Kunufaika Kikamili na Shule ya Huduma ya Kitheokrasi
1 Shule ya Huduma ya Kitheokrasi imekuwa kama chombo cha kutuzoeza katika “ustadi wa kufundisha” hivi kwamba twaweza kupitishia wengine kweli za Biblia kwa njia yenye matokeo. (2 Tim. 4:2, NW) Sisi hupokea uelewevu wa kina kirefu ulio na thamani katika vichwa mbalimbali vya Biblia kila juma. Twaweza kuhakikishaje kwamba tunapata manufaa kamili kutokana na maagizo muhimu ambayo shule hii huandaa?
2 Sikiliza kwa makini maelezo ya kufungua ya mwangalizi wa shule akaziapo baadhi ya mambo ya kupendeza uwezayo kujifunza wakati wa mkutano huo. Fikiria maswali yoyote ambayo huenda akatokeza na jinsi uwezavyo kuyatumia majibu katika huduma yako.
3 Hotuba ya maagizo si pitio tu la habari zilizochapwa. Hiyo hukaza fikira juu ya thamani yenye kutumika ya habari na jinsi ziwezavyo kukunufaisha kibinafsi. Kutayarisha mapema kutakusaidia uweke fikira vizuri zaidi juu ya mambo makuu na kushiriki katika pitio la mdomo lifuatalo.
4 Kufuatana na usomaji wa Biblia wa kila juma kwaweza kuongeza kina cha uthamini wako juu ya Neno la Mungu. Utafiti wa ziada waweza kufunua unamnanamna wa vijambo vipya tena vya kupendeza vitakavyoongezea uelewevu wako juu ya ile kweli. Utoaji wa mambo makuu ya Biblia ni zaidi ya rudio tu la usimulizi wa Biblia. Baada ya pitio fupi la ujumla, msemaji atakazia mambo ya kutokeza katika kisehemu kilichogawiwa na kuonyesha jinsi mambo hayo yahusuvyo maisha na ibada yetu. Uwe msikivu ili uweze kujifunza njia nzuri zaidi ya kutumia maagizo ya Biblia.—Zab. 119:105.
5 Ikiwa umegawiwa hotuba ya mwanafunzi, angalia jambo la kushauriwa unalotengeneza kwa sasa. Pitia kusoma madokezo yaliyotolewa katika Kiongozi cha Shule yanayoshughulika na sifa hiyo ya usemi, na ujaribu kuyatumia. Unapochagua habari za hotuba yako, jaribu kukazia mambo yatakayokuwa na utumizi shambani.—sg-SW kur. 96-9.
6 Ikiwa wewe ni dada aliyegawiwa kutoa Hotuba Na. 3 au Hotuba Na. 4, jaribu kuitoa habari katika kikao cha hali halisi. Mwenye nyumba aweza kukubaliana au asikubaliane na kila jambo usemalo; jitahidi kuonyesha jinsi ungesaidia mtu huyo asababu juu ya kanuni za Biblia zinazohusika. (sg-SW kur. 153-8) Hii inasaidia wasikilizaji waone jinsi ya kushughulika na vipingamizi kama hivyo ambavyo hukabiliwa katika utumishi wa shambani. Tayarisha vema mapema, na upange mazoezi ya mapema na mwenye nyumba wako. Isiwe lazima kufanya mazoezi mkutano ukiisha kuanza.
7 Wanafunzi wanaotoa hotuba hutiwa moyo waketi karibu na mbele ya jumba. Hiyo yaokoa wakati na kuwezesha mwangalizi wa shule atoe maelezo yake kibinafsi zaidi. Wote waweza kufaidika kutokana na madokezo hususa yenye fadhili ambayo yeye hutoa kwa msingi wa Kiongozi cha Shule. Huenda asifuate mambo ya usemi kwa utaratibu ulioonyeshwa katika kikaratasi cha Shauri la Usemi; atachagua jambo la kushauriwa kwa msingi wa yale uhitajiyo kwa sasa ili kufanya maendeleo bora zaidi.
8 Zote hizo ni sababu nzuri kwetu kujitayarishia Shule ya Huduma ya Kitheokrasi na kuihudhuria kila juma. Maagizo tupokeayo yaweza kutusaidia tuwe wenye hekima na wenye ufundi katika huduma yetu.—Mit. 1:5.