Maeke Fefe ke Taute Tutaki ke he Tohi Iloilo

¹ Ko e foliaga kua manako ma e tau Kerisiano oti ke fakaako e kupu moli ke he falu mo e taute tutaki ki a lautolu kua “kotofa ke he moui tukulagi.” (Gahua 13:48; Mata. 28:19, 20) Kua tuku mai he fakatokatokaaga a Iehova e kanavaakau homo ue atu ke fakakatoatoa aki e mena nei—ko e tohi Iloilo ne Takitaki Atu ke he Moui Tukulagi. Kua fakakite he mataulu e aoga lahi he tau fakaakoaga Tohi Tapu he kaina, ha kua falanaki e moui tukulagi ke he uta e iloilo ha Iehova, ko e Atua moli, mo e hana Tama, ko Iesu Keriso.—Ioane 17:3.

² Ko e tohi Iloilo ko e matapatu tohi he Sosaiete ke fakaaoga he taute e tau fakaakoaga Tohi Tapu he kaina. Fakaaoga ai e tautolu ke fakaako e kupu moli ke he puhala mukamuka, maama, mo e lautonu. To lagomatai e mena nei ke hokotia ke he tau loto ha lautolu kua fakaako. (Luka 24:32) Moli kua latatonu ma e tagata fakaako ke fakaaoga e tau puhala fakaako pauaki kua mitaki. Ma e kakano ia, kua tauteute tuai e uho nei ke fakatoka mai e tau lagomataiaga mo e tau fakamanatuaga hagaao ke he tau puhala fakaako kua moli ke lauia mitaki. He loto manamanatu, mo e ke he tau tutuaga he tau tagata takitaha, kua maeke ia koe ke fakaaoga fakahaga falu po ke fakaaoga oti e tau mena ne tohi i loto. Leveki e uho nei, mo e hagaao tumau ki ai. Ko e tau manatu kehekehe i loto kua lagomatai a koe ke lauia lahi he fakaaoga e tohi Iloilo ke taute tutaki.

³ Taute e Fakaakoaga Tohi Tapu he Kaina kua Holo ki Mua: Kia ha ha i ai e fiafia fakatagata moli ke he tagata fakaako ko e tutaki Kerisiano mo e matakainaga fakaagaga. Kia mafanatia, kapitiga, mo e fakamakai. He eke mo tagata fanogonogo mitaki, maeke ia koe ke iloa e tagata ia—hana feakiaga mo e tuaga he moui—ka lagomatai a koe ke manamanatu e puhala mitaki lahi ke lagomatai a ia fakaagaga. Kia mautali ke foaki e koe a koe ke lata mo e tagata fakaako.—1 Tesa. 2:8.

⁴ Ka fakahoko e fakaakoaga, kua lata ke fakaako fakapapahi e tau veveheaga he tohi Iloilo. To fakaata he mena nei e tagata fakaako ke moua e maama holo ki mua he kupu moli, ha kua fakalaulahi he tohi e tau fakaakoaga he Tohi Tapu fakapapale. Fakatumau e fakaakoaga ke mukamuka mo e fiafia ke alaala mo e holo mitaki ai. (Roma 12:11) Falanaki ai ke he tau tutuaga mo e lotomatala he tagata fakaako, kua liga lata ia koe ke taute oti e tau veveheaga he tula ia po ke pihia, ka e nakai fakatepetepe ai e fakaakoaga. Kua tolomaki ki mua e tau tagata fakaako ka tumau ki ai e faiaoga mo e tagata fakaako ke he fakaakoaga he tau fahitapu takitaha. Ti, ke he tau tagata tokologa, liga kua lata ke oti e tau veveheaga 19 he tohi he kavi ke ono e mahina po ke pihia.

