Hojii Ergamootaa
16 Phaawulos Darbee gaʼe; achiis Lisxiraa dhaqe.+ Barataan Ximotewos jedhamu tokko achi jira ture;+ haati isaa Yihudii Gooftaatti amantu yeroo taatu, abbaan isaa garuu nama Giriikii ture; 2 Ximotewos obboloota Lisxiraa fi Iqooniyum biratti maqaa gaarii qaba ture. 3 Phaawulos, Ximotewos isaa wajjin akka deemu kan barbaadu taʼuu isaa ibse; kanaafuu, Yihudoota naannoowwan sana jiraniif jedhee fuudhee dhaqna isa qabe;+ sababiin isaas, hundi isaanii abbaan isaa nama Giriikii akka taʼe beeku turan. 4 Magaalota keessa darban hundattis, murtoo ergamoonnii fi jaarsoliin Yerusaalem keessa jiran murteessan akka eegan obboloota achi jiranitti himu turan.+ 5 Akka kanaan, gumiiwwan amantiitti cimaa fi guyyuma guyyaadhaan lakkoofsaan dabalaa deeman.
6 Kana malees, hafuurri qulqulluun dubbicha koonyaa Eeshiyaa keessatti akka hin dubbanne waan isaan dhowweef, Firgiyaa fi biyya Galaatiyaa keessa darbanii deeman.+ 7 Yommuu gara Miisiyaatti gad buʼanis, gara Bitiiniyaatti seenuuf carraaqqii godhan;+ haa taʼu malee, hafuurri Yesuus isaaniif hin heyyamne. 8 Kanaafuu, karaa Miisiyaa* darbanii gara Xiroʼaasitti gad buʼan. 9 Achiis Phaawulos halkan sana namni Maqedooniyaa tokko achi dhaabbatee, “Gara Maqedooniyaatti ceʼiitii nu gargaari” jedhee yommuu isa kadhatu mulʼataan arge. 10 Akkuma inni mulʼata kana argeenis, Waaqayyo misiraachicha akka isaaniif lallabnu nu waameera jennee waan yaadneef gara Maqedooniyaa dhaquuf yaalle.
11 Kanaafuu, dooniidhaan Xiroʼaasii kaanee kallattiidhaan gara Saamotraaqee dhaqne; guyyaa itti aanutti immoo gara Niyaapholiis deemne; 12 achii kaanees, gara Filiphisiyus+ ishii magaalaa guddoo koonyaa Maqedooniyaa taatee fi kolonii Roomaa jala turtee dhaqne. Guyyoota muraasaafis magaalaa kana keessa turre. 13 Guyyaa Sanbataattis gad baanee, bakka karra magaalattiidhaa ala laga qarqaratti argamuu fi kadhannaan itti godhama jennee yaanne tokko dhaqne; achi teenyees dubartoota walitti qabamaniif lallabuu jalqabne. 14 Yeroo kanatti dubartiin Liidiyaa jedhamtu, uffata bifa dhiilgee magaalaa Tiyaaxiraadhaa+ dhufe gurgurtuu fi Waaqayyoon waaqeffattu tokko ni dhaggeeffatti turte; Yihowaanis* wanta Phaawulos dubbatu xiyyeeffannaadhaan akka dhaggeeffattu garaa ishii akka gaariitti ishiidhaaf ni bane. 15 Ishiinii fi namoonni mana ishii jiran erga cuuphamanii+ booda, “Yihowaadhaaf* amanamtuu akkan taʼetti yoo na ilaaltan, kottaatii mana koo boqodhaa” jettee nu kadhatte. Akka mana seennus nu dirqisiiste.
