Ingene igitabu ca Yobu cogufasha igihe utanga impanuro

1-2. Ni igiki kitoroheye ba bagenzi batatu ba Yobu be na Elihu?

AMAKURU y’ivyashikiye Yobu arakwiragira hirya no hino yo mu buseruko. Uwo mugabo yahora avugangwa kubera itunga ryiwe, asigaye yifumbereje kuko vyose vyamuhezeko. Abagenzi biwe batatu ari bo Elifazi, Biludadi na Zofari, barumva ivyamushikiye, maze bagaca bafata urugendo baja i Uzi kugira bamuremeshe. Ariko bakimukubita ijisho, barumirwa bakabura n’ico bavuga.

² Niwihe ishusho y’ukuntu ibintu vyifashe: Yobu yatakaje ibintu nka vyose yari atunze: uri ubusho bwiwe bw’intama, ubw’inka, ingamiya be n’indogobwa. Abana biwe be n’abasuku biwe benshi, bapfuye. N’inzu yasenyukiye ku bana biwe iracari ibihomvagurike. Wa wundi ngo amagorwa ntasiga ayandi, Yobu na we nyene yuzuye ibihute umubiri wose. Ba bagabo batatu bahashitse, basanga Yobu yicaye mu minyota yihebuye. None baca bakora iki? Bamara imisi indwi badakurako n’umunwa ngo bayagishe uwo mugabo arengewe n’umubabaro. (Yobu 2:​12, 13) Mu nyuma, umugabo akiri muto yitwa Elihu na we nyene arashika kwa Yobu agaca yicara hafi ya ba bagabo batatu. Vyakabaye kera, Yobu arateranura akanwa, agatangura kuvuma umusi yavukiyeko, akipfuza no gupfa. (Yobu 3:​1-3, 11) Emwe, biragaragara ko Yobu akeneye guhumurizwa! Ivyo rero abo bagabo baza kuvuga n’ingene baza kubivuga, biraza kwerekana nimba ari abagenzi ba Yobu vy’ukuri be n’uko bamwitwararika.

3. Twihweza ibiki muri iki kiganiro?

³ Musa ahumekewe na Yehova, yaranditse ivyo ba bagenzi batatu ba Yobu na Elihu bavuze be n’ivyo bakoze. Bimwe mu vyo Elifazi yavuze, biboneka ko yari yabihumekewe n’idayimoni. Ariko ivyo Elihu yavuze vyovyo vyava kuri Yehova. (Yobu 4:​12-16; 33:​24, 25) Ntibitangaje rero kubona mu gitabu ca Yobu tuhasanga impanuro nziza kuruta izindi, tukahasanga n’impanuro mbi cane. Muri iki kiganiro, turaza kubona ingene igitabu ca Yobu codufasha igihe tugomba gutanga impanuro. Ubwa mbere, tuza kwihweza akarorero kabi ka ba bagenzi batatu ba Yobu. Ubukurikira, tuza kwihweza akarorero keza ka Elihu. Muri ubwo burorero bwompi, turaza kubona ivyo Abisirayeli bashobora kuba barigiye ku gitabu ca Yobu, n’ivyo natwe twohigira muri iki gihe.

INGENE BA BAGENZI BATATU BA YOBU BAMUHAYE IMPANURO

4. Kubera iki ba bagenzi batatu ba Yobu bananiwe kumuhoza? (Raba n’ifoto.)

⁴ Bibiliya ivuga ko ba bagenzi batatu ba Yobu bamaze kwumva ivyago vyari vyamushikiye, bagiye kumuraba bafise intumbero yo «kumuremesha no kumuhoza.» (Yobu 2:11) Ariko rero vyarabananiye gushika kuri iyo ntumbero. Uti kubera iki? N’imiburiburi kubera imvo zitatu. Ubwa mbere, barihutiye kumucira urubanza. Nk’akarorero, biyumviriye ko Yobu yariko ashikirwa n’ivyago kubera ibicumuro yari yarakoze, kandi atari vyo.a (Yobu 4:7; 11:14) Ubwa kabiri, nyinshi mu mpanuro abo bagabo bahaye Yobu, zari impanuro zitaranga ubuntu, ata co zimaze, kandi zisogota. Nk’akarorero, naho abo bagabo bose ukwo ari batatu bavuga ibintu umengo vyarimwo ubwenge, nta co vyari bimaze. (Yobu 13:12) Incuro zibiri zose Biludadi yabwiye Yobu amukarira ko avuga menshi. (Yobu 8:2; 18:2) Zofari na we, yavuze amajambo acumita akikiriza ko Yobu ari «ikijuju.» (Yobu 11:12) Ubwa gatatu, naho mu gutanga izo mpanuro bashobora kuba batakoresheje ijwi riri hejuru, akenshi imvugo yabo yari imvugo y’agahemo, yo kwagiriza Yobu, kandi yamushira hasi. (Yobu 15:​7-11) Abo bagabo bahavuye bibanda cane ku kwagiriza Yobu, aho kumuremesha no kumuhoza.

