Juli

Iinima ayihe mbyoka Jesus a li a popi nokwa ningi, mwa kwatelwa iikumithalonga, mbyoka a longo, okwa li ha dhiladhila nokuulika omaiyuvo ga fa gaHe thiluthilu. (Joh. 14:9) Oshike tatu vulu okwiilonga miikumithalonga yaJesus? Jesus naHe oye tu hole noonkondo. Sho Jesus a li kombanda yevi, okwa li a ulukile aantu kutya oku ya hole noonkondo mokulongitha oonkondo dhe dhopashikumithalonga a kwathele mboka ya li taya mono iihuna. Pompito yimwe, aalumentu yaali aaposi oya li ye mu kugile ekwatho. (Mat. 20:30-34) Ndhindhilika kutya Jesus okwa li e ya “sile ohenda” e te ya aludha. Oshityalonga shOshigreka shoka sha tolokwa ‘okusila ohenda’ otashi ti kutya okukala wu uvite olukeno olunene meni lyoye. Olukeno lwa tya ngaaka ndoka lu li euliko lyohole, olwa li wo lwa inyengitha Jesus a kutithe aasindjala noku aludhe omunashilundu. (Mat. 15:32; Mark. 1:41) Otatu vulu okukala nuushili kutya Jehova, Kalunga ngoka ‘omunalukeno nomunesilohenda’ nosho wo Omwana, oye tu hole noonkondo nohaya kala ye uvite nayi, uuna tatu mono iihuna. (Luk. 1:78; 1 Pet. 5:7) Oya halelela okuhulitha po omaupyakadhi agehe ngoka haga hepeke aantu. w23.04 3 ¶4-5

Otatu vulu okukambadhala okuninga ngaashi tatu vulu tu yande okulesha nokupulakena kiinima ya puka, mbyoka yi li apuhe muuyuni waSatana. Otatu vulu okuudhitha omadhiladhilo getu niinima iiwanawa, uuna tatu lesha nokukonakona Ombiimbeli. Okukala pokugongala nokukutha ombinga miilonga yokuuvitha, otaku gamene wo omadhiladhilo getu. Na Jehova okwe tu uvanekela kutya ita ka etha tu makelwe nemakelo ndyoka li vule oonkondo dhetu. (1 Kor. 10:12, 13) Kehe gumwe gwomutse okwa pumbwa a kale ha galikana shi vulithe shito, opo a kale omudhiginini kuJehova momasiku ngaka omadhigu gahugunina. Jehova okwa hala tu ‘aneke omaudhigu getu koshipala she.’ (Eps. 62:8) Tanga Jehova noku mu pandula, omolwaashihe shoka a ninga. Mu pula e ku kwathele wu kale wu na uulaadhi muukalele. Mu indila e ku kwathele wu ungaunge nuupyakadhi kehe nokusinda omamakelo ngoka tashi vulika wu na. Ino etha nando osha nenge omuntu e ku ethithe po okugalikana kuJehova pandjigilile. w23.05 7 ¶17-18

Omolwashike hatu kala pokugongala? Elalakano lyetu okutanga Jehova. (Eps. 26:12; 111:1) Shimwe ishewe, ohatu kala pokugongala, opo tu tsaathane omukumo pomathimbo ngaka omadhigu. (1 Tes. 5:11) Uuna twa ganeke iikaha yetu e tatu gandja etyokosha, kungawo ohatu ningi iinima ayihe mbyoka. Ihe otashi vulika pu kale iinima yimwe mbyoka hayi shi ningi oshidhigu kutse okugandja omatyokosha. Otashi vulika tu kale twa tila okugandja etyokosha, nenge tashi vulika tu kale twa hala okugandja omatyokosha iikando oyindji, ihe omathimbo gamwe ihatu tumbulwa uuna twa ganeke. Oshike tashi vulu oku tu kwathela tu ungaunge nomashongo ngoka? Omuyapostoli Paulus okwa ti: ‘Otu na okugandja eitulomo kokukumagidhathana.’ Otatu ka kala kaatu na uumbanda wokuganeka, ngele otwa dhimbulukwa kutya otatu vulu okutsa yalwe omukumo netyokosha lyetu lyanathangwa ndyoka tali ulike kutya otu na eitaalo. Nongele ihatu tumbulwa olundji, otatu vulu okukala twa nyanyukwa sho yalwe megongalo taya mono oompito dhokugandja omatyokosha. — 1 Pet. 3:8. w23.04 20 ¶1-3

Omukwaniilwa Kores okwa li a gandja elombwelo, kutya Aajuda mbono ya li oonkwatwa muBabilonia uule womimvo 70, oya manguluka okushuna kevi lyawo, Israeli. (Esra 1:2-4) Jehova oye owala a li ta vulu okugwanitha po oshinima shoka. Oshoka paulelalela Babilonia ihashi mangulula nando oonkwatwa dhasho. (Jes. 14:4, 17) Ihe Babilonia osha li sha sindika, nomukwaniilwa gwasho omupe okwa li a lombwele Aajuda kutya otaya vulu okuza mo. Omujuda kehe, unene tuu omitse dhomagumbo, odha li dhi na okuninga etokolo kutya otadhi zi mo muBabilonia nenge otadhi kala mo. Etokolo ndyoka otashi vulika kaalya li epu okuninga. Aajuda oyendji otashi vulika ya li ya kulupa noonkondo nokweenda oshinano shoka oshile. Shimwe ishewe, Babilonia omo mwa li maandjawo, nokapwa li we oshilongo shilwe ya li ya kala mo. Kuyo, Israeli olya li evi lyoohekulululwa. Onkee otashi vulika ya li ye shi mono oshidhigu okuthiga po omagumbo gawo omawanawa nenge oongeshefa dhawo noku ka kala mevi ndyoka kaaye shi. w23.05 14 ¶1-2

