ÌWÉ KEJÌ SÍ ÀWỌN ARÁ TẸSALÓNÍKÀ

1 Pọ́ọ̀lù, Sílífánù* àti Tímótì,+ sí ìjọ àwọn ará Tẹsalóníkà ní ìṣọ̀kan pẹ̀lú Ọlọ́run, Baba wa àti Jésù Kristi Olúwa:

2 Kí ẹ ní inú rere àìlẹ́tọ̀ọ́sí àti àlàáfíà látọ̀dọ̀ Ọlọ́run tó jẹ́ Baba àti Jésù Kristi Olúwa.

3 Ẹ̀yin ará, ó di dandan fún wa láti máa dúpẹ́ lọ́wọ́ Ọlọ́run nígbà gbogbo nítorí yín. Ó yẹ bẹ́ẹ̀, torí pé ìgbàgbọ́ yín ń lágbára sí i, ìfẹ́ tí ẹ ní sí ara yín lẹ́nì kọ̀ọ̀kan àti lápapọ̀ sì ń pọ̀ sí i.+ 4 Nítorí èyí, à ń fi yín yangàn+ láàárín ìjọ Ọlọ́run nítorí ìfaradà àti ìgbàgbọ́ yín nínú gbogbo inúnibíni àti àwọn ìṣòro* tí ẹ̀ ń dojú kọ.*+ 5 Èyí jẹ́ ẹ̀rí ìdájọ́ òdodo Ọlọ́run, tó ń mú kí a kà yín yẹ fún Ìjọba Ọlọ́run tí ẹ̀ ń torí rẹ̀ jìyà.+

6 Èyí jẹ́ nítorí pé Ọlọ́run kà á sí òdodo láti san ìpọ́njú pa dà fún àwọn tó ń pọ́n yín lójú.+ 7 Àmọ́ ẹ̀yin tí ẹ̀ ń ní ìpọ́njú máa rí ìtura gbà pẹ̀lú wa nígbà ìfihàn Jésù Olúwa+ láti ọ̀run pẹ̀lú àwọn áńgẹ́lì rẹ̀ alágbára+ 8 nínú iná tó ń jó fòfò, bó ṣe ń mú ẹ̀san wá sórí àwọn tí kò mọ Ọlọ́run àti àwọn tí kò ṣègbọràn sí ìhìn rere nípa Jésù Olúwa wa.+ 9 Àwọn yìí máa fara gbá ìyà ìdájọ́ ìparun ayérayé+ láti iwájú Olúwa àti látinú ògo agbára rẹ̀, 10 nígbà tó bá dé kí a lè yìn ín lógo pẹ̀lú àwọn ẹni mímọ́ rẹ̀, kí gbogbo àwọn tó ní ìgbàgbọ́ sì lè wò ó ní ọjọ́ yẹn tìyanutìyanu, nítorí ẹ gba ẹ̀rí tí a jẹ́ fún yín gbọ́.

11 Torí bẹ́ẹ̀, à ń gbàdúrà fún yín nígbà gbogbo pé kí Ọlọ́run wa kà yín yẹ fún ìpè rẹ̀,+ kó sì fi agbára rẹ̀ ṣe gbogbo ohun rere tó wù ú láṣepé pẹ̀lú gbogbo iṣẹ́ ìgbàgbọ́. 12 Kí a lè yin orúkọ Olúwa wa Jésù lógo nínú yín, kí a sì yin ẹ̀yin náà lógo nínú rẹ̀, nítorí inú rere àìlẹ́tọ̀ọ́sí Ọlọ́run wa àti ti Jésù Kristi Olúwa.

2 Àmọ́, ẹ̀yin ará, ní ti wíwàníhìn-ín Olúwa wa Jésù Kristi+ àti kíkó wa jọ sọ́dọ̀ rẹ̀,+ a rọ̀ yín 2 kí ọkàn yín má tètè mì tàbí kí ó dà rú nítorí ọ̀rọ̀ onímìísí*+ tàbí nítorí iṣẹ́ tí a fẹnu jẹ́ tàbí nítorí lẹ́tà kan tó dà bíi pé ó wá látọ̀dọ̀ wa, tó ń sọ pé ọjọ́ Jèhófà*+ ti dé.

