Sostar trebul te daras le Iehovastar?

1, 2. Cadea sar phenel-pe ando Psalmo 25:14, so trebul te cheras caște avel amen iech amalimos chidino le Iehovaia?

SO PACHIAS că trebul duie manușenghe caște aven lașe amala? Daștil-pe că pheneias că le lașe amala trebun te iubin-pe hai te aven iech pașa aver. Tha, daștil-pe că i duma „dar” ci nachel prin chi goghi cana gândis-tu ca iech amalimos. Cu sea cadala, cadea sar sicavel vi o verseto pe savo bazol-pe cado articolo, codola cai camen te aven lașe amala le Iehovaia trebun te „daran lestar”. (Citisar Psalmo 25:14.)

² Chiar cana slujisaras de țâra sau mai but timpo le Iehovasche, savore trebul te sicavas iech dar sfânto caring leste. Tha so însemnol te daras le Devlestar? Sar daisaras te sichioas te daras le Iehovastar? Hai so sicaimata anda i dar le Devlestar daisaras te țârdas catar o administratoro Obadia, o baro rașai Iehoiada hai catar o rege Ioas?

SO ÎNSEMNOL TE DARAS LE DEVLESTAR?

3. Sar daștil te feril-ame i dar?

³ Daștil te astarel-ame i dar cana pachias că sam pașă te întâmplol-pe amenghe vareso nasul. Cadai dar daștil te avel lași, anda codoia că ajutil-ame te alosaras goghiaver so te cheras. Sar exemplo, i dar te peras încărel-ame parpale te na pașioas prea but catar iech bari hâv. I dar te avas dine dab cherel-ame te nașas catar iech situația periculoso. Hai i dar te hasaras amaro amalimos ieche jeneia cai si amenghe cuci va așiavela-ame te phenas sau te cheras vareso nelașio.

4. So felo dar camel o Satan te avel amen caring o Iehova?

⁴ O Satan camel ca le manușa te izdran daratar angla o Iehova. Vo sicavel so phendea vi o Elifaz, că o Iehova si iech Del pherdo holi, cai risarel parpale o nasulimos hai că le manușa ci daștin niciechdata te bucurin lesco ilo. (Iov 4:18, 19) O Satan camel te avel amen iech dar nesastevesti caring o Iehova hai cadea te cherel-ame te na mai slujisaras Lesche. Caște na peras ande cado athaimos, trebul te sichioas te sicavas iech dar lași hai iech bari pachiv le Devlesche.

5. So însemnol te daras le Iehovastar?

⁵ Sicavas că si amen iech dar lași caring o Del cana iubisaras-les hai duriaras amendar orisavi buchi cai daștil te rimosarel amaro amalimos Leia. Vi o Isus sicadea iech ‘dar sfânto’, tha cadaia ci cherelas-les te izdral daratar angla o Iehova. (Evr. 5:7; Is. 11:2, 3) Mai but, vo iubisardea le Iehovas zurales hai camlea anda sea o ilo te așunel lestar. (Ioan 14:21, 31) Cadea sar o Isus, vi amen sicavas iech bari pachiv caring o Iehova hai așaras-les anda codoia că jianas că silo iech Del iubitorii, goghiaver, orta hai zuralo. Sa cadea, jianas că o Iehova iubil-ame zurales but hai anda leste si importanto sar phiravas-ame cana vo sicavel-ame so te cheras. Cadea că, amen daisaras te duchavas-les sau te pheras lesco ilo bucuriatar. (Ps. 78:41; Prov. 27:11)

SAR DAISARAS TE SICHIOAS TE DARAS LE DEVLESTAR?

6. Savi si iech buchi prin savi daisaras te sichioas te daras le Devlestar? (Psalmo 34:11)

⁶ Chonic ci năștil-pe cadea te daral le Devlestar. Savore trebul te sichioas cadaia. (Citisar Psalmo 34:11.) Sar? Iech buchi cai ajutil-ame si te avas atento ca i creația de pașa amende. Cana dichas sea mai but „le buchia cărde” le Iehovastar, cai sicaven lesco goghiaverimos, zuralimos hai iubirea caring amende, sam vi mai zuriarde te das lesche pachiv hai te iubisaras-les. (Rom. 1:20) Iech phei po anav Adrienne phenel: „Bariol mânro ilo cana dichav sea le buchia cai cărdea-le o Iehova hai sar sicaven cadala lesco goghiaverimos. Cadea, hachiarav că vo jianel so si o mai mișto vi anda mande”. Pala so gândisardea-pe mai butivar ca cadai buchi, voi phendea: „Sostar te camav te cherav vareso cai daștilas te duriarel-ma le Iehovastar, codo cai dea-ma viața?”. Daisaras vi amen te cheras amenghe timpo ande cado curco caște gândisaras-ame ca iech buchi cai cărdea-la o Iehova? Cana cheras cadaia, amari iubirea hai pachiv anda leste va bariola vi mai but. (Ps. 111:2, 3)