5. Impanuro ba bagenzi ba Yobu bamuhaye zavuyemwo iki?

⁵ Ntibitangaje kubona za mpanuro ba bagenzi batatu ba Yobu bamuhaye ata co zavuyemwo. Amajambo bamubwiye yaramucumise. (Yobu 19:2) Duca dutahura igituma Yobu yaguma yiburanira. Ivyo vyatumye akenshi avuga ibintu atabanje kwiyumvira. (Yobu 6:​3, 26) Impanuro abo bagenzi batatu ba Yobu batanze, ntizari zihuye n’uko Yehova abona ibintu, kandi nta n’impuhwe bagiriye Yobu. Ivyo vyatumye bacika ibikoresho vya Shetani batabiciye n’ikanda. (Yobu 2:​4, 6) None iyo nkuru ishobora kuba yafashije gute Abisirayeli, kandi natwe yodufasha gute muri iki gihe?

6. Ni ivyigwa ibihe abashingantahe bo muri Isirayeli bashobora kuba barigiye ku karorero kabi ka ba bagenzi ba Yobu?

⁶ Ingene ishobora kuba yarafashije Abisirayeli. Yehova amaze gushinga ihanga rya Isirayeli, yaragenye abashingantahe kugira ngo bacire imanza iryo hanga bisunze amategeko yiwe agororotse. (Gus. 1:​15-18; 27:1) Abo bagabo basabwa kwumviriza bitonze imbere yo gutanga impanuro canke guca urubanza. (2 Ngo. 19:6) Babwirizwa kandi kubaza ibibazo aho kwiyumvira ko bazi amakuru yose. (Gus. 19:18) Vyongeye, bategerezwa kwirinda gukarira ababa babituye. Uti kubera iki? Kubera ko gukarira umuntu vyashobora gutuma atabugurukira. (Kuv. 22:​22-24) Ivyo ni bimwebimwe mu vyigwa abashingantahe bo muri Isirayeli bashobora kuba barigiye ku nkuru ya Yobu.

7. (a) Uretse abashingantahe bo muri Isirayeli, ni bande kandi bashobora gutanga impanuro? (b) Inkuru ya Yobu ishobora kuba yabafashije gute? (Imigani 27:9)

⁷ Ariko rero, abashingantahe si bo bonyene bashobora gutanga impanuro muri Isirayeli. Mu vy’ukuri, Umwisirayeli wese, yaba umuto canke uwukuze, umugore canke umugabo, yarashobora guha impanuro mugenziwe kugira amufashe kuryohora ubucuti afitaniye na Yehova, canke kugira amufashe gukosora inyifato kanaka. (Zab. 141:5) Impanuro nk’iyo ivuye ku mutima, umuntu yayihabwa n’umugenzi nyakuri. (Soma Imigani 27:9.) Abisirayeli rero bazirikanye ku karorero kabi ka ba bagenzi batatu ba Yobu, vyari kubafasha kubona ivyo batovuga n’ivyo batokora igihe batanga impanuro.

8. Ni ibiki dukwiye kwirinda igihe dutanga impanuro? (Raba n’amafoto.)

⁸ Ingene natwe yodufasha. Twebwe abakirisu, turipfuza gufasha abavukanyi na bashiki bacu igihe bari mu ngorane. Ariko kugira ngo tubishikeko, bisaba ko twirinda gukora ivyo ba bagenzi batatu ba Yobu bakoze. Ubwa mbere, ntidukwiye kwihutira gucira umuntu urubanza, kandi turakwiye kuraba ko dufise amakuru yose imbere yo kumuha impanuro. Ubwa kabiri, impanuro dutanga zikwiye kuba zishingiye kw’Ijambo ry’Imana, aho kuzishingira ku vyiyumviro vyacu bwite, nk’uko Elifazi yabigize kenshi. (Yobu 4:8; 5:​3, 27) Ubwa gatatu, igihe dutanga impanuro dukwiye kwirinda gutora amahinyu abandi canke kubakarira. Niwibuke yuko bimwebimwe mu vyo Elifazi na bagenziwe bavuze kwari ukuri. Wanashima, n’intumwa Pawulo yarasubiyemwo bimwebimwe mu vyo bavuze. (Gereranya Yobu 5:13 na 1 Abakorinto 3:19.) Ariko ntiwumve, vyinshi mu vyo bavuze vyaracafuza Imana kandi vyarababaje Yobu, akaba ari co gituma Imana yavuze ko batavuze ukuri ku biyerekeye. (Yobu 42:​7, 8) Igihe rero dutanga impanuro turakwiye kwirinda ibi bintu: Kwambika ibara Yehova canke gutuma uwo duhanura yumva ko adakundwa na Yehova. Reka ubu na ho turabe ivyo twokwigira ku karorero ka Elihu.

