Seenaa Baraa Isa Tokkoffaa
11 Yeroo booda Israaʼelonni hundi Daawit isa Kebroonitti+ argamu biratti walitti qabamanii akkana isaan jedhan: “Kunoo, nuti lafee kee fi foon kee ti.*+ 2 Kanaan dura yommuu Saaʼol mootii turetti, situ Israaʼeliin duula irratti geggeessa ture.*+ Waaqni kee Yihowaan, ‘Ati saba koo Israaʼeliin ni tiksita; saba koo Israaʼel irrattis geggeessaa ni taata’ siin jedheera.”+ 3 Akka kanaan, jaarsoliin Israaʼel hundi gara mooticha isa Kebroonitti argamuu dhufan; Daawitis Kebroonitti Yihowaa duratti isaanii wajjin kakuu gale. Achiis isaan akkuma Yihowaan karaa Saamuʼel dubbatetti,+ Daawitiin Israaʼel irratti mootii godhanii diban.+
4 Boodas Daawitii fi Israaʼelonni hundi gara Yerusaalemitti, jechuunis gara Yebuus+ bakka Yebuusonni+ biyyattii keessa itti jiraachaa turanitti qajeelan. 5 Jiraattonni Yebuusis, “Ati matumaa as hin seentu!” jedhanii Daawititti qoosan.+ Haa taʼu malee, Daawit dahoo Xiyoon+ ishii yeroo ammaatti Magaalaa Daawit+ jedhamtu qabate. 6 Kanaafuu, Daawit, “Namni jalqaba Yebuusota rukutu kam iyyuu ajajaa fi geggeessaa ni taʼa” jedhe. Achiis Yoʼaab+ ilmi Zeruuyaa jalqaba ol ni baʼe; innis ajajaa taʼe. 7 Achiis Daawit dahoo sana keessa jiraachuu jalqabe. Isaan Magaalaa Daawit jedhanii kan ishii waaman kanaafi. 8 Innis Koobicha* irraa jalqabee hamma naannoowwan ishii biratti argamanitti guutummaa magaalattii ijaaruu jalqabe; Yoʼaabis kutaa magaalattii isa hafe deebisee ni ijaare. 9 Akka kanaan Daawit caalaatti jabaachaa deeme;+ Yihowaan Gooftaan Raayyaas isaa wajjin ture.
10 Dura buutonni loltoota Daawit warra jajjaboo taʼanii kanneen kana turan; isaanis Israaʼelota hundumaa wajjin taʼuudhaan Yihowaan Israaʼeliin ilaalchisee akka dubbatetti mootii isa gochuudhaaf+ deggersa cimaa isaaf ni godhan. 11 Maqaan loltoota jajjaboo Daawit kanneen kana dha: Yaashobiʼaam+ ilma Hakmoonichaa isa dura buʼaa warra sadanii taʼe.+ Inni eeboo isaa mirmirsee takkaatti namoota 300 ni ajjeese.+ 12 Isatti aansuudhaan Eleʼazaar+ ilma Doodoo Ahohichaa.+ Inni loltoota jajjaboo sadan keessaa isa tokko ture. 13 Inni Paas Daamiim+ bakka Filisxeemonni waraanaaf walitti qabamanitti Daawitii wajjin ture. Bakka sanas maasiin garbuun irra guute tokko jira ture; namoonni sunis Filisxeemotaan kan kaʼe ni baqatan. 14 Inni garuu maasicha gidduutti iddoo isaatii utuu hin sochoʼin maasicha irraa isaan ittise; Filisxeemotas ni rukute; akka kanaan Yihowaan injifannoo* guddaa argamsiise.+
15 Raayyaan waraanaa Filisxeem tokko Sulula* Refaayim+ keessa buufatee utuu jiruu, dura buutota 30n keessaa sadan isaanii gara qarsaa sanaatti, gara Daawit isa holqa Adulaam keessa turetti gad buʼan.+ 16 Yeroo sanatti Daawit dahoo keessa ture; buufanni loltoota Filisxeemotaa tokko immoo Beetaliheem keessa ture. 17 Achiis Daawit, “Boolla bishaanii karra Beetaliheem+ bira jiru keessaa bishaanan dhugu utuun argadhee natti tola ture!” jedhee fedhii isaa ibse. 18 Yeroo kanatti namoonni sadan gara buufata Filisxeemotaatti cabsanii seenuudhaan, boolla bishaanii karra Beetaliheem bira jiru keessaa bishaan waraabanii Daawitiif fidan; inni garuu bishaanicha dhuguu didee Yihowaadhaaf gad dhangalaase. 19 Innis, “Kana gochuun Waaqa koo duratti anaaf wanta hin yaadamne dha! Dhiiga namoota lubbuu isaanii balaadhaaf saaxilan kanaa dhuguun qabaa?+ Sababiin isaas, isaan bishaan kana kan fidan lubbuu isaanii balaadhaaf saaxilanii ti” jedhe. Kanaan kan kaʼes, bishaanicha dhuguu dide. Kun, wantoota loltoonni jajjaboon isaa sadan raawwatani dha.
