AISEIA
1 Kaudiahl me Aiseia*+ nein Eimwos kilangada duwen Suda oh Serusalem ni mwehin Usaia,+ Sodam,+ Ahas+ oh Esekaia,+ nanmwarkien Suda kan:+
2 Nanleng rong, oh sampah tehk kanahieng,+
Pwe Siohwa ketin mahsanih:
3 Kouwol men kin ese ihs me naineki,
Oh dongki men kin ese deupen kene mwenge me nainekio kihong ih;
Nei aramas akan sohte wehwehki mehkot.”
4 Meid suwediong wehi dipano,+
Aramas akan me toutoukilahr sapwung,
Kadaudok en aramas suwed kei, seri mwersuwed kei!
5 Depehnamwail me pahn uhd ale lokolok ni amwail kapatahiong amwail uhwong?+
Moangamwail unsek soumwahu,
Oh mohngiongimwail unsek soumwahulahr.+
6 Sangete ni patehn nehmwail lel ni moangamwail, sohte wasa mwahu mie.
7 Sapwamwailo tehnla.
Amwail kahnimw kan mwasingkihla kisiniei.
Mehn liki kan kadallehla sapwamwailo mwohn masamwail kan.+
E duwehte wasa tehn ehu me mehn liki kan kauwehla.+
8 Nein Saion serepein me luhwehdi rasehng kisin pelien ihmw ehu nan mwetin kreip,
Rasehng imwios ehu nan mwetin kiuhri,
Rasehng kahnimw ehu me imwintihti kan kapilpenehr.+
9 Ma Siohwa kaunen karis en sounpei sohte ketin kapitala ekei kitail,
Kitail pahn duwehla Sodom,
Oh kitail pahn rasehng Komora.+
10 Kumwail rong mahsen en Siohwa, kumwail kaun lemei kan en Sodom.+
Kumwail tehk kanahieng kosonned* en atail Koht, kumwail aramas en Komora kan.+
11 Siohwa ketin mahsanih: “Ia kamwahupen tohtohn amwail meirong kan ong ie?+
I pwangahkidahr amwail meirong isihs en sihpw wol kan+ oh wih en noumwail mahn mwenge mwahu kan,+
Oh I solahr kupwurperenki ntahn koupwul wol kan,+ sihmpwul kan+ oh kuht kan.+
12 Ni amwail kin pwarodo mwohi,+
Ihs me padahkihong kumwail en wia met,
En pwurupwururseli nan ei wasa me kelpeneo?+
13 Kumwail tokedihsang amwail kin wahlongodo meirong en krein* soh katepe kan.
Amwail warpwohmwahu kan kasaut ong ie.+
Amwail kasarawi maram pwul kan,+ sapad kan,+ likwer en kapokon kan+
—I solahr kakohng amwail kin wia wiewiahn akmanaman+ iangahki amwail kapokon sarawi.
14 I kalahdeki amwail kin kasarawi maram pwul kan oh amwail kasarawi teikan.
Re katoutouwihielahr;
I pwangahkidahr kanengamahiong mepwukat.
16 Kumwail widenkumwailda, kamwakeleikumwailda;+
Kumwail kihsang amwail wiewia suwed kan mwohn silangiet;
Kumwail tokedihsang wia me suwed.+
17 Kumwail esehla wia me pwung, rapahki pwung pahrek,+
Kapwungala sounkalokoloko,
Doare pwuhng en me sepwoupwou kan,
Oh peki sawaspen liohdi kan.”+
18 Siohwa ketin mahsanih: “Eri, kumwail kohdo oh kitail kapwungala mahs ire pwukat nanpwungatail,+
Mendahki dipamwail kan weitahta duwehte nta,
Re pahn pwetepwetala duwehte sinoh;+
Mendahki re weitahta duwehte lepin likou weitahta,
Re pahn duwehla wunen sihpw.
19 Ma kumwail men rong,
Kumwail pahn tungoale soahng mwahu kan nan sahpwet.+
20 Ahpw ma kumwail kahng oh uhwong,
Kumwail pahn mehkihla kedlahs,+
Pwe doauesen Siohwa me ketin mahsanih met.”
21 Ia duwen kahnimw lelepeko+ eh wiahla lihen netiki paliwere men!+
23 Noumwail lapalap akan keptakai oh kin ehuong lipirap akan.+
Irail koaros kin perenki ale kisakis ni ahl sapwung oh rapahki kisakis kan.+
Re sohte kin wiahiong me sepwoupwou kan pwung pahrek,
Oh repenpwung en liohdi sohte kin lellahng irail.+
24 Ihme kahrehda Kaun mehlelo, Siohwa kaunen karis en sounpei,
Koht Manaman en Israel, ketin lohkihda:
“Itarehr! I pahn kesehla me kin uhwong ie,
Oh I pahn dupukohng ei imwintihti kan.+
25 I pahn kauwohng uhk limei kat,
I pahn kapeikipeseng* omw samin kan pihl me doalkihda pehs,
Oh I pahn kihsang omw samin koaros.+
26 I pahn kapwurehdo omw sounkopwung kan duwehte nin tapio
Oh omw sounkaweid kan duwehte mahso.+
Mwurin met ke pahn adanekihla Kahnimw Pwung, Kisin Kahnimw Lelepek.+
27 Sang ni pwung pahrek Saion pahn poadoandoarla,*+
Oh ni pwung, eh aramas akan me pwurodo pahn poadoandoarla.*
28 Me uhwong kan oh me dipan akan pahn wiahkintehieu ohla,+
Oh irail me kesehla Siohwa pahn sohrala.+
29 Pwe irail pahn namenengkihla tuhke laud ko me kumwail inengieng,+
Oh kumwail pahn sarohdi pwehki mwetuwel kan* me kumwail pilada.+
30 Pwe kumwail pahn duwehla tuhke laud pwoat me teh kan mengidi,+
Oh duwehla mwetuwel ehu me sohte pile.
31 Ohl kehlail men pahn wiahla dihpw meng,*
Oh eh doadoahk pahn wiahla diperen kisiniei ehu;
Koaros pahn lulda,
Ni eh sohte me pahn kakunirahla.”
2 Iet me Aiseia nein Eimwos kilangada duwen Suda oh Serusalem:+
2 Ni kaimwiseklahn rahn akan,*
Nahnahn tehnpesen Siohwa
Pahn poadada teng pohnangin kadoken nahna kan,+
Oh e pahn pwekipwekda pohnangin dohl kan,
Oh wehi koaros pahn pokonlahng wasao.+
3 Oh aramas tohto pahn kohla oh nda:
“Kohdo, kitail kohdahla ni nahnahn Siohwa,
Ni tehnpesen Koht en Seikop.+
E pahn ketin padahkihong kitail duwen sapwellime ahl akan,
Oh kitail pahn keid nan sapwellime ahl akan.”+
4 E pahn ketin wia kadeik nan wehi kan
Oh ketin kapwungala ire kan nanpwungen aramas tohto.
Irail pahn wekidohng neirail kedlahs kan ni mehn deipwel kan
Oh neirail ketieu kan ni siset en lop tuhke.+
Wehi ehu sohte pahn pwekada nah kedlahs pwehn pelianki ehu wehi,
Re pil sohla pahn sukuhlki mahwen.+
5 Eri, kadaudok en Seikop kan, kumwail kohdo,
Kitail keid nan marain en Siohwa.+
6 Maing Koht, komw ketin likidmelielahr sapwellimomwi aramas akan, kadaudok en Seikop kan,+
Pwehki ar alehda tiahk tohto sang Palimese;
Re kin wia akmanaman+ duwehte mehn Pilisdia kan,
Oh re tohtohkihla serien liki kan.
7 Sapwarailo direkilahr silper oh kohl,
Oh arail dipwisou kesempwal kan sohte kak wadawadedi.
Sapwarailo direkilahr oahs kan,
Oh wararail kuruma kan sohte kak wadawadedi.+
8 Sapwarailo direkilahr koht soh katepe kan.+
Re kin poaridiong mehkan me pein pehrail kan kin wiahda,
Ong soahng kan me sendin pehrail kan kin wiahda.
9 Eri aramas pahn karakarahkala oh namenekla,
Oh komw sohte kak ketin mahkohng irail.
10 Pedolong nan paipo oh rukula nan pwelpar
Pwehki kamasepwehk en engieng en Siohwa
Oh sapwellime lingan lapalap.+
11 Aramas me mas aklapalap pahn namenekla,
Oh aramas pohnmwahso pahn karakarahkala.
Siohwa kelehpw me pahn lapalapala rahno.
12 Pwe iei rahno me Siohwa kaunen karis en sounpei sapwellimanki.+
Rahno pahn kohdiong pohn koaros me aklapalap oh pohnmwahso,
Pohn koaros, mehnda ma re lapalap de tikitik,+
13 Pohn sidar koaros en Lepanon me ileile oh laud
Oh pohn tuhke ohk* koaros en Pasan,
14 Pohn nahna ileile koaros
Oh pohn dohl ileile koaros,
15 Pohn imwen doulik ileile koaros oh kehl kehlail koaros,
16 Pohn sohp en Tarsis koaros+
Oh pohn pwoht kaselel koaros.
17 Aramas aklapalap pahn namenekla,
Oh aramas pohnmwahso pahn karakarahkala.
Siohwa kelehpw me pahn lapalapala rahno.
18 Koht soh katepe kan uhdahn pahn sohrala.+
19 Oh aramas akan pahn pedolong nan pwoaren paip kan
Oh nan pwoahr kan nan pwehl,+
Pwehki kamasepwehk en engieng en Siohwa
Oh sapwellime lingan lapalap,+
Ni eh kin ketida pwehn kahrehiong sampah en rerrerki eh masak.
20 Rahno aramas akan pahn ale arail koht soh katepe silper oh kohl kan
Me re wiahda ong pein irail pwehn poaridiong
Oh keseirailla rehn kitik kan oh pwehk kan,+
21 Pwehn pedolong nan pwoaren paip kan
Oh rukula nanpwungen paipalap akan,
Pwehki kamasepwehk en engieng en Siohwa
Oh sapwellime lingan lapalap,
Ni eh kin ketida pwehn kahrehiong sampah en rerrerki eh masak.
22 Ong kamwahupamwail, kumwail uhdihsang amwail likih aramas,
Me ihte angin esingek kis nan tumwe.
Ia duwen emen eh pahn likih ih?
3 Pwe kilang! Kaun mehlelo, Siohwa kaunen karis en sounpei,
Kin ketikihsang Serusalem oh Suda soangen sawas koaros,
Sawas koaros en pilawa oh pihl,+
2 Ohl kehlail oh sounpei kehlail,
Sounkopwung oh soukohp,+ sounkosetipw oh ohl mah,
3 Kaunen meh 50,+ aramas waun, oh sounkaweid,
Sounakmanaman saman oh sounkamande sineik koahiek.+
4 I pahn wiahiong pwutak kan ren wia arail kaun akan,
Oh irail me kalapw wekidala arail madamadau pahn kaunirailda.
5 Aramas akan pahn kaloke emenemen,
Emenemen ong ienge.+
Pwutak pahn mwamwahliki ohl mah,
Oh me sohte wede pahn uhwong me wahu men.+
6 Emenemen pahn koledi rie sang nan peneinei en eh pahpa oh nda:
“Mie omw likou puhp—ke pahn kaunkitada.
Apwalih koasoakoasoak en wasa ohla wet.”
7 Ahpw rahno e pahn sapwungki oh nda:
“I sohte pahn wia sounkidimala amwail ohla;*
Sohte mwenge de likou nan imweio.
Kumwail dehr wiahkiniehla kaun pohn aramas akan.”
8 Pwe Serusalem dipekelekelier,
Oh Suda pwupwudier,
Pwehki irail kin uhwong Siohwa ni ar lokaia oh mwekid;
Re kin pelianda mwohn silangi lingan.+
9 Mwomwen masarail kan kin wia mehn kadehde me uhwong irail,
Oh re kin lohkihda diparail kan duwehte Sodom;+
Re sohte kin song en ekihla.
Meid suwediong irail, pwe re pahn wahdo kahpwal pohrail!
11 Meid suwediong me suwed!
Kahpwal pahn lelohng ih,
Pwe dahme peh kan wiadahr pahn wiawihong ih!
12 A ong nei aramas akan, arail kaunen doadoahk kan me limeidihd,
Oh lih akan kin kaunirailda.
Nei aramas akan, omw kaun akan kin kahrehiong uhk ken kohkohseli mwahl,
Oh re kin kahrehiong uhk ken sehsehla ahl me ke pahn keidla ie.+
13 Siohwa ketin onopadahr pwe en ketin kedipa aramas akan;
E ketida pwe en ketin lohkihong aramas akan kadeikparail.
14 Siohwa pahn ketin kadeikada ohl mah kan oh lapalap en sapwellime aramas akan.
“Kumwail isikalahr mwetin kreipo,
Oh dahme kumwail pirapahsang me semwehmwe kan mi nan imwamwail kan.+
15 Dahme kumwail kamwutehkihpene nei aramas akan
Oh ngidar mesen me semwehmwe kan nanpwel?”+ Siohwa kaunen karis en sounpei, Kaun Wasa Lapalahpie me ketin mahsanih.
16 Siohwa ketin mahsanih: “Nein Saion serepein kan kin aklapalap,
Oh re kin aluhwei mas ile,
Mesen kala, kakahk tikitik kohwei,
Oh luwou kan kin wie sekesek ni nehrail kan.
17 Kahrehda, Siohwa pahn ketin kalokehki moangen nein Saion serepein kan rihpw,
Oh Siohwa pahn ketin sihpihla temwarail kan.+
18 Rahno Siohwa pahn ketikihsang lingan en luwoun nehrail kan,
Mehn pirapiriong pohn temwarail oh mehn kapwat kan me mwomwen maram pwul,+
19 Tiati kan,* luwou kan, oh koaduhpwel kan,
20 Mehn kapwat moahng kan, sein en neh kan, oh pirapir en mwaremware kan,*
Deupen leh pwohmwahu kan oh mehn silasil kan,
21 Rihng en sendin peh kan oh rihng en tumwe kan,
22 Likou reirei ong kasarawi kan, likoun liki kan, likou puhp kan, oh pilihs kan,
23 Mehn irongen+ me mie mehn kolkol oh likou linen kan,*
Lisoarop kan oh koaduhpwel kan.
24 Kaidehn lehn palsam,*+ ahpw pwohsuwed;
Kaidehn kateng ehu, ahpw sahl pwoat;
Kaidehn lingan en sidail en pitenmoang, ahpw moangamad;+
Kaidehn likou kaselel ehu, ahpw likoun nsensuwed* ehu;+
Oh lipwen ohla ehu* a kaidehn eh kaselel.
25 Sang ni kedlahs noumw ohl akan pahn pwupwudi,
Oh noumw ohl kehlail kan nan mahwen.+
4 Oh rahno lih isimen pahn koledi ohl emen,+ nda:
“Se pahn tungoale pein kanat pilawa
Oh likawih pein at likou;
Ihte mweidohng kiht sen adki edomwen
2 Rahno dahme Siohwa ketin kawosehda pahn kaselel oh lingan, oh mehn Israel kan me pitila pahn pohnmwahsohki oh perenki wahnsahpwo.+ 3 Mehmen me mihmihte nan Saion oh me luhwehdi nan Serusalem pahn adaneki sarawi, irail koaros nan Serusalem me ntingdier ong mour.+
4 Ni Siohwa eh pahn ketin kamwakelehda samin* en nein Saion serepein kan+ oh pahn ketin widensang wiewiahn kakerehdi nta nan Serusalem sang ni sapwellime engieng oh sapwellime kadeik,+ 5 Siohwa pil pahn ketin kapikada depwek oh ediniei ehu ni rahn oh kisiniei marain ehu nipwong+ pohn Nahnahn Saion pwon oh pohn eh wasahn kapokon kan; pwe e pahn mie perehpe pohn soahng koaros me lingan. 6 Oh e pahn mie impwal ehu ong wasahn ruksang karakar ni rahn,+ oh ong wasahn ruk oh perehpe sang melimel kan oh keteu.+
5 Menlau, mweidohng ie I en koulkihong me I poakohng
Apwoat koul duwen me I poakohngo oh eh mwetin kreip.+
Me I poakohngo ahneki mwetin kreip ni pengepengen dohl pwelmwahu ehu.
2 E deipwelihada oh akerasang takai kan.
E padokedi tuhkehn kreip me keieu mwahu,
Kauwada imwen doulik ehu nanwerenge,
Oh wiahda loale wasahn tiak kreip.+
Ih eri kasikasik tuhkeo en kapwarehda kreip mwahu kan,
Ahpw ihte kreip sakanakan kan me e kapwarehda.+
3 “Eri, kumwail tohn Serusalem kan oh aramas en Suda kan,
Menlau kopwung nanpwungen ngehi oh ei mwetin kreipo.+
4 Mie mehkot me I kak wiahiong ei mwetin kreip
Me I saikinte wia?+
Dahme kahrehda e kin kihdahte kreip sakanakan,
Ni ei kin kasikasik kreip mwahu kan?
5 Eri, menlau, mweidohng ie I en ndaiong kumwail
Dahme I pahn wiahiong ei mwetin kreipo:
I pahn kihsang kelepe,
Oh e pahn isihsla.+
I pahn karangkehdi eh kehl takai kan,
Oh e pahn tiatipeseng.
6 I pahn wiahkihla met wasa tehn ehu;+
E sohte pahn kamwakelda de deipwelda.
E pahn direkihla tuhke tekatek kan oh dihpw suwed kan,+
Oh I pahn kehkehlingki depwek kan en dehr kamwerehdi keteu powe.+
7 Pwe mwetin kreip en Siohwa kaunen karis en sounpei iei wehin Israel;+
Aramas en Suda iei tuhkehn kreip me e kin ketin poakohng.
E kin ketin koapworopworki pwung pahrek,+
Ahpw kilang! kopwung sapahrek me mie;
E kin ketin koapworopworki pwung,
Ahpw kilang! sengiseng en apwal me mie.”+
8 Meid suwediong irail me kin kapatahiong ehu ihmw pil ehu ihmw tohrohr+
Oh me kin kapatahiong ehu mwaht ong pil ehu mwaht tohrohr+
Lao sohla me luhwehdi ong meteikan
Oh kumwail kelehpw me kousoan nan sahpwo!
9 I rong me Siohwa kaunen karis en sounpei ketin kahukihla
Me ihmw tohto, mehnda ma laud oh kaselel,
Pahn wiahla mehkot kamasepwehk ehu,
Me pahn sohla towe.+
10 Pwe eiker eisek* en mwetin kreip pahn wiahda sosohng en pahd* ehute en wain,
Oh sosohng en ohmer* ehu en werentuhke pahn wiahda ihpah* ehute.+
11 Meid suwediong irail me kin sangkenei pirida pwehn nim sakau,+
Me kin sakasakau lel nin soutik lao waino kamwakid ar ineng kan!
12 Mie arp oh keseng sahl,
Dampwurin, keseng pepeuk oh wain nan arail kamadipw kan;
Ahpw re sohte kin medewe sapwellimen Siohwa wiewia kan,
Oh re sohte kin kilang wiepen nin lime kan.
13 Eri nei aramas akan pahn kalipilipala
Pwehki re sehse ie;+
Neirail ohl wahu kan pahn duhpekla,+
Oh neirail aramas akan koaros pahn lokolongki men nimpil.
14 Sousou* eri kalaudehla pein ih
Oh ewe sarapeseng ni sohte irepe;+
Oh eh* lingan,* oh nah pokon en aramas mwoarongorong oh pereperen
Uhdahn pahn kohdihla loale.
15 Oh aramas pahn karakarahkala,
Aramas pahn namenekla,
Oh pwoaren mesen me aklapalap kan pahn namenekla.
16 Siohwa kaunen karis en sounpei pahn lapalapala sang ni sapwellime kadeik;*
Koht mehlelo, Koht Sarawi,+ pahn ketin kasarawihala pein ih sang ni sapwellime pwung.+
17 Oh sihmpwul kan pahn kangkang reh kan duwehte nan arail mohs;
Mehn liki kan pahn tungoal nan wasa tehn kan me mahn mwenge mwahu kan kin mi ie mahs.
18 Meid suwediong irail me wurahdeki arail sapwung ni sahl en widing
Oh diparail ni sahl en kuruma;
19 Irail kin nda: “Koht en ketin kamwadangahla sapwellime doadoahk;
En ketin kamwadangahdo pwe sen kak kilang.
20 Meid suwediong irail me kin nda me mwahu iei suwed oh suwed iei mwahu,+
Irail me kin nda me rotorot iei marain oh marain iei rotorot,
Irail me kin nda me katik iei mem oh mem iei katik!
21 Meid suwediong irail kan me medewe me re loalokong
Oh kose me re loalokong!+
22 Meid suwediong irail me kin kehlail en nim wain
Oh aramas akan me samanih doaloapene sakau kehlail kan,+
23 Irail me kin kasaledekala me suwed pwehn ale kisakis+
Oh me kin kahmahmkihla pwung pahrek en me pwung men!+
24 Kahrehda, duwehte lowen kisiniei eh kin isikala diperen dihpw kan*
Oh tehndipw meng me emwirekpene nan kisiniei,
Kalewarail kan pahn mwoasoahngotla,
Oh arail mpwek kan pahn mwarahkpeseng duwehte pwelpar,
Pwehki arail soikala kosonned* en Siohwa kaunen karis en sounpei
Oh mwamwahlikihla mahsen en Koht Sarawi en Israel.+
25 Ihme kahrehda Siohwa ketin engiengda pahn sapwellime aramas akan,
Oh e pahn ketin kapahlahng irail nin lime oh kaloke irail.+
Nahna kan pahn rerada,
Oh paliwararail kan me melahr pahn duwehla kihd nanial kan.+
Pwehki mepwukat koaros, sapwellime engieng saikinte tokedi,
Ahpw e kin ketin kapahlahte nin lime pwehn kaloke irail.
26 E ketin kauwada kilel ehu* ong wehi doh ehu;+
E ketin kuwaih irail pwe ren kohdo sang ni imwin sampah;+
Oh kilang! re mwadangete kohkohdo.+
27 Sohte emen rehrail me pwangada oh dipekelekel.
Sohte me lisoi de memeir.
Kateng ni lukoparail kan sohte mwer,
Selin arail suht kan sohte ohla.
28 Neirail arep kan koaros me keng,
Oh neirail kesik ketieu kan onopadahngehr kesik.
Pahn nehn neirail oahs kan duwehte takai kekeluwak,
Oh daiahn wararail kuruma kan marahra duwehte kisinieng en melimel.+
Re pahn ngiringir oh koledi seikarail
Oh wahsang oh sohte emen kak doarehla.
30 Rahno re pahn ngiringir powe
Duwehte ngiringirisek en madau.+
Emen me kilenglahng sahpw pahn kilang rotorot kamasepwehk;
Marain pil rotorotalahr pwehki depwek kan.+
6 Ni pahr me Nanmwarki Usaia mehla,+ I kilangada Siohwa eh ketiket pohn mwoahl ileile ehu,+ oh sapwellime likou reireio kadirehla tehnpas sarawio. 2 Serap kei wie kesikesihnen pohnangi; emenemen mie eh pehnpihr weneu. Emenemen* pwainkihdi mese pehnpihr riau oh pwainkihdi neh pehnpihr riau, oh emenemen irail kin pihrki pehnpihr riau.
3 Oh emenemen irail kin ndinda:
“Sarawi, sarawi, sarawi iei Siohwa kaunen karis en sounpei.+
Sampah pwon direkilahr sapwellime lingan.”
4 Oh uhren wenihmw ko tepida rerrerki ngilen weriwer,* oh tehnpaso direkilahr ediniei.+
5 Ngehi eri nda: “Meid suwediong ie!
I rasehng aramas mehla men,
Pwe ngehi aramas emen me kilin au samin,
Oh I kin kousoan nanpwungen aramas kilin au samin kei;+
Pwe mesei kat kilangehr Nanmwarkio, Siohwa kaunen karis en sounpei!”
6 Emen serap ko eri pihrdo rehi, oh e kolokol mwoalus ngkengken ehu+ ni tihpw kei me e wahsang pohn pei sarawio.+ 7 E doahke eweiet oh nda:
“Kilang! Met sairehr kilin ewomw kan.
Omw sapwung kan kohsangehr,
Oh dipomw kan pweipweilahr.”*
8 Ngehi eri rongada kapitien Siohwa me mahsanih: “Ihs me I pahn kadarala, oh ihs me pahn wia at* meninkeder?”+ Oh I sapeng, patohwan: “Iet ngehi maing! Komw ketin poaroneiehla!”+
9 Oh e ketin mahsanih, “Kohla, oh ndaiong aramas pwukat:
‘Kumwail pahn pwurupwurehng rong,
Ahpw kumwail sohte pahn wehwehki;
Kumwail pahn pwurupwurehng kilang,
Ahpw kumwail sohte pahn loalokongla.’+
10 Wiahiong mohngiong en aramas pwukat en keptakaila,+
Wiahiong salengarail kan en rong ahpw sohte mwekidki,+
Oh kihpene masarail kan,
Pwe ren dehr kilangki masarail kan
Oh rongki salengarail kan,
Pwe mohngiongirail en sohte wehwehki
Oh ren dehr wekidekiong ie oh mwahula.”+
11 Ngehi eri patohwan: “Maing Siohwa, ia uwen werei?” Ih eri ketin mahsanih:
“Lao kahnimw kan pahn ohla oh tehnla sohla towe
Oh sohla aramas nan ihmw kan
Oh sahpwo pahn ohla oh tehnla;+
12 Lao Siohwa pahn katohrehla aramas akan wasa doh+
Oh wasa tohto nan sahpwo pahn tehnla.
13 “Ahpw e pahn miehte eisek kis ehun aramas akan loale, oh e pahn pwurehng isihsla. Aramas ako rasehng tuhke laud pwoat oh tuhke ohk* pwoat. Ni ara paldi, e pahn miehte tuken tuhke pwoat me luhwehdi; werentuhke* sarawi ehu pahn wosada sang tuken tuhkeo.”
7 Ni mwehin Ahas+ nein Sodam nein Usaia, nanmwarkien Suda, Nanmwarki Resin en Siria oh Peka+ nein Remalaia, nanmwarkien Israel, ahpw kohdahdo pwehn mahweniong Serusalem, ahpw e* sohte kak kalowehdi.+ 2 Pakair ehu ahpw wiawihda ong kadaudok en Depit: “Siria iangalahr karis en Epraim kan.”
Mohngiong en Ahas oh mohngiong en nah aramas akan ahpw tepida rerrerki masepwehk, duwehte tuhkehn nanwel kan ar kin mwekimwekidki kisinieng.
3 Siohwa eri ketin mahsanihong Aiseia: “Menlau, kohieila pwe ken tuhwong Ahas, kowe oh noumw pwutak Sear-sasup,*+ ni imwin warawar* en lepin leh powe+ limwahn ahl en wasahn doadoahk en sounlopwolopw kan. 4 Ke pahn ndaiong ih, ‘Kanahieng oh meleileidi. Ke dehr masak, oh ke dehr nan kapehd tikitikla pwehki tuken tuhke ediniei riau kat, pwehki engieng laud en Resin nanmwarkien Siria oh nein Remalaia.+ 5 Pwe Siria iangahki Epraim oh nein Remalaia pilahn en kauweiukala, oh nda: 6 “Kitail kohdahla mahweniong Suda oh karangkehdi* oh kalowehdi,* oh kitail idihada nein Tapeel en wiahla nanmwarki.”+
7 “‘Iet me Kaun Wasa Lapalahpie Siohwa ketin mahsanih:
“E sohte pahn pweida,
De pil wiawi.
8 Pwe poasen kaun en Siria iei Damaskus,
Oh nanmwarkien Damaskus iei Resin.
Mwohn sounpar 65 eh pahn imwisekla
Epraim pahn mwomwla douluhl oh sohla wia wehi ehu.+
Ma kumwail sohte ahneki pwoson kehlail,
Kumwail sohte pahn tengedi douluhl.”’”
10 Siohwa eri ketin doula mahsanihong Ahas: 11 “Peki kilel ehu sang rehn Siohwa omw Koht;+ e pahn kak loal duwehte Sousou* de ile duwehte pahnlahng.” 12 Ahpw Ahas patohwan: “I sohte pahn peki, de pil kasonge Siohwa.”
13 Aiseia eri nda: “Kumwail nein Depit kan, menlau rong. E sou itar ni amwail kasonge en aramas kanengamah? Kumwail pil pahn kasonge sapwellimen Koht kanengamah?+ 14 Ihme kahrehda, pein Siohwa pahn ketikihong kumwail kilel ehu: Kilang! Peinakapwo pahn liseianda oh naitikihada pwutak emen,+ oh e pahn kihong ede Emanuel.*+ 15 E pahn tepidahr kang pwete oh sukehn loangalap mwohn e esehla mwomwen eh pahn soikala me suwed oh pilada me mwahu. 16 Pwe mwohn pwutako eh pahn esehla mwomwen eh pahn soikala me suwed oh pilada me mwahu, sapwen nanmwarki riemeno me ke masak pahn lekdekla douluhl.+ 17 Siohwa pahn ketin mweidohng uhk oh noumw aramas akan oh peneinei en omw pahpa en mour ni ahnsou apwal ehu me saikinte wiawi sangete ni rahn me Epraim mweisang Suda,+ pwe E pahn ketikihdo nanmwarkien Asiria en mahweniong uhk.+
18 “Rahno Siohwa pahn ketin kuwai pwehn ketin malipe loahng kan sang kahng en pihl doh kan en Nail en Isip oh loangalap kan nan sapwen Asiria, 19 oh irail koaros pahn kohdo oh audehla nan wahu loal kan, nanpwungen paip kan, pohn tuhke tekatek kan, oh pohn wasa koaros me mie pihl.
20 “Rahno, sang sounsihp alahlda men me kohsang sahpw me mi ni Pillapo,* sang nanmwarkien Asiria,+ Siohwa pahn ketin sihpihla moange oh wunen neh kan, oh e pahn pil koahkoahsang eh alis kan.
21 “Rahno aramas emen pahn komourala koupwul men sang pelin kou oh sihpw riemen. 22 Oh pwehki uwen tohtohn milik, e pahn tungoale pwete, pwe koaros me luhwehdi nan sahpwo pahn tungoale pwete oh sukehn loangalap.
23 “Rahno wasa koaros me kin mie tuhkehn kreip 1,000 me pahrekiong mwohni silper 1,000, pahn dipwidipwkihla tuhke tekatek oh dihpw suwed. 24 Aramas akan pahn kohla wasao wa kesik ketieu oh arep, pwehki sahpwo pwon pahn direkihla tuhke tekatek oh dihpw suwed. 25 Oh nahna koaros me kin kamwakelkihda kuwa mahso, ke sohla pahn kohla karanih pwehki keper en tuhke tekatek oh dihpw suwed; wasa pwukat pahn wiahla wasahn mwenge ong kou kan oh wasa me sihpw kan pahn tiakseli.”
8 Siohwa ketin mahsanihong ie: “Ale ehu pelien takai patapat laud+ oh ntingiheki powe pehn me kin kalapw kadoadoahk, ‘Meier-salal-ahs-pas.’* 2 Oh I pahn kamanahla ni nting* sang sounkadehde lelepek kan, samworo Uraia+ oh Sekaraia nein Seperekaia.”
3 Ngehi eri wendi rehn* lih soukohpo,* oh e liseianda oh kedekedeo naitikihada pwutak emen.+ Siohwa eri ketin mahsanihong ie: “Kihong ede Meier-salal-ahs-pas, 4 pwe mwohn pwutako eh pahn esehla nda, ‘Ipa!’ oh ‘Ino!’ kepwehn Damaskus kan oh dipwisou lohdi kan en Sameria pahn wisiklahng mwohn nanmwarkien Asiria.”+
5 Siohwa ketin pwurehng mahsanihong ie:
6 “Pwehki aramas pwukat soikalahr pihl kan en Siloa* me pwilipwilwei ni maledek+
Oh re perenkihdahr Resin oh nein Remalaia pwutak,+
7 Kahrehda kilang! Siohwa pahn ketin wadohng irail
Pihl kehlail oh laud en Pillapo,*
Nanmwarkien Asiria+ oh eh lingan koaros.
E pahn kohda pwaindi kepin eh piletik kan koaros
Oh kadirehla keile kan koaros
8 Oh pwillahng nan Suda.
E pahn lapake kohla, lella ni tepinwere;+
Emanuel,*+ eh pehnpihr kan me kohpeseng pahn pwaindi sapwomw pwon!”
9 Kumwail aramas akan, kumwail kamedekihala, ahpw kumwail pahn pwalpeseng ni pisetik.
Rong, kumwail koaros me kohsang wasa doh kan nin sampah!
Kumwail kaunopada ong mahwen,* ahpw kumwail pahn mwomwla douluhl!+
Kumwail kaunopada ong mahwen, ahpw kumwail pahn mwomwla douluhl!
10 Kumwail koasoanehdi koasoandi ehu, ahpw e sohte pahn pweida!
11 Ni lime roson eh ketiket pohi, iet me Siohwa ketin mahsanihong ie pwehn ketin kehkehlingkihong ie I en dehr idawehn elen aramas pwukat:
12 “Kumwail sohte pahn nda koasoandi mwersuwed ong dahme aramas pwukat kin nda koasoandi mwersuwed!
Kumwail dehr masak dahme re kin masak;
Kumwail dehr rerrerki met.
13 Siohwa kaunen karis en sounpei—iei Ih me kumwail pahn wiahki me sarawi,+
Ih me kumwail pahn lemmwiki,
Oh Ih me pahn ketin kahrehiong kumwail en rerrer.”+
14 E pahn ketin wiahla wasa sarawi ehu,
Ahpw e pil pahn ketin wiahla takain kadipekelekel ehu+
Oh paip ehu me pahn loiong
Wehi riauo koaros en Israel,
Oh lidip ehu oh nsar ehu
Ong tohn Serusalem kan.
15 Me tohto irail pahn dipekelekel oh pwupwudi oh ohla;
Re pahn lidipdi oh lohdi.
16 Welikpene nting me kamanamanlao;
Katengehkihdi mehn kateng kosonnedo* nanpwungen nei tohnpadahk kan!
17 I pahn awiawihete* Siohwa,+ me ketin ekihsang kadaudok en Seikop kan silangi,+ oh I pahn koapworopworki ih.
18 Kilang! Ngehi oh seri kan me Siohwa ketikihong ie+ wia kilel+ oh manaman kapwuriamwei kei nan Israel sang Siohwa kaunen karis en sounpei, me kin ketiket pohn Nahna Saion.
19 Oh ma irail ndaiong kumwail: “Idek rehn sounwunahni kan de rehn sounkosetipw kan me kin mwenginingin,” kaidehn arail Koht me aramas akan anahne kalelapek reh? Ia duwe, re pahn peki rehn me melahr kan ong me momour kan?+ 20 Soh, irail pahn idek duwen kosonnedo oh nting me kamanamanlao!
Ma irail sohte kin koasoi pahrekiong koasoi wet, re sohte ahneki marain.*+ 21 Oh emenemen pahn keidla nan sahpwo lokolok oh duhpek;+ oh pwehki e duhpek oh lingeringer, e pahn keriahla eh nanmwarki oh eh Koht ni eh saradahla. 22 Mwuri e pahn kilang sampah oh ihte me e pahn kilang kahpwal oh rotorot, sohla koapworopwor oh ahnsou apwal akan, rotorot oh sohla marain.
9 Ahpw, rotoroto sohte pahn duwehte ni ahnsou me sahpwo ahneki kahpwal, duwehte mahso ni ahnsou me sapwen Sepulon oh sapwen Napdali kin mwamwahlla.+ Ahpw ahnsou kei mwuhr Koht pahn ketin kahrehiong ahl me mi limwahn sehdo, me mi nan sapwen Sordan, Kalili sapwen mehn liki kan en waunla.
2 Aramas akan me kin alialu nan rotorot
Kilangehr marain laud ehu.
A ong irail me kin koukousoan nan sahpw me rotorot mosul,
Marain dakeradahr irail.+
3 Komw ketin wiahiongehr tohnwehio en tohtohla;
Komw ketin kahrehiong eh peren en mwuledek.
Re pereperen mwohn silangomwi
Duwehte aramas ar kin peren ni ahnsoun dolung,
Duwehte irail me kin peren ni ar nehkpeseng dipwisou lohdi kan.
4 Pwe komw ketin palpisetikihpenehr ar mehn wisik kepwe kan,
Lepin tuhke pohn pwopwarail kan, sokon en arail kaunen doadoahk,
Duwehte ni mwehin Midian.+
5 Suht koaros me kin karerehda sampah ni eh kin alu
Oh likou koaros me wisekesekihla nta
Pahn wiahla mehn sou kisiniei.
E pahn mwarenki Sounkaweid Kaselel,+ Koht Manaman,+ Sahm Poatopoat, Kaunen Popohl.
7 Sapwellime pwuhng en kaunda* pahn lalaudla kohkohlahte
Oh pil popohl pahn poatopoat+
Nan mwoalen Depit+ oh nan sapwellime wehi.
Siohwa kaunen karis en sounpei pahn ketin ngoangki wia met.
8 Siohwa ketin kadarala mahsen ehu pwehn kehkehlikiong Seikop,
Oh e leledohr Israel.+
9 Oh aramas koaros pahn ese met
—Epraim oh tohn Sameria kan—
Me kin nda sang nan arail aklapalap oh arail mohngiong pohnmwahso:
Tuhke sikamor* kan paldier,
Ahpw se pahn wiliankihdi mepwukat sidar kan.”
11 Siohwa pahn ketin wiahiong en Resin imwintihti kan ren uhwong ih
Oh pahn ketin kamwakid eh imwintihti kan ren mwekid,
12 Siria sang palimese oh mehn Pilisdia kan sang palikapi,*+
Re pahn sarapeseng oh kadallehla Israel.+
Pwehki mepwukat koaros, sapwellime engieng saikinte tokedi,
Ahpw e kin ketin kapahlahte nin lime pwehn kaloke irail.+
13 Ahpw aramas ako saikinte pwurodo rehn Ih me kin ketin kaloke irail;
Re saikinte rapahki Siohwa kaunen karis en sounpei.+
15 Ohl mah oh me uhdahn wahu men iei me moange,
Oh soukohp me kin kihda kaweid sapwung iei me pwadaiki.+
16 Irail kan me kin kahluwa aramas pwukat kin kahrehiong irail en kohkohseli,
Oh irail kan me kin idawehn pingidahr.
