Diciembre

¿Jeowara zarea barabʉka ẽbẽra beida jẽda piradrʉbira? Mawũã, Jeowabara nejõma oseabʉ (Apoc. 1:8). Jeowara mejãcha zarea barabʉ iyi nejʉra baduta jõbita akʉza beibʉsida (1 Cor. 15:26). Adewara ĩjãpanʉ Jeowaba ẽbẽra beidara jẽda piradrʉbita iyi burudera jõma jẽda kĩrãbeseabʉ baera. Jeowabara chĩdau aba abaka trʉ̃bʉ ãyi trʉ̃neba (Is. 40:26). Maʉ̃ba jõma biʼia kĩrãbebʉ yi beidarãra (Job 14:13; Luc. 20:38). Jeowabara jõma jẽda kĩrãbeseabʉ ẽbẽra beida sãwũãbadata, iyi kakuata, iyi kĩrãta akʉza iyi buru sãwũãbadata. Adewara jõma jẽda kĩrãbebiseabʉ ẽbẽra beida burude sãwũã krĩchabadara. Dayirãbara wãrĩnu ĩjãseabʉ Jeowaba ẽbẽrarã jẽda piradrʉbi ʉ̃rʉra, iyira zarea barabʉ baera akʉza okĩrãbʉ baera maʉ̃ta. Adewara dayirãbara Jeowa ʉ̃rʉ ĩjãseapanʉ, iya naena ẽbẽra beidara jẽda piradrʉbisi baera. Daizeze Bedʼeadera eda jarabʉ Jeowabara zarea diasita ẽbẽrarã iyiʉ̃me kʼẽrẽpapanʉra, ẽbẽra beidata jẽda piradrʉbimarẽã. Maʉ̃ mawũã zarea diadadebemara basi yi warra Jesuta. w23.04 9, 10 parr. 7-9

Dayirãba ẽbẽrarã ibiade panʉbʉbʉrʉ akʉza urumʉ̃rʉãbʉta ũdubipanʉbʉrʉ wuabemarabara ũrĩkĩrãñi dayi bedʼeara akʉza dayirãʉ̃me audre bedʼeakĩrãnañi. Mamina ẽbẽra abaʉba dayirã widibʉbʉrʉ bari dayirãʉ̃me bedʼeakaya, kʼãrẽa panʉira neẽ dayirãbara (Prov. 26:4). Mamina audrebʉ yi ẽbẽrarã ũrĩkĩrãpanʉrãra. Jipade yibia dayirãba zarea oita urumʉ̃rʉãpanaita. Jeowa yiwidʼira zarea diamarẽã bʉa ibiade panʉita awururaba imitia bedʼeabʉrʉde bʉa ĩjãbʉ ʉ̃rʉ. Kĩrãbera bʉa urumʉ̃rʉãbʉta ũdubira kʼarebaita wuabemaraʉ̃me bedʼeaka ẽ baita akʉza bʉ urumʉ̃rʉãbʉ ũdubibʉba, kʼarebayi yi ẽbẽrarã dayirã ʉ̃rʉ aña krĩchabʉba akʉza Daizeze Bedʼea ʉ̃rʉ aña krĩchabʉba awuara krĩchamarẽã. Bia kʼawuara sãwũã panʉita awururaba bʉa nekʼãrẽ widi nãã, mamina maraba maʉ̃ obʉrʉdera «oidʉa ibiade akʉza wawiade» (1 Ped. 3:15). Mawũã, ewari jõmaʉ̃nẽ urumʉ̃rʉãbʉta ũdubira. w23.09 19 parr. 18, 19

Nekimare akʉdadrʉ sãwũã jʉ̃ã kʼawuabʉta ũdubidaita. Yi nããrabemata, ẽbẽra jʉ̃ã kʼawuabʉra mesera kĩrʉ ẽ. Ẽbẽra jʉ̃ã kʼawuabʉbara iyita kĩrʉbisidabʉrʉ, mesera kĩrʉ ẽ akʉza iyita bia edada ẽ basibʉrʉ, iyara krĩcha ẽ abarika oita. Akʉza krĩcha zroma onʉmʉnera wuabemarãra kĩrʉ bedʼea ẽ (Éx. 34:6). Ũme, ẽbẽra jʉ̃ã kʼawuabʉbara jʉ̃ãbʉ aduʼa. Iya mejãcha jʉ̃ãibarabʉrʉ zarea obʉ kĩrʉ ẽ baita (Mat. 18:​26, 27). Ũbea, ẽbẽra jʉ̃ã kʼawuabʉbara nãã bia krĩchabʉ nekʼãrẽ oi nãã. Ẽbẽra jʉ̃ã kʼawuabʉbara iya nekʼãrẽ oibʉra ñabasea jõbi kʼarea mesera oẽ, mia ñabasea ojʉ̃drʉ ẽ. awuarabʉrʉ ewari jʉrʉbʉ iya bia krĩcha kʼãrãpe tẽã bia oita. Kimare, ẽbẽra jʉ̃ã kʼawuabʉra wuabemara kĩrʉ bedʼea ẽ iyi sãwũã berabarinʉmʉ kʼarea, mia bedʼea zroma erbʉde.Yi ẽbẽra jʉ̃ã kʼawuabʉbara iyara sobiade awuanta kʼawuayi (Col. 1:11). Kristianorabara naʉ̃ra kimarera jʉ̃ã kʼawuabʉta ũdubibara. w23.08 20, 21 parr. 3-6