Oohapu dhaKalunga ohadhi tu ladhipike tu tsikile okukokeka eidhidhimiko, olukeno nohole. Lukas 21:19 otayi ti: “Ngele omwa idhidhimike, otamu ka hupitha oomwenyo dheni.” Aakolossa 3:12 otayi ti: “Kaleni mu na olukeno.” Aatessalonika yotango 4:9, 10 otadhi ti: “Oshoka Kalunga mwene okwe mu longa, mu kale mu holathane. . . . Otatu mu indile, mu shi ninge mu vule shito.” Oohapu adhihe ndhoka odha li dha lombwelwa aalongwa, mboka ya ulika nale eidhidhimiko, olukeno nohole. Ihe nando ongawo, oya li ya pumbwa okutsikila okukokeka omaukwatya ngaka. Natse otu na okuninga sha faathana. Opo tu vule okuninga ngawo, otu na okutala kunkene Aakriste yonale ya li ya ulike omaukwatya ngoka. Otu na wo okutala nkene tatu vulu okuholela aalongwa mboka, naashoka otashi ke tu kwathela tu kale twa ilongekidhila uudhigu uunene. Opo nduno ngele uudhigu uunene wa tameke, otatu ka kala nale tu shi nkene tu na okwiidhidhimika notatu ka kala twa tokola toko tu tsikile nokwiidhidhimika. w23.07 3 ¶4, 8

Kutya nduno tse aagwayekwa nenge ‘oonzi dhilwe,’ otwa pumbwa okutsikila okweenda ‘mOndjila ondjapuki.’ Okweenda muyo otaku tu kwathele tu tsikile okulongela Jehova ngashingeyi nomonakuyiwa, sho Uukwaniilwa waKalunga tawu ke tu etela oonkalo oombwanawa kombanda yevi. (Joh. 10:16) Okuza mo 1919 E.N., aalumentu, aakiintu naanona omamiliyona oya thiga po Babilon Oshinene, uukwaniilwa womalongelokalunga giifundja, noya tameke okweenda mondjila ndjoka yopathaneko. Sho Aajuda ya zi muBabilonia, Jehova okwa li a si oshimpwiyu, opo mondjila yawo kaamu kale sha shoka tashi ya pundukitha. (Jes. 57:14) Jehova okwa kwathela ngiini mboka taya ende ‘mOndjila ondjapuki’ kunena? Omathelemimvo ogendji okuuka pomumvo 1919, Jehova okwa li a tameke okulongitha aalumentu, mboka haye mu simaneke lela, ya kwathele yalwe, ya ze mo muBabilon Oshinene. (Yelekanitha Jesaja 40:3.) Oya li ya longo iilonga mbyoka ya pumbiwa, ya kwathele aanamitima omiwanawa ya ze mo melongelokalunga lyiifundja noya tameke okulongela Jehova pamwe noshigwana she. w23.05 15-16 ¶8-9

Jehova okwa hala tu mu longele twa nyanyukwa nonehalo ewanawa. (2 Kor. 9:7) Onkee mbela otu na ngaa okutsikila okuninga oonkambadhala tu adhe elalakano lyontumba lyopambepo, ngele katu na ehalo lyoku shi ninga? Tala koshiholelwa shomuyapostoli Paulus. Okwa ti: “Onda kolondeke olutu lwandje noku lu dhenga, ndi lu vulikithe.” (1 Kor. 9:25-27) Paulus okwa li i ikondjitha a ninge shoka shi li mondjila, nonando otashi vulika a li e uvite kee na ehalo lyoku shi ninga. Ihe mbela Jehova okwa li ngaa a panda iilonga mbyono a longelwa kuPaulus? Eeno! Na Jehova okwa li e mu yambeke, omolwoonkambadhala dhe. (2 Tim. 4:7, 8) Sha faathana, Jehova oha kala a nyanyukwa, uuna e tu wete tatu longo tu adhe elalakano lyetu, nokuli nando katu na ehalo lyoku shi ninga. Oha kala a nyanyukwa oshoka oku shi kutya nonando otashi vulika ihaatu kala aluhe tu hole shoka tatu ningi, ohatu shi ningi molwaashono tu mu hole. Ngaashi owala Jehova a li a yambeke Paulus, ote ke tu yambeka wo omolwoonkambadhala dhetu. (Eps. 126:5) Sho Jehova te tu yambeke, otashi vulika nokuli tu tameke okukala twa halelela okwaadha elalakano lyetu. w23.05 29 ¶9-10

Omuyapostoli Paulus okwa yelekanitha mboka itaaya ka hupa mesiku lyaJehova, naantu mboka ya kotha. Ihaya kala ye shi shoka tashi ningwa momudhingoloko gwawo, nenge momukokomoko gwethimbo ndyoka tali piti po. Onkee, ihaya vulu okundhindhilika uuna iiningwanima mbyoka ya simana tayi ningwa, nenge ya ninge po sha. Aantu oyendji kunena, oya kotha meityo lyopambepo. (Rom. 11:8) Kaye shi wete kutya otu li ‘momasiku gahugunina’ nosho wo kutya uudhigu uunene owu li pokuya. (2 Pet. 3:3, 4) Ihe sho omasiku taga ende taga humu komeho, otu shi kutya otu na okukala twa tonata shi vulithe nale, ngaashi Ombiimbeli tayi tu ladhipike tu shi ninge. (1 Tes. 5:6) Onkee ano otwa pumbwa okukala twa ngungumana notu na omadhiladhilo ge li pehala. Omolwashike? Opo kaatu ninge iihakanwa yomitotolombo dhopapolotika nenge dhomaipumomumwe ngoka haga holoka po muulipamwe waantu. Sho esiku lyaJehova tali hedha popepi lela, omathiminiko tu kuthe ombinga miinima mbyoka otaga ka indjipala. Ihe katu na okukala twa tila kutya natu ninge shike. Ombepo yaKalunga otayi ke tu kwathela tu kale twa ngungumana, tu na omadhiladhilo ge li pehala nokuninga omatokolo ge li pandunge. — Luk. 12:11, 12. w23.06 10 ¶6-7