17 Ihme kahrehda Siohwa sohte pahn ketin kupwurperenki neirail me pwulopwul kan,
Oh e sohte pahn ketin kasalehda kadek kalahngan ong neirail seri sepwoupwou kan oh neirail liohdi kan
Pwehki irail koaros sohpeisangehr Koht oh re kin wia me suwed+
Oh au koaros kin koasoakoasoi ni salamalam.
Pwehki mepwukat koaros, sapwellime engieng saikinte tokedi,
Ahpw e kin ketin kapahlahte nin lime pwehn kaloke irail.+
18 Pwe suwed kin lulda rasehng kisiniei ehu,
Oh karongehla tuhke tekatek kan oh dihpw suwed kan.
E pahn isikala wasa tuhkehn kan en nanwel,
Oh ediniei mosul pahn kohda sang wasa pwukat.
19 Sang ni engieng en Siohwa kaunen karis en sounpei,
Sahpwo luldahr,
Oh aramas ako pahn wiahla mehn sou kisiniei.
Sohte me pahn doarehla pil pein rie.
20 Emen pahn lupuk uduk ni palimaun
Ahpw men mwengehte;
Oh emen pahn kang uduk ni palimeing
Ahpw sohte pahn medla.
Emenemen pahn kadallehla uduken peh,
21 Manase pahn kadallehla Epraim,
Oh Epraim Manase.
Ira pahn ehupene uhwong Suda.+
Pwehki mepwukat koaros, sapwellime engieng saikinte tokedi,
Ahpw e kin ketin kapahlahte nin lime pwehn kaloke irail.+
10 Meid suwediong irail me kin wiahda koasoandi kamedek kan,+
Me kin kalapw koasoanehdi koasoandi lemei kan,
2 Pwehn kahmahmki kopwung en me semwehmwe,
Pwehn irehdi pwung pahrek sang me luwet kan nanpwungen nei aramas akan,+
Pwehn ale en liohdi kan kepwe nin duwen arail dipwisou lohdi
Oh en me sepwoupwou kan kepwe nin duwen arail dipwisou lohdi!+
3 Dahme kumwail pahn wia ni rahnen kadeik,*+
Ni me pahn kasohreikumwaillao eh pahn kohdo sang wasa doh?+
4 Sohte mehkot me kumwail kak wia, ahpw ihte karahkidi nanpwungen me sensel kan
De pwupwudi nanpwungen me kamakamala kan.
Pwehki mepwukat koaros, sapwellime engieng saikinte tokedi,
Ahpw e kin ketin kapahlahte nin lime pwehn kaloke irail.+
5 “Kilang! mehn Asiria,+
Sokon en kasalehda ei engieng+
Oh I pahn doadoahngki tuhke me mi nan pehrail pwehn kasalehda ei kadeik.
6 I pahn kadarala ih ong wehi ehu me sohpeisangehr Koht,+
Ong aramas akan me kahrehda ei engieng;
I pahn kehkehlingkihong ih en ale dipwisou lohdi tohto
Oh tiakiraildi rasehng pwelmatak en nanial akan.+
7 Ahpw e sohte pahn men wia met
Oh eh mohngiong sohte pahn koasoakoasoane met;
Pwe e mi nan eh mohngiong en kamwomwala,
En kasohrehla wehi tohto, kaidehn me malaulau.
8 Pwe e nda,
‘Kaidehn nei kaun akan koaros wia nanmwarki kei?+
9 Pwe Kalno+ sou duwehte Karkemis?+
Sameria+ sou duwehte Damaskus?+
10 Pehiet koledier wehi kan me kin kaudokiong koht soh katepe kan,
Me arail sansal perperda kan tohtohsang me mi nan Serusalem oh Sameria!+
11 I sou pahn pil wiahiong Serusalem oh eh dikedik kan
Duwehte me I wiahiong Sameria oh eh koht soh katepe kan?’+
12 “Ni ahnsou me Siohwa ketin kanekehla sapwellime doadoahk koaros pohn Nahna Saion oh nan Serusalem, E* pahn ketin kaloke nanmwarkien Asiria pwehki eh mohngiong pohnmwahso oh eh mas aklapalap.+ 13 Pwe e nda,
‘I pahn wia met sang ni kehl en pehiet
Oh sang ni ei erpit, pwe I me loalokong.
I pahn kihsang irepen aramas akan+
Oh kulihasang arail dipwisou kesempwal kan,+
Oh I pahn kalowehdi towe kan duwehte me kehlail men.+
14 Rasehng aramas emen me doahkalahng pahs ehu,
Pehiet pahn koledi en aramas akan kepwe kan;
Oh rasehng emen me rikpene kutohr kan me lekdekla,
I pahn kihpene sampah pwon!
Sohte me pahn kamwakid eh pehnpihr kan de sarapeseng de sisiok.’”
15 Ia duwe, sile pwoat kak kasapwilada pein ih pohn aramas me wie doadoahngki?
Rasaras pwoat kak kasapwilada pein ih pohn aramas me wie rasaraski?
Ia duwe, sokon+ pwoat kak oale aramas me pwekadao?
De sokon pwoat kak pwekada aramas me sohte wiawihdahsang tuhke?
16 Kahrehda Kaun mehlelo, Siohwa kaunen karis en sounpei,
Pahn ketin kahrehiong nah me mworourou kan* en tihtihla,+
Oh e pahn ketin wiahda kisiniei mwehl ehu pahn eh lingan.+
17 Marain en Israel+ pahn ketin wiahla kisiniei ehu,+
Oh eh Koht Sarawi pahn ketin wiahla mpwulen kisiniei ehu;
E pahn lulda oh karongehla eh dihpw suwed kan oh eh tuhke tekatek kan ni rahnteieu.
18 E uhdahn pahn ketikihsang lingan en eh nanwel oh eh mwaht;
E pahn duwehte aramas soumwahu men me luhluwetala.+
19 Luhwen eh tuhkehn nanwel kan
Uhdahn pahn malaulau me pwutak emen pil kak wadekada.
20 Rahno irail me luhwehdi nan Israel
Oh kadaudok en Seikop kan me pitila
Sohla pahn rapahki utuht ong pein irail sang me kin kaloke irail;+
Ahpw re pahn rapahki utuht ong pein irail sang Siohwa,
Koht Sarawi en Israel, oh re pahn lelepek ong ih.
21 Ihte me luhwehdi me pahn pwurodo,
Luhwen kadaudok en Seikop kan, rehn Koht Manaman.+
22 Israel, mendahki noumw aramas akan,
Me tohto rasehng pihken oaroahr kan,
Ihte me luhwehdi nanpwungarail me pahn pwurodo.+
23 Ei, kamwomwala me Kaun Wasa Lapalahpie, Siohwa kaunen karis en sounpei ketin koasoanedier,
Pahn wiawi nan sahpwo pwon.+
24 Kahrehda iet me Kaun Wasa Lapalahpie, Siohwa kaunen karis en sounpei ketin mahsanih: “Nei aramas me kin koukousoan nan Saion, ke dehr masak pwehki mehn Asiriao, me kin kemehkin uhk sokon+ oh kin pwekada nah sokono pwehn uhwong uhk duwehte me Isip wia.+ 25 Pwe ni ahnsou kis ni kadeiko eh pahn imwisekla; ei engieng pahn kamwomwirailla.+ 26 Siohwa kaunen karis en sounpei pahn wokihki ih mehn wowoki ehu,+ duwehte eh kalowehdi Midian limwahn paip Orehp.+ Oh nah sokono pahn mi pohn sehdo, oh e pahn kauwada duwehte me e wiahiong Isip.+
27 Rahno eh wisiko pahn kohdahsang pohn pwopwomwen,+
Oh eh mehn wisiko sang ni tepinweromw,+
Oh mehn wisiko pahn ohla+ pwehki leho.”
30 Likwer oh wer, nein Kallim serepein!
Tehk kanahieng, Laisa!
Poakehla Anadod!+
31 Madmena tangehr.
Tohn Kepim kan rapahkidahr pereparail.
32 Rahnwette e pahn uhdi nan Nop.+
E itik kumwuten peh ni nahna en nein Saion serepein,
Ni dohl en Serusalem.
33 Kilang! Kaun mehlelo, Siohwa kaunen karis en sounpei,
Ketin pelepelehsang rahntuhke kan ni ngihl kamasepwehk;+
Tuhke me keieu reirei kan lopdier,
Oh me ile kan kohdier.
34 E ketin pelehkihdi wasa tuhkehn kan en nanwel dipwisoun doadoahk mete pwoat,*
Oh Lepanon pahn pwupwudi sang emen me kehlail.
11 Kisin rah pwoat+ pahn wosada sang ni tuken tuhkehn Sehsi,+
Oh pons ehu+ sang ni kaleweo pahn kapwarehda wah.
2 Sapwellimen Siohwa ngehn sarawi* pahn kohdiong powe.+
Ihme kahrehda e pahn ahneki erpit+ oh koahiek en wehwehki ire kan,
E pahn kihda kaweid mwahu oh e pahn kehlail,+
E pahn ahneki loalokong laud oh e pahn uhdahn lemmwiki Siohwa.
3 E pahn diar peren ni lemmwin Siohwa.+
E sohte pahn ketin kadeik sang ni dahme e kin mahsanih,
De pil peneu sang dahme e kin karongehte.+
4 E pahn ketin kadeik me semwehmwe kan ni pahrek,*
Oh sang ni pwung e pahn ketikihda peneu pwehki me opampap kan nin sampah.
E pahn ketin poakiheki sampah sokon en doauese+
5 Pwung pahn wia kateng me pidakih lukope,
Oh lelepek iei kateng en pwone.+
6 Kidien wel pahn kousoan* rehn sihmpwul kan,+
Oh lepard pahn wendi mpen kuht pwulopwul,
Oh koupwul oh laion* oh mahn mworourou koaros pahn mihpene;*+
Oh kisin pwutak kis me pahn kahluwa irail.
7 Kou oh pehr pahn mwengepene,
Oh neirail kan pahn wendipene.
Laion pahn kang reh meng duwehte kouwol.+
8 Kisin seri men pahn mwadong pohn pwoahr en kopra men,*
Oh seri men me mweisang dihdi pahn kihdi peh pohn pwoahr en sineik pwoisin men.
9 Irail sohte pahn kamedekihala emen+
De kauwehla mehkot nan ei nahna sarawio pwon,+
Pwehki sampah uhdahn pahn direkihla loalokong duwen Siohwa
Duwehte pihl kan eh kipehdi sehd.+
10 Rahno kalewen Sehsi+ pahn kesihnenda rasehng kilel ehu* ong aramas akan.+
11 Rahno Siohwa pahn ketin pwurehng kapahla lime, keriapak, pwehn ketin pwurehng ale luhwen sapwellime aramas akan me luhwehdi sang Asiria,+ sang Isip,+ sang Padros,+ sang Kus,+ sang Elam,+ sang Sainar,* sang Amad oh sang dekehn nansed kan.+ 12 E pahn ketin kauwada kilel ehu* ong wehi kan oh ketikipene mehn Israel kan me mwarahkpeseng,+ oh e pahn ketin kapokonepene irail mehn Suda kan me mwarahkpeseng sang ni keimw pahieu en sampah.+
13 Luwak en Epraim pahn sohrala,+
Oh irail me kin imwintihtiong Suda pahn sohrala.
Epraim sohte pahn luwangki Suda,
De Suda sohte pahn pil imwintihtiong Epraim.+
14 Irail pahn mwadang kohla mahwen ni ukada kan* en mehn Pilisdia kan ni palikapi;
Irail pahn ehupene kulih aramas en Palimese kan.
Sang sapwellime ahng* karakar e pahn ketin kamadahkihda* piletik isuh ko,
Oh e pahn ketin kahrehiong aramas akan ren alu kotehla mepwukat doadoahngki arail suht kan.
16 Oh e pahn mie ahl pwoat+ kohieisang Asiria ong luhwen sapwellime aramas akan me luhwehdi,+
Duwehte eh mie ong Israel ni rahn me e kohieisang nan sapwen Isip.
12 Rahno ke uhdahn pahn patohwan:
“I kalahngankihong komwi, Maing Siohwa,
Pwe mendahki omwi ketin engieng pahi,
Omwi engieng ekisekis meleileidi, oh komwi ketin kansenamwahwihiehla.+
2 Kilang! Koht me komourpei.+
I pahn likih oh sohte masak mehkot;+
Pwe Iah* Siohwa iei ei kehl oh ei roson,
Oh e ketin wialahr sounkomourpei.”+
3 Ni peren kumwail pahn idipil
Sang nan utuhnpihl en komour.+
4 Oh rahno kumwail pahn nda:
“Kumwail kapingkalahngan ong Siohwa, likweriong mware,
Kumwail kehsehki aramas akan sapwellime wiewia kan!+
Kumwail lohkiseli me mwareo lapalapala.+
5 Kumwail koulki koulen kaping kan* ong Siohwa,+ pwe e ketin wiadahr soahng kapwuriamwei kan.+
Kumwail wiahiong sampah pwon en esehla met.
6 Likwer oh werki peren, kowe tohn* Saion,
Pwe me lapalap nanpwungamwail iei Koht Sarawi en Israel.”
13 Kadeik ehu ong Papilon+ me Aiseia+ nein Eimwos kilangada nan kaudiahl:
2 “Kauwada kilel ehu*+ pohn nahna ehu me takain.
Likwerlahng irail, oaloahl,
Pwe ren kohlongodo nan wasahn pedolong en me lapalap kan.
3 I wiadahr kehkehlik ong irail me I idihadahr.*+
I ekerpenehr nei sounpei kan pwehn kasalehda ei engieng,
Nei aramas akan me kin peren ni aklapalap.
4 Rong! Pokon ehu pohn nahna kan;
E mwomwen ngilen aramas tohto!
Rong! Mwoarong en wehi kan,
Wehi kan me pokonpenehr!+
Siohwa kaunen karis en sounpei ketin kapokonepene karis en sounpei kan ong mahwen.+
5 Sang sahpw doh ehu,+
Sang ni imwin sampah,*
Siohwa oh tehtehn mahwen en sapwellime engieng kohkohdo,
Pwehn ketin kamwomwala sampah pwon.+
6 Mwahiei, pwe rahnen Siohwa kerendohr!
E pahn kohdo sang rehn me Keieu Manamano nin duwen kamwomwala ehu.+
7 Ihme kahrehda peh koaros pahn mwoatorala,
Oh mohngiong en aramas koaros pahn peikipeseng masak.+
8 Aramas ako masepwehkada.+
Re rerada oh dengila oh medek,
Rasehng lih emen me wie neineitik.
Re kilikilengpene ni masak,
Mas weitahtakihla pwunod.
9 Kilang! Rahn en Siohwa kohkohdo,
E pahn uk ni lingeringer oh engieng kowahlap,
Pwehn wiahkihla sahpwo mehkot kamasepwehk ehu,+
Oh en kamwomwala me dipan akan sang nan sahpwo.
10 Pwe usu kan en nanleng oh arail pwihnen usu kan*+
Sohte pahn kapwarehda ar marain;
Ketipin pahn rotorot ni eh kin dakada,
Oh maram sohte pahn kapwarehda eh marain.
11 I pahn kapwukoahki sampah eh suwed,+
Oh me suwed kan pwehki arail sapwung.
12 I pahn wiahiong aramas en malaulausang kohl me mwakelekeldahr,+
Oh aramas akan en malaulausang kohl en Opir.+
13 Ihme kahrehda I pahn wiahiong nanleng en rerrer,
Oh sampah pahn rerada sang nan dewe+
Ni engieng en Siohwa kaunen karis en sounpei ni rahnen sapwellime engieng kowahlap.
14 Rasehng kasel men me tangasang sounkesik men oh rasehng pelin sihpw me sohte me pahn kihirailpene,
Emenemen pahn pwuralahng pein eh aramas akan;
Emenemen pahn tangalahng pein sapwe.+
15 Mehmen me dierek pahn dokdi,
Oh mehmen me kolokoldi pahn mehkihla kedlahs.+
16 Neirail seri kan pahn kamakamala ni lemei mwohn masarail kan,+
Imwarail kan pahn kulsang,
Oh angkehlail pahn wiawihong arail pwoud kan.
17 Iet I pahn wiahiong mehn Media kan ren uhwong irail,+
Me sohte kin wiahki mehkot silper
Oh sohte kin perenki kohl.
18 Arep en neirail kesik ketieu kan pahn doakoahdi mwahnakapw kan;+
Irail sohte pahn kasalehda ar poakehla wahn kapehd kan
De pil kadek kalahngan ong seri kan.
19 Oh Papilon, me keieu lingan* nan wehi kan,+
Lingan oh pohnmwahso en mehn Kaldia kan,+
Pahn duwehla Sodom oh Komora ni ahnsou me Koht ketin kamwomwala ira.+
20 E pahn sohla towe,
De e pil sohla pahn wia wasahn kousoan erein dih kan koaros.+
Sohte mehn Arepia pahn kauwada imwe impwal wasao,
Oh silepen sihpw kan sohte pahn kakommoalehdi neirail pelin sihpw kan wasao.
21 Mahn en nan sapwtehn kan pahn wendi wasao;
Imwarail kan pahn audaudkihda likoht kan.
22 Mahn akan pahn weriwer sang nan eh imwen doulik kan,
Oh kidien wel kan nan eh tehnpas lingan kan.
Eh ahnsou kerendohr, oh eh rahn akan sohte pahn werei.”+
14 Pwe Siohwa pahn ketin kasalehda kadek kalahngan ong Seikop,+ oh e pahn ketin pwurehng pilada Israel.+ E pahn ketin kihiraildi* nan sapwarail,+ oh mehn liki kan pahn iang irail oh iangala kadaudok en Seikop kan.+ 2 Oh aramas akan pahn ale irail oh wairailla ni pein ar wasa kan, oh aramas en Israel kan pahn nainekinirailla nin duwen ladu ohl oh lih kei+ nan sapwen Siohwa; oh irail pahn kaliduwih irail kan me kaliduwih irail, oh irail pahn kaunda irail me kin itonehng ren doadoahk.*
3 Ni rahn me Siohwa ketikihong uhk kommoal sang omw medek oh omw pwunod oh sang kalidu lemei me kohwong uhk,+ 4 ke pahn kapwukapwurehiong mahsen en melkahka* wet ong nanmwarkien Papilon:
“Me kin itonehng meteikan ren doadoahk* imwiseklahr!
Kalokoloko imwiseklahr!+
5 Siohwa ketin kauwelahr sokon en me suwed,
Sokon en kaun akan,+
6 Me sohte tokedihsang keme aramas akan ni lingeringer,+
Me lingeringer kalowehdi wehi kan ni kalokolok me sohte imwi.+
7 Eri sampah pwon kommoaldier oh saledeksang pingiping.
Aramas akan weriwerki ar peren.+
8 Pil tuhke suniper kan perenkihda dahme wiawihong uhk,
Iangahki sidar en Lepanon kan.
Re nda, ‘Sangete ahnsou me ke pwupwudi,
Sohte sounlop tuhke men kohdahdo uhwong kiht.’
9 Pil Sousou* me mi pah kin mwekidida
Pwehn tuhwong uhk ni omw kohdo.
Pwehki kowe, e kin kapwourada me melahr akan me sohte ar kehl,
Kaun lemei* koaros en sampah.
E kin kahrehiong nanmwarkien wehi kan koaros ren kesihnenda sang nan mwoalarail kan.
10 Irail koaros tepida koasoi oh ndaiong uhk,
‘Ke pil luwetala duwehte kiht?
Ke duweikitala?
Mwesenloang kan kohpesengier pahmw duwehte peht ehu,
Oh mwahs kan me wia omw tehi.’
12 Ke pwupwudisangehr nanleng,
Kowe me lingaling, nein nin sohrahn!
Ke lopdier nin sampah,
Kowe me kin kalowehdi wehi kan!+
13 Ke nda nan omw mohngiong, ‘I pahn kohdahla nanleng.+
Pohnangin usu kan en Koht I pahn pwekada mwoalei,+
Oh I pahn mwohndi pohn nahnahn mihting,
Wasa me keieu doh kan ni paliepeng.+
14 I pahn kohdahla pohnangin kadoken depwek kan;
I pahn wiahiong pein ngehi en duwehla Wasa Lapalahpie.’
15 Ahpw, ke pahn wisikdihla nan Sousou,*
Wasa keieu loal nan pwoahr.
16 Irail me kilang uhk pahn kangkakil uhk;
Re pahn kasawihiuk ni keneinei oh nda,
‘Ih ohlo met me kin itik sampah,
Me kin kahrehiong wehi kan en rerada,+
17 Me kahrehiong sampah en duwehla sapwtehn
Oh kamwomwala eh kahnimw kan,+
Me kahng mweidohng nah me sensel kan ren kohla ni imwarail kan?’+
19 Ahpw ke lekdekla sohte omw sousou,
Rasehng pons* ehu me mwamwahlla;
Paliweromw likoukihda irail me kamakamkihla kedlahs,
Me kohdihla ni takain pwoahr ehu,
Rasehng paliwar mehla ehu me tiatipeseng.
20 Ke sohte pahn iang irail mi nan sousou,
Pwe ke kauwehla pein sapwomw,
Ke kemehla pein noumw aramas.
Eden kadaudok en sounwia me suwed kan sohte pahn sansalda.
21 Kaunopada ehu wasahn kamakamala ong nah pwutak kan
Pwehki dipen samarail mehn mahs ako,
Pwe ren dehr kehlailla oh kaunda sampah
Oh kadirehkihla sahpwo arail kahnimw kan.”
22 “I pahn uhwong irail,”+ Siohwa kaunen karis en sounpei me ketin mahmahsen.
“Oh I pahn kasohrehsang nan Papilon ahd oh aramas me luhwehdi oh kadaudok kan oh dih en mwuhr kan,”+ Siohwa me ketin mahmahsen.
23 “Oh I pahn wiahiong ih en wiahla wasahn kousoan en pworkiupain kan* oh lehpwel, oh I pahn koahkoahkieki ih kepenok en kamwomwala,”+ Siohwa kaunen karis en sounpei me ketin mahmahsen.
24 Siohwa kaunen karis en sounpei ketin kahukihla:
“Duwehte me I koasoanedier, eri e pahn wiawi,
Oh duwehte me I piladahr, ihme pahn pweida.
25 I pahn kamwutepene mehn Asiria nan sapwei,
Oh I pahn tiakedi ih pohn ei nahna kan.+
Eh mehn wisik pahn kohsang irail,
Oh eh wisik pahn kohsang pohn pwopwarail kan.”+
26 Iet dahme pilipildahr ong sampah pwon,
Oh iet lime me kapalahr* pwehn uhwong wehi koaros.
27 Pwe Siohwa kaunen karis en sounpei ketin piladahr,
Oh ihs me kak kasapwungehla met?+
E ketin kapalahr lime,
Oh ihs me kak kapwurehla?+
28 Nan pahr me Nanmwarki Ahas mehla,+ kadeik wet kalohkda:
29 “Pilisdia, dehr perenda, kumwail koaros,
Pwehki sokon en aramaso me kin wokihiuk eh ohlahr.
Pwe sang ni kadaudok en* serpent+ iei sineik pwoisin men me pahn kohdo,+
Oh kadaudoke pahn wia sineik kisiniei me kin pihr.*
30 Erein mesenihen irail me luwet kan ar mwenge
Oh me semwehmwe kan ar wendi ni ar sohte perki mehkot,
I pahn kemehkihla kadaudokomw* duhpek,
Oh dahme luhwehdi sang rehmw pahn kamakamala.+
31 Mwahiei, ewen kehl! Wer, kahnimw!
Pilisdia, kumwail koaros pahn nan kapehd tikitikla!
Pwe ediniei ehu kohkohdo sang paliepeng,
Oh sohte me wawaila nan eh pwihn.”
32 Ia duwen ar pahn sapeng meninkeder kan en wehio?
Re pahn sapengki me Siohwa ketin wiadahr poahsoan en Saion,+
Oh me luwet kan en sapwellime aramas akan pahn diar wasahn ruk reh.
15 Kadeik ehu ong Mohap:+
Pwehki e mwomwlahr pwohng tehieu,
Ar+ en Mohap nennenlahr.
Pwehki e mwomwlahr pwohng tehieu,
Kir+ en Mohap nennenlahr.
2 E kohdalahr ni Imwen kaudoko oh Dipon,+
Ni wasa ile kan pwehn sengiseng.
Mohap mwahieiki Nepo+ oh Medepa.+
Moahng koaros sihpla koikoi,+ alis koaros seiseisang.+
3 Irail likawihada likoun nsensuwed* nanial akan.
Pohn imwarail kan oh nan arail wasahn tuhpene kan irail koaros mwahiei;
Irail kohdi wie sengiseng.+
Ihme kahrehda sounpei en Mohap kan wie weriwer.
E wie rerrer.
5 Mohngiongi wie sengisengki Mohap.
Nah me tang kan tang lella Soar+ oh Eklad-selisia.+
Re wie sengiseng ni ar kohdahla ni ukada en Luhid;
Re sengisengki kahpwal laudo ni ar kohkolahng ahl en Oronaim.+
6 Pwe pihl en Nimrim kan tehnla;
Dihpw kan mengilahr,
Dihpw sohralahr oh sohte mehkot pohn dihpw luhwehdi.
7 Ihme kahrehda irail pahn wahsang dahme luhwehdi nan arail imwen nahk kan oh arail kepwe kan;
Irail kotekote wahu en tuhke poplar kan.
8 Ngilen sengisengo peipeila wasa koaros nan sapwen Mohap.+
Ngilen mwahieio lella Eklaim;
Ngilen mwahieio lella Peerelim.
9 Pwe pihl en Dimon kan direkihla nta,
Oh I nekinekid pil ekei kahpwal ong Dimon:
Laion men ong irail mehn Mohap me pitila
Oh ong irail me mihmihte nan sahpwo.+
16 Kadarala sihpw wol men ong kaunen sahpwo,
Sang Sila kohla nan sapwtehno
Kohla ni nahnahn nein Saion serepein.
2 Rasehng menpihr men me kerewen sang nan eh pahs,+
Ih pil duwen nein Mohap serepein kan ar pahn tang kotehla Arnon.+
3 “Kihda kaweid, kapwaiada pilipilo.
Wiahiong omw mweteh nin souwas en duwehte nipwong.
Karukehla me mwarahkpeseng oh dehr pangala irail me tang.
4 Irail me mwarahkpeseng kan en kousoan rehmw, Mohap.
Wiahla wasahn ruk ong irail pwehki sounkamwomwalao.+
Sounkalokoloko pahn imwisekla,
Kamwomwala pahn imwisekla,
Oh irail me kin tiakedi meteikan pahn sohrasang sampah.
5 Eri, mwoahl ehu ahpw pahn kokouda teng ni limpoak loalopwoat.
Me ketiket powe nan impwal en Depit pahn lelepek;+
E pahn ketin kopwung ni pahrek oh kin ketin mwadang wia dahme pwung.”+
6 Se rongehr duwen pohnmwahso en Mohap—e uhdahn pohnmwahso+—
Eh aklapalap oh eh pohnmwahso oh eh lingeringer;+
Ahpw eh lokaia soh katepe sohte pahn wiawi.
7 Eri Mohap pahn mwahieiki Mohap;
Irail koaros pahn mwahiei.+
Irail me lokolok kan pahn ingitingki keik reisin kan en Kir-aresed.+
8 Pwe mwaht kan en Espon+ mengilahr,
Tuhkehn kreip en Sipma,+
Kaunen wehi kan tiakedier eh rah weitahta kan;*
Rah kan lella Saser;+
Re douluhlla nan sapwtehno.
Eh pons kan kohpesengier oh kohla lel ni sehdo.
9 Ihme kahrehda I pahn sengisengki tuhkehn kreip en Sipma duwehte ei sengisengki Saser.
I pahn kawisekesekinuhkala pilen mesei kan, Espon oh Eleale,+
Pwehki weriwer ong omw wahntuhkehn ahnsoun karakar oh ahnsoun dolung eh imwiseklahr.*
10 Peren oh nsenamwahu kohsangehr nan mwahto,
Oh sohte koulen peren de weriwer nan mwetin kreip kan.+
Sountiako solahr tiak kreip nan wasahn tiak kreip kan pwehn wiahda wain,
Pwe I kahrehiong weriwero en uhdi.+
11 Ihme kahrehda loaleiet rerrer pwehki Mohap,+
Rasehng parapar sahl en arp pwoat,
Oh wasa keieu loal rehi rerrer pwehki Kir-aresed.+
12 Mehnda ma Mohap kin nannanti kohla kaudok ni wasa ileo oh mehnda ma e kin kohla kapakap nan eh wasa sarawio, e sohte pahn kapwaiada mehkot ehu.+
13 Ih met mahsen me Siohwa ketin mahsanih mwoweo duwen Mohap. 14 Oh met Siohwa ketin mahsanih: “Mwohn sounpar siluh eh pahn imwisekla, duwehte sounpar kan en tohndoadoahk alahlda men,* lingan en Mohap pahn mwamwahlla pwehki pingiping laud en soahng koaros oh irail kan me luhwehdi pahn uhdahn malaulau oh luwet.”+
17 Kadeik ehu ong Damaskus:+
“Kilang! Damaskus sohla pahn wia kahnimw ehu,
Oh e pahn wiahla koasoakoasoak en mohn kahnimw ehu.+
2 Kahnimw kan en Aroer+ pahn lekdekla;
Re pahn wiahla wasahn en pelinmen kan wendi
Oh sohte me pahn kamasak irail.
3 Kahnimw kehl kehlail kan pahn sohrala sang Epraim,+
Oh wehio sang Damaskus;+
Oh irail me luhwehdi Siria
Pahn duwehla lingan en mehn Israel kan,”* Siohwa kaunen karis en sounpei me ketin mahmahsen.
4 “Rahno lingan en Seikop pahn tikitikla,
Oh eh paliwar roson* pahn tihtihla.
5 E pahn rasehng ahnsou me soundondol men kin rikirikpene krein kesihnen kan
Oh dondolung kadoken krein,
6 Ihte me luhwehdi kan me pahn mihmihte,
Duwehte ni ahnsou me tuhke olip pwoat itiht:
Ihte olip mah riau de siluh me luhwehdi pohn rah me keieu ile,
Ihte meh pahieu de limau luhwe pohn rah kan me kin wa,”+ Siohwa, Koht en Israel me ketin mahmahsen.
7 Rahno aramas pahn sohpeilahng Sounwiepeo, oh mese kan pahn kilikilang Koht Sarawi en Israel. 8 E sohte pahn sohpeiong pei sarawi kan+ me peh kan wiahda;+ oh e sohte pahn kilikilang dahme sendin peh kan wiadahr, mehnda ma tuhke sarawi kan* de pil dewen warpwohmwahu kan.
9 Rahno eh kahnimw kehl kehlail kan pahn duwehla wasahn kousoan kan me lekdeklahr nanwel,+
Rasehng rah pwoat me lekdekla mwohn mehn Israel kan;
E pahn wiahla wasa tehn ehu.
10 Pwe ke manokelahr Koht,+ sounkomourpomw;
Ke sohte tamataman Paipo,+ imwomw ihmw laud kehl kehlailo.
11 Ni rahn me ke kelepene omw mwetuwelo ni keneinei,
Nimenseng ke wiahiong omw werentuhkeo en wosada,
Ahpw ahnsoun dolung pahn sohrala ni rahnen soumwahu oh medek me sohte kak mwahula.+
12 Rong! Mie mwoarong en aramas tohto,
Me katairong duwehte sehd kan!
Mie mwoarong en wehi kan,
Me ngilarail duwehte ngiringirisek en ilok laud kan!
13 Wehi kan pahn wiahda ngihl ehu rasehng ngiringirisek en ilok tohto.
E pahn ketin angiangih irail, oh irail pahn tang kohla wasa doh,
Re pahn tang rasehng kilin krein en nahna kan nan kisinieng ehu,
Rasehng dihpw tekatek madekeng ehu* me piripirseli nan kisinieng en melimel ehu.
14 Nin soutik mie masak.
Mwohn nimenseng irail solahr.
Ih met pwais en irail me adihasang kitail
Oh sohso en irail me kulih kitail.
18 Meid suwediong sahpw me direkihla ngilen pehnpihr en kisin mahn tikitik kan
Nan sahpw en pillap kan en Idiopia!+
2 E kadarala wiliepe kan nansed,
Me kote pihl kan nan pwoht papairus, ndinda:
“Kumwail meninkeder pitipit kan, kumwail kohla,
Rehn tohnwehi reirei oh kil medendel ehu,
Rehn aramas me wehi koaros masak,+
Rehn wehi kehlail ehu, me kin kana,
Me pillap kan wahsang pwelen sapwe.”
3 Kumwail tohn sahpwo pwon oh kumwail me kin kousoan nin sampah,
Dahme kumwail kilang pahn duwehte kilel ehu* me kokouda pohn nahna kan,
Oh kumwail pahn rong ngihl ehu duwehte mehn pepeuk* ehu.
4 Pwe iet dahme Siohwa ketin mahsanihong ie:
“I pahn meleilei oh kilikilengwei pohn* ei wasa me koasoandiero,
Duwehte lingen karakar iangahki marain en ketipin,
Duwehte pwoaik me mweredi nan karakar ni ahnsoun dolung.
5 Pwe mwohn ahnsoun dolung,
Ni eh masalpesengier oh masalo wiahla kreip mah,
Siset en lop tuhke pahn lupukasang pons ko
Oh rah kapw kan pahn lopla oh kohsang.
6 Irail koaros pahn mihmihte ong menpihr en nahna kan
Oh ong mahn en sampah kan.
Menpihr en nahna kan pahn kangkang irail ni ahnsoun karakar,
Oh mahn koaros en sampah pahn kangkang irail ni ahnsoun dolung.
7 Ahnsowo kisakis ehu pahn wisikdohng Siohwa kaunen karis en sounpei,
Sang tohnwehi reirei oh kil medendel ehu,
Sang aramas me wehi koaros masak,
Sang wehi kehlail ehu, me kin kana,
Me pillap kan wahsang pwelen sapwe
Ong wasa me kin kolokol mwaren Siohwa kaunen karis en sounpei, Nahna Saion.”+
19 Kadeik ehu ong Isip:+
Kilang! Siohwa ket pohn depwek marahra ehu oh ketiket kohdo nan Isip.
Koht soh katepe kan en Isip pahn rerrer mwohn silangi,+
Oh mohngiong en mehn Isip kan pahn masepwehkada.
2 “I pahn kamwakid mehn Isip kan ren uhwong mehn Isip kan,
Oh re pahn peipene nanpwungarail,
Emenemen uhwong rie oh mehn mpe,
Kahnimw uhwong kahnimw, wehi uhwong wehi.
3 Oh mehn Isip kan pahn pingida,
Oh I pahn kapingada eh koasoandi kan.+
Irail pahn sohpeilahng arail koht soh katepe kan,
Ong sounakmanaman kan oh ong sounwunahni kan oh ong sounkosetipw kan.+
4 I pahn kihla Isip rehn soumas lemei men,
Oh nanmwarki lemei men pahn kaunirailda,”+ Kaun mehlelo, Siohwa kaunen karis en sounpei me ketin mahmahsen.
5 Pilen sehdo pahn sohrala,
Oh pillapo uhdahn pahn madada.+
6 Oh pillap kan pahn pwohsuwedla;
Dahu en Nail kan en Isip pahn tikitikla oh madada.
Ahlek kan oh dihpw reirei kan* pahn ohla.+
7 Kisin tuhke kan me mi ni keilen Pillap Nail, ni ewen Nail,
Oh sahpw koaros me padok werentuhke ni keilen Nail+ pahn madada.+
E pahn pepeukla, oh e pahn sohrala.
8 Oh soused kan pahn mwahiei,
Irail me kin kesehla kehs kan nan Nail pahn sengiseng,
Oh irail me kin kihpeseng ar uhk kan pohn pihlo pahn malaulaula.
9 Irail me kin wiahda likou sang plaks*+
Oh irail me kin wiahda likou pwetepwet pohn mehn pahda likou pahn namenekla.
10 Nah sounpahda likou kan pahn nsensuwedla;
Tohndoadoahk alahlda kan koaros pahn pahtoula.
11 Kaun kan en Soan+ pweipwei.
Sounkaweid keieu loalokong kan en Parao kihda kaweid pweipwei.+
Ia duwen amwail kak ndaiong Parao:
“Ngehi kadaudok en me loalokong kan,
Kadaudok en nanmwarkien mahs kan”?
12 Eri, ia noumw ohl loalokong kan?+
Ren ndaiong uhk ma re ese dahme Siohwa kaunen karis en sounpei ketin koasoanedier duwen Isip.
13 Kaun akan en Soan wiadahr mwekid pweipwei;
Kaun akan en eh keinek kan kahrehiong Isip en salongala.
14 Siohwa ketin kahrehiong Isip en pingida;+
Oh re kahrehiong Isip en salongala ni soahng koaros me e wia,
Rasehng me sakaula men me wasawasasseli nan eh mwus.
15 Oh sohte doadoahk ehu me Isip pahn wia,
Mehnda ma ong moahng de pwadaiki, pons de dihpw reirei.*
16 Rahno, Isip pahn duwehla lih akan, rerrer oh masepwehk pwehki Siohwa kaunen karis en sounpei pahn ketin kapahda nin lime kamasepwehk pwehn ketin uhwong.+ 17 Oh sapwen Suda pahn wiahla mehkot kamasepwehk ong Isip. Re pahn kin masak ni ar rong met pwehki koasoandi me Siohwa kaunen karis en sounpei ketin wiadahr ong irail.+
18 Rahno e pahn mie kahnimw limau nan sapwen Isip me lokolokaiahki lokaiahn Kenan+ oh kahukihla loalopwoat ong Siohwa kaunen karis en sounpei. Ehu kahnimw pahn adaneki Kahnimw en Kauwehla.
