Kuboresha Ustadi Wetu Katika Huduma—Kupendezwa na Watu Kibinafsi

Kwa Nini Ni Muhimu: Yesu alipendezwa na watu kibinafsi. Kwa mfano, pindi moja huenda Yesu alitambua kwamba kiziwi fulani ana wasiwasi, hivyo alimponya faraghani mbali na umati wa watu. (Marko 7:31-35) Aliwaonyesha ufikirio wanafunzi wake kwa kutambua mipaka yao na hivyo hakuwaambia mambo mengi kupita kiasi. (Yoh. 16:12) Hata akiwa mbinguni, Yesu anapendezwa na watu kibinafsi. (2 Tim. 4:17) Tukiwa wafuasi wa Kristo, tunapenda kumwiga. (1 Pet. 2:21; 1 Yoh. 3:16, 18) Zaidi ya hilo, tutakuwa na matokeo zaidi katika huduma ikiwa tutamwonyesha mwenye nyumba ufikirio na kuzingatia hali, mapendezi, na mahangaiko yake. Huenda atakuwa tayari kusikiliza, akitambua kwamba kusudi letu si tu kusambaza ujumbe au kugawa machapisho, bali tunapendezwa naye kibinafsi.

Jinsi ya Kufanya Hivyo:

Jitayarishe vizuri. Tulia, tabasamu, na uwe mwenye urafiki.
Uwe makini. Je, kuna chochote kinachoonyesha kwamba mwenye nyumba ana watoto? anapenda bustani au anafuga wanyama? au ana imani fulani za kidini? Unaweza kubadili utangulizi wako kulingana na hali zake.
Muulize maoni yake, na umsikilize kwa makini bila kumkatiza isivyo lazima. Mtazame anapoongea ili kuonyesha kwamba unamsikiliza. Mshukuru kwa maelezo yake, na umpongeze kutoka moyoni. Epuka mabishano.
Uwe mwenye kubadilikana. Ikihitajika, badili mazungumzo kulingana na mahangaiko ya mwenye nyumba. Inaweza kuwa rahisi kufanya hivyo kwa sababu trakti, broshua, na magazeti yetu yanazungumzia habari tofauti-tofauti. Ikiwa umemtembelea wakati usiofaa, labda wakati ana shughuli nyingi, onyesha kwamba unatambua hilo na ufupishe mazungumzo.

Jaribu Dokezo Hili kwa Mwezi Mzima:

Fanyeni mazoezi wakati wa ibada ya familia, au labda mnapokuwa katika utumishi, kuhusu jinsi mhubiri anavyoweza kubadili mazungumzo ili azungumzie jambo linalomhangaisha mwenye nyumba.
Katika baadhi ya mikutano ya utumishi wa shambani, ndugu anayeongoza anaweza kuzungumzia au kupanga kuwe na onyesho la jinsi ya kupendezwa na watu kibinafsi.