Oshike hashi ya momadhiladhilo goye uuna wa uvu edhina Simson? Otashi vulika ho dhiladhila komulumentu ngoka e na oonkondo oonene. Shoka oshoshili. Ihe Simson okwa li a ningi etokolo ewinayi, ndyoka lye mu etele iilanduliko iiwinayi. Nonando ongawo, Jehova okwa li a gandja eitulomo kwaashihe shoka Simson a ningi, opo e mu longele. Jehova okwa li a longitha Simson a longe iinima iikumithi, opo a kwathele oshigwana She oshihogololwa, Israeli. Konima yomathelemimvo gontumba okuza shoSimson a si, Jehova okwa wilike omuyapostoli Paulus a kwatele mo edhina lyaSimson momusholondondo gwaalumentu mboka ya li ye na eitaalo lya kola. (Heb. 11:32-34) Oshiholelwa shaSimson otashi vulu oku tu tsa omukumo. Okwa li a inekele muJehova nokuli nomoonkalo oondhigu. Otatu vulu okwiilonga kuSimson nonkene oshiholelwa she tashi vulu oku tu tsa omukumo. w23.09 2 ¶1-2

Otatu vulu okukokeka eidhidhimiko lyetu mokugalikana Jehova aluhe noku mu lombwela ashihe shoka tatu ipula nasho. (1 Tes. 5:17) Otashi vulika ngashingeyi katu na omaupyakadhi ga kwata miiti. Ihe nando ongawo, otatu vulu okugalikana Jehova noku mu pula e tu kwathele, uuna twa geya, twa ngwangwana nenge kaatu shi shoka tu na okuninga. Ngele otwa kala hatu galikana aluhe kuKalunga e tu kwathele momaupyakadhi omashona ngashingeyi, itatu ka kakadhala oku shi ninga, sho tatu ka taalelwa komaupyakadhi omanene monakuyiwa. Ihe okuninga ngaaka otaku tu kwathele tu kale tu na uushili kutya Kalunga oku shi lelalela kutya uunake nongiini e na oku tu kwathela. (Eps. 27:1, 3) Ngele otwa kala aadhiginini kuJehova uuna twa taalela omaupyakadhi ngashingeyi, otashi ke tu kwathela uuna tatu ka taalelwa komaupyakadhi omanene monakuyiwa. (Rom. 5:3) Omolwashike tatu tile ngawo? Aamwatate naamwameme oyendji oya ti kutya ethimbo kehe tayi idhidhimikile onkalo ondhigu, ohashi ya kwathele yi idhidhimikile eshongo ndyoka taye ki iyadha mulyo. Uuna tayi idhidhimikile uupyakadhi kekwatho lyaJehova, ohaya kala ye na eitaalo lya kola kutya Jehova okwa hala oku ya kwathela. Eitaalo ohali ya kwathele wo yi idhidhimikile eshongo ndyoka taye ki iyadha mulyo.— Jak. 1:2-4. w23.07 3 ¶7-8

Eifupipiko nolukeno ohalu inyengitha Jehova a tifuke. Pashiholelwa, Jehova okwa li a ulike kutya omwiifupipiki sho a li e li pokuhanagula po aakolokoshi yomuSodom. Jehova okwa li a lombwele omuyuuki Lot okupitila maayengeli ye, a matukile koshitopolwa shokoondundu. Ihe Lot okwa li a tila okuya ko. Onkee okwe mu indile opo ye noyaandjawo ya ye kuZoar, okandoolopa okashona hoka Jehova a li a tokola okuhanagula po. Jehova okwa li ta vulu okulombwela Lot kutya na ninge owala shoka e mu lombwele. Pehala lyaashono, okwa a li a etha Lot a ye ko, noka li a hanagula po okandoolopa hoka. (Gen. 19:18-22) Konima yomathelemimvo, Jehova okwa li a ulukile aakalimo yomuNinive olukeno. Okwa tumu omuhunganeki Jona a ka lombwele aakolokoshi yomoshilando shoka kutya otaya ka hanagulwa po pamwe nasho. Ihe Aaninive sho yi itedhulula, Jehova okwe ya uvile olukeno noina hanagula po we Ninive. — Jona 3:1, 10; 4:10, 11. w23.07 21 ¶5