19 Rahno e pahn mie pei sarawi ehu ong Siohwa nanwerengen sapwen Isip oh uhr pwoat ong Siohwa ni irepen sahpwo. 20 E pahn wia kilel ehu oh wia mehn kadehde ehu ong Siohwa kaunen karis en sounpei nan sapwen Isip; pwe re pahn likweriong Siohwa pwehki sounkalokolok kan, oh e pahn ketin kadaralahng irail sounkomour men, me lapalap men, me pahn kapitirailla. 21 Oh Siohwa pahn ketin kasalehiong mehn Isip kan ihs ih, oh mehn Isip kan pahn esehla Siohwa rahno, oh re pahn wiahda meirong kan oh kisakis kan oh kahukihla inou ehu ong Siohwa oh kapwaiada. 22 Siohwa pahn ketin kaloke Isip,+ kaloke oh kamwahwihala; oh irail pahn pwurodo rehn Siohwa, oh e pahn ketin karonge arail pekipek kan oh kamwahwihirailla.
23 Rahno, e pahn mie ahl pwoat+ me kohieisang Isip kohla Asiria. Eri Asiria pahn kohlongodo nan Isip, oh Isip pahn kohlongodo nan Asiria, oh Isip pahn papah Koht iangahki Asiria. 24 Rahno Israel pahn kesiluhla ni eh iangala Isip oh Asiria,+ kapai ehu ong sampah, 25 pwe Siohwa kaunen karis en sounpei pahn ketin kapaiairailda oh mahsanih: “Kapai en kohwong nei aramas, Isip, oh wiepen nin limei kat, Asiria, oh ei sohso, Israel.”+
20 Nan pahr me Nanmwarki Sarkon en Asiria kadarala Tartan* rehn Asdod,+ e mahweniong Asdod oh kalowehdi.+ 2 Ni ahnsowo Siohwa ketin mahsen sang Aiseia+ nein Eimwos, mahsanih: “Kohla, kihsang likoun nsensuweden* ni lukopomw kan, oh kihsang omw suht kan ni nehmw kan.” Ih eri kapwaiada, e alialuseli kilisou* oh adasi.
3 Siohwa eri ketin mahsanih: “Duwehte ei ladu Aiseia eh kilisou oh adasi alialuseli erein sounpar siluh nin duwen kilel ehu+ oh kokohp ehu ong Isip+ oh Idiopia,+ 4 nanmwarkien Asiria pahn kahre mehn Isip kan+ me selidi oh mehn Idiopia kan me kalipilipala, pwutak kan oh ohl mah kan, kilisou oh adasi oh kahwarail kan sansalda, Isip pahn namenekla.* 5 Oh irail pahn masepwehkada oh pahn namenengkihla Idiopia me re kin koapworopworki oh Isip me re kin pohnmwahsohki.* 6 Aramas akan me kin kousoan ni oaroahr wet pahn nda rahno, ‘Kilang dahme wiawihong atail koapworopwor, me kitail tangalahng pwehn ale sawas oh pitila sang nanmwarkien Asiria! Ia duwen atail pahn pitila met?’”
21 Kadeik ehu ong sapwtehn me rasehng sehd ehu:*+
E kohkohdo rasehng kisinieng en melimel me kin kohdo sang palieir,
Sang sapwtehno, sang sahpw kamasepwehk ehu.+
2 Kaudiahl kamasepwehk ehu me kasansaliongiehier:
Sounwidingo wiewia widing,
Oh sounkamwomwalao kaukauwehla.
Elam, kohdahla! Media,+ kapilpene!
I pahn katokehdi lokolok koaros me e kahrehda.+
3 Ihme kahrehda I mi nan pwunod laud.*+
I rerada oh dengila,
Rasehng lih emen me wie neineitik.
I nohn nsensuwed kahrehda I sohte kak rong;
I nohn pwunod kahrehda I sohte kak kilang.
4 Mohngiongiet kin pweiek; I rerrer ni masak.
Nin soutik mwohn eh pahn rotorotala me I kasikasik kahrehiong ie I en rerrer.
5 Koasoanehdi tehpelo oh kairekehla sehr kan!
Mwenge oh nim!+
Kumwail lapalap akan, kumwail uhda oh keiehdi* mehn sansaro!
6 Pwe iet dahme Siohwa ketin mahsanihong ie:
“Kohla, kihdi emen sounsilasil oh en pakairkihdo dahme e kilang.”
7 Oh e kilangada kurumahn mahwen ehu iangahki oahs wad riemen,
Kurumahn mahwen ehu en dongki kei,
Kurumahn mahwen ehu en kamel kei.
E tehk kanahieng ni keneinei.
8 Ih eri likwerieila duwehte laion men:
“Maing Siohwa, I kin ahnsou koaros kesikesihnen pohn wasahn iroiro* nin rahn,
Oh I mihmihte ei wasahn silasilo pwohng koaros.+
9 Kilang dahme kohkohdo:
Ohl ekei nan kurumahn mahwen ehu, oahs wad riemen!”+
Ih eri lokaiahda oh nda:
“E pwupwudier! Papilon pwupwudier!+
E pwalangpesengier sansal perperda koaros en eh koht kan nanpwel!”+
10 Nei aramas akan me tiatipene,
Wahn* ei wasahn kihsang kilin krein kan,+
I pakairkihongkumwailehr dahme I rongasang Siohwa kaunen karis en sounpei, Koht en Israel.
11 Kadeik ehu ong Duma:*
Mie me likilikwer sang Seir:+
“Sounsilasil, iahd me pwohnget pahn imwisekla?
Sounsilasil, iahd me pwohnget pahn imwisekla?”
12 Sounsilasilo nda:
“Nimenseng kohkohdo, oh pil nipwong.
Ma kumwail men idek, idek.
Kumwail pwurehng kohdo!”
13 Kadeik ehu ong sapwtehno:
14 Kumwail tohn sahpw en Tima kan,+
Kumwail wahdo pihl pwehn tuhwong aramas me men nimpil,
Oh wahdo pilawa ong aramas me tangdoaui.
15 Pwe re tangasangehr kedlahs kan, sang kedlahs me kaunopadahr,
Sang kesik ketieu me pula, oh sang mahwen kehlail.
16 Pwe iet me Siohwa ketin mahsanihong ie: “Mwohn sounpar ehu, duwehte sounpar kan en tohndoadoahk alahlda men,* lingan en Kedar+ koaros pahn imwisekla. 17 Sounkesik ketieu en sounpei en Kedar kan me luhwehdi pahn malaulau, pwe Siohwa, Koht en Israel me ketin mahsanih.”
22 Kadeik ehu duwen Wahun Kaudiahl:*+
Dahme wiawihong uhk, me kumwail koaros kohkihdahla pohn ihmw kan?
2 Ke direkihla pingiping,
Kahnimw katairong ehu, kisin kahnimw mwoarongorong ehu.
Noumw me kamakamala sohte kamakamkihla kedlahs,
De pil mehla nan mahwen.+
3 Omw kaun lemei kan koaros ehupene tangehrdoaui.+
Re wisiksang nin duwen me selidi ni eh sohte anahne kesik ketieu pwoat.
Koaros me dierek wisiksang nin duwen me selidi,+
Mendahki ar tang kohkohla wasa doh.
4 Ihme kahrehda I nda: “Mesomw kan en sohpeisang ie,
Oh I pahn sengiseng kowahlap.+
5 Pwe e wia rahnen pingiping oh lohdi oh pwurur,+
Sang Kaun Wasa Lapalahpie, Siohwa kaunen karis en sounpei,
Nan Wahun Kaudiahl.
Kehlo mweremweredi+
Oh mie ngilen weriwer ehu ong nahnao.
6 Elam+ pwekada kopwoun arep
Kohdo iangahki kuruma kan me ohl akan dake oh oahs kan,*
Oh Kir+ kaunopadahr mehn sansar.
7 Omw wahu* keieu mwahu kan
Pahn direkihla kurumahn mahwen kan,
Oh oahs kan* pahn kesihnen ni ewen kehlo,
8 Oh perehpen Suda pahn kohsang.
“Rahno ke pahn kilenglahng imwen nahk dipwisoun mahwen me mi nan Imwen Wahlo,+ 9 oh kumwail pahn kilang ohla tohto ni kelen Kahnimw en Depit.+ Oh kumwail pahn kihpene pihl en lepin leh pah.+ 10 Kumwail pahn wadekedi ihmw kan nan Serusalem, oh kumwail pahn karangkehdi ihmw kan pwehn kakehlailihala kehlo. 11 Oh kumwail pahn wiahda peisin ehu nanpwungen kehl riauo ong pihl en lepin lehn mahso, ahpw kumwail sohte pahn kilenglahng Sounwiepe Lapalapo, oh kumwail sohte pahn kilang Ih me ketin wiahda met mahso.
12 Rahno, Kaun Wasa Lapalahpie, Siohwa kaunen karis en sounpei,
Pahn ketin kehkehlingkihong kumwail en sengiseng oh mwahiei,+
Moangamwail kan en sihpla oh likawih likoun nsensuwed.*
Kumwail pahn nda: ‘Kitail en mwenge oh nim, pwe lakapw kitail pahn mehla.’”+
14 Siohwa kaunen karis en sounpei eri ketin kasalehiong ie met: “‘Sapwung wet sohte pahn pweipweila* ong kumwail lao kumwail mehla,’+ Kaun Wasa Lapalahpie, Siohwa kaunen karis en sounpei me ketin mahmahsen.”
15 Iet me Kaun Wasa Lapalahpie, Siohwa kaunen karis en sounpei ketin mahsanih: “Kohla rehn sounapwalih menet, Sepna,+ me kin apwalih tehnpaso, oh nda, 16 ‘Dahme omw pwuhng wasaht, oh ihs me kisehmw wasaht, me ke paraparkihda omw wasahn seridi?’ E paraparada eh wasahn seridi nan wasa ile ehu; e paraparada wasahn kommoal ehu* ong pein ih nan paipalap ehu. 17 ‘Kilang! Siohwa pahn ketin kesepwekeiukedi, oh pahn ketin koluhkedi teng. 18 E uhdahn pahn ketin piduhkpene teng oh kesepwekeiuklahng nan sahpw laud ehu duwehte mpwei ehu. Ke pahn mehla wasao, oh weromw kuruma lingan kan pahn mi wasao, me pahn kahrehda kanamenek ehu ong imwen omw soumaso. 19 Oh I pahn kihsang uhk nan dewomw oh keseiukasang nan omw pwukoa.
20 “‘Rahno I pahn eker nei ladu Elaiakim+ nein Ilkaia, 21 oh I pahn kalikawihkihda ih omw likou reirei oh pirehkihdi ih teng omw kateng,+ oh I pahn kihong omw manaman* nan peh. Oh e pahn wia semen tohn Serusalem kan oh aramas en Suda kan. 22 Oh I pahn kihdiong kih en peneinei en Depit+ pohn pwopwe. E pahn ritingada oh sohte me pahn ritingedi; oh e pahn ritingedi oh sohte me pahn ritingada. 23 I pahn katengehdi ih rasehng nihl pwoat ni wasa kehlail ehu, oh e pahn wiahla mwoahl lingan ehu ong peneinei en eh pahpa. 24 Oh irail pahn langahda powe lingan* koaros en peneinei en eh pahpao, kadaudok kan oh seri kan,* dahl tikitik koaros, dahl pwonopwon koaros, iangahki sah laud kan koaros.
25 Siohwa kaunen karis en sounpei ketin mahsanih: “Rahno, nihl me katengtengdi ni wasa kehlailo pahn kohsang,+ oh e pahn lopdi oh pwupwudi, oh dahme e utungada pahn pwupwudi ohla, pwe pein Siohwa me ketin mahsanih.”
23 Kadeik ehu ong Dair:+
Kumwail sohp en Tarsis kan, kumwail mwahiei!+
Pwe wasahn peidio mwomwlahr; sohte me kak pedolong.
Nan sapwen Kittim+ e sansalda ong irail.
2 Kumwail tohn oaroahr kan, kumwail nennenla.
Sounnetinet kan sang Saidon+ me kotehla sehdo audehkinuhkda kepwe.
3 Krein* en Sihor*+ oh Wahnsahpw en Nail, eh pai,
Kotehla pihl tohto,
Oh re wahdo mwohni en wehi kan.+
4 Namenekla, Saidon, kowe wasahn ruk kehlail en sehd,
Pwehki sehdo nda:
“I saikinte ahneki medek en neitik, oh I saikinte neitik,
De pil apwalihada mwahnakapw kan de kakairada peinakapw kan.”*+
6 Kumwail kotehla lel Tarsis!
Kumwail tohn oaroahr kan, kumwail mwahiei!
7 Ih amwail kahnimwen met me kaperen sangete mahso, sangete nan eh mwehi mahso?
Neh kan kin wahla ih sahpw doh kan pwehn kousoan wasao.
8 Ihs me koasoanehdi met ong Dair?
E kin idihada kaun akan,
Nah sounnetinet kan iei soupeidi kei,
Oh nah sounnetinet kan kin waun nan sampah pwon.+
9 Siohwa kaunen karis en sounpei ketin koasoanedier met,
Pwehn ketin kasohwauwihala eh pohnmwahsohki eh lingan koaros,
Pwehn ketin kanamenekihala irail koaros me kin waun nan sampah pwon.+
10 Kotehla sapwomw duwehte Pillap Nail, nein Tarsis serepein.
11 E ketin kapalahr limeo pohn sehdo;
E ketin itikadahr wehi kan.
Siohwa ketin ruweseier kamwomwmwomwlahn en Penisia wasahn ruk kehlail kan.+
12 Oh e ketin mahsanih: “Nein Saidon serepein meipwon me lokolok,
Ke sohla pahn peren.+
Uhda, kotehla lel Kittim.+
Pil wasao ke sohte pahn diar kommoal.”
13 Kilang! Sapwen mehn Kaldia kan.+
Ih aramas ako met—kaidehn Asiria+ mwo—
Irail wiahiong ih* en wiahla wasa ehu ong irail me kin kousoan nan sapwtehn.
Irail kauwadahr arail imwen doulik en mahwen kan;
Irail karangkehdi eh imwen doulik kehlail kan,+
Oh wiahiong ih en mweredi wiahla mohn kahnimw ehu.
14 Kumwail sohp en Tarsis kan, kumwail mwahiei,
Pwe amwail wasahn ruk kehlailo mwomwlahr.+
15 Rahno Dair pahn manokonokla erein sounpar 70,+ duwehte ni mwehin* emen nanmwarki. Ni kaimwiseklahn sounpar 70, Dair pahn duwehla lihen netiki paliwere men nan koul:
16 “Ale arp ehu, pidakih kahnimwo, kowe lihen netiki paliwere me manokonoklahr.
Kesengki noumw arp en ni koahiek;
Koulki koul tohto,
Pwe ren tamataman uhk.”
17 Ni kaimwiseklahn sounpar 70, Siohwa pahn ketin sohpeiong Dair, oh e pahn pwurehng ale pweinen eh doadoahko oh netiki paliwere rehn wehi koaros nin sampah. 18 Ahpw nah mwohni oh pweine pahn wiahla mehkot sarawi ong Siohwa. E sohte pahn nekinekla de ekiekla, pwehki pweineo pahn ong irail me mi mwohn silangin Siohwa, pwe ren tungoal lao re medla oh likawih likou lingan.+
24 Kilang! Siohwa ketin kihkihsang koaros nan sahpwo* oh ketin wiahiong en tehnla.+
E ketin wekidedi*+ oh kamwerepeseng towe kan.+
2 E pahn duwehpene ong koaros:
Aramas akan oh pil samworo,
Ladu oh eh soumas,
Ladu oh eh lih soumas,
Me pwainda oh me netikihla,
Me kamangaiong mehkot oh me peki,
Me kamangaiong mwohni oh me pweipwand.+
4 Sahpwo kin mwahiei;*+ e luhluwetla.
Sahpw pwelmwahwo mengila; e sosohrala.
Aramas lapalap kan en sahpwo malaulaula.
6 Ihme kahrehda keriao kadallehla sahpwo,+
Oh irail me kin kousoan loale dierek me re pwukoahkihdi dihp.
Ihme kahrehda towe kan en sahpwo malaulaulahr,
Oh aramas malaulaukeite me luhwehdi.+
7 Wain kapwo kin mwahiei,* tuhkehn kreipo kin mengila,+
Oh koaros me peren nan mohngiong kin sengloal.+
8 Peren en dampwurin kan sohralahr;
Ngilen aramas mwoarongorong kan imwiseklahr;
Ngihl kaperen en arp sohralahr.+
9 Re kin nim wain oh sohte kin koul,
Oh nemen sakau kin katik ong irail me niminim.
10 Kisin kahnimw lekdeklao ohlahr;+
Ihmw koaros ritidi pwe sohte me kak pedolong.
11 Irail kin weriwer nanial akan pwehki sohla wain.
Peren koaros sohralahr;
Peren en sahpwo solahr.+
12 Kahnimwo ohla;
Ewen kehlo mwutpene wiahla koasoakoasoak en kihd.+
13 Pwe ih met me pahn wiawi nan sahpwo, nanpwungen aramas akan:
Duwehte ni ahnsou me tuhkehn olip pwoat kin itiht,+
Duwehte kreip malaulau me luhwehdi ni ahnsoun dolung eh imwisekla.+
14 Irail pahn ngihl laudida,
Irail pahn wer ni peren.
Sang ni sehdo* irail pahn lohki roson lapalap en Siohwa.+
15 Ihme kahrehda irail pahn kalinganahda Siohwa nan sahpw en marain;*+
Irail pahn kalinganahla mwaren Siohwa, Koht en Israel, ni dekehn nansed kan.+
16 Sang ni imwin sampah kitail kin rong koul kan:
Ahpw I nda: “I luhluwetala, I luhluwetala!
Meid suwediong ie! Sounwidingo wiewia widing;
Ni widing sounwidingo wia widing.”+
17 Tohn sahpwet, masak oh pwoahr kan oh lidip kan awiawihiuk.+
18 Mehmen me tangasang ngihl kamasepwehko pahn pwupwudiong nan pwoahr,
Oh mehmen me kohdahdo sang nan pwoahro pahn lohdi nan lidipo.+
Pwe ewen kehl en pihl kan powe pahn ritida,
Oh poahsoan kan en sahpwo pahn rerada.
20 Sahpwo wasawasasseli duwehte ohl sakau men,
Oh e kin ipihpirek kohwei kohdo duwehte imwios ehu nan kisinieng.
Eh sapeik kan toutoulahr powe,+
Oh e pahn pwupwudi, pwe en dehr pwurehng pwourda.
21 Rahno Siohwa pahn ketin kaloke karis en sounpei en wasa ile kan
Oh nanmwarkien sampah kan.
22 Oh irail pahn pokonpene
Duwehte me selidi kan ar kohpene nan pwoahr ehu,
Oh irail pahn ritidi nan imweteng;
Mwurin rahn tohto e pahn ketin kaloke irail.
23 Maram mat pahn sarohdi,
Oh ketipin lingaling pahn namenekla,+
Pwe Siohwa kaunen karis en sounpei ketin wialahr Nanmwarki+ ni Nahna Saion+ oh nan Serusalem,
Oh e pahn ketin linganla mwohn ohl mah kan en sapwellime aramas akan.*+
25 Maing Siohwa, komwi me ei Koht.
I kawauwih komwi, I kapinga mwaromwi,
Pwe komwi ketin wiadahr soahng kapwuriamwei kan,+
Komwi ketin kupwurehda soahng pwukat sangete mahsie,+
Ni lelepek,+ ni likilik.
2 Pwe komwi ketin wekidohng kahnimw ehu ong ni koasoakoasoak en takai kan,
Kisin kahnimw kehl kehlail ehu ong ni mohn kahnimw ehu.
Imwen doulik en mehn liki kan pahn sohrala;
Kahnimwo sohla pahn pwurehng onohnsapahlda.
3 Ihme kahrehda pwihn en aramas kehlail ehu pahn kalinganahda komwi;
Kahnimw en wehi lemei kan pahn masak komwi.+
4 Pwe komwi ketin wiahla wasahn ruk kehlail ehu ong me tikitik,
Wasahn ruk kehlail ehu ong me semwehmwe nan eh apwal,+
Wasahn ruksang melimel,
Oh mwete ehu sang karakar.+
Ni ahnsou me lingeringer en kaun lemei kan eh rasehng melimel ehu ni dihd ehu,
5 Rasehng karakar nan sahpw madekeng ehu,
Komwi kin ketin katokehdi mwoarong en mehn liki kan.
Koulen kaun lemei kan pahn tokedi,
Rasehng mwetehn pelien depwek ehu eh kin pwaindi karakar.
6 Ni nahna wet+ Siohwa kaunen karis en sounpei pahn ketin wiahda ong aramas koaros
Kamadipw ehu me diren mwenge,+
Kamadipw ehu en wain mwahu,
Kamadipw en mwenge me keieu mwahu me diren sali mwahu,*
Kamadipw en wain mwahu me sihpda.
7 Ni nahna wet e pahn ketikihsang* pweipwei me kin pwaindi aramas akan koaros
Oh koaduhpwel me kin peipeida pohn wehi kan koaros.
8 E pahn ketin kadallehla* mehla kohkohlahte,+
Oh Kaun Wasa Lapalahpie Siohwa pahn ketin limwihasang pilen mesen aramas koaros.+
E pahn ketikihsang kanamenek en sapwellime aramas akan nan sampah pwon,
Pein Siohwa me ketin mahsanih met.
9 Rahno irail pahn nda:
“Kilang! Ih atail Koht met!+
Iei ih me Siohwa!
Kitail koapworopworki ih.
Eri kitail en nsenamwahu oh pereperen pwehki komour sang ih.”+
10 Pwe limen Siohwa pahn ketidi pohn nahna wet,+
Oh Mohap pahn tiatipeseng nan eh wasa+
Rasehng reh meng me tiatipeseng nan koasoakoasoak en koiasi ehu.
11 Oh e pahn ketin kapahla nin lime kan oh poakih Mohap
Rasehng sounpap men eh siped peh kan pwehn pap,
E pahn ketin katikitikihala eh aklapalap+
Sang ni mwekid koahiek kan en nin lime kan.
12 Oh e pahn ketin karangkehdi,
Kahnimw kehl kehlailo, iangahki omw* kehl ile kan me kin pereiuk;
E pahn ketin kesepwekehdiong nanpwel, nan pwelpar.
26 Rahno koul wet pahn koul+ nan sapwen Suda:+
“Mie atail kahnimw kehlail ehu.+
Sapwellime komour kin duwehte dihd kan oh koasoakoasoak kan en kahnimwo.+
2 Kumwail ritingada ewen kehl kan+ pwe wehi pwungo en pedolong,
Wehi ehu me kin kolokol wiewia lelepek.
3 Komw pahn ketin sinsile irail me kin likih komwi ni unsek;
Komw pahn ketikihong irail popohl me poatopoat,+
Pwehki komwi me re kin likih.+
5 Pwe e ketin katikitikihala irail me kin kousoan wasa ile, kahnimw ileo.
E kin ketin karangkehdi,
E ketin karangkehdiong nin sampah;
E ketin kesepwekehdiong nan pwelpar.
6 Patehn neh pahn tiakpene,
Patehn nehn irail me lokolok, kahk en me tikitik kan.”
7 Ahl en me pwung men iei me pwung.*
Pwehki komwi me ketin pwung,
Komw pahn ketin kamedendelihala ahl en me pwung.
8 Maing Siohwa, ni at kin idawehn elen omw kopwung kan,
At koapworopwor kin mi rehmwi.
Se kin kesempwalki mwaromwi oh se men aramas en tamataman met.*
9 Nipwong I kin anahne komwi nan ei mohngiong unsek,
Ei, loalei* kin raparapahkin komwi;+
Pwe ni ahnsou me kin mie kopwung kan sang rehmwi ong sampah,
Tohn sahpwo kin esehla duwen pwung.+
11 Maing Siohwa, komw ketin kapalahr limomwi, ahpw re sohte kilang.+
Irail pahn kilang omwi limpoak laud* ong sapwellimomwi aramas akan oh namenekla.
Ei, kisiniei ong sapwellimomwi imwintihti kan pahn isikirailla.
12 Maing Siohwa, komw pahn ketikihong kiht popohl,+
Pwehki mehkoaros me se wiahda,
Komwi me ketin kapwaiada ong kiht.
13 Maing Siohwa at Koht, soumas teikan likin komwi kaunkitadahr,+
Ahpw mwaromwihte me se kin kapinga.+
14 Irail melahr; irail sohte pahn mour.
Sohte ar kehl ni ar mehla, irail sohte pahn pwourda.+
Pwe komwi ketin kaloke irail
Pwehn ketin kamwomwirailla oh kasohrehla koasoiparail koaros.
15 Maing Siohwa, komwi ketin kalaudelahr wehio,
Komwi ketin kalaudelahr wehio;
Komwi ketin kalinganalahr pein komwi.+
Komwi ketin katehlapalahr douluhl irepen sahpwo pwon.+
16 Maing Siohwa, erein ar apwal re sohpeiong komwi;
Irail wia ar kapakap ni mwenginingin ni omw ketin panawih irail.+
17 Duwehte lih liseian men me pahn kereniongehr neitik
Eh kin medemedek en neitik oh sengisengki medek,
Ih pil duwen kiht pwehki komwi, Maing Siohwa.
18 Se liseianda, se lelohng medek en neitik,
Ahpw e mwomwen me se naitikihedi kisinieng.
Se sohte wahdo komour ong sahpwo,
Oh sohte me ipwidi pwehn sapweniki sahpwo.
19 “Noumw me mehla kan pahn mour.
Paliwar mehla en nei aramas akan* pahn pwourda.+
Kumwail me kin kousoan nan pwelpar,+
Kumwail pirida oh wer ni peren!
Pwe omw pwoaik duwehte pwoaik en nimenseng,*
Oh sampah pahn mweidohng me melahr akan me sohte ar kehl ren mourda.*
20 Nei aramas akan, kumwail kohla, pedolong nan amwail perehn masloale kan,
Oh ritingedi amwail wenihmw kan mwurimwail.+
21 Pwe kilang! Siohwa ketiket kohdo sang sapwellime wasahn kousoano
Pwehn ketin kapwukoahki tohn sahpwo ar sapwung,
Oh sahpwo pahn kasalehda eh kakerehdi nta
Oh sohla pahn ekieki me e kemehla kan.”
27 Rahno, Siohwa pahn ketin doadoahngki sapwellime kedlahs keng oh lapala oh kehlail,+
Pwehn ketin kaloke Lepaiadan,* serpent pitipito.
E pahn ketin kaloke Lepaiadan, serpent pinipino,
Oh e pahn ketin kemehla mahn kalaimwun menet me mi nansed.
2 Kumwail kouliong liho* rahno:
“Mwetin kreip en wain pwudopwud!+
3 Ngehi, Siohwa, me sinsile liho.+
Ahnsou koaros I kin kalamwurih.+
I kin sinsile ih nipwong oh ni rahn,
Pwe sohte me pahn kamedekihala ih.+
Ihs me pahn uhkihong ie tuhke tekatek kan oh dihpw suwed kan nan mahwen?
I pahn tiakirailpene oh isikirailla koaros.
5 Eri, mweidohng ih en koledi teng ei wasahn ruk kehlailo.
Mweidohng en wiahda popohl rehi;
Ei, mweidohng en wiahda popohl rehi.”
6 Ni rahn akan me pahn kohdo Seikop pahn miehla kalewe,
Israel pahn masalpeseng oh wosada,+
Oh irail pahn audehkihda sahpwo wah.+
7 Ia duwe, e pahn anahne kamakamki kamakam me aramaso kin kemehki ih?
De e pahn anahne kamakamala duwehte me e kemehla kan?
8 Sang ni wer kamasepwehk komw pahn ketin uhwong ih ni omw kadarala.
E pahn ketin kausala ih sang ni sapwellime ahng kehlail ni rahnen kisinieng en palimese.+
9 Eri, ni ahl wet sapwung en Seikop pahn pweipweila,*+
Oh ih met me pahn wiawi ni ahnsou me dipeo kohsang:
E pahn ketin wiahiong takai koaros en pei sarawio
Duwehte takai pweht me kamwutmwutpenehr,
Oh sohte tuhke sarawi* de dewen warpwohmwahu pahn luhwehdi.+
10 Pwe kahnimw kehl kehlailo pahn tehnla;
Mohs kan pahn lekdekla oh manokonokla duwehte sapwtehn ehu.+
Wasao koupwul pahn mwenge oh wendi
Oh pahn kangala eh rah kan.+
11 Ni ahnsou me eh kisin rah kan pahn madada,
Lih akan pahn kohdo oh katipwasang mepwukat,
Oh wiahkihda mepwukat kisiniei.
Pwe aramas pwukat sohte ahneki koahiek en wehwehki ire kan.+
Ihme kahrehda Sounwiaparailo sohte pahn ketin kasalehiong irail kadek kalahngan,
Oh Ih me ketin wiairailda sohte pahn kasalehiong irail kupwuramwahu.+
12 Rahno Siohwa pahn ketin wokihasang wahntuhke kan sang ni Pillap* pwilipwilo kohla ni Wahun Isip,+ oh emenemen kumwail pahn rikirikpene, kumwail aramas en Israel kan.+ 13 Rahno mehn pepeuk* laud ehu pahn pepeuk,+ oh irail me sosohrasang nan sapwen Asiria+ oh irail me mwarahkpeseng nan sapwen Isip+ pahn kohdo oh poaridiong Siohwa ni nahna sarawio nan Serusalem.+
28 Meid suwediong nihn* lingan* en me kin kamamsakau kan en Epraim+
Oh wahnrohs sar en eh lingan kaselel,
Me mi pohn kadoken wahu pwelmwahwo me irail kan me lohdi pahn wain kin mi ie!
2 Kilang! Siohwa ketin sapwellimanki emen me kehlail oh manaman.
Rasehng nansapwe oh keteu aihs takai, melimel kehlail ehu,
Rasehng melimel oh nansapwe en lapake kehlail,
E pahn ketin kesepwekehdihdo met nin sampah.
4 Oh wahnrohs sar en eh lingan kaselel,
Me mi pohn kadoken wahu pwelmwahwo,
Pahn duwehla tepin pik mah mwohn ahnsoun karakar.
Ni ahnsou me emen kilangada met, e pahn kadallehla ni ahnsowohte me e dolungada.
5 Rahno Siohwa kaunen karis en sounpei pahn ketin wiahla nihn lingan oh mwaramwar kaselel ehu ong sapwellime aramas akan me luhwehdi.+ 6 Oh e pahn ketin wiahiong sounkopwung kan* ren kopwung ni pwung pahrek oh e pahn ketin wia utupen kehl ong irail me doandoare ewen kehlo sang uhwong.+
7 Samworo oh soukohp kan pil kin salongala pwehki wain;
Nimarail sakau kan kahrehiong irail en wasasseli.
Re kin salongala pwehki sakau;
Waino kin kapingirailda,
Oh irail kin wasasseli sang arail sakau;
Arail kaudiahl kin kahrehiong irail en salongala,
Oh sapwungala ni ar wia pilipil.+
8 Pwe arail tehpel kan direkihla mwus kasaut kan
—Sohte wasa ehu me sohte mie mwus.
9 Rehn ihs me emen pahn kihong loalokong,
Oh rehn ihs me emen pahn kawehwehda rohng?
Rehn irail me ahpwtehn mweisang milik,
Rehn irail akan me ahpwtehn mweisang dihdi?
10 Pwe met iei “kehkehlik mwurin kehkehlik, kehkehlik mwurin kehkehlik,
Lain mwurin lain, lain mwurin lain,*+
Ekis wasaht, ekis wasao.”
11 Eri sang ni eh ketin doadoahngki irail me ngilpweiek oh lokaiahn liki ehu, e pahn ketin mahseniong aramas pwukat.+ 12 Mie pak me e ketin mahsanihong irail: “Ih wasahn kommoal en met. Mweidohng me pwangada en kommoal; ih wasahn nsenamwahu en met,” ahpw irail kahng rong.+ 13 Eri ong irail mahsen en Siohwa pahn duwe met:
“Kehkehlik mwurin kehkehlik, kehkehlik mwurin kehkehlik,
Lain mwurin lain, lain mwurin lain,*+
Ekis wasaht, ekis wasao,”
Pwe ni ahnsou me irail pahn alu,
Irail pahn dipekelekel oh pwupwula mwuri
Oh ohla oh lidipdi oh lohdi.+
14 Eri kumwail rong mahsen en Siohwa, kumwail me kin suwei kan,
Kumwail kaun akan en aramas pwukat nan Serusalem,
15 Pwe kumwail ohl akan nda:
Ni ahnsou me luwair kehlail pahn kohdo,
E sohte pahn lel kiht,
Pwe se wiahkilahr likamw ehu at wasahn ruk
Oh se karukelahr pein kiht ni likamw.”+
16 Kahrehda iet me Kaun Wasa Lapalahpie Siohwa ketin mahsanih:
“Iet ngehi, I pahn kihdiong nan Saion takain kasongosong ehu nin duwen poahsoan ehu,+
Mehmen me kin kasalehda eh pwoson sohte pahn masepwehkada.+
Keteu aihs takai pahn koahkoahsang wasahn ruk en likamw kan,
Oh pihl akan pahn lapakehda oh wahsang wasahn ruko.
18 Amwail inou lap rehn Mehla pahn sohrala,
Oh dahme kumwail pwungkipene rehn Sousou* sohte pahn pweida.+
Ni ahnsou me luwair kehlail pahn kohdo,
Kumwail pahn mwutpene.
19 Ni uwen eh kin kalapw kohdo,
E pahn kin koahkoahsang kumwail;+
Pwe e pahn kin kohdo nimenseng koaros,
Erein nin rahn oh erein nipwong.
Ihte masepwehk me pahn kahrehiong irail en wehwehki dahme re rongehr.”*
20 Pwe pehto me nohn mwotomwot pwehn wendi powe,
Oh tehi peipeidao me nohn wetikitik pwehn kidikidpene loale.
21 Pwe Siohwa pahn ketida duwehte me e wiadahr ni Nahna Perasim;
E pahn ketin kamwakid pein ih duwehte me e wiahda ni wahu* limwahn Kipeon,+
Pwehn ketin wia sapwellime mwekid—sapwellime mwekid kapwuriamwei—
Oh pwehn ketin kapwaiada sapwellime doadoahk—sapwellime doadoahk me sohte kin kalapw wiawi.+
22 Eri kumwail dehr kepitki,+
Pwe selipamwail kan en dehr tengsang mwoweo,
Pwe I rongasang Kaun Wasa Lapalahpie, Siohwa kaunen karis en sounpei,
23 Kumwail rong mwahu ngilei;
Kumwail rong kanahieng oh rong dahme I nda.
24 Ia duwe, soundeipwel kin deideipwel rahn ehu pwon mwohn eh kin kamwarak werentuhke?
E kin pousehlahte kamwerepeseng oh kamwuterekihada eh pwehl?+
25 Ni eh kin kapatapatihala eh pwehlo,
E sou kin uhd kamwerepeseng kumin toantoal oh padok kumin,
Oh e sou kin padok wihd, millet, oh parli nan arail wasa kan
27 Pwe kumin toantoal sohte kin mwutpene sang ni mehn wurahdek,+
Oh daiahn kuruma sohte kin tangada pohn kumin.
Ahpw, lepin tuhke pwoat me kin poakihasang kumin toantoal,
Oh sokon pwoat me kin poakihasang kumin.
28 Ia duwe, aramas emen kin kamwutepene krein ong pilawa?
Soh, e sohte kin pousehlahte kihkihsang kilin krein;+
Oh ni ahnsou me e kin tangahki daiahn were kurumao pohn met ni eh doadoahngki were oahs kan,
E sohte kin kamwutepene met.+
29 Met pil pwilisang rehn Siohwa kaunen karis en sounpei,
Me sapwellime kaweid* me kaselel
29 “Meid suwediong Ariel,* Ariel, kahnimw me Depit kauwada imwe impwal!+
Pousehlahte ehuehu sounpar;
Koasoandi en kasarawi kan+ en pousehlahte wiawi.
2 Ahpw I pahn wahdo kahpwal pohn Ariel,+
Oh e pahn mie mwahiei oh sengiseng,+
Oh e pahn duwehla wasahn isihs en pei sarawi en Koht ong ie.+
3 I pahn kauwada impwal ni pali koaros pwehn uhwong uhk,
Oh I pahn kapilkinuhkpene tuhke keng
Oh wiahda koasoakoasoak kan pwehn uhwong uhk.+
4 Ke pahn karakarahkala;
Sang nanpwel ke pahn lokaia,
Oh dahme ke nda pahn sohla sansal pwehki pwelpar.
Ngilomw pahn kohsang nanpwel+
Rasehng ngilen sounwunahni men,
Oh omw lokaia kan pahn rasehng ngilen mwenginingin sang nan pwelpar.
5 Pokon en omw imwintihti kan* pahn duwehte pwelpar,+
Pokon en kaun lemei kan pahn duwehte kilin krein me pipihrseli.+
Oh e pahn mwadang wiawi ni soh kasikpe.+
6 Siohwa kaunen karis en sounpei pahn ketin sohpeiong uhk
Sang nansapwe oh rerrer en sahpw oh ngihl laud ehu,
Sang ni kisinieng en melimel oh melimel laud oh mpwulen kisiniei me kin kamwomwala wasa.”+
7 Eri pokon en wehi koaros me mahmahweniong Ariel+
—Irail koaros me mahmahweniong ih,
Imwen doulik en mahwen kan me mahweniong ih,
Oh irail me weuwahdo kahpwal powe—
Pahn duwehla ouraman ehu, kaudiahl ehu nipwong.
8 Ei, e pahn duwehte ni ahnsou me emen me men mwenge ouramanki me e mwengemwenge,
Ahpw e pirida men mwenge,
Oh duwehte ni ahnsou me emen me men nimpil ouramanki me e niminim pihl,
Ahpw e pirida pwang oh men nimpil.
Eri met pahn wiawihong pokon en wehi koaros
Me kin mahweniong Nahna Saion.+
Irail sakaula, ahpw kaidehn sang ni wain;
Irail wasawasasseli, ahpw kaidehn sang ni sakau.
10 Pwe Siohwa ketin kahrehiong amwail mohngiong en meirkelikla;+
E ketin kihpene masamwail kan, iei soukohp kan,+
Oh e ketin pwaindi moangamwail kan, iei sounkilang kaudiahl kan.+
11 Kaudiahl koaros duwehla mahsen kan nan pwuhk ehu me katengtengdier ong kumwail.+ Ni ar kihong emen me kak wadawad oh nda: “Menlau wadek met ni ngihl laud,” e pahn nda: “I sohte kak, pwe e katengtengdi.” 12 Oh ni ar kihong pwuhko rehn emen me sohte kak wadawad oh nda: “Menlau, wadek met,” e pahn nda: “I sohte douluhl kak wadawad.”
