VIVLIOTEKA TA INTERNET yuʼun Watchtower
VIVLIOTEKA TA INTERNET
yuʼun Watchtower
tsotsil
ʼ
  • ʼ
  • VIVLIA
  • VUNETIK
  • TSOBAJELETIK
  • nwt Éxodo 1:1-40:38
  • Eksodo

Muʼyuk svideoal.

Paso perton, mu stij li videoe.

  • Eksodo
  • Xchʼul Kʼop Dios sventa Achʼ Balumil
Xchʼul Kʼop Dios sventa Achʼ Balumil
Eksodo

EKSODO

1 Liʼe jaʼ sbiik li xnichʼnabtak Israel ti ochik batel ta Ejipto xchiʼuk li Jakobe, jujun vinik xchiʼuk yutsʼ yalalik:+ 2 Ruben, Simeon, Levi xchiʼuk Juda;+ 3 Isakar, Sabulon xchiʼuk Benjamin; 4 Dan xchiʼuk Neftali; Gad xchiʼuk Aser.+ 5 Skotol li buchʼutik te likik tal ta stojolal Jakobe* jaʼ 70 ta voʼ. Pe li Josee te xa onoʼox oy ta Ejipto.+ 6 Li Jose xchiʼuk skotol xchiʼiltak ta vokʼele xchiʼuk skotol li jkʼol kuxlejal taje kʼunkʼun chamik batel.+ 7 Ayan ep xnichʼnabik li j-israeletike,* pʼolik tajek. Lik epajikuk ta jyalel xchiʼuk mas to la stsak yipik ta skoj ti epajike. Jech oxal, noj yuʼunik li lume.+

8 Ta tsʼakale, och jun achʼ ajvalil li ta Ejiptoe, jun ajvalil ti mu xojtikin li Josee. 9 Xi laj yalbe li steklumale: «¡Kʼelavilik!, li steklumal Israele mas xa epajik xchiʼuk mas xa la stsak yipik, jaʼ lijkom xa li voʼotike.+ 10 Manyauk ti kʼu yelan ta jpastik ta stojolalike, yuʼun mi moʼoje, jech-o ch-epajik batel. Jaʼ xa chbat xchiʼinik kajkontratik mi lik paskʼope, vaʼun koʼol xa tstsakutik ta kʼop, mi laje, chlokʼik batel li ta jlumaltike».

11 Jech oxal, sventa xakʼbeik svokol ta tsatsal abtele,+ la svaʼanik bankilaletik* sventa li tsatsal abtelale. Akʼbat svaʼanik jteklumetik ti Pitom xchiʼuk Raamses+ sbie. Jaʼ li jteklumetik ti bu tskʼejik* veʼlil xchiʼuk yan kʼusitik ti jaʼ yuʼun faraone. 12 Kʼalal mas ch-ilbajinatike, mas to ch-epajik batel xchiʼuk mas to tspuk sbaik batel. Jaʼ yuʼun, li j-ejiptoetike ch-ipajik xa ta xiʼel laj yaʼiik ta skoj li j-israeletike.+ 13 Jech oxal, li j-ejiptoetike abol sbaik tajek yuʼunik ta tsatsal mosoinel+ li j-israeletike. 14 Li j-israeletike laj yil tajek svokolik ta skoj li tsatsal abtel akʼbatike. Lik svotsʼik achʼel xchiʼuk lik spasik ladriyo xchiʼuk akʼbat spasik kʼusiuk tsatsal abtelal ta osiltik. Ta melel, mosoinatik ta jyalel,+ lubtsanatik ta spasel kʼusiuk tsatsal abtelal.

15 Ta tsʼakal li ajvalil ta Ejiptoe la xchiʼin ta loʼil li parteraetik* ti jaʼ j-ebreoal antsetike, Sifra xchiʼuk Pua sbiik, 16 xi laj yalanbee: «Kʼalal chakoltaik sventa chvokʼ yol li j-ebreoal antsetike+ xchiʼuk kʼalal te xa chotol chavilik li ta chotlebal sventa alajele, persa me chamilik mi kereme, pe mi tsebe, kuxul xaviktaik». 17 Ta skoj ti xiʼtaojik* melel Dios li parteraetike,* muʼyuk la xchʼunbeik li kʼusi albatik yuʼun li ajvalil ta Ejiptoe. Kuxul laj yiktaik li neneʼ keremetike.+ 18 Jaʼ yuʼun, ta mas tsʼakale takatik ta ikʼel yuʼun li ajvalil ta Ejiptoe, xi albatike: «¿Kʼu yuʼun ti kuxul chaviktaik li neneʼ keremetike?». 19 Xi la stakʼbeik faraon li parteraetike:* «Li j-ebreoal antsetike mu xkoʼolaj kʼuchaʼal li j-ejiptoal antsetike, yuʼun mas tsotsik, jaʼ yuʼun vokʼem xa ox yolik kʼalal mu to ch-och batel partera ti bu chkuxike».

20 Lek chabiatik yuʼun Dios li parteraetike,* jech xtok, epajik-o ta jyalel li jteklume xchiʼuk mas to la stsak yipik. 21 Ta skoj ti xiʼtaojik Dios li parteraetike,* akʼbat yutsʼ yalalik ta tsʼakal. 22 Vaʼun, li faraone xi laj yalbe mantal skotol li steklumale: «Skʼan xbat ajipik ta ukʼum Nilo skotol li neneʼ keremetik ti jaʼ to vokʼik ti jaʼ yol xnichʼonik li j-ebreoetike, pe jaʼ kuxul xaviktaik skotol li tsebetike».+

2 Kʼalal jaʼo jech chkʼot ta pasel taje, oy jun vinik ta snitilulal Levi ti laj yikʼbe jun stseb li Levie.+ 2 La xchiʼin yol li antse, vaʼun vokʼ jun skerem. Kʼalal laj yil ti kʼupil sba li skereme, oxib u la snakʼ.*+ 3 Kʼot skʼakʼalil ti mu xa xnakʼ* yuʼune,+ jaʼ yuʼun la stsak jun moch* ti pasbil ta papiroe* xchiʼuk la xpix ta chapopote, te la stikʼ li skereme, vaʼun te laj yakʼ ta ajtikaltik ta nopol stiʼ ukʼum Nilo. 4 Pe li xvix+ olole te vaʼal kom kʼuk snamal sventa tskʼel kʼusi chkʼot ta stojolal li smuke.

5 Kʼalal yal atinuk ta Nilo li stseb faraone, te chanavik batel ta stiʼil Nilo li skiaratake. Vaʼun la sta ta ilel li moch ti te oy ta ajtikaltike, la stak batel ta anil skiara sventa x-ichʼbat talel.+ 6 La sjam li moche, vaʼun laj yil li olole, yakal ch-okʼ la sta li uni olole. Kʼuxubaj ta yoʼonton, pe xi laj yale: «Liʼe jaʼ yol xnichʼon j-ebreoetik». 7 Li xvix olole xi laj yalbe li stseb faraone: «¿Mi chakʼan chbat kikʼbot tal junuk j-ebreoal ants sventa xakʼbe xchuʼ li olole?». 8 Xi laj yal li stseb faraone: «¡Batan chaʼa!». Vaʼun, ta anil xa bat li tsebe, bat yikʼbe talel li smeʼ olole.+ 9 Li stseb faraone xi laj yalbe li antse: «Ikʼo batel li olol liʼe, akʼbo xchuʼ, vaʼun ta jtojot». Li antse laj yikʼ batel xchiʼuk laj yakʼbe xchuʼ li olole. 10 Kʼalal chʼi li olole, li antse bat yakʼbe li stseb faraone, kʼot ta skerem.+ Li stseb faraone Moises* laj yakʼbe sbi xchiʼuk xi laj yale: «Yuʼun ta voʼ la jlokʼes tal».+

11 Vaʼun, kʼalal vinik xa ox li Moisese,* lokʼ skʼel li xchiʼiltak ta j-ebreoale, bat skʼel kʼu yelan ti tsots tajek svokol ch-akʼbatike.+ Te une, laj yil ti yakal chichʼ majel yuʼun jun j-ejiptoal krixchano li jun xchiʼil ta j-ebreoale. 12 Jaʼ yuʼun, la skʼel ta jujujot spat xokon, kʼalal laj yil ti muʼyuk buchʼu te oye, la smil li j-ejiptoal vinike xchiʼuk la snakʼ* ta jiʼtik.*+

13 Ta yokʼomale lokʼ batel xtok, te la sta ta ilel ti yakal tstsak sbaik ta kʼop chaʼvoʼ j-ebreoetike. Jaʼ yuʼun, xi laj yalbe li buchʼu oy smule: «¿Kʼu yuʼun ti chamaj li achiʼile?».+ 14 Xi la stakʼ li vinike: «¿Buchʼu la svaʼanot ta bankilal xchiʼuk ta jchapanvanej kuʼunkutik? ¿Mi anopoj chamilun kʼuchaʼal la amil li j-ejiptoal vinike?».+ Jaʼ yuʼun xiʼ li Moisese, xi laj yale: «¡Ta melel, vinaj xa skʼoplal li kʼusi kʼot ta pasele!».

15 Kʼot ta xchikin faraon li kʼusi kʼot ta pasele, jech oxal tsmil ox yaʼi li Moisese. Pe jatav lokʼel ta stojolal faraon li Moisese, te bat nakluk ta yosilal Madian,+ vaʼun te choti ta stsʼel jun poso. 16 Li pale ta Madiane+ oy vukvoʼ stsebetak, tal slokʼes yaʼalik sventa snojesik li jomteʼ yoʼ xuchʼ voʼ li xchijtak stotike. 17 Pe jech onoʼox kʼuchaʼal chkʼot ta pasele, talik li jchabichijetike, vaʼun la snutsik lokʼel li tsebetike. Kʼalal jech kʼot ta pasele, tal li Moisese xchiʼuk la skolta* li tsebetike, laj yakʼbe yuchʼ voʼ li xchijike. 18 Kʼalal kʼotik ta sna stotik ti Reuel*+ sbie, labal sba laj yaʼi, xi jakʼbatike: «¿Kʼu yuʼun toj sob lavulik li avie?». 19 Xi la stakʼike: «Yuʼun oy jun j-ejiptoal vinik+ la spojunkutik ta stojolal li jchabichijetike. Maʼuk noʼox, yuʼun la slokʼesbunkutik voʼ xchiʼuk laj yakʼbe yuchʼ li chijetike». 20 Xi laj yalbe li stsebetake: «¿Pe bu oy li vinik une? ¿Kʼu yuʼun te laj aviktaik? Bat ikʼik talel sventa xchiʼinutik ta veʼel». 21 Laj une, li Moisese lek laj yaʼi ti te chkom xchiʼin ta naklej li vinike. Vaʼun li vinike laj yakʼbe yikʼ jun stseb ti Sipora+ sbie. 22 Ta tsʼakale, vokʼ jun yol li Siporae. Li Moisese Guersom*+ laj yakʼbe sbi, yuʼun xi laj yale: «Liʼ vul naklikun kʼuchaʼal jyanlum ta jun lum ti maʼuk jlumale».+

23 Kʼalal jal xa ox tajek echʼe,* cham li ajvalil ta Ejiptoe,+ pe li j-israeletike jech-o tajek chil svokolik ta skoj ti mosoinbilike. Jech xtok, x-avlajetik ta skʼanel koltael, kʼot kʼalal to ta stojolal melel Dios ti tskʼanik koltael ta skoj ti mosoinbilike.+ 24 Laj une, la sta yorail ti laj yaʼi Dios ti x-avlajetik ta skoj svokolike,+ vul ta sjol Dios li trato la spas xchiʼuk Abraan, Isaak xchiʼuk Jakobe.+ 25 Li Diose la skʼel li j-israeletike; vaʼun li Diose jech lik yakʼ ta yoʼonton.

3 Li Moisese lik xchabibe xchij li Jetro+ ti jaʼ smolniʼe* xchiʼuk ti jaʼ pale ta Madiane. Oy jun kʼakʼal kʼalal jaʼo yakal chikʼ batel li chijetik ta takixokol balumil ti te xkom ta smaleb kʼakʼale, te to kʼot li ta vits yuʼun melel Diose, jaʼ xkaltik, ta Oreb.+ 2 Li yaj-anjel Jeovae te laj yakʼ sba ta ilel ta stojolal Moises ta jpets chʼix+ ti xtiltun* skʼakʼale. Kʼalal te skʼeloj batele, laj yil ti xtiltun skʼakʼal li chʼixe, pe jaʼ noʼoxe muʼyuk chkʼakʼ li chʼixe. 3 Xi laj yal li Moisese: «Chbat jkʼel kik kʼusi yakal chkʼot ta pasel, yuʼun muʼyuk bu xkil-o jech ti muʼyuk bu chkʼakʼ li chʼixe». 4 Kʼalal laj yil Jeova ti bat skʼel li Moisese, xi kʼopoj tal ta chʼix li Diose: «¡Moises!, ¡Moises!». Xi takʼave: «Liʼ oyune». 5 Xi albate: «Mu xa masuk xanopaj talel. Lokʼo li axonobe, yuʼun chʼul balumil ti bu vaʼalote».

6 Xi to albate: «Voʼon Sdiosun li atote, li Sdios Abraane,+ li Sdios Isaake+ xchiʼuk li Sdios Jakobe».+ La smak sat li Moisese, yuʼun chiʼ mi sta ta ilel li melel Diose. 7 Xi albat yuʼun li Jeova xtoke: «Ta batsʼi melel, kiloj ti chlaj ta ilbajinel li jteklumal te oy ta Ejiptoe, laj xa kaʼi ti x-avlajetik tskʼanik koltael ta skoj li buchʼutik tsujatik ta abtele; kiloj ti bu to kʼalal kʼux chaʼiike.+ 8 Chiyal batel sventa jkolta lokʼel ta skʼob li j-ejiptoetike,+ chkikʼik muyel ta jun lekil balumil ti lek jamale, jun balumil ti bu oy lek leche xchiʼuk pome,+ jaʼ li yosil jkanaanetik, j-etetik, j-amorreoetik, jperisitaetik, j-eveoetik xchiʼuk li yosil jebusetike.+ 9 Yuʼun kʼot ta jtojolal ti x-avlajet tskʼanik koltael li jteklumal Israele xchiʼuk kiloj ti kʼu yelan tsots ch-ilbajinatik+ yuʼun li j-ejiptoetike. 10 Jaʼ yuʼun, laʼ, ta jtakot batel ta stojolal faraon sventa xalokʼes ta Ejipto+ li jteklumale, li j-israeletike».

11 Pe li Moisese xi laj yalbe li melel Diose: «¿Buchʼuun yaʼel ti chbat jkʼel li faraone xchiʼuk ti ta jlokʼes tal ta Ejipto li j-israeletike?». 12 Xi albate: «Voʼon ta jchiʼinot.+ Li senyail chkʼot ti voʼon ta jtakot batele jaʼ liʼe: mi lokʼ xa ox avuʼun ta Ejipto li jteklumale, chatunik ta stojolal* melel Dios li ta vits liʼe».+

13 Pe li Moisese xi laj yalbe li melel Diose: «Kaltik noʼox ti chibat ti bu oy li j-israeletike xchiʼuk ti xi chkʼot kalbeike: ‹La stakun talel ta atojolalik li Sdios amoltotakike›, vaʼun kʼusi chkalbeik mi xi la sjakʼbeikune: ‹¿Kʼusi sbi?›».+ 14 Jech oxal, xi albat yuʼun Dios li Moisese: «Voʼon ta jpas jba ti kʼu yelan ta jkʼan* ta jpas jbae».*+ Xi to albate: «Xi skʼan xavalbe li xnichʼnabtak Israele: ‹Li Voʼon ta jpas jbae jaʼ la stakun talel ta atojolalik›».+ 15 Vaʼun, xi albat yuʼun Dios yan velta li Moisese:

«Xi skʼan xavalbe li j-israeletike: ‹Li Sdios amoltotakik ti jaʼ li Jeovae, jaʼ li Sdios Abraane,+ li Sdios Isaake+ xchiʼuk li Sdios Jakobe,+ la stakun talel ta atojolalik›. Taje jaʼ jech jbi sbatel osil+ xchiʼuk jaʼ jech tsnaʼikun li jujukʼol kuxlejal chtale. 16 Jaʼ yuʼun, batan, bat tsobo li moletik ta Israele, xi xkʼot avalbee: ‹Li Jeova ti jaʼ Sdios amoltotakike laj yakʼ sba ta ilel ta jtojolal, jaʼ li Sdios Abraan, Isaak xchiʼuk Jakobe, xi laj yale: «Laj xa kakʼoxuk ta koʼonton+ xchiʼuk laj xa kakʼ venta li kʼusi chapasbatik ta Ejiptoe. 17 Jaʼ yuʼun, chkalboxuk ti ta jlokʼesoxuk ta skʼob li j-ejiptoetik ti chakʼ avokolike+ sventa chkikʼoxuk batel ta yosil jkanaanetik, j-etetik, j-amorreoetik,+ jperisitaetik, j-eveoetik xchiʼuk jebusetik.+ Chkikʼoxuk batel ta jun balumil ti bu oy lek leche xchiʼuk pome»›.+

18 »Chchikintaik li kʼusi chavale,+ vaʼun koʼol xa chabatik xchiʼuk li moletik ta Israel ta stojolal li ajvalil ta Ejiptoe, xi chavalbeike: ‹La xchiʼinunkutik ta loʼil li Jeova ti jaʼ Sdios j-ebreoetike.+ Jech oxal, avokoluk, koltaunkutik batel ta takixokol balumil, oxib kʼakʼal chinamajkutik batel sventa xbat kakʼbekutik milbil matanal li Jeova Dios kuʼunkutike›.+ 19 Pe jnaʼoj lek ti muʼyuk tskoltaoxuk batel li ajvalil ta Ejiptoe, jaʼ to mi laj yichʼ sujel yuʼun jun tsatsal kʼobile.+ 20 Jaʼ yuʼun, ta jyeʼ jkʼob sventa jyayijes li Ejipto ta skoj li kʼusitik labalik sba ta jpas ta stojolale, jaʼ to jech tstakoxuk lokʼel mi jech la jpasbee.+ 21 Ta jkoltaik sventa lekuk x-ilatik yuʼun j-ejiptoetik li jteklume, jaʼ yuʼun mu xokoluk chbat akʼobik kʼalal chalokʼik batele.+ 22 Li jujun antsetike akʼo skʼanbeik kʼusitik pasbil ta plata xchiʼuk ta oro li slakʼnaik xchiʼuk li antsetik ti te nakal ta snaike. Akʼo skʼanbeik kʼuʼil pokʼiletik xtok sventa xakʼbeik slap li skerem stsebike; jech chichʼik batel li kʼusitik jaʼ yuʼun li j-ejiptoetike».+

4 Pe xi la stakʼ li Moisese: «Jnoptik noʼox ti mu xchʼunbeikune xchiʼuk ti mu xchikintabeikun li kʼusi chkalbeike,+ yuʼun xuʼ xi chalike: ‹Muʼyuk laj yakʼ sba ta ilel ta atojolal li Jeovae›». 2 Xi la sjakʼ li Jeovae: «¿Kʼusi li te atsakoje?». Xi la stakʼe: «Jnamteʼ». 3 Xi albate: «Jipo ta lumtik». Jech oxal, la sjip ta lumtik, jech kʼataj ta jkot kiletel chon,+ vaʼun namaj ta anil li Moisese. 4 Li Jeovae xi laj yalbe li Moisese: «Tsakbo ta sne li chone». Jech oxal, la stsakbe sne, vaʼun chaʼkʼataj ta snamteʼ kʼalal la stsake. 5 Xi laj yal li Diose: «Leʼe jaʼ sventa xchʼunik ti laj yakʼ sba ta ilel ta atojolal+ li Jeovae, li Sdios amoltotike, jaʼ li Sdios Abraane, li Sdios Isaake xchiʼuk li Sdios Jakobe».+

6 Xi laj yal yan velta li Jeovae: «Avokoluk, tikʼo ochel ta yut akʼuʼ apokʼ li akʼobe». Jech la stikʼ ta yut skʼuʼ spokʼ li skʼobe. Kʼalal la slokʼese, ¡tsakbil xa ta lepra* li skʼobe, xkoʼolaj kʼuchaʼal taiv!+ 7 Xi laj yal li Diose: «Tikʼo sutel ta yut akʼuʼ apokʼ li akʼobe». Jech oxal, la stikʼ ochel ta yut skʼuʼ spokʼ li skʼobe. Pe kʼalal la slokʼes yan velta li skʼobe, ¡lek xa kom yan velta jech kʼuchaʼal sjunlej li sbekʼtale! 8 Xi laj yale: «Mi mu skʼan xchʼunboxuk o mi mu skʼan xchikintaboxuk li ta baʼyel senyaile, ta melel jaʼ ta xchʼunboxuk li ta yan senyaile.+ 9 Pe mi mu xchʼunboxuk li ta xchibal senyaile xchiʼuk mi mu skʼan stsakik ta mukʼ li kʼusi chavale, chbat alup talel voʼ ta ukʼum Nilo, vaʼun chamal ta takin balumil; li voʼ chalup tal ta Nilo ti chamal ta takin balumile ta me xkʼataj ta chʼichʼ».+

10 Li Moisese xi laj yalbe li Jeovae: «Pasun ta perton, Jeova, pe muʼyuk onoʼox lek xpʼejlajet chikʼopoj ta voʼne mi jaʼuk onoʼox ti kʼalal lik akʼoponun tal ti voʼon avajtunelune. Yuʼun xmaklajet noʼox chikʼopoj* xchiʼuk mu xjoyij lek li kokʼe».+ 11 Xi laj yal li Jeovae: «¿Buchʼu laj yakʼbe ye li krixchanoe, o buchʼu oy sjuʼel sventa spas ta umaʼ, sventa spas ta pakʼchikin,* sventa lek xil osil o sventa spas ta maʼsate? ¿Mi mu voʼonukun li Jeovae? 12 Jaʼ yuʼun, batan, te ta jchiʼinot kʼalal chakʼopoje* xchiʼuk chkakʼ avil li kʼusi skʼan xavale».+ 13 Pe xi laj yale: «Pasun ta perton, Jeova, avokoluk, tako batel ti buchʼuuk xal avoʼontone». 14 Vaʼun tsan tajek skʼakʼal yoʼonton Jeova ta stojolal li Moisese, xi laj yale: «¿Mi mu teuk oy li abankil Aaron+ ti jaʼ jlevi vinike? Jnaʼoj ti lek xtojob ta kʼopojele. Te xa bu xlokʼ talel sventa xtal snupot ta be. Xmuyubaj xa noʼox mi laj yilote.+ 15 Skʼan xachiʼin ta loʼil xchiʼuk skʼan xavalbe skotol li kʼusitik laj kalbote,+ li voʼone te ta jchiʼinoxuk-o kʼalal chakʼopojike+ xchiʼuk voʼon chkakʼ avilik ti kʼusi skʼan xapasike. 16 Jaʼ chchiʼin ta loʼil li jteklume, jaʼ avajkʼopojel chkʼot, li voʼot une chatun kʼuchaʼal Dios ta stojolal.*+ 17 Chatsak batel li namteʼil liʼe xchiʼuk jaʼ chtun avuʼun sventa chavakʼ ta ilel li senyailtake».+

18 Jaʼ yuʼun, li Moisese sut batel ti bu oy li Jetro ti jaʼ smolniʼe,*+ xi laj yalbee: «Avokoluk, chbat jkʼel kaʼi li jchiʼiltak ta vokʼel ti te oyik ta Ejiptoe, yuʼun ta jkʼan ta jkʼel mi kuxulik to». Li Jetroe xi la stakʼbe li Moisese: «Junuk avoʼonton xabat». 19 Ta tsʼakal une, li te ta Madiane, xi albat yuʼun Jeova li Moisese: «Batan, sutan batel ta Ejipto, yuʼun chamik xa skotol li viniketik ti tsaʼoxuk toʼox sventa tsmiloxuke».+

20 Jech oxal, li Moisese la smuyes ta jkot vuro li yajnile xchiʼuk li xnichʼnabtake, vaʼun sut batel ta Ejipto. Jech xtok, li Moisese la stsakbe li snamteʼ melel Diose. 21 Vaʼun, li Jeovae xi laj yalbe li Moisese: «Mi lakʼot xa ox li ta Ejiptoe, paso me skotol li skʼelobil juʼelal ta stojolal li faraone, yuʼun kakʼojbot xa ajuʼel sventa xapas.+ Li voʼon une chkakʼ tsatsubuk li yoʼontone,+ vaʼun muʼyuk tstak lokʼel li jteklume.+ 22 Xi xkʼot avalbe li faraone: ‹Xi chal li Jeovae: «Jaʼ jnichʼon li Israele, jaʼ li sba jnichʼone.+ 23 Jaʼ yuʼun xi chkalbote: takbun batel sventa xtun ta jtojolal li jnichʼone. Pe mi mu xakʼan xatakbun lokʼele, ta me jmilbot li anichʼone, jaʼ li sba anichʼone»›».+

24 Tana un, li Jeovae te la sta sba xchiʼuk li ta bee,+ jaʼ ti bu ch-echʼ yuʼunik akʼobale, yuʼun tskʼel kʼuxi xuʼ tsmil.+ 25 Li Sipora+ une la stsak pedernal ton* sventa xakʼbe sirkunsision* sjol skʼunil li yole, vaʼun li snukulil skʼunile te laj yakʼbe ta yakan, xi laj yale: «Yuʼun jlekomot ta skoj li chʼichʼ liʼe». 26 Jech oxal, li Diose laj yakʼ batuk. Ta skoj li sirkunsisione xi laj yal Sipora li vaʼ orae: «Jun lekomil ta skoj li chʼichʼ liʼe».

27 Li Jeova une xi laj yalbe li Aarone: «Lokʼan batel sventa te xata aba xchiʼuk Moises+ li ta takixokol balumile». Jech oxal lokʼ batel, vaʼun te la sta sbaik li ta vits yuʼun melel Diose,+ te kʼot stsʼutsʼ.* 28 Li Moisese la xchapbe Aaron skotol li kʼusitik albat yuʼun Jeovae, ti jaʼ takat batele+ xchiʼuk laj yalbe skotol li senyailtak ti akʼbat spas yuʼun Diose.+ 29 Ta tsʼakal li Moises xchiʼuk Aarone bat stsobik skotol li moletik ta Israele.+ 30 Li Aarone la xchapbe skotol li kʼusitik albat yuʼun Jeova li Moisese xchiʼuk la spas ta yeloval jteklum li senyailtake.+ 31 Jaʼ jech la xchʼunik+ li jteklume. Jaʼ yuʼun, li j-israeletike la snijan sbaik xchiʼuk la skejan spatan sbaik kʼalal laj yaʼiik ti chkoltaatik+ yuʼun Jeova xchiʼuk ti laj xa yakʼ venta li svokolik snuptanojike.+

5 Ta tsʼakal li Moises xchiʼuk Aarone ochik batel ti bu oy li faraone, xi kʼot yalbeike: «Xi yaloj Jeova li Sdios Israele: ‹Tako lokʼel li jteklumal sventa spasik kʼin ta jtojolal li ta takixokol balumile›». 2 Pe xi laj yal li faraone: «¿Buchʼu xa noʼox ti Jeova+ ti skʼan jchʼunbe smantale xchiʼuk ti jkolta batel li Israele?+ Mi juteb xkojtikin li Jeovae, jech xtok, muʼyuk ta jkolta batel li Israele».+ 3 Xi laj yalike: «La xchiʼinunkutik ta loʼil li Sdios j-ebreoetike. Avokoluk, koltaunkutik batel ta takixokol balumil, oxib kʼakʼal snamal chibatkutik sventa xbat kakʼbekutik milbil matanal li Jeova Dios kuʼunkutike;+ mi mu jechuk ta jpaskutike, tsyayijesunkutik ta chamel o ta espada». 4 Pe xi albatik yuʼun li ajvalil ta Ejiptoe: «Moises xchiʼuk Aaron, ¿kʼu yuʼun chakʼanik ti akʼo xkechan yabtelik li jteklume? ¡Sut abtejanik!».+ 5 Xi to laj yal li faraone: «Kʼelavilik, ep xa tajek li krixchanoetik liʼ ta lume, pe li voʼoxuke chakʼanik ti xkuxik li ta yabtelike».

6 Li vaʼ kʼakʼale, li faraone xi laj yalbe mantal li buchʼutik chchʼakik abtelal xchiʼuk li bankilaletike:* 7 «Mu xa xavakʼbeik jobel li jteklum sventa spasik li ladriyoe.+ Akʼo bat saʼ stukik li jobel ti chtun yuʼunike. 8 Pe jechuk-o me yepal xavakʼbeik spas ti kʼu onoʼox yepal tspasik li ladriyoe. Mu xajutukajesbeik, yuʼun xchʼajetik ta abtel. Jech oxal xi chalike: ‹¡Ta jkʼan chibatkutik, ta jkʼan chbat kakʼbekutik milbil matanal li Jdioskutike!›. 9 Tsatsubtasbeik to mas yabtelik xchiʼuk oyuk noʼox yabtelik avuʼunik sventa mu xchikintaik li jecheʼ loʼiletike».

10 Jaʼ yuʼun, li buchʼutik chchʼakik abtelal+ xchiʼuk li bankilaletike* lokʼik batel xchiʼuk xi laj yalbeik li jteklume: «Xi yaloj li faraone: ‹Muʼyuk xa chkakʼboxuk jobel. 11 Bat saʼo tal atukik ti bu xataik li jobele, pe maʼuk yuʼun te xa chjutukaj-o ti kʼu yepal chapas li avabtelike›». 12 Vaʼun, li jteklume la spuk sbaik batel ta saʼel jobel ta sjunul li yosilal Ejiptoe. 13 Li buchʼutik chchʼakik abtelale xi tsujvanike: «Jujun kʼakʼal skʼan stsuts li avabtelik ta jujuntale, jech yepal xapasik jech kʼuchaʼal kʼalal cha-akʼbatik toʼox li jobele». 14 Jech xtok, li buchʼutik chchʼakik abtelale la smajik+ li bankilaletik* ti svaʼanojik ta sventainel li j-israeletike. Xi la sjakʼike: «¿Kʼu yuʼun ti muʼyuk stsʼaki avuʼunik ti kʼu yepal nopem xavaʼiik spasel li ladriyoe? Jech kʼot ta pasel li voljee xchiʼuk jech kʼot ta pasel li avi xtoke».

15 Li bankilaletik* yuʼun j-israeletike bat skʼanik parte ta stojolal faraon, xi laj yalike: «¿Kʼu yuʼun ti jech chapasbe li avajtuneltake? 16 Li avajtunelunkutike muʼyuk xa chkichʼkutik akʼbel jobel, pe xi chkichʼkutik sujel xtoke: ‹¡Pasik me ladriyo!›. Lek chkichʼkutik majel ti voʼon avajtunelunkutike, pe jaʼ oy spaltail* li ateklumale». 17 Pe xi takʼbatike: «¡Chʼajoxuk ta abtel, chʼajoxuk ta abtel!+ Jaʼ yuʼun xi chavalike: ‹¡Ta jkʼan chibatkutik, ta jkʼan chbat kakʼbekutik milbil matanal li Jeovae!›.+ 18 Jaʼ lek batanik, ¡sut abtejanik! Muʼyuk xa chavichʼik akʼbel jobel, pe jech-o me yepal xapasik li ladriyoe».

19 Vaʼun, li bankilaletik* yuʼun j-israeletike laj yakʼik venta ti tsots tajek svokolik ta skoj ti xi laj yichʼ alele: «Mu xajutukajesbeik mi jutebuk ti kʼu yepal skʼan spasik ladriyo jujun kʼakʼale». 20 Kʼalal lokʼik talel ta stojolal li faraone, te la staik li Moises xchiʼuk Aaron ti te vaʼal chmalaatike. 21 Xi laj yalbeike: «Te akʼo skʼel xchiʼuk akʼo xchapanoxuk Jeova, yuʼun voʼoxuk ta akojik ti pʼajbilutik* yuʼun faraon xchiʼuk li yajtuneltake, jech xtok, voʼoxuk laj avakʼbeik espada ta skʼobik sventa tsmilutik».+ 22 Vaʼun, li Moisese bat skʼopon li Jeovae, xi laj yale: «Jeova, ¿kʼu yuʼun chavakʼbe svokol li jteklum liʼe? ¿Kʼusi stu ti la atakun tale chaʼa? 23 Yuʼun ti kʼuxi lik kʼopojkun ta abi+ ta stojolal li faraone, mas to lik yakʼbe svokol li jteklume,+ pe muʼyuk akoltaoj-o ateklumal ta melel li voʼote».+

6 Li Jeovae xi laj yalbe li Moisese: «Chavil tana li kʼusi ta jpasbe faraone.+ Tsujat yuʼun jun tsatsal kʼobil sventa stakoxuk lokʼel xchiʼuk tsujat yuʼun jun tsatsal kʼobil sventa snutsoxuk lokʼel li ta yosile».+

2 Vaʼun, xi albat yuʼun Dios li Moisese: «Voʼon Jeovaun. 3 Laj kakʼilan jba ta ilel ta stojolal Abraan, Isaak xchiʼuk Jakob ti voʼon li Diosun ti Buchʼu skotol xuʼ yuʼune.+ Pe muʼyuk xkakʼ jba ta ojtikinel+ ti Jeova jbie.+ 4 Jech xtok, la jpas jun trato xchiʼukik ti chkakʼbeik li yosilal Kanaane, jaʼ li balumil ti te echʼ nakiikuk kʼuchaʼal jyanlumetike.+ 5 Laj xa kaʼi ti x-avlajetik li jteklum Israele, jaʼ li buchʼutik mosoinbilik yuʼun li j-ejiptoetike, jech xtok, xvul ta jol li jtratoe.+

6 »Jaʼ yuʼun, xi xavalbe li j-israeletike: ‹Voʼon Jeovaun. Voʼon ta jkoltaoxuk li ta tsatsal ikatsil yuʼun j-ejiptoetike xchiʼuk ta jpojoxuk lokʼel ti jech smosoinojoxuke.+ Jech xtok, ta jtunes juʼel sventa jkoltaoxuk xchiʼuk chkakʼbe kastigo li j-ejiptoetike.+ 7 Voʼon chkikʼoxuk sventa xakʼotik ta jteklumal xchiʼuk voʼon chikʼot ta Adiosik.+ Ta batsʼi melel chanaʼik ti voʼon Jeovaune, li Adiosik ti tskoltaoxuk li ta tsatsal ikatsil yuʼun j-ejiptoetike. 8 Chkikʼoxuk batel li ta balumil ti laj kakʼ ke* chkakʼbe li Abraan, Isaak xchiʼuk Jakobe; voʼot chkakʼboxuk sventa xavuʼuninik.+ Voʼon Jeovaun›».+

9 Ta tsʼakale, jech kʼot yalbe j-israeletik li Moisese. Pe li j-israeletike muʼyuk la xchikintabeik li Moises ta skoj ti chibajem yoʼontonik xchiʼuk ti tsots mosoinbilike.+

10 Vaʼun, chiʼinat ta loʼil yuʼun Jeova li Moisese, xi albate: 11 «Ochan batel, albo yaʼi faraon li ajvalil ta Ejipto ti akʼo stak lokʼel ta yosil li j-israeletike». 12 Pe li Moisese xi la stakʼbe li Jeovae: «¡Kajval!, muʼyuk xchikintabun li j-israeletike.+ Jaʼ yuʼun, ¿kʼuxi xa noʼox chchikintabun faraon ti xmaklajet noʼox chikʼopoje?».*+ 13 Li Jeovae laj yalbe yan velta Moises xchiʼuk Aaron li mantaletik skʼan xalbeik li j-israeletike xchiʼuk li mantaletik skʼan xalbeik li faraon ti jaʼ ajvalil ta Ejiptoe sventa xlokʼik batel ta yosilal Ejipto li j-israeletike.

14 Liʼe jaʼ li joliletik ta jujuchop yutsʼ yalal j-israeletike: li xnichʼnabtak Ruben ti jaʼ li sba xnichʼon Israele+ jaʼik Anok, Palu, Esron xchiʼuk Karmi.+ Taje jaʼ li yutsʼ yalal Rubene.

15 Li xnichʼnabtak Simeone jaʼik Jemuel, Jamin, Oad, Jakin, Soar xchiʼuk Xaul ti jaʼ yol jun jkanaan antse.+ Taje jaʼ li yutsʼ yalal Simeone.

16 Liʼe jaʼ sbiik li xnichʼnabtak Levi+ ta jujuchop yutsʼ yalalike: Guerson, Koat xchiʼuk Merari.+ Ti kʼu sjalil kuxi li Levie jaʼ 137 jabil.

17 Li xnichʼnab Guerson ta jujuchop yutsʼ yalalike+ jaʼ Libni xchiʼuk Simei.

18 Li xnichʼnabtak Koate jaʼik Amram, Isar, Ebron xchiʼuk Usiel.+ Ti kʼu sjalil kuxi li Koate jaʼ 133 jabil.

19 Li xnichʼnab Merarie jaʼ Mali xchiʼuk Musi.

Taje jaʼ li yutsʼ yalal jlevietik ta jujuchop yutsʼ yalalike.+

20 Li Amrame laj yikʼ Jokebed+ ti jaʼ yixlel stote. Li Jokebede vokʼ yalab ti jaʼ xnichʼnab li Amrame, jaʼ Aaron xchiʼuk Moises.+ Ti kʼu sjalil kuxi li Amrame jaʼ 137 jabil.

21 Li xnichʼnabtak Isare jaʼik Kore,+ Nefeg xchiʼuk Sikri.

22 Li xnichʼnabtak Usiele jaʼik Misael, Elsafan+ xchiʼuk Sitri.

23 Li Aarone laj yikʼ Eliseba ti jaʼ stseb Aminadabe. Li Elisebae jaʼ xchiʼil ta vokʼel li Nasone.+ Li Elisebae vokʼ yalab ti jaʼ xnichʼnab li Aarone, jaʼik Nadab, Abiu, Eleasar xchiʼuk Itamar.+

24 Li xnichʼnabtak Koree jaʼik Asir, Elkana xchiʼuk Abiasaf.+ Taje jaʼ li yutsʼ yalal jkoreetike.+

25 Li Eleasar+ ti jaʼ xnichʼon Aarone laj yikʼbe jun stseb Putiel. Li tsebe vokʼ yol ti jaʼ xnichʼon li Eleasare, Fineas+ sbi.

Taje jaʼ li joliletik ta jujuchop utsʼ alaliletik+ ti te likik talel ta xnichʼnabtak Levie.

26 Taje jaʼ ti bu likik tal li Aaron xchiʼuk Moises ti xi albatik yuʼun Jeovae: «Lokʼesik ta yosilal Ejipto li jteklum Israele, akʼo lokʼikuk batel ta jujutsop».*+ 27 Taje jaʼik Moises xchiʼuk Aaron+ ti la skʼoponik faraon ti jaʼ ajvalil ta Ejiptoe sventa slokʼesik ta Ejipto li jteklum Israele.

28 Kʼalal jaʼo chiʼinat ta loʼil yuʼun Jeova li Moises ta yosilal Ejiptoe, 29 xi albat yuʼun Jeova li Moisese: «Voʼon Jeovaun. Bat albo faraon skotol li kʼusi chkalbote, jaʼ li ajvalil ta Ejiptoe». 30 Pe li Moisese xi la stakʼbe li Jeovae: «¡Kajval!, xmaklajet noʼox chikʼopoj.* Jaʼ yuʼun, ¿kʼuxi xa noʼox chchikintabun li faraone?».+

7 Vaʼun, xi albat yuʼun Jeova li Moisese: «Kʼelavil, koʼol xa kʼuchaʼal Dios kʼotemot kuʼun* ta stojolal li faraone, jech xtok, jaʼ chkʼot ta avaj-alkʼop li abankil Aarone.+ 2 Skʼan xavalbe skotol li kʼusi chkalbote, li abankil Aarone jaʼ xa chalbe li faraone, vaʼun li faraone tstak lokʼel li j-israeletik ta yosile. 3 Li voʼon une chkakʼ tsatsubuk yoʼonton li faraone,+ jech xtok, mas to ch-epaj li senyailtak kuʼune xchiʼuk li skʼelobiltak juʼelal ta jpas ta yosilal Ejiptoe.+ 4 Pe muʼyuk chchikintaboxuk li faraone, jaʼ yuʼun chkakʼ jkʼob ta stojolal li Ejiptoe, vaʼun ta jlokʼes li mukʼta jteklum kuʼune,* li j-israeletike; tsots chkakʼbe kastigo li j-ejiptoetike+ sventa jlokʼes ta yosilal Ejipto li jteklumale. 5 Mi la jyeʼ jkʼob sventa jkontrain li Ejiptoe xchiʼuk mi la jkolta lokʼel li j-israeletik ta stojolalike, li j-ejiptoetike jpʼel skʼoplal tsnaʼik ti voʼon Jeovaune».+ 6 Li Moises xchiʼuk Aarone la spasik li kʼusi albatik yuʼun Jeovae, jech tajek la spasik kʼuchaʼal albatike. 7 Kʼalal jaʼo bat skʼoponik li faraone,+ li Moisese yichʼoj xa ox 80 jabil, li Aarone yichʼoj xa ox 83 jabil.

