Kaxxa għall-​Mistoqsija

◼ Huwa xieraq li wieħed jikkontribwixxi għal trasport ipprovdut minn oħrajn?

Minħabba ċerti ċirkostanzi xi wħud minna jeħtiġilna niddependu minn oħrajn għall-​għajnuna biex nattendu l-​laqgħat regolarment u biex nieħdu sehem fis-​servizz taʼ l-​għalqa. Ħafna aħwa rġiel u nisa juru qalb tajba billi joħorġu barra minn triqthom u bl-​imħabba jużaw ħinhom, il-​karozzi tagħhom, u riżorsi oħrajn biex jipprovdulna trasport. Għalkemm forsi jkollhom ilestu iktar kmieni mis-​soltu u jdumu ma jaslu d-​dar, dan jagħmluh mill-​qalb.

Bħal f’kull aspett ieħor tal-​ministeru Kristjan tagħna, japplika l-​prinċipju misjub f’Galatin 6:5: “Kull wieħed se jġorr it-​tagħbija tiegħu stess.” Għalhekk, jekk xi ħadd jipprovdilna trasport regolarment, għandna nuru l-​apprezzament tagħna mhux biss bi kliemna imma wkoll, jekk nistgħu, b’kontribuzzjoni raġonevoli biex tgħinu jkopri l-​ispejjeż involuti.​—Matt. 7:12; 1 Kor. 10:24.

Saħansitra jekk dak li qiegħed juża l-​karozza tiegħu ma jitlobniex assistenza finanzjarja u ma jidhirx li għandu bżonnha, l-​offerta sinċiera taʼ kontribuzzjoni hija dejjem apprezzata. Is-​sewwieq għandu mnejn jirrifjuta li jaċċetta xi ħaġa; u, m’għandniex xi ngħidu, l-​għażla trid tkun tiegħu. Imma huwa xieraq li int toffri. Jekk ma tistax tikkontribwixxi xi ħaġa f’dak il-​mument, tistaʼ żżommha f’moħħok; forsi tkun tistaʼ tagħti xi ħaġa żejda meta terġaʼ taċċetta rikba.​—Luqa 6:38.

Huwa taʼ mħabba kbira li dawk li għandhom il-​karozzi jipprovdu trasport għal dawk li, kieku mhux hekk, ma jkunux jistgħu jattendu l-​laqgħat jew jieħdu sehem fil-​ministeru taʼ l-​għalqa. (Prov. 3:27) Fl-​istess ħin, huwa wkoll taʼ mħabba jekk dawk li jibbenefikaw minn qalb tajba bħal din jesprimu l-​gratitudni tagħhom billi jikkontribwixxu skond iċ-​ċirkostanzi tagħhom.​—Kol. 3:15.