi bia bakeluba mu tshibambalu* tshia Muaba Mutambe Tshijila, kubilamikaye or.+ 11 Bule buonso bua mapuapua a bakeluba+ buvua bua nkubita 20; dipuapua dia mukeluba wa kumpala divua bule bua nkubita itanu ne divua dilenga ku tshimanu tshia nzubu; dipuapua diende dikuabu divua bule bua nkubita itanu ne divua dilenga dipuapua dia mukeluba mukuabu au. 12 Dipuapua dia mukeluba mukuabu divua bule bua nkubita itanu ne divua dilenga ku tshimanu tshikuabu tshia nzubu; dipuapua diende dikuabu divua bule bua nkubita itanu ne divua dilenga dipuapua dia mukeluba wa kumpala. 13 Mapuapua a bakeluba aba avua mabalula bule bua nkubita 20; bavua bimane kuulu, batangile munda.*

14 Wakenza kabidi tshilamba tshia kukosolola natshi+ tshienza ne tshilamba tshimpe menemene ne buanda bua dikala dia ble ne miosa mikunzubile ya mikoko ne buanda bukunze, yeye kuzolapu bakeluba.+

15 Pashishe wakenza makunji abidi+ kumpala kua nzubu, mikale bule bua nkubita 35, ne mutu wa dikunji uvua ku mutu kua dikunji dionso uvua ne nkubita itanu.+ 16 Wakenza kabidi shene, mienze bu shene ya kuela mu nshingu, yeye kuyela ku mitu ya makunji, kuenzaye kabidi bimuma bia grenade lukama, yeye kubiela ku shene ayi. 17 Wakimanyika makunji au kumpala kua ntempelo, dimue ku dia balume* ne dikuabu ku dia bakaji;* wakinyika dikunji dia ku dia balume ne: Yakina,* dia ku dia bakaji ne: Boaza.*

4 Pashishe wakenza tshioshelu tshia tshiamu tshia mitaku,+ nkubita 20 mu bule, nkubita 20 mu butshiama, ne nkubita dikumi mu butumbuke.

2 Wakenza Mbuu*+ wa tshiamu tshiengulula. Uvua wa tshijengu, muikale ne nkubita dikumi kumbukila ku mubangubangu umue ne ku mubangubangu mukuabu ne uvua ne nkubita itanu mu butumbuke; bivua biangata muonji wa kupima nawu wa bule bua nkubita 30 bua kumunyungulula.+ 3 Kuvua kabidi bilengejilu bia bibulubulu+ kuinshi kuawu, bimunyunguluke yonso mujima, bibulubulu dikumi bua nkubita umue, bibulubulu dikumi bua nkubita umue kumpenga kuonso kua Mbuu. Bibulubulu bivua mu milongo ibidi ne bivua bienzelaku. 4 Mbuu uvua musombe pa ngombe milume 12,+ ngombe isatu mitangile ku nord, isatu mitangile ku ouest, isatu mitangile ku sud, ne isatu mitangile ku est; ne Mbuu uvua musombe pa ngombe ayi, ne bia nyima biayi bivua bitangija munkatshi. 5 Mupimbu wende uvua bunene bua tshianza;* ne mubangubangu wende uvua muenza bu mubangubangu wa dikopo, muikale bu tshilongo tshia kapapankole tshikanguke. Tshintu tshia kulamina mâyi atshi tshivua mua kubuela* bipiminu 3 000 bia bata.*

6 Wakenza kabidi malongo manene dikumi a kuowela mâyi, kutekaye atanu ku dia balume ne atanu ku dia bakaji.+ Bavua basukuilamu bintu bivuabu benza nabi mudimu bua mulambu wa kuosha.+ Kadi Mbuu yeye uvua bua bakuidi kuowa mâyi.+

7 Pashishe wakenza bitekelu bia miendu dikumi bia or,+ anu muvuabu baleje,+ kubitekaye mu ntempelo, bitanu ku dia balume, bitanu ku dia bakaji.+

8 Wakenza kabidi mêsa dikumi, kuatekaye mu ntempelo, atanu ku dia balume ne atanu ku dia bakaji;+ ne wakenza bibakudi lukama bia or.

9 Pashishe wakenza lubanza+ lua bakuidi+ ne lubanza* lunene+ ne biibi bia lubanza, ne wakalamika tshiamu tshia mitaku ku biibi biayi. 10 Wakateka Mbuu ku luseke lua dia balume, ku sud lua ku est.+

11 Hilama wakenza kabidi bintu bia kuboya nabi butu, bikasu, ne bibakudi.+

Nunku Hilama wakajikija mudimu uvuaye muenzele mukalenge Solomo ku nzubu wa Nzambi mulelela:+ 12 makunji abidi+ ne mitu ya makunji ivua mienze bu bibakudi ivua ku mutu kua makunji abidi; tukanu tubidi+ bua kuela ku mitu ibidi ya makunji ivua mienze bu bibakudi ivua ku mutu kua makunji; 13 bimuma bia grenade 400+ bua makondo a tukanu abidi, milongo ibidi ya bimuma bia grenade bua bukondo buonso, bua kuela ku mitu ibidi ya makunji ivua mienze bu bibakudi ivua ku mutu kua makunji;+ 14 matempu* dikumi ne malongo manene dikumi pa matempu;+ 15 Mbuu ne ngombe milume 12 muinshi muende;+ 16 ne bintu bia kuboya nabi butu, bikasu, nsomo,+ ne bintu biabi bionso bivua Hilama-abiwa+ muenzele mukalenge Solomo ne tshiamu tshia mitaku tshipela, bua nzubu wa Yehowa. 17 Mukalenge wakabifudila mu tshitupa tshia buloba tshia Yadene mu diima dia tshikanana pankatshi pa Sukota+ ne Zeleda. 18 Solomo wakenza bintu bionso ebi bia bungi menemene; bujitu bua tshiamu tshia mitaku kabuvua bumanyike to.+

19 Solomo wakenza bintu bionso+ bua nzubu wa Nzambi mulelela: tshioshelu tshia or;+ mêsa+ mikale ne mampa a dileja pa mutu pawu;+ 20 bitekelu bia miendu ne miendu yabi bia or muimpe menemene,+ bua kuikalayi yitema kumpala kua nzubu wa munda menemene bilondeshile malu malomba; 21 ne bilongo bikadi bikanguke, miendu, ne tushola tua kukoka natu mikaba ya miendu,* bionso bia or, or mutambe buimpe; 22 bintu bia kujima nabi kapia, bibakudi, makopo, ne bintu bia kuambuila kapia, bionso bia or muimpe menemene; ne tshibuelelu tshia nzubu, biibi biende bia munda bua Muaba Mutambe Tshijila,+ ne biibi bia nzubu wa ntempelo, bionso bia or.+

5 Nunku Solomo wakajikija mudimu wonso uvuaye ne bua kuenza bua nzubu wa Yehowa.+ Pashishe Solomo wakalua ne bintu bivua tatuende Davidi muvuije bia tshijila,+ ne wakela arjan, or, ne bintu bionso mu bibutshilu bia nzubu wa Nzambi mulelela.+ 2 Tshikondo atshi Solomo wakasangisha bakulu ba mu Isalele, bantu bonso bavua ku mutu kua bisa, bamfumu ba nzubu ya batatu ba mu Isalele. Bakalua ku Yelushalema bua kubanda ne mushete wa tshipungidi tshia Yehowa kumbuka nawu mu Tshimenga tshia Davidi,+ mmumue ne: Siona.+ 3 Bantu bonso ba mu Isalele bakadisangisha kumpala kua mukalenge mu tshibilu* tshidibu benza mu ngondo wa muanda mutekete.+

4 Nunku bakulu bonso ba mu Isalele bakalua, ne bena Lewi bakajula Mushete.+ 5 Bakambula Mushete, ntenta wa kusambakena,+ ne bintu bia tshijila bionso bivua mu ntenta. Bakuidi ne bena Lewi* bakabanda nabi. 6 Mukalenge Solomo ne tshisumbu tshijima tshia Isalele tshivuabu babikile bua kutuilangana nende bavua kumpala kua Mushete. Bavua balambula mikoko ne ngombe bia bungi menemene+ bienza bua kakuikadi mushindu wa kuyibala anyi kumanya bungi buayi. 7 Pashishe bakuidi bakabueja mushete wa tshipungidi tshia Yehowa muaba wawu, mu nzubu wa munda menemene wa mu nzubu, Muaba Mutambe Tshijila, muinshi mua mapuapua a bakeluba.+ 8 Nunku mapuapua a bakeluba avua mabalula pa mutu pa muaba uvua Mushete, bienza bua bakeluba babuikile Mushete ne mikamba yawu+ lua muulu. 9 Mikamba ayi ivua mile bienza bua nsongo ya mikamba ayi yikale yimuenekela Muaba wa Tshijila kumpala kua nzubu wa munda menemene, kadi kayivua yimuenekela pambelu to. Idi muaba au too ne lelu. 10 Kakuvua tshintu tshikuabu mu Mushete to, anu mabue abidi avua Mose mutekamu ku Holeba+ pavua Yehowa mudie tshipungidi+ ne tshisamba tshia Isalele pavuabu bapatuka mu Ejipitu.+

11 Pavua bakuidi bapatuke muaba wa tshijila (bualu bakuidi bonso bavua muaba au bavua badijidile,+ nansha bobu bikale ba mu tshisumbu kayi),+ 12 bimbi ba misambu bena Lewi bonso+ bavua ba Asafa,+ ba Hemana,+ ba Yedutuna,+ ne ba bana babu balela ne bana babu bavua bavuale bilamba bimpe menemene, bambule bintu bia kukumakaja, biombelu bia nshinga, ne nzenze; bavua bimane ku est kua tshioshelu, ne bavua pamue ne bakuidi 120 bavua bela mpungi.+ 13 Dîba divua bedi ba mpungi ne bimbi ba misambu batumbisha Yehowa ne bamuela tuasakidila bu muntu umue, ne pavua muadi wa mpungi, wa bintu bia kukumakaja, wa bintu bikuabu bia kuimba nabi misambu wenda ubanda pavuabu benda batumbisha Yehowa, “bualu yeye udi muimpe; dinanga diende dia lulamatu didi dishalaku kashidi,”+ dîba adi nzubu, nzubu wa Yehowa, wakuwula ne ditutu.+ 14 Bakuidi kabakakumbana bua kuimana bua kuenza mudimu to, bua ditutu adi, bualu butumbi bua Yehowa buvua buwuje nzubu wa Nzambi mulelela.+

6 Dîba adi Solomo wakamba ne: “Yehowa uvua muambe ne: uvua ne bua kusombela mu mifitu mikole.+ 2 Mpindieu ndi mukuibakile nzubu wa butumbi, muaba mujadika wa wewe kusombela kashidi.”+

3 Pashishe mukalenge wakakudimuka, kutuadijaye kubenesha tshisumbu tshijima tshia Isalele pavua tshisumbu tshijima tshia Isalele tshimane.+ 4 Wakamba ne: “Yehowa Nzambi wa Isalele atumbishibue, yeye uvua muakule mukana muende nkayende mulaye tatuanyi Davidi ne mukumbaje bualu abu ne bianza biende yeye wamba ne: 5 ‘Katshia ku dituku dimvua mupatule tshisamba tshianyi mu buloba bua Ejipitu, tshiena musungule tshimenga kampanda mu bisa bionso bia Isalele tshia meme kuibakila nzubu bua dîna dianyi kushalamu to,+ ne tshiena musungule muntu bua kulua mulombodi ku mutu kua tshisamba tshianyi tshia Isalele to. 6 Kadi ndi musungule Yelushalema+ bua dîna dianyi dikalamu, ne ndi musungule Davidi bua ikale ku mutu kua tshisamba tshianyi tshia Isalele.’+ 7 Tatuanyi Davidi uvua ne dijinga mu muoyo wende dia kuibaka nzubu bua dîna dia Yehowa Nzambi wa Isalele.+ 8 Kadi Yehowa wakambila tatuanyi Davidi ne: ‘Wewe uvua ne dijinga mu muoyo webe dia kuibaka nzubu bua dîna dianyi, ne uvua muenze bimpe bua kujinga bualu ebu mu muoyo webe. 9 Kadi wewe kuakuibaka nzubu eu to, kadi muanebe wewe wikalabu ne bua kukulelela* yeye ke wibaka nzubu bua dîna dianyi.’+ 10 Yehowa mmukumbaje bualu buvuaye mulaye, bualu ndi mupingane pa muaba wa tatuanyi Davidi ne ndi musombe mu nkuasa wa bukalenge wa Isalele+ anu muvua Yehowa mulaye.+ Ndi muibake kabidi nzubu bua dîna dia Yehowa Nzambi wa Isalele, 11 ne ndi mutekamu Mushete udi ne tshipungidi+ tshivua Yehowa mudie ne tshisamba tshia Isalele.”

12 Pashishe wakimana kumpala kua tshioshelu tshia Yehowa kumpala kua tshisumbu tshijima tshia Isalele, yeye kuolola bianza.+ 13 (Bualu Solomo uvua muenze tshintu tshia kuimanyina tshia tshiamu tshia mitaku, mutshiteke munkatshi mua lubanza.*+ Tshivua ne nkubita* itanu mu bule, nkubita itanu mu butshiama, ne nkubita isatu mu butumbuke; yeye kuimanyinapu.) Pashishe wakatua binu kumpala kua tshisumbu tshijima tshia Isalele, yeye kuela bianza muulu,+ 14 kuambaye ne: “Yehowa Nzambi wa Isalele, kakuena Nzambi mukuabu bu wewe mu diulu anyi pa buloba udi ulama tshipungidi ne uleja dinanga dia lulamatu kudi bena mudimu bebe badi benda kumpala kuebe ne muoyo wabu mujima.+ 15 Udi mukumbaje dilaya diuvua mulaye muena mudimu webe tatuanyi Davidi.+ Uvua muenze dilaya edi ne mukana muebe wewe, ne lelu udi mudikumbaje ne tshianza tshiebe.+ 16 Mpindieu, wewe Yehowa Nzambi wa Isalele, kumbaja dilaya diuvua mulaye muena mudimu webe tatuanyi Davidi pauvua muambe ne: ‘Bana bebe bobu badimuke mu njila wabu pa kuenda mu mikenji yanyi,+ anu bu muudi muende kumpala kuanyi, kakuakupangika muntu wa mu ndelanganyi yebe kumpala kuanyi bua kusomba mu nkuasa wa bukalenge wa Isalele.’+ 17 Mpindieu wewe Yehowa Nzambi wa Isalele, dilaya diuvua mulaye muena mudimu webe Davidi dikale dia kueyemena.

18 “Kadi Nzambi neasombe bushuwa ne bantu pa buloba anyi?+ Tangila! Diulu, bushuwa, diulu dia mu diulu kadiena mua kukukumbana to;+ nunku netuambe tshinyi bua nzubu undi muibake eu?+ 19 Mpindieu Yehowa Nzambi wanyi, teya ntema ku disambila dia muena mudimu webe ne ku dilomba diende dia kuanyishibua, ne teleja muadi wa dilomba diambuluisha ne disambila didi muena mudimu webe usambila kumpala kuebe. 20 Mêsu ebe ikalaku matabale matangile ku nzubu eu munya ne butuku, matangile ku muaba uuvua muambe ne: uvua ne bua kuteka dîna diebe,+ bua kuteleja disambila didi muena mudimu webe usambila mutangile muaba eu. 21 Teleja kabidi misengelelu ya dilomba nayi diambuluisha ya kudi muena mudimu webe ne misengelelu ya kudi tshisamba tshiebe tshia Isalele padibu basambila batangile muaba eu,+ ne umvuaku kumbukila muaba uudi musombele, kumbukila mu diulu;+ bushuwa, telejaku ne ubabuikidile.+

22 “Muntu yeye muenzele mukuende bibi ne bobu bamutshipishe* ne bamuteke ku bukenji bua mutshipu* au, yeye mulue kumpala kua tshioshelu tshiebe mu nzubu eu patshidiye ku mutshipu* au,+ 23 dîba adi umvuaku kumbukila mu diulu, wangate malu mu bianza ne ulumbuluishe bena mudimu bebe pa kufuta muntu mubi, uteka malu avuaye muenze pa mutu pende yeye,+ ne pa kuamba mudi muntu muakane kayi ne bualu,* umufuta bilondeshile buakane buende.+

24 “Bobu batshimune tshisamba tshiebe tshia Isalele kudi bena lukuna bualu bavua batungunuke ne kukuenzela mpekatu,+ ne badi balukila, batumbisha dîna diebe,+ basambila+ ne balomba bua kuanyishibua kumpala kuebe mu nzubu emu,+ 25 dîba adi umvuaku kumbukila mu diulu,+ ubuikile mpekatu wa tshisamba tshiebe tshia Isalele ne ubapingaje mu buloba buuvua mubapeshe bobu ne bankambua babu.+

26 “Padi diulu dikangibua ne kakuyi mvula+ bualu bavua batungunuke ne kukuenzela mpekatu,+ ne badi basambila batangile muaba eu, batumbisha dîna diebe ne balekela mpekatu wabu bualu wewe uvua mubapuekeshe,*+ 27 dîba adi umvuaku kumbukila mu diulu ne ubuikile mpekatu wa bena mudimu bebe, wa tshisamba tshiebe tshia Isalele, bualu neubalongeshe bua njila muimpe udibu ne bua kuendela;+ ne ulokeshe mvula+ mu buloba buebe buuvua mupeshe tshisamba tshiebe bu bumpianyi.

28 “Tshiyole tshia nzala tshiotshi tshibudike mu buloba,+ anyi tshipupu tshia disama,+ tshipupu tshidi tshiumisha bintu, disama dia mitshi,+ mpasu ya mikumbi, anyi mpasu idi ibutula;*+ anyi bikala bena lukuna babu babatshintshimike mu tshimue tshia ku bimenga bia mu buloba*+ anyi bikalaku kubudike tshipupu kampanda tshikuabu anyi disama kampanda dikuabu,+ 29 disambila kayi dionso,+ dilomba kayi dionso dia kuanyishibua+ didi muntu kayi yonso anyi tshisamba tshiebe tshia Isalele tshijima mua kuenza (bualu muntu yonso mmumanye dikenga diende ne lutatu luende)+ padibu bolola bianza batangile ku nzubu eu,+ 30 dîba adi umvuaku kumbukila mu diulu, muaba uudi musombele,+ ne ubabuikidile;+ ne ufute muntu yonso bilondeshile njila yende yonso, bualu wewe udi mumanye muoyo wende (wewe nkayebe udi mumanye muoyo wa muntu bushuwa),+ 31 bua bakutshine pa kuendela mu njila yebe matuku onso adibu mu buloba buuvua mupeshe bankambua betu.

32 “Kabidi bua muntu wa ku babende udi kayi wa mu tshisamba tshiebe tshia Isalele ne udi ufumina ku buloba bua kule bua bualu bua dîna diebe dinene*+ ne bua tshianza tshiebe tshia bukole ne bua diboko diebe diolola, ne yeye udi ulua ne usambila mutangile ku nzubu eu,+ 33 dîba adi utelejaku kumbukila mu diulu, muaba uudi musombele, ne wenze bionso bidi muntu wa ku babende ukulomba, bua bisamba bionso bia pa buloba bimanye dîna diebe+ ne bikutshine, anu mudi tshisamba tshiebe tshia Isalele tshienza, ne bimanye ne: badi babila dîna diebe mu nzubu undi muibake eu.

34 “Bikala bantu bebe baye ku mvita bua kuluangana ne bena lukuna babu mu njila uudi mubatume bua kuyila,+ ne bobu bakusambile+ batangile ku tshimenga etshi tshiudi musungule ne ku nzubu undi muibake bua dîna diebe,+ 35 dîba adi umvue disambila diabu ne dilomba diabu dia kuanyishibua kumbukila mu diulu ne ubalumbuluile.+

36 “Bobu bakuenzele mpekatu (bualu kakuena muntu nansha umue utu kayi wenza mpekatu),+ ne udi ubakuatshila tshiji tshikole, ubalekela mu bianza bia bena lukuna, ne babakuatshi babakuate baye nabu mu buloba bukuabu, kule anyi pabuipi,+ 37 ne badi bafika ku diumvua mu buloba mudibu babakuate baye nabu, ne badi bapingana kuudi, bakulomba bua kuanyishibua mu buloba mudibu babakuate amu bamba ne: ‘Tudi benze mpekatu ne tudi batupakane; tudi benze malu mabi,’+ 38 ne badi bapingana kuudi ne muoyo wabu wonso+ ne anyima* wabu yonso mu buloba mudibu babakuate,+ muaba uvuabu baye nabu pavuabu babakuate, ne badi basambila batangile ku buloba buabu buuvua mupeshe bankambua babu, ku tshimenga tshiudi musungule+ ne ku nzubu undi muibake bua dîna diebe, 39 dîba adi umvua disambila diabu ne dilomba diabu dia kuanyishibua kumbukila mu diulu, muaba uudi musombele, ne ubalumbuluile+ ne ubuikidile tshisamba tshiebe tshidi tshikuenzele mpekatu.

40 “Mpindieu, wewe Nzambi wanyi, mêsu ebe ikalaku matabale ne matshi ebe atelejaku disambila didi dienzeka* muaba eu.+ 41 Mpindieu Yehowa Nzambi wanyi, banda muaba webe wa kuikishila,+ wewe ne Mushete wa bukole buebe. Yehowa Nzambi wanyi, bakuidi bebe bavuale lupandu, ne bena lulamatu bebe basanke mu buimpe buebe.+ 42 Yehowa Nzambi wanyi, kubengi* muela manyi webe to.+ Uvulukaku dinanga diebe dia lulamatu kudi muena mudimu webe Davidi.”+

7 Mpindieu, diakamue pavua Solomo mujikije kusambila,+ kapia kakapueka kafuma mu diulu,+ kuoshaku mulambu wa kuosha ne milambu mikuabu, ne butumbi bua Yehowa buakuwula mu nzubu.+ 2 Bakuidi bakapangila bua kubuela mu nzubu wa Yehowa, bualu butumbi bua Yehowa buvua buwule mu nzubu wa Yehowa.+ 3 Tshisamba tshijima tshia Isalele tshivua tshitangila pavua kapia kapueka ne pavua butumbi bua Yehowa pa nzubu, ne bakinama batangije mpala panshi pavua palamika mabue, kutuabu mpala panshi ne kuelabu Yehowa tuasakidila, “bualu yeye udi muimpe; dinanga diende dia lulamatu didi dishalaku kashidi.”

4 Nunku mukalenge ne tshisamba tshijima bakalambula milambu kumpala kua Yehowa.+ 5 Mukalenge Solomo wakalambula mulambu wa ngombe binunu 22 ne mikoko binunu 120. Nunku mukalenge ne tshisamba tshijima bakabanjija nzubu wa Nzambi mulelela.+ 6 Bakuidi bavua bimane miaba yabu ya mudimu, anu bu bena Lewi bavua ne biombelu bia kuimbila nabi Yehowa misambu.+ (Mukalenge Davidi uvua muenze biombelu ebi bua kuela nabi Yehowa tuasakidila, “bualu dinanga diende dia lulamatu didi dishalaku kashidi,” pavua Davidi utumbisha nabu* Nzambi.) Bakuidi bavua bela mpungi bikole+ kumpala kuabu, pavua eku bena Isalele bonso bimane.