8 Xi to albatik yuʼun Jeova li Moises xchiʼuk Aarone: 9 «Mi xi laj yalboxuk li faraone: ‹Pasik junuk skʼelobil juʼelal›, vaʼun xi xavalbe li Aarone: ‹Tsako li anamteʼe, jipo ta lumtik ta yeloval faraon›. Jech chkʼataj ta jkot mukʼta kiletel chon».+ 10 Li Moises xchiʼuk Aarone batik yoʼ bu oy li faraone xchiʼuk jech tajek kʼot spasik jech kʼuchaʼal albatik yuʼun li Jeovae. Li Aarone la sjip ta lumtik ta yeloval faraon xchiʼuk ta yeloval yajtuneltak li snamteʼe, jech kʼataj ta jkot mukʼta kiletel chon. 11 Vaʼun, li faraone la stak ta ikʼel li buchʼutik pʼijike xchiʼuk li j-akʼchameletike. Li paleetik ti xchanojik majia te ta Ejiptoe+ jech la spasik xchiʼuk li smajiaik* eke.+ 12 Ta jujuntal la sjipik ta lumtik li snamteʼike, jech kʼataj ta mukʼta kiletel chonetik ek; pe li snamteʼ Aarone la sbikʼanbe li snamteʼike. 13 Akʼo mi jech, tsatsub yoʼonton li faraone,+ jaʼ yuʼun muʼyuk la xchikintabe li Moises xchiʼuk Aaron jech onoʼox kʼuchaʼal yaloj li Jeovae.

14 Jaʼ yuʼun xi albat yuʼun Jeova li Moisese: «Tsots yoʼonton li faraone.+ Mu skʼan stak lokʼel li jteklume. 15 Sob xbat akʼel li faraon okʼome, yuʼun te chbat yoʼ bu oy li voʼe. Te xbat vaʼlan yoʼ te xata aba xchiʼuk li ta stiʼil ukʼum Niloe, tsako batel li namteʼil ti kʼataj ta kiletel chone.+ 16 Xi xavalbee: ‹La stakun talel ta atojolal+ li Jeova ti jaʼ Sdios j-ebreoetike, xi chale: «Koltabun lokʼel li jteklumal sventa te xtunik ta jtojolal ta takixokol balumil», pe muʼyuk achʼunoj-o. 17 Xi chal li Jeovae: «Liʼe jaʼ jech chanaʼ ti voʼon Jeovaune.+ Li jnamteʼ jtsakoj ta jkʼobe jaʼ ta jmaj-o li ukʼum Niloe, vaʼun chkʼataj ta chʼichʼ. 18 Chcham li choyetik ta Niloe xchiʼuk chlik tuibuk li Niloe, jaʼ yuʼun li j-ejiptoetike mu stakʼ uchʼel chaʼiik li voʼ ta Niloe»›».

19 Vaʼun, xi albat yuʼun Jeova li Moisese: «Xi xavalbe li Aarone: ‹Tsako li anamteʼe xchiʼuk toyo akʼob ta sba li voʼ oy ta Ejiptoe,+ ta sba li ukʼume, ta sba ti butik chbeine,* li ta tsʼantsʼan voʼe+ xchiʼuk ta skotol ti butik skʼejoj* yaʼalike sventa xkʼataj ta chʼichʼ›. Ch-ayan chʼichʼ ta sjunul yosilal Ejipto kʼalal to ta yavil yaʼalik ti pasbil ta teʼ xchiʼuk ta tone». 20 Li Moises xchiʼuk Aarone ta ora noʼox la spasik jech kʼuchaʼal albatik yuʼun Jeovae. La stoy li snamteʼe, ta sat faraon xchiʼuk yajtuneltak la smaj li voʼ ta ukʼum Niloe, jech kʼataj ta chʼichʼ skotol li ukʼume.+ 21 Cham li choyetik ta ukʼume+ xchiʼuk lik tuibuk li ukʼume. Li j-ejiptoetike mu stakʼ xuchʼik li voʼ ta Nilo+ ta skoj ti kʼataj ta chʼichʼ li voʼ ta sjunul li yosilal Ejiptoe.

22 Pe li paleetik ti xchanojik majia te ta Ejiptoe jech la spasik ek.+ Jech oxal, jech-o tsots yoʼonton li faraone, jaʼ yuʼun muʼyuk la xchikintabe li Moises xchiʼuk Aaron jech onoʼox kʼuchaʼal yaloj li Jeovae.+ 23 Sut batel ta sna li faraone, pe muʼyuk laj yakʼ ta yoʼonton xtok li kʼusi kʼot ta pasele. 24 Sventa xuchʼik voʼ li j-ejiptoetike, lik sjokʼ yaʼalik ta sjoylejal li Niloe, yuʼun mu stakʼ xuchʼik li voʼ ta Niloe. 25 Echʼ lek vukub kʼakʼal ti la skʼatajes ta chʼichʼ li voʼ ta Nilo li Jeovae.

8 Li Jeovae xi laj yalbe li Moisese: «Batan yoʼ bu oy li faraone, xi xavalbee: ‹Xi chal li Jeovae: «Koltabun lokʼel jteklumal sventa xtunik ta jtojolal.+ 2 Mi jech-o mu xakʼan xatak batele, ta xkakʼbot avokol, ta jnojes ta ranaetik sjunul li alumale.+ 3 Li ta ukʼum Niloe te chlokʼ tal epal ranaetik. Chmuyik tal, vaʼun ch-ochik ta ana, ta akuarto xchiʼuk chmuy ta atem.* Ch-ochik ta sna avajtuneltak xchiʼuk ta sna li ateklumale. Ch-ochik ta a-orno xchiʼuk ta svotsʼobil kʼusitik avuʼunik.+ 4 Chtalik ta atojolal li ranaetike, chtalik ta stojolal ateklumal xchiʼuk ta stojolal li avajtuneltake»›».

5 Ta tsʼakale, xi albat yuʼun Jeova li Moisese: «Xi xavalbe li Aarone: ‹Tsako li anamteʼe, toyo ta sba li ukʼumetike, ti butik chbein yok li Niloe xchiʼuk li ta tsʼantsʼan voʼetike. Akʼo muyuk tal avuʼun li ranaetik ta sjunul li yosilal Ejiptoe›». 6 Li Aarone la stoy skʼob ta sba skotol li voʼ ta Ejiptoe, vaʼun lik muyuk tal li ranaetike, solel lamal kʼot ta sjunul yosilal Ejipto. 7 Pe li paleetik ti xchanojik majiae jech la spasik ek. Muy tal yuʼunik ranaetik ek li ta yosilal Ejiptoe.+ 8 Li faraone la stak ta ikʼel li Moises xchiʼuk Aarone, xi laj yale: «Kʼanbeik vokol Jeova sventa xlokʼ batel ta jtojolal li ranaetike xchiʼuk ta stojolal li jteklumale,+ yuʼun ta jkʼan ta jtak batel li ateklumalik sventa xakʼbeik milbil matanal li Jeovae». 9 Li Moisese xi laj yalbe li faraone: «Albun kaʼitik kʼusi ora chakʼan ta jkʼopon Dios sventa xichʼ lokʼesel ta atojolal li ranaetike, ta stojolal li avajtuneltake, li ateklumale xchiʼuk li ta anatake. Jaʼ xa noʼox te chkom li ta ukʼum Niloe». 10 Xi laj yale: «Okʼom». Xi laj yal li Moisese: «Sventa xanaʼ ti muʼyuk yan kʼuchaʼal li Jdioskutik Jeovae,+ jechuk kʼotuk ta pasel kʼuchaʼal chavale. 11 Chlokʼ batel ta atojolal li ranaetike, chlokʼ batel li ta anatake, ta stojolal li avajtuneltake xchiʼuk ta stojolal li ateklumale. Jaʼ xa noʼox te chkom li ta Niloe».+

12 Jech oxal, li Moises xchiʼuk Aarone lokʼik batel ti bu oy li faraone, vaʼun li Moisese lik skʼanbe vokol Jeova ti akʼo slokʼes li ranaetik ti laj yakʼ talel ta stojolal li faraone.+ 13 Li Jeovae jech la spas kʼuchaʼal la skʼan li Moisese, jaʼ yuʼun lik chamuk li ranaetik ti te oy ta yut snaik, ta yamakʼik* xchiʼuk li ta osiltike. 14 Lik stsobik li ranaetike, solel ep xa noʼox butik la sbusanik, vaʼun lik tuibuk li balumile. 15 Kʼalal laj yakʼ venta faraon ti paj li vokolile, la stsatsubtas yoʼonton+ xchiʼuk muʼyuk la xchikintabe li Moises xchiʼuk Aaron jech onoʼox kʼuchaʼal yaloj li Jeovae.

16 Xi albat yuʼun Jeova li Moisese: «Xi xavalbe li Aarone: ‹Toyo li anamteʼe, majo li spukukal* balumile sventa xkʼataj ta usetik ta sjunul yosilal Ejipto›». 17 Taje jech la spasik. Li Aarone la stoy li snamteʼ stsakoje, vaʼun la smaj li spukukal* balumile. Jech kʼot ta stojolal krixchanoetik xchiʼuk ta stojolal chonbolometik li usetike. Skotol li spukukal balumile kʼataj ta us ta sjunul li yosilal Ejiptoe.+ 18 Li paleetik ti xchanojik majiae laj yakʼik persa spasel jech ek+ sventa slokʼesik tal usetik, pe muʼyuk pas yuʼunik. Li usetike kʼot ta stojolal krixchanoetik xchiʼuk ta stojolal chonbolometik. 19 Jaʼ yuʼun, li paleetik ti xchanojik majiae xi laj yalbeik li faraone: «¡Jaʼ ta sjuʼel  Dios!».*+ Pe jech-o tsots yoʼonton li faraone xchiʼuk muʼyuk la xchikintaanbe jech onoʼox kʼuchaʼal yaloj li Jeovae.

20 Vaʼun, li Jeovae xi laj yalbe li Moisese: «Sob tajek xalik li okʼome, bat vaʼan aba ta stojolal li faraone, yuʼun te chbat yoʼ bu oy li voʼe. Xi xavalbee: ‹Xi yaloj li Jeovae: «Koltabun lokʼel jteklumal sventa xtunik ta jtojolal. 21 Pe mi muʼyuk chatak lokʼel li jteklumale, ta jtak talel jtiʼvanej vovetik* ta atojolal, ta stojolal avajtuneltak, ta ateklumal xchiʼuk li ta anatake. Chnoj ta jtiʼvanej vovetik li naetik ta Ejiptoe xchiʼuk pixil chkom ta jtiʼvanej vovetik li balumil bu vaʼalike.* 22 Li vaʼ kʼakʼale, ta jvokʼ komel li yosilal Gosen ti jaʼ te nakal li jteklumale. Tee muʼyuk chkʼot jtiʼvanej vovetik*+ sventa xanaʼ ti liʼ oyun ta lum+ voʼon ti Jeovaune. 23 Chkakʼ ta ilel ti jelel li jteklumal xchiʼuk ateklumale. Okʼom chvinaj li senyail taje»›».

24 Jech kʼot ta pasel yuʼun li Jeovae, xvolet tal jtiʼvanej vovetik* li ta sna faraone, ta sna yajtuneltak xchiʼuk ta sjunul li yosilal Ejiptoe.+ Li balumile solel sok ta skoj li jtiʼvanej vovetike.+ 25 Jaʼ yuʼun, li faraone la stak ta ikʼel li Moises xchiʼuk Aarone, xi laj yale: «Batanik, akʼbeik milbil matanal Adiosik liʼ ta lume». 26 Pe xi la stakʼ li Moisese: «Mu lekuk ti jech ta jpaskutike, yuʼun li kʼusi chkakʼbekutik ta milbil matanal li Jdioskutik Jeovae toj chopol chil li j-ejiptoetike.+ Ti xkakʼkutik jun milbil matanal ti toj chopol chil ta sat li j-ejiptoetike, ¿mi mu van tauk xkichʼkutik tʼajbel ton? 27 Jaʼ yuʼun, chibatkutik ta takixokol balumil, oxib kʼakʼal chinamajkutik batel sventa te xbat kakʼbekutik milbil matanal li Jeova Dios kuʼunkutik jech kʼuchaʼal yalojbunkutike».+

28 Xi laj yal li faraone: «Voʼon ta jtakoxuk batel ta takixokol balumil sventa xavakʼbeik milbil matanal li Jeova Dios avuʼunike. Jaʼ noʼoxe mu toj nomuk xabatik. Kʼanik vokol ta jtojolal».+ 29 Xi la stakʼ li Moisese: «Chilokʼ batel ta atojolal, ta jkʼoponbot Jeova. Faraon, okʼom chlokʼ batel ta atojolal li jtiʼvanej vovetike,* chlokʼ batel ta stojolal avajtuneltak xchiʼuk ta stojolal li ateklumale. Pe mu me xalabanunkutik* un faraon ti muʼyuk xa chatak batel yan velta li jteklum sventa xakʼbeik milbil matanal li Jeovae».+ 30 Jech lokʼ batel Moises ta stojolal faraon sventa skʼanbe vokol li Jeovae.+ 31 Li Jeovae jech la spas kʼuchaʼal kʼanbat yuʼun li Moisese. Jech lokʼ batel ta stojolal faraon li jtiʼvanej vovetike* xchiʼuk lokʼ batel ta stojolal yajtuneltak xchiʼuk ta stojolal li steklumale. Mi jkotuk xa kom. 32 Pe tsatsub yan velta yoʼonton li faraone, jaʼ yuʼun muʼyuk la stak batel li jteklume.

9 Jech oxal, li Jeovae xi laj yalbe li Moisese: «Ochan batel ti bu oy li faraone, xi xavalbee: ‹Xi chal Jeova ti jaʼ Sdios j-ebreoetike: «Koltabun lokʼel li jteklumal sventa xtunik ta jtojolale.+ 2 Pe mi mu xakʼan xatakbun lokʼel xchiʼuk mi jaʼ noʼox chapajtsane, 3 li skʼob Jeovae+ ta me xtal ta stojolal li achonbolomtak ti te oy ta osiltike, chtal ta stojolal kaʼetik, vuroetik, kameyoetik, vakaxetik xchiʼuk chijetik. Tsots xa noʼox tajek li vokolil chtale.+ 4 Li Jeovae mu jechuk chakʼ kʼotuk ta pasel ta melel ta stojolal xchonbolomtak Israel jech kʼuchaʼal li chonbolometik ta Ejiptoe. Muʼyuk chcham jkotuk li xchonbolom j-israeletike»›».+ 5 Jech xtok, li Jeovae lek laj yakʼbe yorail ti kʼusi ora chkʼot ta pasele, xi laj yale: «Okʼom jech chakʼ kʼotuk ta pasel Jeova liʼ ta lume».

6 Ta yokʼomal noʼox jech la spas li Jeovae, lik chamuk skotol li jaytos chonbolometik ta Ejiptoe,+ yan li xchonbolomtak Israele muʼyuk xcham jkotuk. 7 Kʼalal la sjakʼbe skʼoplal faraon taje, albat ti muʼyuk xcham jkotuk li xchonbolomtak Israele. Pe jech-o tsots yoʼonton li faraone, jaʼ yuʼun muʼyuk la stak lokʼel li jteklume.+

8 Li Jeovae xi laj yalbe li Moises xchiʼuk Aarone: «Jopik ta xchibal akʼobik sibakil orno, vaʼun li Moisese tsvij muyel ta yeloval li faraone. 9 Ta xkʼataj ta ninil pukuk* li ta sjunul yosilal Ejiptoe, vaʼun chkʼataj ta kʼaʼemal chin ti oy spojovil ti chkʼot ta stojolal krixchanoetik xchiʼuk chonbolometik ta sjunul li yosilal Ejiptoe».

10 Jech oxal, la sjopik sibakil orno xchiʼuk bat svaʼan sbaik ta stojolal li faraone, li Moises une la svij muyel, vaʼun kʼataj ta chinetik ti oy spojovil ti lik chʼiuk ta sbekʼtal krixchanoetik xchiʼuk ta sbekʼtal li chonbolometike. 11 Li paleetik ti xchanojik majiae muʼyuk vuʼ yuʼun xbatik ta stojolal Moises ta skoj li kʼaʼemal chine, yuʼun li paleetik ti xchanojik majiae xchiʼuk skotol li j-ejiptoetike tsakbilik ta kʼaʼemal chin.+ 12 Pe li Jeovae laj yakʼ tsatsubuk yoʼonton li faraone, jaʼ yuʼun muʼyuk la xchikintabe li Moises xchiʼuk Aaron jech onoʼox kʼuchaʼal albat yuʼun Jeova li Moisese.+

13 Li Jeova une xi laj yalbe li Moisese: «Sob tajek xalik li okʼome, te xa vaʼan aba ta stojolal faraon, xi xavalbee: ‹Xi yaloj li Jeova ti jaʼ Sdios j-ebreoetike: «Koltabun lokʼel jteklumal sventa xtunik ta jtojolal. 14 Sventa xanaʼ ti muʼyuk buchʼu yan ta balumil kʼuchaʼal voʼone, chkakʼbot talel skotol li vokoliletike, chkakʼ talel ta stojolal avajtuneltak xchiʼuk ta stojolal ateklumal.+ 15 Ti jechuke, laj xa jyeʼ jkʼob sventa jyayijesot xchiʼuk ateklumal ta jun tsatsal vokolil, jech xtok, laj xa avichʼ lajesel* liʼ ta balumil ti jechuke. 16 Pe laj to kakʼ kuxian sventa xkakʼ avil juʼel xchiʼuk sventa xichʼ pukel ta spʼejel balumil li jbie.+ 17 ¿Mi yuʼun yokel-o chatoy aba ta stojolal li jteklumal ti mu xakʼan xatak batele? 18 Okʼom jechtik ora kʼuchaʼal liʼe chkakʼ taluk tsatsal bot ta atojolalik ti muʼyuk bu jech kʼotem-o ta pasel ta Ejiptoe. 19 Jaʼ yuʼun, alo mantal ti akʼo xbat yichʼ tikʼel skotol li achonbolomtake xchiʼuk skotol li kʼusi jaʼ avuʼun ti te oy ta osiltike. Skotol krixchano xchiʼuk chonbolometik ti te chkom ta osiltik ti muʼyuk chichʼ tikʼel ta yut nae, ta xchamik mi vul ta stojolalik li bote»›».

20 Li yajtuneltak faraone xiʼik-o li kʼusi laj yal Jeovae, jaʼ yuʼun la stikʼik ta anil ta yut sna li yajtunelike xchiʼuk li xchonbolomike, 21 pe li buchʼu muʼyuk la stsak ta mukʼ li kʼusi laj yal Jeovae te laj yikta komel ta osiltik li yajtuneltak xchiʼuk xchonbolomtake.

22 Tana un li Jeovae xi laj yalbe li Moisese: «Toyo akʼob ta vinajel sventa xtal ta sjunul yosilal Ejipto li bote.+ Chvul ta stojolal krixchanoetik, chonbolometik xchiʼuk ta stojolal skotol tsʼiʼleletik ti oy ta sjunul yosilal Ejiptoe».+ 23 Jaʼ yuʼun, li Moisese la stoy muyel snamteʼ ta vinajel, li Jeova une la stak talel chauk xchiʼuk bot, jech xtok, yal talel kʼokʼ* li ta balumile. Jech te xvajet-o bot yuʼun Jeova li ta yosilal Ejiptoe. 24 Xvajet-o li bote xchiʼuk xjaplajet* noʼox kʼokʼ kʼalal yakal li bote. Tsots xa noʼox tajek, muʼyuk-o bu jech kʼotem ta pasel ta Ejipto ti kʼuxi pas ta mukʼta lume.+ 25 Li bote la syayijes skotol li kʼusitik oy ta osiltik ta sjunul li yosilal Ejiptoe, kʼalal ta krixchanoetik xchiʼuk ta chonbolometik la syayijes, jech xtok, la slilin komel skotol li tsʼiʼleletike xchiʼuk la skʼasan komel skotol li teʼetik ta osiltike.+ 26 Jaʼ xa noʼox muʼyuk laj yakʼ bot li ta yosilal Gosen ti bu oy li j-israeletike.+

27 Li faraone la stak ta ikʼel li Moises xchiʼuk Aarone, xi laj yalanbee: «Li avie, la jsaʼ jmul. Tukʼ kʼusi tspas li Jeovae, jaʼ oy jmulkutik xchiʼuk li jteklumale. 28 Kʼanbeik vokol Jeova sventa xpaj li chauke xchiʼuk li bot la stak tale. Vaʼun, ta jtakoxuk lokʼel, muʼyuk xa liʼ chakomike». 29 Xi la stakʼ li Moisese: «Jaʼ noʼox mi lilokʼ batel liʼ ta jteklume, ta jyeʼ xchibal jkʼob ta stojolal Jeova. Jaʼ yuʼun, sventa xanaʼ ti jaʼ yuʼun Jeova li balumile,+ chpaj li chauk xchiʼuk sbotale. 30 Akʼo mi jech chkʼot ta pasel, jnaʼoj lek ti muʼyuk onoʼox chlik axiʼtaik* Jeova Dios xchiʼuk li avajtuneltake».

31 Lilijem kom li lino nichim xchiʼuk sevadae, yuʼun li sevadae lek xa ox yij sat sventa xichʼ tsobel xchiʼuk li lino nichime chtʼomanuk xa ox xnichtak. 32 Pe li trigoetike* muʼyuk xlilij, yuʼun tsʼakal to chlokʼ. 33 Li Moises une lokʼ batel li ta jteklum ti bu oy faraone, la stoy xchibal skʼob ta stojolal li Jeovae, vaʼun jech paj li chauk xchiʼuk sbotale, jech xtok, paj li voʼe.+ 34 Kʼalal laj yakʼ venta faraon ti paj li voʼe, li bote xchiʼuk li chauke, la saʼ smul yan velta xchiʼuk la stsatsubtas yoʼonton;+ jech la spas li yajtuneltak eke. 35 Jech-o tsots yoʼonton la spas li faraone, jaʼ yuʼun muʼyuk la stak lokʼel li j-israeletik jech onoʼox kʼuchaʼal laj yal ta stojolal Moises li Jeovae.+

10 Vaʼun, xi albat yuʼun Jeova li Moisese: «Ochan batel ti bu oy li faraone, yuʼun li voʼone laj kakʼ tsatsubuk yoʼonton xchiʼuk laj kakʼ tsatsubuk yoʼonton yajtuneltak+ sventa xuʼ xkakʼ ta ilel ta stojolal li senyailtak kuʼune.+ 2 Jech xtok, jaʼ sventa xavalbe anichʼnabtak xchiʼuk amamobtak ti tsots tajek laj kakʼbe svokol li Ejiptoe xchiʼuk li senyailtak laj kakʼ ta ilel ta stojolalike;+ li voʼoxuke jaʼ jech chanaʼik ta melel ti voʼon Jeovaune».

3 Jaʼ yuʼun, li Moises xchiʼuk Aarone ochik batel ti bu oy li faraone, xi laj yalbeike: «Xi chal Jeova ti jaʼ Sdios j-ebreoetike: ‹¿Kʼusi to ora chlik abikʼtajes aba ta jtojolal?+ Koltabun lokʼel li jteklumal sventa xtunik ta jtojolale. 4 Mi jech-o mu xakʼan xakolta lokʼel li jteklumale, li okʼome ta jtak talel kʼulubetik ti bu kʼalal smakoj alumale. 5 Pixil chkom ta kʼulubetik li balumile, jech mu xa xvinaj chkom li balumile. Chlik slajesik skotol li kʼusitik laj yiktaboxuk komel li bote xchiʼuk tslajesik skotol li teʼetik ti yakal chchʼi tal ta osiltike.+ 6 Chnoj ta kʼulubetik li anatake, skotol li sna avajtuneltake xchiʼuk li naetik ta sjunul Ejiptoe. Li kʼusi chkʼot ta pasele muʼyuk bu jech yiloj-o atotik xchiʼuk amukʼtotik›».*+ Kʼalal jech laj yale, joypʼij, vaʼun lokʼ batel ti bu oy li faraone.

7 Xi albat yuʼun yajtuneltak li faraone: «¿Bakʼin to chikta sba ta sibtaselutik* li mu vinik leʼe? Tako xa lokʼel li jteklume, akʼo xa bat tunikuk ta stojolal li Jeova ti jaʼ Sdiosike. ¿Mi yuʼun mu to xavakʼ venta ti solel lajem xa tajek li Ejiptoe?». 8 Jaʼ yuʼun, laj yichʼik takel ta ikʼel yan velta ta stojolal faraon li Moises xchiʼuk Aarone, xi albatike: «Batanik, bat tunanik ta stojolal li Jeova Dios avuʼunike. ¿Pe buchʼutik ti chbatik une?». 9 Xi laj yal li Moisese: «Chibatkutik xchiʼuk li jchex kerem tsebkutike, li buchʼutik oy xa sjabilalike, li jkeremkutike, li jtsebkutike, li jchijkutike xchiʼuk li jvakaxkutike,+ yuʼun ta jpaskutik jun kʼin ta stojolal li Jeovae».+ 10 Xi albatik yuʼun li faraone: «¡Mi oy junuk kʼakʼal la jtakoxuk lokʼel akotolik xchiʼuk li avalab anichʼnabike, yuʼun me te xchiʼinojoxuk Jeova un bi!+ Lek xvinaj ti chopol li kʼusi oy ta avoʼontonik spasele. 11 ¡Pe mi jutebuk jech ta jpas! Jaʼ noʼox xuʼ xabatik voʼoxuk li vinikoxuke, bat tunanik ta stojolal li Jeovae, yuʼun jaʼ li kʼusi la akʼanike». Vaʼun, nutsatik lokʼel ta stojolal li faraone.

12 Xi albat yuʼun Jeova li Moisese: «Toyo akʼob ta stojolal yosilal Ejipto sventa xtal li kʼulubetike, sventa xtal ta yosilal Ejipto xchiʼuk sventa slajesik skotol li tsʼiʼleletik ta osiltike, skotol li kʼusitik laj to yikta komel li bote». 13 Li Moisese ta anil noʼox la stoy snamteʼ ta stojolal li yosilal Ejiptoe, li Jeova une laj yakʼ taluk ikʼ ti lik talel ta slokʼeb kʼakʼale, solel xjumumet sjunul kʼakʼal xchiʼuk sjunul akʼobal li ta lume. Ta sob yokʼomale, xkuchoj talel kʼulubetik li ikʼ ti lik talel ta slokʼeb kʼakʼale. 14 Jech tal li kʼulubetike, te lamal kʼot ta sjunul li yosilal Ejiptoe.+ Solel toj echʼ xa noʼox tsots laj yakʼ vokolil,+ yuʼun muʼyuk-o bu jech yepal kʼotem kʼulubetik kʼuchaʼal taje xchiʼuk muʼyuk jech chkʼot ta pasel yan velta xtok. 15 Pixil kom ta kʼulubetik sjunul li lume, jaʼ yuʼun ikʼ tajek kom yuʼun li lume; la slajesik skotol li tsʼiʼleletik ta osiltike xchiʼuk skotol li sat teʼetik ti kol komel ta bote; muʼyuk xa kʼusi yox kom li ta teʼtikaltike xchiʼuk li ta tsʼiʼleltik ta sjunul yosilal Ejiptoe.

16 Li faraone la stak ta ikʼel ta anil li Moises xchiʼuk Aarone, xi laj yale: «La jsaʼ jmul ta stojolal li Jeova Dios avuʼunike xchiʼuk ta atojolalik. 17 Jaʼ yuʼun, slajeb xa velta akʼikun ta perton li avie, avokolikuk, kʼanbeik vokol li Jeova Dios avuʼunik sventa slokʼes batel ta jtojolal li vokolil ti chmilvane». 18 Lokʼ batel* ti bu oy li faraone, la skʼanbe vokol li Jeovae.+ 19 Vaʼun, li Jeovae la sjelbe sbe li ikʼe, laj yakʼ sutuk ta tsatsal ikʼ ti chlik xa tal ta smaleb kʼakʼale, jech la xkuch batel li kʼulubetike, te to kʼot yuʼun ta Tsajal nab. Mi jkotuk xa kʼulub kom ta sjunul li yosilal Ejiptoe. 20 Pe li Jeovae laj yakʼ tsatsubuk yoʼonton li faraone,+ jaʼ yuʼun muʼyuk la stak lokʼel li j-israeletike.

21 Xi albat yuʼun Jeova li Moisese: «Toyo muyel akʼob ta vinajel sventa x-ikʼub osil li ta yosilal Ejiptoe, ikʼ tajek chkom ti xvinaj xa ta pikel yilele». 22 Ta ora noʼox la stoy muyel skʼob ta vinajel li Moisese, vaʼun oxib kʼakʼal ikʼ tajek kom sjunul li yosilal Ejiptoe.+ 23 Oxib kʼakʼal muʼyuk xil sbaik xchiʼuk muʼyuk bu xbatik, pe ti bu nakal skotol li j-israeletike oy sakilal osil.+ 24 Li faraone la stak ta ikʼel li Moisese, xi laj yalbee: «Batanik, bat tunanik ta stojolal Jeova.+ Xuʼ xavikʼik batel xtok li avalab anichʼnabike. Jaʼ noʼoxe chkom li achijik xchiʼuk avakaxike». 25 Pe xi laj yal li Moisese: «Voʼot chavakʼbunkutik batel chonbolometik sventa xkakʼbekutik ta milbil matanal xchiʼuk ta chikʼbil matanal li Jeova Dios kuʼunkutike.+ 26 Chkikʼkutik batel li jchonbolomkutike, mi jkotuk* ta xkom. Yuʼun jaʼ ta jtuneskutik jlomuk sventa xkichʼkutik ta mukʼ li Jeova Dios kuʼunkutike, mu jnaʼkutik kʼusi chkakʼkutik sventa xkichʼkutik ta mukʼ Jeova jaʼ to mi te likʼotkutike». 27 Pe li Jeovae laj yakʼ tsatsubuk yoʼonton li faraone, jaʼ yuʼun muʼyuk la stakan lokʼel.+ 28 Xi laj yal li faraone: «¡Lokʼan batel! Kʼelo me aba, mu xa xtal akʼel jsat yan velta, yuʼun ta me xacham mi tal to akʼel jsate». 29 Xi laj yal li Moisese: «Muʼyuk xa chtal jkʼelbot asat jech kʼuchaʼal chavale».

11 Li Jeovae xi laj yalbe li Moisese: «Ta to xkakʼ taluk jtos vokolil ta stojolal faraon xchiʼuk ta stojolal li Ejiptoe. Mi kʼot ta pasele, jaʼ to tstakoxuk lokʼel.+ Ta melel, tsnutsoxuk lokʼel mi kʼot yoraile.+ 2 Avi une, albo skotol li viniketik xchiʼuk antsetik ta jteklum ti akʼo skʼanbe slakʼnaik kʼusitik pasbil ta plata xchiʼuk ta oro».+ 3 Li Jeovae la skolta jteklum sventa lekuk x-ilatik yuʼun li j-ejiptoetike. Jech xtok, li Moisese lek tajek ilbil yuʼun yajtuneltak faraon xchiʼuk li krixchanoetik ta jteklum Ejiptoe.

4 Vaʼun, xi laj yal li Moisese: «Xi chal li Jeovae: ‹Li ta oʼloltik akʼobale chi-echʼ ta oʼlol Ejipto,+ 5 vaʼun chcham skotol li sba nichʼoniletik ta yosilal Ejiptoe,+ ta xcham kʼalal ta sba xnichʼon faraon ti te chotol ta chotlebal sventa ajvalile kʼalal ta sba yol li kiarail ti te chjuchʼunaj ta molinoe,* jech xtok, chcham skotol li sba yol chonbolometike.+ 6 Ta sjunul li yosilal Ejiptoe chlik tsots avanel ti muʼyuk bu jech xichʼ-o aʼiele xchiʼuk ti muʼyuk bu jech chichʼ aʼiel yan velta xtoke.+ 7 Pe mi jkotuk tsʼiʼ xvojvun ta stojolal li j-israeletike, mi jaʼuk ta stojolal li viniketike mi jaʼuk ta stojolal li xchonbolomike. Ti jech chkʼot ta pasele, jaʼ sventa xanaʼik ti jelel kʼusi xuʼ spas ta stojolal j-ejiptoetik li Jeovae xchiʼuk ti jelel kʼusi xuʼ spas ta stojolal li j-israeletike›.+ 8 Vaʼun, chtalik ta jtojolal skotol li avajtuneltake xchiʼuk chtal skejan spatan sbaik ta jtojolal, xi chalike: ‹Batan xchiʼuk sjunul li jteklum ti tstsʼakliote›.+ Ta tsʼakal une chilokʼ batel». Vaʼun, li Moisese tsanal tajek skʼakʼal yoʼonton lokʼ batel ti bu oy li faraone.

9 Pe li Jeovae xi laj yalbe li Moisese: «Li faraone muʼyuk chchikintaboxuk+ sventa x-epaj li skʼelobiltak juʼelal kuʼun ta yosilal Ejiptoe».+ 10 Skotol li skʼelobiltak juʼelal taje la spasik ta yeloval faraon+ li Moises xchiʼuk Aarone. Pe li Jeovae laj yakʼ tsatsubuk yoʼonton li faraone, jaʼ yuʼun muʼyuk la stak lokʼel j-israeletik li ta yosile.+

12 Vaʼun, xi albatik yuʼun Jeova li Moises xchiʼuk Aaron li ta yosilal Ejiptoe: 2 «Li u liʼe jaʼ slikeb li jujun u avuʼunike. Jaʼ chkʼot ta baʼyel u avuʼunik li ta jujun jabile.+ 3 Chiʼinik ta loʼil skotol li j-israeletike, xi xavalbeike: ‹Li ta slajunebal li u liʼe, ta jujuntal skʼan stsakik jkotuk chij+ sventa li yutsʼ yalalike,* jkot chij ta jujupʼej na skʼan stsakik. 4 Mi jutebik li utsʼ alalil sventa stiʼik li chije, skʼan stsob sbaik xchiʼuk li slakʼnaik ti mas nopol xilike sventa skomon lajesik ta snaik jaʼ ti jayvoʼike. Kʼalal chakʼelik ti jayvoʼ chatsob abaike, tsakik ta venta lek kʼu yepal chatiʼik ta jujuntal. 5 Xuʼ xatʼujik jkot chʼiom tot chij o jkot chʼiom tot tentsun, jaʼ noʼoxe skʼan muʼyukuk ip*+ xchiʼuk skʼan junuk jabil yichʼoj. 6 Te to xachabiik jaʼ to mi kʼot li 14 yuʼun li u liʼe,+ sjunul li tsobobbail yuʼun Israele skʼan smilik kʼalal chʼayem xa ox batel kʼakʼale.*+ 7 Skʼan stsakbeik jutuk li xchʼichʼele, vaʼun akʼo sbonbeik ta xchaʼjotal li smarkoal tiʼ na ta xokontake xchiʼuk li smarkoal tiʼ na ta sjol ti bu tstiʼik li chije.+

8 »›Li sbekʼtale skʼan stiʼik noʼox li vaʼ akʼobale.+ Skʼan svoik ta kʼokʼ xchiʼuk skʼan stiʼik xchiʼuk pan ti muʼyuk slevaduraile*+ xchiʼuk chʼail itajetik.+ 9 Mi jutebuk me xatiʼik mi tse toe o mi lakanbile, skʼan xavoik lek ta kʼokʼ, vobeik li sjole, li yoʼtake xchiʼuk kʼalal to ta sbel xchʼut. 10 Mu me kʼusi xakʼejik* ta sventa yokʼomal, pe mi oy to kom avuʼunik ta yokʼomale, skʼan xachikʼik.+ 11 Xi skʼan xaveʼike: tsiniluk me lek achukik,* alapojuk me axonobik xchiʼuk atsakojuk me anamteʼik; jech xtok, skʼan sujom xaveʼik. Jaʼ Kʼin Koltael sventa Jeova. 12 Yuʼun chi-echʼ ta yosilal Ejipto li vaʼ akʼobale xchiʼuk ta jyayijes skotol li sba nichʼonil ta yosilal Ejiptoe, ta jyayijes kʼalal ta krixchanoetik xchiʼuk ta chonbolometik,+ jech xtok, ta jchapan skotol li diosetik ta Ejiptoe.+ Voʼon Jeovaun. 13 Li chʼichʼ ta tiʼ na ti bu oyoxuke chtun sventa senyail avuʼunik. Mi laj kil li chʼichʼe, tukʼ chijelav batel, jaʼ yuʼun muʼyuk chtal ta atojolalik li vokolil sventa xavichʼik lajesel mi tal jyayijes li yosilal Ejiptoe.+

14 »›Li vaʼ kʼakʼale, chtun sventa snaʼobil avuʼunik, skʼan xapasik jun kʼin ta stojolal Jeova, skʼan jech spasik ek li jaykʼol kuxlejal chtal avuʼunik ta tsʼakale. Jaʼ jun mantal sbatel osil ti skʼan xapasik li kʼine. 15 Vukub kʼakʼal skʼan xaveʼik pan ti muʼyuk slevaduraile.+ Li ta sba kʼakʼale, skʼan xalokʼes ta anaik li votsʼbil arina ti yichʼoj slevaduraile. Yuʼun li buchʼu tslajes kʼusi yichʼoj slevadurail li ta sba kʼakʼal kʼalal to ta svukubal kʼakʼale skʼan xichʼ milel.* 16 Chapasik jun chʼul tsobajel li ta sba kʼakʼale xchiʼuk chapasik yan chʼul tsobajel li ta svukubal kʼakʼale. Mu stakʼ xa-abtejik mi jutebuk li vaʼ kʼakʼaletike.+ Jaʼ noʼox skʼan xapas aveʼelik ti kʼu yepal chalajesik ta jujuntale.

17 »›Skʼan xapasik li Skʼinal Pan ti Muʼyuk Slevaduraile,+ yuʼun li vaʼ kʼakʼale ta jlokʼes ta yosilal Ejipto li ateklumal ti epik tajeke.* Li vaʼ kʼakʼale, persa me skʼan xachabiik xchiʼuk akʼo xchabiik ek li jaykʼol kuxlejal chtal avuʼunik ta tsʼakale. Jaʼ jun mantal chkom ta atojolalik sbatel osil. 18 Kʼalal chʼayem xa ox batel kʼakʼal li ta 14 yuʼun sba ue, skʼan xalajesik pan ti muʼyuk slevaduraile, jech-o xapasik kʼalal to ta 21 yuʼun li u liʼe kʼalal chʼayem xa ox batel kʼakʼale.+ 19 Vukub kʼakʼal skʼan mu xavakʼbeik slevadurail li avotsʼbil arinaik ta anaike, yuʼun mi oy buchʼu tslajes li kʼusi yichʼoj slevaduraile, skʼan xichʼ milel*+ manchuk mi jyanlum o mi te vokʼem ta Israel.+ 20 Mu me xalajesik jutebuk li kʼusitik oy slevaduraile. Li ta anaike jaʼ noʼox xuʼ xalajesik pan ti muʼyuk slevaduraile›».

21 Li Moisese ta anil la stak ta ikʼel li moletik ta Israele,+ xi laj yalanbee: «Batanik, bat tʼujik chʼiom chonbolometik* sventa jujuchop avutsʼ avalalik, milik sventa xavakʼik ta matanal li ta Kʼin Koltaele. 22 Tsʼajik jchukuk isopo* li ta chʼichʼ te akʼbil ta jun mukʼta boche. Li isopo ti bonbil ta chʼichʼe jaʼ majik-o li smarkoal tiʼ na ta sjole xchiʼuk li smarkoal tiʼ na ta xokontake. Mi junuk me buchʼu xlokʼ avuʼunik li ta anaike, jaʼ to xuʼ xalokʼik ta yokʼomal. 23 Kʼalal mi echʼ yakʼbe svokol j-ejiptoetik li Jeovae xchiʼuk mi laj yil li chʼichʼ ta smarkoal tiʼ na ta sjole xchiʼuk li ta smarkoal tiʼ na ta xokontake, tukʼ chjelav ta stiʼ anaik li Jeovae, muʼyuk ta xakʼ ochuk ta anaik+ li vokolil sventa lajelale.*

24 »Skʼan jech xapasik xchiʼuk avalab anichʼnabik li kʼin taje,+ yuʼun jaʼ jun mantal ta sbatel osil. 25 Kʼalal mi la-ochik li ta balumil ti yaloj onoʼox Jeova chakʼboxuke, jech-o me xapasik li kʼin taje.+ 26 Mi oy jun kʼakʼal ti xi tsjakʼboxuk li avalab anichʼnabike: ‹¿Kʼusi smelolal ti jech chapasike?›,+ 27 xi skʼan xatakʼbeike: ‹Jaʼ jun milbil matanal sventa li Kʼin Koltael yuʼun Jeovae, yuʼun kʼalal ay yakʼbe svokol li j-ejiptoetike, muʼyuk laj yakʼ vokolil ti bu oy snaik li j-israeletike, laj yakʼbe perton li kutsʼ kalalkutike›».