20 Abishaay+ obboleessi Yoʼaab+ dura buʼaa namoota kan biroo sadii ture; inni eeboo isaa mirmirsee namoota 300 ni ajjeese; akkuma namoota sadaniis beekamaa ture.+ 21 Inni namoota sadan kan biroo keessaa tokko ture; lamaan isaanii caalaa beekamaa fi ajajaa isaanii yoo taʼe iyyuu, sadarkaa namoonni jalqabaa sadan sun qaban hin arganne.
22 Benaayaan+ ilmi Yehoyaadaa nama onnataa* Qaabzeʼel+ keessatti gochawwan gootummaa hedduu raawwate dha. Inni ilmaan Ariʼeel isa nama biyya Moʼaab taʼe sanaa lamaan ni ajjeese; akkasumas, guyyaa cabbiin buʼe tokkotti boolla bishaanii tokko keessa seenee leenca ajjeese.+ 23 Kana malees, inni namicha Gibxii akka malee guddaa taʼee fi dhundhuma shan dheeratu*+ tokko ajjeeseera. Namichi Gibxii sun harka isaatti eeboo mukti isaa muka namni wayyaa dhaʼu wayyaa itti maru fakkaatu+ kan qabate taʼus, inni garuu ulee qabatee isa loluu deeme; achiis eeboo namicha Gibxii sanaa harka isaa irraa butee, eeboo sanaan isa ajjeese.+ 24 Benaayaan ilmi Yehoyaadaa wantoota kana ni raawwate; inni akkuma loltoota jajjaboo sadan sanaa beekamaa ture. 25 Inni namoota soddomman caalaa beekamaa yoo taʼe iyyuu, sadarkaa namoonni sadan sun qaban hin arganne.+ Haa taʼu malee, Daawit ajajaa eegdota ofii isaa godhee isa muude.
26 Loltoonni jajjaboon humnoota waraanaa kanneen kana turan: Asaahel+ obboleessa Yoʼaab, Elhaanaan ilma Doodoo Beetaliheemichaa,+ 27 Shaamoot Harooricha, Heleez Phelonicha, 28 Iiraa+ ilma Iqeesh Teqoohaatichaa, Abiʼezer+ Anaatoticha, 29 Sibekaay+ Hushaaticha, Iilaay Ahohicha, 30 Maahaaraay+ Netooficha, Heleed+ ilma Baʼaanaa Netoofichaa, 31 Iitaay ilma Ribaay Biiniyaamichaa+ isa nama biyya Gibeʼaa taʼe, Benaayaa Phiraatonicha, 32 Huraay isa nama sululawwan* Gaʼaash+ taʼe, Abiʼeel Arbaaticha, 33 Azmaawet Baahuriimicha, Eliyaabaa Shaʼaalbonicha, 34 ilmaan Hasheem Gizoonichaa, Yonaataan ilma Shaagee Haraarichaa, 35 Ahiʼaam ilma Saakaar Haraarichaa, Eliifaal ilma Uur, 36 Hefeer Mekeraaticha, Ahiyaa Phelonicha, 37 Hezroo Qarmeelosicha, Naʼaaraay ilma Ezbaay, 38 Yooʼel obboleessa Naataan, Mibhaar ilma Hagrii, 39 Zeleeq Amoonicha, Naahaaraay Beʼeeroticha isa Yoʼaab ilma Zeruuyaatiif meeshaa waraanaa baatu; 40 Iiraa Yitricha, Gaareb Yitricha, 41 Uuriyaa+ Heeticha, Zaabaad ilma Ahilaay, 42 Adiinaa ilma Shiizaa Ruubenichaa isa dura buʼaa Ruubenotaa taʼee fi namoota 30 isaa wajjin turan; 43 Haanaan ilma Maʼaakaa, Yoshaafaax Mitnicha, 44 Uuziyaa Ashtaaroticha, Shaamaa fi Yeyiʼel ilmaan Hotaam Aroʼerichaa; 45 Yediyaayel ilma Shimrii fi obboleessa isaa Yohaa Tizaayicha; 46 Eliʼeel Mahaawicha, Yeribaayii fi Yoshaabiyaa ilmaan Elnaaʼaam, akkasumas Yitmaa Moʼaabicha; 47 Eliʼeel, Yoobeed, akkasumas Yaaʼaasiʼel Mezoobicha.