Taiga! Taiga!

WANPELA MAN LONG INDIA I RAITIM DISPELA STORI BILONG KIRAP!

INAP planti yia saveman Charles McDougal i bin skelim pasin bilong ol taiga long Royal Sitwan Nesenel-Pak long Nepal. Em i tok: ‘Wanpela taim mi wokabaut long liklik kil bilong maunten. Taim mi wokabaut i go, wanpela taiga i wokabaut i kam long mi. Mipela bung antap long maunten na em i stap klostu tasol long mi.’ Saveman McDougal i sanap tasol. Em i no lukluk stret long ai bilong taiga, nogut taiga i ting em i laik pait wantaim em. McDougal i tromoi ai i go longwe liklik baksait long taiga. Taiga i sindaun yet, tasol em i no mekim wanpela samting. Inap sampela minit bihain, McDougal i wokabaut i go bek liklik. Em i tok: ‘Bihain mi baut na wokabaut i go bek long hap mi kam long en.’

Long yia 1900, i gat 100,000 taiga long ples tru bilong ol, em Esia, na inap olsem 40,000 bilong ol i stap long India. Tasol long 1973, klostu 4,000 tasol bilong dispela gutpela animal i stap long olgeta hap. As bilong dispela, em ol man i raunim na kilim. I no gat narapela pusi i bikpela olsem taiga, tasol man i kilim klostu olgeta. Olsem wanem? Taiga i laik bagarapim man? Wanem pasin tru bilong dispela bikpela pusi? Wok bilong ol man long lukautim taiga i kamap gut na bai em i no ken pinis olgeta?

I Stap Bilong Famili Taiga

Inap planti yia ol saveman i no les long skelim i stap bilong ol taiga, na dispela i bin helpim ol long save gut long en. Bilong save gut long taiga, yumi ken tok piksa olsem yumi stap long gutpela bikbus Rantambor long noten India na lukluk long wanpela famili taiga. Longpela bilong taiga man long nus i go inap arere bilong tel em klostu 3 mita, na hevi bilong en i olsem 200 kilogram. Longpela bilong taiga meri i olsem 2.7 mita na hevi bilong en i olsem 140 kilogram.a Tupela i gat 3-pela pikinini​—wanpela man na tupela meri.

Sampela taim hat bilong dispela bikbus i winim 45 digri Selsias, tasol famili taiga i sindaun gut aninit long ol diwai i gat planti lip. Na sapos ol i laik, ol i ken waswas long raunwara klostu, em wara bilong en i kol liklik. Olsem wanem? Ol pusi inap subim wara? Yes, ol taiga i laikim tru wara! Ol man i save, sampela i bin subim wara i go i go inap 5-pela kilomita na ol i no malolo.

Lait bilong san i sut i kam insait long bikbus na holim skin bilong ol taiga na retpela skin bilong ol i lait tru. Na ol blakpela makmak long skin na ol waitpela makmak antap long ai bilong ol, em tu i lait. Inap longpela taim liklik mipela i lukluk i go long 3-pela pikinini na bihain mipela inap save long wan wan, long wanem, ol makmak bilong skin na pes i narapela narapela kain.

Taiga i Go Bikpela

Taim taiga mama i gat bel, em i raun painim gutpela ples hait insait long bus olsem haus bilong em. Nau long dispela ples, famili taiga inap lukluk i go daun long stretpela graun i gat hul wara em planti animal i save kam long en. Taiga meri i bin makim dispela hap famili i ken sindaun long en, long wanem, em i save, taim em i raun painim abus em i no ken stap longwe long ol pikinini.

Kirap long taim taiga i karim ol pikinini, em i bin lukautim ol gut. Olgeta taim em i holim ol namel long lek bilong en, na mekim wok long nus bilong rapim skin bilong ol, na long tang bilong en em i bin wasim ol. Taim em i mekim olsem, em i mekim liklik krai. Taim ol pikinini i go bikpela liklik ol i kirap na pilai​—wanpela i slip long ples hait na ol narapela i bin wok long painim em, na tu, ol i pilai pilai olsem ol i pait. Ol pikinini taiga i no inap krai olsem pusi, tasol taim ol i gat wanpela krismas ol inap mekim wanpela strongpela kain krai, na ol i mekim olsem taim mama i bin lusim ol na nau em i kam bek.