Oshike tatu vulu okwiilonga koshiholelwa shaJoas? Okwa li a fa omuti gwa mena omidhi dhi li kombanda, hagu ambidhidhwa owala noshiti. Sho Jehoiada ngoka a li te mu kwathele a si, Joas okwa tameke okupulakena kaashunimonima, e ta kala kee shi we omudhiginini kuJehova. Oshiholelwa shika otashi ulike kutya katu na okuvulika kuKalunga molwaashoka owala yaandjetu nosho wo yalwe megongalo ye tu tulila po oshiholelwa oshiwanawa. Opo tu kale popepi naJehova, otu na okukoleka ohole yetu yoku mu hola nokukala twe mu simaneka mokukala hatu konakona pandjigilile Oohapu dhe, hatu tedhatedha kudho nohatu galikana. (Jer. 17:7, 8; Kol. 2:6, 7) Jehova ihe tu pula tu ninge oshindjishindji. Ihe shoka a tegelela tu ninge otashi adhika mOmuuvithi 12:13, ngoka ta ti: “Tila Kalunga nou dhiginine iipango ye, oshoka aantu ayehe osho ye na okuninga.” Ngele otwa kala hatu tila Kalunga, otatu ka vula okukala aadhiginini kuye monakuyiwa. Kapu na sha tashi vulu oku ka yona po ekwatathano lyetu naJehova. w23.06 19 ¶17-19

Ovelise 5 oya tameka nuutumbulilo tawu ti: “Ngoka a kuutumba koshipangelapundi, okwa popi a ti.” (Eh. 21:5a) Oohapu ndhika odha ikalekelwa, molwaashoka membo lyEhololo odha holoka mo iikando itatu, moka Jehova ta popi ye mwene. Ehunganeko ndyoka inali popiwa komuyengeli omunankondo, nenge kuJesus omuyumudhwa, ihe okuJehova ye mwene. Uumbangi mboka otawu tu shilipaleke kutya otatu vulu okwiinekela shoka ta ka popya. Omolwashike tatu tile ngawo? Omolwaashoka Jehova ‘iha fundju.’ (Tit. 1:2) Shino otashi koleke oohapu ndhoka dhi li mEhololo 21:5, 6 kutya otadhi ka gwanithwa shili. Natu taleni oshitya “Tala!” Oshitya shOshigreka shoka sha tolokwa “tala,” osha longithwa olundji membo lyEhololo. Konima sho Kalunga a ti “tala,” okwa landulitha ko shike? Okwa ti: “Iinima ayihe otandi yi ningi iipe.” Jehova ota ka ninga omalunduluko ngoka monakuyiwa, ihe molwaashoka oku na uushili kutya ote ke ga gwanitha po, okwe ga popi ga fa ga gwanithwa nale. — Jes. 46:10. w23.11 3-4 ¶7-8

Omuyapostoli Petrus okwa li ta kondjo nuunkundi we. Natu taleni iiholelwa yontumba. Sho Jesus a yelithile Petrus kutya ota ka hepekwa nota ka sa, opo omahunganeko gOmbiimbeli ga gwanithwe, Petrus okwa ti kutya shoka itashi vulu okuningwa. (Mark. 8:31-33) Iikando niikando, okwa li ha patathana naalongwa ooyakwawo kutya olye omunene mokati kawo. (Mark. 9:33, 34) Ongulohi ndjoka ya tetekele eso lyaJesus, Petrus okwa tete ko okutsi kwomulumentu gumwe. (Joh. 18:10) Ongulohi oyo tuu ndjoka Petrus okwa kala a tila e ta idhimbike kuume ke, Jesus, lwiikando itatu. (Mark. 14:66-72) Shoka osha ningitha Petrus a lile nokulililila. Jesus kali a thigi po aayapostoli ye mboka ya li ye mu teya omukumo nayi. Konima sho Jesus a yumuka oku ulukile Petrus kutya natango oku mu hole. Jesus okwe mu pula e mu longele nuudhiginini e li omusita gwoonzi dhe. (Joh. 21:15-17) Petrus okwa li e na ehalo okuninga shoka Jesus e mu lombwele. Okwa li muJerusalem mesiku lyaPentekoste nokwa li gumwe gwomwaamboka ya gwayekwa tango nombepo ondjapuki. w23.09 22 ¶6-7

Omuyapostoli Petrus okwa ladhipike aakuluntugongalo ooyakwawo a ti: “Kaleni aasita yoshigunda shoka mwe shi pewa kuKalunga.” (1 Pet. 5:1-4) Ngele owu li omukuluntugongalo otu shi kutya owu hole aamwaho nowa hala okuya sila oshimpwiyu. Ihe omathimbo gamwe otashi vulika wu kale wa ipyakidhila noonkondo nenge wu uvite wa vulwa noito vulu okugwanitha po oshinakugwanithwa shoka. Mbela oshike to vulu okuninga? Lombwela Jehova nkene wu uvite. Petrus okwa ti: “Ngoka ta yakula, na yakule koonkondo ndhoka e dhi pewa kuKalunga.” (1 Pet. 4:11) Aamwatate naamwameme otashi vulika ya taalela omaupyakadhi ngoka itaaga vulu okukandulwa po ngashingeyi. Ihe dhimbulukwa kutya “Omusitawiliki,” Jesus Kristus, ota vulu oku ya kwathela shi vulithe pungoye. Shoka ota vulu oku shi ninga kunena nosho wo muuyuni uupe. Kalunga okwa hala aakuluntugongalo ya kale ye hole aamwahe noku ya sila oshimpwiyu ‘nokukala ye shi okuholelwa kegongalo.’ w23.09 29-30 ¶13-14