INGENE ELIHU YAHAYE IMPANURO YOBU

9. Kubera iki Yobu yari akeneye kuremeshwa inyuma y’aho ba bagenzi biwe bahereje kuvuga, kandi Yehova yamuremesheje gute?

⁹ Ikiyago Yobu yagiranye na ba bagenzi biwe gitegerezwa kuba caheze imitsi yaranze. Amajambo abo bagabo bari bamaze kuvuga, yari menshi cane ku buryo yuzuye ibigabane 28 vyo muri Bibiliya, kandi menshi muri yo bayavuganye ishavu ryinshi. Ntibitangaje kubona umubabaro wa Yobu utigeze ugabanuka. Yari agikeneye kuremeshwa no gukosorwa. None Yehova yamuremesheje gute? Yakoresheje Elihu. Kubera iki none Elihu atashotse avuga? Yasiguye ati: «Ndacari muto ariko mwe murakuze. Ni co gituma nabubashe nkigumya.» (Yobu 32:​6, 7) Elihu yaratahura ko abitereye mu myaka barusha ubukerebutsi abakiri bato, kubera ko imyaka myinshi baba bamaze ituma bamenya utuntu n’utundi. Ariko rero, Elihu amaze kwumviriza Yobu na ba bagenzi biwe yihanganye, yahavuye ava mu gacerere. Yavuze ati: «Imyaka gusa si yo ituma umuntu aba inkerebutsi, kandi abatama bonyene si bo batahura ibigororotse.» (Yobu 32:9) None ni ibiki Elihu yaciye avuga, kandi yabivuze gute?

10. Elihu yakoze iki imbere y’uko ahanura Yobu? (Yobu 33:​6, 7)

¹⁰ Imbere y’uko Elihu ahanura Yobu, yabanje gukora ibintu vyari gutuma iyo mpanuro yoroha kwakira. None yakoze ibiki? Ubwa mbere, yabanje guhwamika ishavu yari afise, kuko Bibiliya ivuga yuko yari yashavuriye Yobu. (Yobu 32:​2-5) Naho ari ukwo, nta na hamwe dusoma yuko yoba yarakankamiye Yobu. Ahubwo yamuyagishije abigiranye umutima mwiza, aramuhumuriza. Nk’akarorero, yabwiye Yobu ati: «Imbere y’Imana y’ukuri meze nkawe.» (Soma Yobu 33:​6, 7.) Ubukurikira, Elihu yarerekanye ko yari yumvirije Yobu yitonze. Ushima ari ko biri, yarasubiyemwo muri make ivyiyumviro nyamukuru Yobu yari yavuze, mu ncuro zitandatu yafashe ijambo. (Yobu 32:11; 33:​8-11) Ukwo nyene ni ko yabigenjeje kandi igihe yasubira guha Yobu impanuro.—Yobu 34:​5, 6, 9; 35:​1-4.

11. Elihu yahaye impanuro gute Yobu? (Yobu 33:1)

¹¹ Igihe Elihu yaha impanuro Yobu yabigize mu buryo bumutera iteka. Nk’akarorero, yaramuvuze mw’izina, ico kikaba ari ikintu ba bagabo batatu bashobora kuba batakoze. (Soma Yobu 33:1.) Elihu yarahaye kandi Yobu akaryo ko kugira ico avuze ku mpanuro yariko aramuha. Ivyo ashobora kuba yabitumwe n’ukuba yaributse ingene na we yipfuje cane kugira ico avuze, igihe Yobu na ba bagenzi biwe batatu bariko baraterana amajambo. (Yobu 32:4; 33:32) Elihu yarakebuye kandi Yobu adaca ku ruhande ku vyiyumviro bimwebimwe bitari vyo yari yavuze, yongera aramwibutsa abigiranye ubugwaneza ubukerebutsi bwa Yehova, ububasha bwiwe, ubutungane bwiwe, n’urukundo rwiwe rudahemuka. (Yobu 36:​18, 21-26; 37:​23, 24) Nta nkeka yuko impanuro nziza Elihu yahaye Yobu, zamuteguye kwakiriza yompi impanuro Umuremyi wiwe na we yagira amuhe. (Yobu 38:​1-3) None akarorero ka Elihu gashobora kuba kafashije gute Abisirayeli, kandi natwe kodufasha gute muri iki gihe?