⁵ Talahau e tau fakaakoaga takitaha aki e tau manatu ku kua omoomoi e fiafia ke he vala tala. To kitia e koe igatia e tau veveheaga mo e mataulu ne kua lata ke peehi. Kua igatia e mataulu mo e talahau e matapatu manatu, he lagomatai a koe ke tokaloto e mataulu he veveheaga. Mailoga ke aua tutala tumau. Ka e lali ke futiaki mai e tau manatu he tagata fakaako. Huhu fakatonu e tau huhu fakalagalaga ke he tagata fakaako, fakave ke he mena kua fita he iloa e ia, ka lagomatai a ia ke fakakakano mo e hokotia ai ke he fakaotiaga hako. (Mata. 17:24-26; Luka 10:25-37; kikite School Guidebook, lau 51, paratafa 10.) Pipiki mau ke he vala tala kua tohia i loto he tohi Iloilo. Ko e fakakite he falu tala lafi ki luga kua uta kehe po ke fakalokiloki e tau matapatu manatu mo e toho e fakaakoaga. (Ioane 16:12) Kaeke kua huhu e huhu nakai mai he fakaakoaga, ko e mena ia kua lata ni ia koe ke tali ai he fakahikuaga he fakaakoaga. To fakaata he mena nei a koe ke oti e fakaakoaga he fahitapu mo e nakai fakatauhele. Fakamaama ke he tagata fakaako to tali fakahaga e tau huhu fakatagata hana he tau fakaholoaga he fakaakoaga.—Kikite e School Guidebook, lau 94, paratafa 14.

⁶ Ka mauokafua e tagata fakaako ke he Tolu Taha, nakai maeke ke mate e solu, afi a helo, po ke tau fakaakoaga fakavai pihia, ti kua nakai fakamakona ai he tau manatu he tohi Iloilo a ia, maeke ia koe ke age e tohi Rea­son­ing po ke taha tohi kua talahau ai e fakaakoaga. Tala age ki a ia to tutala a koe mo ia ke he fakaakoaga ka oti he totou e ia mo e manamanatu ki ai.

⁷ Kua fakalilifu ai he kamata mo e fakaoti aki e fakaakoaga ke he liogi ma e takitakiaga mo e fakamonuina ha Iehova, kua tuku e manamanatuaga lilifu he tagata, ti futiaki mai ki a Iehova ko e Faiaoga moli. (Ioane 6:45) Ka ula tapaka agaia e tagata fakaako, kia lata ia koe ke ole ki a ia ke fakamamao mai ai he magaaho ka fakaako.—Gahua 24:16; Iako. 4:3.

⁸ Fakaako kua Lauia Mitaki he Tau Tohiaga Tapu, Tau Fakataitaiaga, mo e Tau Huhu Fakamanatu: Pete ni kua laga fiha e fakaako e ia e veveheaga he magaaho fakamua, to liu fakamanatu he faiaoga lotomatala e tau fakaakoaga takitaha mo e tokaloto tumau e tagata fakaako. Kua lagomatai he mena nei ke amaamanaki falu huhu he tagata fakaako. Ke lauia mitaki e fakaako, kia manamanatu fakamitaki ke he tau matapatu manatu he veveheaga. Kumi e tau kupu tohi ke kitia ko e tatai fefe ke he vala tala, ti fifili e tau kupu kua lata ke totou he fakaakoaga. Manamanatu ke he puhala ke fakaako e koe he fakaaoga e tau fakataiaga mo e tau huhu fakamanatu he fakahikuaga he veveheaga.

⁹ He fakaaoga fakamitaki e tau kupu tohi, to lagomatai e koe e tagata fakaako ke loto fakaaue kua fakaako moli e ia e Tohi Tapu. (Gahua 17:11) He fakaaoga e puha “Fakaaoga Fakamitaki e Tohi Tapu Hau,” he lau 14 he tohi Iloilo, fakaako a ia ke iloa e tau tuaga he tau kupu tohi. Fakakite age ki a ia e puhala ke kitia e tau kupu tohi ne fatiaki he fakaakoaga. He fai magaaho, kumi ti totou e tau kupu tohi ne toka ai ka e nakai fatiaki. Kia fakaata e tagata fakaako ke talahau e puhala kua kau e lautolu po ke fakamaama e mena kua talahau he paratafa. Peehi e tau matapatu manatu he vala tala ke maeke ia ia ke loto fakaaue e tau kakano ma e tau matapatu kakano he fakaakoaga. (Nehe. 8:8) Nakai lata he faiaoga ke talahau e tau vala tala lafi ki luga ke he fakaakoaga ka e toka ni ke he mena kua talahau he tohi. Talahau e aoga he iloa e tau higoa mo e tau tuaga he tau tohi he Tohi Tapu. Kua aoga lahi ma e tagata fakaako ke totou e Watchtower ia Iuni 15, 1991, lau 27-30. Ka latatonu, ti fakamalolo ke fakaaoga e New World Translation. Maeke ia koe ke fakatata fakahaga e puhala ke fakaaoga e tau puhala kehekehe, tuga e tau fakamoliaga he fahi mo e tutuaga he tau kupu he Tohi Tapu.