Otwa pumbwa okuyanda okudhiladhila kwopantu. Ngele otwa kala hatu tala ko iinima pataloko lyopantu, otashi vulika tu idhimbike Jehova nomithikampango dhe. (1 Kor. 3:19) “Shoka sha talwa kuuyuni mbuka kutya osho oondunge,” olundji ohashi nwetha mo aantu kaaya vulike kuKalunga. Aakriste yamwe moPergamo nosho wo muTiatira oya li ya nwethwa mo kaantu yomomudhingoloko mboka ya li ye na eihumbato lya nyata nohaya longele iikalunga. Jesus okwa li a gandja omayele ga kwata miiti komagongalo ngoka, molwaashoka oga li gi ipwililikila oluhondelo. (Eh. 2:14, 20) Kunena aantu momudhingoloko otaya vulu oku tu nwetha mo tu taambe ko omadhiladhilo ga puka. Yaandjetu naatseyikile otaya vulu oku tu itaalitha kutya otwa kakatela unene koompango dhomOmbiimbeli. Pashiholelwa, otashi vulika ya tye kutya inashi simana okukala twa yogoka pamikalo nosho wo kutya omithikampango dhOmbiimbeli odhonkuluyonale. Omathimbo gamwe otashi vulika tu tye Jehova ihe tu pe omalombwelo ga yela nawa. Otashi vulika nokuli tu makelwe tu ‘konde shoka shu uthwa.’ — 1 Kor. 4:6. w23.07 16 ¶10-11

Maria, yina yaJesus, okwa li a pumbwa oonkondo. Okwa li e na okuninga etegelelo omanga inaa hokanwa. Ka li e na owino yokuputudha aanona, ihe okwa li e na okusila oshimpwiyu okamati hoka ka li taka ka ninga Mesiasa. Osha li oshidhigu kuye okulombwela Josef kutya oku li metegelelo, molwaashoka ina ya nando onale momilalo. (Luk. 1:26-33) Maria okwa li a mono ngiini oonkondo? Okwa li a kongo ekwatho kuyalwe. Pashiholelwa, okwa li a pula Gabriel e mu pe uuyelele wa gwedhwa po wu na ko nasha noshinakugwanithwa shoka. (Luk. 1:34) Nziya konima yaashono, okwa yi ‘koshilando shomuJudea shi li koondundu,’ a ka talele po omupambele gwe, Elisabet. Elisabet okwa li a pandula Jehova nokwa li a nwethwa mo kuJehova a lombwele Maria ehunganeko tali tsu omukumo, kombinga yokamwanamati hoka inaaka valwa natango. (Luk. 1:39-45) Maria okwa ti kutya Jehova “okwa longo iilongankondo noshikaha she.” (Luk. 1:46-51) Jehova okwa li a nkondopaleke Maria okupitila muGabriel naElisabet. w23.10 14-15 ¶10-12

Omwaalu owala omushona gwaalongwa yaKristus ya gwayekwa nombepo ondjapuki nohaya nyanyukilwa ekwatathano lyawo lyi ikalekelwa naJehova. Aantu 144 000 otaya ka longa pamwe naJesus megulu ye li aayambi. (Eh. 14:1) Uuyapuki wetsalihangano otawu thaneke kutya oya gwayekwa nombepo ondjapuki sho ya li kombanda yevi ye li oyanamati yaKalunga yopambepo. (Rom. 8:15-17) Uuyapukielela wetsalihangano otawu thaneke egulu moka Jehova e li. “Etopolitho” ndyoka lya topola ko Uuyapuki kUuyapukielela olya li tali thaneke olutu lwaJesus lwopanyama ndwoka lwa li talu mu imbi okuya megulu e li Omuyambi Omukuluntu gwomotempeli yopambepo. Sho Jesus a yamba po olutu lwe lwopantu, lu ninge ekuliloyambo lyaantu, kungawo okwe shi ningi tashi wapa, opo Aakriste ayehe aagwayekwa ya ka kale nomwenyo megulu. Aakriste aagwayekwa nayo oye na wo okuyamba po omalutu gawo gopanyama, opo ya ka mone ondjambi yawo yomegulu. — Heb. 10:19, 20; 1 Kor. 15:50. w23.10 28 ¶13

Gideon okwa kala a ngungumana, sho Aaefraim ya li taye mu pe uusama. (Aatok. 8:1-3) Ine ya yamukula a geya. Okwi ifupipike mokupulakena komanyenyeto gawo nokupopya nayo nohenda. Aakuluntugongalo aanandunge ohaya holele Gideon mokupulakena neitulomo nokuyamukula nombili uuna taya pewa uusama kuyalwe. (Jak. 3:13) Kungawo ohaya kwatele po ombili megongalo. Sho yalwe ya li ya pe Gideon esimano, Gideon okwa ti Jehova oye na pewe esimano. (Aatok. 8:22, 23) Ongiini aakuluntugongalo taya vulu okuholela Gideon? Ngele oya pondola sha, esimano otaya vulu oku li pa Jehova. (1 Kor. 4:6, 7) Pashiholelwa, ngele omukuluntugongalo okwa pandulwa kugumwe omolwuunkulungu we wokulonga aantu, ota vulu okutya okwa kwathelwa kOohapu dhaKalunga nenge a tye atuheni ohatu longwa owala kehangano lyaJehova. Aakuluntugongalo otaya vulu okudhiladhila ngele ohaya longo ngaa aantu momukalo ngoka tagu simanekitha Jehova nenge ohaye shi ningi owala, opo ya pandike kaantu. w23.06 4 ¶7-8