16 Gaaf tokko gara bakka kadhannaa dhaqaa utuu jirruu, tajaajiltuun hafuura xuraaʼaa hooda* dubbachiisu qabdu tokko+ nutti dhufte. Ishiin hooda dubbachuudhaan gooftolii ishiitiif buʼaa hedduu argamsiisti turte. 17 Intalli tun Phaawulosii fi nu duukaa buutee, “Namoonni kun garboota Waaqa Hundaa Olii+ warra daandii fayyinaa isiniif labsani dha” jettee iyyiti turte. 18 Ishiin guyyoota hedduudhaaf akkasuma gochaa turte. Dhuma irrattis Phaawulos waan nuffeef duubatti garagalee hafuurichaan, “Maqaa Yesuus Kiristoosiin ishii keessaa akka baatu sin ajaja” jedhe. Hafuurichis yeruma sana ishii keessaa baʼe.+
19 Gooftoliin ishiis abdiin buʼaa argachuuf qaban akka bade yommuu hubatan,+ Phaawulosii fi Siilaasiin qabanii lafa irra harkisaa bakka gabaatti gara bulchitootaatti geessan.+ 20 Gara bulchitoota magaalattiitti isaan geessanii akkana jedhan: “Namoonni kun magaalaa keenya akka malee jeeqaa jiru.+ Isaan Yihudoota yommuu taʼan, 21 nuti namoota Roomaa taanee utuu jirruu aadaa akka fudhannus taʼe akka ittiin jiraannu nuuf hin heyyamamne labsaa jiru.” 22 Namoonni hedduun sunis tokkummaadhaan isaan irratti kaʼan; bulchitoonni magaalattii uffata isaanii erga isaan irratti tarsaasanii booda, uleedhaan akka reebaman ajajan.+ 23 Garmalee erga isaan reebanii* booda mana hidhaatti isaan galchanii, eegduun mana hidhaa sun jabeessee akka isaan eegu ajajan.+ 24 Innis ajajni kun waan isaaf kennameef, kutaa mana hidhaa isa keessaatti isaan galchee miila isaanii jirma gidduu galchee hidhe.
25 Gara halkan walakkaa garuu Phaawulosii fi Siilaas kadhachaa fi faarfannaadhaan Waaqayyoon jajachaa turan;+ hidhamtoonnis isaan dhaggeeffatu turan. 26 Akkuma tasaa kirkirri lafaa guddaan waan uumameef hundeen mana hidhaa sanaa ni raafame. Yeruma sana balballi hundi ni baname; funcaan hundi isaanii ittiin hidhaman isaan irraa ni hiikame.+ 27 Eegduun mana hidhaa sun dammaqee balbaloonni mana hidhaa akka banaman yommuu argu, namoonni hidhaman kan badan waan itti fakkaateef goraadee isaa luqqifatee of ajjeesuuf kaʼe.+ 28 Phaawulos garuu sagalee guddaadhaan, “Of hin miidhin, hundi keenya iyyuu asuma jirra!” jedhe. 29 Kanaafuu, ibsaa akka isaaf fidan gaafatee ariitiidhaan gara keessaatti seene; achiis hollachaa miila Phaawulosii fi Siilaas jalatti kufe. 30 Gad isaan baasees, “Gooftolii koo, fayyuuf maal gochuun qaba?” isaaniin jedhe. 31 Isaanis, “Gooftaa Yesuusitti amani, atii fi maatiin kee ni fayyitu” isaan jedhan.+ 32 Achiis isaa fi warra mana isaa keessa jiran hundatti dubbii Yihowaa* himan. 33 Halkanuma sanas saʼaatii sanatti fuudhee deemee madaa isaanii isaaniif dhiqe. Sana booda innii fi guutummaan maatii isaa dafanii cuuphaman.+ 34 Gara mana isaatti isaan geessees nyaata isaaniif dhiheesse; inni Waaqayyotti waan amaneef, guutummaa maatii isaa wajjin baayʼee gammade.
35 Yommuu bariʼus bulchitoonni magaalattii, “Namoota sana gadhiisi” jedhanii akka itti himaniif eegdota isatti ergan. 36 Eegduun mana hidhaa sunis, “Bulchitoonni magaalattii lamaan keessan iyyuu akka gadhiifamtan namoota erganiiru. Kanaafuu, amma gad baʼaatii nagaadhaan deemaa” jedhee wanta isaan jedhan Phaawulositti hime. 37 Phaawulos garuu akkana isaaniin jedhe: “Nuti lammii Roomaa taanee utuu jirruu, murtii malee uummata duratti nu garafanii+ mana hidhaatti nu galchaniiru. Amma immoo dhoksaatti gad nu baasuu barbaaduu? Matumaa hin taʼu! Ofuma isaaniitii dhufanii nu haa baasan.” 38 Eegdonni sunis wanta jedhame kana bulchitoota magaalattiitti himan. Bulchitoonni magaalattiis, isaan lammii Roomaa taʼuu isaanii yommuu dhagaʼan baayʼee sodaatan.+ 39 Kanaafuu, dhufanii isaan kadhatan; mana hidhaatii erga isaan baasanii boodas magaalattii gadhiisanii akka deeman isaan gaafatan. 40 Isaan garuu mana hidhaa keessaa baʼanii gara mana Liidiyaa dhaqan; achittis obboloota arganii erga isaan jajjabeessanii+ booda baʼanii deeman.