3 Ẹ má ṣe jẹ́ kí ẹnì kankan kó yín ṣìnà* lọ́nàkọnà, nítorí kò ní dé láìjẹ́ pé ìpẹ̀yìndà+ kọ́kọ́ dé, tí a sì fi ọkùnrin arúfin+ hàn, ìyẹn ọmọ ìparun.+ 4 Alátakò ni, ó sì gbé ara rẹ̀ lékè gbogbo àwọn tí wọ́n ń pè ní ọlọ́run tàbí ohun ìjọsìn,* tó fi jẹ́ pé ó jókòó nínú tẹ́ńpìlì Ọlọ́run, ó sì ń fi ara rẹ̀ hàn ní gbangba pé òun jẹ́ ọlọ́run. 5 Ṣé ẹ rántí pé nígbà tí mo ṣì wà pẹ̀lú yín, mo máa ń sọ àwọn nǹkan yìí fún yín?

6 Ní báyìí, ẹ mọ ohun tó ń ṣèdíwọ́ kó má bàa fara hàn ṣáájú àkókò rẹ̀. 7 Lóòótọ́, àṣírí ìwà ìkà yìí ti wà lẹ́nu iṣẹ́,+ àmọ́ ó dìgbà tí ẹni tó ń ṣèdíwọ́ ní báyìí bá kúrò lọ́nà. 8 Lẹ́yìn náà, a ó fi arúfin náà hàn, ẹni tí Jésù Olúwa máa fi ẹ̀mí ẹnu rẹ̀ pa,+ tí á sì sọ di asán nígbà tó bá ṣe kedere+ pé ó ti wà níhìn-ín. 9 Àmọ́ ohun tó mú kí arúfin náà wà níhìn-ín jẹ́ iṣẹ́ ọwọ́ Sátánì+ pẹ̀lú gbogbo iṣẹ́ agbára àti àwọn iṣẹ́ àmì àti iṣẹ́ ìyanu* tó jẹ́ irọ́ + 10 pẹ̀lú gbogbo ẹ̀tàn àìṣòdodo  + fún àwọn tó ń ṣègbé, gẹ́gẹ́ bí ẹ̀san iṣẹ́ wọn nítorí pé wọn ò gba ìfẹ́ òtítọ́ kí wọ́n lè rí ìgbàlà. 11 Ìdí nìyẹn tí Ọlọ́run fi jẹ́ kí ohun tó ń ṣiṣẹ́ ẹ̀tàn kó wọn ṣìnà, kí wọ́n lè gba irọ́ gbọ́,+ 12 kí a lè dá gbogbo wọn lẹ́jọ́ torí pé wọn ò gba òtítọ́ gbọ́, kàkà bẹ́ẹ̀ ṣe ni wọ́n ń fi àìṣòdodo ṣayọ̀.

13 Síbẹ̀, ó di dandan fún wa láti máa dúpẹ́ lọ́wọ́ Ọlọ́run nígbà gbogbo nítorí yín, ẹ̀yin ará tí Jèhófà* nífẹ̀ẹ́, torí pé àtìbẹ̀rẹ̀ ni Ọlọ́run ti yàn yín+ fún ìgbàlà nípa fífi ẹ̀mí rẹ̀ sọ yín di mímọ́+ àti nípa ìgbàgbọ́ yín nínú òtítọ́. 14 Ó tipasẹ̀ ìhìn rere tí à ń kéde pè yín sí èyí, kí ẹ lè ní ògo Olúwa wa Jésù Kristi.+ 15 Nítorí náà, ẹ̀yin ará, ẹ dúró gbọn-in,+ kí ẹ sì di àwọn àṣà tí a fi kọ́ yín mú ṣinṣin,+ ì báà jẹ́ nípasẹ̀ iṣẹ́ tí a fẹnu jẹ́ tàbí nípasẹ̀ lẹ́tà látọ̀dọ̀ wa. 16 Jù bẹ́ẹ̀ lọ, kí Olúwa wa Jésù Kristi fúnra rẹ̀ àti Ọlọ́run, Baba wa, ẹni tó nífẹ̀ẹ́ wa,+ tó sì fún wa ní ìtùnú ayérayé àti ìrètí rere+ nípasẹ̀ inú rere àìlẹ́tọ̀ọ́sí, 17 tu ọkàn yín lára, kó sì fìdí yín múlẹ̀ gbọn-in* nínú gbogbo iṣẹ́ rere àti ọ̀rọ̀ rere.