Dayirã sora bia akʉdaibara Jeowaba akʉbʉ baera dayi sota. Naʉ̃ba jarakĩrãbʉ Jeowabara akʉ ẽãta wuabema ẽbẽraba akʉbʉ kĩrãkʼa, mawũã dayi sota bia akʉbʉ baera kʼawuabʉ kʼaita dayirã. Jeowabara mejãcha kãgayi dayirãra iyi buru biata jʉrʉpanʉbʉrʉ (Juan 4:14). Mawũã opanʉbʉrʉ ewari neẽbayi Diaruba naʉ̃ drʉade nekayirua omarẽãbʉta oẽ baita (1 Juan 5:​18, 19). Dayirãba jʉrʉpanʉbʉrʉ ewariza audre Jeowa kʼawa bʼaita, audre kãga wãnañi akʉza audre wawia ũdubidayi iyaʼa. Jeowata sopʉabiamapanʉ baera jipa krĩchada ẽ bayi nemitia oita. Mebẽã Marta Croaciadebemaba jarabʉ iyara bera nekayirua osita, iya bʉsi: «Mʉ̃itara jipa zareabasi bia krĩchaita akʉza mawũã nemitia oita krĩchabʉ idubʉita, mamina Jeowa wawia ũdubibʉba kʼarebasi». ¿Jeowa wawia ũdubibʉbara sãwũã kʼarebasi? Martabara jarasi iyara bia krĩchabasita iya nemitia ora kʼãrẽ bedʼea zroma ũduita. Dayirãbida abarika oseabʉ. w23.06 20, 21 parr. 3, 4

Jesubara kʼawuabasi Jeowabara iyi trʉ̃ra neneẽã babikĩrãbʉta, maʉ̃ kʼarea Jesuba iyi kʼaidubemara kʼãwũã yiwidʼimarẽã jarasi: «Zeze ʉ̃tʉbema, bʉ trʉ̃ra neneẽã baide bʉa» (Mat. 6:9). Jesubara kʼawuabasi nekʼãrẽ naʉ̃ drʉadebʉbara maʉ̃ta oibarabasita. Jesubara nekʼãrẽ mejãcha osi yi Zeze trʉ̃ ʉ̃rʉ ibia bedʼeabita wuabemaraneira. Jesu iyi nejʉraraba jidasidadera jarasida Jesubara wawia ũdubi ẽãta Daizezeʼa. Jesura mejãcha krĩcha zroma obasi, iyi juezma edebʉdade jaradai kʼarea iyara wãrĩnu wawia ũdubi ẽãta Daizeze ʉ̃rʉ. Jesura maʉ̃ kʼarea krĩcha zroma obasibaibara iyi jidadai nããra (Luc. 22:​41-44). w24.02 11 parr. 11

Dayirãbara audre kãgaibara Jeowata akʉza Jesuta dayirã mebẽrãira (Mat. 10:37). Maʉ̃ba jarakĩrãbʉ ẽ bʉra Jeowaita trajai baera akʉ ẽ baibarata bʉ mebẽrãra, awuarabʉrʉ Jeowaba dayirãta bia akʉmarẽãra biʼia akʉibara dayirã mebẽrãsida (1 Tim. 5:​4, 8). Juwa jidapanʉrabara ãyirai wawia ũdubidaibara. Yibarirabara ãyi wũãwũãra jaradiaibara akʉza wũãwũãrabara ũrĩbara yibarira bedʼeata, ãya naʉ̃ta opanʉbʉrʉ sobiapanañi. Jeowabara parãsi mebẽrãra sobiapanamarẽã (Efes. 5:33; 6:​1, 4). Bʉta kima barabʉbʉrʉ, yibaribʉrʉ, mawũã ẽ bʉrʉ wũãwũãbʉrʉ, ũrĩda Daizeze Bedʼeaba jarabʉta. Bʉma biabʉ kĩrãkʼabʉta orãra, bʉ kulturaba jarabʉta orãra akʉza naʉ̃ ʉ̃rʉ biʼia kʼawuabʉ apanʉraba jarabʉta orãra. Zokʼara dayirã kartara Daizeze Bedʼeadebemata, naʉ̃rabara erbʉ baera ũrãgʼa bia dayirã kʼarebaseabʉta. w23.08 28 parr. 6, 7

Kristiana biabara nesida nekʼãrẽ okʼawua bʼaita, bʉ warraraenaʉ̃ba nekʼãrẽ okʼawuabʉba, kʼarebabʉ bʉ yi zroma bʼai bia bʼaita. Bari jaraita le kʼawuara akʉza bʉ kʼawuara. Ʉ̃kʉrʉ kulturaba krĩchabʉ nesida ẽãta yuwẽrãrabara le kʼawuamarẽã akʉza bʉ kʼawuamarẽã, mamina maʉ̃ kʼawuaira jipade yibia kristianora jõmaʉ̃ita (1 Tim. 4:13). Maʉ̃ba bʉita zaremina zarea ora kʼawuaita. ¿Kʼãrẽ nebiata ũduseapanʉ? Kʼarebaseabʉ trajo bia ũduita, Daizeze Bedʼea ʉ̃rʉ audre kʼawuaita, audre biʼia jaradiaita akʉza audre Jeowa kʼawabayi iyi Bedʼeata akʉbʉ baera akʉza maʉ̃ ʉ̃rʉ krĩchabʉ baera (1 Tim. 4:15). w23.12 20 parr. 10, 11

Jeowa kʼarebata widira nemitia obi ẽ marẽã. Dayirã jõmaʉ̃ta nekayirua omia baera yõibara dayi krĩcha mitiaʉ̃me nekayirua oẽ baita. Diarubara nekʼãrẽ baduta obʉ dayirã maʉ̃ krĩcha mitia zebʉa edebimarẽã. Maʉ̃ranebemara kãgabʉ omarẽã jemene Jeowaba kãga ẽãta, maʉ̃ra jemene kayiruaba dayi sota ãrĩseabʉ akʉza dayi krĩchata, maʉ̃ba nemitiata obiseabʉ (Mar. 7:​21-23; Sant. 1:​14, 15). Dayirãba nekayiruata oamapanʉbʉrʉ nesidapanʉ Jeowa kʼarebata. Jesuba naʉ̃ta widimarẽã jarasi, iya jaraside: «Eda baebirara kayiruade baebibari krĩchade, awuarabʉrʉ ẽdrʉbira Diaru juwadeba» (Mat. 6:13). Jeowabara dayirãra kʼarebakĩrãbʉ, mamina dayirãba widibara iyaʼa kʼarebata. Dayirãba Jeowaʼa yiwidʼida kĩrãkʼa oibara. w23.05 6, 7 parr. 15-17