7 Pashishe Solomo wakajidila muaba wa munkatshi mua lubanza luvua kumpala kua nzubu wa Yehowa, bualu muaba au ke uvuaye ne bua kulambuila milambu ya kuosha+ ne bitupa bia mafuta a milambu ya diumvuangana, bualu tshioshelu tshia tshiamu tshia mitaku+ tshivua Solomo muenze katshivua mua kuambula milambu ya kuosha, milambu ya ntete,+ ne bitupa bia mafuta+ to. 8 Tshikondo atshi Solomo wakenza tshibilu matuku muanda mutekete+ pamue ne Isalele mujima, tshisumbu tshinene menemene tshia bantu bavua bumbukile ku Lebo-hamate* kupueka too ne ku Kasulu ka tshilonda nkoka* ka mu Ejipitu.+ 9 Kadi dituku dia muanda mukulu* bakenza masangisha a pa buawu,+ bualu bavua babanjije tshioshelu matuku muanda mutekete ne benze tshibilu matuku muanda mutekete. 10 Pashishe dituku dia 23 dia ngondo wa muanda mutekete, wakapingaja bantu ku mabu benda basanka+ ne bumvua bimpe mu mioyo yabu bua malu mimpe avua Yehowa muenzele Davidi ne Solomo ne tshisamba tshiende tshia Isalele.+

11 Nunku Solomo wakajikija nzubu wa Yehowa ne nzubu* wa mukalenge;+ ne bintu bionso bivua Solomo nabi ku muoyo bua kuenza bua nzubu wa Yehowa ne bua nzubu wende yeye muine, wakabienza bimpe menemene.+ 12 Pashishe Yehowa wakamuenekela Solomo+ butuku ne wakamuambila ne: “Ndi mumvue disambila diebe, ne ndi mudisunguile muaba eu bua wikale nzubu wa milambu.+ 13 Pandi nkanga diulu mvula kayi uloka, ne pandi ntumina mpasu dîyi bua kubutula buloba, ne meme mutume tshipupu munkatshi mua tshisamba tshianyi, 14 bena mu tshisamba tshianyi tshidibu babikila ku dîna dianyi+ bobu badipuekeshe,+ basambile, bakebe mpala wanyi, ne balekele njila yabu mibi,+ dîba adi nenteleje kumbukila mu diulu, nembabuikidile mpekatu wabu ne nengondope buloba buabu.+ 15 Mpindieu mêsu anyi neikale matabale ne matshi anyi neikale ateleja disambila dienzela muaba eu.+ 16 Nunku ndi musungule nzubu eu ne mumujidile bua dîna dianyi dikalamu bua kashidi,+ ne mêsu anyi ne muoyo wanyi nebikalamu misangu yonso.+

17 “Kadi wewe, biwenda kumpala kuanyi anu bu muvua tatuebe Davidi muende pa kuenza malu onso andi mukutumine dîyi bua kuenza, ne biwatumikila mêyi ne mikandu bianyi ne mêyi anyi a dilumbuluisha,+ 18 dîba adi nenjadike nkuasa wa bukalenge wa bukokeshi buebe,+ anu mumvua mudie tshipungidi ne tatuebe Davidi,+ ngamba ne: ‘Kakuakupangika muntu wa mu ndelanganyi yebe udi ukokesha Isalele to.’+ 19 Kadi wewe musesuke, mubenge mikenji yanyi mifunda ne mêyi anyi bindi muteke kumpala kuebe, ne wewe muye muenzele nzambi mikuabu mudimu ne muyinamine,+ 20 nenjomone Isalele mu buloba buanyi bundi mubapeshe,+ ne nengumbushe mêsu anyi ku nzubu undi mujidile bua dîna dianyi eu, nemmuvuije tshintu tshia kupetula* ne tshia kuseka munkatshi mua bisamba bionso.+ 21 Nunku nzubu eu nealue mishiki ya bibundu. Muntu yonso udi upitshila pabuipi nende neashale mutangile ukema+ ne neambe ne: ‘Bua tshinyi Yehowa uvua muenzele buloba ebu ne nzubu eu nunku?’+ 22 Dîba adi nebambe ne: ‘Mbienzeke nunku bualu bavua balekele Yehowa+ Nzambi wa bankambua babu uvua mubapatule mu buloba bua Ejipitu,+ ne bavua balamate nzambi mikuabu, bayinamine ne bayenzele mudimu.+ Ke bualu kayi uvua mubatumine dikenga dionso edi.’”+

8 Ku ndekelu kua bidimu 20 bivua Solomo muibake nzubu wa Yehowa ne nzubu* wende yeye,+ 2 Solomo wakibakulula bimenga bivua Hilama+ mumupeshe, ne Solomo wakatekamu bena Isalele.* 3 Solomo wakaya kabidi ku Hamate-soba, kumukuataye. 4 Pashishe wakakolesha* Tademô mu tshipela ne bimenga bionso bia kulamina bintu+ bivuaye muibake mu Hamate.+ 5 Wakakolesha kabidi Bete-holona wa ku mutu+ ne Bete-holona wa kuinshi,+ bimenga bikolesha bivua ne bimanu, biibi, ne milonda, 6 ne Bâlata+ pamue ne bimenga bia Solomo bionso bia kulamina bintu, bimenga bionso bia matempu,+ bimenga bua bendeshi ba tubalu, ne bintu bionso bivua Solomo musue kuibaka mu Yelushalema, mu Lebanona, ne mu buloba buonso buvua ku bukokeshi buende.

7 Kadi bua bantu bonso bavua bashale ba mu bena Hiti, bena Amole, bena Pelizi, bena Hiwi, ne bena Yebuse,+ bavua kabayi ba mu Isalele,+ 8 ndelanganyi yabu ivua mishale mu buloba (bantu bavua bena Isalele kabayi babutule),+ Solomo wakabangata bua kubenzeja midimu mikole ku bukole too ne lelu.+ 9 Kadi Solomo kavua muvuije muena Isalele nansha umue mupika bua mudimu wende to,+ bualu bavua bena mvita bende, bamfumu ba banene ba basalayi bende, ne bamfumu ba bendeshi bende ba matempu ne bendeshi bende ba tubalu.+ 10 Kuvua bamfumu 250 ba baleji mpala ba mukalenge Solomo, bamfumu bavua ku mutu kua bantu.+

11 Solomo wakumbusha kabidi muana wa bakaji wa Palô+ mu Tshimenga tshia Davidi, kumubandishaye mu nzubu uvuaye mumuibakile,+ bualu uvua muambe ne: “Nansha mudiye mukajanyi, kena ne bua kusomba mu nzubu wa Davidi mukalenge wa Isalele to, bualu miaba idi Mushete wa Yehowa mupitshile nya tshijila.”+

12 Pashishe Solomo wakafila milambu ya kuosha+ kudi Yehowa pa tshioshelu+ tshia Yehowa tshivuaye muase kumpala kua lutanda.+ 13 Uvua ulonda tshilele tshia dituku dionso ne ufila milambu bilondeshile dîyi dia Mose bua Nsabatu,+ bua matuku adi ngondo ubala,+ ne bua bibilu bilongolola misangu isatu ku tshidimu:+ Tshibilu tshia Mampa kaayi mela Luevene,+ Tshibilu tshia Mbingu,+ ne Tshibilu tshia Bitanda.*+ 14 Pashishe wakateka bisumbu bia bakuidi+ bua midimu yabu bilondeshile mukenji wa tatuende Davidi, ne bena Lewi bua miaba yabu ya midimu, bua kutumbisha Nzambi+ ne kuenza mudimu mu mêsu a bakuidi bilondeshile tshilele tshia dituku dionso, ne balami ba ku biibi mu bisumbu biabu bua biibi bishilashilangane,+ bualu edi ke divua dîyi dia Davidi muntu wa Nzambi mulelela. 15 Kabavua basesuke ku dîyi divua mukalenge muambile bakuidi ne bena Lewi bua bualu kayi buonso anyi bua nzubu ya dilamina bintu to. 16 Nunku mudimu wonso wa Solomo uvua mulongolola bimpe,* katshia ku dituku divuabu benze tshishimikidi tshia nzubu wa Yehowa+ too ne pavuabu bamujikije. Nunku nzubu wa Yehowa wakajika.+

17 Tshikondo atshi ke tshivua Solomo muye ku Esione-gebê+ ne ku Elota+ ku muelelu kua mbuu mu buloba bua Edome.+ 18 Hilama+ wakamutumina mazuwa ne bantu bavua bamanye mâyi bikole ku butuangaji bua bena mudimu bende yeye. Bakaya ne bena mudimu ba Solomo ku Ofî,+ kuangatabu ntalanta* 450 ya or kuntu aku,+ kuyituadilabu mukalenge Solomo.+

9 Mpindieu mukalenge mukaji wa ku Sheba+ wakumvua lumu lua Solomo, nunku wakalua ku Yelushalema bua kuteta Solomo ne nkonko mikole.* Uvua mushindikija kudi tshisumbu tshinene tshia bantu,* ne tumelu tuambule mafuta a mutshi wa bome ne or wa bungi menemene+ ne mabue a mushinga mukole. Wakabuela kudi Solomo, kumuambilaye malu onso avuaye nawu ku muoyo.+ 2 Nunku Solomo wakandamuna nkonko yende yonso. Kakuvua bualu nansha bumue buvua butambe kukolela* Solomo bua kumumvuija to.

3 Pavua mukalenge mukaji wa ku Sheba mumone meji a Solomo,+ nzubu uvuaye muibake,+ 4 biakudia bia ku mêsa ende,+ mushindu uvua bena mudimu bende basomba, mudimu wa ku mêsa uvua bena mudimu bende benza ne mvuadilu wabu, bafidi bende ba maluvu ne mvuadilu wabu, ne milambu yende ya kuosha ivuaye ne tshibidilu tshia kufila ku nzubu wa Yehowa,+ biakamupitshila.* 5 Nunku wakambila mukalenge ne: “Lumu lumvua mumvue mu buloba buanyi bua malu audi muenze* ne bua meji ebe luvua lulelela. 6 Kadi tshivua muitabe lumu alu too ne pamvua mulue ne mudimuene malu au ne mêsu anyi abidi.+ Kadi tangila! Kabavua bangambile nansha tshitupa tshia meji ebe a bungi to.+ Udi mupite lumu lumvua mumvue kule ne kule.+ 7 Bantu bebe mba diakalenga, ne bena mudimu bebe badi bimana kumpala kuebe misangu yonso bateleja meji ebe mba diakalenga! 8 Yehowa Nzambi webe atumbishibue, yeye udi musanke bua bualu buebe pa kukuteka mu nkuasa wende wa bukalenge bu mukalenge bua Yehowa Nzambi webe. Bu mudi Nzambi webe munange Isalele,+ bua kuenza bua atungunuke ne kuikalaku bua kashidi, uvua mukuteke mukalenge wende bua kulumbuluisha ne kuteka buakane.”

9 Pashishe wakapesha mukalenge ntalanta* 120 ya or+ ne mafuta a mutshi wa bome a bungi menemene ne mabue a mushinga mukole. Kakutu kuanji kubuela kabidi mafuta a mutshi wa bome a buena avua mukalenge mukaji wa ku Sheba mupeshe mukalenge Solomo to.+

10 Bualu bukuabu, bena mudimu ba Hilama ne bena mudimu ba Solomo bavua balua ne or bumbuka nende ku Ofî+ bavua balua kabidi ne mitshi ya algumime ne mabue a mushinga mukole.+ 11 Mukalenge wakangata mitshi ya algumime ayi kuenzaye nayi bibandilu bua nzubu wa Yehowa+ ne nzubu* wa mukalenge,+ kuenzaye kabidi nzenze ne biombelu bia nshinga bua bimbi ba misambu.+ Katshia kabatu banji kumona bintu bia buena abi mu buloba bua Yuda to.

12 Mukalenge Solomo wakapesha kabidi mukalenge mukaji wa ku Sheba bintu bionso bivuaye mujinge ne bivuaye mulombe, kupita* bivuaye yeye mutuadile mukalenge. Pashishe wakumbuka, kupinganaye mu buloba buende pamue ne bena mudimu bende.+

13 Bujitu bua or uvuabu batuadila Solomo mu tshidimu tshimue buvua bua ntalanta 666 ya or,+ 14 pa kumbusha uvuabu balua nende kudi bangenda mushinga ne basumbishi ba bintu ne bakalenge bonso ba bena Arabe ne banguvena ba mu buloba bavua batuadila Solomo or ne arjan.+

15 Mukalenge Solomo wakenza ngabu minene 200 ya or musambakaja ne tshiamu tshikuabu+ (ngabu yonso wakangata nshekele* 600 ya or musambakaja ne tshiamu tshikuabu)+ 16 ne ngabu mikese* 300 ya or musambakaja ne tshiamu tshikuabu (ngabu mukese yonso wakangata mina* isatu ya or). Pashishe mukalenge wakayiteka mu Nzubu wa Ditu dia Lebanona.+

17 Mukalenge wakenza kabidi nkuasa wa bukalenge munene wa mibanga ne wakamulamika or muimpe menemene.+ 18 Kuvua katshibandilu ka bidiatshilu bisambombo ku nkuasa wa bukalenge, ne kuvua tshitekelu tshia makasa tshia or tshilamakaja ku nkuasa wa bukalenge, ne kuvua bitekelu bia maboko ku nseke yonso ibidi ya nkuasa, ne bavua benze ntambue ibidi+ ivua mimane ku luseke lua bitekelu bia maboko. 19 Bavua benze kabidi ntambue 12+ mimane pa bidiatshilu bisambombo, umue ku luseke luonso lua bidiatshilu bionso bisambombo. Kakuvua bukalenge bukuabu nansha bumue buvua buenze nkuasa wa bukalenge wa nanku to. 20 Makopo a mukalenge Solomo onso avua a or, ne bintu bionso bia mu Nzubu wa Ditu dia Lebanona bivua bia or muimpe menemene. Kakuvua tshintu nansha tshimue tshienza ne tshiamu tshia arjan to, bualu bavua bangata arjan bu tshintu tshia tshianana mu matuku a Solomo.+ 21 Bualu tshisumbu tshia mazuwa a mukalenge tshivua tshiya ku Tâshishi+ ne bena mudimu ba Hilama.+ Musangu umue mu bidimu bisatu bionso, mazuwa a ku Tâshishi avua alua mambule or ne arjan, mibanga,+ nsoko,* ne nyunyi ya tuyiba.

22 Nunku mukalenge Solomo uvua ne bubanji ne meji bia bungi kupita bakalenge bakuabu bonso ba pa buloba.+ 23 Bakalenge ba pa buloba bujima bavua bakeba bua kumonangana ne* Solomo bua kumvua meji avua Nzambi mulelela muele mu muoyo wende.+ 24 Yonso wa kudibu uvua ulua ne dipa (bintu bia arjan, bintu bia or, bilamba,+ bia mvita, mafuta a mutshi wa bome, tubalu, ne mpunda) ne bualu ebu buvua buenzeka ku tshidimu ne ku tshidimu. 25 Solomo uvua ne bikumbi 4 000 bua tubalu tuende ne matempu ne tubalu* binunu 12,+ ne wakabiteka mu bimenga bia matempu ne pabuipi ne mukalenge mu Yelushalema.+ 26 Uvua ukokesha bakalenge bonso ba kumbukila ku Musulu* too ne ku buloba bua bena Peleshete ne ku mikalu ya Ejipitu.+ 27 Mukalenge wakenza bua tshiamu tshia arjan tshikale tshia bungi mu Yelushalema anu bu mabue, ne bua mitshi ya sedre yikale ya bungi anu bu mitshi ya tshikuyi mu Shefela.+ 28 Bavua batuadila Solomo tubalu tua mu Ejipitu+ ne tua mu maloba makuabu onso.

29 Bua malu adi mashale a ku malu a Solomo,+ kutuadijila ku mbangilu kuawu too ne ku ndekelu, ki mmafunda mu mêyi a muprofete Natana,+ mu mêyi a buprofete a Ahiya+ muena Shilo, ne mu bikena kumona bivua Ido+ mumonyi wa bikena kumona mufunde bua Yalobama+ muana wa Nebata anyi? 30 Solomo wakakokesha mu Yelushalema ku mutu kua Isalele mujima bua bidimu 40. 31 Pashishe Solomo wakalala bua kuikisha ne bankambua bende. Nunku bakamujiika mu Tshimenga tshia Davidi tatuende;+ ne muanende Lehabama wakalua mukalenge pa muaba wende.+

10 Lehabama wakaya ku Shekeme,+ bualu Isalele mujima uvua mulue ku Shekeme bua kumuteka mukalenge.+ 2 Diakamue pavua Yalobama+ muana wa Nebata mumvue bualu abu (utshivua mu Ejipitu bualu uvua munyeme bua bualu bua mukalenge Solomo),+ Yalobama wakapingana ufumina mu Ejipitu. 3 Pashishe bakamubikidisha, ne Yalobama ne Isalele mujima bakalua kudi Lehabama, kuambabu ne: 4 “Tatuebe uvua muvuije mutshi wetu wa tshikokedi bujitu.+ Kadi wewe mutekeshe mudimu mukole wa tatuebe ne mupepeje mutshi wa tshikokedi wa bujitu* uvuaye mututenteke, netukuenzele mudimu.”

5 Ke yeye kubambila ne: “Nupingane kundi panyima pa matuku asatu.” Nunku bantu bakaya.+ 6 Mukalenge Lehabama wakakeba lungenyi kudi bantu bakulumpe* bavua benzele tatuende Solomo mudimu patshivuaye ne muoyo wamba ne: “Mmubelu kayi unudi mua kufila bua mushindu wa kuandamuna bantu aba?” 7 Bakamuandamuna ne: “Wewe muikale muntu muimpe kudi bantu aba, wewe mubasankishe, ne mubandamune bimpe, nebashale anu bena mudimu bebe.”

8 Kadi wakabenga mubelu uvua bantu bakulumpe* bamupeshe, yeye kuya kulomba lungenyi kudi bansongalume bavuaye mukole nabu ne bakavua mpindieu bambuluishi bende.+ 9 Wakabakonka ne: “Mmubelu kayi unudi nufila bua mushindu wa tuetu kuandamuna bantu aba badi bangambile ne: ‘Pepeja mutshi wa tshikokedi uvua tatuebe mututenteke’?” 10 Bansongalume bavuaye mukole nabu bakamuambila ne: “Newambile bantu badi bakuambile ne: ‘Tatuebe uvua muvuije mutshi wetu wa tshikokedi bujitu, kadi wewe udi ne bua kutupepejilawu’; neubambile nunku: ‘Kantengenene kanyi nekikale kanene kupita tshimono tshia tatuanyi. 11 Tatuanyi uvua munutenteke mutshi wa tshikokedi wa bujitu, kadi meme nensakidile bujitu ku mutshi wenu wa tshikokedi. Tatuanyi uvua mununyoke ne mfimbu ya tshianana, kadi meme nennunyoke ne mfimbu ya tubulu tubulu.’”

12 Yalobama ne bantu bonso bakalua kudi Lehabama dituku disatu anu muvua mukalenge muambe ne: “Nupingane kundi dituku disatu.”+ 13 Kadi mukalenge wakabandamuna ne dîyi dibi. Nunku mukalenge Lehabama wakabenga mubelu wa kudi bantu bakulumpe.* 14 Wakakula nabu bilondeshile mubelu wa bansongalume wamba ne: “Nemvuije mutshi wenu wa tshikokedi bujitu, ne nensakidilaku bujitu bukuabu. Tatuanyi uvua mununyoke ne mfimbu ya tshianana, kadi meme nennunyoke ne mfimbu ya tubulu tubulu.” 15 Nunku mukalenge wakabenga kuteleja bantu, bualu Nzambi mulelela ke uvua muenze bua malu enzeke mushindu eu,+ bua kukumbaja dîyi divua Yehowa muambile Yalobama muana wa Nebata ku butuangaji bua Ahiya+ muena Shilo.

16 Kadi bua Isalele mujima, bu muvua mukalenge mubenge kubateleja, bantu bakandamuna mukalenge ne: “Tudi ne tshitupa kayi mu Davidi? Katuena ne bumpianyi mu muana wa Yishai to. Wewe Isalele, muntu yonso aye kudi nzambi yende. Mpindieu wewe Davidi, ditangidila nzubu webe nkayebe.”+ Bua bualu abu, bena Isalele bonso bakapingana ku nzubu* yabu.+

17 Kadi Lehabama wakatungunuka ne kukokesha bena Isalele bavua basombela mu bimenga bia Yuda.+

18 Pashishe mukalenge Lehabama wakatuma Hadolama+ uvua utangila bantu bavuabu babikidishe bua kubenzeja midimu mikole ku bukole, kadi bena Isalele bakamuasa mabue too ne pakafuaye. Mukalenge Lehabama wakapeta mpunga wa kubanda mu ditempu diende bua kunyema kuya ku Yelushalema.+ 19 Nunku bena Isalele mbashale batombokele nzubu wa Davidi too ne lelu.

11 Pavua Lehabama mufike ku Yelushalema, wakasangisha diakamue nzubu wa Yuda ne Benyamina,+ bena mvita balongesha* binunu 180 bua kuluangana ne Isalele bua kupingajila Lehabama bukalenge.+ 2 Dîba adi dîyi dia Yehowa diakalua kudi Shemaya+ muntu wa Nzambi mulelela diamba ne: 3 “Ambila Lehabama muana wa Solomo mukalenge wa Yuda ne bena Isalele bonso badi mu Yuda ne mu Benyamina ne: 4 ‘Yehowa udi wamba nunku: “Kanuena ne bua kubanda bua kuluangana ne bana benu to. Yonso wa kunudi apingane kuende, bualu meme ke udi muenze bua bualu ebu buenzeke nanku.”’”+ Nunku bakatumikila dîyi dia Yehowa, bobu kupingana ne kabakaya bua kuluangana ne Yalobama to.

5 Lehabama wakasombela mu Yelushalema ne wakakolesha bimenga mu Yuda. 6 Nunku wakakolesha Beteleheme,+ Etama, Tekoa,+ 7 Bete-sû, Soko,+ Adulama,+ 8 Gata,+ Malesha, Zifa,+ 9 Adolayima, Lakisha,+ Azeka,+ 10 Solea, Ayalona,+ ne Hebelone.+ Ebi ke bimenga bivuabu bakoleshe mu Yuda ne mu Benyamina. 11 Wakakolesha kabidi miaba mikolesha ayi bikole, yeye kutekamu balombodi ne biakudia ne mafuta ne mvinyo, 12 ne wakafila ngabu minene ne mafuma mu bimenga bishilashilangane bionso; wakabikolesha bikole menemene. Nunku Yuda ne Benyamina biakashala biende.

13 Bakuidi ne bena Lewi bavua mu Isalele mujima bakamulamata yeye, bobu kumbuka mu bitupa bionso bia maloba abu. 14 Bena Lewi bakashiya mpata yabu ya kudishila nyama ne maloba abu,+ bobu kulua mu Yuda ne mu Yelushalema, bualu Yalobama ne bana bende ba balume bavua babumbushe bua kabenji mudimu bu bakuidi ba Yehowa to.+ 15 Pashishe Yalobama wakateka bakuidi bende yeye bua miaba mitumbuke,+ bua bademon bavua benze bu mbuji*+ ne bua tuana tua ngombe tuvuaye muenze.+ 16 Nunku bantu ba mu bisa bionso bia Isalele bavua badisuike mu muoyo wabu bua kukeba Yehowa Nzambi wa Isalele bakabalonda ku Yelushalema bua kufila milambu kudi Yehowa Nzambi wa bankambua babu.+ 17 Bua bidimu bisatu bakakolesha bukalenge bua Yuda, bobu kutua Lehabama muana wa Solomo nyama ku mikolo, bualu bakendela mu njila wa Davidi ne wa Solomo bidimu bisatu.

18 Pashishe Lehabama wakasela Mahalata uvua muana wa Yelimota muana wa Davidi ne wa Abihayila muana wa bakaji wa Eliaba muana wa Yishai.+ 19 Pakapita matuku wakamulelela bana ba balume: Yeusha, Shemaliya, ne Zahama. 20 Panyima pa yeye mumane kumusela, wakasela Mâka muikulu wa Abashaloma.+ Pakapita matuku wakamulelela Abiya,+ Atai, Ziza, ne Shelomita. 21 Lehabama wakananga Mâka muikulu wa Abashaloma kupita bakaji bende bakuabu bonso ne bakaji bavuaye mubanjije,+ bualu uvua musele bakaji 18 ne mubanjije bakaji 60, ne wakalela bana ba balume 28 ne ba bakaji 60. 22 Nunku Lehabama wakateka Abiya muana wa Mâka bu mfumu ne mulombodi munkatshi mua bana babu, bualu uvua ujinga kumuteka mukalenge. 23 Kadi wakenza malu ne lungenyi, kutumaye* bamue ba ku bana bende ba balume mu bitupa bionso bia maloba a mu Yuda ne mu Benyamina, mu bimenga bikolesha bionso,+ kubapeshaye biakudia bia bungi ne kubaselelaye bakaji ba bungi.

12 Diakamue bobu bamane kujadika bukalenge bua Lehabama bikole+ ne yeye mumane kupeta bukole, wakalekela mikenji ya Yehowa,+ yeye pamue ne Isalele mujima. 2 Mu tshidimu tshitanu tshia mukalenge Lehabama, Shishaka+ mukalenge wa Ejipitu wakabanda bua kuluisha Yelushalema, bualu bavua bapange lulamatu kudi Yehowa. 3 Uvua ne matempu 1 200, bendeshi ba tubalu binunu 60, ne bisumbu bia basalayi bungi kabuyi kubala bivuaye mulue nabi kumbukila ku Ejipitu: bena Libi, bena Sukiya, ne bena Etshiopi.+ 4 Wakakuata bimenga bikolesha bia mu Yuda ne ndekelu wa bionso kufikaye ku Yelushalema.

5 Muprofete Shemaya+ wakaya kudi Lehabama ne kudi bakokeshi ba mu Yuda bavua badisangishe ku Yelushalema bua bualu bua Shishaka, kubambilaye ne: “Yehowa udi wamba ne: ‘Nudi bandekele, ke bualu kayi meme panyi ndi munulekele+ mu tshianza tshia Shishaka.’” 6 Ke bakokeshi ba mu Isalele ne mukalenge kudipuekeshabu,+ kuambabu ne: “Yehowa mmuakane.” 7 Pavua Yehowa mumone ne: bavua badipuekeshe, dîyi dia Yehowa diakalua kudi Shemaya diamba ne: “Mbadipuekeshe. Tshiakubabutula to,+ ne nembasungile mu katupa kakese emu. Tshiakuitshikijila Yelushalema tshiji tshianyi ku diambuluisha dia Shishaka to. 8 Kadi bobu nebalue bena mudimu bende, bua bamanye dishilangana didi pankatshi pa kungenzela mudimu ne kuenzela bakalenge ba* maloba makuabu mudimu.”

