Je, Mtoto Wako Anaweza Kufanya Uamuzi Mzito?
1 Uamuzi mzito kuhusu nini? Kuhusu kutiwa damu mishipani. Kama ilivyoonyeshwa katika makala yenye kichwa “Tembea Kama Ufundishwavyo na Yehova” katika toleo la Mnara wa Mlinzi la Juni 15, 1991, watoto wa Mashahidi wa Yehova wamelazimika kuchukua msimamo thabiti na ulio wazi, ili kuthibitisha kwamba tamaa yao ya kutii amri ya Mungu kuhusu damu ni muhimu kwao kama ilivyo muhimu kwa wazazi wao. Je, mtoto wako mchanga anaweza kulazimika kuchukua msimamo kama huo?
2 Sheria Inasema Nini? Kwa mfano, nchini Marekani, Mahakama Kuu ya Illinois ndiyo mahakama kuu zaidi kukubali uamuzi wa mtoto mchanga wa kukataa kutiwa damu mishipani. Ilipokuwa ikichunguza kesi ya dada mmoja mwenye umri wa miaka 17, mahakama hiyo iliamua hivi: “Ikiwa uthibitisho ni wazi na wenye kusadikisha kwamba mtoto amekomaa vya kutosha kufahamu matokeo ya hatua yake [na] kufanya uamuzi kama mtu mzima, basi ile kanuni inayohusu mtoto aliyekomaa ambayo inategemea sheria zilizotungwa kutokana na vikao vya zamani mahakamani, inampa haki ya kukubali au kukataa matibabu.” Hivyo, ili kuamua ikiwa mtoto amekomaa vya kutosha kufanya uamuzi wake mwenyewe, huenda madaktari au wenye mamlaka wakamhoji mgonjwa ili kusikia sababu zake za kukataa kutiwa damu mishipani. Kijana atahitaji kuelewa vizuri hali ya ugonjwa wake na matokeo ya matibabu atakayochagua na kueleza kwa uthabiti imani yake ya kidini kuhusu sheria ya Mungu juu ya damu.
3 Mtoto Wako Atasema Nini? Je, watoto wako wanaweza kueleza vizuri msimamo wao kuhusu sheria ya Mungu juu ya damu? Je, wanaamini kwa moyo wao wote kwamba sheria ya ‘kujiepusha na damu’ imetoka kwa Mungu? (Mdo. 15:29; 21:25) Je, wanaweza kutumia Maandiko kueleza imani yao? Je, watatetea kwa uthabiti uamuzi wao kuhusu damu ikiwa madaktari watasema kwamba uhai wao umo hatarini, na hata ikiwa wazazi wao hawapo? Kwa kuwa ‘wakati na tukio lisilotazamiwa hutupata sote,’ unaweza kumtayarishaje mtoto wako kwa jaribu lolote la utimilifu wake?—Mhu. 9:11; Efe. 6:4.
4 Wazazi, Mnaweza Kufanya Nini? Mna daraka la kuwafundisha watoto wenu maoni ya Mungu kuhusu damu. (2 Tim. 3:14, 15) Maelezo ya wazi yanapatikana katika kitabu Kutoa Sababu, ukurasa wa 42-46. Jifunze habari hiyo kwa makini pamoja na familia yako. Ukitumia sehemu “Mtu Akisema—” kwenye ukurasa wa 46-48, fanya mazoezi na watoto wako ili kuwasaidia wapate uzoefu wa kueleza yale wanayoamini na kwa nini wanayaamini. (1 Pet. 3:15) Vifaa vingine vya kutuelimisha kuhusu suala la damu vinatia ndani broshua Damu Yaweza Kuokoaje Uhai Wako? na gazeti Mnara wa Mlinzi la Juni 15, 2004, ukurasa wa 14-24. Pia, video kama, Transfusion-Alternative Health Care—Meeting Patient Needs and Rights na No Blood—Medicine Meets the Challenge, ambazo sasa zinapatikana kwenye DVD yenye kichwa, Transfusion Alternatives—Documentary Series, hutoa habari zenye kusadikisha kuhusu manufaa ya matibabu na upasuaji usiohusisha kutiwa damu mishipani. Je, familia yako imezungumzia mojawapo ya vifaa hivyo hivi karibuni?
5 Wasaidie watoto wako ‘wajihakikishie wenyewe mapenzi ya Mungu yaliyo mema na yenye kukubalika na makamilifu’ kuhusu damu. Kwa kufanya hivyo, wanaweza kufanya uamuzi mzito na kupata kibali cha Yehova.—Rom. 12:2.
[Maswali ya Funzo]
1. Vijana Mashahidi wamechukua msimamo gani kuhusu matumizi ya damu? Toa mfano.
2. Mahakama moja ilitumia kanuni gani ya kisheria kwa mtoto aliyekataa kutiwa damu mishipani, na wazazi Wakristo na watoto wao wanajifunza nini kutokana na hilo?
3. Wazazi wanapaswa kufikiria maswali gani kwa uzito, na kwa nini?
4, 5. (a) Wazazi wana jukumu gani, nao wanaweza kulitimizaje? (b) Kuna vifaa gani vya kuwasaidia wazazi?