Ol pikinini i amamas tru long waswas na pilai long wara wantaim mama bilong ol. Tingim olsem yu lukim dispela taiga meri i sindaun arere long raunwara na tel bilong en i slip insait long wara. Skin bilong en i hat, olsem na bilong mekim kol skin, wan wan taim em i mekim wok long tel bilong tromoi hap wara long skin. Na ol pikinini i no les long ranim tel bilong mama taim em i meknaisim. Taim taiga meri i mekim olsem em i no pilai tasol, em i skulim ol pikinini long pasin bilong ranim wanpela samting na kalap long en. Bihain ol bai mekim olsem taim ol i kirap painim abus. Ol pikinini taiga i amamas tu long go antap long ol diwai. Tasol taim ol i kisim 15 mun samting, skin bilong ol i bikpela na hevi, olsem na ol i hatwok long go antap long diwai.

Wok Bilong Papa

I no longtaim i go pinis na planti man i bin ting taiga mama tasol i save lukautim ol pikinini, na sapos rot i op papa bai kilim ol. Dispela i no pasin bilong olgeta taiga. Tru, inap longtaim liklik taiga papa i lusim famili na em i raun insait long bus inap 50 skwe kilomita samting, tasol em i save kam lukim famili bilong em. Taim em i kam, em inap raun wantaim meri na ol pikinini bilong painim abus na kilim. Pikinini man i gat strong bilong pait bai go pas long kaikai. Sapos em i mangalim kaikai na inap longtaim liklik em i pasim ol susa bilong em long kaikai, mama bai kam na subim em o paitim em. Em nau, ol pikinini meri tu inap kaikai.

Skin bilong papa i bikpela na ol pikinini i amamas long pilai wantaim em. Wanpela hap ol i amamas tru long pilai long en, em long hul wara klostu. Isi isi taiga papa i slip i go insait long wara na het tasol i stap ples klia. (Ol taiga i no laik bai wara i go insait long ai bilong ol!) Nau em i larim ol pikinini i kam rapim nus bilong ol long skin bilong em, na taim ol i mekim olsem em i rapim long tang pes bilong ol. Dispela famili i pas gut wantaim.

Ol i Save Kaikai Man?

Planti taim ol buk na piksa wokabaut i mekim olsem taiga i animal bilong kros na pait, na em i save bihainim man na wetim gutpela taim bilong kalap long man na kaikai em. Dispela kain tingting i no stret liklik. Wan wan taiga tasol i save kaikai man. Taiga i lukim man i raun long bikbus em bai ranawe. Ol i ting taiga i no save harim smel bilong man.

Tasol sapos sampela samting i kamap na taiga i hangre, em inap birua. Sapos em i lapun na ol tit bilong en i lus o man i bin bagarapim hap skin bilong en, ating em i no inap raunim abus bilong kisim kaikai. Na i olsem sapos ol man i katim na rausim bikbus bilong taiga; dispela inap pinisim kaikai tru bilong taiga. Long kain as olsem ol taiga i save kilim i dai inap olsem 50 manmeri long olgeta yia long India, tasol planti manmeri moa i save dai long snek​—inap olsem 5,000. Planti man i save kisim bagarap long taiga, em long ples tais bilong wara Genjis.

Saveman McDougal i tok, planti man i ting taiga i olsem animal nogut bilong bagarapim man, tasol nogat. Em i tok: Sapos wantu tasol yu kamap klostu long taiga na pretim em, ating em bai birua long yu. Tasol “taiga i man bilong bel isi. Sapos yu bungim taiga​—maski yu stap klostu long em​—em i no ken kirap na bagarapim yu.”

Ol taiga i no save pait namel long ol yet, wan wan tasol. Olsem: Wanpela yangpela taiga inap wokabaut i go long hap graun bilong narapela taiga na bungim em. Orait, tupela bai krai strong na nus bilong wanpela bai pas long nus bilong narapela taim tupela i mekim pairap long maus. Tasol taim bikpela taiga i kamapim strong bilong en, yangpela taiga bai slip long baksait bilong en na putim ol lek i go antap bilong makim olsem em i stap daun long narapela, na nau kros bilong tupela i pinis.

