Tingalalikire Bwanji Pogwiritsa Ntchito Tebulo Kapena Kashelefu Kamatayala?

Kulalikira pogwiritsa ntchito tebulo kapena kashelefu kamatayala kukuthandiza kuti anthu ambiri a mitima yabwino aphunzire choonadi. (Yoh. 6:44) Choncho akulu anauzidwa kuti ayenera kukonza zoti mpingo wawo uzilalikira pogwiritsa ntchito njirayi pamalo opezeka anthu ambiri m’gawo la mpingo wawo. Popeza polalikira pogwiritsa ntchito njirayi sitimafunika kumanga kabenchi, nthawi zambiri sitingafunike kupempha chilolezo kwa akuluakulu a pamalopo. Ndiye kodi ndani ayenera kulalikira pogwiritsa ntchito njira imeneyi? Akulu ayenera kusankha ofalitsa amene amachita zinthu mozindikira, achitsanzo chabwino komanso amene ali ndi luso lolankhula ndi anthu. Mfundo zotsatirazi zikufotokoza zimene muyenera kuchita komanso zimene simuyenera kuchita mukamalalikira pogwiritsa ntchito njirayi.

Zimene muyenera kuchita:

Muzikhala aubwenzi komanso muzichita chidwi ndi anthu odutsa. Ofalitsa ena amamwetulira anthuwo komanso kuwapatsa moni mwansangala. Munthu akasonyeza kuti ali ndi chidwi ndi zomwe zili patebulo kapena kashelefuko, munganene kuti: “Mukhoza kutenga chilichonse chomwe mukufuna.”
Muziima pamalo abwino, osati patali kwambiri kapena pafupi kwambiri ndi tebulo kapena kashelefu kanu. Munthu akaima, yambani kukambirana naye. Mwina mungamufunse kuti: “Kodi mukudziwa yankho la funso limeneli?” Ofalitsa ena amaona kuti kuima moyandikira tebulo kapena kashelefu kawo kumathandiza. Koma ena amaona kuti kuchita zimenezi kumachititsa kuti anthu ena aziopa kuima pamalopo. Choncho amaima chapataliko n’kumadikira kuti munthu aime kapena asonyeze kuti ali ndi chidwi ndi zimene zili patebulopo.
Ngati n’zotheka werengani naye lemba limodzi kapena angapo.
Ngati munthu watenga buku la Baibulo Limaphunzitsa Chiyani kapena kabuku komwe timagwiritsa ntchito pophunzira ndi anthu, mufotokozereni zokhudza phunziro la Baibulo. Ngati n’zotheka, muonetseni vidiyo yakuti, N’chifukwa Chiyani Tiyenera Kuphunzira Baibulo?
Mungamupemphe kuti akupatseni adiresi kapena nambala yake ya foni. Ngati munthuyo sakhala m’gawo la mpingo wanu, lembani fomu ya Kaonaneni ndi Wachidwi Uyu (S-43), n’kuipereka kwa mlembi pasanapite nthawi yaitali.

Zimene simuyenera kuchita:

Musakhale aukali kapena amakani. Simuyenera kukhala pafupi kwambiri ndi tebulo kapena kashelefuko ngati ndinu mlonda.
Musamaone ngati cholinga cha ulalikiwu ndi kungogawira mabuku athu basi. Tikamalalikira, cholinga chathu chimakhala kuyambitsa maphunziro a Baibulo. Choncho yesetsani kukambirana ndi anthu.
Musamaime kutsogolo kwa tebulo kapena kashelefuko kuopa kutchingira anthu. Muzipewanso kucheza kwambiri ndi munthu amene mukulalikira naye, chifukwa zimenezi zingapangitse kuti anthu azingodutsa popanda kuthandizidwa. Ngati mukufuna kuimba kapena kuyankha foni, ndi bwino kuchoka kaye pamene pali tebulo kapena kashelefuko.
Ngati munthu akutsutsa, musayambe kukangana naye. Ndi bwino kungochoka n’kukaima pamalo ena.