Kuboresha Ustadi Wetu Katika Huduma—Kushughulika na Mwenye Nyumba Mwenye Hasira

Kwa Nini Ni Muhimu: Watu wengi tunaokutana nao katika huduma hututendea kwa heshima. Hata hivyo, Yesu alitabiri kwamba watu wengine watatuchukia. (Yoh. 17:14) Kwa hiyo, hatupaswi kushangaa tunapokutana na mwenye nyumba mwenye hasira. Tunapokabili hali hiyo, tungependa kutenda kwa njia inayompendeza yule tunayemwakilisha, yaani, Yehova. (Rom. 12:17-21; 1 Pet. 3:15) Kufanya hivyo kunaweza kuzuia hali isiwe mbaya zaidi. Pia, tutatoa ushahidi kwa mwenye nyumba na wanaotutazama, na kuwafanya wawe tayari zaidi kusikiliza wakati mwingine Mashahidi wa Yehova watakapowatembelea.—2 Kor. 6:3.

Jinsi ya Kufanya Hivyo:

Uwe mtulivu na mwenye urafiki. Kufanya hivyo kutasaidia kutuliza hali hiyo. Usiudhike haraka. (Mhu. 7:9) Huenda mwenye nyumba amekasirika kwa sababu ya matatizo ya kibinafsi au kwa sababu umemtembelea wakati usiofaa. Hata ikiwa amekasirishwa na ujumbe wetu, mara nyingi ni kwa sababu amepotoshwa.—2 Kor. 4:4.
Jibu kwa upole na utumie maneno yenye neema. (Met. 15:1) Je, ulimwamsha au kukatiza shughuli zake? Ingawa hatuombi msamaha kwa ajili ya kazi yetu, kwa unyenyekevu unaweza kumpa pole kwa kumtembelea wakati usiofaa. Je, amekasirika kwa sababu ya maneno yasiyo ya kweli aliyosikia kutuhusu? Ikiwa ndivyo, unaweza kusema: “Ninaelewa kwa nini jambo hilo limekukasirisha. Hata hivyo, inaonekana kwamba jambo ulilosikia kutuhusu si la kweli. Je, ungependa kupata ufafanuzi zaidi?” Je, anapinga jambo fulani tunaloamini, labda kuhusu damu au kutenga na ushirika? Unaweza kusema: “Ninaelewa. Wengine pia wana maoni kama yako. Je, ungependa kujua Biblia inasema nini kuhusu fundisho hilo?”
Ikiwa mwenye nyumba amekasirika sana, huenda ikafaa kuondoka bila kusema lolote. Akisema kwamba hataki Mashahidi wa Yehova wamtembelee tena, unaweza kumhakikishia kwamba tutaheshimu uamuzi wake.

Jaribu Dokezo Hili kwa Mwezi Mzima:

Fanyeni mazoezi wakati wa ibada yenu ya familia.
Baada ya kumwacha mwenye nyumba mwenye hasira, zungumza na mwandamani wako kuhusu jinsi ambavyo ungeweza kushughulikia hali hiyo vizuri zaidi.