Ngele inatu mona shoka twa pula momagalikano getu, otatu vulu oku ipula ngeyi, ‘Mbela otandi pula ngaa oshinima shi li mondjila?’ Olundji ohatu kala tu wete tu shi shoka tashi tu opalele. Ihe iinima mbyoka tatu pula, otashi vulika kaayi ke tu etele uuwanawa washa momukokomoko gwethimbo. Uuna tatu galikana kombinga yuupyakadhi wontumba, otashi vulika pu kale ekandulopo lyomukundu li ili, kaali shi ndyoka tatu pula. Iinima yimwe mbyoka hatu pula otashi vulika yi kale ompinge nehalo lyaJehova. (1 Joh. 5:14) Natu taleni ishewe koshiholelwa shaavali mboka ya kala nokupula Jehova a kwathele omwana kaa ze mo moshili. Otashi vulika eindilo lyawo li kale tali monika lya fa li li nawa. Ihe Jehova iha thiminike nando ogumwe gwomutse e mu longele. Okwa hala kehe gumwe gwomutse, mwa kwatelwa aanona, a hogolole ye mwene kutya ote ke mu longela. (Deut. 10:12, 13; 30:19, 20) Onkee ano aavali oya li taya vulu okupula Jehova e ya kwathele ya vule okwaadha omutima gwomwana, opo a vule okukala e hole Jehova nokuninga kuume ke. — Omayel. 22:6; Ef. 6:4. w23.11 21 ¶5; 23 ¶12

Omolwashike okutalalekathana ku li omukalo gwa simana gwokuulukila yalwe kutya otu ya hole? Embo limwe tali popi kombinga yOmbiimbeli olya ti kutya oshitya “talalekathaneni,” shoka Paulus a longitha otashi ti kutya “okuthikama popepi nomuntu wu mu tse omukumo, uuna ta mono iihuna, omolwoonkalo oondhigu.” Onkee ano uuna tatu hekeleke omwiitaali omukwetu ngoka e li muudhigu, otatu mu kwathele a thikame po noku tsikile nolweendo lwe, e li mondjila ndjoka tayi fala komwenyo. Ethimbo kehe tatu hekeleke omumwatate nenge omumwameme, nena otatu mu ulukile kutya otu mu hole. (2 Kor. 7:6, 7, 13) Okuuvila gumwe uukwawo wanankali nosho wo oku mu hekeleka oya pambathana. Omomukalo guni mbela? Omuntu ngoka ha ulukile yalwe uukwawo wanankali, ohashi mu inyengitha a hekeleke yalwe noku ya ningila sha shoka tashi ya kwathele. Onkee ano tango ohatu uvile yamwe uukwawo wanankali, opo ihe tatu ya hekeleke. Ndhindhilika nkene Paulus a kwatakanitha uukwawo wanankali mboka Jehova he tu ulukile nehekeleko ndyoka he tu pe. Paulus okwa hokolola Jehova a ti kutya “oye Tate omunahenda, Kalunga, ngoka kuye haku zi ekwatho alihe.” — 2 Kor. 1:3. w23.11 9-10 ¶8-10

Aalanduli yaKristus ayehe oye na okukala ya tegelela ya iyadhe momaudhigu gi ili nogi ili. Natu tale koshiholelwa shomuyapostoli Paulus. Okwa lombwele Aatessalonika a ti: “Sho twa li pune, otwe mu londodha kutya onatu ka tidhaganwa, naashika omwe shi mono kutya osho naanaa tashi ningwa.” (1 Tes. 3:4) Okwa nyolele ishewe Aakorinto a ti: “Otwa hala oku mu dhimbulutha uudhigu mboka twa li tu na . . . otwa li twa kanitha etegameno alihe lyokukala nomwenyo.” (2 Kor. 1:8; 11:23-27) Aakriste kunena, otashi vulika nayo ya iyadhe momaudhigu gontumba nogongandi. (2 Tim. 3:12) Otashi vulika ookuume koye naakwanezimo ya ungaunga nangoye nonyanya sho wa itaale Jesus nowa ninga omulanduli gwe. Mbela oho iyadha muupyakadhi kiilonga, molwaashoka wa tokola toka okukala omunashili miinima ayihe? (Heb. 13:18) Owa iyadhele nale to hepekwa kepangelo, molwaashoka owala ho uvithile yalwe kombinga yetegameno ndyoka wu na? Paulus okwa ti natu nyanyukwe, nonando otu iyadhe muudhigu wu thike peni. w23.12 10-11 ¶9-10

Jakob okwa li wo i idhidhimikile omaupyakadhi ogendji. Oyanamati yaJakob yaali, Simeon naLevi, oya li ya sitha yaandjawo ohoni noya shekitha edhina lyaJehova. Shimwe ishewe, Rakel, omukulukadhi gwaJakob ngoka a li e hole, okwa si manga ta mono okanona kawo okatiyali. Nomolwondjala yamemememe, Jakob okwa tembukile kuEgipiti pethimbo lyuukulupe we. (Gen. 35:16-19; 37:28; 45:9-11, 28) Nonando Jakob okwa li e na omaupyakadhi agehe ngoka, okwa kala i inekela muJehova nomomauvaneko Ge. Opo nduno, Jehova oku ulukile Jakob kutya okwe mu hokwa. Pashiholelwa, Jehova okwa li a yambeke Jakob niiniwe oyindji. Dhiladhila wo kunkene Jakob a li e na okukala a pandula Jehova, sho e mu hanganitha ishewe naJosef, omwanamati ngoka a li ta dhiladhila kutya okwa sa nalenale. Molwaashono Jakob okwa li e na ekwatathano lyopothingo naJehova, shono osha li she mu ningitha a vule okwiidhidhimikila omaudhigu ge nomupondo. (Gen. 30:43; 32:9, 10; 46:28-30) Ngele otwa kala tu na ekwatathano lya kola naJehova, natse otatu ka vula okuungaunga nomupondo nomaudhigu ngoka hage tu adha ombaadhilila. w23.04 15 ¶6-7