I Stap Bilong Bikpela Pusi Bihain

Taiga i no bagarapim man, man yet i bagarapim taiga. Long nau sampela lain i wok long helpim taiga na em i no ken pinis olgeta. Long sampela kantri bilong Esia, ol i makim hap graun bilong ol taiga i ken stap gut long en. Long 1973, ol i kamapim wanpela bikpela wok (Pro ject Tiger) long Kobet Nesenel-Pak long noten India bilong lukautim ol taiga. Bikpela mani na ol samting bilong helpim dispela wok i bin kam long olgeta hap bilong graun. Bihain, i gat 18 bikpela hap graun long India ol taiga inap stap gut long en. Sapos yumi bungim ol dispela graun wantaim, bikpela bilong en i olsem 28,000 skwe kilomita. Long 1978, ol taiga i stap long lista bilong ol animal i laik pinis. Tasol gutpela samting tru i kamap! Taim i no gat tambu yet long kilim taiga, ol i bin stap hait na raun long nait tasol, long wanem, ol i pret long man. Tasol sampela yia bihain long tambu i stap bilong lukautim ol taiga, ol i no pret long raun na long taim bilong san ol i kirap painim abus!

Tasol taiga i gat hevi yet: Long olgeta hap planti man i save laikim ol marasin bilong ol Esia, em ol marasin bilong ples ol i save wokim long sampela hap skin bilong taiga. Olsem: Long India, ol man inap kisim 500 dola long ol bun bilong taiga, na taim ol i wokim i kamap paura samting na salim i go long hap bilong Is, ol inap kisim olsem 25,000 dola. Em bikpela mani, olsem na planti rabisman bilong ples ol i wok wantaim ol man i wok hait na kilim ol animal, na ol i trikim ol was bilong bikbus. Bipo ol man i ting wok bilong helpim ol taiga i kamap gut. Tasol kirap long 1988, dispela hevi i go bikpela gen. Long nau, inap olsem 27 taiga tasol i save raun long Rantambor. Long 20 yia i go pinis i gat 40 taiga. Na ol man i ting long olgeta hap i gat 5,000 taiga tasol i stap!

Paslain long yia 1900, ol taiga na ol man long India, ol i bin stap gut wantaim na ol i no birua birua long narapela narapela. Olsem wanem? Dispela kain samting bai kamap gen? Long nau, sampela taim ol man inap lukim dispela nambawan bikpela pusi na ol i kirap nogut na singaut: “Taiga! Taiga!” Tasol yumi no save long bihain​—wok sampela lain i save mekim bilong lukautim taiga bai helpim ol o nogat. Tasol Baibel i tokim yumi, bihain graun olgeta bai kamap wanpela paradais olsem gaden Iden. Long dispela taim man na ol animal bilong bus olsem taiga, ol bai stap bel isi wantaim long graun.​—Aisaia 11:​6-9.

[Futnot]

[Blok/Piksa long pes 17]

Waitpela Taiga

Wan wan tasol bilong ol i stap na em i wanpela gutpela samting tru bilong India. Dispela kain taiga i kamap, long wanem, jin long skin i narapela kain. Long 1951 long bikbus Rewa, India, ol man i bin holim pikinini taiga i gat waitpela skin. Bihain em i poromanim taiga meri i gat kala tru bilong ol taiga, na ol pikinini i kamap ol i gat kala bilong mama. Tasol bihain wanpela bilong ol dispela pikinini, em i poromanim waitpela taiga man, na bihain em i karim 4-pela pikinini i gat waitpela skin. Hatwok bilong ol man i mekim na nau long planti hap, ol man inap lukim dispela narapela kain taiga long ol banis animal.

[Piksa long pes 16]

Ol pusi inap subim wara? Yes!

[Piksa long pes 17]

Planti man i ting taiga i olsem animal nogut bilong bagarapim man, tasol nogat