¹⁰ Kua fakamaama he Fakaakoaga 34 he Theocratic Ministry School Guidebook ko e tau fakataitaiaga kua omoomoi e tau puhala manamanatu he tagata mo e mukamuka lahi ke iloa e tau manatu fou. Kua fakalataha ai e lotomatala ulu mo e tau logonaaga, ke maeke he fekau ke hokotia ne nakai lata ai mo e tau fakamoliaga mukamuka. (Mata. 13:34) Ko e tohi Iloilo kua toka ai e loga he tau fakataitaiaga fakaako ne kua mukamuka ka e malolo. Ma e fakatai, ne fakaaoga e fakataitaiaga he veveheaga 17 ke ati hake e fakaaueaga he puhala fakaagaga, kua foaki e Iehova e tau mena kai, mena tui, mo e nonofoaga mai he fakapotopotoaga Kerisiano. Ko e tau fakataitaiaga fulufuluola he tohi Iloilo kua lata ke fakaaoga fakamitaki ke fakaohooho e tau logonaaga. I lalo hifo he mataulu “Ko e Olioliaga he Liu Tu Mai,” he lau 185, to fakamalolo e kakano he paratafa 18 he fekau e tagata fakaako ke liu ono ke he fakatino he lau 86. To omoi he mena nei a ia ke manamanatu ke he liu tu mai ko e mena moli i lalo he Kautu he Atua.

¹¹ Kua lata e tau tagata fakaako Tohi Tapu ke tolomaki fakaagaga he tau fakaakoaga takitaha. Ma e kakano nei, kia nakai fakato ke huhu e tau huhu fakamanatu he puha “Kamatamata e Iloilo Hau” he fakaotiaga he veveheaga. Fanogonogo ke he hokulo he mena ne fakaako ki ai nakai ni ke he tau tali iloilo. Falu he tau huhu nei ne talaga ke futiaki e tali fakatagata mai he loto. Ma e fakatai, kikite e lau 31, ti huhu ke he tagata fakaako: “Ko e heigoa e tau fua a Iehova ne mua atu e futiaki ki a koe?”—2 Kori. 13:5.

¹² Fakamahani e Tau Tagata Fakaako ke Tauteute ma e Fakaakoaga: Ko e tagata fakaako ne totou fakamua e fakaakoaga, ne fakamailoga e tau tali, mo e manamanatu e puhala ke tali aki ke he tau kupu ni hana to mafiti lahi e tupu ki mua fakaagaga hana. He hau a fakafifitakiaga mo e fakamaloloaga, maeke ia koe ke fakamahani a ia ke tauteute ma e fakaakoga. Fakakite age ki a ia e tohi hau, ke he mena ne fakamailoga e koe po ke hihika e tau matapatu kupu po ke tau talahauaga. Fakamaama ki a ia e puhala ke kumi e tau tali hako ke he tau huhu he tohi. Ko e tauteute tokoua he veveheaga kua liga lagomatai ke he tagata fakaako. Fakamalolo ki a ia ke tali ke he tau kupu ni hana. Ko e mena ia ni ke tavakivaki kua maama e ia e vala tala. Ka totou e ia e tali hana mai he tohi, kia fakaohooho e koe e manamanatuaga hana he huhu ki a ia e puhala ke fakamaama e manatu ke he taha tagata ke he tau kupu ni hana.

