Fakkeenya
9 Ogummaa dhugaan mana ishii ijaarratteetti;
Utubaawwan ishii torba boccee qopheeffatteetti.
2 Ishiin guutummaatti foon ishii qopheessiteetti;*
Daadhii wayinii ishii waliin makteetti;
Maaddii ishiis qopheessiteetti.
3 Iddoowwan ol kaʼoo magaalattii irraa akkana jedhanii akka waamaniif,+
Tajaajiltoota ishii warra durbaa ergiteetti:
4 “Namni muuxannoo hin qabne kam iyyuu, as haa dhufu.”
Warra hubannaa* hin qabneenis akkana jetti:
5 “Kottaa, nyaata koo nyaadhaa,
Dhaadhii wayinii isan waliin makes dhugaa.
6 Wallaalummaa keessan* dhiisaa, lubbuudhaanis jiraadhaa;+
Daandii hubannaa irra fuulduratti deemaa.”+
7 Namni nama qoostuu taʼeef sirreeffama kennu salphina ofitti waama,+
Namni nama hamaadhaaf sirreeffama kennu hundis of miidha.
8 Nama qoostuu taʼeef sirreeffama hin kennin, yoo akkana goote si jibba.+
Nama ogeessaaf sirreeffama kenni, innis si jaallata.+
9 Nama ogeessa barsiisi, innis caalaatti ogeessa taʼa.+
Nama qajeelaa barsiisi, innis beekumsa dabalataa ni argata.
10 Yihowaa sodaachuun, jalqaba ogummaa ti,+
Isa Hundumaa Caalaa Qulqulluu taʼe sana beekuunis+ hubannaa dha.
11 Anaan kan kaʼe guyyoonni kee hedduu ni taʼu,+
Waggoonni umurii keetiis siif dabalamu.
12 Ogeessa yoo taate, ogeessa taʼuun kee suma fayyada,
Qoostuu yoo taate garuu, miidhaan isaa suma irra gaʼa.
13 Dubartii gowwaan iyyitee dubbatti.+
Ishiin beekumsa hin qabdu, wanta beektu tokko illee hin qabdu.
14 Ishiin balbala mana ishii dura,
Iddoowwan ol kaʼoo magaalattii irra barcuma irra teessee,+
15 Warra achiin darban,
Warra karaa isaanii qabatanii kallattiidhaan deeman akkana jettee waamti:
16 “Namni muuxannoo hin qabne kam iyyuu, as haa dhufu.”