Kutoka kwa Wasomaji Wetu

Husoma Toka Jalada Hadi Jalada Sikuzote nimekuwa nikipenda Amkeni!, lakini nilikuwa nikisoma tu makala ambazo zilivuta uangalifu wangu. Sasa nasoma gazeti hilo toka jalada hadi jalada na likiwa tokeo mimi hufurahia habari ambazo mbeleni nilikuwa nikiziacha. Kwa kielelezo, nimemaliza tu kusoma “Desturi ya Kale ya Waamerika Wahindi” (Machi 8, 1996), na niliifurahia sana!

E. A. S., Brazili

Kuudhi Wengine Makala “Maoni ya Biblia: Jambo la Kufanya Unapoudhi Wengine” (Februari 8, 1996) ilikuja kwa wakati ufaao hasa. Kwa ghafula dada mmoja Mkristo aliacha kuongea nami. Nilimwuliza ikiwa nilikuwa nimefanya chochote ambacho kilimuudhi, kisha nikaomba radhi. Lakini hili halikubadili mtazamo wake. Niliumizwa sana na hili nikaanza kufikiri kwamba utumishi wangu kwa Yehova haukuwa ukikubalika. Nilihisi faraja kama nini kwa kusoma fungu la mwisho la makala hiyo! Lilisema kwamba “maadamu umejitahidi sana kufanya amani, Yehova atapendezwa kukubali ibada yako.”

M. R., Argentina

Fira Ile makala “Je, Ungependa Kukutana na Fira?” (Machi 22, 1996) ilikuwa yenye kupendeza sana. Lakini maelezo ya picha kwenye ukurasa 16 yasema hivi: “Fira mweusi apanua kichwa chake anapoota jua kwenye mwamba wenye joto.” Kadiri nijuavyo, fira hupanua kichwa chake wakati tu anapohisi hatari au wakati amekasirika.

R. F., Ujerumani

Hilo lilielezwa katika makala hiyo kwenye ukurasa 18, fungu la 1, na ukurasa 20, fungu la 2. Mleta-habari wetu katika India asema kwamba katika picha hiyo fira huyo alikuwa akitenda kutokana na kukasirishwa na msaidizi wa mpiga-picha.—Mhariri.

Dereva Asiyejiweza Ile makala “Wasiojiweza Lakini Wawezao Kuendesha Gari” (Mei 8, 1996) ilifika kwa wakati ufaao kabisa. Nikiwa asiyejiweza, napata kwamba huduma yangu ya Kikristo imewekewa mipaka sana. Namshukuru Yehova kwamba sasa nina gari lililoundwa kwa ajili ya mahitaji yangu, na makala hii imenichochea kupanua huduma yangu.

A. A. V., Brazili

Kucheza Dansi Mimi hufurahia kucheza dansi ya muziki aina ya classical, ya Kilatini, na muziki uendao polepole upendwao na wengi ukiwa utendaji wa kustarehe. Nilithamini sana makala “Maoni ya Biblia: Je, Yafaa Wakristo Kucheza Dansi?” (Mei 8, 1996) Ilinisaidia kuchunguza sana aina hii ya tafrija. Maswali ya kujichunguza ambayo mlizusha yatanisaidia kubaki bila lawama ‘nikijitunza mwenyewe bila doa kutokana na ulimwengu.’—Yakobo 1:27.

D. D. G., Trinidad

Nina umri wa miaka 15, na nimepata likiwa jambo gumu sana kuamua kifaacho na kisichofaa kwa habari ya kucheza dansi. Kwa kutumia mwongozo ambao makala hiyo iliandaa—pamoja na maandiko yaliyotajwa kutoka Biblia—naweza kuamua kifaacho.

M. R., Marekani

Maandalizi ya Kusikia kwa Walio na Kasoro Mimi ni kiziwi na kipofu, nataka kuwashukuru kwa makala “Kujitahidi Kufikia kwa Mikono Itoayo Ishara.” (Aprili 8, 1996) Ilieleza kuhusu “Wasifaji Wenye Shangwe” Mikusanyiko ya Wilaya ya Mashahidi wa Yehova iliyofanywa kwa Lugha ya Ishara ya Kimarekani. Nilitiwa moyo sana kujua kwamba wengi walio vipofu na viziwi walikuwapo. Nashukuru sana wale walionikalimania programu ya mkusanyiko tulipokuwa na mkusanyiko wetu hapa katika Desemba 1995. Sijapata kamwe kutumia Braille, kwa hiyo ili kuhubiria wengine, nimekariri maandiko 121 ya Biblia. Ni tamaa yangu kuona utimizo wa ahadi ya Mungu kwenye Isaya 35:5, 6, ambayo husema juu ya viziwi kusikia na mabubu kusema. Nataka niweze kumwimbia Yehova sifa katika Paradiso inayokuja!

A. F. A., Argentina