¹³ Fakamafana e tagata fakaako ke kumi e tau kupu tohi ne nakai fatiaki ko e vala he hana kumikumiaga fakafahitapu, ha kua nakai fai magaaho lahi ke totou oti ai he fakaakoaga. Nava atu ki a ia ma e laliaga kua tuku e ia ke he tau fakaakoaga hana. (2 Pete. 1:5; kikite e Watchtower, Aokuso 15, 1993, lau 13-14, ma e falu lagomataiaga ke he mena ke taute he faiaoga mo e tagata fakaako ke fakaholo ki mua e iloa he fakaakoaga Tohi Tapu.) He puhala nei, kua fakamahani e tagata fakaako ke tauteute mo e taute e tau tali kakano he tau feleveiaaga he fakapotopotoaga. To ako e ia e puhala ke feaki e tau aga mitaki he fakaako fakatagata ne kua lagomatai a ia ke tumau e mafiti ke he kupu moli he mole e fakaakoaga Tohi Tapu fakatagata hana ka oti e tohi Iloilo.—1 Timo. 4:15; 1 Pete. 2:2.

¹⁴ Takitaki Atu e Tau Tagata Fakaako ke he Fakatokatokaaga a Iehova: Ko e matagahua he tagata taute tutaki ke takitaki atu e fiafia he tagata fakaako ke he fakatokatokaaga a Iehova. To mafiti lahi e motua fakaagaga he tagata fakaako kaeke ke mailoga e ia mo e loto fakaaue ke he fakatokatokaaga mo e iloa moli e lata ke fakalataha ai. Manako a tautolu ke moua e ia e fiafia he feoaki mo e tau tagata he Atua mo e amanaki lahi ke fakalataha mo tautolu ke he Fale he Kautu, ke moua e ia e lagomataiaga fakaagaga mo e loto ne kua foaki ai he fakapotopotoaga Kerisiano.—1 Timo. 3:15.

¹⁵ Ko e porosua Tau Fakamoli a Iehova—Ne Kaufakalataha ke Taute e Finagalo he Atua ke he Lalolagi Katoa ne kua taute ai ke fakamahani aki e tau tagata mo e fakatokatokaaga kitia a Iehova kua fakaaoga he vaha nei ke fakakatoatoa aki hana a finagalo. Ka fakatu e fakaakoga, he ha he age e lagaki ke he tagata fakaako? He kamataaga, uiina tumau e tagata fakaako ke he tau feleveiaaga. Fakamaama e puhala kua taute aki. Maeke ia koe ke tala age e mataulu he lauga pauaki he tapu ka hau po ke fakakite age ki a ia e vala tala ka fakatutala ke he Fakaakoaga Kolo Toko. Liga maeke ia koe ke uta a ia ke kitia e Fale he Kautu ka nakai fai feleveiaaga i ai ke nakai fakatupetupe a ia he amanaki a ia ke fano ke he matakavi fou he magaaho fakapa. Liga maeke ia koe ke foaki ke uta ke he tau feleveiaaga. Ka hau a ia, kia fakafeleveia fakamitaki mo e fakahagahaga mitaki. (Mata. 7:12) Fakafeleveia atu a ia ke he falu Fakamoli, mo e tau motua. Amanaki ai to kamata a ia ke kitia e fakapotopotoaga ko e magafaoa fakaagaga hana. (Mata. 12:49, 50; Mareko 10:29, 30) Liga fakatoka foki e koe e foliaga ma hana, tuga ke taha e feleveiaaga ka fina atu ki ai he fahitapu, mo e fakatumau ke fatiaki e foliaga.—Hepe. 10:24, 25.

¹⁶ He kamata e fakaako Tohi Tapu ke he tohi Iloilo, peehi e tau vala kua tohi ai ke lata he fakalataha tumau mo e fakapotopotoaga he tau feleveiaaga. Pauaki atu ke he lau 52, 115, 137-9, 159, ti pihia foki e veveheaga 17. Fakakite e tau manatu hokulo hau he loto fakaaue ma e fakatokatokaaga a Iehova. (Mata. 24:45-47) Vagahau ati hake hagaao ke he fakapotopotoaga he matakavi mo e tau mena kua ako e koe he tau feleveiaaga. (Sala. 84:10; 133:1-3) Kua mitaki kaeke ke kitia he tagata fakaako e tau vitio he Sosaiete, kamata aki e Jehovah’s Witnesses—The Organization Behind the Name. Ma e fakalaulahi atu e tau manatu ke he puhala ke takitaki e fiafia ke he fakatokatokaaga, kikite e Watchtower, Novema 1, 1984, lau 14-18, mo e uho he Our Kingdom Ministry Aperila 1993.

