Kuwonjezera Luso Lathu mu Utumiki—Pezani Anthu Oti Muziwapatsa Magazini Mwezi Uliwonse

N’chifukwa Chiyani Kuchita Zimenezi N’Kofunika?: Anthu ena amakonda kuwerenga magazini athu koma safuna kuti tiziphunzira nawo Baibulo. Mwina safuna kuphunzira chifukwa amaona kuti ali kale ndi chipembedzo chawo kapena amaona kuti alibe nthawi yophunzira Baibulo. Komabe, akamawerenga magazini athu nthawi zonse, akhoza kufuna kudziwa zambiri. (1 Pet. 2:2) Nkhani ina ya m’magazini athu, ikhoza kuwachititsa chidwi kapena zinthu pa moyo wawo zikhoza kusintha. Choncho tikamawayendera nthawi zonse, angayambe kumasuka nafe ndipo zimenezi zingatithandize kudziwa zimene amakonda komanso zomwe zimawadetsa nkhawa. Kenako, tikhoza kuyamba kuphunzira nawo Baibulo.

Kodi Tingachite Bwanji Zimenezi?

Mwezi uliwonse, muziwapatsa magazini atsopano a Nsanja ya Olonda ndi Galamukani! Mungathenso kupitako mkati mwa mwezi kukakambirana nawo nkhani ina ya m’magazini omwe munawasiyira. Mungathenso kukawapatsa kapepala kapena kabuku kogawira m’mweziwo. Zimenezi zingathandize kuti apitirize kukhala ndi chidwi chofuna kuphunzira Mawu a Mulungu. Muzilemba zonse zimene mwakambirana, chilichonse chomwe mwawapatsa komanso tsiku lomwe munapitako.—Onani Utumiki Wathu wa Ufumu wa January 2014, patsamba 3.
Muzikonzekera bwino musanapiteko. Komanso m’malo mongowasiyira magazini, yesani kucheza nawo mwachidule kuti muzolowerane nawo. Zimenezi zingathandize kuti afune kuphunzira zambiri.
Muzikhala tcheru kuti muone ngati mungathe kuyamba kuphunzira Baibulo ndi anthu amene mumawapatsa magazini mwezi uliwonse. Mwachitsanzo, akafunsa funso pa nkhani inayake, apatseni buku kapena kabuku komwe timagwiritsa ntchito pophunzira ndi anthu. Kenako kambiranani nawo yankho lake. Musanachoke, afunseni funso loti mudzakambirane pa ulendo wotsatira. Ngati mumakambirana nawo nthawi zonse Baibulo kapena mabuku amene timagwiritsa ntchito pophunzira ndi anthu, ndiye kuti limenelo ndi phunziro. Kodi munawapatsapo kabuku ka Uthenga Wabwino komanso kuwasonyeza mmene timachitira phunziro lachidule? Nanga munawaonetsapo vidiyo yakuti, N’chifukwa Chiyani Tiyenera Kuphunzira Baibulo? ndi yakuti, Kodi Phunziro la Baibulo Limachitika Bwanji? Musaiwale kuti zinthu zimasintha. Ngakhale zitakhala kuti poyamba munthuyo sanasonyeze chidwi chofuna kuphunzira Baibulo, mungachite bwino kumufunsanso ngati panopa angafune kuphunzira.

Tayesani Kuchita Izi Mwezi Uno:

Lembani mayina a anthu omwe mukuganiza kuti mungamawapatse magazini mwezi uliwonse. Apititsireni magazini atsopano ndipo auzeni kuti mudzawapatsanso magazini a mwezi wamawa.