Къордӕй хъусын кӕнын хӕссы цин
1 Йесо 70 ахуыргӕнинаджы хъусын кӕнынмӕ куы ӕрвыста, уӕд сӕ дыгӕйттыл адих кодта, бацамыдта сын, цы хъуамӕ дзырдтаиккой ӕмӕ кӕдӕм хъуамӕ ацыдаиккой, уый. Уыцы хъуыддаг сын ӕрхаста цин (Лук. 10:1—17). Афтӕ абон дӕр къордӕй хъусын кӕнын Хуыцауы адӕмӕн сӕ ныфсыл ныфс ӕфтауы ӕмӕ сын ахъаз у уыцы иу ӕгъдаумӕ гӕсгӕ хъусын кӕнынӕн.
2 Хистӕр нӕлгоймӕгтӕ разамынд исынц сӕхимӕ. Хистӕр нӕлгоймӕгтӕ стыр ӕххуыс сты алкӕмӕндӕр хъусын кӕнынмӕ иудадзыг цӕуынӕн. Уацамындӕн дзуапдӕттӕг цӕстдарӕг йӕхимӕ разамынд исы, цӕмӕй къуырийы дӕргъы ӕмбырды уацамындон фембӕлдтӕ уа. Алы чиныгахуыры цӕстдарӕгӕн дӕр йӕ хӕс у йӕ къордӕн уацамындӕн фадӕттӕ арын, уӕлдайдӕр та сабат ӕмӕ хуыцаубоны. Уацамындон фембӕлд ӕнӕхъӕн ӕмбырдӕн куы уа, (зӕгъӕм «Хъахъхъӕнӕн мӕсыг»-ы ахуыры фӕстӕ), уӕд алы чиныгахуыры цӕстдарӕг дӕр хъуамӕ йӕхи къордыл батыхса, цӕмӕй сын уа, кӕм хъусын кӕной, уый.
3 «Ӕфсармимӕ ӕмӕ ӕгъдауыл». Уацамындон фембӕлд уадзын кӕмӕн бахӕс кӕной, уый йӕ хъуамӕ афоныл райдайа, ӕмӕ фембӕлд хъуамӕ цӕуа 10—15 минуты. Уый хъусынгӕнджытӕн зӕгъдзӕн, чи кӕимӕ ацӕудзӕн, ратдзӕн сын участоктӕ (кӕд чиныгахуыры цӕстдарджытӕ, уӕлдӕр куыд загътам, афтӕ нӕ сарӕзтой, уӕд) ӕмӕ уый фӕстӕ скувдзӕн. Хъуыддӕгтӕ ахӕм ӕгъдаумӕ гӕсгӕ арӕзт куы цӕуой, уӕд хъусынгӕнджыты нал хъӕудзӕн уацамынды размӕ участокы къордӕй ӕмбырд кӕнын (науӕд уымӕй нӕ куыст адӕмы цӕсты нӕ ахады). Ахӕм фӕтк ма разы у Павелы уынаффӕимӕ дӕр: «Алцыдӕр хъуамӕ уа ӕфсармимӕ ӕмӕ ӕгъдауыл» (1 Кор. 14:40). Уацамындон фембӕлдтӕм чи ӕрбацӕуы, уыдон хъуамӕ уыцы хъуыддагӕн ӕххуыс кӕной, ӕмӕ-иу афоныл ӕрбацӕуой, разамынд йӕхимӕ чи райста, уыимӕ ӕмгуыст кӕной ӕмӕ къордимӕ ӕвӕстиатӕй участокмӕ цӕуой.
4 Кӕрӕдзимӕ ӕввахсдӕр кӕнӕм. Къордӕй куы фӕхъусын кӕнӕм, уӕд нын фӕзыны диссаджы фадат, цӕмӕй ӕмбырды иннӕтимӕ хуыздӕр базонгӕ уӕм. Хъусынгӕнӕг уацамынды ацӕуыны тыххӕй развӕлгъау искӕимӕ куы баныхас кӕна, уӕд уым ӕвзӕрӕй ницы ис, фӕлӕ ма хорз уаид, уацамындон фембӕлды размӕ-иу куы никӕимӕ баныхас кӕниккам. Уӕд, гӕнӕн ис, хорз кӕй нӕ зонӕм, ахӕм хъусынгӕнӕгимӕ уацамынды ацӕуӕм, ӕмӕ уый фӕрцы та нӕ уарзондзинадӕй фылдӕрӕн бахай кӕндзыстӕм (2 Кор. 6:11—13).
5 Къордӕй хъусын кӕныны фӕрцы нӕ ныфсыл ныфс ӕфты ӕмӕ кӕрӕдзимӕ ӕввахсдӕр кӕнӕм, куыд «ӕмкусджытӕ ӕцӕгады», афтӕ (3 Иоан. 8, НД). Цӕй уӕдӕ дзы фылдӕр архайӕм!