9 Nunku Shishaka mukalenge wa Ejipitu wakabanda bua kuluisha Yelushalema. Wakangata bintu bia mushinga bia mu nzubu wa Yehowa+ ne bintu bia mushinga bia mu nzubu* wa mukalenge. Wakangata bintu bionso, kusangisha ne ngabu ya or ivua Solomo muenze.+ 10 Nunku mukalenge Lehabama wakenza ngabu ya tshiamu tshia mitaku bua kuyipingaja pa muaba wayi, ne wakayipesha bamfumu ba balami* bavua balama ku tshibuelelu tshia nzubu wa mukalenge bua bikale bayilama. 11 Dîba dionso divua mukalenge ulua ku nzubu wa Yehowa, balami bavua babuela bayambula, ne pashishe bavua bayipingaja mu nzubu wa balami. 12 Bu muvua mukalenge mudipuekeshe, tshiji tshia Yehowa tshiakumbuka kudiye,+ ne kakababutula bonso to.+ Kuvua kabidi malu mimpe makuabu avuabu basangane mu Yuda.+

13 Mukalenge Lehabama wakakolesha bukokeshi buende mu Yelushalema ne wakatungunuka ne kukokesha; Lehabama uvua ne bidimu 41 pavuaye mulue mukalenge, ne wakakokesha bidimu 17 mu Yelushalema, tshimenga tshivua Yehowa musungule mu bisa bionso bia Isalele bua tshikale muaba wa kuteka dîna diende. Dîna dia mamuende wa mukalenge divua Nâmaha muena Amona.+ 14 Kadi yeye wakenza malu mabi, bualu kavua mudisuike mu muoyo wende bua kukeba Yehowa to.+

15 Bua malu a Lehabama, kutuadijila ku mbangilu kuawu too ne ku ndekelu kuawu, ki mmafunda mu mêyi a muprofete Shemaya+ ne a Ido+ mumonyi wa bikena kumona mu difunda dia dilondangana dia mêku anyi? Kuvua mvita misangu yonso pankatshi pa Lehabama ne Yalobama.+ 16 Pashishe Lehabama wakalala bua kuikisha ne bankambua bende ne bakamujiika mu Tshimenga tshia Davidi;+ muanende Abiya+ wakalua mukalenge pa muaba wende.

13 Mu tshidimu tshia 18 tshia mukalenge Yalobama, Abiya wakalua mukalenge wa Yuda.+ 2 Wakakokesha mu Yelushalema bidimu bisatu. Dîna dia mamuende divua Mikaya+ muana wa Uliele muena Gibea.+ Kuvua mvita pankatshi pa Abiya ne Yalobama.+

3 Nunku Abiya wakaya ku mvita ne tshiluilu tshia bilobo binunu 400 bilongesha mvita.*+ Kadi Yalobama wakela mualu wa mvita bua kuluangana nende muikale ne bantu balongesha mvita* binunu 800, bikale bilobo bia mvita. 4 Mpindieu Abiya wakimana pa mukuna wa Semalayima udi mu buloba bua mikuna bua Efelayima, kuambaye ne: “Wewe Yalobama ne Isalele mujima, ntelejayi.5 Kanuena bamanye ne: Yehowa Nzambi wa Isalele uvua mupeshe Davidi, yeye ne bana bende ba balume,+ bukalenge ku mutu kua Isalele bua kashidi+ ku diambuluisha dia tshipungidi tshia mukele* anyi?+ 6 Kadi Yalobama+ muana wa Nebata, muena mudimu wa Solomo muana wa Davidi, wakajuka, kutombokelaye mfumuende.+ 7 Bantu tshianana bavua kabayi ne tshia kuenza bavua anu badisangisha kudiye. Nunku bakatamba Lehabama muana wa Solomo patshivua Lehabama muana, kayi ne muoyo mukole, ne yeye kavua mua kubatua tshiadi to.

8 “Mpindieu nudi nuela meji ne: nuenu nudi mua kutua bukalenge bua Yehowa budi mu tshianza tshia bana ba Davidi tshiadi bualu nudi musumba munene ne nudi ne tuana tua ngombe tua or tuvua Yalobama muenze bua tuikale nzambi yenu.+ 9 Kanuena bipate bakuidi ba Yehowa,+ ndelanganyi ya Alona, ne bena Lewi, ne kanuena bateke bakuidi benu nuenu anu bu mudi bisamba bia mu maloba makuabu bienze anyi?+ Muntu yonso uvua ulua ne* muana mulume wa ngombe ne bimpanga bia mikoko muanda mutekete uvua ulua muakuidi wa bintu bidi kabiyi nzambi. 10 Kadi buetu tuetu, Yehowa n’Nzambi wetu,+ ne katuena bamulekele to; bakuidi betu, ndelanganyi ya Alona, badi benzela Yehowa mudimu, ne bena Lewi badi bambuluisha mu mudimu au. 11 Badi bafuimishila Yehowa milambu ya kuosha dinda dionso ne dilolo dionso+ pamue ne musenga wa manananshi wa mupuya muimpe,+ ne milongo ya mampa*+ idi pa mêsa a or muimpe menemene, ne badi batemesha tshitekelu tshia miendu tshia or+ ne miendu yatshi dilolo dionso,+ bualu tudi tukumbaja mudimu utudi ne bua kuenzela Yehowa Nzambi wetu; kadi nuenu nudi bamulekele. 12 Mpindieu tangilayi, Nzambi mulelela udi netu, wenda utulombola, ne bakuidi bende ne mpungi ya mvita bua kunuelela mpungi wa mvita. Nuenu bantu ba mu Isalele, kanuluanganyi ne Yehowa Nzambi wa bankambua benu to, bualu kanuakukumbana to.”+

13 Kadi Yalobama wakatuma bantu bua baye kubalamina bua babapatukile panyima, bienza bua bikale batangilangane ne Yuda ne bantu bavua baye kualamina bikale panyima pabu. 14 Pavua bantu ba mu Yuda bakudimuke, bakamona ne: bavua ne bua kuluangana mvita kumpala ne panyima. Ke bobu kutuadija kudidila Yehowa,+ pavua eku bakuidi bela mpungi bikole. 15 Bantu ba mu Yuda bakela lubila lua mvita, ne pavua bantu ba mu Yuda bele lubila lua mvita, Nzambi mulelela wakatshimuna Yalobama ne Isalele mujima kumpala kua Abiya ne Yuda. 16 Bena Isalele bakanyema kumpala kua Yuda, ne Nzambi wakabafila mu tshianza tshiabu. 17 Abiya ne bantu bende bakabashipa dishipa dia dikema, ne bena Isalele bavuabu bashipe bavua benda bakuluka, bantu binunu 500 balongesha mvita.* 18 Nunku bantu ba mu Isalele bakapuekeshibua milongo dîba adi, kadi bantu ba mu Yuda bakabatamba bukole bualu bavua beyemene* Yehowa Nzambi wa bankambua babu.+ 19 Abiya wakatungunuka ne kulondakaja Yalobama ne kumunyengaye bimenga ebi: Betele+ ne misoko ya kumpenga kuende,* Yeshana ne misoko ya kumpenga kuende, Efelayina+ ne misoko ya kumpenga kuende. 20 Yalobama kakapetulula kabidi bukole buende mu matuku a Abiya to; pashishe Yehowa wakamukuma, yeye kufua.+

21 Kadi Abiya wakapeta bukole bua bungi. Pakapita matuku wakasela bakaji 14,+ yeye kulela bana ba balume 22 ne ba bakaji 16. 22 Malu adi mashale a ku malu a Abiya, bienzedi biende ne mêyi ende, mmafunda mu mifundu* ya muprofete Ido.+

14 Pashishe Abiya wakalala bua kuikisha ne bankambua bende, ne bakamujiika mu Tshimenga tshia Davidi;+ ne muanende Asa wakalua mukalenge pa muaba wende. Mu matuku ende buloba buakashala mu dikisha bidimu dikumi.

2 Asa wakenza malu mimpe ne makane ku mêsu kua Yehowa Nzambi wende. 3 Wakumbusha bioshelu bia nzambi ya ku babende+ ne miaba mitumbuke, kuzazaye makunji a tshijila,+ ne kukosaye mitshi ya tshijila.*+ 4 Wakambila kabidi bena Yuda bua kukeba Yehowa Nzambi wa bankambua babu ne bua kutumikila mikenji yende ne mêyi ende. 5 Nunku wakumbusha miaba mitumbuke ne bioshelu bia musenga wa manananshi+ mu bimenga bionso bia mu Yuda, ne mu bukokeshi buende, bukalenge buakatungunuka kabayi babutatshisha. 6 Wakibaka bimenga bikolesha mu Yuda,+ bualu kabavua batatshisha buloba ne kabavua bamuela mvita mu bidimu abi to, bualu Yehowa uvua mumupeshe dikisha.+ 7 Wakambila Yuda ne: “Tuibakayi bimenga ebi ne tubinyungulule ne bimanu ne bibumba,+ biibi* ne milonda. Bualu buloba butshidi mu bianza bietu bu mutudi bakebe Yehowa Nzambi wetu. Tudi bamukebe, ne yeye mmutupeshe dikisha ku nseke yonso.” Nunku midimu yabu ya luibaku yakaya kumpala bimpe.+

8 Asa uvua ne tshiluilu tshia bantu ba mu Yuda binunu 300, bikale ne ngabu minene ne mafuma. Mu Benyamina uvua kabidi ne bilobo bia mvita binunu 280 bivua biambula ngabu mikese,* bikale kabidi ne mata a mikete.*+

9 Pakapita matuku Zela muena Etshiopi wakalua bua kubaluisha ne tshiluilu tshia bantu muliyo umue ne matempu 300.+ Pakafikaye ku Malesha,+ 10 Asa wakapatuka bua kumuluisha ne bakela mualu wa mvita mu Tshibandabanda tshia Zefata ku Malesha. 11 Ke Asa kubikila Yehowa Nzambi wende,+ kuambaye ne: “Yehowa wanyi, buebe wewe kabiena ne bualu nansha baudi wambuluisha bikale ba bungi anyi kabayi ne bukole.+ Tuambuluisha koku, Yehowa Nzambi wetu, bualu tudi tukueyemena,*+ ne tudi balue bua kuluisha musumba wa bantu eu mu dîna diebe.+ Wewe Yehowa udi Nzambi wetu. Kuitabi bua muntu wetu ufuafua eu akupite bukole to.”+

12 Nunku Yehowa wakatshimuna bena Etshiopi kumpala kua Asa ne kumpala kua Yuda, ne bena Etshiopi bakanyema.+ 13 Asa ne bantu bavuaye nabu bakabalondakaja too ne ku Gelâ,+ ne bena Etshiopi bakatungunuka ne kukuluka too ne pavuaku kakuyi kushale muntu nansha umue ne muoyo, bualu Yehowa ne tshiluilu tshiende bavua babazaze. Pashishe bakaya ne bintu bia bungi menemene bivuabu banyenge. 14 Bakaluisha kabidi bimenga bionso bivua binyunguluke Gelâ, bualu buôwa bukole bua kudi Yehowa buvua bubakuate; bakapawula bimenga bionso, bualu kuvua bintu bia bungi bia kupawulamu. 15 Bakaluisha kabidi ntenta ya bantu bavua ne bimuna, bobu kukuata bisumbu bia mikoko bia bungi ne tumelu, pashishe kupinganabu ku Yelushalema.

15 Mpindieu nyuma wa Nzambi wakatulukila Azaya muana wa Odede. 2 Nunku wakapatuka bua kutuilangana ne Asa, kumuambilaye ne: “Wewe Asa ne Yuda mujima ne Benyamina, ntelejayi! Yehowa udi nenu misangu yonso inudi nushala nende;+ nuenu bamukebe, neenze bua numupete,+ kadi nuenu bamulekele, neanulekele.+ 3 Isalele uvua mushale musangu mule* kayi ne Nzambi mulelela, kayi ne muakuidi ulongesha ne kayi ne mikenji.+ 4 Kadi pavuabu bapingane kudi Yehowa Nzambi wa Isalele ne bamukebe mu dikenga diabu, wakenza bua bamupete.+ 5 Mu bikondo abi muntu nansha umue kavua mua kuenza luendu kakuyi njiwu* to, bualu kakuvua ditalala nansha dikese munkatshi mua bantu bonso ba mu maloba au to. 6 Tshisamba tshimue tshivua tshizaza tshisamba tshikuabu ne tshimenga tshimue tshizaza tshimenga tshikuabu, bualu Nzambi uvua mubalekele mu kayumbayumba ne makenga a mishindu yonso.+ 7 Kadi nuenu, ikalayi ne bukole ne kanuteketshi mu mikolo* to,+ bualu nebafute mudimu wenu.”

8 Diakamue pakumvua Asa mêyi aa ne dîyi dia buprofete dia muprofete Odede, wakapeta dikima, kumbushaye mpingu ya muendi mu buloba buonso bua Yuda+ ne bua Benyamina ne mu bimenga bivuaye mukuate mu buloba bua mikuna bua Efelayima, ne wakalongolola tshioshelu tshia Yehowa tshivua kumpala kua lutanda lua Yehowa.+ 9 Wakasangisha kabidi Yuda mujima ne Benyamina ne bantu bavua basombe buenyi bavuabu nabu ba ku Efelayima ne Manashe ne Simeona,+ bualu bavua banyeme Isalele ba bungi menemene baye kudiye pavuabu bamone ne: Yehowa Nzambi wende uvua nende. 10 Nunku bakasangishibua ku Yelushalema mu ngondo muisatu wa tshidimu tshia 15 tshia bukokeshi bua Asa. 11 Dituku adi bakalambula Yehowa bintu bia mu bintu bivuabu banyenge mu mvita balue nabi, ngombe 700 ne mikoko 7 000. 12 Bakabuela kabidi mu tshipungidi bua kukeba Yehowa Nzambi wa bankambua babu ne muoyo wabu wonso ne anyima* wabu yonso.+ 13 Bavua ne bua kushipa muntu yonso uvua kayi ukeba Yehowa Nzambi wa Isalele, nansha yeye mukese anyi munene, mulume anyi mukaji.+ 14 Nunku bakaditshipa kudi Yehowa ne dîyi dikole ne mbila ya disanka, bikale ne mpungi ne nsengu. 15 Bena Yuda bonso bavua basanke bua mutshipu au, bualu bavua baditshipe ne muoyo wabu wonso ne bavua bamukebe ne muoyo mujima, ke yeye kuenza bua bamupete,+ ne Yehowa wakatungunuka ne kubapesha dikisha ku nseke yonso.+

16 Mukalenge Asa wakumbusha too ne kakuende Mâka+ pa muaba wende wa mamu mukalenge mukaji,* bualu uvua muenze lupingu lua bundu bua ntendelelu wa mutshi wa tshijila.*+ Asa wakakosa lupingu luende lua bundu alu, kuluzazaye ne kuluoshaye mu Tshibandabanda tshia Kidilona.+ 17 Kadi miaba mitumbuke kayivua miumbusha+ mu Isalele to.+ Nansha nanku, muoyo wa Asa uvua mujima* matuku ende onso a muoyo.*+ 18 Wakabueja bintu bivuaye yeye ne tatuende bavuije bia tshijila mu nzubu wa Nzambi mulelela, mmumue ne: arjan, or, ne bintu bishilashilangane.+ 19 Kakuakenzeka mvita too ne mu tshidimu tshia 35 tshia bukokeshi bua Asa to.+

16 Mu tshidimu tshia 36 tshia bukokeshi bua Asa, Bâsha+ mukalenge wa Isalele wakabanda bua kuluisha Yuda, kubangaye kukolesha* Lama+ bua kupangisha muntu yonso mua kupatuka anyi kubuela kudi* Asa mukalenge wa Yuda.+ 2 Ke Asa kupatulaye arjan ne or bivua mu bibutshilu bia nzubu wa Yehowa+ ne nzubu* wa mukalenge, wakabituma kudi Bene-hadada mukalenge wa Sulia+ uvua musombele mu Damaseke wamba ne: 3 “Tudi bapunge nebe dîyi* ne tatuanyi uvua mupunge dîyi ne tatuebe. Ndi nkutumina arjan ne or. Luaku, ushipe dîyi* diuvua mupunge ne Bâsha mukalenge wa Isalele bua yeye umbuke kundi.”

4 Bene-hadada wakateleja mukalenge Asa, yeye kutuma bamfumu ba biluilu biende bua kuluisha bimenga bia Isalele, ne bakatshimuna Iyona,+ Dana,+ Abele-maima, ne miaba yonso ya kulamina bintu ya bimenga bia Nafatale.+ 5 Pavua Bâsha mumvue bualu abu, wakalekela diakamue kuibaka* Lama ne kulekelaye mudimu uvuaye wenza muaba au. 6 Nunku mukalenge Asa wakangata Yuda mujima, bobu kuambula mabue ne mabaya bia mu Lama+ bivua Bâsha wibaka nabi,+ kuyabu nabi, ne wakakolesha* nabi Geba+ ne Misepa.+

7 Tshikondo atshi mumonyi wa malu Hanani+ wakaya kudi Asa mukalenge wa Yuda, kumuambilaye ne: “Bu muuvua mueyemene* mukalenge wa Sulia kuyi mueyemene* Yehowa Nzambi webe, tshiluilu tshia mukalenge wa Sulia ntshipanduke mu tshianza tshiebe.+ 8 Bena Etshiopi ne bena Libi kabavua tshiluilu tshinene menemene bikale ne matempu a bungi ne bendeshi ba tubalu anyi? Kadi bu muuvua mueyemene Yehowa, yeye uvua mubafile mu tshianza tshiebe.+ 9 Bualu mêsu a Yehowa adi akenzakana pa buloba bujima+ bua kuleja bukole buende* kudi bantu badi ne muoyo mujima* kudiye.+ Wewe udi muenze malu ne bupote bua bungi mu tshilumbu etshi; kutuadijila ku lelu nebikale anu bakuela mvita.”+

10 Kadi Asa wakafiikila mumonyi wa malu munda, kumuelaye mu buloko* bualu uvua mumukuatshile tshiji tshikole bua bualu ebu. Asa wakatuadija kukengesha bantu bakuabu ba mu tshisamba tshikondo tshimue tshimue atshi. 11 Nunku malu a Asa, kutuadijila ku mbangilu kuawu too ne ku ndekelu kuawu, mmafunda mu Mukanda wa Bakalenge ba Yuda ne ba Isalele.+

12 Mu tshidimu tshia 39 tshia bukokeshi bua Asa, disama diakamukuata ku makasa too ne pakabangaye kusama bikole; nansha mu disama diende, kakaya kudi Yehowa to, kadi wakaya kudi buondopianganyi. 13 Pashishe Asa wakalala bua kuikisha ne bankambua bende;+ wakafua mu tshidimu tshia 41 tshia bukokeshi buende. 14 Nunku bakamujiika muaba munene wa kujiikilangana uvuaye mudiumbuile mu Tshimenga tshia Davidi,+ ne bakamuladika pa kalalu kuwuja ne mafuta a mutshi wa bome ne bintu bishilashilangane bia mishindu yonso bia mupuya muimpe bisambakaja bilue mafuta a pa buawu.+ Bakamutemeshila kabidi kapia kanene ka dikema bua kumujiika.*

17 Muanende Yehoshafata+ wakalua mukalenge pa muaba wende, ne wakakolesha bukokeshi buende ku mutu kua Isalele. 2 Wakateka biluilu bia basalayi mu bimenga bikolesha bionso bia mu Yuda, kutekaye bisumbu bia basalayi mu buloba bua Yuda ne mu bimenga bia mu Efelayima bivua tatuende Asa mukuate.+ 3 Yehowa wakatungunuka ne kuikala ne Yehoshafata bualu uvua muendele mu njila ivua nkambua wende Davidi muendele kale+ ne kavua mukebe Babâla to. 4 Bualu uvua mukebe Nzambi wa tatuende+ ne uvua mulonde* mêyi ende, kayi mulonde bilele bia Isalele to.+ 5 Yehowa wakashindamija bukalenge mu tshianza tshiende bikole;+ Yuda mujima wakatungunuka ne kupesha Yehoshafata mapa, ne yeye uvua ne bubanji ne butumbi bia bungi.+ 6 Muoyo wende wakapeta dikima mu njila ya Yehowa, kumbushaye too ne miaba mitumbuke+ ne mitshi ya tshijila*+ mu Yuda.

7 Mu tshidimu tshisatu tshia bukokeshi buende, wakabikidisha bakokeshi ba mu bukalenge buende: Bene-hayila, Obadaya, Zekâya, Netanele, ne Mikaya bua kulongesha mu bimenga bia mu Yuda. 8 Bavua ne bena Lewi: Shemaya, Netanya, Zebadaya, Asahele, Shemilamota, Yehonatana, Adoniya, Tobiyahu, ne Toba-adoniya, pamue ne muakuidi Elishama ne muakuidi Yeholama.+ 9 Bakatuadija kulongesha mu Yuda, bikale ne mukanda wa Mikenji ya Yehowa,+ bobu kunyunguluka mu bimenga bionso bia mu Yuda benda balongesha bantu.

10 Buôwa bukole bua kudi Yehowa buakakuata makalenge onso a maloba avua manyunguluke Yuda, ne kabakaluisha Yehoshafata to. 11 Bena Peleshete bavua batuadila Yehoshafata mulambu wa mapa ne makuta. Bena Arabe bavua bamutuadila bimpanga bia mikoko 7 700 ne mbuji ya mpumbu 7 700 bia mu bisumbu biabu bia nyama.

12 Yehoshafata wakatungunuka anu ne kupeta bukole bua bungi,+ ne wakatungunuka ne kuibaka miaba mikolesha+ ne bimenga bia kulamina bintu+ mu Yuda. 13 Wakenza malu manene mu bimenga bia mu Yuda, ne uvua ne basalayi, bilobo bia mvita, mu Yelushalema. 14 Bavua batapulule bantu aba mu bisumbu mu bisumbu bilondeshile nzubu ya batatuabu: mu Yuda bamfumu ba bantu tshinunu tshinunu, Adenaha mfumu, ne yeye uvua ne bilobo bia mvita binunu 300.+ 15 Ku bukokeshi buende kuvua Yehohanana mfumu, ne yeye uvua ne bantu binunu 280. 16 Ku bukokeshi buende kuvua kabidi Amasiya muana wa Zikeli uvua mudifile ku budisuile bua mudimu wa Yehowa, ne uvua ne bilobo bia mvita binunu 200. 17 Mu Benyamina+ muvua Eliada, tshilobo tshia mvita, ne uvua ne bantu binunu 200 bikale ne mata a mikete ne ngabu.+ 18 Ku bukokeshi buende kuvua Yehozabada, ne uvua ne bantu binunu 180 bikale ne bia mvita bua kuikala mu tshiluilu. 19 Bantu aba bavua benzela mukalenge mudimu kusakidila ku bavua mukalenge muteke mu bimenga bikolesha mu Yuda mujima.+

18 Yehoshafata uvua ne bubanji ne butumbi bia bungi,+ kadi wakadia tshipungidi tshia dibaka ne Ahaba.+ 2 Nunku pakapita bidimu wakapueka kudi Ahaba ku Samalea,+ ne Ahaba wakalambula mikoko ne ngombe bia bungi buende yeye ne bua bantu bavuaye nabu. Wakamusengelela* bua babande nende bua kuluisha Lamota-gilada.+ 3 Ke Ahaba mukalenge wa Isalele kuambilaye Yehoshafata mukalenge wa Yuda ne: “Neuye nanyi ku Lamota-gilada anyi?” Wakamuandamuna ne: “Meme ndi bu wewe, bantu banyi badi bu bantu bebe ne netukuambuluishe mu mvita.”

4 Kadi Yehoshafata wakambila mukalenge wa Isalele ne: “Anji ebejaku dîyi dia Yehowa.”+ 5 Nunku mukalenge wa Isalele wakasangisha baprofete pamue, bantu 400, kubebejaye ne: “Tuye ku mvita bua kuluisha Lamota-gilada anyi ndekele?” Bakandamuna ne: “Banda, ne Nzambi mulelela neamufile mu tshianza tshia mukalenge.”

6 Pashishe Yehoshafata wakamba ne: “Kakuenaku muprofete wa Yehowa muaba eu anyi?+ Tuebeje kabidi malu ku butuangaji buende.”+ 7 Ke mukalenge wa Isalele kuambila Yehoshafata ne: “Kutshidi muntu mukuabu+ utudi mua kuebeja Yehowa malu ku butuangaji buende; kadi meme ndi mumukine, bualu katu wamba ne: malu mimpe neamfikile to, kadi anu malu mabi.+ M’Mikaya muana wa Yimela.” Kadi Yehoshafata wakamba ne: “Mukalenge kena ne bua kuamba bualu bua mushindu eu to.”