¹⁷ Fakamalolo e Tau Tagata Fakaako ke Fakamatala ke he Falu: Ko e foliaga ha tautolu he fakaako mo e tau tagata ke taute tutaki kua fakamoli ma Iehova. (Isa 43:10-12) Ko e kakano kua lata e faiaoga ke fakamalolo e tagata fakaako ke tutala ke he falu hagaao ke he mena kua iloa e ia mai he Tohi Tapu. Taute e mena nei he huhu: “Maeke fefe ia koe ke fakamaama e mena nei ke he magafaoa hau?” po ke “Ko e heigoa e kupu tohi ka fakaaoga e koe ke fakamoli aki e manatu nei ke he kapitiga?” Fakamaama e tau matapatu matakavi he tohi Iloilo ne kua malolo ai e gahua fakamatala, tuga ke he lau 22, 93-5, 105-6, ti pihia foki e veveheaga 18. Ka latatonu, age ke he tagata fakaako e tau tuleke ke fakaaoga ke he gahua fakamatala nakai mautali ke he falu. Lagomatai ki ai ke uiina e ia hana magafaoa ke nonofo ke he fakaakoaga hana. Fai kapitiga nakai a ia ne kua manako foki ke fakaako? Huhu kia ia ke atu ki a koe a lautolu kua fiafia.

¹⁸ He o atu ke he Aoga Fekafekau Fakateokarasi mo e Feleveiaaga Fekafekau, ko e tutaki lauia mitaki kua moua falu fakamahaniaga mo e fakaohooho ka lagomatai a ia ke eke mo tagata fakailoa he tala mitaki. Ka fakakite e ia e fiafia he hu he aoga po ke eke mo tagata fakailoa nakai la papatiso, ko e matapatu fakaako ne kua fakatoka mai he tohi Our Ministry lau 98 mo e 99 ka fakaaoga. Ka ha i ai e puhala he moui hana kua puipui a ia mai he lata ki ai, maeke ia koe ke kumi e tau tohi he Sosaiete ma e tau lagomataiaga ke hahamo e manatu mo e talahau ai ki a ia. Ma e fakatai, liga uka e tagata fakaako ke kautu mai he ula tapaka po ke falu a tau tulaki. Kua fakakite mai he tohi Reasoning e tau kakano malolo faka-Tohiaga Tapu ko e ha kua lata e tau Kerisiano ke fehola kehe mai he tau aga fakamamahi, mo e he lau 112 kua fakatoka mai e puhala kua moli ke kautu he lagomatai e falu ke tiaki ai. Liogi mo ia hagaao ke he mena ia, fakaako ki a ia ke ati hake e falanakiaga ki a Iehova ma e lagomatai.—Iako. 4:8.

¹⁹ Ko e fakatokaaga ke muitua ke he fifiliaga ko e lata a ia ke fakalataha ke he fekafekauaga auloa kua mai he Kolo Toko, Fepuali 1, 1996, lau 13, paratafa 6. Ka lata e tagata fakaako, kua lagomatai lahi ke taute e fakamahaniaga he tauteute a ia ke he fekafekauaga he fonua ke he aho fakamua. Ke he puhala mitaki, fakatutala ke he tau aga he tagata mo e tau foliaga ne kua fa aga mau ki a koe he matakavi. Kamata fakamua a ia ke he gahua he taha fale ke he taha fale ka maeke, mo e fakamahani tumau a ia ke he falu puhala he fekafekauaga. Kaeke ke fakaku mo e fakamukamuka e koe e tau fakataitaiaga, to mukamuka foki ia ia ke muitua. Kia ati hake mo e fakamalolo, ke malolo e loto olioli ke he gahua, ke maeke ia ia ke moua e aga hau mo e fifitaki ki ai. (Gahua 18:25) Ko e foliaga he tutaki fou kua lata ke eke mo tagata fakailoa tumau mo e fakamakai ke he gahua fakamatala. Liga maeke ia koe ke lagomatai a ia ke taute e setulu aoga ma e fekafekauaga. Ke maeke ia ia ke holo ki mua ke he hana lotomatala ke fakamatala ke he falu, kia fakakite e koe e manatu he totou e ia e tau lagaki he Watchtower ia Aokuso 15, 1984, lau 15-25; Iulai 15, 1988, lau 9-20; Ianuari 15, 1991, lau 15-20; mo e Ianuari 1, 1994, lau 20-5.