Vaʼun, li j-israeletike la snijan sbaik xchiʼuk la skejan spatan sbaik. 28 Jech lokʼik batel li j-israeletike, jech bat spasik jech kʼuchaʼal albatik mantal yuʼun Jeova li Moises xchiʼuk Aarone.+ Jech tajek la spasik kʼuchaʼal albatike.

29 Li ta oʼlol akʼobal une, li Jeovae la smil skotol li sba nichʼoniletik ta yosilal Ejiptoe,+ la smil kʼalal ta sba xnichʼon faraon ti te chotol ta chotlebal sventa ajvalile kʼalal ta sba xnichʼon li jchukel ti te tikʼil ta chukinabe* xchiʼuk skotol li sba yol chonbolometike.+ 30 Li faraon xchiʼuk yajtuneltake likik li vaʼ akʼobale, likik skotol li yan j-ejiptoetik eke. Ta skoj ti oy yanimaik ta jujupʼej snaik li j-ejiptoetike, te lik tsots avanel yuʼunik.+ 31 Li ta akʼobale, takatik ta ikʼel ta anil yuʼun faraon li Moises xchiʼuk Aarone,+ xi albatike: «Likanik, lokʼanik batel li ta jteklumale, akʼo lokʼikuk batel ek li yan j-israeletike. Batanik, bat tunanik ta stojolal Jeova jech kʼuchaʼal laj avalike.+ 32 Ikʼik batel xtok li achijik xchiʼuk avakaxike. Batanik jech kʼuchaʼal laj avalike.+ Jech xtok, akʼbeikun bendision».

33 Li j-ejiptoetike lik sujik li jteklum ti akʼo lokʼikuk batel ta anil li ta lume.+ Yuʼun xi chalike: «¡Mi muʼyuk chbatike, ta me xijcham jkotoltik un bi!».+ 34 Li jteklume la xkuchik batel li svotsʼbil arinaik ti muʼyuk slevaduraile. La stikʼik ta svotsʼobil xchiʼuk la svol ta skʼuʼ spokʼik ti la skajan batel ta snekebike. 35 Li j-israeletike jech la spasik kʼuchaʼal albatik yuʼun li Moisese, jaʼ yuʼun la skʼanbeik j-ejiptoetik kʼusitik pasbil ta plata xchiʼuk ta oro, jech xtok, la skʼanbeik kʼuʼil pokʼiletik.+ 36 Li Jeovae la skolta jteklum sventa lekuk x-ilatik yuʼun li j-ejiptoetike, jech oxal li j-ejiptoetike laj yakʼik skotol li kʼusitik kʼanbatike, jech pojbatik batel li kʼusitik oy yuʼunike.+

37 Li j-israeletike te van 600 mil ti ta yakan likik batel ta Rameses+ kʼalal to ta Sukote,+ parte xtok li ololetike.+ 38 Jech xtok, te tijil batik epal krixchanoetik*+ xchiʼuk laj yikʼik batel li xchijik xchiʼuk xvakaxike, ep ta jyalel li chonbolometike. 39 Lik spasik ta pan li svotsʼbil arinaik ti laj yichʼik lokʼel ta Ejipto ti chʼabal slevaduraile, la staʼajesik. Ti jech chʼabal slevadurail li s-arinaike, jaʼ ta skoj ti anil noʼox nutsatik lokʼel ta Ejiptoe, muʼyuk xa xakʼ yorail xchapan batel kʼusi slajesik.+

40 Ti kʼu sjalil te nakiik ta Ejipto+ li j-israeletike jaʼ 430 jabil.+ 41 Li vaʼ kʼakʼal kʼalal tsʼaki li 430 jabile, li steklumal Jeova ti epik tajeke jaʼo lokʼik* li ta yosilal Ejiptoe. 42 Jaʼ jun akʼobal ti skʼan xchabiike, yuʼun jaʼo lokʼesatik yuʼun Jeova li ta yosilal Ejiptoe. Li akʼobal taje skʼan xchabiik li jteklum Israel ta stojolal li Jeovae xchiʼuk jech skʼan xchabiik ek li jaykʼol kuxlejal chtal yuʼunik ta tsʼakale.+

43 Jech oxal, xi albatik yuʼun Jeova li Moises xchiʼuk Aarone: «Liʼe jaʼ smantalil li Kʼin Koltaele: mi junuk jyanlum stakʼ slajes li veʼlil sventa Kʼin Koltaele.+ 44 Pe mi oy buchʼu smanoj ta takʼin junuk smosoe, skʼan xavakʼbe sirkunsision,*+ vaʼun jaʼ noʼox jech xuʼ slajes. 45 Li buchʼu te talem ta naklej ta alumalike xchiʼuk li jsaʼabtele mu stakʼ slajesik. 46 Te noʼox ta yut ana xalajesik, mu stakʼ xavichʼik lokʼel jutebuk ta pana* li bekʼete xchiʼuk mu stakʼ xakʼasbeik junuk sbakil.+ 47 Jech skʼan spas sjunul li tsobobbail yuʼun Israele. 48 Mi te xchiʼukoxuk ta naklej junuk jyanlum ti tskʼan tspas yaʼi ek li Kʼin Koltael yuʼun Jeovae, skʼan xichʼ sirkunsision skotol li viniketik te oy ta snae. Vaʼun jaʼ to jech xuʼ xchiʼinoxuk ta spasel xchiʼuk koʼol xa kʼuchaʼal te vokʼem ta Israel chkʼot. Pe mu xuʼ slajes li buchʼu muʼyuk yichʼoj sirkunsisione.+ 49 Jun noʼox mantal oy ta sventa li buchʼu te vokʼem ta Israele xchiʼuk li jyanlum ti te xchiʼukoxuk ta nakleje».+

50 Skotol li j-israeletike la spasik jech kʼuchaʼal albatik mantal yuʼun Jeova li Moises xchiʼuk Aarone. Jech tajek la spasik kʼuchaʼal albatike. 51 Li vaʼ kʼakʼale, la slokʼes ta yosilal Ejipto skotol j-israeletik* li Jeovae.

13 Li Jeovae xi to laj yalbe li Moisese: 2 «Chʼultajesbun* skotol li sba xnichʼnab j-israeletik ti keremetike.* Jaʼ kuʼun li sba kerem chvokʼe o li sba yol chonbolom ti stot chvokʼe».+

3 Vaʼun, li Moisese xi laj yalbe li jteklume: «Vulesik me ta ajolik li avi kʼakʼale, yuʼun jaʼo lalokʼik ta Ejipto+ ti bu toʼox tikʼiloxuk ta mosoile. Yuʼun ta sjuʼel skʼob Jeova la slokʼesoxuk tal te.+ Jech oxal, mu stakʼ xalajesik li kʼusitik yichʼoj slevaduraile.* 4 Li avi ti jaʼ yuilal abibe*+ jaʼo chalokʼik batel. 5 Mi laj xa ox yakʼbot Jeova li yosil jkanaanetik, j-etetik, j-amorreoetik, j-eveoetik xchiʼuk li jebusetik+ ti laj onoʼox yalbe amoltotak ti cha-akʼbate+ ti jaʼ jun balumil ti bu oy lek leche xchiʼuk pome,+ skʼan me xapas jujun jabil li kʼin liʼe. 6 Vukub kʼakʼal skʼan xaveʼ pan ti muʼyuk slevaduraile,+ yuʼun li ta svukubal kʼakʼale chapas jun kʼin ta stojolal Jeova. 7 Vukub kʼakʼal skʼan xaveʼ pan ti muʼyuk slevaduraile;+ xchiʼuk skʼan muʼyukuk me kʼusi avuʼun ti yichʼoj slevaduraile,+ jech xtok, ta sjunul li avosilale* skʼan muʼyukuk me avuʼun votsʼbil arina ti yichʼoj slevaduraile. 8 Xi skʼan xavalbe anichʼon li vaʼ kʼakʼale: ‹Jaʼ ta skoj li kʼusi la spas Jeova ta jtojolal kʼalal lilokʼ ta Ejiptoe›.+ 9 Li kʼin liʼe jaʼ chtun sventa xvul ta ajol li kʼusi kʼot ta pasele, yuʼun xkoʼolaj ti te tsʼibabil ta akʼob xchiʼuk ta atiba*+ sventa teuk-o ta ave li smantaltak Jeovae, yuʼun ta sjuʼel skʼob Jeova la slokʼesot li ta Ejiptoe. 10 Li mantal liʼe skʼan xatsak ta venta jujun jabil+ sventa xapas li kʼin jech ora kʼuchaʼal liʼe.

11 »Mi laj xa ox yakʼbot Jeova li yosil jkanaanetik ti laj yakʼ ye chakʼbote xchiʼuk ti laj yakʼ ye chakʼbe li amoltotake,+ 12 skʼan xavakʼbe Jeova skotol li sba keremetike,* jech xtok, skʼan xavakʼbe skotol li sba yol ti stot chvokʼ yuʼun li chonbolometik chavuʼunine. Yuʼun jaʼ yuʼun Jeova ti bu naka stote.+ 13 Kʼalal chvokʼ sba yol avuroe, skʼan xavakʼ jkotuk chij ta xkʼexol, yan mi mu xavakʼbe xkʼexole, skʼan xakʼasbe snukʼ li avuroe. Jech xtok, skʼan xavakʼbe xkʼexol skotol li sba nichʼnabiletik avuʼunik ti jaʼ keremetike.+

14 »Mi oy xi la sjakʼbot ta mas tsʼakal li anichʼone: ‹¿Kʼusi skʼan xal leʼe?›. Xi skʼan xatakʼbee: ‹Yuʼun ta sjuʼel skʼob Jeova la slokʼesunkutik ta Ejipto ti bu oyunkutik toʼox ta mosoile.+ 15 Yuʼun kʼalal la stoy sba li faraon ti muʼyuk la stakunkutik lokʼele,+ li Jeovae la smil skotol li sba keremetik ta yosilal Ejiptoe, la smil kʼalal ta sba xnichʼon krixchanoetik xchiʼuk skotol li sba yol chonbolometike.+ Jaʼ yuʼun, skotol li sba yol chonbolometik* ti stot vokʼeme chkakʼbekutik ta milbil matanal li Jeovae xchiʼuk chkakʼbekutik xkʼexol skotol li sba jnichʼonkutik ti jaʼ keremetike›. 16 Taje jaʼ chtun ta senyail ti xkoʼolaj te tsʼibabil ta akʼob xchiʼuk chtun kʼuchaʼal xpix atiba,*+ yuʼun ta sjuʼel skʼob Jeova la slokʼesutik ta Ejipto».

17 Li Diose mu teuk la sbeiltas batel ta yosilal jfilisteaetik li jteklum kʼalal takatik xa ox lokʼel yuʼun li faraone manchuk mi jaʼ mas nopol. Yuʼun xi laj yal li Diose: «Mi la stsak sbaik ta kʼop xchiʼuk yantike, xuʼ sjel snopbenik, vaʼun tsutik batel ta Ejipto». 18 Jech oxal, li Diose laj yakʼ xanavuk jteklum ta sjoylejal li takixokol balumil ti te oy ta Tsajal nabe.+ Kʼalal lokʼik ta Ejiptoe, lek xcholet batik kʼuchaʼal soltaro li j-israeletike. 19 Li Moisese laj yichʼbe batel xtok li sbakil Josee, yuʼun li Josee xi laj yal kʼalal laj yakʼ ye yuʼun li xnichʼnab Israele: «Li Diose mu teuk noʼox chiktaoxuk, yuʼun chtal skoltaoxuk ta melel, jech xtok, ichʼbeikun me batel li jbakiltake».+ 20 Likik batel ta Sukot, te kʼot spas skarpanaik ta Esam ti te oy ta stiʼil takixokol balumile.

21 Li Jeovae jaʼ jbabe batel yuʼunik; li ta kʼakʼaltike chbeiltasatik batel ta jvol tok,*+ yan li ta akʼobaltike chbeiltasatik batel ta jvol kʼokʼ* sventa x-akʼbatik xojobal, ti jech taje jaʼ sventa xanavik ta kʼakʼaltik xchiʼuk ta akʼobaltik.+ 22 Li toke muʼyuk chnamaj ta stojolalik li ta kʼakʼaltike, jech xtok, li ta akʼobaltike muʼyuk chnamaj ta stojolalik li kʼokʼe.+

14 Li Jeova une xi laj yalbe li Moisese: 2 «Albo j-israeletik ti akʼo sutik batele, te akʼo spas skarpanaik ta yeloval Piairot ti te xkom ta oʼlol yuʼunik li Migdol xchiʼuk li nabe ti skʼeloj batel Baal-Sefone.+ Skʼan skʼeloj batel nab ti bu tspas skarpanaike. 3 Vaʼun, xi chal faraon ta stojolal li j-israeletike: ‹Mu snaʼ bu chbatik, joybilik yuʼun li takixokol balumile›. 4 Chkakʼ tsatsubuk yoʼonton li faraone,+ jech oxal anil chbat snuts li j-israeletike, li voʼon une ta jmukʼibtas jkʼoplal ta stojolal faraon xchiʼuk ta stojolal skotol li yajsoltarotake.+ Jech ta snaʼ j-ejiptoetik ti voʼon Jeovaune».+ Taje jaʼ jech la spasik.

5 Ta tsʼakal li ajvalil ta Ejiptoe albat ti jatavik xa batel li jteklume. Li faraone ta anil jel yoʼonton xchiʼuk yajtuneltak ta stojolal li jteklume.+ Xi laj yalike: «¿Kʼu xa noʼox chaʼal ti jech la jpastike xchiʼuk ti la jkoltatik lokʼel li Israel ti jaʼ toʼox jmosotike?». 6 Jech oxal, la xchapan skaretatak sventa paskʼop xchiʼuk laj yikʼ batel li yajsoltarotake.+ 7 Laj yikʼ batel vakib sien skaretatak ti toj lekike xchiʼuk laj yikʼ batel skotol li yan karetaetik ta Ejiptoe, te kajajtik batel soltaroetik ta jujukot. 8 Li Jeovae jaʼ jech laj yakʼ tsatsubuk yoʼonton li faraone, li ajvalil ta Ejiptoe, jaʼ yuʼun anil xa bat snuts li j-israeletike. Ti vaʼ orae jaʼo jun yoʼonton* chlokʼik batel li j-israeletike.+ 9 Li j-ejiptoetike bat snutsik li j-israeletike.+ Skotol li karetaetik yuʼun faraone, li yajsoltarotak kajajtik batel ta kaʼe xchiʼuk li yan soltaroetike yantik xnopajik batel kʼalal jaʼo te vololik ta stsʼel nabe, ta stsʼel Piairot ti skʼelojik batel Baal-Sefone.

10 Kʼalal nopol xa oy li faraone, li j-israeletike la stoy satik, vaʼun laj yilik ti te xa nutsbilik tal yuʼun li j-ejiptoetike. Xiʼik ta jyalel li j-israeletike, jaʼ yuʼun lik skʼanbeik koltael li Jeovae.+ 11 Xi laj yalbeik li Moisese: «¿Mi yuʼun muʼyuk mukinal yaʼel ta Ejipto ti liʼ tal avakʼ chamkunkutik ta takixokol balumile?+ ¿Kʼu xa noʼox chaʼal ti la alokʼesunkutik tal ta Ejiptoe? 12 ¿Mi mu xiuk onoʼox laj kalbotkutik ta Ejiptoe chaʼa: ‹Iktaunkutik xa, akʼo xitunkutik ta stojolal li j-ejiptoetike›? Yuʼun jaʼ mas lek ti chitunkutik ta stojolal li j-ejiptoetike, jaʼ altik ti liʼ chichamkutik ta takixokol balumile».+ 13 Li Moisese xi laj yalbe li jteklume: «Mu xaxiʼik.+ Tsotsuk avoʼontonik, kʼelik kʼuxi tspojoxuk Jeova li avie.+ Li j-ejiptoetik liʼ akʼelojik ta orae, mi jutebuk xa chavilbeik sat ta tsʼakal.+ 14 Yuʼun jaʼ tspas kʼop stuk Jeova sventa tspak akʼoplalik,+ li voʼoxuke te noʼox tsʼijiloxuk».

15 Xi albat yuʼun Jeova li Moisese: «¿Kʼu yuʼun ti te to xavokolet ta jtojolale? Albo ti akʼo xanavikuk batel li j-israeletike. 16 Li voʼot une, tsako li anamteʼe xchiʼuk toyo akʼob ta sba li nabe, chʼako ta oʼlol sventa x-echʼik ta takin balumil ta oʼlol nab li j-israeletike. 17 Li voʼone chkakʼ tsatsubuk yoʼonton li j-ejiptoetike sventa tijil xbatik ta spat li j-israeletike; vaʼun ta jmukʼibtas jkʼoplal ta stojolal li faraone, ta stojolal skotol li yajsoltarotake, ta stojolal li skaretatak sventa paskʼope xchiʼuk ta stojolal li yajsoltarotak ti kajajtik batel ta kaʼe.+ 18 Mi laj xa ox jmukʼibtas jkʼoplal ta stojolal faraon, ta stojolal li skaretatak sventa paskʼope xchiʼuk ta stojolal li yajsoltarotak ti kajajtik batel ta kaʼe,+ jech ta snaʼik ta melel j-ejiptoetik ti voʼon Jeovaune».

19 Li yaj-anjel melel Dios+ ti jaʼ jbabe batel yuʼun Israele te laj yakʼ sba ta spatik, jech xtok, li jvol tok* ti te oy ta yelovalike kʼej batel sventa xbat ta spatik, jech te kom ta spatik.+ 20 Jech oxal, li jvol toke* te laj yakʼ sba ta oʼlol ti bu tsobol li j-ejiptoetike xchiʼuk ti bu oy li Israele.+ Li ta jote jaʼ jun ikʼal tok, yan li ta jote sakjaman yuʼun li akʼobaltike.+ Ti vaʼ yelane sjunul akʼobal muʼyuk nopajik batel li j-ejiptoetik ta stojolal li j-israeletike.

21 Li Moises une la stoy skʼob ta sba li nabe;+ vaʼun li Jeovae laj yakʼ taluk tsatsal ikʼ ta slokʼeb kʼakʼal sjunul akʼobal sventa xchʼak li nabe, jech takij li lum ta yut nabe+ xchiʼuk la xchʼak sba ta chaʼjot li nabe.+ 22 Jaʼ yuʼun, ta takin balumil echʼ xtuchʼik oʼlol nab li j-israeletike,+ yuʼun li voʼe xkoʼolaj kʼuchaʼal jun muro kom ta stsʼetkʼobik* xchiʼuk ta sbatsʼikʼobik.+ 23 Li j-ejiptoetike lik snutsik batel, ochik batel ta nab li skaʼtak faraone, li skaretatak sventa paskʼope xchiʼuk li yajsoltarotak kajajtik ta kaʼe, bat snutsik ta oʼlol nab.+ 24 Li ta sob ikʼlumane,* li Jeovae te kʼelvan tal li ta jvol kʼokʼ* xchiʼuk ta jvol toke,*+ la skʼel tal li j-ejiptoetike, vaʼun lik ochikuk ta xiʼel yuʼun li j-ejiptoetike. 25 Li Diose lik slokʼesbe syantailtak li skaretaike, jech oxal vokol xa chanav li skaretaike. Xi chalilanik li j-ejiptoetike: «Jatavkutik lokʼel ta stojolal li j-israeletike, yuʼun li Jeovae yakal tstsak ta kʼop j-ejiptoetik sventa skolta li j-israeletike».+

26 Vaʼun, li Jeovae xi laj yalbe li Moisese: «Toyo akʼob ta sba li nabe sventa mukul xkomik ta voʼ li j-ejiptoetike, li skaretaik sventa paskʼope xchiʼuk li yajsoltaroik kajajtik ta kaʼe». 27 Ta anil la stoy skʼob ta sba nab li Moisese, jaʼ yuʼun kʼalal poʼot xa tsakube, sut ta yav li nabe. Kʼalal chjatavik xa ox lokʼel yaʼi li j-ejiptoetike, li Jeovae la sjip ochel ta oʼlol nab.+ 28 Kʼalal yakal tsut li voʼe, la smutʼi* komel li skaretatak faraon sventa paskʼope, li yajsoltarotak kajajtik ta kaʼe xchiʼuk skotol li yajsoltarotak ti te toʼox tijilik ochel ta spat li j-israeletike.+ Mi junuk xa kuxul kom yuʼun.+

29 Pe jaʼuk li j-israeletike xanavik ta takin balumil li ta oʼlol yut nabe,+ yuʼun li voʼe pas ta jun muro ta stsʼetkʼobik* xchiʼuk ta sbatsʼikʼobik.+ 30 Jaʼ jech pojatik yuʼun Jeova li j-israeletik ta yok skʼob j-ejiptoetik+ li vaʼ kʼakʼale. Li j-israeletike laj yilik ti te xkajlajet ta tiʼ nab li j-ejiptoetik ti chamemik xae. 31 Jech xtok, li j-israeletike laj yilik kʼu yelan la stunes stsatsal juʼel* Jeova ta skontrainel li j-ejiptoetike. Li jteklume lik xiʼtaik* li Jeovae xchiʼuk lik yakʼ xchʼunel yoʼontonik ta stojolal Jeova xchiʼuk ta stojolal li yajtunel ti jaʼ li Moisese.+

15 Li vaʼ kʼakʼale, xi la skʼejintaik Jeova li Moises xchiʼuk Israele:+

«Ta jkʼejinta Jeova, yuʼun la stoybe sba skʼoplal ti jaʼ Mukʼul Jpasmantale.+

La sjip ochel ta nab li kaʼ xchiʼuk li buchʼutik kajajtik ta kaʼe.+

 2 Jaʼ kipal xchiʼuk jaʼ juʼel li Jeovae,* yuʼun jaʼ kʼotem ta jkoltavanej kuʼun.+

Jaʼ Jdios, ta jmuyubta;+ jaʼ Sdios jtot,+ ta jtoybe skʼoplal.+

 3 Jaʼ jun tsatsal jpaskʼop li Jeovae.+ Jaʼ Jeova sbi.+

 4 La sten ochel ta nab li skaretatak xchiʼuk yajsoltarotak faraone,+

la smuk ta Tsajal nab li mas lekil jpaskʼopetik yuʼune.+

 5 Mukatik ta syukʼlajetel voʼ; mutʼijik* yalel kʼalal to ta yutil nab kʼuchaʼal ton.+

 6 Kajval Jeova, toj ep sjuʼel li abatsʼikʼobe;+

Kajval Jeova, xuʼ slilin jun jkontrainvanej li abatsʼikʼobe.

 7 Ta atsatsal juʼel xuʼ xajip yalel li buchʼu chlik skontrainote;+

chatak tal skʼakʼal avoʼonton, chchikʼ kʼuchaʼal jobel.

 8 Ta yikʼal noʼox aniʼ ep la stsob sba voʼ;

mu xa xbakʼ kom, jaʼ la smakbe yok li voʼe;

li voʼ ti xyukʼlajet tajeke te yijub ta oʼlol* yut nab.

 9 Xi laj yal li jkontrainvaneje: ‹¡Chbat jnutsik! ¡Ta jtaik ta be!

¡Ta jchʼak li kʼusitik ta jpoje jaʼ to mi echʼ koʼontone!

¡Ta jnit lokʼel j-espada! ¡Ta xichʼik tsalel ta jkʼob!›.+

10 La avuchʼta* ta yikʼal ave, mutʼijik* ta nab;+

mutʼijik yalel ta mukʼul nab jech kʼuchaʼal plomo.

11 Kajval Jeova, ¿mi oy yan diosetik kʼuchaʼal voʼote?+

¿Buchʼu yan ti jech chakʼ

ta ilel ti chʼul xa noʼox tajek skʼoplal kʼuchaʼal voʼote?+

Jaʼ noʼox ti buchʼu skʼan xiʼtael* xchiʼuk ti skʼan muyubtael ta kʼejojetike, jaʼ ti buchʼu labalik sba kʼusitik tspase.+

12 La ayeʼ abatsʼikʼob, vaʼun bikʼatik yuʼun li balumile.+

13 Ta skoj li tukʼil kʼanelal avuʼune, la abeiltas li jteklum ti la apoj lokʼele;+

ti bu nakalot ti chʼule jaʼ te chabeiltas batel ta atsatsal.

14 Persa chkʼot ta xchikin li jteklumetike;+ ta xiʼik;

chnikik ta vul oʼonton* li jnaklejetik ta Filisteae.

15 Li vaʼ kʼakʼale, chnikik tajek ta xiʼel li bankilaletik* ta Edome;

xtʼelajetik* ta xiʼel li ajvaliletik ti tsots sjuʼelik* ta Moabe.+

Chchibajik skotol li jnaklejetik ta Kanaane.+

16 Chtal mukʼta xiʼel ta stojolalik.+

Ta skoj li sjuʼel akʼobe, mu xa xbakʼik kʼuchaʼal ton

jaʼ to mi jelav li ateklumale, Kajval Jeova,

jaʼ to mi jelav+ li jteklum ti voʼot laj avakʼ ayanuke.+

17 Voʼot atuk chavikʼan tal xchiʼuk te chavakʼ li ta vits avuʼune.+

Kajval Jeova, jaʼ li vits ti bu achapanoj sventa bu chanakie.

Kajval Jeova, jaʼ li chʼulna ti jaʼ svaʼanoj xchibal akʼobe.

18 Jaʼ ch-ajvalilaj sbatel osil+ li Jeovae.

19 Kʼalal ochik ta nab li skaʼtak faraone, li skaretatak sventa paskʼope xchiʼuk li yajsoltarotak kajajtik ta kaʼe,+

li Jeovae laj yakʼ sutuk tal ta sbaik li voʼ ta nabe,+

pe li j-israeletike ta takin balumil xanavik li ta oʼlol nabe».+

20 Vaʼun, li meʼ j-alkʼop Miriam ti jaʼ xvix Aarone la stsak jun pandereta,* skotol li yan antsetike la stsak spanderetaik xchiʼuk lik akʼotajikuk ek. 21 Li Miriame kʼejin sventa xi tstakʼbe li viniketike:

«Kʼejintaik li Jeovae, yuʼun la stoybe sba skʼoplal ti jaʼ Mukʼul Jpasmantale.+

La sjip ochel ta nab li kaʼ xchiʼuk li buchʼutik kajajtik ta kaʼe».+

22 Ta tsʼakal li Moisese la snamajes lokʼel li Israel ta Tsajal nabe, batik ta takixokol balumil ta Sur, oxib kʼakʼal xanavik li ta takixokol balumile, pe muʼyuk bu la staik voʼ. 23 Kʼotik ta Mara,*+ pe ta skoj ti chʼa li voʼ ta Marae, muʼyuk laj yuchʼik. Jaʼ yuʼun, li Moisese Mara laj yakʼbe sbi. 24 Li jteklume xi lik bikʼtal kʼopojikuke:+ «¿Kʼusi xa noʼox van chkuchʼtik?». 25 Li Moisese la skʼanbe koltael li Jeovae,+ vaʼun li Jeovae laj yikʼ batel ta jpets teʼ. Kʼalal la sjip ochel ta voʼ li teʼe, stakʼ xa uchʼel* kom li voʼe.

Ta skoj li kʼusi kʼot ta pasele, li Diose laj yakʼbe yil jteklum li kʼusi chkʼanbatik yuʼune. Li Diose jaʼ te laj yakʼ ta preva xtok mi ta xchʼunik mantal o mi moʼoj.+ 26 Xi laj yale: «Mi ta jpʼel chachʼun li kʼusi chlokʼ ta ke ti voʼon Jeova Adiosune, mi chapas li kʼusi tukʼ chil jsate, mi chatsʼet chikinta xchiʼuk chachʼun li jmantaltake,+ muʼyuk chkakʼ taluk mi jtosuk chamel ta atojolal jech kʼuchaʼal li chameletik laj kakʼ talel ta stojolal li j-ejiptoetike,+ yuʼun yakal ta jpoxtaot, voʼon Jeovaun».+

27 Ta tsʼakale, te kʼotik ta Elim ti bu oy 12 sat voʼe* xchiʼuk ti bu oy 70 ta pets steʼel xane. Jech oxal, te la spas skarpanaik li ta stsʼel voʼe.

16 Ta tsʼakal kʼalal lokʼik ta Elim sjunul li tsobobbail yuʼun j-israeletike, te kʼotik ta takixokol balumil ta Sin+ ti te xkom ta oʼlol yuʼunik li Elim xchiʼuk Sinaie, taje jaʼo kʼot ta pasel kʼalal lokʼem xa ox jun u slokʼelik ta yosilal Ejiptoe, jaʼ xkaltik, li ta 15 yuʼun li xchibal ue.

2 Vaʼun, lik bikʼtal kʼopojikuk ta stojolal Moises xchiʼuk Aaron ta takixokol balumil sjunul li tsobobbail yuʼun j-israeletike.+ 3 Xi xvulajetik-o li j-israeletike: «¡Jaʼ lek ti teuk lichamkutik ta skʼob Jeova li ta yosilal Ejiptoe, yuʼun li tee ta stsʼel noʼox spʼinal bekʼet chichotikutik+ xchiʼuk ta jveʼkutik pan jaʼ to ti kʼuxi chnoj lek jchʼutkutike. Pe li voʼoxuke la alokʼesunkutik tal liʼ ta takixokol balumil sventa xchamik ta viʼnal sjunul li tsobobbail liʼe!».+

4 Li Jeovae xi laj yalbe li Moisese: «¡Kʼelavil!, chkakʼ yaluk tal veʼlil ta vinajel jech kʼuchaʼal voʼ sventa xalajesik,+ ta jujuntal skʼan xlokʼ atsobik ti kʼu yepal chalajesik jujun kʼakʼale.+ Yuʼun chkakʼoxuk ta preva sventa jkʼel mi chachʼunik li jmantale o mi muʼyuk.+ 5 Pe li ta svakibal kʼakʼale,+ j-oʼlol to jech yepal xatsobik ti kʼu onoʼox yepal chatsobik jujun kʼakʼale+ xchiʼuk skʼan me xameltsanik».

6 Li Moises xchiʼuk Aarone xi laj yalbeik skotol li j-israeletike: «Kʼalal chʼayem xa ox batel kʼakʼale, chanaʼik ti jaʼ Jeova la slokʼesoxuk li ta yosilal Ejiptoe.+ 7 Chavilbeik smukʼulal Jeova li sob okʼome, yuʼun laj xa yaʼi Jeova ti chabikʼtal kʼopojik ta stojolale. ¿Mi yuʼun tsots jkʼoplalkutik chavilik ti chabikʼtal kʼopojik ta jtojolalkutike?». 8 Xi to laj yal li Moisese: «Sventa chavakʼik venta ti laj xa yaʼi Jeova ti chabikʼtal kʼopojik ta stojolale, li Jeovae chakʼboxuk bekʼet kʼalal chʼayem xa ox batel kʼakʼale xchiʼuk chakʼboxuk pan ta sob jaʼ to ti kʼuxi chnoj achʼutike. Pe ¿kʼu yuʼun ti chabikʼtal kʼopojik ta jtojolalkutike? Yuʼun maʼuk chabikʼtal kʼopojik ta jtojolalkutik, jaʼ ta stojolal li Jeovae».+

9 Xi albat yuʼun Moises li Aarone: «Xi xavalbe sjunul li tsobobbail yuʼun j-israeletike: ‹Nopajanik talel ta stojolal li Jeovae, yuʼun laj xa yaʼi ti chabikʼtal kʼopojike›».+ 10 Kʼalal naka noʼox laj yoʼonton ta skʼoponel sjunul tsobobbail yuʼun j-israeletik li Aarone, joypʼijik li j-israeletike xchiʼuk la skʼelik batel li takixokol balumile, vaʼun te vinaj ta tok li smukʼulal Jeovae.+

11 Li Jeovae xi laj yalbe yan velta li Moisese: 12 «Kaʼioj ti chbikʼtal kʼopojik li j-israeletike,+ jaʼ yuʼun xi xavalanbee: ‹Chatiʼik bekʼet kʼalal chʼayem xa ox batel kʼakʼale* xchiʼuk chanojes achʼutik ta pan+ li sob okʼome. Chanaʼik ta melel ti voʼon Jeova Adiosikune›».+

13 Kʼalal chʼayem xa ox batel kʼakʼal li vaʼ ora taje tal kodornisetik,* noj ta kodornis ti bu spasoj skarpanaike,+ jech xtok, li ta sob yokʼomale noj ta job osil skotol li spat xokon bu spasoj skarpanaike. 14 Kʼalal chʼay batel li job osile, oy kʼusi te kom ti nin tajek xchiʼuk ti uni pechajtike, te lamal ta sba takixokol balumil,+ nin tajek jech kʼuchaʼal li taiv ta lumtike. 15 Kʼalal laj yilik li j-israeletike, xi laj yalbe sbaik ta jujuntal ta skoj ti mu snaʼik kʼusi jaʼe: «¿Kʼusi leʼe?». Jaʼ yuʼun, xi laj yal li Moisese: «Jaʼ li veʼlil ti laj yakʼboxuk Jeova sventa xalajesike.+ 16 Xi chalboxuk mantal li Jeovae: ‹Tsobik ta jujuntal ti kʼu yepal xlaj avuʼunike. Skʼan xatsobik jun omer*+ ta jujuntal, jaʼ xa tsakik ta venta ti jayvoʼ oy ta yut akarpanaik ta jujuntale›». 17 Jech la spasik li j-israeletike; la stsobik. Li yantike ep la stsobik, li jlome jutuk noʼox. 18 Kʼalal la spʼisik ta omere, muʼyuk bu spas sovrail yuʼun li buchʼu ep la stsobe xchiʼuk muʼyuk bu skʼan to yuʼun li buchʼu jutuk la stsobe.+ Ta jujuntal la stsobik ti kʼu yepal xlaj yuʼunike.

19 Xi albatik yuʼun li Moisese: «Mu me buchʼu skomtsan avuʼunik jutebuk sventa sob yokʼomal».+ 20 Pe muʼyuk la xchikintabeik li Moisese, kʼalal oy buchʼu laj yikta sventa sob yokʼomale, ayan xuvital xchiʼuk tuib li skomenale,* jaʼ yuʼun li Moisese kap sjol ta stojolalik. 21 Jujun sob chlokʼ stsobik ti kʼu yepal xlaj yuʼunike. Ch-ul batel kʼalal chkʼixnaj tal kʼakʼale.

22 Li ta svakibal kʼakʼale j-oʼlol to jech yepal la stsob sveʼelik,+ chib omer ta jujun krixchano. Jaʼ yuʼun, skotol li bankilaletik ta tsobobbaile tal yalbeik li Moisese. 23 Xi albatik yuʼun li Moisese: «Jaʼ jech yaloj Jeova, li okʼome oy lek kux oʼonton,* jaʼ jun chʼul savado sventa Jeova.+ Taʼajesik ti kʼusi chtun avuʼunike xchiʼuk lakanik ti kʼusi chtun avuʼunike;+ xuʼ xakʼejik* li skomenal* avuʼunike sventa jaʼ xatunesik ta yokʼomal». 24 Jech kʼuchaʼal albatik yuʼun li Moisese, la skʼejik* sventa sob yokʼomal. Muʼyuk tuib xchiʼuk muʼyuk ayan xuvital. 25 Xi laj yal li Moisese: «Lajesik li avie, yuʼun jaʼ jun savado sventa Jeova. Li avie, muʼyuk chataik ta osiltik. 26 Vakib kʼakʼal skʼan xatsobik, yuʼun muʼyuk me li ta svukubal kʼakʼale, li ta savadoe».+ 27 Akʼo mi jech, oy buchʼutik ta jteklum ti lokʼ stsobik li ta svukubal kʼakʼale, pe muʼyuk la staik jutebuk.

28 Vaʼun, xi albat yuʼun Jeova li Moisese: «¿Kʼusi to ora chlik achʼunik li jmantaltake?+ 29 Teuk me ta ajolik ti yakʼojboxuk Jeova li savadoe.+ Jech oxal, li ta svakibal kʼakʼale chakʼboxuk aveʼelik sventa chib kʼakʼal. Akotolik te noʼox xakomik ti bu oyoxuke, mu me bu xabatik li ta svukubal kʼakʼale». 30 Jaʼ yuʼun, li jteklume la xchabi savado* li ta svukubal kʼakʼale.+

31 Li j-israeletike «mana»* laj yakʼbeik sbi li veʼlil taje. Sak xchiʼuk xkoʼolaj kʼuchaʼal sbekʼ kulantu xchiʼuk jech smuil kʼuchaʼal jayal pakʼanbil arina ti yichʼoj pome.+ 32 Xi laj yal li Moisese: «Xi yaloj mantal li Jeovae: ‹Pʼiso junuk omer sventa teuk-o kʼejbil* ti jaykʼol kuxlejal ch-echʼ avuʼunike+ yoʼ xilik li veʼlil laj kakʼ alajesik ta takixokol balumil kʼalal la jlokʼesoxuk ta Ejiptoe›». 33 Jech oxal, li Moisese xi laj yalbe li Aarone: «Tsako junuk jarra xchiʼuk te xatikʼ junuk omer mana. Te xavakʼ ta yeloval Jeova sventa teuk-o kʼejbil* ti jaykʼol kuxlejal ch-echʼ avuʼunike».+ 34 Li Aarone jech la spas jech kʼuchaʼal albat yuʼun Jeova li Moisese, te laj yakʼ ta stsʼel jun kaxa+ ti tsots skʼoplale* sventa xichʼ kʼejel.* 35 40 jabil la slajesik mana li j-israeletike+ jaʼ to ti kʼuxi kʼotik ta jun osil ti bu oy jnaklejetike.+ Jech la slajesik-o mana jaʼ to ti kʼuxi kʼotik ta stsʼak li yosilal Kanaane.+ 36 Li jun omere xi yepale: jaʼ jvokʼ ta lajunvokʼ li jun efae.*

17 Sjunul li tsobobbail yuʼun j-israeletike lokʼik batel li ta takixokol balumil ta Sine.+ Te la xkuxilanik batel ti butik albatik yuʼun Jeovae,+ jaʼ to ti kʼuxi te kʼot spas skarpanaik ta Refidime.+ Pe li tee chʼabal voʼ sventa xuchʼ li jteklume.

2 Jech oxal, li jteklume lik stsakik ta kʼop li Moisese,+ xi laj yalbeike: «Akʼbunkutik voʼ kuchʼkutik». Pe xi laj yal li Moisese: «¿Kʼu yuʼun ti chatsakikun ta kʼope? ¿Kʼu yuʼun ti jech-o chavakʼik ta preva li Jeovae?».+ 3 Chchamik tajek ta takitiʼil li jteklum tee, jaʼ yuʼun xi bikʼtal kʼopojik-o ta stojolal li Moisese:+ «¿Kʼu yuʼun ti la alokʼesunkutik ta Ejipto sventa xtal amilunkutik ta takitiʼil xchiʼuk kalab jnichʼnabkutik xchiʼuk li jchonbolomkutike?». 4 Li Moisese xi laj yalbe li Jeovae: «¿Kʼusi ta jpas xchiʼuk li jteklum liʼe? ¡Yuʼun jutuk xa skʼan smilikun ta ton!».

5 Vaʼun, li Jeovae xi laj yalbe li Moisese: «Jelavan batel ta jbabe yuʼun li jteklume, ikʼo batel jayvoʼuk moletik ta Israel xchiʼuk ichʼo batel li anamteʼ ti jaʼ la amaj-o li ukʼum Niloe.+ Tsako batel, batan me un. 6 Yan li voʼone te chivaʼi ta sba ton ta Oreb. Skʼan xamaj li tone, vaʼun te ta xlokʼ tal voʼ sventa xuchʼ li jteklume».+ Li Moisese jaʼ jech la spas ta sat li moletik ta Israele. 7 Ti bu taje, Masa*+ xchiʼuk Meriba*+ laj yakʼbe sbi ta skoj ti la saʼik kʼop li j-israeletike xchiʼuk ta skoj ti laj yakʼik ta preva li Jeovae,+ yuʼun xi chalike: «¿Mi liʼ xchiʼukutik li Jeovae o mi muʼyuk?».

8 Vaʼun, li j-amaleketike+ tal spasik kʼop xchiʼuk j-israeletik ta Refidim.+ 9 Ta skoj taje, li Moisese xi laj yalbe li Josuee:+ «Tʼujo viniketik, vaʼun bat tsako ta kʼop li j-amaleketike. Li okʼome te ta jvaʼan jba ta jol bikʼit vits xchiʼuk chkichʼbe batel li snamteʼ melel Diose». 10 Jech la spas Josue kʼuchaʼal albat yuʼun li Moisese,+ bat stsak ta kʼop li j-amaleketike. Li Moises, Aaron xchiʼuk Ure+ muyik batel li ta jol bikʼit vitse.