8 Nunku mukalenge wa Isalele wakabikila muena mudimu kampanda wa mu lubanza lua mukalenge, kuambaye ne: “Luaku ne Mikaya muana wa Yimela lukasa lukasa.”+ 9 Mpindieu mukalenge wa Isalele ne Yehoshafata mukalenge wa Yuda bavua basombe muntu yonso mu nkuasa wende wa bukalenge, bavuale bilamba bia bukalenge; bavua basombe muaba wa tshishipuidi ku tshibuelelu tshia tshiibi tshia Samalea, ne baprofete bonso bavua bamba mêyi a buprofete kumpala kuabu. 10 Pashishe Sedekiya muana wa Kenâna wakadienzela nsengu ya tshiamu tshifiike, kuambaye ne: “Yehowa udi wamba nunku: ‘Neutue bena Sulia nsengu eyi* too ne pawababutula.’” 11 Baprofete bakuabu bonso bavua bamba mêyi a buprofete mushindu wa muomumue bamba ne: “Banda ku Lamota-gilada ne malu ebe neende bimpe;+ Yehowa neamufile mu tshianza tshia mukalenge.”

12 Nunku muntu uvuabu batume ne mukenji bua kubikila Mikaya wakamuambila ne: “Tangila! Baprofete badi dîyi dimue, bamba malu mimpe bua mukalenge. Mêyi ebe ikalaku bu mêyi abu,+ ne wakule bimpe bua mukalenge.”+ 13 Kadi Mikaya wakamba ne: “Bushuwa, anu bu mudi Yehowa ne muoyo, tshionso tshidi Nzambi wanyi wamba ke tshingamba.”+ 14 Nunku wakaya kudi mukalenge, mukalenge kumuebeja ne: “Mikaya, tuye ku mvita bua kuluisha Lamota-gilada, anyi ndekele?” Diakamue wakamuandamuna ne: “Banda ne malu ebe neende bimpe; nebafidibue mu tshianza tshienu.” 15 Ke mukalenge kumuambila ne: “Nenkutshipishe misangu bungi kayi bua kubenga kungambila bualu bukuabu kadi anu bulelela mu dîna dia Yehowa?” 16 Nunku wakamba ne: “Ndi mumone bena Isalele bonso batangalake pa mikuna bu mikoko idi kayiyi ne mulami.+ Yehowa wakamba ne: ‘Bantu aba kabena ne mfumu to. Muntu yonso apingane kuende mu ditalala.’”

17 Nunku mukalenge wa Isalele wakambila Yehoshafata ne: “Tshivua mukuambile ne: ‘Kakuamba ne: malu mimpe neamfikile, anu malu mabi’ anyi?”+

18 Ke Mikaya kuamba ne: “Mpindieu teleja dîyi dia Yehowa: Mvua mumone Yehowa musombe mu nkuasa wende wa bukalenge+ ne tshiluilu tshionso tshia mu diulu+ tshimane ku dia balume diende ne ku dia bakaji diende.+ 19 Pashishe Yehowa wakebeja ne: ‘Nnganyi wadingakaja Ahaba mukalenge wa Isalele bua abande ne afuile ku Lamota-gilada?’ Umue uvua wamba bualu bumue, ne mukuabu wamba bualu bukuabu. 20 Nunku nyuma* kampanda+ wakasemena kumpala, kuimanaye kumpala kua Yehowa, kuambaye ne: ‘Meme nemmudingakaje.’ Yehowa wakamuebeja ne: ‘Neumudingakaje mushindu kayi?’ 21 Wakandamuna ne: ‘Nenye ne nendue nyuma udi udingangana mukana mua baprofete bende bonso.’ Nunku wakamba ne: ‘Neumudingakaje, ne bualu bukuabu, neukumbaje tshiudi uyila. Ndaku, wenze nanku.’ 22 Nunku mpindieu Yehowa mmuele nyuma wa kudingangana mukana mua baprofete bebe aba,+ kadi Yehowa mmuambe ne: dikenga nedikukuate.”

23 Mpindieu Sedekiya+ muana wa Kenâna wakasemena, kukumaye Mikaya+ ku ditama,+ kuambaye ne: “Nyuma wa Yehowa mmumbuke kundi mupitshile njila kayi bua kuakula nebe?”+ 24 Mikaya wakandamuna ne: “Tangila! Neumone njila uvuaye mupitshile dituku diwabuela mu nzubu wa munda menemene bua kusokoma.” 25 Pashishe mukalenge wa Isalele wakamba ne: “Angata Mikaya umufile kudi Amona mfumu wa tshimenga ne kudi Yoasha muana wa mukalenge. 26 Ubambile ne: ‘Mukalenge udi wamba nunku: “Elayi muntu eu mu buloko,+ ne nuikale numupesha mampa ne mâyi bungi bushadile too ne pangapingana mu ditalala.”’” 27 Kadi Mikaya wakamba ne: “Wewe anu mupingane mu ditalala, Yehowa ki mmuakule nanyi to.”+ Pashishe wakamba kabidi ne: “Nuenu bantu bonso, kuatayi bualu ebu.”

28 Nunku mukalenge wa Isalele ne Yehoshafata mukalenge wa Yuda bakabanda ku Lamota-gilada.+ 29 Ke mukalenge wa Isalele kuambila Yehoshafata ne: “Nendivuije bu muntu mukuabu ne nenye mu mvita, kadi wewe udi ne bua kuvuala bilamba biebe bia bukalenge.” Nunku mukalenge wa Isalele wakadivuija bu muntu mukuabu, kubuelabu mu mvita. 30 Mpindieu, mukalenge wa Sulia uvua mutumine balombodi bende ba matempu dîyi ne: “Kanuluishi muntu mukuabu, mukese anyi munene to, nuluishe anu mukalenge wa Isalele.” 31 Diakamue pavua balombodi ba matempu bamone Yehoshafata, bakadiambila ne: “Eu ke mukalenge wa Isalele.” Nunku bakakudimuka bua kumuluisha; ne Yehoshafata wakatuadija kuela mbila ulomba diambuluisha,+ ne Yehowa wakamuambuluisha; Nzambi wakabayishila kua tshianana, kumbukabu kudiye diakamue. 32 Pavua balombodi ba matempu bamone ne: kavua mukalenge wa Isalele, bakapingana diakamue, kulekelabu kumulonda.

33 Kadi muntu kampanda wakela mukete ku mpukapuka,* kuasaye mukalenge wa Isalele pankatshi pa bilungidi bia kazaku kende ka mvita ka tuamu. Nunku mukalenge wakambila muntu uvua umuendesha mu ditempu ne: “Kudimuka, upatuke nanyi mu mvita,* bualu mbantape bibi be!”+ 34 Mvita yakakunza dituku dijima adi, ne bavua ne bua kuimanyika mukalenge wa Isalele mu ditempu, mutangile bena Sulia too ne ku dilolo; wakafua pakabuela dîba.+

19 Pashishe Yehoshafata mukalenge wa Yuda wakapingana ku nzubu* kuende mu Yelushalema kayi mupete njiwu.*+ 2 Yehu+ muana wa Hanani+ mumonyi wa bikena kumona wakapatuka bua kutuilangana ne mukalenge Yehoshafata, kumuambilaye ne: “Muntu mubi ke uudi ne bua kuambuluisha+ ne bantu badi bakine Yehowa ke baudi ne bua kunanga anyi?+ Bua bualu ebu tshiji tshia Yehowa tshidi nebe. 3 Nansha nanku, kudi malu mimpe adibu basangane kuudi,+ bualu uvua mumbushe mitshi ya tshijila* mu buloba ne udi mulongolole muoyo webe* bua kukeba Nzambi mulelela.”+

4 Yehoshafata wakatungunuka ne kusombela mu Yelushalema, ne wakaya kabidi kudi bantu kumbukila ku Bê-sheba too ne mu buloba bua mikuna bua Efelayima,+ bua kubapingaja kudi Yehowa Nzambi wa bankambua babu.+ 5 Wakateka kabidi balumbuluishi mu buloba buonso mu bimenga bikolesha bionso bia Yuda, mu tshimenga ne mu tshimenga.+ 6 Wakambila balumbuluishi ne: “Nudimuke bua tshinudi nuenza, bualu kanuena nulumbuluisha bua muntu kadi nudi nulumbuluisha bua Yehowa, ne yeye udi nenu panudi nulumbuluisha.+ 7 Mpindieu ditshina dia Yehowa dikale kunudi.+ Nudimuke bua tshinudi nuenza, bualu kudi Yehowa Nzambi wetu kakuena disungulujangana,+ anyi kansungansunga,+ anyi diangata nkosa mishiku.”+

8 Mu Yelushalema kabidi, Yehoshafata wakateka bamue bena Lewi ne bakuidi ne bamue bamfumu ba nzubu ya batatu ya Isalele bua kuikala balumbuluishi bua Yehowa ne bua kukosa bilumbu bua bantu ba mu Yelushalema.+ 9 Wakabambila ne: “Monayi tshinudi ne bua kuenza mu ditshina dia Yehowa, ne lulamatu ne muoyo mujima:* 10 Dîba dionso didi bana benu badi basombela mu bimenga biabu balua ne tshilumbu tshidi tshitangila diela dia mashi panshi+ anyi tshilumbu tshidi tshitangila mukenji kampanda, dîyi, mêyi ne mikandu, anyi mêyi a dilumbuluisha, nudi ne bua kubadimuija bua kabapidi kumpala kua Yehowa to; tshianana tshiji tshiende netshilue kunudi ne kudi bana benu. Ebu ke bualu bunudi ne bua kuenza, bua kanupetshi dipila. 11 Amalia mfumu wa bakuidi udi ku mutu kuenu bua tshilumbu tshionso tshia Yehowa nyeye eu.+ Zebadaya muana wa Yishemaele mmulombodi wa nzubu wa Yuda bua tshilumbu tshionso tshidi tshitangila mukalenge. Bena Lewi nebikale batangidi benu. Ikalayi ne bukole, enzayi mudimu, ne Yehowa ikale ne bantu badi benza tshidi tshimpe.*+

20 Pakapita matuku, bena Moaba+ ne bena Amona+ pamue ne bamue bena Amonima* bakalua bua kuela Yehoshafata mvita. 2 Nunku bakambila Yehoshafata ne: “Musumba munene wa bantu mmulue bua kukuluisha umbukila mu tshitupa tshia buloba tshia ku mbuu,* ku Edome,+ ne mbobu abu mu Hasasona-tamâ, mmumue ne: Ene-gedi.”+ 3 Ke Yehoshafata kupeta buôwa, ne kudisuikaye* bua kukeba Yehowa.+ Nunku wakamba bua bajile biakudia mu Yuda mujima. 4 Pashishe bantu ba mu Yuda bakadisangisha pamue bua kuebeja Yehowa malu;+ bavua bafumina mu bimenga bionso bia mu Yuda bua kuebeja Yehowa malu.

5 Pashishe Yehoshafata wakimana kuulu mu tshisumbu tshia Yuda ne Yelushalema mu nzubu wa Yehowa kumpala kua lubanza lupialupia, 6 kuambaye ne:

“Wewe Yehowa Nzambi wa bankambua betu, wewe kuena Nzambi mu diulu anyi?+ Kuena ne bukokeshi ku mutu kua makalenge onso a bisamba anyi?+ Mu tshianza tshiebe mudi bukokeshi ne bukole, ne muntu nansha umue kena mua kuimana kumpala kuebe to.+ 7 Wewe Nzambi wetu, kuvuaku muipate bena mu buloba ebu kumpala kua tshisamba tshiebe tshia Isalele ne pashishe mubupeshe bana* ba mulunda webe Abalahama bua buikale buloba buabu bua kashidi anyi?+ 8 Bakasombelamu, bobu kukuibakilamu muaba munsantu bua dîna diebe+ bamba ne: 9 ‘Dikenga diodi ditukuate, nansha ku muele wa mvita, ku dilumbuluisha didi dikebesha dikenga, ku tshipupu, anyi ku tshiyole tshia nzala, tuimanaku kumpala kua nzubu eu ne kumpala kuebe (bualu dîna diebe didi mu nzubu eu),+ tukulombe diambuluisha mu dikenga dietu, ne ututelejaku, utupandishe.’+ 10 Mpindieu mona bantu ba mu Amona, mu Moaba ne mu buloba bua mikuna bua Seî,+ bena maloba auvua kuyi muitabile bena Isalele bua kukuata pavuabu bapatuke mu buloba bua Ejipitu. Bakayila kule nabu ne kabakababutula to.+ 11 Mpindieu bakadi batufuta pa kubuela bua kutuipata mu buloba buebe buudi mutupeshe bu bumpianyi.+ 12 Wewe Nzambi wetu, kuakubalumbuluisha anyi?+ Bualu tuetu katuena ne bukole kumpala kua musumba munene wa bantu udi ulua bua kutuluisha eu to; ne katuena bamanye tshitudi ne bua kuenza to,+ kadi mêsu etu adi kuudi.”+

13 Pine apu, bena Yuda bonso bavua bimane kumpala kua Yehowa, bikale ne bana babu ba batekete, bakaji babu, ne bana babu balela.*

14 Pashishe nyuma wa Yehowa wakatulukila Yahaziele muana wa Zekâya muana wa Benaya muana wa Yiele muana wa Matanaya muena Lewi wa mu bana ba Asafa munkatshi mua tshisumbu. 15 Wakamba ne: “Yuda mujima ne nuenu badi basombele mu Yelushalema ne mukalenge Yehoshafata, telejayi! Yehowa udi unuambila nunku: ‘Kanutshinyi anyi kanuikadi ne buôwa bua musumba munene wa bantu eu, bualu mvita ki nyenu to, kadi nya Nzambi.+ 16 Malaba nubapuekele. Nebikale benda babanda ne njila wa ku Sisi, ne nenubapete ku ndekelu kua tshibandabanda* kumpala kua tshipela tshia Yeluele. 17 Kanuena ne bualu bua kuluangana mvita eyi to. Dilongololayi, nushale bimane,+ ne numone lupandu lua Yehowa bua bualu buenu.*+ Wewe Yuda ne Yelushalema, kanutshinyi anyi kanuikadi ne buôwa to.+ Malaba nubapatukile, ne Yehowa neikale nenu.’”+

18 Diakamue Yehoshafata wakinama, kutuaye mpala panshi, ne Yuda mujima ne bantu ba mu Yelushalema bakadiela panshi kumpala kua Yehowa bua kutendelela Yehowa. 19 Pashishe bena Lewi bavua ndelanganyi ya bena Kohata+ ne bena Kola bakajuka bua kutumbisha Yehowa Nzambi wa Isalele ne dîyi dikole menemene.+

20 Pakatshiabu, bakajuka mu dinda menemene, kuyabu mu tshipela tshia Tekoa.+ Pavuabu benda baya, Yehoshafata wakimana kuulu, kuambaye ne: “Nuenu bena Yuda ne nuenu bena mu Yelushalema, ntelejayi! Ikalayi ne ditabuja kudi Yehowa Nzambi wenu bua numone mua kuimana bashindame.* Ikalayi ne ditabuja kudi baprofete bende,+ nunku malu enu neende bimpe.”

21 Yeye mumane kuyukila ne bantu, wakateka bamue bua kuimbila Yehowa misambu+ ne bua kumutumbisha bavuale bintu bilengele bia tshijila pavuabu benda baya bikale kumpala kua bantu bavua ne bia mvita, bamba ne: “Elayi Yehowa tuasakidila, bualu dinanga diende dia lulamatu didi dishalaku kashidi.”+

22 Pakatuadijabu kuimba misambu ya kutumbisha nayi Nzambi ne disanka, Yehowa wakatekela bantu ba mu Amona, ba mu Moaba, ne ba mu buloba bua mikuna bua Seî bavua babuele mu Yuda buteyi, bobu kushipangana nkayabu.+ 23 Bena Amona ne bena Moaba bakakudimukila bantu ba mu buloba bua mikuna bua Seî+ bua kubashipa ne kubabutula; pakajikijanganabu ne bantu ba mu Seî, bakambuluisha bua kushipangana nkayabu.+

24 Kadi pavua bena Yuda bafike ku tshibumba tshia nsentedi tshia ku tshipela+ ne batangile kuvua musumba wa bantu, tangilayi, bakamona bitalu biabu bikuluke panshi;+ kakuvua muntu uvua mushale ne muoyo to. 25 Nunku Yehoshafata ne bantu bende bakalua bua kuambula bintu biabu, bobu kusangana bintu bia bungi munkatshi muabu, bilamba, ne bintu bimpe bivuabu bangate kudibu too ne muvuabu kabayi mua kuambula kabidi tshintu.+ Bakenza matuku asatu bua kuambula bintu abi, bualu bivua bia bungi. 26 Dituku dinayi bakadisangisha pamue mu Tshibandabanda* tshia Belaka, bualu bakatumbisha* Yehowa kuntu aku. Ke bualu kayi bakinyika muaba au ne: Tshibandabanda tshia Belaka,*+ too ne lelu.

27 Pashishe bantu bonso ba mu Yuda ne mu Yelushalema, bikale ne Yehoshafata ku mutu kuabu, bakapingana ku Yelushalema benda basanka, bualu Yehowa uvua mubasankishe bua bualu bua bena lukuna babu.+ 28 Nunku bakabuela mu Yelushalema bikale ne biombelu bia nshinga, ne nzenze,+ ne mpungi,+ kuyabu ku nzubu wa Yehowa.+ 29 Buôwa bukole bua kudi Nzambi buakakuata makalenge onso a mu maloba pavuabu bumvue ne: Yehowa uvua muluangane ne bena lukuna ba Isalele.+ 30 Nunku kabavua batatshisha kabidi bukalenge bua Yehoshafata to, ne Nzambi wende wakatungunuka ne kumupesha dikisha ku nseke yonso.+

31 Yehoshafata wakatungunuka ne kukokesha mu Yuda. Uvua ne bidimu 35 pavuaye mulue mukalenge, ne wakakokesha mu Yelushalema bidimu 25. Dîna dia mamuende divua Azuba muana wa Shilihi.+ 32 Wakatungunuka ne kuendela mu njila wa tatuende Asa.+ Kavua mumbukamu to, ne wakenza malu mimpe ku mêsu kua Yehowa.+ 33 Kadi miaba mitumbuke kayivua miumbusha to,+ ne bantu kabavua banji kulongolola mioyo yabu bua Nzambi wa bankambua babu to.+

34 Bua malu adi mashale a ku malu a Yehoshafata, kutuadijila ku mbangilu kuawu too ne ku ndekelu, monayi, mmafunda mu mêyi a Yehu+ muana wa Hanani+ avuabu balue kuela mu Mukanda wa bakalenge ba Isalele. 35 Panyima pa malu aa, Yehoshafata mukalenge wa Yuda wakadia tshipungidi ne Ahazaya mukalenge wa Isalele uvua muenze malu mabi.+ 36 Nunku wakadisangisha nende bua kuenza mazuwa bua kuyawu ku Tâshishi,+ bobu kuenza mazuwa mu Esione-gebê.+ 37 Kadi Eliezê muana wa Dodawahu wa ku Malesha wakambila Yehoshafata mêyi a buprofete wamba ne: “Bu muudi mudie tshipungidi ne Ahazaya, Yehowa neanyangakaje midimu yebe.”+ Nunku mazuwa akatshibukila mu mâyi,+ ne kaavua mua kuya ku Tâshishi to.

21 Pashishe Yehoshafata wakalala bua kuikisha ne bankambua bende ne bakamujiika ne bankambua bende mu Tshimenga tshia Davidi; muanende Yeholama wakalua mukalenge pa muaba wende.+ 2 Bana babu, bana ba balume ba Yehoshafata bavua: Azaya, Yehiele, Zekâya, Azaya, Mikaele, ne Shefataya; bonso aba bavua bana ba Yehoshafata mukalenge wa Isalele. 3 Tatuabu uvua mubapeshe mapa a bungi a arjan ne or, ne bintu bia mushinga, pamue ne bimenga bikolesha mu Yuda;+ kadi wakapesha Yeholama bukalenge,+ bualu uvua muanabute.

4 Pavua Yeholama muangate bukalenge bua tatuende, wakakolesha bukokeshi buende pa kushipa bana babu bonso+ ku muele wa mvita, kusangisha ne bamue ba ku bakokeshi ba mu Isalele. 5 Yeholama uvua ne bidimu 32 pavuaye mulue mukalenge, ne wakakokesha bidimu muanda mukulu mu Yelushalema.+ 6 Wakendela mu njila wa bakalenge ba Isalele,+ anu muvua ba mu nzubu wa Ahaba benze, bualu muana wa bakaji wa Ahaba uvua mulue mukajende;+ ne wakatungunuka ne kuenza malu mabi ku mêsu kua Yehowa. 7 Kadi Yehowa kavua musue kubutula nzubu wa Davidi bua bualu bua tshipungidi tshivuaye mudie ne Davidi to,+ bualu uvua mulaye bua kumupesha yeye ne bana bende ba balume muendu bua kashidi.+

8 Mu matuku ende Edome wakatombokela Yuda+ ne pashishe kuditekelaye wende mukalenge.+ 9 Nunku Yeholama ne balombodi ba basalayi bende bakasabuka ne matempu ende onso, ne wakajuka butuku butuku, kutshimunaye bena Edome bavua bamunyunguluke yeye ne balombodi ba matempu. 10 Kadi Edome mmushale mutombokele Yuda too ne lelu. Libina+ pende uvua mutomboke tshikondo atshi, bualu uvua mulekele Yehowa Nzambi wa bankambua bende.+ 11 Uvua muenze kabidi miaba mitumbuke+ pa mikuna ya mu Yuda bua kusaka bantu ba mu Yelushalema bua kuenda bundumba bua mu nyuma, ne wakasesuisha Yuda.

12 Ndekelu wa bionso wakapeta mukanda wa kudi muprofete Eliya+ uvua wamba ne: “Yehowa Nzambi wa nkambua webe Davidi udi wamba nunku: ‘Kuena muendele mu njila ya tatuebe Yehoshafata+ anyi mu njila ya Asa+ mukalenge wa Yuda to. 13 Kadi udi wendela mu njila wa bakalenge ba Isalele+ ne usaka Yuda ne bantu ba mu Yelushalema bua kuenda bundumba bua mu nyuma+ anu bu bundumba bua nzubu wa Ahaba,+ ne udi mushipe too ne bana benu nuenu,+ ba mu nzubu wa tatuebe, bavua bakupite wewe. 14 Nunku Yehowa udi ukuma bantu bebe, bana bebe, bakaji bebe, ne bintu biebe bionso mukumu mukole. 15 Neusame masama a bungi, neusame kabidi ne disama dia mala, too ne padi mala ebe akupatuka bua disama adi, ku dituku ku dituku.’”

16 Pashishe Yehowa wakajudila+ Yeholama bena Peleshete*+ ne bena Arabe+ bavua pabuipi ne bena Etshiopi. 17 Nunku bakabuela mu Yuda, kumubuelabu ku bukole, kuangatabu bintu bionso bivuabu basangane mu nzubu* wa mukalenge,+ pamue ne bana bende ne bakaji bende; wakashala anu ne muana umuepele, muanende wa balume wa mukala, Yehoaza.*+ 18 Panyima pa malu onso aa, Yehowa wakamutua disama dia mu mala divuabu kabayi mua kuondopa.+ 19 Pakapita matuku, pakavua bidimu bibidi bulubulu bipite, mala akamupatuka bua disama diende adi, ne wakafua muikale ukenga bikole bua disama diende adi; bantu bende kabavua bamutemeshile kapia bu kapia kavuabu batemeshila bankambua bende to.+ 20 Uvua ne bidimu 32 pavuaye mulue mukalenge, ne wakakokesha bidimu muanda mukulu mu Yelushalema. Muntu nansha umue kakanyingalala pakafuaye to. Nunku bakamujiika mu Tshimenga tshia Davidi,+ kadi ki mmu miaba ya kujiikilangana ya bakalenge to.+

22 Pashishe bantu ba mu Yelushalema bakateka Ahazaya muanende wa balume wa mukala mukalenge pa muaba wende, bualu tshisumbu tshia benzavi tshivua tshilue ne bena Arabe mu tshitudilu tshivua tshishipe bana bende ba bakulumpe bonso.+ Nunku Ahazaya muana wa Yeholama wakabanga kukokesha bu mukalenge wa Yuda.+ 2 Ahazaya uvua ne bidimu 22 pavuaye mulue mukalenge, ne wakakokesha tshidimu tshimue mu Yelushalema. Dîna dia mamuende divua Atalaya+ muikulu* wa Omeli.+

3 Yeye pende wakendela mu njila ya nzubu wa Ahaba,+ bualu mamuende wakalua mumupeshi wa mibelu mu dienza malu mabi. 4 Wakatungunuka ne kuenza malu mabi ku mêsu kua Yehowa anu bu nzubu wa Ahaba, bualu bavua balue bamupeshi ba mibelu panyima pa lufu lua tatuende, bua dibutuka diende. 5 Wakalonda mibelu yabu, ne wakaya ne Yeholama muana wa Ahaba mukalenge wa Isalele bua kuluangana ne Hazaele+ mukalenge wa Sulia ku Lamota-gilada,+ kuvua bedi ba mikete batapile Yeholama. 6 Wakapingana ku Yizelele+ bua mputa ivuabu bamutape ku Lama pavuaye muluangane ne Hazaele mukalenge wa Sulia yuume.+

Ahazaya* muana wa Yeholama+ mukalenge wa Yuda wakapueka ku Yizelele bua kumona Yeholama+ muana wa Ahaba, bualu bavua bamutape.*+ 7 Kadi Nzambi wakenza bua dikuluka dia Ahazaya dienzeke pavuaye mulue kudi Yeholama; pakaluaye, wakapatuka ne Yeholama bua kusambakena ne Yehu+ muikulu* wa Nimishi uvua Yehowa muele manyi bua kubutula* nzubu wa Ahaba.+ 8 Pavua Yehu mubange kulumbuluisha nzubu wa Ahaba, wakapeta bakokeshi ba mu Yuda ne bana ba bana babu ne Ahazaya, bena mudimu ba Ahazaya, kubashipaye.+ 9 Pashishe wakakeba Ahazaya; bakamukuatshila muaba uvuaye musokome mu Samalea, kuluabu nende kudi Yehu. Pashishe bakamushipa, bobu kumujiika+ bualu bakamba ne: “Yeye mmuikulu wa Yehoshafata uvua mukebe Yehowa ne muoyo wende wonso.”+ Kakuvua muntu nansha umue wa mu nzubu wa Ahazaya uvua ne bukole bua kukokesha mu bukalenge to.

