Video Mpya kwa Ajili ya Kuanzisha Mafunzo ya Biblia

Video fupi yenye kichwa “Kwa Nini Ujifunze Biblia?” inatazamwa na watu wengi kwenye Tovuti ya jw.org. Kusudi la video hiyo ni kuchochea watu wanaopenda kujifunza Biblia wafanye hivyo bila malipo. Unaweza kuipata video hiyo kwa kubofya sehemu “Omba Ufundishwe Biblia” iliyo chini kwenye ukurasa wa mwanzo. Pia, unaweza kuipata kwa kufungua Tovuti yetu kwa kutumia alama ya QR inayopatikana kwenye ukurasa wa mwisho wa trakti zetu mpya. Yafuatayo ni madokezo yatakayotusaidia tutumie video yetu ifaavyo.

• Unapomrudia mwenye nyumba mwulize hivi: “Je, naweza kukuonyesha video ambayo inaeleza jinsi unavyoweza kupata majibu ya maswali yako ya Biblia?” Akikubali, mwonyeshe video hiyo kwenye kifaa cha mkononi kilichounganishwa na intaneti au kwenye kompyuta yake.

• Iwapo utamwachia mtu mojawapo ya trakti mpya unapohubiri hadharani au isivyo rasmi, mwelekeze kwenye alama ya QR na umtie moyo atumie kifaa chake cha mkononi kufungua video hiyo. Kwa kuwa katika lugha nyingi alama ya QR inakupeleka moja kwa moja kwenye video iliyo kwenye Tovuti yetu, huenda itawezekana kucheza video hiyo papo hapo kwa kutumia kifaa chako cha mkononi.

• Waeleze wafanyakazi wenzako, wanashule wenzako, watu wa ukoo, na wengine unaowafahamu kuhusu video hiyo, na uwe tayari kuwaonyesha. Unaweza pia kuwatumia kupitia barua pepe kiunganishi cha kufungua video hiyo, na uwaombe waitazame.

Kwa kutumia njia hiyo mpya, tunaweza kuanzisha mafunzo mengi zaidi ya Biblia na kuwasaidia kiroho wale walio na “mwelekeo unaofaa kwa ajili ya uzima wa milele.”—Mdo 13:48.