Onyesha Wengine Ufikirio—Sehemu ya 1
1 Twafurahi kuona usitawi wa watu wa Yehova, ambao umetokeza ongezeko la idadi ya makutaniko. Katika maeneo mengine, hasa katika majiji makubwa, vifaa vya Jumba la Ufalme vimetumiwa kwa kadiri kubwa, wakati mwingine ikihitaji makutaniko kadhaa yatumie Jumba lilelile la Ufalme. Hali hii yahitaji ufikirio zaidi kwa upande wa wote wanaohusika.
2 Kila kutaniko linalotumia Jumba la Ufalme lapaswa kuliacha likiwa katika hali nzuri na yenye utaratibu kwa ajili ya akina ndugu wanaokuja baadaye. Viti vyapaswa kuwekwa kwa mpango, fasihi zozote zilizo kwenye meza ya vitabu zapasa kuwekwa kando, na vifaa vyovyote vya kibinafsi vilivyoachwa kwenye Jumba la Ufalme vyapaswa kukusanywa. Vyoo vyapaswa kuachwa katika hali nadhifu, kwa kuhakikisha kwamba sabuni, taulo, na ugavi wa karatasi za chooni vimejazwa tena na vyombo vya kuwekea takataka vimeachwa tupu.
3 Wakati mkutano mwingine umeratibiwa kuanza muda mfupi baadaye, wale wanaobaki baada ya mkutano uliotangulia hawapaswi kukawia isivyo lazima, wakivuruga matayarisho ya mkutano ufuatao. Mazungumzo ya kijamii ya muda mrefu yaweza kutokeza kujaa kupita kiasi ukumbini na kuchelewesha akina ndugu kupanga vitu kwa ajili ya mkutano unaofuata. Mahali pa kuegesha magari kuzunguka Jumba la Ufalme paweza kuwa padogo, na lingekuwa jambo la fadhili kuondoka mara moja ili wale wanaokuja wawe na mahali pa kuegesha. Kwa upande ule mwingine, wale wanaohudhuria mkutano unaofuata hawapaswi kufika mapema mno, wakisababisha msongamano usio wa lazima ukumbini na mahali pa kuegeshea.
4 Mahali ambapo makutaniko kadhaa yanahusika, kuna uhitaji wa pekee wa ushirikiano wa karibu katika kufanya mipango ya usafishaji wa kila juma wa Jumba la Ufalme. Kwa kawaida, makutaniko huwa na duru kwa kipindi kilichochaguliwa. Kutaniko lenu likiwa na daraka hilo, hakikisha kwamba usafishaji wafanywa kikamili na haraka. Kisha makutaniko yale mengine yanayotumia jumba hilo hayatakuwa na sababu ya kulalamika.
5 Pindi kwa pindi kuna uhitaji kwa kila kutaniko kubadili saa zao za mkutano, kama vile mwangalizi wa mzunguko azurupo. Ikiwa kutaniko jingine laathiriwa, wazee wapaswa kujulisha kutaniko lile jingine mapema vya kutosha ili kwamba waweze kuwajulisha wahubiri wao mapema iwezekanavyo. Pia, ikiwa utendaji ulioidhinishwa, kama vile Shule ya Utumishi wa Painia, mkutano wa wazee wa mzunguko, au harusi, unaratibiwa, makutaniko mengine na waangalizi wowote wa mzunguko walioathiriwa wapaswa kujulishwa mapema vya kutosha; hivyo basi hawataratibu utumiaji wa Jumba la Ufalme wakati uleule.
6 Kuna idadi ya majumba yatumiwayo na makutaniko yaliyogawiwa mizunguko tofauti. Ni muhimu kwamba waangalizi wasafirio wanaozuru majumba haya wajulishane juu ya ziara zinazokuja ambazo zimeratibiwa. Mabadiliko ya dakika ya mwisho au magumu mengineyo yaweza kutokea waangalizi wawili wasafirio wanaporatibu ziara wakati wa juma lilelile.
7 Ufikirio wenye upendo kwa wengine, uwasiliano mzuri, mpango wa mapema, na ushirikiano utasaidia kudumisha uhusiano mchangamfu kati ya makutaniko na utahakikisha kwamba mambo yote ‘yanatendeka kwa uzuri na kwa utaratibu.’—1 Kor. 14:40.