11 Kʼalal stoyoj skʼob li Moisese, chkuch yuʼunik li j-israeletike, pe kʼalal tsyales skʼobe, jaʼ chkuch yuʼunik li j-amaleketike. 12 Kʼalal lub skʼob li Moisese, la stsakik talel jpʼej ton sventa te xchoti yuʼunik. Vaʼun, li Aaron xchiʼuk Ure te laj yakʼ sbaik ta jujujot xokon sventa xikbeik li skʼobe yoʼ jech stoyojuk-o skʼob jaʼ to ti kʼuxi xmak batel li kʼakʼale. 13 Li Josuee la stsal ta espada li j-amaleketik xchiʼuk li yan buchʼu te xchiʼukik li j-amaleketike.+

14 Li Jeovae xi laj yalbe li Moisese: «Tsʼibao ta livro sventa svulesobil ta ajolik xchiʼuk xi xavalbe yan velta li Josuee: ‹Ta jtupʼbe skʼoplal ta yolon vinajel li j-amaleketike,+ jech muʼyuk xa buchʼu chvul ta sjol›». 15 Li Moises une la spas jun skajleb matanal, Jeova-Nisi* laj yakʼbe sbi, 16 xi laj yale: «Ta skoj ti tskontrainik li ajvalilal* yuʼun Jeovae,*+ tsakbilik-o ta kʼop chkomik yuʼun Jeova li Amalek xchiʼuk li jaykʼol kuxlejal chvokʼ yuʼunik ta tsʼakale».+

18 Vaʼun, li Jetro ti jaʼ pale ta Madian ti jaʼ smolniʼ* li Moisese+ laj yaʼi skotol li kʼusitik la spas Dios ta stojolal Moises xchiʼuk ta stojolal li steklumal ti jaʼ li Israele. Laj yaʼi ti kʼuxi lokʼesatik yuʼun Jeova ta Ejipto li Israele.+ 2 Li Jetro ti jaʼ smolniʼ* li Moisese laj toʼox xchabi li Sipora ti jaʼ yajnil Moises kʼalal ay akʼbatuk komel 3 xchiʼuk li chaʼvoʼ yalabe.+ Li june Guersom* sbi,+ yuʼun xi laj yal li Moisese: «Liʼ vul naklikun kʼuchaʼal jyanlum ta jun lum ti maʼuk jlumale». 4 Li june Elieser* sbi, yuʼun xi laj yale: «Jaʼ jkoltavanej kuʼun li Sdios jtote, yuʼun jaʼ la spojun sventa mu smilun ta s-espada li faraone».+

5 Li Jetro une ti jaʼ smolniʼ* Moisese te xchiʼuk talel li xnichʼnab Moisese xchiʼuk li yajnile. Talik ta vits yuʼun melel Dios+ sventa xtal skʼelik Moises ti te spasoj skarpana ta takixokol balumile. 6 Li Jetroe xi laj yalbe batel aʼyej li Moisese: «Voʼon Jetro, ti amolniʼune,*+ tal jkʼelot, lital xchiʼuk avajnil xchiʼuk li chaʼvoʼ yalabe». 7 Ta anil lokʼ snup ta be smolniʼ* li Moisese, la snijan sba xchiʼuk la stsʼutsʼ,* vaʼun ta jujuntal la sjakʼbe sbaik kʼu yelan oyik, laje ochik batel ta yut karpana.

8 Li Moisese la xchapbe smolniʼ* skotol li kʼusitik la spasbe faraon xchiʼuk Ejipto li Jeovae, ti jech la spasbe kʼalal la skolta li Israele.+ Jech xtok, la xchapbe skotol li vokoliletik la snupik ta bee+ xchiʼuk ti kʼuxi koltaatik yuʼun Jeovae. 9 Li Jetroe xmuyubaj xa ta skoj li kʼusitik lek la spas Jeova ta stojolal Israel kʼalal la spoj lokʼel ta Ejiptoe.* 10 Xi laj yal li Jetroe: «Kʼupil kʼoptabiluk li Jeovae, jaʼ li buchʼu la spojoxuk ta stojolal faraon xchiʼuk ti la spoj lokʼel jteklum ta yok skʼob li Ejiptoe. 11 Ta skoj ti kʼusi la spasbe li buchʼutik tstoy sbaik ta skontrainbel li steklumale, laj xa jnaʼ ti mas mukʼ skʼoplal li Jeovae, jaʼ mu sta skotol li yan diosetike».+ 12 Li Jetro ti jaʼ smolniʼ* Moisese laj yichʼbe talel chikʼbil matanal xchiʼuk milbil matanal li Diose, vaʼun li Aaron xchiʼuk skotol li moletik ta Israele tal xchiʼinik ta veʼel li smolniʼ Moises ta yeloval li melel Diose.

13 Li ta yokʼomale, te choti jech onoʼox kʼuchaʼal nopem xaʼi sventa xtun kʼuchaʼal jchapanvanej yuʼun li jteklume, sob xa te vaʼalik ta stojolal Moises li jteklume, te oyik-o kʼalal chʼayem xa ox batel kʼakʼale. 14 Kʼalal laj yakʼ venta smolniʼ* Moises li kʼusi tspas ta stojolal jteklum li Moisese, xi laj yalbee: «¿Kʼu yuʼun ti jech chapas ta stojolal li jteklume? ¿Kʼu yuʼun ti atuk noʼox liʼ chotolot xchiʼuk ti liʼ vaʼalik ta atojolal skotol li krixchanoetik ta sob jaʼ to ti kʼuxi chchʼay batel kʼakʼale?». 15 Xi la stakʼbe smolniʼ* li Moisese: «Yuʼun jech-o chtalik ta jtojolal sventa tsjakʼik kʼusi oy ta yoʼonton li Diose. 16 Kʼalal oy kʼusi skʼan chapanele, chtalik ta jtojolal sventa jchapanik ta jujuntal xchiʼuk chkakʼbe snaʼik kʼusi tsnop li melel Diose xchiʼuk li smantaltak Diose».+

17 Xi albat yuʼun smolniʼ* li Moisese: «Mu lekuk ti jech chapase. 18 Chalub ti jech chapase xchiʼuk chlub li jteklum ti liʼ achiʼuke, yuʼun li kʼusi chapase jaʼ jun alal ikatsil xchiʼuk mu xkuch avuʼun atuk. 19 Chikintabun avaʼi li tojobtasel chkalbot avie, vaʼun te chchiʼinot li Diose.+ Voʼot tunan kʼuchaʼal yajkʼopojel melel Dios ta stojolal li jteklume,+ voʼot chavichʼ batel ta stojolal melel Dios li kʼusi skʼan chapanele.+ 20 Skʼan xapʼijubtas ta sventa skotol li mantaletike+ xchiʼuk skʼan xavakʼbe yil ti bu beal skʼan stamik batele xchiʼuk li kʼusi abtelal skʼan spasike. 21 Pe skʼan xatʼuj viniketik li ta jteklum ti lek xtojobike,+ ti lek xiʼtaojik* Diose, ti xuʼ spat yoʼontonik jteklum ta stojolalike+ xchiʼuk ti muʼyukuk ta yoʼonton chloʼlavanik ta skoj ti tskʼan tspasik kanale, vaʼun jaʼ vaʼano ta bankilaletik sventa sbainik jmil ta voʼ, ta bankilaletik sventa sbainik sien ta voʼ, ta bankilaletik sventa sbainik 50 ta voʼ xchiʼuk ta bankilaletik sventa sbainik lajunvoʼ.+ 22 Jaʼ akʼo xchapanik ta skotol ora li krixchanoetike, jaʼ xa noʼox chichʼboxuk talel li kʼusi toj vokol ta chapanele,+ pe mi oy kʼusi ti mu vokoluke, te akʼo xchapan stukik. Mi laj avakʼbe xkuch yantik li avikatse, mas me kʼun chavaʼi ek.+ 23 Mi jech chapase xchiʼuk mi jech chal Dios chapase, xkuch me avuʼun li ikatsile xchiʼuk jun xa yoʼonton tsutik batel ta snaik».

24 Li Moisese la xchʼun ta anil li kʼusi albat yuʼun smolniʼe,* jaʼ yuʼun la spas skotol li kʼusi albate. 25 Li Moisese la stʼuj viniketik ti lek xtojobik li ta Israele, vaʼun la svaʼan ta bankilaletik li ta jteklume, ta bankilaletik sventa sbain jmil ta voʼ, bankilaletik sventa sbain sien ta voʼ, bankilaletik sventa sbain 50 ta voʼ xchiʼuk bankilaletik sventa sbain lajunvoʼ. 26 Jaʼ xa la xchapanik kʼalal oy kʼusi skʼan chapanele. Li kʼusi toj vokol ta chapanele jaʼ chtal yalbeik li Moisese,+ pe li bu mu toj vokoluke, te chchapan stukik. 27 Ta tsʼakal li Moisese la xchʼak sba xchiʼuk li smolniʼe.*+ Li smolniʼe sut batel ta slumal.

19 Kʼalal yoxibal xa ox u slokʼelik ta yosilal Ejipto li j-israeletike, talik ta takixokol balumil ta Sinai. 2 Kʼalal lokʼik tal li ta Refidime,+ ta jun noʼox skʼakʼalil kʼotik li ta takixokol balumil ta Sinaie xchiʼuk te la spas skarpanaik li ta takixokol balumile. Li Israele te la spas skarpana li ta yeloval vitse.+

3 Muy batel ta stojolal melel Dios li Moisese, te kʼoponat tal yuʼun Jeova li ta vitse,+ xi albate: «Xi skʼan xavalbe li snitilulal Jakobe xchiʼuk xi skʼan xavalbe li j-israeletike: 4 ‹Aviloj atukik kʼusi la jpasbe j-ejiptoetik+ sventa jkajanoxuk tal ta jxikʼ jech kʼuchaʼal chkuch yalab li jkot aguilae.+ 5 Mi jpʼel chachʼunik li kʼusitik chkalboxuke xchiʼuk mi chkʼot ta pasel avuʼunik li jtratoe, chakʼotik ta jteklumal ti stuk xa noʼox jech* ta skotol li yan jteklumetike,+ yuʼun jaʼ kuʼun spʼejel li balumile.+ 6 Chakʼotik ta paleetik ti chatunik kʼuchaʼal ajvaliletike xchiʼuk chakʼotik ta chʼul lum›.+ Taje jaʼ jech skʼan xavalbe li j-israeletike».

7 Jaʼ yuʼun, li Moisese yal talel xchiʼuk bat stsob li moletik ta jteklume, la xchapbe yaʼiik skotol li smantaltak laj yal Jeovae.+ 8 Kʼalal laj xa ox yaʼiike, xi jmoj takʼav sjunul li jteklume: «Ta jpas ta sjunul koʼontonkutik skotol li kʼusi yaloj Jeovae».+ Li Moisese ta anil bat yalbe Jeova li kʼusi la stakʼ li jteklume. 9 Li Jeovae xi laj yalbe li Moisese: «¡Kʼelavil!, sventa xaʼibun jteklum kʼalal ta jchiʼinot ta loʼile xchiʼuk sventa jechuk-o xakʼ xchʼunel yoʼontonik ta atojolal eke, chital ta jun ikʼal tok ta atojolal». Li Moisese laj yalbe Jeova li kʼusi laj yal jteklume.

10 Vaʼun, li Jeovae xi laj yalbe li Moisese: «Batan yoʼ bu oy li jteklume, chʼultajeso li avie xchiʼuk li okʼome, jech xtok, akʼo xchukʼ skʼuʼ spokʼik. 11 Skʼan me chapalikuk li ta yoxibal kʼakʼale, yuʼun li ta yoxibal kʼakʼale ta sat sjunul jteklum chyal talel Jeova li ta vits Sinaie. 12 Skʼan xavalbe jteklum ti bu kʼalal xuʼ xpajik li ta sjoylejal vitse. Xi xavalanbee: ‹Kʼelo me abaik ti mu xamuyik batel li ta vitse, mi jaʼuk xanopajik li ta yoke. Manchuk mi ta yok noʼox vits oy buchʼu te chkʼot, ta me xcham ta melel. 13 Mu me xapikik mi oy buchʼu jech la spase, jaʼ lek milik ta ton o tsʼapbeik flecha, persa ta xcham manchuk mi chonbolom o mi krixchano›.+ Pe mi laj yaʼiik chichʼ jupanel li xulub tot chije,+ xuʼ xmuyik li ta vitse».

14 Vaʼun, li Moisese yal batel ti bu oy li jteklume, lik xchʼultajes li jteklume. Li stukik une lik xchukʼ li skʼuʼ spokʼike.+ 15 Xi laj yalbe li krixchanoetike: «Chapano abaik li ta yoxibal kʼakʼale. Mu me xachiʼin ta vayel avajnilik».*

16 Li ta yoxibal kʼakʼal ta sobe, xkʼavlajet noʼox chauk xchiʼuk xjaplajet* noʼox saksevul,* jech xtok, tal ikʼal tok+ li ta sba vitse xchiʼuk laj yichʼ aʼiel tsatsal yechʼomal kachu. Xtʼelajetik* likel ta xiʼel skotol li krixchanoetike.+ 17 Li Moisese laj yalbe jteklum ti akʼo xlokʼik ti bu spasoj skarpanaik sventa xbat snupik li melel Diose. Te kʼot svaʼan sbaik li ta yok vitse. 18 Ta skoj ti te yal tal ta kʼokʼ li Jeovae,+ ta buyuk xa noʼox lokʼ xchʼailal* li vits Sinaie; li xchʼailale muy batel jech kʼuchaʼal xchʼailal orno sventa xchikʼobil kʼusitik. Solel tsots xa noʼox chnik ta j-echʼel spʼejel li vitse.+ 19 Kʼalal yantik stsatsaj li yechʼomal kachue, kʼopoj li Moisese, vaʼun takʼbat yuʼun li yechʼomal ye melel Diose.

20 Li Jeovae yal talel ta sjol li vits Sinaie. Vaʼun, li Moisese takat ta ikʼel yuʼun Jeova li ta jol vitse, jech muy batel li Moisese.+ 21 Xi albat yuʼun Jeova li Moisese: «Yalan batel, bat pʼijubtaso jteklum ti mu me xakʼik persa sjam tal sbeik sventa xtal skʼelik li Jeovae, yuʼun xuʼ ep buchʼutik xchamik. 22 Jech xtok, sventa mu xmilatik yuʼun Jeova+ li paleetik ti nopoltik noʼox chnopajik ta stojolal li Jeovae, akʼo xchʼultajes sbaik». 23 Li Moisese xi la stakʼbe li Jeovae: «Mu xa onoʼox stakʼ xmuyik tal jteklum li ta vits Sinaie, yuʼun xi xa onoʼox la apʼijubtasunkutike: ‹Skʼan xavalbe jteklum ti bu kʼalal xuʼ xpajik li ta sjoylejal vitse xchiʼuk chʼuluk xavil li vitse›».+ 24 Pe xi takʼbat yuʼun li Jeovae: «Yalan batel, jmoj xa xamuy talel xchiʼuk li Aarone. Pe mu me xavakʼ muyuk tal li paleetike xchiʼuk mu me sjam tal sbeik ta persa li jteklum sventa xtal skʼelik li Jeovae, yuʼun mi moʼoje ta xmilatik».+ 25 Jech oxal, li Moisese yal talel xchiʼuk lik yalbe jteklum li kʼusi albate.

20 Xi xcholet kʼopoj li Diose:+

2 «Voʼon Jeova Diosun avuʼun ti la jlokʼesot ta yosilal Ejipto ti bu toʼox tikʼilot ta mosoile.+ 3 Mu me xavichʼ ta mukʼ yan diosetik, skʼan jaʼ noʼox voʼon xavichʼun ta mukʼ.+

4 »Mu me oyuk kʼusi xapasbe slokʼol mi jaʼuk kʼusi ti xkoʼolaj kʼuchaʼal li kʼusitik oy ta vinajele, li kʼusitik oy ta balumile o li kʼusitik oy ta voʼe.+ 5 Mu me xanijan aba ta stojolalik xchiʼuk mu me buchʼu stijbot avoʼonton ti chatun ta stojolalike,+ yuʼun li Jeova Diosun avuʼune, jaʼ Diosun ti jtuk noʼox ta jkʼan ichʼel ta mukʼe.+ Chkakʼbe kastigo alab nichʼnabiletik ta skoj smul li totiletike. Li buchʼutik tspʼajune chkakʼbe kastigo kʼalal to ta yoxkʼolal xchiʼuk ta xchankʼolal kuxlejal. 6 Pe chkakʼbe ta ilel tukʼil kʼanelal ta smilal noʼox jkʼol kuxlejal li buchʼu skʼanojikune xchiʼuk ti chchʼunik jmantaltake.+

7 »Skʼan mu ixtoluk noʼox avuʼun li sbi Jeova Dios avuʼune,+ yuʼun li Jeovae muʼyuk chkol yuʼun ta kastigo li buchʼu ixtol noʼox yuʼun li sbie.+

8 »Vuleso me ta ajol li skʼakʼalil savadoe sventa chʼuluk avuʼun.+ 9 Vakib noʼox kʼakʼal skʼan xapas skotol li avabtele,+ 10 li ta svukubal kʼakʼale jaʼ jun savado sventa li Jeova Dios avuʼune. Mu me xapas jtosuk avabtel, mi jaʼuk spas yabtel akerem, atseb, amoso, akiara, atsʼunbal chonbolom mi jaʼuk li jyanlum ti te achiʼuk ta nakleje.+ 11 Yuʼun ta vakib kʼakʼal la spas Jeova li vinajel xchiʼuk balumile, li nab xchiʼuk skotol li kʼusitik te oye, vaʼun lik xkux li ta svukubal kʼakʼale,+ jech oxal li Jeovae laj yakʼbe bendision li skʼakʼalil savadoe xchiʼuk la xchʼultajes.

12 »Ichʼo ta mukʼ atot ameʼ+ sventa jal xakuxi li ta balumil ti chakʼbot li Jeova Dios avuʼune.+

13 »Mu xamilvan.+

14 »Mu xaloʼla anup achiʼil.+

15 »Mu xa-elkʼaj.+

16 »Mu me xajut kʼop* kʼalal chavaʼan aba ta testigo ta stojolal li achiʼile.+

17 »Mu me xapichʼ oʼontabe li sna achiʼile, mu me xapichʼ oʼontabe li yajnil achiʼile,+ li smosoe, li skiarae, li xvakaxe, li svuroe o yan kʼusitik ti oy yuʼun li achiʼile».+

18 Vaʼun, sjunul li jteklume te vaʼal chaʼiik xchiʼuk tskʼelik li chauke, li saksevule,* li tsatsal yechʼomal kachue xchiʼuk li vits ti chlokʼ xchʼailale;* xtʼelajetik* likel ta xiʼel kʼalal laj yilik taje xchiʼuk te kʼuk snamal vaʼal komik.+ 19 Jaʼ yuʼun, xi laj yalbeik li Moisese: «Voʼot xachiʼinunkutik ta loʼil, ta jchikintabotkutik, pe mu xavakʼ xchiʼinunkutik ta loʼil li Diose, yuʼun xiʼel xichamkutik».+ 20 Li Moisese xi laj yalbe li jteklume: «Mu xaxiʼik, yuʼun tal yakʼoxuk ta preva li melel Diose+ sventa jechuk-o xaxiʼtaik* yoʼ mu xasaʼ amulik ta stojolal».+ 21 Jaʼ yuʼun, te kʼuk snamal vaʼal kom li jteklume, yan li Moisese nopaj batel ta stojolal li ikʼal tok ti bu oy li melel Diose.+

22 Xi albat yuʼun Jeova li Moises une: «Xi xavalbe li j-israeletike: ‹Laj avil ta asat atukik ti ta vinajel to la jchiʼinoxuk ta loʼile.+ 23 Mu me xapasik diosetik ti pasbil ta plata ti jmoj xa chavichʼikun ta mukʼ xchiʼuke, jech xtok, mu me xapasik diosetik ti pasbil ta oroe.+ 24 Pasbun ta lum junuk skajleb matanal, vaʼun te chavakʼ li chikʼbil matanale, li milbil matanal sventa jun oʼontonale, li achijtak xchiʼuk avakaxtake. Ta buyuk noʼox ti bu ta jkʼan tsvules ta sjolik li jbie+ te chtal jkʼelot xchiʼuk chkakʼbot bendision. 25 Mi chapasbun ta ton junuk skajleb matanale, mu me setbiluk ta abtejebal li ton chatunese.*+ Yuʼun ta me xasokesbe skʼoplal mi chatunes asinsel sventa xavokʼ li tone. 26 Mu me xapasbe skojolkojol sventa chamuy li ta skajleb matanale yoʼ mu xvinaj li abekʼtale›.*

21 »Liʼe jaʼ li kʼusitik chapanbil kuʼun ti skʼan xavalbe li jteklume:+

2 »Mi chaman ta amoso junuk j-ebreo vinike,+ vakib jabil chtun ta amoso. Li ta svukubal jabile skʼan xakolta batel, jaʼ noʼoxe muʼyuk kʼusi tstojbot komel.+ 3 Mi stuk kʼote, stuk chlokʼ batel. Yan mi oy yajnil kʼote, li yajnil eke chlokʼ batel xchiʼuk li smalale. 4 Mi akʼbat yajnil yuʼun li yajvale xchiʼuk mi ayan skeremtak xchiʼuk stsebetak li antse, stuk noʼox chlokʼ batel li mosoile,+ yuʼun li ajnilal xchiʼuk yalabtake te chkomik ta stojolal li yajvale. 5 Pe mi mu xlaj yoʼonton xchiʼuk ti xi chal li mosoile: ‹Jkʼanoj tajek li kajvale, li kajnile xchiʼuk li jnichʼnabtake; mu jkʼan xilokʼ batel›,+ 6 akʼo ikʼatuk tal yuʼun yajval ta stojolal li melel Diose xchiʼuk te akʼo xikʼan ta tiʼ na o ta smarkoal tiʼ na ta xokon sventa sjombe xchikin ta jun jichʼil takʼin ti oy sniʼe, vaʼun jaʼ xa smoso chkom-o ti kʼu sjalil kuxule.

7 »Mi oy junuk vinik ti chchon batel ta mosoil junuk stsebe, mu jechuk chkol lokʼel ta mosoil jech kʼuchaʼal chkol lokʼel ta mosoil li jun vinike. 8 Mi muʼyuk lek ch-ilat yuʼun yajval li tsebe xchiʼuk mi muʼyuk chkʼot ta stsʼakal ajnile xchiʼuk mi chchonat batel ta yane, muʼyuk xa sderecho sventa xchonbe batel junuk jyanlum, yuʼun laj xa sloʼla. 9 Mi la stʼuj sventa li xnichʼone, skʼan me oyuk sderecho yuʼun kʼuchaʼal sbatsʼi tseb. 10 Mi laj to saʼ yan yajnile, skʼan me mu sjutukajesbe sveʼel yuchʼbol xchiʼuk skʼuʼ spokʼ li sba yajnile, jech xtok, skʼan mu sjutukajes ti chchiʼin ta vayele.*+ 11 Yan mi mu skʼan xakʼbe li oxtos taje, xuʼ kolem chkom sventa chlokʼ batel li antse, muʼyuk chakʼ jutebuk takʼin.

12 »Mi oy buchʼu la syayijes jun vinik ti chcham-o yuʼune, skʼan xichʼ milel.+ 13 Pe mi mu yolbajuk la spase xchiʼuk mi laj yakʼ permiso melel Dios ti jech chkʼot ta pasele, chkalbot bu xuʼ xjatav batel.+ 14 Mi oy jun vinik tsots tajek ch-ilin ta stojolal li xchiʼil ta krixchanoale xchiʼuk ti yolbaj xa tsmile,+ skʼan xichʼ milel li vinike akʼo mi te to chbat alokʼesik li ta skajleb matanal kuʼune.+ 15 Skʼan me xichʼ milel li buchʼu tsyayijes stot o smeʼe.+

16 »Skʼan xichʼ milel+ mi oy buchʼu chelkʼan* junuk vinik+ xchiʼuk chchon batele o mi te to laj yichʼ tabel li buchʼu yelkʼanoje.+

17 »Skʼan xichʼ milel mi oy buchʼu chchopol kʼopta stot o smeʼe.+

18 »Xi skʼan pasel kʼalal jaʼo yakal tstsak sbaik ta kʼop viniketike, mi oy jun buchʼu chakʼ ton o majele,* pe ti muʼyuk xcham yuʼun li xchiʼile ti jaʼ noʼox puchʼul kom yuʼun ta steme:* 19 mi xuʼ xlik xchiʼuk mi xuʼ xlokʼ xanavuk xchiʼuk snamteʼe, mu persauk xichʼ kastigo li buchʼu yayijesvane, jaʼ noʼox skʼan stoj ti kʼu sjalil muʼyuk ch-abtej li buchʼu laj yichʼ yayijesele, jaʼ to mi poxtaj leke.

20 »Mi oy junuk vinik tsyayijes ta teʼ junuk smoso o junuk skiara xchiʼuk mi te cham ta skʼobe, skʼan me xichʼ pakbel skʼoplal li krixchano ti chame.+ 21 Pe mi kuxul to kom junuk o chibuk kʼakʼale, muʼyuk chichʼ pakbel skʼoplal, yuʼun ta stakʼin onoʼox yajval manbil.

22 »Mi oy la stsak sbaik ta majel viniketik xchiʼuk mi la staik ta netʼel jun ants ti xchiʼuk yole xchiʼuk mi vokʼ li yol ti muʼyuk to staoj yuale,*+ pe mi muʼyuk buchʼu chame,* li buchʼu netʼvane akʼo me stoj ti kʼu yepal tskʼanbe stojol li smalal antse; akʼo stoj ta stojolal jchapanvanejetik.+ 23 Pe mi oy buchʼu junukal chame,* skʼan me xichʼ milel ek li buchʼu* milvane.+ 24 Mi oy buchʼu la stʼus bekʼ satile, chichʼ tʼusbel sbekʼ sat ek, mi la skʼas tanal eile, chichʼ kʼasbel stanal ye ek, mi la skʼas kʼobile, chichʼ kʼasbel skʼob ek, mi la skʼas akanile, chichʼ kʼasbel yakan ek,+ 25 mi chikʼvane, chichʼ chikʼel ek, mi yayijesvane, chichʼ yayijesel ek xchiʼuk mi majvane, chichʼ majel ek.

26 »Mi oy jun vinik ti tsyayijesbe sbekʼ sat junuk smoso o sbekʼ sat skiara ti jech-o sokem kom li sbekʼ sate, skʼan skolta batel li smosoe sventa jaʼ xkʼot ta xkʼexol sbekʼ sat.+ 27 Mi la skolesbe stanal ye junuk smoso o stanal ye skiarae, skʼan skolta batel li smosoe sventa jaʼ xkʼot ta xkʼexol stanal ye.

28 »Mi oy jkot tot vakax ti la xluch junuk vinik o antse xchiʼuk ti cham-o yuʼune, li tot vakaxe skʼan me xichʼ milel ta ton,+ jaʼ noʼoxe mu xuʼ xatibeik li sbekʼtale. Muʼyuk me chichʼ kastigo li yajval tot vakaxe. 29 Pe mi jech xa onoʼox nopem xaʼi chluchvan li tot vakaxe xchiʼuk mi laj xa onoʼox yichʼ albel li yajvale, pe muʼyuk la xchabi li xvakaxe, li tot vakaxe skʼan me xichʼ milel ta ton mi la smil junuk vinik o antse xchiʼuk skʼan me xichʼ milel li yajval eke. 30 Mi akʼbat spoj sbae, skʼan me xakʼ skotol ti kʼusi chkʼanbate sventa spoj li xkuxlejale, jaʼ stojol chkʼot li xkuxlejale. 31 Mi jaʼ la xluch jun kerem o jun tsebe, li yajval tot vakaxe skʼan jech xichʼ pasbel jech kʼuchaʼal chal li kʼusi chapanbile. 32 Mi jaʼ la xluch junuk mosoil o junuk kiarail li tot vakaxe, skʼan xichʼ akʼbel 30 siklo* stojol li yajval mosoile, jech xtok, skʼan me xichʼ milel ta ton li tot vakaxe.

33 »Mi oy junuk vinik ti la sjam o la sjom chʼen ti muʼyuk la smak komele, mi te pʼaj* yalel jkotuk tot vakax o jkotuk vuroe, 34 skʼan me stoj li vinike.*+ Skʼan stojbe li yajval chonbolome, vaʼun jaʼ chichʼ komel li chamem tot vakax o li chamem vuroe. 35 Mi la syayijes jkotuk tot vakax li stot xvakax jun vinike xchiʼuk mi cham-oe, skʼan xchonik li kuxul tot vakaxe xchiʼuk skʼan xchʼakbe sbaik li stojole, jech xtok, skʼan xchʼakbe sbaik li chamem tot vakaxe. 36 Mi nabil ti nopem onoʼox xaʼi chluchvan li tot vakaxe, pe ti muʼyuk laj yichʼ chabiel yuʼun li yajvale, skʼan me xakʼbe xkʼexol li tot vakaxe xchiʼuk jaʼ chichʼ komel li chamem tot vakaxe.

22 »Mi oy jun vinik laj yelkʼan jkotuk tot vakax o jkotuk chije, mi la smil o mi la xchone, voʼkot chakʼbe xkʼexol li tot vakaxe xchiʼuk chankot chakʼbe xkʼexol li chije.+

2 »(Mi laj yichʼ tael jun j-elekʼ+ ti jaʼo yakal ch-elkʼaj ta jpʼej nae, mi te laj yichʼ yayijesel xchiʼuk mi chame, li buchʼu milvane muʼyuk chkom ta sba li xchʼichʼel j-elekʼe. 3 Pe mi jaʼo kʼot ta pasel kʼalal lokʼem xa ox talel kʼakʼale, chkom ta sba li xchʼichʼel j-elekʼe).

»Skʼan xakʼbe xkʼexol. Mi muʼyuk kʼusi x-ayan yuʼune, akʼo yichʼ chonel batel ta skoj li kʼusi laj yelkʼane. 4 Mi kuxul to tabat li yelekʼe, mi jaʼ jkotuk tot vakax o jkotuk vuro o mi jaʼ jkotuk chije, j-oʼlol to jech yepal skʼan xkʼexta li kʼusi yelkʼanoje.

5 »Mi oy buchʼu bat yakʼbe sloʼ yaxal* ta osiltik li xchonbolome o ti bu tsʼunbil uvae, pe mi te laj yakʼ veʼuk li ta yosil yan krixchanoe, skʼan jaʼ xakʼbe ta xkʼexol li kʼusi mas lekik chlokʼ ta yosile o li bu mas lekik chlokʼ li s-uvae.

6 »Mi oy buchʼu la stsan kʼokʼe xchiʼuk mi kol batel yuʼun ta chʼixtikaltike, mi la xchikʼ li chukbil sat tsʼunobil chlokʼe o ti bu tekʼajtik toe o mi kʼakʼ batel jsepuk osile, li buchʼu la stsanbe skʼakʼale skʼan xakʼbe xkʼexol li kʼusitik kʼakʼe.

7 »Mi oy jun vinik laj yakʼbe skʼej* stakʼin junuk xchiʼil o mi laj yakʼbe skʼej yan kʼusitik oy yuʼune, pe ti laj yichʼ elkʼanbel ta sna li buchʼu la skʼeje, mi laj yichʼ tael li j-elekʼe, j-oʼlol to jech yepal chakʼbe xkʼexol li kʼusitik laj yelkʼane.+ 8 Mi muʼyuk laj yichʼ tael li j-elekʼe, akʼo yichʼ ikʼel talel ta stojolal melel Dios+ li yajval nae sventa xichʼ naʼel mi jaʼ laj yakʼ skʼob ta stojolal li kʼusitik jaʼ yuʼun xchiʼile. 9 Mi oy buchʼu te yichʼoj o yikʼoj li kʼusitik maʼuk yuʼune, jech kʼuchaʼal jkot tot vakax, jkot vuro, jkot chij, jlik kʼuʼil pokʼil o kʼusiuk noʼox ti chʼayem ti xi chal li june: ‹¡Leʼe jaʼ kuʼun!›, xchaʼvoʼalik skʼan xakʼik ta ojtikinel ta stojolal melel Dios li kʼop taje.+ Mi laj yakʼ ta naʼel Dios ti buchʼu ta smule, j-oʼlol to jech yepal skʼan xakʼbe xkʼexol li xchiʼile.+

10 »Mi oy jun vinik la skʼubanbe jkotuk svuro junuk xchiʼil, jkotuk stot xvakax o jkotuk xchij o yan stsʼunbal chonbolome, pe mi cham o mi mu xa xtun kom yakane o mi oy buchʼu laj yikʼ batel ti muʼyuk buchʼu laj yile, 11 te oyuk xchaʼvoʼalik ta stojolal Jeova sventa jamal xal li buchʼu la xchabi ti muʼyuk laj yakʼ skʼob ta stojolal li kʼusi jaʼ yuʼun xchiʼile; skʼan xchʼun li yajval chonbolom eke. Li jun une muʼyuk chakʼbe xkʼexol.+ 12 Pe mi laj yichʼ elkʼanbel li chonbolome, skʼan xichʼ akʼbel xkʼexol li yajvale. 13 Yan mi laj yichʼ lilinel ta tiʼel ta jkotuk jtiʼvanej chonbolome, skʼan xichʼbe talel xkechel sventa xvinaj ti jech kʼot ta pasele. Muʼyuk chakʼbe xkʼexol mi laj yichʼ lilinel ta tiʼel ta jkotuk jtiʼvanej chonbolome.

14 »Mi oy buchʼu la skʼanbe ta chʼom jkotuk xchonbolom junuk xchiʼil, pe ti mu xa xtun kom yakane o ti cham yuʼun kʼalal muʼyuk te xchiʼuk li yajvale, skʼan xakʼbe xkʼexol li buchʼu la skʼan ta chʼome. 15 Pe muʼyuk chakʼbe xkʼexol mi te xchiʼuk li yajvale. Mi yuʼun lokʼbil li chonbolome, jaʼ xa xkʼexol chkom ti kʼu yepal la stojbe li slokʼe.

16 »Mi oy jun vinik ti lek xa la sloʼla batel junuk tojol tseb ti muʼyuk to makbil ta vinike xchiʼuk ti la xchiʼin ta vayele, skʼan stoj ti kʼu yepal tstojik li tojol tsebetike, akʼo yikʼ li tsebe.+ 17 Pe mi mu jutebuk skʼan xakʼ stseb li totile, skʼan onoʼox stoj ti kʼu yepal tstojik li tojol tsebetike.

18 »Mu me xavakʼ kuxiuk junuk meʼ j-akʼchamel.+

19 »Persa me skʼan xichʼ milel li buchʼu chchiʼin ta vayel jkotuk chonbolome.+

20 »Skʼan me xichʼ lajesbel skʼoplal li buchʼu maʼuk noʼox chakʼbe smoton li Jeovae ti chakʼbe smoton yan diosetik xtoke.+

21 »Mu me xavilbajin xchiʼuk mu me xavakʼbe svokol junuk jyanlum ti te achiʼuk ta nakleje,+ yuʼun jyanlum la-echʼik ek li ta yosilal Ejiptoe.+

22 »Mu me xavakʼbeik svokol junuk ants ti chamem smalale o junuk olol ti chamem stote.+ 23 Mi oy laj avakʼbe svokole, ta me xkaʼibe skʼopojel mi la skʼanbun vokole;+ 24 ta me stsan skʼakʼal koʼonton, vaʼun ta jmiloxuk ta espada, stuk chkom li avajnilike xchiʼuk muʼyuk stot chkom li anichʼnabike.

25 »Mi oy laj avakʼbe xchʼamun atakʼin li buchʼu povre* ti te achiʼuk ta naklej ta jteklumale, mu me jechuk xapas jech kʼuchaʼal jun krixchano ti chakʼ ta chʼom stakʼin sventa spas kanal takʼine. Mu me xakʼanbeik sjol li atakʼinike.+

26 »Mi laj avichʼbe komel ta prental* jlikuk skʼuʼ spokʼe,+ skʼan me xasutesbe kʼalal chchʼay xa batel li kʼakʼale. 27 Yuʼun kʼajomal jlik skʼuʼ spokʼ sventa smak li sbekʼtale;* ¿kʼusi chvay-o un?+ Ta me xkaʼibe skʼopojel ta melel mi la skʼanbun vokole, yuʼun oy xkʼuxul koʼonton.*+

28 »Mu me xachopol kʼopta li Diose,+ jech xtok, mu me xachopol kʼopta junuk bankilal* li ta alumale.+

29 »Mu me xanaʼetuk xavakʼ ta matanal kʼalal ep chakʼ sat li kʼusitik chatsʼune xchiʼuk mu me xanaʼetuk xavakʼ ta matanal kʼalal ep tajek chlokʼ yaʼlel a-uva li ta spitsʼobile.*+ Skʼan xavakʼbun li sba xnichʼnab anichʼnabtake.+ 30 Xi skʼan xapas xchiʼuk li stot avakax xchiʼuk li achije:+ vukub kʼakʼal te komuk xchiʼuk smeʼ. Li ta xvaxakibal kʼakʼal une skʼan xavakʼbun.+

31 »Skʼan me xavakʼik ta ilel ti chʼuloxuk ta jtojolale+ xchiʼuk mu me xatiʼik li skomenal* chonbolom chataik ta osiltik ti yichʼoj lilinel ta tiʼel ta jkotuk jtiʼvanej chonbolome.+ Skʼan xajipbeik batel tsʼiʼ.

23 »Mu me xapuk batel junuk aʼyej ti mu meleluke.+ Mu me xakʼot ta jun chopol testigo ti jaʼ xa chakolta li buchʼu chopole.+ 2 Mu me xatsʼakli batel epal krixchanoetik sventa xapas li kʼusi chopole, jech xtok, kʼalal chakʼopoje, mu me xasokesbe skʼoplal li kʼusi melel sventa noʼox chatsʼakli batel li epal krixchanoetike.* 3 Mu me tʼujbiluk yajval avuʼun kʼalal oy skʼop li jun povree.+

4 »Mi la atabe stot xvakax junuk avajkontra o jkotuk svuro ti chʼayeme, skʼan me xasutesbe.+ 5 Mi laj avakʼ venta ti te netʼel kom ta yikats jkotuk svuro li buchʼu spʼajojote, mu me teuk noʼox xakʼel o ti te noʼox xavikta komele. Skʼan xakolta ta syalesbel yikats li svuroe.+

6 »Kʼalal chichʼ chapanel junuk povre ti te oy ta atojolalike, mu xasokes ti kʼu yelan chichʼ chapanele.+

7 »Mu me xatikʼ aba kʼalal oy buchʼu jecheʼ chichʼ sabel smule; mu me xamil li buchʼu muʼyuk smule xchiʼuk li buchʼu tukʼe, yuʼun li voʼone muʼyuk tukʼ chkalbe skʼoplal li buchʼu chopole.*+

8 »Mu me xachon aba ta takʼin,* yuʼun li chonbail ta takʼine tspas yuʼun ta maʼsat li buchʼu lek xil osile xchiʼuk xuʼ sokesbe skʼopojel li tukʼil viniketike.+

9 »Mu me xavakʼbe svokol li jun jyanlum ti te achiʼuk ta nakleje. Li voʼoxuke lek xanaʼik kʼu yelan chaʼi sba li jun jyanlume,* yuʼun la-echʼik ta jyanlum li ta yosilal Ejipto eke.+

10 »Vakib jabil skʼan xavabtelan li avosile xchiʼuk xatsobbe sat li kʼusitik chatsʼune.+ 11 Li ta svukubal jabil une mu me kʼusi xatsʼun li ta avosile, skʼan xavakʼbe xkux; akʼo te saʼ sveʼelik li buchʼutik povreike, li sovrailtak chkom yuʼunike jaʼ xa tslajesik li teʼtikal chonbolometik ta osiltike. Jaʼ jech skʼan xapas li bu chatsʼun a-uva xchiʼuk a-olivae.

12 »Vakib noʼox kʼakʼal xuʼ xa-abtej, li ta svukubal kʼakʼale mu xa xa-abtej sventa xkux li stot avakaxe, li avuroe xchiʼuk sventa xkux li yol akiarae xchiʼuk li jyanlum ti te achiʼuk ta nakleje.+

13 »Skʼan me xakʼelik lek ti xapasik li kʼusi laj kalboxuke+ xchiʼuk skʼan me mu xatabeik ta albel sbi yan diosetik; skʼan me mu xlokʼ ta ave taje.+

14 »Oxib velta ta jabil skʼan xapas kʼin ta jtojolal.+ 15 Skʼan xapas li Skʼinal Pan ti Muʼyuk Slevaduraile.*+ Jech kʼuchaʼal laj kalbot mantale, kʼalal jaʼo yorail li ta yuilal abibe,*+ vukub kʼakʼal chalajes pan ti muʼyuk yichʼoj slevaduraile, yuʼun jaʼ jech ora lalokʼ talel li ta Ejiptoe. Mu me buchʼu xokoluk skʼob xtal ta jtojolal.+ 16 Jech xtok, skʼan xapasbe li Skʼinal Sba Sat Kʼusitik Chlokʼ* avuʼun ti lek xa yijik ti laj avabtelane, jaʼ li sat kʼusitik la atsʼun ta avosile.+ Jech xtok, li ta stsutsebal jabile skʼan xapasbe li Skʼinal Stsobbel Sat Kʼusitik Tsʼunbil* avuʼune, jaʼo kʼalal chatsobbe sat li avabtele.+ 17 Oxib velta ta jabil skʼan xtalik ta stojolal Kajvaltik Jeova skotol li viniketik avuʼune.+

18 »Mu me xakap ta kʼusi yichʼoj slevadurail li chʼichʼ chavakʼbun ta jmotone. Jech xtok, mu me xakʼejik* kʼalal to ta sob yokʼomal li xepuʼal kʼusitik chavakʼik ta matanal li ta kʼinetik chapasik ta jtojolale.