²⁰ Omoi e Tau Tagata Fakaako ke he Tukuleleaga mo e Papatisoaga: Kua lata ke maeke he tagata fakaako loto fakamoli ke lahi e mena kua ako he fakaakoga ke he tohi Iloilo ke taute e tukuleleaga ke he Atua mo e lata ke papatiso. (Fakatatai Gahua 8:27-39; 16:25-34.) Pete ia, ato fakaohooho e tagata ke taute e tukuleleaga, kua lata ia ia ke feaki e fakamoliaga ki a Iehova. (Sala. 73:25-28) He fakaakoaga, kia kumi puhala ke ati hake e loto fakaue ke he tau mahani a Iehova. Fakakite e manatu hokulo hau ke he Atua. Lagomatai e tagata fakaako ke he puhala ke fakatupu e fakafetuiaga mafanatia fakatagata mo Iehova. Ka iloa mo e fakaalofa moli a ia ke he Atua, to fekafekau fakamoli a ia ki a Ia, ha ko e fakamoli mahani Atua kua fai vala ke he puhala kua logona e tautolu ki a Iehova ko e peresona.—1 Timo. 4:7, 8; kikite e School Guidebook, lau 76, paratafa 11.

²¹ Lali ke hokotia ke he loto he tagata fakaako. (Sala. 119:11; Gahua 16:14; Roma 10:10) Kua lata ia ia ke kitia e puhala kua lauia e kupu moli ki a ia fakatagata mo e ke fifili e puhala kua lata ia ia ke taute ke he mena kua ako e ia. (Roma 12:2) Kua talitonu moli kia e ia e kupu moli kua fakakite age ki a ia he tau fahitapu oti? (1 Tesa. 2:13) Ko e mena ia, maeke ia koe ke futiaki mai e tagata fakaako he huhu e tau huhu kitia tuga e: Fefe e logonaaga hau ke he mena nei? Fakagahua fefe e koe e mena nei ke he moui hau? Mai he tau tali hana kua maama e koe e fahi kua lata lagomatai ke hokotia ke he hana loto. (Luka 8:15; kikite e School Guidebook, lau 52, paratafa 11.) Ko e tau talahauaga ma e tau fakatino he lau 172 mo e 174 he tohi Iloilo kua huhu: “Kua taute nakai e koe e tukuleleaga ke he Atua he liogi?” mo e “Ko e heigoa e lekua ne nakai papatiso ai a koe?” Kua maeke he tau mena nei ke fakaohooho fakalahi e tagata fakaako ke gahuahua.

²² Ko e fakaholoaga ke muitua ka manako e tagata nakai la papatiso ke papatiso ne kua tohi he Kolo Toko, Fepuali 1, 1996, lau 13, paratafa 9. Ne lolomi e tohi Iloilo mo e foliaga ke lagomatai e tagata ke tali e “Tau Huhu ma Lautolu kua Manako ke Papatiso,” ne moua he vala lafi he tohi Our Ministry, ka liu fakamanatu he tau motua mo ia. Kaeke ke peehi e koe e tau tali ke he tau huhu ne tohi he tohi Iloilo, kua lata e tagata fakaako ke lagomatai lahi ma e tau magaaho huhu ne taute mo e tau motua he tauteute a ia ma e hana papatisoaga.