Yumakẽrãba yuwẽrãʉ̃meba Jeowa mejãcha kãgabʉ ũdubibʉde, aripe opanʉ Jeowaba zokʼabʉta, maʉ̃ba kʼarebayi ãyi bedʼea zroma ũdubʉrʉde ara oita, bedʼeaka ẽ baita akʉza ãyi kima kãga ũdubibʉ jõ ẽ baita. Yi ẽbẽra Jeowa nãã bʉebʉra, zarea obʉ Jeowade kĩrãkʼa oita, ne diakĩrã dia bʼaita, jʉ̃ã bʼaita akʉza kĩrãdua kʼawuaita iyi ʉ̃rʉ nemitia obʉdade (Efes. 4:32–5:1). Juwa jidapanʉraba naʉ̃ nebiata oũdubipanʉbʉrʉ audre yiya kãga wãnañi. Mebẽã wẽrã yi trʉ̃ Lena yi juwa jidadata 25 poaga audre ba, iya jarabʉ: «Ẽbẽra Jeowade nããra bʉebʉbara iyaʼa wawia ũdubita akʉza kãgaira zare ẽ». Krĩchadaya Daizeze Bedʼeaba yiza jaradiabʉ ʉ̃rʉ, Jeowaba yi warra Jesuita kʼaita yibarira bʼaita jidasidera, Davidʼdeba zedarãra ẽbẽrarã mejãchaʉta juwa jidapanasimina, iyara biʼia krĩcha kʼãrãpe jidasi Joséta Maríaʉ̃me. ¿Kʼãrẽa jidasi? Naʉ̃rãra Jeowa neũdukʼawua biabasi baera akʉza Jeowaba kʼawuabasi ewari jõmaʉ̃nẽ iya zokʼabʉta obʼaita, mawũã ãyi juwa jidapanʉne bia wãmarẽã. w23.05 20, 21 par. 3, 4

Jesura dayirã nãã edebari, iyira kayirua oka. Mamina iya jʉrʉsi ẽbẽrarã nama udabemata, ãyira nekayirua omia. Edaʉde naʉ̃raba jarabʉ ũrĩra zarea baseabʉ, audre ãya dayirã omarẽã jarara nekʼãrẽ dayirãba okĩrã ẽãta. Ewari aba angelba Pedroʼa jarasi nei omarẽã, iya maʉ̃ra abedaedara okĩrã ẽ basi. Naʉ̃ angelba jarasi komarẽã chichi Moisés leyde kobe ẽã abʉta. Iyara maʉ̃ra ũbeabayeda jarasi ko ẽ baita (Hech. 10:​9-16). ¿Kʼãrẽa mawũã ũrĩamabasi iyara? Iyimara maʉ̃ angelba jaradara biga ba ẽ basi baera. Tẽã Zõrãrã Jerusalénʼnebemaba Pabloʼa jarasida iyita akʉza yumakẽrãra kimareta wãmarẽã temploeda, mawũã nekʼãrẽ oita ãyi neneẽã baita leyba jarabada kĩrãkʼa. Mawũã ũdubita iyara ũrĩbʉta maʉ̃ leyba jarabʉta. Pablobara ũrĩsi iya nekʼãrẽ omarẽã jaradapeadara, iyara kʼawuabasi kristianora maʉ̃ ewadebemarabara ũrĩbara ẽ basita maʉ̃ leyba jarabʉra, mawũãsidu iyara ũrĩsi akʉza nrʉema maʉ̃ra kimareta edesi Daizeze kĩrãbita neneẽã baidebema ojʉ̃drʉita (Hech. 21:​23, 24, 26). Pabloba iyaʼa nekʼãrẽ omarẽã jaradapeadata ũrĩsi baera, naʉ̃ba kʼarebasi mebẽrã kongregasionebema ãbapanaita (Rom. 14:​19, 21). w23.10 10 parr. 15, 16

Bʉa krĩcha ẽ bayi dayi neũdukʼawua bia erbaira pera baibarata iyi kʼarea. Mamina Jeowa neũdukʼawua bʼaira iyaʼa wawiata ũdubibara Krĩcha ẽ kʼãrẽ poagaba bata Jeowa ode, ewari jõmaʉ̃nẽ Jeowa wawiata ũdubibara mamina, ¿kʼãrẽta jarakĩrãbʉ Jeowa wawia ũdubira? Dayirãba Jeowaʼa wãrĩnu wawiata ũdubibʉbʉrʉ kãgata ũdubidayi akʉza oẽ bayi iya kãga ẽãta akʉza iyideba jĩga babibʉta. Jesubara maʉ̃ wawiata ũdubibasi Jeowara (Heb. 5:7). Iyara maʉ̃ perabita ũdubi ẽ basi (Is. 11:​2, 3). Iya Jeowata mejãcha kãgabasi baera okĩrã ẽ basi Jeowaba jarabʉ awuarara (Juan 14:​21, 31). Maʉ̃ba Jesude kĩrãkʼa wawiata ũdubikĩrãpanʉ iyira kãga barabʉ baera, zarea barabʉ, aripe obʉ akʉza buru bia. Kʼawuapanʉ Jeowaba dayirãrakãgata, maʉ̃ba dayirãba nemitiata ora, iyira mejãcha sopʉaseabʉ, mawũã ẽ bʉrʉ sobia baseabʉ nebiata obʉbʉrʉ (Sal. 78:41; Prov. 27:11). w23.06 14 parr. 1, 2; 15 parr. 5

