Li kʼusi mu stakʼ xapas kʼalal chavakʼ estudioe

Mu epuk xakʼopoj. Maʼuk me voʼot skʼan xavalbe smelolal skotol. Li Jesuse la tstunes sjakʼobiltak yoʼ skolta li krixchanoetik sventa lekuk kʼusi chkʼot ta nopel yuʼunike (Mt 17:24-27). Kʼalal chichʼ tunesel sjakʼobiltake mas me chichʼ kʼupinel li estudioe, te me chkakʼtik venta kʼusi xchʼunoj li buchʼu chkakʼbetik estudioe xchiʼuk mi yakal chaʼibe smelolal li kʼusi yakal chchane (be paj. 253 par. 3, 4). Kʼalal oy kʼusi chajakʼbee, oyuk smalael avuʼun xchiʼuk malao ti akʼo stakʼe. Mi mu xtakʼ yuʼune, mu xavalbe li stakʼobile, jaʼ lek ti xavalbe yan sjakʼobil sventa xaʼibe smelolale (be paj. 238 par. 1, 2). Sventa xaʼibe smelolal li kʼusi yakal chchan li buchʼu chichʼ estudioe, mu me toj aniluk xakʼopoj (be paj. 230 par. 4).

Mu jtsatsubtastik li kʼusi chal parafoe. Mi anaʼojbe xa skʼoplal li kʼusi yakal chachanike, mu me persauk voʼot xachapbe skʼoplal skotol (Jn 16:12). Jaʼuk xavalbe smelolal li kʼusi mas tsots skʼoplale (be paj. 226 par. 4, kʼalal ta paj. 227 par. 1). Mi jaʼ chkaltik skotol li kʼusi jsetʼ-jutebe, akʼo me toj tsots skʼoplal, xuʼ mu xa xaʼibeik smelolal li kʼusi mas tsots skʼoplal ta parafoe (be paj. 235 par. 3). Mi laj xa yaʼibe smelolal li avaj-estudioe, jelavanik batel ta yan parafo.

Jaʼ noʼox xatunes li aʼyej yichʼoje. Li kʼusi ta jkʼantike jaʼ ti xkʼot ta yoʼonton li mantale, mu jaʼuk noʼox ta jchantik batel (Lu 24:32). Kʼalal jaʼ chichʼ albel skʼoplal li teksto ti mas tsots skʼoplale, lek me yakal chichʼ tunesel li Skʼop Diose (2Ko 10:4; Evr 4:12; be paj. 144 par. 1-3). Tuneso lokʼolkʼopetik ti kʼunik ta aʼiele (be paj. 245 par. 2-4). Tsako ta venta li kʼusi vokol chaʼiik xchiʼuk li kʼusi xchʼunojik li buchʼutik chichʼik estudioe, vaʼun jaʼ jech xachanubtas li kʼu yelan xkuxlejalike. Xuʼ xi xajakʼbee: «¿Kʼusi chanop ta sventa li kʼusi yakal chachane? ¿Kʼusi chchanubtasutik ta sventa Jeova? ¿Kʼusi sbalil chatabe xanaʼ mi laj avakʼ ta akuxlejal li tojobtasel liʼe?» (be paj. 238 par. 3-5; paj. 259 par. 1).