Episalomi 23 olyo eimbilo ndyoka tali popi kombinga yokwiinekela mohole yaJehova nomesiloshimpwiyu lye. David, omunyoli gwalyo, okwa popya kombinga yekwatathano lya kola ndyoka lya li pokati ke nOmusita gwe, Jehova. David okwa li e uvite e li megameno, sho a etha Jehova e mu endithe, nokwa li a inekela thiluthilu muye. David okwa li e shi kutya Jehova ote ke mu ulukila ohole ye esiku nesiku. Oshike sha li she mu inyengitha a kale e mu inekela? David okwa li e uvite a silwa oshimpwiyu nawa, molwaashoka Jehova okwa li aluhe e mu pe shoka a pumbwa. David okwa li wo e shi kutya Jehova oku li kuume ke nokwe mu hokwa. Nomolwaashono a li e na uushili kutya Jehova ota ka tsikila okugwanitha po oompumbwe dhe adhihe, kutya nduno oshike tashi ke mu ningilwa monakuyiwa. Molwaashoka David okwa li e shi kutya Jehova oku mu hole note ke mu sila oshimpwiyu, oshe mu kwathele kaa kale e na omaipulo, ihe pehala lyaashono, okwa kala a nyanyukwa nokwa gwanenwa kwaashoka e na. — Eps. 16:11. w24.01 29 ¶12-13

Okuza pIita Iitiyali yUuyuni, aalongeli yaJehova miilongo oyindji, oya kala ye na ombili noya kala taya uvitha ya manguluka. Odhoshili kutya iilonga mbyoka oya li ya ende nawa. Kunena, iilyo yOlutuwiliki otayi tsikile okupula ewiliko kuJesus. Oya hala omalombwelo ngoka taya gandja kaamwatate ga kale metsokumwe netaloko lyaJehova nolyaJesus. Opo nduno ohaya longitha aatonatelishikandjo naakuluntugongalo ye ga gandje komagongalo. Aakuluntugongalo aagwayekwa oye li ‘moshikaha shaKristus shokolulyo.’ (Eh. 2:1) Odhoshili kutya aakuluntugongalo mboka inaya gwanenena nohaya ningi omapuko. Omathimbo gamwe, Moses naJosua nayo oya li haya ningi omapuko, ngaashi owala aayapostoli. (Num. 20:12; Jos. 9:14, 15; Rom. 3:23) Nonando ongaaka, Kristus ota wilike nuukeka omupiya omudhiginini nosho wo aakuluntugongalo mboka ya langekwa po, nota ka tsikila oku shi ninga Onkee ano otu na omatompelo ogendji gokwiinekela ewiliko ndyoka hatu pewa kwaamboka taya kwatele komeho. w24.02 23-24 ¶13-14

Kunena, otatu vulu okunyanyudha Jehova mokupopya kombinga ye nohamu, nolupandu nonohole. Uuna tatu uvitha, ohatu kaleke momadhiladhilo kutya elalakano lyetu lya simana, olyo okukwathela aantu ya hedhe kuJehova noku ya kwathela ya tale ko Tate yetu ngaashi tse. (Jak. 4:8) Otwa nyanyukwa okuulukila aantu nkene Ombiimbeli tayi popi Jehova, tayi ulike ohole ye, uuyuuki, uunongo, oonkondo nomaukwatya ge galwe omawanawa. Ohatu simaneke wo Jehova noku mu nyanyudha mokukambadhala oku mu holela. Uuna tatu shi ningi, otatu kala tu iwetikile mo muuyuni mbuka wa kolokosha. Aantu otashi vulika ye shi ndhindhilike mo kutya otwa yooloka ko kuyo notashi vulika ya ipule kutya omolwashike. (Mat. 5:14-16) Uuna tu li nayo, otatu vulu tu ya yelithile kutya omolwashike hatu ihumbata ngawo. Nena kungawo, otashi ka inyengitha aanamitima omiwanawa ya kale ya hala okuhedha popepi naKalunga ketu. Uuna tatu simaneke Jehova momikalo ndhika, ohatu nyanyudha omutima gwe. — 1 Tim. 2:3, 4. w24.02 10 ¶7

Opo wu ninge omulumentu Omukriste a pyokoka pambepo, owa pumbwa okwiilonga wu kale wu shi okuninga iinima yontumba. Otashi ke ku kwathela wu taambe ko iinakugwanithwa megongalo, wu kale wu na iilonga, opo wu vule okwiisila oshimpwiyu, nenge aantu yaandjeni nowu kale wo wu na ekwatathano ewanawa nayalwe. Pashiholelwa, ilonga okulesha nokunyola nawa. Ombiimbeli otayi ti kutya opo omulumentu a kale a nyanyukwa nota pondola monkalamwenyo ye, oku na okulongitha ethimbo a kale ha lesha Ombiimbeli esiku kehe nokutedhatedha kuyo. (Eps. 1:1-3) Okulesha Ombiimbeli esiku kehe otashi ke mu kwathela a tseye nkene Jehova ha dhiladhila, notashi ke mu kwathela a kale ha dhiladhila noha tompathana nawa. (Omayel. 1:3, 4) Aamwatate naamwameme oya pumbwa ekwatho lyaalumentu mboka ye shi okulonga nokugandja omayele ga kankamena kOmbiimbeli. Ngele owu shi okulesha nokunyola nawa, oto ka vula okwiilongekidha iipopiwa nomatyokosha taga tungu yalwe nokukoleka eitaalo lyawo. Oto ka vula wo okuninga omandhindhilikoshango ngoka taga vulu oku ku kwathela wu tunge eitaalo lyoye nokutsa yalwe omukumo. w23.12 26-27 ¶9-11

