Wapiga-mbiu wa Ufalme Waripoti

Mashahidi Wafikia Watu Wote Ufaransa

TOKA Ijumaa asubuhi, Januari 29, 1999, na kuendelea hadi mwisho-juma, Mashahidi wa Yehova katika Ufaransa waligawanya kwa uchangamfu barabarani na baadaye nyumba hadi nyumba, nakala milioni 12 za trakti yenye kichwa People of France, You Are Being Deceived! Kwa nini wafanye kampeni kama hiyo?

Kwenye mkutano na waandishi wa habari huko Paris, asubuhi Ijumaa hiyo, sababu ya kampeni hiyo ilitolewa. Msemaji wa Mashahidi alieleza hivi: “Tunalotaka kufanya leo hii ni kujulisha kuwa sisi ni watu wa aina gani na kukomesha taarifa za kashfa zilizoenezwa kutuhusu. Tuko tayari kukubali uchambuzi, lakini hatutasikiliza kamwe uwongo na maelezo yanayoharibu sifa yetu.”

Ijapokuwa Mashahidi wa Yehova ni dini ya Kikristo ya tatu kwa ukubwa nchini Ufaransa, watoto wengi wa Mashahidi wamekuwa wakitukanwa na kusumbuliwa shuleni. Watu wazima wamepoteza kazi zao na wametishwa kwa sababu ya dini yao. Amini usiamini, hata michango ya kidini ambayo wamepokea imetozwa kodi ya asilimia 60. Kampeni hiyo ilishughulikaje na ubaguzi huu?

Trakti hiyo yatangaza hivi: “Mashahidi wa Yehova wapatao 250,000 na washiriki wao wanaoishi Ufaransa WANATETA dhidi ya njia isiyo ya haki ambayo dini yao ya Kikristo, ambayo imekuwapo Ufaransa tangu 1900, imejumuishwa na mafarakano hatari tangu 1995. . . . WANATETA dhidi ya usumbufu wa daima ambao wamekuwa wakifanyiwa.” Mashtaka ya uchongezi ambayo Mashahidi katika Ufaransa wamefanyiwa na njia za kichinichini ambazo wakashifu wametafuta kutokeza mtazamo usiofaa zilifunuliwa. Trakti hiyo yamalizia kwa kusema: “Leo, zaidi ya Mashahidi wa Yehova milioni mbili na washiriki wao huishi Ulaya. Wanastahi sheria za Serikali ambamo wao ni raia kwa kushikilia viwango vya Gospeli. Watu wa Ufaransa, haya ndiyo mambo ya hakika. Ni jukumu letu kuyaeleza kama yalivyo kwa kweli!”

Itikio la Haraka na Lifaalo

Mamilioni ya trakti yalitolewa siku ya kwanza. Katika Paris pekee, kufikia adhuhuri, zaidi ya Mashahidi 7,000 walikuwa wamewapa watu zaidi ya trakti milioni 1.3. Kuona Mashahidi wengi hivyo wakigawanya trakti barabarani kwa hakika lilikuwa jambo ambalo watu hawajawahi kuona. Vyombo vya habari, kutia ndani magazeti na televisheni za Ufaransa na za kimataifa, viliitikia vizuri kampeni hiyo ya mawasiliano. Gazeti la habari Le Progrès de Lyon lilitaarifu: “Ari hii . . . huelewesha wazi kutoeleweka kwa neno moja. Muda wa miaka kumi iliyopita, neno ‘farakano’ . . . limekuwa na maana yenye kupotosha, hatari, na yenye kuumiza. . . . Mashahidi wa Yehova si watu hatari waelekeao kuvuruga amani ya jamii.”

Wale wanaowajua Mashahidi wa Yehova huthamini hali yao ya amani na staha yao yenye kina kirefu kwa utaratibu uliowekwa wa jamii. Hivyo basi, watu wengi barabarani walionyesha uthamini na utegemezo wao kwa makumi ya maelfu ya Mashahidi walioshiriki katika kampeni hiyo. Simu, faksi, na barua kutoka kwa watu waliotoa shukrani zao kwa trakti hiyo zilipokewa mara moja. Zaidi ya yote, watu wenye mioyo minyofu walipewa fursa ya kusikia mambo ya hakika juu ya Mashahidi tofauti na maelezo ya uwongo na yasiyo ya akili, na wale ambao itikadi zao zilikuwa zimekashifiwa waliweza kuonyesha hisia zao kwa yale waliyothamini sana.