Leviticus

26 “‘Monnyɛ anyamehunu,+ ahoni,*+ anaa abosom adum biara. Na mommfa boɔ nnsene ohoni biara+ nnsi mo asase so nnsom no,+ ɛfiri sɛ mene Yehowa mo Nyankopɔn. 2 Monhwɛ sɛ mobɛdi me homeda;+ monsuro nni me kronkronbea no ni. Mene Yehowa.

3 “‘Sɛ mokɔ so di m’ahyɛdeɛ ne me mmara so na moyɛ ne nyinaa+ a, 4 me nso mɛma nsuo atɔ ne berɛ mu,+ na asase no bɛma ne nnɔbaeɛ,+ na wuram nnua aso aba pii.+ 5 Na mobɛporo mo ayuo akɔsi berɛ a mobɛtete bobe aba, na mobɛtete bobe aba akɔsi berɛ a mobɛdua adeɛ, na moadidi amee+ na moatena mo asase so dwoodwoo.+ 6 Na mɛma asomdwoeɛ aba asase no so,+ na mobɛda a obiara renyi mo hu.+ Mɛhwɛ sɛ aboa bɔne biara remma asase no soɔ,+ na obiara rentwe nkrantɛ wɔ mo so.+ 7 Mobɛtĩ mo atamfo+ na wɔatotɔ nkrantɛ ano mo anim. 8 Mo mu nnum bɛtĩ nnipa ɔha, na mo mu ɔha atĩ mpem du, na mo atamfo atotɔ nkrantɛ ano mo anim.+

9 “‘Mɛhwɛ mo,+ na mɛma moawo ama mo ase atrɛ,+ na mɛdi apam a me ne mo ayɛ no so.+ 10 Mobɛdi afe a atwam no nnɔbaeɛ dada no,+ na mobɛyi dada no afiri hɔ na moanya baabi de foforɔ no agu. 11 Na mede me ntomadan bɛsi mo mu,+ na mo ho renyɛ me kra abofono.+ 12 Mɛnante mo mu ada me ho adi sɛ mo Nyankopɔn+ na mo nso moayɛ me man.+ 13 Mene Yehowa mo Nyankopɔn a ɔyii mo firii Egypt nkoasom mu+ no. Me na mebubuu mo kɔndua mu maa motumi maa mo tiri so nanteeɛ.+

14 “‘Na sɛ moantie me anyɛ deɛ mahyɛ nyinaa,+ 15 na mopo m’ahyɛdeɛ,+ na m’atemmusɛm yɛ mo kra abofono, na moanni me mmara nyinaa so na mobu m’apam so+ a, 16 ɛnneɛ me nso mɛyɛ deɛ ɛdi soɔ yi de atwe mo aso: Mede nsamanwa+ ne atiridii bɛbɔ mo na mo ani asɛe+ na mo kra ago.+ Mobɛdua aba nanso ɛbɛyɛ adwumahunu, ɛfiri sɛ mo atamfo na wɔbɛdie.+ 17 Na mɛma m’ani asã mo, na mobɛdi nkoguo mo atamfo anim.+ Wɔn a wɔkyiri mo bɛtiatia mo so,+ na mobɛdwane berɛ a obiara mpamo mo.+

18 “‘Na sɛ yeinom nyinaa akyi moantie m’asɛm a, ɛnneɛ mɛma mo bɔne ho asotwe abu abɔ ho mprɛ nson.+ 19 Mɛbubu ahantan a ayɛ mo kokuroo no, na mɛma mo soro ayɛ sɛ dadeɛ+ na mo asase ayɛ sɛ kɔbere. 20 Mo ahoɔden bɛsɛe kwa, ɛfiri sɛ mo mfuo remma ne nnɔbaeɛ+ na asase so nnua renso aba.+

21 “‘Na sɛ mokɔ so ne me di asie na moantie me a, mɛma ɔhaw a mede bɛba mo soɔ no abu abɔ ho mprɛ nson sɛdeɛ mo bɔne teɛ.+ 22 Na mɛma wuram mmoa bɔne aba mo so+ na wɔakunkum mo mma+ ne mo nyɛmmoa, na mo so bɛhwan na mo akwan asɛesɛe.+

23 “‘Nanso sɛ yeinom nyinaa akyi moamma kwan amma mantene mo so,+ na mokɔ so ne me di asie a, 24 ɛnneɛ me nso me ne mo bɛdi asie,+ na mo bɔne nti mɛtwe mo aso mprɛ nson.+ 25 Na mede nkrantɛ bɛba mo so abɛtua bɔne a moayɛ atia apam no so ka,+ na mobɛdwane akɔ mo nkuro mu na mama yaredɔm ate asi mo mu,+ na wɔde mo ahyɛ ɔtamfo nsa.+ 26 Sɛ mebubu nnua a mokora paanoo wɔ soɔ no+ a, mmaa du bɛtõ paanoo wɔ fononoo baako mu na wɔakari paanoo ama mo,+ na mobɛdi nso moremmee.+