13 Siohwa ketin mahsanih: “Aramas pwukat kin kaudokiong ie sang ni awarail kan
Oh re waunekin ie sang ni kilin awarail kan,+
Ahpw arail mohngiong inenen dohsang ie;
Oh arail lemmwikin ie kin kohsang kehkehlik en aramas akan me irail sukuhlkier.+
14 Ihme kahrehda, Ih ngehi me pahn pwurehng wia soahng kaselel kan ong aramas pwukat,+
Ni soahng kapwuriamwei kan;
Oh erpit en neirail ohl loalokong kan pahn sohrala,
Oh koahiek en wehwehki ire kan en neirail ohl loalokong kan pahn ekiekla.”+
15 Meid suwediong irail me kin nantihong en karirihala arail koasoandi kan* sang Siohwa.+
Arail mwekid kan kin wiawi nan wasa rotorot ehu,
Ni ar kin nda: “Ihs me kilang kitail?
Ihs me ese duwen kitail?”+
16 Ia uwen amwail kapirekihala soahng kan!*
Ia duwe, kumwail pahn medewe me sounwia dahlo duwehte pwehlo?+
Dahme wiawihdao pahn ndahki duwen me wiahdao:
“E sohte wiaiehda”?+
Oh dahme wiawihdao pahn ndahki duwen me wiahdao:
“Sohte mehkot me e ese”?+
18 Rahno me salengepon kan pahn rong mahsen kan en pwuhko,
Oh sang nan rotorot mesen me maskun kan pahn kilang.+
19 Me opampap pahn peren laud pwehki Siohwa,
Oh me semwehmwe nanpwungen aramas pahn peren pwehki Koht Sarawi en Israel.+
20 Pwe kaun lemei kan pahn sohrala,
Me suwei kan pahn sohrala,
Oh irail koaros me raparapahki en wia mehkot kamedek pahn mwomwla,+
21 Irail me kin kahrehiong meteikan ren pwukoahkihdi dihp sang arail lokaia likamw,
Me kin kihdi lidip kan ong me repenpwung kan* nan ewen kelen kahnimw,+
Oh me kin kihsang pwung pahrek ong me pwung men sang arail akamai likamw kan.+
22 Eri iet me Siohwa, me ketin kasaledekala* Eipraam,+ ketin mahsanihong kadaudok en Seikop kan:
23 Pwe ni eh kin kilang nah seri kan,
Me iei wiepen nin limei kat, reh,+
Irail pahn kasarawihala mwarei;
Ei, irail pahn kasarawihala Koht Sarawi en Seikop,
Oh irail pahn kesihnen ni ar lemmwiki Koht en Israel.+
24 Irail me salongala pahn alehda koahiek en wehwehki ire kan,
Oh irail me kaulim pahn ale kaweid.”
30 Siohwa ketin mahsanih, “Meid suwediong seri keptakai kan,+
Me kin kapwaiada koasoandi kan me kaidehn ahi,+
Me kin wiahda miniminpenehn wehi kan,* ahpw kaidehn sang ni ei ngehn sarawi,*
Pwe ren katohtohwehla diparail kan.
2 Irail kohdihla Isip+ ni ar sohte idek rehi,*+
Pwehn diarada wasahn ruk pahn perehpen Parao*
Oh diarada wasahn ruk pahn mwetehn Isip!
3 Ahpw kumwail pahn namenekla pwehki amwail likih Parao en perei kumwail,
Oh kumwail pahn namenekla pwehki amwail rapahki wasahn ruk pahn mwetehn Isip.+
4 Pwe nah kaun akan kin mi nan Soan,+
Oh wiliepe kan lellahr Anes.
5 Irail koaros pahn namenekla
Sang pwihnen aramas ehu me sohte kak wahdo kamwahu ong irail,
Me sohte kin kihda sawas oh kamwahu,
Ahpw ihte kanamenek oh mwamwahlla.”+
6 Kadeik ehu ong mahn akan en palieir:
Nan sapwen kahpwal oh keper,
Sapwen laion, laion me kin weriwer,
Sapwen sineik pwoisin oh sineik kisiniei me kin pihr,*
Irail kin wa arail kepwe kan pohn tihnsewen dongki kan
Oh arail dipwisou kan pohn tihnsewen kamel kan.
Ahpw mepwukat sohte pahn wia kamwahu ong aramas ako.
7 Pwe en Isip sawas uhdahn sohte katepe.+
Eri I ekerki memenet: “Reap,+ me wie mwomwohd.”
8 “Eri kohla, ntingihedi met nan pelien takai patapat ehu mwohrail,
Oh ntingihedi nan pwuhk ehu,+
Pwe en kadoadoahk ehu rahn ni ahnsou kohkohdo,
Nin duwen mehn kadehde poatopoat ehu.+
10 Irail ndaiong sounkilang kaudiahl kan, ‘Kumwail dehr kilang,’
Oh ong soukohp kan, ‘Kumwail dehr ndaiong kiht kokohp mehlel kan.+
Kumwail ndaiong kiht soahng kapohl kan;* kilang kaudiahl likamw kan.+
11 Kumwail sohpeisang ahlo; wetsang ahlo.
Dehier koasoiaiong kiht duwe Koht Sarawi en Israel.’”+
12 Ihme kahrehda iet me Koht Sarawi en Israel ketin mahsanih:
“Pwehki kumwail soikala mahsen wet+
Oh kumwail likih widing oh likamw
Oh kumwail koapworopworki mepwukat,+
13 Eri ong kumwail sapwung wet pahn duwehte kehl ohla ehu,
Duwehte kehl ileile ehu me sikiei eh pahn pwupwudier.
E pahn mwadang rengkidi ni soh kasikpe.
14 E pahn ohla rasehng nein sounwia dahl men sah laud ehu,
E pahn ohla douluhl oh sohte dipere ehu pahn luhwehdi
Me kak reikihda mwoalus okohk sang nan kisiniei
De idipada pihl sang nan peden pihl.”*
15 Pwe iet me Kaun Wasa Lapalahpie Siohwa, Koht Sarawi en Israel ketin mahsanih:
“Ma kumwail pahn pwurodo rehi oh kommoal, kumwail pahn pitila;
Kumwail pahn kehlail ni amwail kin meleilei oh kasalehda amwail likih ie.”+
Ahpw kumwail kahng.+
16 Oh kumwail nda: “Soh, se pahn tang dake oahs kan!”
Eri kumwail pahn tang.
Kumwail pil nda: “Oh se pahn dake oahs marahra kan!”+
Eri irail me pwakih kumwail pahn marahra.+
17 Meh kid pahn rerrerki mwekid kamasepwehk en emen;+
Sang ni mwekid kamasepwehk en meh limen kumwail pahn tang
Lao dahme luhwehdi rehmwail pahn duwehla kehu pwoat pohn kadoken nahna ehu,
Duwehte tuhkehn kilel ehu pohn dohl ehu.+
18 Ahpw Siohwa kin ketin awiawih ni kanengamah* pwehn ketin kasalehiong kumwail kupwuramwahu,+
Oh e pahn ketida pwehn ketin kasalehiong kumwail kadek kalahngan.+
Pwe Siohwa iei Koht en pwung pahrek.+
Meid peren irail koaros me kin awiawihete* ih.+
19 Ni ahnsou me aramas akan pahn kousoan nan Saion, nan Serusalem,+ ke uhdahn sohte pahn sengiseng.+ E uhdahn pahn ketin kasalehiong uhk kupwuramwahu ni eh ketin karongehda ngilen omw peksawas; e pahn ketin sapeng uhk ni ahnsowohte me e ketin karongehda met.+ 20 Mendahki Siohwa pahn ketikihong kumwail pilawa ni mwomwen kahpwal oh pihl ni mwomwen kalokolok,+ omw Sounpadahk Lapalapo sohla pahn karirihala pein ih, oh ke pahn kilangki mesomw omw Sounpadahk Lapalapo.+ 21 Oh pein salengomw pahn rong ngihl ehu sang mwurimw me mahsanih, “Iet ahlo.+ Keid loale,” ma kumwail pahn kohla palimaun de ma kumwail pahn kohla palimeing.+
22 Oh kumwail pahn kasaminehla kidikid silper en amwail sansal perperda kan oh kidikid kohl en amwail sansal mete kan.+ Ke pahn keseirailla duwehte mwein likou samin ehu* oh ndaiong irail, “Kumwail kohkohla!”*+ 23 Oh e pahn ketikihong keteu ong werentuhke me ke padok nanpwel,+ oh pilawa me pwehl pahn kapwarehda pahn mwahu oh tohto.*+ Rahno noumw pelinmen kan pahn mwenge nan mohs laud kan.+ 24 Oh kou oh dongki kan me kin deipwel pahn kang tahpw me doalki sorrel, me katohrohrkipeseng sapwel oh pwohk. 25 Oh pahn mie piletik kan oh warawar kan pohn nahna ile koaros oh pohn dohl ile koaros,+ ni rahnen kamakam laudo ni ahnsou me imwen doulik ko rengkidi. 26 Oh marain en maram mat pahn duwehla marain en ketipin; oh marain en ketipin pahn pak isuh kehlailla,+ duwehte marain en rahn isuh, ni rahn me Siohwa pahn ketin kidimpene ohlahn sapwellime aramas akan+ oh kamwahwihala ohla laud sang wowoki me e ketin wiao.+
27 Kilang! Mwaren Siohwa kohkohdo sang wasa doh,
Iangahki sapwellime engieng oh ni depwek mosul kan.
Kilin doauese kan me diren engieng,
Oh lowe rasehng kisiniei me kin kamwomwala wasa.+
28 Sapwellime ngehn sarawi* rasehng lapake kehlail ehu me kin lella ni tepinwar,
Pwehn itikada wehi kan nan mehn sihp en kamwomwala ehu;*
Oh aramas akan pahn mie mehn kaweid mahn nan auwerail kan+ me kin kasalongeirailla.
29 Ahpw amwail koul pahn duwehte koul me kumwail kin koulki nipwong
Ni ahnsou me kumwail kaukaunop* ong kasarawi ehu,+
Oh amwail mohngiong pahn peren duwehte emen
Me kin alu wa keseng pepeuk ehu
Kohkohla pohn nahna en Siohwa, Paip en Israel.+
30 Siohwa pahn ketin wiahiong aramas akan ren rong kapitie+ lapalap
Oh pahn ketin kasalehda nin lime+ ni eh kohdi ni engieng,+
Iangahki kisiniei me kin kamwomwala wasa,+
Keteu mosul ehu+ oh melimel oh nansapwe ehu oh keteu aihs takai kan.+
32 Oh wok koaros en sapwellime sokon en kalokolok
Me Siohwa pahn ketikihdiong pohn Asiria
Pahn iangahki dampwurin kan oh arp kan+
Ni eh ketin kamwakamwakid lime pwehn uhwong irail nan mahwen.+
E ketin wiadahr koasoakoasoak en tuwi kan en loal oh tehlap,
Me diren kisiniei oh tuwi.
Angin doauesen Siohwa, rasehng pwilipwil en suwepel ehu,
Pahn ketin isikada met.
31 Meid suwed ong irail me kohdihla Isip pwehn ale sawas,+
Me kin koapworopworki oahs kan,+
Me kin likih kurumahn mahwen kan pwehki ar tohto,
Oh oahs en mahwen kan* pwehki ar kehlail.
Re sohte kin koapworopworki Koht Sarawi en Israel,
Oh re sohte kin rapahki Siohwa.
2 Ahpw e ketin kupwurokong oh e pahn ketikihdo kahpwal,
Oh e pahn ketin kapwaiada sapwellime mahsen kan.
E pahn ketida pwehn uhwong pwihn me kin wia me suwed
Oh irail me kin sewese aramas suwed kan.+
3 Ahpw, mehn Isip kan aramas kei kaidehn Koht;
Neirail oahs kan uduk a kaidehn ngehn.+
Ni Siohwa eh ketin kapahla nin lime,
Irail koaros me kin kihda sawas pahn dipekelekel
Oh irail koaros me alehdi sawas pahn pwupwudi;
Irail koaros pahn sohrala ni ahnsoutehkis.
4 Pwe iet me Siohwa ketin mahsanihong ie:
“Ni laion men, laion pwulopwul kehlail men,* eh kin ngiringir pohn seike,
Mehnda ma pwihnen silepen sihpw ehu pwon likwerpene pwehn pelianda,
Laiono sohte kin masakada ngilarail
De ngilen ar mwoaromwoarong.
Duwehte met, Siohwa kaunen karis en sounpei pahn ketidihdo pwehn mahwen
Pohn Nahna Saion oh pohn eh dohlo.
5 Duwehte menpihr kan me kin pihr kohdi, eri Siohwa kaunen karis en sounpei pahn ketin pere Serusalem.+
E pahn ketin pere ih oh doare ih.
E pahn ketin kapitala ih oh doarehla ih.”
6 “Kumwail aramas en Israel kan, kumwail pwurodo rehn Ih me kumwail uhwongadahr.+ 7 Pwe rahno emenemen pahn kesehla eh koht silper sohte katepe kan oh eh koht kohl sohte kesempwal kan, me pein pehmwail kan wiahda ni dihp.
8 Oh mehn Asiria pahn mehkihla kedlahs, kaidehn sang aramas emen;
Oh kedlahs pwoat pahn kadallehla ih, kaidehn aramas emen.+
E pahn tang pwehki kedlahs,
Oh nah mwahnakapw kan pahn wia doadoahk idihd kan.
9 Eh paipalap pahn sohrala pwehki masepwehk laud,
Oh nah lapalap akan pahn masepwehkada pwehki tuhkehn kilelo,” Siohwa me ketin mahmahsen,
Sapwellime marain* kin mi nan Saion oh sapwellime wasahn kisiniei mwehl kin mi nan Serusalem.
2 Oh emenemen pahn duwehte wasahn ruk ehu sang kisinieng,
Wasahn ruk ehu sang melimel,
Duwehte piletik kan nan sahpw ehu me sohte pihl,+
Duwehte mwetehn paipalap lapala ehu nan sahpw madekeng.
3 Eri pwoaren mesen irail kan me kilikilang sohla pahn kohpene,
Oh salengen irail kan me rongorong pahn rong kanahieng.
4 Mohngiong en me pwurur kan pahn medemedewe loalokong,
Oh me ngilpweiek pahn koasoi ni maledek oh sansal.+
5 Me salamalam men sohla pahn adaneki me sapan,
Oh aramas mwersuwed sohla pahn adaneki me lapalap;
6 Pwe me salamalam men pahn koasoi mwahl,
Oh eh mohngiong pahn koasoanehdi soahng kamedek kan,+
Pwehn kahrehda sohpeisang Koht oh koasoia dahme likamw duwen Siohwa,
Pwehn kahrehiong me duhpek men en sohte mwenge
Oh en irehdi me men nimpil en dehr nim mehkot.
7 Koasoandien aramas mwersuwed kin suwed;+
E kin kangoangehki meteikan tiahk kanamenek
Pwehn kauwehkihla me lokolok kan likamw,+
Ni me semwehmwe kan ar kin koasoia dahme pwung.
8 Ahpw me sapan men kin mie eh koasoandi kan ong wiewia sapan kan,
Oh e kin pousehlahte wiewia soahng sapan kan.
9 “Kumwail lih seukautih kan, kumwail uhda oh rong ngilei!
Kumwail serepein kan+ me sohte kin pwunodki mehkot, kumwail rong kanahieng dahme I nda!
10 Ni ahnsou kis mwurin sounpar ehu, kumwail me sohte kin pwunodki mehkot pahn rerrer,
Pwehki sohte wahnsahpw pahn rikirikpene ni ahnsoun dolung kreip eh imwisekla.+
11 Kumwail lih seukautih kan, kumwail rerrer!
Kumwail me sohte kin pwunodki mehkot, kumwail rerrer!
12 Kumwail pikir mwaremwaramwail kan ni amwail sengiseng.
Pwehki dahme wiawihong mwaht me diren wah kan oh mwetin kreip kan.
13 Pwe en nei aramas akan pwehl pahn direkihla dihpw tekatek kan;
Re pahn pwaindi ihmw en peren koaros,
Ei, kahnimw en peren.+
14 Pwe imwen doulik kehlailo lekdeklahr;
Kahnimw katairongo manokonoklahr.+
Opel+ oh wasahn iroiro* wiahlahr wasa tehn ehu kohkohlahte,
Mehkot kaperen ong dongki lawalo kan,
Oh mohs ehu ong pelinmen kan,+
15 Lao ngehn sarawi* mwerediong pohtail sang powe,+
Oh sapwtehno wiahla mwaht ehu,
Oh mwahto duwehla nanwel ehu.+
16 Eri pwung pahrek pahn mi nan sapwtehno,
Oh pwung pahn mi nan mwahto.+
17 Imwilahn pwung mehlel iei popohl,+
Oh wahn pwung mehlel iei meleilei oh sohte perki mehkot kohkohlahte.+
18 Nei aramas akan pahn mi nan wasahn kousoan meleilei ehu,
Nan wasahn kousoan sohte keper kan oh wasahn kommoal meleilei kan.+
19 Ahpw keteu aihs takai pahn kapatapatihala nanwelo,
Oh kahnimwo pahn patapatala douluhl.
33 Meid suwediong uhk, kowe sounkamwomwala me saikinte kamwomwmwomwla;+
Kowe sounpangala me saikinte pengpengla!
Ni ahnsou me ke nek kamwomwala, ke pahn kamwomwmwomwla.+
Ni ahnsou me ke nek pangala, ke pahn pengpengla.
2 Maing Siohwa, komw ketin kasalehiong kiht kupwuramwahu.+
At koapworopwor kin mihmi rehmwi.
3 Ni ngilen mwoarong aramas akan pahn tang.
Ni omw ketida, wehi kan pahn mwarahkpeseng.+
4 Duwehte loukust mehwo kan ar kin kohpene, ih duwen amwail dipwisou lohdi kan ar pahn kohpene;
Aramas akan pahn tangpene powe duwehte mwuten loukust kan.
5 Siohwa pahn ketin lapalapala,
Pwe e kin ketiket wasa ileile.
E pahn ketin audehkihda Saion pwung pahrek oh pwung.
6 Ih me kin ketin katengehdi omw ahnsou kan;
Me kin ketikihda komour laud,+ erpit, loalokong oh lemmwin Siohwa+
—Ih met me eh dipwisou kesempwal.
7 Kilang! Neirail ohl kommwad kan wie weriwer nanial;
Meninkeder en popohl kan wie sengiseng kowahlap.
8 Ahl akan tehnla;
Sohte me wie seiseiloak nan ahl akan.
9 Sahpwo kin mwahiei* oh tehnla.
Lepanon nameneklahr;+ e ohlahr.
Saron duwelahr sapwtehn,
Oh Pasan oh Karmel kin itikasang tehra kan.+
10 Siohwa ketin mahsanih: “Met I pahn uhda,
Met I pahn wiahiong ie I en lapalapala;+
Met I pahn kalinganahla pein ngehi.
11 Kumwail pahn liseiankihda dihpw madekeng oh naitikihada diperen dihpw kan.
Amwail elen madamadau* pahn kamwomwkumwailla duwehte kisiniei ehu.+
12 Oh aramas akan pahn duwehla takai pweht me isihsda.
Duwehte dihpw tekatek kan me lopdier, re pahn isihsla.+
13 Kumwail me doh, kumwail rong dahme I pahn wia!
Oh kumwail me keren, kumwail pohnese ei roson!
14 Me dipan akan nan Saion masepwehkadahr;+
Irail akan me sohpeisang Koht rerrer oh nda:
‘Ihs rehtail me kak kousoan wasa me mie kisiniei me kin kamwomwala wasa?+
Ihs rehtail me kak kousoan karanih kisiniei me sohte kak kunla?’
15 Me kin pousehlahte kekeid ni pwung,+
Me kin koasoia dahme pwung,+
Me kin soikala ale kamwahupe ni likamw oh widing,
Me peh kan kin soikala ale kisakis ni ahl sapwung oh sohte koledi,+
Me kin pwaindi salenge ni koasoiepen kakerehdi nta,
Oh me kin meirpene pwehn dehr kilang dahme suwed
16 —E pahn kousoan nan wasa ileile kan;
Eh wasahn ruk* pahn mi nan wasahn ruk kehlail takain kan.
E pahn mie kene pilawa,
Oh nime pihl sohte pahn nekla.”+
17 Ke pahn kilang nanmwarki men nan eh lingan;
Ke pahn kilang sahpw ehu me doh.
18 Nan omw mohngiong ke pahn tamanda* masako:
“Ia sekterio?
Ia aramas me tenekih kisakiso?+
Ia aramas me wadekedi imwen doulik ko?”
19 Ke sohla pahn kilang aramas pohnmwahso,
Pwihnen aramas ehu me arail lokaia sohte sansal* en wehwehki,
Irail me ngilpweiek, me ke sohte kak wehwehki.+
20 Kilang Saion, kahnimw en atail kasarawi kan!+
Mesomw kan pahn kilang Serusalem nin duwen wasahn kousoan meleilei ehu,
Impwal ehu me sohte pahn mwekid.+
Eh metehn kateng kan sohte mwahn pahn weweikdahsang,
Oh pil eh sahl kan sohte pahn mweipeseng.
21 Ahpw wasao Me Lapalapo, Siohwa,
Pahn ketin wia sahpw en pillap kan, dahu tehlap kan ong kitail,
Wasa me sohte sohp en mahwen kan pahn kohla ie
Oh sohte sohp laud kan pahn daulih.
22 Pwe Siohwa iei atail Sounkopwung,+
Siohwa iei atail Sounwiahda Kosonned,+
Siohwa iei atail Nanmwarki;+
Iei Ih me pahn ketin kapitkitailla.+
23 Noumwail sahl kan sohte pahn teng;
Re sohte kak kolada kehu de kihpeseng serek kan.
Ni ahnsowo dipwisou lohdi tohto pahn nehnepeseng;
Pil me dangepel pahn ale dipwisou lohdi tohto.+
24 Oh sohte me kin kousoan wasao pahn nda: “I soumwahu.”+
Aramas akan me kousoan nan sahpwo pahn ale mahkpen ar sapwung.+
34 Kumwail wehi kan, kumwail keido pwe kumwail en rong,
Oh kumwail aramas akan, kumwail rong kanahieng.
Sampah oh audepe kan,
Oh sahpw oh wah kan koaros en rong.
2 Pwe Siohwa ketin engiengdahr pahn wehi koaros,+
Oh e ketin engiengdahr pahn neirail karis en sounpei kan koaros.+
E pahn ketin kamwomwirailla;
E pahn ketin kihla ren kamakamala.+
3 Neirail me kamakamala kan pahn lekdekla,
Oh pwohsuwed en paliwararail mehla kan pahn kohda;+
Nahna kan pahn peikipeseng arail nta.+
4 Karis en nanleng koaros pahn matala,
Oh nanleng pahn limilimpene duwehte doaropwe limilimpene ehu.
Neirail karis koaros pahn mengpene,
Duwehte tehntuhke meng ehu me pwupwusang ni tuhkehn kreip
Oh pik madekeng ehu sang ni tuhke pik.
5 “Pwe nei kedlahs pahn wisekesekla nanleng.+
E pahn kohdiong pohn Edom ni kadeik,+
Pohn aramas akan me I koasoanehdi en kamwomwala.
6 Siohwa sapwellimanki kedlahs pwoat; e pahn direkihla nta.
Pwe Siohwa sapwellimanki meirong ehu nan Posra,
Kamakamala laud ehu nan sapwen Edom.+
7 Kouwol lawalo kan pahn iang irail pwupwudi,
Koupwul wol kan iangahki me kehlail kan.
Sapwarailo pahn wisekesengkihla nta,
Oh arail pwehl pahn direkihla wih.”
9 Eh* piletik kan pahn wekiong ni tahr,
Oh eh pwelpar ni suwepel,
Oh sapwe pahn duwehla tahr me lullul.
10 Nipwong de ni rahn e sohte pahn kunla;
Ediniei pahn kin kohkohda kohkohlahte.
Sang ehu dih lel ehu dih e pahn tehnlahte;
Sohte me pahn keidla wasao kohkohlahte.+
11 Pelikan oh pworkiupain* pahn sapwenikihla ih,
Likoht saleng reirei kan oh reipen* kan pahn kousoan reh.
E pahn ketin kapahla sahl en sosohng soh audepe
Oh selin sosohng* en tehnla powe.
12 Sohte emen nah lapalap akan pahn wia nanmwarki,
Oh nah kaun akan koaros pahn sohla mie.
13 Dihpw tekatek kan pahn keirda nan eh imwen doulik kehlail kan,
Dihpw tekatek kan oh dihpw suwed kan pahn keirda nan eh ihmw laud kehl kehlail kan.
E pahn wiahla pwoahr en kidien wel kan,+
Wasa kelpene ehu ong ostris kan.
14 Mahn en nan sapwtehn kan pahn tuhwong mahn akan me kin wer,
Oh kuht en wel* pahn kin eker ienge.
Ei, menpihr en nipwong* pahn kousoanla wasao oh diar wasahn kommoal.
15 Wasao sineik pitipit pahn wiahda eh pahs oh kutohrdi,
Oh e pahn kasawa kutohr ko oh kihirailpene pahn mweteh.
Ei, kaid kan pahn kohpene wasao, emenemen iangahki eh werek.
16 Kumwail rapahki nan pwuhken Siohwa oh wadek ni ngihl laud:
Sohte emen irail pahn salongala;
Sohte emen irail pahn sohte eh werek,
Pwe doauesen Siohwa me ketin ruwese met,
Oh sapwellime ngehn sarawi* me ketikihirailpene.
17 Iei Ih me ketin wia usuhs ong irail,
Oh pein lime me sohngedier wasa me kileldiong irail.*
Irail pahn sapwenikihla met kohkohlahte;
Irail pahn kousoan loale erein dih kan koaros.
35 Sapwtehno oh sahpw madekengo pahn perenda,+
Oh sapwtehno pahn peren oh masalpeseng duwehte rohs sapron.*+
2 E uhdahn pahn masalpeseng;+
E pahn peren oh werki peren.
Aramas akan pahn kilang lingan en Siohwa, lingan en atail Koht.
3 Kumwail kakehlakahda peh kan me luwetalahr,
Oh kumwail katengehdi pwukie kan me wie rerrer.+
4 Kumwail ndaiong irail me pwunod nan ar mohngiong:
“Kumwail en kehlail. Kumwail dehr masak.
Kilang! Pein amwail Koht pahn ketido pwehn ketin ikih,
Koht pahn ketido pwehn ketin dupuk.+
E pahn ketido oh kapitkumwailla.”+
Pwe pihl kan pahn kuspekda nan sapwtehn,
Oh piletik kan nan sapwtehn.
7 Pwehl madekeng karakar pahn wiahla lepin lehn ahlek ehu,
Oh sahpw madekeng pahn wiahla utuhnpihl kan.+
Nan pwoahr kan wasa me kidien wel kan kin kommoal ie,+
E pahn mie dihpw oh ahlek oh papairus.
8 Ahl pwoat pahn mi wasao,+
Ei, ahl pwoat me adaneki Ahl en Sarawi.
Me samin men sohte pahn keid loale.+
Met kileldier ong me alialu pohn ahlo;
Sohte me pweipwei men pahn keid loale.
9 Sohte laion pahn mi wasao,
Oh sohte mahn lawalo keper kan pahn kohdo wasao.
10 Irail me Siohwa ketin kasaledekala* pahn pwurodo+ oh kohdo Saion ni weriwer en peren.+
Peren me sohte imwi pahn kapwata moangarail kan.+
Re pahn ahneki peren oh nsenamwahu,
Oh pahtou oh sengloal pahn tang.+
36 Ni kaeisek pahieun sounpar en Nanmwarki Esekaia, Senakerip nanmwarkien Asiria+ ahpw kohdahdo mahweniong kahnimw kehl kehlail koaros en Suda oh kaloweiraildi.+ 2 Nanmwarkien Asiria eri kadarala rehn Nanmwarki Esekaia nan Serusalem, Rapsake*+ iangahki lapalahn karis en sounpei ehu sang Lakis.+ Irail eri uhdi limwahn warawar en lepin leh powe,+ me mi ni ahl en wasahn doadoahk en sounlopwolopw kan.+ 3 Elaiakim+ nein Ilkaia, me kin apwalih tohn tehnpaso, Sepna+ sekterio, oh Soha nein Asap me wia sounnting ahpw kohieila reh.
4 Rapsake eri ndaiong irail: “Menlau, ndaiong Esekaia, ‘Iet me nanmwarki lapalapo, nanmwarkien Asiria, mahsanih: “Ia poahsoanpen omw koapworopwor?+ 5 Ke kin ndinda, ‘Mie ei koasoandi ehu oh kehl en mahwen,’ ahpw mepwukat koasoi mwahl kei. Ihs me ke kin likih, me ke lemehkihda ken uhwong ie?+ 6 Kilang! Ke kin likih sawasepen ahlek wet me mwutpenehr, iei Isip, a ma aramas emen pahn idengek powe, e pahn ihrlong nan peh oh doakoahdi. Ih met mwomwen Parao nanmwarkien Isip ong irail koaros me kin likih ih.+ 7 Oh ma ke pahn ndaiong ie, ‘Se kin likih Siohwa at Koht,’ kaidehn ih me ahneki wasa ile kan oh pei sarawi kan me Esekaia kihsangehr,+ ni eh ndaiong Suda oh Serusalem, ‘Kumwail anahne poaridi mwohn pei sarawi wet’?”’+ 8 Eri, menlau, pwungkihda met rehn ei kaun nanmwarkien Asiria:+ I pahn kihong uhk oahs 2,000 ma ke pahn kak rapahkihda uwen tohtohn soundak oahs pwukat. 9 Eri, ia duwen omw pahn kak kapwure emente kepina me keieu tikitik nanpwungen nein ei kaun ladu kan, ni omw kin likih Isip ong kuruma kan oh soundak oahs kan? 10 Eri, ia duwe, I kohdadohng mahweniong sahpwet pwehn kamwomwala ni ei sohte ale mweimwei sang rehn Siohwa? Pein Siohwa me ketin mahsanihong ie, ‘Kohdahla mahweniong sahpwet oh kamwomwala.’”
11 Elaiakim oh Sepna+ oh Soha ahpw ndaiong Rapsake:+ “Menlau, koasoiong omw ladu kat ni lokaiahn Aramaik,*+ pwe se kak wehwehki; komw dehr koasoiong kiht ni lokaiahn Suhs ni aramas kat me mi pohn kehlet ar rongorong.”+ 12 Ahpw Rapsake nda: “Ia duwe, ongete omw kauno oh kowe me ei kaun kadariehdo I en koasoia mahsen pwukat? Met sou pil ong aramas pwukat me mwomwohd pohn kehlo, me pahn iang kumwail kang pein arail pwise oh nim pein arail kent?”
13 Rapsakeo eri kesihnenda oh werki ni ngihl laud ni lokaiahn Suhs,+ nda: “Kumwail rong mahsen en nanmwarki lapalapo, nanmwarkien Asiria.+ 14 Iet me nanmwarkio mahsanih, ‘Kumwail dehr mweidohng Esekaia en pitih kumwail, pwe e sohte kak doareikumwailla.+ 15 Oh kumwail dehr mweidohng Esekaia en kahrehiong kumwail en likih Siohwa+ ni eh pahn nda: “Siohwa uhdahn pahn ketin doareikitailla, oh kahnimw wet sohte pahn kohieng nan pehn nanmwarkien Asiria.” 16 Kumwail dehr rong Esekaia, pwe iet me nanmwarkien Asiria mahsanih: “Kumwail wiahda popohl rehi oh pekimahk,* oh emenemen kumwail pahn tungoale pein eh tuhkehn kreip oh eh tuhkehn pik oh pahn nimpil sang nan pein eh pwoaren nahk pihl, 17 lao I kohdo oh waikumwailla nan sahpw ehu me duwehte pein sapwamwail,+ sahpw en krein oh wain kapw, sahpw en pilawa oh mwetin kreip kan. 18 Kumwail dehr mweidohng Esekaia en pitihkumwaildi ni eh pahn nda, ‘Siohwa pahn ketin doareikitailla.’ Ia duwe, mie koht en wehi kan me doarehla sapwarail kan sang nan pehn nanmwarkien Asiria?+ 19 Ia koht kan en Amad oh Arpad?+ Ia koht kan en Separpaim?+ Ia duwe, irail doarehla Sameria sang nan pehi?+ 20 Ihs nanpwungen koht koaros en sahpw pwukat me doarehla sapwarail sang nan pehi, pwe Siohwa en pil kak doarehla Serusalem sang nan pehi?”’”+
21 Ahpw irail nennenlahte oh sohte nda mehkot pwehn sapengki, pwe kehkehlik en nanmwarkio iei, “Kumwail dehpa sapeng ih.”+ 22 Ahpw Elaiakim nein Ilkaia, me kin apwalih tohn tehnpaso, Sepna+ sekterio, oh Soha nein Asap me wia sounnting eri kohdo rehn Esekaia ni ar likou ko eh teipeseng oh ndaiong ih en Rapsake koasoi ko.
37 Ni ahnsowohte me Nanmwarki Esekaia rongada met, e ahpw tehrpeseng eh likou ko oh likawihada likoun nsensuwed* oh kohlongala nan tehnpesen Siohwa.+ 2 Ih eri kadarala Elaiakim, me kin apwalih tohn tehnpaso, Sepna sekterio, oh ohl mah kan en samworo kan, rehn soukohp Aiseia,+ nein Eimwos, oh irail koaros likawih likoun nsensuwed.* 3 Irail eri ndaiong Aiseia: “Iet me Esekaia mahsanih, ‘Rahn wet iei rahnen apwal, peneu,* oh kanamenek; pwe seri kan onopadahngehr ren ipwidi,* ahpw sohte kehl en neitik.+ 4 Mweinele Siohwa omw Koht pahn ketin karonge en Rapsake koasoi ko, me nanmwarkien Asiria eh kaun kadarodo pwehn kepitki Koht ieias,+ oh e pahn ketin kapwukoahki ih koasoi ko me Siohwa omw Koht ketin karongeier. Eri, kapakapki+ irail me luhwehdi kan me pitila.’”+
5 Nein Nanmwarki Esekaia ladu ko eri kohla rehn Aiseia,+ 6 oh Aiseia ndaiong irail: “Iet me kumwail pahn ndaiong amwail kauno, ‘Iet me Siohwa ketin mahsanih: “Ke dehr masak+ pwehki koasoi kan me ke rongehr, koasoi kan me sounpapah en nanmwarkien Asiriao+ lahlahwehkin ie. 7 Eri I pahn kamwakid eh madamadau, oh e pahn rong pakair ehu oh pwurala nan pein sapwe;+ oh I pahn wiahiong ih en mehkihla kedlahs nan pein sapwe.”’”+
8 Mwurin Rapsake eh rongada me nanmwarkien Asiria kohkohlahsangehr Lakis, e ahpw pwurala reh oh diarada me e mahmahweniong Lipna.+ 9 Nanmwarkio eri rongada koasoi duwen Nanmwarki Tiraka en Idiopia: “E kohieidohr pwehn mahweniong komwi.” Ni eh rongada met, e ahpw pwurehng kadarala meninkeder kan rehn Esekaia,+ nda: 10 “Iet me kumwail pahn ndaiong Nanmwarki Esekaia en Suda, ‘Ke dehr mweidohng omw Koht me ke kin likih en pitihiukedi ni eh pahn mahsanih: “Serusalem sohte pahn kohieng nan pehn nanmwarkien Asiria.”+ 11 Kilang! Ke rongehr dahme nanmwarki kan en Asiria wiahiong sahpw koaros ni ar kamwomwirailla.+ Ia duwe, kowe kelehpw me pahn pitila? 12 Ia duwe, koht en wehi kan me semei mehn mahs ako kauwehla kapitirailla?+ Ia Kosan, Aran,+ Risep oh aramas en Ihden kan me mi nan Telassar? 13 Ia nanmwarkien Amad, nanmwarkien Arpad, oh nanmwarkien kahnimw kan en Separpaim,+ Ena, oh Ippa?’”
14 Esekaia eri ale kisinlikou ko sang nan pehn meninkeder ko oh wadek mepwukat. Esekaia eri kohdahla ni tehnpesen Siohwa oh kihpeseng mepwukat* mwohn silangin Siohwa.+ 15 Oh Esekaia ahpw tepida kapakapohng Siohwa+ oh patohwan: 16 “Maing Siohwa kaunen karis en sounpei,+ Koht en Israel, me ketiket nan mwoale pohnangin* kerup kan, komwi kelehpw me Koht mehlel en wehi koaros en sampah. Komwi me ketin wiahda nanleng oh sampah. 17 Maing Siohwa, komw ketin karonge ni keneinei!+ Maing Siohwa, komw ketin mahsanih ni keneinei!+ Komw ketin karonge koasoi koaros me Senakerip kadarodo pwehn kepitki Koht ieias.+ 18 Maing Siohwa, e mehlel me nanmwarki kan en Asiria kamwomwalahr sahpw koaros,+ oh pil pein sapwarail kan. 19 Oh irail keselahr arail koht kan nan kisiniei,+ pwehki kaidehn irail koht kei ahpw wiepen pehn aramas+ me wiawihdahsang tuhke oh takai. Ihme kahrehda irail kak kamwomwirailla. 20 Ahpw met, Maing Siohwa at Koht, komw ketin kapitkitala sang nan peh, pwe wehi koaros en sampah en ese me komwi kelehpw me Koht, Maing Siohwa.”+
21 Aiseia nein Eimwos eri kadarala rohng wet rehn Esekaia: “Iet me Siohwa, Koht en Israel ketin mahsanih, ‘Pwehki ke kapakapkihong ie duwen Nanmwarki Senakerip en Asiria,+ 22 iet mahsen me Siohwa ketin mahsanihong ih:
“Nein Saion serepein meipwon kin mwamwahlikin uhk oh kepitkin uhk.
Nein Serusalem serepein kin tuwelekiong uhk.
23 Ihs me ke kepitki+ oh lahlahwe?
Ihs me ke lokolokaia laud ong+
Oh kihkihdahng mesomw pohnmwahso kan?
