Papalata Mintlhamu Leyi Loko U Ri Karhi U Fambisa Dyondzo Ya Bibele

Ku Vulavula Ngopfu: U nga titwi onge u fanele u hlamusela hinkwaswo. Yesu u tirhise swivutiso leswaku a pfuna vanhu va ehleketa kutani va tikumela nhlamulo. (Mt 17:​24-⁠27) Swivutiso swi endla leswaku dyondzo yi tsakisa naswona swi ku pfuna leswaku u tiva leswi xichudeni xa wena xi swi twisisaka ni ku swi pfumela. (be 253 ¶3-⁠4) Loko u vutisa xivutiso, lehisa mbilu u yimela nhlamulo. Loko xichudeni xi nyikela nhlamulo leyi hoxeke, ematshan’weni yo xi byela nhlamulo leyi ku nga yona, xi endle xi tikumela nhlamulo hi ku xi vutisa swivutiso leswi engetelekeke. (be 238 ¶1-⁠2) Vulavula hi ndlela leyi nga ta endla leswaku xichudeni xi kota ku twisisa mhaka leyi xa ha ku yi twaka.​—be 230 ¶4.

Ku Rharhanganisa Mhaka: Papalata ku lava ku hlamusela rungula hinkwaro leri u ri tivaka hi mhaka leyi mi bulaka ha yona. (Yh 16:​12) Dzika eka tinhlankulu ta ndzimana. (be 226 ¶4-⁠5) Hambi ku ri rungula leri tsakisaka ri nga endla leswaku tinhlankulu ti nga vi erivaleni. (be 235 ¶3) Loko xichudeni xi kala xi twisisa yinhlankulu, yana eka ndzimana leyi landzelaka.

Ku Hlanganisa Rungula Ro Tala: Xikongomelo xa hina i ku fikelela mbilu ku nga ri ku hlanganisa rungula ro tala. (Lk 24:​32) Tirhisa matimba ya Rito ra Xikwembu hi ku dzika eka matsalwankulu ya dyondzo. (2Ko 10:⁠4; Hv 4:​12; be 144 ¶1-⁠3) Tirhisa swifaniso swo olova. (be 245 ¶2-⁠4) Anakanyisisa hi swiphiqo ni leswi xichudeni xi swi pfumelaka kutani u dzikisa dyondzo eka xona. Vutisa swivutiso swo fana ni leswi: “U titwa njhani hileswi u swi dyondzaka laha?” “Leswi swi hi dyondzisa yini hi Yehovha?” “Hi byihi vuyelo lebyi u byi vonaka hikwalaho ko tirhisa ndzayo yoleyo?”​—be 238 ¶3-⁠5; 259 ¶1.