**Mú Kí Iṣẹ́ Òjíṣẹ́ Rẹ Sunwọ̀n Sí I —Bí O Ṣe Lè Fi Ìwé Bíbélì Fi Kọ́ni Lọni**

Ìdí Tó Fi Ṣe Pàtàkì: Ọ̀kan pàtàkì lára àwọn ìwé tá a fi ń kọ́ àwọn èèyàn lẹ́kọ̀ọ́ ni ìwé Bíbélì Fi Kọ́ni. Àmọ́, ká tó lè máa fi ìwé yìí kọ́ ẹnì kan lẹ́kọ̀ọ́, ó yẹ ká ti kọ́kọ́ fún un. Torí náà, ó yẹ kí gbogbo wa sapá láti mọ bí a ṣe ń fi ìwé Bíbélì Fi Kọ́ni lọni lọ́nà tó já fáfá lóde ẹ̀rí. (Òwe 22:29) Onírúurú ọ̀nà la lè gbà fi ìwé yìí lọni, a sì lè lò ó lọ́nà kan tá a ti rí i pé ó gbéṣẹ́.

Bó O Ṣe Lè Ṣe É:

Bi ẹni tó o fẹ́ bá sọ̀rọ̀ ní ìbéèrè tó máa jẹ́ kó fẹ́ mọ púpọ̀ sí i, èyí táá jẹ́ kó o lè bá a jíròrò orí kan pàtó nínú ìwé náà. Kódà o lè yan ọ̀kan lára àwọn ìbéèrè tó wà ní ìbẹ̀rẹ̀ orí kọ̀ọ̀kan. Lẹ́yìn tí ẹni náà bá ti dáhùn ìbéèrè tó o bi í, ka ẹsẹ Bíbélì tó dáhùn ìbéèrè náà, kó o wá fi ìpínrọ̀ tó sọ̀rọ̀ nípa ìbéèrè tó o bi í hàn án, ẹ sì lè jọ jíròrò rẹ̀ ní ṣókí.
Ọ̀nà míì tó o lè gbà lo ìwé yìí ni pé kó o fi ojú ìwé kẹta sí ìkẹfà nínú ìwé náà han onílé láti jẹ́ kó nífẹ̀ẹ́ sí ìkẹ́kọ̀ọ́, kó o wá fi ohun tí Bíbélì sọ nínú rẹ̀ hàn án. Bí àpẹẹrẹ, o lè sọ̀rọ̀ nípa àjálù kan tó wáyé lẹ́nu àìpẹ́ yìí tó o gbọ́ nínú ìròyìn, kó o wá sọ fún un pé ọ̀pọ̀ èèyàn ló máa ń ṣe kàyéfì nípa ohun tí ìdáhùn àwọn ìbéèrè tó wà lójú ìwé 3 máa jẹ́. O sì lè sọ pé àwọn ohun rere tó máa ṣẹlẹ̀ lọ́jọ́ ọ̀la lò ń sọ fáwọn aládùúgbò rẹ. Lẹ́yìn náà fi àwòrán tó wà lójú ìwé 4 àti 5 hàn án, kó o wá bí i pé: “Èwo lára àwọn ìlérí tó wà níbí ló wù ọ́ jù pé kó nímùúṣẹ?” Ohùn míì tó o lè ṣe ni pé kó o sọ pé a wá ṣèbẹ̀wò ráńpẹ́ sọ́dọ̀ yín ká lè jọ wá ìdáhùn sí àwọn ìbéèrè pàtàkì nípa ìgbésí ayé. Fi àwọn ìbéèrè tó wà lápá ìsàlẹ̀ ojú ìwé 6 hàn án kó o wá bi í pé èwo nínú àwọn ìbéèrè yìí ló fẹ́ kẹ́ ẹ jọ jíròrò.
Fi ìkẹ́kọ̀ọ́ Bíbélì lọ ẹni náà ní tààràtà. O lè sọ pé: “À wá fi ìwé tí a fi ń bá àwọn èèyàn ṣe ìkẹ́kọ̀ọ́ Bíbélì yìí han àwọn aládùúgbò wa. Ṣé o ti rí ìwé yìí rí? [Jẹ́ kó fèsì.] Tó o bá lè fún mi ní ìṣẹ́jú díẹ̀, màá fi hàn ẹ́ bí a ṣe lè lo Bíbélì tìẹ àti ìwé yìí láti fi ṣe ìkẹ́kọ̀ọ́ Bíbélì.”

Gbìyànjú Èyí Lóṣù Yìí:

Ṣe ìdánrawò bí o ṣe lè lo ìwé yìí nígbà ìjọsìn ìdílé yín.
Tó o bá wà lóde ẹ̀rí, sọ bó o ṣe fẹ́ fi ìwé yìí lọni fún akéde tẹ́ ẹ jọ ń ṣiṣẹ́. (Òwe 27:17) O lè yí ọ̀nà ìgbọ́rọ̀kalẹ̀ rẹ padà tó o bá rí i pé kò gbéṣẹ́ tó.