Iei ong Koht Sarawi en Israel!+
24 Ke kepitki Siohwa+ sang noumw ladu kan, oh nda,
‘Sang ni werei kurumahn mahwen tohto kan
I pahn kohdahla wasa ile en nahna kan,+
Wasa me keieu doh kan en Lepanon.
I pahn pelehdihsang eh sidar ile kan, eh tuhke suniper keieu mwahu kan.
I pahn pedolong nan eh wasahn ruk me keieu ile kan, eh nanwel me keieu diren tuhke kan.
25 I pahn weirada pwarer kan oh nim pihl;
I pahn kamadahkihda piletik* en Isip kan patehn nehi kan.’
26 Ia duwe, ke sohte rong? Sang mahsie e koasoansoandier.*
Sang rahn samwalahr ko I kaunopadahr.*+
Met I pahn wahdo.+
Ke pahn wekidohng kahnimw kehl kehlail kan ong ni koasoakoasoak en mohn ihmw kan.+
27 Towe kan pahn sohte sawasparail;
Irail pahn masepwehk oh namenekla.
Irail pahn rasehng dihpw en nansapw oh reh kan,
Rasehng dihpw en pohn ihmw kan me mengkihla kisinieng en palimese.
28 Ahpw I uhdahn ese ni omw kin mwohndi, ni omw kin pedoi, ni omw kin pedolong,+
Oh ni omw kin lingeringerda pahi,+
29 Pwehki omw lingeringer pahi+ oh omw weriwer lelehr ni salengei kat.+
Eri I pahn kihong nei kehs ni tumwomwen oh nei mehn kaweid mahn nanpwungen kilin ewomw kan,+
Oh I pahn kapwureiukalahng ni ahl me ke keid kohdo ie.”
30 “‘Oh met pahn wia kilel ong uhk:* Pahr wet kumwail pahn tungoale dahme pein wosada;* oh ni keriaun sounpar, kumwail pahn tungoale krein me wosada sang met; ahpw ni kesiluhwen sounpar kumwail pahn kamwarak werentuhke oh dolung, oh kumwail pahn padok mwetin kreip kan oh tungoale wahrail kan.+ 31 Aramas en Suda kan me pitila, irail me luhwehdi kan,+ pahn kadarala kalewe pah oh kapwarehda wah powe. 32 Pwe me luhwehdi kan pahn kohieisang nan Serusalem oh me pitila kan sang pohn Nahna Saion.+ Siohwa kaunen karis en sounpei pahn ketin ngoangki wia met.+
33 “‘Kahrehda iet me Siohwa ketin mahsaniheki duwen nanmwarkien Asiria:+
“E sohte pahn kohdo nan kahnimw wet+
De kesingkihla arep pwoat wasao
De uhkihong met mehn sansar pwoat
De wiahda koasoakoasoak ehu limwahn met.”’+
34 ‘Sang ni ahl me e keid kohdo e pahn pwurala;
E sohte pahn kohdo nan kahnimw wet,’ Siohwa me ketin mahmahsen.
36 Oh sapwellimen Siohwa tohnleng men eri kohla oh kemehla ohl 185,000 nan kahnimpwal en mehn Asiria kan. Ni ahnsou me aramas ako sangkenei pirida, irail kilangada paliwar mehla ko koaros.+ 37 Eri Nanmwarki Senakerip en Asiria ahpw mweselda oh pwurala Ninipe+ oh mihmi wasao.+ 38 Oh ni eh wie poarpoardi nan imwen kaudok en eh koht Nisrok, pein nah pwutak ko Adramelek oh Sareser kemehkihla ih kedlahs+ oh mwuri tangalahng sapwen Ararat.+ Oh nah pwutak Esaradon+ wiliandi ih wiahla nanmwarki.
38 Ni rahn ako Esekaia soumwahuda oh pahn kereniongehr mehla.+ Soukohp Aiseia+ nein Eimwos eri kohdo oh ndaiong ih, “Iet me Siohwa ketin mahsanih: ‘Kihong tohnimwomwo koasoandi kan, pwe ke pahn mehla; ke sohte pahn mwahula.’”+ 2 Esekaia eri sohpeiong ni dihdo oh tepida kapakapohng Siohwa: 3 “Maing Siohwa, I patohwan peki rehmwi, komw kupwurkalahngan oh ketin tamataman+ duwen ei kin kekeid mwohn silangomwi ni lelepek oh ni mohngiong unsek,+ oh I kin wia dahme mwahu mwohn silangomwi.” Esekaia eri tepida sengiseng kowahlap.
4 Siohwa eri ketin mahsanihong Aiseia: 5 “Pwurala oh ndaiong Esekaia,+ ‘Iet me Siohwa, Koht en semomw mehn mahso Depit ketin mahsanih: “I karongeier omw kapakap.+ I kilangehr pilen mesomw kan.+ Met I pahn kapatahiong omw mour* sounpar 15,+ 6 oh I pahn doarehla kowe oh kahnimw wet sang nan pehn nanmwarkien Asiria, oh I pahn pere kahnimw wet.+ 7 Ih kilel en met sang Siohwa pwehn kasalehiong uhk me Siohwa pahn ketin kapwaiada mahsen kan me e ketin mahsanihier:+ 8 Met I pahn wiahiong mwetehn ketipin me kohkohdi pohn en Ahas kehndakeo* en pwurala mwuri ni kahk eisek.”’”+ Eri ketipin pwurala mwuri ni kahk eisek pohn kehndake me e kohdihsangehr poweo.
9 Iet nting ehu me Nanmwarki Esekaia en Suda wiahda ni eh soumwahuda oh mwahula sang eh soumwahu.
10 I nda: “Ni ei saikinte mahla
I pahn kohlongala nan ewen kehl kan en Sousou.*
Luhwen ei sounpar kan pahn kohsang ie.”
11 I nda: “I sohte pahn kilang Iah,* Iah nan sapwen me momour kan.+
I sohla pahn kilang aramas
Ni ei kin mihmi rehn tohn wasa me mehkoaros kin sohrala.
12 Ei wasahn kousoan weweiksangehr oh kohsangiehier+
Rasehng impwal en silepen sihpw men.
I pidpenehier ei mour rasehng dahme sounpahda likou men kin wia;
E kin ketin tipwaiepeseng rasehng dereht kan.
Sang ni marain en rahn lel nipwong komw kin ketin usehlahte waiehla ni imwi.+
13 I kin kameleileiehdi lao lel nimenseng.
Rasehng laion men, e kin ketin usehlahte kauwehla tih kat koaros;
Sang ni marain en rahn lel nipwong komw kin ketin usehlahte waiehla ni imwi.+
14 Rasehng kisin menpihr kan me adaneki suwipd* de durahs,* eri I kin usehlahte sisiok;+
I kin usehlahte wiewia kisin ngihl rasehng mwuroi.+
Pwoaren mesei kat luwetala kilikilengdahla powe;+
‘Maing Siohwa, I mi nan apwal laud;
15 Dahme I kak nda?
E ketin mahseniong ie oh ketin mwekid.
I pahn alu ni aktikitik erein ei sounpar kan koaros
Ni ei tamataman nsensuwed laud me I ahneki.
Komw pahn ketin kamwahwihala ei roson oh mweidohng ie I en momour.+
17 Maing! I ahneki apwal laud, a kaidehn popohl;
Ahpw sang omwi kin ketin poakohng ie,
Komwi ketin kapitielahr sang nan pwoahr en kamwomwmwomwla.+
Komwi ketin keselahr dipei kan koaros mwurimw.*+
Irail me kohdihla nan pwoahr sohte kak koapworopworki omwi lelepek.+
19 Me momour, ei me momour kante me kak kapinga komwi,
Duwehte me I kak wia rahnwet.
Pahpa men kak padahkihong nah pwutak kan duwen omwi lelepek.+
20 Maing Siohwa, komw ketin doareiehla,
Oh se pahn kesengki ei koul kan ni keseng sahl kan+
Erein at mour ni tehnpesen Siohwa.’”+
21 Aiseia eri nda: “Wahdo pik madekeng kan me idaidpene oh kihong ni mpwoso, e ahpw pahn mwahula.”+ 22 Esekaia eri idek: “Ia kilelepen ei pahn kohdahla ni tehnpesen Siohwa?”+
39 Ni ahnsowo nanmwarkien Papilon, Merodak-paladan nein Paladan, ahpw kadaralahng Esekaia kisinlikou kan oh kisakis ehu,+ pwe e rongada me e soumwahuda oh mwahula.+ 2 Esekaia eri perenki kasamwo* irail oh kasalehiong irail eh wasahn nahk dipwisou kesempwal kan+—silper, kohl, lehn palsam* oh leh kesempwal teikan, eh imwen nahk dipwisoun mahwen koaros, oh mehkoaros me dierek nan eh wasahn nahk dipwisou kesempwal kan. Sohte mehkot ehu me Esekaia sohte kasalehiong irail nan tehnpese oh nan eh wehi pwon.
3 Mwurin mwo soukohp Aiseia eri kohla rehn Nanmwarki Esekaia oh idek reh: “Dahme ohl pwukat nda, oh ia wasa irail kohsang ie?” Esekaia eri nda: “Irail kohsang sahpw doh ehu, sang Papilon.”+ 4 Aiseia eri idek: “Dahme irail kilang nan tehnpasomwi?” Esekaia eri sapengki: “Irail kilang mehkoaros nan tehnpesei. Sohte mehkot ehu me I sohte kasalehiong irail nan ei wasahn nahk dipwisou kesempwal kan.”
5 Aiseia eri ndaiong Esekaia: “Rong mahsen en Siohwa kaunen karis en sounpei, 6 Siohwa ketin mahsanih:+ ‘Kilang! Rahn akan me pahn kohdo, oh mehkoaros me mi nan tehnpasomwi oh mehkoaros me semomw mehn mahs ako nekidalahr leledo rahnwet pahn wisiklahng Papilon. Sohte mehkot ehu pahn luhwehdi.+ 7 Oh ekei kadaudokomw kan me pahn ipwidi pahn wisiksang oh pahn wiahla lapalap akan nan tehnpesen nanmwarkien Papilon.’”+
8 Esekaia eri ndaiong Aiseia: “Mahsen en Siohwa me komw koasoiahn me mwahu.” Ih eri kapatahiong: “Pwehki e pahn mie popohl oh onepek mwahu* erein ei mour.”*+
40 Amwail Koht ketin mahsanih: “Kumwail kansenamwahwih, kansenamwahwih nei aramas akan.+
2 Kumwail koasoiong mohngiong en* Serusalem,
Oh lohkihong ih me eh ahnsoun doadoahk idihd kan nekier,
Pweinen dipe pweipweilahr.+
Sang ni limen Siohwa e alehdier kalokepe unsek ong dipe kan koaros.”+
3 Ngihl ehu kin liklikwer nan sapwtehn:
“Kumwail kaunopada elen Siohwa!+
Kumwail wiahda ahl inen pwoat+ nan sapwtehno ong atail Koht.+
4 Wahu koaros en audaudla,
Oh nahna koaros oh dohl koaros en karakarahkala.
Wasa sapahrek en pahrekla,
Oh wasa takain en wiahla wasa patapat en wahu ehu.+
5 Lingan en Siohwa pahn sansalda,+
Oh aramas koaros* pahn kohpene kilang met,+
Pwe doauesen Siohwa me ketin mahsanih.”
6 Rong! Mie me ndinda: “Lohkiseli!”
Pil emen idek: “Dahme I pahn lohkiseli?”
“Aramas koaros* rasehng dihpw.
Arail limpoak loalopwoat koaros rasehng masal en wahnrohs en nansapw.+
7 Dihpw kan kin mengila,
Wahnrohs masal kin mengila,+
Mehlelete me aramas akan me dihpw.
8 Dihpw kan kin mengila,
Wahnrohs masal kin mengila,
Ahpw mahsen en atail Koht kin mihmi kohkohlahte.”+
9 Kowe lih me wahwahdo rohng mwahu ong Saion
Kohdahla pohn nahna ile ehu.+
Kowe lih me wahwahdo rohng mwahu ong Serusalem
Kalaudehla ngilomw ni omw kehl.
Kalaudehla ngilomw, ke dehr masak.
Pakairkihong kahnimw en Suda kan: “Iet amwail Koht.”+
Kilang! Sapwellime keting mihmi reh,
Oh pweipwei me e kin ketin pwain mi mwohn silangi.+
11 Duwehte silepen sihpw men e pahn ketin apwalih nah pelin sihpw.+
E pahn ketin kolkihpene sihmpwul kan lime,
Oh e pahn ketin wa irail ni pahnadi.
E pahn ketin kahre ni keneinei irail kan me kin kadihdi wahrail kan.+
Ihs me oarepene pwelpar en sampah nan mehn sosohng ehu+
De teneki nahna kan
Oh dohl kan nan mehn tenek kan?
13 Ihs me sohngedi* sapwellimen Siohwa ngehn sarawi,*
Oh ihs me kak kaweid ih nin duwen sapwellime sounkaweid?+
14 Ihs me e ketin peksawas reh pwe en ketin wehwehkihla,
De ihs me kin padahkihong ih ahl en pwung pahrek,
De padahkihong ih loalokong,
De kasalehiong ih ahl en wehwe mehlel?+
15 Kilang! Wehi kan rasehng dingiding ehu sang nan pekid ehu,
Oh irail rasehng kisin weren pwelpar kan pohn mehn tenek kan.+
Kilang! E kin ketin pwekada deke kan rasehng pwelpar.
16 Pil Lepanon sohte itar en kalkallulih kisiniei ehu,*
Oh mahn lawalo kan wasao sohte itar ong meirong isihs ehu.
17 Wehi kan koaros duwehte mehkot me sohte mie mwohn silangi;+
E kin ketin wiahkin irail sohte mehkot, sohte audepe.+
18 Ihs me kumwail kak kapahrekiong Koht?+
Dahme duwehte ih me kumwail kak kihdiong limwah?+
19 Tohndoadoahk saman kin wiahda dikedik ehu,
Sounsukmete kin kidimkihla met kohl,+
Oh e kin wiahda sein silper kan.
20 E kin pilada tuhke pwoat ong eh kisakis,+
Tuhke pwoat me sohte pahn mwoasoahngotla.
E kin rapahki tohndoadoahk saman men
Pwehn kaunopada sansal perperda ehu me sohte pahn pwupwudi.+
21 Kumwail sehse?
Kumwail saikinte rong?
Kumwail sou rongehr met sangete nin tapio?
Kumwail sohte wehwehki sangete ni ahnsou me poahsoan en sampah wiawihda?+
22 Mie Emen me kin ketiket pohnangin pwonopwon en sampah,+
Oh tohnsampah kan rasehng mensiek kan.
E kin ketin katehlapahla nanleng duwehte likou menipinip kaselel ehu,
Oh e kin ketikihpeseng met duwehte impwal ehu pwehn kousoan loale.+
23 E kin ketin kahrehiong lapalap akan ren sohla ahneki manaman
Oh ketin wiahki sounkopwung* en sampah kan sohte mehkot.
24 Re sohte kin kalapw poad,
Re sohte kin kalapw kamwarak,
Kalewarail kan sohte kin kalapw kohdi nin sampah,
Oh ahng eri ipido pohrail oh re mengidi,
Oh kisinieng kin wairailsang rasehng diperen dihpw kan.+
25 Koht Sarawi ketin mahsanih: “Ihs me kumwail kak karasahiong ie pwe I en pahrekiong?
26 Kumwail saradalahng nanleng oh kilang.
Ihs me ketin kapikada mepwukat?+
Iei Ih me kin ketin kahre irail nin duwen karis en sounpei sang ni wadepen emenemen irail;
E kin ketin malipehkin irail koaros adarail.+
Pwehki lapalap en sapwellime kehl oh sapwellime manaman kapwuriamwei,
Sohte ehu rehrail me kin salongala.+
27 Seikop, dahme kahrehda ke nda, oh Israel, dahme kahrehda ke lohki,
‘Elei kin ekiekla sang rehn Siohwa,
Oh I sohte ale pwung pahrek sang rehn Koht’?+
28 Ke sehse? Ke saikinte rong?
Siohwa, Sounkapikpen soahng koaros nin sampah, iei Koht emen kohkohlahte.+
E sohte mwahn kin ngirala de luwetala.+
Sohte emen kak wehwehki sapwellime erpit.*+
30 Pwutak kan pahn pwangada oh luwetala,
Mwahnakapw kan pahn dipekelekel oh pwupwudi,
31 Ahpw irail me kin koapworopworki Siohwa pahn pwurehng kehlailda.
Irail pahn pipihr ile rasehng ikel kan.+
Irail pahn tang oh sohte luwetala;
Irail pahn alu oh sohte pwangada.”+
41 “Kumwail deke kan, nennenla oh rong ie;*
Wehi kan en pwurehng kehlailda.
Irail en keido; oh irail en koasoi.+
Kitail en kohpene ong kadeik.
2 Ihs me kamwakid aramas men sang ni dakadahn ketipin,*+
Me ekerodo ih lel ni aluweluwe kan* ni pwung,
Pwehn kihong ih wehi kan
Oh wiahiong ih en kalowehdi nanmwarki kan?+
Ihs me kin katikitikihirailla pwe ren wia pwelpar kei mwohn nah kedlahs,
Rasehng diperen dihpw kan nan kisinieng mwohn nah kesik ketieu?
3 E kin pwakih irail, wonoweite ni onepek mwahu
Pohn ahl akan me neh kan saikinte keid ie.
4 Ihs me mwekidehr oh wiahier met?
Ihs me kin ekerpene dih kan sangete nin tapio?
5 Deke kan kilangehr met oh masepwehkadahr.
Imwin sampah eri tepida rerrer.
Irail kin kerendo oh kohdo mwowe.
6 Emenemen kin sewese ienge
Oh ndaiong rie: “Kehlail.”
7 Eri tohndoadoahk samano kin kakehlakahda sounsukmeteo;+
Me kin kapatapatakihla mete ama
Kin kakehlakahda emen me kin sukmete pohn mehn sukmete.
E kin ndahki duwen meteo eh patpene: “Met mwahu.”
Mwuri, emen kin katengehkihdi nihl kan sansalo pwe en dehr pwupwusang.
8 “Ahpw kowe, Israel, ei ladu,+
Kowe, Seikop, me I piladahr,+
Kadaudok en kompoakepahi Eipraam,+
9 Kowe me I wahsang ni imwin sampah,+
Oh kowe me I ekerodo sang ni wasa keieu doh kan.
10 Ke dehr masak, pwe I pahn ieiang uhk.+
Ke dehr pwunod, pwe ngehi me omw Koht.+
I pahn kakehleiukada, ei, I pahn seweseiuk,+
I uhdahn pahn kolkinuhkedi limei palimaun en pwung.’
11 Kilang! Irail koaros me kin lingeringer pahmw pahn namenekla oh sarohdi.+
Irail me kin peiong uhk pahn kasohrala oh sohla mie.+
12 Ke pahn rapahki aramas akan me kin peiong uhk, ahpw ke sohte pahn diar irail;
Aramas akan me kin mahweniong uhk pahn duwehla mehkot me sohte mie, me sohte douluhl mehkot.+
13 Pwe ngehi, Siohwa omw Koht, me kin kolokol pehmw palimaun,
Oh kin mahmahsanihong uhk, ‘Ke dehr masak. I pahn seweseiuk.’+
14 Ke dehr masak, kowe mwahs* Seikop,+
Kumwail aramas en Israel kan, I pahn seweseiuk,” Siohwa, me ketin pwainuhkada sapahl,+ Koht Sarawi en Israel, me ketin mahmahsen.
15 “Kilang! I wiahiong uhk mehn wurahdek ehu,+
Mehn wurahdek kapw ehu me mie ngih riapwoat.
Ke pahn tiakedi nahna kan oh kamwuteirailpene
Oh wiahiong dohl kan en duwehla kilin krein.
16 Ke pahn keseirailda nan wehwe,
Oh kisinieng pahn wairailsang;
Oh melimel ehu pahn kamwarakirailpeseng.
17 “Me lokolok kan oh me semwehmwe kan raparapahki pihl, ahpw sohte.
Lowarail kan madekengkihda ar men nimpil.+
Ngehi, Siohwa, pahn sapeng irail.+
Ngehi, Koht en Israel, sohte pahn keseirailla.+
18 I pahn kapwilewei pillap kan pohn kadoken dohl kan+
Oh utuhnpihl kan nan wasa patapat en wahu kan.+
I pahn kawekiong sapwtehn ong ni lepin lehn ahlek
Oh sahpw me sohte pihl ong ni utuhnpihl.+
19 Nan sapwtehn I pahn padok tuhke sidar,
Tuhke akesia oh mirtel oh pain.+
Nan sapwtehn I pahn padok tuhke suniper,
Iangahki tuhke ahs oh saipres,+
20 Pwe aramas koaros en kilang oh ese
Oh tehk kanahieng oh wehwehki
Me limen Siohwa me ketin wiahda met,
Oh Koht Sarawi en Israel ketin kapikada met.”+
21 Siohwa ketin mahsanih, “Kumwail wahdo amwail repenpwung.”
Nanmwarkien Seikop ketin mahsanih, “Kumwail kasalehda amwail mehn kadehde kan.”
22 “Kumwail kasalehda mehn kadehde oh ndaiong kiht soahng kan me pahn wiawi.
De kumwail lohkihong kiht soahng kan me kohkohdo.+
23 Kumwail ndaiong kiht dahme pahn wiawi ni ahnsou kohkohdo,
Pwe sen ese me kumwail koht kei.+
Kumwail wia mehkot, mwahu de suwed,
Pwe sen pwuriamweikihla ni at kilang met.+
24 Kilang! Kumwail mehkot sohte katepe,
Oh dahme kumwail wiahda sohte mehkot.+
Mehmen me kin pilkumwailda kin kasaut.+
25 I pahn kamwakid emen sang ni paliepeng, oh e pahn kohdo,+
E pahn tiakedi kaun akan* duwehte ma irail pwehl kei,+
Rasehng sounwia dahl men eh kin tiakpene pwehl mwuterek.
26 Ihs me koasoia duwen met sangete nin tapio, pwe sen kak ese,
De sangete ahnsou samwalahr ako, pwe sen kak nda, ‘Ih me pwung’?+
Mehlel, sohte me pakairki met!
Sohte me lohki met!
Sohte me rongasang kumwail mehkot!”+
27 Ngehi me tepin ndaiong Saion: “Kilang dahme pahn wiawi!”+
Oh I pahn kadaralahng Serusalem sounwa rohng mwahu men.+
28 Ahpw I kilikilenglahte, oh sohte emen;
Sohte emen nanpwungarail me kihda kaweid.
Oh I idihdek rehrail pwe ren sapeng.
29 Kilang! Irail koaros sohte katepe.*
Arail doadoahk kan sohte mehkot.
Arail sansal mete kan sohte audepe duwehte kisinieng.+
42 Kilang! Ei ladu+ me I kin utung!
Nei me pilipildahro,+ me I pwungki!+
2 E sohte pahn weriwer de ngihl laudida,
Oh e sohte pahn wiahiong ngile en lella nanial akan.+
Ni lelepek e pahn wahdo pwung pahrek.+
4 E sohte pahn luwetala de pwangada lao e wiahda pwung pahrek nin sampah;+
Oh deke kan kin awiawihte eh kosonned.*
5 Iet me Koht mehlelo, Siohwa,
Sounkapikpen nanleng oh Me Lapalap, me ketin katehlapahla mepwukat,+
Ih me ketin wiahda* sampah oh audepe kan,+
Ih me ketikihong aramas akan nin sampah angin esingek+
Oh kehl en mour* ong irail akan me kin kekeid nin sampah, ketin mahsanih:+
6 “Ngehi, Siohwa me malipeiuk ni pwung;
I koledier pehmwen.
I pahn sinsileiuk oh kihiukala nin duwen inou lap ehu ong aramas akan+
Oh nin duwen marain en wehi kan,+
7 Pwe ken kapehdpeseng mesen me maskun kan,+
Pwehn wahdo me selidi kan sang nan imweteng
Oh irail me mwomwohd nan rotorot sang nan imweteng.+
8 Ngehi me Siohwa. Ih mwarei en met;
I sohte kin kihong emen tohrohr ei lingan,*
De pil kapingpei ong sansal perperda kan.+
9 Kilang, tepin soahng kan pweidahier;
Met I pahn lohki soahng kapw kan.
Mwohn ar pahn wiawi, I pahn ndaiong kumwail duwen mepwukat.”+
10 Kumwail koulkihong Siohwa apwoat koul kapwen,+
Kumwail koulki sapwellime kaping sang ni imwin sampah,+
Kumwail me kin kohdihla nansed oh audepe kan koaros,
Kumwail deke kan oh towe kan.+
Irail tohn paipalap kan en wer ni peren;
Irail en weriwer sang pohn kadoken nahna kan.
12 Irail en kalinganahda Siohwa
Oh lohki sapwellime kaping ni deke kan.+
13 Siohwa pahn ketieila rasehng ohl kehlail men.+
E pahn ketin ngoangki mwekid duwehte sounpei men.+
E pahn ketin wer, ei, e pahn ketin ngiringirisengki wer en mahwen;
E pahn ketin kasalehda me e kehlailsang sapwellime imwintihti kan.+
14 “I nennenlahte ahnsou reirei.
I sohte mweseisei oh irehdi pein ngehi.
Duwehte lih emen me pahn neitik,
I pahn wiahkintehieu ingitik, nget, oh esimoar.
15 I pahn kauwehla nahna kan oh dohl kan
Oh kamadahda arail dihpw kan koaros.
16 I pahn kahluwa me maskun kan ni ahl ehu me re sehse+
Oh kahrehiong irail en keid nan ahl kan me re sehse.+
Ih met me I pahn wiahiong irail, oh I sohte pahn keseirailla.”
17 Irail pahn lohdi oh uhdahn pahn namenekla,
Irail me kin likih sansal perperda kan,
Irail me kin ndaiong sansal mete kan: “Kumwail me at koht.”+
18 Kumwail me salengepon kan, kumwail rong;
Kumwail me maskun kan, kumwail kilang oh tehk.+
19 Ihs me maskun likin ei ladu,
Ihs me salengepon duwehte meninkeder me I kadarala?
Ihs me maskun duwehte emen me ale ketingpe,
Ihs me maskun duwehte ladun Siohwa?+
20 Ke kin kilang soahng tohto, ahpw ke sohte kin tehk kanahieng.
Ke kawahsekpeseng salengomw kan, ahpw ke sohte rong.+
21 Pwehki sapwellime pwung,
Siohwa ketin kupwurperenki kasalehda me kosonnedo* me lapalap oh lingan.
22 Ahpw ih pwihnen aramas wet me kulsangehr oh pirapalahr;+
Irail koaros lidipdi nan pwoahr kan oh ekiekla nan imweteng kan.+
Irail kulsangehr ni sohte emen pahn kapitirailla,+
Oh pirapala ni sohte emen pahn nda: “Kapwureiraildo!”
23 Ihs rehmwail me pahn rong met?
Ihs me pahn tehk mwahu oh rong pwehn paiekihda ahnsou me pahn kohdo?
24 Ihs me kihla Seikop pwehn pirapala
Oh Israel rehn sounkul kan?
Kaidehn Siohwa, me kitail kin wiahda dihp ong?
25 Eri e ketin pousehlahte wudekihdiong powe engieng,
Sapwellime engieng oh mahwen kehlail.+
Met kamwomwala mehkoaros me kapilpene ih, ahpw e sohte mwahn tehk.+
Met kin luldahng ih, ahpw e sohte kin nsenohki met.+
43 Seikop, Israel, iet me Siohwa ketin mahsanih,
Sounkapikpomw, me ketin wiaiukada:+
“Ke dehr masak, pwe I pwainuhkdahr sapahl.+
I ekerkin uhk edomw.
Nei kowe.
2 Ni omw pahn kotehla pihl kan, I pahn ieiang uhk,+
Oh ni omw pahn alu nan pillap kan, re sohte pahn lapakehda pohmw.+
Ni omw pahn alu nan kisiniei, ke sohte pahn roangala,
De ke pil sohte pahn mwasingkihla kisiniei.
3 Pwe ngehi me Siohwa omw Koht,
Koht Sarawi en Israel, omw Sounkomour.
I kihla Isip nin duwen pweinen pweipwei sapahl ehu ong uhk,
Idiopia oh Sehpa pwehn wilianuhkedi.
Eri I pahn kihla aramas akan pwehn wilianuhkedi
Oh wehi kan wiliepen omw mour.*
5 Ke dehr masak, pwe I pahn ieiang uhk.+
I pahn wahdo kadaudokomw sang palimese
Oh kihkumwailpene sang palikapi.+
6 I pahn ndaiong paliepeng, ‘Kapwureiraildo!’+
Oh ong palieir, ‘Dehr kolokol irail.
Wahdo nei pwutak kan sang wasa doh, oh nei serepein kan sang ni imwin sampah,+
7 Koaros me kin adki mwarei+
Oh me I kapikada ong kalinganpei,
Me I wiahda.’+
8 Wahieido pwihnen aramas ehu me maskun, mendahki eh mie masarail kan,
Oh me salengepon, mendahki eh mie salengarail kan.+
9 Wehi kan koaros en pokonpene wasa ehu,
Oh aramas akan en kohpene.+
Ihs rehrail me kak nda met?
De irail kak wiahiong kitail en rong tepin soahng kan?*+
Irail en kasalehda arail sounkadehde kan pwehn kadehdehda me irail pwung,
De irail en rong oh nda, ‘Iei met me mehlel!’”+
10 Siohwa ketin mahsanih: “Kumwail me ei sounkadehde kan,+
Ei, nei ladu me I piladahr,+
Pwe kumwail en ese oh pwoson ie*
Oh wehwehki me Ngehite met.+
Mwohn ngehi sohte emen Koht wiawihda,
Oh mwurin ngehi sohte pil emen.+
11 Ngehi—Ngehi me Siohwa,+ oh likin ngehi sohte emen sounkomour.”+
12 Siohwa ketin mahsanih: “Ni ahnsou me sohte koht en liki men nanpwungamwail,+
Ih ngehi me kin lohkihda dahme I pahn wia oh kapitkumwailla oh kasansalehda met.
Eri kumwail me ei sounkadehde oh ngehi me Koht.+
Ni ahnsou me I kin mwekid, ihs me kak kauhdi?”+
14 Iet me Siohwa, me ketin pwainkumwailda sapahl,+ Koht Sarawi en Israel,+ ketin mahsanih:
“Pwehki kumwail I pahn kadariraillahng Papilon oh kauwehla lepin tuhkehn kateng ni ewen kehl ko,+
Oh mehn Kaldia kan pahn sengisengki kahpwal nan wararail sohp kan.+
15 Ngehi me Siohwa, amwail Koht me Sarawi,+ Sounkapikpen Israel,+ amwail Nanmwarki.”+
16 Iet me Siohwa ketin mahsanih,
Me kin ketin wiahda ahl pwoat nansed
Oh kin ketin wiahda ahl pwoat nansed ilokin,+
17 Ih me kin ketin kahluwaieila kurumahn mahwen oh oahs,+
Oh pil karis en sounpei kan iangahki sounpei kehlail kan:
“Irail pahn wendi oh sohte pwourda.+
Irail pahn koakunkunla rasehng wihk okohk ehu.”
18 “Kumwail dehr tamataman mehkan en mahso,
Oh dehr medemedewe duwen mahso.
19 Kilang! I pahn wiahda mehkot kapw ehu;+
Pil ahnsou wet e pahn tepida wiawi.
Kumwail sohte pohnese met?
20 Mahn lawalo en nansapw pahn waunekin ie,
Kidien wel kan oh ostris kan,
Pwe I pahn kihda pihl nan sapwtehn,
Pillap kan nan sapwtehn,+
Pwe nei aramas akan, nei me pilipilda kan,+ en nim,
21 Aramas akan me I wiahda ong pein ngehi
Pwe irail en kak lohki kapingpei.+
23 Ke sohte wadohng ie sihpw kan ong omw meirong isihs kan me pwonte isihsla
De kalinganahkiniehda omw meirong kan.
I sohte itonehng uhk ken wadohng ie kisakis ehu,
De pil kapwangeiukada ni ei idingkihong uhk ken isik warpwohmwahu pwetepwet.*+
24 Ke sohte pwainkihong ie ahlek pwohmwahu noumw mwohni,
Oh ke sohte kansenamwahwihkin ie wih en omw meirong kan.+
Ahpw, ke katoutouwihkin ie dipomw kan
Oh kapwangahkiniehda omw sapwung kan.+
25 Ngehi, Ih ngehi me irisasang omw sapeik kan*+ pwehki ngehi,+
Oh I sohte pahn tamataman dipomw kan.+
26 Katamankin ie; kitail en wapene atail repenpwung kan ong emenemen;
Koasoia omw pali pwehn kadehdehda me kowe me pwung.
28 Eri I pahn kasaminehla lapalap akan en wasa sarawio,
Oh I pahn kihla Seikop en kamwomwmwomwla
Oh mweidala Israel en lelohng lokaia lemei kan.+
44 “Eri Seikop ei ladu, rong,
Oh kowe, Israel, me I piladahr.+
2 Iet me Siohwa,
Sounwiepomw oh me ketin wiaiukada,+
Me ketin seweseiuk sang nan kapehden inomw,* ketin mahsanih:
4 Oh irail pahn wosada rasehng dihpw kan,+
Rasehng tuhke poplar kan ni keilen piletik kan.
5 Emen pahn nda: “Ngehi sapwellimen Siohwa.”+
Meteio pahn kahdaneki pein ih eden Seikop,
Oh pil emen pahn ntingihedi pohn peh: “Sapwellimen Siohwa.”
Oh e pahn alehda eden Israel.’
6 Iet me Siohwa, Nanmwarkien Israel+ oh me ketin pwainda sapahl ih,+
Siohwa kaunen karis en sounpei, ketin mahsanih:
‘Ngehi me keieu oh ngehi me keieu mwuri.+
Sohte emen Koht mie ahpw ngehite.+
7 Mie emen me duweie?+
En nda oh koasoia met oh kadehdehiong ie!+
Sangete ahnsou me I wiahda aramas akan mahso,
Irail en koasoia soahng kan me pahn kereniong wiawi
Oh pil soahng kan me pahn kohdo mwuhr.
I sou ndaiong emenemen kumwail oh lohkihda met mwohn eh wiawi?
Kumwail me ei sounkadehde kan.+
Mie emen Koht likin ngehi?
Soh, sohte pil ehu Paip;+ sohte emen me I ese.’”
9 Irail koaros me kin wiahda sansal perperda kan sohte irail mehkot,
Oh arail dikedik kesempwal kan pahn sohte katepe.+
Nin duwen arail sounkadehde kan, irail* sohte kilang mehkot oh sehse mehkot,+
Eri irail me wiahda mepwukat pahn namenekla.+
10 Ihs me pahn wiahda koht men de wiahda sansal mete ehu
Me sohte kak wahdo kamwahu?+
11 Kilang! Ienge kan koaros pahn namenekla!+
Tohndoadoahk saman kan ihte aramas kei.
Irail koaros en pokonpene oh kesikesihnen.
Irail pahn masepwehkada oh namenekla ahnsowohte.
12 Sounsukmete kin doadoahngki nah dipwisoun doadoahk pwehn karang meteo pohn mwoalus kan.
E kin wiahda met ni eh doadoahngki nah ama kan,
Ni eh kin doadoahngki peh me kehlail.+
Mwuri e kin men mwengehda oh sohla angi;
E sohte kin nimpil oh e kin pwangada.
13 Sounpartuhke kin kadangpeseng sahl en sosohng, lainihki mwohmw ehu sohk weitahta.
E kin parkihda met mehn par tuhke oh lainihki met kompas.
14 Mie emen me eh doadoahk iei en pelehdi tuhke sidar kan.
E kin pilada soangen tuhke pwoat, tuhke ohk* pwoat,
Oh e kin mweidohng en keirda kehlail nanpwungen tuhkehn nanwel kan.+
E padokedi tuhke lohrel pwoat, oh keteu me kin kakairada.
15 Aramas eri tuwihkihla tuhkeo.
E kin ale ekei tuwi ko pwehn wia eh mehn rengireng;
E kin wiahda kisiniei ehu oh umwunda pilawa.
Ahpw e pil kin wiahda koht men oh kaudokiong.
E kin wiahkihda tuhkeo sansal perperda ehu, oh e kin poaridiong mwowe.+
16 Elep en tuhkeo e kin seukisinieikihla;
Elep en tuhkeo e kin karangki uduk me e pahn tungoale, oh e medkihla.
E pil kin rengireng oh nda:
“I karakarada ni ei kilikilang kisinieio.”
17 Ahpw luhwen tuhkeo e kin wiahkihda koht men, eh sansal perperda ehu.
E kin poaridiong oh kaudokiong.
E kin kapakapohng oh nda:
“Komw doareiehla, pwe komwi me ei koht.”+
18 Irail sohte ese mehkot, irail sohte wehwehki mehkot,+
Pwehki masarail kan pweipweidier oh re sohte kak kilang wasa,
Oh mohngiongirail kan sohte kak dehdehki mwahu.
19 Sohte me kin doudouloale nan eh mohngiong
De ahneki loalokong de koahiek en wehwehki ire oh kin nda:
“Elep en tuhkeo I seukisinieikihla,
Oh I umwunda pilawa oh karangada uduk pohn mwoalus ko pwe I en tungoale.
Eri, ia duwe, I pahn wiahkihda luhwen tuhkeo ni mehkot kasaut ehu?+
I pahn kaudokiong lepin tuhke* pwoat?”
20 E kin kang pehs kan.
Eh mohngiong me pitida me kahrehiong eh salongala.
E sohte kak doarehla pein ih, e pil sohte kin nda:
“E sou mie likamw ehu ni pehi palimaun?”
21 “Seikop, tamataman mepwukat, oh kowe, Israel,
Pwe kowe me ei ladu.
I wiaiukada, oh kowe me ei ladu.+
Israel, I sohte pahn manokeiukala.+
22 I pahn irisasang omw sapeik kan duwehte depwek ehu eh pwaindi+
Oh dipomw kan duwehte depwek mosul ehu eh pwaindi.
Pwurodo rehi, pwe I pahn pwainuhkada sapahl.+
23 Nanleng, kumwail wer ni peren,
Pwe Siohwa ketin mwekid!
Kumwail wasa loal kan en sampah, kumwail weriwerki ngilen kana!
Kumwail nahna kan, kumwail wer ni peren,+
Kumwail nanwel kan, oh tuhke kan koaros nanwel!