Nokʼo Uzíasba iya nekʼãrẽ obʉ audre bia owãside akʉza zarea erbasidera kĩrãduasi iya maʉ̃ra erbasita Jeowaba zarea diasi baera. ¿Kʼãrẽta kʼawuapanʉ? Bia opanʉ krĩchapanʉbʉrʉ dayirãba nebia erbʉra akʉza pribilegio erbʉra Jeowaba diasita, dayirãba krĩchai kaude nekʼãrẽ dayirãba obʉra bia obʉta, dayirãba jõma bia okʼawuabʉ baera, krĩchaibara maʉ̃ra mawũã opanʉta, Jeowaba kʼarebabʉ baera (1 Cor. 4:7). Kʼawuapanaibara dayirãra nemitia omiata, maʉ̃ kʼarea nesidapanʉta ũrãgʼata diadamarẽã. Mebẽã 60 poagabʉba naʉ̃ta jarasi: «Mʉ̃a kʼawuabʉrʉ aukʼara mʉ̃ ʉ̃rʉ krĩcha ẽ baibarata akʉza mesera kĩrʉ ẽ baibarata wuabemaraba mʉ̃a kʼãrẽ kayirua obʉ jarabʉdade. Zarea obʉ maʉ̃ kʼarea mejãcha krĩcha oẽ baita akʉza kʼẽrẽpa takeraita». Dayirãba Jeowaba jarabʉta ũrĩpanʉbʉrʉ akʉza eda krĩchabʉta ũdubipanʉbʉrʉ sobiapanañi (Prov. 22:4). w23.09 10 parr. 10, 11

Nããbema kristianorabara nesidabasi awuantaita. Ãyira bedʼea zroma erbasi ẽbẽra naʉ̃ drʉadebʉ kĩrãkʼa, maʉ̃ awuara bedʼea zroma erbasi ãyira kristianobasi baera. Ãyira pẽwãsida religion nokʼoraba, Romanebema nokʼoraba akʉza maʉ̃ awuara pẽwãsida yi mebẽrãbida (Mat. 10:21). Adewara zarea odaibarabasi apostataraba jaradiabʉ kʼarea kongregasion ãbabʉta ãrĩ ẽ marẽã (Hech. 20:​29, 30). Mawũãsidu ãyara awuantasida (Apoc. 2:3). ¿Sãwũã osida ãyara? Bia krĩchasida yiza ẽbẽrarã bedʼea zroma awuantada ʉ̃rʉ Escrituras Hebreasdebʉde, bari jaraita Job ʉ̃rʉ (Sant. 5:​10, 11). Akʉza Jeowa yiwidʼisida maʉ̃ bedʼea zroma awuantabimarẽã (Hech. 4:​29-31). Adewara biʼia krĩchasida ãya kʼãrẽ nebia ũdudaita awuantapanʉ kʼarea (Hech. 5:41). Dayirãbida bedʼea zromara awuantadayi Daizeze Bedʼeadeba akʉza dayirã kartaraneba yiza biabʉ ʉ̃rʉ le kʼãrãpe akʉza maʉ̃ ʉ̃rʉ bia krĩchapanʉbʉrʉ. w23.07 3 parr. 5, 6

Jeowaba Jesuʉ̃mebara krĩcha ẽ dayirãra zeri ẽãta, Pedrobara bia jida kʼawuabʉta ũdubibarabasi iya Jesu ũduka ada tẽãra. Iya jidaibarabasi Jesu kʼaidu kʼẽrẽpa bʼaita mawũã ẽ bʉrʉ Jesu kʼaidubʉta idubʉita. Jesubara Jeowaʼa widisi kʼarebamarẽã Pedro mapae ẽ baita akʉza iya Pedroʼa jara ũrĩbisi Jeowa iya kʼãrẽ wididata, maʉ̃neba ʉ̃ta Pedrora zarea erbasi mebẽrã so zarea diaita (Luc. 22:​31, 32). Pedrora aduʼa sentisibaibara Jesuba jarada kʼarea, abarika dayirãba nei jidaibaradebida Jeowaba kʼarebayi zõrãrãneba dayirã iyiare kʼẽrẽpa bamarẽã (Efes. 4:​8, 11). Jeowabara Pedroʼa akʉza yi wuabemara Jesu kʼaidubemarãra kʼarebasi ãya nekʼãrẽ nesidabʉde, abarika idi ewadebida Jeowabara dayirãta kʼarebaseabʉ dayirãba nekʼãrẽ nesidabʉde. w23.09 24, 25 parr. 14, 15

Jeowabara akʉbʉ dayirãba kʼãrẽ nebia obʉra wikakirumina, maʉ̃ra iyara jĩpa nebia zroma kĩrãkʼa akʉbʉ akʉza Jeowaba jẽda diayi. Bʉta naweda zõrãrãbasibʉrʉ, mawũã ẽ bʉrʉ zõrãrã kʼarebabaribasibʉrʉ Jeowabara kĩrãbebʉ bʉa naweda odara akʉza sãwũã kãgaba odata (1 Cor. 15:58). Jeowabara akʉbʉ bʉa wuabemara kãga ũdubibʉra. Jeowabara kãgabʉ bʉa iyita audre kãga wãnamarẽã akʉza wuabemarata. Dayirãbara audre wari wãbiseabʉ Jeowa kãga wãita iyi Bedʼea akʉpanʉne akʉza maʉ̃ ʉ̃rʉ krĩchapanʉne. Adewara iyaʼa badua yiwidʼipanʉne mawũã jaraita dayi sãwũã sentibʉta. Dayirã mebẽrãra kãga ũdubiseabʉ ãyi kʼarebabʉde akʉza maʉ̃ba audre Jeowa kʼawa babiseabʉ, adewara dayirã mebẽrãsida audre kãga wãseabʉ, mawũã ewari jõmaʉ̃nẽ ãyi neũdukʼawua bia baseabʉ. w23.07 10 parr. 11; 11 parr. 13; 13 parr. 18