19 »Skʼan xavichʼ talel ta sna Jeova Dios avuʼun li sba sat kʼusitik atsʼunoj ti lek xa yijik xchiʼuk ti bu mas lekik chlokʼ ta avosile.+

»Mu me xalakan ta yaʼlel xchuʼ smeʼ li chʼiom tentsune.+

20 »Ta jtak jelavel ta atojolal jun anjel sventa xchabiot ta be+ xchiʼuk sventa xikʼot ochel ti bu chapanbil kuʼune.+ 21 Tsʼet chikintabo me xchiʼuk chʼunbo me li kʼusi chale. Mu xatoy aba ta stojolal, yuʼun muʼyuk me chakʼ ta perton amulik,+ yuʼun te oy jbi ta stojolal. 22 Mi jpʼel chachʼunbe li kʼusi chale xchiʼuk mi chapas skotol li kʼusitik chkalbote, ta jkontrain li buchʼutik tskontrainote xchiʼuk tsots chkakʼ jba ta stojolal li buchʼu tsots chakʼ sba ta atojolale. 23 Jaʼ jbabe chbat avuʼun li kaj-anjele, jaʼ chikʼot batel ti bu oy li j-amorreoetike, li j-etetike, li jperisitaetike, li jkanaanetike, li j-eveoetike xchiʼuk li jebusetike, vaʼun ta jmil li krixchanoetik taje.+ 24 Mu me xanijan aba ta stojolal li sdiosike xchiʼuk mu me buchʼu stijbot avoʼonton sventa xatun ta stojolal li sdiosike, jech xtok, mu me xachanbe li kʼusitik tspasike.+ Jaʼ lek lilino li jecheʼ diosetik yuʼunike xchiʼuk lomeso li chʼul vaʼanbil tonetik yuʼunike.+ 25 Li voʼoxuke skʼan me xatunik ta stojolal li Jeova Dios avuʼunike,+ vaʼun chakʼbe bendision li aveʼel xchiʼuk avuchʼomike.+ Ta jlajesbe skʼoplal li chamel oy ta atojolale.+ 26 Li ants ta alumale muʼyuk chyal yol mi jaʼuk ti mu xa snaʼ x-alaje,+ li voʼote jal tajek chkakʼ kuxian.

27 »Kʼalal mu to chakʼot ti bu oy li krixchanoetike, ta xnikik ta xiʼel ta skoj ti chaʼiik jkʼoplale.+ Skotol li buchʼutik tstsakot ta kʼope chvovij sjol kuʼun, vaʼun kʼalal chjatavik batel kuʼun skotol li avajkontratake, tsalbil xa chbatik.*+ 28 Kʼalal mu to xakʼote, li j-eveoetike, li jkanaanetike xchiʼuk li j-etetike chkakʼ chibajikuk* ta atojolal,+ vaʼun ta jnuts lokʼel ta atojolal li avajkontratake.+ 29 Mu ta junuk noʼox jabil ta jnutsan lokʼel sventa mu jecheʼuk noʼox xokol xkom li balumile xchiʼuk sventa mu x-epaj ta atojolal li jtiʼvanej chonbolometike, yuʼun xiʼel xilbajin li ateklumale.+ 30 Kʼunkʼun ta jlokʼesan batel ta atojolal jaʼ to mi la-epaje xchiʼuk mi laj avuʼunin xa ox lek li osile.+

31 »Li tsʼak avuʼune te chlik talel ta Tsajal nab kʼalal to ta ukʼum yuʼun jfilisteaetik, te chlik talel ta takixokol balumil kʼalal to ta Ukʼum,*+ yuʼun chkakʼ ta akʼobik li jnaklejetik te ta lume, vaʼun te chanuts lokʼel.+ 32 Mu xapas trato xchiʼukik mi jaʼuk xapas trato xchiʼuk li diosetik yuʼunike.+ 33 Sventa mu xasaʼ amul yuʼunik ta jtojolale, mu me xavakʼ nakiikuk li ta alumale. Jpʼel skʼoplal chkʼot kʼuchaʼal chʼojon ta atojolal mi latun ta stojolal li diosetik yuʼunike».+

24 Xi laj yalbe li Moisese: «Muyan talel ta stojolal Jeova, ikʼo talel Aaron, Nadab, Abiu+ xchiʼuk 70 ta voʼ moletik ta Israel. Te kʼuk snamal xanijan abaik. 2 Stuk noʼox akʼo nopajuk tal ta stojolal Jeova li Moisese, mu me xnopajik tal li yantike, jech xtok, mu me xmuyik talel xchiʼuk Moises li jteklume».+

3 Li Moises une tal yalbe jteklum skotol li kʼusitik laj yal Jeovae xchiʼuk skotol li kʼusitik chapanbil yuʼune.+ Xi jmoj takʼav sjunul li jteklume: «Ta sjunul koʼontonkutik chkabtelankutik skotol li kʼusi yaloj Jeovae».+ 4 Li Moises une la stsʼiba skotol li kʼusitik laj yal Jeovae.+ Sob xa tajek lik ta yokʼomal xchiʼuk te la svaʼan jun skajleb matanal li ta yok vitse xchiʼuk la slats 12 ta pʼej ton ti jaʼ sventa li 12 ta chop snitilulal Israele. 5 Laje, la stak batel j-israelal keremetik sventa xbat yakʼik chikʼbil matanaletik, jech xtok, la smilik tot vakaxetik yoʼ xakʼbeik ta milbil matanal sventa jun oʼontonal+ li Jeovae. 6 Li Moisese la stsak j-oʼlol li chʼichʼe, te laj yakʼ ta mukʼta bochetik, yan li j-oʼlole te la svij ta sba skajleb matanal. 7 Vaʼun, la stsak li slivroal tratoe xchiʼuk tsots laj yaptabe li jteklume.+ Xi la stakʼike: «Ta jpaskutik ta sjunul koʼontonkutik skotol li kʼusi yaloj Jeovae xchiʼuk ta jchʼunkutik mantal».+ 8 Jech oxal, li Moisese la stsak li chʼichʼe, vaʼun la svijbe ta sba li jteklume,+ xi laj yale: «Li chʼichʼ liʼe jaʼ sventa li trato tspas Jeova xchiʼuk voʼoxuk ta sventa li kʼusi laj xa kalboxuke».+

9 Muyik batel li Moises, Aaron, Nadab, Abiu xchiʼuk li 70 ta voʼ moletik ta Israele, 10 la staik ta ilel li Dios yuʼun Israele.+ Li bu stekʼanoj yakane xkoʼolaj kʼuchaʼal piso pasbil ta safiro ton, yox tajek jech kʼuchaʼal li vinajele.+ 11 Li Diose muʼyuk la syayijes li viniketik ti ichʼbilik ta mukʼ ta Israele,+ te laj yakʼ sba ta ilel melel Dios ta stojolalik kʼalal jaʼo chveʼik xchiʼuk ch-uchʼbolajike.

12 Xi albat yuʼun Jeova li Moisese: «Muyan tal ta jtojolal li ta jol vitse, teuk xakom. Ta xkakʼbot li pechpech tonetik ti te jtsʼibaoj li mantaletik kuʼune xchiʼuk li kʼusitik kaloj sventa achanubtaselike».+ 13 Li Moisese lik xchiʼuk li Josue ti jaʼ yajtunele,+ pe jaʼ noʼox muy batel ta vits yuʼun melel Dios li Moisese.+ 14 Xi xa onoʼox yalojbe li moletike: «Liʼ xa malavanike jaʼ to mi lisutkutik talel ta atojolalike.+ Mi oy kʼusi skʼan chapanel avuʼunike,+ jaʼ bat kʼelik li Aaron xchiʼuk Ure,+ yuʼun jaʼ liʼ chkom ta atojolalike». 15 Li Moisese jaʼo muy batel kʼalal volol ta tok li vitse.+

16 Li smukʼulal Jeovae+ te kom ta sba li vits Sinaie+ xchiʼuk vakib kʼakʼal te volol kom ta tok li Vitse. Li ta svukubal kʼakʼale, te kʼoponat tal yuʼun Dios li Moises li ta oʼlol toke. 17 Li j-israeletike laj yilik li smukʼulal Jeova ti te oy ta jol vitse, xkoʼolaj kʼuchaʼal kʼokʼ ti chchikʼvane. 18 Li Moisese och batel li ta toke, jech muy batel li ta vitse.+ 40 kʼakʼal xchiʼuk 40 akʼobal+ te kom ta vits li Moisese.

25 Li Jeova une xi laj yalbe li Moisese: 2 «Albo jteklum Israel ti oyuk kʼusi stsobbeikun tale; skotol li buchʼu jech oy ta yoʼonton chakʼe. Skʼan xatsobik li kʼusi chakʼbeikune.+ 3 Liʼe jaʼ me li kʼusi chichʼik tal ti skʼan xatsobike: oro,+ plata,+ kovre,+ 4 asul no, tsots ti bonbil ta kuxul moradoe,* kuxul tsajal pokʼ, lekil lino, stsotsil tentsun, 5 snukulil tot chijetik ti bonbil ta tsoje, snukulil fokaetik, akasia teʼ,+ 6 s-aseiteal kantiletik,+ balsamo sventa li aseite ti chtun kʼalal oy buchʼu chichʼ tʼujele+ xchiʼuk sventa li pom ti oy sperfumeale,+ 7 onise tonetik xchiʼuk yan tonetik ti te chichʼ akʼel ta mokankʼuʼile+ xchiʼuk ti te chichʼ akʼel ta smak stiʼ oʼontonale.+ 8 Akʼo spasbeikun jun yavil kichʼobil ta mukʼ ti chʼule, vaʼun te ta jchiʼinik ta naklej.*+ 9 Skʼan xapasik li axibalnae xchiʼuk skotol li kʼusitik te chtune, jaʼ jech skʼan xapasik jech kʼuchaʼal li skʼelobil* chkakʼ avile.+

10 »Skʼan spasik jun kaxa ta akasia teʼ, chib xukʼubil* xchiʼuk j-oʼlol li snatile, jun xukʼubil xchiʼuk j-oʼlol li sjamleje xchiʼuk jun xukʼubil xchiʼuk j-oʼlol li stayleje.+ 11 Skʼan xapix lek ta batsʼi oro+ li yut xchiʼuk spate. Jech xtok, ta oro xapasbe yuni nichimal ta sjoyobal li stiʼ kaxae.+ 12 Paso chanib xotbil oro, chikʼbil ta kʼokʼ xapas, vaʼun te xanapʼanbe ta yakʼol ti bu tsakajtik li chanib yakane, chib xotbil oro ta jot xokon xchiʼuk chib xotbil oro li ta jot xokone. 13 Ta akasia teʼ xapasbe li steʼeltake xchiʼuk pixo ta oro.+ 14 Sventa stakʼ kuchel batel li Kaxae, li steʼeltake te xaxoj ochel li ta xotbil oro ti te napʼajtik ta xokon Kaxae. 15 Li steʼeltake te xojluk-o komuk li ta xotbil oro ti te napʼajtik ta xokon Kaxae; mu me xichʼ lokʼesel.+ 16 Li ta Kaxa une te xatikʼ ochel li pechpech tonetik chkakʼbot ti chtun kʼuchaʼal testigo ta atojolalike.+

17 »Pasbo junuk smak ta batsʼi oro, chib xukʼubil xchiʼuk j-oʼlol snatil xchiʼuk jun xukʼubil xchiʼuk j-oʼlol sjamlej.+ 18 Paso chib keruvinetik ta oro, tenbil ta martiyo xapas xchiʼuk te xavakʼ jujun ta jujujot sjol li smak kaxae.+ 19 Li keruvinetike te xavakʼ jujun ta jujujot, jujun keruvin ta jujujot sjol li smak kaxae. 20 Li chib keruvinetik taje lichʼil muyel chkom li xikʼike sventa xakʼbeik yaxinal* ta xikʼik li smak kaxae.+ Snupoj sbaik chkom xchibalik xchiʼuk nijajtik yalel satik ta smak li kaxae. 21 Laje, mako li Kaxae,+ pe te xatikʼ ochel li pechpech tonetik ti chtun kʼuchaʼal testigo ta atojolalike. 22 Jaʼ te chkakʼ jba ta ilel ta atojolal xchiʼuk te ta jkʼoponot tal ta sba li smak kaxae.+ Te chikʼopoj tal ta oʼlol ti bu oy li chib keruvinetik ta sba xkaxail Mantal* sventa xkalbot tal li mantaletik ti skʼan xavalbe li j-israeletike.

23 »Jech xtok, ta akasia teʼ skʼan xapas jun mexa,+ chib xukʼubil li snatile, jun xukʼubil li sjamleje xchiʼuk jun xukʼubil xchiʼuk j-oʼlol li stayleje.+ 24 Chapix ta batsʼi oro xchiʼuk chapasbe yuni nichimal ta sjoyobal li mexae. 25 Chapakʼbe jun tavla ta sjoyobal ti chanib kʼob* sjamleje xchiʼuk chapasbe jun spolpol tiʼil ta oro ta sjoyobal li tavlae. 26 Paso chanib xotbil oro, vaʼun te xanapʼanbe li ta chanjot xchikin ti bu tsakajtik li yakantake. 27 Li xotbil oroetike te xanapʼan ta stsʼel li tavlae yoʼ te xichʼ xojel li steʼeltak sventa xichʼ kuchel batel li mexae. 28 Pasbo steʼeltak ta akasia teʼ xchiʼuk pixo ta oro, vaʼun jaʼ chtun sventa xakuch batel li mexae.

29 »Jech xtok, skʼan xapasbe splatoaltak, skopailtak, sjarrailtak xchiʼuk smukʼta bochaltak sventa xamalik li matanal vinoe. Ta batsʼi oro skʼan xapas.+ 30 Skʼan te xavakʼilan-o ta sba mexa li pan ti chkichʼ akʼbel kʼuchaʼal matanale.+

31 »Skʼan xapas jun kandelero+ ta batsʼi oro, tenbil ta martiyo xapas li kandeleroe. Pasbo snakleb yakan, yakan, skʼobtak, snakleb xnich, s-umul nichimal xchiʼuk stukem nichimal. Jmoj snitoj sba ta skotol xapas.+ 32 Vakib skʼob xavakʼbe li kandeleroe, oxib ta jujujot. 33 Li ta jot oxib skʼobe, skʼan xapasbe oxib snakleb xnich ti xkoʼolaj ta xnich almendrae, pasbo s-umul nichimal xchiʼuk stukem nichimal, akʼo sjelilan sbaik ta jujun. Jech xapas xtok li ta jot oxib skʼobe, skʼan xapasbe oxib snakleb xnich ti xkoʼolaj ta xnich almendrae, pasbo s-umul nichimal xchiʼuk stukem nichimal, akʼo sjelilan sbaik ta jujun. Jaʼ jech skʼan xapasbe li svakibal skʼob kandelero ti te chlokʼ ta yakane. 34 Li ta yakane skʼan xapasbe chanib snakleb xnich ti xkoʼolaj ta xnich almendrae, pasbo s-umul nichimal xchiʼuk stukem nichimal, akʼo sjelilan sbaik ta jujun. 35 Li jun umul* nichime te chapas ta yolon ti bu chlokʼ li baʼyel chib skʼob ta yakane. Li yan umul nichime te chapas ta yolon li yan chib skʼobe. Jech xapas yan umul nichim li ta yolon yan chib skʼobe. Taje jaʼ li svakibal skʼob kandeleroe. 36 Li s-umul niche, li skʼobtake xchiʼuk sjunul li kandeleroe jmoj snitoj sba ta skotol xapas. Skʼan xapas ta batsʼi oro xchiʼuk tenbil ta martiyo xapas.+ 37 Pasbo vukub skantilal. Kʼalal mi laj yichʼ tsanel li kantiletike, chakʼ batel xojobal ta yeloval.+ 38 Li xtuchʼobil xmechaile xchiʼuk li yav akʼale ta batsʼi oro skʼan xapas.+ 39 Ta jun talento* batsʼi oro skʼan xichʼ pasel li kandelero xchiʼuk skotol li kʼusitik chtun yuʼune. 40 Kʼelo me lek ti jechuk xapas jech kʼuchaʼal li skʼelobil* la-akʼbat avil ta vitse.+

26 »Li axibalnae xi skʼan xapase:+ tuneso lajunlik pokʼ ti pasbil ta lekil lino ti tsʼotbile, asul no, tsots* ti bonbil ta kuxul moradoe xchiʼuk kuxul tsajal pokʼ. Skʼan xaluchbe* slokʼol+ keruvinetik.+ 2 Li jujulik pokʼe 28 xukʼubil* snatil xchiʼuk chanib xukʼubil sjamlej. Skʼan koʼol smukʼul skotol li pokʼetike.+ 3 Tsako li jujulik pokʼe, vaʼun nupʼo ta tsʼisel voʼlik sventa snitojuk sba xkom, jech xapas xtok xchiʼuk li yan voʼlik pokʼ sventa snitojuk sba xkom eke. 4 Li ta jot stiʼil slajebal pokʼe akʼbo xchikintak ta asul no, jech xapasbe xtok li jot stiʼil ti bu tsnupʼ sba xchiʼuk li jchope. 5 Pasbo 50 xchikin li baʼyel pokʼe xchiʼuk pasbo 50 xchikin li yan pokʼ sventa snupʼ sba xchiʼuk li baʼyel pokʼe. 6 Paso 50 lukajtik takʼin ta oro, akʼo snupʼ sba xchaʼlikal pokʼ li ta lukajtik takʼine, jaʼ jech tspas ta jlik pokʼ sventa li axibalnae.+

7 »Paso yan pokʼ xtok, ta stsotsil tentsun+ xapas sventa smak li axibalnae, 11 ta lik xapas.+ 8 Li jujulik pokʼe 30 xukʼubil snatil xchiʼuk chanib xukʼubil sjamlej. Skʼan koʼol smukʼul li 11 ta lik pokʼe. 9 Ta jlik noʼox xapas li voʼlik pokʼe xchiʼuk ta jlik noʼox xapas li yan vaklik pokʼe, li svaklikal pokʼe skʼan xapux ta yeloval li karpanae. 10 Pasbo 50 xchikin ta stiʼil li baʼyel jlik pokʼe xchiʼuk pasbo 50 xchikin ta stiʼil li yan pokʼe sventa snupʼ sba xchiʼuk li baʼyel pokʼe. 11 Paso 50 lukajtik takʼin ta kovre, te xaxoj ochel li ta xchikin pokʼe yoʼ snupʼ sba li karpanae, jaʼ jech chkʼot ta smak li axibalnae. 12 Te jokʼoluk komuk ti kʼu snatil jelavem chkom li pokʼe. Li j-oʼlol sovrail pokʼe te jokʼoluk komuk ta spat li axibalnae. 13 Ti kʼu snatil sovrail chkom li pokʼetike te kililuk komuk ta yok li axibalnae, jun xukʼubil snatil ta jujujot sventa smak.

14 »Pasbo yan smak xtok li karpanae, chapano snukulil tot chijetik ti bonbil ta tsoje, jech xtok, lamanbo snukulil fokaetik li ta sbae.+

15 »Tuneso akasia teʼ yoʼ xapasbe steʼeltak+ li axibalnae, vaʼajtik xapas.+ 16 Skʼan lajuneb xukʼubil snatil li jujun steʼeltake xchiʼuk jun xukʼubil xchiʼuk j-oʼlol li sjamleje. 17 Li jujun steʼeltake pasbo chib yakan. Jech xapasbe skotol li steʼeltak axibalnae. 18 Pasbo 20 steʼeltak ta jot li axibalnae, jaʼ li ta stukʼil sure.

19 »Paso 40 ta pech plata ti jomajtik sate+ sventa te chavakʼ ta yolon li 20 steʼeltake. Li chaʼpech plata ti jomol sate jaʼ sventa li chib yakan jujun steʼeltake. Jaʼ jech xavakʼ batel chaʼchaʼpech plata sventa li chib yakan jujun steʼeltake.+ 20 Sventa li ta jot xokon axibalnae, jaʼ li ta snorteale, pasbo 20 steʼeltak. 21 Paso 40 ta pech plata ti jomajtik sate, li chaʼpech plata ti jomol sate jaʼ sventa li chib yakan jujun steʼeltake. Jaʼ jech xavakʼ batel chaʼchaʼpech plata sventa li chib yakan jujun steʼeltake. 22 Sventa li spat axibalnae, li ta smaleb kʼakʼale, pasbo vakib steʼeltak.+ 23 Paso chib steʼeltak sventa xkʼot ta s-eskinail jujujot xokon ta spat li axibalnae. 24 Li chib steʼeltak taje skʼan ta lumtik xlik avaʼan muyel, te chkʼot snup sba ta akʼol ti bu oy li baʼyel xotbil oroe. Jaʼ chkʼot ta s-eskinail jujujot xokon ta spat li axibalnae. 25 Pasbo vaxakib steʼeltak xchiʼuk 16 xpechpech platail ti jomajtik sate, li chaʼpech plata ti jomol sate jaʼ sventa li chib yakan jujun steʼeltake. Jaʼ jech xavakʼ batel chaʼchaʼpech plata sventa li chib yakan jujun steʼeltake.

26 »Tuneso akasia teʼ sventa xapas voʼob kʼatlom teʼ sventa xichʼ tsakanel li steʼeltak jot xokon axibalnae,+ 27 paso voʼob kʼatlom teʼ xtok sventa xichʼ tsakanel li steʼeltak ta jot xokon axibalnae xchiʼuk paso yan voʼob kʼatlom teʼ sventa xichʼ tsakanel li steʼeltak ta spat axibalna ti skʼeloj batel smaleb kʼakʼale. 28 Li skʼatlom teʼal ti chichʼ akʼel ta oʼlol steʼeltake skʼan jtel noʼox ti chlik ta jot stiʼil kʼalal to ta jot stiʼile.

29 »Pixo ta oro li steʼeltake+ xchiʼuk paso xotbil oro ti jaʼ chtun ta stsakleb li skʼatlom teʼaltake xchiʼuk skʼan xapix ta oro li kʼatlom teʼetike. 30 Jech me skʼan xapas li axibalna jech kʼuchaʼal li splanoal la-akʼbat avil ta vitse.+

31 »Paso jlik kortina,+ tuneso asul no, tsots* ti bonbil ta kuxul moradoe, kuxul tsajal pokʼ xchiʼuk tsʼotbil lekil lino. Skʼan xaluchbe* slokʼol keruvinetik. 32 Te xajokʼan ta chanib oyetik ti pasbil ta akasia teʼ ti pixbilik ta oroe. Li stsaklebtake skʼan pasbiluk ta oro. Li yoyaltake te xachotan ta chanpech plata ti jomajtik sate. 33 Te xajokʼan ta lukajtik takʼin li kortinae, vaʼun li xkaxail Mantale*+ te xatikʼ ochel ta yut ti bu jokʼol li kortinae. Li kortinae jaʼ sventa chʼakal xkom avuʼunik li bu Chʼule+ xchiʼuk li Batsʼi Lekil Chʼul Kuartoe.+ 34 Skʼan me xanujanbe smak li xkaxail Mantal* te ta Batsʼi Lekil Chʼul Kuartoe.

35 »Li mexae te xavakʼ ta spat ti bu jokʼol li kortinae, skʼeloj chkom li kandelero+ ti te oy ta sural ta yut li axibalnae; li mexae te xavakʼ li ta snorteale. 36 Pasbo skortinail li yochebal karpanae, tuneso asul no, tsots* ti bonbil ta kuxul moradoe, kuxul tsajal pokʼ xchiʼuk tsʼotbil lekil lino, vaʼun jmoj xajal ta skotol.+ 37 Paso voʼob oy ta akasia teʼ sventa li kortinae xchiʼuk pixo ta oro. Li stsaklebtake skʼan pasbiluk ta oro xchiʼuk skʼan xapasbe voʼpech kovre ti jomajtik sat ti chtun ta xchotleb li yoyaltake.

27 »Ta akasia teʼ xapas li skajleb matanale,+ voʼob xukʼubil* snatil, voʼob xukʼubil sjamlej, kuadrado xapas li skajleb matanale; jaʼ oxib xukʼubil li stayleje.+ 2 Pasbo xulub+ ta jujujot xchikin; tsakaluk ta skajleb matanal li xulubtake xchiʼuk pixo ta kovre li skajleb matanale.+ 3 Paso kuvetaetik sventa xalokʼesbe li stanile,* jech xtok, paso palaetik, mukʼta bochetik, natil chavchav takʼinetik xchiʼuk yavtak akʼal. Ta kovre xapas skotol li kʼusitik te chtune.+ 4 Pasbo jun xchajchaj takʼinal li skajleb matanale, ta kovre xapas. Vaʼun napʼanbo jujun xotbil kovre ta jujujot xchikin li chajchaj takʼine. 5 Te xavakʼ ta yolon stiʼil skajleb matanal. Li chajchaj takʼine tikʼo ochel kʼalal to ta oʼlol yut li skajleb matanale. 6 Pasbo steʼeltak li skajleb matanale, ta akasia teʼ xapas xchiʼuk pixo ta kovre. 7 Sventa stakʼ kuchel batele, li steʼeltake te xaxoj ochel li ta xotbil kovre ti te napʼajtik ta jujujot xchikin li skajleb matanale, jech komuk ta xchaʼjotal.+ 8 Li skajleb matanale skʼan xapas jech kʼuchaʼal jun kaxa ti pojol yut ti pasbil ta tavlae. Jechuk xichʼ pasel jech kʼuchaʼal laj yakʼbot avil Dios li ta vitse.+

9 »Pasbo yamakʼil*+ li axibalnae. Li ta jot xokon ta stukʼil sure skʼan xajokʼanbe skortinailtak li yamakʼile. Skʼan xapas ta tsʼotbil lekil lino, sien xukʼubil snatil ta skotol li kortinaetik sventa li jot yamakʼil taje.+ 10 Akʼbo 20 yoyal xchiʼuk 20 ta pech kovre ti jomajtik sate. Li stsaklebtak yoyale xchiʼuk li kʼusitik chichʼ tsʼakel-oe* skʼan xichʼ pasel ta plata. 11 Li skortinailtak chichʼ jokʼanel li ta jot xokon ta stukʼil nortee skʼan sien xukʼubil snatil ta skotol, 20 yoyal xchiʼuk 20 ta pech kovre ti jomajtik sate. Skʼan xichʼ pasel ta plata li stsaklebtake xchiʼuk li kʼusitik chichʼ tsʼakel-o* li oyetike. 12 Skʼan xajokʼanbe skortinailtak li ta jot yamakʼil* ta stukʼil smaleb kʼakʼale, skʼan 50 xukʼubil snatil ta skotol sventa li sjamlej yamakʼile. Akʼbo lajuneb yoyal xchiʼuk lajunpech kovre ti jomajtik sate. 13 Li sjamlej yamakʼil* li ta jot xokon ta stukʼil slokʼeb kʼakʼale jaʼ 50 xukʼubil. 14 Li ta xokon yochebal ta batsʼikʼobe skʼan xajokʼanbe skortinailtak ti 15 xukʼubil snatil ta skotole, akʼbo oxib yoyal xchiʼuk oxpech kovre ti jomajtik sate.+ 15 Li ta xokon yochebal ta tsʼetkʼobe* skʼan xajokʼanbe skortinailtak ti 15 xukʼubil snatil ta skotole, akʼbo oxib yoyal xchiʼuk oxpech kovre ti jomajtik sate.

16 »Pasbo skortinail ti 20 xukʼubil snatil sventa li yochebal yamakʼile.* Tuneso asul no, tsots* ti bonbil ta kuxul moradoe, kuxul tsajal pokʼ xchiʼuk tsʼotbil lekil lino, vaʼun jmoj xajal ta skotol.+ Akʼbo chanib yoyal xchiʼuk chanpech kovre ti jomajtik sate.+ 17 Skotol li yoyaltak ta sjoylejal li yamakʼile* pasbo ta plata li kʼusitik chichʼ tsʼakel-oe xchiʼuk ta plata xapas li stsaklebtake. Pe skʼan xapas ta kovre li kʼusi pechajtik ti jomajtik sate.+ 18 Li smak ta sjoyobal li amakʼe* skʼan sien xukʼubil snatil,+ 50 xukʼubil sjamlej xchiʼuk voʼob xukʼubil staylej, paso ta tsʼotbil lekil lino xchiʼuk paso pechajtik kovre ti jomajtik sate. 19 Jech kʼuchaʼal ta kovre skʼan xichʼ pasel skotol li estakaetik sventa karpanae xchiʼuk skotol li estakaetik sventa amakʼe,* ta kovre skʼan xichʼ pasel ek skotol li kʼusitik chichʼ tunesel li ta axibalnae xchiʼuk li yan kʼusitik chichʼ tunesel kʼalal ch-abtejik li ta axibalnae.+

20 »Albo mantal j-israeletik ti akʼo yichʼik talel sbatsʼi aseiteal olivae, taje jaʼ chtun sventa tsanaluk-o li kantiletike+ yoʼ sakjamanuk noʼox xvinaj. 21 Li Aaron xchiʼuk xnichʼnabtake jaʼ yabtel tskʼelik ti tsanaluk-o li kantiletik ti te oy ta karpana sventa tsobobbaile, jaʼ li ta spat ti bu jokʼol li kortina ti nopol xil xkaxail Mantale.+ Skʼan tsanaluk-o yuʼunik ta stojolal Jeova kʼalal chʼayem xa ox batel kʼakʼal+ kʼalal to ta sob yokʼomal. Jaʼ jun mantal ti jech skʼan spas skotol li jaykʼol kuxlejal chtal yuʼunik li j-israeletike.+

28 »Ikʼo lokʼel tal ta stojolal j-israeletik li abankil Aaron xchiʼuk li xnichʼnabtake sventa xtun kuʼun ta paleal+ li Aarone,+ jech xtok, chtun kuʼun ta paleal li Nadab xchiʼuk Abiue,+ li Eleasar xchiʼuk Itamar+ ti jaʼik xnichʼnabtak Aarone.+ 2 Skʼan xapasbe chʼul kʼuʼil pokʼiletik li abankil Aarone sventa xichʼ-o albel smukʼulal xchiʼuk sventa kʼupiluk sba xvinaj.+ 3 Skʼan xachiʼin ta loʼil li buchʼutik lek xtojobike,* jaʼ li buchʼutik kakʼojbe ep spʼijilike.+ Jaʼ tspasbeik li skʼuʼ spokʼtak Aaron sventa xichʼ chʼultajesel yoʼ xtun kuʼun ta paleale.

4 »Liʼe jaʼ li kʼuʼil pokʼiletik skʼan spasike: jun smak stiʼ oʼontonal,+ jlik mokankʼuʼil,+ jlik natil kʼuʼil ti muʼyuk skʼobe,+ jlik kʼuʼil ti oy skuadroaltake, jlik stsʼotobil jolil+ xchiʼuk jlik chukil;+ li chʼul kʼuʼil pokʼiletik taje skʼan spasik sventa slap li abankil Aaron xchiʼuk xnichʼnabtake yoʼ xtunik kuʼun ta paleal. 5 Li buchʼutik lek xtojobike jaʼ akʼo stunesik oro, asul no, tsots* ti bonbil ta kuxul moradoe, kuxul tsajal pokʼ xchiʼuk lekil lino.

6 »Li mokankʼuʼile akʼo spasik ta oro, ta asul no, ta tsots* ti bonbil ta kuxul moradoe, ta kuxul tsajal pokʼ xchiʼuk ta tsʼotbil lekil lino xchiʼuk luchbiluk* me.+ 7 Skʼan spasbeik chib spakʼ snekebal ti te tsnapʼanik li ta jujujot stiʼil snekebale. 8 Li jalbil chukil*+ ti te napʼal ta mokankʼuʼil sventa ta yaviluk lek xkome skʼan pasbiluk ta oro ek, ta asul no, ta tsots* ti bonbil ta kuxul moradoe, ta kuxul tsajal pokʼ xchiʼuk ta tsʼotbil lekil lino.

9 »Tsako chaʼpʼej onise ton,+ te xatsʼibabe sbiik li xnichʼnabtak Israele,+ 10 vakib biil xatsʼiba li ta jujupʼej tone, xcholet xatsʼiba jaʼ ti kʼu yelan vokʼike. 11 Li buchʼu jaʼ yabtel snaʼ stsʼibaj ta tonetike akʼo stsʼibabe sbi xnichʼnabtak Israel li ta chaʼpʼej tone, akʼo spakʼ jech kʼuchaʼal li seyoe.+ Mi laje, akʼo yakʼbe snakleb ta oro li chaʼpʼej tone. 12 Li chaʼpʼej tone te xanapʼan li ta spakʼ snekebal li mokankʼuʼile yoʼ xtun ta snaʼobil yuʼunik xnichʼnabtak Israel li tonetike.+ Li Aarone skʼan teuk x-ichʼet-o yuʼun ta snekeb ta stojolal Jeova li sbiik sventa snaʼobile. 13 Pasbo me snaklebtak ton ta oro. 14 Jech xtok, paso chaʼlik jichʼil kadena ta batsʼi oro ti xkoʼolaj ta balbil chʼojone.+ Li kadena ti xkoʼolaj ta balbil chʼojone te xaxoj li ta snaklebtak tone.+

15 »Saʼo buchʼu snaʼ xluchomaj* sventa spas li smak stiʼ oʼontonal sventa chapanele.+ Li smak stiʼ oʼontonale akʼo yichʼ pasel ta oro, ta asul no, ta tsots* ti bonbil ta kuxul moradoe, ta kuxul tsajal pokʼ xchiʼuk ta tsʼotbil lekil lino+ jech kʼuchaʼal li mokankʼuʼile. 16 Skʼan me kuadrado xkom kʼalal chichʼ puxele, jchʼix* sjamlej xchiʼuk jchʼix snatil. 17 Napʼanbo tonetik li ta snaklebe, chanchol xavakʼ. Li sbacholale jaʼ rubi, topasio xchiʼuk esmeralda ton. 18 Li xchaʼcholale jaʼ turkesa, safiro xchiʼuk jaspe ton. 19 Li yoxcholale jaʼ leschem,* agata xchiʼuk amatista ton. 20 Li xchancholale jaʼ krisolito, onise xchiʼuk jade ton. Te xavakʼ li ta snaklebtak ti pasbil ta oroe. 21 Li jujupʼej tone jaʼ sventa sbiik li 12 ta voʼ xnichʼnabtak Israele. Li sbiike teuk tsʼibabil jech kʼuchaʼal seyo, li jujun biil te tsʼibabile jaʼ skʼan xal li 12 ta chop snitilulal Israele.

22 »Skʼan xapas jichʼil kadenaetik ta batsʼi oro ti xkoʼolaj ta balbil chʼojon sventa sjoylejal li smak stiʼ oʼontonale.+ 23 Paso chib xotajtik oro sventa li smak stiʼ oʼontonale, jaʼ te xanapʼan ta jujujot xchikin ta akʼol li ta smak stiʼ oʼontonale. 24 Li chaʼlik jichʼil kadena pasbil ta oroe te xaxoj li ta chib xotajtik oro ta jujujot xchikin li smak stiʼ oʼontonale. 25 Li sba xchaʼlikal jichʼil kadenae te xaxoj li ta chib snaklebtake sventa snit sba xchiʼuk li spakʼ snekebal mokankʼuʼile, taje jaʼ sventa xkom ta yeloval mokankʼuʼil li smak stiʼ oʼontonale. 26 Paso chib xotbil oro, te xanapʼan ta olon ta yut jujujot xchikin li smak stiʼ oʼontonale, skʼeloj chkom li mokankʼuʼile.+ 27 Paso chib xotajtik oro xtok ti bu tsnup sba li mokankʼuʼil xchiʼuk li xchuk ti jalbile, jaʼ xkaltik, ta yeloval li mokankʼuʼile, ta yolon li spakʼ snekebale, te chkom ta yakʼol li xchuk* ti jalbile.+ 28 Tuneso asul chʼojon sventa te xaxoj li ta xotajtik oro ta jujujot xchikin smak stiʼ oʼontonale xchiʼuk te xaxoj li ta xotajtik oro ti te oy li ta mokankʼuʼile, taje jaʼ sventa te chkom ta yakʼol jalbil chukil* li smak stiʼ oʼontonale xchiʼuk ta sba li mokankʼuʼile.

29 »Li ta smak stiʼ oʼontonal sventa chapanel ti te napʼal ta stiʼ yoʼonton li Aarone jaʼ te chichʼbe batel li sbi xnichʼnabtak Israele. Jech skʼan xichʼ batel kʼalal jaʼo ch-och li bu Chʼul sventa svulesobil ta jolil ta stojolal Jeovae. 30 Li Urim xchiʼuk Tumime*+ te xavakʼ ta smak stiʼ oʼontonal sventa chapanel sventa te napʼal batel ta stiʼ yoʼonton Aaron kʼalal ch-och batel ta stojolal Jeovae. Li kʼusitik tstunes Aaron sventa xchapan li j-israeletike te me oyuk-o ta stiʼ yoʼonton kʼalal te oy ta yeloval li Jeovae.

31 »Ta asul no xapas li jlik natil kʼuʼil+ ti muʼyuk skʼobe ti te chkom ta yut li mokankʼuʼile. 32 Skʼan xajombe sjol ta oʼlol. Ta sjoylejal li stiʼil bu chajome skʼan me jalbiluk yuʼun li jalkʼuʼile. Sventa mu xjate, jechuk xkom jech kʼuchaʼal li stiʼil smak bekʼtalile.* 33 Skʼan xapas kʼusitik ti xkoʼolaj ta granadaetik* li ta sjoylejal xpuxbenale, tuneso asul no, tsots* ti bonbil ta kuxul moradoe xchiʼuk kuxul tsajal pokʼ, jech xtok, paso kampanaetik ta oro ti tsjelulan sba xchiʼuk li granadaetike. 34 Ta sjoylejal xpuxbenal li natil kʼuʼil ti muʼyuk skʼobe akʼo sjelulan sba jujupʼej li kampana ta oroe xchiʼuk li granadae,* jpʼej kampana ta oro xchiʼuk jpʼej granada. 35 Jaʼ skʼan slap Aaron kʼalal tspas yabtele. Sventa mu xchame,+ skʼan stsʼinlajet yuʼun li kampanaetik kʼalal ch-och xchiʼuk kʼalal chlokʼ ta stojolal Jeova ti butik chʼule.

36 »Skʼan xapas jpechuk lamina ta batsʼi oro ti solel stsʼayayete xchiʼuk te xatsʼiba jech kʼuchaʼal kʼalal oy kʼusi chichʼ akʼbel seyoale: ‹Te likem ta stojolal Jeova li kʼusi chʼule›.+ 37 Li jpech laminae tsakano ta jlik asul chʼojon li ta stsʼotobil jolile;+ te komuk li ta yeloval stsʼotobil jolile. 38 Skʼan te napʼaluk-o ta stiba Aaron, yuʼun li Aarone jaʼ oy ta sba kʼalal oy buchʼu tspas smul ta stojolal li kʼusitik chʼule,+ jaʼ li kʼusitik chchʼultajesik li j-israeletik kʼalal chakʼik ta chʼul matanale. Skʼan te napʼaluk-o xkom ta stiba sventa lek x-ilatik yuʼun li Jeovae.

39 »Jalo ta lekil lino li kʼuʼil ti oy skuadroaltake, paso ta lekil lino li stsʼotobil jolile xchiʼuk jalo li jlik chukile.+

40 »Jech xtok, sventa li xnichʼnabtak Aarone+ paso kʼuʼil pokʼiletik, chukiletik xchiʼuk xpix sjolik yoʼ xichʼ-o albel smukʼulalik xchiʼuk sventa kʼupiluk sba xvinajik.+ 41 Jaʼ skʼan xavakʼbe slap li abankil Aaron xchiʼuk li xnichʼnabtak te xchiʼuke, skʼan xamalbe aseite ta sjolik,+ vaʼano ta paleetik*+ xchiʼuk chʼultajeso skotolik, yuʼun jech chtunik kuʼun ta paleal. 42 Jech xtok, sventa smak li sbekʼtalik ti tʼanale,+ pasbo xkʼox vexik ta lino, li snatile te chlik ta xchukbenalik* kʼalal to ta yoʼik. 43 Sventa mu sta smulik li Aaron xchiʼuk li xnichʼnabtak ti xuʼ xchamik-oe, akʼo slapik kʼalal ch-ochik ta karpana sventa tsobobbaile o kʼalal chnopajik li ta skajleb matanal sventa chtunik ti bu chʼule. Jaʼ jun mantal sbatel osil sventa li Aaron xchiʼuk li snitilulal ta tsʼakale.