Pwe Siohwa ketin pwainda sapahl Seikop,
Oh e ketin kasalehda sapwellime lingan ong Israel.”+
24 Iet me Siohwa, me ketin pwainuhkada sapahl,+
Me ketin wiaiukada sangete ahnsou me ke mi nan kapehden inomw, ketin mahsanih:
“Ngehi me Siohwa, me wiahda mehkoaros.
Ihs me iang ie?
25 I kin kasapwungehla en irail me kin koasoi mwahl kan* ar kilel kan,
Oh Ih ngehi me wiahiong sounkosetipw kan ren mwekid ni mwomwen pweipwei;+
Me kapingada ohl loalokong kan
Oh wekidohng arail loalokong ong ni pweipwei;+
26 Me kin wiahiong mahsen en nah ladu en pweida
Oh uhdahn kapwaiada kokohp en nah meninkeder kan;+
Me kin ndahki Serusalem, ‘E pahn miehla towe kan,’+
Oh ndahki kahnimw en Suda kan, ‘Re pahn onohnsapahlda,+
Oh I pahn kamwahwihala eh wasa tehn kan’;+
27 Me kin ndaiong pihl loal kan, ‘Madada,
Oh I pahn kamadahda omw pillap kan koaros’;+
28 Me kin ndahki Sairus,+ ‘Ih me nei sounsilepen sihpw,
Oh e uhdahn pahn kapwaiada kupwurei koaros’;+
Me kin ndahki Serusalem, ‘E pahn onohnsapahlda,’
Oh ndahki tehnpas sarawio, ‘Omw poahsoan pahn wiawihda.’”+
45 I koledier palimaun en pehn Sairus+
Pwehn kalowehdi wehi kan mwowe,+
Pwehn kihsang en nanmwarki kan dipwisoun mahwen kan,*
Pwehn ritingada mwowe wenihmw riauo,
Pwe ewen kehl ko en dehr ritidi.
Iet me Siohwa ketin mahsanihong Sairus,+ sapwellime me keidio:
2 “I pahn tiengla mwohmw,+
Oh I pahn kapatapatahla dohl kan.
I pahn kapisetikihpeseng wenihmw prons kan,
Oh I pahn lupukpeseng mete kan.+
3 I pahn kihong uhk dipwisou kesempwal kan nan rotorot
Oh dipwisou kesempwal kan me ekiekla nan wasa rir kan,+
Pwe ken ese me ngehi me Siohwa,
Koht en Israel, me ekerkin uhk edomw.+
4 Pwehki ei ladu Seikop oh Israel nei me pilipildahro,
I ekerkin uhk edomw.
I pahn kihong uhk mwar wahu ehu, mendahki omw sehse ie.
5 Ngehi me Siohwa, oh sohte pil emen mie.
Sohte emen Koht mie, ngehite.+
I pahn kakehleiukada,* mendahki omw sehse ie.
6 Pwe sang wasa me ketipin kin dakada ie lel wasa me e kin kihrla ie*
Aramas akan en ese
Me sohte emen likin ngehi.+
Ngehi me Siohwa, oh sohte pil emen mie.+
7 I wiahda marain+ oh kapikada rotorot,+
I wiahda popohl+ oh kapikada kahpwal;+
Ngehi, Siohwa, me wiewia soahng pwukat koaros.
8 Nanleng, kumwail kamwerehdi keteu sang powe;+
Depwek kan en wudekihdi pwung.
Sampah en ritpeseng oh direkihla wahn komour,
Oh en kahrehiong pwung en wosada ni ahnsowohte.+
Ngehi, Siohwa, me kapikada met.”
9 Meid suwediong emen me kin pelianda* Sounwiepe,*
Pwe ihte diperen dahl pwehl ehu ih
Nanpwungen diperen dahl pwehl teikan me mi pohn pwehl!
Ia duwe, pwehlo pahn ndaiong Sounwia dahlo:* “Dahme ke pahn wiahda?”+
De dahme ke wiahdao pahn nda: “Sohte peh”?*
10 Meid suwediong emen me kin ndaiong pahpa men: “Dahme ke pahn naineki?”
Oh ndaiong lih emen: “Dahme ke pahn naitikihada?”*
11 Iet me Siohwa, Koht Sarawi en Israel,+ me ketin wiahda ih, ketin mahsanih:
“Ke pahn peikasalkiong ie duwen soahng kan me kohkohdo
Oh ruwesehkin ie duwen nei seri kan+ oh wiepen limei kan?
12 I wiahda sampah+ oh kapikada aramas powe.+
13 Siohwa kaunen karis en sounpei ketin mahsanih:
“I pahn kamwakid emen ni pwung,+
Oh I pahn kainenehla eh ahl koaros.
14 Iet me Siohwa ketin mahsanih:
“Mwohni* en Isip oh kepwehn net* en Idiopia oh mehn Sapea kan, aramas reirei kan,
Pahn kohdo rehmw oh wiahla noumw.
Irail pahn alu mwurimw selikihdi selmete kan.
Irail pahn kohdo rehmw oh poaridiong uhk.+
Irail pahn ndaiong uhk nan ar kapakap, ‘Mehlel me Koht ketin ieiang uhk,+
Oh sohte pil emen mie; sohte pil emen Koht.’”
15 Mehlel me komwi Koht emen me kin ketin karirihala pein ih,
Koht en Israel, Sounkomour.+
16 Irail koaros pahn namenekla oh sarohdi;
Sounwiahda dikedik kan koaros pahn kohkohwei ni namenek.+
17 Ahpw Siohwa pahn ketin komourala Israel kohkohlahte.+
Kumwail sohte pahn namenekla de mwamwahlla kohkohlahte.+
18 Pwe iet me Siohwa, Sounkapikpen nanleng,+ Koht mehlelo,
Me ketin wiahda sampah, Sounwiepe me ketin koasoanehdi teng,+
Me sohte ketin kapikada met ni soh kahrepe,* ahpw ketin wiahda pwe aramas en kousoan ie,+ ketin mahsanih:
“Ngehi me Siohwa, oh sohte pil emen mie.
19 I sohte mahsen nan wasa rir ehu,+ nan sahpw rotorot ehu;
I sohte mahsanihong kadaudok en Seikop,
‘Rapahkin ie ni soh kahrepe.’*
Ngehi me Siohwa, me mahsanih dahme pwung oh lohki dahme mehlel.+
20 Kumwail pokonpene oh kohdo.
Kumwail me pitila sang wehi kan, kumwail koaros pwarodo.+
Irail sohte ese mehkot, irail me waseli sansal perperda kan
Oh kapakapohng koht men me sohte kak doareirailla.+
21 Kumwail wahdo amwail repenpwung, kasalehda amwail mehn kadehde.
Irail en koasoiapene ni minimin.
Ihs me kohpada met sangete mahso
Oh lohkihda met sang ahnsou samwalahr ako?
Kaidehn ngehi, Siohwa?
22 Kumwail aramas koaros nan sampah pwon, kumwail sohpeidohng ie oh komourla,+
Pwe ngehi me Koht, oh sohte pil emen mie.+
Aramas koaros pahn kelepwikihdi mwohi,
Loh koaros pahn kahukihla ar loalopwoat+
24 Oh nda, ‘Pwung mehlel oh kehl uhdahn mi rehn Siohwa.
Oh koaros me kin lingeringer pah pahn patohdo mwohn silangi ni namenek.
25 Pwehki Siohwa, kadaudok en Israel koaros pahn sansalda me re pwung,+
Oh re pahn suweiki ih.’”
46 Pel kin dairukedi,+ Nepo kin itiekidi.
Arail dikedik kan pwekipwekda pohn mahn akan, mahn en wisik kan,+
Duwehte wisik toutou pohn mahn akan me pwangadahr.
3 “Kadaudok en Seikop kan, kumwail rong ie, oh kumwail koaros me luhwehdi nan wehin Israel,+
Kumwail me I kin utung sangete amwail ipwidi oh weuwa sang ni kapehden inamwail.+
4 I pahn duweduwehte lao ke mahla;+
I pahn kin utung uhk lao ke moangepwetala.
Duwehte me I wiahier, I pahn waiuk oh utung uhk oh kapituhkala.+
5 Ihs me kumwail pahn karasahiong ie de wiahiong ie I en duwehte de kapahrekiong ie,+
Pwe kitail en mwomwen duwepenehte?+
6 Mie irail me kin wudekihiei kohl sang nan neirail pilihs;
Irail kin teneki silper pohn mehn tenek.
Irail kin alehda sounsukmete, oh e kin wiahkihda met koht men.+
Irail eri kin lukupoardi, ei, irail kin kaudokiong.*+
7 Irail eri kin kapaikada met;+
Irail kin wahda oh kihdi nan dewe, oh e kin kesikesihnente wasao.
E sohte kin mwekidsang nan dewe.+
Irail kin likweriong, ahpw e sohte kin sapeng;
E sohte kak kapitasang emen nan kahpwal.+
8 Kumwail tamataman met, oh kumwail eimah.
Kumwail me kin kauwehla kosonned kan, kumwail katengehdiong nan mohngiongimwail kan.
9 Kumwail tamataman tepin soahng kan mahso,
Me ngehi me Koht, oh sohte pil emen tohrohr.
Ngehi me Koht, oh sohte emen me duwehte ngehi.+
10 Sangete nin tapio I kohpada dahme pahn wiawi,
Oh sangete mahso I kohpada soahng kan me saikinte wiawi.+
11 I kin eker menpihr men me kin kang uduk sang ni dakadahn ketipin,*+
Aramas emen sang sahpw doh ehu pwe en kapwaiada ei koasoandio.*+
I mahsenier, oh I pahn wiahiong met en wiawi.
I kupwuredahr met, oh I pil pahn kapwaiada.+
12 Kumwail me mohngiong keptakai,* kumwail rong ie,
Kumwail me dohsang pwung.
I pahn kihong Saion komour, ei lingan ong Israel.”+
47 Nein Papilon serepein meipwon,+
Kohdihdo oh mwohndi nan pwelpar.
Nein mehn Kaldia kan serepein,
Mwohndi pohn pwehl wasa me sohte mwoahl,+
Pwe aramas akan sohla pahn pwurehng ekerkin uhk kaselel oh keneinei.
2 Ale ehu mehn ngidar pilawa* oh ngidarpene pilawa amas.
Kihsang omw koaduhpwelen.
Kapwuhrasang omw urohsen, kasalehda nehmw kan.
Kotehla pillap akan.
3 Omw kilisou pahn sansalda.
Omw namenek pahn sansalda.
I pahn ikih,+ oh sohte me pahn ireiehdi.*
4 “Me pahn ketin pwainkitailda sapahl
—Siohwa kaunen karis en sounpei iei mware—
Iei Koht Sarawi en Israel.”+
5 Nein mehn Kaldia kan serepein,+
Nennenla kowe mwomwohd wasahn oh mihmi nan rotorot;
6 I engiengda pahn nei aramas akan.+
Ahpw ke sohte kasalehiong irail kadek kalahngan.+
Ke pil kihdi pohn me mah kan wisik toutou ehu.+
7 Ke nda: “Ahnsou koaros I pahn wia Lih Soumas,* kohkohlahte.”+
Ke sohte katengehdiong mepwukat nan mohngiongomw;
Ke sohte medemedewe ia duwen irair wet eh pahn imwisekla.
8 Eri rong met, me kin nsenkihte wia nsene,+
Me kin mwomwohd sohte perki mehkot, me kin nda nan eh mohngiong:
“Iei ngehi mwo, oh sohte pil emen mie.+
I sohte pahn wiahla liohdi men.
I sohte mwahn pahn ese mehlahn seri kan.”+
9 Ahpw soahng riau pwukat pahn mwadangete wiawihong uhk ni rahnteieu:+
Mehlahn seri kan oh liohdihla.
Mepwukat uhdahn pahn wiawihong uhk+
Pwehki* omw akmanaman tohto oh omw lokaiahn wunahni kehlail koaros.+
10 Ke kin likih omw suwed.
Ke kin nda: “Sohte me kilang ie.”
Omw erpit oh loalokong me kasalongeiukala,
Oh ke kin nda nan omw mohngiong: “Iei ngehi mwo, oh sohte pil emen mie.”
11 Ahpw kahpwal pahn wiawihong uhk,
Oh sohte ehu omw akmanaman kan pahn kauhdi met.*
Apwal pahn lelohng uhk; ke sohte pahn kak soikala.
Soangen ohla me ke sohte mwahn ese pahn mwadangete lelohng uhk.+
12 Eri, nannantihki omw lokaiahn wunahni kan oh omw akmanaman tohto,+
Me ke doadoahk laudki sangete ni omw pwulopwul.
Mweinele ke pahn kak paiekihda;
Mweinele ke pahn kak kamasakada aramas akan.
13 Ke pwangahkihda tohtohn omw sounkaweid kan.
Irail en kesihnenda met oh doareiukala,
Irail akan me kin kaudokiong nanleng,* me kin kilikilang usu kan,+
Irail akan me kin kasalehda loalokong ni ahnsoun maram pwul kan
Duwen soahng kan me pahn kohdiong pohmw.
14 Kilang! Re rasehng diperen dihpw kan.
Kisiniei ehu pahn isikirailla.
Irail sohte kak doareirailla sang kehl en kisinieio.
Mepwukat kaidehn mwoalus mwahu kei ong rengireng,
Oh met kaidehn soangen kisiniei me pahn mwahu en mwohd mwowe.
15 Iei met imwilahn noumw sounkamande sineik kan,
Irail ako me ke doadoahk laudiong sangete ni omw pwulopwul.
Irail pahn kohkohseli, emenemen nan pein eh ahl.*
Sohte me pahn doareiukala.+
48 Kadaudok en Seikop kan, kumwail rong met,
Kumwail me kin ekerki pein kumwail eden Israel+
Oh kadaudok en* Suda kan,
Kumwail me kahula ni mwaren Siohwa+
Oh me kin likweriong Koht en Israel,
Ahpw kaidehn ni mehlel oh pwung.+
2 Pwe irail kin ekerki pein irail tohn kahnimw sarawio+
Oh re kin rapahki utuht sang rehn Koht en Israel,+
Me mware iei Siohwa kaunen karis en sounpei.
3 “I ndaiong uhk tepin soahng kan mahso.
Re kohieisang nan ewei,
Oh I wiahiong mepwukat en sansalda.+
I mwadangete mwekid, oh re pweida.+
4 Pwehki I ese uwen omw keptakai
—Sahl en tepinweromw me mete oh temwomw me prons+—
5 I ndaionguhkehr mahso.
Mwohn eh pweida, I wiahiong uhk ken rong,
Kahrehda ke sohte kak nda, ‘Ei dikediko me wiahda met;
Ei sansal perperda oh ei sansal mete me kehkehlingki met.’
6 Ke rongehr oh kilangehr mepwukat koaros.
Kumwail sohte pahn lohkiseli met?+
Sang met kohla I pahn pakairkihong uhk soahng kapw kan,+
Soahng rir ekiekla kan me ke sehse.
7 Ahnsou wet re kapikipikda, a kaidehn mahso,
Soahng kan me ke saikinte rong mwohn rahnwet,
Kahrehda ke sohte kak nda, ‘Kilang! I eseier mepwukat.’
8 Ke saikinte rong,+ ke saikinte ese,
Oh mahso ke sohte men rong.
9 Ahpw pwehki mwarei I pahn koledi ei engieng;+
Pwehki kapingpei I pahn ireiehdi,
Oh I sohte pahn kasohreiukala.+
10 Kilang! I kamwakeleiukadahr, ahpw kaidehn ni mwomwen silper.+
I kasawihiuker* nan wasahn kisiniei mwehl,* me iei kahpwal.+
11 Pwehki mwarei, pwehki mwarei I pahn mwekid,+
Pwe ia duwen ei pahn kak mweidohng mwarei en saminla?+
I sohte kin kihong emen tohrohr ei lingan.*
12 Seikop, kowe Israel me I malipehdo, rong ie.
Ngehite met.+ Ngehi me keieu; Pil ngehi me keieu mwuri.+
Ni ei kin malipe irail, irail koaros kesihnenda.
14 Kumwail koaros, kumwail pokonpene oh rong.
Ihs nanpwungarail me pakairkihda soahng pwukat?
Siohwa ketin poakohng ih.+
E pahn kapwaiada kupwure pwehn uhwong Papilon,+
Oh e pahn doadoahngki peh pwehn uhwong mehn Kaldia kan.+
15 Pein ngehi me mahsanih met, oh I malipehdo ih.+
I wahdo ih, oh eh doadoahk pahn pweida.+
16 Kumwail kohdo limwahi oh rong met.
Sangete nin tapio I sohte mahsen ni rir.+
Sangete ahnsou me e wiawi I mi mwo.”
Oh met Kaun Wasa Lapalahpie Siohwa ketin poaroneiehla, oh* sapwellime ngehn sarawi.*
17 Iet me Siohwa, me ketin pwainuhkada sapahl, Koht Sarawi en Israel,+ ketin mahsanih:
“Ngehi me Siohwa omw Koht,
Me kin padahkihiuk pwe ken paiekihda,*+
Me kin kahluwaiuk nan ahl me ke pahn keid ie.+
18 Ihte ma ke pahn rong kanahieng ei kehkehlik kan!+
19 Kadaudokomw pahn tohtohla duwehte pihk
Ei, re pahn tohto duwehte pihk.+
Adarail kan sohte pahn sohrala de mwomwla mwohi.”
20 Kumwail kohkohieisang Papilon!+
Kumwail tangasang mehn Kaldia kan!
Kumwail pakairki met ni weriwer en peren! Kumwail lohkiseli!+
Kumwail kasansalehda met lel ni imwin sampah.+
Kumwail nda: “Siohwa ketin pwainda sapahl sapwellime ladu Seikop.+
21 Irail sohte men nimpilda ni eh ketin kahluwa irail nan wasa tehn kan.+
E ketin wiahiong pihl en pwilieisang nan paip ong irail;
E ketin pwalangpeseng paip ehu oh wiahiong pihl en kusieisang.”+
22 Siohwa ketin mahsanih: “Sohte popohl ong me suwed.”+
49 Kumwail deke kan, kumwail rong ie,
Oh kumwail wehi doh kan,+ kumwail rong kanahieng.
Siohwa ketin malipeiehdo mwohn ei ipwidi.*+
Sangete ahnsou me I mi nan kapehden inei e ketin mahsaniher edei.
E ketin wiahkiniehla arep keng pwoat;
E ketin karukeiehla nan sapwellime kopwoun arep.
3 E ketin mahsanihong ie: “Kowe me ei ladu, Israel,+
I pahn kasalehda ei lingan ni ei doadoahngkin uhk.”+
4 Ahpw I nda: “I doadoahk ni soh katepe.
I doadoahngkihla ei kehl ong ni mehkot me sohte mehlel, sohte katepe.
5 Siohwa ketin wiaiehda sang nan kapehden inei nin duwen sapwellime ladu,
Oh e ketin mahsanihong ie I en kapwurehdo Seikop reh,
Pwe Israel en kak pokonpene reh.+
I pahn linganla mwohn silangin Siohwa,
Oh ei Koht pahn ketin wiahla ei kehl.
6 Oh e pil ketin mahsanih: “E sohte itar omw wiahte ei ladu
Pwe ken onehda sapahl keinek en Seikop
Oh kapwurehdo mehn Israel kan me poadoandoarla.
7 Iet me Siohwa, me ketin pwainda sapahl Israel, Koht Sarawi en Israel,+ ketin mahsanihong emen me mwamwahlla,+ me wehi kan kasautki, ladun kaun akan:
“Nanmwarki kan pahn kilang oh uhda,
Oh lapalap akan pahn poaridi
Pwehki Siohwa, me ketin lelepek,+
Koht Sarawi en Israel, me ketin piluhkadahr.”+
8 Iet me Siohwa ketin mahsanih:
“Ni ahnsoun kupwuramwahu I sapeng uhk,+
Oh ni rahnen komour I seweseiuk;+
I kin sinsileiuk pwehn kihiukala nin duwen inou lap ehu ong aramas akan,+
Pwe ken pwurehng kamwahwihala sahpwo,
Pwe ken wiahiong irail en alehdi arail sohso kan me tehnla,+
9 Pwe ken ndaiong irail me sensel kan, ‘Kumwail pedoi!’+
Oh ong irail me mihmi nan rotorot,+ ‘Kumwail pwarada!’
Irail pahn mwengemwengeseli limwahn ahl akan.
Keilen ahl koaros me aramas tohto kalapw keid ie* pahn wiahla ar mohs.
10 Irail sohte pahn men mwengehda, de pil men nimpilda,+
Karakar laud de ketipin sohte pahn kamwasikei irail.+
Pwe Ih me kin ketin kadek kalahngan ong irail pahn ketin kahluwa irail,+
Oh e pahn ketin kahreirailla limwahn utuhnpihl kan.+
11 I pahn wiahiong ei nahna kan koaros ni ahl pwoat,
Oh ei ahl akan pahn ileilehda.+
12 Kilang! Irail pwukat kohkohdo sang wasa doh,+
Oh kilang! irail pwukat kohsang paliepeng oh palikapi,
Oh irail pwukat kohsang sapwen Sinim.”+
13 Nanleng, kumwail werki peren, oh kowe sampah, perenda.+
Nahna kan en perenda ni ar weriwerki peren.+
Pwe Siohwa ketin kansenamwahwihala sapwellime aramas akan,+
Oh e kin ketin kasalehda kadek kalahngan ong sapwellime kan me wie lokolok.+
14 Ahpw Saion kin ndinda:
“Siohwa ketin keseielahr,+ oh Siohwa ketin likidmelieiehla.”+
15 Ia duwe, lih emen kak manokehla nah seri me e kadihdi
De sohte poakehla wahnedio?
Mehnda ma lih pwukat manokehla, I sohte pahn manokeiukala.+
16 Kilang! I ntingihedier edomw nan pehi kat.
Ahnsou koaros omw dihd kan mihmi mwohi.
17 Noumw seri kan mwadang pwurodo.
Irail me kauweiukala oh kamwomwuhkala pahn kohkohlahsang uhk.
18 Sarada oh kilengseli.
Irail koaros pokopokonpene.+
Irail kohkodohng uhk.
Siohwa ketin mahsanih: “Nin duwen ei ieias,
Ke pahn likawihada irail koaros duwehte mehn kapwat kan,
Oh ke pahn katengeiraildi rehmw duwehte me lih kamwohd men kin wia.
19 Mendahki omw wasa kan ohlahr oh mwomwlahr oh sapwomw tehnlahr,+
Met e pahn nohn koait ong irail me kin kousoan wasao,+
20 Seri kan me ipwidi mwurin noumw seri kan ar mehla pahn ndaiong uhk,
‘Wasaht nohn koait ong ie.
Wiahda ei wasa pwe I en kousoan wasaht.’+
21 Oh ke pahn nda nan omw mohngiong,
‘Ihs semen seri pwukat me kohieng ie?
Pwe ngehi lih emen me nah seri kan melahr, oh I depwen,
Oh I kalipilipala oh selidi.
Ihs me apwalihada irail pwukat?+
22 Iet me Kaun Wasa Lapalahpie Siohwa ketin mahsanih:
23 Nanmwarki kan pahn kin apwalihiuk,+
Oh nein nanmwarki serepein kan pahn kadihdihada noumw seri kan.
Irail pahn poaridiong uhk+
Oh tamwe pwelpar en nehmw kan,+
Oh ke pahn anahne ese me ngehi me Siohwa;
Irail me kin koapworopworkin ie sohte pahn namenekla.”+
24 Ia duwe, irail me lohdier kak wisiksang rehn ohl kehlail men,
De irail me selidi rehn kaun lemei men kak pitila?
25 Ahpw iet me Siohwa ketin mahsanih:
“Pil irail me selidi rehn ohl kehlail men pahn wisiksang,+
Oh irail me lohdi pahn kaun lemei men pahn pitila.+
I pahn uhwong irail me kin uhwong uhk,+
Oh I pahn doarehla noumw seri kan.
26 I pahn wiahiong irail me kin wiakauweiuk ren kang pein udukarail,
Oh duwehte wain mem, irail pahn sakaukihla pein arail nta.
Oh aramas koaros* pahn anahne ese me ngehi me Siohwa,+
Omw Sounkomour+ oh me pwainuhkada sapahl,+
Koht Manaman en Seikop.”+
50 Iet me Siohwa ketin mahsanih:
“A ia kisinlikoun kamweid+ ong amwail nohno me I kadarala?
De ihs me I pweipwandohng pwe I en netikinkumwailla reh?
Kilang! Pwehki amwail sapwung kan+ me kumwail netilahki,
Oh pwehki amwail kauwehla kosonned kan me amwail nohno pekederlahki.+
2 Eri, dahme kahrehda, sohte me mi me ni ei kohdo?
Dahme kahrehda sohte me sapeng ni ei likwer?+
Arail mwahmw kan matala pwehki sohte pihl,
Oh re mehla pwehki sohla pihl.
4 Kaun Wasa Lapalahpie Siohwa ketin kaiahnehda loweiet,*+
Pwe I en ese mwomwen ei pahn sapengki* me pwangada men lokaia pwung.*+
E kin ketin panginiehda nimenseng koaros;
E kin ketin panginiehda* pwe I en rong duwehte me tohnpadahk men kin wia.+
I sohte kin sohpeila pali teio.+
6 I mweidohng irail en wokih tihnseweiet
Oh likinsepei ong irail me wus alis.
I sohte ekihsang meseiet soahng kanamenek kan oh kendip.+
7 Ahpw Kaun Wasa Lapalahpie Siohwa pahn ketin sewese ie.+
Ihme kahrehda I sohte pahn sarohdi.
Ihme kahrehda I wiahiong mesei en duwehte takai kekeluwak ehu,+
Oh I ese me I sohte pahn namenekla.
8 Ih me ketin mahsanih me I pwung kin karanih ie.
Kitail en kesihnenda.*
Ihs me mie eh kedip ong ie?
En kohdo tuhwong ie.
9 Kilang! Kaun Wasa Lapalahpie Siohwa pahn ketin sewese ie.
Ihs me pahn nda me I dipan?
Kilang! Irail koaros pahn meringla duwehte likou ehu.
Kariskahn* pahn kangirailla.
10 Ihs nanpwungamwail me kin lemmwiki Siohwa
Oh rong ngilen sapwellime ladu?+
Ihs me alu nan rotorot mosul, sohte marain?
En likih mwaren Siohwa oh rapahki utuht ong pein ih sang* eh Koht.
11 “Kilang! Kumwail koaros me sasaun kisiniei,
Oh kin wiahiong diperen kisiniei kan en pihr,
Kumwail alu nan marain en amwail kisiniei,
Nanpwungen diperen kisiniei kan me pipihr.
Iet me kumwail pahn ahneki sang nin limei:
Kumwail pahn wonohn ni amwail medek laud.
51 “Kumwail rong ie, kumwail me kin raparapahki pwung,
Kumwail me kin raparapahki Siohwa.
Kumwail kilenglahng paip me kumwail paldihsang ie
Oh pwoahr me kumwail weiweidahsang ie.
3 Pwe Siohwa pahn ketin kansenamwahwih Saion.+
E pahn ketikihdo nsenamwahu ong eh wasa tehn kan koaros,+
Oh e pahn ketin wiahiong eh sapwtehn en duwehla Ihden+
Oh eh sapwtehn duwehte mwetuwel en Siohwa.+
Peren oh nsenamwahu pahn dierek reh wasao,
Oh kapingkalahngan oh ngilen koul kan.+
4 Nei aramas akan, kumwail rong ie kanahieng,
Oh ei tohnwehi kan, kumwail rong ie.+
Pwe kosonned ehu pahn kohsang rehi,+
Oh I pahn koasoanehdi ei pwung pahrek nin duwen marain ehu ong aramas akan.+
5 Ei pwung kerendohr.+
6 Kumwail kilengdalahng nanleng,
Oh kilang sampah me mi pah.
Pwe nanleng pahn mwerpeseng duwehte ediniei,
Sampah pahn meringla duwehte likou ehu,
Oh towe kan pahn mehla duwehte kisin amwin wel kan.
Kumwail dehr masak en aramas akan kepit kan,
Oh dehr masepwehkada pwehki ar kapailok kan.
8 Pwe kariskahn* pahn kangirailla duwehte likou ehu;
Ahpw ei pwung pahn poatopoat,
Oh ei komour ong dih kan koaros.”+
9 Pirida! Pirida!
Pwuhriong nan kehl, kowe limen Siohwa!+
Pirida duwehte rahn akan mahso, duwehte dih en mahs ako.
10 Kaidehn komwi me ketin kamadahda sehd, pihl en wasa me uhdahn loal?+
Kaidehn komwi me ketin wiahiong kepin madau ong ni ahl pwoat, pwe me pweipweida sapahl kan en kotehla?+
11 Irail me Siohwa ketin kasaledekala* pahn pwurodo.+
Re pahn ahneki peren oh nsenamwahu,
Oh pahtou oh sengloal pahn tang.+
12 “Ngehi me kin kansenamwahwih kumwail.+
Dahme ke pahn masangki aramas emen me pahn mehla+
Oh nein aramas me pahn mengila duwehte dihpw?
13 Dahme kahrehda ke manokehla Siohwa Sounwiepomw,+
Me ketin katehlapahla nanleng+ oh wiahda poahsoan en sampah?
Rahn ehu pwon ke kin masamasak lingeringer en sounkalokolok,*
Duwehte ma e onopadahr en kamwomwuhkala.
Eri, ia en sounkalokoloko lingeringer?
14 Me pengkihdi selmete kan pahn kereniong saledekla;+
E sohte pahn mehla oh kohla nan pwoahr,
De e pil sohte pahn duhpekla.
15 Ahpw ngehi me Siohwa omw Koht,
Me kin kamwakidada sehd oh wiahiong ilok kan en pwungupwungudek+
—Siohwa kaunen karis en sounpei iei mware.+
16 I pahn kihdiong nan ewomw ei mahsen kan,
Oh I pahn pwainkinuhkedi mwetehn limei,+
Pwehn koasoanehdi nanleng oh wiahda poahsoan en sampah+
Oh ndaiong Saion, ‘Kowe me nei aramas.’+
17 Kowe Serusalem. Pirida! Pirida! Kesihnenda.+
Ke nimalahr kep en engieng en Siohwa sang nin lime.
Ke nimalahr kep en wain;
Ke nimalahr kep me kin kahrehda wasawasasseli.+
18 Sohte emen nanpwungen seri koaros me e naitikihada mi mwo pwehn kahre ih,
Oh sohte emen nanpwungen seri koaros me e apwalihada koledi peh.
19 Soahng riau pwukat lelohng uhk.
Ihs me pahn poakeiukala?
Ohla oh mwomwla, duhpek oh kedlahs!+
Ihs me pahn kansenamwahwihiuk?+
20 Noumw seri kan lipwongmasala.+
Irail wendi ni keimwen ahl koaros
Duwehte sihpw en wel men nan uhk.
Irail direkilahr engieng en Siohwa, lipwoar en omw Koht.”
21 Eri menlau rong met,
Lih me lokolok oh sakaula, ahpw kaidehn sang ni wain.
22 Iet me omw Kaun Siohwa, omw Koht me kin ketin pere sapwellime aramas akan, ketin mahsanih:
“Kilang! I pahn kihsang nan pehmwen kep me kin kahrehda wasawasasseli,+
Kep en wain, kep en ei engieng;
Ke sohte pahn pwurehng nim.+
23 I pahn uhd kihdiong nan pehn irail me kin kalokeiuk,+
Me kin ndaiong uhk, ‘Poaridi pwe sen kak aluhwei pohmw!’
Eri ke wiahkihla tihnsewomw duwehte pwehl,
Duwehte ahl pwoat ong irail en alu powe.”
52 Pirida! Pirida! Saion,+ likawihada kehl!+
Serusalem, kahnimw sarawi, pwuhriong nan omw likou kaselel kan!+
Pwe me sohte sirkumsais oh me samin sohla pahn pedolong rehmw.+
2 Serusalem, sipedasang pwelpar, kesihnenda oh mwohndi nan sehr en wahu.
Nein Saion serepein me sensel, sapwadada sahl en tepinweromw.+
3 Pwe iet me Siohwa ketin mahsanih:
4 Pwe iet me Kaun Wasa Lapalahpie Siohwa ketin mahsanih:
“Nin tapio nei aramas akan kohdihla Isip pwe ren kousoan wasao nin duwen mehn liki kei;+
Mwuri Asiria kaloke irail ni soh kahrepe.”
5 Iet me Siohwa ketin mahsanih: “Eri, dahme I pahn wia wasaht?”
Siohwa pil ketin mahsanih: “Pwe nei aramas akan wisiksang ni sohte pweipwei.
6 Ong kahrepe wet nei aramas akan pahn ese mwarei;+
Ong kahrepe wet, rahno irail pahn ese me Ngehi me mahmahsen.
Kilang, iei ngehi mwo!”
7 Meid kaselel nehn emen me kin weuwa kohdo rohng mwahu pohn nahna kan,+
Me kin lohki popohl,+
Me kin weuwa rohng mwahu en mehkot mwahu,
Me kin lohki komour,
Me kin ndaiong Saion: “Omw Koht wialahr Nanmwarki!”+
8 Rong! Noumw sounsilasil kan ngihl laudida.
Irail wiahkintehieu wer ni peren,
Pwe irail pahn kilang met ni sansal ni ahnsou me Siohwa ketin kapwurehdo Saion.
9 Kumwail wasa tehn kan en Serusalem, kumwail perenda, wiahkintehieu wer ni peren,+
Pwe Siohwa ketin kansenamwahwihala sapwellime aramas akan;+ e ketin pwainda sapahl Serusalem.+
10 Siohwa ketin kasalehda lime sarawi mwohn mesen wehi kan koaros;+
Aramas koaros nan sampah pwon pahn kilang wiewiahn komour* kan en atail Koht.+
11 Kumwail mwesel, mwesel, pedoisang wasahn,+ dehr doahke mehkot samin!+
Kumwail pedoisang reh,+ kolokol amwail mwakelekel,
Kumwail me weuwa sapwellimen Siohwa dipwisou kan.+
12 Pwe kumwail sohte pahn mwesel masepwehk,
De pil kumwail sohte anahne tang,
Pwe Siohwa pahn ketin tiengla mwohmwail,+
Oh Koht en Israel pahn ketin sinsile mwurimwail.+
13 Kilang! Ei laduwo+ pahn mwekid ni dehde mwahu.
E pahn kesepwilda,
E pahn lapalapala oh waunla kowahlap.+
14 Mwomwe suwedsang mwomwen aramas teikan
Oh eh mwohmw lingan suwedsang mwomwen aramas akan.
Eri, duwehte me tohto ar kin pwuriamweikihla ar kangkakil ih,
15 Wehi tohto pahn pwuriamweikihla.+
Nanmwarki kan pahn kihpene awarail kan* mwowe,+
Pwehki irail pahn kilang mehkot me sohte emen padahkihong irail
Oh medemedewe dahme irail sohte rong.+
53 Ihs me pwosonla dahme re rongasang kiht?*+
A duwen limen Siohwa,+ ong ihs me e sansalohng?+
2 E pahn pwarada mwohn ih* duwehte kisin rah pwoat,+ duwehte kalewe pwoat sang nan sahpw madekeng.
E sohte mwomwen lingan de pil kaselel;+
Oh ni at kin kilang ih, mwomwe sohte kin kahrehiong kiht sen keila reh.*
E mwomwen me meseo ekiekla sang kiht.*
E mwamwahlla, oh se sohte wiahki ih mehkot.+
Ahpw se kin wiahki ih emen me lokolongki soumwahu, me Koht ketin kaloke oh ahneki lokolok.
6 Kiht koaros kohkohseli rasehng sihpw kan,+
Emenemen pein kekeid nan eh ahl,
Oh Siohwa ketin kahrehiong sapwung me kiht koaros wiahda en lelohng ih.+
E wisikdo rasehng sihpw men pwehn kamakamala,+
Rasehng sihpw lih men me sohte kin mweseisei mwohn sounsehk wunen sihpw kan,
Oh e sohte kin kihpeseng ewe.+
9 Oh e alehdi wasahn seridi ehu* rehn me suwed,+
Oh seridi rehn me kepwehpwe* ni eh mehla,+
Mendahki e sohte wiahda sapwung ehu*
Oh sohte widing ehu kohsang nan ewe.+
10 Ahpw iei kupwuren Siohwa* en kamwutepene ih, oh e ketin mweidohng ih en soumwahuda.
Ma komw pahn ketikihda eh mour* nin duwen meirong en tomwki dihp,+
E pahn kilang kadaudoke oh e pahn mour werei,+
11 Pwehki eh lokolok, e pahn kilang oh nsenamwahula.
Pwehki eh loalokong, me pwung men, nei ladu,+
Pahn sewese aramas tohto pwe ren pwungla,+
Oh e pahn weuwa arail sapwung kan.+
12 Ong kahrepe wet I pahn koasoanediong ih pwais ehu nanpwungen me tohto,
Oh e pahn nehkpeseng dipwisou lohdi rehn me kehlail kan,
Pwehki e mweidala* eh mour* lao lel mehla+
Oh iang wadawadohng rehn me dipan akan;+
E weuwa dipen aramas tohto,+
Oh e peki mahkpen me dipan akan.+
54 Siohwa ketin mahsanih: “Wer ni peren, kowe lih depwen me sohte kin neitik!+
Perenda oh werki peren,+ kowe me sohte kin medek en neitik,+
Pwe nein lih me lekdeklahro seri kan* me tohtohsang
2 Kalaudehla imwomw impwalo.+
Katehlapahla likoun imwomw impwal laudo.
Ke dehr pweiek, kareireila selin imwomw impwalo,
Oh wiahiong metehn imwomw impwalo en kehlail.+
3 Pwe ke pahn kohpeseng kohla palimaun oh palimeing.
Kadaudokomw pahn kaunda wehi kan,
Oh irail pahn kousoanla nan kahnimw tehnla kan.+
Pwe ke pahn manokehla kanamenekpen omw pwulopwul,
Oh ke sohla pahn tamataman kanamenekpen omw wia liohdi men.”