10 Pavua Atalaya,+ mamuende wa Ahazaya, mumone ne: muanende uvua mufue, wakajuka, kushipaye ndelanganyi yonso ya bukalenge ya* nzubu wa Yuda.+ 11 Kadi Yehoshabata muana wa mukalenge wakangata Yoasha+ muana wa Ahazaya, kumuibaye mu bana ba mukalenge bavuabu ne bua kushipa, kumutekaye yeye ne ndeji wende mu nzubu wa bulalu wa munda. Yehoshabata muana wa mukalenge Yeholama+ (yeye uvua mukaji wa muakuidi Yehoyada+ ne muanabu ne Ahazaya) wakakokesha bua kumusokoka ku mêsu kua Atalaya, nunku Atalaya kakamushipa to.+ 12 Wakashala nabu bidimu bisambombo, musokoka mu nzubu wa Nzambi mulelela, pavua eku Atalaya ukokesha mu buloba.

23 Mu tshidimu tshia muanda mutekete, Yehoyada wakenza malu ne dikima, kusuikaye dîyi* ne bamfumu ba bantu lukama lukama,+ mbuena kuamba ne: Azaya muana wa Yelohama, Yishemaele muana wa Yehohanana, Azaya muana wa Obeda, Maaseya muana wa Adaya, ne Elishafata muana wa Zikeli. 2 Pashishe bakaya mu Yuda mujima, bobu kusangisha bena Lewi+ ba mu bimenga bionso bia Yuda ne bamfumu ba nzubu ya batatu ya mu Isalele. Pakafikabu ku Yelushalema, 3 tshisumbu tshijima tshiakadia tshipungidi+ ne mukalenge mu nzubu wa Nzambi mulelela, pashishe Yehoyada kubambilaye ne:

“Tangilayi! Muana wa mukalenge neakokeshe anu muvua Yehowa mulaye bua bana ba Davidi.+ 4 Nudi ne bua kuenza nunku: Tshia bisatu tshia bakuidi ne tshia bena Lewi tshikala ku mudimu+ dia Nsabatu netshikale tshilama ku biibi;+ 5 tshia bisatu tshikuabu netshikale ku nzubu* wa mukalenge,+ ne tshia bisatu tshikuabu atshi netshikale ku Tshiibi tshia Tshishimikidi, ne bantu bonso nebikale mu mbanza ya nzubu wa Yehowa.+ 6 Kanulekedi muntu nansha umue ubuela mu nzubu wa Yehowa to, anu bakuidi ne bena Lewi badi benza mudimu.+ Bobu aba badi mua kubuela bualu badi tshisumbu tshia tshijila, ne bantu bonso nebatungunuke ne kuenza malu adibu ne bua kuenzela Yehowa. 7 Bena Lewi badi ne bua kunyunguluka mukalenge ku nseke yonso, muntu yonso muikale ne bia mvita biende mu tshianza. Muntu yonso udi ubuela mu nzubu neashipibue. Nuikale ne mukalenge muaba wonso udiye uya.”*

8 Bena Lewi ne bena Yuda bonso bakenza anu muvua muakuidi Yehoyada mutume dîyi bua kuenza. Nunku muntu yonso wakangata bantu bende bavua ku mudimu dia Nsabatu,+ pamue ne bavua kabayi ku mudimu dia Nsabatu, bualu muakuidi Yehoyada kavua mumbushe bisumbu+ ku midimu yabi to. 9 Pashishe muakuidi Yehoyada wakapesha bamfumu ba bantu lukama lukama+ mafuma ne ngabu mikese* ne ngabu ya bijengu bivua bia mukalenge Davidi,+ bivua mu nzubu wa Nzambi mulelela.+ 10 Pashishe wakimanyika bantu bonso, yonso muikale ne tshia mvita tshiende* mu tshianza, kumbukila ku luseke lua dia balume lua nzubu too ne ku luseke lua dia bakaji lua nzubu, lua ku tshioshelu ne lua ku nzubu, banyunguluke mukalenge nseke yonso. 11 Pashishe bakapatula muana wa mukalenge,+ kumutekabu tshifulu tshia bukalenge* ne Bujadiki*+ pa mutu, bobu kumuvuija mukalenge; Yehoyada ne bana bende ba balume kumuelabu manyi. Pashishe bakamba ne: “Mukalenge ikale ne muoyo matuku a bungi!”+

12 Pavua Atalaya mumvue mikuma ya bantu benda banyema ne batumbisha mukalenge, diakamue wakalua kudi bantu abu ku nzubu wa Yehowa.+ 13 Pashishe wakamona mukalenge muimane kuntu aku lua ku dikunji diende ku tshibuelelu. Bakokeshi+ ne bedi ba mpungi bavua ne mukalenge, ne bantu bonso ba mu buloba bavua basanka,+ bela mpungi, ne bimbi ba misambu bikale ne bintu biabu bia kuimba nabi misambu bavua balombola* misambu ya kutumbisha nayi Nzambi. Ke Atalaya kudipanda bilamba ne kuelaye lubila ne: “Mbantungile tshitungu! Mbantungile tshitungu!” 14 Kadi muakuidi Yehoyada wakapatula bamfumu ba bantu lukama lukama, bantu bavuabu bateke ku mutu kua tshiluilu, yeye kubambila ne: “Mumbushayi mu milongo, ne bikala muntu mumulonde, numushipe ne muele wa mvita!” Bualu muakuidi uvua muambe ne: “Kanumushipi mu nzubu wa Yehowa to.” 15 Nunku bakamukuata, ne pakafikaye ku tshibuelelu tshia Tshiibi tshia Tubalu tshia nzubu* wa mukalenge, bakamushipela muaba au diakamue.

16 Pashishe Yehoyada wakenza tshipungidi pankatshi pende yeye ne tshisamba tshijima ne mukalenge tshia ne: bavua ne bua kutungunuka ne kuikala tshisamba tshia Yehowa.+ 17 Panyima pa bualu ebu bantu bonso bakaya ku nzubu* wa Bâla, bobu kumupula,+ kuzazabu bioshelu biende ne bimfuanyi biende,+ ne kushipabu Matane muakuidi wa Bâla+ kumpala kua bioshelu. 18 Pashishe Yehoyada wakateka ditangila dia nzubu wa Yehowa mu bianza bia bakuidi ne bena Lewi bavua Davidi muteke mu bisumbu ku mutu kua nzubu wa Yehowa bua kufila milambu ya kuosha ya Yehowa+ bilondeshile malu adi mafunda mu Mikenji ya Mose,+ benda basanka, bimba misambu, anu muvuabu bambe kudi* Davidi. 19 Wakateka kabidi balami ba biibi+ ku biibi bia nzubu wa Yehowa, bua muntu mukoya wa mushindu kayi yonso kabuedi to. 20 Nunku wakangata bamfumu ba bantu lukama lukama,+ bantu banene, ne bakokeshi ba bantu, ne bantu bonso ba mu buloba, bobu kupueka ne mukalenge bumbukila ku nzubu wa Yehowa. Pashishe bakabuelela ku tshiibi tshia kuulu tshia nzubu* wa mukalenge, bobu kusombesha mukalenge mu nkuasa wa bukalenge+ wa bumfumu.+ 21 Nunku bantu bonso ba mu buloba bakasanka, ne tshimenga tshivua talalaa, bualu bavua bashipe Atalaya ku muele wa mvita.

24 Yoasha uvua ne bidimu muanda mutekete pavuaye mulue mukalenge,+ ne wakakokesha bidimu 40 mu Yelushalema. Dîna dia mamuende divua Sibeya wa ku Bê-sheba.+ 2 Yoasha wakatungunuka ne kuenza malu mimpe ku mêsu kua Yehowa matuku onso a muakuidi Yehoyada.+ 3 Yehoyada wakamusunguila bakaji babidi, ne yeye wakalela bana ba balume ne ba bakaji.

4 Pakapita matuku, Yoasha wakapeta dijinga mu muoyo wende dia kuakajilula nzubu wa Yehowa.+ 5 Nunku wakasangisha bakuidi ne bena Lewi, kubambilaye ne: “Ndayi mu bimenga bia Yuda, nusangishe makuta kudi bena Isalele bonso bua kulongolola nzubu wa Nzambi wenu+ ku tshidimu ne ku tshidimu; ne nudi ne bua kuenza bualu ebu ne lukasa.” Kadi bena Lewi kabakenza malu ne lukasa to.+ 6 Nunku mukalenge wakabikila Yehoyada mfumu wa bakuidi, kumuambilaye ne:+ “Bua tshinyi kuena mulombe bena Lewi bua kuluabu ne bitadi bia tshijila bia mu Yuda ne mu Yelushalema bivua Mose muena mudimu wa Yehowa mutume dîyi bua kufila,+ bitadi bia tshijila bia tshisumbu tshia Isalele, bua ntenta wa Bujadiki?+ 7 Bualu bana ba Atalaya,+ mukaji mubi au, bavua babuele mu nzubu wa Nzambi mulelela ku bukole+ ne bangate bintu bia tshijila bionso bia nzubu wa Yehowa, benze nabi mudimu bua Babâla.” 8 Nunku mukalenge wakatuma dîyi, bobu kuenza mushete,+ kuwutekabu pambelu ku tshiibi tshia nzubu wa Yehowa.+ 9 Pashishe bakela dîyi mu Yuda ne mu Yelushalema mujima bua batuadile Yehowa bitadi bia tshijila+ bivua Mose muena mudimu wa Nzambi mulelela muelele bena Isalele mukenji mu tshipela bua kufila. 10 Bakokeshi bonso ne bantu bonso bakasanka,+ ne bavua anu balua ne mapa ne baela mu mushete too ne pavuawu uwula.*

11 Dîba dionso divua bena Lewi balua ne mushete bua kuwupesha mukalenge ne bamona ne: muvua makuta a bungi, mufundi wa mukalenge ne muleji mpala wa mfumu wa bakuidi bavua balua, bapatula makuta avuamu,+ ne pashishe bavua bawupingaja muaba wawu. Bavua benza nanku ku dituku ne ku dituku, ne bavua basangisha makuta a bungi. 12 Nunku mukalenge ne Yehoyada bavua baapesha bantu bavua balombola mudimu wa nzubu wa Yehowa, ne bobu bavua bafuta bakoshi ba mabue ne bansenda bua kuakaja nzubu wa Yehowa,+ bafuta kabidi bantu bavua benza midimu ne tshiamu tshifiike ne tshiamu tshia mitaku bua kulongolola nzubu wa Yehowa. 13 Bantu bavua balombola mudimu bakawutuadija, ne mudimu wa dilongolola wakaya kumpala ku bulombodi buabu, bobu kuakajilula nzubu wa Nzambi mulelela kumupingajabu anu muvuaye kumpala ne kumukoleshabu. 14 Diakamue pavuabu bajikije, bakaya ne makuta avua mashale kudi mukalenge ne kudi Yehoyada, ne bobu bakenzeja nawu bintu bua nzubu wa Yehowa, bintu bia kuenza nabi mudimu ne bia kufila nabi milambu ne makopo ne bintu bia or ne bia arjan.+ Nunku bavua bafila milambu ya kuosha+ ku nzubu wa Yehowa pa tshibidilu matuku onso a Yehoyada.

15 Pakavua Yehoyada mununu ne mulale bidimu bia bungi muboboke, wakafua; uvua ne bidimu 130 pakafuaye. 16 Nunku bakamujiika mu Tshimenga tshia Davidi pamue ne bakalenge,+ bualu uvua muenze malu mimpe mu Isalele+ pa bidi bitangila Nzambi mulelela ne nzubu Wende.

17 Panyima pa lufu lua Yehoyada, bakokeshi ba mu Yuda bakalua, kuinaminabu mukalenge ne mukalenge wakabateleja. 18 Bakalekela nzubu wa Yehowa Nzambi wa bankambua babu, kutuadijabu kuenzela mitshi ya tshijila* ne mpingu mudimu; nunku tshiji tshia Nzambi tshiakatemena* Yuda ne Yelushalema bua dipila diabu. 19 Yehowa uvua anu utuma baprofete munkatshi muabu bua kubapingaja kudiye, ne bavua anu babadimuija,* kadi bakabenga kuteleja.+

20 Nyuma wa Nzambi wakatulukila* Zekâya muana wa muakuidi Yehoyada,+ yeye kuimana kuulu ku mutu kua bantu, kubambilaye ne: “Nzambi mulelela udi wamba nunku: ‘Bua tshinyi nudi nushipa mêyi a Yehowa? Malu enu kaakuenda bimpe to! Bu munudi balekele Yehowa, yeye pende neanulekele.’”+ 21 Kadi bakamuelela tshifufu,+ pashishe kumuasabu mabue ku dîyi dia mukalenge mu lubanza lua nzubu wa Yehowa.+ 22 Nunku mukalenge Yoasha kakavuluka dinanga dia lulamatu divua tatuende* Yehoyada mumuleje to, ne wakashipa muanende uvua muambe pavuaye wenda ukula muoyo ne: “Yehowa atangile bualu ebu ne akulumbuluishe.”+

23 Ku ntuadijilu kua tshidimu,* tshiluilu tshia bena Sulia tshiakabanda bua kuluisha Yoasha, bobu kubuela mu Yuda ne mu Yelushalema.+ Pashishe bakashipa bakokeshi bonso+ ba bantu, kutumabu bintu bionso bivuabu banyenge mu mvita kudi mukalenge wa Damaseke. 24 Bualu nansha muvua tshiluilu tshia bena Sulia tshivua tshibabuelele tshikale ne bantu bakese, Yehowa wakafila tshiluilu tshinene menemene mu bianza biabu,+ bualu bavua balekele Yehowa Nzambi wa bankambua babu; nunku bobu* bakalumbuluisha Yoasha. 25 Pavuabu bamushiye (bualu bavua bamushiye mutapike bibi menemene*), bena mudimu bende yeye bakamuelela tshifufu bualu uvua muele mashi a bana ba balume ba* muakuidi Yehoyada panshi.+ Bakamushipela pa bulalu buende yeye.+ Nunku wakafua ne bakamujiika mu Tshimenga tshia Davidi,+ kadi kabakamujiika mu miaba ya kujiikilangana ya bakalenge to.+

26 Aba mbantu bavua bamuelele tshifufu:+ Zabada muana wa Shimeta mukaji muena Amona ne Yehozabada muana wa Shimelite mukaji muena Moaba. 27 Bua bana bende ba balume ne bua malu mabi a bungi avuabu bamanyishe avua ne bua kumufikila+ ne bua diakajilula* dia nzubu wa Nzambi mulelela,+ malu onso aa mmafunda mu mifundu* ya mu Mukanda wa Bakalenge. Muanende Amasaya wakalua mukalenge pa muaba wende.

25 Amasaya uvua ne bidimu 25 pavuaye mulue mukalenge, ne wakakokesha bidimu 29 mu Yelushalema. Dîna dia mamuende divua Yehoadana wa mu Yelushalema.+ 2 Wakatungunuka ne kuenza malu mimpe ku mêsu kua Yehowa, kadi ki nne muoyo mujima to. 3 Diakamue pavua bukalenge bushindame mu tshianza tshiende, wakashipa bena mudimu bende bavua bashipe tatuende mukalenge.+ 4 Kadi kavua mushipe bana ba bena mudimu abu to, bualu uvua muenze malu mu diumvuangana ne tshidibu bafunde mu Mikenji, mu mukanda wa Mose, muvua Yehowa mutume dîyi ne: “Batatu kabena mua kufua bua bana babu, ne bana kabena mua kufua bua batatuabu to; muntu yonso neafue bua mpekatu wende nkayende.”+

5 Nunku Amasaya wakasangisha bena Yuda, kubimanyikaye bilondeshile nzubu ya batatuabu, bilondeshile bamfumu ba bantu tshinunu tshinunu ne bilondeshile bamfumu ba bantu lukama lukama bua Yuda mujima ne Benyamina.+ Wakafunda mêna abu kutuadijila ku bidimu 20 kubanda,+ kusanganaye ne: bavua bantu binunu 300 balongesha mvita* bavua mua kubuela mu tshiluilu, bakumbane bua kuluangana ne mafuma ne ngabu minene. 6 Wakafuta kabidi bilobo bia mvita bia mu Isalele binunu 100 ntalanta* lukama ya arjan. 7 Kadi muntu kampanda wa Nzambi mulelela wakalua kudiye wamba ne: “Mukalenge wanyi, kulekedi tshiluilu tshia Isalele tshiya nebe to, bualu Yehowa kena ne Isalele to,+ kena ne muena Efelayima nansha umue to. 8 Kadi diyila nkayebe, angata malu mu bianza, ne ikala ne dikima mu mvita. Tshianana Nzambi mulelela udi mua kukukuluisha kumpala kua bena lukuna, bualu Nzambi udi ne bukole bua kuambuluisha muntu+ anyi kumukuluisha.” 9 Ke Amasaya kuambila muntu wa Nzambi mulelela ne: “Kadi ngenze tshinyi bua ntalanta lukama indi mupeshe bisumbu bia basalayi ba Isalele?” Muntu wa Nzambi mulelela wakandamuna ne: “Yehowa udi ne mushindu wa kukupesha bia bungi kupita apu.”+ 10 Nunku Amasaya wakumbusha bisumbu bia basalayi bia mu Efelayima bivua bilue kudiye, kubapingajaye kuabu. Kadi bakakuatshila Yuda tshiji tshikole, bobu kupingana kuabu ne tshiji tshikole.

11 Pashishe Amasaya wakapeta dikima, kulombolaye bisumbu biende bia basalayi mu Tshibandabanda tshia Mukele,+ yeye kushipa bantu binunu 10 ba ku Seî.+ 12 Bantu ba mu Yuda bakakuata bantu binunu 10 ne muoyo. Ke bobu kubanda nabu ku lusongo lua mukuna wa dibue, kubakupabu panshi kumbukila ku lusongo lua mukuna wa dibue au, bobu kutayika bonso bipese bipese. 13 Kadi basalayi ba mu tshisumbu tshia basalayi bavua Amasaya mupingaje bua kabayi nende ku mvita+ bavua babuela mu bimenga bia Yuda bua kupawula, kumbukila ku Samalea+ too ne ku Bete-holona;+ bakashipa bantu 3 000 ba kudibu, kunyengabu bintu bia bungi.

14 Kadi pavua Amasaya mupingane ufuma ku dishipa bena Edome, wakalua ne nzambi ya bantu ba ku Seî, kuditekelaye nayi bu nzambi,+ ne wakabanga kuinama kumpala kuayi ne kuyifuimishila muishi wa milambu. 15 Nunku Yehowa wakakuatshila Amasaya tshiji tshikole, kutumaye muprofete, yeye kumuambila ne: “Bua tshinyi udi ulonda nzambi ya bantu aba ivua kayiyi misungile bantu bayi ku tshianza tshiebe?”+ 16 Patshivuaye wambila mukalenge bualu ebu, mukalenge wakamba ne: “Tuvua bakuteke bua wikale mufidi wa mibelu wa mukalenge anyi?+ Puwa!+ Bua tshinyi udi ukeba kudishipesha?” Nunku muprofete wakalekela, kadi wakamba kabidi ne: “Ndi mumanye ne: Nzambi ukadi mupangadije bua kukubutula, bualu udi muenze bualu ebu ne kuena muteleje mibelu yanyi to.”+

17 Panyima pa Amasaya mukalenge wa Yuda mumane kuyukila ne bamupeshi ba mibelu, wakatuma mukenji kudi Yoasha muana wa Yehoaza muana wa Yehu mukalenge wa Isalele wamba ne: “Luaku tuluangane mvita.”*+ 18 Yoasha mukalenge wa Isalele wakatumina Amasaya mukalenge wa Yuda mukenji eu ne: “Tshisonsa tshia mêba tshia mu Lebanona tshiakatumina mutshi wa sedre wa mu Lebanona mukenji ne: ‘Fila muanebe wa bakaji kudi muananyi wa balume bua ikale mukajende.’ Kadi nyama wa tshisuku wa mu Lebanona wakapitshila muaba au, kudiatakajaye tshisonsa tshia mêba. 19 Wewe udi muambe ne: ‘Tangila! Ndi* mutshimune Edome.’+ Ke bualu kayi muoyo webe mmulue ne lutambishi, ujinga bua bawutumbishe. Kadi mpindieu, shala mu nzubu* muebe wewe. Bua tshinyi udi ukeba kujudija dikenga ne kukuluka, uya panshi wewe ne Yuda?”

20 Kadi Amasaya kakateleja to,+ bualu, bualu ebu buvua bufumina kudi Nzambi mulelela bua kubafila mu tshianza tshia bena lukuna,+ bualu bavua balonde nzambi ya Edome.+ 21 Nunku Yoasha mukalenge wa Isalele wakabanda, ne yeye ne Amasaya mukalenge wa Yuda bakaluangana mvita ku Bete-shemeshe+ wa mu Yuda. 22 Isalele wakatshimuna Yuda, nunku muntu yonso wakanyemena kuende.* 23 Yoasha mukalenge wa Isalele wakakuata Amasaya mukalenge wa Yuda, muana wa Yoasha muana wa Yehoaza,* ku Bete-shemeshe. Pashishe wakalua nende ku Yelushalema, ne yeye kupula tshimanu tshia Yelushalema kumbukila ku Tshiibi tshia Efelayima+ too ne ku Tshiibi tshia ku Ditumba,+ nkubita 400.* 24 Wakangata or yonso ne arjan ne bintu bionso bivuaye musangane mu nzubu wa Nzambi mulelela ne* Obeda-edome ne mu bibutshilu bia nzubu* wa mukalenge,+ pamue ne bantu bavuaye mukuate lukole. Pashishe wakapingana ku Samalea.

25 Amasaya+ muana wa Yoasha mukalenge wa Yuda wakashala ne muoyo bidimu 15 panyima pa lufu lua Yoasha+ muana wa Yehoaza mukalenge wa Isalele.+ 26 Bua malu adi mashale a ku malu a Amasaya, kubangila ku ntuadijilu kuawu too ne ku ndekelu kuawu, monayi, ki mmafunda mu Mukanda wa Bakalenge ba Yuda ne ba Isalele anyi? 27 Katshia ku tshikondo tshivua Amasaya mulekele kulonda Yehowa, bakamuelela tshifufu+ mu Yelushalema, yeye kunyemena ku Lakisha, kadi bakatuma bantu bua kumulonda ku Lakisha ne kumushipelabu kuntu aku. 28 Nunku bakapingana nende muambula pa tubalu, kumujiikabu ne bankambua bende mu tshimenga tshia Yuda.

