Ħu Sehem Fix-​Xogħol Li Qatt Ma Se Jerġaʼ Jseħħ

¹ F’diversi żminijiet matul l-​istorja taʼ l-​umanità, kien hemm il-​bżonn li Jehovah jesegwixxi ġudizzju fuq l-​għedewwa tiegħu. Madankollu, minħabba l-​ħniena tiegħu, hu pprovda lil uħud b’qalb sinċiera opportunità għal salvazzjoni. (Salm 103:3) Il-​mod kif aġixxew iddetermina d-​destin tagħhom.

² Biex nagħtu eżempju, qabel id-​Dilluvju, fis-​sena 2370 Q.E.K., Noè kien “predikatur tat-​tjieba.” Dawk li għebu kienu dawk li ma tawx kas tat-​twissija divina. (2 Piet. 2:5; Ebr. 11:7) Qabel il-​qerda taʼ Ġerusalemm fis-​sena 70 E.K., Ġesù wera biċ-​ċar l-​azzjoni li wieħed kellu jieħu sabiex jeħlisha mill-​qerda li kellha ġġarrab il-​belt. Dawk kollha li ċaħdu l-​messaġġ tiegħu taʼ twissija batew konsegwenzi koroh. (Luqa 21:​20-​24) Twissijiet u ġudizzji divini bħal dawn ġew ripetuti ħafna drabi matul l-​istorja.

³ Xogħol Taʼ Twissija Fi Żmienna: Ħafna żmien ilu Jehovah iddikjara li hu kien se jiżvoga r-​rabja tiegħu kontra s-​sistema mill-​agħar tal-​lum u li l-​ġwejdin biss kellhom isalvaw. (Sof. 2:​2, 3; 3:8) Iż-​żmien biex inxandru dan il-​messaġġ taʼ twissija wasal biex jispiċċa! It-​“tribulazzjoni l-​kbira” tinsab wara l-​kantuniera, u wħud ġwejdin qegħdin issa jinġabru. Tabilħaqq, l-​“għelieqi” huma “bojod għall-​ħsad.” Għalhekk, l-​ebda xogħol ieħor ma jistaʼ jitqabbel maʼ dan inkwantu għall-​importanza u l-​urġenza.​—Matt. 24:​14, 21, 22; Ġwn. 4:​35.

⁴ Irridu nieħdu sehem f’li nsemmgħu lil oħrajn it-​twissija taʼ żmienna, “kemm jekk jisimgħu u kemm jekk ma jisimgħux.” Dan hu inkarigu mogħti mingħand Alla li ma nazzardawx ninjorawh. (Eżek. 2:​4, 5; 3:​17, 18) Li nieħdu sehem sħiħ f’dan ix-​xogħol jipprovdi turija konvinċenti taʼ l-​imħabba profonda tagħna lejn Alla, tat-​tħassib ġenwin tagħna fil-​ġirien tagħna, u tal-​fidi tagħna li ma titħarrikx fis-​Salvatur tagħna, Ġesù Kristu.

⁵ Issa Hu Ż-​Żmien Li Naġixxu: Wara ġudizzji li wettaq Jehovah fl-​imgħoddi, il-​ħażen dejjem reġaʼ nibet mill-​ġdid għax Satana u d-​demonji tiegħu kienu għadhom attivi. Madankollu, din id-​darba se tkun xi ħaġa differenti. L-​influwenza satanika se tiġi eliminata. Ma se jkun hemm bżonn qatt iktar taʼ twissija globali dwar “tribulazzjoni kbira” li ġejja dalwaqt. (Riv. 7:14; Rum. 16:20) Aħna għandna l-​privileġġ speċjali li nagħmlu parti minn xogħol li qatt ma se jirrepeti ruħu. Issa hu ­ż-żmien li napprofittaw ruħna kemm jistaʼ jkun minn din l-​opportunità.

⁶ Rigward l-​attività tiegħu taʼ l-​ippridkar, l-​appostlu Pawlu, b’konvinzjoni kbira, stqarr: “Jien nadif mid-​demm tal-​bnedmin kollha.” (Atti 20:26) Hu ma ħassux ħati taʼ demm minħabba li naqas li jsemmaʼ t-​twissija. Għala le? Għaliex hu setaʼ jgħid dwar il-​ministeru tiegħu: “Għal dan l-​għan jien qiegħed tabilħaqq naħdem iebes, nistinka ruħi.” (Kol. 1:29) Ejjew ingawdu l-​istess sodisfazzjon taʼ li nieħdu sehem sa l-​iktar punt possibbli fix-​xogħol li qatt ma se jerġaʼ jsir!​—2 Tim. 2:​15.