29 »Xi skʼan xapas sventa xachʼultajes yoʼ xtunik kuʼun ta paleale: tsako jkotuk chʼiom tot vakax xchiʼuk chaʼkot tot chij ti muʼyuk xchopolile,+ 2 jech xtok, tsako pan ti muʼyuk slevaduraile,* set-set panetik ti muʼyuk slevadurail ti yichʼoj aseitee xchiʼuk jayal gayetaetik ti muʼyuk slevadurail ti bonbil ta aseitee.+ Paso ta s-arinail trigo ti lek nine. 3 Tikʼo ta moch xchiʼuk ichʼo tal ta jtojolal+ xchiʼuk li tot vakax xchiʼuk li chaʼkot tot chije.

4 »Li Aaron xchiʼuk xnichʼnabtake ikʼo tal ta yochebal karpana sventa tsobobbail+ xchiʼuk albo ti akʼo atinikuke.+ 5 Ichʼo tal li kʼuʼil pokʼiletike+ sventa xavakʼbe slap li Aarone. Akʼo slap li jlik kʼuʼil ti oy skuadroaltake, li natil kʼuʼil ti muʼyuk skʼob ti te chkom ta yut li mokankʼuʼile, li mokankʼuʼile, li smak stiʼ oʼontonale xchiʼuk tsinbo lek ta xchukbenal* li jalbil chukil*+ ti napʼal ta mokankʼuʼile. 6 Akʼbo ta sjol li stsʼotobil sjole. Jech xtok, te xavakʼbe ta sba stsʼotobil sjol+ li chʼul lamina pasbil ta oroe;* 7 tsako li aseite ti chtun kʼalal oy buchʼu chichʼ tʼujele,+ vaʼun malbo ta sjol+ sventa x-och ta paleal.

8 »Nopajesbo talel li xnichʼnabtak sventa xavakʼbe slap li kʼuʼil pokʼiletike,+ 9 chukbo ta xchʼutik li chukiletike, jech xapasbe li Aaron xchiʼuk xnichʼnabtake xchiʼuk akʼbo li xpix sjolike. Li abtelal ta paleale jaʼ jun mantal chkom-o sbatel osil ta stojolal li Aaron xchiʼuk xnichʼnabtake.+ Jaʼ jech skʼan xapas sventa xavaʼan yoʼ xtunik ta paleal li Aaron xchiʼuk xnichʼnabtake.*+

10 »Mi laje, ikʼo tal ta karpana sventa tsobobbail li tot vakaxe, vaʼun li Aaron xchiʼuk xnichʼnabtake akʼo yakʼ skʼobik ta sjol li tot vakaxe.+ 11 Li tot vakaxe te xamil ta stojolal Jeova, jaʼ li ta yochebal karpana sventa tsobobbaile.+ 12 Tsʼajo sniʼ akʼob ta xchʼichʼel tot vakax sventa xabonbe li xulubtak skajleb matanale.+ Li yan skomenal* chʼichʼe te xamal li ta snakleb skajleb matanale.+ 13 Tsakbo lokʼel skotol li xepuʼal+ sbikile, li xepuʼal sekube, li chib srinyone xchiʼuk li xepuʼal srinyontake, vaʼun chikʼo ta skajleb matanal sventa xtomet muyel xchʼailal.*+ 14 Pe li sbekʼtal tot vakaxe, li snukulil xchiʼuk li yikʼobale* skʼan xbat achikʼ leʼ to ta spat ti bu spasoj skarpanaike. Jaʼ jun matanal sventa mulil.

15 »Tsako tal jkotuk li tot chije, vaʼun te akʼo yakʼ skʼobik ta sjol tot chij li Aaron xchiʼuk xnichʼnabtake.+ 16 Milo li chije, tsakbo li xchʼichʼele, te xavijbe ta sjoyobal li skajleb matanale.+ 17 Bikʼtal bojilanbo li sbekʼtale, sapbo li sbikile+ xchiʼuk li yoʼtake. Mi laje, li jujutuchʼ sbekʼtale koʼol xachol xchiʼuk li sjole. 18 Chikʼo skotol, xtometuk muyel xchʼailal* li ta sba skajleb matanale. Jaʼ jun chikʼbil matanal sventa Jeova yoʼ lek xmuet li yikʼe.*+ Jaʼ jun matanal ti chichʼ chikʼel ta kʼokʼ sventa li Jeovae.

19 »Mi laje, tsako tal li yan tot chije, vaʼun te akʼo yakʼ skʼobik ta sjol chij li Aaron xchiʼuk xnichʼnabtake.+ 20 Milo li chije, tsakbo jutebuk li xchʼichʼele, vaʼun bonbo li ta svelvelul sbatsʼichikin li Aarone xchiʼuk te xabonbe li ta svelvelul sbatsʼichikin li xnichʼnabtake. Jech xtok, te xabonbe ta smeʼ sbatsʼikʼobik xchiʼuk ta smeʼ sbatsʼi-okik. Vaʼun, vijo ta sjoylejal xokon skajleb matanal li chʼichʼe. 21 Mi laje, tsako jutebuk li chʼichʼ te oy ta sba skajleb matanale xchiʼuk tsako jutebuk li aseite ti chtun kʼalal oy buchʼu chichʼ tʼujele,+ vaʼun vijbo li Aaron xchiʼuk skʼuʼ spokʼtake, jech xtok, vijbo li xnichʼnabtak xchiʼuk li skʼuʼ spokʼ xnichʼnabtake. Taje jaʼ sventa chʼul xkom xchiʼuk li skʼuʼ spokʼtake xchiʼuk jaʼ sventa chʼul xkom li xnichʼnabtak xchiʼuk skʼuʼ spokʼik eke.+

22 »Tsakbo skotol li xepuʼal+ tot chije, li sne ti bu mas jupʼeme, li xepuʼal sbikile, li xepuʼal sekube, li chib srinyone, li xepuʼal srinyontake xchiʼuk li sbatsʼi-oʼe, yuʼun jaʼ jkot tot chij ti chichʼ akʼel sventa chichʼ vaʼanel paleetike.+ 23 Tsako jpʼej pan xtok xchiʼuk jpech pan ti yichʼoj aseitee xchiʼuk jpechuk jayal gayeta ti te tikʼajtik ta xmochal li pan ti muʼyuk slevaduraile, jaʼ li moch te oy ta yeloval Jeovae. 24 Akʼbo skotol ta skʼob Aaron xchiʼuk ta skʼob li xnichʼnabtake, vaʼun yeʼilano ta jujujot sventa xkʼot ta yebil matanal ta stojolal Jeova. 25 Tsakbo lokʼel li ta skʼobike, vaʼun chikʼo li ta skajleb matanale yoʼ lek xmuet yikʼ* ta stojolal Jeova. Te xachikʼ ta sba li chikʼbil matanale. Jaʼ jun matanal ti chichʼ chikʼel ta kʼokʼ sventa li Jeovae.

26 »Tsakbo li stiʼ yoʼonton tot chij ti chichʼ akʼel sventa chichʼ vaʼanel paleetik+ ti chichʼ akʼel ta sbi Aarone. Yeʼilano ta jujujot sventa xkʼot ta yebil matanal ta stojolal Jeova, vaʼun jaʼ avuʼun chkʼot. 27 Chʼultajeso li stiʼ yoʼonton tot chij ti laj yichʼ akʼel ta yebil matanale xchiʼuk li yoʼ ti laj yichʼ akʼel ta yebil matanal ti kʼot ta chʼul matanale ti te laj yichʼ tsakel lokʼel li ta tot chij sventa chichʼ vaʼanel paleetike,+ jaʼ li chij laj yichʼ akʼel ta sventa Aaron xchiʼuk xnichʼnabtake. 28 Jaʼ chichʼik li Aaron xchiʼuk xnichʼnabtake, jaʼ jun mantal sbatel osil ti jech skʼan spasik li j-israeletike, yuʼun jaʼ jun chʼul matanal ti skʼan xakʼ li j-israeletike.+ Taje jaʼ li chʼul matanal chakʼbeik Jeova li j-israeletik ti chchʼakik lokʼel li ta milbil matanal sventa jun oʼontonal chakʼike.+

29 »Li chʼul kʼuʼil pokʼiletik+ ti jaʼ yuʼun Aarone jaʼ tstunesik li xnichʼnabtak+ chtal ta tsʼakal ti jaʼ chkʼot ta xkʼexol kʼalal mi laj yichʼik tʼujel xchiʼuk mi laj yichʼik vaʼanel ta paleale. 30 Li pale ti jaʼ xnichʼnabtak ti jaʼ chkom ta xkʼexol xchiʼuk ti ch-och ta karpana sventa tsobobbail sventa tspas yabtel ti bu chʼule vukub me kʼakʼal ta slap li kʼuʼil pokʼile.+

31 »Chatsak tal li tot chij ti chichʼ akʼel sventa chichʼ vaʼanel paleetike, vaʼun te xalakanbe sbekʼtal ti bu chʼule.+ 32 Li Aaron xchiʼuk xnichʼnabtake te akʼo stibeik li sbekʼtal tot chij+ ta yochebal karpana sventa tsobobbaile xchiʼuk te akʼo sveʼik li pan tikʼil ta moche. 33 Skʼan slajesik li kʼusitik tun sventa stael perton kʼalal laj yichʼik vaʼanel ta paleale* xchiʼuk ti chʼul komike. Pe mu me xuʼ slajes li buchʼu muʼyuk akʼbil permisoe,* yuʼun chʼul li kʼusitik taje.+ 34 Mi oy to kom sovrail ta yokʼomal li sbekʼtal tot chij ti chichʼ akʼel sventa chichʼ vaʼanel paleetike xchiʼuk li pane, skʼan me xachikʼ ta kʼokʼ.+ Mu me xichʼ lajesel, yuʼun chʼul li kʼusitik taje.

35 »Jech kʼuchaʼal laj kalbot mantale, jaʼ jech skʼan xapasbe li Aaron xchiʼuk xnichʼnabtake. Vukub kʼakʼal chichʼ avuʼun yoʼ xichʼik vaʼanel ta paleal.*+ 36 Jkot tot vakax skʼan xavakʼ jujun kʼakʼal sventa xkʼot ta matanal sventa stael perton. Jech xtok, sventa chʼul xkom li skajleb matanale, skʼan xavakʼ matanal sventa stael perton, vaʼun malbo aseite ta sba sventa chʼul xkom li skajleb matanale.+ 37 Vukub kʼakʼal skʼan xavakʼ li matanal sventa xlekub li skajleb matanale, skʼan xachʼultajes sventa toj echʼ xa noʼox chʼul xkʼot li skajleb matanale.+ Skotol li buchʼu tspik li skajleb matanale skʼan me chʼuluk.

38 »Li kʼusitik skʼan xavakʼ ta skajleb matanal jujun kʼakʼale jaʼ liʼe: chaʼkot tot chij ti jun to jabil yichʼoje. Jech-o xapasilan.+ 39 Jaʼ ta sob xavakʼ li baʼyel chʼiom tot chije, li jkot xtok une jaʼ to xavakʼ kʼalal chʼayem xa ox batel kʼakʼale.*+ 40 Li baʼyel chʼiom tot chije jmoj xavakʼ xchiʼuk jvokʼ ta lajunvokʼ jun efa* arina ti lek nin ti kapbil ta jutuk mu jun litro* pukʼbil aseitee, jech xtok, jmoj xavakʼ xchiʼuk jutuk mu jun litro matanal vino. 41 Li xchaʼkotal chʼiom tot chije chavakʼ kʼalal chʼayem xa ox batel kʼakʼale,* jmoj xavakʼ xtok xchiʼuk li sat tsʼunobile xchiʼuk li matanal vinoe. Jech xapas kʼuchaʼal la apas ta sobe. Jaʼ jun matanal chavakʼ ti lek xmuet yikʼe.* Jaʼ jun matanal ti chichʼ chikʼel ta kʼokʼ sventa li Jeovae. 42 Skotol li jaykʼol kuxlejal chtal avuʼunik ta tsʼakale skʼan me nopolik noʼox xakʼik li chikʼbil matanale, te chakʼik ta stojolal Jeova li ta yochebal karpana sventa tsobobbail ti bu chkakʼ jba ta ilel ta atojolalik sventa jchiʼinot ta loʼil.+

43 »Te chkakʼ jba ta ilel ta stojolal li j-israeletike. Jech xtok, ti bu chkakʼ jba ta ilele chʼultajesbil chkom ta skoj li jmukʼulale.+ 44 Ta jchʼultajes li karpana sventa tsobobbaile xchiʼuk li skajleb matanale, ta jchʼultajes li Aaron xchiʼuk xnichʼnabtak+ sventa xtunik kuʼun ta paleale. 45 Te ta jchiʼinik ta naklej* li jteklum Israele xchiʼuk voʼon chikʼot ta Sdiosik.+ 46 Jpʼel skʼoplal tsnaʼik ti voʼon Jeova Diosun yuʼunike ti la jlokʼesik ta yosilal Ejipto sventa te jchiʼinik ta nakleje.+ Voʼon Jeova Diosun yuʼunik.

30 »Paso jun skajleb matanal ti bu xuʼ xachikʼ pome,+ ta akasia teʼ xapas.+ 2 Kuadrado xapas, jun xukʼubil* snatil, jun xukʼubil sjamlej xchiʼuk chib xukʼubil li stayleje. Li xulubtake jmoj snitoj sba xapas xchiʼuk li skajleb matanale.+ 3 Skʼan xapix ta batsʼi oro li sbae, li xokontake xchiʼuk li xulubtake; skʼan xapasbe xnichimal ta sjoyobal, ta oro xapas. 4 Li ta jujujot xokon skajleb matanale pasbo chib xotbil oro ta yolon li xnichimale, li xotbil oroe jaʼ sventa te xichʼ xojel ochel li steʼeltak yoʼ xichʼ kuchel batele. 5 Ta akasia teʼ xapasbe li steʼeltake xchiʼuk pixo ta oro. 6 Te xavakʼ ta yeloval kortina ti bu nopol oy li xkaxail Mantale,*+ te xavakʼ ta stukʼil li xkaxail Mantal xchiʼuk smake, jaʼ ti bu chkakʼ jba ta ilel ta atojolale.+

7 »Li Aarone+ te+ akʼo xchikʼ pom ti oy sperfumeale+ sventa xtometuk muyel xchʼailal* yuʼun ta skajleb matanal kʼalal jaʼo chchapan jujun sob li kantiletike.+ 8 Li Aarone jaʼo chchikʼ pom kʼalal tstsan kantiletik mi chʼayem xa ox batel kʼakʼale.* Jaʼ jun matanal pom ti nopajtik noʼox chichʼ akʼel ta stojolal Jeova ti jaykʼol kuxlejal chtal avuʼunik ta tsʼakale. 9 Mu me teuk xavakʼik yan pom mi muʼyuk akʼbil permiso chichʼ akʼele,+ mi jaʼuk xuʼ te xavakʼik chikʼbil matanal, mi jaʼuk matanal sat tsʼunobiletik, jech xtok, mu me teuk xamalik matanal vino. 10 Li Aarone jun velta ta jabil+ skʼan stunes jutebuk li xchʼichʼel milbil matanal sventa mulile+ sventa te xakʼ ta xulubtak skajleb matanal sventa xchikʼobil pom yoʼ sakuk xkome. Taje jkoj ta jabil jech tspas ti jaykʼol kuxlejal chtal avuʼunik ta tsʼakale. Toj echʼ xa noʼox chʼul ta sventa Jeova».

11 Li Jeovae xi laj yalbe li Moisese: 12 «Jujun velta kʼalal chapas senso xchiʼuk chachap li xnichʼnabtak Israele,+ ta jujuntal skʼan spoj xkuxlejalik ta stojolal Jeova kʼalal jaʼo chichʼ pasel li sensoe. Ti jech tspasike jaʼ sventa mu xtal svokolik kʼalal mi laj yichʼ tsakbel sbiike. 13 Liʼe jaʼ li kʼusitik skʼan xakʼik li buchʼutik chichʼ tsakbel sbiike: j-oʼlol siklo* plata, jaʼ ti kʼu yepal yalal jujun siklo ti bu chʼule.+ Li 20 guerae* jaʼ jun siklo. Li j-oʼlol sikloe jaʼ li kʼu yepal chichʼ akʼbel Jeovae.+ 14 Skʼan me jech yepal xakʼik li matanal yuʼun Jeova skotol li buchʼutik chichʼ tsakbel sbiik ti 20 o ti mas ta 20 jabil yichʼojike.+ 15 Maʼuk ti jaʼ xa x-echʼ ta j-oʼlol siklo* skʼan xakʼ li buchʼu jkʼuleje o ti jaʼ xa mu sta j-oʼlol siklo skʼan xakʼ li buchʼu povree. J-oʼlol siklo plata skʼan xakʼbeik Jeova sventa spoj li xkuxlejalike. 16 Li plata takʼin chakʼ j-israeletik sventa li stael pertone skʼan xatsob yoʼ xichʼ tunesel li ta abtelaletik chichʼ pasel ta karpana sventa tsobobbaile, ti jech chichʼ pasele jaʼ chtun sventa svulesobil ta sjol Jeova yoʼ stabeik sbalil li j-israeletike».

17 Xi to albat yuʼun Jeova li Moisese: 18 «Paso junuk perol ta kovre xchiʼuk pasbo snakleb,+ te xavakʼ ta oʼlol yuʼunik li skajleb matanal xchiʼuk li karpana sventa tsobobbaile. Nojeso ta voʼ.+ 19 Jaʼ te akʼo spok yakanik xchiʼuk skʼobik+ li Aaron xchiʼuk xnichʼnabtake. 20 Sventa mu xchamik kʼalal ch-ochik li ta karpana sventa tsobobbaile o kʼalal chnopajik batel sventa tspas yabtelik li ta skajleb matanale xchiʼuk kʼalal chakʼik chikʼbil matanal ti xtomet muyel xchʼailal* ta stojolal li Jeovae, skʼan spok sbaik ta voʼ. 21 Skʼan spok yakanik xchiʼuk skʼobik sventa mu xchamik. Jaʼ jun mantal sbatel osil chkom ta stojolal Aaron xchiʼuk snitilulal ti jaykʼol kuxlejal chtal yuʼunik ta tsʼakale».+

22 Xi to albat yuʼun Jeova li Moisese: 23 «Ta tsʼakale, tsako li perfumeetik ti mas lekike: voʼob sien siklo yijubem mirra, 250 siklo kanela ti mu tajek yikʼe, 250 siklo kalamo tsʼiʼlel ti mu tajek yikʼe 24 xchiʼuk voʼob sien siklo kasia teʼ, jaʼ jech xapʼis ti kʼu yepal yalal jujun siklo ti bu chʼule.+ Jech xtok, tsako jutuk mu chanibuk litro* s-aseiteal oliva. 25 Skotol taje paso ta chʼul aseite ti chtun kʼalal oy buchʼu chichʼ tʼujele; lekuk me kapbil xkom.*+ Kʼotuk avuʼun ta chʼul aseite ti chtun kʼalal oy buchʼu chichʼ tʼujele.

26 »Akʼbo chʼul aseite ta sba li karpana sventa tsobobbaile+ xchiʼuk li xkaxail Mantal* ti te oy ta yute, 27 jech xtok, vijbo aseite li mexa xchiʼuk skotol kʼusitik te chtune, li kandelero xchiʼuk skotol kʼusitik te chtune, li skajleb matanal sventa xchikʼobil pome, 28 li skajleb chikʼbil matanal xchiʼuk skotol kʼusitik te chtune xchiʼuk li perol xchiʼuk snaklebe. 29 Skʼan xachʼultajes skotol sventa toj echʼ xa noʼox chʼul xkom.+ Skotol li buchʼu tspik li kʼusitik taje skʼan me chʼulikuk.+ 30 Tuneso li aseite sventa xatʼuj li Aaron+ xchiʼuk li xnichʼnabtake+ xchiʼuk chʼultajeso sventa xtunik kuʼun ta paleal.+

31 »Chiʼino ta loʼil li j-israeletike, xi xavalbe yaʼiike: ‹Chʼuluk-o me xkom ta jtojolal li aseite ti chtun kʼalal oy buchʼu chichʼ tʼujele, jech-o komuk ti jaykʼol kuxlejal chtal avuʼunik ta tsʼakale.+ 32 Mu me xavakʼbeik ta sbekʼtal junuk krixchano xchiʼuk mu me xameltsanik yan aseite jech kʼuchaʼal liʼe, yuʼun jaʼ chʼul aseite. Chʼuluk-o skʼoplal xkom avuʼunik. 33 Mi oy buchʼu tspas jtosuk aseite ti oy sperfumeal jech kʼuchaʼal liʼe xchiʼuk ti chakʼbe ta sbekʼtal junuk krixchano ti muʼyuk akʼbil permiso chichʼe,* skʼan xichʼ milel li ta steklumale›».+

34 Vaʼun, xi albat yuʼun Jeova li Moisese: «Koʼol yepal xatsak li perfumeetik liʼe:+ jtsʼujuk muil xuchʼ, unya teʼ ti mu yikʼe, galbano ti oy sperfumeale xchiʼuk batsʼi sakil pom.* 35 Paso ta pom;+ lek me xakap* skotol li muil tsʼiʼleletike xchiʼuk akʼbo lek atsʼam,+ taje jaʼ sventa lekuk sak xchiʼuk chʼuluk xkom li pome. 36 Lek xanoy jlomuk jaʼ to mi nin xa kome xchiʼuk te xavakʼ jlomuk li ta yeloval xkaxail Mantal ti te oy ta karpana sventa tsobobbaile, jaʼ ti bu chkakʼ jba ta ilel ta atojolale. Skʼan me toj echʼ xa noʼox chʼul xavilik. 37 Ti vaʼ yelan skap li kʼusitik taje mu me xapas ta apom atukik.+ Teuk me ta ajolik ti chʼul chil li Jeovae. 38 Mi oy buchʼu la spas jtosuk ti xkoʼolaj kʼuchaʼal li pom taje ti tskʼan tskʼupinbe li smuil yikʼe, skʼan me xichʼ milel li ta steklumale».

31 Li Jeovae xi to laj yalbe li Moisese: 2 «Kʼelavil, laj xa jtʼuj* Besalel+ ti jaʼ xnichʼon Uri xchiʼuk ti jaʼ smom Ur ti te likem talel li ta jchop snitilulal Judae.+ 3 Ta jnojes ta s-espiritu Dios, chkakʼbe spʼijil, chlik yaʼibe smelolal kuʼun xchiʼuk chojtikin lek kʼuxi ta pasel kʼusiuk noʼox pʼijil abtelal, 4 sventa xlokʼtaj yuʼun kʼusitik ti kʼupilik sba tajek xvinaje, sventa xabtelan oro, plata, kovre, 5 sventa set xchiʼuk xakʼbe snakleb tonetik+ xchiʼuk sventa spas yuʼun kʼusiuk noʼox ta teʼetik.+ 6 Sventa oyuk buchʼu xuʼ xkoltaate, laj xa jtʼuj Ooliab+ ti jaʼ xnichʼon Aisamak ti te likem talel li ta jchop snitilulal Dane. Jech xtok, sventa spas yuʼunik skotol li kʼusitik laj xa kalbot xapase,+ yakal chkakʼbe spʼijil yoʼontonik skotol li buchʼutik lek xtojobike.* 7 Jaʼ tspasik li karpana sventa tsobobbaile,+ li xkaxail Mantal*+ xchiʼuk li smak+ te oy ta sbae, skotol li kʼusitik chtun ta karpanae, 8 li mexa+ xchiʼuk kʼusitik te chtune, li kandelero pasbil ta batsʼi oro xchiʼuk skotol li kʼusitik te chtune,+ li skajleb matanal sventa xchikʼobil pome,+ 9 li skajleb chikʼbil matanal+ xchiʼuk skotol li kʼusitik te chtune, li perol xchiʼuk snaklebe,+ 10 li lekil jalbil kʼuʼil pokʼiletike, li chʼul kʼuʼil pokʼiletik sventa li pale Aarone, li kʼuʼil pokʼiletik sventa xnichʼnab yoʼ xtunik ta paleale,+ 11 li aseite ti chtun kʼalal oy buchʼu chichʼ tʼujele xchiʼuk li pom ti oy sperfumeal ti te chichʼ tunesel ti bu chʼule.+ Jaʼ tspasik skotol ti kʼu yelan laj xa kalbot mantale».

12 Xi to albat yuʼun Jeova li Moisese: 13 «Chiʼino ta loʼil li j-israeletike, xi xavalanbee: ‹Jaʼ tsots skʼoplal skʼan xachabiik li savado kuʼune,+ yuʼun jaʼ senyail chkom kuʼun xchiʼuk voʼoxuk ti jaykʼol kuxlejal chtal avuʼunik ta tsʼakale sventa xanaʼik ti voʼon Jeova ti yakal ta jchʼultajesoxuke. 14 Skʼan me xachabiik li savadoe, yuʼun toj chʼul ta atojolalik.+ Buchʼuuk noʼox ti tsokesbe skʼoplale skʼan xichʼ milel. Mi oy buchʼu ch-abtej li vaʼ kʼakʼale, skʼan xichʼ milel li ta steklumale.+ 15 Vakib kʼakʼal xuʼ xa-abtejik, pe li ta svukubal kʼakʼale jaʼ jun savado sventa xakux lek avoʼontonik.+ Chʼul ta stojolal li Jeovae. Skʼan xichʼ milel li buchʼu ch-abtej ta savadoe. 16 Skʼan xchabiik savado li j-israeletike; li jaykʼol kuxlejal chtal avuʼunik ta tsʼakale skʼan xchabiik li savadoe. Jaʼ jun trato sbatel osil. 17 Jaʼ senyail sbatel osil chkom kuʼun xchiʼuk li jteklum Israele,+ yuʼun ta vakib noʼox kʼakʼal la spas vinajel xchiʼuk balumil li Jeovae. Li ta svukubal kʼakʼale laj yikta yabtel xchiʼuk la xkux›».+

18 Kʼalal naka noʼox laj yoʼonton ta xchiʼinel ta loʼil Moises li ta vits Sinaie, laj yakʼbe li chaʼpech tone,*+ jaʼ li chaʼpech ton ti ta sniʼ skʼob stuk Dios la stsʼibae.+

32 Li jteklume laj yakʼ venta ti jalij xa tajek ta vits li Moisese.+ Jaʼ yuʼun, la stsob sbaik ta stojolal li Aarone, xi laj yalbeike: «Likan, pasbunkutik jun jdioskutik sventa jaʼuk jbabe xbat kuʼunkutik.+ Yuʼun mu jnaʼtik kʼusi kʼot ta pasel ta stojolal li Moises ti la slokʼesutik talel ta yosilal Ejiptoe». 2 Jech oxal, li Aarone xi laj yalanbee: «Tsobik xchiʼuk ichʼbeikun talel li s-areteal xchikin avajnilik ti pasbil ta oroe,+ li s-areteal xchikin akeremik xchiʼuk li s-areteal xchikin atsebike». 3 Li jteklume lik slokʼes li s-areteal xchikinik pasbil ta oroe, vaʼun laj yichʼbeik batel li Aarone. 4 La stsak li oro ti laj yakʼ jteklume, la stunes jun sinsel, vaʼun laj yunijes sventa spas ta slokʼol jkot chʼiom tot vakax.+ Xi lik yalike: «Israel, jaʼ me Adios liʼ une, jaʼ ti la slokʼesot talel ta yosilal Ejiptoe».+

5 Kʼalal jech laj yil li Aarone, lik spas jun skajleb matanal ta yeloval li lokʼole. Xi tsots laj yal li Aarone: «Ta jpastik jun kʼin ta stojolal Jeova li okʼome». 6 Sob likik li ta yokʼomale, lik yakʼik chikʼbil matanal xchiʼuk milbil matanal sventa jun oʼontonal. Laje, chotiik ta veʼel, ta uchʼbolajel, jech lik xchʼay yoʼontonik.+

7 Xi albat yuʼun Jeova li Moisese: «Batan, yalan batel, yuʼun sok xa li ateklumal la alokʼes tal ta yosilal Ejiptoe.+ 8 Anil laj yiktaik li be ti bu laj kalbeik ti akʼo te xbatike.+ La spasik slokʼol jkot chʼiom tot vakax ta unijesbil takʼin, te yakal tsnijan sbaik ta stojolal, chakʼbeik milbil matanal xchiʼuk xi chalike: ‹Israel, jaʼ me Adios liʼ une, jaʼ ti la slokʼesot talel ta yosilal Ejiptoe›». 9 Xi to albat yuʼun Jeova li Moisese: «Kiloj xa ti tsots yoʼonton* li jteklum liʼe.+ 10 Jaʼ yuʼun, li avie akʼbun jlajesbeik skʼoplal ta skʼakʼal koʼonton xchiʼuk voʼot xa chkakʼ kʼotan ta jun mukʼta lum».+

11 Li Moisese xi la skʼunibtasbe yoʼonton li Jeova Dios yuʼune:+ «Kajval Jeova, ¿kʼu yuʼun ti chlik skʼakʼal avoʼonton ta stojolal li ateklumal ti voʼot la alokʼes tal ta ajuʼel xchiʼuk ta stsatsal akʼob li ta yosilal Ejiptoe?+ 12 ¿Kʼu yuʼun ti xi chal avuʼun li j-ejiptoetike: ‹Yuʼun chopol kʼusi snopoj kʼalal ay spoj lokʼele. Tskʼan tsmil li ta vitstikaltike xchiʼuk tskʼan stupʼbe skʼoplal liʼ ta sba balumile?›.+ Lajuk li skʼakʼal avoʼontone, chaʼnopbo skʼoplal* ti anopoj chavakʼ talel vokolil ta stojolal li ateklumale. 13 Vuleso ta ajol li avajtunel Abraan, Isaak xchiʼuk Israele, jaʼ li buchʼutik xi laj avakʼbe ave ta melele: ‹Chkepajes li anitilulale, jech yepal chbat kʼuchaʼal li kʼanaletik ta vinajele+ xchiʼuk chkakʼbe anitilulal skotol li lumetik ti kaloj chkakʼbeik sventa xuʼuninik-o sbatel osile›».+

14 Jaʼ yuʼun, li Jeovae la xchaʼnopbe skʼoplal* li vokolil yaloj chakʼ talel ta stojolal li steklumale.+

15 Sut talel ta vits li Moisese, te stsakoj yalel+ li chaʼpech tone.*+ Li chaʼpech tone tsʼibabil ta xchaʼjotal; tsʼibabil ta yeloval xchiʼuk ta spat. 16 Jaʼ yabtel Dios li chaʼpech tone xchiʼuk jaʼ stsʼib Dios li kʼusi te tsʼibabil ta chaʼpech tone.+ 17 Kʼalal laj yaʼi Josue ti x-avetik noʼox li jteklume, xi laj yalbe li Moisese: «Tsots tajek ch-avanik chkaʼi ta skoj paskʼop yoʼ bu oy li karpanaetike». 18 Pe xi laj yal li Moisese:

«Maʼuk ch-avanik-o ta skoj ti kuch yuʼunik paskʼope

xchiʼuk maʼuk ch-avanik-o ta skoj ti laj yichʼik

tsalele;

yan-o yaʼeluk ti kʼu yelan x-avetik ta kʼejimole».

19 Kʼalal nopaj batel Moises yoʼ bu oy li karpanaetik xchiʼuk kʼalal laj yil li jkot chʼiom tot vakax+ xchiʼuk ti ch-akʼotajike, tsan tajek skʼakʼal yoʼonton. Jaʼ yuʼun, la sjip yalel li pechpech tonetike xchiʼuk te la xvochʼ li ta yok vitse.+ 20 La stsak li jkot chʼiom tot vakax spasojike, la xchikʼ ta kʼokʼ, tee la xvochʼ ta jyalel jaʼ to ti kʼuxi tan xa kom yuʼune.+ La svij batel ta ba voʼ xchiʼuk jaʼ laj yakʼbe yuchʼ li j-israeletike.+ 21 Xi albat yuʼun Moises li Aarone: «¿Kʼusi la spasbot li jteklum ti jech tsots smul la sta avuʼune?». 22 Xi la stakʼ li Aarone: «Mu xlik skʼakʼal avoʼonton, kajval. Anaʼoj onoʼox lek ti jaʼ batem ta yoʼontonik spasel kʼusi chopol li jteklume.+ 23 Jaʼ yuʼun, xi laj yalbeikune: ‹Pasbunkutik jun jdioskutik sventa jaʼuk jbabe xbat kuʼunkutik. Yuʼun mu jnaʼtik kʼusi kʼot ta pasel ta stojolal li Moises ti la slokʼesutik talel ta yosilal Ejiptoe›.+ 24 Jech oxal, xi laj kalbeike: ‹Buchʼuuk noʼox ti oy s-oroe lokʼesik, vaʼun ichʼbeikun talel›. La jip ochel ta kʼokʼ, vaʼun lokʼ talel li chʼiom tot vakax liʼe».

25 Li Moisese laj yakʼ venta ti mu xa stakʼik pajtsanel li jteklume, yuʼun kolemik noʼox yuʼun li Aarone, jaʼ yuʼun kʼexlal kʼotik ta sat li yajkontraike. 26 Li Moisese te vaʼi li ta yochebal karpanaetike, xi laj yale: «¡Akʼo taluk ta jtojolal+ li buchʼu koʼol yoʼonton xchiʼuk li Jeovae!». Jech te la stsob sbaik ta stojolal Moises skotol li jlevietike. 27 Xi laj yalanbee: «Xi yaloj Jeova ti jaʼ Dios yuʼun li Israele: ‹Chukino a-espadaik ta jujuntal xchiʼuk xanik ta sjunul li karpanaetike, te xa-echʼik li ta jujun stiʼe, vaʼun milik komel li achiʼilik ta vokʼele, li alakʼnaike xchiʼuk li buchʼu lek xakʼopon aba achiʼukike›».+ 28 Li jlevietike la xchʼunik li kʼusi laj yal Moisese. Jech oxal, li vaʼ kʼakʼale oxmil viniketik chamik. 29 Xi laj yal li Moisese: «Vokʼo abaik* sventa Jeova li avie, yuʼun ta jujuntal la akontrainik li anichʼonike xchiʼuk li achiʼilik ta vokʼele;+ chakʼboxuk bendision li avie».+

30 Li ta yokʼomale, xi albatik yuʼun Moises li jteklume: «Tsots amul la apasik, jech oxal li avie chimuy batel ta stojolal Jeova sventa jkʼel mi oy kʼusi xuʼ jpas yoʼ jkʼan parte ta atojolalik ta skoj li amulike».+ 31 Sut batel ta stojolal Jeova li Moisese, xi laj yalbee: «¡Toj tsots xa noʼox smul la spas li jteklume! ¡La spas jun sdiosik ta oro!+ 32 Mi jech oy ta avoʼontone, akʼo ta perton li smulike,+ yan mi moʼoje, avokoluk tupʼo li jbi te atsʼibaoj ta alivroe».+ 33 Pe li Jeovae xi laj yalbe li Moisese: «Jaʼ noʼox ta jtupʼbe sbi ta jlivro li buchʼu la saʼ smul ta jtojolale. 34 Batan ta ora, ikʼo batel li jteklum ti bu laj kalbote. Jaʼ jbabe chbat avuʼun li kaj-anjele;+ mi la sta skʼakʼalil ta jchapanike, jaʼ to te chkakʼbeik kastigo ta skoj li smulike». 35 Li Jeovae lik yakʼbe svokol jteklum ta skoj ti la spasik li chʼiom tot vakax ti jaʼ la spas li Aarone.

33 Li Jeovae xi to laj yalbe li Moisese: «Lokʼan batel liʼe, ikʼo batel li jteklum ti la alokʼes ta yosilal Ejiptoe. Te xabat li ta osil ti xi laj kakʼ ke ta stojolal li Abraan, Isaak xchiʼuk Jakobe: ‹Jaʼ chkakʼbe anitilulal›.+ 2 Ta jtak talel jun anjel sventa jaʼ jbabe xbat avuʼunik,+ vaʼun ta jnuts lokʼel li jkanaanetike, li j-amorreoetike, li j-etetike, li jperisitaetike, li j-eveoetike xchiʼuk li jebusetike.+ 3 Muyan batel ta jun balumil ti bu oy lek leche xchiʼuk pome.+ Yan li voʼone muʼyuk ta jchiʼinoxuk batel, yuʼun jaʼoxuk jun jteklum ti tsots avoʼontonike*+ xchiʼuk yikʼal te noʼox jmiloxuk ta be».+

4 Kʼalal laj yaʼi jteklum ti vaʼ yelan tsots kʼoponatike, laj yat tajek yoʼontonik xchiʼuk muʼyuk xa buchʼu la stunes aniyo, arete o yan kʼusitik. 5 Li Jeovae xi laj yalbe li Moisese: «Xi xavalbe li j-israeletike: ‹Jaʼoxuk jun jteklum ti tsots avoʼontonike.*+ Ta anil noʼox xuʼ xibat ta atojolalik ti jechuke xchiʼuk ta jmiloxuk.+ Pe yoʼ to ta jnop kʼusi ta jpasboxuke, mu to xavakʼ avaniyoik, avareteik o yan kʼusitik›». 6 Jaʼ yuʼun, li j-israeletike muʼyuk xa la stunesik* aniyo, arete o yan kʼusitik ti kʼalal lokʼik ta vits Orebe.

7 Vaʼun, li Moisese la slokʼes batel li skarpanae, te kʼuk snamal bat yakʼ ti bu oy skarpana li j-israeletike. Karpana sventa tsobobbail laj yakʼbe sbi. Mi oy buchʼu oy kʼusi tskʼan tsjakʼbe li Jeovae,+ persa chbat li ta karpana sventa tsobobbaile ti te kʼuk snamal yiloj ti bu spasoj skarpanaike. 8 Kʼalal naka noʼox chlokʼ batel sventa chbat ta karpana li Moisese, chlik sjunul li jteklume xchiʼuk te tsvaʼan sbaik ta yochebal skarpanaik, te skʼelojik-o batel Moises jaʼ to ti kʼuxi ch-och ta karpanae. 9 Kʼalal naka noʼox ch-och ta karpana li Moisese, chyal talel li jvol toke*+ xchiʼuk te chkom ta yochebal karpana kʼalal te chchiʼin sbaik ta loʼil xchiʼuk Dios li Moisese.+ 10 Kʼalal chil sjunul jteklum ti te oy ta yochebal karpana li jvol toke,* chlik skotolik xchiʼuk te tsnijan sbaik ta yochebal skarpanaik. 11 Kʼalal chchiʼinat ta loʼil yuʼun Jeova li Moisese, skʼelojbe sba satik+ jech kʼuchaʼal kʼalal chchiʼin sbaik ta loʼil chaʼvoʼ viniketike. Kʼalal tsut batel Moises yoʼ bu spasoj skarpanaik li j-israeletike, li yajtunel+ ti jaʼ Josue+ ti jaʼ xnichʼon li Nune te chkom li ta karpana sventa tsobobbaile.

12 Li Moisese xi laj yalbe li Jeovae: «Xi chavalbune: ‹Ikʼo batel li jteklume›, pe muʼyuk avalojbun buchʼu chatak batel jchiʼin. Jech xtok, xi avaloje: ‹Xakojtikin lek ta abi* xchiʼuk lek chakilot›. 13 Mi lek chavilune chaʼa, avokoluk, akʼbun kil li beetik avuʼune+ sventa xkojtikinot xchiʼuk sventa jechuk-o lek xavilune. Tsako ta venta xtok ti jaʼ ateklumal li lum liʼe».+ 14 Jech oxal, xi takʼbate: «Voʼon jtuk* chbat jchiʼinot+ xchiʼuk chkakʼ akux avoʼonton».+ 15 Xi laj yal li Moisese: «Mi muʼyuk chachiʼinunkutik batele, mu xalokʼesunkutik batel liʼe. 16 ¿Kʼuxi tsnaʼik yantik ti lek chavilune xchiʼuk ti lek chavil li ateklumale? ¿Mi mu jaʼuk te tsnaʼik kʼalal chbat achiʼinunkutike+ sventa jelel xikʼotkutik xchiʼuk li ateklumal ta stojolal li yan jteklumetik ta spʼejel balumile?».+

17 Li Jeovae xi laj yalbe li Moisese: «Ta jpas xtok li kʼusi chakʼanbune, yuʼun lek chkilot xchiʼuk xakojtikin lek ta abi». 18 Xi laj yal li Moisese: «Avokoluk, akʼbun kil li amukʼulale». 19 Pe xi takʼbate: «Te chijelav ti bu oyote, chavakʼ venta ti lek koʼontone. Jamal chkal ti Jeova jbie+ xchiʼuk chkakʼbe ta ilel slekil koʼonton xchiʼuk ta jkʼuxubin li buchʼu ta jkʼan ta jkʼuxubine».+ 20 Xi to albate: «Mu stakʼ xakʼel li jsate, yuʼun mi junuk krixchano chkuxi mi laj yil li jsate».