26 Pashishe bantu bonso ba mu Yuda bakangata Uziya+ uvua ne bidimu 16, kumutekabu mukalenge pa muaba wa tatuende Amasaya.+ 2 Wakibakulula Elota,+ kumupingajilaye Yuda panyima pa mukalenge* mumane kulala bua kuikisha ne bankambua bende.+ 3 Uziya+ uvua ne bidimu 16 pavuaye mulue mukalenge, ne wakakokesha bidimu 52 mu Yelushalema. Dîna dia mamuende divua Yekoliya wa mu Yelushalema.+ 4 Wakatungunuka ne kuenza malu mimpe ku mêsu kua Yehowa, anu muvua tatuende Amasaya muenze.+ 5 Wakatungunuka ne kukeba Nzambi mu matuku a Zekâya uvua mumulongeshe bua kutshina Nzambi mulelela. Tshikondo tshivuaye ukeba Yehowa atshi, Nzambi mulelela wakamutantshisha.+

6 Wakapatuka, kuluanganaye ne bena Peleshete+ ne kupandaye tshimanu tshia Gata,+ tshimanu tshia Yabene,+ ne tshimanu tshia Ashedodo.+ Pashishe wakibaka bimenga bikuabu pabuipi ne Ashedodo ne mu buloba bua bena Peleshete. 7 Nzambi mulelela wakatungunuka ne kumuambuluisha mu mvita yende ne bena Peleshete, ne bena Arabe+ bavua basombela mu Gule-bâla, ne bena Meunima. 8 Bena Amona+ bakatuadija kulambula Uziya milambu. Ndekelu wa bionso lumu luende luakatangalaka, kufikalu too ne ku Ejipitu, bualu wakalua ne bukole bua bungi menemene. 9 Uziya wakibaka kabidi bibumba+ mu Yelushalema ku Tshiibi tshia ku Ditumba,+ ku Tshiibi tshia mu Tshibandabanda,+ ne ku Dikunji divua dikuata tshimanu, yeye kubikolesha. 10 Pashishe wakibaka bibumba+ mu tshipela, kumbulaye* bina bia kulamina mâyi bia bungi (bualu uvua ne bimuna bia bungi); wakenza kabidi nanku mu Shefela ne mu mpata.* Uvua ne bidime ne badimi ba mionji ya tumuma tua mvinyo mu mikuna ne mu Kâmele, bualu uvua munange malu a madimi.

11 Bualu bukuabu, Uziya wakalua kupeta tshiluilu tshikale ne bia mvita. Bavua baya ku mvita, balongolola mu bisumbu. Bavua bababale ne babafunde mêna+ kudi mufundi Yiele+ ne kapita Maaseya, ku bulombodi bua Hananiya umue wa ku bakokeshi ba mua mukalenge. 12 Bungi busanga bua bamfumu ba nzubu ya batatu bavua ku mutu kua bilobo bia mvita ebi buvua bua bantu 2 600. 13 Tshiluilu tshivua ku bulombodi buabu tshivua tshia bantu 307 500 badiakaje bua mvita, tshiluilu tshia basalayi tshia bukole bua kukuatshisha mukalenge bua kuluanganaye ne bena lukuna bende.+ 14 Uziya wakapesha tshiluilu tshijima ngabu, mafuma,+ bifulu, tuzaku tua mvita tua tuamu,+ mata a mikete, ne mabue a kuashila mu ndundu.+ 15 Pashishe wakenza biamu bia mvita bienza kudi bamanyi bapiluke mu Yelushalema; bavua babiteke pa bibumba+ ne pa matumba a bimanu ne bivua mua kukupa mikete ne mabue manene. Nunku lumu luende luakatangalaka bikole menemene, bualu wakapeta diambuluisha dia dikema ne wakalua ne bukole.

16 Kadi diakamue pakaluaye ne bukole, muoyo wende wakadibandisha kumufikishabi ku dibutuka, ne wakapanga lulamatu kudi Yehowa Nzambi wende pa kubuela mu ntempelo wa Yehowa bua kuosha musenga wa manananshi pa tshioshelu tshia musenga wa manananshi.+ 17 Diakamue muakuidi Azaya ne bakuidi bakuabu ba Yehowa 80 bavua ne dikima bakamulondakaja. 18 Bakimanyina mukalenge Uziya, kumuambilabu ne: “Uziya, ki mbianyishibue bua wewe kuoshela Yehowa musenga wa manananshi to!+ Anu bakuidi ke badi ne bua kuosha musenga wa manananshi, bualu badi ndelanganyi ya Alona,+ bantu badibu bajidile. Patuka muaba munsantu eu, bualu udi mupange lulamatu ne kuakupeta butumbi kudi Yehowa bua bualu ebu nansha kakese.”

19 Kadi Uziya uvua ne tshintu tshia kuoshela musenga wa manananshi mu tshianza wakafiika munda bikole;+ ne mu tshiji tshivuaye mukuatshile bakuidi atshi, nsudi+ yakamupatuka mu mpala mu mêsu a bakuidi mu nzubu wa Yehowa ku luseke lua tshioshelu tshia musenga wa manananshi. 20 Pavua Azaya mfumu wa bakuidi ne bakuidi bonso bamutangile, bakamona ne: nsudi ivua mimukuate mu mpala! Nunku bakamupatula muntu amu lukasa lukasa, ne yeye muine wakapatuka lukasa lukasa, bualu Yehowa uvua mumukume.

21 Mukalenge Uziya wakashala muena nsudi too ne dituku dia lufu luende, ne uvua usombela mu nzubu wa pa nkayende bu muvuaye muena nsudi,+ bualu bavua bamukandike bua kuya ku nzubu wa Yehowa. Muanende Yotama uvua utangila nzubu* wa mukalenge, ulumbuluisha bantu ba mu buloba.+

22 Malu adi mashale a ku malu a Uziya, kubangila ku ntuadijilu kuawu too ne ku ndekelu kuawu, avua mafunda kudi muprofete Yeshaya+ muana wa Amoza. 23 Pashishe Uziya wakalala bua kuikisha ne bankambua bende, ne bakamujiika ne bankambua bende, kadi bakamujiika mu tshitupa tshia buloba tshivuabu bajiikila bakalenge, bualu bavua bambe ne: “Mmuena nsudi.” Muanende Yotama+ wakalua mukalenge pa muaba wende.

27 Yotama+ uvua ne bidimu 25 pavuaye mulue mukalenge, ne wakakokesha bidimu 16 mu Yelushalema. Dîna dia mamuende divua Yelusha muana wa Sadoka.+ 2 Wakatungunuka ne kuenza malu mimpe ku mêsu kua Yehowa anu muvua tatuende Uziya muenze,+ kadi yeye kavua mubuele mu ntempelo wa Yehowa to.+ Tshidibi bantu batshivua anu benza malu mabi. 3 Wakasa tshiibi tshia kuulu tshia nzubu wa Yehowa,+ ne wakenza midimu ya bungi ya luibaku ku tshimanu tshia Ofele.+ 4 Wakibaka kabidi bimenga+ mu buloba bua mikuna bua Yuda,+ ne wakibaka miaba mikolesha+ ne bibumba+ mu metu. 5 Wakela mukalenge wa bena Amona mvita,+ ne ndekelu wa bionso wakabapita bukole, kuenzabi ne: tshidimu atshi bena Amona bamupeshe ntalanta* lukama ya arjan, bipiminu binunu 10 bia kore* bia ntete ya blé, ne bipiminu binunu 10 bia kore bia orje. Bena Amona bakamufuta kabidi bintu ebi mu tshidimu tshibidi ne mu tshisatu.+ 6 Nunku Yotama wakatungunuka ne kupeta bukole, bualu uvua mushindamije* njila yende kumpala kua Yehowa Nzambi wende.

7 Bua malu adi mashale a ku malu a Yotama, mvita yonso ivuaye muluangane, kabidi ne njila yende, mmafunda mu Mukanda wa Bakalenge ba Isalele ne ba Yuda.+ 8 Uvua ne bidimu 25 pavuaye mulue mukalenge, ne wakakokesha bidimu 16 mu Yelushalema.+ 9 Pashishe Yotama wakalala bua kuikisha ne bankambua bende ne bakamujiika mu Tshimenga tshia Davidi.+ Muanende Ahaza wakalua mukalenge pa muaba wende.+

28 Ahaza+ uvua ne bidimu 20 pavuaye mulue mukalenge, ne wakakokesha bidimu 16 mu Yelushalema. Kavua muenze malu mimpe ku mêsu kua Yehowa bu muvua nkambua wende Davidi muenze to.+ 2 Kadi yeye wakendela mu njila ya bakalenge ba Isalele,+ ne wakenza too ne mpingu ya tshiamu*+ ya Babâla. 3 Wakafuimisha kabidi muishi wa milambu mu Tshibandabanda tshia Muana wa Hinoma* ne wakuosha bana bende mu kapia,+ ulonda bilele bibi menemene bia bisamba+ bivua Yehowa muipate kumpala kua bena Isalele. 4 Wakatungunuka kabidi ne kulambula milambu ne kufuimisha muishi wa milambu miaba mitumbuke,+ pa mikuna mikese, ne muinshi mua mutshi wonso uvua musampile bikole.+

5 Nunku Yehowa Nzambi wende wakamufila mu tshianza tshia mukalenge wa Sulia,+ bobu kumutshimuna, kuangatabu bantu ba bungi bavuabu bakuate, kuyabu nabu ku Damaseke.+ Wakamufila kabidi mu tshianza tshia mukalenge wa Isalele uvua mumubutule dibutula dia dikema. 6 Bualu Peka+ muana wa Lemalaya uvua mushipe mu dituku dimue bantu binunu 120 mu Yuda, bonso bikale balume ba bukitu, bualu bavua balekele Yehowa Nzambi wa bankambua babu.+ 7 Zikeli, muena mvita kampanda muena Efelayima, uvua mushipe pende Maaseya muana wa mukalenge ne Azelikama uvua utangila dibalasa,* ne Elekana uvua tshindondi tshia mukalenge. 8 Bualu bukuabu, bena Isalele bakakuata bana babu binunu 200, kuyabu nabu: bakaji, bana ba balume, ne bana ba bakaji; bakanyenga kabidi bintu bia bungi, bobu kuya ne bintu abi ku Samalea.+

9 Kadi muprofete kampanda wa Yehowa, dîna diende Odede, uvua kuntu aku. Wakapatuka kumpala kua tshiluilu tshivua tshilua ku Samalea, kubambilaye ne: “Tangilayi! Yehowa Nzambi wa bankambua benu uvua mukuatshile Yuda tshiji tshikole ke bualu kayi uvua mubafile mu tshianza tshienu,+ ne nuenu nudi babashipe ne luonji ludi lufike too ne mu diulu. 10 Mpindieu nudi nujinga kuvuija bantu ba mu Yuda ne ba mu Yelushalema bena mudimu benu balume ne bena mudimu benu bakaji.+ Pabi, nuenu penu kanuena bapile kumpala kua Yehowa Nzambi wenu anyi? 11 Mpindieu ntelejayi ne nupingaje bantu banudi bakuate ba munkatshi mua bana benu, bualu Yehowa udi nenu tshiji tshikole.”

12 Ke bamfumu ba bena Efelayima aba: Azaya muana wa Yehohanana, Belekiya muana wa Meshilemota, Yehizikiya muana wa Shaluma, ne Amasa muana wa Hadelai, kuimanyinabu bantu bavua balua bafumina ku mvita, 13 kubambilabu ne: “Kanubuedi munemu ne bantu banudi bakuate abu to, bualu nebitukebele dipila ku mêsu kua Yehowa. Tshinudi nujinga kuenza atshi netshisakidile ku mpekatu yetu ne ku dipila dietu, bualu dipila dietu dikadi dinene, ne mbakuatshile Isalele tshiji tshikole.” 14 Nunku basalayi bavua ne bia mvita bakapesha bakokeshi ne tshisumbu tshijima bantu bavuabu bakuate ne bintu bivuabu banyenge.+ 15 Pashishe bantu bavuabu basungule bakajuka, kuangatabu bantu bavuabu bakuate, kupeshabu bantu bonso ba munkatshi muabu bavua butaka bilamba biangata mu bintu bivuabu banyenge. Nunku bakabavuadika ne kubapeshabu sandala, biakudia ne bia kunua, ne mafuta a kudilaba pambidi. Bakambula kabidi bantu bavua bateketangane pa mpunda, ne bakaya nabu kudi bana babu mu Yeliko, tshimenga tshia mabue a ngaji. Pashishe bakapingana ku Samalea.

16 Tshikondo atshi mukalenge Ahaza wakalomba bakalenge ba Ashû diambuluisha.+ 17 Bena Edome bakabuela kabidi, kuluishabu Yuda, ne kukuatabu bantu kuyabu nabu. 18 Bena Peleshete+ pabu bakaluisha bimenga bia mu Shefela+ ne mu Negebe mu Yuda, kukuatabu Bete-shemeshe,+ Ayalona,+ Gedelote, Soko ne misoko ya kumpenga kuende,* Timena+ ne misoko ya kumpenga kuende, ne Gimezo ne misoko ya kumpenga kuende; bobu kusombelamu. 19 Yehowa wakapuekesha Yuda milongo bua Ahaza mukalenge wa Isalele, bualu uvua mulekele bena Yuda benza malu kayi ubakanda, kubafikishabi ku dipanga lulamatu bikole menemene kudi Yehowa.

20 Ndekelu wa bionso Tigelata-pilenesê+ mukalenge wa Ashû wakamuluila, kumukebelaye dikenga+ pamutu pa kumuambuluisha. 21 Bualu Ahaza uvua mupawule bintu bia mu nzubu wa Yehowa ne bia mu nzubu* wa mukalenge+ ne bia mu nzubu ya bakokeshi, mubipeshe mukalenge wa Ashû bu dipa; kadi bualu ebu kabuvua bumuambuluishe nansha kakese to. 22 Mu tshikondo tshia dikenga diende adi, mukalenge Ahaza wakapanga kabidi lulamatu kudi Yehowa bikole kupita kumpala. 23 Wakatuadija kufila milambu kudi nzambi ya ku Damaseke+ ivua mimutshimune,+ ne wakamba ne: “Bu mudi nzambi ya bakalenge ba Sulia ibambuluisha, nenyilambule milambu bua ingambuluishe.”+ Kadi yakamufikisha yeye ne Isalele mujima ku dikuluka. 24 Ahaza wakasangisha kabidi bintu bia mu nzubu wa Nzambi mulelela; pashishe wakakosa bintu bia mu nzubu wa Nzambi mulelela abi bitupa bitupa,+ kukangaye biibi bia nzubu wa Yehowa,+ ne kudienzelaye bioshelu mu masangu onso a mu Yelushalema. 25 Wakenza miaba mitumbuke mu bimenga bionso bia mu Yuda bua kufuimishila nzambi mikuabu muishi wa milambu,+ ne wakafiikisha Yehowa Nzambi wa bankambua bende munda.

26 Bua malu adi mashale a ku malu ende, malu onso avuaye muenze kubangila ku ntuadijilu kuawu too ne ku ndekelu kuawu, tangila, mmafunda mu Mukanda wa Bakalenge ba Yuda ne ba Isalele.+ 27 Pashishe Ahaza wakalala bua kuikisha ne bankambua bende, bobu kumujiika mu tshimenga, mu Yelushalema, bualu kabavua baye nende miaba ya kujiikilangana ya bakalenge ba Isalele to.+ Muanende Hezikiya wakalua mukalenge pa muaba wende.

29 Hezikiya+ wakalua mukalenge ne bidimu 25, ne wakakokesha bidimu 29 mu Yelushalema. Dîna dia mamuende divua Abiya muana wa Zekâya.+ 2 Wakatungunuka ne kuenza malu mimpe ku mêsu kua Yehowa,+ anu muvua nkambua wende Davidi muenze.+ 3 Mu tshidimu tshia kumpala tshia bukokeshi buende, mu ngondo wa kumpala, wakakangula biibi bia nzubu wa Yehowa ne wakabilongolola.+ 4 Pashishe wakabikidisha bakuidi ne bena Lewi, kubasangishaye muaba wa tshinsangansanga ku est. 5 Wakabambila ne: “Nuenu bena Lewi, ntelejayi. Mpindieu dijidilayi nuenu bine+ ne nujidile nzubu wa Yehowa Nzambi wa bankambua benu, ne umbushayi tshintu tshia bukoya muaba wa tshijila.+ 6 Bualu batatuetu bavua bapange lulamatu ne benze malu mabi ku mêsu kua Yehowa Nzambi wetu.+ Bavua bamulekele, bobu kumbusha mpala yabu ku ntenta wa tshitendelelu wa Yehowa, kuelabu Nzambi nyima.+ 7 Bavua kabidi bakange biibi bia ku lutanda+ ne bajime miendu.+ Bavua balekele kuoshela Nzambi wa Isalele musenga wa manananshi+ ne kumupesha milambu ya kuosha+ muaba wa tshijila. 8 Nunku tshiji tshia Yehowa tshiakatemena Yuda ne Yelushalema,+ yeye kubavuija tshintu tshidi tshienza buôwa ne tshidi tshikemesha ne tshidi tshisaka bantu ku diela muonzo,* anu munudi mua kudimuenena ne mêsu enu.+ 9 Monayi, bankambua betu bavua bakuluke ku muele wa mvita,+ ne bavua bakuate bana betu ba balume, bana betu ba bakaji, ne bakaji betu baye nabu bua bualu ebu.+ 10 Mpindieu muoyo wanyi udi ujinga kudia tshipungidi ne Yehowa Nzambi wa Isalele+ bua tshiji tshiende tshikole tshiumbuke kutudi. 11 Bana banyi, edi ki ndîba dia kulengulula malu* to, bualu Yehowa mmunusungule nuenu bua kuimana kumpala kuende, bua kuikala bena mudimu bende,+ ne bua kufuimisha milambu yende.”+

12 Pakumvua bena Lewi nanku, bakajuka: Mahata muana wa Amasai ne Yoele muana wa Azaya ba mu bena Kohata;+ mu bena Melali:+ Kishi muana wa Abedi ne Azaya muana wa Yehalelele; mu bena Gêshona:+ Yoa muana wa Zima ne Edene muana wa Yoa; 13 mu bana ba Elisafana: Shimeli ne Yeule; mu bana ba Asafa:+ Zekâya ne Matanaya; 14 mu bana ba Hemana:+ Yehiele ne Shimei; mu bana ba Yedutuna:+ Shemaya ne Uziele. 15 Pashishe bakasangisha bana babu, bobu kudijidila ne kuluabu anu muvua mukalenge mutume dîyi bilondeshile mêyi a Yehowa, bua kukezula nzubu wa Yehowa.+ 16 Nunku bakuidi bakabuela munda mua nzubu wa Yehowa bua kumukezula, bobu kupatula bintu bia bukoya bionso bivuabu bapete mu ntempelo wa Yehowa, kuyabu nabi mu lubanza+ lua nzubu wa Yehowa. Bena Lewi pabu bakabiangata, kuyabu nabi pambelu mu Tshibandabanda tshia Kidilona.+ 17 Nunku bakatuadija dijidila edi dituku dia kumpala dia ngondo, ne mu dituku dia muanda mukulu dia ngondo bakafika mu lutanda lua Yehowa.+ Bakajidila nzubu wa Yehowa matuku muanda mukulu, ne bakajikija mu dituku dia 16 dia ngondo wa kumpala.

18 Pashishe bakabuela kudi mukalenge Hezikiya, bobu kuamba ne: “Tudi bakezule nzubu wa Yehowa mujima, tshioshelu tshia mulambu wa kuosha+ ne bintu biatshi bionso,+ ne mêsa a milongo ya mampa*+ ne bintu biawu bionso. 19 Tudi kabidi balongolole bintu bionso bivua mukalenge Ahaza muteke ku luseke mu bukokeshi buende pavuaye mupange lulamatu,+ tudi babijidile,+ ne bidi kumpala kua tshioshelu tshia Yehowa.”

20 Nunku mukalenge Hezikiya wakajuka mu dinda menemene, kusangishaye bakokeshi ba mu tshimenga, bobu kubanda ku nzubu wa Yehowa. 21 Bakalua ne ngombe milume muanda mutekete, bimpanga bia mikoko muanda mutekete, bana ba mikoko muanda mutekete ba mpanga, ne mbuji ya mpumbu muanda mutekete bu mulambu wa mpekatu bua bukalenge, bua muaba munsantu, ne bua Yuda.+ Nunku wakambila bakuidi, ndelanganyi ya Alona, bua kubilambula pa tshioshelu tshia Yehowa. 22 Pashishe bakashipa ngombe ayi,+ ne bakuidi bakangata mashi ayi, bobu kuamiamina pa tshioshelu;+ bakashipa kabidi bimpanga bia mikoko, kumiaminabu mashi abi pa tshioshelu, ne bakashipa bana ba mikoko ba mpanga, bobu kumiamina mashi abu pa tshioshelu. 23 Pashishe bakalua ne mbuji ya mpumbu ya mulambu wa mpekatu kumpala kua mukalenge ne kua tshisumbu, bobu kuteka bianza biabu pa mutu payi. 24 Bakuidi bakayishipa, bobu kufila mulambu wa mpekatu pa tshioshelu ne mashi ayi bua kubuikidila Isalele mujima mpekatu, bualu mukalenge uvua muambe ne: mulambu wa kuosha ne mulambu wa mpekatu ivua ne bua kuikala bua Isalele mujima.

25 Pine apu, uvua muimanyike bena Lewi ku nzubu wa Yehowa bikale ne bintu bia kukumakaja, biombelu bia nshinga, ne nzenze,+ bilondeshile dîyi dia Davidi+ ne dia Gada+ mumonyi wa bikena kumona wa mukalenge ne dia muprofete Natana,+ bualu dîyi edi divua difume kudi Yehowa ku butuangaji bua baprofete bende. 26 Nunku bena Lewi bavua bimane bikale ne biombelu bia Davidi, ne bakuidi bikale ne mpungi.+

27 Pashishe Hezikiya wakatuma dîyi bua bafile mulambu wa kuosha pa tshioshelu.+ Pakatuadijabu kufila mulambu wa kuosha, musambu wa Yehowa wakatuadija ne mpungi kabidi, bilonda muvua biombelu bia Davidi mukalenge wa Isalele bienda biya. 28 Tshisumbu tshijima tshiakinama pavuabu benda bimba musambu ne mpungi yenda idila, ne bionso ebi biakatungunuka too ne pavuabu bajikije kufila mulambu wa kuosha. 29 Diakamue pavuabu bajikije kufila mulambu au, mukalenge ne bantu bonso bavuaye nabu bakinama, kutuabu mpala panshi. 30 Ke mukalenge Hezikiya ne bakokeshi kuambilabu bena Lewi bua kutumbisha Yehowa ne mêyi a Davidi+ ne a Asafa+ mumonyi wa bikena kumona. Nunku bakatumbisha Nzambi ne disanka dia bungi, bobu kuinama ne kutuabu mpala panshi.

31 Pashishe Hezikiya wakamba ne: “Mpindieu unudi batekibue ku luseke* bua Yehowa, luayi ne nutuale milambu ne milambu ya kuela nayi tuasakidila ku nzubu wa Yehowa.” Nunku tshisumbu tshiakatuadija kulua ne milambu ne milambu ya kuela nayi tuasakidila, ne muntu yonso uvua muoyo umusaka bua kulua ne milambu ya kuosha, uvua ulua nayi.+ 32 Bungi bua milambu ya kuosha buvua tshisumbu tshilue nabu buvua bua ngombe milume 70, bimpanga bia mikoko lukama, bana ba mikoko 200 ba mpanga, bionso ebi bu mulambu wa kuoshela Yehowa,+ 33 ne milambu ya tshijila ivua ya ngombe 600 ne mikoko 3 000. 34 Kadi kakuvua bakuidi bungi bukumbane bua kulamuna biseba ku milambu ya kuosha yonso to, nunku bana babu bena Lewi bakabambuluisha+ too ne pavua mudimu mujike, ne too ne pavua bakuidi mua kudijidila,+ bualu bena Lewi bavua badifile ne muoyo mujima* bua kudijidila kupita bakuidi. 35 Kuvua kabidi milambu ya kuosha ya bungi,+ pamue ne bitupa bia mafuta bia milambu ya diumvuangana+ ne milambu ya bia kunua bua milambu ya kuosha.+ Nunku mudimu wa ku nzubu wa Yehowa wakatuadijilula.* 36 Ke Hezikiya ne tshisamba tshionso kusanka bua tshivua Nzambi mulelela muenzele tshisamba tshiende,+ bualu, bualu ebu buvua buenzeke lukasa lukasa.