5 “Pwe Sounwiepomw Lapalap+ me duwehte omw pwoud,*+
Siohwa kaunen karis en sounpei iei mware,
Oh Koht Sarawi en Israel me ketin pwainuhkada sapahl.+
E pahn mwarenki Koht en sampah pwon.+
6 Pwe Siohwa malipeiuk duwehte lih pwopwoud me eh pwoud kesehlahr oh pahtoula,+
Duwehte lih me pwopwoudida ni eh pwulopwul oh mwuri lekdekla,” omw Koht me ketin mahmahsen.
7 “Erein ahnsou kis I keseiukala,
Ahpw sang ni kadek kalahngan lapalap l pahn kapwureiukodo.+
8 Sang ni engieng laud* I ekihsang uhk silangiet erein ahnsou kis,+
Ahpw sang ni limpoak loalopwoat me poatopoat I pahn kasalehiong uhk kadek kalahngan,”+ Siohwa me ketin pwainuhkada sapahl+ me ketin mahmahsen.
9 “Met duwehte ni mwehin Noha ong ie.+
Duwehte ei kahukihla me pihl ko ni rahnen Nohao sohla pahn kipehdi sampah,+
Eri I kahukihla me I sohla pahn engiengda pahmw de lipwoareiuk.+
10 Pwe nahna kan pahn kakete sohrala
Oh dohl akan pahn kakete rerada,
Ahpw ei limpoak loalopwoat ong uhk sohte pahn sohrala,+
De pil ei inou lap en popohl sohte pahn rerada,”+ Siohwa, me ketin kasalehiong uhk kadek kalahngan+ me ketin mahmahsen.
11 “Lih lokolok,+ me pwungupwungudengki melimel, me sohte nsenamwahula,+
I pahn kihdi omw takai kan ni ei doadoahngki siment kekeluwak
Oh wiahkihda omw poahsoan takai sapair kan.+
12 I pahn wiahkihda kengkeng en omw kelen kahnimw takai rupi kan,
Omw ewen kehl kan takai melengileng kan,*
Oh omw irepe kan koaros takai kesempwal kan.
14 Ke pahn kokouda teng ni pwung.+
Ke pahn dohlahsang kalokolok,+
Ke sohte pahn masak mehkot oh sohte kahrepen omw pahn masepwehk,
Pwe met sohte pahn kohdo limwahmw.+
15 Ma emen pahn peiong uhk,
Kaidehn ngehi me ruwese.
Mehmen me pahn peiong uhk pahn pwupwudi pwehki kowe.”+
16 “Kilang! Pein ngehi me kapikada tohndoadoahk saman,
Me kin peuk mwoalus en kisiniei,
Oh eh doadoahk kin wiahda tehtehn mahwen.
Pein ngehi me pil kapikada sounkamwomwala pwehn kauwehla.+
17 Sohte tehtehn mahwen me wiawihda pwehn uhwong uhk pahn pweida,+
Oh ke pahn kadeikada loh koaros me kin uhwong uhk ni ahnsoun kadeik.
Ih met sohsohn ladu kan en Siohwa,
Oh arail pwung kohsang rehi,” Siohwa me ketin mahmahsen.+
55 Kumwail koaros me men nimpil,+ kumwail kohdo, kohdo ni pihlet!+
Kumwail me sohte noumwail mwohni, kumwail kohdo, pwainda oh kang!
Ei, kumwail kohdo, pwainda wain oh milik+ ni soh isepe oh sohte pweine.+
2 Dahme kahrehda kumwail pwapwainki mehkot me kaidehn pilawa,
Oh dahme kahrehda kumwail doadoahngkihla pweinamwail kan* ong mehkot me sohte kin wahdo nsenamwahu?
Kumwail rong ie kanahieng, oh tungoale dahme mwahu,+
Oh kumwail pahn diar peren laud ong mehkot me uhdahn mwenge mwahu.*+
3 Kumwail rong kanahieng oh kohdo rehi.+
Kumwail rong, oh kumwail ahpw pahn momour,
Oh I uhdahn pahn wiahiong kumwail inou lap poatopoat ehu+
Me pahrekiong kasalepen limpoak loalopwoat ong Depit, me likilik.*+
5 Kilang! Ke pahn likwerih wehi ehu me ke sehse,
Oh tohnwehi ehu me sehseiuk pahn tangodohng uhk
Pwehki Siohwa omw Koht,+ Koht Sarawi en Israel,
Pwehki e pahn ketin kalinganaiukada.+
6 Kumwail rapahki Siohwa ni eh kakete dierek.+
Kumwail likweriong ih ni eh ketikette limwahmwail.+
7 Aramas suwed en sohpeisang elen eh mour+
Oh aramas me kin kamedekih meteikan en kesehla eh lamalam;
En pwurodohng rehn Siohwa, me pahn ketin kasalehiong ih kadek kalahngan,+
Rehn atail Koht, pwe e pahn ketin mahkohng ih ni ahl laud ehu.*+
8 Siohwa ketin mahsanih: “Pwe ei lamalam kaidehn amwail lamalam,+
Oh amwail ahl akan kaidehn ei ahl akan.
9 Pwe duwehte nanleng eh ileilehsang sampah,
Eri ei ahl akan ileilehsang amwail ahl akan
Oh ei lamalam ileilehsang amwail lamalam.+
10 Pwe duwehte keteu oh sinoh ar kin mweredi sang nanleng
Oh sohte kin pwurala wasao lao re kalamwurih sampah, kawosehda oh kapwarehda wah,
Kihda werentuhke mehn poad oh pilawa mehn tungoal,
E sohte pahn pwurodo rehi ni eh sohte pweida,+
Ahpw e uhdahn pahn kapwaiada dahme I kupwurperenki,*+
Oh e uhdahn pahn pweida ong dahme I kadaralahng en wia.
Nahna kan oh dohl akan pahn perenda mwohmwail ni ar weriwerki peren,+
Oh tuhkehn nansapw akan koaros pahn lopwolopw.+
13 Tuhke suniper me pahn wosada a kaidehn tuhke tekatek kan,+
Oh tuhke mirtel me pahn wosada a kaidehn dihpw tekatek kan.
56 Iet me Siohwa ketin mahsanih:
“Kumwail utung pwung pahrek,+ oh wia dahme pwung,
Pwe ei komour pahn kereniong leledo
Oh ei pwung pahn sansalda.+
2 Meid peren aramas me kin wia met
Oh nein aramas me kin kolokol teng met,
Me kin kapwaiada Sapad oh sohte kin kasaminehla+
Oh me kin koledihsang peh soangen suwed koaros.
3 Mehn liki men me iangala Siohwa+ sohte pahn nda,
‘Siohwa uhdahn pahn ketin katohreiehsang sapwellime aramas akan.’
Oh ohl me lek wusol sohte pahn nda, ‘Kilang! Ngehi tuhke pwoat me madada.’”
4 Pwe iet me Siohwa ketin mahsanihong ohl me lek wusol kan me kin kapwaiada ei sapad kan oh pilada dahme I perenki oh kin kolokol teng ei inou lap:
5 “I pahn kihong irail nan tehnpesei oh nan ei dihd kan mehn kataman ehu oh ahd ehu,
Mehkot me mwahusang naineki pwutak kan oh serepein kan.
I pahn kihong irail ahd poatopoat ehu,
Ahd ehu me sohte pahn sohrala.
6 A ong mehn liki kan me iangala Siohwa pwe ren papah ih,
Pwe ren poakohng mwaren Siohwa+
Oh wia sapwellime ladu kan,
Irail koaros me kin kapwaiada Sapad oh sohte kin kasaminehla
Oh me kin kolokol teng ei inou lap,
7 I pil pahn wairaildo ni ei nahna sarawio+
Oh kaperenihirailda nan ei tehnpesen kapakap.
I pahn kupwurehla arail meirong isihs kan me pwonte isihsla oh arail meirong teikan pohn ei pei sarawio.
Pwe tehnpesei pahn adaneki tehnpesen kapakap ong aramas akan koaros.”+
8 Kaun Wasa Lapalahpie Siohwa, me kin ketikipene mehn Israel kan me mwarahkpeseng,+ ketin mahsanih:
“I pahn kapokonepene meteikan reh likin irail me kohpenehier.”+
9 Kumwail mahn lawalo koaros en nansapw, kumwail kohdo mwenge,
Kumwail mahn lawalo koaros nanwel.+
10 Nah sounsilasil kan me maskun,+ sohte emen irail tetehk wasa.+
Irail koaros kidi nennen kei, re sohte kak ngong.+
Re kin nget oh wonohn; re kin perenki meir.
11 Irail kidi mehwo kei;
Irail sohte kin medla.
Irail silepen sihpw kei me sohte ahneki koahiek en wehwehki ire kan.+
Irail koaros keid nan ar ahl akan;
Irail koaros kin rapahki kamwahuparail ni likamw oh nda:
12 “Kumwail kohdo, I pahn ale ekei wain,
Oh kitail pahn nim lao kitail sakaula.+
Oh lakapw pahn duwehte rahnwet, ihte mwahusang douluhl!”
57 Me pwung men sohralahr,
Ahpw sohte me nsenohki met.
2 E diar popohl.
Irail kommoal pohn arail peht kan,* koaros me keid ni pwung.
3 “Ahpw kumwail, kumwail keido,
Kumwail nein lih me kin wia akmanaman seri kan,
Kumwail nein me kin kamwahl oh nein me kin netiki paliwere seri kan:
4 Ihs me kumwail kapakapailoke?
Ihs me kumwail sarahiong oh kapwadohng lowamwail kan?
Kaidehn kumwail nein me dipan akan seri,
Oh nein sounlikamw kan seri,+
5 Irail me mwasingkihla ar ineng kehlail nanpwungen tuhke laud kan,+
Pahn tuhke losolos koaros,+
Me kin kemehla seri kan nan wahu kan+
Nanpwungen paipalap akan?
6 Ke pilada takai medendel kan en nan wahu.+
Ei, mepwukat me omw sohso.
Ke pil kin wudekihdi meirong en wain ong mepwukat oh kihda kisakis kan.+
Ia duwe, I pahn nsenamwahukihla* mepwukat?
8 Ke kauwada omw kilelen kataman mwurin wenihmw oh uhren wenihmw.
Ke kohkohsang ie oh kilisouda;
Ke kohdahla oh katehlapahla omw pehto.
Oh ke wiahda inou lap ehu rehrail.
9 Ke kohdihla Melek* wa leh
Oh leh pwohmwahu tohto.
Ke kadarala wiliepomw kan wasa doh,
Kahrehda ke kohdihla nan Sousou.*
10 Ke kin doadoahk laud ni omw ideidawehn omw ahl tohto kan,
Ahpw ke sohte kin nda, ‘Sohla koapworopwor!’
Ke kin pehm me ke pwurehng kehlailda.
Ihme kahrehda ke sohte kin uhdi.*
11 Ihs me ke kin masak
Kahrehda ke tepida lokaia likamw?+
Ke sohte tamataman ie.+
Sohte mehkot ehu ke katengehdi nan mohngiongomw.+
Ia duwe, I sou nennenla oh pweiekla?*+
Eri ke kasalehda me ke sohte lemmwikin ie.
13 Ni omw pahn likwer peksawas,
Dikedik kan me ke kihpene sohte pahn doareiukala.+
Kisinieng ehu pahn wairailsang koaros,
Angin esingek ehute pahn peukirailla,
Ahpw me kin diar wasahn ruk rehi pahn sohsohki sahpwo
Oh pahn sapwenikihla ei nahna sarawio.+
14 Emen pahn nda, ‘Kumwail wiahda, wiahda ahl pwoat! Kaunopada ahlo!+
Kihsang mehn kerempwa koaros nan ahl en nei aramas akan.’”
“I kin kousoan nan wasa ile oh sarawi,+
Ahpw I pil kin mi rehn irail me mworusala oh nan kapehd* tikitikla,
Pwe I en pwurehng kakehlaka me nan kapehd* tikitikla
Oh pwurehng kakehlaka mohngiong en irail me mworusala.+
16 Pwe I sohte pahn uhwong irail kohkohlahte
De wie engieng ahnsou koaros;+
Pwe aramas pahn luwetala pwehki ngehi,+
Pil soahng kan me kin esingek me I wiahda.
17 I wie engiengki dipe, eh raparapahki kamwahupe ni likamw,+
Ngehi eri kaloke ih, I ekihla silangiet, oh I wie engieng.
Ahpw e kin alialu nin duwen me soaloalopwoat men+ oh ideidawehn elen eh mohngiong.
18 I kilangehr ele kan,
Ahpw I pahn kamwahwihala ih+ oh kahluwa ih+
Oh kapwurehiong* ih oh irail me iang ih mwahiei+ nsenamwahu.”+
19 Siohwa ketin mahsanih: “I pahn kapikada mahsen en kaping kan.*
Popohl poatopoat pahn kohieng emen me mi wasa doh oh emen me keren,+
Oh I pahn kamwahwihala ih.”
20 “Ahpw me suwed kin duwehte sehd ilokin me sohte kak meleileidi,
Oh sehdo kin kamwakamwakid oaloahd oh pwehl.
21 Sohte popohl ong me suwed,”+ ei Koht me ketin mahmahsen.
58 “Likwer ni ngihl laud; ke dehr pweiek!
Kalaudehla ngilomw duwehte mehn pepeuk ehu.*
Lohkihong nei aramas akan arail uhwong,+
Ong kadaudok en Seikop kan diparail kan.
2 Irail kin rapahkin ie ehuehu rahn,
Oh irail kin kasalehda me re perenki esehla elei kan,
Me dene irail wehi ehu me kin wia me pwung
Oh sohte kin kesehla pwung pahrek en arail Koht.+
Irail kin peki rehi kadeik pwung kan,
Oh perenki karanihala Koht:+
3 ‘Dahme kahrehda komw sohte kin ketin mahsanih ni at kaisihsol?+
Oh dahme kahrehda komw sohte kin ketin mwahngih ni at kaloke pein kiht?’+
Pwehki ni rahnen amwail kaisihsol, kumwail kin rapahki pein kamwahupamwail,*
Oh kumwail kin kaloke noumwail tohndoadoahk kan.+
4 Amwail kaisihsol kin imwikihla akamai oh pei,
Oh kumwail kin pakerki kumwuten pehmwail ni lemei.*
Kumwail sohte kak kaisihsol duwehte me kumwail kin wia rahnwet oh kasik me I pahn karonge ngilamwail kan sang nanleng.
5 Ia duwe, kaisihsol me I pilada pahn duwehte met?
Duwehte rahn ehu me emen kin kaloke pein ih,
Poarikihdi moange rasehng dihpw reirei pwoat,
Wiahkihda eh peht likoun nsensuwed* oh pehs?
Ih met me ke kin kahdaneki kaisihsol oh rahn ehu me kaperenda Siohwa?
6 Soh, iet kaisihsol me I pilada:
Iei kihsang selipen suwed kan,
Sapwadada sahl kan en tuhkehn wisiko,+
Kasaledekala me lokolok kan,+
Oh katimpeseng tuhkehn wisik kan koaros;
7 Me iei ehukihong konomw pilawa rehn me duhpek,+
Wadohng me semwehmwe oh aramas me sohte imwe nan imwomw,
Kalikawihada emen me kilisou ni omw kilang ih,+
Oh sohte sohpeisang kisehmw kan.
8 Eri, omw marain pahn marainpeseng duwehte nin sohrahn,+
Oh ke pahn mwadang mwahula.
Omw pwung pahn tiengla mwohmw,
Oh lingan en Siohwa pahn sinsile mwurimw.+
9 Eri ke pahn likwer, oh Siohwa pahn ketin sapeng;
Ke pahn likwer peksawas, oh e pahn ketin mahsanih, ‘Iet ngehi!’
Ma ke kihsang nanpwungamwail tuhkehn wisiko
Oh dehier kauhla sendin pehmwen oh koasoi kamedek,+
10 Ma ke kihong me duhpek dahme ke kin inengieng+
Oh apwalih mwahu irail me lokolok kan,
Eri omw marain pahn marainpeseng mehnda ma nan rotorot,
Oh omw rotorot pahn duwehla nin souwas.+
11 Siohwa pahn ketin kahluwaiuk ahnsou koaros
Oh apwalihiuk mehnda ma nan sahpw madekeng ehu;+
E pahn ketin kakehlakahda tihmw kan,
Oh ke pahn duwehla mwetuwel ehu me diren pihl,+
Duwehla utuhnpihl ehu me sohte kin madada.
12 Irail pahn onehda sapahl wasa tehn kan mahso pwehki kowe,+
Oh ke pahn onehda sapahl poahsoanen dih en mahs ako.+
13 Ma pwehki Sapad me ke uhdihsang rapahki pein kamwahupomw* ni ei rahn sarawi+
Oh ke kin kahdaneki Sapad peren laud ehu, rahn sarawi ehu ong Siohwa oh rahnen linganla ehu,+
Oh ke kalinganahla met oh sohte rapahki pein kamwahupomw, oh ke sohte ndinda lokaia mwahl kan,
14 Eri ke pahn diar omw peren laud rehn Siohwa,
Oh I pahn wiahiong uhk ken kaunda wasa ile kan en sampah.+
I pahn kahrehiong uhk ken perenki* sohso en Seikop semomw mehn mahso,+
Pwe doauesen Siohwa me ketin mahmahsen.”
59 Kilang! Limen Siohwa sohte nohn mwotomwot pwe en sohte kak ketin doarehla,+
De pil salenge sohte nohn pon pwe en sohte kak ketin karonge.+
2 Soh, pein amwail sapwung kan me katohreikumwailsang amwail Koht.+
Dipamwail kan me kahrehiong eh ketin ekihsang kumwail silangi,
Oh e sohte kin ketin karongei kumwail.+
3 Pwe pehmwail kan saminkihla nta+
Oh sendinpehmwail kan saminkihla sapwung.
Kilin awamwail kan kin koasoi likamw,+ oh lowamwail kan kin mwengininginki soahng suwed.
4 Sohte me kin peki dahme pwung,+
Oh sohte me kin kohla nan mwoalen kopwung ni mehlel.
Irail kin likih mehkot me sohte mehlel*+ oh koasoia soahng sohte katepe.
Irail kin liseiankihda kahpwal oh neitikiehdi mehkot kamedek.+
5 Irail kasawa kutohr en sineik pwoisin men,
Oh irail pahda pesen likan men.+
Mehmen me kin kang kutohren sineik pwoisin kan pahn mehla,
Oh kutohr me pwalpeseng kin kasawa sineik pwoisin men.
6 Arail pesen likan sohte pahn wia likou ehu,
De pil irail sohte pahn pwainirailkihdi dahme irail wiahda.+
Arail wiewia kan kin kamedek,
Oh pehrail kan kin direki tiahk lemei.+
7 Nehrail kan kin tangalahng wia me suwed,
Oh irail kin mwadang kakerehdi ntahn aramas soh dipe.+
Arail madamadau kan madamadau kamedek kei;
Ohla oh nsensuwed mi nan ar ahl akan.+
8 Irail sohte kin ese elen popohl,
Oh sohte pwung pahrek nan ar ahl akan.+
Irail wiahiong ar ahl akan en pirekla;
Sohte me keid pohn mepwukat pahn ese popohl.+
9 Ihme kahrehda pwung pahrek dohsang kiht,
Oh pwung sohte leledohng kiht.
Se kin kasikasik marain, ahpw kilang! rotorot me mie;
Se kin kasikasik lingaling, ahpw se kin alialu nan rotorot.+
10 Se kin dehmseli dihd kan rasehng me maskun kan;
Se kin dedehmseli rasehng irail me sohte pwoaren masarail.+
Se kin dipekelekel nin souwas likamwete rotorot en nin soutik;
Nanpwungen me kehlail kan se duwehte me melahr akan.
11 Kiht koaros kin ngiringir duwehte pehr kan
Oh ngilen pahtou rasehng mwuroi kan.
Se kin kasikasik pwung pahrek, ahpw sohte;
Se kin kasikasik komour, ahpw e dohsang kiht.
At uhwong kan mi reht;
Se uhdahn ese at sapwung kan.+
13 Se kauwelahr kosonned oh kahmahmkihla Siohwa;
Se sohpeisangehr at Koht.
Se koasoia duwen kaloke meteikan oh uhwong;+
Se wiadahr likamw oh mwengininginki lokaia likamw kan sang nan at mohngiong.+
14 Pwung pahrek pwuralahr,+
Oh pwung kin kesihnen wasa doh;+
Mehlel kin dipekelekel ni wasahn tuhpenehn kahnimwo,
Oh dahme pwung sohte kak pedolong.
15 Mehlel sohralahr,+
Oh mehmen me sohpeisang suwed kin kulsang.
16 E ketin mahsanihada me sohte aramas emen,
Oh e ketin pwuriamweikihla me sohte emen me kin sewese irail,
Eri pein lime me ketikihdo komour,*
Oh sapwellime pwung me utung ih.
17 Ih eri ketin pwuhriong nan pwung rasehng likou mete ehu*
E ketin pwuhriong nan likoun ikih duwehte sapwellime likou+
Oh ketin kidimkihla pein ih ngoang duwehte likou ehu.*
18 E pahn ketin katingihkin irail dahme irail wiadahr:+
Engieng ong irail kan me kin uhwong ih, oh kalokolok ong sapwellime imwintihti kan.+
Oh e pahn ketin dupungkihong deke kan dahme konehng irail.
19 Sang ni kihrlahn ketipin irail pahn lemmwiki mwaren Siohwa
Oh sang ni dakadahn ketipin irail pahn lemmwiki sapwellime lingan,
Pwe e pahn ketido rasehng pillap ehu me ahd kehlail,
Pillap ehu me sapwellimen Siohwa ngehn sarawi* kin kamwakamwakid.
20 Siohwa ketin mahsanih: “Me pahn pwainda sapahl+ pahn kohdo Saion,+
Rehn kadaudok en Seikop kan me uhdihsang ar kin kauwehla kosonned.”+
21 Siohwa ketin mahsanih: “A ngehi, iet ei inou lap ong irail.”+ Siohwa pil ketin mahsanih: “Ei ngehn sarawi* me mi pohmw oh ei mahsen kan me I kihdiong nan ewomw—mepwukat sohte pahn kohsang nan ewomw, sang nan ewen noumw seri kan, de sang nan ewen nein noumw seri kan, sang met oh pil kohkohlahte.”
60 “Lih, uhda,+ kihpeseng marain, pwe omw marain leledohr.
Lingan en Siohwa dakeruhkadahr.+
2 Pwe kilang! rotorot pahn kipehdi sampah
Oh rotorot mosul pahn kipehdi wehi kan;
Ahpw Siohwa pahn ketin dakeruhkada,
Oh sapwellime lingan pahn sansalda pohmw.
4 Sarada oh kilengseli limwahmw!
Irail koaros pokonpenehr; irail kohkodohng uhk.
5 Ahnsowo ke pahn kilang oh linganla,+
Oh omw mohngiong pahn kumwukumw oh direkihla peren,
Pwehki kepwe kesempwal en nansed pahn kohwong uhk;
Kepwehn wehi kan pahn kodohng uhk.+
6 Mwutumwut en kamel kan pahn kipehdi sapwomw.
Kamel wol pwulopwul kan en Midian oh Epa.+
Aramas koaros sang Sipa pahn kohdo;
Irail pahn wa kohl oh warpwohmwahu pwetepwet.*
Irail pahn lohki kaping kan en Siohwa.+
7 Pelin sihpw koaros en Kedar+ pahn pokonpene rehmw.
Sihpw wol en Nepaiod kan+ pahn papahiuk.
9 Pwe deke kan pahn koapworopworkin ie;+
Sohp en Tarsis kan me tieng,*
Pwehn wahdo noumw seri kan sang wasa doh,+
Iangahki neirail silper oh kohl kan,
Ong mwaren Siohwa omw Koht oh Koht Sarawi en Israel,
Pwe e pahn ketin kalinganaiukala.+
I kalokeiuk sang ni ei engieng,
Ahpw I pahn kasalehiong uhk kadek kalahngan sang ni ei kupwuramwahu.+
11 Omw ewen kehl kan pahn kin langalang ahnsou koaros;+
Mepwukat sohte pahn ritidi nin rahn de nipwong,
Pwehn wadohng uhk kepwehn wehi kan,
Oh arail nanmwarki kan me pahn tepin wia met.+
13 Lingan en Lepanon pahn kohdo rehmw,+
Iangahki tuhke suniper, tuhke ahs, oh tuhke saipres,+
Pwehn kalinganahla ei wasa sarawio;
I pahn kalinganahla wasao ong aluweluwei kat.+
14 Seri kan me nein irail me kin kalokeiuk pahn kohdo oh poaridi mwohmw;
Irail koaros me kin mwamwahlikin uhk uhdahn pahn poaridi ni nehmw kan,
Oh irail pahn ekerkin uhk kahnimw en Siohwa,
Saion en Koht Sarawi en Israel.+
15 Mendahki I keseiukala oh aramas akan kailongkin uhk, oh sohte me keidwei rehmw,+
I pahn wiahkinuhkala mehkot me aramas pahn kapinga kohkohlahte,
Kahrepen peren erein dih kan koaros.+
16 Wehi kan oh nanmwarki kan pahn kihda omw anahn kan koaros+
Duwehte nohno men eh kin kadihdi nah seri men;+
Oh ke uhdahn pahn ese me ngehi, Siohwa, me omw Sounkomour,
Oh Koht Manaman en Seikop me pwainuhkada sapahl.+
17 I pahn wahdo kohl a kaidehn prons,
Oh I pahn wahdo silper a kaidehn mete,
Prons a kaidehn tuhke,
Oh mete a kaidehn takai;
Oh I pahn idihada popohl nin duwen omw sounapwalih
Oh pwung nin duwen noumw sounkoasoanehdi doadoahk.+
Oh ke pahn ekerki omw dihd kan Komour+ oh omw ewen kehl kan Kaping.
19 Ketipin sohla pahn wia marain en nin rahn ong kowe,
De pil lingen maram sohla pahn kamarainihiuk,
Pwe Siohwa pahn ketin wiahla marain poatopoat ehu ong uhk,+
Oh omw Koht pahn wiahla omw lingan.+
20 Omw ketipin sohla pahn kihrla,
Oh omw maram pahn kin maramarain ahnsou koaros,
Pwe Siohwa pahn ketin wiahla marain poatopoat ehu ong uhk,+
Oh rahnen omw mwahiei kan pahn imwisekla.+
22 Me malaulau pahn wiahla meh kid
Oh me tikitik men pahn wiahla wehi kehlail ehu.
Ngehi, Siohwa, pahn kamwadangahla met ni ahnsawi.”
61 Ngehn sarawi* en Kaun Wasa Lapalahpie Siohwa, mi rehi,+
Pwehki Siohwa ketin keieiehdier pwe I en lohki rohng mwahu ong me opampap.+
E ketin poaroneiehdo pwe I en kamwahwihala* me nan kapehd tikitikla,
Pwe I en lohkihong me sensel kan ar saledek
Oh kapehdpeseng mesen irail kan me mi nan imweteng,+
2 Pwe I en lohki pahr en sapwellimen Siohwa kupwuramwahu
Oh rahnen ikih en atail Koht,+
Pwe I en kansenamwahwih koaros me kin mwahiei.+
3 Pwe I en apwalih irail me mwahieiki Saion,
Pwe I en kihong irail mehn kapwat moahng ehu a kaidehn pehs kan,
Lehn peren a kaidehn mwahiei,
Likoun kaping a kaidehn sohla koapworopwor.
Oh irail pahn adaneki tuhke laud kan en pwung,
Me Siohwa ketin padokedi, pwehn kalinganahla ih.+
4 Irail pahn onehda sapahl wasa tehn kan mahso;+
Irail pahn kauwada wasa kan me tehnla ni ahnsou samwalahr ako,
Oh irail pahn onehda sapahl kahnimw mwomwla kan,+
Wasa tehn kan sang ehu dih lel ehu dih.+
5 “Mehn keiru kan pahn kesihnen oh apwalih noumwail pelin sihpw kan,
Oh mehn liki kan+ pahn wia noumwail soumwet kan oh noumwail soumwet en kreip kan.+
6 A kumwail, kumwail pahn adaneki samworo kan en Siohwa;+
Irail pahn ekerkin kumwail sounpapah en atail Koht.
7 Kumwail pahn ale pwaisamwail pahn pak riau a kaidehn kanamenek,
Oh irail pahn weriwerki peren pwehki pwaisarail a kaidehn saroh.
Ei, irail pahn sapwenikihla sapwarailo me laudla pahn pak riapak.+
Irail pahn pereperen kohkohlahte.+
I pahn kihong irail ketingparail ni lelepek,
Oh I pahn wiahiong irail inou lap poatopoat ehu.+
Koaros me kilang irail pahn pohnese
Me irail iei kadaudok me Siohwa ketin kapaiahda.”+
10 I uhdahn pahn perenkihda Siohwa.
I pahn perenkihda ei Koht ni mohngiong unsek.+
Pwe e ketin kalikawihkiniehda likou en komour;+
E ketin kidimkiniepene likou* en pwung,
Rasehng ohl kamwohd men me lisoaropkihda lisoarop ehu me duwehte ahn samworo men,+
Oh rasehng lih kamwohd men me kapwatkihda eh mehn kapwat kan.
11 Pwe duwehte sampah eh kawosehda werentuhke kan
Oh duwehte mwetuwel eh kawosehda dahme kamwarakdi loale,
Ih pil duwen Kaun Wasa Lapalahpie Siohwa
Ketin kahrehiong pwung+ oh kaping en pwarada+ mwohn wehi kan koaros.
62 Pwehki Saion I sohte pahn nennenla,+
Oh pwehki Serusalem I pahn mwekimwekid
Lao eh pwung pahn dakada rasehng marain lingaling ehu+
Oh komourpe pahn lullul rasehng mehnser ehu.+
Oh ahd kapw ehu pahn kohieng uhk,+
Me doauesen Siohwa pahn ketin koasoanehdi.
3 Ke pahn wiahla nihn lingan ehu nan limen Siohwa,
Oh lisoarop en nanmwarki ehu nan limen omw Koht.
Ahpw ke pahn adaneki Ei Peren Mi Reh,+
Oh sapwomw pahn adaneki Lih me Pwopwoudida.
Pwe Siohwa pahn ketin kupwurperenkin uhk,
Oh sapwomw pahn rasehng lih me pwopwoudida.
5 Pwe duwehte mwahnakapw men eh pwoudikihda meipwon men,
Noumw pwutak kan pahn pwoudikin uhk.
Duwehte ohl kamwohd men eh kin perenki lih kamwohd,
Omw Koht pahn ketin perenkin uhk.+
6 Serusalem, I idihadahr sounsilasil kan pohn omw dihd kan.
Rahn ehu pwon oh pwohng ehu pwon, irail sohte pahn nennenlahte.
Kumwail me kin koasoakoasoia duwen Siohwa,
Kumwail dehr kommoal.
7 Oh usehlahte kapakapohng ih lao e ketin koasoanehdi teng Serusalem,
Ei, lao e ketin wiahiong aramas akan nan sampah pwon ren kapinga ih.”+
8 Siohwa ketin kahukihla inou ehu ni eh ketin kauwada nin lime palimaun, nin lime roson:
“I solahr pahn kihong omw imwintihti kan konomw krein mehn tungoal,
De pil mehn liki kan solahr pahn nim omw wain kapw, me ke doadoahk laudki.+
9 Ahpw irail me kin kihpene krein kan pahn tungoale oh irail pahn kapinga Siohwa;
Oh irail me kin kihpene kreip kan pahn nim wain nan ei wasa me kelpene sarawi.”+
10 Kumwail keidwei, keidwei ni ewen kehl kan.
Kumwail kamwakelehda ahlo ong aramas akan.+
Kumwail wiahda, wiahda ahlo.
Kumwail kihsang takai kan.+
Kumwail kauwada kilel ehu* ong aramas akan.+
11 Kilang! Siohwa ketin lohkiseli lel ni imwin sampah:
“Kumwail ndaiong nein Saion serepein,
‘Kilang! Komourpomw kohkohdo.+
Kilang! Sapwellime keting mihmi reh,
Oh pweipwei me e kin ketin pwain mi mwohn silangi.’”+
12 Irail pahn adaneki aramas sarawi kan, irail me Siohwa ketin pwainda sapahl,+
Oh ke pahn adaneki Kahnimw ehu me Koht Ketin Rapahki, Kahnimw ehu me Sohte Lekdekla.+
63 Ihs memenet me kohkohdo sang Edom,+
Sang Posra+ ni eh likawih likou me poh lingaling,*
Memenet me likawih likou kaselel,
Alialu ni eh ahneki manaman laud?
“Ih ngehi* met, me koasoakoasoia dahme pwung,
Me sapwellimanki manaman laud en komourala.”
2 Dahme omw likowen weitahtahki,
Oh dahme omw likou kan duwehkihte en me kin tiak kreip kan?”+
3 “I kelehpw tiakpeseng kreip nan deupen mehn tiak kreip.
Sohte emen aramas iang ie.
I usehlahte tiakirailpeseng ni ei lingeringer,
Oh I usehlahte tiakirailpeseng ni ei engieng.+
Ntahrail sikdohng ei likou kan,
Oh I kareihala ei likou kan koaros.
4 Pwe rahnen ikih mi nan mohngiongi,+
Oh pahr en pwainda sapahl nei aramas akan leledohr.
5 I kilengla, ahpw sohte me pahn sawas;
I pwuriamweikihla me sohte me men kihda utuht.
6 I tiakpeseng aramas akan ni ei lingeringer,
I kahrehiong irail en sakaukihla ei engieng+
Oh wudekihdiong ntahrail nanpwel.”
7 I pahn koasoia sapwellimen Siohwa wiewia limpoak loalopwoat kan.
Sapwellimen Siohwa wiewia kan me warohng kaping,
Pwehki mehkoaros me Siohwa ketin wiahiongkitailehr,+
Soahng mwahu tohto me e ketin wiahiong wehin Israel,
Sang sapwellime kadek kalahngan oh sapwellime limpoak loalopwoat laud.
8 Pwe e ketin mahsanih: “Mehlel irail me nei aramas, seri kan me sohte pahn soaloalopwoat.”*+
Eri e ketin wiahla ar Sounkomour.+
9 Erein ar apwal akan koaros met kin kansensuwed ong ih.+
Oh sapwellime meninkeder* me kapitirailla.+
Sang sapwellime limpoak oh kupwurkalahngan e ketin pwainirailda sapahl,+
Oh e ketin pwekirailda oh wa irail erein rahn akan koaros mahso.+
10 Ahpw irail uhwongada+ oh kansensuwedihala sapwellime ngehn sarawi.*+
11 Oh irail tamanda rahn akan mahso,
Nan mwehin Moses sapwellime laduwo:
“Ia Ih me ketin wairaildahdo sang nan sehdo+ iangahki silepe kan en sapwellime pelin sihpwo?+
Ia Ih me ketikihdi loalen memenet Sapwellime ngehn sarawi,*+
12 Me ketin wiahiong nin lime lingan en ieiang palimaunen pehn Moses,+
Me ketin pwalangpeseng pihlo mwohrail+
Pwehn ketin wiahda mwar poatopoat ehu ong pein ih,+
13 Me ketin wiahiong irail en aluhwei nan ilok en sehd kan,*
Pwe ren alu oh sohte dipekelekel,
Duwehte oahs emen nan wasa patapat?*
14 Duwehte pelinmen kan ni ar kohdihla ni wasa patapat en wahwo,
Iei met duwen omwi pahn ketin kahluwa sapwellimomwi aramas akan,
Pwe komwi en ketin wiahda mwar lapalap* ehu ong pein komwi.+
15 Komw ketin mahsendihdo sang nanleng oh mahsanih
Sang omwi wasa ile me sarawi oh lingan.
Ia sapwellimomwi kupwur ngoang oh sapwellimomwi roson,
Ia mwekimwekid en omwi pepehm loal kan*+ oh omwi kadek kalahngan?+
Mepwukat irairdi sang ie.
16 Pwe komwi me Samat;+
Mehnda ma Eipraam sehsei kiht
Oh Israel sohte pohnese kiht,
Maing Siohwa, komwi me Samat.
Komwi me ketin pwainkitada sapahl sang mahsie.+
17 Maing Siohwa, dahme kahrehda komw ketin mweidohng kiht sen* salongasang alomwi kan?
Dahme kahrehda komw ketin mweidohng* at mohngiong en kekeluwakala, kahrehda se sohte lemmwikin komwi?+
Komw ketin sapahldo, pwehki sapwellimomwi ladu kat,
Keinek kan me komw ketin sapwellimanki.+
18 Sapwellimomwi aramas sarawi kan ahneki met erein ahnsou kis.
At imwintihti kan tiakpesengier omwi wasa sarawio.+
19 Erein ahnsou werei se duwehla irail kan me komw sohte mwahn kin ketin kaunda,
Duwehla irail kan me sohte mwahn kin adki mwaromwi.
64 Ihte ma komw ketin tehrpeseng nanleng oh ketidihdo,
Pwe nahna kan en rerada pwehki komwi,
2 Rasehng kisiniei ehu eh kin isikada kisin tuhke kan,
Oh kisiniei eh kin wiahiong pihl en pwoail,
Eri mwaromwi pahn sansalda rehn sapwellimomwi imwintihti kan,
Oh wehi kan pahn rerrer mwohn silangomwi!
3 Ni omwi ketin wiahda soahng kapwuriamwei kan me se sohte mwahn kasikasik,+
Komwi ketidihdo, oh nahna kan rerada mwohn silangomwi.+
4 Sangete mahso saikinte emen me rong de tehk kanahieng,
De pil saikinte pwoaren mas ehu me kilang Koht emen likin komwi,
5 Komwi ketin tuhwongehr irail me kin perenki wia dahme pwung,+
Irail me kin tamataman komwi oh idawehn alomwi kan.
Maing, komwi ketin engiengda ni at pousehlahte wiewia dihp,+
Se wiewia met erein ahnsou werei.
Ia duwe, se pahn pitila ahnsou wet?
Kiht koaros pahn mengila duwehte tehntuhke pwoat,
Oh at sapwung kan pahn waikitasang rasehng kisinieng.
7 Sohte emen me kin likweriong mwaromwi,
Sohte emen me kin songosong en kolokol teng komwi,
Pwe komwi kin ketin ekihsang kiht silangomwi,+
Oh komwi kin ketin kahrehiong kiht sen luwetala* pwehki at sapwung kan.
8 Ahpw met, Maing Siohwa, komwi me Samat.+
9 Maing Siohwa, komw dehr nohn ketin engieng,+
Oh komw dehr ketin tamataman at sapwung kan kohkohlahte.