²³ Lagomatai a Lautolu kua Fakakatoatoa e Fakaakoaga Tohi Tapu he Kaina: Ne amanaki ke he tagata ka oti e fakaakoaga he tohi Iloilo, ko e hana fakamoli mo e hokulo he fiafia he fekafekau ke he Atua to maaliali ai. (Mata. 13:23) Ko e mena haia he vala fakahiku he tohi kua huhu, “Ko e Heigoa Hau Ka Taute?” Ko e tau paratafa fakahiku kua kitia ke he tagata fakaako ke hagaaki ke he fakafetuiaga kua lata ia ia ke feaki mo e Atua, ko e lata ke fakagahua e iloilo ne ako e ia, mo e ke lata ke taute fakamafiti e fakatataaga he hana fakaalofa ki a Iehova. Nakai fai foakiaga foki he tau tohi ke fakaako mo lautolu ka oti e tohi Iloilo. Fakamaama fakamitaki ke he tagata fakaako kua kaumahala ke tali atu ke he iloilo he Atua ke he mena ke taute e ia ke tolomaki fakaagaga. Kia femataaki tumau a koe mo ia, hafagi e puhala ma hana ke taute e tau lakaaga ke takitaki atu ke he moui tukulagi.—Fakama. 12:13.

²⁴ Ko e tutaki fou kua kuku mau e ia e kupu moli mo e papatiso ai ka lagomatai fakalahi a ia ke tupu ki mua e hana iloilo mo e maama ke maeke ke fakatumau ke he tua. (Kolo. 2:6, 7) He matutaki e fakaakoaga Tohi Tapu he kaina hana he oti e tohi Iloilo, maeke ia koe ke fakaata e koe a koe ke foaki ha lagomataiaga fakatagata ne kua lata ia ia ke maeke ke motua fakaagaga. (Kala. 6:10; Hepe. 6:1) Ma e vala hana, kua maeke ia ia ke fakaoti aki hana maama he totou tumau e Tohi Tapu, fakaako fakatagata e Kolo Toko mo e falu tohi kua tauteute he “fekafekau fakamoli,” mo e fina atu ke he tau feleveiaaga, mo e fakatutala e kupu moli ke he tau matakainaga he tua. (Mata. 24:45-47; Sala. 1:2; Gahua 2:41, 42; Kolo. 1:9, 10) Ko e totou hana he tohi Our Ministry mo e fakagahua e mena kua tohi ai ka lahi e aoga he eke a ia mo tagata fakatokatoka fakateokarasi ke fakakatoatoa hana feua he fonua.—2 Timo. 2:2; 4:5.

²⁵ Fakatupu e Puhala he Fakaako Atu: Ne poaki ki a tautolu ke ‘eke e tau motu oti kana mo tutaki ti fakaako atu kia lautolu.’ (Mata. 28:19, 20) Ha kua nakai mumutu kehe e puhala fakaako atu mo e taute tutaki, kua manako a tautolu ke lali ke holo ki mua ko e tau faiaoga. (1 Timo. 4:16; 2 Timo. 4:2) Ke fakalaulahi e tau lagomataiaga ke feaki e puhala fakaako atu hau, kua manako a koe ke totou: “Feaki e Puhala Fakaako” mo e “Hokotia ke he Loto he Tagata Fanogonogo Hau” he School Guidebook, tau fakaakoaga 10 mo e 15; “Faiaoga, Fakaako Atu” he Insight, Volume 2; mo e tau vala tala he Watchtower “Ati Hake Aki e Tau Koloa Nakai Vela” mo e “Ka Fakaako a Koe, Kia Hokotia ke he Loto,” Aokuso 1, 1984; “Kakano Kua Lauia Mitaki a Koe Mai he Tau Tohiaga Tapu?,” Mati 1, 1986; mo e “Moua Fefe e Olioli he Taute Tutaki,” Fepuari 15, 1996.

²⁶ Ka makai a koe ke taute tutaki, he fakaaoga e tohi Iloilo, liogi tumau ki a Iehova, ko ia “ni kua fakatutupu ai,” ke fakamonuina e tau laliaga hau ke hokotia e tala mitaki he Kautu ke he tau loto he tau tagata. (1 Kori. 3:5-7) Kia moua e koe e olioli he fakaako e falu ke maama, ke loto fakaaue, mo e ke fakaaoga e iloilo kua takitaki atu ke he moui tukulagi!