30 Hezikiya wakatuma dîyi mu Isalele mujima+ ne mu Yuda, kufundilaye too ne bena Efelayima ne bena Manashe mikanda,+ bua bantu balue ku nzubu wa Yehowa mu Yelushalema bua kuenzela Yehowa Nzambi wa Isalele Pasaka.+ 2 Kadi mukalenge, bakokeshi ba mu bukalenge buende, ne tshisumbu tshijima tshivua mu Yelushalema bakangata dipangadika dia kuenza Pasaka mu ngondo muibidi,+ 3 bualu kabavua bakumbane bua kumuenza dîba dia pa tshibidilu+ bu muvua bungi bua bakuidi bavua badijidile kabuyi bukumbane,+ ne bantu kabayi badisangishe mu Yelushalema to. 4 Bualu ebu buvua bumueneke buimpe ku mêsu kua mukalenge ne kua tshisumbu tshijima. 5 Nunku bakangata dipangadika dia kumanyisha mu Isalele mujima, kumbukila ku Bê-sheba too ne ku Dana,+ bua ne: bantu bavua ne bua kulua ne kuenzela Yehowa Nzambi wa Isalele Pasaka ku Yelushalema, bualu kabavua bamuenze badisangishe bu tshisumbu bilondeshile tshivuabu bafunde to.+

6 Nunku bafidi ba mikanda* bakaya ne mikanda ya kudi mukalenge ne bakokeshi ba mu bukalenge buende mu Isalele mujima ne mu Yuda, anu muvua mukalenge mutume dîyi, bamba ne: “Nuenu bantu ba mu Isalele, pinganayi kudi Yehowa Nzambi wa Abalahama, wa Izaka, ne wa Isalele, bua yeye apingane kudi bashadile bavua bapanduke mu tshianza tshia bakalenge ba Ashû.+ 7 Kanuikadi bu bankambua benu ne bu bana benu bavua bapange lulamatu kudi Yehowa Nzambi wa bankambua babu, kuenzabi bua abavuije tshintu tshidi tshienza buôwa anu bu munudi numona.+ 8 Mpindieu kanuikadi ne mutu mukole bu bankambua benu to.+ Kokelayi Yehowa ne luayi muaba wende munsantu+ udiye mujidile bua kashidi, nuenzele Yehowa Nzambi wenu mudimu bua tshiji tshiende tshikole tshiumbuke kunudi.+ 9 Bualu panudi nupingana kudi Yehowa, nebaleje bana benu ne bana benu balela luse kudi bantu badi babakuate baye nabu+ ne nebabanyishile bua kupingana mu buloba ebu,+ bualu Yehowa udi Nzambi udi uditeka pa muaba wa bakuabu* ne udi ne luse,+ ne nuenu bapingane kudiye kakumbusha mpala wende kunudi to.”+

10 Nunku bafidi ba mikanda* bakaya mu tshimenga ne mu tshimenga mu buloba buonso bua Efelayima ne bua Manashe,+ kuyabu too ne ku Zebulona, kadi bantu bavua babaneka ne babaseka.+ 11 Tshidibi bamue bantu ba mu Ashê, mu Manashe, ne mu Zebulona bakadipuekesha, kuluabu ku Yelushalema.+ 12 Tshianza tshia Nzambi mulelela tshivua kabidi mu Yuda bua kuenza bua bikale mu buobumue* bua kuenza tshivua mukalenge ne bakokeshi batume dîyi bua kuenza bilondeshile dîyi dia Yehowa.

13 Musumba wa bantu wakadisangisha ku Yelushalema bua kuenza Tshibilu tshia Mampa kaayi mela Luevene+ mu ngondo muibidi;+ tshivua tshisumbu tshinene be! 14 Bakajuka, kumbushabu bioshelu bivua mu Yelushalema,+ kumbushabu kabidi bioshelu bionso bia musenga wa manananshi,+ kubimanshabu mu Tshibandabanda tshia Kidilona. 15 Pashishe bakashipa mulambu wa Pasaka mu dituku dia 14 dia ngondo muibidi. Bakuidi ne bena Lewi bakumvua bundu, ke bobu kudijidila ne kuluabu ne milambu ya kuosha ku nzubu wa Yehowa. 16 Bakangata miaba yabu ya pa tshibidilu bilondeshile Mikenji ya Mose muntu wa Nzambi mulelela; pashishe bakuidi bakamiamina mashi+ avua bena Lewi babapeshe. 17 Kuvua bantu ba bungi mu tshisumbu bavua kabayi badijidile, nunku bena Lewi bavua ne mudimu wa kushipa milambu ya Pasaka bua bantu bonso bavua bakoya,+ bua kubajidila kudi Yehowa. 18 Bualu bantu ba bungi, nangananga bavua bafumine mu Efelayima, mu Manashe,+ mu Yisakâ, ne mu Zebulona, kabavua badikezule to, tshidibi bavua anu badia Pasaka, kabiyi bipetangana ne tshivuabu bafunde to. Kadi Hezikiya wakasambila bua bualu buabu wamba ne: “Yehowa udi muimpe+ itabaku 19 muntu yonso udi mulongolole muoyo wende bua kukeba Nzambi mulelela,+ Yehowa, Nzambi wa bankambua bende, nansha yeye kayi mukezudibue bilondeshile mukenji wa bunsantu.”+ 20 Nunku Yehowa wakateleja Hezikiya, yeye kubuikidila* bantu.

21 Nunku bena Isalele bavua mu Yelushalema bakenza Tshibilu tshia Mampa kaayi mela Luevene+ matuku muanda mutekete ne disanka dia bungi,+ ne bena Lewi ne bakuidi bavua batumbisha Yehowa ku dituku ku dituku, bimbila Yehowa biombelu biabu ne dîyi dikole.+ 22 Hezikiya wakakula kabidi ne bena Lewi bonso bavua benzele Yehowa mudimu ne meji ne wakabakankamija.* Bakadia mu tshibilu tshijima atshi matuku muanda mutekete,+ balambula milambu ya diumvuangana+ ne bela Yehowa Nzambi wa bankambua babu tuasakidila.

23 Pashishe tshisumbu tshijima tshiakangata dipangadika dia kutshienza matuku makuabu muanda mutekete, ke bobu kutshienza matuku makuabu muanda mutekete ne disanka.+ 24 Nunku Hezikiya mukalenge wa Yuda wakafila ngombe tshinunu ne mikoko 7 000 bua tshisumbu, ne bakokeshi bakafila ngombe tshinunu ne mikoko binunu 10 bua tshisumbu;+ ne bakuidi ba bungi bavua badijidila.+ 25 Tshisumbu tshijima tshia Yuda, bakuidi, bena Lewi, tshisumbu tshijima tshivua tshifumine mu Isalele,+ ne bantu bavua basombe buenyi+ bavua bafumine mu buloba bua Isalele ne aba bavua basombela mu Yuda bakatungunuka ne kusanka. 26 Kuvua disanka dia bungi mu Yelushalema, bualu katshia ku matuku a Solomo muana wa Davidi mukalenge wa Isalele, bualu bua buena ebu kabuvua buanji kuenzeka mu Yelushalema to.+ 27 Ndekelu wa bionso, bakuidi bena Lewi bakajuka, kubeneshabu bantu;+ ne Nzambi wakumvua mêyi abu, ne disambila diabu diakafika muaba wa tshijila udiye musombele, mu diulu.

31 Diakamue pakajikijabu malu onso aa, bena Isalele bonso bavuapu bakaya mu bimenga bia mu Yuda, bobu kuzaza makunji a tshijila,+ kukosa mitshi ya tshijila,*+ ne kupula miaba mitumbuke+ ne bioshelu+ mu Yuda mujima ne mu Benyamina, kabidi ne mu Efelayima ne mu Manashe,+ too ne pakabibutulabu bionso butubutu; pashishe bena Isalele bonso bakapingana mu bimenga biabu, muntu yonso mu buloba buende.

2 Pashishe Hezikiya wakateka bakuidi mu bisumbu biabu+ ne bena Lewi mu bisumbu biabu,+ tshisumbu tshionso tshia bakuidi ne tshia bena Lewi bua mudimu wabu,+ bua milambu ya kuosha ne milambu ya diumvuangana, bua kuenza mudimu ne kuela Nzambi tuasakidila ne kumutumbisha mu biibi bia mbanza ya* Yehowa.+ 3 Bakafila tshitupa tshia bintu bia mukalenge bua milambu ya kuosha,+ kusangisha ne milambu ya mu dinda ne ya dilolo,+ pamue ne milambu ya kuosha bua Nsabatu,+ padi ngondo ubala,+ ne bua bibilu,+ bilondeshile tshidibu bafunde mu Mikenji ya Yehowa.

4 Wakatumina kabidi bantu bavua basombela mu Yelushalema dîyi bua kulua ne bintu bivuabu ne bua kupesha bakuidi ne bena Lewi,+ bua bobu aba balamate mikenji ya Yehowa ne muoyo mujima.* 5 Diakamue pakatumabu dîyi adi, bena Isalele bakafila bintu bia kumpala bia ntete bia bungi, bia mvinyo mupiamupia, bia mafuta,+ ne bia buitshi, ne bia bintu bionso bia mu madimi;+ bakalua ne bia dikumi bia bintu bionso bia bungi menemene.+ 6 Bantu ba mu Isalele ne ba mu Yuda bavua basombela mu bimenga bia Yuda bakalua pabu ne tshia dikumi tshia ngombe ne tshia mikoko ne tshia dikumi tshia bintu bia tshijila+ bivuabu bajidile Yehowa Nzambi wabu. Bakalua nabi, kubitekabu mishiki mishiki. 7 Mu ngondo muisatu,+ bakatuadija kuteka mapa abu mu mishiki; ne mu ngondo wa muanda mutekete,+ bakajikija. 8 Pavua Hezikiya ne bakokeshi balue ne bamone mishiki ayi, bakatumbisha Yehowa ne kubeneshabu tshisamba tshiende tshia Isalele.

9 Hezikiya wakebeja bakuidi ne bena Lewi bua mishiki ayi, 10 ne Azaya mfumu wa bakuidi wa mu nzubu wa Sadoka wakamuambila ne: “Katshia ku tshikondo tshivuabu batuadije kulua ne mapa mu nzubu wa Yehowa,+ bantu badi badia bukuta ne kutshidi kushale bintu bikuabu bia pa mutu bia bungi, bualu Yehowa mmubeneshe tshisamba tshiende, ne bintu bia bungi ebi mbishale.”+

11 Ke Hezikiya kubambilaye bua kulongolola nzubu ya kulamina bintu*+ mu nzubu wa Yehowa, bobu kuyilongolola. 12 Bakatungunuka ne kulua ne mapa, bia dikumi,+ ne bintu bia tshijila ne lulamatu luonso; bavua bateke Konaniya muena Lewi bua ikale mulombodi bua kutangila bintu bionso ebi, ne muanabu Shimei uvua tshindondi tshiende. 13 Yehiele, Azazaya, Nahata, Asahele, Yelimota, Yozabada, Eliele, Yisemakaya, Mahata, ne Benaya bavua bantu bavuabu bapeshe mudimu wa kuambuluisha Konaniya ne muanabu Shimei, bilondeshile dîyi divua mukalenge Hezikiya mutume, ne Azaya uvua mulombodi wa nzubu wa Nzambi mulelela. 14 Kole muana wa Yimenaha, muena Lewi mulami wa ku tshiibi luseke lua est,+ uvua utangila milambu ya budisuile+ ya Nzambi mulelela, ne uvua wabanya mapa avuabu bapeshe Yehowa+ ne bintu bitambe tshijila.+ 15 Ku bulombodi buende kuvua Edene, Minyamina, Yeshua, Shemaya, Amalia, ne Shekaniya, mu bimenga bia bakuidi,+ mu mudimu wabu wa kueyemenyibua, bua kuabanyina bana babu bavua mu bisumbu biabu+ bintu bungi bua muomumue, kudi munene ne kudi mukese mushindu wa muomumue. 16 Diabanya dia bintu edi divua dienzeka pa kumbusha bintu bivuabu babanyina bantu balume ba bidimu bisatu kubanda bavuabu bafunde mêna mu avuabu bafunde mu dilondangana dia mêku abu, bantu bavua balua dituku dionso bua kuenza mudimu mu nzubu wa Yehowa ne bua kukumbaja midimu ivuabu ne bua kuenza mu bisumbu biabu.

17 Difunda dia dilondangana dia mêku a bakuidi divua dilondesha nzubu ya batatuabu,+ anu bu muvua dia bena Lewi bavua ne bidimu 20 kubanda,+ bilondeshile midimu ivuabu ne bua kuenza mu bisumbu biabu.+ 18 Difunda dia dilondangana dia mêku edi divua dikongoloja bakaji babu, bana babu ba balume ne ba bakaji, too ne bana babu ba batekete, tshisumbu tshiabu tshijima (bualu bavua badilama ba tshijila bua tshintu tshivua tshia tshijila bua bualu bua mudimu wabu wa kueyemenyibua) 19 kabidi ne ndelanganyi ya Alona, bakuidi bavua basombela mu maloba a mpata ya kudishila nyama ivua minyunguluke bimenga biabu.+ Mu bimenga bionso, bavua basungule bantu bua kufila bintu kudi bantu balume bonso ba munkatshi mua bakuidi ne kudi bantu bonso bavuabu bafunde mêna abu mu dilondangana dia mêku a bena Lewi.

20 Hezikiya wakenza bualu ebu mu Yuda mujima, ne wakatungunuka ne kuenza malu avua mimpe, makane, ne a lulamatu kumpala kua Yehowa Nzambi wende. 21 Mudimu wonso uvuaye ujinga kuenza bua kukeba Nzambi wende, nansha muikale utangila mudimu wa nzubu wa Nzambi+ mulelela anyi utangila Mikenji ne mêyi, uvua uwenza ne muoyo mujima, ne malu ende avua enda bimpe.

32 Panyima pa malu aa ne bienzedi bia lulamatu ebi,+ Saneheliba mukalenge wa Ashû wakalua, kubuelaye mu Yuda. Wakatshintshimika bimenga bikolesha, ujinga kubuelamu ku bukole ne kubikuata.+

2 Pavua Hezikiya mumone ne: Saneheliba uvua mulue ne uvua ujinga kuela Yelushalema mvita, 3 yeye mumane kuyukila ne bakokeshi ba mu bukalenge buende ne bena mvita bende, wakangata dipangadika dia kujibikila mâyi a mishimi pambelu pa tshimenga,+ ne bobu bakatua ku tshiende. 4 Bantu ba bungi bakadisangisha, bobu kujibikila mishimi yonso ne kasulu kavua kapitshila mu buloba buabu bamba ne: “Bua tshinyi bakalenge ba Ashû badi ne bua kulua kusangana mâyi a bungi?”

5 Wakibakulula kabidi ne disuminyina dionso tshimanu tshionso tshivua tshiupuke, yeye kuibakapu bibumba, ne yeye kuenza tshimanu tshikuabu pambelu. Wakalongolola kabidi Kakunakuna*+ ka mu Tshimenga tshia Davidi, ne wakenza bia mvita* bia bungi ne ngabu. 6 Pashishe wakateka bamfumu ba basalayi ku mutu kua bantu, yeye kubasangisha muaba wa tshinsangansanga wa ku tshiibi tshia tshimenga ne kubakankamijaye* wamba ne: 7 “Ikalayi ne dikima ne bukole. Kanutshinyi anyi kanuikadi ne buôwa bua mukalenge wa Ashû+ ne musumba wonso udiye nawu, bualu badi netu badi ba bungi kupita badi nende.+ 8 Yeye udi ne diboko dia musunyi,* kadi tuetu tudi ne Yehowa Nzambi wetu bua kutuambuluisha ne kutuluila mvita.”+ Nunku bantu bakakoleshibua ne mêyi a kudi Hezikiya mukalenge wa Yuda.+

9 Panyima pa bualu ebu, pavua Saneheliba mukalenge wa Ashû+ muikale ku Lakisha ne biluilu biende bionso,* wakatuma bena mudimu bende ku Yelushalema, kudi Hezikiya mukalenge wa Yuda ne kudi bena Yudaya bonso mu Yelushalema+ wamba ne:

10 “Saneheliba mukalenge wa Ashû udi wamba ne: ‘Nudi nueyemena tshinyi bua kushala mu Yelushalema padibu eku bamutshintshimike?+ 11 Hezikiya kena unupambuisha ne unufila bua kufua ne nzala ne nyota, padiye wamba ne: “Yehowa Nzambi wetu neatusungile mu tshianza tshia mukalenge wa Ashû” anyi?+ 12 Ki ng’Hezikiya umue umue eu uvua mumbushe miaba mitumbuke+ ne bioshelu bia Nzambi wenu,*+ pashishe muambile Yuda ne Yelushalema ne: “Nudi ne bua kuinama anu kumpala kua tshioshelu tshimue ne popu apu ke panudi ne bua kufuimishila milambu yenu” anyi?+ 13 Kanuena bamanye tshimvua meme ne bankambua banyi benzele bisamba bionso bia mu maloba makuabu anyi?+ Nzambi ya bisamba bia maloba au ivuaku mikokeshe bua kusungila buloba buayi mu tshianza tshianyi anyi?+ 14 Nnganyi munkatshi mua nzambi yonso ya bisamba ebi bivua bankambua banyi babutule uvua mukokeshe bua kusungila bantu bende mu tshianza tshianyi, bua Nzambi wenu akokeshe bua kunusungila mu tshianza tshianyi?+ 15 Kanulekedi Hezikiya unushima anyi unupambuisha mushindu eu to!+ Kanumuitabuji to, bualu nzambi nansha umue wa mu tshisamba anyi bukalenge kayi buonso kavua mukokeshe bua kusungila bantu bende mu tshianza tshianyi ne mu tshianza tshia bankambua banyi to. Nunku netuambe tshinyi bua Nzambi wenu? Kena mua kunusungila mu tshianza tshianyi to!’”+

16 Bena mudimu bende bakamba kabidi Yehowa Nzambi mulelela ne muena mudimu wende Hezikiya malu a bungi. 17 Wakafunda kabidi mikanda+ bua kupenda Yehowa Nzambi wa Isalele+ ne kumuamba, wamba ne: “Anu bu nzambi ya bisamba bia maloba makuabu ivua kayiyi mikokeshe bua kusungila bantu bayi mu tshianza tshianyi,+ nunku Nzambi wa Hezikiya kakusungila pende bantu bende mu tshianza tshianyi to.” 18 Bakatungunuka ne kuela bantu ba mu Yelushalema bavua pa tshimanu mbila ne dîyi dikole mu muakulu wa bena Yuda, bua kubatshinyisha ne kubakuatshisha buôwa, bua bobu kukuata tshimenga.+ 19 Bakamba Nzambi wa Yelushalema anu muvuabu bambe nzambi ya bukua bisamba bia pa buloba idi mudimu wa bianza bia bantu. 20 Kadi mukalenge Hezikiya ne muprofete Yeshaya+ muana wa Amoza bavua anu basambila bua bualu ebu ne balomba diambuluisha mu diulu.+

21 Nunku Yehowa wakatuma muanjelu, yeye kubutula bilobo bia mvita+ bionso, balombodi bonso, ne bamfumu bonso mu tshitudilu tshia mukalenge wa Ashû, kuenzabi bua ne: apingane mu buloba buende ne bundu. Pashishe wakabuela mu nzubu* wa nzambi wende, ne bamue ba ku bana bende yeye bakamushipamu ne muele wa mvita.+ 22 Nunku Yehowa wakapandisha Hezikiya ne bantu ba mu Yelushalema mu tshianza tshia Saneheliba mukalenge wa Ashû ne mu tshianza tshia bantu bakuabu bonso, yeye kubapesha dikisha ku nseke yonso. 23 Bantu ba bungi bakatuadila Yehowa mapa ku Yelushalema, bobu kutuadila Hezikiya mukalenge wa Yuda+ bintu bimpe menemene, ne panyima pa bualu abu bisamba bionso biakanemeka Hezikiya bikole.

24 Mu matuku au, Hezikiya wakasama ne ukavua ukeba kufua, kadi yeye kusambila Yehowa,+ yeye kumuandamuna ne kumupesha tshimanyinu.*+ 25 Kadi Hezikiya kakaleja dianyisha bua malu mimpe avuabu bamuenzele, bualu muoyo wende wakadibandisha, kudikebelaye yeye muine ne Yuda ne Yelushalema tshiji tshia Nzambi. 26 Kadi Hezikiya wakadipuekesha ku didibandisha dia muoyo wende,+ yeye ne bantu ba mu Yelushalema; nunku tshiji tshia Yehowa katshiakabakuata mu matuku a Hezikiya to.+

27 Hezikiya wakalua kupeta bubanji bua bungi ne butumbi bua bungi;+ wakadienzela nzubu ya kulamina bintu+ bua arjan, or, mabue a mushinga mukole, mafuta a mutshi wa bome, ngabu, ne bua bintu bimpe bionso. 28 Wakenza kabidi miaba ya kulamina bintu bua ntete, bua mvinyo mupiamupia, ne bua mafuta, kuenzaye kabidi ne bikumbi bua bimuna bionso bia mishindu mishilashilangane ne bikumbi bua bisumbu bia mikoko. 29 Wakadipetela kabidi bimenga, ne bimuna bia bungi, bisumbu bia mikoko, ne bisumbu bia ngombe, bualu Nzambi uvua mumupeshe bintu bia bungi menemene. 30 Hezikiya ke uvua mukange njila wa ku mutu wa mâyi+ a Gihona,+ yeye kuapuekesha buludiludi ku ouest mu Tshimenga tshia Davidi,+ ne midimu yonso ivua Hezikiya wenza ivua yenda bimpe. 31 Kadi pavuabu batume baleji mpala ba bakokeshi ba mu Babilona bua kumuebeja bua tshimanyinu*+ tshivua tshienzeke mu buloba,+ Nzambi mulelela wakamulekela nkayende bua kumuteta,+ bua afike ku dimanya malu onso avua mu muoyo wende.+

32 Bua malu adi mashale a ku malu a Hezikiya ne malu avuaye muenze avua maleje muvuaye ne dinanga dia lulamatu,+ mmafunda mu tshikena kumona tshia muprofete Yeshaya,+ muana wa Amoza, mu Mukanda wa Bakalenge ba Yuda ne ba Isalele.+ 33 Pashishe Hezikiya wakalala bua kuikisha ne bankambua bende, ne bakamujiika mu njila udi mubande ku miaba ya kujiikilangana ya bana ba Davidi;+ Yuda mujima ne bantu ba mu Yelushalema bakamupesha bunême ku lufu luende. Muanende Manashe wakalua mukalenge pa muaba wende.

33 Manashe+ uvua ne bidimu 12 pavuaye mulue mukalenge, ne wakakokesha bidimu 55 mu Yelushalema.+

2 Wakenza malu mabi ku mêsu kua Yehowa, ulonda bilele bibi menemene bia bisamba bivua Yehowa muipate kumpala kua tshisamba tshia Isalele.+ 3 Wakibakulula miaba mitumbuke ivua tatuende Hezikiya mubumbule,+ wakashila Babâla bioshelu ne wakenza mitshi ya tshijila,* ne wakinamina musumba wonso wa bintu bia mu diulu, kuwenzelaye mudimu.+ 4 Wakasa kabidi bioshelu mu nzubu wa Yehowa,+ nzubu uvua Yehowa muambe ne: “Dîna dianyi nedikale mu Yelushalema bua kashidi.”+ 5 Wakashila kabidi musumba wonso wa bintu bia mu diulu bioshelu mu mbanza ibidi ya ku nzubu wa Yehowa.+ 6 Wakapitshisha kabidi bana bende yeye ba balume mu kapia+ mu Tshibandabanda tshia Muana wa Hinoma;+ wakenza majimbu,+ kubukishaye, kuenzaye malu a mupongo, kutekaye bena mbuku ne bantu badi bamba malu atshilualua.+ Wakenza malu mabi ku mêsu kua Yehowa mu mushindu wa dikema, bua kumufiikisha munda.

7 Wakateka lupingu lusonga luvuaye muenze mu nzubu wa Nzambi mulelela,+ nzubu uvua Nzambi muambile Davidi ne muanende Solomo ne: “Nenteke dîna dianyi kashidi mu nzubu eu ne mu Yelushalema undi musungule mu bisa bionso bia Isalele.+ 8 Tshiakumbusha kabidi makasa a Isalele mu buloba bumvua mupeshe bankambua babu, kadi anu bobu balame ne muoyo mujima malu onso amvua mubatumine dîyi bua kuenza, Mikenji yonso, mêyi ne mikandu ne mapangadika bimvua mubapeshe ku butuangaji bua Mose.” 9 Manashe wakatungunuka ne kupambuisha Yuda ne bena mu Yelushalema, ubafikisha ku dienza malu mabi matambe kupita bisamba bivua Yehowa mubutule kumpala kua bena Isalele.+

10 Yehowa uvua anu wakula ne Manashe ne bantu bende, kadi bobu kabavua bateleja to.+ 11 Nunku Yehowa wakabatumina bamfumu ba tshiluilu tshia mukalenge wa Ashû, bobu kukuata Manashe ne ndobo,* kumusuikabu ne nkanu ibidi ya tshiamu tshia mitaku ne kuyabu nende ku Babilona. 12 Mu dikenga diende, wakalomba Yehowa Nzambi wende luse* ne wakatungunuka ne kudipuekesha bikole kumpala kua Nzambi wa bankambua bende. 13 Wakatungunuka ne kumusambila, ne disengelela diende adi diakamulenga ku muoyo, Yeye kuteleja dilomba diende dia luse, ne kumupingajaye mu Yelushalema mu bukalenge buende.+ Nunku Manashe wakafika ku dimanya ne: Yehowa udi Nzambi mulelela.+

14 Panyima pa bualu ebu, wakibaka tshimanu pambelu pa Tshimenga tshia Davidi+ ku ouest kua Gihona+ mu tshibandabanda* tshiye too ne ku Tshiibi tshia Mishipa,+ ne wakatungunuka natshi kunyunguluka too ne ku Ofele,+ kutshilepeshaye muulu bikole menemene. Wakateka kabidi bamfumu ba tshiluilu mu bimenga bikolesha bionso bia mu Yuda. 15 Pashishe wakumbusha nzambi ya ku babende ne lupingu mu nzubu wa Yehowa+ ne bioshelu bionso bivuaye muase mu mukuna wa nzubu wa Yehowa+ ne mu Yelushalema, wakabimanshisha pambelu pa tshimenga. 16 Wakalongolola kabidi tshioshelu tshia Yehowa,+ kutuadijaye kufilapu milambu ya diumvuangana+ ne milambu ya kuela nayi tuasakidila,+ ne wakambila Yuda bua kuenzela Yehowa Nzambi wa Isalele mudimu. 17 Nansha nanku, bantu batshivua anu balambula milambu pa miaba mitumbuke, kadi bavua bayilambula anu Yehowa Nzambi wabu.