Kristiano aba abakaʉba jidaibara ãyi bebʉ sãwũã bia akʉita. Daizeze Bedʼeaba jara ẽ mina kʼãrẽ tratamiento jidaibarata, jarabʉ wara zokʼa ẽ bʼaibarata akʉza jaidebemata oẽ baibarata (Hech. 15:20; Gál. 5:​19, 20). Maʉ̃ awuara ẽbẽra aba abakaʉba jidaseabʉ kʼãrẽ tratamiento oita.Dayirãba tratamiento jidabʉrʉdera jara ẽ baibara mebẽrã kʼãrẽ tratamiento jidaita, awuarabʉrʉ iduaribibara ãya jidamarẽã. Maʉ̃ oita maʉ̃ ʉ̃rʉ krĩchaibara: (aba) Daizeze Nokʼobʉrʉ jõbiyi kayara (Is. 33:24). (Ũme) kristiano aba abakaʉba biʼia krĩchaibara ãyita kʼãrẽta audre yibiata (Rom. 14:5). (Ũbea) imitia bedʼea ẽ dayirã mebẽrã ʉ̃rʉ ãya jidabʉ kʼarea akʉza baebidaita krĩchada ẽ (Rom. 14:13). (Kimare) kristianorabara kãgata ũdubibʉ maʉ̃ kʼarea ãyimabʉta oẽ, awuarabʉrʉ krĩchabʉ mebẽrã kongregasionebemarata (Rom. 14:​15, 19, 20). w23.07 24 parr. 15

¿Bʉara kãgaka Jeowara? Mawũã, ẽbẽrarã nããbemarasida, mawũã senti zebʉda bʉ kĩrãkʼa (Sal. 104:​33, 34). Mejãchaʉba idubʉsida ãya nebia erbadata, mawũã Jeowaba kãgabʉ oita, Israel dera nazareorabara mawũã opanasi. Naʉ̃ba biʼia ũdubibʉ israelitara kʼẽrẽpapanʉraba kʼãrẽaba zarea opanasita mawũã Jeowaba kãgabʉta biʼia oũdubita. Ley Moisésʼa diadaba iduaribibasi ʉ̃kʉrʉ yumakẽrãraba, mawũã ẽ bʉrʉ yuwẽrãraba jidadamarẽã nazareo bʼaita ãyi bebʉ Jeowaʼa diabʉde (Núm. 6:​1, 2). Israelita abaʉba iyi nazareo bʼaita jarabasidera, oibarabasi nekʼãrẽ iya omarẽã zokʼapanʉta, mamina yi wuabemara israelitarabara oẽ baibarasi maʉ̃ra. ¿Kʼãrẽa ʉ̃kʉrʉ israelitarabara jidasida nazareo bʼaita? Naʉ̃ israelita maʉ̃ mawũã obʉbara Jeowata mejãcha kãgabasi baera mawũã obasi akʉza biga diakĩrãbasi baera iya nebia erbʉ kʼarea (Deut. 6:5; 16:17). w24.02 14 parr. 1, 2

Daizeze Bedʼeaba jarabʉ kʼẽrẽpa bʼaira akʉza kãga jõkara Daizezeba ũdubibʉ iyi odepanʉra akʉza iyabaʉ naʉ̃ra bedʼearata zokʼapanʉ ũdubita Jeowa odepanʉrãra yiya kãgapanʉta (2 Sam. 9:​6, 7). Ewari berabari wãba dayirãra audre kʼẽrẽpa wãñi. Akʉdayi Danielʼra sãwũã audre kʼẽrẽpabasita. Danielbara ewari jõmaʉ̃nẽ ũdubisi iyira kʼẽrẽpabʉta, mamina iyara audre kʼẽrẽpabʉta ũdubibarabasi iyi 90 poagabaside. Ẽbẽrarã nokʼoraita trajapananarabara Danielʼra jʉradebasi akʉza wawia ũdubida ẽ basi Daizeze Jeowara, maʉ̃ kʼarea ãyara nekʼãrẽ osida Daniel beadaita. Ãya jarasida nokʼoʼa leyta diamarẽã wuabemara daizezera yiwidʼida ẽ marẽã 30 ewaribayeda. Mamina Danielbara oẽ basi maʉ̃ leyba jarabadara (Dan. 6:​12-15, 20-22). w23.08 5 parr. 10-12.

Jeowabara kãgabʉ dayirãba zarea omarẽã mebẽrã kãga ũdubita. Mebẽã abaʉba dayita bia eda ẽ bʉrʉ kristianoraba oibara kĩrãkʼa, krĩcha ẽ baibara kriña mawũã osita, awuarabʉrʉ kĩrãbeibara ãyabida Jeowaba kãgabʉde okĩrãbʉta (Prov. 12:18). Iyi ode kʼẽrẽpapanʉra nekayirua omiamina Jeowabara kãga. Akʉza ãya nekʼãrẽ aña obʉrʉdera, ãyiʉ̃me kĩrʉ ẽ akʉza ãyi neũdukʼawua babʉ (Sal. 103:9). Kʼãrẽ yibia Jeowade kĩrãkʼa kĩrãdua kʼawuaita mebẽrãba nekayirua obʉrʉde (Efes. 4:32–5:1). Kĩrãbedaibara naʉ̃ ewari jõbodota arakʼaitaba baera audre mebẽrã kʼaita bʼaibarata. Maʉ̃ ewaridera audre pẽwãnañi dayirãra akʉza karselde eda bʉeseapanʉ. Maʉ̃ mawũã berabaribʉrʉdera dayirãbara mebẽrãta nesidayi (Prov. 17:17). w23.11 10, 11 parr. 12, 13