Komw kupwurkalahngan oh ketin mahsanih kiht, pwe kiht koaros sapwellimomwi aramas.
10 Sapwellimomwi kahnimw sarawi kan wialahr sapwtehn ehu.
Saion wialahr sapwtehn ehu,
Serusalem wialahr wasa tehn ehu.+
11 Imwato* me sarawi oh lingan,
Wasa me samat mehn mahs ako kin kapinga komwi,
Mwasingkihla kisiniei,+
Oh mehkoaros me se kesempwalki mwomwla.
12 Maing Siohwa, pwehki met, komw pahn ketin usehlahte sohte wia mehkot?
Komw pahn ketin nennenweite oh mweidohng kiht sen wie lokolok laud?+
65 “I wiahiong pein ngehi en sansalda ong irail me sohte kin idek duwen ngehi;
I mweidala pein ngehi en dierek rehn irail me sohte kin rapahkin ie.+
I ndaiong wehi ehu me sohte kin likweriong mwarei, ‘Iet ngehi, iet ngehi!’+
2 I kapawehr limei kat rahn ehu pwon ong aramas keptakai kan,+
Ong irail kan me kin kekeid nan ahl me sohte mwahu,+
Ideidawehn pein ar lamalam akan;+
3 Pwihnen aramas ehu me kin kalapw kansensuwedih ie ni silangi,+
Me kin wiewia meirong kan nan mwetuwel kan+ oh wiewia meirong ediniei pohn prik kan.*
4 Irail kin mwomwohd nanpwungen sousou kan,+
Oh irail kin mi nan wasa rir kan* nipwong,
Oh kangkang uduk en pwihk kan,+
Oh pilen uduk en soahng samin kan mi nan neirail einpwoat kan.+
5 Irail kin nda, ‘Mihmihte wasahn; ke dehr keido mpei,
Pwe I me sarawi sang uhk.’*
Mepwukat iei ediniei nan ei keinuhnu, kisiniei me wie lullul rahn ehu pwon.
6 Kilang! E ntingdier mwohn silangi;
I sohte pahn nennenlahte,
Ahpw I pahn dupukohng irail,+
I pahn dupukohng irail ni mehkoaros*
7 Ong arail sapwung kan oh pil sapwung en samarail mehn mahs ako,”+ Siohwa me ketin mahmahsen.
“Pwehki irail wiahda meirong ediniei kan pohn nahna kan
Oh karaune ie pohn dohl akan,+
Keieu I pahn kalokehkin irail me konehng ar wiewia suwed koaros.”*
8 Iet me Siohwa ketin mahsanih:
“Duwehte ni ahnsou me wain kapw dierek nan dunen kreip ehu
Oh emen nda, ‘Ke dehr kauwehla, pwe miehte ekei me mwahu* loale,’
Eri ih met me I pahn wia ong nei ladu kan;
I sohte pahn kauwehla irail koaros.+
9 I pahn kapwarehda kadaudok ehu sang rehn Seikop,
Oh sang rehn Suda emen me pahn sohsohki ei nahna kan;+
Nei me pilipilda kan pahn sapwenikihla met,
Oh nei ladu kan pahn kousoanla wasao.+
10 Saron+ pahn wiahla mohs ehu ong sihpw kan
Oh Wahun* Akor+ pahn wiahla wasahn kommoal ehu ong kou kan,
Met pahn wiawihong nei aramas akan me kin rapahkin ie.
11 Ahpw kumwail kin mi nanpwungen irail me kesehla Siohwa,+
Irail me kin manokehla ei nahna sarawio,+
Irail me kin koasoanehdi tehpel ehu ong koht en Paiamwahu,
Oh irail me kin audehkihda kep kan wain me doalda ong koht me kin koasoanehdi ahnsou kohkohdo.
12 Eri I pahn koasoanediong kumwail kedlahs,+
Oh kumwail koaros pahn itiekidi pwe kumwail en kamakamala,+
Pwehki I likwer, ahpw kumwail sohte sapeng,
I mahsen, ahpw kumwail sohte rong;+
Kumwail pousehlahte wiewia dahme suwed mwohn silangi,*
Oh kumwail pilada dahme kin kansensuwedih ie.”+
13 Eri iet me Kaun Wasa Lapalahpie Siohwa ketin mahsanih:
“Kilang! Nei ladu kan pahn tungoal, ahpw kumwail pahn duhpekla.+
Kilang! Nei ladu kan pahn nimpil,+ ahpw kumwail pahn men nimpilda.
Kilang! Nei ladu kan pahn perenda,+ ahpw kumwail pahn namenekla.+
14 Kilang! Nei ladu kan pahn wer ni peren pwehki irair mwahu en mohngiong,
Ahpw kumwail pahn sengiseng pwehki medek en mohngiong
Oh kumwail pahn mwahiei pwehki madamadau* en sohla koapworopwor.
15 Kumwail pahn kihdi ahd ehu me nei me pilipilda kan pahn doadoahngki nin duwen mehn keria ehu,
Oh Kaun Wasa Lapalahpie Siohwa pahn ketin kemehla emenemen kumwail,
Ahpw e pahn ketin malipehki sapwellime ladu kan ehu ahd tohrohr;+
16 Pwe mehmen me kin rapahki kapai ehu ong pein ih nin sampah
Pahn alehdi kapai sang rehn Koht en mehlel,*
Oh mehmen me kin kahukihla inou ehu nin sampah
17 Pwe kilang! I pahn kapikada lahng kapw oh sampah kapw;+
Oh sohte me pahn tamataman mehkan en mahso,
De pil mepwukat sohla pahn kapwunode mohngiong.+
18 Eri kumwail perenda oh pereperenki kohkohlahte mehkan me I kin kapikada.
Pwe kilang! I pahn kapikada Serusalem pwe en wia kahrepen peren ehu
Oh nah aramas akan pwe en wia kahrepen peren ehu.+
19 Oh I pahn perenkihda Serusalem oh nei aramas akan;+
Sohla pahn mie ngilen sengiseng de sengiseng en kahpwal wasao.”+
20 “Sohla seri pwelel men sang wasao me pahn momourkihte rahn kei,
De pil sohla me mah men pahn mehla mwohn eh kaunsekala ahnsoun eh mour.
Pwe mehmen me mehla ni eh sounpar epwiki, aramas pahn wiahki ih kisin pwutak men,
Oh me dipan pahn riahla, mehnda ma e mahki sounpar epwiki.*
21 Irail pahn kauwada ihmw kan oh kousoanla loale,+
Oh irail pahn padokedi mwetin kreip kan oh tungoale wahrail kan.+
22 Irail sohte pahn kauwada ihmw kan pwe emen tohrohr en kousoan loale,
De pil irail sohte pahn padokedi pwe meteikan en tungoale.
Pwe en nei aramas akan rahn akan pahn duwehte rahn akan en tuhke pwoat,+
Oh nei me pilipilda kan uhdahn pahn perenkihda doadoahk en pehrail kan.
23 Oh irail sohte pahn doadoahk laud ahpw sohte katepe,+
De pil irail sohte pahn naitikihada seri kan ong kahpwal,
Pwe irail iei kadaudok me Siohwa ketin kapaiahda,+
Oh pil kadaudokarail kan me mi rehrail.+
24 Pil mwohn ar pahn likwer, I pahn sapeng;
Ni ar lokolokaiahte, I pahn karonge.
25 Kidien wel oh sihmpwul pahn mwengepene,
Laion pahn kang reh meng duwehte kouwol,+
Oh kenen serpent mwenge iei pwelpar.
Irail sohte pahn kamedekihala emen de pil kauwehla mehkot nan ei nahna sarawio pwon,”+ Siohwa me ketin mahmahsen.
66 Iet me Siohwa ketin mahsanih:
“Nanleng iei mwoalei, oh sampah iei utupen aluweluwei kat.+
2 Siohwa ketin mahsanih: “Nin limeiet me wiahda mepwukat koaros,
Oh ih duwen mepwukat koaros ar miehla.+
3 Me kin kemehla kouwol men duwehte emen me kin kemehla aramas emen.+
Me kin meirongkihla sihpw men duwehte emen me kin katimpeseng tepinweren kidi men.+
Me kin meirongkihla kisakis ehu—duwehte ntahn pwihk men!+
Me kin wiahda meirong en warpwohmwahu pwetepwet* ehu+ nin duwen mehn kataman ehu, duwehte emen me ndinda kapai ehu ni lokaiahn wunahni kan.*+
Irail pilada pein ar ahl akan,
Oh irail kin perenki dahme kasaut.
4 Eri I pahn pilada ahl akan en kaloke irail,+
Oh I pahn wadohng pohrail soahng kan me re masak.
Pwehki ni ei likwer, sohte me sapeng;
Ni ei mahsen, sohte me rong.+
Irail pousehlahte wiewia dahme suwed mwohn silangi,*
Oh irail pilada en wia dahme kin kansensuwedih ie.”+
5 Kumwail rong mahsen en Siohwa, kumwail me kin rerrerki* sapwellime mahsen:
“Riamwail kan me kin kailongkin kumwail oh katohreikumwailla pwehki mwarei nda, ‘Siohwa en ketin linganla!’+
Ahpw E pahn ketin pwarada oh wadohng kumwail peren,
Oh ih irail me pahn namenekla.”+
6 Mie mwoarong ehu sang nan kahnimwo, ngihl ehu sang nan tehnpas sarawio!
Iei ngihl me Siohwa kin ketin dupungkihong sapwellime imwintihti kan dahme konehng irail.
7 Mwohn eh medekda, e neitikla.+
Mwohn medek en neitik eh lel ih, e naitikihada seri pwutak men.
8 Ihs me rongehr soahng wet?
Ihs me kilangehr soahng pwukat?
Ia duwe, sahpw ehu pahn ipwidi ni rahn ehute?
De wehi ehu pahn ipwidi ni ahnsou ehute?
Ahpw, ni ahnsowohte me Saion medekda, e naitikihada nah seri kan.
9 Siohwa ketin mahsanih: “Ia duwe, I pahn wahdo serio lel ahnsoun ipwidi oh mwuri sohte mweidohng en ipwidi?”
Omw Koht ketin mahsanih: “De I pahn kahrehiong en tepida neitik oh mwuri irehdi serio en dehr ipwidi?”
10 Kumwail iang Serusalem perenda oh iang ih pereperen,+ kumwail koaros me poakohng ih.+
Kumwail iang ih pereperen kowahlap, kumwail koaros me mwahmwahieiki ih,
11 Pwe duwehte nohno men eh kin kadihdi nah seri lao e medla, ih pil duwen Serusalem eh pahn apwalih kumwail.
Ei, kumwail pahn nsenamwahula oh uhdahn perenda pwehki eh lingan kowahlap.
12 Pwe iet me Siohwa ketin mahsanih:
“Met I pahn wadohng ih popohl duwehte pillap pwoat+
Oh lingan en wehi kan duwehte lapake kehlail ehu.+
Kumwail pahn dihdi oh wisik ni pengepenge.
Oh kumwail pahn epwel mwahu pohn pwukie kan.
13 Duwehte nohno men eh kin kansenamwahwih nah seri,
Ih pil duwen ei pahn usehlahte kansenamwahwih kumwail;+
Oh kumwail pahn nsenamwahukihla Serusalem.+
14 Kumwail pahn kilang met, oh amwail mohngiong pahn perenda,
Oh tihmwail kan pahn keirda duwehte dihpw kapw.
Oh limen* Siohwa pahn sansalda rehn sapwellime ladu kan,
Ahpw e pahn ketin kadeikada sapwellime imwintihti kan.”+
15 “Pwe Siohwa pahn ketido rasehng kisiniei ehu,+
Oh tehnwere kuruma kan rasehng kisinieng en melimel ehu,+
Pwehn ketin dupuk ni engieng laud,
Pwehn ketin angiangki mpwulen kisiniei.+
16 Pwe sang ni kisiniei Siohwa pahn ketin kadeikada aramas koaros,*
Ei, sang ni sapwellime kedlahs;
Oh Siohwa pahn ketin kemehla me tohto.
17 Siohwa ketin mahsanih: “Irail me kin kasarawihirailla oh kamwakeleirailda pwe ren pedolong nan mwetuwel kan*+ oh idawehn me mi nanwerengeo, irail me kin kang uduken pwihk kan+ oh soahng kasaut kan oh kitik kan,+ irail koaros pahn imwisekla. 18 Pwehki I ese duwen arail wiewia kan oh arail lamalam akan, I pahn kohdo pwehn kihpene aramas en wehi koaros oh lokaia koaros, oh irail pahn kohdo oh kilang ei lingan.”
19 “I pahn wiahda kilel ehu nanpwungarail, oh I pahn kadarala ekei irail me pitila, ong wehi kan—Tarsis,+ Pul oh Lud,+ irail sounkesik ketieu kan, ong Tupal oh Seipan,+ oh ong deke doh kan—me saikinte rong duwen ngehi de kilang ei lingan; oh irail pahn lohki ei lingan nan wehi kan.+ 20 Irail pahn wahdo riamwail kan koaros sang nan wehi kan koaros+ nin duwen kisakis ehu ong Siohwa. Re pahn wairaildo pohn oahs kan, kuruma kan, kuruma me pweipweidi kan, pohn dongki kan oh kamel marahra kan. Re pahn wairaildahla pohn ei nahna sarawio, Serusalem, duwehte ni aramas en Israel kan ar kin wahdo arail kisakis kan nan mehn deudeu mwakelekel ehu nan tehnpesen Siohwa,” Siohwa me ketin mahmahsen.
21 Siohwa ketin mahsanih: “I pil pahn ale ekei ong samworo kan oh mehn Lipai kan.”
22 Siohwa ketin mahsanih: “Pwe duwehte lahng kapw oh sampah kapw+ me I kin wiahda ar pahn mihmihte mwohn silangi, ih pil duwen kadaudokamwail oh adamwail ar pahn mihmihte.”+
23 Siohwa pil ketin mahsanih: “Oh sang maram pwul lel maram pwul oh sang sapad lel sapad,
Aramas koaros* pahn pedolongodo pwe ren poaridi mwohn silangi.*+
24 Oh irail pahn kohieila oh kilang paliweren aramas mehla kan me uhwongiehda;
Mwahs kan me mi pohrail sohte pahn mehla,
Oh kisiniei me isikirailla sohte pahn kunla,+
Oh irail pahn wiahla mehkot kasaut ong aramas koaros.”*
Wehwehki “Sapwellimen Siohwa komour.”
De “eh soumas.”
LI, “padikasang.”
De “kaweid.”
Kilang KLL.
LI, “pwoaren mesei kat.”
De “pihru wihd.”
“Kamwakele,” nin duwen me iretikitik wet koasoia e kin dokedoke kapeipeseng mete pwehn kamwahwihala.
LI, “pweipweida sapahl.”
LI, “pweipweida sapahl.”
E mwomwen me tuhke kan oh mwetuwel kan me kin pidada kaudok en dikedik.
De “dereht en plaks.”
De “Ni imwin rahn akan.”
De “kaweid.”
Soangen tuhke kalaimwun ehu, me ni lokaiahn wai e adaneki “oak.”
De “noumwail sounkamwahwihala.”
LI, “pahn tungoale wahn arail wiewia kan.”
De “mwaramwar sein kan.”
De “kateng kan.”
De “likoun loale kan.”
Kilang KLL.
E wiawihkihda mwein likou arekarek me kin wiahda ehd.
Me iei, lipwen mwasik ehu ni paliweren lidu men de me selidi men.
Me iei, kanamenek en sohte pwopwoud oh sohte naineki seri.
LI, “pwise.”
LI, “span eisek.”
Kilang Ortk B14.
Kilang Ortk B14.
Kilang Ortk B14.
LI, sheʼohl′. Kilang KLL.
E dokedoke Serusalem.
De “nah lapalap akan.”
De “pwung pahrek.”
De “pilipil; kaweid.”
Met kin wehwehki kirikirihn krein me luwehdi nan mwahto mwurin dondol.
De “kaweid.”
De “tuhkehn kilel ehu.”
De “laion pwulopwul kan me wunaun ni tepinwere.”
LI, “E.”
LI, “ngilen me likilikwer.”
De “tomwlahr.”
Ni lokaiahn Ipru, lepin lokaia wet kin dokedoke tohtohsang emen. “At” kak dokedoke meh riemen de tohtohsang.
Soangen tuhke kalaimwun ehu, me ni lokaiahn wai e adaneki “oak.”
De “kadaudok.”
De kakete, “irail.”
Wehwehki “Ihte me Luhwehdi Pahn Pwurodo.”
De “dahu.”
De kakete “kamasak.”
De “wiahda pwoahr ni kehl ko.” LI, “pwalangpeseng.”
LI, sheʼohl′. Kilang KLL.
Wehwehki “Koht Kin Ketiket Rehtail.”
Me iei, Iupreitis.
Kakete wehwehki “Pitipit en kohla ni Dipwisou Lohdi, Mwadang Kodohng Dipwisou Lohdi.”
De “kadehde.”
LI, “kohla limwahn.”
Me iei, en Aiseia pwoudo.
Siloa iei warawar en pihl.
Me iei, Iupreitis.
Kilang Ais 7:14.
De “katengeikumwaildi.”
De “kaweid.”
De “ngoangkihte awih.”
LI, “wasa rahn.”
De “koperment; kaundahn soupeidi.”
De “koperment; kaundahn soupeidi.”
Met kin kalapw dokedoke prik kan me wiawihkihda reh meng oh pwehl.
Soangen tuhke pik pwoat.
LI, “sang mwuri.”
De kakete, “tehn pahm oh ahlek.”
De “kalokolok.”
De “lingan.”
LI, “I.”
Me iei, “mehn Asiria kan,” me mi nan iretikitik 5 oh 24.
De “kalokolok.”
De “sile pwoat.”
De “Sapwellimen Siohwa manaman.” LI, ruʹach. Kilang KLL “pneuʹma; ruʹach.”
De “pwung.”
LI, ruʹach. Kilang KLL “pneuʹma; ruʹach.”
De “kousoan erein ahnsou kei.”
De “laion pwulopwul me wunaun ni tepinwere.”
De kakete, “Oh koupwul oh laion pahn mwengepene.”
Sineik pwoisin kehlail men me mi nan Eisia oh Aperika.
De “tuhkehn kilel ehu.”
De “Wehi kan pahn rapahki ih.”
Me iei, Papilonia.
De “tuhkehn kilel ehu.”
LI, “pwopwen.”
De “kahrehiong arail manaman en lel.”
De kakete, “kamadahda.”
LI, “lowen.” Me iei, dahu tikitik me kin kohlongala nan sapw.
Me iei, Iupreitis.
LI, ruʹach. Kilang KLL “pneuʹma; ruʹach.”
De kakete, “poakiheki nan.”
“Iah” iei kamwotepen mwaren Siohwa.
De “Keseng.”
LI, “towe lih en,” met dokedoke tohn wasa ehu nin duwen lih emen.
De “tuhkehn kilel ehu.”
LI, “ong nei me sarawihla kan.”
LI, “sang ni imwin nanleng.”
LI, “oh arail Kesil kan,” ele e dokedoke Orion oh pwihnen usu kan me kapilpene.
Kilang Nem 14:44, ntp.
De “kapwat.”
De kakete, “Oh ngehn suwed kan me mwomwen kuht.”
De “ketikihong irail kommoal.”
De “arail kaunen doadoahk kan.”
De “kepit.”
De “kaunen doadoahk.”
LI, sheʼohl′. Kilang KLL.
LI, “kuht wol kan.”
LI, sheʼohl′. Kilang KLL.
LI, sheʼohl′. Kilang KLL.
LI, “ihmw.”
De “rah.”
Kitik laud me mie wune tekatek mehn perepe. Ni lokaiahn wai, porcupine.
De “onopadahr en kaloke.”
LI, “kalewen.”
De “sineik pwoisin me pitipit.”
LI, “kalewomw.”
E wiawihkihda mwein likou arekarek me kin wiahda ehd.
De “eh rah kan me direkihla kreip weitahta kan.”
De kakete, “Pwehki weriwer en mahwen kohdiongehr pohn omw wahntuhkehn ahnsoun karakar oh ahnsoun dolung.”
De “wadawadedi ni keneinei duwehte me tohndoadoahk alahlda men kin wia”; me iei, nan sounparte siluh.
LI, “nein Israel pwutak kan.”
LI, “wih en uduke.”
De “Wasa Patapat Pah nan.”
Kilang KLL.
De “kansenamwahu.”
De “pons en koht en liki kan.”
De “dihpw madekeng ehu me kin tapwtapwurseli nan sapwtehn.”
De “tuhkehn kilel ehu.”
LI, “kod.” Kilang KLL.
De kakete, “sang.”
Soangen tuhke reirei pwoat me kin kalapw keirda nan lehpwel kan.
Kisin tuhke ehu me re kin padokedi nan Isip. E kin kadoadoahk ong wiahda likou linen.
De “Mempis.”
De kakete, “tehn pahm oh ahlek.”
De “kaunen sounpeio.”
E wiawihkihda mwein likou arekarek me kin wiahda ehd.
De “sohte uhdahn likouda.”
LI, “kilisouda.”
De “me eh kaselel re kin pohlki.”
Ele met dokedoke sahpw en Papilonia mahso.
LI, “lukope ie diren medek.”
De “wisoare.”
De “kahn iroiro.”
LI, “pwutak en.”
Wehwehki “Sohte mweseisei.”
Pwihnen seiloak ehu iangahki neirail mahn akan me wa kepwe.
De “wadawadedi ni keneinei duwehte me tohndoadoahk alahlda men kin wia”; me iei, nan sounparte ehu.
E sansal me e dokedoke Serusalem.
LI, “nei aramas nair serepein kan.” Lokaiahn karasaras ehu ni koasoi kaselel kan, ele kasalepen pepehm en poakehla.
De “soundak oahs kan.”
De “wasa patapat pah.”
De “soundak oahs kan.”
E wiawihkihda mwein likou arekarek me kin wiahda ehd.
De “tomwla.”
LI, “wasahn kousoan ehu.”
De “kaunda.”
LI, “toutou.”
De “rah kan.”
LI, “werentuhke.”
Me iei, ehu kahng en Pillap Nail.
LI, “meipwon kan.”
De kakete, “wasahn peidi en sohp.”
Kakete dokedoke Dair.
LI, “rahn akan.”
De “sampah.”
De “E ketin pirer mesen met.”
De kakete, “madekengda.”
De “mahso.”
De kakete, “madekengda.”
De “palikapi.”
De “ni palimese.”
De “Kapwat.”
LI, “mwohn sapwellime ohl mah kan.”
De “Mwenge me keieu mwahu me diren kanengen tih.”
LI, “kadallehla.”
De “ketikihsang.”
Sansal me met kin dokedoke Mohap.
“Iah” iei kamwotepen mwaren Siohwa.
De “inen.”
Me iei, aramas en tamataman Koht oh mwareo oh kahrehiong en ndandla.
LI, ruʹach. Kilang KLL “pneuʹma; ruʹach.”
De “inen.”
LI, “ngoang.”
LI, “Nei paliwar mehla men.”
De kakete, “pwoaik en dihpw kan (mallow).”
De “pahn natikihedi me melahr akan me sohte ar kehl.”
De “kadeiko.”
Kilang KLL.
E sansal me e dokedoke Israel, me karasaraskihong lih emen oh mwetin kreip ehu.
De “tomwla.”
Kilang KLL.
Me iei, Iupreitis.
LI, “kod.” Kilang KLL.
E sansal me e dokedoke kahnimw poahsoan kaun, Sameria.
De “aklapalap; pohnmwahso.”
De “aklapalap; pohnmwahso.”
De “e pahn ketin wiahiong sapwellime ngehn sarawi en kohdiong pohn sounkopwung kan.”
De “Lain en sosohng pohn lain en sosohng, lain en sosohng pohn lain en sosohng.”
De “Lain en sosohng pohn lain en sosohng, lain en sosohng pohn lain en sosohng.”
LI, sheʼohl′. Kilang KLL.
De kakete, “wiadahr kaudiahl ehu.”
De “selin sosohng.”
LI, sheʼohl′. Kilang KLL.
De kakete, “Ni ahnsou me re wehwehkihda, irail uhdahn pahn masepwehkada.”
De “wasa patapat pah.”
De “ong sampah pwon.”
Ni lepin lokaiahn Ipru met dokedoke soangen wihd sakanakan ehu me kin pod nan Isip mahso.
De “panawih; lipwoare.”
De “kupwur.”
De “Oh me sapwellime erpit me lapalap.”
Kakete wehwehki “Wasahn Isihs en Pei Sarawi en Koht,” mwein dokedoke Serusalem.
LI, “aramas me ke sehse kan.”
De “kaweid.”
De “Ia uwen amwail pirekla!”
LI, “me kin kihda peneu.”
LI, “pwainda sapahl.”
Me iei, sang namenek oh mworusala.
LI, “wudeki sakau nin duwen meirong ehu,” e sansal me e dokedoke en pwungkihpene mehkot ehu.
De “ei manaman.” LI, ruʹach. Kilang KLL “pneuʹma; ruʹach.”
De “ni ar sohte idek sang ewei.”
LI, “nan wasahn ruk kehlail en Parao.”
De “sineik pwoisin me pitipit.”
De “kaweid.”
LI, “kansenamwahu.”
De kakete, “pwoaren nahk pihl.”
De “awiawihete.”
De “ngoangki awiawih.”
De “mwein likou ehu me reikihla ntahn soumwahu en lih.”
De kakete, “oh ekerkin irail samin.”
LI, “wih oh doalkihda leh tohto.”
De “angin esingek.” LI, ruʹach. Kilang KLL “pneuʹma; ruʹach.”
LI, “mehn sihp en soahng soh katepe kan.”
De “kasarawihala pein kumwail.”
“Doped” wasaht kadoadoahk nin duwen karasaras en wasahn isihs ehu, me dokedoke kasohrala.
De “soundak oahs kan.”
De “laion pwulopwul men me wunaun ni tepinwere.”
De “kisiniei.”
E wiawihkihda mwein likou arekarek me kin wiahda ehd.
De “kahn iroiro.”
De “sapwellimen Koht manaman.” LI, ruʹach. Kilang KLL “pneuʹma; ruʹach.”
De “sapwadada.”
De “at kehl.”
Dokedoke imwintihti.
De kakete, “madada.”
LI, ruʹach. Kilang KLL “pneuʹma; ruʹach.”
De “wasahn ruk ileile.”
De “doudouloale.”
LI, “loal.”
E sansal me e dokedoke Posra, poahsoan kaun en Edom.
Kitik laud me mie wune tekatek mehn perepe. Ni lokaiahn wai, porcupine.
Menpihr menet duwehte sioahk ahpw e lapalahsang.
LI, “takai kan.”
De kakete, “ngehn suwed me mwomwen kuht.”
Menpihr me duwehte likoht.
De “sapwellime manaman.” LI, ruʹach. Kilang KLL “pneuʹma; ruʹach.”
LI, “katohrepeseng met ong irail sang ni sahl en sosohng ehu.”
De “krokus.”
LI, “pwainda sapahl.”
De “kaunen sounkohwahn wain.”
De “Siria.”
LI, “Wiahda kapai ehu rehi oh kohieido rehi.”
E wiawihkihda mwein likou arekarek me kin wiahda ehd.
E wiawihkihda mwein likou arekarek me kin wiahda ehd.
De “kasaroh.”
LI, “miher ni ewen poahsoano.”
LI, “met.”
De kakete, “nanpwungen.”
De “dahu en Nail kan.”
LI, “wiawidahr.”
De “wiadahr.”
Me iei, Esekaia.
De “wosada sang weren krein kan me pwupwudi.”
LI, “rahn akan.”
Mweinele kehndakeo kin kadoadoahk pwehn wadek ahnsou, duwehte kuloak me kin doadoahngki ketipin.
LI, sheʼohl′. Kilang KLL.
“Iah” iei kamwotepen mwaren Siohwa.
Lokaiahn wai “swift.”
Lokaiahn wai “thrush.” De kakete, “krain.”
LI, “wia ei koapworopwor.”
Me iei, sapwellimen Koht mahsen kan oh wiewia kan.
LI, ruʹach. Kilang KLL “pneuʹma; ruʹach.”
De “ketikihsang dipei kan koaros mwohn silangomwi.”
LI, sheʼohl′. Kilang KLL.
LI, “perenkihda.”
Kilang KLL.
De “mehlel.”
LI, “rahn akan.”
De “Kaloalamwahwihala.”
LI, “uduk koaros.”
LI, “Uduk koaros.”
LI, ruʹach. Kilang KLL “pneuʹma; ruʹach.”
Uwen reirei nanpwungen imwin sendilepe oh imwin sendi sohkatepe ni ahnsou me peh kin kohpeseng. Kilang Ortk B14.
De kakete “wehwehki.”
De “madamadau.” LI, ruʹach. Kilang KLL “pneuʹma; ruʹach.”
De “sohte kak kihda tuwi me itar.”
De “kaun akan.”
De “koahiek en wehwehki ire kan.”
De “kehl laud.”
De “Nennenlahte mwohi.”
De “sang ni palimese.”
Me iei, pwehn papah Ih.
Me iei, sohte kak doare pein ih oh tikitik.
LI, “tapio.”
De “katengehdi mepwukat nan at mohngiong.”
De “sang ni palimese.”
De “keriaun kaun akan.”
De “mehkot me sohte mie.”
De “ei manaman.” LI, ruʹach. Kilang KLL “pneuʹma; ruʹach.”
De “kaweid.”
LI, “ketikihpeseng.”
LI, ruʹach. Kilang KLL “pneuʹma; ruʹach.”
De “I sohte kin ehukihong emen tohrohr ei lingan.”
De “oaroahr kan.”
De “kaweido.”
De “kaweid.”
LI, neʹphesh. Kilang KLL.
E kakete dokedoke soahng kan me pahn tepin kohdo ni ahnsou kohkohdo.
De “oh likih ie.”
Kilang KLL.
De “wiewiahn uhwong kan.”
E kakete dokedoke sounpadahk kan en Kosonned.
De “sang omw ipwidi.”
Wehwehki “Me Pwung Men,” lengileng wahu ehu ong Israel.
De “sahpw me anahne pihl.”
De “ei manaman.” LI, ruʹach. Kilang KLL “pneuʹma; ruʹach.”
Me iei, dikedik kan.
De “imwen kaudok ehu.”
Soangen tuhke kalaimwun ehu, me ni lokaiahn wai e adaneki “oak.”
De “lepin tuhke madekeng.”
LI, “kihpeseng.”
De “soukohp likamw akan.”
LI, “sapwadada lukopen nanmwarki kan.”
LI, “katengeiukedi.”
De “Sang palimese lel palikapi.”
De “akamaiong.”
De “Emen me wiahda ih.”
De “Emen me wiahda met.”
De kakete, “De pwehlo pahn nda: ‘Dahme ke wiahdao sohte mehn kolokol’?”
De “Dahme ke medek en neitingki?”
LI, “arail karis en sounpei koaros.”
De kakete, “Tohndoadoahk kan.”
De kakete, “sounnetinet kan.”
De kakete, “ni soh audepe.”
De “ni soh katepe.”
Me iei, dikedik kan me pwekipwekda pohn mahn akan.
LI, “poaridiong.”
De “kupwurei; ei kaweid.”
De “palimese.”
De “kupwurei; ei kaweid.”
LI, “kehlail.”
Mehn ngidar tikitik me aramas kin kapirki peh. Kilang “Takain ngidar pilawa” nan KLL.
De kakete, “oh I sohte pahn tuhwong emen ni elen kadek.”
De “Lih Nanmwarki.”
De “Lih Nanmwarki.”
De kakete, “Mendahki.”
De “Oh ke sohte pahn ese mwomwen silehdi met.”
De kakete, “Irail me kin kihpeseng nanleng; Sounkasawih usu kan.”
LI, “pein sapwe.”
LI, “me kohsang pihl en.”
De kakete, “piluhkadahr.”
De “wasahn kisiniei ong kapeipeseng mete.”
De “I sohte kin ehukihong emen tohrohr ei lingan.”
De “iangahki.”
De “sapwellime manaman.” LI, ruʹach. Kilang KLL “pneuʹma; ruʹach.”
De “pwehn wia kamwahu ong uhk.”
LI, “sang nan kapehden inei.”
De “Siohwa pahn ketikihong ie pwung pahrek.”
De “ketingpei.”
De kakete, “dohl kan koaros me sohte tuhke.”
De “tuhkehn kilel.”
LI, “pahnadirail.”
LI, “uduk koaros.”
LI, “pwainda sapahl.”
E wiawihkihda mwein likou arekarek me kin wiahda ehd.
LI, “ketikihong ie lowen irail me aleier padahk.”
De kakete, “kakehlakahki.”
LI, “lokaia ehu.”
LI, “panginda salengei.”
De “pelian.”
De “sohpeipene.”
Kisin mahn tikitik men me mwomwen lipahrourou me kin kang likou.
De “likih.”
De “waikumwaildo ni medek en neitik.”
De “ei manaman.”
De “kaweid.”
Kisin mahn tikitik men me mwomwen lipahrourou me kin kang likou.
De kakete, “Mwahs.”
Kilang KLL.
LI, “pwainda sapahl.”
LI, “mi pohn moangarail kan.”
De “me kin kapiluhkpene.”
De “kana.”
De “sohte pahn kak lokaia.”
De kakete, “dahme se rong?”
“Ih” kak dokedoke emen me kilikilang de Koht.
De “sohte mwohmw tohrohr ehu me se mwahuki reh.”
De “me wehwehki.”
De kakete, “E duwehte emen me aramas akan kin sohpeisang.”
LI, “kalokolok oh kopwung.”
De “mwomwen eh mour?”
De “kamakamala.”
De “Oh emen pahn kihong eh wasahn seridi.”
LI, “aramas kepwehpwe men.”
De “wia tiahk lemei.”
De “Ahpw Siohwa ketin kupwurperenki.”
LI, neʹphesh. Kilang KLL.
De “peren en.”
LI, “wudekihla.”
LI, neʹphesh. Kilang KLL.
De “pwutak kan.”
De “soumas.”
De “soumas.”
De “lapakehn engieng.”
De “takai kan me poh kisiniei.”
De “pwutak kan.”
De “pwutak kan.”
De “pweinen amwail doadoahk laud.”
LI, “ong wih.”
De “lelepek.”
De “pahn ketin mahkohng ih ni mehlel.”
De “I kupwurki.”
De “pahn wiahda ahd ehu ong Siohwa.”
Me iei, mehla.
De kakete, “Sang ni.”
Me iei, nan sousou.
De “Ia duwe, I pahn kansenamwahwihkin ie.”
Kakete dokedoke kaudok en dikedik kan.
De kakete, “nanmwarki.”
LI, sheʼohl′. Kilang KLL.
LI, “luwetala.”
De “oh ekihla ire kan?”
De “kousoan.”
LI, ruʹach. Kilang KLL “pneuʹma; ruʹach.”
LI, ruʹach. Kilang KLL “pneuʹma; ruʹach.”
De “kapwungkihong.”
LI, “wahn kilin au kan.”
LI, “kod ehu.” Kilang KLL.
De “amwail peren.”
LI, “pakerki kumwuten pehmwail en suwed.”
E wiawihkihda mwein likou arekarek me kin wiahda ehd.
LI, “wasa pwal.”
De “pein omw peren.”
De “mwenge sang.”
De “mehkot me sohte audepe.”
LI, “oh met suwed mwohn silangi.”
De “kana ong ih.”
Likoun perehpe ehu ong ahnsoun mahwen.
De “kana.”
De “likou reirei ehu me sohte peh.”
De “sapwellimen Siohwa manaman.” LI, ruʹach. Kilang KLL “pneuʹma; ruʹach.”
De “Ei manaman.” LI, ruʹach. Kilang KLL “pneuʹma; ruʹach.”
De “marain en omw nin sohrahn.”
Kilang KLL.
De “wasahn pedolong kan nan imwen menpihr kan?”
De “duwehte me nin tapio.”
De “pahn wiahla aramas pwung.” Kilang KLL, “Pwung.”
De “Manaman.” LI, ruʹach. Kilang KLL “pneuʹma; ruʹach.”
LI, “kidimpene.”
De “kepwe kan.”
De “likou reirei ehu me sohte peh.”
De “tuhkehn kilel ehu.”
De kakete, “uhdahn weitahta.”
Me iei, Koht.
De “wadohng ie kana.”
De “sohte sansalda me re likamw.”
De “tohnleng me kohsang mwohn silangi.”
De “sapwellime manaman.” LI, ruʹach. Kilang KLL “pneuʹma; ruʹach.”
De “Sapwellime manaman.” LI, ruʹach. Kilang KLL “pneuʹma; ruʹach.”
De “pihl loal kan.”
De “sapwtehn?”
De “Sapwellimen Siohwa manaman.” LI, ruʹach. Kilang KLL “pneuʹma; ruʹach.”
De “kaselel.”
LI, “Mwekimwekid en kepwehn loalomw kan.”
De “kahrehiong kiht sen.”
LI, “wiahiong.”
De “awih ih ni kanengamah.”
De “mwein likou ehu me reikihla ntahn soumwahu en lih.”
LI, “peipeseng.”
De “Me wiaikitada.”
De “At tehnpas sarawio.”
Met kin kalapw dokedoke prik kan me wiawihkihda reh meng oh pwehl.
De kakete, “nan imwios kan.”
De kakete, “Pwe ei sarawi pahn kohwong uhk.”
LI, “pahnadirail.”
LI, “pahnadirail.”
LI, “kapai ehu.”
De “Wasa Patapat Pah nan.”
LI, “pwoaren mesei kat.”
LI, ruʹach. Kilang KLL “pneuʹma; ruʹach.”
De “lelepek.” LI, “Amen.”
De “lelepek.” LI, “Amen.”
LI, “pwoaren mesei kat.”
De kakete, “Oh emen me sohte lel epwiki, aramas pahn wiahki ih me riahla.”
LI, ruʹach. Kilang KLL “pneuʹma; ruʹach.”
De “pwunodki duwen.”
Kilang KLL.
De kakete, “emen me kapikapinga dikedik ehu.”
LI, “pwoaren mesei kat.”
De “pwunodki duwen.”
De “manaman en.”
LI, “uduk koaros.”
Me iei, mwetuwel tohrohr kan me kin kadoadoahk ong kaudok en dikedik kan.
LI, “uduk koaros.”
De “kaudokiong ie.”
LI, “uduk koaros.”