Уе ’мбырдӕн стыр территори ис?
1 Йесо бӕстон хъусын кодта рагон Израилы стыр территорийы, Иудейы сахартӕй Галилейы хъӕуты онг (Маркы 1:38, 39; Лук. 23:5). Мах дӕр хъуамӕ тынг бирӕ адӕмӕн фехъусын кӕнӕм хорз хабар (Маркы 13:10). Фӕлӕ уый алы хатт ӕнцон нӕ уыдзӕн. Цӕуылнӕ?
2 Ирыстоны иуӕй-иу ӕмбырдтӕн ис стыр территоритӕ. Ӕндӕр ӕвзагыл, уыимӕ ма къухӕй амонгӕ ӕвзагыл цы ӕмбырдтӕ ис, уыдон фӕхъусын кӕнынц стыр горӕтты, цӕмӕй, се ’взагыл чи дзуры, ахӕм адӕмы ссарой. Ахӕм стыр территориты чи цӕры, уыцы адӕмӕн нӕ бон куыд у баххуыс кӕнын, цӕмӕй базоной ӕцӕгад Иегъовӕ, Йесо ӕмӕ Хуыцауы Паддзахады тыххӕй?
3 Лӕмбынӕг пълангӕнгӕйӕ. Уацамындӕн дзуапдӕттӕг ӕфсымӕр ӕмӕ участоктӕн дзуапп чи дӕтты, уыцы ӕфсымӕр хъуамӕ бацархайой, цӕмӕй ӕмбырд хорз бакуса ахӕм территори. Уый тыххӕй равзарӕн ис цалдӕр сабаты, хъусынгӕнджытӕй сӕ фылдӕрӕн сӕ бон ӕнӕхъӕн бон хъусын кӕнын куы уа, уӕд. Дард территоримӕ цӕугӕйӕ, гӕнӕн уӕвгӕйӕ, спълан кӕнут фылдӕр рӕстӕг хъусын кӕнын, ӕмӕ уемӕ сихорӕн исты айсут. Уӕ бон у раздӕр ӕрӕмбырд уат, цӕмӕй уын фаг рӕстӕг уа фӕндагӕн кӕнӕ та кӕм хъусын кӕндзыстут, уырдӕм хӕстӕг искуы уацамындон фембӕлд ауадзынӕн. Хъӕутӕм хъусын кӕнынмӕ ацӕуӕн ис, боныхъӕд ӕмӕ фӕндӕгтӕ хорз куы уой, уӕд.
4 Ӕндӕр ӕвзӕгтыл кӕм дзурынц, ахӕм участокты чи хъусын кӕна, уыдон сӕ рӕстӕг нӕ хардз кӕндзысты се ’взагыл чи дзуры, ахӕм адӕмы агурыныл, мыггӕгтӕ, адристӕ ӕмӕ сӕм бынӕттон картӕ куы уа, уӕд. Участоктӕ афтӕ адих кӕнын хъӕуы, цӕмӕй алы къорд дӕр йӕ участокы алкӕмӕдӕр бацӕуа.
5 Уемӕ ахӕссут фаг литературӕ. Территорийыл арӕх куы нӕ хъусын кӕнат, уӕд хорз уаид, хӕдзары чи нӕ разына, уыдонӕн исты трактат кӕнӕ та зӕронд журнал ныууадзын. Кӕд уе ’взагыл ис трактат «Фӕнды дӕ Библи хуыздӕр базонын?», уӕд ӕй дӕттут, кӕуыл ӕмбӕлат, уыдонӕй алкӕмӕндӕр, хӕдзары кӕй нӕ баййафат, уыдонӕн та-иу ӕй уадзгӕ ныккӕнут.
6 Кӕрӕдзийӕн ӕххуысгӕнгӕйӕ. Стыр территорийы хъусынгӕнгӕйӕ хъусынгӕнджытӕ хъуамӕ кӕрӕдзийӕн ӕххуыс кӕной. Исчи уӕ йӕ машинӕйыл куы ласа, уӕд хорз уаид ласӕггаг ын куы радтиккат. Дзурын чи уарзы, ахӕм адӕймагыл куы фембӕлай, уӕд дӕ зӕрдыл дар, бирӕ рӕстӕг дын кӕй нӕй ӕмӕ дӕ участокы алкӕмӕдӕр бацӕуын кӕй хъӕуы, уый.
7 Исчи куы бацымыдис кӕна, уӕд бацархай, цӕмӕй йын дарддӕр дӕр Хуыцауы базонынӕн баххуыс кӕнай. Адрисӕй дарддӕр ма цымыдисгӕнаг адӕймагӕй райс йӕ телефоны номыр дӕр, цӕмӕй йӕм фӕдзурай ӕмӕ йын ӕцӕгады тыххӕй фылдӕр радзурай. Хъӕуы уынгтӕн нӕмттӕ куы нӕ уа ӕмӕ хӕдзӕрттыл та номыртӕ, уӕд, чи бацымыдис кодта, уыдоны цӕмӕй иннӕ хатт ӕнцонтӕй ссарай, уый тыххӕй хъуамӕ картӕ лӕмбынӕг сныв кӕнай кӕнӕ та уыцы адӕймаджы куыд ис ссарӕн, уый бӕстон ныффыссай.
8 Цӕй кадджын хӕслӕвӕрд нын ис — ӕххӕст кӕнын Йесойы фӕдзӕхст: «Цыдӕриддӕр сахармӕ, кӕнӕ хъӕумӕ бацӕуат, уӕд базонут, уым аккаг чи у, уый» (Матф. 10:11, НФ). Иегъовӕ дын ӕнӕмӕнгдӕр раарфӕ кӕндзӕн, ацы ахадгӕ хъуыддаг зӕрдӕбынӕй куы аразай, уӕд!