21 Xi to albat yuʼun li Jeovae: «Xokol liʼ ta jtsʼele. Te xavakʼ aba li ta sba tone. 22 Kʼalal mi lijelav xchiʼuk jmukʼulale, ta jtikʼot ochel ta japton xchiʼuk ta jmakot ta jkʼob jaʼ to mi lijelav batele. 23 Laje, ta jlokʼes li jkʼobe sventa xavil li jpate, yuʼun mu stakʼ kʼelel li jsate».+

34 Vaʼun, xi albat yuʼun Jeova li Moisese: «Meltsano chaʼpechuk ton jech kʼuchaʼal li ta baʼyele,+ te ta jtsʼiba li kʼusitik te toʼox tsʼibabil li ta baʼyel chaʼpech ton+ ti la avochʼe.+ 2 Chapano aba sventa okʼom, yuʼun li sob okʼome chamuy talel li ta vits Sinaie xchiʼuk te chkʼot avakʼ aba ta jtojolal li ta jol vitse.+ 3 Pe mu me buchʼu xachiʼin muyel xchiʼuk skʼan me muʼyukuk buchʼu te oy ta sjoylejal li vitse. Jech xtok, mu me stakʼ te xveʼ chijetik xchiʼuk vakaxetik li ta yeloval vitse».+

4 Li Moisese la smeltsan chaʼpech ton jech kʼuchaʼal li ta baʼyele. Sob xa tajek lik ta yokʼomal sventa xmuy batel ta vits Sinai jech kʼuchaʼal albat mantal yuʼun li Jeovae, te yichʼoj batel ta skʼob li chaʼpech tone. 5 Li Jeovae te kʼot ta tok kʼalal yal tale,+ te kʼot yoʼ bu oy li Moisese, vaʼun li Jeovae lik yalbe skʼoplal li sbie.+ 6 Li Jeovae te lik echʼuk ta yeloval li Moisese xchiʼuk xi chale: «Jeova, Jeova, jaʼ jun Dios ti oy xkʼuxul yoʼontone,+ oy slekil yoʼonton,+ mu ta aniluk chlik skʼakʼal yoʼonton,+ ep tukʼil kʼanelal* yuʼun+ xchiʼuk melel snaʼ xkʼopoj.*+ 7 Ta smilal noʼox buchʼu chakʼbe ta ilel tukʼil kʼanelal,+ chakʼ ta perton li buchʼu oy kʼusi chopol tspase, li buchʼu mu xchʼun mantale+ xchiʼuk li buchʼu tsaʼ smule, pe maʼuk ti te noʼox skʼeloj ti muʼyuk chakʼbe kastigo li buchʼu oy smule.+ Jech xtok, chakʼbe kastigo nichʼonil ta skoj smul li totile, chakʼbe kastigo li momile, chakʼbe kastigo kʼalal to ta yoxkʼolal xchiʼuk xchankʼolal kuxlejal».+

8 Li Moisese ta anil la snijan sba ta lumtik xchiʼuk la skejan spatan sba. 9 Vaʼun xi laj yale: «Li avi une, mi lek chavilune, Kajval Jeova, bat chiʼinunkutik,+ avokoluk, Jeova, akʼo mi jaʼunkutik jun jteklum ti tsots koʼontonkutike.*+ Akʼo ta perton xtok li kʼusi chopol ta jpaskutike,+ li jmulkutike xchiʼuk jaʼuk xa noʼox avuʼun xikomkutik». 10 Xi takʼbate: «Kʼelavil ti yakal ta jpas jun tratoe: yan to sba yutsil kʼusitik ta jpas ta stojolal sjunul li ateklumale, muʼyuk bu jech-o jpasoj ta spʼejel balumil o ta stojolal skotol li yantik lume.+ Chilbeik yabtel Jeova skotol li jteklum te achiʼuk ta nakleje, yuʼun labalik sba tajek li kʼusitik yakal ta jpas ta atojolalike.+

11 »Lek me xatsʼet chikinta li kʼusi yakal chkalbot avie.+ Ta jnuts lokʼel ta atojolal li j-amorreoetike, li jkanaanetike, li j-etetike, li jperisitaetike, li j-eveoetike xchiʼuk li jebusetike.+ 12 Pe pʼijan me ti mu xapas trato xchiʼuk li jnaklejetik li ta lum bu chabate,+ yuʼun mi moʼoje chkʼot kʼuchaʼal chʼojon ta atojolal.+ 13 Skʼan me xajinesbe li skajleb matanaletik yuʼunike, skʼan xalilin li vaʼanbil chʼul ton yuʼunike xchiʼuk skʼan xakʼas li chʼul posteetik* yuʼunike.+ 14 Mu me xanijan aba ta stojolal yan dios,+ yuʼun li Jeovae ojtikinbil ti stuk noʼox tskʼan ichʼel ta mukʼe.* Ta melel, jaʼ jun Dios ti stuk noʼox tskʼan ichʼel ta mukʼe.+ 15 Pʼijan me ti mu xapas trato xchiʼuk li jnaklejetik ta osile, yuʼun kʼalal chmulivajik xchiʼuk li sdiosike xchiʼuk kʼalal chakʼbeik milbil matanal li sdiosike,+ oy buchʼu tstakot ta ikʼel, vaʼun chlik alajes li kʼusi laj yakʼbeik ta milbil matanale.+ 16 Yuʼun mi jeche, chlik avakʼbe yikʼ akeremtak li stsebike,+ li tsebetik taje chmulivajik xchiʼuk li sdiosike, vaʼun chlik mulivajikuk xchiʼuk sdios tsebetik li akeremtake.+

17 »Mu xapas adiostak ta unijesbil takʼin.+

18 »Skʼan xapas li Skʼinal Pan ti Muʼyuk Slevaduraile.*+ Jech kʼuchaʼal laj kalbot mantale, kʼalal jaʼo yorail li ta yuilal abibe,*+ vukub kʼakʼal chalajes pan ti muʼyuk yichʼoj slevaduraile, yuʼun jaʼo ta yuilal abib kʼalal lalokʼ talel li ta Ejiptoe.

19 »Jaʼ kuʼun skotol li sba kerem chvokʼe*+ xchiʼuk jaʼ kuʼun skotol li sba yol achonbolomtake akʼo mi jaʼ sba yol vakax o chij ti stot chvokʼe.+ 20 Kʼalal chvokʼ sba yol avuroe, skʼan xavakʼ jkotuk chij ta xkʼexol, yan mi mu xavakʼbe xkʼexole, skʼan xakʼasbe snukʼ li avuroe. Jech xtok, skʼan xavakʼbe xkʼexol skotol li sba nichʼnabiletik avuʼunik ti jaʼ keremetike.+ Mu me buchʼu xokoluk skʼob xtal ta jtojolal.

21 »Vakib noʼox kʼakʼal xuʼ xa-abtej, li ta svukubal kʼakʼale skʼan xakux.*+ Manchuk mi jaʼo yorail chalok avosil o jaʼo yorail chatsobbe sat li kʼusi atsʼunoje, skʼan me xakux.

22 »Skʼan xapasbe li Skʼinal Xemanaetik kʼalal chavichʼ tal li sba sat atrigo ti lek xa yijike, jech xtok, li ta stsutsebal jabile skʼan xapasbe li Skʼinal Stsobbel Sat Kʼusitik Tsʼunbil* avuʼune.+

23 »Oxib velta ta jabil skʼan xtalik ta stojolal Kajvaltik Jeova skotol li viniketik avuʼune, ta stojolal li Dios yuʼun Israele.+ 24 Ta jnuts lokʼel ta atojolal li mukʼtik lumetike+ xchiʼuk ta xkepajes li avosile. Jech xtok, kʼalal jaʼo chamuy batel oxib velta ta jabil sventa chbat akʼelbe sat li Jeovae Dios avuʼune, muʼyuk buchʼu chpichʼ yoʼonton yuʼun li avosile.

25 »Mu me xakap ta kʼusi yichʼoj slevadurail li chʼichʼ chavakʼbun ta jmotone.+ Jech xtok, mu me xakʼejik* kʼalal to ta sob yokʼomal li milbil matanal sventa li Kʼin Koltaele.+

26 »Skʼan xavichʼ talel ta sna Jeova Dios avuʼun li sba sat kʼusitik atsʼunoj ti lek xa yijik xchiʼuk ti bu mas lekik chlokʼ ta avosile.+

»Mu me xalakan ta yaʼlel xchuʼ smeʼ li chʼiom tentsune».+

27 Xi albat yuʼun Jeova li Moisese: «Skʼan xatsʼiba li jaypʼel kʼop taje,+ yuʼun ta sventa li jaypʼel kʼop taje, yakal ta jpas jun trato xchiʼuk voʼot xchiʼuk li Israele».+ 28 Li Moisese 40 kʼakʼal xchiʼuk 40 akʼobal te kom xchiʼuk li Jeovae. Muʼyuk kʼusi la slajes jutebuk mi jaʼuk laj yuchʼ jtsʼujuk voʼ.+ Te la stsʼiba* ta chaʼpech ton li jaypʼel kʼop sventa tratoe, jaʼ li Lajuneb Mantale.*+

29 Li Moisese yal talel li ta vits Sinaie, te stsakoj talel li chaʼpech tone.+ Kʼalal yal talel li ta vitse, li Moisese mu snaʼ ti xvikʼlajet* tajek sat ta skoj ti la xchiʼin sbaik ta loʼil xchiʼuk li Diose. 30 Kʼalal la staik ta ilel Moises li Aaron xchiʼuk skotol li j-israeletike, laj yakʼik venta ti xvikʼlajet* tajek li sate, jech oxal muʼyuk xnopajik batel ta stojolal, yuʼun xiʼik.+

31 Pe takatik ta ikʼel yuʼun li Moisese, jech oxal li Aaron xchiʼuk li bankilaletik ta tsobajele nopajik batel ta stojolal, jech te chiʼinatik ta loʼil yuʼun li Moisese. 32 Laje, skotol li j-israeletike nopajik batel ta stojolal li Moisese. Jech te akʼbatik yuʼun Moises li mantaletik ti te akʼbat yuʼun Jeova li ta vits Sinaie.+ 33 Kʼalal chlaj yoʼonton ta xchiʼinel ta loʼil j-israeletik li Moisese, chpix ta jlik pokʼ li sate.+ 34 Pe kʼalal ch-och batel ta stojolal Jeova sventa chchiʼin ta loʼile, tslokʼes li smak sate, jaʼ to chpix mi lokʼ tale.+ Vaʼun, mi lokʼ tale, chtal yakʼbe snaʼ j-israeletik li mantaletik akʼbate.+ 35 Li j-israeletike laj yakʼik venta ti xvikʼlajet* tajek li sat Moisese, jaʼ yuʼun li Moisese chpix yan velta li sate jaʼ to tslokʼes kʼalal ch-och xchiʼin ta loʼil li Diose.+

35 Ta tsʼakal li Moisese la stsob sjunul li tsobobbail yuʼun j-israeletike, xi laj yalanbee: «Liʼe jaʼ li kʼusitik laj yal mantal Jeova ti skʼan chʼunele:+ 2 vakib kʼakʼal xuʼ xa-abtejik, pe li ta svukubal kʼakʼale skʼan chʼuluk xkʼot avuʼunik, jaʼ jun savado ti chʼul sventa Jeovae.+ Skʼan xichʼ milel li buchʼu ch-abtej ta savadoe.+ 3 Ti bu nakaloxuke mu me xatsan akʼokʼik li ta skʼakʼalil savadoe».

4 Li Moisese xi laj yalbe sjunul li tsobobbail yuʼun j-israeletike: «Liʼe jaʼ li kʼusi yaloj mantal Jeovae: 5 ‹Oyuk kʼusi xatsobbeik talel li Jeovae.+ Skotol li buchʼu oy ta yoʼontone+ akʼo yichʼbe tal Jeova li kʼusi tskʼan chakʼbee: oro, plata, kovre, 6 asul no, tsots* ti bonbil ta kuxul moradoe, kuxul tsajal pokʼ, lekil lino, stsotsil tentsun,+ 7 snukulil tot chijetik ti bonbil ta tsoje, snukulil fokaetik, akasia teʼ, 8 s-aseiteal kantiletik, balsamo sventa li aseite ti chtun kʼalal oy buchʼu chichʼ tʼujele xchiʼuk sventa li pom ti oy sperfumeale,+ 9 onise tonetik xchiʼuk yan tonetik ti te chichʼ akʼel ta mokankʼuʼile+ xchiʼuk ti te chichʼ akʼel ta smak stiʼ oʼontonale.+

10 »›Akʼo talikuk skotol li buchʼutik lek xtojob*+ avuʼunike sventa spasik skotol li kʼusi yaloj mantal Jeova akʼo xichʼ pasele, 11 jaʼ xkaltik, li axibalna xchiʼuk stsʼakbenaltak xchiʼuk li smake, li slukajtik takʼinale, li steʼeltake, li skʼatlom teʼaltake, li yoyaltake, li xpechajtik takʼinal ti jomajtik sate; 12 li Kaxa+ xchiʼuk steʼeltake,+ li smake+ xchiʼuk li kortina+ sventa smake; 13 li mexa+ xchiʼuk steʼeltake, li kʼusitik te chtune xchiʼuk li pan ti chichʼ akʼel kʼuchaʼal matanale;+ 14 li kandelero+ sventa xakʼ xojobale xchiʼuk li kʼusitik chtun yuʼune, li kantiletik xchiʼuk s-aseiteale;+ 15 li skajleb matanal sventa xchikʼobil pom+ xchiʼuk steʼeltake; li aseite ti chtun kʼalal oy buchʼu chichʼ tʼujele xchiʼuk li pom ti oy sperfumeale;+ li kortina sventa yochebal axibalnae; 16 li skajleb chikʼbil matanale,+ li xchajchaj takʼinal ta kovree, li steʼeltak xchiʼuk skotol li kʼusitik te chtune; li perol xchiʼuk snaklebe;+ 17 li kortina te chichʼ jokʼanel ta yamakʼile,*+ li yoyaltak xchiʼuk li pechajtik takʼin ti jomajtik sate; li kortina sventa yochebal amakʼe; 18 li estakaetik sventa karpanae, li estakaetik sventa amakʼe* xchiʼuk li xchʼojonaltake;+ 19 li lekil jalbil kʼuʼil pokʼiletik+ sventa spas yabtelik li bu chʼule, li chʼul kʼuʼil pokʼiletik sventa li pale Aarone+ xchiʼuk li kʼuʼil pokʼiletik sventa xnichʼnab yoʼ xtunik ta paleale›».

20 Jech oxal, sjunul li tsobobbail yuʼun j-israeletike lokʼik batel yoʼ bu oy li Moisese. 21 Vaʼun skotol li buchʼu jech oy ta yoʼontonike xchiʼuk ti tijbat yoʼontonik ta yakʼele+ laj yichʼbeik talel Jeova skotol yoʼ xichʼ tunesel li ta karpana sventa tsobobbaile, sventa xichʼ pasel li chʼul kʼuʼil pokʼiletike xchiʼuk skotol li kʼusitik te chtune. 22 Talik kʼalal ta vinik ta ants ti jech oy ta yoʼonton chakʼike, laj yichʼik talel prendedoretik,* areteetik, aniyoetik xchiʼuk yan kʼusitik kʼupilik sba xchiʼuk yan kʼusitik ta oro. Laj yakʼbeik ta smoton* Jeova skotol li kʼusitik oy yuʼunik ta oroe.+ 23 Skotol li buchʼutik oy yuʼun asul no, tsots* ti bonbil ta kuxul morado, kuxul tsajal pokʼ, lekil lino, stsotsil tentsun, snukulil tot chijetik ti bonbil ta tsoje xchiʼuk snukulil fokaetike laj yichʼik talel. 24 Skotol li buchʼutik oy ta yoʼonton chichʼik talel plata xchiʼuk kovree laj yichʼbeik talel Jeova, jech xtok, skotol li buchʼutik oy yuʼunik akasia teʼe laj yichʼik talel sventa chtun ta buyuk noʼox li ta abtelale.

25 Skotol li antsetik ti lek xtojobike+ la snauik asul no, tsots* ti bonbil ta kuxul moradoe, kuxul tsajal pokʼ xchiʼuk lekil lino, vaʼun laj yichʼik talel li kʼusi la snau ta skʼobike. 26 Li antsetik ti lek xtojobik ti jech oy ta yoʼontonike la snauik li stsotsil tentsune.

27 Li bankilaletik eke laj yichʼik talel onise tonetik xchiʼuk yan tonetik ti te chichʼ akʼel ta mokankʼuʼile xchiʼuk ti te chichʼ akʼel ta smak stiʼ oʼontonale,+ 28 laj yichʼik talel balsamo xchiʼuk aseite sventa li kantiletike, sventa xichʼ pasel li aseite ti chtun kʼalal oy buchʼu chichʼ tʼujele+ xchiʼuk sventa li pom ti oy sperfumeale.+ 29 Skotol li viniketik xchiʼuk antsetik ti jech oy ta yoʼonton chakʼike oy kʼusi laj yichʼik talel sventa li abtelal albat yuʼun Jeova li Moises ti skʼan pasele; li j-israeletike lokʼ ta yoʼontonik sventa xichʼbeik talel ta smoton li Jeovae.+

30 Li Moisese xi laj yalbe li j-israeletike: «Kʼelavilik, li Jeovae laj xa stʼuj Besalel ti jaʼ xnichʼon Uri xchiʼuk ti jaʼ smom Ur ti te likem talel li ta jchop snitilulal Judae.+ 31 La snojes ta s-espiritu Dios, laj xa yakʼbe spʼijil, laj xa yaʼibe smelolal yuʼun xchiʼuk laj xa yakʼbe yojtikin lek kʼuxi ta pasel kʼusiuk noʼox pʼijil abtelal, 32 sventa xlokʼtaj yuʼun kʼusitik kʼupilik sba tajek xvinaj, sventa xabtelan oro, plata, kovre, 33 sventa set xchiʼuk xakʼbe snakleb tonetik xchiʼuk sventa spas ta teʼ kʼusitik kʼupilik sba tajek xvinaj. 34 Jech xtok, li Diose yakʼojbe ta yoʼonton Besalel ti xuʼ xchanubtasvan xchiʼuk li Ooliab+ ti jaʼ xnichʼon Aisamak ti te likem talel li ta jchop snitilulal Dane. 35 Laj xa stojobtasan lek*+ sventa spas yuʼunik kʼusiuk pʼijil abtelal, sventa xtojobik ta luchom,* ta jolob* ti tstunesik asul no, tsots* ti bonbil ta kuxul moradoe, kuxul tsajal pokʼ, lekil lino xchiʼuk yan kʼusitik ti jalbile. Li viniketik taje jaʼ tspasik kʼusiuk noʼox abtelal xchiʼuk jaʼ chchapanik li slokʼoltak kʼusitik ti kʼupilik sbae.

36 »Li Besalele koʼol ch-abtej xchiʼuk Ooliab xchiʼuk skotol li viniketik ti lek xtojobik* ti akʼbat spʼijilik yuʼun Jeovae xchiʼuk ti laj xa yaʼibeik smelolal sventa spas yuʼunik skotol li chʼul abtelal jech kʼuchaʼal yaloj mantal Jeovae».+

2 Takatik ta ikʼel yuʼun Moises li Besalel, Ooliab xchiʼuk skotol li viniketik ti lek xtojobik ti akʼbil spʼijilik yuʼun li Jeovae,+ skotol li buchʼutik tijbat yoʼontonik ti tskʼan chkoltavanik ta abtelale.+ 3 Vaʼun, akʼbatik yuʼun Moises skotol li matanal laj yichʼik tal li j-israeletik+ sventa li chʼul abtelale. Pe jech-o jujun sob chichʼik tal matanaletik ti chlokʼ ta yoʼontonik yakʼele.

4 Kʼalal likem xa ox li chʼul abtelale, ta jujuntal lik talikuk skotol li viniketik ti lek xtojobike, 5 xi laj yalbeik li Moisese: «Li krixchanoetike toj ep xa laj yichʼik talel li kʼusitik chtun sventa li abtelal ti jech yaloj mantal Jeova xichʼ pasele». 6 Jech oxal, li Moisese laj yal mantal ti akʼo xi xalik ta sjunul ti bu spasoj skarpanaike: «Vinik antsetik, mu xa xavichʼik tal li kʼusitik lekik ta sventa li chʼul matanale». Jaʼ yuʼun, muʼyuk xa kʼusi mas laj yichʼik talel. 7 Li kʼusitik lekik laj yakʼike lek xa xlokʼ-o sventa xichʼ pasel li abtelale, ep xa spas sovra.

8 Jaʼ yuʼun, skotol li j-abteletik ti lek xtojobike+ la spasik li axibalnae,+ la stunesik lajunlik pokʼ ti pasbil ta lekil lino ti tsʼotbile, asul no, tsots* ti bonbil ta kuxul moradoe xchiʼuk kuxul tsajal pokʼ. Li Besalele te la xluchbe* slokʼol keruvinetik.+ 9 Li jujulik pokʼe 28 xukʼubil* snatil xchiʼuk chanib xukʼubil sjamlej. Koʼol smukʼul skotol li pokʼetike. 10 Vaʼun, la spas ta jlik noʼox li voʼlik pokʼe xchiʼuk ta jlik noʼox la spas xtok li yan voʼlik pokʼe. 11 Li ta jot stiʼil slajebal pokʼe laj yakʼbe xchikintak ta asul no. Jech la spasbe xtok li jot stiʼil ti bu tsnupʼ sba xchiʼuk li jchope. 12 La spasbe 50 xchikin li baʼyel pokʼe xchiʼuk la spasbe 50 xchikin li yan pokʼ sventa snupʼ sba xchiʼuk li baʼyel pokʼe. 13 Ta slajeb une la spas 50 lukajtik takʼin ta oro yoʼ snupʼ sba li xchaʼlikal pokʼ xchiʼuk li lukajtik takʼine, jaʼ jech pas ta jlik pokʼ sventa li axibalnae.

14 La spas pokʼ ta stsotsil tentsun sventa smak li axibalnae, 11 ta lik la spas.+ 15 Li jujulik pokʼe 30 xukʼubil snatil xchiʼuk chanib xukʼubil sjamlej. Koʼol smukʼul li 11 ta lik pokʼe. 16 Vaʼun, ta jlik noʼox la spas li voʼlik pokʼe xchiʼuk ta jlik noʼox la spas li yan vaklik pokʼe. 17 Tee la spasbe 50 xchikin ta stiʼil li baʼyel jlik pokʼe xchiʼuk la spasbe 50 xchikin ta stiʼil li yan pokʼe sventa snupʼ sba xchiʼuk li baʼyel jlik pokʼe. 18 Jech xtok, la spas 50 lukajtik takʼin ta kovre sventa snupʼ sba li pokʼe, jaʼ jech pas ta jpʼej axibalna.

19 La xchapan snukulil tot chijetik ti bonbil ta tsoje sventa spasbe smak li karpanae, jech xtok, la slamanbe snukulil fokaetik li ta sbae.+

20 La stunes akasia teʼ+ yoʼ spasbe steʼeltak li axibalnae, vaʼajtik la spas.+ 21 lajuneb xukʼubil snatil li jujun steʼeltake xchiʼuk jun xukʼubil xchiʼuk j-oʼlol li sjamleje. 22 Li jujun steʼeltake oy chib yakan. Jech la spas skotol li steʼeltak axibalnae. 23 La spasbe 20 steʼeltak ta jot li axibalnae, jaʼ li ta stukʼil sure. 24 La spas 40 ta pech plata ti jomajtik sate sventa te xakʼ ta yolon li 20 steʼeltake. Li chaʼpech plata ti jomol sate jaʼ sventa li chib yakan jujun steʼeltake. Jaʼ jech laj yakʼ batel chaʼchaʼpech plata sventa li chib yakan jujun steʼeltake.+ 25 Sventa li jot xokon axibalnae, jaʼ li ta snorteale, la spasbe 20 steʼeltak, 26 40 ta pech plata ti jomajtik sate, li chaʼpech plata ti jomol sate jaʼ sventa li chib yakan jujun steʼeltake. Jech laj yakʼ batel chaʼchaʼpech plata sventa li chib yakan jujun steʼeltake.

27 Sventa li spat axibalnae, li ta smaleb kʼakʼale, la spasbe vakib steʼeltak.+ 28 La spasbe chib steʼeltak sventa xkʼot ta s-eskinail jujujot xokon ta spat li axibalnae. 29 Li chib steʼeltak taje ta lumtik lik svaʼan muyel, te kʼot snupʼ sba ta akʼol ti bu oy li baʼyel xotbil oroe. Jech pas yuʼun li s-eskinail ta jujujot xokon ta spat li axibalnae. 30 Jaʼ jech kʼot ta vaxakib steʼeltak xchiʼuk 16 xpechpech platail ti jomajtik sate, li chaʼpech plata ti jomol sate jaʼ sventa li chib yakan jujun steʼeltake.

31 Ta tsʼakale, la stunes akasia teʼ sventa spas ta voʼob kʼatlom teʼ sventa xichʼ tsakanel li steʼeltak jot xokon axibalnae.+ 32 La spas voʼob kʼatlom teʼ xtok sventa xichʼ tsakanel li steʼeltak ta jot xokon axibalnae xchiʼuk la spas yan voʼob kʼatlom teʼ sventa xichʼ tsakanel li steʼeltak ta spat axibalna ti skʼeloj batel smaleb kʼakʼale. 33 La spasbe li skʼatlom teʼal ti chichʼ akʼel ta oʼlol steʼeltak sventa jtel noʼox ti chlik ta jot stiʼil kʼalal to ta jot stiʼile. 34 La xpix ta oro li steʼeltake xchiʼuk la spas xotbil oro ti jaʼ chtun ta stsakleb li skʼatlom teʼaltake xchiʼuk la xpix ta oro li kʼatlom teʼetike.+

35 Vaʼun, la spas jlik kortina,+ la stunes asul no, tsots* ti bonbil ta kuxul moradoe, kuxul tsajal pokʼ xchiʼuk tsʼotbil lekil lino. Te la xluchbe*+ slokʼol keruvinetik.+ 36 La spasbe chanib yoyaltak ta akasia teʼ xchiʼuk la xpix ta oro. La spasbe stsaklebtak ta oro xchiʼuk laj yunijes chanpech plata ti jomajtik sat sventa li yoyaltake. 37 Ta tsʼakale, la spasbe skortinail li yochebal karpanae, la stunes asul no, tsots* ti bonbil ta kuxul moradoe, kuxul tsajal pokʼ xchiʼuk tsʼotbil lekil lino, la sjal skotol.+ 38 Jech xtok, la spasbe li voʼob yoyaltak xchiʼuk stsaklebtake. La xpix ta oro li jol oyetike xchiʼuk li kʼusitik chichʼ tsʼakel-oe,* pe jaʼ ta kovre la spas li kʼusi pechajtik ti jomajtik sate.

37 Vaʼun, li Besalele+ ta akasia teʼ la spas li Kaxae.+ Chib xukʼubil* xchiʼuk j-oʼlol li snatile, jun xukʼubil xchiʼuk j-oʼlol li sjamleje xchiʼuk jun xukʼubil xchiʼuk j-oʼlol li stayleje.+ 2 La xpix lek ta batsʼi oro li yut xchiʼuk spate xchiʼuk ta oro la spasbe yuni nichimal ta sjoyobal li stiʼe.+ 3 La spasbe chanib xotbil oro, chikʼbil ta kʼokʼ la spas, vaʼun te la snapʼan ta yakʼol ti bu tsakajtik li chanib yakane, chib xotbil oro laj yakʼ ta jot xokon xchiʼuk chib xotbil oro laj yakʼ li ta jot xokone. 4 La spasbe steʼeltak ta akasia teʼ xchiʼuk la xpix ta oro.+ 5 Sventa stakʼ kuchel batel li Kaxae, li steʼeltake te la xoj ochel li ta xotbil oro ti te napʼajtik ta xokon Kaxae.+

6 La spasbe smak ta batsʼi oro.+ Chib xukʼubil xchiʼuk j-oʼlol snatil xchiʼuk jun xukʼubil xchiʼuk j-oʼlol sjamlej.+ 7 La spas chib keruvinetik ta oro,+ tenbil ta martiyo la spas xchiʼuk te laj yakʼ jun ta jujujot sjol li smak kaxae.+ 8 Li jun keruvine te oy ta jot sjol li smak kaxae, li yan keruvine te oy li ta jot sjol smak kaxae. La spas keruvinetik li ta jujujot sjol li smak kaxae. 9 Li chib keruvinetik taje lichʼil muyel chkom li xikʼike sventa xakʼbeik yaxinal* ta xikʼik li smak kaxae.+ Snupoj sbaik chkom xchibalik xchiʼuk nijajtik yalel satik ta smak li kaxae.+

10 Jech xtok, ta akasia teʼ la spas li mexae,+ chib xukʼubil li snatile, jun xukʼubil li sjamleje xchiʼuk jun xukʼubil xchiʼuk j-oʼlol li stayleje.+ 11 La xpix ta batsʼi oro xchiʼuk ta oro la spasbe yuni nichimal ta sjoyobal li mexae. 12 La spakʼbe jun tavla ta sjoyobal ti chanib kʼob* sjamleje xchiʼuk la spasbe jun spolpol tiʼil ta oro ta sjoyobal li tavlae. 13 La spasbe chanib xotbil oro, chikʼbil ta kʼokʼ la spas, vaʼun te la snapʼanbe ta jujujot xchikin ta yakʼol ti bu tsakajtik li chanib yakane. 14 Li xotbil oroe te nopol xil li tavla ta sjoyobale, li xotbil oroe jaʼ sventa te xichʼ xojel li steʼeltak sventa stakʼ kuchel batele. 15 Ta akasia teʼ la spasbe li steʼeltake xchiʼuk la xpix ta oro, li steʼeltake jaʼ sventa xkuchik batel li mexae. 16 Jech xtok, ta batsʼi oro la spas li kʼusitik te chichʼ akʼel ta sba mexae, li splatoaltake, li skopailtake, li smukʼta bochaltake xchiʼuk li sjarrailtak sventa smalik li matanal vinoe.+

17 Ta batsʼi oro la spas li kandeleroe,+ tenbil ta martiyo la spas li kandeleroe. La spasbe snakleb yakan, yakan, snakleb xnich, s-umul nichimal xchiʼuk stukem nichimal. Jmoj snitoj sba ta skotol la spas.+ 18 Vakib skʼob laj yakʼbe li kandeleroe, oxib ta jujujot. 19 Li ta jot oxib skʼobe, la spasbe oxib snakleb xnich ti xkoʼolaj ta xnich almendrae, la spasbe s-umul nichimal xchiʼuk stukem nichimal, tsjelilan sbaik ta jujun. Jech la spas xtok li ta jot oxib skʼobe, la spasbe oxib snakleb xnich ti xkoʼolaj ta xnich almendrae, la spasbe s-umul nichimal xchiʼuk stukem nichimal, tsjelilan sbaik ta jujun. Jaʼ jech la spasbe li svakibal skʼob kandelero ti te chlokʼ ta yakane. 20 Li ta yakane la spasbe chanib snakleb xnich ti xkoʼolaj ta xnich almendrae, la spasbe s-umul nichimal xchiʼuk stukem nichimal, tsjelilan sbaik ta jujun. 21 Li jun umul* nichime te la spas ta yolon ti bu chlokʼ li baʼyel chib skʼob ta yakane. Li yan umul nichime te la spas ta yolon li yan chib skʼobe. La spas yan umul nichim li ta yolon yan chib skʼobe. Taje jaʼ li svakibal skʼob kandeleroe. 22 Li s-umul niche, li skʼobtake xchiʼuk sjunul li kandeleroe jmoj snitoj sba ta skotol laj yichʼ pasel. Ta batsʼi oro laj yichʼ pasel xchiʼuk tenbil ta martiyo laj yichʼ pasel. 23 Ta batsʼi oro la spasbe li vukub skantilale,+ li xtuchʼobil xmechaile xchiʼuk li yav yakʼalile. 24 Ta jun talento* batsʼi oro la spas li kandeleroe xchiʼuk skotol li kʼusitik chtun yuʼune.

25 La spas li skajleb matanal ti bu chchikʼik pome,+ ta akasia teʼ la spas. Kuadrado la spas, jun xukʼubil snatil, jun xukʼubil sjamlej xchiʼuk chib xukʼubil li stayleje. Li xulubtake jmoj snitoj sba la spas xchiʼuk li skajleb matanale.+ 26 La xpix lek ta batsʼi oro li sbae, li xokontake xchiʼuk li xulubtake, jech xtok, ta oro la spasbe li xnichimal ta sjoyobale. 27 Li ta jujujot xokon skajleb matanale la spasbe chib xotbil oro ta yolon li xnichimale, li xotbil oroe jaʼ sventa te xichʼ xojel ochel li steʼeltak sventa xichʼ kuchel batele. 28 Laje, ta akasia teʼ la spasbe li steʼeltake xchiʼuk la xpix ta oro. 29 Jech xtok, la spas li chʼul aseite ti chtun kʼalal oy buchʼu chichʼ tʼujele+ xchiʼuk li batsʼi pom ti oy sperfumeale,+ lek kapbil la spas.*

38 Li Besalele ta akasia teʼ la spas li skajleb chikʼbil matanale, voʼob xukʼubil* snatil, voʼob xukʼubil sjamlej, kuadrado la spas li skajleb matanale; jaʼ oxib xukʼubil li stayleje.+ 2 La spasbe li xulub ta jujujot xchikine; tsakal ta skajleb matanal li xulubtake xchiʼuk la xpix ta kovre.+ 3 Ta tsʼakale, la spas skotol li kʼusitik te chtun li ta skajleb matanale, li slokʼesobil stanile, li palaetike, li mukʼta bochetike, li natil chavchav takʼinetike xchiʼuk li yavtak akʼale. Ta kovre la spas skotol li kʼusitik te chtune. 4 Laje, ta kovre la spasbe li xchajchaj takʼinal skajleb matanale. Te laj yakʼ ta yolon stiʼil li skajleb matanale, la stikʼ ochel kʼalal to ta oʼlol yut. 5 Laj yunijesbe chanib xotbil kovre li ta jujujot xchikin ti nopol xil li xchajchaj takʼinal ta kovree. Li chanib xotbil kovree jaʼ sventa te xichʼ xojel li steʼeltake. 6 Ta tsʼakale ta akasia teʼ la spasbe li steʼeltake xchiʼuk la xpix ta kovre. 7 Sventa stakʼ kuchel batele, te la xoj li steʼeltak li ta xotbil kovre ti te oy ta jujujot xokon skajleb matanale. Li skajleb matanale jech la spas kʼuchaʼal jun kaxa ti pojol yut ti pasbil ta tavlae.

8 Ta kovre la spas li perol xchiʼuk snaklebe;+ jaʼ la stunes li snen* antsetik ti lek chapal ch-abtejik li ta yochebal karpana sventa tsobobbaile.

9 La spasbe li yamakʼile.*+ Li ta jot xokon ta stukʼil sure la sjokʼanbe skortinailtak li yamakʼile. Ta tsʼotbil lekil lino la spas, sien xukʼubil snatil ta skotol.+ 10 Oy 20 yoyal xchiʼuk 20 ta pech kovre ti jomajtik sate. Li stsaklebtak yoyal xchiʼuk li kʼusitik chichʼ tsʼakel-oe* jaʼ ta plata. 11 Li skortinailtak chichʼ jokʼanel li ta jot xokon ta stukʼil nortee jaʼ sien xukʼubil snatil ta skotol. Oy 20 yoyal ta kovre xchiʼuk 20 ta pech kovre ti jomajtik sate. Li stsaklebtak yoyal xchiʼuk li kʼusitik chichʼ tsʼakel-oe* jaʼ ta plata. 12 Laj yichʼ jokʼanbel skortinailtak li ta jot yamakʼil* ta stukʼil smaleb kʼakʼale, jaʼ 50 xukʼubil snatil ta skotol. Oy lajuneb yoyal xchiʼuk lajunpech kovre ti jomajtik sate. Li stsaklebtak yoyal xchiʼuk li kʼusitik chichʼ tsʼakel-oe* jaʼ ta plata. 13 Li sjamlej li ta jot xokon ta stukʼil slokʼeb kʼakʼale jaʼ 50 xukʼubil. 14 Li ta xokon yochebal ta batsʼikʼobe laj yichʼ jokʼanbel skortinailtak ti 15 xukʼubil snatil ta skotole, oy oxib yoyal xchiʼuk oxpech kovre ti jomajtik sate. 15 Li ta xokon yochebal yamakʼil* ta tsʼetkʼobe* laj yichʼ jokʼanbel skortinailtak ti 15 xukʼubil snatil ta skotole, oy oxib yoyal xchiʼuk oxpech kovre ti jomajtik sate. 16 Skotol li kortinaetik laj yichʼ jokʼanel ta sjoylejal li yamakʼile* ta tsʼotbil lekil lino laj yichʼ pasel. 17 Li kʼusi pechajtik ti jomajtik sat sventa li yoyaltake ta kovre laj yichʼ pasel. Li stsaklebtak yoyal xchiʼuk li kʼusitik chichʼ tsʼakel-oe* jaʼ ta plata, laj yichʼ pixel ta plata li jol oyetike xchiʼuk laj yichʼ pasbel ta plata li kʼusitik chichʼ tsʼakel-o skotol li yoyaltak amakʼe.*+

18 Li skortinail yochebal yamakʼile* jalbil ta asul no, ta tsots* ti bonbil ta kuxul moradoe, ta kuxul tsajal pokʼ xchiʼuk ta tsʼotbil lekil lino. 20 xukʼubil snatil xchiʼuk voʼob xukʼubil staylej, koʼol staylej kʼuchaʼal li kortinaetik ti laj yichʼ jokʼanel ta yamakʼile.+ 19 Li chanib yoyaltake xchiʼuk li chanpech kʼusitik ti jomajtik sate ta kovre laj yichʼ pasel. Jaʼ ta plata li stsaklebtake xchiʼuk li kʼusitik chichʼ tsʼakel-oe.* Li jol oyetike laj yichʼ pixel ta plata. 20 Skotol li s-estakailtak axibalnae xchiʼuk li estakaetik ta sjoylejal li yamakʼile* ta kovre laj yichʼ pasel.+

21 Li yan kʼusi laj yichʼ pasel ti jech laj yal mantal Moisese jaʼ ti akʼo xchapik li kʼusitik chtun ta karpanae, jaʼ li chʼul karpana ti te oy li xkaxail tratoe.+ Jaʼ oy ta sbaik li jlevietik+ ti jaʼ beiltasatik yuʼun li Itamare,+ li xnichʼon pale Aarone. 22 Li Besalel+ ti jaʼ xnichʼon Uri xchiʼuk ti jaʼ smom Ur ti te likem talel li ta jchop snitilulal Judae la spas skotol li kʼusi albat mantal yuʼun Jeova li Moisese. 23 Te xchiʼuk Ooliab+ ti jaʼ xnichʼon Aisamak ti te likem talel li ta jchop snitilulal Dan ti lek spas yuʼun pʼijil abtelaletike xchiʼuk snaʼ xluchomaj,* jech xtok, snaʼ sjalel asul no, tsots* ti bonbil ta kuxul moradoe, kuxul tsajal pokʼ xchiʼuk lekil lino.

24 Skotol li oro laj yichʼ tunesel li ta abtelal ti bu chʼule, li oro ti laj yakʼik ta yebil matanale,+ jaʼ 29 talento* xchiʼuk 730 siklo,* jaʼ ti kʼu yepal yalal jujun siklo ti bu chʼule. 25 Skotol li plata laj yakʼik li viniketik ti laj yichʼ tsakbel sbiike jaʼ sien talento xchiʼuk 1,775 siklo, jaʼ ti kʼu yepal yalal jujun siklo ti bu chʼule. 26 Li j-oʼlol siklo laj yakʼik jujune jaʼ ti kʼu yepal yalal jujun siklo ti bu chʼule. Jaʼ jech yepal laj yakʼik li jujun vinik ti 20 o mas ta 20 sjabilalike,+ 603,550 ta skotolik.+

27 Li kʼusitik pechajtik ti jomajtik sat ti laj yichʼ unijesel sventa li bu chʼule xchiʼuk li kʼusitik pechajtik ti jomajtik sat ti jaʼ sventa li kortinae, jaʼ sien talento ta skotol. Li sien ta pech kʼusitik jomajtik sate jaʼ sien talento, jaʼ xkaltik, jun talento sventa li jujupech kʼusitik jomajtik sate.+ 28 Li 1,775 siklo platae jaʼ la spas-o li stsaklebtak yoyale xchiʼuk la xpix ta plata li jol oyetike, vaʼun la stsʼakanan.

29 Li kovre laj yakʼik ta matanale* jaʼ 70 talento xchiʼuk 2,400 siklo. 30 Jaʼ la spas-o li kʼusitik pechajtik ti jomajtik sat ti jaʼ sventa li yochebal karpana sventa tsobobbaile, jaʼ la spas-o li skajleb matanal ta kovre xchiʼuk li xchajchaj takʼinal ta kovree xchiʼuk jaʼ la spas-o skotol li kʼusitik te chtun ta skajleb matanale, 31 jech xtok, jaʼ la spas-o li kʼusitik pechajtik ti jomajtik sat ti jaʼ sventa li sjoylejal yamakʼile,* li kʼusitik pechajtik ti jomajtik sat ti jaʼ sventa li yochebal yamakʼile xchiʼuk jaʼ la spas-o skotol li s-estakailtak axibalnae+ xchiʼuk li estakaetik ta sjoylejal li yamakʼile.