12. (a) Yehova yakoresheje gute abahanuzi kugira afashe abasavyi biwe? (b) Akarorero ka Elihu gashobora kuba karafashije gute Abisirayeli?

¹² Ingene gashobora kuba karafashije Abisirayeli. Yehova yagiye aragena abahanuzi kugira amenyeshe abasavyi biwe b’Abisirayeli ibijanye n’umugambi wiwe. Nk’akarorero, mu gihe c’abacamanza, Debora yaraserutse nk’umuvyeyi araronsa abagize iryo hanga ubuyobozi buvuye ku Mana. Samweli na we kuva akiri muto, yarakoreye Yehova adahemuka nk’umuvugizi wiwe. (Abac. 4:​4-7; 5:7; 1 Sam. 3:​19, 20) Mu gihe c’abami na ho, Yehova yarakoresheje abahanuzi bagiye barakurikirana kugira ngo akomeze abasavyi biwe mu vy’impwemu yongere akosore ababa bataye inzira bakava mu gusenga kw’ukuri. (2 Sam. 12:​1-4; Ivyak. 3:24) Akarorero ka Elihu dusanga mu gitabu ca Yobu, kari gufasha abagabo n’abagore b’abizigirwa kumenya ivyo bakwiye kuvuga n’ingene bobivuga, igihe batanga impanuro.

13. Tworemesha gute abo dusangiye ukwizera?

¹³ Ingene natwe kodufasha. Na twebwe muri iki gihe turamenyesha abantu ivyo Imana igomba mu kwamamaza ukuri kwo mw’Ijambo ryayo. Ubundi buryo tubigira, ni mu kubwira abo dusangiye ukwizera amajambo yubaka kandi aremesha. (1 Kor. 14:3) Abakurambere barakwiye canecane kwitwararika ‘kuyagisha abavukanyi babo n’ijwi ryirura’, mbere n’abashobora kuba batwawe n’agashavu canke abavuga ‘batabanje kwiyumvira.’—1 Tes. 5:14; Yobu 6:3.

14-15. Tanga akarorero kerekana ingene umukurambere yokwigana Elihu igihe agomba gutanga impanuro.

¹⁴ Iyumvire aka karorero: Umukurambere aramenye ko mw’ishengero iwabo hariho mushiki wacu umwe yacitse intege. We n’uwundi muvukanyi baciye bafata ingingo yo kumugendera kugira ngo bamuremeshe. Uwo mushiki wacu arababwira ko naho atigera asiba amakoraniro n’indimiro, yumva ko ata munezero agifise. None uwo mukurambere yoca akora iki?

¹⁵ Ubwa mbere, aca agerageza kurondera kumenya neza imvo zituma uwo mushiki wacu yumva amerewe gutyo. Kugira ngo ivyo abishikeko, akwiye kubanza kumwumviriza yitonze. Vyoba bitumwa n’uko yiyumvira ko atakibereye gukundwa n’Imana? Yoba aremerewe «n’amaganya y’ubu buzima»? (Luka 21:34) Ubwa kabiri, uwo mukurambere akwiye guca araba ivyo yokezako uwo mushiki wacu. Nk’akarorero, yoshobora kumukeza kubera ko abandanya kwitaba amakoraniro no kuja mu ndimiro, naho yumva ko ata munezero agifise. Ubwa gatatu, uwo mukurambere amaze gutahura neza uko ivy’uwo mushiki wacu vyifashe be n’ibituma yumva ko acitse intege, azoca akoresha Bibiliya kugira afashe uwo mushiki wacu guhera amazinda ko Yehova amukunda.—Gal. 2:20.

NUBANDANYE GUKURA IVYIGWA KU GITABU CA YOBU

16. Twokora iki kugira tubandanye gukura ivyigwa ku gitabu ca Yobu?

¹⁶ Emwe igitabu ca Yobu kirimwo ivyigwa vyinshi! Nk’uko twabibonye mu kiganiro c’imbere y’iki, inkuru ya Yobu ntitwigisha gusa igituma Imana ireka tugashikirwa n‘ingorane, ahubwo iranatwigisha ingene dushobora kuzihanganira. Iki kiganiro na co, catwibukije ko twese dushobora gutanga impanuro nziza, igihe twirinze gukurikiza akarorero kabi ka ba bagenzi batatu ba Yobu, ahubwo tugakurikiza akarorero keza ka Elihu. Imbere y’uko utanga impanuro, hari aho vyoba vyiza ubanje gusuzuma ivyigwa dusanga mu gitabu ca Yobu. Nimba na ho haciye igihe utagisoma, niwishingire umugambi wo gusubira kugisoma. Nta nkeka ko utazobura ibindi vyigwa ugikuramwo.