Mú Kí Iṣẹ́ Òjíṣẹ́ Rẹ Sunwọ̀n Sí I—Máa Fi Fóònù Wàásù

Ìdí Tó Fi Ṣe Pàtàkì: Torí pé ọ̀nà míì ló jẹ́ láti ran àwọn èèyàn lọ́wọ́ kí wọ́n lè gba ìmọ̀ pípéye sínú, èyí tó lè mú kí wọ́n rí ìgbàlà. (2 Pét. 3:9) Bó tiẹ̀ jẹ́ pé ìwàásù ilé-dé-ilé ni ọ̀nà pàtàkì tá à ń gbà kéde Ìjọba Ọlọ́run, tọkàntọkàn la fi máa ń lo àwọn ọ̀nà míì láti wàásù fáwọn tí kì í fi bẹ́ẹ̀ gbélé.—Mát. 24:14; Lúùkù 10:1-7; Ìṣí. 14:6.

Bó O Ṣe Lè Ṣe É:

Tó o bá ń fi fóònù wàásù, ó yẹ kí ìnasẹ̀ ọ̀rọ̀ rẹ tuni lára, kí ọ̀rọ̀ sì yọ̀ mọ́ ẹ lẹ́nu. Àwọn kan tó ṣẹ̀ṣẹ̀ bẹ̀rẹ̀ sí í fi fóònù wàásù lè ka ìnasẹ̀ ọ̀rọ̀ wọn jáde lọ́nà tó tuni lára tó sì já geere.
Ní Àwọn ọ̀rọ̀ tá a lè fi bẹ̀rẹ̀ ìwàásù tó wà nínú ìwé Bí A Ṣe Lè Bẹ̀rẹ̀ Awọn Ìjíròrò Bibeli Kí A Sì Máa Báa Nìṣó, Iṣẹ́ Òjíṣẹ́ Ìjọba Wa àti ìwé àṣàrò kúkúrú náà, Ṣé Wàá Fẹ́ Mọ Òtítọ́? lè ṣèrànwọ́ gan-an. Tó o bá fẹ́ múra ìnasẹ̀ ọ̀rọ̀ tó o máa lò, wá kókó tó o fẹ́ kí ọ̀rọ̀ rẹ dá lé, ronú nípa ìbéèrè tó o lè bi onítọ̀hún lórí kókó náà, kó o sì múra sílẹ̀ láti ka ẹsẹ Bíbélì bíi mélòó kan tó dáhùn ìbéèrè náà.
Lo àwọn ìtẹ̀jáde tá a máa ń lò lẹ́nu iṣẹ́ ìwàásù ilé-dé-ilé.
Fara balẹ̀, kó o sì rọra máa sọ̀rọ̀. Sọ̀rọ̀ lọ́nà tó fọ̀wọ̀ hàn, ṣe sùúrù, kó o sì jẹ́ kí ọ̀rọ̀ rẹ tuni lára, torí pé àwọn nǹkan yìí máa hàn nínú ohùn rẹ bí onítọ̀hún ṣe ń gbọ́ ẹ. Fetí sílẹ̀ bí ẹni tó ò ń bá sọ̀rọ̀ bá ń sọ èrò rẹ̀, jẹ́ kó mọ̀ pé o gbọ́ ohun tó sọ, kó o sì dúpẹ́ lọ́wọ́ rẹ̀ fún àlàyé tó ṣe.
Ṣọ́ra láti má ṣe sọ̀rọ̀ nípa ọrẹ tá a máa ń gbà, torí pé àwọn èèyàn lè rò pé ńṣe lò ń dọ́gbọ́n tọrọ owó látorí fóònù.

Gbìyànjú Èyí Lóṣù Yìí:

Nígbà ìjọsìn ìdílé yín, ẹ ṣe ìdánrawò bí ẹ ṣe lè lo ẹ̀rọ ìbánisọ̀rọ̀ ẹnu ọ̀nà láti fi bá onílé sọ̀rọ̀. Kí ẹni tó máa ṣe bí onílé àti ẹni tó fẹ́ wàásù wà níbi tó jìnnà síra wọn.