39 La spasik kʼuʼil pokʼiletik ti lek jalbil sventa li abtelal ti bu chʼule, la spasik ta asul no, ta tsots* ti bonbil ta kuxul moradoe+ xchiʼuk ta kuxul tsajal pokʼ. La spasik li chʼul kʼuʼil pokʼiletik sventa li Aaron+ jech kʼuchaʼal albat mantal yuʼun Jeova li Moisese.

2 Ta oro la spas li mokankʼuʼile,+ ta asul no, ta tsots* ti bonbil ta kuxul moradoe, ta kuxul tsajal pokʼ xchiʼuk ta tsʼotbil lekil lino. 3 La stenik ta martiyo laminaetik ta oro jaʼ to ti kʼuxi joy xa tajek kome, laje la sil sventa skap ta jalel xchiʼuk li asul noe, li tsots* ti bonbil ta kuxul moradoe, li kuxul tsajal pokʼe xchiʼuk li lekil linoe, laje laj yichʼ luchel.* 4 La spasbeik chib spakʼ snekebal, te la snapʼanik li ta jujujot stiʼil snekebal li mokankʼuʼile. 5 Li jalbil chukil* ti te napʼal ta mokankʼuʼil sventa ta yaviluk lek xkome+ la spasik ta oro, ta asul no, ta tsots* ti bonbil ta kuxul moradoe, ta kuxul tsajal pokʼ xchiʼuk ta tsʼotbil lekil lino jech kʼuchaʼal albat mantal yuʼun Jeova li Moisese.

6 Laje, te laj yakʼik li onise tonetik li ta snakleb ta oroe. Te la stsʼibabeik sbi li xnichʼnabtak Israele, jaʼ jech la spasik kʼuchaʼal seyo.+ 7 Te la snapʼan li ta spakʼ snekebal mokankʼuʼile yoʼ xtun ta snaʼobil yuʼunik xnichʼnabtak Israel li tonetik+ jech kʼuchaʼal albat mantal yuʼun Jeova li Moisese. 8 Laje, jech la xluch* li smak stiʼ oʼontonal+ jech kʼuchaʼal li buchʼu snaʼ xluchomaje, jech la spas jech kʼuchaʼal li mokankʼuʼile, ta oro, ta asul no, ta tsots* ti bonbil ta kuxul moradoe, ta kuxul tsajal pokʼ xchiʼuk ta tsʼotbil lekil lino.+ 9 Kuadrado chkom kʼalal chichʼ puxele. Li smak stiʼ oʼontonal la spasike jchʼix* sjamlej xchiʼuk jchʼix snatil kʼalal chichʼ puxele. 10 Te la snapʼanik tonetik, chanchol laj yakʼik. Li sbacholale jaʼ rubi, topasio xchiʼuk esmeralda ton. 11 Li xchaʼcholale jaʼ turkesa, safiro xchiʼuk jaspe ton. 12 Li yoxcholale jaʼ leschem,* agata xchiʼuk amatista ton. 13 Li xchancholale jaʼ krisolito, onise xchiʼuk jade ton. Te laj yakʼik li ta snaklebtak ti pasbil ta oroe. 14 Li jujupʼej tone jaʼ sventa sbiik li 12 ta voʼ xnichʼnabtak Israele. Li sbiike te tsʼibabil jech kʼuchaʼal seyo, li jujun biil te tsʼibabile jaʼ skʼan xal li 12 ta chop snitilulal Israele.

15 La spasik jichʼil kadenaetik ta batsʼi oro ti xkoʼolaj ta balbil chʼojon+ sventa sjoylejal li smak stiʼ oʼontonale. 16 La spasik chib snakleb ta oro xchiʼuk chib xotajtik oro ti te la snapʼanik ta jujujot xchikin ta akʼol li ta smak stiʼ oʼontonale. 17 Li chaʼlik jichʼil kadena pasbil ta oroe te la xojik li ta chib xotajtik oro ta jujujot xchikin li smak stiʼ oʼontonale. 18 Li sba xchaʼlikal jichʼil kadenae te la xojik li ta chib snaklebtake sventa snit sba xchiʼuk li spakʼ snekebal mokankʼuʼile, taje jaʼ sventa xkom ta yeloval mokankʼuʼil li smak stiʼ oʼontonale. 19 Laje, la spasik chib xotbil oro, te la snapʼanik ta olon ta yut jujujot xchikin li smak stiʼ oʼontonale, skʼeloj kom li mokankʼuʼile.+ 20 La spasik yan chib xotajtik oro xtok, te laj yakʼik ti bu tsnup sba li mokankʼuʼil xchiʼuk li xchuk* ti jalbile, jaʼ xkaltik, ta yeloval li mokankʼuʼile, ta yolon li spakʼ snekebale, te kom ta yakʼol li xchuk ti jalbile. 21 La stunesik asul chʼojon sventa te xojik li ta xotajtik oro ta jujujot xchikin smak stiʼ oʼontonale xchiʼuk te la xojik li ta xotajtik oro ti te oy li ta mokankʼuʼile, taje jaʼ sventa te xkom ta yakʼol jalbil chukil* li smak stiʼ oʼontonale xchiʼuk ta sba li mokankʼuʼil jech kʼuchaʼal albat mantal yuʼun Jeova li Moisese.

22 Ta asul no+ la sjal sliklej li natil kʼuʼil ti muʼyuk skʼob ti te chkom ta yut li mokankʼuʼile. 23 Jombil sjol ta oʼlol li natil kʼuʼil ti muʼyuk skʼobe, jombil jech kʼuchaʼal li smak bekʼtalile.* Sventa mu xjate, laj yichʼ jalbel li stiʼil ta sjoyobale. 24 La spasbeik kʼusitik ti xkoʼolaj ta granadaetik* li ta sjoylejal xpuxbenal li natil kʼuʼil ti muʼyuk skʼobe, la stunesik asul no, tsots* ti bonbil ta kuxul moradoe xchiʼuk kuxul tsajal pokʼ, laj yichʼ balel ta skotol. 25 La spasik kampanaetik ta batsʼi oro, te laj yakʼik li ta xpuxbenal natil kʼuʼil ti muʼyuk skʼobe, tsjelulan sba xchiʼuk li granadaetike.* 26 Ta sjoylejal xpuxbenal li natil kʼuʼil ti muʼyuk skʼob ti tstunesik kʼalal tspas yabtelike te jokʼajtik jujupʼej kampana ta oro ti tsjelulan sba xchiʼuk li granadae,* jpʼej kampana ta oro xchiʼuk jpʼej granada jech kʼuchaʼal albat mantal yuʼun Jeova li Moisese.

27 Laje, la spasik li kʼuʼil pokʼiletik sventa Aaron xchiʼuk xnichʼnabe,+ ta lekil lino la spasik xchiʼuk jalbil kʼuchaʼal tsjal li jalkʼuʼile. 28 La spasik xtok li stsʼotobil jolil+ ta lekil linoe, li xpix jolil+ ta lekil lino ti tstunes li xnichʼnabtak Aarone, li xkʼox vexik+ ta tsʼotbil lekil linoe, 29 jech xtok, li chukile ta lekil tsʼotbil lino la spasik, ta asul no, ta tsots* ti bonbil ta kuxul moradoe xchiʼuk ta kuxul tsajal pokʼ, jmoj jalbil ta skotol jech kʼuchaʼal albat mantal yuʼun Jeova li Moisese.

30 Laje, la spasik jpech chʼul lamina ta batsʼi oro ti solel stsʼayayete* xchiʼuk te la stsʼibaik jech kʼuchaʼal kʼalal oy kʼusi chichʼ akʼbel seyoal ti xi chale: «Te likem ta stojolal Jeova li kʼusi chʼule».+ 31 Vaʼun, la xojbeik jlik chʼojon ti pasbil ta asul noe sventa te xkom ta yeloval li stsʼotobil jolil jech kʼuchaʼal albat mantal yuʼun Jeova li Moisese.

32 Jaʼ jech tsʼaki yuʼunik spasel skotol li kʼusitik chtun ta axibalnae, jaʼ xkaltik, li karpana sventa tsobobbaile. Li j-israeletike la spasik skotol jech kʼuchaʼal albat mantal yuʼun Jeova li Moisese.+ Jech tajek la spasik kʼuchaʼal albatike.

33 Vaʼun, laj yichʼbeik talel Moises li axibalna+ xchiʼuk stsʼakbenaltak+ xchiʼuk skotol li kʼusi chtun yuʼune: li kʼusitik lukajtike,+ li steʼeltake,+ li skʼatlom teʼaltake,+ li yoyaltake xchiʼuk li kʼusi pechajtik ti jomajtik sate;+ 34 li snukulil tot chijetik ti bonbil ta tsoj+ sventa smake, li snukulil fokaetik sventa smake, li kortina sventa smake;+ 35 li xkaxail Mantale,* li steʼeltake+ xchiʼuk li smake;+ 36 li mexae, skotol li kʼusitik te chtune+ xchiʼuk li pan chichʼ akʼel kʼuchaʼal matanal ta stojolal Diose; 37 li kandelero pasbil ta batsʼi oroe, li skantilaltak+ ti cholol pasbile, skotol li kʼusitik te chtune+ xchiʼuk li aseite sventa li kantiletike;+ 38 li skajleb matanal+ ta oroe, li aseite ti chtun kʼalal oy buchʼu chichʼ tʼujele,+ li pom ti oy sperfumeale,+ li skortinail+ yochebal karpanae; 39 li skajleb matanal ta kovre+ xchiʼuk li xchajchaj takʼinal ta kovree, li steʼeltake,+ skotol li kʼusitik te chtune,+ li perol xchiʼuk snaklebe;+ 40 li skortinailtak chichʼ jokʼanel ta yamakʼile,* li yoyaltake, li kʼusi pechajtik ti jomajtik sate,+ li skortinail+ yochebal amakʼe, li xchʼojonaltake, li s-estakailtake,+ skotol li kʼusitik chtun sventa li abtelal ta axibalnae, jaʼ xkaltik, li karpana sventa tsobobbaile; 41 li lekil jalbil kʼuʼil pokʼiletik sventa li abtelal ti bu chʼule, li chʼul kʼuʼil pokʼiletik sventa li pale Aarone+ xchiʼuk li kʼuʼil pokʼiletik sventa xnichʼnab yoʼ xtunik ta paleale.

42 Li j-israeletike jech tajek la spasik skotol li abtelal jech kʼuchaʼal albat mantal yuʼun Jeova li Moisese.+ 43 Kʼalal la skʼel Moises skotol li abtelal la spasike, laj yakʼ venta ti jaʼ jech meltsaj yuʼunik skotol jech kʼuchaʼal yaloj mantal li Jeovae, vaʼun akʼbatik bendision yuʼun li Moisese.

40 Li Jeovae xi laj yalbe li Moisese: 2 «Li ta sba kʼakʼal yuʼun li sba ue, skʼan xavaʼan li axibalnae, jaʼ xkaltik, li karpana sventa tsobobbaile.+ 3 Te xatikʼ ochel li xkaxail Mantale;*+ sventa mu xvinaj ochel li Kaxae, jokʼano li kortinae.+ 4 Tikʼo ochel li mexae+ xchiʼuk skʼan xavakʼ ta yavil li kʼusitik te chkom ta sbae. Jech xtok, tikʼo ochel li kandeleroe+ xchiʼuk tsano li kantiletike.+ 5 Li skajleb matanal pasbil ta oro sventa xchikʼobil pome+ te xavakʼ ta yeloval li xkaxail Mantale.* Laje, jokʼano ta yavil li kortina ti jaʼ sventa yochebal axibalnae.+

6 »Li skajleb chikʼbil matanale+ te xavakʼ ta stukʼil yochebal li axibalnae, jaʼ xkaltik, li karpana sventa tsobobbaile. 7 Li perole te xavakʼ ta oʼlol yuʼunik li skajleb matanal xchiʼuk li karpana sventa tsobobbaile. Nojeso ta voʼ.+ 8 Vaʼun chapano li yamakʼile*+ xchiʼuk jokʼano ta yavil li kortina+ ti jaʼ sventa yochebal amakʼe. 9 Ta tsʼakale, tsako li aseite ti chtun kʼalal oy buchʼu chichʼ tʼujele,+ vaʼun vijbo li axibalnae xchiʼuk skotol li kʼusitik te oy ta yute,+ jmoj xachʼultajes xchiʼuk skotol li kʼusitik te chtun sventa chʼuluk xkome. 10 Sventa toj echʼ xa noʼox chʼul xkom li skajleb matanale, vijbo aseite li skajleb chikʼbil matanale xchiʼuk skotol li kʼusitik te chtune, chʼultajeso li skajleb matanale.+ 11 Jech xtok, vijbo aseite li perol xchiʼuk snaklebe, vaʼun chʼultajeso.

12 »Nopajeso tal ta yochebal karpana sventa tsobobbail li Aaron xchiʼuk xnichʼnabtake, poko ta voʼ.*+ 13 Akʼbo slap Aaron li chʼul kʼuʼil pokʼiletike,+ malbo aseite+ xchiʼuk chʼultajeso sventa xtun kuʼun ta paleal. 14 Ta tsʼakale, nopajeso talel li xnichʼnabtake xchiʼuk akʼbo slapik li kʼuʼil pokʼiletike.+ 15 Sventa xtunik kuʼun ta paleale, skʼan xamalbe aseite jech kʼuchaʼal la amalbe aseite li stotike.+ Ti vaʼ yelan chichʼik malbel aseitee jaʼ skʼan xal ti jaʼ chichʼik-o li abtelal ta paleal ti jaykʼol kuxlejal chtal yuʼunik ta tsʼakale».+

16 Li Moisese jaʼ jech la spas skotol li kʼusitik albat yuʼun Jeovae.+ Jech tajek la spas kʼuchaʼal albate.

17 Li ta sba kʼakʼal yuʼun li sba ue, kʼalal jaʼo xchibal jabile, laj yichʼ vaʼanel li axibalnae.+ 18 Kʼalal la svaʼan axibalna li Moisese, laj yakʼ ta olon li kʼusitik pechajtik ti jomajtik sate,+ la svaʼanbe li steʼeltake,+ la xojbe li skʼatlom teʼaltake+ xchiʼuk la svaʼanbe li yoyaltake. 19 La slamanbe jlik smak li axibalnae,+ jech xtok, la slamanbe yan smak li ta sba+ jech kʼuchaʼal albat mantal yuʼun Jeova li Moisese.

20 Ta tsʼakale la stsak li chaʼpech tone,+ vaʼun la stikʼ ochel ta yut li Kaxae.+ La xojbe li steʼeltake+ xchiʼuk laj yakʼbe smak+ li Kaxae.+ 21 La stikʼ ochel ta yut axibalna li Kaxae. Sventa mu xvinaj ochel ti bu oy li xkaxail Mantale,*+ la sjokʼan li kortina+ jech kʼuchaʼal albat mantal yuʼun Jeova li Moisese.

22 Vaʼun la stikʼ ochel ta karpana sventa tsobobbail li mexae.+ Te laj yakʼ ta snorteal li axibalnae, ta spat ti bu jokʼol li kortinae. 23 Ta sba li mexae te la slats li panetike,+ te laj yakʼ ta yeloval Jeova jech kʼuchaʼal albat mantal yuʼun Jeova li Moisese.

24 La stikʼ ochel ta yut karpana sventa tsobobbail li kandeleroe.+ Te laj yakʼ ta stukʼil li mexae, ta sural li axibalnae. 25 La stsan li kantiletik+ ta yeloval Jeova jech kʼuchaʼal albat mantal yuʼun Jeova li Moisese.

26 Vaʼun la stikʼ ochel ta yut karpana sventa tsobobbail li skajleb matanal pasbil ta oroe,+ te laj yakʼ ta stukʼil ti bu oy li kortinae, 27 taje jaʼ sventa xtometuk muyel xchʼailal*+ yuʼun li pom ti oy sperfumeal+ jech kʼuchaʼal albat mantal yuʼun Jeova li Moisese.

28 Laje, la sjokʼan ta yavil li kortina+ ti jaʼ sventa yochebal axibalnae.

29 Li ta yochebal axibalnae, jaʼ xkaltik, li karpana sventa tsobobbaile, te laj yakʼ li skajleb chikʼbil matanale.+ Taje jaʼ sventa te chakʼ chikʼbil matanal+ xchiʼuk li matanal sat tsʼunobiletik jech kʼuchaʼal albat mantal yuʼun Jeova li Moisese.

30 Li perole te laj yakʼ ta oʼlol yuʼunik li skajleb matanal xchiʼuk li karpana sventa tsobobbaile, la snojes ta voʼ sventa xuʼ te spok yakanik xchiʼuk skʼobik li paleetike.+ 31 Te la spok yakanik xchiʼuk skʼobik li Moises, li Aaron xchiʼuk xnichʼnabtake. 32 Jujun velta kʼalal ch-ochik ta karpana sventa tsobobbaile o kʼalal chnopajik batel li ta skajleb matanale, tspok yakanik xchiʼuk skʼobik+ jech kʼuchaʼal albat mantal yuʼun Jeova li Moisese.

33 Ta slajeb xa une la xchapanbe li yamakʼil*+ ta sjoylejal li axibalnae xchiʼuk li skajleb matanale. La sjokʼan ta yavil xtok li kortina ti jaʼ sventa yochebal amakʼe.+

Jaʼ jech tsuts yuʼun spasel abtel li Moisese. 34 Vaʼun, lik volatuk ta tok li karpana sventa tsobobbaile xchiʼuk noj ta smukʼulal Jeova li axibalnae.+ 35 Ta skoj ti jech-o volol ta tok li karpana sventa tsobobbaile, muʼyuk x-och li Moisese. Jech-o noj ta smukʼulal Jeova li axibalnae.+

36 Kʼalal chtoy ta sba axibalna li toke, jaʼo tstots skarpanaik li j-israeletike, jech-o tspasilanik ti butik chbatike.+ 37 Pe kʼalal muʼyuk chtoy li toke, muʼyuk tstots skarpanaik li j-israeletike, jaʼ to tstots skarpanaik mi toy li toke.+ 38 Yuʼun li ta kʼakʼaltike te oy li tok yuʼun Jeovae, yan li ta akʼobaltike te skʼelojik jvol kʼokʼ* ta sba axibalna li j-israeletike, jech kʼot ta pasel ti butik chbatike.+

Literal «te lokʼik ta yoʼ Jakobe».

Literal «xnichʼnabtak Israel».

O «la svaʼanik kapatasetik».

O «tsnakʼik».

O «jnetʼometik; jtam-ololetik».

Kʼelo Glosario, xiʼtael Dios.

O «jnetʼometike; jtam-ololetike».

O «jnetʼometike; jtam-ololetike».

O «jnetʼometike; jtam-ololetike».

O «jnetʼometike; jtam-ololetike».

O «smuk».

O «xmuk».

O «arka; kaja».

Kʼelo Glosario, papiro.

Jaʼ skʼan xal ‹lokʼesbil›, jaʼ xkaltik, laj yichʼ lokʼesel ta voʼ.

O «kʼalal yantik stsatsub batel li Moisese».

O «smuk».

O «yiʼtik».

O «la spakbe skʼoplal».

Jaʼ xkaltik, li Jetroe.

Jaʼ skʼan xal ‹jun jyanlum ti te nakale›.

Literal «ep xa ox kʼakʼal echʼe».

O «smoniʼe; smuniʼe».

O «xloklun; xpulpun».

O «chavichʼik ta mukʼ».

O «jtʼuj».

O «Voʼon chkakʼ ta ilel li kʼusi oy ta koʼonton chkakʼ ta ilele». Kʼelo Apendise A4.

Kʼelo Glosario, lepra.

Literal «ol noʼox ke».

O «kok; xmak xchikin».

Literal «te ta jchiʼin ave».

O «jaʼ yajkʼopojelot Dios chakʼot ta stojolal».

O «smoniʼe; smuniʼe».

O «kuchilu pasbil ta pedernal ton».

Kʼelo Glosario, sirkunsision.

O «sbutsʼ; stsʼutsʼun».

O «kapatasetike».

O «kapatasetike».

O «kapatasetik».

O «kapatasetik».

O «xchopolil».

O «kapatasetik».

O «voʼoxuk ta akojik ti toj chopol chaʼi kikʼkutik li faraon xchiʼuk yajtuneltake».

Literal «la jtoy jkʼob».

Literal «muʼyuk yichʼoj sirkunsision li yanal kee».

O «jech kʼuchaʼal jujutsop soltaroetik».

Literal «muʼyuk yichʼoj sirkunsision li yanal kee».

Literal «lapas ta Dios kuʼun».

Literal «kajsoltarotake».

O «majia ti lek xchanojik».

Jaʼ xkaltik, ti butik chbein yok li Niloe.

O «snakʼoj».

O «avayeb».

O «stiʼ snaik». Kʼelo Glosario, amakʼ.

O «slumal».

O «slumal».

Literal «¡Jaʼ sniʼ skʼob Dios!».

O «xkochetik».

Jaʼ xkaltik, li j-ejiptoetike.

O «xkochetik».

O «xkochetik».

O «xkochetike».

O «Pe mu me achiʼilunkutik ta tajimol xavil».

O «xkochetike».

O «lum».

O «tupʼbel akʼoplal».

Xuʼ van jaʼ skʼoplal ti solel xjaplajet tajek li saksevule o li saktsele.

O «stsʼaylajet».

Kʼelo Glosario, xiʼtael Dios.

Li tsʼibetik ta ebreo kʼope chalbe skʼoplal chaʼtos trigo ti te chchʼi ta voʼneal Ejiptoe, li jtose lekik tajek, yan li jtose jutuktik noʼox.

O «amoltotik».

Literal «ti jaʼ jlik chʼojon ta jtojolaltik».

Yaʼeluke, jaʼ skʼoplal li Moisese.

Literal «mi junuk svoy».

Jaʼ jun kʼox molino ti ta kʼabal chichʼ tunesele. Kʼelo Glosario, stanal molino.

Literal «li sna stotike».

O «muʼyukuk xchopolil».

Literal «kʼalal tsta sba li chib mal kʼakʼale».

Kʼelo Glosario, levadura.

O «xanakʼik».

Literal «tsiniluk me lek achukbenalik».

Literal «chichʼ tuchʼel lokʼel li ta Israele».

Literal «avajsoltarotake».

Literal «chichʼ tuchʼel lokʼel li ta Israele».

Jaʼ xkaltik, chʼiom chijetik o chʼiom tentsunetik.

Kʼelo Glosario, isopo.

Literal «jinesele».

Literal «nail poso».

Jaʼ xkaltik, epal krixchanoetik ti maʼuk j-israeletike, te kapal skʼoplal li j-ejiptoetik eke.

Literal «yajsoltarotak».

Kʼelo Glosario, sirkunsision.

O «pat na».

Literal «soltaroetik».

O «Chʼakbun».

Literal «skotol sba olol ti tsjam alajebale».

Kʼelo Glosario, levadura.

Kʼelo Apendise B15.

Literal «atsʼaktake».

Literal «kakal ta oʼlol xchaʼpʼejal sbekʼ asat».

Literal «skotol li buchʼu tsjam alajebale».

Literal «skotol li kʼusi tsjam alajebale».

Literal «kakal ta oʼlol xchaʼpʼejal sbekʼ asat».

Literal «jtel tok».

Literal «jtel kʼokʼ».

Literal «stoyoj skʼobik».

Literal «jtel tok».

Literal «jtel toke».

O «surtokʼobik».

Jaʼ xkaltik, tetik van ta chib ora ta sob kʼalal ta vakib ora ta sob.

Literal «jtel kʼokʼ».

Literal «jtel toke».

O «smuk; snojes; sbutʼi».

O «surtokʼobik».

Literal «skʼob».

Kʼelo Glosario, xiʼtael Dios.

Literal «Jae». Taje jaʼ skomkom bi li Jeovae.

O «mukik; nojik; butʼijik».

Literal «yoʼonton».

O «ajuchʼta».

O «mukik; nojik; butʼijik».

Kʼelo Glosario, xiʼtael Dios.

Literal «xkʼuxul alajel».

Li «bankilaletik» chal liʼe jaʼ skʼoplal li buchʼu tspas mantal ta jchop nitilulale.

O «chnikik; chbakʼik».

O «ajvaliletik ti oy ta yok skʼob skotol».

O «chijchij takʼin».

Jaʼ skʼan xal ‹chʼa›.

Literal «chiʼ».

O «nioʼe».

Literal «kʼalal tsta sba li chib mal kʼakʼale».

O «voychijetik; jaxpekʼetik».

Te van 2.2 litro. Kʼelo Apendise B14.

O «skomelale».

O «xchabiel savado».

O «xanakʼik».

O «skomelal».

O «snakʼik».

O «la xkuxik».

Xuʼ van te likem ta jpʼel kʼop ta ebreo ti jaʼ skʼan xal ‹¿kʼusi leʼe?›.

O «nakʼbil».

O «nakʼbil».

O «snaʼobil». Yaʼeluke, jaʼ jun kaxa ti te tskʼejik li kʼusitik tstsʼibaik ti jtunel tajek yuʼunike.

O «nakʼel».

Li jun efae jaʼ 22 litro. Kʼelo Apendise B14.

Jaʼ skʼan xal ‹preva› o ‹chichʼ akʼel ta preva›.

Jaʼ skʼan xal ‹saʼkʼop›.

Jaʼ skʼan xal ‹li Jeovae jaʼ jun poste sventa senyail kuʼun›.

Kʼelo Glosario, ajvalilal.

Literal «Jae». Taje jaʼ skomkom bi li Jeovae.

O «smoniʼ; smuniʼ».

O «smoniʼ; smuniʼ».

Jaʼ skʼan xal ‹jun jyanlum ti te nakale›.

Jaʼ skʼan xal ‹jaʼ jkoltavanej li Jdiose›.

O «smoniʼ; smuniʼ».

O «amoniʼune; amuniʼune».

O «smoniʼ; smuniʼ».

O «sbutsʼ; stsʼutsʼun».

O «smoniʼ; smuniʼ».

Literal «ta skʼob Ejiptoe».

O «smoniʼ; smuniʼ».

O «smoniʼ; smuniʼ».

O «smoniʼ; smuniʼ».

O «smoniʼ; smuniʼ».

Kʼelo Glosario, xiʼtael Dios.

O «smoniʼe; smuniʼe».

O «smoniʼe; smuniʼe».

O «ti ep sbalil».

Literal «Mu me xanopajik ta ants».

O «stsʼaylajet».

O «saktsel».

O «Ninik; Bakʼik».

O «xchʼayilal».

O «Mu me xanop kʼop; Mu me xa-epal kʼopoj».

O «saktsele».

O «xchʼayilale».

O «nikik; bakʼik».

Kʼelo Glosario, xiʼtael Dios.

O «mu me anbiluk ton xatunes».

Literal «ti tʼanalote».

Literal «yakʼbel yajnil li kʼusi oy ta sbae».

O «tspas sekuestrar».

O jaʼ van skʼoplal «chmajvan ta junuk abtejebale».

O «svayebe».

Literal «lokʼ li yalabtake».

O «pe mi muʼyuk toj echʼ xa noʼox yayije».

Jaʼ xkaltik, li meʼile o li olole.

Li ta ebreo kʼope jaʼ nefex. Kʼelo Glosario, nefex.

Li jun sikloe jaʼ 11.4 gramo yalal. Kʼelo Apendise B14.

O «tsʼuj».

Literal «yajval chʼene».

O «tsʼiʼlel».

O «snakʼ».

O «oy svokol».

O «prentail; xkʼexol».

Literal «snukulile».

O «slekil koʼonton».

O «jpasmantal».

Jaʼ xkaltik, prensa ti bu tslokʼesik aseite xchiʼuk ti bu tspitsʼik uvae.

O «skomelal».

O «li aʼyej ti pukem skʼoplale».

O «muʼyuk ta jkolta batel li buchʼu chopole».

O «Mu me xatsak michʼob kʼabal».

O «xavojtikinbeik xkuxlejal li jyanlume».

Kʼelo Glosario, levadura.

Kʼelo Apendise B15.

Ojtikinbil xtok kʼuchaʼal Skʼinal Xemanaetik o Pentekostes.

Ojtikinbil xtok kʼuchaʼal Skʼinal Axibalnaetik (Karpanaetik).

O «xanakʼik».

O «tsvalopatinoxuk komel kuʼun li avajkontratake».

O jaʼ van skʼoplal «xiʼel; mukʼta xiʼel».

Jaʼ xkaltik, li Eufratese.

O «stsotsil chij o stsotsil yan chonbolom ti bonbil ta kuxul morado tsoje».

O «te chi-oyi li ta axibalnae».

O «splanoal».

Li jun xukʼubile jaʼ 44.5 sentimetro snatil. Kʼelo Apendise B14.

O «skeoval».

O «kaxa ti chtun ta testigo».

Te van 7.4 sentimetro sjamlej. Kʼelo Apendise B14.

O «volvol».

Li jun talentoe jaʼ 34.2 kilo yalal. Kʼelo Apendise B14.

O «splanoal».

Taje jaʼ stsotsil chij o stsotsil yan chonbolometik.

O «xatsʼisbe».

Li jun xukʼubile jaʼ 44.5 sentimetro snatil. Kʼelo Apendise B14.

Taje jaʼ stsotsil chij o stsotsil yan chonbolometik.

O «xatsʼisbe».

O «kaxa ti chtun ta testigoe».

O «kaxa ti chtun ta testigo».

Taje jaʼ stsotsil chij o stsotsil yan chonbolometik.

Li jun xukʼubile jaʼ 44.5 sentimetro snatil. Kʼelo Apendise B14.

O «stanil ti oy xepuʼale», jaʼ xkaltik, tan ti tʼuxul ta xepuʼal chikʼbil matanale.

O «stiʼ». Kʼelo Glosario, amakʼ.

O «kʼusitik xotajtik; lukajtik» ti jaʼ sventa xichʼ tsʼakel-oe.

O «kʼusitik xotajtik; lukajtik» ti jaʼ sventa xichʼ tsʼakel-oe.

O «stiʼ axibalnae».

O «stiʼ axibalnae».

O «surtokʼobe».

O «stiʼ axibalnae».

Taje jaʼ stsotsil chij o stsotsil yan chonbolometik.

O «stiʼ axibalnae».

O «stiʼ axibalnae».

O «stiʼ axibalnae».

Literal «pʼij yoʼontonike».

Taje jaʼ stsotsil chij o stsotsil yan chonbolometik.

Taje jaʼ stsotsil chij o stsotsil yan chonbolometik.

O «tsʼisbiluk».

O «xchuk chʼutil».

Taje jaʼ stsotsil chij o stsotsil yan chonbolometik.

O «stsʼisomaj».

Taje jaʼ stsotsil chij o stsotsil yan chonbolometik.

Jaʼ xkaltik, ti kʼu sjamlej xakʼ li jkʼobtike, te van 22.2 sentimetro sjamlej. Kʼelo Apendise B14.

Jaʼ jpʼej kʼupil sba ton ti muʼyuk nabil lek kʼu yelane, jaʼ van skʼoplal ambar (pauch), jasinto, opalo o turmalina ton.

O «xchuk chʼutil».

O «xchuk chʼutil».

Kʼelo Glosario, Urim xchiʼuk Tumim.

Jaʼ jtos makobbail tstunesik kʼalal chbatik ta paskʼope.

Jaʼ jtos sat teʼ ti lek tsoj skoloral ti xkoʼolajtik kʼuchaʼal mantsanae.

Taje jaʼ stsotsil chij o stsotsil yan chonbolometik.

Jaʼ jtos sat teʼ ti lek tsoj skoloral ti xkoʼolajtik kʼuchaʼal mantsanae.

Literal «nojesbo skʼobik».

O «xchʼutik».

Kʼelo Glosario, levadura.

O «xchʼutik».

O «xchuk chʼutil».

O «xchʼul senyail ti akʼbil xa ta stojolal Dios li Aarone».

Literal «xanojesbe skʼob li Aaron xchiʼuk li skʼob xnichʼnabtake».

O «skomelal».

O «xchʼayilal».

O «stsoʼe».

O «xchʼayilal».

O «ti chakʼ jun oʼontonale». Literal «slamajes oʼontonale».

O «jun yoʼonton yuʼun». Literal «slamajes oʼontonal».

Literal «nojesbel skʼobike».

Literal «yan krixchano», jaʼ xkaltik, jun krixchano ti maʼuk yutsʼ yalal Aarone.

Literal «xanojesbe skʼobik».

Literal «kʼalal tsta sba li chib mal kʼakʼale».

Li jun efae jaʼ 22 litro. Kʼelo Apendise B14.

Literal «jun kuarto in». Li jun ine jaʼ 3.67 litro. Kʼelo Apendise B14.

Literal «kʼalal tsta sba li chib mal kʼakʼale».

O «chakʼ jun oʼontonale». Literal «tslamajes oʼontonale».

O «te chi-oyi li ta axibalnae».

Li jun xukʼubile jaʼ 44.5 sentimetro snatil. Kʼelo Apendise B14.

O «kaxa ti chtun ta testigoe».

O «xchʼayilal».

Literal «kʼalal tsta sba li chib mal kʼakʼale».

Li jun sikloe jaʼ 11.4 gramo yalal. Kʼelo Apendise B14.

Li jun guerae jaʼ 0.57 gramo yalal. Kʼelo Apendise B14.

Li jun sikloe jaʼ 11.4 gramo yalal. Kʼelo Apendise B14.

O «xchʼayilal».

Literal «jun in». Li jun ine jaʼ 3.67 litro. Kʼelo Apendise B14.

O «jechuk me kapbil xkom jech kʼuchaʼal tspas li buchʼu jaʼ yabtel-oe».

O «kaxa ti chtun ta testigo».

Literal «yan krixchano», jaʼ xkaltik, jun krixchano ti maʼuk yutsʼ yalal Aarone.

Kʼelo Glosario, sakil pom.

O «jechuk me kapbil xkom avuʼun jech kʼuchaʼal tspas li buchʼu jaʼ yabtel-oe».

Literal «la jtak ta ikʼel ta sbi».

Literal «pʼij yoʼontonike».

O «kaxa ti chtun ta testigo».

O «chaʼpech ton ti chtun kʼuchaʼal testigoe».

Literal «teʼtsinan snukʼ».

O «chopoluk xavaʼi aba».

O «chopol laj yaʼi sba ta skoj».

O «chaʼpech ton ti chtun kʼuchaʼal testigoe».

Literal «Nojeso akʼobik».

Literal «teʼtsinan anukʼike».

Literal «teʼtsinan anukʼike».

Literal «la slokʼesik».

Literal «jtel toke».

Literal «jtel toke».

O «Laj xa jtʼujot».

Literal «Li jsate».

O «slekil yutsil oʼontonal».

O «tukʼ yoʼonton».

Literal «teʼtsinan jnukʼkutike».

Kʼelo Glosario, chʼul poste.

O «ti mu stsʼik yuʼun ti oy yan xkʼexole».

Kʼelo Glosario, levadura.

Kʼelo Apendise B15.

Literal «skotol li kʼusi tsjam alajebale».

O «skʼan xachabi savado».

Ojtikinbil xtok kʼuchaʼal Skʼinal Axibalnaetik (Karpanaetik).

O «xanakʼik».

Taje jaʼ skʼoplal li Diose.

Literal «li Lajunpʼel Kʼope». Ojtikinbil kʼuchaʼal Decálogo xtok.

O «xojobinaj».

O «xojobinaj».

O «xojobinaj».

Taje jaʼ stsotsil chij o stsotsil yan chonbolometik.

Literal «pʼij yoʼontonik».

O «stiʼe». Kʼelo Glosario, amakʼ.

O «stiʼe». Kʼelo Glosario, amakʼ.

O «baj jolil».

O «Laj yakʼbeik ta yebil matanal».

Taje jaʼ stsotsil chij o stsotsil yan chonbolometik.

Taje jaʼ stsotsil chij o stsotsil yan chonbolometik.

Literal «yakʼbe spʼijil yoʼontonik».

O «tsʼisom».

O «jalob».

Taje jaʼ stsotsil chij o stsotsil yan chonbolometik.

Literal «skotol viniketik ti pʼij yoʼontonik».

Taje jaʼ stsotsil chij o stsotsil yan chonbolometik.

O «stsʼisbe».

Li jun xukʼubile jaʼ 44.5 sentimetro snatil. Kʼelo Apendise B14.

Taje jaʼ stsotsil chij o stsotsil yan chonbolometik.

O «stsʼisbe».

Taje jaʼ stsotsil chij o stsotsil yan chonbolometik.

O «kʼusitik xotajtik; lukajtik» ti jaʼ sventa xichʼ tsʼakel-oe.

Li jun xukʼubile jaʼ 44.5 sentimetro snatil. Kʼelo Apendise B14.

O «skeoval».

Te van 7.4 sentimetro sjamlej. Kʼelo Apendise B14.

O «volvol».

Li jun talentoe jaʼ 34.2 kilo yalal. Kʼelo Apendise B14.

O «jech kapbil kom jech kʼuchaʼal tspas li buchʼu jaʼ yabtel-oe».

Li jun xukʼubile jaʼ 44.5 sentimetro snatil. Kʼelo Apendise B14.

Jaʼ xkaltik, nenetik pasbil ta takʼin ti lek chʼulbile.

O «stiʼ axibalnae». Kʼelo Glosario, amakʼ.

O «kʼusitik xotajtik; lukajtik» ti jaʼ sventa xichʼ tsʼakel-oe.

O «kʼusitik xotajtik; lukajtik» ti jaʼ sventa xichʼ tsʼakel-oe.

O «stiʼ axibalna».

O «kʼusitik xotajtik; lukajtik» ti jaʼ sventa xichʼ tsʼakel-oe.

O «stiʼ axibalna».

O «surtokʼobe».

O «stiʼ axibalnae».

O «kʼusitik xotajtik; lukajtik» ti jaʼ sventa xichʼ tsʼakel-oe.

O «stiʼ axibalnae».

O «stiʼ axibalnae».

Taje jaʼ stsotsil chij o stsotsil yan chonbolometik.

O «kʼusitik xotajtik; lukajtik» ti jaʼ sventa xichʼ tsʼakel-oe.

O «stiʼ axibalnae».

O «stsʼisomaj».

Taje jaʼ stsotsil chij o stsotsil yan chonbolometik.

Li jun talentoe jaʼ 34.2 kilo yalal. Kʼelo Apendise B14.

Li jun sikloe jaʼ 11.4 gramo yalal. Kʼelo Apendise B14.

O «yebil matanale».

O «stiʼ axibalnae».

Taje jaʼ stsotsil chij o stsotsil yan chonbolometik.

Taje jaʼ stsotsil chij o stsotsil yan chonbolometik.

Taje jaʼ stsotsil chij o stsotsil yan chonbolometik.

O «tsʼisel».

O «xchuk chʼutil».

Taje jaʼ stsotsil chij o stsotsil yan chonbolometik.

O «stsʼis».

Taje jaʼ stsotsil chij o stsotsil yan chonbolometik.

Te van 22.2 sentimetro sjamlej. Kʼelo Apendise B14.

Jaʼ jpʼej kʼupil sba ton ti muʼyuk nabil lek kʼu yelane, jaʼ van skʼoplal ambar (pauch), jasinto, opalo o turmalina ton.

O «xchuk chʼutile».

O «xchuk chʼutil».

Jaʼ jtos makobbail tstunesik kʼalal chbatik ta paskʼope.

Jaʼ jtos sat teʼ ti lek tsoj skoloral ti xkoʼolajtik kʼuchaʼal mantsanae.

Taje jaʼ stsotsil chij o stsotsil yan chonbolometik.

Jaʼ jtos sat teʼ ti lek tsoj skoloral ti xkoʼolajtik kʼuchaʼal mantsanae.

Jaʼ jtos sat teʼ ti lek tsoj skoloral ti xkoʼolajtik kʼuchaʼal mantsanae.

Taje jaʼ stsotsil chij o stsotsil yan chonbolometik.

O «jun xchʼul senyail ti akʼbil xa ta stojolal Dios li Aarone».

O «kaxa ti chtun ta testigoe».

O «stiʼ axibalnae». Kʼelo Glosario, amakʼ.

O «kaxa ti chtun ta testigoe».

O «kaxa ti chtun ta testigoe».

O «stiʼ axibalnae». Kʼelo Glosario, amakʼ.

Xuʼ van jaʼ skʼoplal ti ch-albatik yuʼun Moises ti akʼo atinikuke.

O «kaxa ti chtun ta testigoe».

O «xchʼayilal».

O «stiʼ».

Literal «jtel kʼokʼ».

    Vunetik ta tsotsil (2001-2025)
    Lokʼan
    Ochan
    • tsotsil
    • Tako batel
    • Ti kʼu yelan chak'ane
    • Copyright © 2025 Watch Tower Bible and Tract Society of Pennsylvania
    • Ti kʼutik yelan xuʼ xichʼ tunesele
    • Política de privacidad
    • Configuración de privacidad
    • JW.ORG
    • Ochan
    Tako batel