27 “‘Na yei nso moantie me na mokɔ so ne me di asie+ a, 28 ɛnneɛ me ne mo bɛdi asie dendeenden,+ na mo bɔne nti matwe mo aso mprɛ nson.+ 29 Mobɛwe mo mma mmarima ne mo mma mmaa nam.+ 30 Na mɛsɛe mo sorɔnsorɔmmea+ ne aduhwam adeɛ na mede mo afunu agu mo abosom fĩ no afunu so.+ Mo ho bɛyɛ me kra abofono.+ 31 Na mede mo nkuro bɛma nkrantɛ+ na masɛe mo kronkronbea,+ na merente mo afɔdeɛ hwa.+ 32 Mɛma asase no ada mpan+ na mo atamfo a wɔbɛba abɛtena soɔ no ho bɛdwiri wɔn.+ 33 Na mɛbɔ mo apete amanaman mu+ na matwe nkrantɛ adi mo akyi.+ Mo asase bɛsɛe+ na mo nkuro adane amamfõ.

34 “‘Berɛ a mowɔ mo atamfo man mu a mo asase da mpan no, asase no bɛhome de ate ne ka nyinaa. Saa berɛ no asase no bɛhome na ahome deɛ ɛkaa mu nyinaa.+ 35 Nna a ɛbɛda mpan nyinaa ɛbɛhome, ɛfiri sɛ berɛ a mote soɔ no, sɛ ɛduru mo homeda a ɛsɛ sɛ asase no home a, ɛnhome.

36 “‘Na wɔn a wɔbɛka no,+ mɛma ehu aka wɔn akoma wɔ wɔn atamfo nsase so, na ahahan mpo yɛ kyekyerɛ a, wɔbɛdwane sɛdeɛ nkrantɛ di wɔn akyi, na wɔbɛhwehwe ase berɛ a obiara nni wɔn akyi.+ 37 Na berɛ a obiara ntaa wɔn soɔ mpo no, wɔbɛtiatia wɔn ho abubu afa so sɛdeɛ wɔredwane afiri nkrantɛ ano, na morennya ahoɔden a mode bɛgyina mo atamfo anim.+ 38 Mobɛwuwu amanaman no mu+ na mo atamfo asase amene mo. 39 Na wɔn a wɔbɛka no, wɔn ara wɔn bɔne a wɔbɛdi no mo atamfo asase soɔ ne wɔn agyanom bɔne+ nti, wɔbɛsɛe+ sɛ wɔn ara. 40 Afei wɔbɛka wɔn ara wɔn bɔne+ ne wɔn agyanom bɔne ne wɔn amumuyɔsɛm, sɛdeɛ wɔne me dii asie+ no. 41 Enti na me nso me ne wɔn dii asie+ na mede wɔn kɔɔ wɔn atamfo asase soɔ no.+

“‘Ebia saa berɛ yi deɛ, wɔbɛma wɔn akoma a wɔntwaa no twetia+ no abrɛ ase+ na wɔatua wɔn bɔne so ka. 42 Afei mɛkae apam a me ne Yakob yɛeɛ,+ ne apam a me ne Isak yɛeɛ,+ ne apam a me ne Abraham yɛeɛ+ no, na mɛkae asase no. 43 Berɛ a wɔagya asase no ato hɔ na wɔretua wɔn bɔne so ka no, asase no nso bɛhome de ate ne ka+ berɛ a adane amamfõ no. Wɔbɛtua wɔn bɔne so ka+ ɛfiri sɛ wɔapo m’atemmusɛm+ na m’ahyɛdeɛ yɛ wɔn kra abofono.+ 44 Nanso berɛ a wɔwɔ wɔn atamfo asase soɔ mpo no, merempo wɔn+ koraa na meremmu wɔn sɛ abofonodeɛ+ a enti mɛtɔre wɔn aseɛ. Merenyɛ saa na mammu apam a me ne wɔn ayɛ no so,+ ɛfiri sɛ mene Yehowa wɔn Nyankopɔn. 45 Mɛkae apam a me ne wɔn nananom yɛeɛ no;+ wɔn na meyii wɔn firii Egypt asase so wɔ amanaman no anim+ de kyerɛɛ sɛ mene wɔn Nyankopɔn. Mene Yehowa.’”

46 Yeinom ne ahyɛdeɛ ne atemmusɛm+ ne mmara a Yehowa nam Mose so de too ɔne Israelfoɔ ntam wɔ Bepɔ Sinai soɔ.+