3 Lákòótán, ẹ̀yin ará, ẹ máa gbàdúrà fún wa,+ kí ọ̀rọ̀ Jèhófà* lè máa gbilẹ̀ kíákíá,+ kí a sì máa ṣe é lógo, bó ṣe rí lọ́dọ̀ yín, 2 kí a lè gbà wá lọ́wọ́ àwọn ẹni ibi àti èèyàn burúkú,+ nítorí ìgbàgbọ́ kì í ṣe ohun ìní gbogbo èèyàn.+ 3 Àmọ́ olóòótọ́ ni Olúwa, yóò fún yín lókun, yóò sì dáàbò bò yín kúrò lọ́wọ́ ẹni burúkú náà. 4 Yàtọ̀ síyẹn, bí a ṣe wà nínú Olúwa, a ní ìgbẹ́kẹ̀lé nínú yín pé ẹ̀ ń ṣe àwọn ohun tí a sọ fún yín, ẹ ó sì máa ṣe wọ́n nìṣó. 5 Kí Olúwa máa darí ọkàn yín sínú ìfẹ́ Ọlọ́run+ àti sínú ìfaradà+ fún Kristi.

6 Ní báyìí ẹ̀yin ará, à ń fún yín ní ìtọ́ni ní orúkọ Jésù Kristi Olúwa wa, pé kí ẹ fà sẹ́yìn kúrò lọ́dọ̀ gbogbo arákùnrin tó ń rìn ségesège,+ tí kì í ṣe gẹ́gẹ́ bí àṣà* tí ẹ* gbà lọ́dọ̀ wa.+ 7 Nítorí ẹ̀yin fúnra yín mọ bó ṣe yẹ kí ẹ fara wé wa,+ torí a ò ṣe ségesège láàárín yín, 8 bẹ́ẹ̀ la ò jẹ oúnjẹ ẹnikẹ́ni lọ́fẹ̀ẹ́.*+ Kàkà bẹ́ẹ̀, nínú òpò* àti làálàá, à ń ṣiṣẹ́ tọ̀sántòru kí a má bàa gbé ẹrù tó wúwo wọ ìkankan nínú yín lọ́rùn.+ 9 Kì í ṣe pé a ò ní àṣẹ,+ àmọ́ a fẹ́ fi ara wa ṣe àpẹẹrẹ fún yín kí ẹ lè máa fara wé wa.+ 10 Kódà, nígbà tí a wà lọ́dọ̀ yín, a máa ń pa àṣẹ yìí fún yín pé: “Tí ẹnikẹ́ni ò bá fẹ́ ṣiṣẹ́, kó má jẹun.”+ 11 Nítorí a gbọ́ pé àwọn kan ń rìn ségesège láàárín yín,+ wọn ò ṣiṣẹ́ rárá, ṣe ni wọ́n ń tojú bọ ohun tí kò kàn wọ́n.+ 12 Irú àwọn ẹni bẹ́ẹ̀ ni a pa àṣẹ fún, tí a sì gbà níyànjú nínú Jésù Kristi Olúwa pé kí wọ́n gbájú mọ́ iṣẹ́ wọn, kí wọ́n sì máa jẹ oúnjẹ tí àwọn fúnra wọn ṣiṣẹ́ fún.+

13 Ní tiyín, ẹ̀yin ará, ẹ má ṣe jẹ́ kó sú yín láti máa ṣe rere. 14 Àmọ́ tí ẹnikẹ́ni ò bá ṣègbọràn sí ọ̀rọ̀ tí a sọ nínú lẹ́tà yìí, ẹ sàmì sí ẹni náà, ẹ má sì bá a kẹ́gbẹ́ mọ́,+ kí ojú lè tì í. 15 Síbẹ̀, ẹ má kà á sí ọ̀tá, àmọ́ ẹ máa gbà á níyànjú+ bí arákùnrin.

16 Tóò, kí Olúwa àlàáfíà máa fún yín ní àlàáfíà nígbà gbogbo àti ní gbogbo ọ̀nà.+ Kí Olúwa wà pẹ̀lú gbogbo yín.

17 Ìkíni èmi Pọ́ọ̀lù nìyí, tí mo fi ọwọ́ ara mi kọ,+ ó jẹ́ àmì nínú gbogbo lẹ́tà mi; bí mo ṣe máa ń kọ̀wé nìyí.

18 Kí inú rere àìlẹ́tọ̀ọ́sí Olúwa wa Jésù Kristi wà pẹ̀lú gbogbo yín.