Uuna wa tila, tedhatedha kwaashoka Jehova te ke ku ningila monakuyiwa uuna Satana ta ka kala kee po we. Poshigongi shoshitopolwa shomo 2014, opwa li pwa ningwa euliko lyomusamane gumwe omuvali ta kundathana naanegumbo lye nkene Timoteus omutiyali 3:1-5 ta vulu okuleshwa, andola okwa li ta popi nkene onkalo tayi ka kala mOparadisa. Okwa ti: “Muuyuni uupe otamu ka kala omathimbo ga tuntula. Molwaashoka aantu otaya ka kala ye holathane, ye hole iinima yopambepo, ye shi omangambeko gawo, aaifupipiki, haya tanga Kalunga, haya vulika kaakuluntu, ye shi okupandula, aadhiginini, ye hole yaandjawo nohole yomuule, haya uvathana, haya popile ooyakwawo muuwanawa, ye na eipangelo, ye na omwenyo omwaanawa, ye hole shoka oshiwanawa, aainekelwa, haya tivuka, ye hole Kalunga, pehala lyokuhola uuhalu uuwinayi, haya inyengithwa ketilokalunga lyashili, naantu ya tya ngawo, kala wu na ekwatathano lyopothingo nayo.” Mbela oho kundathana ngaa noyaandjeni, nenge nooitaali ooyakweni kutya onkalamwenyo muuyuni uupe otayi ka kala ya tya ngiini? w24.01 6 ¶13-14

Otashi hekeleke okutseya kutya Jehova okwa hokwa oshigwana she ashihe. Ombiimbeli oya ti: “Omuwa okwa hokwa aantu ye.” (Eps. 149:4) Ihe nando ongawo, omathimbo gamwe yamwe ohaya kala ya teka omukumo, tashi vulika taya ipula kutya, ‘Mbela Jehova okwa hokwa ndje ngaa?’ Aalongeli yaJehova yontumba yopethimbo lyOmbiimbeli, nayo oya li taya kondjo nomadhiladhilo ga tya ngawo. (1 Sam. 1:6-10; Job 29:2, 4; Eps. 51:11) Ombiimbeli oye shi popya sha yela kutya aantu inaaya gwanenena, otaya vulu okukala ya hokiwa kuJehova. Ngiini mbela? Omokukala twa itaala Jesus Kristus nokuninginithwa. (Joh. 3:16) Kungawo, otatu ulike kutya otwa iyela ombedhi omolwoondjo dhetu, notwa ninga euvaneko kuKalunga kutya otatu ka longa ehalo lye. (Iil. 2:38; 3:19) Jehova oha kala a nyanyukwa, uuna tatu katuka oonkatu tu koleke ekwatathano lyetu naye. Ngele otwa ningi ngaashi tatu vulu, tu kale metsokumwe neiyapulo lyetu, Jehova ota kala e tu hokwa e te tu tala ko tu li ookuume ke kopothingo. — Eps. 25:14. w24.03 26 ¶1-2

Otatu vulu okuholela aalongwa mboka, mokutsikila okuuvitha nokuli nonando aakwanepangelo otaye tu lombwele tu ethe po oku shi ninga. Natse otatu vulu okukala tu na einekelo kutya Jehova ota vulu oku tu kwathela tu gwanithe po uukalele wetu. Onkee natu galikane kuJehova e tu pe uulaadhi nuunongo noku tu kwathele tu vule okuungaunga nomaupyakadhi. Oyendji yomutse otatu mono iihuna omolwuuwehame nenge molwuupyakadhi wopamaiyuvo, twa silwa, tu na uupyakadhi megumbo, tatu hepekwa, nenge tu na omaupyakadhi galwe. Iinima ngaashi omikithi dhekomba niita, oya ningitha omashongo ngano ga kale omadhigu unene okuungaungiwa nago. Onkee mbumbulila Jehova omutima gwoye. Mu lombwela kombinga yonkalo yoye, ngaashi owala to lombwele kuume koye kopothingo. Kala wu na uushili kutya Jehova ‘ote ku kwathele.’ (Eps. 37:3, 5) Okudhiginina okugalikana otaku vulu oku tu kwathela tu ‘idhidhimike muudhigu.’ (Rom. 12:12) Jehova oku shi kutya aalongeli ye oye li moonkalo dha tya ngiini noha “uvu omaindilo gawo.” — Eps. 145:18, 19. w23.05 5-6 ¶12-15

Uuna tatu ningi omatokolo ga simana, otwa pumbwa ‘okukambadhala tu ilonge shoka sha opalela Omuwa’ nokukala metsokumwe nasho. (Ef. 5:17) Otatu ka vula okumona kutya Kalunga onkalo yetu okwe yi tala ko ngiini, uuna twa mono omakotampango gOmbiimbeli ngoka tage yi opalele. Ngele otwe ga tula miilonga, otatu ka vula okuninga omatokolo ge li pandunge. ‘Omuhindadhi,’ omutondi gwetu Satana, okwa hala tu kale twa ipyakidhila niinima yuuyuni mbuka, nokukala kaatu na ethimbo lyokulongela Kalunga. (1 Joh. 5:19) Shoka otashi ningitha Omukriste a kale a tala ko elongo, nenge iilonga ye oyo ya simana, pehala lyokulongela Jehova. Ngele shono osha ningwa, otashi ka ulika kutya okwa nwethwa mo komadhiladhilo guuyuni mbuka. Odhoshili kutya iinima mbyoka inayi puka muyo yene, ihe hayo tu na okupititha komeho monkalamwenyo yetu. w24.03 24 ¶16-17