Daizeze Bedʼeadebʉ nebʉra warrara kʼẽrẽpabada ʉ̃rʉ bedʼeabʉta, ãyira Jeowabara bia akʉsi akʉza bia wãsi ãyira. Maʉ̃rane edabasi Davidta. Iyara warrarainʉba jidasi Jeowaba zokʼabʉta oita akʉza tẽã iyira nokʼobasi akʉza kʼẽrẽpabasi (1 Rey. 3:6; 9:​4, 5; 14:8). Bʉa David ʉ̃rʉ estudiabʉrʉdera iyi yizaba kʼarebayi Jeowaba zokʼabʉta kʼẽrẽpa oita akʉza kʼawuaseabʉ Marcos, adewara Timoteo ʉ̃rʉ. Ãyara warrarainʉba jidasida Jeowaba zokʼabʉta oita akʉza kʼẽrẽpapanʉta ũdubisida ãyi beiyeda, ãya kʼãwũã oi jidadaba Jeowata sobiabisi. Bʉ bebʉ idi sãwũã zokʼabʉba ũdubibʉ bʉ sãwũã bʼaita ʉ̃ra zebʉrʉde. Bʉyikʉza ĩjãi kaude Jeowa ʉ̃rʉ ĩjãbʉbʉrʉ iya kʼarebayi bʉa nekʼãrẽ bia jida kʼawuaita. Kĩrãbera Jeowabara biʼia akʉbʉta bʉa iyi kʼarea kʼãrẽ obʉta, audre yibiabayi bʉ bebʉta zokʼara Jeowaba kãgabʉ oita. w23.09 13 parr. 18, 19

Pablobara kʼawuabasi mebẽrãra kayirua omiarata. Bari jaraita, mebẽrã Jerusalénʼnebemarabara iyi ũdusidadera ĩjãna ẽ basi iyira wãrĩnu Jesu kʼaidubemata (Hech. 9:26). Tẽã ʉ̃kʉrʉra iyi ʉ̃rʉ imitia bedʼeasida wuabemaraba ĩjãna ẽ marẽã Pablo ʉ̃rʉ (2 Cor. 10:10). Akʉza Pabloba ũdusi sãwũã zõrãrã abaʉba nekʼãrẽ aña jidada kʼarea, wuabemara mebẽrãsida baebiseabasita (Gál. 2:​11, 12). Adewara iyiʉ̃meba Daizeze Bedʼea jaradiabadaba, yi trʉ̃ Marcosba nekʼãrẽ osi Pablo kĩrʉbibʉta (Hech. 15:​37, 38). Pablora maʉ̃ kʼarea mebẽrãneba jĩga wãi kaude, iyara akʉsi mebẽrãba kʼãrẽ nebiata erbʉta akʉza Jeowa ode kʼẽrẽpabasi. ¿Kʼãrẽba kʼarebasi Pablo kʼẽrẽpa bʼaita? Pablobara mejãcha kãgabasi mebẽrãra. Naʉ̃ba kʼarebasi iya akʉ ẽ baita mebẽrãba kʼãrẽ aña obʉta, awuarabʉrʉ akʉita mebẽrãba kʼãrẽ nebia obʉta. Kãga ũdubibʉba kʼarebasi Pabloba oũdubita idibema testoba jarabʉta. w24.03 15 parr. 4, 5

Daizeze Bedʼeade nebʉrara mejãchabʉ dayirã ũdubibʉta kʼãrẽa yibiata urumʉ̃rʉãra bʼaita. Akʉdaya Isaac yizata, iyi Guerar pʉwʉrʉdebaside, pʉwʉrʉ iyi kʼawabemaba anasida pozo yi zezeba odata, mamina Isaacʼra ãyibawara yõi kaude wãsi awuru drʉaeda, mõbe awuru pozota korusi (Gén. 26:​12-18). Mamina tẽã, pilisteorãra iyi chuidʉ jʉ̃ẽsida jaraita maʉ̃ pozosida ãyideta, maʉ̃nebida Isaacʼra kĩrʉ ẽ basi, awuarabʉrʉ urumʉ̃rʉãbʉta ũdubisi (Gén. 26:​19-25). ¿Kʼãrẽba kʼarebasi Isaac urumʉ̃rʉã bamarẽã awururaba kĩrʉbikĩrãpanasimina? Iyara iyi yibariraneba kʼawuasibaibara, yi zeze Abrahánʼra urumʉ̃rʉãbasi akʉza yi papa Sarara aduʼabasi akʉza urumʉ̃rʉãbasi (1 Ped. 3:​4-6; Gén. 21:​22-34). w23.09 15 parr. 4

Jeowaba iya krĩchada ewaride zokʼa bʉesi iyi warra Jesuta ẽbẽrarã jaradiamarẽã Jeowa Nokʼo ʉ̃rʉ akʉza iyi bebʉta diamarẽã, tẽã Jesura Jeowaba jẽda piradrʉbisi iyi Nokʼota zokʼamarẽã. Daizeze Bedʼeara audre bedʼeabʉ Jeowa trʉ̃ sãwũã neneẽã bai ʉ̃rʉ, iya oita krĩchabʉ aripe berabaribibʉrʉde Daizeze Nokʼodeba. Jeowaba kʼãrẽ oita krĩchabʉra awuara krĩcha ẽ, iya jarasi maʉ̃ra jõma aripe berabaribita (Is. 46:​10, nota; Heb. 6:​17, 18). Wika wikade naʉ̃ drʉara ẽjũã kĩrãwãreãbayi akʉza yi Adán Evadeba zedarãra kayirua okabayi, adewara ãyira naʉ̃ drʉade ewari jõmaʉ̃nẽ sobiapanañi (Sal. 22:26). Mamina Jeowaba audre kãgabʉ angelerata akʉza ẽbẽrarãta ãbapanamarẽã yi mebẽrã kĩrãkʼa, maʉ̃ ewaridera jõmaʉ̃ba ũrĩnañi Jeowaba jarabʉta iya nejõma zokʼaseabʉ baera (Efes. 1:​8-11). ¿Bʉmara jipade yibia ẽka Jeowaba nekʼãrẽ obʉra mawũã aripe berabaribita iya oita krĩchabʉta? w23.10 20 parr. 7-8

