Tumia Kikamili Kutoa Sababu kwa Kutumia Maandiko
1 “Je! wewe waona laiti wewe binafsi ungeweza kutoa sababu kwa mafanikio zaidi kwa kutumia Maandiko? Je! kuna maswali ambayo wewe hupata katika huduma yako na ambayo huona kuwa magumu kushughulika nayo kwa mafanikio? Je! wewe ungethamini kupata msaada fulani wa kushughulika nayo ili usaidie wenye mioyo minyoofu katika sehemu yenu watambue ukweli?” Kitabu Kutoa Sababu kwa Kutumia Maandiko ndio msaada hasa tunaohitaji ili tuwe wenye mafanikio zaidi katika huduma yetu. Tangu kitolewe, je! wewe umekuwa ukikitumia kikamili chombo hiki bora ili ‘kutoa sababu, kufafanua, na kuthibitisha’ kwa kutumia Maandiko yale unayofundisha?—Mdo. 17:2, 3, NW.
WAKATI WA KUTUMIA KITABU KUTOA SABABU
2 Unapojitayarisha kwa ajili ya huduma ya nyumba kwa nyumba, inafaa hasa kufikiria baadhi ya yale matangulizi bora katika sehemu ya kufungua. Je! waweza kutumia mojawapo au urekebishe mmoja ufaane na hali za kwenu? Bila shaka kufikiria madokezo hayo kutakusaidia upate njia mpya. Pia, unapokuwa ukishiriki katika kazi yenyewe ya nyumba kwa nyumba, huenda ukatambua kwamba utangulizi wako hauamshi kupendezwa. Katikati ya ziara, kwa nini usirejezee kitabu Kutoa Sababu upate mawazo? Au hesabu fulani ya wenye nyumba huenda wakawa walizuia mazungumzo kwa jibu lile lile. Kurejezea sehemu inayoanzia ukurasa 15 huenda kukakusaidia ugeuze unaoelekea kuwa ukuta usiopandika uwe mlango ulio wazi wa kuwa na mazungumzo zaidi.
3 Unapofanya ziara ya kurudia au kuongoza funzo la Biblia, huenda ukapata kwamba mtu huyo anaona vigumu fulani katika kuelewa au kuthamini jambo fulani. Huenda akawa angali ana maswali. Kitabu Kutoa Sababu kina mamia ya maswali hususa na vielezi vingi vya maneno ambavyo vyaweza kukusaidia ufikie moyo wa mwulizaji. Kwa mfano, angalia kielezi kwenye ukurasa 371 kinachoonyesha kwa nini Yehova ameruhusu uovu.
4 Kitabu Kutoa Sababu kinaweza kukusaidia pia ueleze mwanafunzi wa Biblia ni mabadiliko gani ambayo huenda akahitaji kufanya katika maisha yake ili ampendeze Yehova. Kwa mfano, huenda watu wawili wa jinsia tofauti wakawa wanaishi pamoja, ingawa hawajafunga ndoa kisheria. Sababu za Kimaandiko juu ya jambo hilo zimeandaliwa kwenye kurasa 241 na 242. Au mwanafunzi wa Biblia huenda akaona vigumu kuacha kutumia tumbaku au kutumia dawa za kulevya. Chini ya kichwa kikuu “Dawa za Kulevya,” kitabu chetu kipya cha mafundisho hupitia mambo mengine ya hakika juu ya mazoea hayo yenye kudhuru na kuonyesha sababu zenye nguvu kwa nini Wakristo huyaepuka.
5 Katika vita vyetu vya kiroho, kitabu Kutoa Sababu chaweza kutusaidia kutumia “upanga wa Roho” kwa njia yenye nguvu ili kuweka huru mateka kutoka kwa mafundisho na mawazo ya Kibabuloni yaliyoimarika sana. (Efe. 6:17; 2 Kor. 10:4, 5) Lakini hata silaha yenye nguvu zaidi ya zote haifai ikiwa askari hajui namna ya kuitumia au haichukui. Hivyo, kama ilivyokuwa katika siku za Musa, sisi askari wa Kristo lazima ‘tujivike silaha ili kutangulia Yehova kwa ajili ya vita.’ (Hes. 32:20, 21; 2 Tim. 2:3) Sisi sote na tutumie kikamili Kutoa Sababu kwa Kutumia Maandiko na hivyo sikuzote tuwe tayari kutetea na kusogeza mbele habari njema.