7. Sar daștil te ajutil-ame o manglimos te sichioas te daras le Iehovastar?

⁷ Iech aver buchi prin savi daisaras te sichioas te daras le Devlestar si te mangas-ame lesche mai butivar. Cana mangas-ame le Iehovasche arăsas te prinjianas-les sea mai mișto. De fiesavi data cana mangas-les te del-ame zuralimos caște nachas părdal iech zumaimos, anas ande amari goghi chichi de zuralo si o Iehova. Cana naisaras le Iehovasche anda i răscumpărarea, anas ande amari goghi chichi de bari si i iubirea le Iehovaschi anda amende. Hai cana mangas-les te ajutil-ame cana si amen iech pharimos, hachiaras chichi de goghiaver si amaro Del. Cadal manglimata bariaren amari pachiv anda o Iehova. Sa cadea, zuriaren-ame te așias dur catar orisavi buchi cai daștilas te rimosarel amaro amalimos leia.

8. So va ajutila-ame te sicavas mai dur amari dar caring o Iehova?

⁸ Daisaras te sicavas mai dur amari dar caring o Iehova cana citisaras andai Biblia hai das amari zor te sichioas vi catar le manușa cai cărde so si mișto hai vi catar codola cai cărde buchia nasul. Mai dur, va avela te das duma anda dui slujitori loialo le Iehovasche: O Obadia, cai sas o administratoro anda o chăr le regesco Ahab, hai o baro rașai Iehoiada. Pala codoia, va avela te dichas so daisaras te sichioas catar o Ioas, o rege anda Iuda, cai, mai anglal, slujisaradea loialo le Iehovasche, tha, mai târzio, șudrilea lestar.

TE AVAS TROMANE, CADEA SAR O OBADIA

9. Sar ajutisardea i dar sfânto le Obadias? (1 Regi 18:3, 12)

⁹ I iechto data cana i Biblia del duma anda o Obadiab phenel: „O Obadia daralas zurales but le Iehovastar”. (Citisar 1 Regi 18:3, 12.) Sar ajutisardea i dar sfânto le Obadias? Cărdea-les te avel iech manuș pachivalo hai demno pachiamasco. Cadea că, o rege dea-les i buchi te lel sama pe lesco chăr. (Dich vi o verseto anda Neemia 7:2.) Sa cadea, i dar sfânto dea iech baro tromai le Obadias, buchi saveatar sas-les ciaces nevoia. Vo traisardea ando timpo cana railas o rege Ahab, cai „sas mai nasul andel iacha le Iehovasche sar sea [le regi] cai sas angla leste”. (1 Regi 16:30) Mai but, i Izabela, i rromni le regeschi Ahab, anelas închinarea co Baal. Voi urâlas cadea de but le Iehovas, că dea sea peschi zor caște chosel i închinarea uji anda o regato de nord hai chiar mudardea but profeți le Devlesche. (1 Regi 18:4) Hachiarel-pe claro, că Obadia anelas închinarea le Iehovasche ande iech pharo timpo.

10. Sar sicadea o Obadia iech baro tromai?

¹⁰ Sar sicadea o Obadia iech baro tromai? Cana i Izabela astardea te phirel pala le profeți le Devlesche caște mudarel-le, o Obadia ‘garadea 100 anda le profeți, hulade câte 50 ande iech peștera, hai dea-le manro hai pai’. (1 Regi 18:13, 14) Dacă avileas astardo, o Obadia avileas te avel mudardo. Si ciaces, sar orisavo manuș, vo ci camelas te merel. Tha, o Obadia iubisardea le Iehovas hai codolen cai anenas închinarea Lesche mai but sar iubilas pes.