Judiorabara Babilonianeba Jerusalénʼena jʉ̃ẽna audre ẽãne, bedʼea zromata ũdusida, ãyara kʼawua ẽ basi ãyi mebẽrã sãwũã diaita ãya nesidabʉta akʉza maʉ̃ ewadede nokʼo Persiadebemara bedʼea zroma erbasi, adewara ãyira pẽwãsida. Maʉ̃ ewaridera ãya Jeowa templora jẽda ara oibarabasi akʉza ãya maʉ̃trʉ nããra oita krĩchadamarẽãra Jeowaba zokʼa bʉesi Ageota akʉza Zacaríasta, naʉ̃ra judiora so zarea diamarẽã. Naʉ̃ra yumakẽrãraba mawũã so zarea diadara jipade yibiabasi judioraitara (Ageo 1:1; Zac. 1:1). Mawũãsidu maʉ̃ tẽã 50 poaga babodoare, naʉ̃ra judiorabara akʉza nesidasida ãyaʼa so zarea diadamarẽã. Esdras Daizeze ley kopia obarira, wãsi Jerusalénʼena judiora so zarea diaita, mawũã ãya nãã bʉemarẽã Daizeze deta (Esd. 7:​1, 6). Zacaríasba akʉza Ageoba propesia jaradabara mejãcha kʼarebasi judioraba Jeowa ʉ̃rʉ ĩjãmarẽã ãya bedʼea zroma ũdubʉrʉde, abarika naʉ̃ra propesiaba idi ewade kʼarebabʉ dayirãba bedʼea zroma ũdubʉrʉde Jeowa ʉ̃rʉ ĩjãmarẽã (Prov. 22:19). w23.11 14 parr. 2, 3

¿Sãwũã dayirãi yiya kãgapanʉta ũdubiseapanʉ? Dayirãba kãgata ũdubipanʉ mebẽrã so zarea diabʉde akʉza ãyaʼa audre so zarea diaseapanʉ ãyita so borekea akʉpanʉbʉrʉ (1 Tes. 4:18). ¿Kʼãrẽta oseapanʉ dayirãi yiya kãgabʉta zarea erpanaita? Maʉ̃itara zarea odaibara mebẽrãba kayirua obʉta kĩrãduaita.¿Kʼãrẽa yibia dayirãi yiya kãgabʉ ũdubita? Pedroba jara ũrĩbisi kʼãrẽa, iya jarabʉ: «Mamina nekʼãrẽ jõma jõita arakʼaitaba. Maʉ̃ kʼarea [ . . . ] mayirai mejãcha yi kãgapanaidua» (1 Ped. 4:​7, 8). Naʉ̃ ewari jõi audre arakʼaita babʉrʉdera, ¿kʼãrẽta berabari? Jesuba naʉ̃ta jarasi: «Adewara pʉwʉrʉ jõmaʉ̃nẽbemaba marara jʉradaya mʉ̃ kʼarea» (Mat. 24:9). Ãya mawũã jʉrabʉ awuantaira, dayirãra mebẽrãʉ̃me ãbapanaibara, mawũã opanʉbʉrʉ Diarubara ãyideba jĩga babi ẽ bayi, dayirãra yiya kãga ũdubipanʉ baera (Filip. 2:​1, 2). w23.11 13 parr. 18, 19

Wãrĩnu Daizeze Bedʼearadebemara jipade yibia. Dayirãba Jeowa ʉ̃rʉ jaradiabʉrʉde iyi wãrĩnu sãwũãchu ʉ̃rʉ, maʉ̃ra jipa yibia. Ẽbẽrarãba Daizeze ʉ̃rʉ nãã aña krĩchabadara wua mawũã krĩcha ẽ bayi, awuarabʉrʉ biʼia kʼawuayi wãrĩnu Daizeze sãwũãbʉ ʉ̃rʉ, iya kʼãrẽ nebia erbʉ ʉ̃rʉ, ãyira kĩrãmigadayi Daizezeba zarea mejãcha erbʉ kʼarea (Is. 40:26). Ĩjãnañi iya jõma aripe obʉta (Deut. 32:4). Nemejãcha kʼawuadai baera Daizeze krĩcha biadeba (Is. 55:9; Rom. 11:33). Aduʼa sentiyi kʼawuai baera Daizezera kãga yibarita (1 Juan 4:8). Jeowa ʉ̃rʉ audre ũdukʼawua wãne, ãyitara ewari jõmaʉ̃nẽ bʼaira jipade wãrĩnuara babʉ. Kʼãrẽ kĩrãkʼa yibia dayirãitara kʼarebaita ẽbẽrarã audre Jeowa kʼawa bamarẽã, mawũã opanʉbʉrʉ dayirãsida Jeowaʉ̃me ãba trajabʉ kĩrãkʼabayi (1 Cor. 3:5). w24.02 12 parr. 15

Bʉa Daizeze ʉ̃rʉ kʼawuanʉmʉbʉrʉ, mawũã ẽ bʉrʉ bʉ yibarirata Jeowa ʉ̃rʉ Kʼawuabipanʉrãbʉrʉ bʉara, ¿krĩchabarika buru kʼoeita? Maʉ̃ ʉ̃rʉ krĩchaira yibia, mamina bʉ buru kʼoei nããra bʉ bebʉta nãã diaibara Jeowaʼa. ¿Kʼãrẽta jarakĩrãbʉ dayirãba dayi bebʉ Jeowaʼa diaira? Jarakĩrãbʉ Daizezeʼa yiwidʼita maʉ̃ne jaraita dayi bebʉra ewari jõmaʉ̃nẽ iya kãgabʉde erbaita akʉza Jeowaba kãgabʉtrʉ nããra oita. Naʉ̃ba jarakĩrãbʉ dayirãba kãgaita Daizezera dayi so jõmainʉba, dayi krĩcha jõmainʉba, kakua jõmainʉba akʉza dayi zarea jõmainʉba (Mar. 12:30). Bʉ bebʉ Jeowaʼa diaira, maʉ̃ra miõba kʼawuabe ẽ, maʉ̃ra kʼawuabʉ Jeowaba akʉza bʉa. Mamina bʉ buru kʼoebʉrʉdera ẽbẽra jõmaʉ̃ba ũdupanʉ, maʉ̃ba ũdubibʉ bʉ bebʉra Jeowa diasita. Bʉ bebʉ Jeowaʼa diaira jipade yibia akʉza Jeowaba kãgabʉ bʉa jarada kĩrãkʼa omarẽã (Ecl. 5:4). w24.03 2 parr. 2; 3 parr. 5