18 Bua malu adi mashale a ku malu a Manashe, disambila divuaye muenze kudi Nzambi wende, ne mêyi a bamonyi ba bikena kumona bavua bakule nende mu dîna dia Yehowa Nzambi wa Isalele, mmafunda mu malu a bakalenge ba Isalele. 19 Disambila diende+ ne muvuabu bandamune disengelela diende, mpekatu yende yonso ne dipanga diende dia lulamatu,+ miaba ivuaye muibakile miaba mitumbuke ne muimanyikile mitshi ya tshijila*+ ne mpingu misonga kumpala kua kudipuekeshaye, mbifunda kabidi mu mêyi a bamonyi bende ba bikena kumona. 20 Pashishe Manashe wakalala bua kuikisha ne bankambua bende, ne bakamujiika ku nzubu kuende; ne muanende Amona wakalua mukalenge pa muaba wende.+

21 Amona+ uvua ne bidimu 22 pavuaye mulue mukalenge, ne wakakokesha bidimu bibidi mu Yelushalema.+ 22 Wakatungunuka ne kuenza malu mabi ku mêsu kua Yehowa anu muvua tatuende Manashe muenze;+ Amona wakafila milambu kudi mpingu misonga yonso ivua tatuende Manashe muenze,+ ne wakatungunuka ne kuyenzela mudimu. 23 Kadi kavua mudipuekeshe kumpala kua Yehowa+ bu muvua tatuende Manashe mudipuekeshe to;+ pamutu pa kuenza nanku, Amona wakavudija dipila diende bikole. 24 Ndekelu wa bionso, bena mudimu bende bakamuelela tshifufu,+ kumushipelabu mu nzubu muende yeye. 25 Kadi bantu ba mu buloba bakashipa bantu bonso bavua belele mukalenge Amona+ tshifufu, ne bakateka muanende Yoshiya+ mukalenge pa muaba wende.

34 Yoshiya+ uvua ne bidimu muanda mukulu pakaluaye mukalenge, ne wakakokesha bidimu 31 mu Yelushalema.+ 2 Wakenza malu mimpe ku mêsu kua Yehowa ne wakendela mu njila ya nkambua wende Davidi, kavua musesuke muye ku dia balume anyi ku dia bakaji to.

3 Mu tshidimu tshia muanda mukulu tshia bukokeshi buende, patshivuaye muana, wakatuadija kukeba Nzambi wa nkambua wende Davidi;+ ne mu tshidimu tshia 12, wakatuadija kukezula Yuda ne Yelushalema,+ umbusha miaba mitumbuke+ ne mitshi ya tshijila,* mpingu misonga,+ ne mpingu ya tshiamu.* 4 Bakupula kabidi bioshelu bia Babâla mu mêsu muende, ne wakakosa bioshelu bia musenga wa manananshi bivua pa mutu pabi. Wakakosolola kabidi mitshi ya tshijila,* mpingu misonga, ne mpingu ya tshiamu* bitupa bitupa, kubizazaye kubishiya musenga, kuwumiaminaye pa mutu pa nkita ya bantu bavua babilambula milambu.+ 5 Pashishe wakuosha mifuba ya bakuidi pa bioshelu biabu.+ Nunku wakakezula Yuda ne Yelushalema.

6 Pashishe mu bimenga bia Manashe, bia Efelayima,+ bia Simeona, too ne ku Nafatale, miaba ivua mibanyunguluke ivuabu babutule, 7 wakupula bioshelu, kuzazaye mitshi ya tshijila* ne mpingu misonga,+ kubishiyaye musenga; ne wakakosa bioshelu bionso bia musenga wa manananshi mu buloba buonso bua Isalele,+ pashishe wakapingana ku Yelushalema.

8 Mu tshidimu tshia 18 tshia bukokeshi buende, pakavuaye mukezule buloba ne ntempelo,* wakatuma Shafana+ muana wa Asalaya, Maaseya mfumu wa tshimenga, ne Yoa muana wa Yoahaza mufundi bua kulongolola nzubu wa Yehowa Nzambi wende.+ 9 Bakalua kudi muakuidi munene Hilekiya, kumupeshabu makuta avuabu balue nawu ku nzubu wa Nzambi, avua bena Lewi bavua benza mudimu bu balami ba ku biibi basangishe kudi bantu ba mu Manashe, mu Efelayima, mu tshitupa tshia Isalele tshionso tshivua tshishale,+ kabidi ne a kudi bantu ba mu Yuda, mu Benyamina, ne bantu ba mu Yelushalema. 10 Pashishe bakaapesha bantu bavuabu bateke bua kutangila mudimu uvua wenzeka mu nzubu wa Yehowa. Bantu bavua benza mudimu mu nzubu wa Yehowa bakaatula pabu bua kuakaja nzubu ne kumulongolola. 11 Bakaapesha bansenda ne bibaki bua kusumba mabue masonga ne mabaya bua bipanda ne bua kuibaka nzubu ivua bakalenge ba Yuda balekele inyanguka, kuyibaka ne mikamba.+

12 Bantu abu bakenza mudimu ne lulamatu luonso.+ Ku mutu kuabu bavua bateke Yahata ne Obadaya, bena Lewi ba mu bena Melali,+ ne Zekâya ne Meshulama, ba mu bena Kohata,+ bua bikale batangidi. Bena Lewi, bonso bavua bimbi ba misambu bapiluke,+ 13 bavua ku mutu kua bena mudimu betu ba tshianana aba* ne bavua batangidi ba bantu bonso bavua benza mudimu mu midimu ya mishindu yonso; ne bena Lewi bakuabu bavua bafundi, batangidi, ne balami ba ku biibi.+

14 Pavuabu benda bangata makuta avua bantu balue nawu ku nzubu wa Yehowa,+ muakuidi Hilekiya wakapeta mukanda wa Mikenji ya Yehowa+ ivuabu bafile ku butuangaji bua* Mose.+ 15 Nunku Hilekiya wakambila mufundi Shafana ne: “Ndi mupete mukanda wa Mikenji mu nzubu wa Yehowa.” Ke Hilekiya kupesha Shafana mukanda au. 16 Pashishe Shafana wakaya ne mukanda kudi mukalenge, kumuambilaye ne: “Bena mudimu bebe badi benza malu onso avuabu babalombe bua kuenza. 17 Mbapongolole makuta avuabu basangane mu nzubu wa Yehowa, ne mbaapeshe bantu badibu bateke bua kutangila mudimu ne badi benza mudimu.” 18 Mufundi Shafana wakambila kabidi mukalenge ne: “Kudi mukanda udi muakuidi Hilekiya mumpeshe.”+ Pashishe Shafana wakatuadija kuwubala kumpala kua mukalenge.+

19 Diakamue pakumvua mukalenge mêyi a mu Mikenji, wakadipanda bilamba.+ 20 Pashishe mukalenge wakatuma dîyi kudi Hilekiya, Ahikama+ muana wa Shafana, Abidona muana wa Mika, mufundi Shafana, ne Asaya muena mudimu wa mukalenge wamba ne: 21 “Ndayi, nuebeje Yehowa malu buanyi meme ne bua bantu badi bashale mu Isalele ne mu Yuda bua mêyi a mu mukanda udibu bapete eu; bualu tshiji tshia Yehowa tshiatutemena ntshikole, bualu bankambua betu kabavua batumikile dîyi dia Yehowa bua kuenza malu onso adibu bafunde mu mukanda eu to.”+

22 Nunku Hilekiya pamue ne bantu bonso bavua mukalenge mutume bakaya kudi muprofete mukaji Huleda.+ Yeye uvua mukaji wa Shaluma muana wa Tikewa muana wa Hâhasa, mulami wa muaba uvuabu batekela bilamba, ne uvua musombele mu Tshitupa tshibidi tshia Yelushalema; nunku bakayukila nende kuntu aku.+ 23 Wakabambila ne: “Yehowa Nzambi wa Isalele udi wamba ne: ‘Ambilayi muntu udi munutume kundi ne: 24 “Yehowa udi wamba ne: ‘Nentume dikenga muaba eu ne kudi bantu badi basombelamu,+ milawu yonso idi mifunda mu mukanda+ uvuabu babale kumpala kua mukalenge wa Yuda. 25 Bu mudibu bandekele+ ne bikale bafuimishila nzambi mikuabu milambu bua kumfiikisha munda+ ne midimu yonso ya bianza biabu, tshiji tshianyi tshikole netshitshikile muaba eu ne katshiakujima to.’”+ 26 Kadi bua mukalenge wa Yuda uvua munutume bua kuebeja Yehowa malu, nudi ne bua kumuambila nunku: “Yehowa Nzambi wa Isalele udi wamba ne: ‘Bua mêyi audi mumvue,+ 27 bu muvua muoyo webe munyingalale* ne bu muuvua mudipuekeshe kumpala kua Nzambi pauvua mumvue mêyi ende adi atangila muaba eu ne bantu badimu, ne bu muuvua mudipuekeshe kumpala kuanyi, mudipande bilamba, ne mudile kumpala kuanyi, meme panyi ndi mukumvue,+ ke mudi Yehowa wamba. 28 Ke bualu kayi nenkusangishe kudi bankambua bebe,* neulale mu lukita luebe mu ditalala, ne mêsu ebe kaakumona dikenga dionso dingatuma muaba eu ne kudi bantu badimu to.’”’”+

Pashishe bakatuadila mukalenge diandamuna. 29 Nunku mukalenge wakatuma dîyi, yeye kubikidisha bakulu bonso ba mu Yuda ne ba mu Yelushalema.+ 30 Pashishe mukalenge wakabanda ku nzubu wa Yehowa ne bantu balume bonso ba mu Yuda, bantu ba mu Yelushalema, bakuidi, bena Lewi, mmumue ne: tshisamba tshijima, muntu munene ne muntu mukese. Wakabala mêyi onso a mu mukanda wa tshipungidi uvuabu bapete mu nzubu wa Yehowa mu matshi abu.+ 31 Mukalenge wakimana muaba wende ne wakenza tshipungidi*+ kumpala kua Yehowa tshia ne: nealonde Yehowa ne nealame mêyi ende, mavuluija ende ne mêyi ne mikandu biende ne muoyo wende wonso ne anyima* wende yonso+ pa kukumbaja mêyi a tshipungidi avua mafunda mu mukanda eu.+ 32 Bualu bukuabu, wakenza bua bantu bonso bavua mu Yelushalema ne mu Benyamina batshitabe. Nunku bantu ba mu Yelushalema bakenza malu bilondeshile tshipungidi tshia Nzambi, Nzambi wa bankambua babu.+ 33 Pashishe Yoshiya wakumbusha bintu bibi menemene bionso* mu maloba onso avua a bena Isalele,+ ne wakenza bua bantu bonso ba mu Isalele benzele Yehowa Nzambi wabu mudimu. Tshikondo tshionso tshivuaye ne muoyo,* kabakasesuka, balekela kulonda Yehowa Nzambi wa bankambua babu to.

35 Yoshiya wakenzela Yehowa Pasaka+ mu Yelushalema, ne bakashipa mulambu bua Pasaka+ dituku dia 14 dia ngondo wa kumpala.+ 2 Wakapesha bakuidi midimu yabu, yeye kubakankamija bua kukumbaja mudimu wabu wa nzubu wa Yehowa.+ 3 Pashishe wakambila bena Lewi, balongeshi ba Isalele mujima,+ aba bavua ba tshijila ku mêsu kua Yehowa ne: “Tekayi Mushete wa tshijila mu nzubu uvua Solomo muana wa Davidi mukalenge wa Isalele muibake;+ kanuena ne bua kuwambula kabidi pa makaya enu to.+ Mpindieu enzelayi Yehowa Nzambi wenu ne tshisamba tshiende tshia Isalele mudimu. 4 Dilongololayi bilondeshile nzubu ya batatuenu ne bilondeshile bisumbu bienu, nulonda tshivua Davidi+ mukalenge wa Isalele ne muanende Solomo bafunde.+ 5 Imanayi muaba wa tshijila mu bisumbu mu bisumbu bilondeshile nzubu ya batatu ya bana benu, bantu ba mu tshisamba,* mu diumvuangana ne tshisumbu tshia nzubu wa batatu wa bena Lewi. 6 Shipayi mulambu wa Pasaka,+ nudijidile, ne nulongoluele bana benu bintu bua kukumbaja dîyi divua Yehowa muambe ku butuangaji bua Mose.”

7 Yoshiya wakapesha bantu bisumbu bia nyama, bana ba mikoko ba mpanga ne mbuji ya mpumbu ya miana, bua milambu ya Pasaka bua bantu bonso bavua muaba au; bungi busanga bua mikoko yonso buvua binunu 30, pamue ne ngombe 3 000. Nyama eyi ivua ya mu bintu bia mukalenge yeye nkayende.+ 8 Bakokeshi ba mu bukalenge buende bakafila pabu dipa bu mulambu wa budisuile bua bantu, bua bakuidi, ne bua bena Lewi. Hilekiya,+ Zekâya, ne Yehiele, balombodi ba nzubu wa Nzambi mulelela, bakapesha bakuidi milambu ya Pasaka 2 600 ne ngombe 300. 9 Konaniya ne bana babu Shemaya ne Netanele, pamue ne Hashabeya, Yiele, ne Yozabada, bamfumu ba bena Lewi, bakapesha bena Lewi milambu ya Pasaka 5 000 ne ngombe 500.

10 Bakalongolola mudimu, bakuidi kuimanabu miaba yabu, ne bena Lewi kuimanabu bilondeshile bisumbu biabu+ anu muvua mukalenge mutume dîyi. 11 Bakashipa milambu ya Pasaka,+ ne bakuidi bakamiamina mashi avuabu babapesha kudi bena Lewi,+ pavua eku bena Lewi balamuna biseba ku nyama.+ 12 Pashishe bakalongolola milambu ya kuosha bua kuyabanyina bantu bavua bimane mu bisumbu mu bisumbu bilondeshile nzubu ya batatuabu, bua bayifile kudi Yehowa anu mudibi bifunda mu mukanda wa Mose; ne bakenza bia muomumue ne ngombe. 13 Bakalamba* mulambu wa Pasaka pa kapia bu muvuabu benza pa tshibidilu;+ ne bakalamba milambu ya tshijila mu ngesu, mu biesu bivua bienze bu mabungu, ne mu mpanu, pashishe bobu kuya nayi kudi bantu lukasa lukasa. 14 Panyima pa bualu ebu, bakalongolola bintu buabu bobu ne bua bakuidi, bualu bakuidi, ndelanganyi ya Alona, bavua benda balambula milambu ya kuosha ne bitupa bivua ne mafuta too ne pavua butuku buile, kuenzabi bua ne: bena Lewi balongolole bintu buabu bobu ne bua bakuidi, ndelanganyi ya Alona.

15 Bimbi ba misambu, bana ba Asafa,+ bavua miaba yabu bilondeshile dîyi dia Davidi,+ dia Asafa,+ dia Hemana, ne dia Yedutuna+ mumonyi wa bikena kumona wa mukalenge; ne balami ba ku biibi bavua ku biibi bishilashilangane.+ Kabivua bibalomba bua kumbuka ku midimu yabu to, bualu bana babu bena Lewi bavua babalongoluele bintu. 16 Nunku bakalongolola mudimu wa Yehowa wonso dituku adi bua kuenza Pasaka+ ne kulambula milambu pa tshioshelu tshia Yehowa, bilondeshile dîyi divua mukalenge Yoshiya mutume.+

17 Bena Isalele bavua muaba au bakenza Pasaka dîba adi ne Tshibilu tshia Mampa kaayi mela Luevene munkatshi mua matuku muanda mutekete.+ 18 Kabavua benze Pasaka wa buena au mu Isalele katshia ku matuku a muprofete Samuele; anyi kakuvua mukalenge mukuabu wa Isalele uvua muenze Pasaka wa buena uvuabu benze kudi Yoshiya,+ bakuidi, bena Lewi, bena Yuda bonso ne bena Isalele bavua muaba au, ne bena mu Yelushalema to. 19 Pasaka eu wakenzeka mu tshidimu tshia 18 tshia bukokeshi bua Yoshiya.

20 Panyima pa malu onso aa, pakavua Yoshiya mulongolole ntempelo,* Neko+ mukalenge wa Ejipitu wakabanda bua kuluangana mvita ku Kâkemisha pabuipi ne musulu wa Pelata. Nunku Yoshiya wakapatuka bua kumuluisha.+ 21 Ke yeye kumutumina bantu ne mukenji wamba ne: “Bualu ebu mbukutangile ku tshinyi, wewe mukalenge wa Yuda? Tshiena ndua kukuluisha wewe lelu to, kadi ndi nya kuluisha nzubu mukuabu, ne Nzambi mmuambe ne: ndi ne bua kuenza lukasa lukasa. Bua diakalenga diebe, lekela kukandamena Nzambi udi nanyi, tshianana neakubutule.” 22 Kadi Yoshiya wakabenga bua kumbuka kudiye, pamutu pa nanku wakadivuija bu muntu mukuabu+ bua kuluangana nende, ne wakabenga kuteleja mêyi a Neko avua afumina mukana mua Nzambi. Nunku wakalua bua kuluangana mu Mpata wa Megido.+

23 Bedi ba mikete bakasa mukalenge Yoshiya, ke mukalenge kuambila bena mudimu bende ne: “Ngumbushayi muaba eu, bualu ndi mutapike bibi be!” 24 Ke bena mudimu bende kumumbushabu mu ditempu diende, kumubuejabu mu ditempu diende dia mvita dibidi, kuyabu nende ku Yelushalema. Nunku wakafua ne bakamujiika mu lukita lua bankambua bende,+ ne Yuda mujima ne Yelushalema bakadila Yoshiya. 25 Yelemiya+ wakelela Yoshiya kasala, ne bimbi ba misambu bonso, balume ne bakaji,+ badi batungunuka ne kuimba bua Yoshiya mu tusala tuabu tua miadi* too ne lelu; ne bakangata dipangadika dia ne: bavua ne bua kutuimba mu Isalele, ne mbatufunde mu tusala tukuabu.

26 Bua malu adi mashale a ku malu a Yoshiya ne bienzedi biende bivua bileja dinanga dia lulamatu mu dilonda malu adibu bafunde mu mikenji ya Yehowa, 27 ne malu avuaye muenze, kutuadija ku mbangilu kuawu too ne ku ndekelu, mbifunda mu Mukanda wa Bakalenge ba Isalele ne ba Yuda.+

36 Pashishe bantu ba mu buloba bakangata Yehoaza muana wa Yoshiya,+ kumutekabu mukalenge mu Yelushalema pa muaba wa tatuende.+ 2 Yehoaza uvua ne bidimu 23 pavuaye mulue mukalenge, ne wakakokesha ngondo isatu mu Yelushalema. 3 Kadi mukalenge wa Ejipitu wakamumbusha mu bukalenge mu Yelushalema ne kukoselaye buloba tshibawu tshia ntalanta* lukama ya arjan ne ntalanta umue wa or.+ 4 Pashishe mukalenge wa Ejipitu wakateka Eleyakima muanabu ne Yehoaza mukalenge wa Yuda ne Yelushalema ne wakashintulula dîna diende kuluadi Yehoyakima; kadi Neko+ wakangata muanabu Yehoaza, kuyaye nende mu Ejipitu.+

5 Yehoyakima+ uvua ne bidimu 25 pavuaye mulue mukalenge, ne wakakokesha bidimu 11 mu Yelushalema. Wakatungunuka ne kuenza malu mabi ku mêsu kua Yehowa Nzambi wende.+ 6 Nebukadenesâ mukalenge+ wa Babilona wakabanda bua kumusuika ne nkanu ibidi ya tshiamu tshia mitaku bua kuya nende ku Babilona.+ 7 Pashishe Nebukadenesâ wakangata bimue bintu bia mu nzubu wa Yehowa, kuyaye nabi ku Babilona, kubitekaye mu dibalasa diende mu Babilona.+ 8 Bua malu adi mashale a ku malu a Yehoyakima, malu mabi menemene avuaye muenze ne malu avuabu bamupete nawu, mmafunda mu Mukanda wa Bakalenge ba Isalele ne ba Yuda; ne muanende Yehoyakina wakalua mukalenge pa muaba wende.+

9 Yehoyakina+ uvua ne bidimu 18 pavuaye mulue mukalenge, ne wakakokesha ngondo isatu ne matuku dikumi mu Yelushalema; wakatungunuka ne kuenza malu mabi ku mêsu kua Yehowa.+ 10 Ku ntuadijilu kua tshidimu,* mukalenge Nebukadenesâ wakatuma bantu bua balue nende ku Babilona,+ pamue ne bintu bia mushinga bia mu nzubu wa Yehowa.+ Pashishe wakateka Sedekiya tatuende muakunyi mukalenge wa Yuda ne Yelushalema.+

11 Sedekiya+ uvua ne bidimu 21 pavuaye mulue mukalenge, ne wakakokesha bidimu 11 mu Yelushalema.+ 12 Wakatungunuka ne kuenza malu mabi ku mêsu kua Yehowa Nzambi wende. Kavua mudipuekeshe kumpala kua muprofete Yelemiya+ uvua muakule bilondeshile dîyi dituma kudi Yehowa to. 13 Wakatombokela kabidi mukalenge Nebukadenesâ+ uvua mumutshipishe mu dîna dia Nzambi, ne wakashala ne tshitunu,* kukoleshaye muoyo, ne kubengaye bua kupingana kudi Yehowa Nzambi wa Isalele. 14 Bamfumu bonso ba bakuidi pamue ne tshisamba tshionso bavua bapange lulamatu bibi menemene, benza malu mabi onso a bisamba bikuabu, ne bakanyanga nzubu wa Yehowa+ uvuaye mujidile mu Yelushalema.

15 Yehowa Nzambi wa bankambua babu uvua anu ubadimuija ku diambuluisha dia bantu bavuaye utuma ne mikenji, ubadimuija misangu ne misangu, bualu uvua mumvuile tshisamba tshiende ne muaba wende wa kusombela luse. 16 Kadi bakatungunuka ne kupepeja bantu bavua Nzambi mulelela+ utuma ne mikenji, bakapetula mêyi ende+ ne kusekabu baprofete bende,+ too ne pavua tshiji tshikole tshia Yehowa tshitemene bantu bende,+ too ne pavuaku kakuyi mushindu wa kubondopa.

17 Nunku wakabajudila mukalenge wa bena Kasada,+ yeye kushipa bansongalume babu ne muele wa mvita+ muaba wabu munsantu;+ kavua mumvuile nsongalume anyi nsongakaji, mukulakaje anyi muntu mukoke luse to.+ Nzambi wakafila bintu bionso mu tshianza tshiende.+ 18 Bintu bionso bia mu nzubu wa Nzambi mulelela, binene ne bikese, pamue ne bintu bia mushinga bia mu nzubu wa Yehowa ne bintu bia mushinga bia mukalenge ne bia bakokeshi ba mu bukalenge buende, wakaya nabi bionso ku Babilona.+ 19 Wakuosha nzubu wa Nzambi mulelela,+ kupulaye tshimanu tshia Yelushalema,+ kuoshaye bibumba biende bikolesha ne kapia, ne kunyangakajaye bintu bionso bia mushinga.+ 20 Wakakuata bantu bavua bapanduke ku muele wa mvita,+ kuyaye nabu ku Babilona, ne bakalua bena mudimu bende yeye+ ne ba bana bende too ne pavua bukalenge* bua Pelasa butuadije kukokesha,+ 21 bua kukumbaja dîyi dia Yehowa diamba kudi Yelemiya,+ too ne pavua buloba bufute dibanza dia nsabatu yabu.+ Matuku onso avuabu bushale munda mutupu buvua bulame nsabatu, bua kukumbaja bidimu 70.+

22 Mu tshidimu tshia kumpala tshia Kolesha+ mukalenge wa Pelasa, bua dîyi divua Yehowa muambe ku butuangaji bua Yelemiya+ kukumbanadi, Yehowa wakasonsola lungenyi lua Kolesha mukalenge wa Pelasa bua kufila dimanyisha mu bukalenge buende buonso, dimanyisha divuaye kabidi mufunde,+ wamba ne: 23 “Kolesha mukalenge wa Pelasa udi wamba ne: ‘Yehowa Nzambi wa mu diulu mmumpeshe makalenge onso a pa buloba,+ ne mmumpeshe kabidi mudimu wa kumuibakila nzubu mu Yelushalema udi mu Yuda.+ Muntu yonso udi munkatshi muenu wa mu tshisamba tshiende tshijima, Yehowa Nzambi wende ikale nende, ne yeye abande.’”+