11. Sar sile le slujitori le Iehovasche de aghies cadea sar o Obadia? (Dich vi i imaginea.)

¹¹ Aghies, but slujitori le Iehovasche train ande thema cai amari buchi sili așiadi. Von sicaven pachiv caring le autorități, tha, cadea sar o Obadia, von anen închinarea numai le Iehovasche. (Mat. 22:21) Cadala phrala sicaven că daran le Devlestar, anda codoia că așunen mai but lestar sar le manușendar. (Fap. 5:29) Cadea că, von phenen mai dur i vestea lași hai chiden-pe ande iech than garades andal întruniri. (Mat. 10:16, 28) Von len sama ca lenghe phralen hai pheian te avel-len le lila cai ajutil-le te așen pașă le Iehovastar. Te dichas o exemplo le phralesco Henri. Vo beșel ande iech them africano, cai mai anglal amari buchi sas-li așiadi. Ande codo timpo, o Henri dea pesco vast caște ajutil te aven îngărde le phralenghe le lila bazome pi Biblia. Vo scriisardea: „Me som iech manuș mai lajiavuno. Anda codoia, pachiav anda sea o ilo că i bari pachiv cai si man anda o Iehova dea-ma o tromai cai trebulas manghe caște cherav cadai buchi”. Va aveia vi tu sa cadea de tromano sar o Henri? Daștis te aves, cana bariares iech dar lași caring o Del.

TE AVAS LOIALI, SAR O BARO RAȘAI IEHOIADA

12. Sar sicadea peschi loialitatea caring o Iehova o baro rașai Iehoiada hai leschi rromni?

¹² O baro rașai Iehoiada daralas le Iehovastar. Cadai dar cărdea-les te avel loialo hai te zuriarel vi averen te așen pașa i închinarea ciaci. Cadaia dichilea-pe cana i șei la Izabelachi, i Atalia, astardea te rail, bi te avela o drepto, sar regina andi Iuda. Le manușen sas-len sostar te daran latar. Voi sas-li cadea de ratavali hai camelas cadea de but te avel regina, că astardea te mudarel sea pesche nepoțen, caște așel voi corcori co raimos. (2 Cron. 22:10, 11) Iech anda cadal șiavorre, o Ioas, așilea jiuvindo anda codoia că i rromni le bare rașaieschi Iehoiada, i Ioșebeat hastradea-les. Voi hai laco rrom garade le șiavorres hai ferisarde-les. Cadea, von line sama ca varecon anda i familia le Davidoschi te așel jiuvindo hai te arăsăl rege. O Iehoiada sas-lo loialo le Iehovasche hai ci mechlea ca lesco ilo te izdral daratar angla i Atalia. (Prov. 29:25)

13. Cana o Ioas sas-lo efta bărșengo, sar sicadea o Iehoiada încă iech data peschi loialitatea caring o Iehova?

¹³ Cana o Ioas sas-lo efta bărșengo, o Iehoiada sicadea încă iech data peschi loialitatea caring o Iehova. Vo cărdea pesche iech plano. Dacă avelas te înclel mișto, o Ioas, cas sas-les o drepto te rail, avelas te cărdiol rege. Tha, dacă ci înclelas, o Iehoiada daștilas te avel mudardo. Le ajutoroia le Iehovasco, le buchia găle mișto. Le căpetenii hai le leviți așile pașa o Iehoiada, vo machlea sar rege le șiavorres Ioas hai phendea ca i Atalia te avel mudardi. (2 Cron. 23:1-5, 11, 12, 15; 24:1) Pala codoia, o Iehoiada „cărdea iech solaharimos mașcar o Iehova hai o rege hai le manușa, că va avena mai dur o poporo le Iehovasco”. (2 Regi 11:17) Sa cadea, „șiutea codolen portari ca le udara catar o chăr le Iehovasco ca niciech manuș neujo ande vroiech felo te na avel andre”. (2 Cron. 23:19)

14. Sar sicadea-pe pachiv caring o Iehoiada anda codoia că dea pachiv le Iehovas?

¹⁴ Bute timpoia mai anglal, o Iehova cărdea i promisiunea cai avel: „Codolen cai den-ma pachiv va avela te dav-le vi me pachiv”. Hai vo pochindea ciaces le bare rașaies Iehoiada. (1 Sam. 2:30) Sar exemplo, o Iehova lea sama te avel scriime ande lesco Cuvânto sea so cărdea o Iehoiada hai cadea amen te sichioas lestar. (Rom. 15:4) Hai cana o Iehoiada mulea, sas lesche dini i bari pachiv te avel prahome „ando foro le Davidosco, pașa le regi, anda codoia că cărdea but lașe buchia ando Israelo, anda o ciacio Del hai anda Lesco chăr”. (2 Cron. 24:15, 16)