Juwa jidapanʉra jõmaʉ̃ba bedʼea zroma ũduyi, maʉ̃ta jarabʉ Daizeze Bedʼeaba (1 Cor. 7:28). ¿Kʼãrẽa? Ãyi ũmena kayirua omiara baera, nekʼãrẽ awuara opanʉ baera, nekʼãrẽ awuruta kãga baera akʉza awuarapanʉ baera, adewara kultura awuarabʉ baera. Maʉ̃ba ãyi juwa jida tẽãbʉrʉ ũduseabʉ ãyi kima wãrĩnu sãwũãbʉta ãyi juwa jidai nãã ũdu ẽ badata. Maʉ̃ kʼarea bedʼea zromata ũduseapanʉ akʉza ãya nekʼãrẽ aña obʉta akʉ ẽã jaraseapanʉ ãyi kimabʉrʉ nekʼãrẽ aña obʉta. Maʉ̃ba ãya bedʼea zroma erbʉ kʼarea krĩchaseapanʉ audre yibiata yi idubʉita. Mamina, ¿maʉ̃ oira yibiaka? Mawũã ẽ, Jeowabara kãgabʉ juwa jidapanʉrãra ãba panamarẽã, ãyi kimaʉ̃me ãba bʼai zaremina. w24.03 16 parr. 8; 17 parr. 11.

Bʉ buru kʼoeda tẽãbida, bʉara Jeowara audre ũdu kʼawua zesi akʉza audre kãga zesi, adewara audre ĩjãsi bʉa nebia jʉ̃ãbʉra wãrĩnu berabarita (Heb. 5:13–6:1). Edaʉde bʉra berabaribaribaibara Romanos 5:​2-4ba jarabʉ kĩrãkʼa, bʉa bedʼea zroma bio ũdusibaibara, mamina bʉa awuantasi baera ũdusibaibara Jeowaba bʉ sãwũã bia akʉsita. Bʉa kʼawuabʉ baera Jeowaba bʉ kãgata akʉza bʉa awuantabʉ kʼarea sobiabʉta, naʉ̃ba kʼarebabʉ audre ĩjãita bʉa nebia jʉ̃ãbʉra aripe berabarita. Akʉza naʉ̃ba awuara babibʉ bʉ bʉ mebẽrãʉ̃me sãwũãbʉta. Adewara bʉa nei jidaidebida audre bia obibʉ. Apostol Pabloba nebiata jara ũrĩbibʉ, iya jara ũrĩbibʉ Jeowata sobiabibʉbʉrʉ kʼawuabʉta iya nebia jʉ̃ãbʉra aripe berabarita (Rom. 15:13). w23.12 12, 13 parr. 16-19

Dayirãba bedʼea zroma ũdubʉrʉdera, nãã sãwũã sentibada kĩrãkʼa mawũã ẽ bʉrʉ, nãã krĩchabada kĩrãkʼa ba ẽ bayi akʉza edaʉde sobia sentiseapanʉ, mamina atiaʉde sopʉa totoseabʉ. ¿Dayirã aukʼara sopʉa sentibʉrʉdera sãwũã kʼarebabʉ Jeowabara? Jeowaba jarabʉ kʼarebaita dayirã zareapanaita. Nãgʉ zroma zebʉrʉdera jãba zromara bʉrʉwa bʉrʉwanʉma kʼawa, maʉ̃ kʼarea jãba zromarabara nei erbʉ, mawũã bʉrʉwa bʉrʉwa ẽ baita, mamina maʉ̃ nekʼãrẽbara audre kʼarebaseabʉ yi jãbata abibʉrʉ. Abarika maʉ̃ kĩrãkʼa dayirãba bedʼea zroma ũdubʉrʉdera Jeowaba kʼarebayi zarea bʼaita, mamina audre kʼarebayi dayirãba nekʼãrẽ opanʉbʉrʉ iyi kʼawa bʼaita. w24.01 22 parr. 7, 8

Bʉ pera sentibʉrʉdera bʉyikʉza widira: «¿Kʼãrẽta ozebʉrʉ Jeowabara mʉ̃ bari?». Bari jaraita, krĩchara Jeowaba sãwũã biʼia akʉbʉta ibanarata, adewara neponorata, naʉ̃rãra iya iyi kĩrãkʼa parã ẽ basimina akʉza iyaʼa yiwidʼida ẽ mina. Jeowaba naʉ̃rata kʼãwũã biʼia akʉbʉrʉ dayirãra audre biʼia akʉyi. Naʉ̃ ʉ̃rʉ krĩchaiba kʼarebayi dayirãba ĩjãbʉra audre zarea erbaita (Mat. 6:​25-32). Adewara krĩchaseabʉ Jeowaba iyi odepanʉra sãwũã kʼareba zebʉrʉ ʉ̃rʉ, maʉ̃ ʉ̃rʉ leseabʉ Daizeze Bedʼeade, mawũã ẽ bʉrʉ nebʉra idi ewadebemane. Adewara krĩchara Jeowaba bʉ sãwũã kʼareba zebʉrʉta, iya sãwũã kʼarebasita bʉa iyita ũdukʼawuamarẽã (Juan 6:44). ¿Jeowabara sãwũã panʉ zebʉrʉ bʉa iyaʼa widibʉra? (1 Juan 5:14). Adewara krĩchara Jesu bʉ kʼarea beidaba sãwũã kʼarebabʉta (Efes. 1:7; Heb. 4:​14-16). w24.01 4 parr. 6; 7, 17