15. So daisaras te sichioas andai relatarea anda o Iehoiada? (Dich vi le imagini.)

¹⁵ I relatarea anda o Iehoiada daștil te ajutil savoren anda amende te bariaras iech dar lași caring o Del. Le phure sichion lestar te așen uștiade hai te ferin le bacrean le Devlesche. (Fap. 20:28) Codola mai phure daștin te sichion catar o Iehoiada că, dacă daran le Iehovastar hai așen lesche loialo, vo daștil te folosil-le caște pherel pesco scopo. Vo ci șiol-le de iech rig. Anda o modo sar phiradea-pe o Iehova caring o Iehoiada, le tărne sichion te den pachiv le phralenghe mai phure, vi mai but codolenghe cai slujin de but timpo le Iehovasche. (Prov. 16:31) Sa cadea, catar le căpetenii hai catar le leviți cai așile pașa o Iehoiada savore sichioas că trebul te așias pașa codola cai sile șiute angla amende hai te așunas lendar. (Evr. 13:17)

TE NA AVAS SAR O REGE IOAS

16. So sicavel că le reges Ioas sas-les iech pachiamos covlo?

¹⁶ O Iehoiada ajutisardea le reges Ioas te avel iech manuș lașio. (2 Regi 12:2) Cadea că, o tărno rege camlea te cherel so si mișto andel iacha le Iehovasche. Tha, pala so o Iehoiada mulea, o Ioas astardea te așunel catar le prinți apostați. So andea cadaia? Vi vo, hai vi le manușa opral save railas „astarde te den cianga angla le cașta sacro hai angla le idoli”. (2 Cron. 24:4, 17, 18) Le ileia duchado, o Iehova bișaldea ande lengo mașcar profeți caște anel-len parpale leste, tha von ci camle te așunen. Cadala ci așunde nici barem catar o șiav le bare rașaiesco, o Zaharia, cai sas na numai profeto hai rașai, tha vi o văro le Ioasosco. Mai but, o Ioas bâstărdea sea so cărdea cadai familia anda leste hai chiar șiutea ca o Zaharia te avel mudardo. (2 Cron. 22:11; 24:19-22)

17. Sar încliste le buchia anda o Ioas?

¹⁷ O Ioas ci dea peschi zor te încărel peschi dar caring o Iehova hai le buchia încliste nasul anda leste. O Iehova phendea: „Codolența cai prasan-ma va avela te phiravav-ma nasul”. (1 Sam. 2:30) Cadea că, iech țâni armata mardea ‘i armata zurales bari’ cai sas le Ioasos, hai vi vo sas-lo dino dab mai butivar. Pala so le sirieni tiliarde, o Ioas sas-lo mudardo catar pesche slujitori, anda codoia că vo mudardea le Zaharias. Cado rege sas cadea de nasul că ci sas lesche dini i pachiv te avel prahome „andel mormintea le regenghe”. (2 Cron. 24:23-25; dich i nota anda o studio catar o Matei 23:35, „o șiav cai sas le Barachias”)

18. Cadea sar phenel-pe ando Ieremia 17:7, 8, so trebul te cheras caște na avas sar o Ioas?

¹⁸ So daisaras te sichioas catar o Ioas? Vo sas-lo sar iech cașt savesche rădăcini ci sas-le zurale șiute andi phuv hai cas încărelas ande pânrende iech rovli. Cana cadai rovli – o Iehoiada – ci mai sas-lo pașa leste, hai i barval anda i apostazia astardea te marel, o Ioas pelea. Anda lesco exemplo nasul hachiaras că amari dar anda o Iehova ci trebul te încărel numai catar o fapto că le phrala andai congregația hai amari familia zuriaren-ame te cheras so si mișto. Caște avel amen iech pachiamos zuralo, trebul te așias pașa o Iehova hai te bariaras amari iubirea hai dar anda leste. Cheras cadaia cana sichioas corcore anda o Iehova, gândisaras-ame ca so citisardeam hai mangas-ame. (Citisar Ieremia 17:7, 8; Col. 2:6, 7)

19. So manghel amendar o Iehova?

¹⁹ O Iehova ci manghel mai but amendar sar daisaras te cheras. Ando Eclesiasto 12:13 arachas so manghel vo amendar. Cade phenel-pe: „Te daras catar o ciacio Del hai te încăres so phenel tuche vo, anda codoia că cadaia trebul te cherel o manuș”. Cana daras le Devlestar va avela te daisaras te nachas părdal le pharimata cai va avena hai te așias zurale ando pachiamos, cadea sar o Obadia hai o Iehoiada. Chanci ci va daștila te rimosarel amaro amalimos le Iehovaia.